𑁧𑁧. 𑀦𑀸𑀮𑀓𑀲𑀼𑀢𑁆𑀢𑀁

𑁬𑁮𑁪. 𑀆𑀦𑀦𑁆𑀤𑀚𑀸𑀢𑁂 𑀢𑀺𑀤𑀲𑀕𑀡𑁂 𑀧𑀢𑀻𑀢𑁂, 𑀲𑀓𑁆𑀓𑀜𑁆𑀘 𑀇𑀦𑁆𑀤𑀁 𑀲𑀼𑀘𑀺𑀯𑀲𑀦𑁂 𑀘 𑀤𑁂𑀯𑁂;

𑀤𑀼𑀲𑁆𑀲𑀁 𑀕𑀳𑁂𑀢𑁆𑀯𑀸 𑀅𑀢𑀺𑀭𑀺𑀯 𑀣𑁄𑀫𑀬𑀦𑁆𑀢𑁂, 𑀅𑀲𑀺𑀢𑁄 𑀇𑀲𑀺 𑀅𑀤𑁆𑀤𑀲 𑀤𑀺𑀯𑀸𑀯𑀺𑀳𑀸𑀭𑁂.

𑁬𑁮𑁫. 𑀤𑀺𑀲𑁆𑀯𑀸𑀦 𑀤𑁂𑀯𑁂 𑀫𑀼𑀤𑀺𑀢𑀫𑀦𑁂 𑀉𑀤𑀕𑁆𑀕𑁂, 𑀘𑀺𑀢𑁆𑀢𑀺𑀁 𑀓𑀭𑀺𑀢𑁆𑀯𑀸𑀦 𑀇𑀤𑀫𑀯𑁄𑀘 [𑀓𑀭𑀺𑀢𑁆𑀯𑀸 𑀇𑀤𑀫𑀯𑁄𑀘𑀸𑀲𑀺 (𑀲𑀻.)] 𑀢𑀢𑁆𑀣;

‘‘𑀓𑀺𑀁 𑀤𑁂𑀯𑀲𑀗𑁆𑀖𑁄 𑀅𑀢𑀺𑀭𑀺𑀯 𑀓𑀮𑁆𑀬𑀭𑀽𑀧𑁄, 𑀤𑀼𑀲𑁆𑀲𑀁 𑀕𑀳𑁂𑀢𑁆𑀯𑀸 𑀭𑀫𑀬𑀣 [𑀪𑀫𑀬𑀣 (𑀲𑀻.)] 𑀓𑀺𑀁 𑀧𑀝𑀺𑀘𑁆𑀘.

𑁬𑁮𑁬. ‘‘𑀬𑀤𑀸𑀧𑀺 𑀆𑀲𑀻 𑀅𑀲𑀼𑀭𑁂𑀳𑀺 𑀲𑀗𑁆𑀕𑀫𑁄, 𑀚𑀬𑁄 𑀲𑀼𑀭𑀸𑀦𑀁 𑀅𑀲𑀼𑀭𑀸 𑀧𑀭𑀸𑀚𑀺𑀢𑀸.

𑀢𑀤𑀸𑀧𑀺 𑀦𑁂𑀢𑀸𑀤𑀺𑀲𑁄 𑀮𑁄𑀫𑀳𑀁𑀲𑀦𑁄, 𑀓𑀺𑀫𑀩𑁆𑀪𑀼𑀢𑀁 𑀤𑀝𑁆𑀞𑀼 𑀫𑀭𑀽 𑀧𑀫𑁄𑀤𑀺𑀢𑀸.

𑁬𑁮𑁭. ‘‘𑀲𑁂𑀴𑁂𑀦𑁆𑀢𑀺 𑀕𑀸𑀬𑀦𑁆𑀢𑀺 𑀘 𑀯𑀸𑀤𑀬𑀦𑁆𑀢𑀺 𑀘, 𑀪𑀼𑀚𑀸𑀦𑀺 𑀨𑁄𑀝𑁂𑀦𑁆𑀢𑀺 [𑀧𑁄𑀞𑁂𑀦𑁆𑀢𑀺 (𑀲𑀻. 𑀧𑀻.), 𑀧𑁄𑀣𑁂𑀦𑁆𑀢𑀺 (𑀓.)] 𑀘 𑀦𑀘𑁆𑀘𑀬𑀦𑁆𑀢𑀺 𑀘;

𑀧𑀼𑀘𑁆𑀙𑀸𑀫𑀺 𑀯𑁄𑀳𑀁 𑀫𑁂𑀭𑀼𑀫𑀼𑀤𑁆𑀥𑀯𑀸𑀲𑀺𑀦𑁂, 𑀥𑀼𑀦𑀸𑀣 𑀫𑁂 𑀲𑀁𑀲𑀬𑀁 𑀔𑀺𑀧𑁆𑀧 𑀫𑀸𑀭𑀺𑀲𑀸’’.

