𑁧𑁩. 𑀫𑀳𑀸𑀩𑁆𑀬𑀽𑀳𑀲𑀼𑀢𑁆𑀢𑀁

𑁯𑁦𑁧. 𑀬𑁂 𑀓𑁂𑀘𑀺𑀫𑁂 𑀤𑀺𑀝𑁆𑀞𑀺𑀧𑀭𑀺𑀩𑁆𑀩𑀲𑀸𑀦𑀸, 𑀇𑀤𑀫𑁂𑀯 𑀲𑀘𑁆𑀘𑀦𑁆𑀢𑀺 𑀯𑀺𑀯𑀸𑀤𑀬𑀦𑁆𑀢𑀺 [𑀯𑀺𑀯𑀸𑀤𑀺𑀬𑀦𑁆𑀢𑀺 (𑀲𑀻. 𑀧𑀻.)];

𑀲𑀩𑁆𑀩𑁂𑀯 𑀢𑁂 𑀦𑀺𑀦𑁆𑀤𑀫𑀦𑁆𑀯𑀸𑀦𑀬𑀦𑁆𑀢𑀺, 𑀅𑀣𑁄 𑀧𑀲𑀁𑀲𑀫𑁆𑀧𑀺 𑀮𑀪𑀦𑁆𑀢𑀺 𑀢𑀢𑁆𑀣.

𑁯𑁦𑁨. 𑀅𑀧𑁆𑀧𑀜𑁆𑀳𑀺 𑀏𑀢𑀁 𑀦 𑀅𑀮𑀁 𑀲𑀫𑀸𑀬, 𑀤𑀼𑀯𑁂 𑀯𑀺𑀯𑀸𑀤𑀲𑁆𑀲 𑀨𑀮𑀸𑀦𑀺 𑀩𑁆𑀭𑀽𑀫𑀺;

𑀏𑀢𑀫𑁆𑀧𑀺 𑀤𑀺𑀲𑁆𑀯𑀸 𑀦 𑀯𑀺𑀯𑀸𑀤𑀬𑁂𑀣, 𑀔𑁂𑀫𑀸𑀪𑀺𑀧𑀲𑁆𑀲𑀁 𑀅𑀯𑀺𑀯𑀸𑀤𑀪𑀽𑀫𑀺𑀁.

𑁯𑁦𑁩. 𑀬𑀸 𑀓𑀸𑀘𑀺𑀫𑀸 𑀲𑀫𑁆𑀫𑀼𑀢𑀺𑀬𑁄 𑀧𑀼𑀣𑀼𑀚𑁆𑀚𑀸, 𑀲𑀩𑁆𑀩𑀸𑀯 𑀏𑀢𑀸 𑀦 𑀉𑀧𑁂𑀢𑀺 𑀯𑀺𑀤𑁆𑀯𑀸;

𑀅𑀦𑀽𑀧𑀬𑁄 𑀲𑁄 𑀉𑀧𑀬𑀁 𑀓𑀺𑀫𑁂𑀬𑁆𑀬, 𑀤𑀺𑀝𑁆𑀞𑁂 𑀲𑀼𑀢𑁂 𑀔𑀦𑁆𑀢𑀺𑀫𑀓𑀼𑀩𑁆𑀩𑀫𑀸𑀦𑁄.

𑁯𑁦𑁪. 𑀲𑀻𑀮𑀼𑀢𑁆𑀢𑀫𑀸 𑀲𑀜𑁆𑀜𑀫𑁂𑀦𑀸𑀳𑀼 𑀲𑀼𑀤𑁆𑀥𑀺𑀁, 𑀯𑀢𑀁 𑀲𑀫𑀸𑀤𑀸𑀬 𑀉𑀧𑀝𑁆𑀞𑀺𑀢𑀸𑀲𑁂;

𑀇𑀥𑁂𑀯 𑀲𑀺𑀓𑁆𑀔𑁂𑀫 𑀅𑀣𑀲𑁆𑀲 𑀲𑀼𑀤𑁆𑀥𑀺𑀁, 𑀪𑀯𑀽𑀧𑀦𑀻𑀢𑀸 𑀓𑀼𑀲𑀮𑀸 𑀯𑀤𑀸𑀦𑀸.

