𑁧𑁨. 𑀤𑁆𑀯𑀬𑀢𑀸𑀦𑀼𑀧𑀲𑁆𑀲𑀦𑀸𑀲𑀼𑀢𑁆𑀢𑀁

𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀧𑀼𑀩𑁆𑀩𑀸𑀭𑀸𑀫𑁂 𑀫𑀺𑀕𑀸𑀭𑀫𑀸𑀢𑀼𑀧𑀸𑀲𑀸𑀤𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀸 𑀢𑀤𑀳𑀼𑀧𑁄𑀲𑀣𑁂 𑀧𑀦𑁆𑀦𑀭𑀲𑁂 𑀧𑀼𑀡𑁆𑀡𑀸𑀬 𑀧𑀼𑀡𑁆𑀡𑀫𑀸𑀬 𑀭𑀢𑁆𑀢𑀺𑀬𑀸 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀅𑀩𑁆𑀪𑁄𑀓𑀸𑀲𑁂 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺. 𑀅𑀣 𑀔𑁄 𑀪𑀕𑀯𑀸 𑀢𑀼𑀡𑁆𑀳𑀻𑀪𑀽𑀢𑀁 𑀢𑀼𑀡𑁆𑀳𑀻𑀪𑀽𑀢𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀅𑀦𑀼𑀯𑀺𑀮𑁄𑀓𑁂𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋

‘‘‘𑀬𑁂 𑀢𑁂, 𑀪𑀺𑀓𑁆𑀔𑀯𑁂, 𑀓𑀼𑀲𑀮𑀸 𑀥𑀫𑁆𑀫𑀸 𑀅𑀭𑀺𑀬𑀸 𑀦𑀺𑀬𑁆𑀬𑀸𑀦𑀺𑀓𑀸 𑀲𑀫𑁆𑀩𑁄𑀥𑀕𑀸𑀫𑀺𑀦𑁄, 𑀢𑁂𑀲𑀁 𑀯𑁄, 𑀪𑀺𑀓𑁆𑀔𑀯𑁂, 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀅𑀭𑀺𑀬𑀸𑀦𑀁 𑀦𑀺𑀬𑁆𑀬𑀸𑀦𑀺𑀓𑀸𑀦𑀁 𑀲𑀫𑁆𑀩𑁄𑀥𑀕𑀸𑀫𑀻𑀦𑀁 𑀓𑀸 𑀉𑀧𑀦𑀺𑀲𑀸 𑀲𑀯𑀦𑀸𑀬𑀸’𑀢𑀺 𑀇𑀢𑀺 𑀘𑁂, 𑀪𑀺𑀓𑁆𑀔𑀯𑁂, 𑀧𑀼𑀘𑁆𑀙𑀺𑀢𑀸𑀭𑁄 𑀅𑀲𑁆𑀲𑀼, 𑀢𑁂 𑀏𑀯𑀫𑀲𑁆𑀲𑀼 𑀯𑀘𑀦𑀻𑀬𑀸 𑁋 ‘𑀬𑀸𑀯𑀤𑁂𑀯 𑀤𑁆𑀯𑀬𑀢𑀸𑀦𑀁 𑀥𑀫𑁆𑀫𑀸𑀦𑀁 𑀬𑀣𑀸𑀪𑀽𑀢𑀁 𑀜𑀸𑀡𑀸𑀬𑀸’𑀢𑀺. 𑀓𑀺𑀜𑁆𑀘 𑀤𑁆𑀯𑀬𑀢𑀁 𑀯𑀤𑁂𑀣?

(𑁧) ‘‘𑀇𑀤𑀁 𑀤𑀼𑀓𑁆𑀔𑀁, 𑀅𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄𑀢𑀺 𑀅𑀬𑀫𑁂𑀓𑀸𑀦𑀼𑀧𑀲𑁆𑀲𑀦𑀸. 𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑁄, 𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸𑀢𑀺, 𑀅𑀬𑀁 𑀤𑀼𑀢𑀺𑀬𑀸𑀦𑀼𑀧𑀲𑁆𑀲𑀦𑀸. 𑀏𑀯𑀁 𑀲𑀫𑁆𑀫𑀸 𑀤𑁆𑀯𑀬𑀢𑀸𑀦𑀼𑀧𑀲𑁆𑀲𑀺𑀦𑁄 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀅𑀧𑁆𑀧𑀫𑀢𑁆𑀢𑀲𑁆𑀲 𑀆𑀢𑀸𑀧𑀺𑀦𑁄 𑀧𑀳𑀺𑀢𑀢𑁆𑀢𑀲𑁆𑀲 𑀯𑀺𑀳𑀭𑀢𑁄 𑀤𑁆𑀯𑀺𑀦𑁆𑀦𑀁 𑀨𑀮𑀸𑀦𑀁 𑀅𑀜𑁆𑀜𑀢𑀭𑀁 𑀨𑀮𑀁 𑀧𑀸𑀝𑀺𑀓𑀗𑁆𑀔𑀁 𑁋 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀅𑀜𑁆𑀜𑀸, 𑀲𑀢𑀺 𑀯𑀸 𑀉𑀧𑀸𑀤𑀺𑀲𑁂𑀲𑁂 𑀅𑀦𑀸𑀕𑀸𑀫𑀺𑀢𑀸’’𑀢𑀺.

𑀇𑀤𑀫𑀯𑁄𑀘 𑀪𑀕𑀯𑀸. 𑀇𑀤𑀁 𑀯𑀢𑁆𑀯𑀸𑀦 𑀲𑀼𑀕𑀢𑁄 𑀅𑀣𑀸𑀧𑀭𑀁 𑀏𑀢𑀤𑀯𑁄𑀘 𑀲𑀢𑁆𑀣𑀸 𑁋

𑁭𑁨𑁯. ‘‘𑀬𑁂 𑀤𑀼𑀓𑁆𑀔𑀁 𑀦𑀧𑁆𑀧𑀚𑀸𑀦𑀦𑁆𑀢𑀺, 𑀅𑀣𑁄 𑀤𑀼𑀓𑁆𑀔𑀲𑁆𑀲 𑀲𑀫𑁆𑀪𑀯𑀁;

𑀬𑀢𑁆𑀣 𑀘 𑀲𑀩𑁆𑀩𑀲𑁄 𑀤𑀼𑀓𑁆𑀔𑀁, 𑀅𑀲𑁂𑀲𑀁 𑀉𑀧𑀭𑀼𑀚𑁆𑀛𑀢𑀺;

𑀢𑀜𑁆𑀘 𑀫𑀕𑁆𑀕𑀁 𑀦 𑀚𑀸𑀦𑀦𑁆𑀢𑀺, 𑀤𑀼𑀓𑁆𑀔𑀽𑀧𑀲𑀫𑀕𑀸𑀫𑀺𑀦𑀁.

