𑁧𑁬. 𑀲𑀸𑀭𑀺𑀧𑀼𑀢𑁆𑀢𑀲𑀼𑀢𑁆𑀢𑀁

𑁯𑁬𑁧. ‘‘𑀦 𑀫𑁂 𑀤𑀺𑀝𑁆𑀞𑁄 𑀇𑀢𑁄 𑀧𑀼𑀩𑁆𑀩𑁂, (𑀇𑀘𑁆𑀘𑀸𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄)

𑀦 𑀲𑀼𑀢𑁄 𑀉𑀤 𑀓𑀲𑁆𑀲𑀘𑀺;

𑀏𑀯𑀁 𑀯𑀕𑁆𑀕𑀼𑀯𑀤𑁄 𑀲𑀢𑁆𑀣𑀸,

𑀢𑀼𑀲𑀺𑀢𑀸 𑀕𑀡𑀺𑀫𑀸𑀕𑀢𑁄.

𑁯𑁬𑁨. ‘‘𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲, 𑀬𑀣𑀸 𑀤𑀺𑀲𑁆𑀲𑀢𑀺 𑀘𑀓𑁆𑀔𑀼𑀫𑀸;

𑀲𑀩𑁆𑀩𑀁 𑀢𑀫𑀁 𑀯𑀺𑀦𑁄𑀤𑁂𑀢𑁆𑀯𑀸, 𑀏𑀓𑁄𑀯 𑀭𑀢𑀺𑀫𑀚𑁆𑀛𑀕𑀸.

𑁯𑁬𑁩. ‘‘𑀢𑀁 𑀩𑀼𑀤𑁆𑀥𑀁 𑀅𑀲𑀺𑀢𑀁 𑀢𑀸𑀤𑀺𑀁, 𑀅𑀓𑀼𑀳𑀁 𑀕𑀡𑀺𑀫𑀸𑀕𑀢𑀁;

𑀩𑀳𑀽𑀦𑀫𑀺𑀥 𑀩𑀤𑁆𑀥𑀸𑀦𑀁, 𑀅𑀢𑁆𑀣𑀺 𑀧𑀜𑁆𑀳𑁂𑀦 𑀆𑀕𑀫𑀁.

𑁯𑁬𑁪. ‘‘𑀪𑀺𑀓𑁆𑀔𑀼𑀦𑁄 𑀯𑀺𑀚𑀺𑀕𑀼𑀘𑁆𑀙𑀢𑁄, 𑀪𑀚𑀢𑁄 𑀭𑀺𑀢𑁆𑀢𑀫𑀸𑀲𑀦𑀁;

𑀭𑀼𑀓𑁆𑀔𑀫𑀽𑀮𑀁 𑀲𑀼𑀲𑀸𑀦𑀁 𑀯𑀸, 𑀧𑀩𑁆𑀩𑀢𑀸𑀦𑀁 𑀕𑀼𑀳𑀸𑀲𑀼 𑀯𑀸.

𑁯𑁬𑁫. ‘‘𑀉𑀘𑁆𑀘𑀸𑀯𑀘𑁂𑀲𑀼 𑀲𑀬𑀦𑁂𑀲𑀼, 𑀓𑀻𑀯𑀦𑁆𑀢𑁄 𑀢𑀢𑁆𑀣 𑀪𑁂𑀭𑀯𑀸;

𑀬𑁂𑀳𑀺 𑀪𑀺𑀓𑁆𑀔𑀼 𑀦 𑀯𑁂𑀥𑁂𑀬𑁆𑀬, 𑀦𑀺𑀕𑁆𑀖𑁄𑀲𑁂 𑀲𑀬𑀦𑀸𑀲𑀦𑁂.