𑁯𑁦𑁫. 𑀲𑀘𑁂 𑀘𑀼𑀢𑁄 𑀲𑀻𑀮𑀯𑀢𑀢𑁄 𑀳𑁄𑀢𑀺, 𑀧𑀯𑁂𑀥𑀢𑀻 [𑀲 𑀯𑁂𑀥𑀢𑀺 (𑀲𑀻. 𑀧𑀻.)] 𑀓𑀫𑁆𑀫 𑀯𑀺𑀭𑀸𑀥𑀬𑀺𑀢𑁆𑀯𑀸;

𑀧𑀚𑀧𑁆𑀧𑀢𑀻 𑀧𑀢𑁆𑀣𑀬𑀢𑀻 𑀘 𑀲𑀼𑀤𑁆𑀥𑀺𑀁, 𑀲𑀢𑁆𑀣𑀸𑀯 𑀳𑀻𑀦𑁄 𑀧𑀯𑀲𑀁 𑀖𑀭𑀫𑁆𑀳𑀸.

𑁯𑁦𑁬. 𑀲𑀻𑀮𑀩𑁆𑀩𑀢𑀁 𑀯𑀸𑀧𑀺 𑀧𑀳𑀸𑀬 𑀲𑀩𑁆𑀩𑀁, 𑀓𑀫𑁆𑀫𑀜𑁆𑀘 𑀲𑀸𑀯𑀚𑁆𑀚𑀦𑀯𑀚𑁆𑀚𑀫𑁂𑀢𑀁;

𑀲𑀼𑀤𑁆𑀥𑀺𑀁 𑀅𑀲𑀼𑀤𑁆𑀥𑀺𑀦𑁆𑀢𑀺 𑀅𑀧𑀢𑁆𑀣𑀬𑀸𑀦𑁄, 𑀯𑀺𑀭𑀢𑁄 𑀘𑀭𑁂 𑀲𑀦𑁆𑀢𑀺𑀫𑀦𑀼𑀕𑁆𑀕𑀳𑀸𑀬.

𑁯𑁦𑁭. 𑀢𑀫𑀽𑀧𑀦𑀺𑀲𑁆𑀲𑀸𑀬 𑀚𑀺𑀕𑀼𑀘𑁆𑀙𑀺𑀢𑀁 𑀯𑀸, 𑀅𑀣𑀯𑀸𑀧𑀺 𑀤𑀺𑀝𑁆𑀞𑀁 𑀯 𑀲𑀼𑀢𑀁 𑀫𑀼𑀢𑀁 𑀯𑀸;

𑀉𑀤𑁆𑀥𑀁𑀲𑀭𑀸 𑀲𑀼𑀤𑁆𑀥𑀺𑀫𑀦𑀼𑀢𑁆𑀣𑀼𑀦𑀦𑁆𑀢𑀺, 𑀅𑀯𑀻𑀢𑀢𑀡𑁆𑀳𑀸𑀲𑁂 𑀪𑀯𑀸𑀪𑀯𑁂𑀲𑀼.

𑁯𑁦𑁮. 𑀧𑀢𑁆𑀣𑀬𑀫𑀸𑀦𑀲𑁆𑀲 𑀳𑀺 𑀚𑀧𑁆𑀧𑀺𑀢𑀸𑀦𑀺, 𑀧𑀯𑁂𑀥𑀺𑀢𑀁 𑀯𑀸𑀧𑀺 𑀧𑀓𑀧𑁆𑀧𑀺𑀢𑁂𑀲𑀼;

𑀘𑀼𑀢𑀽𑀧𑀧𑀸𑀢𑁄 𑀇𑀥 𑀬𑀲𑁆𑀲 𑀦𑀢𑁆𑀣𑀺, 𑀲 𑀓𑁂𑀦 𑀯𑁂𑀥𑁂𑀬𑁆𑀬 𑀓𑀼𑀳𑀺𑀁𑀯 𑀚𑀧𑁆𑀧𑁂 [𑀓𑀼𑀳𑀺𑀜𑁆𑀘𑀺 𑀚𑀧𑁆𑀧𑁂 (𑀲𑀻. 𑀲𑁆𑀬𑀸. 𑀓.), 𑀓𑀼𑀳𑀺𑀁 𑀧𑀚𑀧𑁆𑀧𑁂 (𑀧𑀻.) 𑀦𑀺𑀤𑁆𑀤𑁂𑀲𑁄 𑀧𑀲𑁆𑀲𑀺𑀢𑀩𑁆𑀩𑁄].

