𑁧𑁪. 𑀢𑀼𑀯𑀝𑀓𑀲𑀼𑀢𑁆𑀢𑀁

𑁯𑁨𑁧. ‘‘𑀧𑀼𑀘𑁆𑀙𑀸𑀫𑀺 𑀢𑀁 𑀆𑀤𑀺𑀘𑁆𑀘𑀩𑀦𑁆𑀥𑀼 [𑀆𑀤𑀺𑀘𑁆𑀘𑀩𑀦𑁆𑀥𑀼𑀁 (𑀲𑀻. 𑀲𑁆𑀬𑀸.)], 𑀯𑀺𑀯𑁂𑀓𑀁 𑀲𑀦𑁆𑀢𑀺𑀧𑀤𑀜𑁆𑀘 𑀫𑀳𑁂𑀲𑀺;

𑀓𑀣𑀁 𑀤𑀺𑀲𑁆𑀯𑀸 𑀦𑀺𑀩𑁆𑀩𑀸𑀢𑀺 𑀪𑀺𑀓𑁆𑀔𑀼, 𑀅𑀦𑀼𑀧𑀸𑀤𑀺𑀬𑀸𑀦𑁄 𑀮𑁄𑀓𑀲𑁆𑀫𑀺𑀁 𑀓𑀺𑀜𑁆𑀘𑀺’’.

𑁯𑁨𑁨. ‘‘𑀫𑀽𑀮𑀁 𑀧𑀧𑀜𑁆𑀘𑀲𑀗𑁆𑀔𑀸𑀬, (𑀇𑀢𑀺 𑀪𑀕𑀯𑀸)

𑀫𑀦𑁆𑀢𑀸 𑀅𑀲𑁆𑀫𑀻𑀢𑀺 𑀲𑀩𑁆𑀩𑀫𑀼𑀧𑀭𑀼𑀦𑁆𑀥𑁂 [𑀲𑀩𑁆𑀩𑀫𑀼𑀧𑀭𑀼𑀤𑁆𑀥𑁂 (𑀲𑁆𑀬𑀸. 𑀧𑀻. 𑀓.)];

𑀬𑀸 𑀓𑀸𑀘𑀺 𑀢𑀡𑁆𑀳𑀸 𑀅𑀚𑁆𑀛𑀢𑁆𑀢𑀁,

𑀢𑀸𑀲𑀁 𑀯𑀺𑀦𑀬𑀸 [𑀯𑀺𑀦𑀬𑀸𑀬 (?)] 𑀲𑀤𑀸 𑀲𑀢𑁄 𑀲𑀺𑀓𑁆𑀔𑁂.

𑁯𑁨𑁩. ‘‘𑀬𑀁 𑀓𑀺𑀜𑁆𑀘𑀺 𑀥𑀫𑁆𑀫𑀫𑀪𑀺𑀚𑀜𑁆𑀜𑀸, 𑀅𑀚𑁆𑀛𑀢𑁆𑀢𑀁 𑀅𑀣𑀯𑀸𑀧𑀺 𑀩𑀳𑀺𑀤𑁆𑀥𑀸;

𑀦 𑀢𑁂𑀦 𑀣𑀸𑀫𑀁 [𑀫𑀸𑀦𑀁 (𑀲𑀻. 𑀓.)] 𑀓𑀼𑀩𑁆𑀩𑁂𑀣, 𑀦 𑀳𑀺 𑀲𑀸 𑀦𑀺𑀩𑁆𑀩𑀼𑀢𑀺 𑀲𑀢𑀁 𑀯𑀼𑀢𑁆𑀢𑀸.

𑁯𑁨𑁪. ‘‘𑀲𑁂𑀬𑁆𑀬𑁄 𑀦 𑀢𑁂𑀦 𑀫𑀜𑁆𑀜𑁂𑀬𑁆𑀬, 𑀦𑀻𑀘𑁂𑀬𑁆𑀬𑁄 𑀅𑀣𑀯𑀸𑀧𑀺 𑀲𑀭𑀺𑀓𑁆𑀔𑁄;

𑀨𑀼𑀝𑁆𑀞𑁄 [𑀧𑀼𑀝𑁆𑀞𑁄 (𑀲𑀻. 𑀲𑁆𑀬𑀸. 𑀓.)] 𑀅𑀦𑁂𑀓𑀭𑀽𑀧𑁂𑀳𑀺, 𑀦𑀸𑀢𑀼𑀫𑀸𑀦𑀁 𑀯𑀺𑀓𑀧𑁆𑀧𑀬𑀁 𑀢𑀺𑀝𑁆𑀞𑁂.

