𑁫. 𑀧𑀜𑁆𑀘𑀓𑀦𑀺𑀧𑀸𑀢𑁄

𑁧. 𑀭𑀸𑀚𑀤𑀢𑁆𑀢𑀢𑁆𑀣𑁂𑀭𑀕𑀸𑀣𑀸

𑁩𑁧𑁫. ‘‘𑀪𑀺𑀓𑁆𑀔𑀼 𑀲𑀺𑀯𑀣𑀺𑀓𑀁 [𑀲𑀻𑀯𑀣𑀺𑀓𑀁 (𑀲𑀻. 𑀲𑁆𑀬𑀸. 𑀧𑀻.)] 𑀕𑀦𑁆𑀢𑁆𑀯𑀸, 𑀅𑀤𑁆𑀤𑀲 𑀇𑀢𑁆𑀣𑀺𑀫𑀼𑀚𑁆𑀛𑀺𑀢𑀁;

𑀅𑀧𑀯𑀺𑀤𑁆𑀥𑀁 𑀲𑀼𑀲𑀸𑀦𑀲𑁆𑀫𑀺𑀁, 𑀔𑀚𑁆𑀚𑀦𑁆𑀢𑀺𑀁 𑀓𑀺𑀫𑀺𑀳𑀻 𑀨𑀼𑀝𑀁.

𑁩𑁧𑁬. ‘‘𑀬𑀜𑁆𑀳𑀺 𑀏𑀓𑁂 𑀚𑀺𑀕𑀼𑀘𑁆𑀙𑀦𑁆𑀢𑀺, 𑀫𑀢𑀁 𑀤𑀺𑀲𑁆𑀯𑀸𑀦 𑀧𑀸𑀧𑀓𑀁;

𑀓𑀸𑀫𑀭𑀸𑀕𑁄 𑀧𑀸𑀢𑀼𑀭𑀳𑀼, 𑀅𑀦𑁆𑀥𑁄𑀯 𑀲𑀯𑀢𑀻 [𑀯𑀲𑀢𑀻 (𑀲𑀻.)] 𑀅𑀳𑀼𑀁.

𑁩𑁧𑁭. ‘‘𑀑𑀭𑀁 𑀑𑀤𑀦𑀧𑀸𑀓𑀫𑁆𑀳𑀸, 𑀢𑀫𑁆𑀳𑀸 𑀞𑀸𑀦𑀸 𑀅𑀧𑀓𑁆𑀓𑀫𑀺𑀁;

𑀲𑀢𑀺𑀫𑀸 𑀲𑀫𑁆𑀧𑀚𑀸𑀦𑁄𑀳𑀁, 𑀏𑀓𑀫𑀦𑁆𑀢𑀁 𑀉𑀧𑀸𑀯𑀺𑀲𑀺𑀁.

𑁩𑁧𑁮. ‘‘𑀢𑀢𑁄 𑀫𑁂 𑀫𑀦𑀲𑀻𑀓𑀸𑀭𑁄, 𑀬𑁄𑀦𑀺𑀲𑁄 𑀉𑀤𑀧𑀚𑁆𑀚𑀣;

𑀆𑀤𑀻𑀦𑀯𑁄 𑀧𑀸𑀢𑀼𑀭𑀳𑀼, 𑀦𑀺𑀩𑁆𑀩𑀺𑀤𑀸 𑀲𑀫𑀢𑀺𑀝𑁆𑀞𑀣.

𑁩𑁧𑁯. ‘‘𑀢𑀢𑁄 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺 𑀫𑁂, 𑀧𑀲𑁆𑀲 𑀥𑀫𑁆𑀫𑀲𑀼𑀥𑀫𑁆𑀫𑀢𑀁;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

… 𑀭𑀸𑀚𑀤𑀢𑁆𑀢𑁄 𑀣𑁂𑀭𑁄….

𑁨. 𑀲𑀼𑀪𑀽𑀢𑀢𑁆𑀣𑁂𑀭𑀕𑀸𑀣𑀸

𑁩𑁨𑁦. ‘‘𑀅𑀬𑁄𑀕𑁂 𑀬𑀼𑀜𑁆𑀚𑀫𑀢𑁆𑀢𑀸𑀦𑀁, 𑀧𑀼𑀭𑀺𑀲𑁄 𑀓𑀺𑀘𑁆𑀘𑀫𑀺𑀘𑁆𑀙𑀓𑁄 [𑀓𑀺𑀘𑁆𑀘𑀫𑀺𑀘𑁆𑀙𑀢𑁄 (𑀲𑀻.), 𑀓𑀺𑀘𑁆𑀘𑀫𑀺𑀘𑁆𑀙𑀬𑀁 (𑀓𑀢𑁆𑀣𑀘𑀺)];

𑀘𑀭𑀁 𑀘𑁂 𑀦𑀸𑀥𑀺𑀕𑀘𑁆𑀙𑁂𑀬𑁆𑀬, ‘𑀢𑀁 𑀫𑁂 𑀤𑀼𑀩𑁆𑀪𑀕𑀮𑀓𑁆𑀔𑀡𑀁’.

𑁩𑁨𑁧. ‘‘𑀅𑀩𑁆𑀩𑀽𑀴𑁆𑀳𑀁 𑀅𑀖𑀕𑀢𑀁 𑀯𑀺𑀚𑀺𑀢𑀁, 𑀏𑀓𑀜𑁆𑀘𑁂 𑀑𑀲𑁆𑀲𑀚𑁂𑀬𑁆𑀬 𑀓𑀮𑀻𑀯 𑀲𑀺𑀬𑀸;

𑀲𑀩𑁆𑀩𑀸𑀦𑀺𑀧𑀺 𑀘𑁂 𑀑𑀲𑁆𑀲𑀚𑁂𑀬𑁆𑀬 𑀅𑀦𑁆𑀥𑁄𑀯 𑀲𑀺𑀬𑀸, 𑀲𑀫𑀯𑀺𑀲𑀫𑀲𑁆𑀲 𑀅𑀤𑀲𑁆𑀲𑀦𑀢𑁄.

