𑁧𑁦. 𑀓𑁄𑀓𑀸𑀮𑀺𑀓𑀲𑀼𑀢𑁆𑀢𑀁

𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀅𑀣 𑀔𑁄 𑀓𑁄𑀓𑀸𑀮𑀺𑀓𑁄 𑀪𑀺𑀓𑁆𑀔𑀼 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀓𑁄𑀓𑀸𑀮𑀺𑀓𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀧𑀸𑀧𑀺𑀘𑁆𑀙𑀸, 𑀪𑀦𑁆𑀢𑁂, 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸, 𑀧𑀸𑀧𑀺𑀓𑀸𑀦𑀁 𑀇𑀘𑁆𑀙𑀸𑀦𑀁 𑀯𑀲𑀁 𑀕𑀢𑀸’’𑀢𑀺.

𑀏𑀯𑀁 𑀯𑀼𑀢𑁆𑀢𑁂, 𑀪𑀕𑀯𑀸 𑀓𑁄𑀓𑀸𑀮𑀺𑀓𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘 𑁋 ‘‘𑀫𑀸 𑀳𑁂𑀯𑀁, 𑀓𑁄𑀓𑀸𑀮𑀺𑀓, 𑀫𑀸 𑀳𑁂𑀯𑀁, 𑀓𑁄𑀓𑀸𑀮𑀺𑀓! 𑀧𑀲𑀸𑀤𑁂𑀳𑀺, 𑀓𑁄𑀓𑀸𑀮𑀺𑀓, 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑁂𑀲𑀼 𑀘𑀺𑀢𑁆𑀢𑀁. 𑀧𑁂𑀲𑀮𑀸 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸’’𑀢𑀺.

𑀤𑀼𑀢𑀺𑀬𑀫𑁆𑀧𑀺 𑀔𑁄…𑀧𑁂… 𑀢𑀢𑀺𑀬𑀫𑁆𑀧𑀺 𑀔𑁄 𑀓𑁄𑀓𑀸𑀮𑀺𑀓𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑀺𑀜𑁆𑀘𑀸𑀧𑀺 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀲𑀤𑁆𑀥𑀸𑀬𑀺𑀓𑁄 𑀧𑀘𑁆𑀘𑀬𑀺𑀓𑁄, 𑀅𑀣 𑀔𑁄 𑀧𑀸𑀧𑀺𑀘𑁆𑀙𑀸𑀯 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸, 𑀧𑀸𑀧𑀺𑀓𑀸𑀦𑀁 𑀇𑀘𑁆𑀙𑀸𑀦𑀁 𑀯𑀲𑀁 𑀕𑀢𑀸’’𑀢𑀺. 𑀢𑀢𑀺𑀬𑀫𑁆𑀧𑀺 𑀔𑁄 𑀪𑀕𑀯𑀸 𑀓𑁄𑀓𑀸𑀮𑀺𑀓𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘 𑁋 ‘‘𑀫𑀸 𑀳𑁂𑀯𑀁, 𑀓𑁄𑀓𑀸𑀮𑀺𑀓, 𑀫𑀸 𑀳𑁂𑀯𑀁, 𑀓𑁄𑀓𑀸𑀮𑀺𑀓! 𑀧𑀲𑀸𑀤𑁂𑀳𑀺, 𑀓𑁄𑀓𑀸𑀮𑀺𑀓, 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑁂𑀲𑀼 𑀘𑀺𑀢𑁆𑀢𑀁. 𑀧𑁂𑀲𑀮𑀸 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸’’𑀢𑀺.

