𑁪. 𑀘𑀢𑀼𑀓𑀦𑀺𑀧𑀸𑀢𑁄

𑁧. 𑀦𑀸𑀕𑀲𑀫𑀸𑀮𑀢𑁆𑀣𑁂𑀭𑀕𑀸𑀣𑀸

𑁨𑁬𑁭. ‘‘𑀅𑀮𑀗𑁆𑀓𑀢𑀸 𑀲𑀼𑀯𑀲𑀦𑀸, 𑀫𑀸𑀮𑀺𑀦𑀻 𑀘𑀦𑁆𑀤𑀦𑀼𑀲𑁆𑀲𑀤𑀸;

𑀫𑀚𑁆𑀛𑁂 𑀫𑀳𑀸𑀧𑀣𑁂 𑀦𑀸𑀭𑀻, 𑀢𑀼𑀭𑀺𑀬𑁂 𑀦𑀘𑁆𑀘𑀢𑀺 𑀦𑀝𑁆𑀝𑀓𑀻.

𑁨𑁬𑁮. ‘‘𑀧𑀺𑀡𑁆𑀟𑀺𑀓𑀸𑀬 𑀧𑀯𑀺𑀝𑁆𑀞𑁄𑀳𑀁, 𑀕𑀘𑁆𑀙𑀦𑁆𑀢𑁄 𑀦𑀁 𑀉𑀤𑀺𑀓𑁆𑀔𑀺𑀲𑀁;

𑀅𑀮𑀗𑁆𑀓𑀢𑀁 𑀲𑀼𑀯𑀲𑀦𑀁, 𑀫𑀘𑁆𑀘𑀼𑀧𑀸𑀲𑀁𑀯 𑀑𑀟𑁆𑀟𑀺𑀢𑀁.

𑁨𑁬𑁯. ‘‘𑀢𑀢𑁄 𑀫𑁂 𑀫𑀦𑀲𑀻𑀓𑀸𑀭𑁄, 𑀬𑁄𑀦𑀺𑀲𑁄 𑀉𑀤𑀧𑀚𑁆𑀚𑀣;

𑀆𑀤𑀻𑀦𑀯𑁄 𑀧𑀸𑀢𑀼𑀭𑀳𑀼, 𑀦𑀺𑀩𑁆𑀩𑀺𑀤𑀸 𑀲𑀫𑀢𑀺𑀝𑁆𑀞𑀣 [𑀲𑀫𑁆𑀧𑀢𑀺𑀝𑁆𑀞𑀣 (𑀓.)].

𑁨𑁭𑁦. ‘‘𑀢𑀢𑁄 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺 𑀫𑁂, 𑀧𑀲𑁆𑀲 𑀥𑀫𑁆𑀫𑀲𑀼𑀥𑀫𑁆𑀫𑀢𑀁;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

… 𑀦𑀸𑀕𑀲𑀫𑀸𑀮𑁄 𑀣𑁂𑀭𑁄….

𑁨. 𑀪𑀕𑀼𑀢𑁆𑀣𑁂𑀭𑀕𑀸𑀣𑀸

𑁨𑁭𑁧. ‘‘𑀅𑀳𑀁 𑀫𑀺𑀤𑁆𑀥𑁂𑀦 𑀧𑀓𑀢𑁄, 𑀯𑀺𑀳𑀸𑀭𑀸 𑀉𑀧𑀦𑀺𑀓𑁆𑀔𑀫𑀺𑀁;

𑀘𑀗𑁆𑀓𑀫𑀁 𑀅𑀪𑀺𑀭𑀼𑀳𑀦𑁆𑀢𑁄, 𑀢𑀢𑁆𑀣𑁂𑀯 𑀧𑀧𑀢𑀺𑀁 𑀙𑀫𑀸.

𑁨𑁭𑁨. ‘‘𑀕𑀢𑁆𑀢𑀸𑀦𑀺 𑀧𑀭𑀺𑀫𑀚𑁆𑀚𑀺𑀢𑁆𑀯𑀸, 𑀧𑀼𑀦𑀧𑀸𑀭𑀼𑀬𑁆𑀳 𑀘𑀗𑁆𑀓𑀫𑀁;

𑀘𑀗𑁆𑀓𑀫𑁂 𑀘𑀗𑁆𑀓𑀫𑀺𑀁 𑀲𑁄𑀳𑀁, 𑀅𑀚𑁆𑀛𑀢𑁆𑀢𑀁 𑀲𑀼𑀲𑀫𑀸𑀳𑀺𑀢𑁄.

𑁨𑁭𑁩. ‘‘𑀢𑀢𑁄 𑀫𑁂 𑀫𑀦𑀲𑀻𑀓𑀸𑀭𑁄, 𑀬𑁄𑀦𑀺𑀲𑁄 𑀉𑀤𑀧𑀚𑁆𑀚𑀣;

𑀆𑀤𑀻𑀦𑀯𑁄 𑀧𑀸𑀢𑀼𑀭𑀳𑀼, 𑀦𑀺𑀩𑁆𑀩𑀺𑀤𑀸 𑀲𑀫𑀢𑀺𑀝𑁆𑀞𑀣.

