𑁧𑁨. 𑀘𑀽𑀴𑀩𑁆𑀬𑀽𑀳𑀲𑀼𑀢𑁆𑀢𑀁 [𑀘𑀽𑀴𑀯𑀺𑀬𑀽𑀳𑀲𑀼𑀢𑁆𑀢𑀁 (𑀲𑀻. 𑀲𑁆𑀬𑀸. 𑀦𑀺𑀤𑁆𑀤𑁂𑀲)]

𑁮𑁮𑁪. 𑀲𑀓𑀁𑀲𑀓𑀁𑀤𑀺𑀝𑁆𑀞𑀺𑀧𑀭𑀺𑀩𑁆𑀩𑀲𑀸𑀦𑀸, 𑀯𑀺𑀕𑁆𑀕𑀬𑁆𑀳 𑀦𑀸𑀦𑀸 𑀓𑀼𑀲𑀮𑀸 𑀯𑀤𑀦𑁆𑀢𑀺;

𑀬𑁄 𑀏𑀯𑀁 𑀚𑀸𑀦𑀸𑀢𑀺 𑀲 𑀯𑁂𑀤𑀺 𑀥𑀫𑁆𑀫𑀁, 𑀇𑀤𑀁 𑀧𑀝𑀺𑀓𑁆𑀓𑁄𑀲𑀫𑀓𑁂𑀯𑀮𑀻 𑀲𑁄.

𑁮𑁮𑁫. 𑀏𑀯𑀫𑁆𑀧𑀺 𑀯𑀺𑀕𑁆𑀕𑀬𑁆𑀳 𑀯𑀺𑀯𑀸𑀤𑀬𑀦𑁆𑀢𑀺, 𑀩𑀸𑀮𑁄 𑀧𑀭𑁄 𑀅𑀓𑁆𑀓𑀼𑀲𑀮𑁄𑀢𑀺 [𑀅𑀓𑀼𑀲𑀮𑁄𑀢𑀺 (𑀲𑀻. 𑀲𑁆𑀬𑀸. 𑀧𑀻.)] 𑀘𑀸𑀳𑀼;

𑀲𑀘𑁆𑀘𑁄 𑀦𑀼 𑀯𑀸𑀤𑁄 𑀓𑀢𑀫𑁄 𑀇𑀫𑁂𑀲𑀁, 𑀲𑀩𑁆𑀩𑁂𑀯 𑀳𑀻𑀫𑁂 𑀓𑀼𑀲𑀮𑀸 𑀯𑀤𑀸𑀦𑀸.

𑁮𑁮𑁬. 𑀧𑀭𑀲𑁆𑀲 𑀘𑁂 𑀥𑀫𑁆𑀫𑀫𑀦𑀸𑀦𑀼𑀚𑀸𑀦𑀁, 𑀩𑀸𑀮𑁄𑀫𑀓𑁄 [𑀩𑀸𑀮𑁄 𑀫𑀕𑁄 (𑀲𑀻. 𑀲𑁆𑀬𑀸. 𑀓.)] 𑀳𑁄𑀢𑀺 𑀦𑀺𑀳𑀻𑀦𑀧𑀜𑁆𑀜𑁄;

𑀲𑀩𑁆𑀩𑁂𑀯 𑀩𑀸𑀮𑀸 𑀲𑀼𑀦𑀺𑀳𑀻𑀦𑀧𑀜𑁆𑀜𑀸, 𑀲𑀩𑁆𑀩𑁂𑀯𑀺𑀫𑁂 𑀤𑀺𑀝𑁆𑀞𑀺𑀧𑀭𑀺𑀩𑁆𑀩𑀲𑀸𑀦𑀸.

𑁮𑁮𑁭. 𑀲𑀦𑁆𑀤𑀺𑀝𑁆𑀞𑀺𑀬𑀸 𑀘𑁂𑀯 𑀦 𑀯𑀻𑀯𑀤𑀸𑀢𑀸, 𑀲𑀁𑀲𑀼𑀤𑁆𑀥𑀧𑀜𑁆𑀜𑀸 𑀓𑀼𑀲𑀮𑀸 𑀫𑀼𑀢𑀻𑀫𑀸;

𑀦 𑀢𑁂𑀲𑀁 𑀓𑁄𑀘𑀺 𑀧𑀭𑀺𑀳𑀻𑀦𑀧𑀜𑁆𑀜𑁄 [𑀓𑁄𑀘𑀺𑀧𑀺 𑀦𑀺𑀳𑀻𑀦𑀧𑀜𑁆𑀜𑁄 (𑀲𑀻. 𑀲𑁆𑀬𑀸. 𑀓.)], 𑀤𑀺𑀝𑁆𑀞𑀻 𑀳𑀺 𑀢𑁂𑀲𑀫𑁆𑀧𑀺 𑀢𑀣𑀸 𑀲𑀫𑀢𑁆𑀢𑀸.