𑁬𑁮𑁮. ‘‘𑀲𑁄 𑀩𑁄𑀥𑀺𑀲𑀢𑁆𑀢𑁄 𑀭𑀢𑀦𑀯𑀭𑁄 𑀅𑀢𑀼𑀮𑁆𑀬𑁄, 𑀫𑀦𑀼𑀲𑁆𑀲𑀮𑁄𑀓𑁂 𑀳𑀺𑀢𑀲𑀼𑀔𑀢𑁆𑀣𑀸𑀬 [𑀳𑀺𑀢𑀲𑀼𑀔𑀢𑀸𑀬 (𑀲𑀻. 𑀲𑁆𑀬𑀸. 𑀧𑀻.)] 𑀚𑀸𑀢𑁄;

𑀲𑀓𑁆𑀬𑀸𑀦 𑀕𑀸𑀫𑁂 𑀚𑀦𑀧𑀤𑁂 𑀮𑀼𑀫𑁆𑀩𑀺𑀦𑁂𑀬𑁆𑀬𑁂, 𑀢𑁂𑀦𑀫𑁆𑀳 𑀢𑀼𑀝𑁆𑀞𑀸 𑀅𑀢𑀺𑀭𑀺𑀯 𑀓𑀮𑁆𑀬𑀭𑀽𑀧𑀸.

𑁬𑁮𑁯. ‘‘𑀲𑁄 𑀲𑀩𑁆𑀩𑀲𑀢𑁆𑀢𑀼𑀢𑁆𑀢𑀫𑁄 𑀅𑀕𑁆𑀕𑀧𑀼𑀕𑁆𑀕𑀮𑁄, 𑀦𑀭𑀸𑀲𑀪𑁄 𑀲𑀩𑁆𑀩𑀧𑀚𑀸𑀦𑀫𑀼𑀢𑁆𑀢𑀫𑁄;

𑀯𑀢𑁆𑀢𑁂𑀲𑁆𑀲𑀢𑀺 𑀘𑀓𑁆𑀓𑀫𑀺𑀲𑀺𑀯𑁆𑀳𑀬𑁂 𑀯𑀦𑁂, 𑀦𑀤𑀁𑀯 𑀲𑀻𑀳𑁄 𑀩𑀮𑀯𑀸 𑀫𑀺𑀕𑀸𑀪𑀺𑀪𑀽’’.

𑁬𑁯𑁦. 𑀢𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀢𑀼𑀭𑀺𑀢𑀫𑀯𑀲𑀭𑀻 𑀲𑁄, 𑀲𑀼𑀤𑁆𑀥𑁄𑀤𑀦𑀲𑁆𑀲 𑀢𑀤 𑀪𑀯𑀦𑀁 𑀉𑀧𑀸𑀯𑀺𑀲𑀺 [𑀉𑀧𑀸𑀕𑀫𑀺 (𑀲𑀻. 𑀧𑀻.)];

𑀦𑀺𑀲𑀚𑁆𑀚 𑀢𑀢𑁆𑀣 𑀇𑀤𑀫𑀯𑁄𑀘𑀸𑀲𑀺 𑀲𑀓𑁆𑀬𑁂, ‘‘𑀓𑀼𑀳𑀺𑀁 𑀓𑀼𑀫𑀸𑀭𑁄 𑀅𑀳𑀫𑀧𑀺 𑀤𑀝𑁆𑀞𑀼𑀓𑀸𑀫𑁄’’.

𑁬𑁯𑁧. 𑀢𑀢𑁄 𑀓𑀼𑀫𑀸𑀭𑀁 𑀚𑀮𑀺𑀢𑀫𑀺𑀯 𑀲𑀼𑀯𑀡𑁆𑀡𑀁, 𑀉𑀓𑁆𑀓𑀸𑀫𑀼𑀔𑁂𑀯 𑀲𑀼𑀓𑀼𑀲𑀮𑀲𑀫𑁆𑀧𑀳𑀝𑁆𑀞𑀁 [𑀲𑀼𑀓𑀼𑀲𑀮𑁂𑀦 𑀲𑀫𑁆𑀧𑀳𑀝𑁆𑀞𑀁 (𑀓.)];

𑀤𑀤𑁆𑀤𑀮𑁆𑀮𑀫𑀸𑀦𑀁 [𑀤𑀤𑁆𑀤𑀴𑁆𑀳𑀫𑀸𑀦𑀁 (𑀓.)] 𑀲𑀺𑀭𑀺𑀬𑀸 𑀅𑀦𑁄𑀫𑀯𑀡𑁆𑀡𑀁, 𑀤𑀲𑁆𑀲𑁂𑀲𑀼 𑀧𑀼𑀢𑁆𑀢𑀁 𑀅𑀲𑀺𑀢𑀯𑁆𑀳𑀬𑀲𑁆𑀲 𑀲𑀓𑁆𑀬𑀸.

𑁬𑁯𑁨. 𑀤𑀺𑀲𑁆𑀯𑀸 𑀓𑀼𑀫𑀸𑀭𑀁 𑀲𑀺𑀔𑀺𑀫𑀺𑀯 𑀧𑀚𑁆𑀚𑀮𑀦𑁆𑀢𑀁, 𑀢𑀸𑀭𑀸𑀲𑀪𑀁𑀯 𑀦𑀪𑀲𑀺𑀕𑀫𑀁 𑀯𑀺𑀲𑀼𑀤𑁆𑀥𑀁;

𑀲𑀽𑀭𑀺𑀬𑀁 𑀢𑀧𑀦𑁆𑀢𑀁 𑀲𑀭𑀤𑀭𑀺𑀯𑀩𑁆𑀪𑀫𑀼𑀢𑁆𑀢𑀁, 𑀆𑀦𑀦𑁆𑀤𑀚𑀸𑀢𑁄 𑀯𑀺𑀧𑀼𑀮𑀫𑀮𑀢𑁆𑀣 𑀧𑀻𑀢𑀺𑀁.

