𑁩. 𑀫𑀳𑀸𑀯𑀕𑁆𑀕𑁄

𑁧. 𑀧𑀩𑁆𑀩𑀚𑁆𑀚𑀸𑀲𑀼𑀢𑁆𑀢𑀁

𑁪𑁦𑁭. 𑀧𑀩𑁆𑀩𑀚𑁆𑀚𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀬𑀣𑀸 𑀧𑀩𑁆𑀩𑀚𑀺 𑀘𑀓𑁆𑀔𑀼𑀫𑀸;

𑀬𑀣𑀸 𑀯𑀻𑀫𑀁𑀲𑀫𑀸𑀦𑁄 𑀲𑁄, 𑀧𑀩𑁆𑀩𑀚𑁆𑀚𑀁 𑀲𑀫𑀭𑁄𑀘𑀬𑀺.

𑁪𑁦𑁮. 𑀲𑀫𑁆𑀩𑀸𑀥𑁄𑀬𑀁 𑀖𑀭𑀸𑀯𑀸𑀲𑁄, 𑀭𑀚𑀲𑁆𑀲𑀸𑀬𑀢𑀦𑀁 𑀇𑀢𑀺;

𑀅𑀩𑁆𑀪𑁄𑀓𑀸𑀲𑁄𑀯 𑀧𑀩𑁆𑀩𑀚𑁆𑀚𑀸, 𑀇𑀢𑀺 𑀤𑀺𑀲𑁆𑀯𑀸𑀦 𑀧𑀩𑁆𑀩𑀚𑀺.

𑁪𑁦𑁯. 𑀧𑀩𑁆𑀩𑀚𑀺𑀢𑁆𑀯𑀸𑀦 𑀓𑀸𑀬𑁂𑀦, 𑀧𑀸𑀧𑀓𑀫𑁆𑀫𑀁 𑀯𑀺𑀯𑀚𑁆𑀚𑀬𑀺;

𑀯𑀘𑀻𑀤𑀼𑀘𑁆𑀘𑀭𑀺𑀢𑀁 𑀳𑀺𑀢𑁆𑀯𑀸, 𑀆𑀚𑀻𑀯𑀁 𑀧𑀭𑀺𑀲𑁄𑀥𑀬𑀺.

𑁪𑁧𑁦. 𑀅𑀕𑀫𑀸 𑀭𑀸𑀚𑀕𑀳𑀁 𑀩𑀼𑀤𑁆𑀥𑁄, 𑀫𑀕𑀥𑀸𑀦𑀁 𑀕𑀺𑀭𑀺𑀩𑁆𑀩𑀚𑀁;

𑀧𑀺𑀡𑁆𑀟𑀸𑀬 𑀅𑀪𑀺𑀳𑀸𑀭𑁂𑀲𑀺, 𑀆𑀓𑀺𑀡𑁆𑀡𑀯𑀭𑀮𑀓𑁆𑀔𑀡𑁄.

𑁪𑁧𑁧. 𑀢𑀫𑀤𑁆𑀤𑀲𑀸 𑀩𑀺𑀫𑁆𑀩𑀺𑀲𑀸𑀭𑁄, 𑀧𑀸𑀲𑀸𑀤𑀲𑁆𑀫𑀺𑀁 𑀧𑀢𑀺𑀝𑁆𑀞𑀺𑀢𑁄;

𑀤𑀺𑀲𑁆𑀯𑀸 𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀁, 𑀇𑀫𑀫𑀢𑁆𑀣𑀁 𑀅𑀪𑀸𑀲𑀣.

𑁪𑁧𑁨. ‘‘𑀇𑀫𑀁 𑀪𑁄𑀦𑁆𑀢𑁄 𑀦𑀺𑀲𑀸𑀫𑁂𑀣, 𑀅𑀪𑀺𑀭𑀽𑀧𑁄 𑀩𑁆𑀭𑀳𑀸 𑀲𑀼𑀘𑀺;

𑀘𑀭𑀡𑁂𑀦 𑀘 𑀲𑀫𑁆𑀧𑀦𑁆𑀦𑁄, 𑀬𑀼𑀕𑀫𑀢𑁆𑀢𑀜𑁆𑀘 𑀧𑁂𑀓𑁆𑀔𑀢𑀺.

𑁪𑁧𑁩. ‘‘𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀼 𑀲𑀢𑀺𑀫𑀸, 𑀦𑀸𑀬𑀁 𑀦𑀻𑀘𑀓𑀼𑀮𑀸𑀫𑀺𑀯;

𑀭𑀸𑀚𑀤𑀽𑀢𑀸𑀪𑀺𑀥𑀸𑀯𑀦𑁆𑀢𑀼, 𑀓𑀼𑀳𑀺𑀁 𑀪𑀺𑀓𑁆𑀔𑀼 𑀕𑀫𑀺𑀲𑁆𑀲𑀢𑀺’’.

𑁪𑁧𑁪. 𑀢𑁂 𑀧𑁂𑀲𑀺𑀢𑀸 𑀭𑀸𑀚𑀤𑀽𑀢𑀸, 𑀧𑀺𑀝𑁆𑀞𑀺𑀢𑁄 𑀅𑀦𑀼𑀩𑀦𑁆𑀥𑀺𑀲𑀼𑀁;

𑀓𑀼𑀳𑀺𑀁 𑀕𑀫𑀺𑀲𑁆𑀲𑀢𑀺 𑀪𑀺𑀓𑁆𑀔𑀼, 𑀓𑀢𑁆𑀣 𑀯𑀸𑀲𑁄 𑀪𑀯𑀺𑀲𑁆𑀲𑀢𑀺.

𑁪𑁧𑁫. 𑀲𑀧𑀤𑀸𑀦𑀁 𑀘𑀭𑀫𑀸𑀦𑁄, 𑀕𑀼𑀢𑁆𑀢𑀤𑁆𑀯𑀸𑀭𑁄 𑀲𑀼𑀲𑀁𑀯𑀼𑀢𑁄;

𑀔𑀺𑀧𑁆𑀧𑀁 𑀧𑀢𑁆𑀢𑀁 𑀅𑀧𑀽𑀭𑁂𑀲𑀺, 𑀲𑀫𑁆𑀧𑀚𑀸𑀦𑁄 𑀧𑀝𑀺𑀲𑁆𑀲𑀢𑁄.

𑁪𑁧𑁬. 𑀧𑀺𑀡𑁆𑀟𑀘𑀸𑀭𑀁 𑀘𑀭𑀺𑀢𑁆𑀯𑀸𑀦, 𑀦𑀺𑀓𑁆𑀔𑀫𑁆𑀫 𑀦𑀕𑀭𑀸 𑀫𑀼𑀦𑀺;

𑀧𑀡𑁆𑀟𑀯𑀁 𑀅𑀪𑀺𑀳𑀸𑀭𑁂𑀲𑀺, 𑀏𑀢𑁆𑀣 𑀯𑀸𑀲𑁄 𑀪𑀯𑀺𑀲𑁆𑀲𑀢𑀺.

𑁪𑁧𑁭. 𑀤𑀺𑀲𑁆𑀯𑀸𑀦 𑀯𑀸𑀲𑀽𑀧𑀕𑀢𑀁, 𑀢𑀬𑁄 [𑀢𑀢𑁄 (𑀲𑀻. 𑀧𑀻.)] 𑀤𑀽𑀢𑀸 𑀉𑀧𑀸𑀯𑀺𑀲𑀼𑀁;

𑀢𑁂𑀲𑀼 𑀏𑀓𑁄𑀯 [𑀏𑀓𑁄 𑀘 𑀤𑀽𑀢𑁄 (𑀲𑀻. 𑀲𑁆𑀬𑀸. 𑀧𑀻.)] 𑀆𑀕𑀦𑁆𑀢𑁆𑀯𑀸, 𑀭𑀸𑀚𑀺𑀦𑁄 𑀧𑀝𑀺𑀯𑁂𑀤𑀬𑀺.

𑁪𑁧𑁮. ‘‘𑀏𑀲 𑀪𑀺𑀓𑁆𑀔𑀼 𑀫𑀳𑀸𑀭𑀸𑀚, 𑀧𑀡𑁆𑀟𑀯𑀲𑁆𑀲 𑀧𑀼𑀭𑀢𑁆𑀣𑀢𑁄 [𑀧𑀼𑀭𑀓𑁆𑀔𑀢𑁄 (𑀲𑁆𑀬𑀸. 𑀓.)];

𑀦𑀺𑀲𑀺𑀦𑁆𑀦𑁄 𑀩𑁆𑀬𑀕𑁆𑀖𑀼𑀲𑀪𑁄𑀯, 𑀲𑀻𑀳𑁄𑀯 𑀕𑀺𑀭𑀺𑀕𑀩𑁆𑀪𑀭𑁂’’.