𑁯𑁬𑁬. ‘‘𑀓𑀢𑀻 𑀧𑀭𑀺𑀲𑁆𑀲𑀬𑀸 𑀮𑁄𑀓𑁂, 𑀕𑀘𑁆𑀙𑀢𑁄 𑀅𑀕𑀢𑀁 𑀤𑀺𑀲𑀁;

𑀬𑁂 𑀪𑀺𑀓𑁆𑀔𑀼 𑀅𑀪𑀺𑀲𑀫𑁆𑀪𑀯𑁂, 𑀧𑀦𑁆𑀢𑀫𑁆𑀳𑀺 𑀲𑀬𑀦𑀸𑀲𑀦𑁂.

𑁯𑁬𑁭. ‘‘𑀓𑁆𑀬𑀸𑀲𑁆𑀲 𑀩𑁆𑀬𑀧𑁆𑀧𑀣𑀬𑁄 𑀅𑀲𑁆𑀲𑀼, 𑀓𑁆𑀬𑀸𑀲𑁆𑀲𑀲𑁆𑀲𑀼 𑀇𑀥 𑀕𑁄𑀘𑀭𑀸;

𑀓𑀸𑀦𑀺 𑀲𑀻𑀮𑀩𑁆𑀩𑀢𑀸𑀦𑀸𑀲𑁆𑀲𑀼, 𑀧𑀳𑀺𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄.

𑁯𑁬𑁮. ‘‘𑀓𑀁 𑀲𑁄 𑀲𑀺𑀓𑁆𑀔𑀁 𑀲𑀫𑀸𑀤𑀸𑀬, 𑀏𑀓𑁄𑀤𑀺 𑀦𑀺𑀧𑀓𑁄 𑀲𑀢𑁄;

𑀓𑀫𑁆𑀫𑀸𑀭𑁄 𑀭𑀚𑀢𑀲𑁆𑀲𑁂𑀯, 𑀦𑀺𑀤𑁆𑀥𑀫𑁂 𑀫𑀮𑀫𑀢𑁆𑀢𑀦𑁄’’.

𑁯𑁬𑁯. ‘‘𑀯𑀺𑀚𑀺𑀕𑀼𑀘𑁆𑀙𑀫𑀸𑀦𑀲𑁆𑀲 𑀬𑀤𑀺𑀤𑀁 𑀨𑀸𑀲𑀼, (𑀲𑀸𑀭𑀺𑀧𑀼𑀢𑁆𑀢𑀸𑀢𑀺 𑀪𑀕𑀯𑀸)

𑀭𑀺𑀢𑁆𑀢𑀸𑀲𑀦𑀁 𑀲𑀬𑀦𑀁 𑀲𑁂𑀯𑀢𑁄 𑀘𑁂;

𑀲𑀫𑁆𑀩𑁄𑀥𑀺𑀓𑀸𑀫𑀲𑁆𑀲 𑀬𑀣𑀸𑀦𑀼𑀥𑀫𑁆𑀫𑀁,

𑀢𑀁 𑀢𑁂 𑀧𑀯𑀓𑁆𑀔𑀸𑀫𑀺 𑀬𑀣𑀸 𑀧𑀚𑀸𑀦𑀁.

𑁯𑁭𑁦. ‘‘𑀧𑀜𑁆𑀘𑀦𑁆𑀦𑀁 𑀥𑀻𑀭𑁄 𑀪𑀬𑀸𑀦𑀁 𑀦 𑀪𑀸𑀬𑁂, 𑀪𑀺𑀓𑁆𑀔𑀼 𑀲𑀢𑁄 𑀲𑀧𑀭𑀺𑀬𑀦𑁆𑀢𑀘𑀸𑀭𑀻;

𑀟𑀁𑀲𑀸𑀥𑀺𑀧𑀸𑀢𑀸𑀦𑀁 𑀲𑀭𑀻𑀲𑀧𑀸𑀦𑀁, 𑀫𑀦𑀼𑀲𑁆𑀲𑀨𑀲𑁆𑀲𑀸𑀦𑀁 𑀘𑀢𑀼𑀧𑁆𑀧𑀤𑀸𑀦𑀁.