𑁬𑁯𑁩. 𑀅𑀦𑁂𑀓𑀲𑀸𑀔𑀜𑁆𑀘 𑀲𑀳𑀲𑁆𑀲𑀫𑀡𑁆𑀟𑀮𑀁, 𑀙𑀢𑁆𑀢𑀁 𑀫𑀭𑀽 𑀥𑀸𑀭𑀬𑀼𑀫𑀦𑁆𑀢𑀮𑀺𑀓𑁆𑀔𑁂;

𑀲𑀼𑀯𑀡𑁆𑀡𑀤𑀡𑁆𑀟𑀸 𑀯𑀻𑀢𑀺𑀧𑀢𑀦𑁆𑀢𑀺 𑀘𑀸𑀫𑀭𑀸, 𑀦 𑀤𑀺𑀲𑁆𑀲𑀭𑁂 𑀘𑀸𑀫𑀭𑀙𑀢𑁆𑀢𑀕𑀸𑀳𑀓𑀸.

𑁬𑁯𑁪. 𑀤𑀺𑀲𑁆𑀯𑀸 𑀚𑀝𑀻 𑀓𑀡𑁆𑀳𑀲𑀺𑀭𑀺𑀯𑁆𑀳𑀬𑁄 𑀇𑀲𑀺, 𑀲𑀼𑀯𑀡𑁆𑀡𑀦𑀺𑀓𑁆𑀔𑀁 𑀯𑀺𑀬 𑀧𑀡𑁆𑀟𑀼𑀓𑀫𑁆𑀩𑀮𑁂;

𑀲𑁂𑀢𑀜𑁆𑀘 𑀙𑀢𑁆𑀢𑀁 𑀥𑀭𑀺𑀬𑀦𑁆𑀢 [𑀥𑀸𑀭𑀺𑀬𑀦𑁆𑀢 (𑀲𑁆𑀬𑀸.), 𑀥𑀸𑀭𑀬𑀦𑁆𑀢𑀁 (𑀲𑀻. 𑀓.)] 𑀫𑀼𑀤𑁆𑀥𑀦𑀺, 𑀉𑀤𑀕𑁆𑀕𑀘𑀺𑀢𑁆𑀢𑁄 𑀲𑀼𑀫𑀦𑁄 𑀧𑀝𑀺𑀕𑁆𑀕𑀳𑁂.

𑁬𑁯𑁫. 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀧𑀦 𑀲𑀓𑁆𑀬𑀧𑀼𑀗𑁆𑀕𑀯𑀁, 𑀚𑀺𑀕𑀻𑀲𑀢𑁄 [𑀚𑀺𑀕𑀺𑀁𑀲𑀓𑁄 (𑀲𑀻. 𑀲𑁆𑀬𑀸. 𑀧𑀻.)] 𑀮𑀓𑁆𑀔𑀡𑀫𑀦𑁆𑀢𑀧𑀸𑀭𑀕𑀽;

𑀧𑀲𑀦𑁆𑀦𑀘𑀺𑀢𑁆𑀢𑁄 𑀕𑀺𑀭𑀫𑀩𑁆𑀪𑀼𑀤𑀻𑀭𑀬𑀺, ‘‘𑀅𑀦𑀼𑀢𑁆𑀢𑀭𑀸𑀬𑀁 𑀤𑁆𑀯𑀺𑀧𑀤𑀸𑀦𑀫𑀼𑀢𑁆𑀢𑀫𑁄’’ [𑀤𑀺𑀧𑀤𑀸𑀦𑀫𑀼𑀢𑁆𑀢𑀫𑁄 (𑀲𑀻. 𑀲𑁆𑀬𑀸. 𑀧𑀻.)].

𑁬𑁯𑁬. 𑀅𑀣𑀢𑁆𑀢𑀦𑁄 𑀕𑀫𑀦𑀫𑀦𑀼𑀲𑁆𑀲𑀭𑀦𑁆𑀢𑁄, 𑀅𑀓𑀮𑁆𑀬𑀭𑀽𑀧𑁄 𑀕𑀴𑀬𑀢𑀺 𑀅𑀲𑁆𑀲𑀼𑀓𑀸𑀦𑀺;

𑀤𑀺𑀲𑁆𑀯𑀸𑀦 𑀲𑀓𑁆𑀬𑀸 𑀇𑀲𑀺𑀫𑀯𑁄𑀘𑀼𑀁 𑀭𑀼𑀤𑀦𑁆𑀢𑀁,

‘‘𑀦𑁄 𑀘𑁂 𑀓𑀼𑀫𑀸𑀭𑁂 𑀪𑀯𑀺𑀲𑁆𑀲𑀢𑀺 𑀅𑀦𑁆𑀢𑀭𑀸𑀬𑁄’’.

𑁬𑁯𑁭. 𑀤𑀺𑀲𑁆𑀯𑀸𑀦 𑀲𑀓𑁆𑀬𑁂 𑀇𑀲𑀺𑀫𑀯𑁄𑀘 𑀅𑀓𑀮𑁆𑀬𑁂, ‘‘𑀦𑀸𑀳𑀁 𑀓𑀼𑀫𑀸𑀭𑁂 𑀅𑀳𑀺𑀢𑀫𑀦𑀼𑀲𑁆𑀲𑀭𑀸𑀫𑀺;

𑀦 𑀘𑀸𑀧𑀺𑀫𑀲𑁆𑀲 𑀪𑀯𑀺𑀲𑁆𑀲𑀢𑀺 𑀅𑀦𑁆𑀢𑀭𑀸𑀬𑁄, 𑀦 𑀑𑀭𑀓𑀸𑀬𑀁 𑀅𑀥𑀺𑀫𑀸𑀦𑀲𑀸 [𑀅𑀥𑀺𑀫𑀦𑀲𑀸 (𑀲𑀻. 𑀲𑁆𑀬𑀸.)] 𑀪𑀯𑀸𑀣.