𑁪𑁧𑁯. 𑀲𑀼𑀢𑁆𑀯𑀸𑀦 𑀤𑀽𑀢𑀯𑀘𑀦𑀁, 𑀪𑀤𑁆𑀤𑀬𑀸𑀦𑁂𑀦 𑀔𑀢𑁆𑀢𑀺𑀬𑁄;

𑀢𑀭𑀫𑀸𑀦𑀭𑀽𑀧𑁄 𑀦𑀺𑀬𑁆𑀬𑀸𑀲𑀺, 𑀬𑁂𑀦 𑀧𑀡𑁆𑀟𑀯𑀧𑀩𑁆𑀩𑀢𑁄.

𑁪𑁨𑁦. 𑀲 𑀬𑀸𑀦𑀪𑀽𑀫𑀺𑀁 𑀬𑀸𑀬𑀺𑀢𑁆𑀯𑀸, 𑀬𑀸𑀦𑀸 𑀑𑀭𑀼𑀬𑁆𑀳 𑀔𑀢𑁆𑀢𑀺𑀬𑁄;

𑀧𑀢𑁆𑀢𑀺𑀓𑁄 𑀉𑀧𑀲𑀗𑁆𑀓𑀫𑁆𑀫, 𑀆𑀲𑀚𑁆𑀚 𑀦𑀁 𑀉𑀧𑀸𑀯𑀺𑀲𑀺.

𑁪𑁨𑁧. 𑀦𑀺𑀲𑀚𑁆𑀚 𑀭𑀸𑀚𑀸 𑀲𑀫𑁆𑀫𑁄𑀤𑀺, 𑀓𑀣𑀁 𑀲𑀸𑀭𑀡𑀻𑀬𑀁 𑀢𑀢𑁄;

𑀓𑀣𑀁 𑀲𑁄 𑀯𑀻𑀢𑀺𑀲𑀸𑀭𑁂𑀢𑁆𑀯𑀸, 𑀇𑀫𑀫𑀢𑁆𑀣𑀁 𑀅𑀪𑀸𑀲𑀣.

𑁪𑁨𑁨. ‘‘𑀬𑀼𑀯𑀸 𑀘 𑀤𑀳𑀭𑁄 𑀘𑀸𑀲𑀺, 𑀧𑀞𑀫𑀼𑀧𑁆𑀧𑀢𑁆𑀢𑀺𑀓𑁄 [𑀧𑀞𑀫𑀼𑀧𑁆𑀧𑀢𑁆𑀢𑀺𑀬𑀸 (𑀲𑀻.), 𑀧𑀞𑀫𑀼𑀧𑁆𑀧𑀢𑁆𑀢𑀺𑀢𑁄 (𑀲𑁆𑀬𑀸.)] 𑀲𑀼𑀲𑀼;

𑀯𑀡𑁆𑀡𑀸𑀭𑁄𑀳𑁂𑀦 𑀲𑀫𑁆𑀧𑀦𑁆𑀦𑁄, 𑀚𑀸𑀢𑀺𑀫𑀸 𑀯𑀺𑀬 𑀔𑀢𑁆𑀢𑀺𑀬𑁄.

𑁪𑁨𑁩. ‘‘𑀲𑁄𑀪𑀬𑀦𑁆𑀢𑁄 𑀅𑀦𑀻𑀓𑀕𑁆𑀕𑀁, 𑀦𑀸𑀕𑀲𑀗𑁆𑀖𑀧𑀼𑀭𑀓𑁆𑀔𑀢𑁄;

𑀤𑀤𑀸𑀫𑀺 𑀪𑁄𑀕𑁂 𑀪𑀼𑀜𑁆𑀚𑀲𑁆𑀲𑀼, 𑀚𑀸𑀢𑀺𑀁 𑀅𑀓𑁆𑀔𑀸𑀳𑀺 𑀧𑀼𑀘𑁆𑀙𑀺𑀢𑁄’’.

𑁪𑁨𑁪. ‘‘𑀉𑀚𑀼𑀁 𑀚𑀦𑀧𑀤𑁄 𑀭𑀸𑀚, 𑀳𑀺𑀫𑀯𑀦𑁆𑀢𑀲𑁆𑀲 𑀧𑀲𑁆𑀲𑀢𑁄;

𑀥𑀦𑀯𑀻𑀭𑀺𑀬𑁂𑀦 𑀲𑀫𑁆𑀧𑀦𑁆𑀦𑁄, 𑀓𑁄𑀲𑀮𑁂𑀲𑀼 [𑀓𑁄𑀲𑀮𑀲𑁆𑀲 (𑀲𑁆𑀬𑀸. 𑀓.)] 𑀦𑀺𑀓𑁂𑀢𑀺𑀦𑁄.

𑁪𑁨𑁫. ‘‘𑀆𑀤𑀺𑀘𑁆𑀘𑀸 [𑀆𑀤𑀺𑀘𑁆𑀘𑁄 (𑀓.)] 𑀦𑀸𑀫 𑀕𑁄𑀢𑁆𑀢𑁂𑀦, 𑀲𑀸𑀓𑀺𑀬𑀸 [𑀲𑀸𑀓𑀺𑀬𑁄 (𑀓.)] 𑀦𑀸𑀫 𑀚𑀸𑀢𑀺𑀬𑀸;

𑀢𑀫𑁆𑀳𑀸 𑀓𑀼𑀮𑀸 𑀧𑀩𑁆𑀩𑀚𑀺𑀢𑁄𑀫𑁆𑀳𑀺, 𑀦 𑀓𑀸𑀫𑁂 𑀅𑀪𑀺𑀧𑀢𑁆𑀣𑀬𑀁.

𑁪𑁨𑁬. ‘‘𑀓𑀸𑀫𑁂𑀲𑁆𑀯𑀸𑀤𑀻𑀦𑀯𑀁 𑀤𑀺𑀲𑁆𑀯𑀸, 𑀦𑁂𑀓𑁆𑀔𑀫𑁆𑀫𑀁 𑀤𑀝𑁆𑀞𑀼 𑀔𑁂𑀫𑀢𑁄;

𑀧𑀥𑀸𑀦𑀸𑀬 𑀕𑀫𑀺𑀲𑁆𑀲𑀸𑀫𑀺, 𑀏𑀢𑁆𑀣 𑀫𑁂 𑀭𑀜𑁆𑀚𑀢𑀻 𑀫𑀦𑁄’’𑀢𑀺.

𑀧𑀩𑁆𑀩𑀚𑁆𑀚𑀸𑀲𑀼𑀢𑁆𑀢𑀁 𑀧𑀞𑀫𑀁 𑀦𑀺𑀝𑁆𑀞𑀺𑀢𑀁.

𑁨. 𑀧𑀥𑀸𑀦𑀲𑀼𑀢𑁆𑀢𑀁

𑁪𑁨𑁭. ‘‘𑀢𑀁 𑀫𑀁 𑀧𑀥𑀸𑀦𑀧𑀳𑀺𑀢𑀢𑁆𑀢𑀁, 𑀦𑀤𑀺𑀁 𑀦𑁂𑀭𑀜𑁆𑀚𑀭𑀁 𑀧𑀢𑀺;

𑀯𑀺𑀧𑀭𑀓𑁆𑀓𑀫𑁆𑀫 𑀛𑀸𑀬𑀦𑁆𑀢𑀁, 𑀬𑁄𑀕𑀓𑁆𑀔𑁂𑀫𑀲𑁆𑀲 𑀧𑀢𑁆𑀢𑀺𑀬𑀸.

𑁪𑁨𑁮. ‘‘𑀦𑀫𑀼𑀘𑀻 𑀓𑀭𑀼𑀡𑀁 𑀯𑀸𑀘𑀁, 𑀪𑀸𑀲𑀫𑀸𑀦𑁄 𑀉𑀧𑀸𑀕𑀫𑀺;

‘𑀓𑀺𑀲𑁄 𑀢𑁆𑀯𑀫𑀲𑀺 𑀤𑀼𑀩𑁆𑀩𑀡𑁆𑀡𑁄, 𑀲𑀦𑁆𑀢𑀺𑀓𑁂 𑀫𑀭𑀡𑀁 𑀢𑀯.