𑁨𑁭𑁪. ‘‘𑀢𑀢𑁄 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺 𑀫𑁂, 𑀧𑀲𑁆𑀲 𑀥𑀫𑁆𑀫𑀲𑀼𑀥𑀫𑁆𑀫𑀢𑀁;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

… 𑀪𑀕𑀼𑀢𑁆𑀣𑁂𑀭𑁄….

𑁩. 𑀲𑀪𑀺𑀬𑀢𑁆𑀣𑁂𑀭𑀕𑀸𑀣𑀸

𑁨𑁭𑁫. [𑀥. 𑀧. 𑁬 𑀥𑀫𑁆𑀫𑀧𑀤𑁂𑀧𑀺] ‘‘𑀧𑀭𑁂 𑀘 𑀦 𑀯𑀺𑀚𑀸𑀦𑀦𑁆𑀢𑀺, 𑀫𑀬𑀫𑁂𑀢𑁆𑀣 𑀬𑀫𑀸𑀫𑀲𑁂;

𑀬𑁂 𑀘 𑀢𑀢𑁆𑀣 𑀯𑀺𑀚𑀸𑀦𑀦𑁆𑀢𑀺, 𑀢𑀢𑁄 𑀲𑀫𑁆𑀫𑀦𑁆𑀢𑀺 𑀫𑁂𑀥𑀕𑀸.

𑁨𑁭𑁬. ‘‘𑀬𑀤𑀸 𑀘 𑀅𑀯𑀺𑀚𑀸𑀦𑀦𑁆𑀢𑀸, 𑀇𑀭𑀺𑀬𑀦𑁆𑀢𑁆𑀬𑀫𑀭𑀸 𑀯𑀺𑀬;

𑀯𑀺𑀚𑀸𑀦𑀦𑁆𑀢𑀺 𑀘 𑀬𑁂 𑀥𑀫𑁆𑀫𑀁, 𑀆𑀢𑀼𑀭𑁂𑀲𑀼 𑀅𑀦𑀸𑀢𑀼𑀭𑀸.

𑁨𑁭𑁭. ‘‘𑀬𑀁 𑀓𑀺𑀜𑁆𑀘𑀺 𑀲𑀺𑀣𑀺𑀮𑀁 𑀓𑀫𑁆𑀫𑀁, 𑀲𑀁𑀓𑀺𑀮𑀺𑀝𑁆𑀞𑀜𑁆𑀘 𑀬𑀁 𑀯𑀢𑀁;

𑀲𑀗𑁆𑀓𑀲𑁆𑀲𑀭𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀦 𑀢𑀁 𑀳𑁄𑀢𑀺 𑀫𑀳𑀧𑁆𑀨𑀮𑀁.

𑁨𑁭𑁮. ‘‘𑀬𑀲𑁆𑀲 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼, 𑀕𑀸𑀭𑀯𑁄 𑀦𑀽𑀧𑀮𑀩𑁆𑀪𑀢𑀺;

𑀆𑀭𑀓𑀸 𑀳𑁄𑀢𑀺 𑀲𑀤𑁆𑀥𑀫𑁆𑀫𑀸, 𑀦𑀪𑀁 𑀧𑀼𑀣𑀯𑀺𑀬𑀸 𑀬𑀣𑀸’’𑀢𑀺.

… 𑀲𑀪𑀺𑀬𑁄 𑀣𑁂𑀭𑁄….

𑁪. 𑀦𑀦𑁆𑀤𑀓𑀢𑁆𑀣𑁂𑀭𑀕𑀸𑀣𑀸

𑁨𑁭𑁯. ‘‘𑀥𑀺𑀭𑀢𑁆𑀣𑀼 𑀧𑀽𑀭𑁂 𑀤𑀼𑀕𑁆𑀕𑀦𑁆𑀥𑁂, 𑀫𑀸𑀭𑀧𑀓𑁆𑀔𑁂 𑀅𑀯𑀲𑁆𑀲𑀼𑀢𑁂;

𑀦𑀯𑀲𑁄𑀢𑀸𑀦𑀺 𑀢𑁂 𑀓𑀸𑀬𑁂, 𑀬𑀸𑀦𑀺 𑀲𑀦𑁆𑀤𑀦𑁆𑀢𑀺 𑀲𑀩𑁆𑀩𑀤𑀸.

