𑁭. 𑀲𑀢𑁆𑀢𑀓𑀦𑀺𑀧𑀸𑀢𑁄

𑁧. 𑀲𑀼𑀦𑁆𑀤𑀭𑀲𑀫𑀼𑀤𑁆𑀤𑀢𑁆𑀣𑁂𑀭𑀕𑀸𑀣𑀸

𑁪𑁫𑁯. ‘‘𑀅𑀮𑀗𑁆𑀓𑀢𑀸 𑀲𑀼𑀯𑀲𑀦𑀸, 𑀫𑀸𑀮𑀥𑀸𑀭𑀻 [𑀫𑀸𑀮𑀸𑀪𑀸𑀭𑀻 (𑀲𑀻.), 𑀫𑀸𑀮𑀪𑀸𑀭𑀻 (𑀲𑁆𑀬𑀸.)] 𑀯𑀺𑀪𑀽𑀲𑀺𑀢𑀸;

𑀅𑀮𑀢𑁆𑀢𑀓𑀓𑀢𑀸𑀧𑀸𑀤𑀸, 𑀧𑀸𑀤𑀼𑀓𑀸𑀭𑀼𑀬𑁆𑀳 𑀯𑁂𑀲𑀺𑀓𑀸.

𑁪𑁬𑁦. ‘‘𑀧𑀸𑀤𑀼𑀓𑀸 𑀑𑀭𑀼𑀳𑀺𑀢𑁆𑀯𑀸𑀦, 𑀧𑀼𑀭𑀢𑁄 𑀧𑀜𑁆𑀚𑀮𑀻𑀓𑀢𑀸;

𑀲𑀸 𑀫𑀁 𑀲𑀡𑁆𑀳𑁂𑀦 𑀫𑀼𑀤𑀼𑀦𑀸, 𑀫𑁆𑀳𑀺𑀢𑀧𑀼𑀩𑁆𑀩𑀁 [𑀫𑀺𑀳𑀺𑀢𑀧𑀼𑀩𑁆𑀩𑀁 (𑀲𑀻.)] 𑀅𑀪𑀸𑀲𑀣’’.

𑁪𑁬𑁧. ‘‘𑀬𑀼𑀯𑀸𑀲𑀺 𑀢𑁆𑀯𑀁 𑀧𑀩𑁆𑀩𑀚𑀺𑀢𑁄, 𑀢𑀺𑀝𑁆𑀞𑀸𑀳𑀺 𑀫𑀫 𑀲𑀸𑀲𑀦𑁂;

𑀪𑀼𑀜𑁆𑀚 𑀫𑀸𑀦𑀼𑀲𑀓𑁂 𑀓𑀸𑀫𑁂, 𑀅𑀳𑀁 𑀯𑀺𑀢𑁆𑀢𑀁 𑀤𑀤𑀸𑀫𑀺 𑀢𑁂;

𑀲𑀘𑁆𑀘𑀁 𑀢𑁂 𑀧𑀝𑀺𑀚𑀸𑀦𑀸𑀫𑀺, 𑀅𑀕𑁆𑀕𑀺𑀁 𑀯𑀸 𑀢𑁂 𑀳𑀭𑀸𑀫𑀳𑀁.

𑁪𑁬𑁨. ‘‘𑀬𑀤𑀸 𑀚𑀺𑀡𑁆𑀡𑀸 𑀪𑀯𑀺𑀲𑁆𑀲𑀸𑀫, 𑀉𑀪𑁄 𑀤𑀡𑁆𑀟𑀧𑀭𑀸𑀬𑀦𑀸;

𑀉𑀪𑁄𑀧𑀺 𑀧𑀩𑁆𑀩𑀚𑀺𑀲𑁆𑀲𑀸𑀫, 𑀉𑀪𑀬𑀢𑁆𑀣 𑀓𑀝𑀕𑁆𑀕𑀳𑁄’’.