𑁬𑁯𑁮. ‘‘𑀲𑀫𑁆𑀩𑁄𑀥𑀺𑀬𑀕𑁆𑀕𑀁 𑀨𑀼𑀲𑀺𑀲𑁆𑀲𑀢𑀸𑀬𑀁 𑀓𑀼𑀫𑀸𑀭𑁄, 𑀲𑁄 𑀥𑀫𑁆𑀫𑀘𑀓𑁆𑀓𑀁 𑀧𑀭𑀫𑀯𑀺𑀲𑀼𑀤𑁆𑀥𑀤𑀲𑁆𑀲𑀻;

𑀯𑀢𑁆𑀢𑁂𑀲𑁆𑀲𑀢𑀸𑀬𑀁 𑀩𑀳𑀼𑀚𑀦𑀳𑀺𑀢𑀸𑀦𑀼𑀓𑀫𑁆𑀧𑀻, 𑀯𑀺𑀢𑁆𑀣𑀸𑀭𑀺𑀓𑀲𑁆𑀲 𑀪𑀯𑀺𑀲𑁆𑀲𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁.

𑁬𑁯𑁯. ‘‘𑀫𑀫𑀜𑁆𑀘 𑀆𑀬𑀼 𑀦 𑀘𑀺𑀭𑀫𑀺𑀥𑀸𑀯𑀲𑁂𑀲𑁄, 𑀅𑀣𑀦𑁆𑀢𑀭𑀸 𑀫𑁂 𑀪𑀯𑀺𑀲𑁆𑀲𑀢𑀺 𑀓𑀸𑀮𑀓𑀺𑀭𑀺𑀬𑀸;

𑀲𑁄𑀳𑀁 𑀦 𑀲𑁄𑀲𑁆𑀲𑀁 [𑀲𑀼𑀲𑁆𑀲𑀁 (𑀲𑀻. 𑀲𑁆𑀬𑀸.)] 𑀅𑀲𑀫𑀥𑀼𑀭𑀲𑁆𑀲 𑀥𑀫𑁆𑀫𑀁, 𑀢𑁂𑀦𑀫𑁆𑀳𑀺 𑀅𑀝𑁆𑀝𑁄 𑀩𑁆𑀬𑀲𑀦𑀁𑀕𑀢𑁄 𑀅𑀖𑀸𑀯𑀻’’.

𑁭𑁦𑁦. 𑀲𑁄 𑀲𑀸𑀓𑀺𑀬𑀸𑀦𑀁 𑀯𑀺𑀧𑀼𑀮𑀁 𑀚𑀦𑁂𑀢𑁆𑀯𑀸 𑀧𑀻𑀢𑀺𑀁, 𑀅𑀦𑁆𑀢𑁂𑀧𑀼𑀭𑀫𑁆𑀳𑀸 𑀦𑀺𑀕𑁆𑀕𑀫𑀸 [𑀦𑀺𑀭𑀕𑀫𑀸 (𑀲𑀻. 𑀲𑁆𑀬𑀸.), 𑀦𑀺𑀕𑀫𑀸 (𑀓. 𑀲𑀻.), 𑀦𑀺𑀭𑀕𑀫 (𑀧𑀻.)] 𑀩𑁆𑀭𑀳𑁆𑀫𑀘𑀸𑀭𑀻;

𑀲𑁄 𑀪𑀸𑀕𑀺𑀦𑁂𑀬𑁆𑀬𑀁 𑀲𑀬𑀁 𑀅𑀦𑀼𑀓𑀫𑁆𑀧𑀫𑀸𑀦𑁄, 𑀲𑀫𑀸𑀤𑀧𑁂𑀲𑀺 𑀅𑀲𑀫𑀥𑀼𑀭𑀲𑁆𑀲 𑀥𑀫𑁆𑀫𑁂.

𑁭𑁦𑁧. ‘‘𑀩𑀼𑀤𑁆𑀥𑁄𑀢𑀺 𑀖𑁄𑀲𑀁 𑀬𑀤 [𑀬𑀤𑀺 (𑀲𑁆𑀬𑀸. 𑀓.)] 𑀧𑀭𑀢𑁄 𑀲𑀼𑀡𑀸𑀲𑀺, 𑀲𑀫𑁆𑀩𑁄𑀥𑀺𑀧𑀢𑁆𑀢𑁄 𑀯𑀺𑀯𑀭𑀢𑀺 𑀥𑀫𑁆𑀫𑀫𑀕𑁆𑀕𑀁;

𑀕𑀦𑁆𑀢𑁆𑀯𑀸𑀦 𑀢𑀢𑁆𑀣 𑀲𑀫𑀬𑀁 𑀧𑀭𑀺𑀧𑀼𑀘𑁆𑀙𑀫𑀸𑀦𑁄 [𑀲𑀬𑀁 𑀧𑀭𑀺𑀧𑀼𑀘𑁆𑀙𑀺𑀬𑀸𑀦𑁄 (𑀲𑀻. 𑀲𑁆𑀬𑀸.)], 𑀘𑀭𑀲𑁆𑀲𑀼 𑀢𑀲𑁆𑀫𑀺𑀁 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁’’.

