𑁪. 𑀅𑀝𑁆𑀞𑀓𑀯𑀕𑁆𑀕𑁄

𑁧. 𑀓𑀸𑀫𑀲𑀼𑀢𑁆𑀢𑀁

𑁭𑁭𑁨. 𑀓𑀸𑀫𑀁 𑀓𑀸𑀫𑀬𑀫𑀸𑀦𑀲𑁆𑀲, 𑀢𑀲𑁆𑀲 𑀘𑁂 𑀢𑀁 𑀲𑀫𑀺𑀚𑁆𑀛𑀢𑀺;

𑀅𑀤𑁆𑀥𑀸 𑀧𑀻𑀢𑀺𑀫𑀦𑁄 𑀳𑁄𑀢𑀺, 𑀮𑀤𑁆𑀥𑀸 𑀫𑀘𑁆𑀘𑁄 𑀬𑀤𑀺𑀘𑁆𑀙𑀢𑀺.

𑁭𑁭𑁩. 𑀢𑀲𑁆𑀲 𑀘𑁂 𑀓𑀸𑀫𑀬𑀸𑀦𑀲𑁆𑀲 [𑀓𑀸𑀫𑀬𑀫𑀸𑀦𑀲𑁆𑀲 (𑀓.)], 𑀙𑀦𑁆𑀤𑀚𑀸𑀢𑀲𑁆𑀲 𑀚𑀦𑁆𑀢𑀼𑀦𑁄;

𑀢𑁂 𑀓𑀸𑀫𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀲𑀮𑁆𑀮𑀯𑀺𑀤𑁆𑀥𑁄𑀯 𑀭𑀼𑀧𑁆𑀧𑀢𑀺.

𑁭𑁭𑁪. 𑀬𑁄 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀢𑀺, 𑀲𑀧𑁆𑀧𑀲𑁆𑀲𑁂𑀯 𑀧𑀤𑀸 𑀲𑀺𑀭𑁄;

𑀲𑁄𑀫𑀁 [𑀲𑁄 𑀇𑀫𑀁 (𑀲𑀻. 𑀧𑀻.)] 𑀯𑀺𑀲𑀢𑁆𑀢𑀺𑀓𑀁 𑀮𑁄𑀓𑁂, 𑀲𑀢𑁄 𑀲𑀫𑀢𑀺𑀯𑀢𑁆𑀢𑀢𑀺.

𑁭𑁭𑁫. 𑀔𑁂𑀢𑁆𑀢𑀁 𑀯𑀢𑁆𑀣𑀼𑀁 𑀳𑀺𑀭𑀜𑁆𑀜𑀁 𑀯𑀸, 𑀕𑀯𑀲𑁆𑀲𑀁 [𑀕𑀯𑀸𑀲𑁆𑀲𑀁 (𑀲𑀻. 𑀲𑁆𑀬𑀸. 𑀧𑀻.)] 𑀤𑀸𑀲𑀧𑁄𑀭𑀺𑀲𑀁;

𑀣𑀺𑀬𑁄 𑀩𑀦𑁆𑀥𑀽 𑀧𑀼𑀣𑀼 𑀓𑀸𑀫𑁂, 𑀬𑁄 𑀦𑀭𑁄 𑀅𑀦𑀼𑀕𑀺𑀚𑁆𑀛𑀢𑀺.

𑁭𑁭𑁬. 𑀅𑀩𑀮𑀸 𑀦𑀁 𑀩𑀮𑀻𑀬𑀦𑁆𑀢𑀺, 𑀫𑀤𑁆𑀤𑀦𑁆𑀢𑁂𑀦𑀁 𑀧𑀭𑀺𑀲𑁆𑀲𑀬𑀸;

𑀢𑀢𑁄 𑀦𑀁 𑀤𑀼𑀓𑁆𑀔𑀫𑀦𑁆𑀯𑁂𑀢𑀺, 𑀦𑀸𑀯𑀁 𑀪𑀺𑀦𑁆𑀦𑀫𑀺𑀯𑁄𑀤𑀓𑀁.

𑁭𑁭𑁭. 𑀢𑀲𑁆𑀫𑀸 𑀚𑀦𑁆𑀢𑀼 𑀲𑀤𑀸 𑀲𑀢𑁄, 𑀓𑀸𑀫𑀸𑀦𑀺 𑀧𑀭𑀺𑀯𑀚𑁆𑀚𑀬𑁂;

𑀢𑁂 𑀧𑀳𑀸𑀬 𑀢𑀭𑁂 𑀑𑀖𑀁, 𑀦𑀸𑀯𑀁 𑀲𑀺𑀢𑁆𑀯𑀸𑀯 [𑀲𑀺𑀜𑁆𑀘𑀺𑀢𑁆𑀯𑀸 (𑀲𑀻.)] 𑀧𑀸𑀭𑀕𑀽𑀢𑀺.

𑀓𑀸𑀫𑀲𑀼𑀢𑁆𑀢𑀁 𑀧𑀞𑀫𑀁 𑀦𑀺𑀝𑁆𑀞𑀺𑀢𑀁.

𑁨. 𑀕𑀼𑀳𑀝𑁆𑀞𑀓𑀲𑀼𑀢𑁆𑀢𑀁

𑁭𑁭𑁮. 𑀲𑀢𑁆𑀢𑁄 𑀕𑀼𑀳𑀸𑀬𑀁 𑀩𑀳𑀼𑀦𑀸𑀪𑀺𑀙𑀦𑁆𑀦𑁄, 𑀢𑀺𑀝𑁆𑀞𑀁 𑀦𑀭𑁄 𑀫𑁄𑀳𑀦𑀲𑁆𑀫𑀺𑀁 𑀧𑀕𑀸𑀴𑁆𑀳𑁄;

𑀤𑀽𑀭𑁂 𑀯𑀺𑀯𑁂𑀓𑀸 𑀳𑀺 𑀢𑀣𑀸𑀯𑀺𑀥𑁄 𑀲𑁄, 𑀓𑀸𑀫𑀸 𑀳𑀺 𑀮𑁄𑀓𑁂 𑀦 𑀳𑀺 𑀲𑀼𑀧𑁆𑀧𑀳𑀸𑀬𑀸.

𑁭𑁭𑁯. 𑀇𑀘𑁆𑀙𑀸𑀦𑀺𑀤𑀸𑀦𑀸 𑀪𑀯𑀲𑀸𑀢𑀩𑀤𑁆𑀥𑀸, 𑀢𑁂 𑀤𑀼𑀧𑁆𑀧𑀫𑀼𑀜𑁆𑀘𑀸 𑀦 𑀳𑀺 𑀅𑀜𑁆𑀜𑀫𑁄𑀓𑁆𑀔𑀸;

𑀧𑀘𑁆𑀙𑀸 𑀧𑀼𑀭𑁂 𑀯𑀸𑀧𑀺 𑀅𑀧𑁂𑀓𑁆𑀔𑀫𑀸𑀦𑀸, 𑀇𑀫𑁂𑀯 𑀓𑀸𑀫𑁂 𑀧𑀼𑀭𑀺𑀫𑁂𑀯 𑀚𑀧𑁆𑀧𑀁.

𑁭𑁮𑁦. 𑀓𑀸𑀫𑁂𑀲𑀼 𑀕𑀺𑀤𑁆𑀥𑀸 𑀧𑀲𑀼𑀢𑀸 𑀧𑀫𑀽𑀴𑁆𑀳𑀸, 𑀅𑀯𑀤𑀸𑀦𑀺𑀬𑀸 𑀢𑁂 𑀯𑀺𑀲𑀫𑁂 𑀦𑀺𑀯𑀺𑀝𑁆𑀞𑀸;

𑀤𑀼𑀓𑁆𑀔𑀽𑀧𑀦𑀻𑀢𑀸 𑀧𑀭𑀺𑀤𑁂𑀯𑀬𑀦𑁆𑀢𑀺, 𑀓𑀺𑀁𑀲𑀽 𑀪𑀯𑀺𑀲𑁆𑀲𑀸𑀫 𑀇𑀢𑁄 𑀘𑀼𑀢𑀸𑀲𑁂.