𑁩𑁨𑁨. ‘‘𑀬𑀜𑁆𑀳𑀺 𑀓𑀬𑀺𑀭𑀸 𑀢𑀜𑁆𑀳𑀺 𑀯𑀤𑁂, 𑀬𑀁 𑀦 𑀓𑀬𑀺𑀭𑀸 𑀦 𑀢𑀁 𑀯𑀤𑁂;

𑀅𑀓𑀭𑁄𑀦𑁆𑀢𑀁 𑀪𑀸𑀲𑀫𑀸𑀦𑀁, 𑀧𑀭𑀺𑀚𑀸𑀦𑀦𑁆𑀢𑀺 𑀧𑀡𑁆𑀟𑀺𑀢𑀸.

𑁩𑁨𑁩. [𑀥. 𑀧. 𑁫𑁧 𑀥𑀫𑁆𑀫𑀧𑀤𑁂𑀧𑀺] ‘‘𑀬𑀣𑀸𑀧𑀺 𑀭𑀼𑀘𑀺𑀭𑀁 𑀧𑀼𑀧𑁆𑀨𑀁, 𑀯𑀡𑁆𑀡𑀯𑀦𑁆𑀢𑀁 𑀅𑀕𑀦𑁆𑀥𑀓𑀁;

𑀏𑀯𑀁 𑀲𑀼𑀪𑀸𑀲𑀺𑀢𑀸 𑀯𑀸𑀘𑀸, 𑀅𑀨𑀮𑀸 𑀳𑁄𑀢𑀺 𑀅𑀓𑀼𑀩𑁆𑀩𑀢𑁄.

𑁩𑁨𑁪. [𑀥. 𑀧. 𑁫𑁨] ‘‘𑀬𑀣𑀸𑀧𑀺 𑀭𑀼𑀘𑀺𑀭𑀁 𑀧𑀼𑀧𑁆𑀨𑀁, 𑀯𑀡𑁆𑀡𑀯𑀦𑁆𑀢𑀁 𑀲𑀼𑀕𑀦𑁆𑀥𑀓𑀁 [𑀲𑀕𑀦𑁆𑀥𑀓𑀁 (𑀲𑀻. 𑀲𑁆𑀬𑀸. 𑀧𑀻.)];

𑀏𑀯𑀁 𑀲𑀼𑀪𑀸𑀲𑀺𑀢𑀸 𑀯𑀸𑀘𑀸, 𑀲𑀨𑀮𑀸 𑀳𑁄𑀢𑀺 𑀓𑀼𑀩𑁆𑀩𑀢𑁄’’𑀢𑀺 [𑀲𑀓𑀼𑀩𑁆𑀩𑀢𑁄 (𑀲𑀻. 𑀧𑀻.), 𑀲𑀼𑀓𑀼𑀩𑁆𑀩𑀢𑁄 (𑀲𑁆𑀬𑀸.)].

… 𑀲𑀼𑀪𑀽𑀢𑁄 𑀣𑁂𑀭𑁄….

𑁩. 𑀕𑀺𑀭𑀺𑀫𑀸𑀦𑀦𑁆𑀤𑀢𑁆𑀣𑁂𑀭𑀕𑀸𑀣𑀸

𑁩𑁨𑁫. ‘‘𑀯𑀲𑁆𑀲𑀢𑀺 𑀤𑁂𑀯𑁄 𑀬𑀣𑀸 𑀲𑀼𑀕𑀻𑀢𑀁, 𑀙𑀦𑁆𑀦𑀸 𑀫𑁂 𑀓𑀼𑀝𑀺𑀓𑀸 𑀲𑀼𑀔𑀸 𑀦𑀺𑀯𑀸𑀢𑀸;

𑀢𑀲𑁆𑀲𑀁 𑀯𑀺𑀳𑀭𑀸𑀫𑀺 𑀯𑀽𑀧𑀲𑀦𑁆𑀢𑁄, 𑀅𑀣 𑀘𑁂 𑀧𑀢𑁆𑀣𑀬𑀲𑀻 𑀧𑀯𑀲𑁆𑀲 𑀤𑁂𑀯.

𑁩𑁨𑁬. ‘‘𑀯𑀲𑁆𑀲𑀢𑀺 𑀤𑁂𑀯𑁄 𑀬𑀣𑀸 𑀲𑀼𑀕𑀻𑀢𑀁, 𑀙𑀦𑁆𑀦𑀸 𑀫𑁂 𑀓𑀼𑀝𑀺𑀓𑀸 𑀲𑀼𑀔𑀸 𑀦𑀺𑀯𑀸𑀢𑀸;

𑀢𑀲𑁆𑀲𑀁 𑀯𑀺𑀳𑀭𑀸𑀫𑀺 𑀲𑀦𑁆𑀢𑀘𑀺𑀢𑁆𑀢𑁄, 𑀅𑀣 𑀘𑁂 𑀧𑀢𑁆𑀣𑀬𑀲𑀻 𑀧𑀯𑀲𑁆𑀲 𑀤𑁂𑀯.

𑁩𑁨𑁭. ‘‘𑀯𑀲𑁆𑀲𑀢𑀺 𑀤𑁂𑀯𑁄…𑀧𑁂… 𑀢𑀲𑁆𑀲𑀁 𑀯𑀺𑀳𑀭𑀸𑀫𑀺 𑀯𑀻𑀢𑀭𑀸𑀕𑁄…𑀧𑁂….

𑁩𑁨𑁮. ‘‘𑀯𑀲𑁆𑀲𑀢𑀺 𑀤𑁂𑀯𑁄…𑀧𑁂… 𑀢𑀲𑁆𑀲𑀁 𑀯𑀺𑀳𑀭𑀸𑀫𑀺 𑀯𑀻𑀢𑀤𑁄𑀲𑁄…𑀧𑁂….

𑁩𑁨𑁯. ‘‘𑀯𑀲𑁆𑀲𑀢𑀺 𑀤𑁂𑀯𑁄…𑀧𑁂… 𑀢𑀲𑁆𑀲𑀁 𑀯𑀺𑀳𑀭𑀸𑀫𑀺 𑀯𑀻𑀢𑀫𑁄𑀳𑁄;

𑀅𑀣 𑀘𑁂 𑀧𑀢𑁆𑀣𑀬𑀲𑀻 𑀧𑀯𑀲𑁆𑀲 𑀤𑁂𑀯𑀸’’𑀢𑀺.

… 𑀕𑀺𑀭𑀺𑀫𑀸𑀦𑀦𑁆𑀤𑁄 𑀣𑁂𑀭𑁄….