𑁯𑁭𑁧. ‘‘𑀧𑀭𑀥𑀫𑁆𑀫𑀺𑀓𑀸𑀦𑀫𑁆𑀧𑀺 𑀦 𑀲𑀦𑁆𑀢𑀲𑁂𑀬𑁆𑀬, 𑀤𑀺𑀲𑁆𑀯𑀸𑀧𑀺 𑀢𑁂𑀲𑀁 𑀩𑀳𑀼𑀪𑁂𑀭𑀯𑀸𑀦𑀺;

𑀅𑀣𑀸𑀧𑀭𑀸𑀦𑀺 𑀅𑀪𑀺𑀲𑀫𑁆𑀪𑀯𑁂𑀬𑁆𑀬, 𑀧𑀭𑀺𑀲𑁆𑀲𑀬𑀸𑀦𑀺 𑀓𑀼𑀲𑀮𑀸𑀦𑀼𑀏𑀲𑀻.

𑁯𑁭𑁨. ‘‘𑀆𑀢𑀗𑁆𑀓𑀨𑀲𑁆𑀲𑁂𑀦 𑀔𑀼𑀤𑀸𑀬 𑀨𑀼𑀝𑁆𑀞𑁄, 𑀲𑀻𑀢𑀁 𑀅𑀢𑀼𑀡𑁆𑀳𑀁 [𑀅𑀘𑁆𑀘𑀼𑀡𑁆𑀳𑀁 (𑀲𑀻. 𑀲𑁆𑀬𑀸.)] 𑀅𑀥𑀺𑀯𑀸𑀲𑀬𑁂𑀬𑁆𑀬;

𑀲𑁄 𑀢𑁂𑀳𑀺 𑀨𑀼𑀝𑁆𑀞𑁄 𑀩𑀳𑀼𑀥𑀸 𑀅𑀦𑁄𑀓𑁄, 𑀯𑀻𑀭𑀺𑀬𑀁 𑀧𑀭𑀓𑁆𑀓𑀫𑁆𑀫𑀤𑀴𑁆𑀳𑀁 𑀓𑀭𑁂𑀬𑁆𑀬.

𑁯𑁭𑁩. ‘‘𑀣𑁂𑀬𑁆𑀬𑀁 𑀦 𑀓𑀸𑀭𑁂 [𑀦 𑀓𑀭𑁂𑀬𑁆𑀬 (𑀲𑀻. 𑀲𑁆𑀬𑀸. 𑀓.)] 𑀦 𑀫𑀼𑀲𑀸 𑀪𑀡𑁂𑀬𑁆𑀬, 𑀫𑁂𑀢𑁆𑀢𑀸𑀬 𑀨𑀲𑁆𑀲𑁂 𑀢𑀲𑀣𑀸𑀯𑀭𑀸𑀦𑀺;

𑀬𑀤𑀸𑀯𑀺𑀮𑀢𑁆𑀢𑀁 𑀫𑀦𑀲𑁄 𑀯𑀺𑀚𑀜𑁆𑀜𑀸, 𑀓𑀡𑁆𑀳𑀲𑁆𑀲 𑀧𑀓𑁆𑀔𑁄𑀢𑀺 𑀯𑀺𑀦𑁄𑀤𑀬𑁂𑀬𑁆𑀬.

𑁯𑁭𑁪. ‘‘𑀓𑁄𑀥𑀸𑀢𑀺𑀫𑀸𑀦𑀲𑁆𑀲 𑀯𑀲𑀁 𑀦 𑀕𑀘𑁆𑀙𑁂, 𑀫𑀽𑀮𑀫𑁆𑀧𑀺 𑀢𑁂𑀲𑀁 𑀧𑀮𑀺𑀔𑀜𑁆𑀜 𑀢𑀺𑀝𑁆𑀞𑁂;

𑀅𑀣𑀧𑁆𑀧𑀺𑀬𑀁 𑀯𑀸 𑀧𑀦 𑀅𑀧𑁆𑀧𑀺𑀬𑀁 𑀯𑀸, 𑀅𑀤𑁆𑀥𑀸 𑀪𑀯𑀦𑁆𑀢𑁄 𑀅𑀪𑀺𑀲𑀫𑁆𑀪𑀯𑁂𑀬𑁆𑀬.

