𑁧𑁫. 𑀅𑀢𑁆𑀢𑀤𑀡𑁆𑀟𑀲𑀼𑀢𑁆𑀢𑀁

𑁯𑁪𑁧. ‘‘𑀅𑀢𑁆𑀢𑀤𑀡𑁆𑀟𑀸 𑀪𑀬𑀁 𑀚𑀸𑀢𑀁, 𑀚𑀦𑀁 𑀧𑀲𑁆𑀲𑀣 𑀫𑁂𑀥𑀕𑀁;

𑀲𑀁𑀯𑁂𑀕𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀬𑀣𑀸 𑀲𑀁𑀯𑀺𑀚𑀺𑀢𑀁 𑀫𑀬𑀸.

𑁯𑁪𑁨. ‘‘𑀨𑀦𑁆𑀤𑀫𑀸𑀦𑀁 𑀧𑀚𑀁 𑀤𑀺𑀲𑁆𑀯𑀸, 𑀫𑀘𑁆𑀙𑁂 𑀅𑀧𑁆𑀧𑁄𑀤𑀓𑁂 𑀬𑀣𑀸;

𑀅𑀜𑁆𑀜𑀫𑀜𑁆𑀜𑁂𑀳𑀺 𑀩𑁆𑀬𑀸𑀭𑀼𑀤𑁆𑀥𑁂, 𑀤𑀺𑀲𑁆𑀯𑀸 𑀫𑀁 𑀪𑀬𑀫𑀸𑀯𑀺𑀲𑀺.

𑁯𑁪𑁩. ‘‘𑀲𑀫𑀦𑁆𑀢𑀫𑀲𑀸𑀭𑁄 𑀮𑁄𑀓𑁄, 𑀤𑀺𑀲𑀸 𑀲𑀩𑁆𑀩𑀸 𑀲𑀫𑁂𑀭𑀺𑀢𑀸;

𑀇𑀘𑁆𑀙𑀁 𑀪𑀯𑀦𑀫𑀢𑁆𑀢𑀦𑁄, 𑀦𑀸𑀤𑁆𑀤𑀲𑀸𑀲𑀺𑀁 𑀅𑀦𑁄𑀲𑀺𑀢𑀁.

𑁯𑁪𑁪. ‘‘𑀑𑀲𑀸𑀦𑁂𑀢𑁆𑀯𑁂𑀯 𑀩𑁆𑀬𑀸𑀭𑀼𑀤𑁆𑀥𑁂, 𑀤𑀺𑀲𑁆𑀯𑀸 𑀫𑁂 𑀅𑀭𑀢𑀻 𑀅𑀳𑀼;

𑀅𑀣𑁂𑀢𑁆𑀣 𑀲𑀮𑁆𑀮𑀫𑀤𑁆𑀤𑀓𑁆𑀔𑀺𑀁, 𑀤𑀼𑀤𑁆𑀤𑀲𑀁 𑀳𑀤𑀬𑀦𑀺𑀲𑁆𑀲𑀺𑀢𑀁.

𑁯𑁪𑁫. ‘‘𑀬𑁂𑀦 𑀲𑀮𑁆𑀮𑁂𑀦 𑀑𑀢𑀺𑀡𑁆𑀡𑁄, 𑀤𑀺𑀲𑀸 𑀲𑀩𑁆𑀩𑀸 𑀯𑀺𑀥𑀸𑀯𑀢𑀺;

𑀢𑀫𑁂𑀯 𑀲𑀮𑁆𑀮𑀫𑀩𑁆𑀩𑀼𑀬𑁆𑀳, 𑀦 𑀥𑀸𑀯𑀢𑀺 𑀦 𑀲𑀻𑀤𑀢𑀺.