𑁪𑁬𑁩. ‘‘𑀢𑀜𑁆𑀘 𑀤𑀺𑀲𑁆𑀯𑀸𑀦 𑀬𑀸𑀘𑀦𑁆𑀢𑀺𑀁, 𑀯𑁂𑀲𑀺𑀓𑀁 𑀧𑀜𑁆𑀚𑀮𑀻𑀓𑀢𑀁;

𑀅𑀮𑀗𑁆𑀓𑀢𑀁 𑀲𑀼𑀯𑀲𑀦𑀁, 𑀫𑀘𑁆𑀘𑀼𑀧𑀸𑀲𑀁𑀯 𑀑𑀟𑁆𑀟𑀺𑀢𑀁.

𑁪𑁬𑁪. ‘‘𑀢𑀢𑁄 𑀫𑁂 𑀫𑀦𑀲𑀻𑀓𑀸𑀭𑁄…𑀧𑁂… 𑀦𑀺𑀩𑁆𑀩𑀺𑀤𑀸 𑀲𑀫𑀢𑀺𑀝𑁆𑀞𑀣.

𑁪𑁬𑁫. ‘‘𑀢𑀢𑁄 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺 𑀫𑁂…𑀧𑁂… 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

… 𑀲𑀼𑀦𑁆𑀤𑀭𑀲𑀫𑀼𑀤𑁆𑀤𑁄 𑀣𑁂𑀭𑁄….

𑁨. 𑀮𑀓𑀼𑀡𑁆𑀟𑀓𑀪𑀤𑁆𑀤𑀺𑀬𑀢𑁆𑀣𑁂𑀭𑀕𑀸𑀣𑀸

𑁪𑁬𑁬. 𑀧𑀭𑁂 𑀅𑀫𑁆𑀩𑀸𑀝𑀓𑀸𑀭𑀸𑀫𑁂, 𑀯𑀦𑀲𑀡𑁆𑀟𑀫𑁆𑀳𑀺 𑀪𑀤𑁆𑀤𑀺𑀬𑁄;

𑀲𑀫𑀽𑀮𑀁 𑀢𑀡𑁆𑀳𑀫𑀩𑁆𑀩𑀼𑀬𑁆𑀳, 𑀢𑀢𑁆𑀣 𑀪𑀤𑁆𑀤𑁄𑀯 𑀛𑀸𑀬𑀢𑀺 [𑀪𑀤𑁆𑀤𑁄’𑀥𑀺𑀛𑀸𑀬𑀸𑀬𑀢𑀺 (𑀲𑀻.), 𑀪𑀤𑁆𑀤𑁄 𑀛𑀺𑀬𑀸𑀬𑀢𑀺 (𑀲𑁆𑀬𑀸. 𑀲𑀻. 𑀅𑀝𑁆𑀞.)].

𑁪𑁬𑁭. ‘‘𑀭𑀫𑀦𑁆𑀢𑁂𑀓𑁂 𑀫𑀼𑀤𑀺𑀗𑁆𑀕𑁂𑀳𑀺 [𑀫𑀼𑀢𑀺𑀗𑁆𑀕𑁂𑀳𑀺 (𑀲𑀻. 𑀅𑀝𑁆𑀞.)], 𑀯𑀻𑀡𑀸𑀳𑀺 𑀧𑀡𑀯𑁂𑀳𑀺 𑀘;

𑀅𑀳𑀜𑁆𑀘 𑀭𑀼𑀓𑁆𑀔𑀫𑀽𑀮𑀲𑁆𑀫𑀺𑀁, 𑀭𑀢𑁄 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑁂.

𑁪𑁬𑁮. ‘‘𑀩𑀼𑀤𑁆𑀥𑁄 𑀘𑁂 [𑀩𑀼𑀤𑁆𑀥𑁄 𑀘 (𑀲𑀩𑁆𑀩𑀢𑁆𑀣)] 𑀫𑁂 𑀯𑀭𑀁 𑀤𑀚𑁆𑀚𑀸, 𑀲𑁄 𑀘 𑀮𑀩𑁆𑀪𑁂𑀣 𑀫𑁂 𑀯𑀭𑁄;

𑀕𑀡𑁆𑀳𑁂𑀳𑀁 𑀲𑀩𑁆𑀩𑀮𑁄𑀓𑀲𑁆𑀲, 𑀦𑀺𑀘𑁆𑀘𑀁 𑀓𑀸𑀬𑀕𑀢𑀁 𑀲𑀢𑀺𑀁.

