𑁮. 𑀅𑀝𑁆𑀞𑀓𑀦𑀺𑀧𑀸𑀢𑁄

𑁧. 𑀫𑀳𑀸𑀓𑀘𑁆𑀘𑀸𑀬𑀦𑀢𑁆𑀣𑁂𑀭𑀕𑀸𑀣𑀸

𑁪𑁯𑁪. ‘‘𑀓𑀫𑁆𑀫𑀁 𑀩𑀳𑀼𑀓𑀁 𑀦 𑀓𑀸𑀭𑀬𑁂, 𑀧𑀭𑀺𑀯𑀚𑁆𑀚𑁂𑀬𑁆𑀬 𑀚𑀦𑀁 𑀦 𑀉𑀬𑁆𑀬𑀫𑁂;

𑀲𑁄 𑀉𑀲𑁆𑀲𑀼𑀓𑁆𑀓𑁄 𑀭𑀲𑀸𑀦𑀼𑀕𑀺𑀤𑁆𑀥𑁄, 𑀅𑀢𑁆𑀣𑀁 𑀭𑀺𑀜𑁆𑀘𑀢𑀺 𑀬𑁄 𑀲𑀼𑀔𑀸𑀥𑀺𑀯𑀸𑀳𑁄.

𑁪𑁯𑁫. ‘‘𑀧𑀗𑁆𑀓𑁄𑀢𑀺 𑀳𑀺 𑀦𑀁 𑀅𑀯𑁂𑀤𑀬𑀼𑀁, 𑀬𑀸𑀬𑀁 𑀯𑀦𑁆𑀤𑀦𑀧𑀽𑀚𑀦𑀸 𑀓𑀼𑀮𑁂𑀲𑀼;

𑀲𑀼𑀔𑀼𑀫𑀁 𑀲𑀮𑁆𑀮𑀁 𑀤𑀼𑀭𑀼𑀩𑁆𑀩𑀳𑀁, 𑀲𑀓𑁆𑀓𑀸𑀭𑁄 𑀓𑀸𑀧𑀼𑀭𑀺𑀲𑁂𑀦 𑀤𑀼𑀚𑁆𑀚𑀳𑁄.

𑁪𑁯𑁬. ‘‘𑀦 𑀧𑀭𑀲𑁆𑀲𑀼𑀧𑀦𑀺𑀥𑀸𑀬, 𑀓𑀫𑁆𑀫𑀁 𑀫𑀘𑁆𑀘𑀲𑁆𑀲 𑀧𑀸𑀧𑀓𑀁;

𑀅𑀢𑁆𑀢𑀦𑀸 𑀢𑀁 𑀦 𑀲𑁂𑀯𑁂𑀬𑁆𑀬, 𑀓𑀫𑁆𑀫𑀩𑀦𑁆𑀥𑀽𑀳𑀺 𑀫𑀸𑀢𑀺𑀬𑀸.

𑁪𑁯𑁭. ‘‘𑀦 𑀧𑀭𑁂 𑀯𑀘𑀦𑀸 𑀘𑁄𑀭𑁄, 𑀦 𑀧𑀭𑁂 𑀯𑀘𑀦𑀸 𑀫𑀼𑀦𑀺;

𑀅𑀢𑁆𑀢𑀸 𑀘 𑀦𑀁 𑀬𑀣𑀸𑀯𑁂𑀤𑀺 [𑀬𑀣𑀸 𑀯𑁂𑀢𑁆𑀢𑀺 (𑀲𑀻.)], 𑀤𑁂𑀯𑀸𑀧𑀺 𑀦𑀁 𑀢𑀣𑀸 𑀯𑀺𑀤𑀽.

𑁪𑁯𑁮. ‘‘𑀧𑀭𑁂 𑀘 𑀦 𑀯𑀺𑀚𑀸𑀦𑀦𑁆𑀢𑀺, 𑀫𑀬𑀫𑁂𑀢𑁆𑀣 𑀬𑀫𑀸𑀫𑀲𑁂;

𑀬𑁂 𑀘 𑀢𑀢𑁆𑀣 𑀯𑀺𑀚𑀸𑀦𑀦𑁆𑀢𑀺, 𑀢𑀢𑁄 𑀲𑀫𑁆𑀫𑀦𑁆𑀢𑀺 𑀫𑁂𑀥𑀕𑀸.

𑁪𑁯𑁯. ‘‘𑀚𑀻𑀯𑀢𑁂 𑀯𑀸𑀧𑀺 𑀲𑀧𑁆𑀧𑀜𑁆𑀜𑁄, 𑀅𑀧𑀺 𑀯𑀺𑀢𑁆𑀢𑀧𑀭𑀺𑀓𑁆𑀔𑀬𑁄;

𑀧𑀜𑁆𑀜𑀸𑀬 𑀘 𑀅𑀮𑀸𑀪𑁂𑀦 [𑀅𑀪𑀸𑀯𑁂𑀦 (𑀲𑀻. 𑀅𑀝𑁆𑀞.)], 𑀯𑀺𑀢𑁆𑀢𑀯𑀸𑀧𑀺 𑀦 𑀚𑀻𑀯𑀢𑀺.