𑁭𑁦𑁨. 𑀢𑁂𑀦𑀸𑀦𑀼𑀲𑀺𑀝𑁆𑀞𑁄 𑀳𑀺𑀢𑀫𑀦𑁂𑀦 𑀢𑀸𑀤𑀺𑀦𑀸, 𑀅𑀦𑀸𑀕𑀢𑁂 𑀧𑀭𑀫𑀯𑀺𑀲𑀼𑀤𑁆𑀥𑀤𑀲𑁆𑀲𑀺𑀦𑀸;

𑀲𑁄 𑀦𑀸𑀮𑀓𑁄 𑀉𑀧𑀘𑀺𑀢𑀧𑀼𑀜𑁆𑀜𑀲𑀜𑁆𑀘𑀬𑁄, 𑀚𑀺𑀦𑀁 𑀧𑀢𑀺𑀓𑁆𑀔𑀁 [𑀧𑀢𑀺 + 𑀇𑀓𑁆𑀔𑀁 = 𑀧𑀢𑀺𑀓𑁆𑀔𑀁] 𑀧𑀭𑀺𑀯𑀲𑀺 𑀭𑀓𑁆𑀔𑀺𑀢𑀺𑀦𑁆𑀤𑁆𑀭𑀺𑀬𑁄.

𑁭𑁦𑁩. 𑀲𑀼𑀢𑁆𑀯𑀸𑀦 𑀖𑁄𑀲𑀁 𑀚𑀺𑀦𑀯𑀭𑀘𑀓𑁆𑀓𑀯𑀢𑁆𑀢𑀦𑁂, 𑀕𑀦𑁆𑀢𑁆𑀯𑀸𑀦 𑀤𑀺𑀲𑁆𑀯𑀸 𑀇𑀲𑀺𑀦𑀺𑀲𑀪𑀁 𑀧𑀲𑀦𑁆𑀦𑁄;

𑀫𑁄𑀦𑁂𑀬𑁆𑀬𑀲𑁂𑀝𑁆𑀞𑀁 𑀫𑀼𑀦𑀺𑀧𑀯𑀭𑀁 𑀅𑀧𑀼𑀘𑁆𑀙𑀺, 𑀲𑀫𑀸𑀕𑀢𑁂 𑀅𑀲𑀺𑀢𑀸𑀯𑁆𑀳𑀬𑀲𑁆𑀲 𑀲𑀸𑀲𑀦𑁂𑀢𑀺.

𑀯𑀢𑁆𑀣𑀼𑀕𑀸𑀣𑀸 𑀦𑀺𑀝𑁆𑀞𑀺𑀢𑀸.

𑁭𑁦𑁪. ‘‘𑀅𑀜𑁆𑀜𑀸𑀢𑀫𑁂𑀢𑀁 𑀯𑀘𑀦𑀁, 𑀅𑀲𑀺𑀢𑀲𑁆𑀲 𑀬𑀣𑀸𑀢𑀣𑀁;

𑀢𑀁 𑀢𑀁 𑀕𑁄𑀢𑀫 𑀧𑀼𑀘𑁆𑀙𑀸𑀫𑀺, 𑀲𑀩𑁆𑀩𑀥𑀫𑁆𑀫𑀸𑀦 𑀧𑀸𑀭𑀕𑀼𑀁.

𑁭𑁦𑁫. ‘‘𑀅𑀦𑀕𑀸𑀭𑀺𑀬𑀼𑀧𑁂𑀢𑀲𑁆𑀲, 𑀪𑀺𑀓𑁆𑀔𑀸𑀘𑀭𑀺𑀬𑀁 𑀚𑀺𑀕𑀻𑀲𑀢𑁄;

𑀫𑀼𑀦𑀺 𑀧𑀩𑁆𑀭𑀽𑀳𑀺 𑀫𑁂 𑀧𑀼𑀝𑁆𑀞𑁄, 𑀫𑁄𑀦𑁂𑀬𑁆𑀬𑀁 𑀉𑀢𑁆𑀢𑀫𑀁 𑀧𑀤𑀁’’.

𑁭𑁦𑁬. ‘‘𑀫𑁄𑀦𑁂𑀬𑁆𑀬𑀁 𑀢𑁂 𑀉𑀧𑀜𑁆𑀜𑀺𑀲𑁆𑀲𑀁, (𑀇𑀢𑀺 𑀪𑀕𑀯𑀸) 𑀤𑀼𑀓𑁆𑀓𑀭𑀁 𑀤𑀼𑀭𑀪𑀺𑀲𑀫𑁆𑀪𑀯𑀁;

𑀳𑀦𑁆𑀤 𑀢𑁂 𑀦𑀁 𑀧𑀯𑀓𑁆𑀔𑀸𑀫𑀺, 𑀲𑀦𑁆𑀣𑀫𑁆𑀪𑀲𑁆𑀲𑀼 𑀤𑀴𑁆𑀳𑁄 𑀪𑀯.

𑁭𑁦𑁭. ‘‘𑀲𑀫𑀸𑀦𑀪𑀸𑀕𑀁 𑀓𑀼𑀩𑁆𑀩𑁂𑀣, 𑀕𑀸𑀫𑁂 𑀅𑀓𑁆𑀓𑀼𑀝𑁆𑀞𑀯𑀦𑁆𑀤𑀺𑀢𑀁;

𑀫𑀦𑁄𑀧𑀤𑁄𑀲𑀁 𑀭𑀓𑁆𑀔𑁂𑀬𑁆𑀬, 𑀲𑀦𑁆𑀢𑁄 𑀅𑀦𑀼𑀡𑁆𑀡𑀢𑁄 𑀘𑀭𑁂.