𑀅𑀣 𑀔𑁄 𑀓𑁄𑀓𑀸𑀮𑀺𑀓𑁄 𑀪𑀺𑀓𑁆𑀔𑀼 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀅𑀘𑀺𑀭𑀧𑁆𑀧𑀓𑁆𑀓𑀦𑁆𑀢𑀲𑁆𑀲 𑀘 𑀓𑁄𑀓𑀸𑀮𑀺𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀸𑀲𑀧𑀫𑀢𑁆𑀢𑀻𑀳𑀺 𑀧𑀺𑀴𑀓𑀸𑀳𑀺 𑀲𑀩𑁆𑀩𑁄 𑀓𑀸𑀬𑁄 𑀨𑀼𑀝𑁄 [𑀨𑀼𑀝𑁆𑀞𑁄 (𑀲𑁆𑀬𑀸.)] 𑀅𑀳𑁄𑀲𑀺; 𑀲𑀸𑀲𑀧𑀫𑀢𑁆𑀢𑀺𑀬𑁄 𑀳𑀼𑀢𑁆𑀯𑀸 𑀫𑀼𑀕𑁆𑀕𑀫𑀢𑁆𑀢𑀺𑀬𑁄 𑀅𑀳𑁂𑀲𑀼𑀁; 𑀫𑀼𑀕𑁆𑀕𑀫𑀢𑁆𑀢𑀺𑀬𑁄 𑀳𑀼𑀢𑁆𑀯𑀸 𑀓𑀴𑀸𑀬𑀫𑀢𑁆𑀢𑀺𑀬𑁄 𑀅𑀳𑁂𑀲𑀼𑀁; 𑀓𑀴𑀸𑀬𑀫𑀢𑁆𑀢𑀺𑀬𑁄 𑀳𑀼𑀢𑁆𑀯𑀸 𑀓𑁄𑀮𑀝𑁆𑀞𑀺𑀫𑀢𑁆𑀢𑀺𑀬𑁄 𑀅𑀳𑁂𑀲𑀼𑀁; 𑀓𑁄𑀮𑀝𑁆𑀞𑀺𑀫𑀢𑁆𑀢𑀺𑀬𑁄 𑀳𑀼𑀢𑁆𑀯𑀸 𑀓𑁄𑀮𑀫𑀢𑁆𑀢𑀺𑀬𑁄 𑀅𑀳𑁂𑀲𑀼𑀁; 𑀓𑁄𑀮𑀫𑀢𑁆𑀢𑀺𑀬𑁄 𑀳𑀼𑀢𑁆𑀯𑀸 𑀆𑀫𑀮𑀓𑀫𑀢𑁆𑀢𑀺𑀬𑁄 𑀅𑀳𑁂𑀲𑀼𑀁; 𑀆𑀫𑀮𑀓𑀫𑀢𑁆𑀢𑀺𑀬𑁄 𑀳𑀼𑀢𑁆𑀯𑀸 𑀩𑁂𑀴𑀼𑀯𑀲𑀮𑀸𑀝𑀼𑀓𑀫𑀢𑁆𑀢𑀺𑀬𑁄 𑀅𑀳𑁂𑀲𑀼𑀁; 𑀩𑁂𑀴𑀼𑀯𑀲𑀮𑀸𑀝𑀼𑀓𑀫𑀢𑁆𑀢𑀺𑀬𑁄 𑀳𑀼𑀢𑁆𑀯𑀸 𑀩𑀺𑀮𑁆𑀮𑀫𑀢𑁆𑀢𑀺𑀬𑁄 𑀅𑀳𑁂𑀲𑀼𑀁; 𑀩𑀺𑀮𑁆𑀮𑀫𑀢𑁆𑀢𑀺𑀬𑁄 𑀳𑀼𑀢𑁆𑀯𑀸 𑀧𑀪𑀺𑀚𑁆𑀚𑀺𑀁𑀲𑀼; 𑀧𑀼𑀩𑁆𑀩𑀜𑁆𑀘 𑀮𑁄𑀳𑀺𑀢𑀜𑁆𑀘 𑀧𑀕𑁆𑀖𑀭𑀺𑀁𑀲𑀼. 𑀅𑀣 𑀔𑁄 𑀓𑁄𑀓𑀸𑀮𑀺𑀓𑁄 𑀪𑀺𑀓𑁆𑀔𑀼 𑀢𑁂𑀦𑁂𑀯𑀸𑀩𑀸𑀥𑁂𑀦 𑀓𑀸𑀮𑀫𑀓𑀸𑀲𑀺. 𑀓𑀸𑀮𑀗𑁆𑀓𑀢𑁄 𑀘 𑀓𑁄𑀓𑀸𑀮𑀺𑀓𑁄 𑀪𑀺𑀓𑁆𑀔𑀼 𑀧𑀤𑀼𑀫𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀺 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑁂𑀲𑀼 𑀘𑀺𑀢𑁆𑀢𑀁 𑀆𑀖𑀸𑀢𑁂𑀢𑁆𑀯𑀸.

𑀅𑀣 𑀔𑁄 𑀩𑁆𑀭𑀳𑁆𑀫𑀸 𑀲𑀳𑀫𑁆𑀧𑀢𑀺 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑁄 𑀓𑁂𑀯𑀮𑀓𑀧𑁆𑀧𑀁 𑀚𑁂𑀢𑀯𑀦𑀁 𑀑𑀪𑀸𑀲𑁂𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁, 𑀞𑀺𑀢𑁄 𑀔𑁄 𑀩𑁆𑀭𑀳𑁆𑀫𑀸 𑀲𑀳𑀫𑁆𑀧𑀢𑀺 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑁄𑀓𑀸𑀮𑀺𑀓𑁄, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀓𑀸𑀮𑀗𑁆𑀓𑀢𑁄; 𑀓𑀸𑀮𑀗𑁆𑀓𑀢𑁄 𑀘, 𑀪𑀦𑁆𑀢𑁂, 𑀓𑁄𑀓𑀸𑀮𑀺𑀓𑁄 𑀪𑀺𑀓𑁆𑀔𑀼 𑀧𑀤𑀼𑀫𑀁 𑀦𑀺𑀭𑀬𑀁 𑀉𑀧𑀧𑀦𑁆𑀦𑁄 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑁂𑀲𑀼 𑀘𑀺𑀢𑁆𑀢𑀁 𑀆𑀖𑀸𑀢𑁂𑀢𑁆𑀯𑀸’’𑀢𑀺. 𑀇𑀤𑀫𑀯𑁄𑀘 𑀩𑁆𑀭𑀳𑁆𑀫𑀸 𑀲𑀳𑀫𑁆𑀧𑀢𑀺; 𑀇𑀤𑀁 𑀯𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀺.