𑁫𑁦𑁦. ‘‘𑀲𑀩𑁆𑀩𑀁 𑀲𑀼𑀡𑀸𑀢𑀺 𑀲𑁄𑀢𑁂𑀦, 𑀲𑀩𑁆𑀩𑀁 𑀧𑀲𑁆𑀲𑀢𑀺 𑀘𑀓𑁆𑀔𑀼𑀦𑀸;

𑀦 𑀘 𑀤𑀺𑀝𑁆𑀞𑀁 𑀲𑀼𑀢𑀁 𑀥𑀻𑀭𑁄, 𑀲𑀩𑁆𑀩𑀁 𑀉𑀚𑁆𑀛𑀺𑀢𑀼𑀫𑀭𑀳𑀢𑀺.

𑁫𑁦𑁧. ‘‘𑀘𑀓𑁆𑀔𑀼𑀫𑀸𑀲𑁆𑀲 𑀬𑀣𑀸 𑀅𑀦𑁆𑀥𑁄, 𑀲𑁄𑀢𑀯𑀸 𑀩𑀥𑀺𑀭𑁄 𑀬𑀣𑀸;

𑀧𑀜𑁆𑀜𑀯𑀸𑀲𑁆𑀲 𑀬𑀣𑀸 𑀫𑀽𑀕𑁄, 𑀩𑀮𑀯𑀸 𑀤𑀼𑀩𑁆𑀩𑀮𑁄𑀭𑀺𑀯;

𑀅𑀣 𑀅𑀢𑁆𑀣𑁂 𑀲𑀫𑀼𑀧𑁆𑀧𑀦𑁆𑀦𑁂, 𑀲𑀬𑁂𑀣 [𑀧𑀲𑁆𑀲𑁂𑀣 (𑀓.)] 𑀫𑀢𑀲𑀸𑀬𑀺𑀓’’𑀦𑁆𑀢𑀺.

… 𑀫𑀳𑀸𑀓𑀘𑁆𑀘𑀸𑀬𑀦𑁄 𑀣𑁂𑀭𑁄….

𑁨. 𑀲𑀺𑀭𑀺𑀫𑀺𑀢𑁆𑀢𑀢𑁆𑀣𑁂𑀭𑀕𑀸𑀣𑀸

𑁫𑁦𑁨. ‘‘𑀅𑀓𑁆𑀓𑁄𑀥𑀦𑁄𑀦𑀼𑀧𑀦𑀸𑀳𑀻, 𑀅𑀫𑀸𑀬𑁄 𑀭𑀺𑀢𑁆𑀢𑀧𑁂𑀲𑀼𑀡𑁄;

𑀲 𑀯𑁂 𑀢𑀸𑀤𑀺𑀲𑀓𑁄 𑀪𑀺𑀓𑁆𑀔𑀼, 𑀏𑀯𑀁 𑀧𑁂𑀘𑁆𑀘 𑀦 𑀲𑁄𑀘𑀢𑀺.

𑁫𑁦𑁩. ‘‘𑀅𑀓𑁆𑀓𑁄𑀥𑀦𑁄𑀦𑀼𑀧𑀦𑀸𑀳𑀻, 𑀅𑀫𑀸𑀬𑁄 𑀭𑀺𑀢𑁆𑀢𑀧𑁂𑀲𑀼𑀡𑁄;

𑀕𑀼𑀢𑁆𑀢𑀤𑁆𑀯𑀸𑀭𑁄 𑀲𑀤𑀸 𑀪𑀺𑀓𑁆𑀔𑀼, 𑀏𑀯𑀁 𑀧𑁂𑀘𑁆𑀘 𑀦 𑀲𑁄𑀘𑀢𑀺.

𑁫𑁦𑁪. ‘‘𑀅𑀓𑁆𑀓𑁄𑀥𑀦𑁄𑀦𑀼𑀧𑀦𑀸𑀳𑀻, 𑀅𑀫𑀸𑀬𑁄 𑀭𑀺𑀢𑁆𑀢𑀧𑁂𑀲𑀼𑀡𑁄;

𑀓𑀮𑁆𑀬𑀸𑀡𑀲𑀻𑀮𑁄 𑀲𑁄 [𑀬𑁄 (𑀲𑁆𑀬𑀸.)] 𑀪𑀺𑀓𑁆𑀔𑀼, 𑀏𑀯𑀁 𑀧𑁂𑀘𑁆𑀘 𑀦 𑀲𑁄𑀘𑀢𑀺.