𑁭𑁩𑁦. ‘‘𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀳𑀻𑀦𑀸 𑀢𑁂, 𑀅𑀣𑁄 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀬𑀸;

𑀅𑀪𑀩𑁆𑀩𑀸 𑀢𑁂 𑀅𑀦𑁆𑀢𑀓𑀺𑀭𑀺𑀬𑀸𑀬, 𑀢𑁂 𑀯𑁂 𑀚𑀸𑀢𑀺𑀚𑀭𑀽𑀧𑀕𑀸.

𑁭𑁩𑁧. ‘‘𑀬𑁂 𑀘 𑀤𑀼𑀓𑁆𑀔𑀁 𑀧𑀚𑀸𑀦𑀦𑁆𑀢𑀺, 𑀅𑀣𑁄 𑀤𑀼𑀓𑁆𑀔𑀲𑁆𑀲 𑀲𑀫𑁆𑀪𑀯𑀁;

𑀬𑀢𑁆𑀣 𑀘 𑀲𑀩𑁆𑀩𑀲𑁄 𑀤𑀼𑀓𑁆𑀔𑀁, 𑀅𑀲𑁂𑀲𑀁 𑀉𑀧𑀭𑀼𑀚𑁆𑀛𑀢𑀺;

𑀢𑀜𑁆𑀘 𑀫𑀕𑁆𑀕𑀁 𑀧𑀚𑀸𑀦𑀦𑁆𑀢𑀺, 𑀤𑀼𑀓𑁆𑀔𑀽𑀧𑀲𑀫𑀕𑀸𑀫𑀺𑀦𑀁.

𑁭𑁩𑁨. ‘‘𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀲𑀫𑁆𑀧𑀦𑁆𑀦𑀸, 𑀅𑀣𑁄 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀬𑀸;

𑀪𑀩𑁆𑀩𑀸 𑀢𑁂 𑀅𑀦𑁆𑀢𑀓𑀺𑀭𑀺𑀬𑀸𑀬, 𑀦 𑀢𑁂 𑀚𑀸𑀢𑀺𑀚𑀭𑀽𑀧𑀕𑀸’’𑀢𑀺.

(𑁨) ‘‘‘𑀲𑀺𑀬𑀸 𑀅𑀜𑁆𑀜𑁂𑀦𑀧𑀺 𑀧𑀭𑀺𑀬𑀸𑀬𑁂𑀦 𑀲𑀫𑁆𑀫𑀸 𑀤𑁆𑀯𑀬𑀢𑀸𑀦𑀼𑀧𑀲𑁆𑀲𑀦𑀸’𑀢𑀺, 𑀇𑀢𑀺 𑀘𑁂, 𑀪𑀺𑀓𑁆𑀔𑀯𑁂, 𑀧𑀼𑀘𑁆𑀙𑀺𑀢𑀸𑀭𑁄 𑀅𑀲𑁆𑀲𑀼; ‘𑀲𑀺𑀬𑀸’𑀢𑀺𑀲𑁆𑀲𑀼 𑀯𑀘𑀦𑀻𑀬𑀸. 𑀓𑀣𑀜𑁆𑀘 𑀲𑀺𑀬𑀸? 𑀬𑀁 𑀓𑀺𑀜𑁆𑀘𑀺 𑀤𑀼𑀓𑁆𑀔𑀁 𑀲𑀫𑁆𑀪𑁄𑀢𑀺 𑀲𑀩𑁆𑀩𑀁 𑀉𑀧𑀥𑀺𑀧𑀘𑁆𑀘𑀬𑀸𑀢𑀺, 𑀅𑀬𑀫𑁂𑀓𑀸𑀦𑀼𑀧𑀲𑁆𑀲𑀦𑀸. 𑀉𑀧𑀥𑀻𑀦𑀁 𑀢𑁆𑀯𑁂𑀯 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸 𑀦𑀢𑁆𑀣𑀺 𑀤𑀼𑀓𑁆𑀔𑀲𑁆𑀲 𑀲𑀫𑁆𑀪𑀯𑁄𑀢𑀺, 𑀅𑀬𑀁 𑀤𑀼𑀢𑀺𑀬𑀸𑀦𑀼𑀧𑀲𑁆𑀲𑀦𑀸. 𑀏𑀯𑀁 𑀲𑀫𑁆𑀫𑀸…𑀧𑁂… 𑀅𑀣𑀸𑀧𑀭𑀁 𑀏𑀢𑀤𑀯𑁄𑀘 𑀲𑀢𑁆𑀣𑀸 𑁋

𑁭𑁩𑁩. ‘‘𑀉𑀧𑀥𑀺𑀦𑀺𑀤𑀸𑀦𑀸 𑀧𑀪𑀯𑀦𑁆𑀢𑀺 𑀤𑀼𑀓𑁆𑀔𑀸, 𑀬𑁂 𑀓𑁂𑀘𑀺 𑀮𑁄𑀓𑀲𑁆𑀫𑀺𑀫𑀦𑁂𑀓𑀭𑀽𑀧𑀸;

𑀬𑁄 𑀯𑁂 𑀅𑀯𑀺𑀤𑁆𑀯𑀸 𑀉𑀧𑀥𑀺𑀁 𑀓𑀭𑁄𑀢𑀺, 𑀧𑀼𑀦𑀧𑁆𑀧𑀼𑀦𑀁 𑀤𑀼𑀓𑁆𑀔𑀫𑀼𑀧𑁂𑀢𑀺 𑀫𑀦𑁆𑀤𑁄;

𑀢𑀲𑁆𑀫𑀸 𑀧𑀚𑀸𑀦𑀁 𑀉𑀧𑀥𑀺𑀁 𑀦 𑀓𑀬𑀺𑀭𑀸, 𑀤𑀼𑀓𑁆𑀔𑀲𑁆𑀲 𑀚𑀸𑀢𑀺𑀧𑁆𑀧𑀪𑀯𑀸𑀦𑀼𑀧𑀲𑁆𑀲𑀻’’𑀢𑀺.