𑁮𑁮𑁮. 𑀦 𑀯𑀸𑀳𑀫𑁂𑀢𑀁 𑀢𑀣𑀺𑀬𑀦𑁆𑀢𑀺 [𑀢𑀣𑀺𑀯𑀦𑁆𑀢𑀺 (𑀲𑁆𑀬𑀸. 𑀓.)] 𑀩𑁆𑀭𑀽𑀫𑀺, 𑀬𑀫𑀸𑀳𑀼 𑀩𑀸𑀮𑀸 𑀫𑀺𑀣𑀼 𑀅𑀜𑁆𑀜𑀫𑀜𑁆𑀜𑀁;

𑀲𑀓𑀁𑀲𑀓𑀁𑀤𑀺𑀝𑁆𑀞𑀺𑀫𑀓𑀁𑀲𑀼 𑀲𑀘𑁆𑀘𑀁, 𑀢𑀲𑁆𑀫𑀸 𑀳𑀺 𑀩𑀸𑀮𑁄𑀢𑀺 𑀧𑀭𑀁 𑀤𑀳𑀦𑁆𑀢𑀺.

𑁮𑁮𑁯. 𑀬𑀫𑀸𑀳𑀼 𑀲𑀘𑁆𑀘𑀁 𑀢𑀣𑀺𑀬𑀦𑁆𑀢𑀺 𑀏𑀓𑁂, 𑀢𑀫𑀸𑀳𑀼 𑀅𑀜𑁆𑀜𑁂 [𑀅𑀜𑁆𑀜𑁂𑀧𑀺 (𑀲𑁆𑀬𑀸.), 𑀅𑀜𑁆𑀜𑁂 𑀘 (?)] 𑀢𑀼𑀘𑁆𑀙𑀁 𑀫𑀼𑀲𑀸𑀢𑀺;

𑀏𑀯𑀫𑁆𑀧𑀺 𑀯𑀺𑀕𑀬𑁆𑀳 𑀯𑀺𑀯𑀸𑀤𑀬𑀦𑁆𑀢𑀺, 𑀓𑀲𑁆𑀫𑀸 𑀦 𑀏𑀓𑀁 𑀲𑀫𑀡𑀸 𑀯𑀤𑀦𑁆𑀢𑀺.

𑁮𑁯𑁦. 𑀏𑀓𑀜𑁆𑀳𑀺 𑀲𑀘𑁆𑀘𑀁 𑀦 𑀤𑀼𑀢𑀻𑀬𑀫𑀢𑁆𑀣𑀺, 𑀬𑀲𑁆𑀫𑀺𑀁 𑀧𑀚𑀸 𑀦𑁄 𑀯𑀺𑀯𑀤𑁂 𑀧𑀚𑀸𑀦𑀁;

𑀦𑀸𑀦𑀸 𑀢𑁂 [𑀦𑀸𑀦𑀸𑀢𑁄 (𑀓.)] 𑀲𑀘𑁆𑀘𑀸𑀦𑀺 𑀲𑀬𑀁 𑀣𑀼𑀦𑀦𑁆𑀢𑀺, 𑀢𑀲𑁆𑀫𑀸 𑀦 𑀏𑀓𑀁 𑀲𑀫𑀡𑀸 𑀯𑀤𑀦𑁆𑀢𑀺.

𑁮𑁯𑁧. 𑀓𑀲𑁆𑀫𑀸 𑀦𑀼 𑀲𑀘𑁆𑀘𑀸𑀦𑀺 𑀯𑀤𑀦𑁆𑀢𑀺 𑀦𑀸𑀦𑀸, 𑀧𑀯𑀸𑀤𑀺𑀬𑀸𑀲𑁂 𑀓𑀼𑀲𑀮𑀸 𑀯𑀤𑀸𑀦𑀸;

𑀲𑀘𑁆𑀘𑀸𑀦𑀺 𑀲𑀼𑀢𑀸𑀦𑀺 𑀩𑀳𑀽𑀦𑀺 𑀦𑀸𑀦𑀸, 𑀉𑀤𑀸𑀳𑀼 𑀢𑁂 𑀢𑀓𑁆𑀓𑀫𑀦𑀼𑀲𑁆𑀲𑀭𑀦𑁆𑀢𑀺.