𑁫𑁦𑁫. ‘‘𑀅𑀓𑁆𑀓𑁄𑀥𑀦𑁄𑀦𑀼𑀧𑀦𑀸𑀳𑀻, 𑀅𑀫𑀸𑀬𑁄 𑀭𑀺𑀢𑁆𑀢𑀧𑁂𑀲𑀼𑀡𑁄;

𑀓𑀮𑁆𑀬𑀸𑀡𑀫𑀺𑀢𑁆𑀢𑁄 𑀲𑁄 𑀪𑀺𑀓𑁆𑀔𑀼, 𑀏𑀯𑀁 𑀧𑁂𑀘𑁆𑀘 𑀦 𑀲𑁄𑀘𑀢𑀺.

𑁫𑁦𑁬. ‘‘𑀅𑀓𑁆𑀓𑁄𑀥𑀦𑁄𑀦𑀼𑀧𑀦𑀸𑀳𑀻, 𑀅𑀫𑀸𑀬𑁄 𑀭𑀺𑀢𑁆𑀢𑀧𑁂𑀲𑀼𑀡𑁄;

𑀓𑀮𑁆𑀬𑀸𑀡𑀧𑀜𑁆𑀜𑁄 𑀲𑁄 𑀪𑀺𑀓𑁆𑀔𑀼, 𑀏𑀯𑀁 𑀧𑁂𑀘𑁆𑀘 𑀦 𑀲𑁄𑀘𑀢𑀺.

𑁫𑁦𑁭. ‘‘𑀬𑀲𑁆𑀲 𑀲𑀤𑁆𑀥𑀸 𑀢𑀣𑀸𑀕𑀢𑁂, 𑀅𑀘𑀮𑀸 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀸;

𑀲𑀻𑀮𑀜𑁆𑀘 𑀬𑀲𑁆𑀲 𑀓𑀮𑁆𑀬𑀸𑀡𑀁, 𑀅𑀭𑀺𑀬𑀓𑀦𑁆𑀢𑀁 𑀧𑀲𑀁𑀲𑀺𑀢𑀁.

𑁫𑁦𑁮. ‘‘𑀲𑀗𑁆𑀖𑁂 𑀧𑀲𑀸𑀤𑁄 𑀬𑀲𑁆𑀲𑀢𑁆𑀣𑀺, 𑀉𑀚𑀼𑀪𑀽𑀢𑀜𑁆𑀘 𑀤𑀲𑁆𑀲𑀦𑀁;

‘𑀅𑀤𑀮𑀺𑀤𑁆𑀤𑁄’𑀢𑀺 𑀢𑀁 𑀆𑀳𑀼, 𑀅𑀫𑁄𑀖𑀁 𑀢𑀲𑁆𑀲 𑀚𑀻𑀯𑀺𑀢𑀁.

𑁫𑁦𑁯. ‘‘𑀢𑀲𑁆𑀫𑀸 𑀲𑀤𑁆𑀥𑀜𑁆𑀘 𑀲𑀻𑀮𑀜𑁆𑀘, 𑀧𑀲𑀸𑀤𑀁 𑀥𑀫𑁆𑀫𑀤𑀲𑁆𑀲𑀦𑀁;

𑀅𑀦𑀼𑀬𑀼𑀜𑁆𑀚𑁂𑀣 𑀫𑁂𑀥𑀸𑀯𑀻, 𑀲𑀭𑀁 𑀩𑀼𑀤𑁆𑀥𑀸𑀦 𑀲𑀸𑀲𑀦’’𑀦𑁆𑀢𑀺.

… 𑀲𑀺𑀭𑀺𑀫𑀺𑀢𑁆𑀢𑁄 𑀣𑁂𑀭𑁄….

𑁩. 𑀫𑀳𑀸𑀧𑀦𑁆𑀣𑀓𑀢𑁆𑀣𑁂𑀭𑀕𑀸𑀣𑀸

𑁫𑁧𑁦. ‘‘𑀬𑀤𑀸 𑀧𑀞𑀫𑀫𑀤𑁆𑀤𑀓𑁆𑀔𑀺𑀁, 𑀲𑀢𑁆𑀣𑀸𑀭𑀫𑀓𑀼𑀢𑁄𑀪𑀬𑀁;

𑀢𑀢𑁄 𑀫𑁂 𑀅𑀳𑀼 𑀲𑀁𑀯𑁂𑀕𑁄, 𑀧𑀲𑁆𑀲𑀺𑀢𑁆𑀯𑀸 𑀧𑀼𑀭𑀺𑀲𑀼𑀢𑁆𑀢𑀫𑀁.