𑁪𑁨𑁯. ‘‘‘𑀲𑀳𑀲𑁆𑀲𑀪𑀸𑀕𑁄 𑀫𑀭𑀡𑀲𑁆𑀲, 𑀏𑀓𑀁𑀲𑁄 𑀢𑀯 𑀚𑀻𑀯𑀺𑀢𑀁;

𑀚𑀻𑀯 𑀪𑁄 𑀚𑀻𑀯𑀺𑀢𑀁 𑀲𑁂𑀬𑁆𑀬𑁄, 𑀚𑀻𑀯𑀁 𑀧𑀼𑀜𑁆𑀜𑀸𑀦𑀺 𑀓𑀸𑀳𑀲𑀺.

𑁪𑁩𑁦. ‘‘‘𑀘𑀭𑀢𑁄 𑀘 𑀢𑁂 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀅𑀕𑁆𑀕𑀺𑀳𑀼𑀢𑁆𑀢𑀜𑁆𑀘 𑀚𑀽𑀳𑀢𑁄;

𑀧𑀳𑀽𑀢𑀁 𑀘𑀻𑀬𑀢𑁂 𑀧𑀼𑀜𑁆𑀜𑀁, 𑀓𑀺𑀁 𑀧𑀥𑀸𑀦𑁂𑀦 𑀓𑀸𑀳𑀲𑀺.

𑁪𑁩𑁧. ‘‘‘𑀤𑀼𑀕𑁆𑀕𑁄 𑀫𑀕𑁆𑀕𑁄 𑀧𑀥𑀸𑀦𑀸𑀬, 𑀤𑀼𑀓𑁆𑀓𑀭𑁄 𑀤𑀼𑀭𑀪𑀺𑀲𑀫𑁆𑀪𑀯𑁄’’’;

𑀇𑀫𑀸 𑀕𑀸𑀣𑀸 𑀪𑀡𑀁 𑀫𑀸𑀭𑁄, 𑀅𑀝𑁆𑀞𑀸 𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂.

𑁪𑁩𑁨. 𑀢𑀁 𑀢𑀣𑀸𑀯𑀸𑀤𑀺𑀦𑀁 𑀫𑀸𑀭𑀁, 𑀪𑀕𑀯𑀸 𑀏𑀢𑀤𑀩𑁆𑀭𑀯𑀺;

‘‘𑀧𑀫𑀢𑁆𑀢𑀩𑀦𑁆𑀥𑀼 𑀧𑀸𑀧𑀺𑀫, 𑀬𑁂𑀦𑀢𑁆𑀣𑁂𑀦 [𑀲𑁂𑀦𑀢𑁆𑀣𑁂𑀦 (?), 𑀅𑀢𑁆𑀢𑀦𑁄 𑀅𑀢𑁆𑀣𑁂𑀦 (𑀅𑀝𑁆𑀞. 𑀲𑀁𑀯𑀡𑁆𑀡𑀦𑀸)] 𑀇𑀥𑀸𑀕𑀢𑁄.

𑁪𑁩𑁩. ‘‘𑀅𑀡𑀼𑀫𑀢𑁆𑀢𑁄𑀧𑀺 [𑀅𑀡𑀼𑀫𑀢𑁆𑀢𑁂𑀦𑀧𑀺 (𑀲𑀻. 𑀲𑁆𑀬𑀸.)] 𑀧𑀼𑀜𑁆𑀜𑁂𑀦, 𑀅𑀢𑁆𑀣𑁄 𑀫𑀬𑁆𑀳𑀁 𑀦 𑀯𑀺𑀚𑁆𑀚𑀢𑀺;

𑀬𑁂𑀲𑀜𑁆𑀘 𑀅𑀢𑁆𑀣𑁄 𑀧𑀼𑀜𑁆𑀜𑁂𑀦, 𑀢𑁂 𑀫𑀸𑀭𑁄 𑀯𑀢𑁆𑀢𑀼𑀫𑀭𑀳𑀢𑀺.

𑁪𑁩𑁪. ‘‘𑀅𑀢𑁆𑀣𑀺 𑀲𑀤𑁆𑀥𑀸 𑀢𑀣𑀸 [𑀢𑀢𑁄 (𑀲𑀻. 𑀧𑀻.), 𑀢𑀧𑁄 (𑀲𑁆𑀬𑀸. 𑀓.)] 𑀯𑀻𑀭𑀺𑀬𑀁, 𑀧𑀜𑁆𑀜𑀸 𑀘 𑀫𑀫 𑀯𑀺𑀚𑁆𑀚𑀢𑀺;

𑀏𑀯𑀁 𑀫𑀁 𑀧𑀳𑀺𑀢𑀢𑁆𑀢𑀫𑁆𑀧𑀺, 𑀓𑀺𑀁 𑀚𑀻𑀯𑀫𑀦𑀼𑀧𑀼𑀘𑁆𑀙𑀲𑀺.

𑁪𑁩𑁫. ‘‘𑀦𑀤𑀻𑀦𑀫𑀧𑀺 𑀲𑁄𑀢𑀸𑀦𑀺, 𑀅𑀬𑀁 𑀯𑀸𑀢𑁄 𑀯𑀺𑀲𑁄𑀲𑀬𑁂;

𑀓𑀺𑀜𑁆𑀘 𑀫𑁂 𑀧𑀳𑀺𑀢𑀢𑁆𑀢𑀲𑁆𑀲, 𑀮𑁄𑀳𑀺𑀢𑀁 𑀦𑀼𑀧𑀲𑀼𑀲𑁆𑀲𑀬𑁂.

𑁪𑁩𑁬. ‘‘𑀮𑁄𑀳𑀺𑀢𑁂 𑀲𑀼𑀲𑁆𑀲𑀫𑀸𑀦𑀫𑁆𑀳𑀺, 𑀧𑀺𑀢𑁆𑀢𑀁 𑀲𑁂𑀫𑁆𑀳𑀜𑁆𑀘 𑀲𑀼𑀲𑁆𑀲𑀢𑀺;

𑀫𑀁𑀲𑁂𑀲𑀼 𑀔𑀻𑀬𑀫𑀸𑀦𑁂𑀲𑀼, 𑀪𑀺𑀬𑁆𑀬𑁄 𑀘𑀺𑀢𑁆𑀢𑀁 𑀧𑀲𑀻𑀤𑀢𑀺;

𑀪𑀺𑀬𑁆𑀬𑁄 𑀲𑀢𑀺 𑀘 𑀧𑀜𑁆𑀜𑀸 𑀘, 𑀲𑀫𑀸𑀥𑀺 𑀫𑀫 𑀢𑀺𑀝𑁆𑀞𑀢𑀺.

𑁪𑁩𑁭. ‘‘𑀢𑀲𑁆𑀲 𑀫𑁂𑀯𑀁 𑀯𑀺𑀳𑀭𑀢𑁄, 𑀧𑀢𑁆𑀢𑀲𑁆𑀲𑀼𑀢𑁆𑀢𑀫𑀯𑁂𑀤𑀦𑀁;

𑀓𑀸𑀫𑁂𑀲𑀼 [𑀓𑀸𑀫𑁂 (𑀲𑀻. 𑀲𑁆𑀬𑀸.)] 𑀦𑀸𑀧𑁂𑀓𑁆𑀔𑀢𑁂 𑀘𑀺𑀢𑁆𑀢𑀁, 𑀧𑀲𑁆𑀲 𑀲𑀢𑁆𑀢𑀲𑁆𑀲 𑀲𑀼𑀤𑁆𑀥𑀢𑀁.

𑁪𑁩𑁮. ‘‘𑀓𑀸𑀫𑀸 𑀢𑁂 𑀧𑀞𑀫𑀸 𑀲𑁂𑀦𑀸, 𑀤𑀼𑀢𑀺𑀬𑀸 𑀅𑀭𑀢𑀺 𑀯𑀼𑀘𑁆𑀘𑀢𑀺;

𑀢𑀢𑀺𑀬𑀸 𑀔𑀼𑀧𑁆𑀧𑀺𑀧𑀸𑀲𑀸 𑀢𑁂, 𑀘𑀢𑀼𑀢𑁆𑀣𑀻 𑀢𑀡𑁆𑀳𑀸 𑀧𑀯𑀼𑀘𑁆𑀘𑀢𑀺.