𑀅𑀣 𑀔𑁄 𑀪𑀕𑀯𑀸 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀇𑀫𑀁, 𑀪𑀺𑀓𑁆𑀔𑀯𑁂, 𑀭𑀢𑁆𑀢𑀺𑀁 𑀩𑁆𑀭𑀳𑁆𑀫𑀸 𑀲𑀳𑀫𑁆𑀧𑀢𑀺 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸…𑀧𑁂… 𑀇𑀤𑀫𑀯𑁄𑀘, 𑀪𑀺𑀓𑁆𑀔𑀯𑁂, 𑀩𑁆𑀭𑀳𑁆𑀫𑀸 𑀲𑀳𑀫𑁆𑀧𑀢𑀺, 𑀇𑀤𑀁 𑀯𑀢𑁆𑀯𑀸 𑀫𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀻’’𑀢𑀺.

𑀏𑀯𑀁 𑀯𑀼𑀢𑁆𑀢𑁂, 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑀻𑀯𑀤𑀻𑀖𑀁 𑀦𑀼 𑀔𑁄, 𑀪𑀦𑁆𑀢𑁂, 𑀧𑀤𑀼𑀫𑁂 𑀦𑀺𑀭𑀬𑁂 𑀆𑀬𑀼𑀧𑁆𑀧𑀫𑀸𑀡’’𑀦𑁆𑀢𑀺? ‘‘𑀤𑀻𑀖𑀁 𑀔𑁄, 𑀪𑀺𑀓𑁆𑀔𑀼, 𑀧𑀤𑀼𑀫𑁂 𑀦𑀺𑀭𑀬𑁂 𑀆𑀬𑀼𑀧𑁆𑀧𑀫𑀸𑀡𑀁; 𑀢𑀁 𑀦 𑀲𑀼𑀓𑀭𑀁 𑀲𑀗𑁆𑀔𑀸𑀢𑀼𑀁 𑀏𑀢𑁆𑀢𑀓𑀸𑀦𑀺 𑀯𑀲𑁆𑀲𑀸𑀦𑀺 𑀇𑀢𑀺 𑀯𑀸 𑀏𑀢𑁆𑀢𑀓𑀸𑀦𑀺 𑀯𑀲𑁆𑀲𑀲𑀢𑀸𑀦𑀺 𑀇𑀢𑀺 𑀯𑀸 𑀏𑀢𑁆𑀢𑀓𑀸𑀦𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀇𑀢𑀺 𑀯𑀸 𑀏𑀢𑁆𑀢𑀓𑀸𑀦𑀺 𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺 𑀇𑀢𑀺 𑀯𑀸’’𑀢𑀺. ‘‘𑀲𑀓𑁆𑀓𑀸 𑀧𑀦, 𑀪𑀦𑁆𑀢𑁂, 𑀉𑀧𑀫𑀸 [𑀉𑀧𑀫𑀁 (𑀲𑀻. 𑀲𑁆𑀬𑀸. 𑀓.)] 𑀓𑀸𑀢𑀼’’𑀦𑁆𑀢𑀺? ‘‘𑀲𑀓𑁆𑀓𑀸, 𑀪𑀺𑀓𑁆𑀔𑀽’’𑀢𑀺 𑀪𑀕𑀯𑀸 𑀅𑀯𑁄𑀘 𑁋