(𑁩) ‘‘‘𑀲𑀺𑀬𑀸 𑀅𑀜𑁆𑀜𑁂𑀦𑀧𑀺 𑀧𑀭𑀺𑀬𑀸𑀬𑁂𑀦 𑀲𑀫𑁆𑀫𑀸 𑀤𑁆𑀯𑀬𑀢𑀸𑀦𑀼𑀧𑀲𑁆𑀲𑀦𑀸’𑀢𑀺, 𑀇𑀢𑀺 𑀘𑁂, 𑀪𑀺𑀓𑁆𑀔𑀯𑁂, 𑀧𑀼𑀘𑁆𑀙𑀺𑀢𑀸𑀭𑁄 𑀅𑀲𑁆𑀲𑀼; ‘𑀲𑀺𑀬𑀸’𑀢𑀺𑀲𑁆𑀲𑀼 𑀯𑀘𑀦𑀻𑀬𑀸. 𑀓𑀣𑀜𑁆𑀘 𑀲𑀺𑀬𑀸? 𑀬𑀁 𑀓𑀺𑀜𑁆𑀘𑀺 𑀤𑀼𑀓𑁆𑀔𑀁 𑀲𑀫𑁆𑀪𑁄𑀢𑀺 𑀲𑀩𑁆𑀩𑀁 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸𑀢𑀺, 𑀅𑀬𑀫𑁂𑀓𑀸𑀦𑀼𑀧𑀲𑁆𑀲𑀦𑀸. 𑀅𑀯𑀺𑀚𑁆𑀚𑀸𑀬 𑀢𑁆𑀯𑁂𑀯 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸 𑀦𑀢𑁆𑀣𑀺 𑀤𑀼𑀓𑁆𑀔𑀲𑁆𑀲 𑀲𑀫𑁆𑀪𑀯𑁄𑀢𑀺, 𑀅𑀬𑀁 𑀤𑀼𑀢𑀺𑀬𑀸𑀦𑀼𑀧𑀲𑁆𑀲𑀦𑀸. 𑀏𑀯𑀁 𑀲𑀫𑁆𑀫𑀸…𑀧𑁂… 𑀅𑀣𑀸𑀧𑀭𑀁 𑀏𑀢𑀤𑀯𑁄𑀘 𑀲𑀢𑁆𑀣𑀸 𑁋

𑁭𑁩𑁪. ‘‘𑀚𑀸𑀢𑀺𑀫𑀭𑀡𑀲𑀁𑀲𑀸𑀭𑀁, 𑀬𑁂 𑀯𑀚𑀦𑁆𑀢𑀺 𑀧𑀼𑀦𑀧𑁆𑀧𑀼𑀦𑀁;

𑀇𑀢𑁆𑀣𑀪𑀸𑀯𑀜𑁆𑀜𑀣𑀸𑀪𑀸𑀯𑀁, 𑀅𑀯𑀺𑀚𑁆𑀚𑀸𑀬𑁂𑀯 𑀲𑀸 𑀕𑀢𑀺.

𑁭𑁩𑁫. ‘‘𑀅𑀯𑀺𑀚𑁆𑀚𑀸 𑀳𑀸𑀬𑀁 𑀫𑀳𑀸𑀫𑁄𑀳𑁄, 𑀬𑁂𑀦𑀺𑀤𑀁 𑀲𑀁𑀲𑀺𑀢𑀁 𑀘𑀺𑀭𑀁;

𑀯𑀺𑀚𑁆𑀚𑀸𑀕𑀢𑀸 𑀘 𑀬𑁂 𑀲𑀢𑁆𑀢𑀸, 𑀦 𑀢𑁂 𑀕𑀘𑁆𑀙𑀦𑁆𑀢𑀺 [𑀦𑀸𑀕𑀘𑁆𑀙𑀦𑁆𑀢𑀺 (𑀲𑀻. 𑀧𑀻.)] 𑀧𑀼𑀦𑀩𑁆𑀪𑀯’’𑀦𑁆𑀢𑀺.

(𑁪) ‘‘𑀲𑀺𑀬𑀸 𑀅𑀜𑁆𑀜𑁂𑀦𑀧𑀺…𑀧𑁂… 𑀓𑀣𑀜𑁆𑀘 𑀲𑀺𑀬𑀸? 𑀬𑀁 𑀓𑀺𑀜𑁆𑀘𑀺 𑀤𑀼𑀓𑁆𑀔𑀁 𑀲𑀫𑁆𑀪𑁄𑀢𑀺 𑀲𑀩𑁆𑀩𑀁 𑀲𑀗𑁆𑀔𑀸𑀭𑀧𑀘𑁆𑀘𑀬𑀸𑀢𑀺, 𑀅𑀬𑀫𑁂𑀓𑀸𑀦𑀼𑀧𑀲𑁆𑀲𑀦𑀸. 𑀲𑀗𑁆𑀔𑀸𑀭𑀸𑀦𑀁 𑀢𑁆𑀯𑁂𑀯 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸 𑀦𑀢𑁆𑀣𑀺 𑀤𑀼𑀓𑁆𑀔𑀲𑁆𑀲 𑀲𑀫𑁆𑀪𑀯𑁄𑀢𑀺, 𑀅𑀬𑀁 𑀤𑀼𑀢𑀺𑀬𑀸𑀦𑀼𑀧𑀲𑁆𑀲𑀦𑀸. 𑀏𑀯𑀁 𑀲𑀫𑁆𑀫𑀸…𑀧𑁂… 𑀅𑀣𑀸𑀧𑀭𑀁 𑀏𑀢𑀤𑀯𑁄𑀘 𑀲𑀢𑁆𑀣𑀸 𑁋

𑁭𑁩𑁬. ‘‘𑀬𑀁 𑀓𑀺𑀜𑁆𑀘𑀺 𑀤𑀼𑀓𑁆𑀔𑀁 𑀲𑀫𑁆𑀪𑁄𑀢𑀺, 𑀲𑀩𑁆𑀩𑀁 𑀲𑀗𑁆𑀔𑀸𑀭𑀧𑀘𑁆𑀘𑀬𑀸;

𑀲𑀗𑁆𑀔𑀸𑀭𑀸𑀦𑀁 𑀦𑀺𑀭𑁄𑀥𑁂𑀦, 𑀦𑀢𑁆𑀣𑀺 𑀤𑀼𑀓𑁆𑀔𑀲𑁆𑀲 𑀲𑀫𑁆𑀪𑀯𑁄.