𑁪𑁩𑁯. ‘‘𑀧𑀜𑁆𑀘𑀫𑀁 [𑀧𑀜𑁆𑀘𑀫𑀻 (𑀲𑀻. 𑀧𑀻.)] 𑀣𑀺𑀦𑀫𑀺𑀤𑁆𑀥𑀁 𑀢𑁂, 𑀙𑀝𑁆𑀞𑀸 𑀪𑀻𑀭𑀽 𑀧𑀯𑀼𑀘𑁆𑀘𑀢𑀺;

𑀲𑀢𑁆𑀢𑀫𑀻 𑀯𑀺𑀘𑀺𑀓𑀺𑀘𑁆𑀙𑀸 𑀢𑁂, 𑀫𑀓𑁆𑀔𑁄 𑀣𑀫𑁆𑀪𑁄 𑀢𑁂 𑀅𑀝𑁆𑀞𑀫𑁄.

𑁪𑁪𑁦. ‘‘𑀮𑀸𑀪𑁄 𑀲𑀺𑀮𑁄𑀓𑁄 𑀲𑀓𑁆𑀓𑀸𑀭𑁄, 𑀫𑀺𑀘𑁆𑀙𑀸𑀮𑀤𑁆𑀥𑁄 𑀘 𑀬𑁄 𑀬𑀲𑁄;

𑀬𑁄 𑀘𑀢𑁆𑀢𑀸𑀦𑀁 𑀲𑀫𑀼𑀓𑁆𑀓𑀁𑀲𑁂, 𑀧𑀭𑁂 𑀘 𑀅𑀯𑀚𑀸𑀦𑀢𑀺.

𑁪𑁪𑁧. ‘‘𑀏𑀲𑀸 𑀦𑀫𑀼𑀘𑀺 𑀢𑁂 𑀲𑁂𑀦𑀸, 𑀓𑀡𑁆𑀳𑀲𑁆𑀲𑀸𑀪𑀺𑀧𑁆𑀧𑀳𑀸𑀭𑀺𑀦𑀻;

𑀦 𑀦𑀁 𑀅𑀲𑀽𑀭𑁄 𑀚𑀺𑀦𑀸𑀢𑀺, 𑀚𑁂𑀢𑁆𑀯𑀸 𑀘 𑀮𑀪𑀢𑁂 𑀲𑀼𑀔𑀁.

𑁪𑁪𑁨. ‘‘𑀏𑀲 𑀫𑀼𑀜𑁆𑀚𑀁 𑀧𑀭𑀺𑀳𑀭𑁂, 𑀥𑀺𑀭𑀢𑁆𑀣𑀼 𑀫𑀫 [𑀇𑀤 (𑀓.)] 𑀚𑀻𑀯𑀺𑀢𑀁;

𑀲𑀗𑁆𑀕𑀸𑀫𑁂 𑀫𑁂 𑀫𑀢𑀁 𑀲𑁂𑀬𑁆𑀬𑁄, 𑀬𑀁 𑀘𑁂 𑀚𑀻𑀯𑁂 𑀧𑀭𑀸𑀚𑀺𑀢𑁄.

𑁪𑁪𑁩. ‘‘𑀧𑀕𑀸𑀴𑁆𑀳𑁂𑀢𑁆𑀣 𑀦 𑀤𑀺𑀲𑁆𑀲𑀦𑁆𑀢𑀺, 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸;

𑀢𑀜𑁆𑀘 𑀫𑀕𑁆𑀕𑀁 𑀦 𑀚𑀸𑀦𑀦𑁆𑀢𑀺, 𑀬𑁂𑀦 𑀕𑀘𑁆𑀙𑀦𑁆𑀢𑀺 𑀲𑀼𑀩𑁆𑀩𑀢𑀸.

𑁪𑁪𑁪. ‘‘𑀲𑀫𑀦𑁆𑀢𑀸 𑀥𑀚𑀺𑀦𑀺𑀁 𑀤𑀺𑀲𑁆𑀯𑀸, 𑀬𑀼𑀢𑁆𑀢𑀁 𑀫𑀸𑀭𑀁 𑀲𑀯𑀸𑀳𑀦𑀁;

𑀬𑀼𑀤𑁆𑀥𑀸𑀬 𑀧𑀘𑁆𑀘𑀼𑀕𑁆𑀕𑀘𑁆𑀙𑀸𑀫𑀺, 𑀫𑀸 𑀫𑀁 𑀞𑀸𑀦𑀸 𑀅𑀘𑀸𑀯𑀬𑀺.

𑁪𑁪𑁫. ‘‘𑀬𑀁 𑀢𑁂 𑀢𑀁 𑀦𑀧𑁆𑀧𑀲𑀳𑀢𑀺, 𑀲𑁂𑀦𑀁 𑀮𑁄𑀓𑁄 𑀲𑀤𑁂𑀯𑀓𑁄;

𑀢𑀁 𑀢𑁂 𑀧𑀜𑁆𑀜𑀸𑀬 𑀪𑁂𑀘𑁆𑀙𑀸𑀫𑀺 [𑀕𑀘𑁆𑀙𑀸𑀫𑀺 (𑀲𑀻.), 𑀯𑁂𑀘𑁆𑀙𑀸𑀫𑀺 (𑀲𑁆𑀬𑀸.), 𑀯𑀚𑁆𑀛𑀸𑀫𑀺 (𑀓.)], 𑀆𑀫𑀁 𑀧𑀢𑁆𑀢𑀁𑀯 𑀅𑀲𑁆𑀫𑀦𑀸 [𑀧𑀓𑁆𑀓𑀁𑀯 𑀅𑀫𑀼𑀦𑀸 (𑀓.)].

𑁪𑁪𑁬. ‘‘𑀯𑀲𑀻𑀓𑀭𑀺𑀢𑁆𑀯𑀸 [𑀯𑀲𑀺𑀁 𑀓𑀭𑀺𑀢𑁆𑀯𑀸 (𑀩𑀳𑀽𑀲𑀼)] 𑀲𑀗𑁆𑀓𑀧𑁆𑀧𑀁, 𑀲𑀢𑀺𑀜𑁆𑀘 𑀲𑀽𑀧𑀢𑀺𑀝𑁆𑀞𑀺𑀢𑀁;

𑀭𑀝𑁆𑀞𑀸 𑀭𑀝𑁆𑀞𑀁 𑀯𑀺𑀘𑀭𑀺𑀲𑁆𑀲𑀁, 𑀲𑀸𑀯𑀓𑁂 𑀯𑀺𑀦𑀬𑀁 𑀧𑀼𑀣𑀽.

𑁪𑁪𑁭. ‘‘𑀢𑁂 𑀅𑀧𑁆𑀧𑀫𑀢𑁆𑀢𑀸 𑀧𑀳𑀺𑀢𑀢𑁆𑀢𑀸, 𑀫𑀫 𑀲𑀸𑀲𑀦𑀓𑀸𑀭𑀓𑀸;

𑀅𑀓𑀸𑀫𑀲𑁆𑀲 [𑀅𑀓𑀸𑀫𑀸 (𑀓.)] 𑀢𑁂 𑀕𑀫𑀺𑀲𑁆𑀲𑀦𑁆𑀢𑀺, 𑀬𑀢𑁆𑀣 𑀕𑀦𑁆𑀢𑁆𑀯𑀸 𑀦 𑀲𑁄𑀘𑀭𑁂’’.

𑁪𑁪𑁮. ‘‘𑀲𑀢𑁆𑀢 𑀯𑀲𑁆𑀲𑀸𑀦𑀺 𑀪𑀕𑀯𑀦𑁆𑀢𑀁, 𑀅𑀦𑀼𑀩𑀦𑁆𑀥𑀺𑀁 𑀧𑀤𑀸𑀧𑀤𑀁;

𑀑𑀢𑀸𑀭𑀁 𑀦𑀸𑀥𑀺𑀕𑀘𑁆𑀙𑀺𑀲𑁆𑀲𑀁, 𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀢𑀻𑀫𑀢𑁄.

𑁪𑁪𑁯. ‘‘𑀫𑁂𑀤𑀯𑀡𑁆𑀡𑀁𑀯 𑀧𑀸𑀲𑀸𑀡𑀁, 𑀯𑀸𑀬𑀲𑁄 𑀅𑀦𑀼𑀧𑀭𑀺𑀬𑀕𑀸;

𑀅𑀧𑁂𑀢𑁆𑀣 𑀫𑀼𑀤𑀼𑀁 [𑀫𑀼𑀤𑀼 (𑀲𑀻.)] 𑀯𑀺𑀦𑁆𑀤𑁂𑀫, 𑀅𑀧𑀺 𑀅𑀲𑁆𑀲𑀸𑀤𑀦𑀸 𑀲𑀺𑀬𑀸.

