𑁯. 𑀯𑀸𑀲𑁂𑀝𑁆𑀞𑀲𑀼𑀢𑁆𑀢𑀁

𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀇𑀘𑁆𑀙𑀸𑀦𑀗𑁆𑀕𑀮𑁂 𑀯𑀺𑀳𑀭𑀢𑀺 𑀇𑀘𑁆𑀙𑀸𑀦𑀗𑁆𑀕𑀮𑀯𑀦𑀲𑀡𑁆𑀟𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸 𑀅𑀪𑀺𑀜𑁆𑀜𑀸𑀢𑀸 𑀅𑀪𑀺𑀜𑁆𑀜𑀸𑀢𑀸 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀸 𑀇𑀘𑁆𑀙𑀸𑀦𑀗𑁆𑀕𑀮𑁂 𑀧𑀝𑀺𑀯𑀲𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀘𑀗𑁆𑀓𑀻 𑀩𑁆𑀭𑀸𑀳𑁆𑀫𑀡𑁄, 𑀢𑀸𑀭𑀼𑀓𑁆𑀔𑁄 𑀩𑁆𑀭𑀸𑀳𑁆𑀫𑀡𑁄, 𑀧𑁄𑀓𑁆𑀔𑀭𑀲𑀸𑀢𑀺 𑀩𑁆𑀭𑀸𑀳𑁆𑀫𑀡𑁄, 𑀚𑀸𑀡𑀼𑀲𑁆𑀲𑁄𑀡𑀺 [𑀚𑀸𑀡𑀼𑀲𑁄𑀡𑀺 (𑀓.)] 𑀩𑁆𑀭𑀸𑀳𑁆𑀫𑀡𑁄, 𑀢𑁄𑀤𑁂𑀬𑁆𑀬𑁄 𑀩𑁆𑀭𑀸𑀳𑁆𑀫𑀡𑁄, 𑀅𑀜𑁆𑀜𑁂 𑀘 𑀅𑀪𑀺𑀜𑁆𑀜𑀸𑀢𑀸 𑀅𑀪𑀺𑀜𑁆𑀜𑀸𑀢𑀸 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀸. 𑀅𑀣 𑀔𑁄 𑀯𑀸𑀲𑁂𑀝𑁆𑀞𑀪𑀸𑀭𑀤𑁆𑀯𑀸𑀚𑀸𑀦𑀁 𑀫𑀸𑀡𑀯𑀸𑀦𑀁 𑀚𑀗𑁆𑀖𑀸𑀯𑀺𑀳𑀸𑀭𑀁 𑀅𑀦𑀼𑀘𑀗𑁆𑀓𑀫𑀦𑁆𑀢𑀸𑀦𑀁 𑀅𑀦𑀼𑀯𑀺𑀘𑀭𑀦𑁆𑀢𑀸𑀦𑀁 [𑀅𑀦𑀼𑀘𑀗𑁆𑀓𑀫𑀫𑀸𑀦𑀸𑀦𑀁 𑀅𑀦𑀼𑀯𑀺𑀘𑀭𑀫𑀸𑀦𑀸𑀦𑀁 (𑀲𑀻. 𑀧𑀻.)] 𑀅𑀬𑀫𑀦𑁆𑀢𑀭𑀸𑀓𑀣𑀸 𑀉𑀤𑀧𑀸𑀤𑀺 𑁋 ‘‘𑀓𑀣𑀁, 𑀪𑁄, 𑀩𑁆𑀭𑀸𑀳𑁆𑀫𑀡𑁄 𑀳𑁄𑀢𑀻’’𑀢𑀺?

𑀪𑀸𑀭𑀤𑁆𑀯𑀸𑀚𑁄 𑀫𑀸𑀡𑀯𑁄 𑀏𑀯𑀫𑀸𑀳 𑁋 ‘‘𑀬𑀢𑁄 𑀔𑁄, 𑀪𑁄, 𑀉𑀪𑀢𑁄 𑀲𑀼𑀚𑀸𑀢𑁄 𑀳𑁄𑀢𑀺 𑀫𑀸𑀢𑀺𑀢𑁄 𑀘 𑀧𑀺𑀢𑀺𑀢𑁄 𑀘 𑀲𑀁𑀲𑀼𑀤𑁆𑀥𑀕𑀳𑀡𑀺𑀓𑁄 𑀬𑀸𑀯 𑀲𑀢𑁆𑀢𑀫𑀸 𑀧𑀺𑀢𑀸𑀫𑀳𑀬𑀼𑀕𑀸 𑀅𑀓𑁆𑀔𑀺𑀢𑁆𑀢𑁄 𑀅𑀦𑀼𑀧𑀓𑁆𑀓𑀼𑀝𑁆𑀞𑁄 𑀚𑀸𑀢𑀺𑀯𑀸𑀤𑁂𑀦, 𑀏𑀢𑁆𑀢𑀸𑀯𑀢𑀸 𑀔𑁄 𑀪𑁄 𑀩𑁆𑀭𑀸𑀳𑁆𑀫𑀡𑁄 𑀳𑁄𑀢𑀻’’𑀢𑀺.

𑀯𑀸𑀲𑁂𑀝𑁆𑀞𑁄 𑀫𑀸𑀡𑀯𑁄 𑀏𑀯𑀫𑀸𑀳 𑁋 ‘‘𑀬𑀢𑁄 𑀔𑁄, 𑀪𑁄, 𑀲𑀻𑀮𑀯𑀸 𑀘 𑀳𑁄𑀢𑀺 𑀯𑀢𑀲𑀫𑁆𑀧𑀦𑁆𑀦𑁄 [𑀯𑀢𑁆𑀢𑀲𑀫𑁆𑀧𑀦𑁆𑀦𑁄 (𑀲𑀻. 𑀲𑁆𑀬𑀸. 𑀫. 𑀦𑀺. 𑁨.𑁪𑁫𑁪)] 𑀘, 𑀏𑀢𑁆𑀢𑀸𑀯𑀢𑀸 𑀔𑁄, 𑀪𑁄, 𑀩𑁆𑀭𑀸𑀳𑁆𑀫𑀡𑁄 𑀳𑁄𑀢𑀻’’𑀢𑀺. 𑀦𑁂𑀯 𑀔𑁄 𑀅𑀲𑀓𑁆𑀔𑀺 𑀪𑀸𑀭𑀤𑁆𑀯𑀸𑀚𑁄 𑀫𑀸𑀡𑀯𑁄 𑀯𑀸𑀲𑁂𑀝𑁆𑀞𑀁 𑀫𑀸𑀡𑀯𑀁 𑀲𑀜𑁆𑀜𑀸𑀧𑁂𑀢𑀼𑀁, 𑀦 𑀧𑀦 𑀅𑀲𑀓𑁆𑀔𑀺 𑀯𑀸𑀲𑁂𑀝𑁆𑀞𑁄 𑀫𑀸𑀡𑀯𑁄 𑀪𑀸𑀭𑀤𑁆𑀯𑀸𑀚𑀁 𑀫𑀸𑀡𑀯𑀁 𑀲𑀜𑁆𑀜𑀸𑀧𑁂𑀢𑀼𑀁.