𑁪𑁬𑁯. ‘‘𑀬𑁂 𑀫𑀁 𑀭𑀽𑀧𑁂𑀦 𑀧𑀸𑀫𑀺𑀁𑀲𑀼, 𑀬𑁂 𑀘 𑀖𑁄𑀲𑁂𑀦 𑀅𑀦𑁆𑀯𑀕𑀽;

𑀙𑀦𑁆𑀤𑀭𑀸𑀕𑀯𑀲𑀽𑀧𑁂𑀢𑀸, 𑀦 𑀫𑀁 𑀚𑀸𑀦𑀦𑁆𑀢𑀺 𑀢𑁂 𑀚𑀦𑀸.

𑁪𑁭𑁦. ‘‘𑀅𑀚𑁆𑀛𑀢𑁆𑀢𑀜𑁆𑀘 𑀦 𑀚𑀸𑀦𑀸𑀢𑀺, 𑀩𑀳𑀺𑀤𑁆𑀥𑀸 𑀘 𑀦 𑀧𑀲𑁆𑀲𑀢𑀺;

𑀲𑀫𑀦𑁆𑀢𑀸𑀯𑀭𑀡𑁄 𑀩𑀸𑀮𑁄, 𑀲 𑀯𑁂 𑀖𑁄𑀲𑁂𑀦 𑀯𑀼𑀬𑁆𑀳𑀢𑀺.

𑁪𑁭𑁧. ‘‘𑀅𑀚𑁆𑀛𑀢𑁆𑀢𑀜𑁆𑀘 𑀦 𑀚𑀸𑀦𑀸𑀢𑀺, 𑀩𑀳𑀺𑀤𑁆𑀥𑀸 𑀘 𑀯𑀺𑀧𑀲𑁆𑀲𑀢𑀺;

𑀩𑀳𑀺𑀤𑁆𑀥𑀸 𑀨𑀮𑀤𑀲𑁆𑀲𑀸𑀯𑀻, 𑀲𑁄𑀧𑀺 𑀖𑁄𑀲𑁂𑀦 𑀯𑀼𑀬𑁆𑀳𑀢𑀺.

𑁪𑁭𑁨. ‘‘𑀅𑀚𑁆𑀛𑀢𑁆𑀢𑀜𑁆𑀘 𑀧𑀚𑀸𑀦𑀸𑀢𑀺, 𑀩𑀳𑀺𑀤𑁆𑀥𑀸 𑀘 𑀯𑀺𑀧𑀲𑁆𑀲𑀢𑀺;

𑀅𑀦𑀸𑀯𑀭𑀡𑀤𑀲𑁆𑀲𑀸𑀯𑀻, 𑀦 𑀲𑁄 𑀖𑁄𑀲𑁂𑀦 𑀯𑀼𑀬𑁆𑀳𑀢𑀻’’𑀢𑀺.

… 𑀮𑀓𑀼𑀡𑁆𑀟𑀓𑀪𑀤𑁆𑀤𑀺𑀬𑁄 𑀣𑁂𑀭𑁄….

𑁩. 𑀪𑀤𑁆𑀤𑀢𑁆𑀣𑁂𑀭𑀕𑀸𑀣𑀸

𑁪𑁭𑁩. ‘‘𑀏𑀓𑀧𑀼𑀢𑁆𑀢𑁄 𑀅𑀳𑀁 𑀆𑀲𑀺𑀁, 𑀧𑀺𑀬𑁄 𑀫𑀸𑀢𑀼 𑀧𑀺𑀬𑁄 𑀧𑀺𑀢𑀼;

𑀩𑀳𑀽𑀳𑀺 𑀯𑀢𑀘𑀭𑀺𑀬𑀸𑀳𑀺, 𑀮𑀤𑁆𑀥𑁄 𑀆𑀬𑀸𑀘𑀦𑀸𑀳𑀺 𑀘.