𑁪. 𑀲𑀼𑀫𑀦𑀢𑁆𑀣𑁂𑀭𑀕𑀸𑀣𑀸

𑁩𑁩𑁦. ‘‘𑀬𑀁 𑀧𑀢𑁆𑀣𑀬𑀸𑀦𑁄 𑀥𑀫𑁆𑀫𑁂𑀲𑀼, 𑀉𑀧𑀚𑁆𑀛𑀸𑀬𑁄 𑀅𑀦𑀼𑀕𑁆𑀕𑀳𑀺;

𑀅𑀫𑀢𑀁 𑀅𑀪𑀺𑀓𑀗𑁆𑀔𑀦𑁆𑀢𑀁, 𑀓𑀢𑀁 𑀓𑀢𑁆𑀢𑀩𑁆𑀩𑀓𑀁 𑀫𑀬𑀸.

𑁩𑁩𑁧. ‘‘𑀅𑀦𑀼𑀧𑁆𑀧𑀢𑁆𑀢𑁄 𑀲𑀘𑁆𑀙𑀺𑀓𑀢𑁄, 𑀲𑀬𑀁 𑀥𑀫𑁆𑀫𑁄 𑀅𑀦𑀻𑀢𑀺𑀳𑁄;

𑀯𑀺𑀲𑀼𑀤𑁆𑀥𑀺𑀜𑀸𑀡𑁄 𑀦𑀺𑀓𑁆𑀓𑀗𑁆𑀔𑁄, 𑀩𑁆𑀬𑀸𑀓𑀭𑁄𑀫𑀺 𑀢𑀯𑀦𑁆𑀢𑀺𑀓𑁂.

𑁩𑁩𑁨. ‘‘𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀚𑀸𑀦𑀸𑀫𑀺, 𑀤𑀺𑀩𑁆𑀩𑀘𑀓𑁆𑀔𑀼 𑀯𑀺𑀲𑁄𑀥𑀺𑀢𑀁;

𑀲𑀤𑀢𑁆𑀣𑁄 𑀫𑁂 𑀅𑀦𑀼𑀧𑁆𑀧𑀢𑁆𑀢𑁄, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁩𑁩𑁩. ‘‘𑀅𑀧𑁆𑀧𑀫𑀢𑁆𑀢𑀲𑁆𑀲 𑀫𑁂 𑀲𑀺𑀓𑁆𑀔𑀸, 𑀲𑀼𑀲𑁆𑀲𑀼𑀢𑀸 𑀢𑀯 𑀲𑀸𑀲𑀦𑁂;

𑀲𑀩𑁆𑀩𑁂 𑀫𑁂 𑀆𑀲𑀯𑀸 𑀔𑀻𑀡𑀸, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄.

𑁩𑁩𑁪. ‘‘𑀅𑀦𑀼𑀲𑀸𑀲𑀺 𑀫𑀁 𑀅𑀭𑀺𑀬𑀯𑀢𑀸, 𑀅𑀦𑀼𑀓𑀫𑁆𑀧𑀺 𑀅𑀦𑀼𑀕𑁆𑀕𑀳𑀺;

𑀅𑀫𑁄𑀖𑁄 𑀢𑀼𑀬𑁆𑀳𑀫𑁄𑀯𑀸𑀤𑁄, 𑀅𑀦𑁆𑀢𑁂𑀯𑀸𑀲𑀺𑀫𑁆𑀳𑀺 𑀲𑀺𑀓𑁆𑀔𑀺𑀢𑁄’’𑀢𑀺.

… 𑀲𑀼𑀫𑀦𑁄 𑀣𑁂𑀭𑁄….

𑁫. 𑀯𑀟𑁆𑀠𑀢𑁆𑀣𑁂𑀭𑀕𑀸𑀣𑀸

𑁩𑁩𑁫. ‘‘𑀲𑀸𑀥𑀽 𑀳𑀺 𑀓𑀺𑀭 𑀫𑁂 𑀫𑀸𑀢𑀸, 𑀧𑀢𑁄𑀤𑀁 𑀉𑀧𑀤𑀁𑀲𑀬𑀺;

𑀬𑀲𑁆𑀲𑀸𑀳𑀁 𑀯𑀘𑀦𑀁 𑀲𑀼𑀢𑁆𑀯𑀸, 𑀅𑀦𑀼𑀲𑀺𑀝𑁆𑀞𑁄 𑀚𑀦𑁂𑀢𑁆𑀢𑀺𑀬𑀸;

𑀆𑀭𑀤𑁆𑀥𑀯𑀻𑀭𑀺𑀬𑁄 𑀧𑀳𑀺𑀢𑀢𑁆𑀢𑁄, 𑀧𑀢𑁆𑀢𑁄 𑀲𑀫𑁆𑀩𑁄𑀥𑀺𑀫𑀼𑀢𑁆𑀢𑀫𑀁.

𑁩𑁩𑁬. ‘‘𑀅𑀭𑀳𑀸 𑀤𑀓𑁆𑀔𑀺𑀡𑁂𑀬𑁆𑀬𑁄𑀫𑁆𑀳𑀺, 𑀢𑁂𑀯𑀺𑀚𑁆𑀚𑁄 𑀅𑀫𑀢𑀤𑁆𑀤𑀲𑁄;

𑀚𑁂𑀢𑁆𑀯𑀸 𑀦𑀫𑀼𑀘𑀺𑀦𑁄 𑀲𑁂𑀦𑀁, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁩𑁩𑁭. ‘‘𑀅𑀚𑁆𑀛𑀢𑁆𑀢𑀜𑁆𑀘 𑀩𑀳𑀺𑀤𑁆𑀥𑀸 𑀘, 𑀬𑁂 𑀫𑁂 𑀯𑀺𑀚𑁆𑀚𑀺𑀁𑀲𑀼 𑀆𑀲𑀯𑀸;

𑀲𑀩𑁆𑀩𑁂 𑀅𑀲𑁂𑀲𑀸 𑀉𑀘𑁆𑀙𑀺𑀦𑁆𑀦𑀸, 𑀦 𑀘 𑀉𑀧𑁆𑀧𑀚𑁆𑀚𑀭𑁂 𑀧𑀼𑀦.

𑁩𑁩𑁮. ‘‘𑀯𑀺𑀲𑀸𑀭𑀤𑀸 𑀔𑁄 𑀪𑀕𑀺𑀦𑀻, 𑀏𑀢𑀫𑀢𑁆𑀣𑀁 𑀅𑀪𑀸𑀲𑀬𑀺;

‘𑀅𑀧𑀺𑀳𑀸 𑀦𑀽𑀦 𑀫𑀬𑀺𑀧𑀺, 𑀯𑀦𑀣𑁄 𑀢𑁂 𑀦 𑀯𑀺𑀚𑁆𑀚𑀢𑀺’.