𑁭𑁮𑁧. 𑀢𑀲𑁆𑀫𑀸 𑀳𑀺 𑀲𑀺𑀓𑁆𑀔𑁂𑀣 𑀇𑀥𑁂𑀯 𑀚𑀦𑁆𑀢𑀼, 𑀬𑀁 𑀓𑀺𑀜𑁆𑀘𑀺 𑀚𑀜𑁆𑀜𑀸 𑀯𑀺𑀲𑀫𑀦𑁆𑀢𑀺 𑀮𑁄𑀓𑁂;

𑀦 𑀢𑀲𑁆𑀲 𑀳𑁂𑀢𑀽 𑀯𑀺𑀲𑀫𑀁 𑀘𑀭𑁂𑀬𑁆𑀬, 𑀅𑀧𑁆𑀧𑀜𑁆𑀳𑀺𑀤𑀁 𑀚𑀻𑀯𑀺𑀢𑀫𑀸𑀳𑀼 𑀥𑀻𑀭𑀸.

𑁭𑁮𑁨. 𑀧𑀲𑁆𑀲𑀸𑀫𑀺 𑀮𑁄𑀓𑁂 𑀧𑀭𑀺𑀨𑀦𑁆𑀤𑀫𑀸𑀦𑀁, 𑀧𑀚𑀁 𑀇𑀫𑀁 𑀢𑀡𑁆𑀳𑀕𑀢𑀁 𑀪𑀯𑁂𑀲𑀼;

𑀳𑀻𑀦𑀸 𑀦𑀭𑀸 𑀫𑀘𑁆𑀘𑀼𑀫𑀼𑀔𑁂 𑀮𑀧𑀦𑁆𑀢𑀺, 𑀅𑀯𑀻𑀢𑀢𑀡𑁆𑀳𑀸𑀲𑁂 𑀪𑀯𑀸𑀪𑀯𑁂𑀲𑀼.

𑁭𑁮𑁩. 𑀫𑀫𑀸𑀬𑀺𑀢𑁂 𑀧𑀲𑁆𑀲𑀣 𑀨𑀦𑁆𑀤𑀫𑀸𑀦𑁂, 𑀫𑀘𑁆𑀙𑁂𑀯 𑀅𑀧𑁆𑀧𑁄𑀤𑀓𑁂 𑀔𑀻𑀡𑀲𑁄𑀢𑁂;

𑀏𑀢𑀫𑁆𑀧𑀺 𑀤𑀺𑀲𑁆𑀯𑀸 𑀅𑀫𑀫𑁄 𑀘𑀭𑁂𑀬𑁆𑀬, 𑀪𑀯𑁂𑀲𑀼 𑀆𑀲𑀢𑁆𑀢𑀺𑀫𑀓𑀼𑀩𑁆𑀩𑀫𑀸𑀦𑁄.

𑁭𑁮𑁪. 𑀉𑀪𑁄𑀲𑀼 𑀅𑀦𑁆𑀢𑁂𑀲𑀼 𑀯𑀺𑀦𑁂𑀬𑁆𑀬 𑀙𑀦𑁆𑀤𑀁, 𑀨𑀲𑁆𑀲𑀁 𑀧𑀭𑀺𑀜𑁆𑀜𑀸𑀬 𑀅𑀦𑀸𑀦𑀼𑀕𑀺𑀤𑁆𑀥𑁄;

𑀬𑀤𑀢𑁆𑀢𑀕𑀭𑀳𑀻 𑀢𑀤𑀓𑀼𑀩𑁆𑀩𑀫𑀸𑀦𑁄, 𑀦 𑀮𑀺𑀧𑁆𑀧𑀢𑀻 [𑀦 𑀮𑀺𑀫𑁆𑀧𑀢𑀻 (𑀲𑁆𑀬𑀸. 𑀓.)] 𑀤𑀺𑀝𑁆𑀞𑀲𑀼𑀢𑁂𑀲𑀼 𑀥𑀻𑀭𑁄.

𑁭𑁮𑁫. 𑀲𑀜𑁆𑀜𑀁 𑀧𑀭𑀺𑀜𑁆𑀜𑀸 𑀯𑀺𑀢𑀭𑁂𑀬𑁆𑀬 𑀑𑀖𑀁, 𑀧𑀭𑀺𑀕𑁆𑀕𑀳𑁂𑀲𑀼 𑀫𑀼𑀦𑀺 𑀦𑁄𑀧𑀮𑀺𑀢𑁆𑀢𑁄;

𑀅𑀩𑁆𑀩𑀽𑀴𑁆𑀳𑀲𑀮𑁆𑀮𑁄 𑀘𑀭𑀫𑀧𑁆𑀧𑀫𑀢𑁆𑀢𑁄, 𑀦𑀸𑀲𑀻𑀲𑀢𑀻 [𑀦𑀸𑀲𑀺𑀁𑀲𑀢𑀻 (𑀲𑀻. 𑀲𑁆𑀬𑀸. 𑀧𑀻.)] 𑀮𑁄𑀓𑀫𑀺𑀫𑀁 𑀧𑀭𑀜𑁆𑀘𑀸𑀢𑀺.

𑀕𑀼𑀳𑀝𑁆𑀞𑀓𑀲𑀼𑀢𑁆𑀢𑀁 𑀤𑀼𑀢𑀺𑀬𑀁 𑀦𑀺𑀝𑁆𑀞𑀺𑀢𑀁.

𑁩. 𑀤𑀼𑀝𑁆𑀞𑀝𑁆𑀞𑀓𑀲𑀼𑀢𑁆𑀢𑀁

𑁭𑁮𑁬. 𑀯𑀤𑀦𑁆𑀢𑀺 𑀯𑁂 𑀤𑀼𑀝𑁆𑀞𑀫𑀦𑀸𑀧𑀺 𑀏𑀓𑁂, 𑀅𑀣𑁄𑀧𑀺 𑀯𑁂 𑀲𑀘𑁆𑀘𑀫𑀦𑀸 𑀯𑀤𑀦𑁆𑀢𑀺;

𑀯𑀸𑀤𑀜𑁆𑀘 𑀚𑀸𑀢𑀁 𑀫𑀼𑀦𑀺 𑀦𑁄 𑀉𑀧𑁂𑀢𑀺, 𑀢𑀲𑁆𑀫𑀸 𑀫𑀼𑀦𑀻 𑀦𑀢𑁆𑀣𑀺 𑀔𑀺𑀮𑁄 𑀓𑀼𑀳𑀺𑀜𑁆𑀘𑀺.

𑁭𑁮𑁭. 𑀲𑀓𑀜𑁆𑀳𑀺 𑀤𑀺𑀝𑁆𑀞𑀺𑀁 𑀓𑀣𑀫𑀘𑁆𑀘𑀬𑁂𑀬𑁆𑀬, 𑀙𑀦𑁆𑀤𑀸𑀦𑀼𑀦𑀻𑀢𑁄 𑀭𑀼𑀘𑀺𑀬𑀸 𑀦𑀺𑀯𑀺𑀝𑁆𑀞𑁄;

𑀲𑀬𑀁 𑀲𑀫𑀢𑁆𑀢𑀸𑀦𑀺 𑀧𑀓𑀼𑀩𑁆𑀩𑀫𑀸𑀦𑁄, 𑀬𑀣𑀸 𑀳𑀺 𑀚𑀸𑀦𑁂𑀬𑁆𑀬 𑀢𑀣𑀸 𑀯𑀤𑁂𑀬𑁆𑀬.

𑁭𑁮𑁮. 𑀬𑁄 𑀅𑀢𑁆𑀢𑀦𑁄 𑀲𑀻𑀮𑀯𑀢𑀸𑀦𑀺 𑀚𑀦𑁆𑀢𑀼, 𑀅𑀦𑀸𑀦𑀼𑀧𑀼𑀝𑁆𑀞𑁄𑀯 𑀧𑀭𑁂𑀲 [𑀧𑀭𑀲𑁆𑀲 (𑀓.)] 𑀧𑀸𑀯 [𑀧𑀸𑀯𑀸 (𑀲𑀻. 𑀲𑁆𑀬𑀸. 𑀧𑀻.)];

𑀅𑀦𑀭𑀺𑀬𑀥𑀫𑁆𑀫𑀁 𑀓𑀼𑀲𑀮𑀸 𑀢𑀫𑀸𑀳𑀼, 𑀬𑁄 𑀆𑀢𑀼𑀫𑀸𑀦𑀁 𑀲𑀬𑀫𑁂𑀯 𑀧𑀸𑀯.