𑁯𑁪𑁬. ‘‘𑀢𑀢𑁆𑀣 𑀲𑀺𑀓𑁆𑀔𑀸𑀦𑀼𑀕𑀻𑀬𑀦𑁆𑀢𑀺 [𑀲𑀺𑀓𑁆𑀔𑀸𑀦𑀼𑀓𑀺𑀭𑀺𑀬𑀦𑁆𑀢𑀺 (𑀓.)], 𑀬𑀸𑀦𑀺 𑀮𑁄𑀓𑁂 𑀕𑀥𑀺𑀢𑀸𑀦𑀺;

𑀦 𑀢𑁂𑀲𑀼 𑀧𑀲𑀼𑀢𑁄 𑀲𑀺𑀬𑀸, 𑀦𑀺𑀩𑁆𑀩𑀺𑀚𑁆𑀛 𑀲𑀩𑁆𑀩𑀲𑁄 𑀓𑀸𑀫𑁂;

𑀲𑀺𑀓𑁆𑀔𑁂 𑀦𑀺𑀩𑁆𑀩𑀸𑀦𑀫𑀢𑁆𑀢𑀦𑁄.

𑁯𑁪𑁭. ‘‘𑀲𑀘𑁆𑀘𑁄 𑀲𑀺𑀬𑀸 𑀅𑀧𑁆𑀧𑀕𑀩𑁆𑀪𑁄, 𑀅𑀫𑀸𑀬𑁄 𑀭𑀺𑀢𑁆𑀢𑀧𑁂𑀲𑀼𑀡𑁄;

𑀅𑀓𑁆𑀓𑁄𑀥𑀦𑁄 𑀮𑁄𑀪𑀧𑀸𑀧𑀁, 𑀯𑁂𑀯𑀺𑀘𑁆𑀙𑀁 𑀯𑀺𑀢𑀭𑁂 𑀫𑀼𑀦𑀺.

𑁯𑁪𑁮. ‘‘𑀦𑀺𑀤𑁆𑀤𑀁 𑀢𑀦𑁆𑀤𑀺𑀁 𑀲𑀳𑁂 𑀣𑀻𑀦𑀁, 𑀧𑀫𑀸𑀤𑁂𑀦 𑀦 𑀲𑀁𑀯𑀲𑁂;

𑀅𑀢𑀺𑀫𑀸𑀦𑁂 𑀦 𑀢𑀺𑀝𑁆𑀞𑁂𑀬𑁆𑀬, 𑀦𑀺𑀩𑁆𑀩𑀸𑀦𑀫𑀦𑀲𑁄 𑀦𑀭𑁄.

𑁯𑁪𑁯. ‘‘𑀫𑁄𑀲𑀯𑀚𑁆𑀚𑁂 𑀦 𑀦𑀻𑀬𑁂𑀣, 𑀭𑀽𑀧𑁂 𑀲𑁆𑀦𑁂𑀳𑀁 𑀦 𑀓𑀼𑀩𑁆𑀩𑀬𑁂;

𑀫𑀸𑀦𑀜𑁆𑀘 𑀧𑀭𑀺𑀚𑀸𑀦𑁂𑀬𑁆𑀬, 𑀲𑀸𑀳𑀲𑀸 𑀯𑀺𑀭𑀢𑁄 𑀘𑀭𑁂.

𑁯𑁫𑁦. ‘‘𑀧𑀼𑀭𑀸𑀡𑀁 𑀦𑀸𑀪𑀺𑀦𑀦𑁆𑀤𑁂𑀬𑁆𑀬, 𑀦𑀯𑁂 𑀔𑀦𑁆𑀢𑀺𑀁 𑀦 𑀓𑀼𑀩𑁆𑀩𑀬𑁂;

𑀳𑀺𑀬𑁆𑀬𑀫𑀸𑀦𑁂 𑀦 𑀲𑁄𑀘𑁂𑀬𑁆𑀬, 𑀆𑀓𑀸𑀲𑀁 𑀦 𑀲𑀺𑀢𑁄 𑀲𑀺𑀬𑀸.