𑁯𑁨𑁫. ‘‘𑀅𑀚𑁆𑀛𑀢𑁆𑀢𑀫𑁂𑀯𑀼𑀧𑀲𑀫𑁂, 𑀦 𑀅𑀜𑁆𑀜𑀢𑁄 𑀪𑀺𑀓𑁆𑀔𑀼 𑀲𑀦𑁆𑀢𑀺𑀫𑁂𑀲𑁂𑀬𑁆𑀬;

𑀅𑀚𑁆𑀛𑀢𑁆𑀢𑀁 𑀉𑀧𑀲𑀦𑁆𑀢𑀲𑁆𑀲, 𑀦𑀢𑁆𑀣𑀺 𑀅𑀢𑁆𑀢𑀸 𑀓𑀼𑀢𑁄 𑀦𑀺𑀭𑀢𑁆𑀢𑀸 𑀯𑀸.

𑁯𑁨𑁬. ‘‘𑀫𑀚𑁆𑀛𑁂 𑀬𑀣𑀸 𑀲𑀫𑀼𑀤𑁆𑀤𑀲𑁆𑀲, 𑀊𑀫𑀺 𑀦𑁄 𑀚𑀸𑀬𑀢𑀻 𑀞𑀺𑀢𑁄 𑀳𑁄𑀢𑀺;

𑀏𑀯𑀁 𑀞𑀺𑀢𑁄 𑀅𑀦𑁂𑀚𑀲𑁆𑀲, 𑀉𑀲𑁆𑀲𑀤𑀁 𑀪𑀺𑀓𑁆𑀔𑀼 𑀦 𑀓𑀭𑁂𑀬𑁆𑀬 𑀓𑀼𑀳𑀺𑀜𑁆𑀘𑀺’’.

𑁯𑁨𑁭. ‘‘𑀅𑀓𑀺𑀢𑁆𑀢𑀬𑀻 𑀯𑀺𑀯𑀝𑀘𑀓𑁆𑀔𑀼, 𑀲𑀓𑁆𑀔𑀺𑀥𑀫𑁆𑀫𑀁 𑀧𑀭𑀺𑀲𑁆𑀲𑀬𑀯𑀺𑀦𑀬𑀁;

𑀧𑀝𑀺𑀧𑀤𑀁 𑀯𑀤𑁂𑀳𑀺 𑀪𑀤𑁆𑀤𑀦𑁆𑀢𑁂, 𑀧𑀸𑀢𑀺𑀫𑁄𑀓𑁆𑀔𑀁 𑀅𑀣𑀯𑀸𑀧𑀺 𑀲𑀫𑀸𑀥𑀺𑀁’’.

𑁯𑁨𑁮. ‘‘𑀘𑀓𑁆𑀔𑀽𑀳𑀺 𑀦𑁂𑀯 𑀮𑁄𑀮𑀲𑁆𑀲, 𑀕𑀸𑀫𑀓𑀣𑀸𑀬 𑀆𑀯𑀭𑀬𑁂 𑀲𑁄𑀢𑀁;

𑀭𑀲𑁂 𑀘 𑀦𑀸𑀦𑀼𑀕𑀺𑀚𑁆𑀛𑁂𑀬𑁆𑀬, 𑀦 𑀘 𑀫𑀫𑀸𑀬𑁂𑀣 𑀓𑀺𑀜𑁆𑀘𑀺 𑀮𑁄𑀓𑀲𑁆𑀫𑀺𑀁.

𑁯𑁨𑁯. ‘‘𑀨𑀲𑁆𑀲𑁂𑀦 𑀬𑀤𑀸 𑀨𑀼𑀝𑁆𑀞𑀲𑁆𑀲, 𑀧𑀭𑀺𑀤𑁂𑀯𑀁 𑀪𑀺𑀓𑁆𑀔𑀼 𑀦 𑀓𑀭𑁂𑀬𑁆𑀬 𑀓𑀼𑀳𑀺𑀜𑁆𑀘𑀺;

𑀪𑀯𑀜𑁆𑀘 𑀦𑀸𑀪𑀺𑀚𑀧𑁆𑀧𑁂𑀬𑁆𑀬, 𑀪𑁂𑀭𑀯𑁂𑀲𑀼 𑀘 𑀦 𑀲𑀫𑁆𑀧𑀯𑁂𑀥𑁂𑀬𑁆𑀬.

𑁯𑁩𑁦. ‘‘𑀅𑀦𑁆𑀦𑀸𑀦𑀫𑀣𑁄 𑀧𑀸𑀦𑀸𑀦𑀁, 𑀔𑀸𑀤𑀦𑀻𑀬𑀸𑀦𑀁 𑀅𑀣𑁄𑀧𑀺 𑀯𑀢𑁆𑀣𑀸𑀦𑀁;

𑀮𑀤𑁆𑀥𑀸 𑀦 𑀲𑀦𑁆𑀦𑀺𑀥𑀺𑀁 𑀓𑀬𑀺𑀭𑀸, 𑀦 𑀘 𑀧𑀭𑀺𑀢𑁆𑀢𑀲𑁂 𑀢𑀸𑀦𑀺 𑀅𑀮𑀪𑀫𑀸𑀦𑁄.