𑁪𑁫𑁦. ‘‘𑀅𑀮𑀤𑁆𑀥𑀸 𑀢𑀢𑁆𑀣 𑀅𑀲𑁆𑀲𑀸𑀤𑀁, 𑀯𑀸𑀬𑀲𑁂𑀢𑁆𑀢𑁄 𑀅𑀧𑀓𑁆𑀓𑀫𑀺;

𑀓𑀸𑀓𑁄𑀯 𑀲𑁂𑀮𑀫𑀸𑀲𑀚𑁆𑀚, 𑀦𑀺𑀩𑁆𑀩𑀺𑀚𑁆𑀚𑀸𑀧𑁂𑀫 𑀕𑁄𑀢𑀫𑀁’’.

𑁪𑁫𑁧. 𑀢𑀲𑁆𑀲 𑀲𑁄𑀓𑀧𑀭𑁂𑀢𑀲𑁆𑀲, 𑀯𑀻𑀡𑀸 𑀓𑀘𑁆𑀙𑀸 𑀅𑀪𑀲𑁆𑀲𑀣;

𑀢𑀢𑁄 𑀲𑁄 𑀤𑀼𑀫𑁆𑀫𑀦𑁄 𑀬𑀓𑁆𑀔𑁄, 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀣𑀸𑀢𑀺.

𑀧𑀥𑀸𑀦𑀲𑀼𑀢𑁆𑀢𑀁 𑀤𑀼𑀢𑀺𑀬𑀁 𑀦𑀺𑀝𑁆𑀞𑀺𑀢𑀁.

𑁩. 𑀲𑀼𑀪𑀸𑀲𑀺𑀢𑀲𑀼𑀢𑁆𑀢𑀁

𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀪𑀺𑀓𑁆𑀔𑀯𑁄’’𑀢𑀺. ‘‘𑀪𑀤𑀦𑁆𑀢𑁂’’𑀢𑀺 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀘𑀢𑀽𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀯𑀸𑀘𑀸 𑀲𑀼𑀪𑀸𑀲𑀺𑀢𑀸 𑀳𑁄𑀢𑀺, 𑀦 𑀤𑀼𑀩𑁆𑀪𑀸𑀲𑀺𑀢𑀸, 𑀅𑀦𑀯𑀚𑁆𑀚𑀸 𑀘 𑀅𑀦𑀦𑀼𑀯𑀚𑁆𑀚𑀸 𑀘 𑀯𑀺𑀜𑁆𑀜𑀽𑀦𑀁. 𑀓𑀢𑀫𑁂𑀳𑀺 𑀘𑀢𑀽𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀼𑀪𑀸𑀲𑀺𑀢𑀁𑀬𑁂𑀯 𑀪𑀸𑀲𑀢𑀺 𑀦𑁄 𑀤𑀼𑀩𑁆𑀪𑀸𑀲𑀺𑀢𑀁, 𑀥𑀫𑁆𑀫𑀁𑀬𑁂𑀯 𑀪𑀸𑀲𑀢𑀺 𑀦𑁄 𑀅𑀥𑀫𑁆𑀫𑀁, 𑀧𑀺𑀬𑀁𑀬𑁂𑀯 𑀪𑀸𑀲𑀢𑀺 𑀦𑁄 𑀅𑀧𑁆𑀧𑀺𑀬𑀁, 𑀲𑀘𑁆𑀘𑀁𑀬𑁂𑀯 𑀪𑀸𑀲𑀢𑀺 𑀦𑁄 𑀅𑀮𑀺𑀓𑀁. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑀽𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀯𑀸𑀘𑀸 𑀲𑀼𑀪𑀸𑀲𑀺𑀢𑀸 𑀳𑁄𑀢𑀺, 𑀦𑁄 𑀤𑀼𑀩𑁆𑀪𑀸𑀲𑀺𑀢𑀸, 𑀅𑀦𑀯𑀚𑁆𑀚𑀸 𑀘 𑀅𑀦𑀦𑀼𑀯𑀚𑁆𑀚𑀸 𑀘 𑀯𑀺𑀜𑁆𑀜𑀽𑀦’’𑀦𑁆𑀢𑀺. 𑀇𑀤𑀫𑀯𑁄𑀘 𑀪𑀕𑀯𑀸. 𑀇𑀤𑀁 𑀯𑀢𑁆𑀯𑀸𑀦 𑀲𑀼𑀕𑀢𑁄 𑀅𑀣𑀸𑀧𑀭𑀁 𑀏𑀢𑀤𑀯𑁄𑀘 𑀲𑀢𑁆𑀣𑀸 𑁋

𑁪𑁫𑁨. ‘‘𑀲𑀼𑀪𑀸𑀲𑀺𑀢𑀁 𑀉𑀢𑁆𑀢𑀫𑀫𑀸𑀳𑀼 𑀲𑀦𑁆𑀢𑁄, 𑀥𑀫𑁆𑀫𑀁 𑀪𑀡𑁂 𑀦𑀸𑀥𑀫𑁆𑀫𑀁 𑀢𑀁 𑀤𑀼𑀢𑀺𑀬𑀁;

𑀧𑀺𑀬𑀁 𑀪𑀡𑁂 𑀦𑀸𑀧𑁆𑀧𑀺𑀬𑀁 𑀢𑀁 𑀢𑀢𑀺𑀬𑀁, 𑀲𑀘𑁆𑀘𑀁 𑀪𑀡𑁂 𑀦𑀸𑀮𑀺𑀓𑀁 𑀢𑀁 𑀘𑀢𑀼𑀢𑁆𑀣’’𑀦𑁆𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀯𑀗𑁆𑀕𑀻𑀲𑁄 𑀉𑀝𑁆𑀞𑀸𑀬𑀸𑀲𑀦𑀸 𑀏𑀓𑀁𑀲𑀁 𑀘𑀻𑀯𑀭𑀁 𑀓𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀜𑁆𑀚𑀮𑀺𑀁 𑀧𑀡𑀸𑀫𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀧𑀝𑀺𑀪𑀸𑀢𑀺 𑀫𑀁 𑀪𑀕𑀯𑀸, 𑀧𑀝𑀺𑀪𑀸𑀢𑀺 𑀫𑀁 𑀲𑀼𑀕𑀢𑀸’’𑀢𑀺. ‘‘𑀧𑀝𑀺𑀪𑀸𑀢𑀼 𑀢𑀁 𑀯𑀗𑁆𑀕𑀻𑀲𑀸’’𑀢𑀺 𑀪𑀕𑀯𑀸 𑀅𑀯𑁄𑀘. 𑀅𑀣 𑀔𑁄 𑀆𑀬𑀲𑁆𑀫𑀸 𑀯𑀗𑁆𑀕𑀻𑀲𑁄 𑀪𑀕𑀯𑀦𑁆𑀢𑀁 𑀲𑀫𑁆𑀫𑀼𑀔𑀸 𑀲𑀸𑀭𑀼𑀧𑁆𑀧𑀸𑀳𑀺 𑀕𑀸𑀣𑀸𑀳𑀺 𑀅𑀪𑀺𑀢𑁆𑀣𑀯𑀺 𑁋

𑁪𑁫𑁩. ‘‘𑀢𑀫𑁂𑀯 𑀯𑀸𑀘𑀁 𑀪𑀸𑀲𑁂𑀬𑁆𑀬, 𑀬𑀸𑀬𑀢𑁆𑀢𑀸𑀦𑀁 𑀦 𑀢𑀸𑀧𑀬𑁂;

𑀧𑀭𑁂 𑀘 𑀦 𑀯𑀺𑀳𑀺𑀁𑀲𑁂𑀬𑁆𑀬, 𑀲𑀸 𑀯𑁂 𑀯𑀸𑀘𑀸 𑀲𑀼𑀪𑀸𑀲𑀺𑀢𑀸.

