𑁫. 𑀲𑀭𑀪𑀗𑁆𑀕𑀢𑁆𑀣𑁂𑀭𑀕𑀸𑀣𑀸

𑁪𑁮𑁭. ‘‘𑀲𑀭𑁂 𑀳𑀢𑁆𑀣𑁂𑀳𑀺 𑀪𑀜𑁆𑀚𑀺𑀢𑁆𑀯𑀸, 𑀓𑀢𑁆𑀯𑀸𑀦 𑀓𑀼𑀝𑀺𑀫𑀘𑁆𑀙𑀺𑀲𑀁;

𑀢𑁂𑀦 𑀫𑁂 𑀲𑀭𑀪𑀗𑁆𑀕𑁄𑀢𑀺, 𑀦𑀸𑀫𑀁 𑀲𑀫𑁆𑀫𑀼𑀢𑀺𑀬𑀸 𑀅𑀳𑀼.

𑁪𑁮𑁮. ‘‘𑀦 𑀫𑀬𑁆𑀳𑀁 𑀓𑀧𑁆𑀧𑀢𑁂 𑀅𑀚𑁆𑀚, 𑀲𑀭𑁂 𑀳𑀢𑁆𑀣𑁂𑀳𑀺 𑀪𑀜𑁆𑀚𑀺𑀢𑀼𑀁;

𑀲𑀺𑀓𑁆𑀔𑀸𑀧𑀤𑀸 𑀦𑁄 𑀧𑀜𑁆𑀜𑀢𑁆𑀢𑀸, 𑀕𑁄𑀢𑀫𑁂𑀦 𑀬𑀲𑀲𑁆𑀲𑀺𑀦𑀸.

𑁪𑁮𑁯. ‘‘𑀲𑀓𑀮𑀁 𑀲𑀫𑀢𑁆𑀢𑀁 𑀭𑁄𑀕𑀁, 𑀲𑀭𑀪𑀗𑁆𑀕𑁄 𑀦𑀸𑀤𑁆𑀤𑀲𑀁 𑀧𑀼𑀩𑁆𑀩𑁂;

𑀲𑁄𑀬𑀁 𑀭𑁄𑀕𑁄 𑀤𑀺𑀝𑁆𑀞𑁄, 𑀯𑀘𑀦𑀓𑀭𑁂𑀦𑀸𑀢𑀺𑀤𑁂𑀯𑀲𑁆𑀲.

𑁪𑁯𑁦. ‘‘𑀬𑁂𑀦𑁂𑀯 𑀫𑀕𑁆𑀕𑁂𑀦 𑀕𑀢𑁄 𑀯𑀺𑀧𑀲𑁆𑀲𑀻, 𑀬𑁂𑀦𑁂𑀯 𑀫𑀕𑁆𑀕𑁂𑀦 𑀲𑀺𑀔𑀻 𑀘 𑀯𑁂𑀲𑁆𑀲𑀪𑀽;

𑀓𑀓𑀼𑀲𑀦𑁆𑀥𑀓𑁄𑀡𑀸𑀕𑀫𑀦𑁄 𑀘 𑀓𑀲𑁆𑀲𑀧𑁄, 𑀢𑁂𑀦𑀜𑁆𑀚𑀲𑁂𑀦 𑀅𑀕𑀫𑀸𑀲𑀺 𑀕𑁄𑀢𑀫𑁄.

𑁪𑁯𑁧. ‘‘𑀯𑀻𑀢𑀢𑀡𑁆𑀳𑀸 𑀅𑀦𑀸𑀤𑀸𑀦𑀸, 𑀲𑀢𑁆𑀢 𑀩𑀼𑀤𑁆𑀥𑀸 𑀔𑀬𑁄𑀕𑀥𑀸;

𑀬𑁂𑀳𑀸𑀬𑀁 𑀤𑁂𑀲𑀺𑀢𑁄 𑀥𑀫𑁆𑀫𑁄, 𑀥𑀫𑁆𑀫𑀪𑀽𑀢𑁂𑀳𑀺 𑀢𑀸𑀤𑀺𑀪𑀺.

𑁪𑁯𑁨. ‘‘𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺, 𑀅𑀦𑀼𑀓𑀫𑁆𑀧𑀸𑀬 𑀧𑀸𑀡𑀺𑀦𑀁;

𑀤𑀼𑀓𑁆𑀔𑀁 𑀲𑀫𑀼𑀤𑀬𑁄 𑀫𑀕𑁆𑀕𑁄, 𑀦𑀺𑀭𑁄𑀥𑁄 𑀤𑀼𑀓𑁆𑀔𑀲𑀗𑁆𑀔𑀬𑁄.

𑁪𑁯𑁩. ‘‘𑀬𑀲𑁆𑀫𑀺𑀁 𑀦𑀺𑀯𑀢𑁆𑀢𑀢𑁂 [𑀬𑀲𑁆𑀫𑀺𑀁 𑀦 𑀦𑀺𑀩𑁆𑀩𑀢𑁆𑀢𑀢𑁂 (𑀓.)] 𑀤𑀼𑀓𑁆𑀔𑀁, 𑀲𑀁𑀲𑀸𑀭𑀲𑁆𑀫𑀺𑀁 𑀅𑀦𑀦𑁆𑀢𑀓𑀁;

𑀪𑁂𑀤𑀸 𑀇𑀫𑀲𑁆𑀲 𑀓𑀸𑀬𑀲𑁆𑀲, 𑀚𑀻𑀯𑀺𑀢𑀲𑁆𑀲 𑀘 𑀲𑀗𑁆𑀔𑀬𑀸;

𑀅𑀜𑁆𑀜𑁄 𑀧𑀼𑀦𑀩𑁆𑀪𑀯𑁄 𑀦𑀢𑁆𑀣𑀺, 𑀲𑀼𑀯𑀺𑀫𑀼𑀢𑁆𑀢𑁄𑀫𑁆𑀳𑀺 𑀲𑀩𑁆𑀩𑀥𑀻’’𑀢𑀺.

… 𑀲𑀭𑀪𑀗𑁆𑀕𑁄 𑀣𑁂𑀭𑁄….

𑀲𑀢𑁆𑀢𑀓𑀦𑀺𑀧𑀸𑀢𑁄 𑀦𑀺𑀝𑁆𑀞𑀺𑀢𑁄.