𑁨𑁮𑁦. ‘‘𑀫𑀸 𑀧𑀼𑀭𑀸𑀡𑀁 𑀅𑀫𑀜𑁆𑀜𑀺𑀢𑁆𑀣𑁄, 𑀫𑀸𑀲𑀸𑀤𑁂𑀲𑀺 𑀢𑀣𑀸𑀕𑀢𑁂;

𑀲𑀕𑁆𑀕𑁂𑀧𑀺 𑀢𑁂 𑀦 𑀭𑀚𑁆𑀚𑀦𑁆𑀢𑀺, 𑀓𑀺𑀫𑀗𑁆𑀕𑀁 𑀧𑀦 [𑀓𑀺𑀫𑀗𑁆𑀕 𑀧𑀦 (𑀲𑀻.)] 𑀫𑀸𑀦𑀼𑀲𑁂.

𑁨𑁮𑁧. ‘‘𑀬𑁂 𑀘 𑀔𑁄 𑀩𑀸𑀮𑀸 𑀤𑀼𑀫𑁆𑀫𑁂𑀥𑀸, 𑀤𑀼𑀫𑁆𑀫𑀦𑁆𑀢𑀻 𑀫𑁄𑀳𑀧𑀸𑀭𑀼𑀢𑀸;

𑀢𑀸𑀤𑀺𑀲𑀸 𑀢𑀢𑁆𑀣 𑀭𑀚𑁆𑀚𑀦𑁆𑀢𑀺, 𑀫𑀸𑀭𑀔𑀺𑀢𑁆𑀢𑀫𑁆𑀳𑀺 𑀩𑀦𑁆𑀥𑀦𑁂.

𑁨𑁮𑁨. ‘‘𑀬𑁂𑀲𑀁 𑀭𑀸𑀕𑁄 𑀘 𑀤𑁄𑀲𑁄 𑀘, 𑀅𑀯𑀺𑀚𑁆𑀚𑀸 𑀘 𑀯𑀺𑀭𑀸𑀚𑀺𑀢𑀸;

𑀢𑀸𑀤𑀻 𑀢𑀢𑁆𑀣 𑀦 𑀭𑀚𑁆𑀚𑀦𑁆𑀢𑀺, 𑀙𑀺𑀦𑁆𑀦𑀲𑀼𑀢𑁆𑀢𑀸 𑀅𑀩𑀦𑁆𑀥𑀦𑀸’’𑀢𑀺.

… 𑀦𑀦𑁆𑀤𑀓𑁄 𑀣𑁂𑀭𑁄….

𑁫. 𑀚𑀫𑁆𑀩𑀼𑀓𑀢𑁆𑀣𑁂𑀭𑀕𑀸𑀣𑀸

𑁨𑁮𑁩. ‘‘𑀧𑀜𑁆𑀘𑀧𑀜𑁆𑀜𑀸𑀲𑀯𑀲𑁆𑀲𑀸𑀦𑀺, 𑀭𑀚𑁄𑀚𑀮𑁆𑀮𑀫𑀥𑀸𑀭𑀬𑀺𑀁;

𑀪𑀼𑀜𑁆𑀚𑀦𑁆𑀢𑁄 𑀫𑀸𑀲𑀺𑀓𑀁 𑀪𑀢𑁆𑀢𑀁, 𑀓𑁂𑀲𑀫𑀲𑁆𑀲𑀼𑀁 𑀅𑀮𑁄𑀘𑀬𑀺𑀁.

𑁨𑁮𑁪. ‘‘𑀏𑀓𑀧𑀸𑀤𑁂𑀦 𑀅𑀝𑁆𑀞𑀸𑀲𑀺𑀁, 𑀆𑀲𑀦𑀁 𑀧𑀭𑀺𑀯𑀚𑁆𑀚𑀬𑀺𑀁;

𑀲𑀼𑀓𑁆𑀔𑀕𑀽𑀣𑀸𑀦𑀺 𑀘 𑀔𑀸𑀤𑀺𑀁, 𑀉𑀤𑁆𑀤𑁂𑀲𑀜𑁆𑀘 𑀦 𑀲𑀸𑀤𑀺𑀬𑀺𑀁.

𑁨𑁮𑁫. ‘‘𑀏𑀢𑀸𑀤𑀺𑀲𑀁 𑀓𑀭𑀺𑀢𑁆𑀯𑀸𑀦, 𑀩𑀳𑀼𑀁 𑀤𑀼𑀕𑁆𑀕𑀢𑀺𑀕𑀸𑀫𑀺𑀦𑀁;

𑀯𑀼𑀬𑁆𑀳𑀫𑀸𑀦𑁄 𑀫𑀳𑁄𑀖𑁂𑀦, 𑀩𑀼𑀤𑁆𑀥𑀁 𑀲𑀭𑀡𑀫𑀸𑀕𑀫𑀁.

𑁨𑁮𑁬. ‘‘𑀲𑀭𑀡𑀕𑀫𑀦𑀁 𑀧𑀲𑁆𑀲, 𑀧𑀲𑁆𑀲 𑀥𑀫𑁆𑀫𑀲𑀼𑀥𑀫𑁆𑀫𑀢𑀁;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

… 𑀚𑀫𑁆𑀩𑀼𑀓𑁄 𑀣𑁂𑀭𑁄….