𑁩𑁩𑁯. ‘‘𑀧𑀭𑀺𑀬𑀦𑁆𑀢𑀓𑀢𑀁 𑀤𑀼𑀓𑁆𑀔𑀁, 𑀅𑀦𑁆𑀢𑀺𑀫𑁄𑀬𑀁 𑀲𑀫𑀼𑀲𑁆𑀲𑀬𑁄;

𑀚𑀸𑀢𑀺𑀫𑀭𑀡𑀲𑀁𑀲𑀸𑀭𑁄, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄’’𑀢𑀺.

… 𑀯𑀟𑁆𑀠𑁄 𑀣𑁂𑀭𑁄….

𑁬. 𑀦𑀤𑀻𑀓𑀲𑁆𑀲𑀧𑀢𑁆𑀣𑁂𑀭𑀕𑀸𑀣𑀸

𑁩𑁪𑁦. ‘‘𑀅𑀢𑁆𑀣𑀸𑀬 𑀯𑀢 𑀫𑁂 𑀩𑀼𑀤𑁆𑀥𑁄, 𑀦𑀤𑀺𑀁 𑀦𑁂𑀭𑀜𑁆𑀚𑀭𑀁 𑀅𑀕𑀸;

𑀬𑀲𑁆𑀲𑀸𑀳𑀁 𑀥𑀫𑁆𑀫𑀁 𑀲𑀼𑀢𑁆𑀯𑀸𑀦, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀯𑀺𑀯𑀚𑁆𑀚𑀬𑀺𑀁.

𑁩𑁪𑁧. ‘‘𑀬𑀚𑀺𑀁 𑀉𑀘𑁆𑀘𑀸𑀯𑀘𑁂 𑀬𑀜𑁆𑀜𑁂, 𑀅𑀕𑁆𑀕𑀺𑀳𑀼𑀢𑁆𑀢𑀁 𑀚𑀼𑀳𑀺𑀁 𑀅𑀳𑀁;

‘𑀏𑀲𑀸 𑀲𑀼𑀤𑁆𑀥𑀻’𑀢𑀺 𑀫𑀜𑁆𑀜𑀦𑁆𑀢𑁄, 𑀅𑀦𑁆𑀥𑀪𑀽𑀢𑁄 [𑀅𑀦𑁆𑀥𑀻𑀪𑀽𑀢𑁄 (𑀓.)] 𑀧𑀼𑀣𑀼𑀚𑁆𑀚𑀦𑁄.

𑁩𑁪𑁨. ‘‘𑀤𑀺𑀝𑁆𑀞𑀺𑀕𑀳𑀦𑀧𑀓𑁆𑀔𑀦𑁆𑀤𑁄 [𑀧𑀓𑁆𑀔𑀦𑁆𑀢𑁄 (𑀲𑀻.), 𑀧𑀓𑁆𑀔𑀦𑁆𑀦𑁄 (𑀲𑁆𑀬𑀸. 𑀧𑀻.)], 𑀧𑀭𑀸𑀫𑀸𑀲𑁂𑀦 𑀫𑁄𑀳𑀺𑀢𑁄;

𑀅𑀲𑀼𑀤𑁆𑀥𑀺𑀁 𑀫𑀜𑁆𑀜𑀺𑀲𑀁 𑀲𑀼𑀤𑁆𑀥𑀺𑀁, 𑀅𑀦𑁆𑀥𑀪𑀽𑀢𑁄 𑀅𑀯𑀺𑀤𑁆𑀤𑀲𑀼.

𑁩𑁪𑁩. ‘‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀧𑀳𑀻𑀦𑀸 𑀫𑁂, 𑀪𑀯𑀸 𑀲𑀩𑁆𑀩𑁂 𑀧𑀤𑀸𑀮𑀺𑀢𑀸 [𑀯𑀺𑀤𑀸𑀮𑀺𑀢𑀸 (𑀓.)];

𑀚𑀼𑀳𑀸𑀫𑀺 𑀤𑀓𑁆𑀔𑀺𑀡𑁂𑀬𑁆𑀬𑀕𑁆𑀕𑀺𑀁, 𑀦𑀫𑀲𑁆𑀲𑀸𑀫𑀺 𑀢𑀣𑀸𑀕𑀢𑀁.

𑁩𑁪𑁪. ‘‘𑀫𑁄𑀳𑀸 𑀲𑀩𑁆𑀩𑁂 𑀧𑀳𑀻𑀦𑀸 𑀫𑁂, 𑀪𑀯𑀢𑀡𑁆𑀳𑀸 𑀧𑀤𑀸𑀮𑀺𑀢𑀸;

𑀯𑀺𑀓𑁆𑀔𑀻𑀡𑁄 𑀚𑀸𑀢𑀺𑀲𑀁𑀲𑀸𑀭𑁄, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄’’𑀢𑀺.

… 𑀦𑀤𑀻𑀓𑀲𑁆𑀲𑀧𑁄 𑀣𑁂𑀭𑁄….

𑁭. 𑀕𑀬𑀸𑀓𑀲𑁆𑀲𑀧𑀢𑁆𑀣𑁂𑀭𑀕𑀸𑀣𑀸

𑁩𑁪𑁫. ‘‘𑀧𑀸𑀢𑁄 𑀫𑀚𑁆𑀛𑀦𑁆𑀳𑀺𑀓𑀁 𑀲𑀸𑀬𑀁, 𑀢𑀺𑀓𑁆𑀔𑀢𑁆𑀢𑀼𑀁 𑀤𑀺𑀯𑀲𑀲𑁆𑀲𑀳𑀁;

𑀑𑀢𑀭𑀺𑀁 𑀉𑀤𑀓𑀁 𑀲𑁄𑀳𑀁, 𑀕𑀬𑀸𑀬 𑀕𑀬𑀨𑀕𑁆𑀕𑀼𑀬𑀸.

𑁩𑁪𑁬. ‘‘‘𑀬𑀁 𑀫𑀬𑀸 𑀧𑀓𑀢𑀁 𑀧𑀸𑀧𑀁, 𑀧𑀼𑀩𑁆𑀩𑁂 𑀅𑀜𑁆𑀜𑀸𑀲𑀼 𑀚𑀸𑀢𑀺𑀲𑀼;

𑀢𑀁 𑀤𑀸𑀦𑀻𑀥 𑀧𑀯𑀸𑀳𑁂𑀫𑀺’, 𑀏𑀯𑀁𑀤𑀺𑀝𑁆𑀞𑀺 𑀧𑀼𑀭𑁂 𑀅𑀳𑀼𑀁.

