𑁫. 𑀯𑀟𑁆𑀠𑀢𑁆𑀣𑁂𑀭𑀕𑀸𑀣𑀸

𑁩𑁩𑁫. ‘‘𑀲𑀸𑀥𑀽 𑀳𑀺 𑀓𑀺𑀭 𑀫𑁂 𑀫𑀸𑀢𑀸, 𑀧𑀢𑁄𑀤𑀁 𑀉𑀧𑀤𑀁𑀲𑀬𑀺;

𑀬𑀲𑁆𑀲𑀸𑀳𑀁 𑀯𑀘𑀦𑀁 𑀲𑀼𑀢𑁆𑀯𑀸, 𑀅𑀦𑀼𑀲𑀺𑀝𑁆𑀞𑁄 𑀚𑀦𑁂𑀢𑁆𑀢𑀺𑀬𑀸;

𑀆𑀭𑀤𑁆𑀥𑀯𑀻𑀭𑀺𑀬𑁄 𑀧𑀳𑀺𑀢𑀢𑁆𑀢𑁄, 𑀧𑀢𑁆𑀢𑁄 𑀲𑀫𑁆𑀩𑁄𑀥𑀺𑀫𑀼𑀢𑁆𑀢𑀫𑀁.

𑁩𑁩𑁬. ‘‘𑀅𑀭𑀳𑀸 𑀤𑀓𑁆𑀔𑀺𑀡𑁂𑀬𑁆𑀬𑁄𑀫𑁆𑀳𑀺, 𑀢𑁂𑀯𑀺𑀚𑁆𑀚𑁄 𑀅𑀫𑀢𑀤𑁆𑀤𑀲𑁄;

𑀚𑁂𑀢𑁆𑀯𑀸 𑀦𑀫𑀼𑀘𑀺𑀦𑁄 𑀲𑁂𑀦𑀁, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁩𑁩𑁭. ‘‘𑀅𑀚𑁆𑀛𑀢𑁆𑀢𑀜𑁆𑀘 𑀩𑀳𑀺𑀤𑁆𑀥𑀸 𑀘, 𑀬𑁂 𑀫𑁂 𑀯𑀺𑀚𑁆𑀚𑀺𑀁𑀲𑀼 𑀆𑀲𑀯𑀸;

𑀲𑀩𑁆𑀩𑁂 𑀅𑀲𑁂𑀲𑀸 𑀉𑀘𑁆𑀙𑀺𑀦𑁆𑀦𑀸, 𑀦 𑀘 𑀉𑀧𑁆𑀧𑀚𑁆𑀚𑀭𑁂 𑀧𑀼𑀦.

𑁩𑁩𑁮. ‘‘𑀯𑀺𑀲𑀸𑀭𑀤𑀸 𑀔𑁄 𑀪𑀕𑀺𑀦𑀻, 𑀏𑀢𑀫𑀢𑁆𑀣𑀁 𑀅𑀪𑀸𑀲𑀬𑀺;

‘𑀅𑀧𑀺𑀳𑀸 𑀦𑀽𑀦 𑀫𑀬𑀺𑀧𑀺, 𑀯𑀦𑀣𑁄 𑀢𑁂 𑀦 𑀯𑀺𑀚𑁆𑀚𑀢𑀺’.

𑁩𑁩𑁯. ‘‘𑀧𑀭𑀺𑀬𑀦𑁆𑀢𑀓𑀢𑀁 𑀤𑀼𑀓𑁆𑀔𑀁, 𑀅𑀦𑁆𑀢𑀺𑀫𑁄𑀬𑀁 𑀲𑀫𑀼𑀲𑁆𑀲𑀬𑁄;

𑀚𑀸𑀢𑀺𑀫𑀭𑀡𑀲𑀁𑀲𑀸𑀭𑁄, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄’’𑀢𑀺.

… 𑀯𑀟𑁆𑀠𑁄 𑀣𑁂𑀭𑁄….