𑁯𑁭𑁫. ‘‘𑀧𑀜𑁆𑀜𑀁 𑀧𑀼𑀭𑀓𑁆𑀔𑀢𑁆𑀯𑀸 𑀓𑀮𑁆𑀬𑀸𑀡𑀧𑀻𑀢𑀺, 𑀯𑀺𑀓𑁆𑀔𑀫𑁆𑀪𑀬𑁂 𑀢𑀸𑀦𑀺 𑀧𑀭𑀺𑀲𑁆𑀲𑀬𑀸𑀦𑀺;

𑀅𑀭𑀢𑀺𑀁 𑀲𑀳𑁂𑀣 𑀲𑀬𑀦𑀫𑁆𑀳𑀺 𑀧𑀦𑁆𑀢𑁂, 𑀘𑀢𑀼𑀭𑁄 𑀲𑀳𑁂𑀣 𑀧𑀭𑀺𑀤𑁂𑀯𑀥𑀫𑁆𑀫𑁂.

𑁯𑁭𑁬. ‘‘𑀓𑀺𑀁𑀲𑀽 𑀅𑀲𑀺𑀲𑁆𑀲𑀸𑀫𑀺 𑀓𑀼𑀯𑀁 𑀯𑀸 [𑀓𑀼𑀥 𑀯𑀸 (𑀓.), 𑀓𑀼𑀣 𑀯𑀸 (𑀦𑀺𑀤𑁆𑀤𑁂𑀲)] 𑀅𑀲𑀺𑀲𑁆𑀲𑀁, 𑀤𑀼𑀓𑁆𑀔𑀁 𑀯𑀢 𑀲𑁂𑀢𑁆𑀣 𑀓𑁆𑀯𑀚𑁆𑀚 𑀲𑁂𑀲𑁆𑀲𑀁;

𑀏𑀢𑁂 𑀯𑀺𑀢𑀓𑁆𑀓𑁂 𑀧𑀭𑀺𑀤𑁂𑀯𑀦𑁂𑀬𑁆𑀬𑁂, 𑀯𑀺𑀦𑀬𑁂𑀣 𑀲𑁂𑀔𑁄 𑀅𑀦𑀺𑀓𑁂𑀢𑀘𑀸𑀭𑀻.

𑁯𑁭𑁭. ‘‘𑀅𑀦𑁆𑀦𑀜𑁆𑀘 𑀮𑀤𑁆𑀥𑀸 𑀯𑀲𑀦𑀜𑁆𑀘 𑀓𑀸𑀮𑁂, 𑀫𑀢𑁆𑀢𑀁 𑀲𑁄 𑀚𑀜𑁆𑀜𑀸 𑀇𑀥 𑀢𑁄𑀲𑀦𑀢𑁆𑀣𑀁;

𑀲𑁄 𑀢𑁂𑀲𑀼 𑀕𑀼𑀢𑁆𑀢𑁄 𑀬𑀢𑀘𑀸𑀭𑀺 𑀕𑀸𑀫𑁂, 𑀭𑀼𑀲𑀺𑀢𑁄𑀧𑀺 𑀯𑀸𑀘𑀁 𑀨𑀭𑀼𑀲𑀁 𑀦 𑀯𑀚𑁆𑀚𑀸.