𑀅𑀣 𑀔𑁄 𑀯𑀸𑀲𑁂𑀝𑁆𑀞𑁄 𑀫𑀸𑀡𑀯𑁄 𑀪𑀸𑀭𑀤𑁆𑀯𑀸𑀚𑀁 𑀫𑀸𑀡𑀯𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀔𑁄, 𑀪𑁄 [𑀅𑀬𑀁 𑀪𑁄 (𑀲𑀻. 𑀲𑁆𑀬𑀸. 𑀓.), 𑀅𑀬𑀁 𑀔𑁄 (𑀧𑀻.)] 𑀪𑀸𑀭𑀤𑁆𑀯𑀸𑀚, 𑀲𑀫𑀡𑁄 𑀕𑁄𑀢𑀫𑁄 𑀲𑀓𑁆𑀬𑀧𑀼𑀢𑁆𑀢𑁄 𑀲𑀓𑁆𑀬𑀓𑀼𑀮𑀸 𑀧𑀩𑁆𑀩𑀚𑀺𑀢𑁄 𑀇𑀘𑁆𑀙𑀸𑀦𑀗𑁆𑀕𑀮𑁂 𑀯𑀺𑀳𑀭𑀢𑀺 𑀇𑀘𑁆𑀙𑀸𑀦𑀗𑁆𑀕𑀮𑀯𑀦𑀲𑀡𑁆𑀟𑁂; 𑀢𑀁 𑀔𑁄 𑀧𑀦 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀏𑀯𑀁 𑀓𑀮𑁆𑀬𑀸𑀡𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀢𑁄 𑁋 ‘𑀇𑀢𑀺𑀧𑀺…𑀧𑁂… 𑀩𑀼𑀤𑁆𑀥𑁄 𑀪𑀕𑀯𑀸’𑀢𑀺. 𑀆𑀬𑀸𑀫, 𑀪𑁄 𑀪𑀸𑀭𑀤𑁆𑀯𑀸𑀚, 𑀬𑁂𑀦 𑀲𑀫𑀡𑁄 𑀕𑁄𑀢𑀫𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀲𑁆𑀲𑀸𑀫; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀫𑀡𑀁 𑀕𑁄𑀢𑀫𑀁 𑀏𑀢𑀫𑀢𑁆𑀣𑀁 𑀧𑀼𑀘𑁆𑀙𑀺𑀲𑁆𑀲𑀸𑀫. 𑀬𑀣𑀸 𑀦𑁄 𑀲𑀫𑀡𑁄 𑀕𑁄𑀢𑀫𑁄 𑀩𑁆𑀬𑀸𑀓𑀭𑀺𑀲𑁆𑀲𑀢𑀺 𑀢𑀣𑀸 𑀦𑀁 𑀥𑀸𑀭𑁂𑀲𑁆𑀲𑀸𑀫𑀸’’𑀢𑀺. ‘‘𑀏𑀯𑀁, 𑀪𑁄’’𑀢𑀺 𑀔𑁄 𑀪𑀸𑀭𑀤𑁆𑀯𑀸𑀚𑁄 𑀫𑀸𑀡𑀯𑁄 𑀯𑀸𑀲𑁂𑀝𑁆𑀞𑀲𑁆𑀲 𑀫𑀸𑀡𑀯𑀲𑁆𑀲 𑀧𑀘𑁆𑀘𑀲𑁆𑀲𑁄𑀲𑀺.

𑀅𑀣 𑀔𑁄 𑀯𑀸𑀲𑁂𑀝𑁆𑀞𑀪𑀸𑀭𑀤𑁆𑀯𑀸𑀚𑀸 𑀫𑀸𑀡𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺𑀁𑀲𑀼. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀯𑀸𑀲𑁂𑀝𑁆𑀞𑁄 𑀫𑀸𑀡𑀯𑁄 𑀪𑀕𑀯𑀦𑁆𑀢𑀁 𑀕𑀸𑀣𑀸𑀳𑀺 𑀅𑀚𑁆𑀛𑀪𑀸𑀲𑀺 𑁋

𑁫𑁯𑁯. ‘‘𑀅𑀦𑀼𑀜𑁆𑀜𑀸𑀢𑀧𑀝𑀺𑀜𑁆𑀜𑀸𑀢𑀸, 𑀢𑁂𑀯𑀺𑀚𑁆𑀚𑀸 𑀫𑀬𑀫𑀲𑁆𑀫𑀼𑀪𑁄;

𑀅𑀳𑀁 𑀧𑁄𑀓𑁆𑀔𑀭𑀲𑀸𑀢𑀺𑀲𑁆𑀲, 𑀢𑀸𑀭𑀼𑀓𑁆𑀔𑀲𑁆𑀲𑀸𑀬𑀁 𑀫𑀸𑀡𑀯𑁄.

𑁬𑁦𑁦. ‘‘𑀢𑁂𑀯𑀺𑀚𑁆𑀚𑀸𑀦𑀁 𑀬𑀤𑀓𑁆𑀔𑀸𑀢𑀁, 𑀢𑀢𑁆𑀭 𑀓𑁂𑀯𑀮𑀺𑀦𑁄𑀲𑁆𑀫𑀲𑁂;

𑀧𑀤𑀓𑀲𑁆𑀫 𑀯𑁂𑀬𑁆𑀬𑀸𑀓𑀭𑀡𑀸, 𑀚𑀧𑁆𑀧𑁂 𑀆𑀘𑀭𑀺𑀬𑀲𑀸𑀤𑀺𑀲𑀸.

𑁬𑁦𑁧. ‘‘𑀢𑁂𑀲𑀁 𑀦𑁄 𑀚𑀸𑀢𑀺𑀯𑀸𑀤𑀲𑁆𑀫𑀺𑀁, 𑀯𑀺𑀯𑀸𑀤𑁄 𑀅𑀢𑁆𑀣𑀺 𑀕𑁄𑀢𑀫;

𑀚𑀸𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑁄 𑀳𑁄𑀢𑀺, 𑀪𑀸𑀭𑀤𑁆𑀯𑀸𑀚𑁄 𑀇𑀢𑀺 𑀪𑀸𑀲𑀢𑀺;

𑀅𑀳𑀜𑁆𑀘 𑀓𑀫𑁆𑀫𑀼𑀦𑀸 [𑀓𑀫𑁆𑀫𑀦𑀸 (𑀲𑀻. 𑀧𑀻.) 𑀏𑀯𑀫𑀼𑀧𑀭𑀺𑀧𑀺] 𑀩𑁆𑀭𑀽𑀫𑀺, 𑀏𑀯𑀁 𑀚𑀸𑀦𑀸𑀳𑀺 𑀘𑀓𑁆𑀔𑀼𑀫.

𑁬𑁦𑁨. ‘‘𑀢𑁂 𑀦 𑀲𑀓𑁆𑀓𑁄𑀫 𑀲𑀜𑁆𑀜𑀸𑀧𑁂𑀢𑀼𑀁, 𑀅𑀜𑁆𑀜𑀫𑀜𑁆𑀜𑀁 𑀫𑀬𑀁 𑀉𑀪𑁄;

𑀪𑀯𑀦𑁆𑀢𑀁 [𑀪𑀕𑀯𑀦𑁆𑀢𑀁 (𑀓.)] 𑀧𑀼𑀝𑁆𑀞𑀼𑀫𑀸𑀕𑀫𑁆𑀳𑀸, 𑀲𑀫𑁆𑀩𑀼𑀤𑁆𑀥𑀁 𑀇𑀢𑀺 𑀯𑀺𑀲𑁆𑀲𑀼𑀢𑀁.

