𑁭. 𑀕𑀬𑀸𑀓𑀲𑁆𑀲𑀧𑀢𑁆𑀣𑁂𑀭𑀕𑀸𑀣𑀸

𑁩𑁪𑁫. ‘‘𑀧𑀸𑀢𑁄 𑀫𑀚𑁆𑀛𑀦𑁆𑀳𑀺𑀓𑀁 𑀲𑀸𑀬𑀁, 𑀢𑀺𑀓𑁆𑀔𑀢𑁆𑀢𑀼𑀁 𑀤𑀺𑀯𑀲𑀲𑁆𑀲𑀳𑀁;

𑀑𑀢𑀭𑀺𑀁 𑀉𑀤𑀓𑀁 𑀲𑁄𑀳𑀁, 𑀕𑀬𑀸𑀬 𑀕𑀬𑀨𑀕𑁆𑀕𑀼𑀬𑀸.

𑁩𑁪𑁬. ‘‘‘𑀬𑀁 𑀫𑀬𑀸 𑀧𑀓𑀢𑀁 𑀧𑀸𑀧𑀁, 𑀧𑀼𑀩𑁆𑀩𑁂 𑀅𑀜𑁆𑀜𑀸𑀲𑀼 𑀚𑀸𑀢𑀺𑀲𑀼;

𑀢𑀁 𑀤𑀸𑀦𑀻𑀥 𑀧𑀯𑀸𑀳𑁂𑀫𑀺’, 𑀏𑀯𑀁𑀤𑀺𑀝𑁆𑀞𑀺 𑀧𑀼𑀭𑁂 𑀅𑀳𑀼𑀁.

𑁩𑁪𑁭. ‘‘𑀲𑀼𑀢𑁆𑀯𑀸 𑀲𑀼𑀪𑀸𑀲𑀺𑀢𑀁 𑀯𑀸𑀘𑀁, 𑀥𑀫𑁆𑀫𑀢𑁆𑀣𑀲𑀳𑀺𑀢𑀁 𑀧𑀤𑀁;

𑀢𑀣𑀁 𑀬𑀸𑀣𑀸𑀯𑀓𑀁 𑀅𑀢𑁆𑀣𑀁, 𑀬𑁄𑀦𑀺𑀲𑁄 𑀧𑀘𑁆𑀘𑀯𑁂𑀓𑁆𑀔𑀺𑀲𑀁;

𑁩𑁪𑁮. ‘‘𑀦𑀺𑀦𑁆𑀳𑀸𑀢𑀲𑀩𑁆𑀩𑀧𑀸𑀧𑁄𑀫𑁆𑀳𑀺, 𑀦𑀺𑀫𑁆𑀫𑀮𑁄 𑀧𑀬𑀢𑁄 𑀲𑀼𑀘𑀺;

𑀲𑀼𑀤𑁆𑀥𑁄 𑀲𑀼𑀤𑁆𑀥𑀲𑁆𑀲 𑀤𑀸𑀬𑀸𑀤𑁄, 𑀧𑀼𑀢𑁆𑀢𑁄 𑀩𑀼𑀤𑁆𑀥𑀲𑁆𑀲 𑀑𑀭𑀲𑁄.

𑁩𑁪𑁯. ‘‘𑀑𑀕𑀬𑁆𑀳𑀝𑁆𑀞𑀗𑁆𑀕𑀺𑀓𑀁 𑀲𑁄𑀢𑀁, 𑀲𑀩𑁆𑀩𑀧𑀸𑀧𑀁 𑀧𑀯𑀸𑀳𑀬𑀺𑀁;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀚𑁆𑀛𑀕𑀫𑀺𑀁, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

… 𑀕𑀬𑀸𑀓𑀲𑁆𑀲𑀧𑁄 𑀣𑁂𑀭𑁄….