𑁪𑁫𑁪. ‘‘𑀧𑀺𑀬𑀯𑀸𑀘𑀫𑁂𑀯 𑀪𑀸𑀲𑁂𑀬𑁆𑀬, 𑀬𑀸 𑀯𑀸𑀘𑀸 𑀧𑀝𑀺𑀦𑀦𑁆𑀤𑀺𑀢𑀸;

𑀬𑀁 𑀅𑀦𑀸𑀤𑀸𑀬 𑀧𑀸𑀧𑀸𑀦𑀺, 𑀧𑀭𑁂𑀲𑀁 𑀪𑀸𑀲𑀢𑁂 𑀧𑀺𑀬𑀁.

𑁪𑁫𑁫. ‘‘𑀲𑀘𑁆𑀘𑀁 𑀯𑁂 𑀅𑀫𑀢𑀸 𑀯𑀸𑀘𑀸, 𑀏𑀲 𑀥𑀫𑁆𑀫𑁄 𑀲𑀦𑀦𑁆𑀢𑀦𑁄;

𑀲𑀘𑁆𑀘𑁂 𑀅𑀢𑁆𑀣𑁂 𑀘 𑀥𑀫𑁆𑀫𑁂 𑀘, 𑀆𑀳𑀼 𑀲𑀦𑁆𑀢𑁄 𑀧𑀢𑀺𑀝𑁆𑀞𑀺𑀢𑀸.

𑁪𑁫𑁬. ‘‘𑀬𑀁 𑀩𑀼𑀤𑁆𑀥𑁄 𑀪𑀸𑀲𑀢𑀺 𑀯𑀸𑀘𑀁, 𑀔𑁂𑀫𑀁 𑀦𑀺𑀩𑁆𑀩𑀸𑀦𑀧𑀢𑁆𑀢𑀺𑀬𑀸;

𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀺𑀭𑀺𑀬𑀸𑀬, 𑀲𑀸 𑀯𑁂 𑀯𑀸𑀘𑀸𑀦𑀫𑀼𑀢𑁆𑀢𑀫𑀸’’𑀢𑀺.

𑀲𑀼𑀪𑀸𑀲𑀺𑀢𑀲𑀼𑀢𑁆𑀢𑀁 𑀢𑀢𑀺𑀬𑀁 𑀦𑀺𑀝𑁆𑀞𑀺𑀢𑀁.

𑁪. 𑀲𑀼𑀦𑁆𑀤𑀭𑀺𑀓𑀪𑀸𑀭𑀤𑁆𑀯𑀸𑀚𑀲𑀼𑀢𑁆𑀢𑀁

𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀓𑁄𑀲𑀮𑁂𑀲𑀼 𑀯𑀺𑀳𑀭𑀢𑀺 𑀲𑀼𑀦𑁆𑀤𑀭𑀺𑀓𑀸𑀬 𑀦𑀤𑀺𑀬𑀸 𑀢𑀻𑀭𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀼𑀦𑁆𑀤𑀭𑀺𑀓𑀪𑀸𑀭𑀤𑁆𑀯𑀸𑀚𑁄 𑀩𑁆𑀭𑀸𑀳𑁆𑀫𑀡𑁄 𑀲𑀼𑀦𑁆𑀤𑀭𑀺𑀓𑀸𑀬 𑀦𑀤𑀺𑀬𑀸 𑀢𑀻𑀭𑁂 𑀅𑀕𑁆𑀕𑀺𑀁 𑀚𑀼𑀳𑀢𑀺, 𑀅𑀕𑁆𑀕𑀺𑀳𑀼𑀢𑁆𑀢𑀁 𑀧𑀭𑀺𑀘𑀭𑀢𑀺. 𑀅𑀣 𑀔𑁄 𑀲𑀼𑀦𑁆𑀤𑀭𑀺𑀓𑀪𑀸𑀭𑀤𑁆𑀯𑀸𑀚𑁄 𑀩𑁆𑀭𑀸𑀳𑁆𑀫𑀡𑁄 𑀅𑀕𑁆𑀕𑀺𑀁 𑀚𑀼𑀳𑀺𑀢𑁆𑀯𑀸 𑀅𑀕𑁆𑀕𑀺𑀳𑀼𑀢𑁆𑀢𑀁 𑀧𑀭𑀺𑀘𑀭𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀲𑀫𑀦𑁆𑀢𑀸 𑀘𑀢𑀼𑀤𑁆𑀤𑀺𑀲𑀸 𑀅𑀦𑀼𑀯𑀺𑀮𑁄𑀓𑁂𑀲𑀺 𑁋 ‘‘𑀓𑁄 𑀦𑀼 𑀔𑁄 𑀇𑀫𑀁 𑀳𑀩𑁆𑀬𑀲𑁂𑀲𑀁 𑀪𑀼𑀜𑁆𑀚𑁂𑀬𑁆𑀬𑀸’’𑀢𑀺? 𑀅𑀤𑁆𑀤𑀲𑀸 𑀔𑁄 𑀲𑀼𑀦𑁆𑀤𑀭𑀺𑀓𑀪𑀸𑀭𑀤𑁆𑀯𑀸𑀚𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀅𑀯𑀺𑀤𑀽𑀭𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀲𑀲𑀻𑀲𑀁 𑀧𑀸𑀭𑀼𑀢𑀁 𑀦𑀺𑀲𑀺𑀦𑁆𑀦𑀁; 𑀤𑀺𑀲𑁆𑀯𑀸𑀦 𑀯𑀸𑀫𑁂𑀦 𑀳𑀢𑁆𑀣𑁂𑀦 𑀳𑀩𑁆𑀬𑀲𑁂𑀲𑀁 𑀕𑀳𑁂𑀢𑁆𑀯𑀸 𑀤𑀓𑁆𑀔𑀺𑀡𑁂𑀦 𑀳𑀢𑁆𑀣𑁂𑀦 𑀓𑀫𑀡𑁆𑀟𑀮𑀼𑀁 𑀕𑀳𑁂𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺.

𑀅𑀣 𑀔𑁄 𑀪𑀕𑀯𑀸 𑀲𑀼𑀦𑁆𑀤𑀭𑀺𑀓𑀪𑀸𑀭𑀤𑁆𑀯𑀸𑀚𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀤𑀲𑀤𑁆𑀤𑁂𑀦 𑀲𑀻𑀲𑀁 𑀯𑀺𑀯𑀭𑀺. 𑀅𑀣 𑀔𑁄 𑀲𑀼𑀦𑁆𑀤𑀭𑀺𑀓𑀪𑀸𑀭𑀤𑁆𑀯𑀸𑀚𑁄 𑀩𑁆𑀭𑀸𑀳𑁆𑀫𑀡𑁄 𑁋 ‘‘𑀫𑀼𑀡𑁆𑀟𑁄 𑀅𑀬𑀁 𑀪𑀯𑀁, 𑀫𑀼𑀡𑁆𑀟𑀓𑁄 𑀅𑀬𑀁 𑀪𑀯’’𑀦𑁆𑀢𑀺 𑀢𑀢𑁄𑀯 𑀧𑀼𑀦 𑀦𑀺𑀯𑀢𑁆𑀢𑀺𑀢𑀼𑀓𑀸𑀫𑁄 𑀅𑀳𑁄𑀲𑀺. 𑀅𑀣 𑀔𑁄 𑀲𑀼𑀦𑁆𑀤𑀭𑀺𑀓𑀪𑀸𑀭𑀤𑁆𑀯𑀸𑀚𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀫𑀼𑀡𑁆𑀟𑀸𑀧𑀺 𑀳𑀺 𑀇𑀥𑁂𑀓𑀘𑁆𑀘𑁂 𑀩𑁆𑀭𑀸𑀳𑁆𑀫𑀡𑀸 𑀪𑀯𑀦𑁆𑀢𑀺, 𑀬𑀁𑀦𑀽𑀦𑀸𑀳𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀚𑀸𑀢𑀺𑀁 𑀧𑀼𑀘𑁆𑀙𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄 𑀲𑀼𑀦𑁆𑀤𑀭𑀺𑀓𑀪𑀸𑀭𑀤𑁆𑀯𑀸𑀚𑁄 𑀩𑁆𑀭𑀸𑀳𑁆𑀫𑀡𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑀺𑀁𑀚𑀘𑁆𑀘𑁄 𑀪𑀯’’𑀦𑁆𑀢𑀺?