𑁬𑁦𑁩. ‘‘𑀘𑀦𑁆𑀤𑀁 𑀬𑀣𑀸 𑀔𑀬𑀸𑀢𑀻𑀢𑀁, 𑀧𑁂𑀘𑁆𑀘 𑀧𑀜𑁆𑀚𑀮𑀺𑀓𑀸 𑀚𑀦𑀸;

𑀯𑀦𑁆𑀤𑀫𑀸𑀦𑀸 𑀦𑀫𑀲𑁆𑀲𑀦𑁆𑀢𑀺, 𑀏𑀯𑀁 𑀮𑁄𑀓𑀲𑁆𑀫𑀺 𑀕𑁄𑀢𑀫𑀁.

𑁬𑁦𑁪. ‘‘𑀘𑀓𑁆𑀔𑀼𑀁 𑀮𑁄𑀓𑁂 𑀲𑀫𑀼𑀧𑁆𑀧𑀦𑁆𑀦𑀁, 𑀫𑀬𑀁 𑀧𑀼𑀘𑁆𑀙𑀸𑀫 𑀕𑁄𑀢𑀫𑀁;

𑀚𑀸𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑁄 𑀳𑁄𑀢𑀺, 𑀉𑀤𑀸𑀳𑀼 𑀪𑀯𑀢𑀺 𑀓𑀫𑁆𑀫𑀼𑀦𑀸;

𑀅𑀚𑀸𑀦𑀢𑀁 𑀦𑁄 𑀧𑀩𑁆𑀭𑀽𑀳𑀺, 𑀬𑀣𑀸 𑀚𑀸𑀦𑁂𑀲𑀼 𑀩𑁆𑀭𑀸𑀳𑁆𑀫𑀡𑀁’’.

𑁬𑁦𑁫. ‘‘𑀢𑁂𑀲𑀁 𑀯𑁄 𑀅𑀳𑀁 𑀩𑁆𑀬𑀓𑁆𑀔𑀺𑀲𑁆𑀲𑀁, (𑀯𑀸𑀲𑁂𑀝𑁆𑀞𑀸𑀢𑀺 𑀪𑀕𑀯𑀸) 𑀅𑀦𑀼𑀧𑀼𑀩𑁆𑀩𑀁 𑀬𑀣𑀸𑀢𑀣𑀁;

𑀚𑀸𑀢𑀺𑀯𑀺𑀪𑀗𑁆𑀕𑀁 𑀧𑀸𑀡𑀸𑀦𑀁, 𑀅𑀜𑁆𑀜𑀫𑀜𑁆𑀜𑀸 𑀳𑀺 𑀚𑀸𑀢𑀺𑀬𑁄.

𑁬𑁦𑁬. ‘‘𑀢𑀺𑀡𑀭𑀼𑀓𑁆𑀔𑁂𑀧𑀺 𑀚𑀸𑀦𑀸𑀣, 𑀦 𑀘𑀸𑀧𑀺 𑀧𑀝𑀺𑀚𑀸𑀦𑀭𑁂;

𑀮𑀺𑀗𑁆𑀕𑀁 𑀚𑀸𑀢𑀺𑀫𑀬𑀁 𑀢𑁂𑀲𑀁, 𑀅𑀜𑁆𑀜𑀫𑀜𑁆𑀜𑀸 𑀳𑀺 𑀚𑀸𑀢𑀺𑀬𑁄.

𑁬𑁦𑁭. ‘‘𑀢𑀢𑁄 𑀓𑀻𑀝𑁂 𑀧𑀝𑀗𑁆𑀕𑁂 𑀘, 𑀬𑀸𑀯 𑀓𑀼𑀦𑁆𑀣𑀓𑀺𑀧𑀺𑀮𑁆𑀮𑀺𑀓𑁂;

𑀮𑀺𑀗𑁆𑀕𑀁 𑀚𑀸𑀢𑀺𑀫𑀬𑀁 𑀢𑁂𑀲𑀁, 𑀅𑀜𑁆𑀜𑀫𑀜𑁆𑀜𑀸 𑀳𑀺 𑀚𑀸𑀢𑀺𑀬𑁄.

𑁬𑁦𑁮. ‘‘𑀘𑀢𑀼𑀧𑁆𑀧𑀤𑁂𑀧𑀺 𑀚𑀸𑀦𑀸𑀣, 𑀔𑀼𑀤𑁆𑀤𑀓𑁂 𑀘 𑀫𑀳𑀮𑁆𑀮𑀓𑁂;

𑀮𑀺𑀗𑁆𑀕𑀁 𑀚𑀸𑀢𑀺𑀫𑀬𑀁 𑀢𑁂𑀲𑀁, 𑀅𑀜𑁆𑀜𑀫𑀜𑁆𑀜𑀸 𑀳𑀺 𑀚𑀸𑀢𑀺𑀬𑁄.

𑁬𑁦𑁯. ‘‘𑀧𑀸𑀤𑀽𑀤𑀭𑁂𑀧𑀺 𑀚𑀸𑀦𑀸𑀣, 𑀉𑀭𑀕𑁂 𑀤𑀻𑀖𑀧𑀺𑀝𑁆𑀞𑀺𑀓𑁂;

𑀮𑀺𑀗𑁆𑀕𑀁 𑀚𑀸𑀢𑀺𑀫𑀬𑀁 𑀢𑁂𑀲𑀁, 𑀅𑀜𑁆𑀜𑀫𑀜𑁆𑀜𑀸 𑀳𑀺 𑀚𑀸𑀢𑀺𑀬𑁄.

𑁬𑁧𑁦. ‘‘𑀢𑀢𑁄 𑀫𑀘𑁆𑀙𑁂𑀧𑀺 𑀚𑀸𑀦𑀸𑀣, 𑀑𑀤𑀓𑁂 𑀯𑀸𑀭𑀺𑀕𑁄𑀘𑀭𑁂;

𑀮𑀺𑀗𑁆𑀕𑀁 𑀚𑀸𑀢𑀺𑀫𑀬𑀁 𑀢𑁂𑀲𑀁, 𑀅𑀜𑁆𑀜𑀫𑀜𑁆𑀜𑀸 𑀳𑀺 𑀚𑀸𑀢𑀺𑀬𑁄.

𑁬𑁧𑁧. ‘‘𑀢𑀢𑁄 𑀧𑀓𑁆𑀔𑀻𑀧𑀺 𑀚𑀸𑀦𑀸𑀣, 𑀧𑀢𑁆𑀢𑀬𑀸𑀦𑁂 𑀯𑀺𑀳𑀗𑁆𑀕𑀫𑁂;

𑀮𑀺𑀗𑁆𑀕𑀁 𑀚𑀸𑀢𑀺𑀫𑀬𑀁 𑀢𑁂𑀲𑀁, 𑀅𑀜𑁆𑀜𑀫𑀜𑁆𑀜𑀸 𑀳𑀺 𑀚𑀸𑀢𑀺𑀬𑁄.