𑁭𑁦𑁮. ‘‘𑀉𑀘𑁆𑀘𑀸𑀯𑀘𑀸 𑀦𑀺𑀘𑁆𑀙𑀭𑀦𑁆𑀢𑀺, 𑀤𑀸𑀬𑁂 𑀅𑀕𑁆𑀕𑀺𑀲𑀺𑀔𑀽𑀧𑀫𑀸;

𑀦𑀸𑀭𑀺𑀬𑁄 𑀫𑀼𑀦𑀺𑀁 𑀧𑀮𑁄𑀪𑁂𑀦𑁆𑀢𑀺, 𑀢𑀸𑀲𑀼 𑀢𑀁 𑀫𑀸 𑀧𑀮𑁄𑀪𑀬𑀼𑀁.

𑁭𑁦𑁯. ‘‘𑀯𑀺𑀭𑀢𑁄 𑀫𑁂𑀣𑀼𑀦𑀸 𑀥𑀫𑁆𑀫𑀸, 𑀳𑀺𑀢𑁆𑀯𑀸 𑀓𑀸𑀫𑁂 𑀧𑀭𑁄𑀧𑀭𑁂 [𑀧𑀭𑁄𑀯𑀭𑁂 (𑀲𑀻. 𑀧𑀻.), 𑀯𑀭𑀸𑀯𑀭𑁂 (𑀲𑁆𑀬𑀸.)];

𑀅𑀯𑀺𑀭𑀼𑀤𑁆𑀥𑁄 𑀅𑀲𑀸𑀭𑀢𑁆𑀢𑁄, 𑀧𑀸𑀡𑁂𑀲𑀼 𑀢𑀲𑀣𑀸𑀯𑀭𑁂.

𑁭𑁧𑁦. ‘‘𑀬𑀣𑀸 𑀅𑀳𑀁 𑀢𑀣𑀸 𑀏𑀢𑁂, 𑀬𑀣𑀸 𑀏𑀢𑁂 𑀢𑀣𑀸 𑀅𑀳𑀁;

𑀅𑀢𑁆𑀢𑀸𑀦𑀁 𑀉𑀧𑀫𑀁 𑀓𑀢𑁆𑀯𑀸, 𑀦 𑀳𑀦𑁂𑀬𑁆𑀬 𑀦 𑀖𑀸𑀢𑀬𑁂.

𑁭𑁧𑁧. ‘‘𑀳𑀺𑀢𑁆𑀯𑀸 𑀇𑀘𑁆𑀙𑀜𑁆𑀘 𑀮𑁄𑀪𑀜𑁆𑀘, 𑀬𑀢𑁆𑀣 𑀲𑀢𑁆𑀢𑁄 𑀧𑀼𑀣𑀼𑀚𑁆𑀚𑀦𑁄;

𑀘𑀓𑁆𑀔𑀼𑀫𑀸 𑀧𑀝𑀺𑀧𑀚𑁆𑀚𑁂𑀬𑁆𑀬, 𑀢𑀭𑁂𑀬𑁆𑀬 𑀦𑀭𑀓𑀁 𑀇𑀫𑀁.

𑁭𑁧𑁨. ‘‘𑀊𑀦𑀽𑀤𑀭𑁄 𑀫𑀺𑀢𑀸𑀳𑀸𑀭𑁄, 𑀅𑀧𑁆𑀧𑀺𑀘𑁆𑀙𑀲𑁆𑀲 𑀅𑀮𑁄𑀮𑀼𑀧𑁄;

𑀲𑀤𑀸 [𑀲 𑀯𑁂 (𑀧𑀻.)] 𑀇𑀘𑁆𑀙𑀸𑀬 𑀦𑀺𑀘𑁆𑀙𑀸𑀢𑁄, 𑀅𑀦𑀺𑀘𑁆𑀙𑁄 𑀳𑁄𑀢𑀺 𑀦𑀺𑀩𑁆𑀩𑀼𑀢𑁄.

𑁭𑁧𑁩. ‘‘𑀲 𑀧𑀺𑀡𑁆𑀟𑀘𑀸𑀭𑀁 𑀘𑀭𑀺𑀢𑁆𑀯𑀸, 𑀯𑀦𑀦𑁆𑀢𑀫𑀪𑀺𑀳𑀸𑀭𑀬𑁂;

𑀉𑀧𑀝𑁆𑀞𑀺𑀢𑁄 𑀭𑀼𑀓𑁆𑀔𑀫𑀽𑀮𑀲𑁆𑀫𑀺𑀁, 𑀆𑀲𑀦𑀽𑀧𑀕𑀢𑁄 𑀫𑀼𑀦𑀺.

𑁭𑁧𑁪. ‘‘𑀲 𑀛𑀸𑀦𑀧𑀲𑀼𑀢𑁄 𑀥𑀻𑀭𑁄, 𑀯𑀦𑀦𑁆𑀢𑁂 𑀭𑀫𑀺𑀢𑁄 𑀲𑀺𑀬𑀸;

𑀛𑀸𑀬𑁂𑀣 𑀭𑀼𑀓𑁆𑀔𑀫𑀽𑀮𑀲𑁆𑀫𑀺𑀁, 𑀅𑀢𑁆𑀢𑀸𑀦𑀫𑀪𑀺𑀢𑁄𑀲𑀬𑀁.