𑁭𑁮𑁯. 𑀲𑀦𑁆𑀢𑁄 𑀘 𑀪𑀺𑀓𑁆𑀔𑀼 𑀅𑀪𑀺𑀦𑀺𑀩𑁆𑀩𑀼𑀢𑀢𑁆𑀢𑁄, 𑀇𑀢𑀺𑀳𑀦𑁆𑀢𑀺 𑀲𑀻𑀮𑁂𑀲𑀼 𑀅𑀓𑀢𑁆𑀣𑀫𑀸𑀦𑁄;

𑀢𑀫𑀭𑀺𑀬𑀥𑀫𑁆𑀫𑀁 𑀓𑀼𑀲𑀮𑀸 𑀯𑀤𑀦𑁆𑀢𑀺, 𑀬𑀲𑁆𑀲𑀼𑀲𑁆𑀲𑀤𑀸 𑀦𑀢𑁆𑀣𑀺 𑀓𑀼𑀳𑀺𑀜𑁆𑀘𑀺 𑀮𑁄𑀓𑁂.

𑁭𑁯𑁦. 𑀧𑀓𑀧𑁆𑀧𑀺𑀢𑀸 𑀲𑀗𑁆𑀔𑀢𑀸 𑀬𑀲𑁆𑀲 𑀥𑀫𑁆𑀫𑀸, 𑀧𑀼𑀭𑀓𑁆𑀔𑀢𑀸 [𑀧𑀼𑀭𑁂𑀓𑁆𑀔𑀢𑀸 (𑀲𑀻.)] 𑀲𑀦𑁆𑀢𑀺 𑀅𑀯𑀻𑀯𑀤𑀸𑀢𑀸;

𑀬𑀤𑀢𑁆𑀢𑀦𑀺 𑀧𑀲𑁆𑀲𑀢𑀺 𑀆𑀦𑀺𑀲𑀁𑀲𑀁, 𑀢𑀁 𑀦𑀺𑀲𑁆𑀲𑀺𑀢𑁄 𑀓𑀼𑀧𑁆𑀧𑀧𑀝𑀺𑀘𑁆𑀘 𑀲𑀦𑁆𑀢𑀺𑀁.

𑁭𑁯𑁧. 𑀤𑀺𑀝𑁆𑀞𑀻𑀦𑀺𑀯𑁂𑀲𑀸 𑀦 𑀳𑀺 𑀲𑁆𑀯𑀸𑀢𑀺𑀯𑀢𑁆𑀢𑀸, 𑀥𑀫𑁆𑀫𑁂𑀲𑀼 𑀦𑀺𑀘𑁆𑀙𑁂𑀬𑁆𑀬 𑀲𑀫𑀼𑀕𑁆𑀕𑀳𑀻𑀢𑀁;

𑀢𑀲𑁆𑀫𑀸 𑀦𑀭𑁄 𑀢𑁂𑀲𑀼 𑀦𑀺𑀯𑁂𑀲𑀦𑁂𑀲𑀼, 𑀦𑀺𑀭𑀲𑁆𑀲𑀢𑀻 𑀆𑀤𑀺𑀬𑀢𑀻 𑀘 𑀥𑀫𑁆𑀫𑀁.

𑁭𑁯𑁨. 𑀥𑁄𑀦𑀲𑁆𑀲 𑀳𑀺 𑀦𑀢𑁆𑀣𑀺 𑀓𑀼𑀳𑀺𑀜𑁆𑀘𑀺 𑀮𑁄𑀓𑁂, 𑀧𑀓𑀧𑁆𑀧𑀺𑀢𑀸 𑀤𑀺𑀝𑁆𑀞𑀺 𑀪𑀯𑀸𑀪𑀯𑁂𑀲𑀼;

𑀫𑀸𑀬𑀜𑁆𑀘 𑀫𑀸𑀦𑀜𑁆𑀘 𑀧𑀳𑀸𑀬 𑀥𑁄𑀦𑁄, 𑀲 𑀓𑁂𑀦 𑀕𑀘𑁆𑀙𑁂𑀬𑁆𑀬 𑀅𑀦𑀽𑀧𑀬𑁄 𑀲𑁄.

𑁭𑁯𑁩. 𑀉𑀧𑀬𑁄 𑀳𑀺 𑀥𑀫𑁆𑀫𑁂𑀲𑀼 𑀉𑀧𑁂𑀢𑀺 𑀯𑀸𑀤𑀁, 𑀅𑀦𑀽𑀧𑀬𑀁 𑀓𑁂𑀦 𑀓𑀣𑀁 𑀯𑀤𑁂𑀬𑁆𑀬;

𑀅𑀢𑁆𑀢𑀸 𑀦𑀺𑀭𑀢𑁆𑀢𑀸 [𑀅𑀢𑁆𑀢𑀁 𑀦𑀺𑀭𑀢𑁆𑀢𑀁 (𑀩𑀳𑀽𑀲𑀼)] 𑀦 𑀳𑀺 𑀢𑀲𑁆𑀲 𑀅𑀢𑁆𑀣𑀺, 𑀅𑀥𑁄𑀲𑀺 𑀲𑁄 𑀤𑀺𑀝𑁆𑀞𑀺𑀫𑀺𑀥𑁂𑀯 𑀲𑀩𑁆𑀩𑀦𑁆𑀢𑀺.

𑀤𑀼𑀝𑁆𑀞𑀝𑁆𑀞𑀓𑀲𑀼𑀢𑁆𑀢𑀁 𑀢𑀢𑀺𑀬𑀁 𑀦𑀺𑀝𑁆𑀞𑀺𑀢𑀁.

𑁪. 𑀲𑀼𑀤𑁆𑀥𑀝𑁆𑀞𑀓𑀲𑀼𑀢𑁆𑀢𑀁

𑁭𑁯𑁪. 𑀧𑀲𑁆𑀲𑀸𑀫𑀺 𑀲𑀼𑀤𑁆𑀥𑀁 𑀧𑀭𑀫𑀁 𑀅𑀭𑁄𑀕𑀁, 𑀤𑀺𑀝𑁆𑀞𑁂𑀦 𑀲𑀁𑀲𑀼𑀤𑁆𑀥𑀺 𑀦𑀭𑀲𑁆𑀲 𑀳𑁄𑀢𑀺;

𑀏𑀯𑀸𑀪𑀺𑀚𑀸𑀦𑀁 [𑀏𑀢𑀸𑀪𑀺𑀚𑀸𑀦𑀁 (𑀲𑀻. 𑀧𑀻.)] 𑀧𑀭𑀫𑀦𑁆𑀢𑀺 𑀜𑀢𑁆𑀯𑀸, 𑀲𑀼𑀤𑁆𑀥𑀸𑀦𑀼𑀧𑀲𑁆𑀲𑀻𑀢𑀺 𑀧𑀘𑁆𑀘𑁂𑀢𑀺 𑀜𑀸𑀡𑀁.

𑁭𑁯𑁫. 𑀤𑀺𑀝𑁆𑀞𑁂𑀦 𑀘𑁂 𑀲𑀼𑀤𑁆𑀥𑀺 𑀦𑀭𑀲𑁆𑀲 𑀳𑁄𑀢𑀺, 𑀜𑀸𑀡𑁂𑀦 𑀯𑀸 𑀲𑁄 𑀧𑀚𑀳𑀸𑀢𑀺 𑀤𑀼𑀓𑁆𑀔𑀁;

𑀅𑀜𑁆𑀜𑁂𑀦 𑀲𑁄 𑀲𑀼𑀚𑁆𑀛𑀢𑀺 𑀲𑁄𑀧𑀥𑀻𑀓𑁄, 𑀤𑀺𑀝𑁆𑀞𑀻 𑀳𑀺 𑀦𑀁 𑀧𑀸𑀯 𑀢𑀣𑀸 𑀯𑀤𑀸𑀦𑀁.

𑁭𑁯𑁬. 𑀦 𑀩𑁆𑀭𑀸𑀳𑁆𑀫𑀡𑁄 𑀅𑀜𑁆𑀜𑀢𑁄 𑀲𑀼𑀤𑁆𑀥𑀺𑀫𑀸𑀳, 𑀤𑀺𑀝𑁆𑀞𑁂 𑀲𑀼𑀢𑁂 𑀲𑀻𑀮𑀯𑀢𑁂 𑀫𑀼𑀢𑁂 𑀯𑀸;

𑀧𑀼𑀜𑁆𑀜𑁂 𑀘 𑀧𑀸𑀧𑁂 𑀘 𑀅𑀦𑀽𑀧𑀮𑀺𑀢𑁆𑀢𑁄, 𑀅𑀢𑁆𑀢𑀜𑁆𑀚𑀳𑁄 𑀦𑀬𑀺𑀥 𑀧𑀓𑀼𑀩𑁆𑀩𑀫𑀸𑀦𑁄.