𑁬𑁧𑁨. ‘‘𑀬𑀣𑀸 𑀏𑀢𑀸𑀲𑀼 𑀚𑀸𑀢𑀻𑀲𑀼, 𑀮𑀺𑀗𑁆𑀕𑀁 𑀚𑀸𑀢𑀺𑀫𑀬𑀁 𑀧𑀼𑀣𑀼;

𑀏𑀯𑀁 𑀦𑀢𑁆𑀣𑀺 𑀫𑀦𑀼𑀲𑁆𑀲𑁂𑀲𑀼, 𑀮𑀺𑀗𑁆𑀕𑀁 𑀚𑀸𑀢𑀺𑀫𑀬𑀁 𑀧𑀼𑀣𑀼.

𑁬𑁧𑁩. ‘‘𑀦 𑀓𑁂𑀲𑁂𑀳𑀺 𑀦 𑀲𑀻𑀲𑁂𑀦, 𑀦 𑀓𑀡𑁆𑀡𑁂𑀳𑀺 𑀦 𑀅𑀓𑁆𑀔𑀺𑀪𑀺;

𑀦 𑀫𑀼𑀔𑁂𑀦 𑀦 𑀦𑀸𑀲𑀸𑀬, 𑀦 𑀑𑀝𑁆𑀞𑁂𑀳𑀺 𑀪𑀫𑀽𑀳𑀺 𑀯𑀸.

𑁬𑁧𑁪. ‘‘𑀦 𑀕𑀻𑀯𑀸𑀬 𑀦 𑀅𑀁𑀲𑁂𑀳𑀺, 𑀦 𑀉𑀤𑀭𑁂𑀦 𑀦 𑀧𑀺𑀝𑁆𑀞𑀺𑀬𑀸;

𑀦 𑀲𑁄𑀡𑀺𑀬𑀸 𑀦 𑀉𑀭𑀲𑀸, 𑀦 𑀲𑀫𑁆𑀩𑀸𑀥𑁂 𑀦 𑀫𑁂𑀣𑀼𑀦𑁂 [𑀦 𑀲𑀫𑁆𑀩𑀸𑀥𑀸 𑀦 𑀫𑁂𑀣𑀼𑀦𑀸 (𑀲𑁆𑀬𑀸. 𑀓.)].

𑁬𑁧𑁫. ‘‘𑀦 𑀳𑀢𑁆𑀣𑁂𑀳𑀺 𑀦 𑀧𑀸𑀤𑁂𑀳𑀺, 𑀦𑀸𑀗𑁆𑀕𑀼𑀮𑀻𑀳𑀺 𑀦𑀔𑁂𑀳𑀺 𑀯𑀸;

𑀦 𑀚𑀗𑁆𑀖𑀸𑀳𑀺 𑀦 𑀊𑀭𑀽𑀳𑀺, 𑀦 𑀯𑀡𑁆𑀡𑁂𑀦 𑀲𑀭𑁂𑀦 𑀯𑀸;

𑀮𑀺𑀗𑁆𑀕𑀁 𑀚𑀸𑀢𑀺𑀫𑀬𑀁 𑀦𑁂𑀯, 𑀬𑀣𑀸 𑀅𑀜𑁆𑀜𑀸𑀲𑀼 𑀚𑀸𑀢𑀺𑀲𑀼.

𑁬𑁧𑁬. ‘‘𑀧𑀘𑁆𑀘𑀢𑁆𑀢𑀜𑁆𑀘 𑀲𑀭𑀻𑀭𑁂𑀲𑀼 [𑀧𑀘𑁆𑀘𑀢𑁆𑀢𑀁 𑀲𑀲𑀭𑀻𑀭𑁂𑀲𑀼 (𑀲𑀻. 𑀧𑀻.)], 𑀫𑀦𑀼𑀲𑁆𑀲𑁂𑀲𑁆𑀯𑁂𑀢𑀁 𑀦 𑀯𑀺𑀚𑁆𑀚𑀢𑀺;

𑀯𑁄𑀓𑀸𑀭𑀜𑁆𑀘 𑀫𑀦𑀼𑀲𑁆𑀲𑁂𑀲𑀼, 𑀲𑀫𑀜𑁆𑀜𑀸𑀬 𑀧𑀯𑀼𑀘𑁆𑀘𑀢𑀺.

𑁬𑁧𑁭. ‘‘𑀬𑁄 𑀳𑀺 𑀓𑁄𑀘𑀺 𑀫𑀦𑀼𑀲𑁆𑀲𑁂𑀲𑀼, 𑀕𑁄𑀭𑀓𑁆𑀔𑀁 𑀉𑀧𑀚𑀻𑀯𑀢𑀺;

𑀏𑀯𑀁 𑀯𑀸𑀲𑁂𑀝𑁆𑀞 𑀚𑀸𑀦𑀸𑀳𑀺, 𑀓𑀲𑁆𑀲𑀓𑁄 𑀲𑁄 𑀦 𑀩𑁆𑀭𑀸𑀳𑁆𑀫𑀡𑁄.

𑁬𑁧𑁮. ‘‘𑀬𑁄 𑀳𑀺 𑀓𑁄𑀘𑀺 𑀫𑀦𑀼𑀲𑁆𑀲𑁂𑀲𑀼, 𑀧𑀼𑀣𑀼𑀲𑀺𑀧𑁆𑀧𑁂𑀦 𑀚𑀻𑀯𑀢𑀺;

𑀏𑀯𑀁 𑀯𑀸𑀲𑁂𑀝𑁆𑀞 𑀚𑀸𑀦𑀸𑀳𑀺, 𑀲𑀺𑀧𑁆𑀧𑀺𑀓𑁄 𑀲𑁄 𑀦 𑀩𑁆𑀭𑀸𑀳𑁆𑀫𑀡𑁄.

𑁬𑁧𑁯. ‘‘𑀬𑁄 𑀳𑀺 𑀓𑁄𑀘𑀺 𑀫𑀦𑀼𑀲𑁆𑀲𑁂𑀲𑀼, 𑀯𑁄𑀳𑀸𑀭𑀁 𑀉𑀧𑀚𑀻𑀯𑀢𑀺;

𑀏𑀯𑀁 𑀯𑀸𑀲𑁂𑀝𑁆𑀞 𑀚𑀸𑀦𑀸𑀳𑀺, 𑀯𑀸𑀡𑀺𑀚𑁄 𑀲𑁄 𑀦 𑀩𑁆𑀭𑀸𑀳𑁆𑀫𑀡𑁄.

𑁬𑁨𑁦. ‘‘𑀬𑁄 𑀳𑀺 𑀓𑁄𑀘𑀺 𑀫𑀦𑀼𑀲𑁆𑀲𑁂𑀲𑀼, 𑀧𑀭𑀧𑁂𑀲𑁆𑀲𑁂𑀦 𑀚𑀻𑀯𑀢𑀺;

𑀏𑀯𑀁 𑀯𑀸𑀲𑁂𑀝𑁆𑀞 𑀚𑀸𑀦𑀸𑀳𑀺, 𑀧𑁂𑀲𑁆𑀲𑀺𑀓𑁄 [𑀧𑁂𑀲𑁆𑀲𑀓𑁄 (𑀓.)] 𑀲𑁄 𑀦 𑀩𑁆𑀭𑀸𑀳𑁆𑀫𑀡𑁄.