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀼, 𑀯𑀻𑀲𑀢𑀺𑀔𑀸𑀭𑀺𑀓𑁄 𑀓𑁄𑀲𑀮𑀓𑁄 𑀢𑀺𑀮𑀯𑀸𑀳𑁄; 𑀢𑀢𑁄 𑀧𑀼𑀭𑀺𑀲𑁄 𑀯𑀲𑁆𑀲𑀲𑀢𑀲𑁆𑀲 𑀯𑀲𑁆𑀲𑀲𑀢𑀲𑁆𑀲 𑀅𑀘𑁆𑀘𑀬𑁂𑀦 𑀏𑀓𑀫𑁂𑀓𑀁 𑀢𑀺𑀮𑀁 𑀉𑀤𑁆𑀥𑀭𑁂𑀬𑁆𑀬. 𑀔𑀺𑀧𑁆𑀧𑀢𑀭𑀁 𑀔𑁄 𑀲𑁄 𑀪𑀺𑀓𑁆𑀔𑀼 𑀯𑀻𑀲𑀢𑀺𑀔𑀸𑀭𑀺𑀓𑁄 𑀓𑁄𑀲𑀮𑀓𑁄 𑀢𑀺𑀮𑀯𑀸𑀳𑁄 𑀇𑀫𑀺𑀦𑀸 𑀉𑀧𑀓𑁆𑀓𑀫𑁂𑀦 𑀧𑀭𑀺𑀓𑁆𑀔𑀬𑀁 𑀧𑀭𑀺𑀬𑀸𑀤𑀸𑀦𑀁 𑀕𑀘𑁆𑀙𑁂𑀬𑁆𑀬, 𑀦𑀢𑁆𑀯𑁂𑀯 𑀏𑀓𑁄 𑀅𑀩𑁆𑀩𑀼𑀤𑁄 𑀦𑀺𑀭𑀬𑁄. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀼, 𑀯𑀻𑀲𑀢𑀺 𑀅𑀩𑁆𑀩𑀼𑀤𑀸 𑀦𑀺𑀭𑀬𑀸 𑀏𑀯𑀫𑁂𑀓𑁄 𑀦𑀺𑀭𑀩𑁆𑀩𑀼𑀤𑁄 𑀦𑀺𑀭𑀬𑁄. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀼, 𑀯𑀻𑀲𑀢𑀺 𑀦𑀺𑀭𑀩𑁆𑀩𑀼𑀤𑀸 𑀦𑀺𑀭𑀬𑀸 𑀏𑀯𑀫𑁂𑀓𑁄 𑀅𑀩𑀩𑁄 𑀦𑀺𑀭𑀬𑁄. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀼, 𑀯𑀻𑀲𑀢𑀺 𑀅𑀩𑀩𑀸 𑀦𑀺𑀭𑀬𑀸 𑀏𑀯𑀫𑁂𑀓𑁄 𑀅𑀳𑀳𑁄 𑀦𑀺𑀭𑀬𑁄. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀼, 𑀯𑀻𑀲𑀢𑀺 𑀅𑀳𑀳𑀸 𑀦𑀺𑀭𑀬𑀸 𑀏𑀯𑀫𑁂𑀓𑁄 𑀅𑀝𑀝𑁄 𑀦𑀺𑀭𑀬𑁄. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀼, 𑀯𑀻𑀲𑀢𑀺 𑀅𑀝𑀝𑀸 𑀦𑀺𑀭𑀬𑀸 𑀏𑀯𑀫𑁂𑀓𑁄 𑀓𑀼𑀫𑀼𑀤𑁄 𑀦𑀺𑀭𑀬𑁄. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀼, 𑀯𑀻𑀲𑀢𑀺 𑀓𑀼𑀫𑀼𑀤𑀸 𑀦𑀺𑀭𑀬𑀸 𑀏𑀯𑀫𑁂𑀓𑁄 𑀲𑁄𑀕𑀦𑁆𑀥𑀺𑀓𑁄 𑀦𑀺𑀭𑀬𑁄. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀼, 𑀯𑀻𑀲𑀢𑀺 𑀲𑁄𑀕𑀦𑁆𑀥𑀺𑀓𑀸 𑀦𑀺𑀭𑀬𑀸 𑀏𑀯𑀫𑁂𑀓𑁄 𑀉𑀧𑁆𑀧𑀮𑀓𑁄 𑀦𑀺𑀭𑀬𑁄. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀼, 𑀯𑀻𑀲𑀢𑀺 𑀉𑀧𑁆𑀧𑀮𑀓𑀸 𑀦𑀺𑀭𑀬𑀸 𑀏𑀯𑀫𑁂𑀓𑁄 𑀧𑀼𑀡𑁆𑀟𑀭𑀻𑀓𑁄 𑀦𑀺𑀭𑀬𑁄. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀼, 𑀯𑀻𑀲𑀢𑀺 𑀧𑀼𑀡𑁆𑀟𑀭𑀻𑀓𑀸 𑀦𑀺𑀭𑀬𑀸 𑀏𑀯𑀫𑁂𑀓𑁄 𑀧𑀤𑀼𑀫𑁄 𑀦𑀺𑀭𑀬𑁄. 𑀧𑀤𑀼𑀫𑀁 𑀔𑁄 𑀧𑀦 𑀪𑀺𑀓𑁆𑀔𑀼 𑀦𑀺𑀭𑀬𑀁 𑀓𑁄𑀓𑀸𑀮𑀺𑀓𑁄 𑀪𑀺𑀓𑁆𑀔𑀼 𑀉𑀧𑀧𑀦𑁆𑀦𑁄 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑁂𑀲𑀼 𑀘𑀺𑀢𑁆𑀢𑀁 𑀆𑀖𑀸𑀢𑁂𑀢𑁆𑀯𑀸’’𑀢𑀺. 𑀇𑀤𑀫𑀯𑁄𑀘 𑀪𑀕𑀯𑀸, 𑀇𑀤𑀁 𑀯𑀢𑁆𑀯𑀸𑀦 𑀲𑀼𑀕𑀢𑁄 𑀅𑀣𑀸𑀧𑀭𑀁 𑀏𑀢𑀤𑀯𑁄𑀘 𑀲𑀢𑁆𑀣𑀸 𑁋

𑁬𑁬𑁨. ‘‘𑀧𑀼𑀭𑀺𑀲𑀲𑁆𑀲 𑀳𑀺 𑀚𑀸𑀢𑀲𑁆𑀲, 𑀓𑀼𑀞𑀸𑀭𑀻 [𑀓𑀼𑀥𑀸𑀭𑀻 (𑀓.)] 𑀚𑀸𑀬𑀢𑁂 𑀫𑀼𑀔𑁂;

𑀬𑀸𑀬 𑀙𑀺𑀦𑁆𑀤𑀢𑀺 𑀅𑀢𑁆𑀢𑀸𑀦𑀁, 𑀩𑀸𑀮𑁄 𑀤𑀼𑀩𑁆𑀪𑀸𑀲𑀺𑀢𑀁 𑀪𑀡𑀁.