𑁪𑁭𑁪. ‘‘𑀢𑁂 𑀘 𑀫𑀁 𑀅𑀦𑀼𑀓𑀫𑁆𑀧𑀸𑀬, 𑀅𑀢𑁆𑀣𑀓𑀸𑀫𑀸 𑀳𑀺𑀢𑁂𑀲𑀺𑀦𑁄;

𑀉𑀪𑁄 𑀧𑀺𑀢𑀸 𑀘 𑀫𑀸𑀢𑀸 𑀘, 𑀩𑀼𑀤𑁆𑀥𑀲𑁆𑀲 𑀉𑀧𑀦𑀸𑀫𑀬𑀼𑀁’’.

𑁪𑁭𑁫. ‘‘𑀓𑀺𑀘𑁆𑀙𑀸 𑀮𑀤𑁆𑀥𑁄 𑀅𑀬𑀁 𑀧𑀼𑀢𑁆𑀢𑁄, 𑀲𑀼𑀔𑀼𑀫𑀸𑀮𑁄 𑀲𑀼𑀔𑁂𑀥𑀺𑀢𑁄;

𑀇𑀫𑀁 𑀤𑀤𑀸𑀫 𑀢𑁂 𑀦𑀸𑀣, 𑀚𑀺𑀦𑀲𑁆𑀲 𑀧𑀭𑀺𑀘𑀸𑀭𑀓𑀁’’.

𑁪𑁭𑁬. ‘‘𑀲𑀢𑁆𑀣𑀸 𑀘 𑀫𑀁 𑀧𑀝𑀺𑀕𑁆𑀕𑀬𑁆𑀳, 𑀆𑀦𑀦𑁆𑀤𑀁 𑀏𑀢𑀤𑀩𑁆𑀭𑀯𑀺;

‘𑀧𑀩𑁆𑀩𑀸𑀚𑁂𑀳𑀺 𑀇𑀫𑀁 𑀔𑀺𑀧𑁆𑀧𑀁, 𑀳𑁂𑀲𑁆𑀲𑀢𑁆𑀬𑀸𑀚𑀸𑀦𑀺𑀬𑁄 𑀅𑀬𑀁.

𑁪𑁭𑁭. ‘‘𑀧𑀩𑁆𑀩𑀸𑀚𑁂𑀢𑁆𑀯𑀸𑀦 𑀫𑀁 𑀲𑀢𑁆𑀣𑀸, 𑀯𑀺𑀳𑀸𑀭𑀁 𑀧𑀸𑀯𑀺𑀲𑀻 𑀚𑀺𑀦𑁄;

𑀅𑀦𑁄𑀕𑁆𑀕𑀢𑀲𑁆𑀫𑀺𑀁 𑀲𑀽𑀭𑀺𑀬𑀲𑁆𑀫𑀺𑀁, 𑀢𑀢𑁄 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺 𑀫𑁂.

𑁪𑁭𑁮. ‘‘𑀢𑀢𑁄 𑀲𑀢𑁆𑀣𑀸 𑀦𑀺𑀭𑀸𑀓𑀢𑁆𑀯𑀸, 𑀧𑀝𑀺𑀲𑀮𑁆𑀮𑀸𑀦𑀯𑀼𑀝𑁆𑀞𑀺𑀢𑁄;

‘𑀏𑀳𑀺 𑀪𑀤𑁆𑀤𑀸’𑀢𑀺 𑀫𑀁 𑀆𑀳, 𑀲𑀸 𑀫𑁂 𑀆𑀲𑀽𑀧𑀲𑀫𑁆𑀧𑀤𑀸.

𑁪𑁭𑁯. ‘‘𑀚𑀸𑀢𑀺𑀬𑀸 𑀲𑀢𑁆𑀢𑀯𑀲𑁆𑀲𑁂𑀦, 𑀮𑀤𑁆𑀥𑀸 𑀫𑁂 𑀉𑀧𑀲𑀫𑁆𑀧𑀤𑀸;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀅𑀳𑁄 𑀥𑀫𑁆𑀫𑀲𑀼𑀥𑀫𑁆𑀫𑀢𑀸’’𑀢𑀺.