𑁯𑁦𑁯. 𑀬𑀫𑀸𑀳𑀼 𑀥𑀫𑁆𑀫𑀁 𑀧𑀭𑀫𑀦𑁆𑀢𑀺 𑀏𑀓𑁂, 𑀢𑀫𑁂𑀯 𑀳𑀻𑀦𑀦𑁆𑀢𑀺 𑀧𑀦𑀸𑀳𑀼 𑀅𑀜𑁆𑀜𑁂;

𑀲𑀘𑁆𑀘𑁄 𑀦𑀼 𑀯𑀸𑀤𑁄 𑀓𑀢𑀫𑁄 𑀇𑀫𑁂𑀲𑀁, 𑀲𑀩𑁆𑀩𑁂𑀯 𑀳𑀻𑀫𑁂 𑀓𑀼𑀲𑀮𑀸 𑀯𑀤𑀸𑀦𑀸.

𑁯𑁧𑁦. 𑀲𑀓𑀜𑁆𑀳𑀺 𑀥𑀫𑁆𑀫𑀁 𑀧𑀭𑀺𑀧𑀼𑀡𑁆𑀡𑀫𑀸𑀳𑀼, 𑀅𑀜𑁆𑀜𑀲𑁆𑀲 𑀥𑀫𑁆𑀫𑀁 𑀧𑀦 𑀳𑀻𑀦𑀫𑀸𑀳𑀼;

𑀏𑀯𑀫𑁆𑀧𑀺 𑀯𑀺𑀕𑁆𑀕𑀬𑁆𑀳 𑀯𑀺𑀯𑀸𑀤𑀬𑀦𑁆𑀢𑀺, 𑀲𑀓𑀁 𑀲𑀓𑀁 𑀲𑀫𑁆𑀫𑀼𑀢𑀺𑀫𑀸𑀳𑀼 𑀲𑀘𑁆𑀘𑀁.

𑁯𑁧𑁧. 𑀧𑀭𑀲𑁆𑀲 𑀘𑁂 𑀯𑀫𑁆𑀪𑀬𑀺𑀢𑁂𑀦 𑀳𑀻𑀦𑁄, 𑀦 𑀓𑁄𑀘𑀺 𑀥𑀫𑁆𑀫𑁂𑀲𑀼 𑀯𑀺𑀲𑁂𑀲𑀺 𑀅𑀲𑁆𑀲;

𑀧𑀼𑀣𑀽 𑀳𑀺 𑀅𑀜𑁆𑀜𑀲𑁆𑀲 𑀯𑀤𑀦𑁆𑀢𑀺 𑀥𑀫𑁆𑀫𑀁, 𑀦𑀺𑀳𑀻𑀦𑀢𑁄 𑀲𑀫𑁆𑀳𑀺 𑀤𑀴𑁆𑀳𑀁 𑀯𑀤𑀸𑀦𑀸.

𑁯𑁧𑁨. 𑀲𑀤𑁆𑀥𑀫𑁆𑀫𑀧𑀽𑀚𑀸𑀧𑀺 𑀦𑁂𑀲𑀁 𑀢𑀣𑁂𑀯, 𑀬𑀣𑀸 𑀧𑀲𑀁𑀲𑀦𑁆𑀢𑀺 𑀲𑀓𑀸𑀬𑀦𑀸𑀦𑀺;

𑀲𑀩𑁆𑀩𑁂𑀯 𑀯𑀸𑀤𑀸 [𑀲𑀩𑁆𑀩𑁂 𑀧𑀯𑀸𑀤𑀸 (𑀲𑁆𑀬𑀸.)] 𑀢𑀣𑀺𑀬𑀸 [𑀢𑀣𑀺𑀯𑀸 (𑀲𑀩𑁆𑀩𑀢𑁆𑀣)] 𑀪𑀯𑁂𑀬𑁆𑀬𑀼𑀁, 𑀲𑀼𑀤𑁆𑀥𑀻 𑀳𑀺 𑀦𑁂𑀲𑀁 𑀧𑀘𑁆𑀘𑀢𑁆𑀢𑀫𑁂𑀯.