𑁯𑁩𑁧. ‘‘𑀛𑀸𑀬𑀻 𑀦 𑀧𑀸𑀤𑀮𑁄𑀮𑀲𑁆𑀲, 𑀯𑀺𑀭𑀫𑁂 𑀓𑀼𑀓𑁆𑀓𑀼𑀘𑁆𑀘𑀸 𑀦𑀧𑁆𑀧𑀫𑀚𑁆𑀚𑁂𑀬𑁆𑀬;

𑀅𑀣𑀸𑀲𑀦𑁂𑀲𑀼 𑀲𑀬𑀦𑁂𑀲𑀼, 𑀅𑀧𑁆𑀧𑀲𑀤𑁆𑀤𑁂𑀲𑀼 𑀪𑀺𑀓𑁆𑀔𑀼 𑀯𑀺𑀳𑀭𑁂𑀬𑁆𑀬.

𑁯𑁩𑁨. ‘‘𑀦𑀺𑀤𑁆𑀤𑀁 𑀦 𑀩𑀳𑀼𑀮𑀻𑀓𑀭𑁂𑀬𑁆𑀬, 𑀚𑀸𑀕𑀭𑀺𑀬𑀁 𑀪𑀚𑁂𑀬𑁆𑀬 𑀆𑀢𑀸𑀧𑀻;

𑀢𑀦𑁆𑀤𑀺𑀁 𑀫𑀸𑀬𑀁 𑀳𑀲𑁆𑀲𑀁 𑀔𑀺𑀟𑁆𑀟𑀁, 𑀫𑁂𑀣𑀼𑀦𑀁 𑀯𑀺𑀧𑁆𑀧𑀚𑀳𑁂 𑀲𑀯𑀺𑀪𑀽𑀲𑀁.

𑁯𑁩𑁩. ‘‘𑀆𑀣𑀩𑁆𑀩𑀡𑀁 𑀲𑀼𑀧𑀺𑀦𑀁 𑀮𑀓𑁆𑀔𑀡𑀁, 𑀦𑁄 𑀯𑀺𑀤𑀳𑁂 𑀅𑀣𑁄𑀧𑀺 𑀦𑀓𑁆𑀔𑀢𑁆𑀢𑀁;

𑀯𑀺𑀭𑀼𑀢𑀜𑁆𑀘 𑀕𑀩𑁆𑀪𑀓𑀭𑀡𑀁, 𑀢𑀺𑀓𑀺𑀘𑁆𑀙𑀁 𑀫𑀸𑀫𑀓𑁄 𑀦 𑀲𑁂𑀯𑁂𑀬𑁆𑀬.

𑁯𑁩𑁪. ‘‘𑀦𑀺𑀦𑁆𑀤𑀸𑀬 𑀦𑀧𑁆𑀧𑀯𑁂𑀥𑁂𑀬𑁆𑀬, 𑀦 𑀉𑀡𑁆𑀡𑀫𑁂𑀬𑁆𑀬 𑀧𑀲𑀁𑀲𑀺𑀢𑁄 𑀪𑀺𑀓𑁆𑀔𑀼;

𑀮𑁄𑀪𑀁 𑀲𑀳 𑀫𑀘𑁆𑀙𑀭𑀺𑀬𑁂𑀦, 𑀓𑁄𑀥𑀁 𑀧𑁂𑀲𑀼𑀡𑀺𑀬𑀜𑁆𑀘 𑀧𑀦𑀼𑀤𑁂𑀬𑁆𑀬.

𑁯𑁩𑁫. ‘‘𑀓𑀬𑀯𑀺𑀓𑁆𑀓𑀬𑁂 𑀦 𑀢𑀺𑀝𑁆𑀞𑁂𑀬𑁆𑀬, 𑀉𑀧𑀯𑀸𑀤𑀁 𑀪𑀺𑀓𑁆𑀔𑀼 𑀦 𑀓𑀭𑁂𑀬𑁆𑀬 𑀓𑀼𑀳𑀺𑀜𑁆𑀘𑀺;

𑀕𑀸𑀫𑁂 𑀘 𑀦𑀸𑀪𑀺𑀲𑀚𑁆𑀚𑁂𑀬𑁆𑀬, 𑀮𑀸𑀪𑀓𑀫𑁆𑀬𑀸 𑀚𑀦𑀁 𑀦 𑀮𑀧𑀬𑁂𑀬𑁆𑀬.