𑁩𑁪𑁭. ‘‘𑀲𑀼𑀢𑁆𑀯𑀸 𑀲𑀼𑀪𑀸𑀲𑀺𑀢𑀁 𑀯𑀸𑀘𑀁, 𑀥𑀫𑁆𑀫𑀢𑁆𑀣𑀲𑀳𑀺𑀢𑀁 𑀧𑀤𑀁;

𑀢𑀣𑀁 𑀬𑀸𑀣𑀸𑀯𑀓𑀁 𑀅𑀢𑁆𑀣𑀁, 𑀬𑁄𑀦𑀺𑀲𑁄 𑀧𑀘𑁆𑀘𑀯𑁂𑀓𑁆𑀔𑀺𑀲𑀁;

𑁩𑁪𑁮. ‘‘𑀦𑀺𑀦𑁆𑀳𑀸𑀢𑀲𑀩𑁆𑀩𑀧𑀸𑀧𑁄𑀫𑁆𑀳𑀺, 𑀦𑀺𑀫𑁆𑀫𑀮𑁄 𑀧𑀬𑀢𑁄 𑀲𑀼𑀘𑀺;

𑀲𑀼𑀤𑁆𑀥𑁄 𑀲𑀼𑀤𑁆𑀥𑀲𑁆𑀲 𑀤𑀸𑀬𑀸𑀤𑁄, 𑀧𑀼𑀢𑁆𑀢𑁄 𑀩𑀼𑀤𑁆𑀥𑀲𑁆𑀲 𑀑𑀭𑀲𑁄.

𑁩𑁪𑁯. ‘‘𑀑𑀕𑀬𑁆𑀳𑀝𑁆𑀞𑀗𑁆𑀕𑀺𑀓𑀁 𑀲𑁄𑀢𑀁, 𑀲𑀩𑁆𑀩𑀧𑀸𑀧𑀁 𑀧𑀯𑀸𑀳𑀬𑀺𑀁;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀚𑁆𑀛𑀕𑀫𑀺𑀁, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

… 𑀕𑀬𑀸𑀓𑀲𑁆𑀲𑀧𑁄 𑀣𑁂𑀭𑁄….

𑁮. 𑀯𑀓𑁆𑀓𑀮𑀺𑀢𑁆𑀣𑁂𑀭𑀕𑀸𑀣𑀸

𑁩𑁫𑁦. ‘‘𑀯𑀸𑀢𑀭𑁄𑀕𑀸𑀪𑀺𑀦𑀻𑀢𑁄 𑀢𑁆𑀯𑀁, 𑀯𑀺𑀳𑀭𑀁 𑀓𑀸𑀦𑀦𑁂 𑀯𑀦𑁂;

𑀧𑀯𑀺𑀝𑁆𑀞𑀕𑁄𑀘𑀭𑁂 𑀮𑀽𑀔𑁂, 𑀓𑀣𑀁 𑀪𑀺𑀓𑁆𑀔𑀼 𑀓𑀭𑀺𑀲𑁆𑀲𑀲𑀺.

𑁩𑁫𑁧. ‘‘𑀧𑀻𑀢𑀺𑀲𑀼𑀔𑁂𑀦 𑀯𑀺𑀧𑀼𑀮𑁂𑀦, 𑀨𑀭𑀫𑀸𑀦𑁄 𑀲𑀫𑀼𑀲𑁆𑀲𑀬𑀁;

𑀮𑀽𑀔𑀫𑁆𑀧𑀺 𑀅𑀪𑀺𑀲𑀫𑁆𑀪𑁄𑀦𑁆𑀢𑁄, 𑀯𑀺𑀳𑀭𑀺𑀲𑁆𑀲𑀸𑀫𑀺 𑀓𑀸𑀦𑀦𑁂.

𑁩𑁫𑁨. ‘‘𑀪𑀸𑀯𑁂𑀦𑁆𑀢𑁄 𑀲𑀢𑀺𑀧𑀝𑁆𑀞𑀸𑀦𑁂, 𑀇𑀦𑁆𑀤𑁆𑀭𑀺𑀬𑀸𑀦𑀺 𑀩𑀮𑀸𑀦𑀺 𑀘;

𑀩𑁄𑀚𑁆𑀛𑀗𑁆𑀕𑀸𑀦𑀺 𑀘 𑀪𑀸𑀯𑁂𑀦𑁆𑀢𑁄, 𑀯𑀺𑀳𑀭𑀺𑀲𑁆𑀲𑀸𑀫𑀺 𑀓𑀸𑀦𑀦𑁂.

𑁩𑁫𑁩. ‘‘𑀆𑀭𑀤𑁆𑀥𑀯𑀻𑀭𑀺𑀬𑁂 𑀧𑀳𑀺𑀢𑀢𑁆𑀢𑁂, 𑀦𑀺𑀘𑁆𑀘𑀁 𑀤𑀴𑁆𑀳𑀧𑀭𑀓𑁆𑀓𑀫𑁂 [𑀆𑀭𑀤𑁆𑀥𑀯𑀻𑀭𑀺𑀬𑁄 𑀧𑀳𑀺𑀢𑀢𑁆𑀢𑁄, 𑀦𑀺𑀘𑁆𑀘𑀁 𑀤𑀴𑁆𑀳𑀧𑀭𑀓𑁆𑀓𑀫𑁄 (𑀲𑀻.)];

𑀲𑀫𑀕𑁆𑀕𑁂 𑀲𑀳𑀺𑀢𑁂 𑀤𑀺𑀲𑁆𑀯𑀸, 𑀯𑀺𑀳𑀭𑀺𑀲𑁆𑀲𑀸𑀫𑀺 𑀓𑀸𑀦𑀦𑁂.