𑁯𑁫𑁧. ‘‘𑀕𑁂𑀥𑀁 𑀩𑁆𑀭𑀽𑀫𑀺 𑀫𑀳𑁄𑀖𑁄𑀢𑀺, 𑀆𑀚𑀯𑀁 𑀩𑁆𑀭𑀽𑀫𑀺 𑀚𑀧𑁆𑀧𑀦𑀁;

𑀆𑀭𑀫𑁆𑀫𑀡𑀁 𑀧𑀓𑀧𑁆𑀧𑀦𑀁, 𑀓𑀸𑀫𑀧𑀗𑁆𑀓𑁄 𑀤𑀼𑀭𑀘𑁆𑀘𑀬𑁄.

𑁯𑁫𑁨. ‘‘𑀲𑀘𑁆𑀘𑀸 𑀅𑀯𑁄𑀓𑁆𑀓𑀫𑁆𑀫 [𑀅𑀯𑁄𑀓𑁆𑀓𑀫𑀁 (𑀦𑀺𑀤𑁆𑀤𑁂𑀲)] 𑀫𑀼𑀦𑀺, 𑀣𑀮𑁂 𑀢𑀺𑀝𑁆𑀞𑀢𑀺 𑀩𑁆𑀭𑀸𑀳𑁆𑀫𑀡𑁄;

𑀲𑀩𑁆𑀩𑀁 𑀲𑁄 [𑀲𑀩𑁆𑀩𑀲𑁄 (𑀲𑁆𑀬𑀸. 𑀓.)] 𑀧𑀝𑀺𑀦𑀺𑀲𑁆𑀲𑀚𑁆𑀚, 𑀲 𑀯𑁂 𑀲𑀦𑁆𑀢𑁄𑀢𑀺 𑀯𑀼𑀘𑁆𑀘𑀢𑀺.

𑁯𑁫𑁩. ‘‘𑀲 𑀯𑁂 𑀯𑀺𑀤𑁆𑀯𑀸 𑀲 𑀯𑁂𑀤𑀕𑀽, 𑀜𑀢𑁆𑀯𑀸 𑀥𑀫𑁆𑀫𑀁 𑀅𑀦𑀺𑀲𑁆𑀲𑀺𑀢𑁄;

𑀲𑀫𑁆𑀫𑀸 𑀲𑁄 𑀮𑁄𑀓𑁂 𑀇𑀭𑀺𑀬𑀸𑀦𑁄, 𑀦 𑀧𑀺𑀳𑁂𑀢𑀻𑀥 𑀓𑀲𑁆𑀲𑀘𑀺.

𑁯𑁫𑁪. ‘‘𑀬𑁄𑀥 𑀓𑀸𑀫𑁂 𑀅𑀘𑁆𑀘𑀢𑀭𑀺, 𑀲𑀗𑁆𑀕𑀁 𑀮𑁄𑀓𑁂 𑀤𑀼𑀭𑀘𑁆𑀘𑀬𑀁;

𑀦 𑀲𑁄 𑀲𑁄𑀘𑀢𑀺 𑀦𑀸𑀚𑁆𑀛𑁂𑀢𑀺, 𑀙𑀺𑀦𑁆𑀦𑀲𑁄𑀢𑁄 𑀅𑀩𑀦𑁆𑀥𑀦𑁄.

𑁯𑁫𑁫. ‘‘𑀬𑀁 𑀧𑀼𑀩𑁆𑀩𑁂 𑀢𑀁 𑀯𑀺𑀲𑁄𑀲𑁂𑀳𑀺, 𑀧𑀘𑁆𑀙𑀸 𑀢𑁂 𑀫𑀸𑀳𑀼 𑀓𑀺𑀜𑁆𑀘𑀦𑀁;

𑀫𑀚𑁆𑀛𑁂 𑀘𑁂 𑀦𑁄 𑀕𑀳𑁂𑀲𑁆𑀲𑀲𑀺, 𑀉𑀧𑀲𑀦𑁆𑀢𑁄 𑀘𑀭𑀺𑀲𑁆𑀲𑀲𑀺.