𑁯𑁭𑁮. ‘‘𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀼 𑀦 𑀘 𑀧𑀸𑀤𑀮𑁄𑀮𑁄, 𑀛𑀸𑀦𑀸𑀦𑀼𑀬𑀼𑀢𑁆𑀢𑁄 𑀩𑀳𑀼𑀚𑀸𑀕𑀭𑀲𑁆𑀲;

𑀉𑀧𑁂𑀓𑁆𑀔𑀫𑀸𑀭𑀩𑁆𑀪 𑀲𑀫𑀸𑀳𑀺𑀢𑀢𑁆𑀢𑁄, 𑀢𑀓𑁆𑀓𑀸𑀲𑀬𑀁 𑀓𑀼𑀓𑁆𑀓𑀼𑀘𑁆𑀘𑀺𑀬𑀽𑀧𑀙𑀺𑀦𑁆𑀤𑁂.

𑁯𑁭𑁯. ‘‘𑀘𑀼𑀤𑀺𑀢𑁄 𑀯𑀘𑀻𑀪𑀺 𑀲𑀢𑀺𑀫𑀸𑀪𑀺𑀦𑀦𑁆𑀤𑁂, 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼 𑀔𑀺𑀮𑀁 𑀧𑀪𑀺𑀦𑁆𑀤𑁂;

𑀯𑀸𑀘𑀁 𑀧𑀫𑀼𑀜𑁆𑀘𑁂 𑀓𑀼𑀲𑀮𑀁 𑀦𑀸𑀢𑀺𑀯𑁂𑀮𑀁, 𑀚𑀦𑀯𑀸𑀤𑀥𑀫𑁆𑀫𑀸𑀬 𑀦 𑀘𑁂𑀢𑀬𑁂𑀬𑁆𑀬.

𑁯𑁮𑁦. ‘‘𑀅𑀣𑀸𑀧𑀭𑀁 𑀧𑀜𑁆𑀘 𑀭𑀚𑀸𑀦𑀺 𑀮𑁄𑀓𑁂, 𑀬𑁂𑀲𑀁 𑀲𑀢𑀻𑀫𑀸 𑀯𑀺𑀦𑀬𑀸𑀬 𑀲𑀺𑀓𑁆𑀔𑁂;

𑀭𑀽𑀧𑁂𑀲𑀼 𑀲𑀤𑁆𑀤𑁂𑀲𑀼 𑀅𑀣𑁄 𑀭𑀲𑁂𑀲𑀼, 𑀕𑀦𑁆𑀥𑁂𑀲𑀼 𑀨𑀲𑁆𑀲𑁂𑀲𑀼 𑀲𑀳𑁂𑀣 𑀭𑀸𑀕𑀁.

𑁯𑁮𑁧. ‘‘𑀏𑀢𑁂𑀲𑀼 𑀥𑀫𑁆𑀫𑁂𑀲𑀼 𑀯𑀺𑀦𑁂𑀬𑁆𑀬 𑀙𑀦𑁆𑀤𑀁, 𑀪𑀺𑀓𑁆𑀔𑀼 𑀲𑀢𑀺𑀫𑀸 𑀲𑀼𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁄;

𑀓𑀸𑀮𑁂𑀦 𑀲𑁄 𑀲𑀫𑁆𑀫𑀸 𑀥𑀫𑁆𑀫𑀁 𑀧𑀭𑀺𑀯𑀻𑀫𑀁𑀲𑀫𑀸𑀦𑁄,

𑀏𑀓𑁄𑀤𑀺𑀪𑀽𑀢𑁄 𑀯𑀺𑀳𑀦𑁂 𑀢𑀫𑀁 𑀲𑁄’’𑀢𑀺.

𑀲𑀸𑀭𑀺𑀧𑀼𑀢𑁆𑀢𑀲𑀼𑀢𑁆𑀢𑀁 𑀲𑁄𑀴𑀲𑀫𑀁 𑀦𑀺𑀝𑁆𑀞𑀺𑀢𑀁.

𑀅𑀝𑁆𑀞𑀓𑀯𑀕𑁆𑀕𑁄 𑀘𑀢𑀼𑀢𑁆𑀣𑁄