𑁭𑁩𑁭. ‘‘𑀏𑀢𑀫𑀸𑀤𑀻𑀦𑀯𑀁 𑀜𑀢𑁆𑀯𑀸, 𑀤𑀼𑀓𑁆𑀔𑀁 𑀲𑀗𑁆𑀔𑀸𑀭𑀧𑀘𑁆𑀘𑀬𑀸;

𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑀸, 𑀲𑀜𑁆𑀜𑀸𑀦𑀁 𑀉𑀧𑀭𑁄𑀥𑀦𑀸;

𑀏𑀯𑀁 𑀤𑀼𑀓𑁆𑀔𑀓𑁆𑀔𑀬𑁄 𑀳𑁄𑀢𑀺, 𑀏𑀢𑀁 𑀜𑀢𑁆𑀯𑀸 𑀬𑀣𑀸𑀢𑀣𑀁.

𑁭𑁩𑁮. ‘‘𑀲𑀫𑁆𑀫𑀤𑁆𑀤𑀲𑀸 𑀯𑁂𑀤𑀕𑀼𑀦𑁄, 𑀲𑀫𑁆𑀫𑀤𑀜𑁆𑀜𑀸𑀬 𑀧𑀡𑁆𑀟𑀺𑀢𑀸;

𑀅𑀪𑀺𑀪𑀼𑀬𑁆𑀬 𑀫𑀸𑀭𑀲𑀁𑀬𑁄𑀕𑀁, 𑀦 𑀕𑀘𑁆𑀙𑀦𑁆𑀢𑀺 [𑀦𑀸𑀕𑀘𑁆𑀙𑀦𑁆𑀢𑀺 (𑀲𑀻. 𑀧𑀻.)] 𑀧𑀼𑀦𑀩𑁆𑀪𑀯’’𑀦𑁆𑀢𑀺.

(𑁫) ‘‘𑀲𑀺𑀬𑀸 𑀅𑀜𑁆𑀜𑁂𑀦𑀧𑀺…𑀧𑁂… 𑀓𑀣𑀜𑁆𑀘 𑀲𑀺𑀬𑀸? 𑀬𑀁 𑀓𑀺𑀜𑁆𑀘𑀺 𑀤𑀼𑀓𑁆𑀔𑀁 𑀲𑀫𑁆𑀪𑁄𑀢𑀺 𑀲𑀩𑁆𑀩𑀁 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸𑀢𑀺, 𑀅𑀬𑀫𑁂𑀓𑀸𑀦𑀼𑀧𑀲𑁆𑀲𑀦𑀸. 𑀯𑀺𑀜𑁆𑀜𑀸𑀡𑀲𑁆𑀲 𑀢𑁆𑀯𑁂𑀯 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸 𑀦𑀢𑁆𑀣𑀺 𑀤𑀼𑀓𑁆𑀔𑀲𑁆𑀲 𑀲𑀫𑁆𑀪𑀯𑁄𑀢𑀺, 𑀅𑀬𑀁 𑀤𑀼𑀢𑀺𑀬𑀸𑀦𑀼𑀧𑀲𑁆𑀲𑀦𑀸. 𑀏𑀯𑀁 𑀲𑀫𑁆𑀫𑀸…𑀧𑁂… 𑀅𑀣𑀸𑀧𑀭𑀁 𑀏𑀢𑀤𑀯𑁄𑀘 𑀲𑀢𑁆𑀣𑀸 𑁋

𑁭𑁩𑁯. ‘‘𑀬𑀁 𑀓𑀺𑀜𑁆𑀘𑀺 𑀤𑀼𑀓𑁆𑀔𑀁 𑀲𑀫𑁆𑀪𑁄𑀢𑀺, 𑀲𑀩𑁆𑀩𑀁 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸;

𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀭𑁄𑀥𑁂𑀦, 𑀦𑀢𑁆𑀣𑀺 𑀤𑀼𑀓𑁆𑀔𑀲𑁆𑀲 𑀲𑀫𑁆𑀪𑀯𑁄.

𑁭𑁪𑁦. ‘‘𑀏𑀢𑀫𑀸𑀤𑀻𑀦𑀯𑀁 𑀜𑀢𑁆𑀯𑀸, 𑀤𑀼𑀓𑁆𑀔𑀁 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸;

𑀯𑀺𑀜𑁆𑀜𑀸𑀡𑀽𑀧𑀲𑀫𑀸 𑀪𑀺𑀓𑁆𑀔𑀼, 𑀦𑀺𑀘𑁆𑀙𑀸𑀢𑁄 𑀧𑀭𑀺𑀦𑀺𑀩𑁆𑀩𑀼𑀢𑁄’’𑀢𑀺.

(𑁬) ‘‘𑀲𑀺𑀬𑀸 𑀅𑀜𑁆𑀜𑁂𑀦𑀧𑀺…𑀧𑁂… 𑀓𑀣𑀜𑁆𑀘 𑀲𑀺𑀬𑀸? 𑀬𑀁 𑀓𑀺𑀜𑁆𑀘𑀺 𑀤𑀼𑀓𑁆𑀔𑀁 𑀲𑀫𑁆𑀪𑁄𑀢𑀺 𑀲𑀩𑁆𑀩𑀁 𑀨𑀲𑁆𑀲𑀧𑀘𑁆𑀘𑀬𑀸𑀢𑀺, 𑀅𑀬𑀫𑁂𑀓𑀸𑀦𑀼𑀧𑀲𑁆𑀲𑀦𑀸. 𑀨𑀲𑁆𑀲𑀲𑁆𑀲 𑀢𑁆𑀯𑁂𑀯 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸 𑀦𑀢𑁆𑀣𑀺 𑀤𑀼𑀓𑁆𑀔𑀲𑁆𑀲 𑀲𑀫𑁆𑀪𑀯𑁄𑀢𑀺, 𑀅𑀬𑀁 𑀤𑀼𑀢𑀺𑀬𑀸𑀦𑀼𑀧𑀲𑁆𑀲𑀦𑀸. 𑀏𑀯𑀁 𑀲𑀫𑁆𑀫𑀸…𑀧𑁂… 𑀅𑀣𑀸𑀧𑀭𑀁 𑀏𑀢𑀤𑀯𑁄𑀘 𑀲𑀢𑁆𑀣𑀸 𑁋