𑁫𑁧𑁧. ‘‘𑀲𑀺𑀭𑀺𑀁 𑀳𑀢𑁆𑀣𑁂𑀳𑀺 𑀧𑀸𑀤𑁂𑀳𑀺, 𑀬𑁄 𑀧𑀡𑀸𑀫𑁂𑀬𑁆𑀬 𑀆𑀕𑀢𑀁;

𑀏𑀢𑀸𑀤𑀺𑀲𑀁 𑀲𑁄 𑀲𑀢𑁆𑀣𑀸𑀭𑀁, 𑀆𑀭𑀸𑀥𑁂𑀢𑁆𑀯𑀸 𑀯𑀺𑀭𑀸𑀥𑀬𑁂.

𑁫𑁧𑁨. ‘‘𑀢𑀤𑀸𑀳𑀁 𑀧𑀼𑀢𑁆𑀢𑀤𑀸𑀭𑀜𑁆𑀘, 𑀥𑀦𑀥𑀜𑁆𑀜𑀜𑁆𑀘 𑀙𑀟𑁆𑀟𑀬𑀺𑀁;

𑀓𑁂𑀲𑀫𑀲𑁆𑀲𑀽𑀦𑀺 𑀙𑁂𑀤𑁂𑀢𑁆𑀯𑀸, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁.

𑁫𑁧𑁩. ‘‘𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑁆𑀧𑀦𑁆𑀦𑁄, 𑀇𑀦𑁆𑀤𑁆𑀭𑀺𑀬𑁂𑀲𑀼 𑀲𑀼𑀲𑀁𑀯𑀼𑀢𑁄;

𑀦𑀫𑀲𑁆𑀲𑀫𑀸𑀦𑁄 𑀲𑀫𑁆𑀩𑀼𑀤𑁆𑀥𑀁, 𑀯𑀺𑀳𑀸𑀲𑀺𑀁 𑀅𑀧𑀭𑀸𑀚𑀺𑀢𑁄.

𑁫𑁧𑁪. ‘‘𑀢𑀢𑁄 𑀫𑁂 𑀧𑀡𑀺𑀥𑀻 𑀆𑀲𑀺, 𑀘𑁂𑀢𑀲𑁄 𑀅𑀪𑀺𑀧𑀢𑁆𑀣𑀺𑀢𑁄;

𑀦 𑀦𑀺𑀲𑀻𑀤𑁂 𑀫𑀼𑀳𑀼𑀢𑁆𑀢𑀫𑁆𑀧𑀺, 𑀢𑀡𑁆𑀳𑀸𑀲𑀮𑁆𑀮𑁂 𑀅𑀦𑀽𑀳𑀢𑁂.

𑁫𑁧𑁫. ‘‘𑀢𑀲𑁆𑀲 𑀫𑁂𑀯𑀁 𑀯𑀺𑀳𑀭𑀢𑁄, 𑀧𑀲𑁆𑀲 𑀯𑀻𑀭𑀺𑀬𑀧𑀭𑀓𑁆𑀓𑀫𑀁;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁫𑁧𑁬. ‘‘𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀚𑀸𑀦𑀸𑀫𑀺, 𑀤𑀺𑀩𑁆𑀩𑀘𑀓𑁆𑀔𑀼 𑀯𑀺𑀲𑁄𑀥𑀺𑀢𑀁;

𑀅𑀭𑀳𑀸 𑀤𑀓𑁆𑀔𑀺𑀡𑁂𑀬𑁆𑀬𑁄𑀫𑁆𑀳𑀺, 𑀯𑀺𑀧𑁆𑀧𑀫𑀼𑀢𑁆𑀢𑁄 𑀦𑀺𑀭𑀽𑀧𑀥𑀺.

𑁫𑁧𑁭. ‘‘𑀢𑀢𑁄 𑀭𑀢𑁆𑀬𑀸 𑀯𑀺𑀯𑀲𑀸𑀦𑁂 [𑀯𑀺𑀯𑀲𑀦𑁂 (𑀲𑀻. 𑀲𑁆𑀬𑀸.)], 𑀲𑀽𑀭𑀺𑀬𑀲𑁆𑀲𑀼𑀕𑁆𑀕𑀫𑀦𑀁 𑀧𑀢𑀺;

𑀲𑀩𑁆𑀩𑀁 𑀢𑀡𑁆𑀳𑀁 𑀯𑀺𑀲𑁄𑀲𑁂𑀢𑁆𑀯𑀸, 𑀧𑀮𑁆𑀮𑀗𑁆𑀓𑁂𑀦 𑀉𑀧𑀸𑀯𑀺𑀲𑀺’’𑀦𑁆𑀢𑀺.

… 𑀫𑀳𑀸𑀧𑀦𑁆𑀣𑀓𑁄 𑀣𑁂𑀭𑁄….

𑀅𑀝𑁆𑀞𑀓𑀦𑀺𑀧𑀸𑀢𑁄 𑀦𑀺𑀝𑁆𑀞𑀺𑀢𑁄.