𑁬. 𑀦𑀤𑀻𑀓𑀲𑁆𑀲𑀧𑀢𑁆𑀣𑁂𑀭𑀕𑀸𑀣𑀸

𑁩𑁪𑁦. ‘‘𑀅𑀢𑁆𑀣𑀸𑀬 𑀯𑀢 𑀫𑁂 𑀩𑀼𑀤𑁆𑀥𑁄, 𑀦𑀤𑀺𑀁 𑀦𑁂𑀭𑀜𑁆𑀚𑀭𑀁 𑀅𑀕𑀸;

𑀬𑀲𑁆𑀲𑀸𑀳𑀁 𑀥𑀫𑁆𑀫𑀁 𑀲𑀼𑀢𑁆𑀯𑀸𑀦, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀯𑀺𑀯𑀚𑁆𑀚𑀬𑀺𑀁.

𑁩𑁪𑁧. ‘‘𑀬𑀚𑀺𑀁 𑀉𑀘𑁆𑀘𑀸𑀯𑀘𑁂 𑀬𑀜𑁆𑀜𑁂, 𑀅𑀕𑁆𑀕𑀺𑀳𑀼𑀢𑁆𑀢𑀁 𑀚𑀼𑀳𑀺𑀁 𑀅𑀳𑀁;

‘𑀏𑀲𑀸 𑀲𑀼𑀤𑁆𑀥𑀻’𑀢𑀺 𑀫𑀜𑁆𑀜𑀦𑁆𑀢𑁄, 𑀅𑀦𑁆𑀥𑀪𑀽𑀢𑁄 [𑀅𑀦𑁆𑀥𑀻𑀪𑀽𑀢𑁄 (𑀓.)] 𑀧𑀼𑀣𑀼𑀚𑁆𑀚𑀦𑁄.

𑁩𑁪𑁨. ‘‘𑀤𑀺𑀝𑁆𑀞𑀺𑀕𑀳𑀦𑀧𑀓𑁆𑀔𑀦𑁆𑀤𑁄 [𑀧𑀓𑁆𑀔𑀦𑁆𑀢𑁄 (𑀲𑀻.), 𑀧𑀓𑁆𑀔𑀦𑁆𑀦𑁄 (𑀲𑁆𑀬𑀸. 𑀧𑀻.)], 𑀧𑀭𑀸𑀫𑀸𑀲𑁂𑀦 𑀫𑁄𑀳𑀺𑀢𑁄;

𑀅𑀲𑀼𑀤𑁆𑀥𑀺𑀁 𑀫𑀜𑁆𑀜𑀺𑀲𑀁 𑀲𑀼𑀤𑁆𑀥𑀺𑀁, 𑀅𑀦𑁆𑀥𑀪𑀽𑀢𑁄 𑀅𑀯𑀺𑀤𑁆𑀤𑀲𑀼.

𑁩𑁪𑁩. ‘‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀧𑀳𑀻𑀦𑀸 𑀫𑁂, 𑀪𑀯𑀸 𑀲𑀩𑁆𑀩𑁂 𑀧𑀤𑀸𑀮𑀺𑀢𑀸 [𑀯𑀺𑀤𑀸𑀮𑀺𑀢𑀸 (𑀓.)];

𑀚𑀼𑀳𑀸𑀫𑀺 𑀤𑀓𑁆𑀔𑀺𑀡𑁂𑀬𑁆𑀬𑀕𑁆𑀕𑀺𑀁, 𑀦𑀫𑀲𑁆𑀲𑀸𑀫𑀺 𑀢𑀣𑀸𑀕𑀢𑀁.

𑁩𑁪𑁪. ‘‘𑀫𑁄𑀳𑀸 𑀲𑀩𑁆𑀩𑁂 𑀧𑀳𑀻𑀦𑀸 𑀫𑁂, 𑀪𑀯𑀢𑀡𑁆𑀳𑀸 𑀧𑀤𑀸𑀮𑀺𑀢𑀸;

𑀯𑀺𑀓𑁆𑀔𑀻𑀡𑁄 𑀚𑀸𑀢𑀺𑀲𑀁𑀲𑀸𑀭𑁄, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄’’𑀢𑀺.

… 𑀦𑀤𑀻𑀓𑀲𑁆𑀲𑀧𑁄 𑀣𑁂𑀭𑁄….