𑁭𑁪𑁧. ‘‘𑀢𑁂𑀲𑀁 𑀨𑀲𑁆𑀲𑀧𑀭𑁂𑀢𑀸𑀦𑀁, 𑀪𑀯𑀲𑁄𑀢𑀸𑀦𑀼𑀲𑀸𑀭𑀺𑀦𑀁;

𑀓𑀼𑀫𑁆𑀫𑀕𑁆𑀕𑀧𑀝𑀺𑀧𑀦𑁆𑀦𑀸𑀦𑀁, 𑀆𑀭𑀸 𑀲𑀁𑀬𑁄𑀚𑀦𑀓𑁆𑀔𑀬𑁄.

𑁭𑁪𑁨. ‘‘𑀬𑁂 𑀘 𑀨𑀲𑁆𑀲𑀁 𑀧𑀭𑀺𑀜𑁆𑀜𑀸𑀬, 𑀅𑀜𑁆𑀜𑀸𑀬𑀼𑀧𑀲𑀫𑁂 [𑀧𑀜𑁆𑀜𑀸𑀬 𑀉𑀧𑀲𑀫𑁂 (𑀲𑁆𑀬𑀸.)] 𑀭𑀢𑀸;

𑀢𑁂 𑀯𑁂 𑀨𑀲𑁆𑀲𑀸𑀪𑀺𑀲𑀫𑀬𑀸, 𑀦𑀺𑀘𑁆𑀙𑀸𑀢𑀸 𑀧𑀭𑀺𑀦𑀺𑀩𑁆𑀩𑀼𑀢𑀸’’𑀢𑀺.

(𑁭) ‘‘𑀲𑀺𑀬𑀸 𑀅𑀜𑁆𑀜𑁂𑀦𑀧𑀺…𑀧𑁂… 𑀓𑀣𑀜𑁆𑀘 𑀲𑀺𑀬𑀸? 𑀬𑀁 𑀓𑀺𑀜𑁆𑀘𑀺 𑀤𑀼𑀓𑁆𑀔𑀁 𑀲𑀫𑁆𑀪𑁄𑀢𑀺 𑀲𑀩𑁆𑀩𑀁 𑀯𑁂𑀤𑀦𑀸𑀧𑀘𑁆𑀘𑀬𑀸𑀢𑀺, 𑀅𑀬𑀫𑁂𑀓𑀸𑀦𑀼𑀧𑀲𑁆𑀲𑀦𑀸. 𑀯𑁂𑀤𑀦𑀸𑀦𑀁 𑀢𑁆𑀯𑁂𑀯 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸 𑀦𑀢𑁆𑀣𑀺 𑀤𑀼𑀓𑁆𑀔𑀲𑁆𑀲 𑀲𑀫𑁆𑀪𑀯𑁄𑀢𑀺, 𑀅𑀬𑀁 𑀤𑀼𑀢𑀺𑀬𑀸𑀦𑀼𑀧𑀲𑁆𑀲𑀦𑀸. 𑀏𑀯𑀁 𑀲𑀫𑁆𑀫𑀸…𑀧𑁂… 𑀅𑀣𑀸𑀧𑀭𑀁 𑀏𑀢𑀤𑀯𑁄𑀘 𑀲𑀢𑁆𑀣𑀸 𑁋

𑁭𑁪𑁩. ‘‘𑀲𑀼𑀔𑀁 𑀯𑀸 𑀬𑀤𑀺 𑀯𑀸 𑀤𑀼𑀓𑁆𑀔𑀁, 𑀅𑀤𑀼𑀓𑁆𑀔𑀫𑀲𑀼𑀔𑀁 𑀲𑀳;

𑀅𑀚𑁆𑀛𑀢𑁆𑀢𑀜𑁆𑀘 𑀩𑀳𑀺𑀤𑁆𑀥𑀸 𑀘, 𑀬𑀁 𑀓𑀺𑀜𑁆𑀘𑀺 𑀅𑀢𑁆𑀣𑀺 𑀯𑁂𑀤𑀺𑀢𑀁.

𑁭𑁪𑁪. ‘‘𑀏𑀢𑀁 𑀤𑀼𑀓𑁆𑀔𑀦𑁆𑀢𑀺 𑀜𑀢𑁆𑀯𑀸𑀦, 𑀫𑁄𑀲𑀥𑀫𑁆𑀫𑀁 𑀧𑀮𑁄𑀓𑀺𑀦𑀁 [𑀧𑀮𑁄𑀓𑀺𑀢𑀁 (𑀲𑀻.)];

𑀨𑀼𑀲𑁆𑀲 𑀨𑀼𑀲𑁆𑀲 𑀯𑀬𑀁 𑀧𑀲𑁆𑀲𑀁, 𑀏𑀯𑀁 𑀢𑀢𑁆𑀣 𑀯𑀺𑀚𑀸𑀦𑀢𑀺 [𑀯𑀺𑀭𑀚𑁆𑀚𑀢𑀺 (𑀓. 𑀲𑀻.)];

𑀯𑁂𑀤𑀦𑀸𑀦𑀁 𑀔𑀬𑀸 𑀪𑀺𑀓𑁆𑀔𑀼, 𑀦𑀺𑀘𑁆𑀙𑀸𑀢𑁄 𑀧𑀭𑀺𑀦𑀺𑀩𑁆𑀩𑀼𑀢𑁄’’𑀢𑀺.