𑁭𑁧𑁫. ‘‘𑀢𑀢𑁄 𑀭𑀢𑁆𑀬𑀸 𑀯𑀺𑀯𑀲𑀸𑀦𑁂 [𑀯𑀺𑀯𑀲𑀦𑁂 (𑀲𑀻. 𑀲𑁆𑀬𑀸. 𑀧𑀻.)], 𑀕𑀸𑀫𑀦𑁆𑀢𑀫𑀪𑀺𑀳𑀸𑀭𑀬𑁂;

𑀅𑀯𑁆𑀳𑀸𑀦𑀁 𑀦𑀸𑀪𑀺𑀦𑀦𑁆𑀤𑁂𑀬𑁆𑀬, 𑀅𑀪𑀺𑀳𑀸𑀭𑀜𑁆𑀘 𑀕𑀸𑀫𑀢𑁄.

𑁭𑁧𑁬. ‘‘𑀦 𑀫𑀼𑀦𑀻 𑀕𑀸𑀫𑀫𑀸𑀕𑀫𑁆𑀫, 𑀓𑀼𑀮𑁂𑀲𑀼 𑀲𑀳𑀲𑀸 𑀘𑀭𑁂;

𑀖𑀸𑀲𑁂𑀲𑀦𑀁 𑀙𑀺𑀦𑁆𑀦𑀓𑀣𑁄, 𑀦 𑀯𑀸𑀘𑀁 𑀧𑀬𑀼𑀢𑀁 𑀪𑀡𑁂.

𑁭𑁧𑁭. ‘‘𑀅𑀮𑀢𑁆𑀣𑀁 𑀬𑀤𑀺𑀤𑀁 𑀲𑀸𑀥𑀼, 𑀦𑀸𑀮𑀢𑁆𑀣𑀁 𑀓𑀼𑀲𑀮𑀁 𑀇𑀢𑀺;

𑀉𑀪𑀬𑁂𑀦𑁂𑀯 𑀲𑁄 𑀢𑀸𑀤𑀻, 𑀭𑀼𑀓𑁆𑀔𑀁𑀯𑀼𑀧𑀦𑀺𑀯𑀢𑁆𑀢𑀢𑀺 [𑀭𑀼𑀓𑁆𑀔𑀁𑀯𑀼’𑀧𑀢𑀺𑀯𑀢𑁆𑀢𑀢𑀺 (𑀓.), 𑀭𑀼𑀓𑁆𑀔𑀁𑀯 𑀉𑀧𑀸𑀢𑀺𑀯𑀢𑁆𑀢𑀢𑀺 (𑀲𑁆𑀬𑀸.)].

𑁭𑁧𑁮. ‘‘𑀲 𑀧𑀢𑁆𑀢𑀧𑀸𑀡𑀺 𑀯𑀺𑀘𑀭𑀦𑁆𑀢𑁄, 𑀅𑀫𑀽𑀕𑁄 𑀫𑀽𑀕𑀲𑀫𑁆𑀫𑀢𑁄;

𑀅𑀧𑁆𑀧𑀁 𑀤𑀸𑀦𑀁 𑀦 𑀳𑀻𑀴𑁂𑀬𑁆𑀬, 𑀤𑀸𑀢𑀸𑀭𑀁 𑀦𑀸𑀯𑀚𑀸𑀦𑀺𑀬𑀸.

𑁭𑁧𑁯. ‘‘𑀉𑀘𑁆𑀘𑀸𑀯𑀘𑀸 𑀳𑀺 𑀧𑀝𑀺𑀧𑀤𑀸, 𑀲𑀫𑀡𑁂𑀦 𑀧𑀓𑀸𑀲𑀺𑀢𑀸;

𑀦 𑀧𑀸𑀭𑀁 𑀤𑀺𑀕𑀼𑀡𑀁 𑀬𑀦𑁆𑀢𑀺, 𑀦𑀬𑀺𑀤𑀁 𑀏𑀓𑀕𑀼𑀡𑀁 𑀫𑀼𑀢𑀁.

𑁭𑁨𑁦. ‘‘𑀬𑀲𑁆𑀲 𑀘 𑀯𑀺𑀲𑀢𑀸 𑀦𑀢𑁆𑀣𑀺, 𑀙𑀺𑀦𑁆𑀦𑀲𑁄𑀢𑀲𑁆𑀲 𑀪𑀺𑀓𑁆𑀔𑀼𑀦𑁄;

𑀓𑀺𑀘𑁆𑀘𑀸𑀓𑀺𑀘𑁆𑀘𑀧𑁆𑀧𑀳𑀻𑀦𑀲𑁆𑀲, 𑀧𑀭𑀺𑀴𑀸𑀳𑁄 𑀦 𑀯𑀺𑀚𑁆𑀚𑀢𑀺.

𑁭𑁨𑁧. ‘‘𑀫𑁄𑀦𑁂𑀬𑁆𑀬𑀁 𑀢𑁂 𑀉𑀧𑀜𑁆𑀜𑀺𑀲𑁆𑀲𑀁, 𑀔𑀼𑀭𑀥𑀸𑀭𑀽𑀧𑀫𑁄 𑀪𑀯𑁂;

𑀚𑀺𑀯𑁆𑀳𑀸𑀬 𑀢𑀸𑀮𑀼𑀫𑀸𑀳𑀘𑁆𑀘, 𑀉𑀤𑀭𑁂 𑀲𑀜𑁆𑀜𑀢𑁄 𑀲𑀺𑀬𑀸.