𑁬𑁬𑁩. ‘‘𑀬𑁄 𑀦𑀺𑀦𑁆𑀤𑀺𑀬𑀁 𑀧𑀲𑀁𑀲𑀢𑀺, 𑀢𑀁 𑀯𑀸 𑀦𑀺𑀦𑁆𑀤𑀢𑀺 𑀬𑁄 𑀧𑀲𑀁𑀲𑀺𑀬𑁄;

𑀯𑀺𑀘𑀺𑀦𑀸𑀢𑀺 𑀫𑀼𑀔𑁂𑀦 𑀲𑁄 𑀓𑀮𑀺𑀁, 𑀓𑀮𑀺𑀦𑀸 𑀢𑁂𑀦 𑀲𑀼𑀔𑀁 𑀦 𑀯𑀺𑀦𑁆𑀤𑀢𑀺.

𑁬𑁬𑁪. ‘‘𑀅𑀧𑁆𑀧𑀫𑀢𑁆𑀢𑁄 𑀅𑀬𑀁 𑀓𑀮𑀺, 𑀬𑁄 𑀅𑀓𑁆𑀔𑁂𑀲𑀼 𑀥𑀦𑀧𑀭𑀸𑀚𑀬𑁄;

𑀲𑀩𑁆𑀩𑀲𑁆𑀲𑀸𑀧𑀺 𑀲𑀳𑀸𑀧𑀺 𑀅𑀢𑁆𑀢𑀦𑀸, 𑀅𑀬𑀫𑁂𑀯 𑀫𑀳𑀢𑁆𑀢𑀭𑁄 [𑀫𑀳𑀦𑁆𑀢𑀓𑀭𑁄 (𑀲𑀻.)] 𑀓𑀮𑀺;

𑀬𑁄 𑀲𑀼𑀕𑀢𑁂𑀲𑀼 𑀫𑀦𑀁 𑀧𑀤𑁄𑀲𑀬𑁂.

𑁬𑁬𑁫. ‘‘𑀲𑀢𑀁 𑀲𑀳𑀲𑁆𑀲𑀸𑀦𑀁 𑀦𑀺𑀭𑀩𑁆𑀩𑀼𑀤𑀸𑀦𑀁, 𑀙𑀢𑁆𑀢𑀺𑀁𑀲𑀢𑀺 𑀧𑀜𑁆𑀘 𑀘 𑀅𑀩𑁆𑀩𑀼𑀤𑀸𑀦𑀺 [𑀅𑀩𑁆𑀩𑀼𑀤𑀸𑀦𑀁 (𑀓.)];

𑀬𑀫𑀭𑀺𑀬𑀕𑀭𑀳𑀻 𑀦𑀺𑀭𑀬𑀁 𑀉𑀧𑁂𑀢𑀺, 𑀯𑀸𑀘𑀁 𑀫𑀦𑀜𑁆𑀘 𑀧𑀡𑀺𑀥𑀸𑀬 𑀧𑀸𑀧𑀓𑀁.

𑁬𑁬𑁬. ‘‘𑀅𑀪𑀽𑀢𑀯𑀸𑀤𑀻 𑀦𑀺𑀭𑀬𑀁 𑀉𑀧𑁂𑀢𑀺, 𑀬𑁄 𑀯𑀸𑀧𑀺 𑀓𑀢𑁆𑀯𑀸 𑀦 𑀓𑀭𑁄𑀫𑀺𑀘𑀸𑀳;

𑀉𑀪𑁄𑀧𑀺 𑀢𑁂 𑀧𑁂𑀘𑁆𑀘 𑀲𑀫𑀸 𑀪𑀯𑀦𑁆𑀢𑀺, 𑀦𑀺𑀳𑀻𑀦𑀓𑀫𑁆𑀫𑀸 𑀫𑀦𑀼𑀚𑀸 𑀧𑀭𑀢𑁆𑀣.

𑁬𑁬𑁭. ‘‘𑀬𑁄 𑀅𑀧𑁆𑀧𑀤𑀼𑀝𑁆𑀞𑀲𑁆𑀲 𑀦𑀭𑀲𑁆𑀲 𑀤𑀼𑀲𑁆𑀲𑀢𑀺, 𑀲𑀼𑀤𑁆𑀥𑀲𑁆𑀲 𑀧𑁄𑀲𑀲𑁆𑀲 𑀅𑀦𑀗𑁆𑀕𑀡𑀲𑁆𑀲;

𑀢𑀫𑁂𑀯 𑀩𑀸𑀮𑀁 𑀧𑀘𑁆𑀘𑁂𑀢𑀺 𑀧𑀸𑀧𑀁, 𑀲𑀼𑀔𑀼𑀫𑁄 𑀭𑀚𑁄 𑀧𑀝𑀺𑀯𑀸𑀢𑀁𑀯 𑀔𑀺𑀢𑁆𑀢𑁄.

𑁬𑁬𑁮. ‘‘𑀬𑁄 𑀮𑁄𑀪𑀕𑀼𑀡𑁂 𑀅𑀦𑀼𑀬𑀼𑀢𑁆𑀢𑁄, 𑀲𑁄 𑀯𑀘𑀲𑀸 𑀧𑀭𑀺𑀪𑀸𑀲𑀢𑀺 𑀅𑀜𑁆𑀜𑁂;

𑀅𑀲𑀤𑁆𑀥𑁄 𑀓𑀤𑀭𑀺𑀬𑁄 𑀅𑀯𑀤𑀜𑁆𑀜𑀽, 𑀫𑀘𑁆𑀙𑀭𑀺 𑀧𑁂𑀲𑀼𑀡𑀺𑀬𑀁 [𑀧𑁂𑀲𑀼𑀡𑀺𑀬𑀲𑁆𑀫𑀺𑀁 (𑀩𑀳𑀽𑀲𑀼)] 𑀅𑀦𑀼𑀬𑀼𑀢𑁆𑀢𑁄.