(𑁮) ‘‘𑀲𑀺𑀬𑀸 𑀅𑀜𑁆𑀜𑁂𑀦𑀧𑀺…𑀧𑁂… 𑀓𑀣𑀜𑁆𑀘 𑀲𑀺𑀬𑀸? 𑀬𑀁 𑀓𑀺𑀜𑁆𑀘𑀺 𑀤𑀼𑀓𑁆𑀔𑀁 𑀲𑀫𑁆𑀪𑁄𑀢𑀺 𑀲𑀩𑁆𑀩𑀁 𑀢𑀡𑁆𑀳𑀸𑀧𑀘𑁆𑀘𑀬𑀸𑀢𑀺, 𑀅𑀬𑀫𑁂𑀓𑀸𑀦𑀼𑀧𑀲𑁆𑀲𑀦𑀸. 𑀢𑀡𑁆𑀳𑀸𑀬 𑀢𑁆𑀯𑁂𑀯 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸 𑀦𑀢𑁆𑀣𑀺 𑀤𑀼𑀓𑁆𑀔𑀲𑁆𑀲 𑀲𑀫𑁆𑀪𑀯𑁄𑀢𑀺, 𑀅𑀬𑀁 𑀤𑀼𑀢𑀺𑀬𑀸𑀦𑀼𑀧𑀲𑁆𑀲𑀦𑀸. 𑀏𑀯𑀁 𑀲𑀫𑁆𑀫𑀸…𑀧𑁂… 𑀅𑀣𑀸𑀧𑀭𑀁 𑀏𑀢𑀤𑀯𑁄𑀘 𑀲𑀢𑁆𑀣𑀸 𑁋

𑁭𑁪𑁫. ‘‘𑀢𑀡𑁆𑀳𑀸𑀤𑀼𑀢𑀺𑀬𑁄 𑀧𑀼𑀭𑀺𑀲𑁄, 𑀤𑀻𑀖𑀫𑀤𑁆𑀥𑀸𑀦 𑀲𑀁𑀲𑀭𑀁;

𑀇𑀢𑁆𑀣𑀪𑀸𑀯𑀜𑁆𑀜𑀣𑀸𑀪𑀸𑀯𑀁, 𑀲𑀁𑀲𑀸𑀭𑀁 𑀦𑀸𑀢𑀺𑀯𑀢𑁆𑀢𑀢𑀺.

𑁭𑁪𑁬. ‘‘𑀏𑀢𑀫𑀸𑀤𑀻𑀦𑀯𑀁 𑀜𑀢𑁆𑀯𑀸, 𑀢𑀡𑁆𑀳𑀁 [𑀢𑀡𑁆𑀳𑀸 (𑀩𑀳𑀽𑀲𑀼) 𑀇𑀢𑀺𑀯𑀼𑀢𑁆𑀢𑀓𑁂 𑁧𑁫 𑀧𑀲𑁆𑀲𑀺𑀢𑀩𑁆𑀩𑀁] 𑀤𑀼𑀓𑁆𑀔𑀲𑁆𑀲 𑀲𑀫𑁆𑀪𑀯𑀁;

𑀯𑀻𑀢𑀢𑀡𑁆𑀳𑁄 𑀅𑀦𑀸𑀤𑀸𑀦𑁄, 𑀲𑀢𑁄 𑀪𑀺𑀓𑁆𑀔𑀼 𑀧𑀭𑀺𑀩𑁆𑀩𑀚𑁂’’𑀢𑀺.

(𑁯) ‘‘𑀲𑀺𑀬𑀸 𑀅𑀜𑁆𑀜𑁂𑀦𑀧𑀺…𑀧𑁂… 𑀓𑀣𑀜𑁆𑀘 𑀲𑀺𑀬𑀸? 𑀬𑀁 𑀓𑀺𑀜𑁆𑀘𑀺 𑀤𑀼𑀓𑁆𑀔𑀁 𑀲𑀫𑁆𑀪𑁄𑀢𑀺 𑀲𑀩𑁆𑀩𑀁 𑀉𑀧𑀸𑀤𑀸𑀦𑀧𑀘𑁆𑀘𑀬𑀸𑀢𑀺, 𑀅𑀬𑀫𑁂𑀓𑀸𑀦𑀼𑀧𑀲𑁆𑀲𑀦𑀸. 𑀉𑀧𑀸𑀤𑀸𑀦𑀸𑀦𑀁 [𑀉𑀧𑀸𑀤𑀸𑀦𑀲𑁆𑀲 (𑀲𑁆𑀬𑀸. 𑀓.)] 𑀢𑁆𑀯𑁂𑀯 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸 𑀦𑀢𑁆𑀣𑀺 𑀤𑀼𑀓𑁆𑀔𑀲𑁆𑀲 𑀲𑀫𑁆𑀪𑀯𑁄𑀢𑀺, 𑀅𑀬𑀁 𑀤𑀼𑀢𑀺𑀬𑀸𑀦𑀼𑀧𑀲𑁆𑀲𑀦𑀸. 𑀏𑀯𑀁 𑀲𑀫𑁆𑀫𑀸…𑀧𑁂… 𑀅𑀣𑀸𑀧𑀭𑀁 𑀏𑀢𑀤𑀯𑁄𑀘 𑀲𑀢𑁆𑀣𑀸 𑁋

𑁭𑁪𑁭. ‘‘𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄, 𑀪𑀽𑀢𑁄 𑀤𑀼𑀓𑁆𑀔𑀁 𑀦𑀺𑀕𑀘𑁆𑀙𑀢𑀺;

𑀚𑀸𑀢𑀲𑁆𑀲 𑀫𑀭𑀡𑀁 𑀳𑁄𑀢𑀺, 𑀏𑀲𑁄 𑀤𑀼𑀓𑁆𑀔𑀲𑁆𑀲 𑀲𑀫𑁆𑀪𑀯𑁄.

𑁭𑁪𑁮. ‘‘𑀢𑀲𑁆𑀫𑀸 𑀉𑀧𑀸𑀤𑀸𑀦𑀓𑁆𑀔𑀬𑀸, 𑀲𑀫𑁆𑀫𑀤𑀜𑁆𑀜𑀸𑀬 𑀧𑀡𑁆𑀟𑀺𑀢𑀸;

𑀚𑀸𑀢𑀺𑀓𑁆𑀔𑀬𑀁 𑀅𑀪𑀺𑀜𑁆𑀜𑀸𑀬, 𑀦 𑀕𑀘𑁆𑀙𑀦𑁆𑀢𑀺 𑀧𑀼𑀦𑀩𑁆𑀪𑀯’’𑀦𑁆𑀢𑀺.