𑁭𑁨𑁨. ‘‘𑀅𑀮𑀻𑀦𑀘𑀺𑀢𑁆𑀢𑁄 𑀘 𑀲𑀺𑀬𑀸, 𑀦 𑀘𑀸𑀧𑀺 𑀩𑀳𑀼 𑀘𑀺𑀦𑁆𑀢𑀬𑁂;

𑀦𑀺𑀭𑀸𑀫𑀕𑀦𑁆𑀥𑁄 𑀅𑀲𑀺𑀢𑁄, 𑀩𑁆𑀭𑀳𑁆𑀫𑀘𑀭𑀺𑀬𑀧𑀭𑀸𑀬𑀡𑁄.

𑁭𑁨𑁩. ‘‘𑀏𑀓𑀸𑀲𑀦𑀲𑁆𑀲 𑀲𑀺𑀓𑁆𑀔𑁂𑀣, 𑀲𑀫𑀡𑀽𑀧𑀸𑀲𑀦𑀲𑁆𑀲 𑀘;

𑀏𑀓𑀢𑁆𑀢𑀁 𑀫𑁄𑀦𑀫𑀓𑁆𑀔𑀸𑀢𑀁, 𑀏𑀓𑁄 𑀘𑁂 𑀅𑀪𑀺𑀭𑀫𑀺𑀲𑁆𑀲𑀲𑀺;

𑀅𑀣 𑀪𑀸𑀳𑀺𑀲𑀺 [𑀪𑀸𑀲𑀺𑀳𑀺 (𑀲𑀻. 𑀲𑁆𑀬𑀸. 𑀧𑀻.)] 𑀤𑀲𑀤𑀺𑀲𑀸.

𑁭𑁨𑁪. ‘‘𑀲𑀼𑀢𑁆𑀯𑀸 𑀥𑀻𑀭𑀸𑀦𑀁 𑀦𑀺𑀕𑁆𑀖𑁄𑀲𑀁, 𑀛𑀸𑀬𑀻𑀦𑀁 𑀓𑀸𑀫𑀘𑀸𑀕𑀺𑀦𑀁;

𑀢𑀢𑁄 𑀳𑀺𑀭𑀺𑀜𑁆𑀘 𑀲𑀤𑁆𑀥𑀜𑁆𑀘, 𑀪𑀺𑀬𑁆𑀬𑁄 𑀓𑀼𑀩𑁆𑀩𑁂𑀣 𑀫𑀸𑀫𑀓𑁄.

𑁭𑁨𑁫. ‘‘𑀢𑀁 𑀦𑀤𑀻𑀳𑀺 𑀯𑀺𑀚𑀸𑀦𑀸𑀣, 𑀲𑁄𑀩𑁆𑀪𑁂𑀲𑀼 𑀧𑀤𑀭𑁂𑀲𑀼 𑀘;

𑀲𑀡𑀦𑁆𑀢𑀸 𑀬𑀦𑁆𑀢𑀺 𑀓𑀼𑀲𑁄𑀩𑁆𑀪𑀸 [𑀓𑀼𑀲𑁆𑀲𑀼𑀩𑁆𑀪𑀸 (𑀲𑀻.)], 𑀢𑀼𑀡𑁆𑀳𑀻𑀬𑀦𑁆𑀢𑀺 𑀫𑀳𑁄𑀤𑀥𑀻.

𑁭𑁨𑁬. ‘‘𑀬𑀤𑀽𑀦𑀓𑀁 𑀢𑀁 𑀲𑀡𑀢𑀺, 𑀬𑀁 𑀧𑀽𑀭𑀁 𑀲𑀦𑁆𑀢𑀫𑁂𑀯 𑀢𑀁;

𑀅𑀟𑁆𑀠𑀓𑀼𑀫𑁆𑀪𑀽𑀧𑀫𑁄 𑀩𑀸𑀮𑁄, 𑀭𑀳𑀤𑁄 𑀧𑀽𑀭𑁄𑀯 𑀧𑀡𑁆𑀟𑀺𑀢𑁄.

𑁭𑁨𑁭. ‘‘𑀬𑀁 𑀲𑀫𑀡𑁄 𑀩𑀳𑀼𑀁 𑀪𑀸𑀲𑀢𑀺, 𑀉𑀧𑁂𑀢𑀁 𑀅𑀢𑁆𑀣𑀲𑀜𑁆𑀳𑀺𑀢𑀁;

𑀚𑀸𑀦𑀁 𑀲𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀚𑀸𑀦𑀁 𑀲𑁄 𑀩𑀳𑀼 𑀪𑀸𑀲𑀢𑀺.

𑁭𑁨𑁮. ‘‘𑀬𑁄 𑀘 𑀚𑀸𑀦𑀁 𑀲𑀁𑀬𑀢𑀢𑁆𑀢𑁄, 𑀚𑀸𑀦𑀁 𑀦 𑀩𑀳𑀼 𑀪𑀸𑀲𑀢𑀺;

𑀲 𑀫𑀼𑀦𑀻 𑀫𑁄𑀦𑀫𑀭𑀳𑀢𑀺, 𑀲 𑀫𑀼𑀦𑀻 𑀫𑁄𑀦𑀫𑀚𑁆𑀛𑀕𑀸’’𑀢𑀺.

𑀦𑀸𑀮𑀓𑀲𑀼𑀢𑁆𑀢𑀁 𑀏𑀓𑀸𑀤𑀲𑀫𑀁 𑀦𑀺𑀝𑁆𑀞𑀺𑀢𑀁.