𑁭𑁯𑁭. 𑀧𑀼𑀭𑀺𑀫𑀁 𑀧𑀳𑀸𑀬 𑀅𑀧𑀭𑀁 𑀲𑀺𑀢𑀸𑀲𑁂, 𑀏𑀚𑀸𑀦𑀼𑀕𑀸 𑀢𑁂 𑀦 𑀢𑀭𑀦𑁆𑀢𑀺 𑀲𑀗𑁆𑀕𑀁;

𑀢𑁂 𑀉𑀕𑁆𑀕𑀳𑀸𑀬𑀦𑁆𑀢𑀺 𑀦𑀺𑀭𑀲𑁆𑀲𑀚𑀦𑁆𑀢𑀺, 𑀓𑀧𑀻𑀯 𑀲𑀸𑀔𑀁 𑀧𑀫𑀼𑀜𑁆𑀘𑀁 𑀕𑀳𑀸𑀬𑀁 [𑀧𑀫𑀼𑀔𑀁 𑀕𑀳𑀸𑀬 (𑀲𑁆𑀬𑀸.), 𑀧𑀫𑀼𑀜𑁆𑀘 𑀕𑀳𑀸𑀬 (𑀓.)].

𑁭𑁯𑁮. 𑀲𑀬𑀁 𑀲𑀫𑀸𑀤𑀸𑀬 𑀯𑀢𑀸𑀦𑀺 𑀚𑀦𑁆𑀢𑀼, 𑀉𑀘𑁆𑀘𑀸𑀯𑀘𑀁 𑀕𑀘𑁆𑀙𑀢𑀺 𑀲𑀜𑁆𑀜𑀲𑀢𑁆𑀢𑁄;

𑀯𑀺𑀤𑁆𑀯𑀸 𑀘 𑀯𑁂𑀤𑁂𑀳𑀺 𑀲𑀫𑁂𑀘𑁆𑀘 𑀥𑀫𑁆𑀫𑀁, 𑀦 𑀉𑀘𑁆𑀘𑀸𑀯𑀘𑀁 𑀕𑀘𑁆𑀙𑀢𑀺 𑀪𑀽𑀭𑀺𑀧𑀜𑁆𑀜𑁄.

𑁭𑁯𑁯. 𑀲 𑀲𑀩𑁆𑀩𑀥𑀫𑁆𑀫𑁂𑀲𑀼 𑀯𑀺𑀲𑁂𑀦𑀺𑀪𑀽𑀢𑁄, 𑀬𑀁 𑀓𑀺𑀜𑁆𑀘𑀺 𑀤𑀺𑀝𑁆𑀞𑀁 𑀯 𑀲𑀼𑀢𑀁 𑀫𑀼𑀢𑀁 𑀯𑀸;

𑀢𑀫𑁂𑀯 𑀤𑀲𑁆𑀲𑀺𑀁 𑀯𑀺𑀯𑀝𑀁 𑀘𑀭𑀦𑁆𑀢𑀁, 𑀓𑁂𑀦𑀻𑀥 𑀮𑁄𑀓𑀲𑁆𑀫𑀺 𑀯𑀺𑀓𑀧𑁆𑀧𑀬𑁂𑀬𑁆𑀬.

𑁮𑁦𑁦. 𑀦 𑀓𑀧𑁆𑀧𑀬𑀦𑁆𑀢𑀺 𑀦 𑀧𑀼𑀭𑁂𑀓𑁆𑀔𑀭𑁄𑀦𑁆𑀢𑀺, 𑀅𑀘𑁆𑀘𑀦𑁆𑀢𑀲𑀼𑀤𑁆𑀥𑀻𑀢𑀺 𑀦 𑀢𑁂 𑀯𑀤𑀦𑁆𑀢𑀺;

𑀆𑀤𑀸𑀦𑀕𑀦𑁆𑀣𑀁 𑀕𑀣𑀺𑀢𑀁 𑀯𑀺𑀲𑀚𑁆𑀚, 𑀆𑀲𑀁 𑀦 𑀓𑀼𑀩𑁆𑀩𑀦𑁆𑀢𑀺 𑀓𑀼𑀳𑀺𑀜𑁆𑀘𑀺 𑀮𑁄𑀓𑁂.

𑁮𑁦𑁧. 𑀲𑀻𑀫𑀸𑀢𑀺𑀕𑁄 𑀩𑁆𑀭𑀸𑀳𑁆𑀫𑀡𑁄 𑀢𑀲𑁆𑀲 𑀦𑀢𑁆𑀣𑀺, 𑀜𑀢𑁆𑀯𑀸 𑀯 𑀤𑀺𑀲𑁆𑀯𑀸 𑀯 [𑀜𑀢𑁆𑀯𑀸 𑀘 𑀤𑀺𑀲𑁆𑀯𑀸 𑀘 (𑀓. 𑀲𑀻. 𑀓.)] 𑀲𑀫𑀼𑀕𑁆𑀕𑀳𑀻𑀢𑀁;

𑀦 𑀭𑀸𑀕𑀭𑀸𑀕𑀻 𑀦 𑀯𑀺𑀭𑀸𑀕𑀭𑀢𑁆𑀢𑁄, 𑀢𑀲𑁆𑀲𑀻𑀥 𑀦𑀢𑁆𑀣𑀻 𑀧𑀭𑀫𑀼𑀕𑁆𑀕𑀳𑀻𑀢𑀦𑁆𑀢𑀺.

𑀲𑀼𑀤𑁆𑀥𑀝𑁆𑀞𑀓𑀲𑀼𑀢𑁆𑀢𑀁 𑀘𑀢𑀼𑀢𑁆𑀣𑀁 𑀦𑀺𑀝𑁆𑀞𑀺𑀢𑀁.

𑁫. 𑀧𑀭𑀫𑀝𑁆𑀞𑀓𑀲𑀼𑀢𑁆𑀢𑀁

𑁮𑁦𑁨. 𑀧𑀭𑀫𑀦𑁆𑀢𑀺 𑀤𑀺𑀝𑁆𑀞𑀻𑀲𑀼 𑀧𑀭𑀺𑀩𑁆𑀩𑀲𑀸𑀦𑁄, 𑀬𑀤𑀼𑀢𑁆𑀢𑀭𑀺 𑀓𑀼𑀭𑀼𑀢𑁂 𑀚𑀦𑁆𑀢𑀼 𑀮𑁄𑀓𑁂;

𑀳𑀻𑀦𑀸𑀢𑀺 𑀅𑀜𑁆𑀜𑁂 𑀢𑀢𑁄 𑀲𑀩𑁆𑀩𑀫𑀸𑀳, 𑀢𑀲𑁆𑀫𑀸 𑀯𑀺𑀯𑀸𑀤𑀸𑀦𑀺 𑀅𑀯𑀻𑀢𑀺𑀯𑀢𑁆𑀢𑁄.

𑁮𑁦𑁩. 𑀬𑀤𑀢𑁆𑀢𑀦𑀻 𑀧𑀲𑁆𑀲𑀢𑀺 𑀆𑀦𑀺𑀲𑀁𑀲𑀁, 𑀤𑀺𑀝𑁆𑀞𑁂 𑀲𑀼𑀢𑁂 𑀲𑀻𑀮𑀯𑀢𑁂 [𑀲𑀻𑀮𑀩𑁆𑀩𑀢𑁂 (𑀲𑁆𑀬𑀸.)] 𑀫𑀼𑀢𑁂 𑀯𑀸;

𑀢𑀤𑁂𑀯 𑀲𑁄 𑀢𑀢𑁆𑀣 𑀲𑀫𑀼𑀕𑁆𑀕𑀳𑀸𑀬, 𑀦𑀺𑀳𑀻𑀦𑀢𑁄 𑀧𑀲𑁆𑀲𑀢𑀺 𑀲𑀩𑁆𑀩𑀫𑀜𑁆𑀜𑀁.

𑁮𑁦𑁪. 𑀢𑀁 𑀯𑀸𑀧𑀺 𑀕𑀦𑁆𑀣𑀁 𑀓𑀼𑀲𑀮𑀸 𑀯𑀤𑀦𑁆𑀢𑀺, 𑀬𑀁 𑀦𑀺𑀲𑁆𑀲𑀺𑀢𑁄 𑀧𑀲𑁆𑀲𑀢𑀺 𑀳𑀻𑀦𑀫𑀜𑁆𑀜𑀁;

𑀢𑀲𑁆𑀫𑀸 𑀳𑀺 𑀤𑀺𑀝𑁆𑀞𑀁 𑀯 𑀲𑀼𑀢𑀁 𑀫𑀼𑀢𑀁 𑀯𑀸, 𑀲𑀻𑀮𑀩𑁆𑀩𑀢𑀁 𑀪𑀺𑀓𑁆𑀔𑀼 𑀦 𑀦𑀺𑀲𑁆𑀲𑀬𑁂𑀬𑁆𑀬.