(𑁧𑁦) ‘‘𑀲𑀺𑀬𑀸 𑀅𑀜𑁆𑀜𑁂𑀦𑀧𑀺…𑀧𑁂… 𑀓𑀣𑀜𑁆𑀘 𑀲𑀺𑀬𑀸? 𑀬𑀁 𑀓𑀺𑀜𑁆𑀘𑀺 𑀤𑀼𑀓𑁆𑀔𑀁 𑀲𑀫𑁆𑀪𑁄𑀢𑀺 𑀲𑀩𑁆𑀩𑀁 𑀆𑀭𑀫𑁆𑀪𑀧𑀘𑁆𑀘𑀬𑀸𑀢𑀺, 𑀅𑀬𑀫𑁂𑀓𑀸𑀦𑀼𑀧𑀲𑁆𑀲𑀦𑀸. 𑀆𑀭𑀫𑁆𑀪𑀸𑀦𑀁 𑀢𑁆𑀯𑁂𑀯 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸 𑀦𑀢𑁆𑀣𑀺 𑀤𑀼𑀓𑁆𑀔𑀲𑁆𑀲 𑀲𑀫𑁆𑀪𑀯𑁄𑀢𑀺, 𑀅𑀬𑀁 𑀤𑀼𑀢𑀺𑀬𑀸𑀦𑀼𑀧𑀲𑁆𑀲𑀦𑀸. 𑀏𑀯𑀁 𑀲𑀫𑁆𑀫𑀸…𑀧𑁂… 𑀅𑀣𑀸𑀧𑀭𑀁 𑀏𑀢𑀤𑀯𑁄𑀘 𑀲𑀢𑁆𑀣𑀸 𑁋

𑁭𑁪𑁯. ‘‘𑀬𑀁 𑀓𑀺𑀜𑁆𑀘𑀺 𑀤𑀼𑀓𑁆𑀔𑀁 𑀲𑀫𑁆𑀪𑁄𑀢𑀺, 𑀲𑀩𑁆𑀩𑀁 𑀆𑀭𑀫𑁆𑀪𑀧𑀘𑁆𑀘𑀬𑀸;

𑀆𑀭𑀫𑁆𑀪𑀸𑀦𑀁 𑀦𑀺𑀭𑁄𑀥𑁂𑀦, 𑀦𑀢𑁆𑀣𑀺 𑀤𑀼𑀓𑁆𑀔𑀲𑁆𑀲 𑀲𑀫𑁆𑀪𑀯𑁄.

𑁭𑁫𑁦. ‘‘𑀏𑀢𑀫𑀸𑀤𑀻𑀦𑀯𑀁 𑀜𑀢𑁆𑀯𑀸, 𑀤𑀼𑀓𑁆𑀔𑀁 𑀆𑀭𑀫𑁆𑀪𑀧𑀘𑁆𑀘𑀬𑀸;

𑀲𑀩𑁆𑀩𑀸𑀭𑀫𑁆𑀪𑀁 𑀧𑀝𑀺𑀦𑀺𑀲𑁆𑀲𑀚𑁆𑀚, 𑀅𑀦𑀸𑀭𑀫𑁆𑀪𑁂 𑀯𑀺𑀫𑀼𑀢𑁆𑀢𑀺𑀦𑁄.

𑁭𑁫𑁧. ‘‘𑀉𑀘𑁆𑀙𑀺𑀦𑁆𑀦𑀪𑀯𑀢𑀡𑁆𑀳𑀲𑁆𑀲, 𑀲𑀦𑁆𑀢𑀘𑀺𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄;

𑀯𑀺𑀓𑁆𑀔𑀻𑀡𑁄 [𑀯𑀺𑀢𑀺𑀡𑁆𑀡𑁄 (𑀲𑀻.)] 𑀚𑀸𑀢𑀺𑀲𑀁𑀲𑀸𑀭𑁄, 𑀦𑀢𑁆𑀣𑀺 𑀢𑀲𑁆𑀲 𑀧𑀼𑀦𑀩𑁆𑀪𑀯𑁄’’𑀢𑀺.

(𑁧𑁧) ‘‘𑀲𑀺𑀬𑀸 𑀅𑀜𑁆𑀜𑁂𑀦𑀧𑀺…𑀧𑁂… 𑀓𑀣𑀜𑁆𑀘 𑀲𑀺𑀬𑀸? 𑀬𑀁 𑀓𑀺𑀜𑁆𑀘𑀺 𑀤𑀼𑀓𑁆𑀔𑀁 𑀲𑀫𑁆𑀪𑁄𑀢𑀺 𑀲𑀩𑁆𑀩𑀁 𑀆𑀳𑀸𑀭𑀧𑀘𑁆𑀘𑀬𑀸𑀢𑀺, 𑀅𑀬𑀫𑁂𑀓𑀸𑀦𑀼𑀧𑀲𑁆𑀲𑀦𑀸. 𑀆𑀳𑀸𑀭𑀸𑀦𑀁 𑀢𑁆𑀯𑁂𑀯 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸 𑀦𑀢𑁆𑀣𑀺 𑀤𑀼𑀓𑁆𑀔𑀲𑁆𑀲 𑀲𑀫𑁆𑀪𑀯𑁄𑀢𑀺, 𑀅𑀬𑀁 𑀤𑀼𑀢𑀺𑀬𑀸𑀦𑀼𑀧𑀲𑁆𑀲𑀦𑀸. 𑀏𑀯𑀁 𑀲𑀫𑁆𑀫𑀸…𑀧𑁂… 𑀅𑀣𑀸𑀧𑀭𑀁 𑀏𑀢𑀤𑀯𑁄𑀘 𑀲𑀢𑁆𑀣𑀸 𑁋

𑁭𑁫𑁨. ‘‘𑀬𑀁 𑀓𑀺𑀜𑁆𑀘𑀺 𑀤𑀼𑀓𑁆𑀔𑀁 𑀲𑀫𑁆𑀪𑁄𑀢𑀺, 𑀲𑀩𑁆𑀩𑀁 𑀆𑀳𑀸𑀭𑀧𑀘𑁆𑀘𑀬𑀸;

𑀆𑀳𑀸𑀭𑀸𑀦𑀁 𑀦𑀺𑀭𑁄𑀥𑁂𑀦, 𑀦𑀢𑁆𑀣𑀺 𑀤𑀼𑀓𑁆𑀔𑀲𑁆𑀲 𑀲𑀫𑁆𑀪𑀯𑁄.