𑁩𑁫𑁪. ‘‘𑀅𑀦𑀼𑀲𑁆𑀲𑀭𑀦𑁆𑀢𑁄 𑀲𑀫𑁆𑀩𑀼𑀤𑁆𑀥𑀁, 𑀅𑀕𑁆𑀕𑀁 𑀤𑀦𑁆𑀢𑀁 𑀲𑀫𑀸𑀳𑀺𑀢𑀁;

𑀅𑀢𑀦𑁆𑀤𑀺𑀢𑁄 𑀭𑀢𑁆𑀢𑀺𑀦𑁆𑀤𑀺𑀯𑀁, 𑀯𑀺𑀳𑀭𑀺𑀲𑁆𑀲𑀸𑀫𑀺 𑀓𑀸𑀦𑀦𑁂’’𑀢𑀺.

… 𑀯𑀓𑁆𑀓𑀮𑀺𑀢𑁆𑀣𑁂𑀭𑁄….

𑁯. 𑀯𑀺𑀚𑀺𑀢𑀲𑁂𑀦𑀢𑁆𑀣𑁂𑀭𑀕𑀸𑀣𑀸

𑁩𑁫𑁫. ‘‘𑀑𑀮𑀕𑁆𑀕𑁂𑀲𑁆𑀲𑀸𑀫𑀺 𑀢𑁂 𑀘𑀺𑀢𑁆𑀢, 𑀆𑀡𑀺𑀤𑁆𑀯𑀸𑀭𑁂𑀯 𑀳𑀢𑁆𑀣𑀺𑀦𑀁;

𑀦 𑀢𑀁 𑀧𑀸𑀧𑁂 𑀦𑀺𑀬𑁄𑀚𑁂𑀲𑁆𑀲𑀁, 𑀓𑀸𑀫𑀚𑀸𑀮 [𑀓𑀸𑀫𑀚𑀸𑀮𑀁 (𑀲𑁆𑀬𑀸.)] 𑀲𑀭𑀻𑀭𑀚 [𑀲𑀭𑀻𑀭𑀚𑀁 (𑀲𑁆𑀬𑀸. 𑀓.)].

𑁩𑁫𑁬. ‘‘𑀢𑁆𑀯𑀁 𑀑𑀮𑀕𑁆𑀕𑁄 𑀦 𑀕𑀘𑁆𑀙𑀲𑀺 [𑀦 𑀕𑀜𑁆𑀙𑀺𑀲𑀺 (𑀧𑀻)], 𑀤𑁆𑀯𑀸𑀭𑀯𑀺𑀯𑀭𑀁 𑀕𑀚𑁄𑀯 𑀅𑀮𑀪𑀦𑁆𑀢𑁄;

𑀦 𑀘 𑀘𑀺𑀢𑁆𑀢𑀓𑀮𑀺 𑀧𑀼𑀦𑀧𑁆𑀧𑀼𑀦𑀁, 𑀧𑀲𑀓𑁆𑀓 [𑀧𑀲𑀳𑀁 (𑀲𑀻. 𑀲𑁆𑀬𑀸. 𑀧𑀻.)] 𑀧𑀸𑀧𑀭𑀢𑁄 𑀘𑀭𑀺𑀲𑁆𑀲𑀲𑀺.

𑁩𑁫𑁭. ‘‘𑀬𑀣𑀸 𑀓𑀼𑀜𑁆𑀚𑀭𑀁 𑀅𑀤𑀦𑁆𑀢𑀁, 𑀦𑀯𑀕𑁆𑀕𑀳𑀫𑀗𑁆𑀓𑀼𑀲𑀕𑁆𑀕𑀳𑁄;

𑀩𑀮𑀯𑀸 𑀆𑀯𑀢𑁆𑀢𑁂𑀢𑀺 𑀅𑀓𑀸𑀫𑀁, 𑀏𑀯𑀁 𑀆𑀯𑀢𑁆𑀢𑀬𑀺𑀲𑁆𑀲𑀁 𑀢𑀁.

𑁩𑁫𑁮. ‘‘𑀬𑀣𑀸 𑀯𑀭𑀳𑀬𑀤𑀫𑀓𑀼𑀲𑀮𑁄, 𑀲𑀸𑀭𑀣𑀺 𑀧𑀯𑀭𑁄 𑀤𑀫𑁂𑀢𑀺 𑀆𑀚𑀜𑁆𑀜𑀁;

𑀏𑀯𑀁 𑀤𑀫𑀬𑀺𑀲𑁆𑀲𑀁 𑀢𑀁, 𑀧𑀢𑀺𑀝𑁆𑀞𑀺𑀢𑁄 𑀧𑀜𑁆𑀘𑀲𑀼 𑀩𑀮𑁂𑀲𑀼.

𑁩𑁫𑁯. ‘‘𑀲𑀢𑀺𑀬𑀸 𑀢𑀁 𑀦𑀺𑀩𑀦𑁆𑀥𑀺𑀲𑁆𑀲𑀁, 𑀧𑀬𑀼𑀢𑁆𑀢𑁄 𑀢𑁂 𑀤𑀫𑁂𑀲𑁆𑀲𑀸𑀫𑀺 [𑀧𑀬𑀢𑀢𑁆𑀢𑁄 𑀯𑁄𑀤𑀧𑁂𑀲𑁆𑀲𑀸𑀫𑀺 (𑀲𑀻.)];

𑀯𑀻𑀭𑀺𑀬𑀥𑀼𑀭𑀦𑀺𑀕𑁆𑀕𑀳𑀺𑀢𑁄, 𑀦 𑀬𑀺𑀢𑁄 𑀤𑀽𑀭𑀁 𑀕𑀫𑀺𑀲𑁆𑀲𑀲𑁂 𑀘𑀺𑀢𑁆𑀢𑀸’’𑀢𑀺.

… 𑀯𑀺𑀚𑀺𑀢𑀲𑁂𑀦𑁄 𑀣𑁂𑀭𑁄….

𑁧𑁦. 𑀬𑀲𑀤𑀢𑁆𑀢𑀢𑁆𑀣𑁂𑀭𑀕𑀸𑀣𑀸

𑁩𑁬𑁦. ‘‘𑀉𑀧𑀸𑀭𑀫𑁆𑀪𑀘𑀺𑀢𑁆𑀢𑁄 𑀤𑀼𑀫𑁆𑀫𑁂𑀥𑁄, 𑀲𑀼𑀡𑀸𑀢𑀺 𑀚𑀺𑀦𑀲𑀸𑀲𑀦𑀁;

𑀆𑀭𑀓𑀸 𑀳𑁄𑀢𑀺 𑀲𑀤𑁆𑀥𑀫𑁆𑀫𑀸, 𑀦𑀪𑀲𑁄 𑀧𑀣𑀯𑀻 𑀬𑀣𑀸.