𑁮𑁯𑁨. 𑀦 𑀳𑁂𑀯 𑀲𑀘𑁆𑀘𑀸𑀦𑀺 𑀩𑀳𑀽𑀦𑀺 𑀦𑀸𑀦𑀸, 𑀅𑀜𑁆𑀜𑀢𑁆𑀭 𑀲𑀜𑁆𑀜𑀸𑀬 𑀦𑀺𑀘𑁆𑀘𑀸𑀦𑀺 𑀮𑁄𑀓𑁂;

𑀢𑀓𑁆𑀓𑀜𑁆𑀘 𑀤𑀺𑀝𑁆𑀞𑀻𑀲𑀼 𑀧𑀓𑀧𑁆𑀧𑀬𑀺𑀢𑁆𑀯𑀸, 𑀲𑀘𑁆𑀘𑀁 𑀫𑀼𑀲𑀸𑀢𑀺 𑀤𑁆𑀯𑀬𑀥𑀫𑁆𑀫𑀫𑀸𑀳𑀼.

𑁮𑁯𑁩. 𑀤𑀺𑀝𑁆𑀞𑁂 𑀲𑀼𑀢𑁂 𑀲𑀻𑀮𑀯𑀢𑁂 𑀫𑀼𑀢𑁂 𑀯𑀸, 𑀏𑀢𑁂 𑀘 𑀦𑀺𑀲𑁆𑀲𑀸𑀬 𑀯𑀺𑀫𑀸𑀦𑀤𑀲𑁆𑀲𑀻;

𑀯𑀺𑀦𑀺𑀘𑁆𑀙𑀬𑁂 𑀞𑀢𑁆𑀯𑀸 𑀧𑀳𑀲𑁆𑀲𑀫𑀸𑀦𑁄, 𑀩𑀸𑀮𑁄 𑀧𑀭𑁄 𑀅𑀓𑁆𑀓𑀼𑀲𑀮𑁄𑀢𑀺 𑀘𑀸𑀳.

𑁮𑁯𑁪. 𑀬𑁂𑀦𑁂𑀯 𑀩𑀸𑀮𑁄𑀢𑀺 𑀧𑀭𑀁 𑀤𑀳𑀸𑀢𑀺, 𑀢𑁂𑀦𑀸𑀢𑀼𑀫𑀸𑀦𑀁 𑀓𑀼𑀲𑀮𑁄𑀢𑀺 𑀘𑀸𑀳;

𑀲𑀬𑀫𑀢𑁆𑀢𑀦𑀸 𑀲𑁄 𑀓𑀼𑀲𑀮𑁄 𑀯𑀤𑀸𑀦𑁄, 𑀅𑀜𑁆𑀜𑀁 𑀯𑀺𑀫𑀸𑀦𑁂𑀢𑀺 𑀢𑀤𑁂𑀯 𑀧𑀸𑀯.

𑁮𑁯𑁫. 𑀅𑀢𑀺𑀲𑀸𑀭𑀤𑀺𑀝𑁆𑀞𑀺𑀬𑀸𑀯 𑀲𑁄 𑀲𑀫𑀢𑁆𑀢𑁄, 𑀫𑀸𑀦𑁂𑀦 𑀫𑀢𑁆𑀢𑁄 𑀧𑀭𑀺𑀧𑀼𑀡𑁆𑀡𑀫𑀸𑀦𑀻;

𑀲𑀬𑀫𑁂𑀯 𑀲𑀸𑀫𑀁 𑀫𑀦𑀲𑀸𑀪𑀺𑀲𑀺𑀢𑁆𑀢𑁄, 𑀤𑀺𑀝𑁆𑀞𑀻 𑀳𑀺 𑀲𑀸 𑀢𑀲𑁆𑀲 𑀢𑀣𑀸 𑀲𑀫𑀢𑁆𑀢𑀸.

𑁮𑁯𑁬. 𑀧𑀭𑀲𑁆𑀲 𑀘𑁂 𑀳𑀺 𑀯𑀘𑀲𑀸 𑀦𑀺𑀳𑀻𑀦𑁄, 𑀢𑀼𑀫𑁄 𑀲𑀳𑀸 𑀳𑁄𑀢𑀺 𑀦𑀺𑀳𑀻𑀦𑀧𑀜𑁆𑀜𑁄;

𑀅𑀣 𑀘𑁂 𑀲𑀬𑀁 𑀯𑁂𑀤𑀕𑀽 𑀳𑁄𑀢𑀺 𑀥𑀻𑀭𑁄, 𑀦 𑀓𑁄𑀘𑀺 𑀩𑀸𑀮𑁄 𑀲𑀫𑀡𑁂𑀲𑀼 𑀅𑀢𑁆𑀣𑀺.