𑁯𑁧𑁩. 𑀦 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀭𑀦𑁂𑀬𑁆𑀬𑀫𑀢𑁆𑀣𑀺, 𑀥𑀫𑁆𑀫𑁂𑀲𑀼 𑀦𑀺𑀘𑁆𑀙𑁂𑀬𑁆𑀬 𑀲𑀫𑀼𑀕𑁆𑀕𑀳𑀻𑀢𑀁;

𑀢𑀲𑁆𑀫𑀸 𑀯𑀺𑀯𑀸𑀤𑀸𑀦𑀺 𑀉𑀧𑀸𑀢𑀺𑀯𑀢𑁆𑀢𑁄, 𑀦 𑀳𑀺 𑀲𑁂𑀝𑁆𑀞𑀢𑁄 𑀧𑀲𑁆𑀲𑀢𑀺 𑀥𑀫𑁆𑀫𑀫𑀜𑁆𑀜𑀁.

𑁯𑁧𑁪. 𑀚𑀸𑀦𑀸𑀫𑀺 𑀧𑀲𑁆𑀲𑀸𑀫𑀺 𑀢𑀣𑁂𑀯 𑀏𑀢𑀁, 𑀤𑀺𑀝𑁆𑀞𑀺𑀬𑀸 𑀏𑀓𑁂 𑀧𑀘𑁆𑀘𑁂𑀦𑁆𑀢𑀺 𑀲𑀼𑀤𑁆𑀥𑀺𑀁;

𑀅𑀤𑁆𑀤𑀓𑁆𑀔𑀺 𑀘𑁂 𑀓𑀺𑀜𑁆𑀳𑀺 𑀢𑀼𑀫𑀲𑁆𑀲 𑀢𑁂𑀦, 𑀅𑀢𑀺𑀲𑀺𑀢𑁆𑀯𑀸 𑀅𑀜𑁆𑀜𑁂𑀦 𑀯𑀤𑀦𑁆𑀢𑀺 𑀲𑀼𑀤𑁆𑀥𑀺𑀁.

𑁯𑁧𑁫. 𑀧𑀲𑁆𑀲𑀁 𑀦𑀭𑁄 𑀤𑀓𑁆𑀔𑀢𑀺 [𑀤𑀓𑁆𑀔𑀺𑀢𑀺 (𑀲𑀻.)] 𑀦𑀸𑀫𑀭𑀽𑀧𑀁, 𑀤𑀺𑀲𑁆𑀯𑀸𑀦 𑀯𑀸 𑀜𑀲𑁆𑀲𑀢𑀺 𑀢𑀸𑀦𑀺𑀫𑁂𑀯;

𑀓𑀸𑀫𑀁 𑀩𑀳𑀼𑀁 𑀧𑀲𑁆𑀲𑀢𑀼 𑀅𑀧𑁆𑀧𑀓𑀁 𑀯𑀸, 𑀦 𑀳𑀺 𑀢𑁂𑀦 𑀲𑀼𑀤𑁆𑀥𑀺𑀁 𑀓𑀼𑀲𑀮𑀸 𑀯𑀤𑀦𑁆𑀢𑀺.

𑁯𑁧𑁬. 𑀦𑀺𑀯𑀺𑀲𑁆𑀲𑀯𑀸𑀤𑀻 𑀦 𑀳𑀺 𑀲𑀼𑀩𑁆𑀩𑀺𑀦𑀸𑀬𑁄, 𑀧𑀓𑀧𑁆𑀧𑀺𑀢𑀁 𑀤𑀺𑀝𑁆𑀞𑀺 𑀧𑀼𑀭𑁂𑀓𑁆𑀔𑀭𑀸𑀦𑁄;

𑀬𑀁 𑀦𑀺𑀲𑁆𑀲𑀺𑀢𑁄 𑀢𑀢𑁆𑀣 𑀲𑀼𑀪𑀁 𑀯𑀤𑀸𑀦𑁄, 𑀲𑀼𑀤𑁆𑀥𑀺𑀁𑀯𑀤𑁄 𑀢𑀢𑁆𑀣 𑀢𑀣𑀤𑁆𑀤𑀲𑀸 𑀲𑁄.