𑁮𑁦𑁫. 𑀤𑀺𑀝𑁆𑀞𑀺𑀫𑁆𑀧𑀺 𑀮𑁄𑀓𑀲𑁆𑀫𑀺𑀁 𑀦 𑀓𑀧𑁆𑀧𑀬𑁂𑀬𑁆𑀬, 𑀜𑀸𑀡𑁂𑀦 𑀯𑀸 𑀲𑀻𑀮𑀯𑀢𑁂𑀦 𑀯𑀸𑀧𑀺;

𑀲𑀫𑁄𑀢𑀺 𑀅𑀢𑁆𑀢𑀸𑀦𑀫𑀦𑀽𑀧𑀦𑁂𑀬𑁆𑀬, 𑀳𑀻𑀦𑁄 𑀦 𑀫𑀜𑁆𑀜𑁂𑀣 𑀯𑀺𑀲𑁂𑀲𑀺 𑀯𑀸𑀧𑀺.

𑁮𑁦𑁬. 𑀅𑀢𑁆𑀢𑀁 𑀧𑀳𑀸𑀬 𑀅𑀦𑀼𑀧𑀸𑀤𑀺𑀬𑀸𑀦𑁄, 𑀜𑀸𑀡𑁂𑀧𑀺 𑀲𑁄 𑀦𑀺𑀲𑁆𑀲𑀬𑀁 𑀦𑁄 𑀓𑀭𑁄𑀢𑀺;

𑀲 𑀯𑁂 𑀯𑀺𑀬𑀢𑁆𑀢𑁂𑀲𑀼 [𑀯𑀺𑀬𑀼𑀢𑁆𑀢𑁂𑀲𑀼 (𑀲𑀻. 𑀅𑀝𑁆𑀞.), 𑀤𑁆𑀯𑀺𑀬𑀢𑁆𑀢𑁂𑀲𑀼 (𑀓.)] 𑀦 𑀯𑀕𑁆𑀕𑀲𑀸𑀭𑀻, 𑀤𑀺𑀝𑁆𑀞𑀺𑀫𑁆𑀧𑀺 [𑀤𑀺𑀝𑁆𑀞𑀺𑀫𑀧𑀺 (𑀓.)] 𑀲𑁄 𑀦 𑀧𑀘𑁆𑀘𑁂𑀢𑀺 𑀓𑀺𑀜𑁆𑀘𑀺.

𑁮𑁦𑁭. 𑀬𑀲𑁆𑀲𑀽𑀪𑀬𑀦𑁆𑀢𑁂 𑀧𑀡𑀺𑀥𑀻𑀥 𑀦𑀢𑁆𑀣𑀺, 𑀪𑀯𑀸𑀪𑀯𑀸𑀬 𑀇𑀥 𑀯𑀸 𑀳𑀼𑀭𑀁 𑀯𑀸;

𑀦𑀺𑀯𑁂𑀲𑀦𑀸 𑀢𑀲𑁆𑀲 𑀦 𑀲𑀦𑁆𑀢𑀺 𑀓𑁂𑀘𑀺, 𑀥𑀫𑁆𑀫𑁂𑀲𑀼 𑀦𑀺𑀘𑁆𑀙𑁂𑀬𑁆𑀬 𑀲𑀫𑀼𑀕𑁆𑀕𑀳𑀻𑀢𑀁.

𑁮𑁦𑁮. 𑀢𑀲𑁆𑀲𑀻𑀥 𑀤𑀺𑀝𑁆𑀞𑁂 𑀯 𑀲𑀼𑀢𑁂 𑀫𑀼𑀢𑁂 𑀯𑀸, 𑀧𑀓𑀧𑁆𑀧𑀺𑀢𑀸 𑀦𑀢𑁆𑀣𑀺 𑀅𑀡𑀽𑀧𑀺 𑀲𑀜𑁆𑀜𑀸;

𑀢𑀁 𑀩𑁆𑀭𑀸𑀳𑁆𑀫𑀡𑀁 𑀤𑀺𑀝𑁆𑀞𑀺𑀫𑀦𑀸𑀤𑀺𑀬𑀸𑀦𑀁, 𑀓𑁂𑀦𑀻𑀥 𑀮𑁄𑀓𑀲𑁆𑀫𑀺𑀁 𑀯𑀺𑀓𑀧𑁆𑀧𑀬𑁂𑀬𑁆𑀬.

𑁮𑁦𑁯. 𑀦 𑀓𑀧𑁆𑀧𑀬𑀦𑁆𑀢𑀺 𑀦 𑀧𑀼𑀭𑁂𑀓𑁆𑀔𑀭𑁄𑀦𑁆𑀢𑀺, 𑀥𑀫𑁆𑀫𑀸𑀧𑀺 𑀢𑁂𑀲𑀁 𑀦 𑀧𑀝𑀺𑀘𑁆𑀙𑀺𑀢𑀸𑀲𑁂;

𑀦 𑀩𑁆𑀭𑀸𑀳𑁆𑀫𑀡𑁄 𑀲𑀻𑀮𑀯𑀢𑁂𑀦 𑀦𑁂𑀬𑁆𑀬𑁄, 𑀧𑀸𑀭𑀗𑁆𑀕𑀢𑁄 𑀦 𑀧𑀘𑁆𑀘𑁂𑀢𑀺 𑀢𑀸𑀤𑀻𑀢𑀺.

𑀧𑀭𑀫𑀝𑁆𑀞𑀓𑀲𑀼𑀢𑁆𑀢𑀁 𑀧𑀜𑁆𑀘𑀫𑀁 𑀦𑀺𑀝𑁆𑀞𑀺𑀢𑀁.

𑁬. 𑀚𑀭𑀸𑀲𑀼𑀢𑁆𑀢𑀁

𑁮𑁧𑁦. 𑀅𑀧𑁆𑀧𑀁 𑀯𑀢 𑀚𑀻𑀯𑀺𑀢𑀁 𑀇𑀤𑀁, 𑀑𑀭𑀁 𑀯𑀲𑁆𑀲𑀲𑀢𑀸𑀧𑀺 𑀫𑀺𑀬𑁆𑀬𑀢𑀺 [𑀫𑀻𑀬𑀢𑀺 (𑀲𑀻. 𑀅𑀝𑁆𑀞.)];

𑀬𑁄 𑀘𑁂𑀧𑀺 𑀅𑀢𑀺𑀘𑁆𑀘 𑀚𑀻𑀯𑀢𑀺, 𑀅𑀣 𑀔𑁄 𑀲𑁄 𑀚𑀭𑀲𑀸𑀧𑀺 𑀫𑀺𑀬𑁆𑀬𑀢𑀺.

𑁮𑁧𑁧. 𑀲𑁄𑀘𑀦𑁆𑀢𑀺 𑀚𑀦𑀸 𑀫𑀫𑀸𑀬𑀺𑀢𑁂, 𑀦 𑀳𑀺 𑀲𑀦𑁆𑀢𑀺 [𑀦 𑀳𑀺 𑀲𑀦𑁆𑀢𑀸 (𑀲𑀻.), 𑀦 𑀳𑀻 𑀲𑀦𑁆𑀢𑀺 (𑀓𑀢𑁆𑀣𑀘𑀺)] 𑀦𑀺𑀘𑁆𑀘𑀸 𑀧𑀭𑀺𑀕𑁆𑀕𑀳𑀸;

𑀯𑀺𑀦𑀸𑀪𑀸𑀯𑀲𑀦𑁆𑀢𑀫𑁂𑀯𑀺𑀤𑀁, 𑀇𑀢𑀺 𑀤𑀺𑀲𑁆𑀯𑀸 𑀦𑀸𑀕𑀸𑀭𑀫𑀸𑀯𑀲𑁂.