𑁬. 𑀲𑁂𑀦𑀓𑀢𑁆𑀣𑁂𑀭𑀕𑀸𑀣𑀸

𑁨𑁮𑁭. ‘‘𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺, 𑀕𑀬𑀸𑀬𑀁 𑀕𑀬𑀨𑀕𑁆𑀕𑀼𑀬𑀸;

𑀬𑀁 𑀅𑀤𑁆𑀤𑀲𑀸𑀲𑀺𑀁 𑀲𑀫𑁆𑀩𑀼𑀤𑁆𑀥𑀁, 𑀤𑁂𑀲𑁂𑀦𑁆𑀢𑀁 𑀥𑀫𑁆𑀫𑀫𑀼𑀢𑁆𑀢𑀫𑀁.

𑁨𑁮𑁮. ‘‘𑀫𑀳𑀧𑁆𑀧𑀪𑀁 𑀕𑀡𑀸𑀘𑀭𑀺𑀬𑀁, 𑀅𑀕𑁆𑀕𑀧𑀢𑁆𑀢𑀁 𑀯𑀺𑀦𑀸𑀬𑀓𑀁;

𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲, 𑀚𑀺𑀦𑀁 𑀅𑀢𑀼𑀮𑀤𑀲𑁆𑀲𑀦𑀁.

𑁨𑁮𑁯. ‘‘𑀫𑀳𑀸𑀦𑀸𑀕𑀁 𑀫𑀳𑀸𑀯𑀻𑀭𑀁, 𑀫𑀳𑀸𑀚𑀼𑀢𑀺𑀫𑀦𑀸𑀲𑀯𑀁;

𑀲𑀩𑁆𑀩𑀸𑀲𑀯𑀧𑀭𑀺𑀓𑁆𑀔𑀻𑀡𑀁, 𑀲𑀢𑁆𑀣𑀸𑀭𑀫𑀓𑀼𑀢𑁄𑀪𑀬𑀁.

𑁨𑁯𑁦. ‘‘𑀘𑀺𑀭𑀲𑀁𑀓𑀺𑀮𑀺𑀝𑁆𑀞𑀁 𑀯𑀢 𑀫𑀁, 𑀤𑀺𑀝𑁆𑀞𑀺𑀲𑀦𑁆𑀤𑀸𑀦𑀩𑀦𑁆𑀥𑀺𑀢𑀁 [𑀲𑀦𑁆𑀥𑀺𑀢𑀁 (𑀲𑀻. 𑀲𑁆𑀬𑀸.), 𑀲𑀦𑁆𑀤𑀺𑀢𑀁 (𑀧𑀻. 𑀲𑀻. 𑀅𑀝𑁆𑀞.)];

𑀯𑀺𑀫𑁄𑀘𑀬𑀺 𑀲𑁄 𑀪𑀕𑀯𑀸, 𑀲𑀩𑁆𑀩𑀕𑀦𑁆𑀣𑁂𑀳𑀺 𑀲𑁂𑀦𑀓’’𑀦𑁆𑀢𑀺.

… 𑀲𑁂𑀦𑀓𑁄 𑀣𑁂𑀭𑁄….

𑁭. 𑀲𑀫𑁆𑀪𑀽𑀢𑀢𑁆𑀣𑁂𑀭𑀕𑀸𑀣𑀸

𑁨𑁯𑁧. ‘‘𑀬𑁄 𑀤𑀦𑁆𑀥𑀓𑀸𑀮𑁂 𑀢𑀭𑀢𑀺, 𑀢𑀭𑀡𑀻𑀬𑁂 𑀘 𑀤𑀦𑁆𑀥𑀬𑁂;

𑀅𑀬𑁄𑀦𑀺 [𑀅𑀬𑁄𑀦𑀺𑀲𑁄 (𑀲𑁆𑀬𑀸.)] 𑀲𑀁𑀯𑀺𑀥𑀸𑀦𑁂𑀦, 𑀩𑀸𑀮𑁄 𑀤𑀼𑀓𑁆𑀔𑀁 𑀦𑀺𑀕𑀘𑁆𑀙𑀢𑀺.

𑁨𑁯𑁨. ‘‘𑀢𑀲𑁆𑀲𑀢𑁆𑀣𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀓𑀸𑀴𑀧𑀓𑁆𑀔𑁂𑀯 𑀘𑀦𑁆𑀤𑀺𑀫𑀸;

𑀆𑀬𑀲𑀓𑁆𑀬𑀜𑁆𑀘 [𑀆𑀬𑀲𑀲𑁆𑀬𑀜𑁆𑀘 (𑀲𑀻.)] 𑀧𑀧𑁆𑀧𑁄𑀢𑀺, 𑀫𑀺𑀢𑁆𑀢𑁂𑀳𑀺 𑀘 𑀯𑀺𑀭𑀼𑀚𑁆𑀛𑀢𑀺.