… 𑀪𑀤𑁆𑀤𑁄 𑀣𑁂𑀭𑁄….

𑁪. 𑀲𑁄𑀧𑀸𑀓𑀢𑁆𑀣𑁂𑀭𑀕𑀸𑀣𑀸

𑁪𑁮𑁦. ‘‘𑀤𑀺𑀲𑁆𑀯𑀸 𑀧𑀸𑀲𑀸𑀤𑀙𑀸𑀬𑀸𑀬𑀁, 𑀘𑀗𑁆𑀓𑀫𑀦𑁆𑀢𑀁 𑀦𑀭𑀼𑀢𑁆𑀢𑀫𑀁;

𑀢𑀢𑁆𑀣 𑀦𑀁 𑀉𑀧𑀲𑀗𑁆𑀓𑀫𑁆𑀫, 𑀯𑀦𑁆𑀤𑀺𑀲𑁆𑀲𑀁 [𑀯𑀦𑁆𑀤𑀺𑀲𑀁 (𑀲𑀻. 𑀧𑀻.)] 𑀧𑀼𑀭𑀺𑀲𑀼𑀢𑁆𑀢𑀫𑀁.

𑁪𑁮𑁧. ‘‘𑀏𑀓𑀁𑀲𑀁 𑀘𑀻𑀯𑀭𑀁 𑀓𑀢𑁆𑀯𑀸, 𑀲𑀁𑀳𑀭𑀺𑀢𑁆𑀯𑀸𑀦 𑀧𑀸𑀡𑀬𑁄;

𑀅𑀦𑀼𑀘𑀗𑁆𑀓𑀫𑀺𑀲𑁆𑀲𑀁 𑀯𑀺𑀭𑀚𑀁, 𑀲𑀩𑁆𑀩𑀲𑀢𑁆𑀢𑀸𑀦𑀫𑀼𑀢𑁆𑀢𑀫𑀁.

𑁪𑁮𑁨. ‘‘𑀢𑀢𑁄 𑀧𑀜𑁆𑀳𑁂 𑀅𑀧𑀼𑀘𑁆𑀙𑀺 𑀫𑀁, 𑀧𑀜𑁆𑀳𑀸𑀦𑀁 𑀓𑁄𑀯𑀺𑀤𑁄 𑀯𑀺𑀤𑀽;

𑀅𑀘𑁆𑀙𑀫𑁆𑀪𑀻 𑀘 𑀅𑀪𑀻𑀢𑁄 𑀘, 𑀩𑁆𑀬𑀸𑀓𑀸𑀲𑀺𑀁 𑀲𑀢𑁆𑀣𑀼𑀦𑁄 𑀅𑀳𑀁.

𑁪𑁮𑁩. ‘‘𑀯𑀺𑀲𑁆𑀲𑀚𑁆𑀚𑀺𑀢𑁂𑀲𑀼 𑀧𑀜𑁆𑀳𑁂𑀲𑀼, 𑀅𑀦𑀼𑀫𑁄𑀤𑀺 𑀢𑀣𑀸𑀕𑀢𑁄;

𑀪𑀺𑀓𑁆𑀔𑀼𑀲𑀗𑁆𑀖𑀁 𑀯𑀺𑀮𑁄𑀓𑁂𑀢𑁆𑀯𑀸, 𑀇𑀫𑀫𑀢𑁆𑀣𑀁 𑀅𑀪𑀸𑀲𑀣’’.

𑁪𑁮𑁪. ‘‘𑀮𑀸𑀪𑀸 𑀅𑀗𑁆𑀕𑀸𑀦𑀁 𑀫𑀕𑀥𑀸𑀦𑀁, 𑀬𑁂𑀲𑀸𑀬𑀁 𑀧𑀭𑀺𑀪𑀼𑀜𑁆𑀚𑀢𑀺;

𑀘𑀻𑀯𑀭𑀁 𑀧𑀺𑀡𑁆𑀟𑀧𑀸𑀢𑀜𑁆𑀘, 𑀧𑀘𑁆𑀘𑀬𑀁 𑀲𑀬𑀦𑀸𑀲𑀦𑀁;

𑀧𑀘𑁆𑀘𑀼𑀝𑁆𑀞𑀸𑀦𑀜𑁆𑀘 𑀲𑀸𑀫𑀻𑀘𑀺𑀁, 𑀢𑁂𑀲𑀁 𑀮𑀸𑀪𑀸’’𑀢𑀺 𑀘𑀸𑀩𑁆𑀭𑀯𑀺.