𑁬𑁨𑁧. ‘‘𑀬𑁄 𑀳𑀺 𑀓𑁄𑀘𑀺 𑀫𑀦𑀼𑀲𑁆𑀲𑁂𑀲𑀼, 𑀅𑀤𑀺𑀦𑁆𑀦𑀁 𑀉𑀧𑀚𑀻𑀯𑀢𑀺;

𑀏𑀯𑀁 𑀯𑀸𑀲𑁂𑀝𑁆𑀞 𑀚𑀸𑀦𑀸𑀳𑀺, 𑀘𑁄𑀭𑁄 𑀏𑀲𑁄 𑀦 𑀩𑁆𑀭𑀸𑀳𑁆𑀫𑀡𑁄.

𑁬𑁨𑁨. ‘‘𑀬𑁄 𑀳𑀺 𑀓𑁄𑀘𑀺 𑀫𑀦𑀼𑀲𑁆𑀲𑁂𑀲𑀼, 𑀇𑀲𑁆𑀲𑀢𑁆𑀣𑀁 𑀉𑀧𑀚𑀻𑀯𑀢𑀺;

𑀏𑀯𑀁 𑀯𑀸𑀲𑁂𑀝𑁆𑀞 𑀚𑀸𑀦𑀸𑀳𑀺, 𑀬𑁄𑀥𑀸𑀚𑀻𑀯𑁄 𑀦 𑀩𑁆𑀭𑀸𑀳𑁆𑀫𑀡𑁄.

𑁬𑁨𑁩. ‘‘𑀬𑁄 𑀳𑀺 𑀓𑁄𑀘𑀺 𑀫𑀦𑀼𑀲𑁆𑀲𑁂𑀲𑀼, 𑀧𑁄𑀭𑁄𑀳𑀺𑀘𑁆𑀘𑁂𑀦 𑀚𑀻𑀯𑀢𑀺;

𑀏𑀯𑀁 𑀯𑀸𑀲𑁂𑀝𑁆𑀞 𑀚𑀸𑀦𑀸𑀳𑀺, 𑀬𑀸𑀚𑀓𑁄 𑀏𑀲𑁄 𑀦 𑀩𑁆𑀭𑀸𑀳𑁆𑀫𑀡𑁄.

𑁬𑁨𑁪. ‘‘𑀬𑁄 𑀳𑀺 𑀓𑁄𑀘𑀺 𑀫𑀦𑀼𑀲𑁆𑀲𑁂𑀲𑀼, 𑀕𑀸𑀫𑀁 𑀭𑀝𑁆𑀞𑀜𑁆𑀘 𑀪𑀼𑀜𑁆𑀚𑀢𑀺;

𑀏𑀯𑀁 𑀯𑀸𑀲𑁂𑀝𑁆𑀞 𑀚𑀸𑀦𑀸𑀳𑀺, 𑀭𑀸𑀚𑀸 𑀏𑀲𑁄 𑀦 𑀩𑁆𑀭𑀸𑀳𑁆𑀫𑀡𑁄.

𑁬𑁨𑁫. ‘‘𑀦 𑀘𑀸𑀳𑀁 𑀩𑁆𑀭𑀸𑀳𑁆𑀫𑀡𑀁 𑀩𑁆𑀭𑀽𑀫𑀺, 𑀬𑁄𑀦𑀺𑀚𑀁 𑀫𑀢𑁆𑀢𑀺𑀲𑀫𑁆𑀪𑀯𑀁;

𑀪𑁄𑀯𑀸𑀤𑀺 𑀦𑀸𑀫 𑀲𑁄 𑀳𑁄𑀢𑀺, 𑀲𑀘𑁂 [𑀲 𑀯𑁂 (𑀲𑀻. 𑀲𑁆𑀬𑀸.)] 𑀳𑁄𑀢𑀺 𑀲𑀓𑀺𑀜𑁆𑀘𑀦𑁄;

𑀅𑀓𑀺𑀜𑁆𑀘𑀦𑀁 𑀅𑀦𑀸𑀤𑀸𑀦𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡𑀁.

𑁬𑁨𑁬. ‘‘𑀲𑀩𑁆𑀩𑀲𑀁𑀬𑁄𑀚𑀦𑀁 𑀙𑁂𑀢𑁆𑀯𑀸, 𑀲𑁄 𑀯𑁂 𑀦 𑀧𑀭𑀺𑀢𑀲𑁆𑀲𑀢𑀺;

𑀲𑀗𑁆𑀕𑀸𑀢𑀺𑀕𑀁 𑀯𑀺𑀲𑀁𑀬𑀼𑀢𑁆𑀢𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡𑀁.

𑁬𑁨𑁭. ‘‘𑀙𑁂𑀢𑁆𑀯𑀸 𑀦𑀤𑁆𑀥𑀺𑀁 𑀯𑀭𑀢𑁆𑀢𑀜𑁆𑀘, 𑀲𑀦𑁆𑀤𑀸𑀦𑀁 𑀲𑀳𑀦𑀼𑀓𑁆𑀓𑀫𑀁;

𑀉𑀓𑁆𑀔𑀺𑀢𑁆𑀢𑀧𑀮𑀺𑀖𑀁 𑀩𑀼𑀤𑁆𑀥𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡𑀁.

𑁬𑁨𑁮. ‘‘𑀅𑀓𑁆𑀓𑁄𑀲𑀁 𑀯𑀥𑀩𑀦𑁆𑀥𑀜𑁆𑀘, 𑀅𑀤𑀼𑀝𑁆𑀞𑁄 𑀬𑁄 𑀢𑀺𑀢𑀺𑀓𑁆𑀔𑀢𑀺;

𑀔𑀦𑁆𑀢𑀻𑀩𑀮𑀁 𑀩𑀮𑀸𑀦𑀻𑀓𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡𑀁.

𑁬𑁨𑁯. ‘‘𑀅𑀓𑁆𑀓𑁄𑀥𑀦𑀁 𑀯𑀢𑀯𑀦𑁆𑀢𑀁, 𑀲𑀻𑀮𑀯𑀦𑁆𑀢𑀁 𑀅𑀦𑀼𑀲𑁆𑀲𑀤𑀁;

𑀤𑀦𑁆𑀢𑀁 𑀅𑀦𑁆𑀢𑀺𑀫𑀲𑀸𑀭𑀻𑀭𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡𑀁.

𑁬𑁩𑁦. ‘‘𑀯𑀸𑀭𑀺 𑀧𑁄𑀓𑁆𑀔𑀭𑀧𑀢𑁆𑀢𑁂𑀯, 𑀆𑀭𑀕𑁆𑀕𑁂𑀭𑀺𑀯 𑀲𑀸𑀲𑀧𑁄;

𑀬𑁄 𑀦 𑀮𑀺𑀫𑁆𑀧𑀢𑀺 𑀓𑀸𑀫𑁂𑀲𑀼, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡𑀁.