𑀅𑀣 𑀔𑁄 𑀪𑀕𑀯𑀸 𑀲𑀼𑀦𑁆𑀤𑀭𑀺𑀓𑀪𑀸𑀭𑀤𑁆𑀯𑀸𑀚𑀁 𑀩𑁆𑀭𑀸𑀳𑁆𑀫𑀡𑀁 𑀕𑀸𑀣𑀸𑀳𑀺 𑀅𑀚𑁆𑀛𑀪𑀸𑀲𑀺 𑁋

𑁪𑁫𑁭. ‘‘𑀦 𑀩𑁆𑀭𑀸𑀳𑁆𑀫𑀡𑁄 𑀦𑁄𑀫𑁆𑀳𑀺 𑀦 𑀭𑀸𑀚𑀧𑀼𑀢𑁆𑀢𑁄, 𑀦 𑀯𑁂𑀲𑁆𑀲𑀸𑀬𑀦𑁄 𑀉𑀤 𑀓𑁄𑀘𑀺 𑀦𑁄𑀫𑁆𑀳𑀺;

𑀕𑁄𑀢𑁆𑀢𑀁 𑀧𑀭𑀺𑀜𑁆𑀜𑀸𑀬 𑀧𑀼𑀣𑀼𑀚𑁆𑀚𑀦𑀸𑀦𑀁, 𑀅𑀓𑀺𑀜𑁆𑀘𑀦𑁄 𑀫𑀦𑁆𑀢 𑀘𑀭𑀸𑀫𑀺 𑀮𑁄𑀓𑁂.

𑁪𑁫𑁮. ‘‘𑀲𑀗𑁆𑀖𑀸𑀝𑀺𑀯𑀸𑀲𑀻 𑀅𑀕𑀳𑁄 𑀘𑀭𑀸𑀫𑀺 [𑀅𑀕𑀺𑀳𑁄 (𑀓. 𑀲𑀻. 𑀧𑀻.) 𑀅𑀕𑁂𑀳𑁄 (𑀓𑀢𑁆𑀣𑀘𑀺)], 𑀦𑀺𑀯𑀼𑀢𑁆𑀢𑀓𑁂𑀲𑁄 𑀅𑀪𑀺𑀦𑀺𑀩𑁆𑀩𑀼𑀢𑀢𑁆𑀢𑁄;

𑀅𑀮𑀺𑀧𑁆𑀧𑀫𑀸𑀦𑁄 𑀇𑀥 𑀫𑀸𑀡𑀯𑁂𑀳𑀺, 𑀅𑀓𑀮𑁆𑀮𑀁 𑀫𑀁 𑀩𑁆𑀭𑀸𑀳𑁆𑀫𑀡 𑀧𑀼𑀘𑁆𑀙𑀲𑀺 𑀕𑁄𑀢𑁆𑀢𑀧𑀜𑁆𑀳𑀁’’.

𑁪𑁫𑁯. ‘‘𑀧𑀼𑀘𑁆𑀙𑀦𑁆𑀢𑀺 𑀯𑁂 𑀪𑁄 𑀩𑁆𑀭𑀸𑀳𑁆𑀫𑀡𑀸, 𑀩𑁆𑀭𑀸𑀳𑁆𑀫𑀡𑁂𑀪𑀺 𑀲𑀳 𑀩𑁆𑀭𑀸𑀳𑁆𑀫𑀡𑁄 𑀦𑁄 𑀪𑀯’’𑀦𑁆𑀢𑀺.

𑁪𑁬𑁦. ‘‘𑀩𑁆𑀭𑀸𑀳𑁆𑀫𑀡𑁄 𑀳𑀺 𑀘𑁂 𑀢𑁆𑀯𑀁 𑀩𑁆𑀭𑀽𑀲𑀺, 𑀫𑀜𑁆𑀘 𑀩𑁆𑀭𑀽𑀲𑀺 𑀅𑀩𑁆𑀭𑀸𑀳𑁆𑀫𑀡𑀁;

𑀢𑀁 𑀢𑀁 𑀲𑀸𑀯𑀺𑀢𑁆𑀢𑀺𑀁 𑀧𑀼𑀘𑁆𑀙𑀸𑀫𑀺, 𑀢𑀺𑀧𑀤𑀁 𑀘𑀢𑀼𑀯𑀻𑀲𑀢𑀓𑁆𑀔𑀭𑀁.

𑁪𑁬𑁧. ‘‘𑀓𑀺𑀁 𑀦𑀺𑀲𑁆𑀲𑀺𑀢𑀸 𑀇𑀲𑀬𑁄 𑀫𑀦𑀼𑀚𑀸, 𑀔𑀢𑁆𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑀸 [𑀧𑀞𑀫𑀧𑀸𑀤𑀦𑁆𑀢𑁄] 𑀤𑁂𑀯𑀢𑀸𑀦𑀁;

𑀬𑀜𑁆𑀜𑀫𑀓𑀧𑁆𑀧𑀬𑀺𑀁𑀲𑀼 𑀧𑀼𑀣𑀽 𑀇𑀥 𑀮𑁄𑀓𑁂 [𑀤𑀼𑀢𑀺𑀬𑀧𑀸𑀤𑀦𑁆𑀢𑁄 (𑀲𑀻.)].

𑁪𑁬𑁨. ‘‘𑀬𑀤𑀦𑁆𑀢𑀕𑀽 𑀯𑁂𑀤𑀕𑀽 𑀬𑀜𑁆𑀜𑀓𑀸𑀮𑁂, 𑀬𑀲𑁆𑀲𑀸𑀳𑀼𑀢𑀺𑀁 𑀮𑀪𑁂 𑀢𑀲𑁆𑀲𑀺𑀚𑁆𑀛𑁂𑀢𑀺 𑀩𑁆𑀭𑀽𑀫𑀺’’.

𑁪𑁬𑁩. ‘‘𑀅𑀤𑁆𑀥𑀸 𑀳𑀺 𑀢𑀲𑁆𑀲 𑀳𑀼𑀢𑀫𑀺𑀚𑁆𑀛𑁂, (𑀇𑀢𑀺 𑀩𑁆𑀭𑀸𑀳𑁆𑀫𑀡𑁄)

𑀬𑀁 𑀢𑀸𑀤𑀺𑀲𑀁 𑀯𑁂𑀤𑀕𑀼𑀫𑀤𑁆𑀤𑀲𑀸𑀫;

𑀢𑀼𑀫𑁆𑀳𑀸𑀤𑀺𑀲𑀸𑀦𑀜𑁆𑀳𑀺 𑀅𑀤𑀲𑁆𑀲𑀦𑁂𑀦, 𑀅𑀜𑁆𑀜𑁄 𑀚𑀦𑁄 𑀪𑀼𑀜𑁆𑀚𑀢𑀺 𑀧𑀽𑀭𑀴𑀸𑀲𑀁’’.

𑁪𑁬𑁪. ‘‘𑀢𑀲𑁆𑀫𑀸𑀢𑀺𑀳 𑀢𑁆𑀯𑀁 𑀩𑁆𑀭𑀸𑀳𑁆𑀫𑀡 𑀅𑀢𑁆𑀣𑁂𑀦, 𑀅𑀢𑁆𑀣𑀺𑀓𑁄 𑀉𑀧𑀲𑀗𑁆𑀓𑀫𑁆𑀫 𑀧𑀼𑀘𑁆𑀙;

𑀲𑀦𑁆𑀢𑀁 𑀯𑀺𑀥𑀽𑀫𑀁 𑀅𑀦𑀻𑀖𑀁 𑀦𑀺𑀭𑀸𑀲𑀁, 𑀅𑀧𑁆𑀧𑁂𑀯𑀺𑀥 𑀅𑀪𑀺𑀯𑀺𑀦𑁆𑀤𑁂 𑀲𑀼𑀫𑁂𑀥𑀁’’.

𑁪𑁬𑁫. ‘‘𑀬𑀜𑁆𑀜𑁂 𑀭𑀢𑁄𑀳𑀁 𑀪𑁄 𑀕𑁄𑀢𑀫, 𑀬𑀜𑁆𑀜𑀁 𑀬𑀺𑀝𑁆𑀞𑀼𑀓𑀸𑀫𑁄 𑀦𑀸𑀳𑀁 𑀧𑀚𑀸𑀦𑀸𑀫𑀺;

𑀅𑀦𑀼𑀲𑀸𑀲𑀢𑀼 𑀫𑀁 𑀪𑀯𑀁, 𑀬𑀢𑁆𑀣 𑀳𑀼𑀢𑀁 𑀇𑀚𑁆𑀛𑀢𑁂 𑀩𑁆𑀭𑀽𑀳𑀺 𑀫𑁂 𑀢𑀁’’.