𑁮𑁧𑁨. 𑀫𑀭𑀡𑁂𑀦𑀧𑀺 𑀢𑀁 𑀧𑀳𑀻𑀬𑀢𑀺 [𑀧𑀳𑀺𑀬𑁆𑀬𑀢𑀺 (𑀲𑀻. 𑀲𑁆𑀬𑀸. 𑀓.)], 𑀬𑀁 𑀧𑀼𑀭𑀺𑀲𑁄 𑀫𑀫𑀺𑀤𑀦𑁆𑀢𑀺 [𑀫𑀫𑀬𑀺𑀤𑀦𑁆𑀢𑀺 (𑀲𑀻. 𑀲𑁆𑀬𑀸. 𑀓.), 𑀫𑀫𑀸𑀬𑀦𑁆𑀢𑀺 (𑀓.)] 𑀫𑀜𑁆𑀜𑀢𑀺;

𑀏𑀢𑀫𑁆𑀧𑀺 𑀯𑀺𑀤𑀺𑀢𑁆𑀯𑀸 [𑀏𑀢𑀁 𑀤𑀺𑀲𑁆𑀯𑀸𑀦 (𑀦𑀺𑀤𑁆𑀤𑁂𑀲𑁂), 𑀏𑀢𑀫𑁆𑀧𑀺 𑀯𑀺𑀤𑀺𑀢𑁆𑀯 (?)] 𑀧𑀡𑁆𑀟𑀺𑀢𑁄, 𑀦 𑀫𑀫𑀢𑁆𑀢𑀸𑀬 𑀦𑀫𑁂𑀣 𑀫𑀸𑀫𑀓𑁄.

𑁮𑁧𑁩. 𑀲𑀼𑀧𑀺𑀦𑁂𑀦 𑀬𑀣𑀸𑀧𑀺 𑀲𑀗𑁆𑀕𑀢𑀁, 𑀧𑀝𑀺𑀩𑀼𑀤𑁆𑀥𑁄 𑀧𑀼𑀭𑀺𑀲𑁄 𑀦 𑀧𑀲𑁆𑀲𑀢𑀺;

𑀏𑀯𑀫𑁆𑀧𑀺 𑀧𑀺𑀬𑀸𑀬𑀺𑀢𑀁 𑀚𑀦𑀁, 𑀧𑁂𑀢𑀁 𑀓𑀸𑀮𑀓𑀢𑀁 𑀦 𑀧𑀲𑁆𑀲𑀢𑀺.

𑁮𑁧𑁪. 𑀤𑀺𑀝𑁆𑀞𑀸𑀧𑀺 𑀲𑀼𑀢𑀸𑀧𑀺 𑀢𑁂 𑀚𑀦𑀸, 𑀬𑁂𑀲𑀁 𑀦𑀸𑀫𑀫𑀺𑀤𑀁 𑀧𑀯𑀼𑀘𑁆𑀘𑀢𑀺 [𑀦𑀸𑀫𑀫𑁂𑀯𑀸 𑀯𑀲𑀺𑀲𑁆𑀲𑀢𑀺 (𑀲𑀻. 𑀲𑁆𑀬𑀸. 𑀧𑀻.)];

𑀦𑀸𑀫𑀁𑀬𑁂𑀯𑀸𑀯𑀲𑀺𑀲𑁆𑀲𑀢𑀺, 𑀅𑀓𑁆𑀔𑁂𑀬𑁆𑀬𑀁 𑀧𑁂𑀢𑀲𑁆𑀲 𑀚𑀦𑁆𑀢𑀼𑀦𑁄.

𑁮𑁧𑁫. 𑀲𑁄𑀓𑀧𑁆𑀧𑀭𑀺𑀤𑁂𑀯𑀫𑀘𑁆𑀙𑀭𑀁 [𑀲𑁄𑀓𑀧𑀭𑀺𑀤𑁂𑀯𑀫𑀘𑁆𑀙𑀭𑀁 (𑀲𑀻. 𑀲𑁆𑀬𑀸. 𑀧𑀻.), 𑀲𑁄𑀓𑀁 𑀧𑀭𑀺𑀤𑁂𑀯𑀫𑀘𑁆𑀙𑀭𑀁 (?)], 𑀦 𑀚𑀳𑀦𑁆𑀢𑀺 𑀕𑀺𑀤𑁆𑀥𑀸 𑀫𑀫𑀸𑀬𑀺𑀢𑁂;

𑀢𑀲𑁆𑀫𑀸 𑀫𑀼𑀦𑀬𑁄 𑀧𑀭𑀺𑀕𑁆𑀕𑀳𑀁, 𑀳𑀺𑀢𑁆𑀯𑀸 𑀅𑀘𑀭𑀺𑀁𑀲𑀼 𑀔𑁂𑀫𑀤𑀲𑁆𑀲𑀺𑀦𑁄.

𑁮𑁧𑁬. 𑀧𑀢𑀺𑀮𑀻𑀦𑀘𑀭𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀪𑀚𑀫𑀸𑀦𑀲𑁆𑀲 𑀯𑀺𑀯𑀺𑀢𑁆𑀢𑀫𑀸𑀲𑀦𑀁;

𑀲𑀸𑀫𑀕𑁆𑀕𑀺𑀬𑀫𑀸𑀳𑀼 𑀢𑀲𑁆𑀲 𑀢𑀁, 𑀬𑁄 𑀅𑀢𑁆𑀢𑀸𑀦𑀁 𑀪𑀯𑀦𑁂 𑀦 𑀤𑀲𑁆𑀲𑀬𑁂.

𑁮𑁧𑁭. 𑀲𑀩𑁆𑀩𑀢𑁆𑀣 𑀫𑀼𑀦𑀻 𑀅𑀦𑀺𑀲𑁆𑀲𑀺𑀢𑁄, 𑀦 𑀧𑀺𑀬𑀁 𑀓𑀼𑀩𑁆𑀩𑀢𑀺 𑀦𑁄𑀧𑀺 𑀅𑀧𑁆𑀧𑀺𑀬𑀁;

𑀢𑀲𑁆𑀫𑀺𑀁 𑀧𑀭𑀺𑀤𑁂𑀯𑀫𑀘𑁆𑀙𑀭𑀁, 𑀧𑀡𑁆𑀡𑁂 𑀯𑀸𑀭𑀺 𑀬𑀣𑀸 𑀦 𑀮𑀺𑀫𑁆𑀧𑀢𑀺 [𑀮𑀺𑀧𑁆𑀧𑀢𑀺 (𑀲𑀻. 𑀧𑀻.)].

𑁮𑁧𑁮. 𑀉𑀤𑀩𑀺𑀦𑁆𑀤𑀼 𑀬𑀣𑀸𑀧𑀺 𑀧𑁄𑀓𑁆𑀔𑀭𑁂, 𑀧𑀤𑀼𑀫𑁂 𑀯𑀸𑀭𑀺 𑀬𑀣𑀸 𑀦 𑀮𑀺𑀫𑁆𑀧𑀢𑀺;

𑀏𑀯𑀁 𑀫𑀼𑀦𑀺 𑀦𑁄𑀧𑀮𑀺𑀫𑁆𑀧𑀢𑀺, 𑀬𑀤𑀺𑀤𑀁 𑀤𑀺𑀝𑁆𑀞𑀲𑀼𑀢𑀁 𑀫𑀼𑀢𑁂𑀲𑀼 𑀯𑀸.

𑁮𑁧𑁯. 𑀥𑁄𑀦𑁄 𑀦 𑀳𑀺 𑀢𑁂𑀦 𑀫𑀜𑁆𑀜𑀢𑀺, 𑀬𑀤𑀺𑀤𑀁 𑀤𑀺𑀝𑁆𑀞𑀲𑀼𑀢𑀁 𑀫𑀼𑀢𑁂𑀲𑀼 𑀯𑀸;

𑀦𑀸𑀜𑁆𑀜𑁂𑀦 𑀯𑀺𑀲𑀼𑀤𑁆𑀥𑀺𑀫𑀺𑀘𑁆𑀙𑀢𑀺, 𑀦 𑀳𑀺 𑀲𑁄 𑀭𑀚𑁆𑀚𑀢𑀺 𑀦𑁄 𑀯𑀺𑀭𑀚𑁆𑀚𑀢𑀻𑀢𑀺.

𑀚𑀭𑀸𑀲𑀼𑀢𑁆𑀢𑀁 𑀙𑀝𑁆𑀞𑀁 𑀦𑀺𑀝𑁆𑀞𑀺𑀢𑀁.