𑁨𑁯𑁩. ‘‘𑀬𑁄 𑀤𑀦𑁆𑀥𑀓𑀸𑀮𑁂 𑀤𑀦𑁆𑀥𑁂𑀢𑀺, 𑀢𑀭𑀡𑀻𑀬𑁂 𑀘 𑀢𑀸𑀭𑀬𑁂;

𑀬𑁄𑀦𑀺𑀲𑁄 𑀲𑀁𑀯𑀺𑀥𑀸𑀦𑁂𑀦, 𑀲𑀼𑀔𑀁 𑀧𑀧𑁆𑀧𑁄𑀢𑀺 𑀧𑀡𑁆𑀟𑀺𑀢𑁄.

𑁨𑁯𑁪. ‘‘𑀢𑀲𑁆𑀲𑀢𑁆𑀣𑀸 𑀧𑀭𑀺𑀧𑀽𑀭𑁂𑀦𑁆𑀢𑀺, 𑀲𑀼𑀓𑁆𑀓𑀧𑀓𑁆𑀔𑁂𑀯 𑀘𑀦𑁆𑀤𑀺𑀫𑀸;

𑀬𑀲𑁄 𑀓𑀺𑀢𑁆𑀢𑀺𑀜𑁆𑀘 𑀧𑀧𑁆𑀧𑁄𑀢𑀺, 𑀫𑀺𑀢𑁆𑀢𑁂𑀳𑀺 𑀦 𑀯𑀺𑀭𑀼𑀚𑁆𑀛𑀢𑀻’’𑀢𑀺.

… 𑀲𑀫𑁆𑀪𑀽𑀢𑁄 𑀣𑁂𑀭𑁄….

𑁮. 𑀭𑀸𑀳𑀼𑀮𑀢𑁆𑀣𑁂𑀭𑀕𑀸𑀣𑀸

𑁨𑁯𑁫. ‘‘𑀉𑀪𑀬𑁂𑀦𑁂𑀯 𑀲𑀫𑁆𑀧𑀦𑁆𑀦𑁄, 𑀭𑀸𑀳𑀼𑀮𑀪𑀤𑁆𑀤𑁄𑀢𑀺 𑀫𑀁 𑀯𑀺𑀤𑀽;

𑀬𑀜𑁆𑀘𑀫𑁆𑀳𑀺 𑀧𑀼𑀢𑁆𑀢𑁄 𑀩𑀼𑀤𑁆𑀥𑀲𑁆𑀲, 𑀬𑀜𑁆𑀘 𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀫𑀸.

𑁨𑁯𑁬. ‘‘𑀬𑀜𑁆𑀘 𑀫𑁂 𑀆𑀲𑀯𑀸 𑀔𑀻𑀡𑀸, 𑀬𑀜𑁆𑀘 𑀦𑀢𑁆𑀣𑀺 𑀧𑀼𑀦𑀩𑁆𑀪𑀯𑁄;

𑀅𑀭𑀳𑀸 𑀤𑀓𑁆𑀔𑀺𑀡𑁂𑀬𑁆𑀬𑁄𑀫𑁆𑀳𑀺, 𑀢𑁂𑀯𑀺𑀚𑁆𑀚𑁄 𑀅𑀫𑀢𑀤𑁆𑀤𑀲𑁄.

𑁨𑁯𑁭. ‘‘𑀓𑀸𑀫𑀦𑁆𑀥𑀸 𑀚𑀸𑀮𑀧𑀘𑁆𑀙𑀦𑁆𑀦𑀸, 𑀢𑀡𑁆𑀳𑀸𑀙𑀸𑀤𑀦𑀙𑀸𑀤𑀺𑀢𑀸;

𑀧𑀫𑀢𑁆𑀢𑀩𑀦𑁆𑀥𑀼𑀦𑀸 𑀩𑀤𑁆𑀥𑀸, 𑀫𑀘𑁆𑀙𑀸𑀯 𑀓𑀼𑀫𑀺𑀦𑀸𑀫𑀼𑀔𑁂.

𑁨𑁯𑁮. ‘‘𑀢𑀁 𑀓𑀸𑀫𑀁 𑀅𑀳𑀫𑀼𑀚𑁆𑀛𑀺𑀢𑁆𑀯𑀸, 𑀙𑁂𑀢𑁆𑀯𑀸 𑀫𑀸𑀭𑀲𑁆𑀲 𑀩𑀦𑁆𑀥𑀦𑀁;

𑀲𑀫𑀽𑀮𑀁 𑀢𑀡𑁆𑀳𑀫𑀩𑁆𑀩𑀼𑀬𑁆𑀳, 𑀲𑀻𑀢𑀺𑀪𑀽𑀢𑁄𑀲𑁆𑀫𑀺 𑀦𑀺𑀩𑁆𑀩𑀼𑀢𑁄’’𑀢𑀺.

