𑁬. 𑀲𑁂𑀦𑀓𑀢𑁆𑀣𑁂𑀭𑀕𑀸𑀣𑀸

𑁨𑁮𑁭. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺, 𑀕𑀬𑀸𑀬𑀁 𑀕𑀬𑀨𑀕𑁆𑀕𑀼𑀬𑀸;

𑀬𑀁 𑀅𑀤𑁆𑀤𑀲𑀸𑀲𑀺𑀁 𑀲𑀫𑁆𑀩𑀼𑀤𑁆𑀥𑀁, 𑀤𑁂𑀲𑁂𑀦𑁆𑀢𑀁 𑀥𑀫𑁆𑀫𑀫𑀼𑀢𑁆𑀢𑀫𑀁.

𑁨𑁮𑁮. ‘‘𑀫𑀳𑀧𑁆𑀧𑀪𑀁 𑀕𑀡𑀸𑀘𑀭𑀺𑀬𑀁, 𑀅𑀕𑁆𑀕𑀧𑀢𑁆𑀢𑀁 𑀯𑀺𑀦𑀸𑀬𑀓𑀁;

𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲, 𑀚𑀺𑀦𑀁 𑀅𑀢𑀼𑀮𑀤𑀲𑁆𑀲𑀦𑀁.

𑁨𑁮𑁯. ‘‘𑀫𑀳𑀸𑀦𑀸𑀕𑀁 𑀫𑀳𑀸𑀯𑀻𑀭𑀁, 𑀫𑀳𑀸𑀚𑀼𑀢𑀺𑀫𑀦𑀸𑀲𑀯𑀁;

𑀲𑀩𑁆𑀩𑀸𑀲𑀯𑀧𑀭𑀺𑀓𑁆𑀔𑀻𑀡𑀁, 𑀲𑀢𑁆𑀣𑀸𑀭𑀫𑀓𑀼𑀢𑁄𑀪𑀬𑀁.

𑁨𑁯𑁦. ‘‘𑀘𑀺𑀭𑀲𑀁𑀓𑀺𑀮𑀺𑀝𑁆𑀞𑀁 𑀯𑀢 𑀫𑀁, 𑀤𑀺𑀝𑁆𑀞𑀺𑀲𑀦𑁆𑀤𑀸𑀦𑀩𑀦𑁆𑀥𑀺𑀢𑀁 [𑀲𑀦𑁆𑀥𑀺𑀢𑀁 (𑀲𑀻. 𑀲𑁆𑀬𑀸.), 𑀲𑀦𑁆𑀤𑀺𑀢𑀁 (𑀧𑀻. 𑀲𑀻. 𑀅𑀝𑁆𑀞.)];

𑀯𑀺𑀫𑁄𑀘𑀬𑀺 𑀲𑁄 𑀪𑀕𑀯𑀸, 𑀲𑀩𑁆𑀩𑀕𑀦𑁆𑀣𑁂𑀳𑀺 𑀲𑁂𑀦𑀓’’𑀦𑁆𑀢𑀺.

… 𑀲𑁂𑀦𑀓𑁄 𑀣𑁂𑀭𑁄….