𑁬𑁩𑁧. ‘‘𑀬𑁄 𑀤𑀼𑀓𑁆𑀔𑀲𑁆𑀲 𑀧𑀚𑀸𑀦𑀸𑀢𑀺, 𑀇𑀥𑁂𑀯 𑀔𑀬𑀫𑀢𑁆𑀢𑀦𑁄;

𑀧𑀦𑁆𑀦𑀪𑀸𑀭𑀁 𑀯𑀺𑀲𑀁𑀬𑀼𑀢𑁆𑀢𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡𑀁.

𑁬𑁩𑁨. ‘‘𑀕𑀫𑁆𑀪𑀻𑀭𑀧𑀜𑁆𑀜𑀁 𑀫𑁂𑀥𑀸𑀯𑀺𑀁, 𑀫𑀕𑁆𑀕𑀸𑀫𑀕𑁆𑀕𑀲𑁆𑀲 𑀓𑁄𑀯𑀺𑀤𑀁;

𑀉𑀢𑁆𑀢𑀫𑀢𑁆𑀣𑀫𑀦𑀼𑀧𑁆𑀧𑀢𑁆𑀢𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡𑀁.

𑁬𑁩𑁩. ‘‘𑀅𑀲𑀁𑀲𑀝𑁆𑀞𑀁 𑀕𑀳𑀝𑁆𑀞𑁂𑀳𑀺, 𑀅𑀦𑀸𑀕𑀸𑀭𑁂𑀳𑀺 𑀘𑀽𑀪𑀬𑀁;

𑀅𑀦𑁄𑀓𑀲𑀸𑀭𑀺𑀫𑀧𑁆𑀧𑀺𑀘𑁆𑀙𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡𑀁.

𑁬𑁩𑁪. ‘‘𑀦𑀺𑀥𑀸𑀬 𑀤𑀡𑁆𑀟𑀁 𑀪𑀽𑀢𑁂𑀲𑀼, 𑀢𑀲𑁂𑀲𑀼 𑀣𑀸𑀯𑀭𑁂𑀲𑀼 𑀘;

𑀬𑁄 𑀦 𑀳𑀦𑁆𑀢𑀺 𑀦 𑀖𑀸𑀢𑁂𑀢𑀺, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡𑀁.

𑁬𑁩𑁫. ‘‘𑀅𑀯𑀺𑀭𑀼𑀤𑁆𑀥𑀁 𑀯𑀺𑀭𑀼𑀤𑁆𑀥𑁂𑀲𑀼, 𑀅𑀢𑁆𑀢𑀤𑀡𑁆𑀟𑁂𑀲𑀼 𑀦𑀺𑀩𑁆𑀩𑀼𑀢𑀁;

𑀲𑀸𑀤𑀸𑀦𑁂𑀲𑀼 𑀅𑀦𑀸𑀤𑀸𑀦𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡𑀁.

𑁬𑁩𑁬. ‘‘𑀬𑀲𑁆𑀲 𑀭𑀸𑀕𑁄 𑀘 𑀤𑁄𑀲𑁄 𑀘, 𑀫𑀸𑀦𑁄 𑀫𑀓𑁆𑀔𑁄 𑀘 𑀧𑀸𑀢𑀺𑀢𑁄;

𑀲𑀸𑀲𑀧𑁄𑀭𑀺𑀯 𑀆𑀭𑀕𑁆𑀕𑀸, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡𑀁.

𑁬𑁩𑁭. ‘‘𑀅𑀓𑀓𑁆𑀓𑀲𑀁 𑀯𑀺𑀜𑁆𑀜𑀸𑀧𑀦𑀺𑀁, 𑀕𑀺𑀭𑀁 𑀲𑀘𑁆𑀘𑀫𑀼𑀤𑀻𑀭𑀬𑁂;

𑀬𑀸𑀬 𑀦𑀸𑀪𑀺𑀲𑀚𑁂 𑀓𑀜𑁆𑀘𑀺, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡𑀁.

𑁬𑁩𑁮. ‘‘𑀬𑁄𑀥 𑀤𑀻𑀖𑀁 𑀯 𑀭𑀲𑁆𑀲𑀁 𑀯𑀸, 𑀅𑀡𑀼𑀁 𑀣𑀽𑀮𑀁 𑀲𑀼𑀪𑀸𑀲𑀼𑀪𑀁;

𑀮𑁄𑀓𑁂 𑀅𑀤𑀺𑀦𑁆𑀦𑀁 𑀦𑀸𑀤𑀺𑀬𑀢𑀺, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡𑀁.

𑁬𑁩𑁯. ‘‘𑀆𑀲𑀸 𑀬𑀲𑁆𑀲 𑀦 𑀯𑀺𑀚𑁆𑀚𑀦𑁆𑀢𑀺, 𑀅𑀲𑁆𑀫𑀺𑀁 𑀮𑁄𑀓𑁂 𑀧𑀭𑀫𑁆𑀳𑀺 𑀘;

𑀦𑀺𑀭𑀸𑀲𑀸𑀲𑀁 [𑀦𑀺𑀭𑀸𑀲𑀬𑀁 (𑀲𑀻. 𑀲𑁆𑀬𑀸. 𑀧𑀻.), 𑀦𑀺𑀭𑀸𑀲𑀓𑀁 (?)] 𑀯𑀺𑀲𑀁𑀬𑀼𑀢𑁆𑀢𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡𑀁.

𑁬𑁪𑁦. ‘‘𑀬𑀲𑁆𑀲𑀸𑀮𑀬𑀸 𑀦 𑀯𑀺𑀚𑁆𑀚𑀦𑁆𑀢𑀺, 𑀅𑀜𑁆𑀜𑀸𑀬 𑀅𑀓𑀣𑀁𑀓𑀣𑀻;

𑀅𑀫𑀢𑁄𑀕𑀥𑀫𑀦𑀼𑀧𑁆𑀧𑀢𑁆𑀢𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡𑀁.

𑁬𑁪𑁧. ‘‘𑀬𑁄𑀥 𑀧𑀼𑀜𑁆𑀜𑀜𑁆𑀘 𑀧𑀸𑀧𑀜𑁆𑀘, 𑀉𑀪𑁄 𑀲𑀗𑁆𑀕𑀫𑀼𑀧𑀘𑁆𑀘𑀕𑀸;

𑀅𑀲𑁄𑀓𑀁 𑀯𑀺𑀭𑀚𑀁 𑀲𑀼𑀤𑁆𑀥𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡𑀁.

𑁬𑁪𑁨. ‘‘𑀘𑀦𑁆𑀤𑀁𑀯 𑀯𑀺𑀫𑀮𑀁 𑀲𑀼𑀤𑁆𑀥𑀁, 𑀯𑀺𑀧𑁆𑀧𑀲𑀦𑁆𑀦𑀫𑀦𑀸𑀯𑀺𑀮𑀁;

𑀦𑀦𑁆𑀤𑀻𑀪𑀯𑀧𑀭𑀺𑀓𑁆𑀔𑀻𑀡𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡𑀁.