… 𑀭𑀸𑀳𑀼𑀮𑁄 𑀣𑁂𑀭𑁄….

𑁯. 𑀘𑀦𑁆𑀤𑀦𑀢𑁆𑀣𑁂𑀭𑀕𑀸𑀣𑀸

𑁨𑁯𑁯. ‘‘𑀚𑀸𑀢𑀭𑀽𑀧𑁂𑀦 𑀲𑀜𑁆𑀙𑀦𑁆𑀦𑀸 [𑀧𑀘𑁆𑀙𑀦𑁆𑀦𑀸 (𑀲𑀻.)], 𑀤𑀸𑀲𑀻𑀕𑀡𑀧𑀼𑀭𑀓𑁆𑀔𑀢𑀸;

𑀅𑀗𑁆𑀓𑁂𑀦 𑀧𑀼𑀢𑁆𑀢𑀫𑀸𑀤𑀸𑀬, 𑀪𑀭𑀺𑀬𑀸 𑀫𑀁 𑀉𑀧𑀸𑀕𑀫𑀺.

𑁩𑁦𑁦. ‘‘𑀢𑀜𑁆𑀘 𑀤𑀺𑀲𑁆𑀯𑀸𑀦 𑀆𑀬𑀦𑁆𑀢𑀺𑀁, 𑀲𑀓𑀧𑀼𑀢𑁆𑀢𑀲𑁆𑀲 𑀫𑀸𑀢𑀭𑀁;

𑀅𑀮𑀗𑁆𑀓𑀢𑀁 𑀲𑀼𑀯𑀲𑀦𑀁, 𑀫𑀘𑁆𑀘𑀼𑀧𑀸𑀲𑀁𑀯 𑀑𑀟𑁆𑀟𑀺𑀢𑀁.

𑁩𑁦𑁧. ‘‘𑀢𑀢𑁄 𑀫𑁂 𑀫𑀦𑀲𑀻𑀓𑀸𑀭𑁄, 𑀬𑁄𑀦𑀺𑀲𑁄 𑀉𑀤𑀧𑀚𑁆𑀚𑀣;

𑀆𑀤𑀻𑀦𑀯𑁄 𑀧𑀸𑀢𑀼𑀭𑀳𑀼, 𑀦𑀺𑀩𑁆𑀩𑀺𑀤𑀸 𑀲𑀫𑀢𑀺𑀝𑁆𑀞𑀣.

𑁩𑁦𑁨. ‘‘𑀢𑀢𑁄 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺 𑀫𑁂, 𑀧𑀲𑁆𑀲 𑀥𑀫𑁆𑀫𑀲𑀼𑀥𑀫𑁆𑀫𑀢𑀁;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

… 𑀘𑀦𑁆𑀤𑀦𑁄 𑀣𑁂𑀭𑁄….

𑁧𑁦. 𑀥𑀫𑁆𑀫𑀺𑀓𑀢𑁆𑀣𑁂𑀭𑀕𑀸𑀣𑀸

𑁩𑁦𑁩. [𑀚𑀸. 𑁧.𑁧𑁦.𑁧𑁦𑁨 𑀚𑀸𑀢𑀓𑁂𑀧𑀺] ‘‘𑀥𑀫𑁆𑀫𑁄 𑀳𑀯𑁂 𑀭𑀓𑁆𑀔𑀢𑀺 𑀥𑀫𑁆𑀫𑀘𑀸𑀭𑀺𑀁, 𑀥𑀫𑁆𑀫𑁄 𑀲𑀼𑀘𑀺𑀡𑁆𑀡𑁄 𑀲𑀼𑀔𑀫𑀸𑀯𑀳𑀢𑀺;

𑀏𑀲𑀸𑀦𑀺𑀲𑀁𑀲𑁄 𑀥𑀫𑁆𑀫𑁂 𑀲𑀼𑀘𑀺𑀡𑁆𑀡𑁂, 𑀦 𑀤𑀼𑀕𑁆𑀕𑀢𑀺𑀁 𑀕𑀘𑁆𑀙𑀢𑀺 𑀥𑀫𑁆𑀫𑀘𑀸𑀭𑀻.

𑁩𑁦𑁪. [𑀚𑀸. 𑁧.𑁧𑁫.𑁩𑁮𑁫] ‘‘𑀦𑀳𑀺 𑀥𑀫𑁆𑀫𑁄 𑀅𑀥𑀫𑁆𑀫𑁄 𑀘, 𑀉𑀪𑁄 𑀲𑀫𑀯𑀺𑀧𑀸𑀓𑀺𑀦𑁄;

𑀅𑀥𑀫𑁆𑀫𑁄 𑀦𑀺𑀭𑀬𑀁 𑀦𑁂𑀢𑀺, 𑀥𑀫𑁆𑀫𑁄 𑀧𑀸𑀧𑁂𑀢𑀺 𑀲𑀼𑀕𑁆𑀕𑀢𑀺𑀁.