𑁯𑁫𑁬. ‘‘𑀲𑀩𑁆𑀩𑀲𑁄 𑀦𑀸𑀫𑀭𑀽𑀧𑀲𑁆𑀫𑀺𑀁, 𑀬𑀲𑁆𑀲 𑀦𑀢𑁆𑀣𑀺 𑀫𑀫𑀸𑀬𑀺𑀢𑀁;

𑀅𑀲𑀢𑀸 𑀘 𑀦 𑀲𑁄𑀘𑀢𑀺, 𑀲 𑀯𑁂 𑀮𑁄𑀓𑁂 𑀦 𑀚𑀻𑀬𑀢𑀺.

𑁯𑁫𑁭. ‘‘𑀬𑀲𑁆𑀲 𑀦𑀢𑁆𑀣𑀺 𑀇𑀤𑀁 𑀫𑁂𑀢𑀺, 𑀧𑀭𑁂𑀲𑀁 𑀯𑀸𑀧𑀺 𑀓𑀺𑀜𑁆𑀘𑀦𑀁;

𑀫𑀫𑀢𑁆𑀢𑀁 𑀲𑁄 𑀅𑀲𑀁𑀯𑀺𑀦𑁆𑀤𑀁, 𑀦𑀢𑁆𑀣𑀺 𑀫𑁂𑀢𑀺 𑀦 𑀲𑁄𑀘𑀢𑀺.

𑁯𑁫𑁮. ‘‘𑀅𑀦𑀺𑀝𑁆𑀞𑀼𑀭𑀻 𑀅𑀦𑀦𑀼𑀕𑀺𑀤𑁆𑀥𑁄, 𑀅𑀦𑁂𑀚𑁄 𑀲𑀩𑁆𑀩𑀥𑀻 𑀲𑀫𑁄;

𑀢𑀫𑀸𑀦𑀺𑀲𑀁𑀲𑀁 𑀧𑀩𑁆𑀭𑀽𑀫𑀺, 𑀧𑀼𑀘𑁆𑀙𑀺𑀢𑁄 𑀅𑀯𑀺𑀓𑀫𑁆𑀧𑀺𑀦𑀁.

𑁯𑁫𑁯. ‘‘𑀅𑀦𑁂𑀚𑀲𑁆𑀲 𑀯𑀺𑀚𑀸𑀦𑀢𑁄, 𑀦𑀢𑁆𑀣𑀺 𑀓𑀸𑀘𑀺 𑀦𑀺𑀲𑀗𑁆𑀔𑀢𑀺 [𑀦𑀺𑀲𑀗𑁆𑀔𑀺𑀢𑀺 (𑀲𑀻. 𑀧𑀻.)].

𑀯𑀺𑀭𑀢𑁄 𑀲𑁄 𑀯𑀺𑀬𑀸𑀭𑀩𑁆𑀪𑀸, 𑀔𑁂𑀫𑀁 𑀧𑀲𑁆𑀲𑀢𑀺 𑀲𑀩𑁆𑀩𑀥𑀺.

𑁯𑁬𑁦. ‘‘𑀦 𑀲𑀫𑁂𑀲𑀼 𑀦 𑀑𑀫𑁂𑀲𑀼, 𑀦 𑀉𑀲𑁆𑀲𑁂𑀲𑀼 𑀯𑀤𑀢𑁂 𑀫𑀼𑀦𑀺;

𑀲𑀦𑁆𑀢𑁄 𑀲𑁄 𑀯𑀻𑀢𑀫𑀘𑁆𑀙𑀭𑁄, 𑀦𑀸𑀤𑁂𑀢𑀺 𑀦 𑀦𑀺𑀭𑀲𑁆𑀲𑀢𑀻’’𑀢𑀺.

𑀅𑀢𑁆𑀢𑀤𑀡𑁆𑀟𑀲𑀼𑀢𑁆𑀢𑀁 𑀧𑀦𑁆𑀦𑀭𑀲𑀫𑀁 𑀦𑀺𑀝𑁆𑀞𑀺𑀢𑀁.