𑁬𑁪𑁩. ‘‘𑀬𑁄𑀫𑀁 𑀧𑀮𑀺𑀧𑀣𑀁 𑀤𑀼𑀕𑁆𑀕𑀁, 𑀲𑀁𑀲𑀸𑀭𑀁 𑀫𑁄𑀳𑀫𑀘𑁆𑀘𑀕𑀸;

𑀢𑀺𑀡𑁆𑀡𑁄 𑀧𑀸𑀭𑀗𑁆𑀕𑀢𑁄 𑀛𑀸𑀬𑀻, 𑀅𑀦𑁂𑀚𑁄 𑀅𑀓𑀣𑀁𑀓𑀣𑀻;

𑀅𑀦𑀼𑀧𑀸𑀤𑀸𑀬 𑀦𑀺𑀩𑁆𑀩𑀼𑀢𑁄, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡𑀁.

𑁬𑁪𑁪. ‘‘𑀬𑁄𑀥 𑀓𑀸𑀫𑁂 𑀧𑀳𑀦𑁆𑀢𑁆𑀯𑀸𑀦, 𑀅𑀦𑀸𑀕𑀸𑀭𑁄 𑀧𑀭𑀺𑀩𑁆𑀩𑀚𑁂;

𑀓𑀸𑀫𑀪𑀯𑀧𑀭𑀺𑀓𑁆𑀔𑀻𑀡𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡𑀁.

𑁬𑁪𑁫. ‘‘𑀬𑁄𑀥 𑀢𑀡𑁆𑀳𑀁 𑀧𑀳𑀦𑁆𑀢𑁆𑀯𑀸𑀦, 𑀅𑀦𑀸𑀕𑀸𑀭𑁄 𑀧𑀭𑀺𑀩𑁆𑀩𑀚𑁂;

𑀢𑀡𑁆𑀳𑀸𑀪𑀯𑀧𑀭𑀺𑀓𑁆𑀔𑀻𑀡𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡𑀁.

𑁬𑁪𑁬. ‘‘𑀳𑀺𑀢𑁆𑀯𑀸 𑀫𑀸𑀦𑀼𑀲𑀓𑀁 𑀬𑁄𑀕𑀁, 𑀤𑀺𑀩𑁆𑀩𑀁 𑀬𑁄𑀕𑀁 𑀉𑀧𑀘𑁆𑀘𑀕𑀸;

𑀲𑀩𑁆𑀩𑀬𑁄𑀕𑀯𑀺𑀲𑀁𑀬𑀼𑀢𑁆𑀢𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡𑀁.

𑁬𑁪𑁭. ‘‘𑀳𑀺𑀢𑁆𑀯𑀸 𑀭𑀢𑀺𑀜𑁆𑀘 𑀅𑀭𑀢𑀺𑀁, 𑀲𑀻𑀢𑀺𑀪𑀽𑀢𑀁 𑀦𑀺𑀭𑀽𑀧𑀥𑀺𑀁;

𑀲𑀩𑁆𑀩𑀮𑁄𑀓𑀸𑀪𑀺𑀪𑀼𑀁 𑀯𑀻𑀭𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡𑀁.

𑁬𑁪𑁮. ‘‘𑀘𑀼𑀢𑀺𑀁 𑀬𑁄 𑀯𑁂𑀤𑀺 [𑀬𑁄’𑀯𑁂𑀢𑀺 (?) 𑀇𑀢𑀺𑀯𑀼𑀢𑁆𑀢𑀓𑁂 𑁯𑁯 𑀅𑀝𑁆𑀞𑀓𑀣𑀸𑀲𑀁𑀯𑀡𑀦𑀸 𑀧𑀲𑁆𑀲𑀺𑀢𑀩𑁆𑀩𑀸] 𑀢𑁆𑀢𑀸𑀦𑀁, 𑀉𑀧𑀧𑀢𑁆𑀢𑀺𑀜𑁆𑀘 𑀲𑀩𑁆𑀩𑀲𑁄;

𑀅𑀲𑀢𑁆𑀢𑀁 𑀲𑀼𑀕𑀢𑀁 𑀩𑀼𑀤𑁆𑀥𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡𑀁.

𑁬𑁪𑁯. ‘‘𑀬𑀲𑁆𑀲 𑀕𑀢𑀺𑀁 𑀦 𑀚𑀸𑀦𑀦𑁆𑀢𑀺, 𑀤𑁂𑀯𑀸 𑀕𑀦𑁆𑀥𑀩𑁆𑀩𑀫𑀸𑀦𑀼𑀲𑀸;

𑀔𑀻𑀡𑀸𑀲𑀯𑀁 𑀅𑀭𑀳𑀦𑁆𑀢𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡𑀁.

𑁬𑁫𑁦. ‘‘𑀬𑀲𑁆𑀲 𑀧𑀼𑀭𑁂 𑀘 𑀧𑀘𑁆𑀙𑀸 𑀘, 𑀫𑀚𑁆𑀛𑁂 𑀘 𑀦𑀢𑁆𑀣𑀺 𑀓𑀺𑀜𑁆𑀘𑀦𑀁;

𑀅𑀓𑀺𑀜𑁆𑀘𑀦𑀁 𑀅𑀦𑀸𑀤𑀸𑀦𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡𑀁.

𑁬𑁫𑁧. ‘‘𑀉𑀲𑀪𑀁 𑀧𑀯𑀭𑀁 𑀯𑀻𑀭𑀁, 𑀫𑀳𑁂𑀲𑀺𑀁 𑀯𑀺𑀚𑀺𑀢𑀸𑀯𑀺𑀦𑀁;

𑀅𑀦𑁂𑀚𑀁 𑀦𑁆𑀳𑀸𑀢𑀓𑀁 𑀩𑀼𑀤𑁆𑀥𑀁, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡𑀁.

𑁬𑁫𑁨. ‘‘𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀬𑁄 𑀯𑁂𑀤𑀺 [𑀬𑁄’𑀯𑁂𑀢𑀺 (?) 𑀇𑀢𑀺𑀯𑀼𑀢𑁆𑀢𑀓𑁂 𑁯𑁯 𑀅𑀝𑁆𑀞𑀓𑀣𑀸𑀲𑀁𑀯𑀡𑀦𑀸 𑀧𑀲𑁆𑀲𑀺𑀢𑀩𑁆𑀩𑀸], 𑀲𑀕𑁆𑀕𑀸𑀧𑀸𑀬𑀜𑁆𑀘 𑀧𑀲𑁆𑀲𑀢𑀺;

𑀅𑀣𑁄 𑀚𑀸𑀢𑀺𑀓𑁆𑀔𑀬𑀁 𑀧𑀢𑁆𑀢𑁄, 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡𑀁.

𑁬𑁫𑁩. ‘‘𑀲𑀫𑀜𑁆𑀜𑀸 𑀳𑁂𑀲𑀸 𑀮𑁄𑀓𑀲𑁆𑀫𑀺𑀁, 𑀦𑀸𑀫𑀕𑁄𑀢𑁆𑀢𑀁 𑀧𑀓𑀧𑁆𑀧𑀺𑀢𑀁;

𑀲𑀫𑁆𑀫𑀼𑀘𑁆𑀘𑀸 𑀲𑀫𑀼𑀤𑀸𑀕𑀢𑀁, 𑀢𑀢𑁆𑀣 𑀢𑀢𑁆𑀣 𑀧𑀓𑀧𑁆𑀧𑀺𑀢𑀁.