𑁭. 𑀢𑀺𑀲𑁆𑀲𑀫𑁂𑀢𑁆𑀢𑁂𑀬𑁆𑀬𑀲𑀼𑀢𑁆𑀢𑀁

𑁮𑁨𑁦. ‘‘𑀫𑁂𑀣𑀼𑀦𑀫𑀦𑀼𑀬𑀼𑀢𑁆𑀢𑀲𑁆𑀲, (𑀇𑀘𑁆𑀘𑀸𑀬𑀲𑁆𑀫𑀸 𑀢𑀺𑀲𑁆𑀲𑁄 𑀫𑁂𑀢𑁆𑀢𑁂𑀬𑁆𑀬𑁄) 𑀯𑀺𑀖𑀸𑀢𑀁 𑀩𑁆𑀭𑀽𑀳𑀺 𑀫𑀸𑀭𑀺𑀲;

𑀲𑀼𑀢𑁆𑀯𑀸𑀦 𑀢𑀯 𑀲𑀸𑀲𑀦𑀁, 𑀯𑀺𑀯𑁂𑀓𑁂 𑀲𑀺𑀓𑁆𑀔𑀺𑀲𑁆𑀲𑀸𑀫𑀲𑁂.

𑁮𑁨𑁧. ‘‘𑀫𑁂𑀣𑀼𑀦𑀫𑀦𑀼𑀬𑀼𑀢𑁆𑀢𑀲𑁆𑀲, (𑀫𑁂𑀢𑁆𑀢𑁂𑀬𑁆𑀬𑀸𑀢𑀺 𑀪𑀕𑀯𑀸) 𑀫𑀼𑀲𑁆𑀲𑀢𑁂 𑀯𑀸𑀧𑀺 𑀲𑀸𑀲𑀦𑀁;

𑀫𑀺𑀘𑁆𑀙𑀸 𑀘 𑀧𑀝𑀺𑀧𑀚𑁆𑀚𑀢𑀺, 𑀏𑀢𑀁 𑀢𑀲𑁆𑀫𑀺𑀁 𑀅𑀦𑀸𑀭𑀺𑀬𑀁.

𑁮𑁨𑁨. ‘‘𑀏𑀓𑁄 𑀧𑀼𑀩𑁆𑀩𑁂 𑀘𑀭𑀺𑀢𑁆𑀯𑀸𑀦, 𑀫𑁂𑀣𑀼𑀦𑀁 𑀬𑁄 𑀦𑀺𑀲𑁂𑀯𑀢𑀺;

𑀬𑀸𑀦𑀁 𑀪𑀦𑁆𑀢𑀁 𑀯 𑀢𑀁 𑀮𑁄𑀓𑁂, 𑀳𑀻𑀦𑀫𑀸𑀳𑀼 𑀧𑀼𑀣𑀼𑀚𑁆𑀚𑀦𑀁.

𑁮𑁨𑁩. ‘‘𑀬𑀲𑁄 𑀓𑀺𑀢𑁆𑀢𑀺 𑀘 𑀬𑀸 𑀧𑀼𑀩𑁆𑀩𑁂, 𑀳𑀸𑀬𑀢𑁂 𑀯𑀸𑀧𑀺 𑀢𑀲𑁆𑀲 𑀲𑀸;

𑀏𑀢𑀫𑁆𑀧𑀺 𑀤𑀺𑀲𑁆𑀯𑀸 𑀲𑀺𑀓𑁆𑀔𑁂𑀣, 𑀫𑁂𑀣𑀼𑀦𑀁 𑀯𑀺𑀧𑁆𑀧𑀳𑀸𑀢𑀯𑁂.

𑁮𑁨𑁪. ‘‘𑀲𑀗𑁆𑀓𑀧𑁆𑀧𑁂𑀳𑀺 𑀧𑀭𑁂𑀢𑁄 𑀲𑁄, 𑀓𑀧𑀡𑁄 𑀯𑀺𑀬 𑀛𑀸𑀬𑀢𑀺;

𑀲𑀼𑀢𑁆𑀯𑀸 𑀧𑀭𑁂𑀲𑀁 𑀦𑀺𑀕𑁆𑀖𑁄𑀲𑀁, 𑀫𑀗𑁆𑀓𑀼 𑀳𑁄𑀢𑀺 𑀢𑀣𑀸𑀯𑀺𑀥𑁄.

𑁮𑁨𑁫. ‘‘𑀅𑀣 𑀲𑀢𑁆𑀣𑀸𑀦𑀺 𑀓𑀼𑀭𑀼𑀢𑁂, 𑀧𑀭𑀯𑀸𑀤𑁂𑀳𑀺 𑀘𑁄𑀤𑀺𑀢𑁄;

𑀏𑀲 𑀔𑁆𑀯𑀲𑁆𑀲 𑀫𑀳𑀸𑀕𑁂𑀥𑁄, 𑀫𑁄𑀲𑀯𑀚𑁆𑀚𑀁 𑀧𑀕𑀸𑀳𑀢𑀺.

𑁮𑁨𑁬. ‘‘𑀧𑀡𑁆𑀟𑀺𑀢𑁄𑀢𑀺 𑀲𑀫𑀜𑁆𑀜𑀸𑀢𑁄, 𑀏𑀓𑀘𑀭𑀺𑀬𑀁 𑀅𑀥𑀺𑀝𑁆𑀞𑀺𑀢𑁄;

𑀅𑀣𑀸𑀧𑀺 [𑀲 𑀘𑀸𑀧𑀺 (𑀦𑀺𑀤𑁆𑀤𑁂𑀲𑁂)] 𑀫𑁂𑀣𑀼𑀦𑁂 𑀬𑀼𑀢𑁆𑀢𑁄, 𑀫𑀦𑁆𑀤𑁄𑀯 𑀧𑀭𑀺𑀓𑀺𑀲𑁆𑀲𑀢𑀺 [𑀧𑀭𑀺𑀓𑀺𑀮𑀺𑀲𑁆𑀲𑀢𑀺 (𑀲𑀻.)].

𑁮𑁨𑁭. ‘‘𑀏𑀢𑀫𑀸𑀤𑀻𑀦𑀯𑀁 𑀜𑀢𑁆𑀯𑀸, 𑀫𑀼𑀦𑀺 𑀧𑀼𑀩𑁆𑀩𑀸𑀧𑀭𑁂 𑀇𑀥;

𑀏𑀓𑀘𑀭𑀺𑀬𑀁 𑀤𑀴𑁆𑀳𑀁 𑀓𑀬𑀺𑀭𑀸, 𑀦 𑀦𑀺𑀲𑁂𑀯𑁂𑀣 𑀫𑁂𑀣𑀼𑀦𑀁.

𑁮𑁨𑁮. ‘‘𑀯𑀺𑀯𑁂𑀓𑀜𑁆𑀜𑁂𑀯 𑀲𑀺𑀓𑁆𑀔𑁂𑀣, 𑀏𑀢𑀤𑀭𑀺𑀬𑀸𑀦𑀫𑀼𑀢𑁆𑀢𑀫𑀁;

𑀦 𑀢𑁂𑀦 𑀲𑁂𑀝𑁆𑀞𑁄 𑀫𑀜𑁆𑀜𑁂𑀣, 𑀲 𑀯𑁂 𑀦𑀺𑀩𑁆𑀩𑀸𑀦𑀲𑀦𑁆𑀢𑀺𑀓𑁂.

𑁮𑁨𑁯. ‘‘𑀭𑀺𑀢𑁆𑀢𑀲𑁆𑀲 𑀫𑀼𑀦𑀺𑀦𑁄 𑀘𑀭𑀢𑁄, 𑀓𑀸𑀫𑁂𑀲𑀼 𑀅𑀦𑀧𑁂𑀓𑁆𑀔𑀺𑀦𑁄;

𑀑𑀖𑀢𑀺𑀡𑁆𑀡𑀲𑁆𑀲 𑀧𑀺𑀳𑀬𑀦𑁆𑀢𑀺, 𑀓𑀸𑀫𑁂𑀲𑀼 𑀕𑀥𑀺𑀢𑀸 [𑀕𑀣𑀺𑀢𑀸 (𑀲𑀻.)] 𑀧𑀚𑀸’’𑀢𑀺.

𑀢𑀺𑀲𑁆𑀲𑀫𑁂𑀢𑁆𑀢𑁂𑀬𑁆𑀬𑀲𑀼𑀢𑁆𑀢𑀁 𑀲𑀢𑁆𑀢𑀫𑀁 𑀦𑀺𑀝𑁆𑀞𑀺𑀢𑀁.