𑁯𑁧𑁭. 𑀦 𑀩𑁆𑀭𑀸𑀳𑁆𑀫𑀡𑁄 𑀓𑀧𑁆𑀧𑀫𑀼𑀧𑁂𑀢𑀺 𑀲𑀗𑁆𑀔𑀸 [𑀲𑀗𑁆𑀔𑀁 (𑀲𑀻. 𑀲𑁆𑀬𑀸. 𑀧𑀻.)], 𑀦 𑀤𑀺𑀝𑁆𑀞𑀺𑀲𑀸𑀭𑀻 𑀦𑀧𑀺 𑀜𑀸𑀡𑀩𑀦𑁆𑀥𑀼;

𑀜𑀢𑁆𑀯𑀸 𑀘 𑀲𑁄 𑀲𑀫𑁆𑀫𑀼𑀢𑀺𑀬𑁄 [𑀲𑀫𑁆𑀫𑀢𑀺𑀬𑁄 (𑀲𑁆𑀬𑀸.)] 𑀧𑀼𑀣𑀼𑀚𑁆𑀚𑀸, 𑀉𑀧𑁂𑀓𑁆𑀔𑀢𑀻 𑀉𑀕𑁆𑀕𑀳𑀡𑀦𑁆𑀢𑀺 𑀫𑀜𑁆𑀜𑁂.

𑁯𑁧𑁮. 𑀯𑀺𑀲𑁆𑀲𑀚𑁆𑀚 𑀕𑀦𑁆𑀣𑀸𑀦𑀺 𑀫𑀼𑀦𑀻𑀥 𑀮𑁄𑀓𑁂, 𑀯𑀺𑀯𑀸𑀤𑀚𑀸𑀢𑁂𑀲𑀼 𑀦 𑀯𑀕𑁆𑀕𑀲𑀸𑀭𑀻;

𑀲𑀦𑁆𑀢𑁄 𑀅𑀲𑀦𑁆𑀢𑁂𑀲𑀼 𑀉𑀧𑁂𑀓𑁆𑀔𑀓𑁄 𑀲𑁄, 𑀅𑀦𑀼𑀕𑁆𑀕𑀳𑁄 𑀉𑀕𑁆𑀕𑀳𑀡𑀦𑁆𑀢𑀺 𑀫𑀜𑁆𑀜𑁂.

𑁯𑁧𑁯. 𑀧𑀼𑀩𑁆𑀩𑀸𑀲𑀯𑁂 𑀳𑀺𑀢𑁆𑀯𑀸 𑀦𑀯𑁂 𑀅𑀓𑀼𑀩𑁆𑀩𑀁, 𑀦 𑀙𑀦𑁆𑀤𑀕𑀽 𑀦𑁄𑀧𑀺 𑀦𑀺𑀯𑀺𑀲𑁆𑀲𑀯𑀸𑀤𑀻;

𑀲 𑀯𑀺𑀧𑁆𑀧𑀫𑀼𑀢𑁆𑀢𑁄 𑀤𑀺𑀝𑁆𑀞𑀺𑀕𑀢𑁂𑀳𑀺 𑀥𑀻𑀭𑁄, 𑀦 𑀮𑀺𑀫𑁆𑀧𑀢𑀺 [𑀦 𑀮𑀺𑀧𑁆𑀧𑀢𑀺 (𑀲𑀻. 𑀧𑀻.)] 𑀮𑁄𑀓𑁂 𑀅𑀦𑀢𑁆𑀢𑀕𑀭𑀳𑀻.

𑁯𑁨𑁦. 𑀲 𑀲𑀩𑁆𑀩𑀥𑀫𑁆𑀫𑁂𑀲𑀼 𑀯𑀺𑀲𑁂𑀦𑀺𑀪𑀽𑀢𑁄, 𑀬𑀁 𑀓𑀺𑀜𑁆𑀘𑀺 𑀤𑀺𑀝𑁆𑀞𑀁 𑀯 𑀲𑀼𑀢𑀁 𑀫𑀼𑀢𑀁 𑀯𑀸;

𑀲 𑀧𑀦𑁆𑀦𑀪𑀸𑀭𑁄 𑀫𑀼𑀦𑀺 𑀯𑀺𑀧𑁆𑀧𑀫𑀼𑀢𑁆𑀢𑁄, 𑀦 𑀓𑀧𑁆𑀧𑀺𑀬𑁄 𑀦𑀽𑀧𑀭𑀢𑁄 𑀦 𑀧𑀢𑁆𑀣𑀺𑀬𑁄𑀢𑀺.

𑀫𑀳𑀸𑀩𑁆𑀬𑀽𑀳𑀲𑀼𑀢𑁆𑀢𑀁 𑀢𑁂𑀭𑀲𑀫𑀁 𑀦𑀺𑀝𑁆𑀞𑀺𑀢𑀁.