𑁬𑁫𑁪. ‘‘𑀤𑀻𑀖𑀭𑀢𑁆𑀢𑀫𑀦𑀼𑀲𑀬𑀺𑀢𑀁, 𑀤𑀺𑀝𑁆𑀞𑀺𑀕𑀢𑀫𑀚𑀸𑀦𑀢𑀁;

𑀅𑀚𑀸𑀦𑀦𑁆𑀢𑀸 𑀦𑁄 [𑀅𑀚𑀸𑀦𑀦𑁆𑀢𑀸 𑀢𑁂 (𑀅𑀝𑁆𑀞.) 𑀫. 𑀦𑀺. 𑁨.𑁪𑁬𑁦] 𑀧𑀩𑁆𑀭𑀼𑀯𑀦𑁆𑀢𑀺, 𑀚𑀸𑀢𑀺𑀬𑀸 𑀳𑁄𑀢𑀺 𑀩𑁆𑀭𑀸𑀳𑁆𑀫𑀡𑁄.

𑁬𑁫𑁫. ‘‘𑀦 𑀚𑀘𑁆𑀘𑀸 𑀩𑁆𑀭𑀸𑀳𑁆𑀫𑀡𑁄 𑀳𑁄𑀢𑀺, 𑀦 𑀚𑀘𑁆𑀘𑀸 𑀳𑁄𑀢𑀺 𑀅𑀩𑁆𑀭𑀸𑀳𑁆𑀫𑀡𑁄;

𑀓𑀫𑁆𑀫𑀼𑀦𑀸 𑀩𑁆𑀭𑀸𑀳𑁆𑀫𑀡𑁄 𑀳𑁄𑀢𑀺, 𑀓𑀫𑁆𑀫𑀼𑀦𑀸 𑀳𑁄𑀢𑀺 𑀅𑀩𑁆𑀭𑀸𑀳𑁆𑀫𑀡𑁄.

𑁬𑁫𑁬. ‘‘𑀓𑀲𑁆𑀲𑀓𑁄 𑀓𑀫𑁆𑀫𑀼𑀦𑀸 𑀳𑁄𑀢𑀺, 𑀲𑀺𑀧𑁆𑀧𑀺𑀓𑁄 𑀳𑁄𑀢𑀺 𑀓𑀫𑁆𑀫𑀼𑀦𑀸;

𑀯𑀸𑀡𑀺𑀚𑁄 𑀓𑀫𑁆𑀫𑀼𑀦𑀸 𑀳𑁄𑀢𑀺, 𑀧𑁂𑀲𑁆𑀲𑀺𑀓𑁄 𑀳𑁄𑀢𑀺 𑀓𑀫𑁆𑀫𑀼𑀦𑀸.

𑁬𑁫𑁭. ‘‘𑀘𑁄𑀭𑁄𑀧𑀺 𑀓𑀫𑁆𑀫𑀼𑀦𑀸 𑀳𑁄𑀢𑀺, 𑀬𑁄𑀥𑀸𑀚𑀻𑀯𑁄𑀧𑀺 𑀓𑀫𑁆𑀫𑀼𑀦𑀸;

𑀬𑀸𑀚𑀓𑁄 𑀓𑀫𑁆𑀫𑀼𑀦𑀸 𑀳𑁄𑀢𑀺, 𑀭𑀸𑀚𑀸𑀧𑀺 𑀳𑁄𑀢𑀺 𑀓𑀫𑁆𑀫𑀼𑀦𑀸.

𑁬𑁫𑁮. ‘‘𑀏𑀯𑀫𑁂𑀢𑀁 𑀬𑀣𑀸𑀪𑀽𑀢𑀁, 𑀓𑀫𑁆𑀫𑀁 𑀧𑀲𑁆𑀲𑀦𑁆𑀢𑀺 𑀧𑀡𑁆𑀟𑀺𑀢𑀸;

𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀤𑀲𑁆𑀲𑀸, 𑀓𑀫𑁆𑀫𑀯𑀺𑀧𑀸𑀓𑀓𑁄𑀯𑀺𑀤𑀸.

𑁬𑁫𑁯. ‘‘𑀓𑀫𑁆𑀫𑀼𑀦𑀸 𑀯𑀢𑁆𑀢𑀢𑀺 𑀮𑁄𑀓𑁄, 𑀓𑀫𑁆𑀫𑀼𑀦𑀸 𑀯𑀢𑁆𑀢𑀢𑀺 𑀧𑀚𑀸;

𑀓𑀫𑁆𑀫𑀦𑀺𑀩𑀦𑁆𑀥𑀦𑀸 𑀲𑀢𑁆𑀢𑀸, 𑀭𑀣𑀲𑁆𑀲𑀸𑀡𑀻𑀯 𑀬𑀸𑀬𑀢𑁄.

𑁬𑁬𑁦. ‘‘𑀢𑀧𑁂𑀦 𑀩𑁆𑀭𑀳𑁆𑀫𑀘𑀭𑀺𑀬𑁂𑀦, 𑀲𑀁𑀬𑀫𑁂𑀦 𑀤𑀫𑁂𑀦 𑀘;

𑀏𑀢𑁂𑀦 𑀩𑁆𑀭𑀸𑀳𑁆𑀫𑀡𑁄 𑀳𑁄𑀢𑀺, 𑀏𑀢𑀁 𑀩𑁆𑀭𑀸𑀳𑁆𑀫𑀡𑀫𑀼𑀢𑁆𑀢𑀫𑀁.

𑁬𑁬𑁧. ‘‘𑀢𑀻𑀳𑀺 𑀯𑀺𑀚𑁆𑀚𑀸𑀳𑀺 𑀲𑀫𑁆𑀧𑀦𑁆𑀦𑁄, 𑀲𑀦𑁆𑀢𑁄 𑀔𑀻𑀡𑀧𑀼𑀦𑀩𑁆𑀪𑀯𑁄;

𑀏𑀯𑀁 𑀯𑀸𑀲𑁂𑀝𑁆𑀞 𑀚𑀸𑀦𑀸𑀳𑀺, 𑀩𑁆𑀭𑀳𑁆𑀫𑀸 𑀲𑀓𑁆𑀓𑁄 𑀯𑀺𑀚𑀸𑀦𑀢’’𑀦𑁆𑀢𑀺.

𑀏𑀯𑀁 𑀯𑀼𑀢𑁆𑀢𑁂, 𑀯𑀸𑀲𑁂𑀝𑁆𑀞𑀪𑀸𑀭𑀤𑁆𑀯𑀸𑀚𑀸 𑀫𑀸𑀡𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫…𑀧𑁂… 𑀉𑀧𑀸𑀲𑀓𑁂 𑀦𑁄 𑀪𑀯𑀁 𑀕𑁄𑀢𑀫𑁄 𑀥𑀸𑀭𑁂𑀢𑀼 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑀼𑀧𑁂𑀢𑁂 [𑀧𑀸𑀡𑀼𑀧𑁂𑀢𑀁 (𑀓.)] 𑀲𑀭𑀡𑀁 𑀕𑀢𑁂’’𑀢𑀺.

𑀯𑀸𑀲𑁂𑀝𑁆𑀞𑀲𑀼𑀢𑁆𑀢𑀁 𑀦𑀯𑀫𑀁 𑀦𑀺𑀝𑁆𑀞𑀺𑀢𑀁.