𑁮. 𑀧𑀲𑀽𑀭𑀲𑀼𑀢𑁆𑀢𑀁

𑁮𑁩𑁦. 𑀇𑀥𑁂𑀯 𑀲𑀼𑀤𑁆𑀥𑀺 𑀇𑀢𑀺 𑀯𑀸𑀤𑀬𑀦𑁆𑀢𑀺 [𑀯𑀺𑀤𑀺𑀬𑀦𑁆𑀢𑀺 (𑀲𑀻. 𑀧𑀻.)], 𑀦𑀸𑀜𑁆𑀜𑁂𑀲𑀼 𑀥𑀫𑁆𑀫𑁂𑀲𑀼 𑀯𑀺𑀲𑀼𑀤𑁆𑀥𑀺𑀫𑀸𑀳𑀼;

𑀬𑀁 𑀦𑀺𑀲𑁆𑀲𑀺𑀢𑀸 𑀢𑀢𑁆𑀣 𑀲𑀼𑀪𑀁 𑀯𑀤𑀸𑀦𑀸, 𑀧𑀘𑁆𑀘𑁂𑀓𑀲𑀘𑁆𑀘𑁂𑀲𑀼 𑀧𑀼𑀣𑀽 𑀦𑀺𑀯𑀺𑀝𑁆𑀞𑀸.

𑁮𑁩𑁧. 𑀢𑁂 𑀯𑀸𑀤𑀓𑀸𑀫𑀸 𑀧𑀭𑀺𑀲𑀁 𑀯𑀺𑀕𑀬𑁆𑀳, 𑀩𑀸𑀮𑀁 𑀤𑀳𑀦𑁆𑀢𑀻 𑀫𑀺𑀣𑀼 𑀅𑀜𑁆𑀜𑀫𑀜𑁆𑀜𑀁;

𑀯𑀤𑀦𑁆𑀢𑀺 𑀢𑁂 𑀅𑀜𑁆𑀜𑀲𑀺𑀢𑀸 𑀓𑀣𑁄𑀚𑁆𑀚𑀁, 𑀧𑀲𑀁𑀲𑀓𑀸𑀫𑀸 𑀓𑀼𑀲𑀮𑀸 𑀯𑀤𑀸𑀦𑀸.

𑁮𑁩𑁨. 𑀬𑀼𑀢𑁆𑀢𑁄 𑀓𑀣𑀸𑀬𑀁 𑀧𑀭𑀺𑀲𑀸𑀬 𑀫𑀚𑁆𑀛𑁂, 𑀧𑀲𑀁𑀲𑀫𑀺𑀘𑁆𑀙𑀁 𑀯𑀺𑀦𑀺𑀖𑀸𑀢𑀺 𑀳𑁄𑀢𑀺;

𑀅𑀧𑀸𑀳𑀢𑀲𑁆𑀫𑀺𑀁 𑀧𑀦 𑀫𑀗𑁆𑀓𑀼 𑀳𑁄𑀢𑀺, 𑀦𑀺𑀦𑁆𑀤𑀸𑀬 𑀲𑁄 𑀓𑀼𑀧𑁆𑀧𑀢𑀺 𑀭𑀦𑁆𑀥𑀫𑁂𑀲𑀻.

𑁮𑁩𑁩. 𑀬𑀫𑀲𑁆𑀲 𑀯𑀸𑀤𑀁 𑀧𑀭𑀺𑀳𑀻𑀦𑀫𑀸𑀳𑀼, 𑀅𑀧𑀸𑀳𑀢𑀁 𑀧𑀜𑁆𑀳𑀯𑀺𑀫𑀁𑀲𑀓𑀸𑀲𑁂;

𑀧𑀭𑀺𑀤𑁂𑀯𑀢𑀺 𑀲𑁄𑀘𑀢𑀺 𑀳𑀻𑀦𑀯𑀸𑀤𑁄, 𑀉𑀧𑀘𑁆𑀘𑀕𑀸 𑀫𑀦𑁆𑀢𑀺 𑀅𑀦𑀼𑀢𑁆𑀣𑀼𑀦𑀸𑀢𑀺.

𑁮𑁩𑁪. 𑀏𑀢𑁂 𑀯𑀺𑀯𑀸𑀤𑀸 𑀲𑀫𑀡𑁂𑀲𑀼 𑀚𑀸𑀢𑀸, 𑀏𑀢𑁂𑀲𑀼 𑀉𑀕𑁆𑀖𑀸𑀢𑀺 𑀦𑀺𑀖𑀸𑀢𑀺 𑀳𑁄𑀢𑀺;

𑀏𑀢𑀫𑁆𑀧𑀺 𑀤𑀺𑀲𑁆𑀯𑀸 𑀯𑀺𑀭𑀫𑁂 𑀓𑀣𑁄𑀚𑁆𑀚𑀁, 𑀦 𑀳𑀜𑁆𑀜𑀤𑀢𑁆𑀣𑀢𑁆𑀣𑀺𑀧𑀲𑀁𑀲𑀮𑀸𑀪𑀸.

𑁮𑁩𑁫. 𑀧𑀲𑀁𑀲𑀺𑀢𑁄 𑀯𑀸 𑀧𑀦 𑀢𑀢𑁆𑀣 𑀳𑁄𑀢𑀺, 𑀅𑀓𑁆𑀔𑀸𑀬 𑀯𑀸𑀤𑀁 𑀧𑀭𑀺𑀲𑀸𑀬 𑀫𑀚𑁆𑀛𑁂;

𑀲𑁄 𑀳𑀲𑁆𑀲𑀢𑀻 𑀉𑀡𑁆𑀡𑀫𑀢𑀻 [𑀉𑀦𑁆𑀦𑀫𑀢𑀻 (?)] 𑀘 𑀢𑁂𑀦, 𑀧𑀧𑁆𑀧𑀼𑀬𑁆𑀬 𑀢𑀫𑀢𑁆𑀣𑀁 𑀬𑀣𑀸 𑀫𑀦𑁄 𑀅𑀳𑀼.

𑁮𑁩𑁬. 𑀬𑀸 𑀉𑀡𑁆𑀡𑀢𑀻 [𑀉𑀦𑁆𑀦𑀢𑀻 (?)] 𑀲𑀸𑀲𑁆𑀲 𑀯𑀺𑀖𑀸𑀢𑀪𑀽𑀫𑀺, 𑀫𑀸𑀦𑀸𑀢𑀺𑀫𑀸𑀦𑀁 𑀯𑀤𑀢𑁂 𑀧𑀦𑁂𑀲𑁄;

𑀏𑀢𑀫𑁆𑀧𑀺 𑀤𑀺𑀲𑁆𑀯𑀸 𑀦 𑀯𑀺𑀯𑀸𑀤𑀬𑁂𑀣, 𑀦 𑀳𑀺 𑀢𑁂𑀦 𑀲𑀼𑀤𑁆𑀥𑀺𑀁 𑀓𑀼𑀲𑀮𑀸 𑀯𑀤𑀦𑁆𑀢𑀺.

𑁮𑁩𑁭. 𑀲𑀽𑀭𑁄 𑀬𑀣𑀸 𑀭𑀸𑀚𑀔𑀸𑀤𑀸𑀬 𑀧𑀼𑀝𑁆𑀞𑁄, 𑀅𑀪𑀺𑀕𑀚𑁆𑀚𑀫𑁂𑀢𑀺 𑀧𑀝𑀺𑀲𑀽𑀭𑀫𑀺𑀘𑁆𑀙𑀁;

𑀬𑁂𑀦𑁂𑀯 𑀲𑁄 𑀢𑁂𑀦 𑀧𑀮𑁂𑀳𑀺 𑀲𑀽𑀭, 𑀧𑀼𑀩𑁆𑀩𑁂𑀯 𑀦𑀢𑁆𑀣𑀺 𑀬𑀤𑀺𑀤𑀁 𑀬𑀼𑀥𑀸𑀬.

𑁮𑁩𑁮. 𑀬𑁂 𑀤𑀺𑀝𑁆𑀞𑀺𑀫𑀼𑀕𑁆𑀕𑀬𑁆𑀳 𑀯𑀺𑀯𑀸𑀤𑀬𑀦𑁆𑀢𑀺 [𑀯𑀺𑀯𑀸𑀤𑀺𑀬𑀦𑁆𑀢𑀺 (𑀲𑀻. 𑀧𑀻.)], 𑀇𑀤𑀫𑁂𑀯 𑀲𑀘𑁆𑀘𑀦𑁆𑀢𑀺 𑀘 𑀯𑀸𑀤𑀬𑀦𑁆𑀢𑀺;

𑀢𑁂 𑀢𑁆𑀯𑀁 𑀯𑀤𑀲𑁆𑀲𑀽 𑀦 𑀳𑀺 𑀢𑁂𑀥 𑀅𑀢𑁆𑀣𑀺, 𑀯𑀸𑀤𑀫𑁆𑀳𑀺 𑀚𑀸𑀢𑁂 𑀧𑀝𑀺𑀲𑁂𑀦𑀺𑀓𑀢𑁆𑀢𑀸.