𑁩𑁦𑁫. ‘‘𑀢𑀲𑁆𑀫𑀸 𑀳𑀺 𑀥𑀫𑁆𑀫𑁂𑀲𑀼 𑀓𑀭𑁂𑀬𑁆𑀬 𑀙𑀦𑁆𑀤𑀁, 𑀇𑀢𑀺 𑀫𑁄𑀤𑀫𑀸𑀦𑁄 𑀲𑀼𑀕𑀢𑁂𑀦 𑀢𑀸𑀤𑀺𑀦𑀸;

𑀥𑀫𑁆𑀫𑁂 𑀞𑀺𑀢𑀸 𑀲𑀼𑀕𑀢𑀯𑀭𑀲𑁆𑀲 𑀲𑀸𑀯𑀓𑀸, 𑀦𑀻𑀬𑀦𑁆𑀢𑀺 𑀥𑀻𑀭𑀸 𑀲𑀭𑀡𑀯𑀭𑀕𑁆𑀕𑀕𑀸𑀫𑀺𑀦𑁄.

𑁩𑁦𑁬. ‘‘𑀯𑀺𑀧𑁆𑀨𑁄𑀝𑀺𑀢𑁄 𑀕𑀡𑁆𑀟𑀫𑀽𑀮𑁄, 𑀢𑀡𑁆𑀳𑀸𑀚𑀸𑀮𑁄 𑀲𑀫𑀽𑀳𑀢𑁄;

𑀲𑁄 𑀔𑀻𑀡𑀲𑀁𑀲𑀸𑀭𑁄 𑀦 𑀘𑀢𑁆𑀣𑀺 𑀓𑀺𑀜𑁆𑀘𑀦𑀁,

𑀘𑀦𑁆𑀤𑁄 𑀬𑀣𑀸 𑀤𑁄𑀲𑀺𑀦𑀸 𑀧𑀼𑀡𑁆𑀡𑀫𑀸𑀲𑀺𑀬’’𑀦𑁆𑀢𑀺.

… 𑀥𑀫𑁆𑀫𑀺𑀓𑁄 𑀣𑁂𑀭𑁄….

𑁧𑁧. 𑀲𑀧𑁆𑀧𑀓𑀢𑁆𑀣𑁂𑀭𑀕𑀸𑀣𑀸

𑁩𑁦𑁭. ‘‘𑀬𑀤𑀸 𑀩𑀮𑀸𑀓𑀸 𑀲𑀼𑀘𑀺𑀧𑀡𑁆𑀟𑀭𑀘𑁆𑀙𑀤𑀸, 𑀓𑀸𑀴𑀲𑁆𑀲 𑀫𑁂𑀖𑀲𑁆𑀲 𑀪𑀬𑁂𑀦 𑀢𑀚𑁆𑀚𑀺𑀢𑀸;

𑀧𑀮𑁂𑀳𑀺𑀢𑀺 𑀆𑀮𑀬𑀫𑀸𑀮𑀬𑁂𑀲𑀺𑀦𑀻, 𑀢𑀤𑀸 𑀦𑀤𑀻 𑀅𑀚𑀓𑀭𑀡𑀻 𑀭𑀫𑁂𑀢𑀺 𑀫𑀁.

𑁩𑁦𑁮. ‘‘𑀬𑀤𑀸 𑀩𑀮𑀸𑀓𑀸 𑀲𑀼𑀯𑀺𑀲𑀼𑀤𑁆𑀥𑀧𑀡𑁆𑀟𑀭𑀸, 𑀓𑀸𑀴𑀲𑁆𑀲 𑀫𑁂𑀖𑀲𑁆𑀲 𑀪𑀬𑁂𑀦 𑀢𑀚𑁆𑀚𑀺𑀢𑀸;

𑀧𑀭𑀺𑀬𑁂𑀲𑀢𑀺 𑀮𑁂𑀡𑀫𑀮𑁂𑀡𑀤𑀲𑁆𑀲𑀺𑀦𑀻, 𑀢𑀤𑀸 𑀦𑀤𑀻 𑀅𑀚𑀓𑀭𑀡𑀻 𑀭𑀫𑁂𑀢𑀺 𑀫𑀁.