𑁪𑁮𑁫. ‘‘𑀅𑀚𑁆𑀚𑀢𑀕𑁆𑀕𑁂 𑀫𑀁 𑀲𑁄𑀧𑀸𑀓, 𑀤𑀲𑁆𑀲𑀦𑀸𑀬𑁄𑀧𑀲𑀗𑁆𑀓𑀫;

𑀏𑀲𑀸 𑀘𑁂𑀯 𑀢𑁂 𑀲𑁄𑀧𑀸𑀓, 𑀪𑀯𑀢𑀼 𑀉𑀧𑀲𑀫𑁆𑀧𑀤𑀸’’.

𑁪𑁮𑁬. ‘‘𑀚𑀸𑀢𑀺𑀬𑀸 𑀲𑀢𑁆𑀢𑀯𑀲𑁆𑀲𑁄𑀳𑀁, 𑀮𑀤𑁆𑀥𑀸𑀦 𑀉𑀧𑀲𑀫𑁆𑀧𑀤𑀁;

𑀥𑀸𑀭𑁂𑀫𑀺 𑀅𑀦𑁆𑀢𑀺𑀫𑀁 𑀤𑁂𑀳𑀁, 𑀅𑀳𑁄 𑀥𑀫𑁆𑀫𑀲𑀼𑀥𑀫𑁆𑀫𑀢𑀸’’𑀢𑀺.

… 𑀲𑁄𑀧𑀸𑀓𑁄 𑀣𑁂𑀭𑁄….

𑁫. 𑀲𑀭𑀪𑀗𑁆𑀕𑀢𑁆𑀣𑁂𑀭𑀕𑀸𑀣𑀸

𑁪𑁮𑁭. ‘‘𑀲𑀭𑁂 𑀳𑀢𑁆𑀣𑁂𑀳𑀺 𑀪𑀜𑁆𑀚𑀺𑀢𑁆𑀯𑀸, 𑀓𑀢𑁆𑀯𑀸𑀦 𑀓𑀼𑀝𑀺𑀫𑀘𑁆𑀙𑀺𑀲𑀁;

𑀢𑁂𑀦 𑀫𑁂 𑀲𑀭𑀪𑀗𑁆𑀕𑁄𑀢𑀺, 𑀦𑀸𑀫𑀁 𑀲𑀫𑁆𑀫𑀼𑀢𑀺𑀬𑀸 𑀅𑀳𑀼.

𑁪𑁮𑁮. ‘‘𑀦 𑀫𑀬𑁆𑀳𑀁 𑀓𑀧𑁆𑀧𑀢𑁂 𑀅𑀚𑁆𑀚, 𑀲𑀭𑁂 𑀳𑀢𑁆𑀣𑁂𑀳𑀺 𑀪𑀜𑁆𑀚𑀺𑀢𑀼𑀁;

𑀲𑀺𑀓𑁆𑀔𑀸𑀧𑀤𑀸 𑀦𑁄 𑀧𑀜𑁆𑀜𑀢𑁆𑀢𑀸, 𑀕𑁄𑀢𑀫𑁂𑀦 𑀬𑀲𑀲𑁆𑀲𑀺𑀦𑀸.

𑁪𑁮𑁯. ‘‘𑀲𑀓𑀮𑀁 𑀲𑀫𑀢𑁆𑀢𑀁 𑀭𑁄𑀕𑀁, 𑀲𑀭𑀪𑀗𑁆𑀕𑁄 𑀦𑀸𑀤𑁆𑀤𑀲𑀁 𑀧𑀼𑀩𑁆𑀩𑁂;

𑀲𑁄𑀬𑀁 𑀭𑁄𑀕𑁄 𑀤𑀺𑀝𑁆𑀞𑁄, 𑀯𑀘𑀦𑀓𑀭𑁂𑀦𑀸𑀢𑀺𑀤𑁂𑀯𑀲𑁆𑀲.