‘‘𑀢𑁂𑀦 𑀳𑀺 𑀢𑁆𑀯𑀁, 𑀩𑁆𑀭𑀸𑀳𑁆𑀫𑀡, 𑀑𑀤𑀳𑀲𑁆𑀲𑀼 𑀲𑁄𑀢𑀁; 𑀥𑀫𑁆𑀫𑀁 𑀢𑁂 𑀤𑁂𑀲𑁂𑀲𑁆𑀲𑀸𑀫𑀺 𑁋

𑁪𑁬𑁬. ‘‘𑀫𑀸 𑀚𑀸𑀢𑀺𑀁 𑀧𑀼𑀘𑁆𑀙𑀻 𑀘𑀭𑀡𑀜𑁆𑀘 𑀧𑀼𑀘𑁆𑀙, 𑀓𑀝𑁆𑀞𑀸 𑀳𑀯𑁂 𑀚𑀸𑀬𑀢𑀺 𑀚𑀸𑀢𑀯𑁂𑀤𑁄;

𑀦𑀻𑀘𑀸𑀓𑀼𑀮𑀻𑀦𑁄𑀧𑀺 𑀫𑀼𑀦𑀻 𑀥𑀺𑀢𑀻𑀫𑀸, 𑀆𑀚𑀸𑀦𑀺𑀬𑁄 𑀳𑁄𑀢𑀺 𑀳𑀺𑀭𑀻𑀦𑀺𑀲𑁂𑀥𑁄.

𑁪𑁬𑁭. ‘‘𑀲𑀘𑁆𑀘𑁂𑀦 𑀤𑀦𑁆𑀢𑁄 𑀤𑀫𑀲𑀸 𑀉𑀧𑁂𑀢𑁄, 𑀯𑁂𑀤𑀦𑁆𑀢𑀕𑀽 𑀯𑀽𑀲𑀺𑀢𑀩𑁆𑀭𑀳𑁆𑀫𑀘𑀭𑀺𑀬𑁄;

𑀓𑀸𑀮𑁂𑀦 𑀢𑀫𑁆𑀳𑀺 𑀳𑀩𑁆𑀬𑀁 𑀧𑀯𑁂𑀘𑁆𑀙𑁂, 𑀬𑁄 𑀩𑁆𑀭𑀸𑀳𑁆𑀫𑀡𑁄 𑀧𑀼𑀜𑁆𑀜𑀧𑁂𑀓𑁆𑀔𑁄 [𑀧𑀼𑀜𑁆𑀜𑀧𑁂𑀔𑁄 (𑀲𑀻. 𑀧𑀻.)] 𑀬𑀚𑁂𑀣.

𑁪𑁬𑁮. ‘‘𑀬𑁂 𑀓𑀸𑀫𑁂 𑀳𑀺𑀢𑁆𑀯𑀸 𑀅𑀕𑀳𑀸 𑀘𑀭𑀦𑁆𑀢𑀺, 𑀲𑀼𑀲𑀜𑁆𑀜𑀢𑀢𑁆𑀢𑀸 𑀢𑀲𑀭𑀁𑀯 𑀉𑀚𑁆𑀚𑀼𑀁;

𑀓𑀸𑀮𑁂𑀦 𑀢𑁂𑀲𑀼 𑀳𑀩𑁆𑀬𑀁 𑀧𑀯𑁂𑀘𑁆𑀙𑁂, 𑀬𑁄 𑀩𑁆𑀭𑀸𑀳𑁆𑀫𑀡𑁄 𑀧𑀼𑀜𑁆𑀜𑀧𑁂𑀓𑁆𑀔𑁄 𑀬𑀚𑁂𑀣.

𑁪𑁬𑁯. ‘‘𑀬𑁂 𑀯𑀻𑀢𑀭𑀸𑀕𑀸 𑀲𑀼𑀲𑀫𑀸𑀳𑀺𑀢𑀺𑀦𑁆𑀤𑁆𑀭𑀺𑀬𑀸, 𑀘𑀦𑁆𑀤𑁄𑀯 𑀭𑀸𑀳𑀼𑀕𑁆𑀕𑀳𑀡𑀸 𑀧𑀫𑀼𑀢𑁆𑀢𑀸;

𑀓𑀸𑀮𑁂𑀦 𑀢𑁂𑀲𑀼 𑀳𑀩𑁆𑀬𑀁 𑀧𑀯𑁂𑀘𑁆𑀙𑁂, 𑀬𑁄 𑀩𑁆𑀭𑀸𑀳𑁆𑀫𑀡𑁄 𑀧𑀼𑀜𑁆𑀜𑀧𑁂𑀓𑁆𑀔𑁄 𑀬𑀚𑁂𑀣.

𑁪𑁭𑁦. ‘‘𑀅𑀲𑀚𑁆𑀚𑀫𑀸𑀦𑀸 𑀯𑀺𑀘𑀭𑀦𑁆𑀢𑀺 𑀮𑁄𑀓𑁂, 𑀲𑀤𑀸 𑀲𑀢𑀸 𑀳𑀺𑀢𑁆𑀯𑀸 𑀫𑀫𑀸𑀬𑀺𑀢𑀸𑀦𑀺;

𑀓𑀸𑀮𑁂𑀦 𑀢𑁂𑀲𑀼 𑀳𑀩𑁆𑀬𑀁 𑀧𑀯𑁂𑀘𑁆𑀙𑁂, 𑀬𑁄 𑀩𑁆𑀭𑀸𑀳𑁆𑀫𑀡𑁄 𑀧𑀼𑀜𑁆𑀜𑀧𑁂𑀓𑁆𑀔𑁄 𑀬𑀚𑁂𑀣.

𑁪𑁭𑁧. ‘‘𑀬𑁄 𑀓𑀸𑀫𑁂 𑀳𑀺𑀢𑁆𑀯𑀸 𑀅𑀪𑀺𑀪𑀼𑀬𑁆𑀬𑀘𑀸𑀭𑀻, 𑀬𑁄 𑀯𑁂𑀤𑀺 𑀚𑀸𑀢𑀻𑀫𑀭𑀡𑀲𑁆𑀲 𑀅𑀦𑁆𑀢𑀁;

𑀧𑀭𑀺𑀦𑀺𑀩𑁆𑀩𑀼𑀢𑁄 𑀉𑀤𑀓𑀭𑀳𑀤𑁄𑀯 𑀲𑀻𑀢𑁄, 𑀢𑀣𑀸𑀕𑀢𑁄 𑀅𑀭𑀳𑀢𑀺 𑀧𑀽𑀭𑀴𑀸𑀲𑀁.

𑁪𑁭𑁨. ‘‘𑀲𑀫𑁄 𑀲𑀫𑁂𑀳𑀺 𑀯𑀺𑀲𑀫𑁂𑀳𑀺 𑀤𑀽𑀭𑁂, 𑀢𑀣𑀸𑀕𑀢𑁄 𑀳𑁄𑀢𑀺 𑀅𑀦𑀦𑁆𑀢𑀧𑀜𑁆𑀜𑁄;

𑀅𑀦𑀽𑀧𑀮𑀺𑀢𑁆𑀢𑁄 𑀇𑀥 𑀯𑀸 𑀳𑀼𑀭𑀁 𑀯𑀸, 𑀢𑀣𑀸𑀕𑀢𑁄 𑀅𑀭𑀳𑀢𑀺 𑀧𑀽𑀭𑀴𑀸𑀲𑀁.

𑁪𑁭𑁩. ‘‘𑀬𑀫𑁆𑀳𑀺 𑀦 𑀫𑀸𑀬𑀸 𑀯𑀲𑀢𑀺 𑀦 𑀫𑀸𑀦𑁄, 𑀬𑁄 𑀯𑀻𑀢𑀮𑁄𑀪𑁄 𑀅𑀫𑀫𑁄 𑀦𑀺𑀭𑀸𑀲𑁄;

𑀧𑀦𑀼𑀡𑁆𑀡𑀓𑁄𑀥𑁄 𑀅𑀪𑀺𑀦𑀺𑀩𑁆𑀩𑀼𑀢𑀢𑁆𑀢𑁄, 𑀬𑁄 𑀩𑁆𑀭𑀸𑀳𑁆𑀫𑀡𑁄 𑀲𑁄𑀓𑀫𑀮𑀁 𑀅𑀳𑀸𑀲𑀺;

𑀢𑀣𑀸𑀕𑀢𑁄 𑀅𑀭𑀳𑀢𑀺 𑀧𑀽𑀭𑀴𑀸𑀲𑀁.