𑁩𑁦𑁯. ‘‘𑀓𑀁 𑀦𑀼 𑀢𑀢𑁆𑀣 𑀦 𑀭𑀫𑁂𑀦𑁆𑀢𑀺, 𑀚𑀫𑁆𑀩𑀼𑀬𑁄 𑀉𑀪𑀢𑁄 𑀢𑀳𑀺𑀁;

𑀲𑁄𑀪𑁂𑀦𑁆𑀢𑀺 𑀆𑀧𑀕𑀸𑀓𑀽𑀮𑀁, 𑀫𑀫 𑀮𑁂𑀡𑀲𑁆𑀲 [𑀫𑀳𑀸𑀮𑁂𑀡𑀲𑁆𑀲 (𑀲𑁆𑀬𑀸. 𑀓.)] 𑀧𑀘𑁆𑀙𑀢𑁄.

𑁩𑁧𑁦. ‘‘𑀢𑀸 𑀫𑀢𑀫𑀤𑀲𑀗𑁆𑀖𑀲𑀼𑀧𑁆𑀧𑀳𑀻𑀦𑀸,

𑀪𑁂𑀓𑀸 𑀫𑀦𑁆𑀤𑀯𑀢𑀻 𑀧𑀦𑀸𑀤𑀬𑀦𑁆𑀢𑀺;

‘𑀦𑀸𑀚𑁆𑀚 𑀕𑀺𑀭𑀺𑀦𑀤𑀻𑀳𑀺 𑀯𑀺𑀧𑁆𑀧𑀯𑀸𑀲𑀲𑀫𑀬𑁄,

𑀔𑁂𑀫𑀸 𑀅𑀚𑀓𑀭𑀡𑀻 𑀲𑀺𑀯𑀸 𑀲𑀼𑀭𑀫𑁆𑀫𑀸’’’𑀢𑀺.

… 𑀲𑀧𑁆𑀧𑀓𑁄 𑀣𑁂𑀭𑁄….

𑁧𑁨. 𑀫𑀼𑀤𑀺𑀢𑀢𑁆𑀣𑁂𑀭𑀕𑀸𑀣𑀸

𑁩𑁧𑁧. ‘‘𑀧𑀩𑁆𑀩𑀚𑀺𑀁 𑀚𑀻𑀯𑀺𑀓𑀢𑁆𑀣𑁄𑀳𑀁, 𑀮𑀤𑁆𑀥𑀸𑀦 𑀉𑀧𑀲𑀫𑁆𑀧𑀤𑀁;

𑀢𑀢𑁄 𑀲𑀤𑁆𑀥𑀁 𑀧𑀝𑀺𑀮𑀪𑀺𑀁, 𑀤𑀴𑁆𑀳𑀯𑀻𑀭𑀺𑀬𑁄 𑀧𑀭𑀓𑁆𑀓𑀫𑀺𑀁.

𑁩𑁧𑁨. ‘‘𑀓𑀸𑀫𑀁 𑀪𑀺𑀚𑁆𑀚𑀢𑀼𑀬𑀁 𑀓𑀸𑀬𑁄, 𑀫𑀁𑀲𑀧𑁂𑀲𑀻 𑀯𑀺𑀲𑀻𑀬𑀭𑀼𑀁 [𑀯𑀺𑀲𑀺𑀬𑀦𑁆𑀢𑀼 (𑀓.)];

𑀉𑀪𑁄 𑀚𑀡𑁆𑀡𑀼𑀓𑀲𑀦𑁆𑀥𑀻𑀳𑀺, 𑀚𑀗𑁆𑀖𑀸𑀬𑁄 𑀧𑀧𑀢𑀦𑁆𑀢𑀼 𑀫𑁂.

𑁩𑁧𑁩. ‘‘𑀦𑀸𑀲𑀺𑀲𑁆𑀲𑀁 𑀦 𑀧𑀺𑀯𑀺𑀲𑁆𑀲𑀸𑀫𑀺, 𑀯𑀺𑀳𑀸𑀭𑀸 𑀘 𑀦 𑀦𑀺𑀓𑁆𑀔𑀫𑁂;

𑀦𑀧𑀺 𑀧𑀲𑁆𑀲𑀁 𑀦𑀺𑀧𑀸𑀢𑁂𑀲𑁆𑀲𑀁, 𑀢𑀡𑁆𑀳𑀸𑀲𑀮𑁆𑀮𑁂 𑀅𑀦𑀽𑀳𑀢𑁂.

𑁩𑁧𑁪. ‘‘𑀢𑀲𑁆𑀲 𑀫𑁂𑀯𑀁 𑀯𑀺𑀳𑀭𑀢𑁄, 𑀧𑀲𑁆𑀲 𑀯𑀻𑀭𑀺𑀬𑀧𑀭𑀓𑁆𑀓𑀫𑀁;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦’’𑀦𑁆𑀢𑀺.

… 𑀫𑀼𑀤𑀺𑀢𑁄 𑀣𑁂𑀭𑁄….

𑀘𑀢𑀼𑀓𑁆𑀓𑀦𑀺𑀧𑀸𑀢𑁄 𑀦𑀺𑀝𑁆𑀞𑀺𑀢𑁄.