𑁬𑁬𑁯. ‘‘𑀫𑀼𑀔𑀤𑀼𑀕𑁆𑀕 𑀯𑀺𑀪𑀽𑀢 𑀅𑀦𑀭𑀺𑀬, 𑀪𑀽𑀦𑀳𑀼 [𑀪𑀼𑀦𑀳𑀢 (𑀲𑁆𑀬𑀸. 𑀓.)] 𑀧𑀸𑀧𑀓 𑀤𑀼𑀓𑁆𑀓𑀝𑀓𑀸𑀭𑀺;

𑀧𑀼𑀭𑀺𑀲𑀦𑁆𑀢 𑀓𑀮𑀻 𑀅𑀯𑀚𑀸𑀢, 𑀫𑀸 𑀩𑀳𑀼𑀪𑀸𑀡𑀺𑀥 𑀦𑁂𑀭𑀬𑀺𑀓𑁄𑀲𑀺.

𑁬𑁭𑁦. ‘‘𑀭𑀚𑀫𑀸𑀓𑀺𑀭𑀲𑀻 𑀅𑀳𑀺𑀢𑀸𑀬, 𑀲𑀦𑁆𑀢𑁂 𑀕𑀭𑀳𑀲𑀺 𑀓𑀺𑀩𑁆𑀩𑀺𑀲𑀓𑀸𑀭𑀻;

𑀩𑀳𑀽𑀦𑀺 𑀤𑀼𑀘𑁆𑀘𑀭𑀺𑀢𑀸𑀦𑀺 𑀘𑀭𑀺𑀢𑁆𑀯𑀸, 𑀕𑀘𑁆𑀙𑀲𑀺 𑀔𑁄 𑀧𑀧𑀢𑀁 𑀘𑀺𑀭𑀭𑀢𑁆𑀢𑀁.

𑁬𑁭𑁧. ‘‘𑀦 𑀳𑀺 𑀦𑀲𑁆𑀲𑀢𑀺 𑀓𑀲𑁆𑀲𑀘𑀺 𑀓𑀫𑁆𑀫𑀁, 𑀏𑀢𑀺 𑀳𑀢𑀁 𑀮𑀪𑀢𑁂𑀯 𑀲𑀼𑀯𑀸𑀫𑀺;

𑀤𑀼𑀓𑁆𑀔𑀁 𑀫𑀦𑁆𑀤𑁄 𑀧𑀭𑀮𑁄𑀓𑁂, 𑀅𑀢𑁆𑀢𑀦𑀺 𑀧𑀲𑁆𑀲𑀢𑀺 𑀓𑀺𑀩𑁆𑀩𑀺𑀲𑀓𑀸𑀭𑀻.

𑁬𑁭𑁨. ‘‘𑀅𑀬𑁄𑀲𑀗𑁆𑀓𑀼𑀲𑀫𑀸𑀳𑀢𑀝𑁆𑀞𑀸𑀦𑀁, 𑀢𑀺𑀡𑁆𑀳𑀥𑀸𑀭𑀫𑀬𑀲𑀽𑀮𑀫𑀼𑀧𑁂𑀢𑀺;

𑀅𑀣 𑀢𑀢𑁆𑀢𑀅𑀬𑁄𑀕𑀼𑀴𑀲𑀦𑁆𑀦𑀺𑀪𑀁, 𑀪𑁄𑀚𑀦𑀫𑀢𑁆𑀣𑀺 𑀢𑀣𑀸 𑀧𑀢𑀺𑀭𑀽𑀧𑀁.

𑁬𑁭𑁩. ‘‘𑀦 𑀳𑀺 𑀯𑀕𑁆𑀕𑀼 𑀯𑀤𑀦𑁆𑀢𑀺 𑀯𑀤𑀦𑁆𑀢𑀸, 𑀦𑀸𑀪𑀺𑀚𑀯𑀦𑁆𑀢𑀺 𑀦 𑀢𑀸𑀡𑀫𑀼𑀧𑁂𑀦𑁆𑀢𑀺;

𑀅𑀗𑁆𑀕𑀸𑀭𑁂 𑀲𑀦𑁆𑀣𑀢𑁂 𑀲𑀬𑀦𑁆𑀢𑀺 [𑀲𑁂𑀦𑁆𑀢𑀺 (𑀲𑀻. 𑀲𑁆𑀬𑀸. 𑀧𑀻.)], 𑀕𑀺𑀦𑀺𑀲𑀫𑁆𑀧𑀚𑁆𑀚𑀮𑀺𑀢𑀁 𑀧𑀯𑀺𑀲𑀦𑁆𑀢𑀺.