𑁩𑁬𑁧. ‘‘𑀉𑀧𑀸𑀭𑀫𑁆𑀪𑀘𑀺𑀢𑁆𑀢𑁄 𑀤𑀼𑀫𑁆𑀫𑁂𑀥𑁄, 𑀲𑀼𑀡𑀸𑀢𑀺 𑀚𑀺𑀦𑀲𑀸𑀲𑀦𑀁;

𑀧𑀭𑀺𑀳𑀸𑀬𑀢𑀺 𑀲𑀤𑁆𑀥𑀫𑁆𑀫𑀸, 𑀓𑀸𑀴𑀧𑀓𑁆𑀔𑁂𑀯 𑀘𑀦𑁆𑀤𑀺𑀫𑀸.

𑁩𑁬𑁨. ‘‘𑀉𑀧𑀸𑀭𑀫𑁆𑀪𑀘𑀺𑀢𑁆𑀢𑁄 𑀤𑀼𑀫𑁆𑀫𑁂𑀥𑁄, 𑀲𑀼𑀡𑀸𑀢𑀺 𑀚𑀺𑀦𑀲𑀸𑀲𑀦𑀁;

𑀧𑀭𑀺𑀲𑀼𑀲𑁆𑀲𑀢𑀺 𑀲𑀤𑁆𑀥𑀫𑁆𑀫𑁂, 𑀫𑀘𑁆𑀙𑁄 𑀅𑀧𑁆𑀧𑁄𑀤𑀓𑁂 𑀬𑀣𑀸.

𑁩𑁬𑁩. ‘‘𑀉𑀧𑀸𑀭𑀫𑁆𑀪𑀘𑀺𑀢𑁆𑀢𑁄 𑀤𑀼𑀫𑁆𑀫𑁂𑀥𑁄, 𑀲𑀼𑀡𑀸𑀢𑀺 𑀚𑀺𑀦𑀲𑀸𑀲𑀦𑀁;

𑀦 𑀯𑀺𑀭𑀽𑀳𑀢𑀺 𑀲𑀤𑁆𑀥𑀫𑁆𑀫𑁂, 𑀔𑁂𑀢𑁆𑀢𑁂 𑀩𑀻𑀚𑀁𑀯 𑀧𑀽𑀢𑀺𑀓𑀁.

𑁩𑁬𑁪. ‘‘𑀬𑁄 𑀘 𑀢𑀼𑀝𑁆𑀞𑁂𑀦 𑀘𑀺𑀢𑁆𑀢𑁂𑀦, 𑀲𑀼𑀡𑀸𑀢𑀺 𑀚𑀺𑀦𑀲𑀸𑀲𑀦𑀁;

𑀔𑁂𑀧𑁂𑀢𑁆𑀯𑀸 𑀆𑀲𑀯𑁂 𑀲𑀩𑁆𑀩𑁂, 𑀲𑀘𑁆𑀙𑀺𑀓𑀢𑁆𑀯𑀸 𑀅𑀓𑀼𑀧𑁆𑀧𑀢𑀁;

𑀧𑀧𑁆𑀧𑀼𑀬𑁆𑀬 𑀧𑀭𑀫𑀁 𑀲𑀦𑁆𑀢𑀺𑀁, 𑀧𑀭𑀺𑀦𑀺𑀩𑁆𑀩𑀸𑀢𑀺𑀦𑀸𑀲𑀯𑁄’’𑀢𑀺.

… 𑀬𑀲𑀤𑀢𑁆𑀢𑁄 𑀣𑁂𑀭𑁄….

𑁧𑁧. 𑀲𑁄𑀡𑀓𑀼𑀝𑀺𑀓𑀡𑁆𑀡𑀢𑁆𑀣𑁂𑀭𑀕𑀸𑀣𑀸

𑁩𑁬𑁫. ‘‘𑀉𑀧𑀲𑀫𑁆𑀧𑀤𑀸 𑀘 𑀫𑁂 𑀮𑀤𑁆𑀥𑀸, 𑀯𑀺𑀫𑀼𑀢𑁆𑀢𑁄 𑀘𑀫𑁆𑀳𑀺 𑀅𑀦𑀸𑀲𑀯𑁄;

𑀲𑁄 𑀘 𑀫𑁂 𑀪𑀕𑀯𑀸 𑀤𑀺𑀝𑁆𑀞𑁄, 𑀯𑀺𑀳𑀸𑀭𑁂 𑀘 𑀲𑀳𑀸𑀯𑀲𑀺𑀁.

𑁩𑁬𑁬. ‘‘𑀩𑀳𑀼𑀤𑁂𑀯 𑀭𑀢𑁆𑀢𑀺𑀁 𑀪𑀕𑀯𑀸, 𑀅𑀩𑁆𑀪𑁄𑀓𑀸𑀲𑁂𑀢𑀺𑀦𑀸𑀫𑀬𑀺;

𑀯𑀺𑀳𑀸𑀭𑀓𑀼𑀲𑀮𑁄 𑀲𑀢𑁆𑀣𑀸, 𑀯𑀺𑀳𑀸𑀭𑀁 𑀧𑀸𑀯𑀺𑀲𑀻 𑀢𑀤𑀸.

𑁩𑁬𑁭. ‘‘𑀲𑀦𑁆𑀣𑀭𑀺𑀢𑁆𑀯𑀸𑀦 𑀲𑀗𑁆𑀖𑀸𑀝𑀺𑀁, 𑀲𑁂𑀬𑁆𑀬𑀁 𑀓𑀧𑁆𑀧𑁂𑀲𑀺 𑀕𑁄𑀢𑀫𑁄;

𑀲𑀻𑀳𑁄 𑀲𑁂𑀮𑀕𑀼𑀳𑀸𑀬𑀁𑀯, 𑀧𑀳𑀻𑀦𑀪𑀬𑀪𑁂𑀭𑀯𑁄.

𑁩𑁬𑁮. ‘‘𑀢𑀢𑁄 𑀓𑀮𑁆𑀬𑀸𑀡𑀯𑀸𑀓𑁆𑀓𑀭𑀡𑁄, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑀸𑀯𑀓𑁄;

𑀲𑁄𑀡𑁄 𑀅𑀪𑀸𑀲𑀺 𑀲𑀤𑁆𑀥𑀫𑁆𑀫𑀁, 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲 𑀲𑀫𑁆𑀫𑀼𑀔𑀸.