𑁯𑁩𑁬. ‘‘𑀦 𑀘 𑀓𑀢𑁆𑀣𑀺𑀢𑀸 𑀲𑀺𑀬𑀸 𑀪𑀺𑀓𑁆𑀔𑀼, 𑀦 𑀘 𑀯𑀸𑀘𑀁 𑀧𑀬𑀼𑀢𑁆𑀢𑀁 𑀪𑀸𑀲𑁂𑀬𑁆𑀬;

𑀧𑀸𑀕𑀩𑁆𑀪𑀺𑀬𑀁 𑀦 𑀲𑀺𑀓𑁆𑀔𑁂𑀬𑁆𑀬, 𑀓𑀣𑀁 𑀯𑀺𑀕𑁆𑀕𑀸𑀳𑀺𑀓𑀁 𑀦 𑀓𑀣𑀬𑁂𑀬𑁆𑀬.

𑁯𑁩𑁭. ‘‘𑀫𑁄𑀲𑀯𑀚𑁆𑀚𑁂 𑀦 𑀦𑀻𑀬𑁂𑀣, 𑀲𑀫𑁆𑀧𑀚𑀸𑀦𑁄 𑀲𑀞𑀸𑀦𑀺 𑀦 𑀓𑀬𑀺𑀭𑀸;

𑀅𑀣 𑀚𑀻𑀯𑀺𑀢𑁂𑀦 𑀧𑀜𑁆𑀜𑀸𑀬, 𑀲𑀻𑀮𑀩𑁆𑀩𑀢𑁂𑀦 𑀦𑀸𑀜𑁆𑀜𑀫𑀢𑀺𑀫𑀜𑁆𑀜𑁂.

𑁯𑁩𑁮. ‘‘𑀲𑀼𑀢𑁆𑀯𑀸 𑀭𑀼𑀲𑀺𑀢𑁄 𑀩𑀳𑀼𑀁 𑀯𑀸𑀘𑀁, 𑀲𑀫𑀡𑀸𑀦𑀁 𑀯𑀸 𑀧𑀼𑀣𑀼𑀚𑀦𑀸𑀦𑀁 [𑀧𑀼𑀣𑀼𑀯𑀘𑀦𑀸𑀦𑀁 (𑀲𑀻. 𑀲𑁆𑀬𑀸. 𑀧𑀻.)];

𑀨𑀭𑀼𑀲𑁂𑀦 𑀦𑁂 𑀦 𑀧𑀝𑀺𑀯𑀚𑁆𑀚𑀸, 𑀦 𑀳𑀺 𑀲𑀦𑁆𑀢𑁄 𑀧𑀝𑀺𑀲𑁂𑀦𑀺𑀓𑀭𑁄𑀦𑁆𑀢𑀺.

𑁯𑁩𑁯. ‘‘𑀏𑀢𑀜𑁆𑀘 𑀥𑀫𑁆𑀫𑀫𑀜𑁆𑀜𑀸𑀬, 𑀯𑀺𑀘𑀺𑀦𑀁 𑀪𑀺𑀓𑁆𑀔𑀼 𑀲𑀤𑀸 𑀲𑀢𑁄 𑀲𑀺𑀓𑁆𑀔𑁂;

𑀲𑀦𑁆𑀢𑀻𑀢𑀺 𑀦𑀺𑀩𑁆𑀩𑀼𑀢𑀺𑀁 𑀜𑀢𑁆𑀯𑀸, 𑀲𑀸𑀲𑀦𑁂 𑀕𑁄𑀢𑀫𑀲𑁆𑀲 𑀦 𑀧𑀫𑀚𑁆𑀚𑁂𑀬𑁆𑀬.

𑁯𑁪𑁦. ‘‘𑀅𑀪𑀺𑀪𑀽 𑀳𑀺 𑀲𑁄 𑀅𑀦𑀪𑀺𑀪𑀽𑀢𑁄, 𑀲𑀓𑁆𑀔𑀺𑀥𑀫𑁆𑀫𑀫𑀦𑀻𑀢𑀺𑀳𑀫𑀤𑀲𑁆𑀲𑀻;

𑀢𑀲𑁆𑀫𑀸 𑀳𑀺 𑀢𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂, 𑀅𑀧𑁆𑀧𑀫𑀢𑁆𑀢𑁄 𑀲𑀤𑀸 𑀦𑀫𑀲𑁆𑀲𑀫𑀦𑀼𑀲𑀺𑀓𑁆𑀔𑁂’’𑀢𑀺.

𑀢𑀼𑀯𑀝𑀓𑀲𑀼𑀢𑁆𑀢𑀁 𑀘𑀼𑀤𑁆𑀤𑀲𑀫𑀁 𑀦𑀺𑀝𑁆𑀞𑀺𑀢𑀁.