𑁬𑁭𑁪. ‘‘𑀚𑀸𑀮𑁂𑀦 𑀘 𑀑𑀦𑀳𑀺𑀬𑀸𑀦, 𑀢𑀢𑁆𑀣 𑀳𑀦𑀦𑁆𑀢𑀺 𑀅𑀬𑁄𑀫𑀬𑀓𑀼𑀝𑁂𑀪𑀺 [𑀅𑀬𑁄𑀫𑀬𑀓𑀽𑀝𑁂𑀳𑀺 (𑀲𑀻. 𑀲𑁆𑀬𑀸. 𑀧𑀻.)];

𑀅𑀦𑁆𑀥𑀁𑀯 𑀢𑀺𑀫𑀺𑀲𑀫𑀸𑀬𑀦𑁆𑀢𑀺, 𑀢𑀁 𑀯𑀺𑀢𑀢𑀜𑁆𑀳𑀺 𑀬𑀣𑀸 𑀫𑀳𑀺𑀓𑀸𑀬𑁄.

𑁬𑁭𑁫. ‘‘𑀅𑀣 𑀮𑁄𑀳𑀫𑀬𑀁 𑀧𑀦 𑀓𑀼𑀫𑁆𑀪𑀺𑀁, 𑀕𑀺𑀦𑀺𑀲𑀫𑁆𑀧𑀚𑁆𑀚𑀮𑀺𑀢𑀁 𑀧𑀯𑀺𑀲𑀦𑁆𑀢𑀺;

𑀧𑀘𑁆𑀘𑀦𑁆𑀢𑀺 𑀳𑀺 𑀢𑀸𑀲𑀼 𑀘𑀺𑀭𑀭𑀢𑁆𑀢𑀁, 𑀅𑀕𑁆𑀕𑀺𑀦𑀺𑀲𑀫𑀸𑀲𑀼 [𑀕𑀺𑀦𑀺𑀲𑁆𑀲𑀫𑀸𑀲𑀼 (𑀓.)] 𑀲𑀫𑀼𑀧𑁆𑀧𑀺𑀮𑀯𑀸𑀢𑁂.

𑁬𑁭𑁬. ‘‘𑀅𑀣 𑀧𑀼𑀩𑁆𑀩𑀮𑁄𑀳𑀺𑀢𑀫𑀺𑀲𑁆𑀲𑁂, 𑀢𑀢𑁆𑀣 𑀓𑀺𑀁 𑀧𑀘𑁆𑀘𑀢𑀺 𑀓𑀺𑀩𑁆𑀩𑀺𑀲𑀓𑀸𑀭𑀻;

𑀬𑀁 𑀬𑀁 𑀤𑀺𑀲𑀓𑀁 [𑀤𑀺𑀲𑀢𑀁 (𑀲𑀻. 𑀲𑁆𑀬𑀸. 𑀧𑀻.)] 𑀅𑀥𑀺𑀲𑁂𑀢𑀺, 𑀢𑀢𑁆𑀣 𑀓𑀺𑀮𑀺𑀲𑁆𑀲𑀢𑀺 𑀲𑀫𑁆𑀨𑀼𑀲𑀫𑀸𑀦𑁄.

𑁬𑁭𑁭. ‘‘𑀧𑀼𑀴𑀯𑀸𑀯𑀲𑀣𑁂 𑀲𑀮𑀺𑀮𑀲𑁆𑀫𑀺𑀁, 𑀢𑀢𑁆𑀣 𑀓𑀺𑀁 𑀧𑀘𑁆𑀘𑀢𑀺 𑀓𑀺𑀩𑁆𑀩𑀺𑀲𑀓𑀸𑀭𑀻;

𑀕𑀦𑁆𑀢𑀼𑀁 𑀦 𑀳𑀺 𑀢𑀻𑀭𑀫𑀧𑀢𑁆𑀣𑀺, 𑀲𑀩𑁆𑀩𑀲𑀫𑀸 𑀳𑀺 𑀲𑀫𑀦𑁆𑀢𑀓𑀧𑀮𑁆𑀮𑀸.

𑁬𑁭𑁮. ‘‘𑀅𑀲𑀺𑀧𑀢𑁆𑀢𑀯𑀦𑀁 𑀧𑀦 𑀢𑀺𑀡𑁆𑀳𑀁, 𑀢𑀁 𑀧𑀯𑀺𑀲𑀦𑁆𑀢𑀺 𑀲𑀫𑀼𑀘𑁆𑀙𑀺𑀤𑀕𑀢𑁆𑀢𑀸;

𑀚𑀺𑀯𑁆𑀳𑀁 𑀩𑀮𑀺𑀲𑁂𑀦 𑀕𑀳𑁂𑀢𑁆𑀯𑀸, 𑀆𑀭𑀚𑀬𑀸𑀭𑀚𑀬𑀸 𑀯𑀺𑀳𑀦𑀦𑁆𑀢𑀺.

𑁬𑁭𑁯. ‘‘𑀅𑀣 𑀯𑁂𑀢𑀭𑀡𑀺𑀁 𑀧𑀦 𑀤𑀼𑀕𑁆𑀕𑀁, 𑀢𑀺𑀡𑁆𑀳𑀥𑀸𑀭𑀔𑀼𑀭𑀥𑀸𑀭𑀫𑀼𑀧𑁂𑀦𑁆𑀢𑀺;

𑀢𑀢𑁆𑀣 𑀫𑀦𑁆𑀤𑀸 𑀧𑀧𑀢𑀦𑁆𑀢𑀺, 𑀧𑀸𑀧𑀓𑀭𑀸 𑀧𑀸𑀧𑀸𑀦𑀺 𑀓𑀭𑀺𑀢𑁆𑀯𑀸.