𑁮𑁯𑁭. 𑀅𑀜𑁆𑀜𑀁 𑀇𑀢𑁄 𑀬𑀸𑀪𑀺𑀯𑀤𑀦𑁆𑀢𑀺 𑀥𑀫𑁆𑀫𑀁, 𑀅𑀧𑀭𑀤𑁆𑀥𑀸 𑀲𑀼𑀤𑁆𑀥𑀺𑀫𑀓𑁂𑀯𑀮𑀻 𑀢𑁂 [𑀲𑀼𑀤𑁆𑀥𑀺𑀫𑀓𑁂𑀯𑀮𑀻𑀦𑁄 (𑀲𑀻.)];

𑀏𑀯𑀫𑁆𑀧𑀺 𑀢𑀺𑀢𑁆𑀣𑁆𑀬𑀸 𑀧𑀼𑀣𑀼𑀲𑁄 𑀯𑀤𑀦𑁆𑀢𑀺, 𑀲𑀦𑁆𑀤𑀺𑀝𑁆𑀞𑀺𑀭𑀸𑀕𑁂𑀦 𑀳𑀺 𑀢𑁂𑀪𑀺𑀭𑀢𑁆𑀢𑀸 [𑀢𑁆𑀬𑀸𑀪𑀺𑀭𑀢𑁆𑀢𑀸 (𑀲𑁆𑀬𑀸. 𑀓.)].

𑁮𑁯𑁮. 𑀇𑀥𑁂𑀯 𑀲𑀼𑀤𑁆𑀥𑀺 𑀇𑀢𑀺 𑀯𑀸𑀤𑀬𑀦𑁆𑀢𑀺, 𑀦𑀸𑀜𑁆𑀜𑁂𑀲𑀼 𑀥𑀫𑁆𑀫𑁂𑀲𑀼 𑀯𑀺𑀲𑀼𑀤𑁆𑀥𑀺𑀫𑀸𑀳𑀼;

𑀏𑀯𑀫𑁆𑀧𑀺 𑀢𑀺𑀢𑁆𑀣𑁆𑀬𑀸 𑀧𑀼𑀣𑀼𑀲𑁄 𑀦𑀺𑀯𑀺𑀝𑁆𑀞𑀸, 𑀲𑀓𑀸𑀬𑀦𑁂 𑀢𑀢𑁆𑀣 𑀤𑀴𑁆𑀳𑀁 𑀯𑀤𑀸𑀦𑀸.

𑁮𑁯𑁯. 𑀲𑀓𑀸𑀬𑀦𑁂 𑀯𑀸𑀧𑀺 𑀤𑀴𑁆𑀳𑀁 𑀯𑀤𑀸𑀦𑁄, 𑀓𑀫𑁂𑀢𑁆𑀣 𑀩𑀸𑀮𑁄𑀢𑀺 𑀧𑀭𑀁 𑀤𑀳𑁂𑀬𑁆𑀬;

𑀲𑀬𑀫𑁂𑀯 𑀲𑁄 𑀫𑁂𑀥𑀕𑀫𑀸𑀯𑀳𑁂𑀬𑁆𑀬 [𑀫𑁂𑀥𑀓𑀁 𑀆𑀯𑀳𑁂𑀬𑁆𑀬 (𑀲𑀻. 𑀧𑀻.)], 𑀧𑀭𑀁 𑀯𑀤𑀁 𑀩𑀸𑀮𑀫𑀲𑀼𑀤𑁆𑀥𑀺𑀥𑀫𑁆𑀫𑀁.

𑁯𑁦𑁦. 𑀯𑀺𑀦𑀺𑀘𑁆𑀙𑀬𑁂 𑀞𑀢𑁆𑀯𑀸 𑀲𑀬𑀁 𑀧𑀫𑀸𑀬, 𑀉𑀤𑁆𑀥𑀁 𑀲 [𑀉𑀤𑁆𑀤𑀁 𑀲𑁄 (𑀲𑀻. 𑀲𑁆𑀬𑀸. 𑀧𑀻.)] 𑀮𑁄𑀓𑀲𑁆𑀫𑀺𑀁 𑀯𑀺𑀯𑀸𑀤𑀫𑁂𑀢𑀺;

𑀳𑀺𑀢𑁆𑀯𑀸𑀦 𑀲𑀩𑁆𑀩𑀸𑀦𑀺 𑀯𑀺𑀦𑀺𑀘𑁆𑀙𑀬𑀸𑀦𑀺, 𑀦 𑀫𑁂𑀥𑀕𑀁 𑀓𑀼𑀩𑁆𑀩𑀢𑀺 𑀚𑀦𑁆𑀢𑀼 𑀮𑁄𑀓𑁂𑀢𑀺.

𑀘𑀽𑀴𑀩𑁆𑀬𑀽𑀳𑀲𑀼𑀢𑁆𑀢𑀁 𑀤𑁆𑀯𑀸𑀤𑀲𑀫𑀁 𑀦𑀺𑀝𑁆𑀞𑀺𑀢𑀁.