𑁪𑁯𑁦. ‘‘𑀬𑁂𑀦𑁂𑀯 𑀫𑀕𑁆𑀕𑁂𑀦 𑀕𑀢𑁄 𑀯𑀺𑀧𑀲𑁆𑀲𑀻, 𑀬𑁂𑀦𑁂𑀯 𑀫𑀕𑁆𑀕𑁂𑀦 𑀲𑀺𑀔𑀻 𑀘 𑀯𑁂𑀲𑁆𑀲𑀪𑀽;

𑀓𑀓𑀼𑀲𑀦𑁆𑀥𑀓𑁄𑀡𑀸𑀕𑀫𑀦𑁄 𑀘 𑀓𑀲𑁆𑀲𑀧𑁄, 𑀢𑁂𑀦𑀜𑁆𑀚𑀲𑁂𑀦 𑀅𑀕𑀫𑀸𑀲𑀺 𑀕𑁄𑀢𑀫𑁄.

𑁪𑁯𑁧. ‘‘𑀯𑀻𑀢𑀢𑀡𑁆𑀳𑀸 𑀅𑀦𑀸𑀤𑀸𑀦𑀸, 𑀲𑀢𑁆𑀢 𑀩𑀼𑀤𑁆𑀥𑀸 𑀔𑀬𑁄𑀕𑀥𑀸;

𑀬𑁂𑀳𑀸𑀬𑀁 𑀤𑁂𑀲𑀺𑀢𑁄 𑀥𑀫𑁆𑀫𑁄, 𑀥𑀫𑁆𑀫𑀪𑀽𑀢𑁂𑀳𑀺 𑀢𑀸𑀤𑀺𑀪𑀺.

𑁪𑁯𑁨. ‘‘𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺, 𑀅𑀦𑀼𑀓𑀫𑁆𑀧𑀸𑀬 𑀧𑀸𑀡𑀺𑀦𑀁;

𑀤𑀼𑀓𑁆𑀔𑀁 𑀲𑀫𑀼𑀤𑀬𑁄 𑀫𑀕𑁆𑀕𑁄, 𑀦𑀺𑀭𑁄𑀥𑁄 𑀤𑀼𑀓𑁆𑀔𑀲𑀗𑁆𑀔𑀬𑁄.

𑁪𑁯𑁩. ‘‘𑀬𑀲𑁆𑀫𑀺𑀁 𑀦𑀺𑀯𑀢𑁆𑀢𑀢𑁂 [𑀬𑀲𑁆𑀫𑀺𑀁 𑀦 𑀦𑀺𑀩𑁆𑀩𑀢𑁆𑀢𑀢𑁂 (𑀓.)] 𑀤𑀼𑀓𑁆𑀔𑀁, 𑀲𑀁𑀲𑀸𑀭𑀲𑁆𑀫𑀺𑀁 𑀅𑀦𑀦𑁆𑀢𑀓𑀁;

𑀪𑁂𑀤𑀸 𑀇𑀫𑀲𑁆𑀲 𑀓𑀸𑀬𑀲𑁆𑀲, 𑀚𑀻𑀯𑀺𑀢𑀲𑁆𑀲 𑀘 𑀲𑀗𑁆𑀔𑀬𑀸;

𑀅𑀜𑁆𑀜𑁄 𑀧𑀼𑀦𑀩𑁆𑀪𑀯𑁄 𑀦𑀢𑁆𑀣𑀺, 𑀲𑀼𑀯𑀺𑀫𑀼𑀢𑁆𑀢𑁄𑀫𑁆𑀳𑀺 𑀲𑀩𑁆𑀩𑀥𑀻’’𑀢𑀺.

… 𑀲𑀭𑀪𑀗𑁆𑀕𑁄 𑀣𑁂𑀭𑁄….

𑀲𑀢𑁆𑀢𑀓𑀦𑀺𑀧𑀸𑀢𑁄 𑀦𑀺𑀝𑁆𑀞𑀺𑀢𑁄.