𑁩𑁬𑁯. ‘‘𑀧𑀜𑁆𑀘𑀓𑁆𑀔𑀦𑁆𑀥𑁂 𑀧𑀭𑀺𑀜𑁆𑀜𑀸𑀬, 𑀪𑀸𑀯𑀬𑀺𑀢𑁆𑀯𑀸𑀦 𑀅𑀜𑁆𑀚𑀲𑀁;

𑀧𑀧𑁆𑀧𑀼𑀬𑁆𑀬 𑀧𑀭𑀫𑀁 𑀲𑀦𑁆𑀢𑀺𑀁, 𑀧𑀭𑀺𑀦𑀺𑀩𑁆𑀩𑀺𑀲𑁆𑀲𑀢𑁆𑀬𑀦𑀸𑀲𑀯𑁄’’𑀢𑀺.

… 𑀲𑁄𑀡𑁄 𑀓𑀼𑀝𑀺𑀓𑀡𑁆𑀡𑀣𑁂𑀭𑁄….

𑁧𑁨. 𑀓𑁄𑀲𑀺𑀬𑀢𑁆𑀣𑁂𑀭𑀕𑀸𑀣𑀸

𑁩𑁭𑁦. ‘‘𑀬𑁄 𑀯𑁂 𑀕𑀭𑀽𑀦𑀁 𑀯𑀘𑀦𑀜𑁆𑀜𑀼 𑀥𑀻𑀭𑁄, 𑀯𑀲𑁂 𑀘 𑀢𑀫𑁆𑀳𑀺 𑀚𑀦𑀬𑁂𑀣 𑀧𑁂𑀫𑀁;

𑀲𑁄 𑀪𑀢𑁆𑀢𑀺𑀫𑀸 𑀦𑀸𑀫 𑀘 𑀳𑁄𑀢𑀺 𑀧𑀡𑁆𑀟𑀺𑀢𑁄, 𑀜𑀢𑁆𑀯𑀸 𑀘 𑀥𑀫𑁆𑀫𑁂𑀲𑀼 𑀯𑀺𑀲𑁂𑀲𑀺 𑀅𑀲𑁆𑀲.

𑁩𑁭𑁧. ‘‘𑀬𑀁 𑀆𑀧𑀤𑀸 𑀉𑀧𑁆𑀧𑀢𑀺𑀢𑀸 𑀉𑀴𑀸𑀭𑀸, 𑀦𑀓𑁆𑀔𑀫𑁆𑀪𑀬𑀦𑁆𑀢𑁂 𑀧𑀝𑀺𑀲𑀗𑁆𑀔𑀬𑀦𑁆𑀢𑀁;

𑀲𑁄 𑀣𑀸𑀫𑀯𑀸 𑀦𑀸𑀫 𑀘 𑀳𑁄𑀢𑀺 𑀧𑀡𑁆𑀟𑀺𑀢𑁄, 𑀜𑀢𑁆𑀯𑀸 𑀘 𑀥𑀫𑁆𑀫𑁂𑀲𑀼 𑀯𑀺𑀲𑁂𑀲𑀺 𑀅𑀲𑁆𑀲.

𑁩𑁭𑁨. ‘‘𑀬𑁄 𑀯𑁂 𑀲𑀫𑀼𑀤𑁆𑀤𑁄𑀯 𑀞𑀺𑀢𑁄 𑀅𑀦𑁂𑀚𑁄, 𑀕𑀫𑁆𑀪𑀻𑀭𑀧𑀜𑁆𑀜𑁄 𑀦𑀺𑀧𑀼𑀡𑀢𑁆𑀣𑀤𑀲𑁆𑀲𑀻;

𑀅𑀲𑀁𑀳𑀸𑀭𑀺𑀬𑁄 𑀦𑀸𑀫 𑀘 𑀳𑁄𑀢𑀺 𑀧𑀡𑁆𑀟𑀺𑀢𑁄, 𑀜𑀢𑁆𑀯𑀸 𑀘 𑀥𑀫𑁆𑀫𑁂𑀲𑀼 𑀯𑀺𑀲𑁂𑀲𑀺 𑀅𑀲𑁆𑀲.

𑁩𑁭𑁩. ‘‘𑀩𑀳𑀼𑀲𑁆𑀲𑀼𑀢𑁄 𑀥𑀫𑁆𑀫𑀥𑀭𑁄 𑀘 𑀳𑁄𑀢𑀺, 𑀥𑀫𑁆𑀫𑀲𑁆𑀲 𑀳𑁄𑀢𑀺 𑀅𑀦𑀼𑀥𑀫𑁆𑀫𑀘𑀸𑀭𑀻;

𑀲𑁄 𑀢𑀸𑀤𑀺𑀲𑁄 𑀦𑀸𑀫 𑀘 𑀳𑁄𑀢𑀺 𑀧𑀡𑁆𑀟𑀺𑀢𑁄, 𑀜𑀢𑁆𑀯𑀸 𑀘 𑀥𑀫𑁆𑀫𑁂𑀲𑀼 𑀯𑀺𑀲𑁂𑀲𑀺 𑀅𑀲𑁆𑀲.

𑁩𑁭𑁪. ‘‘𑀅𑀢𑁆𑀣𑀜𑁆𑀘 𑀬𑁄 𑀚𑀸𑀦𑀸𑀢𑀺 𑀪𑀸𑀲𑀺𑀢𑀲𑁆𑀲, 𑀅𑀢𑁆𑀣𑀜𑁆𑀘 𑀜𑀢𑁆𑀯𑀸𑀦 𑀢𑀣𑀸 𑀓𑀭𑁄𑀢𑀺;

𑀅𑀢𑁆𑀣𑀦𑁆𑀢𑀭𑁄 𑀦𑀸𑀫 𑀲 𑀳𑁄𑀢𑀺 𑀧𑀡𑁆𑀟𑀺𑀢𑁄, 𑀜𑀢𑁆𑀯𑀸 𑀘 𑀥𑀫𑁆𑀫𑁂𑀲𑀼 𑀯𑀺𑀲𑁂𑀲𑀺 𑀅𑀲𑁆𑀲𑀸’’𑀢𑀺.

… 𑀓𑁄𑀲𑀺𑀬𑁄 𑀣𑁂𑀭𑁄….

𑀧𑀜𑁆𑀘𑀓𑀦𑀺𑀧𑀸𑀢𑁄 𑀦𑀺𑀝𑁆𑀞𑀺𑀢𑁄.