𑁬𑁮𑁦. ‘‘𑀔𑀸𑀤𑀦𑁆𑀢𑀺 𑀳𑀺 𑀢𑀢𑁆𑀣 𑀭𑀼𑀤𑀦𑁆𑀢𑁂, 𑀲𑀸𑀫𑀸 𑀲𑀩𑀮𑀸 𑀓𑀸𑀓𑁄𑀮𑀕𑀡𑀸 𑀘;

𑀲𑁄𑀡𑀸 𑀲𑀺𑀗𑁆𑀕𑀸𑀮𑀸 [𑀲𑀺𑀕𑀸𑀮𑀸 (𑀲𑀻. 𑀧𑀻.)] 𑀧𑀝𑀺𑀕𑀺𑀤𑁆𑀥𑀸 [𑀧𑀝𑀺𑀕𑀺𑀚𑁆𑀛𑀸 (𑀲𑁆𑀬𑀸. 𑀧𑀻.)], 𑀓𑀼𑀮𑀮𑀸 𑀯𑀸𑀬𑀲𑀸 𑀘 [𑀓𑀼𑀮𑀮𑀸 𑀘 𑀯𑀸𑀬𑀲𑀸 (?)] 𑀯𑀺𑀢𑀼𑀤𑀦𑁆𑀢𑀺.

𑁬𑁮𑁧. ‘‘𑀓𑀺𑀘𑁆𑀙𑀸 𑀯𑀢𑀬𑀁 𑀇𑀥 𑀯𑀼𑀢𑁆𑀢𑀺, 𑀬𑀁 𑀚𑀦𑁄 𑀨𑀼𑀲𑀢𑀺 [𑀧𑀲𑁆𑀲𑀢𑀺 (𑀲𑀻. 𑀲𑁆𑀬𑀸. 𑀧𑀻.)] 𑀓𑀺𑀩𑁆𑀩𑀺𑀲𑀓𑀸𑀭𑀻;

𑀢𑀲𑁆𑀫𑀸 𑀇𑀥 𑀚𑀻𑀯𑀺𑀢𑀲𑁂𑀲𑁂, 𑀓𑀺𑀘𑁆𑀘𑀓𑀭𑁄 𑀲𑀺𑀬𑀸 𑀦𑀭𑁄 𑀦 𑀘𑀧𑁆𑀧𑀫𑀚𑁆𑀚𑁂.

𑁬𑁮𑁨. ‘‘𑀢𑁂 𑀕𑀡𑀺𑀢𑀸 𑀯𑀺𑀤𑀽𑀳𑀺 𑀢𑀺𑀮𑀯𑀸𑀳𑀸, 𑀬𑁂 𑀧𑀤𑀼𑀫𑁂 𑀦𑀺𑀭𑀬𑁂 𑀉𑀧𑀦𑀻𑀢𑀸;

𑀦𑀳𑀼𑀢𑀸𑀦𑀺 𑀳𑀺 𑀓𑁄𑀝𑀺𑀬𑁄 𑀧𑀜𑁆𑀘 𑀪𑀯𑀦𑁆𑀢𑀺, 𑀤𑁆𑀯𑀸𑀤𑀲 𑀓𑁄𑀝𑀺𑀲𑀢𑀸𑀦𑀺 𑀧𑀼𑀦𑀜𑁆𑀜𑀸 [𑀧𑀦𑀬𑁆𑀬𑁂 (𑀓.)].

𑁬𑁮𑁩. ‘‘𑀬𑀸𑀯 𑀤𑀼𑀔𑀸 [𑀤𑀼𑀓𑁆𑀔𑀸 (𑀲𑀻. 𑀲𑁆𑀬𑀸.), 𑀤𑀼𑀓𑁆𑀔 (𑀧𑀻. 𑀓.)] 𑀦𑀺𑀭𑀬𑀸 𑀇𑀥 𑀯𑀼𑀢𑁆𑀢𑀸, 𑀢𑀢𑁆𑀣𑀧𑀺 𑀢𑀸𑀯 𑀘𑀺𑀭𑀁 𑀯𑀲𑀺𑀢𑀩𑁆𑀩𑀁;

𑀢𑀲𑁆𑀫𑀸 𑀲𑀼𑀘𑀺𑀧𑁂𑀲𑀮𑀲𑀸𑀥𑀼𑀕𑀼𑀡𑁂𑀲𑀼, 𑀯𑀸𑀘𑀁 𑀫𑀦𑀁 𑀲𑀢𑀢𑀁 [𑀧𑀓𑀢𑀁 (𑀲𑁆𑀬𑀸.)] 𑀧𑀭𑀺𑀭𑀓𑁆𑀔𑁂’’𑀢𑀺.

𑀓𑁄𑀓𑀸𑀮𑀺𑀓𑀲𑀼𑀢𑁆𑀢𑀁 𑀤𑀲𑀫𑀁 𑀦𑀺𑀝𑁆𑀞𑀺𑀢𑀁.