𑁭𑁫𑁩. ‘‘𑀏𑀢𑀫𑀸𑀤𑀻𑀦𑀯𑀁 𑀜𑀢𑁆𑀯𑀸, 𑀤𑀼𑀓𑁆𑀔𑀁 𑀆𑀳𑀸𑀭𑀧𑀘𑁆𑀘𑀬𑀸;

𑀲𑀩𑁆𑀩𑀸𑀳𑀸𑀭𑀁 𑀧𑀭𑀺𑀜𑁆𑀜𑀸𑀬, 𑀲𑀩𑁆𑀩𑀸𑀳𑀸𑀭𑀫𑀦𑀺𑀲𑁆𑀲𑀺𑀢𑁄.

𑁭𑁫𑁪. ‘‘𑀆𑀭𑁄𑀕𑁆𑀬𑀁 𑀲𑀫𑁆𑀫𑀤𑀜𑁆𑀜𑀸𑀬, 𑀆𑀲𑀯𑀸𑀦𑀁 𑀧𑀭𑀺𑀓𑁆𑀔𑀬𑀸;

𑀲𑀗𑁆𑀔𑀸𑀬 𑀲𑁂𑀯𑀻 𑀥𑀫𑁆𑀫𑀝𑁆𑀞𑁄, 𑀲𑀗𑁆𑀔𑁆𑀬𑀁 [𑀲𑀗𑁆𑀔𑀁 (𑀲𑀻. 𑀧𑀻.)] 𑀦𑁄𑀧𑁂𑀢𑀺 𑀯𑁂𑀤𑀕𑀽’’𑀢𑀺.

(𑁧𑁨) ‘‘𑀲𑀺𑀬𑀸 𑀅𑀜𑁆𑀜𑁂𑀦𑀧𑀺…𑀧𑁂… 𑀓𑀣𑀜𑁆𑀘 𑀲𑀺𑀬𑀸? 𑀬𑀁 𑀓𑀺𑀜𑁆𑀘𑀺 𑀤𑀼𑀓𑁆𑀔𑀁 𑀲𑀫𑁆𑀪𑁄𑀢𑀺 𑀲𑀩𑁆𑀩𑀁 𑀇𑀜𑁆𑀚𑀺𑀢𑀧𑀘𑁆𑀘𑀬𑀸𑀢𑀺, 𑀅𑀬𑀫𑁂𑀓𑀸𑀦𑀼𑀧𑀲𑁆𑀲𑀦𑀸. 𑀇𑀜𑁆𑀚𑀺𑀢𑀸𑀦𑀁 𑀢𑁆𑀯𑁂𑀯 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸 𑀦𑀢𑁆𑀣𑀺 𑀤𑀼𑀓𑁆𑀔𑀲𑁆𑀲 𑀲𑀫𑁆𑀪𑀯𑁄𑀢𑀺, 𑀅𑀬𑀁 𑀤𑀼𑀢𑀺𑀬𑀸𑀦𑀼𑀧𑀲𑁆𑀲𑀦𑀸. 𑀏𑀯𑀁 𑀲𑀫𑁆𑀫𑀸…𑀧𑁂… 𑀅𑀣𑀸𑀧𑀭𑀁 𑀏𑀢𑀤𑀯𑁄𑀘 𑀲𑀢𑁆𑀣𑀸 𑁋

𑁭𑁫𑁫. ‘‘𑀬𑀁 𑀓𑀺𑀜𑁆𑀘𑀺 𑀤𑀼𑀓𑁆𑀔𑀁 𑀲𑀫𑁆𑀪𑁄𑀢𑀺, 𑀲𑀩𑁆𑀩𑀁 𑀇𑀜𑁆𑀚𑀺𑀢𑀧𑀘𑁆𑀘𑀬𑀸;

𑀇𑀜𑁆𑀚𑀺𑀢𑀸𑀦𑀁 𑀦𑀺𑀭𑁄𑀥𑁂𑀦, 𑀦𑀢𑁆𑀣𑀺 𑀤𑀼𑀓𑁆𑀔𑀲𑁆𑀲 𑀲𑀫𑁆𑀪𑀯𑁄.

𑁭𑁫𑁬. ‘‘𑀏𑀢𑀫𑀸𑀤𑀻𑀦𑀯𑀁 𑀜𑀢𑁆𑀯𑀸, 𑀤𑀼𑀓𑁆𑀔𑀁 𑀇𑀜𑁆𑀚𑀺𑀢𑀧𑀘𑁆𑀘𑀬𑀸;

𑀢𑀲𑁆𑀫𑀸 𑀳𑀺 𑀏𑀚𑀁 𑀯𑁄𑀲𑁆𑀲𑀚𑁆𑀚, 𑀲𑀗𑁆𑀔𑀸𑀭𑁂 𑀉𑀧𑀭𑀼𑀦𑁆𑀥𑀺𑀬;

𑀅𑀦𑁂𑀚𑁄 𑀅𑀦𑀼𑀧𑀸𑀤𑀸𑀦𑁄, 𑀲𑀢𑁄 𑀪𑀺𑀓𑁆𑀔𑀼 𑀧𑀭𑀺𑀩𑁆𑀩𑀚𑁂’’𑀢𑀺.

(𑁧𑁩) ‘‘𑀲𑀺𑀬𑀸 𑀅𑀜𑁆𑀜𑁂𑀦𑀧𑀺…𑀧𑁂… 𑀓𑀣𑀜𑁆𑀘 𑀲𑀺𑀬𑀸? 𑀦𑀺𑀲𑁆𑀲𑀺𑀢𑀲𑁆𑀲 𑀘𑀮𑀺𑀢𑀁 𑀳𑁄𑀢𑀻𑀢𑀺, 𑀅𑀬𑀫𑁂𑀓𑀸𑀦𑀼𑀧𑀲𑁆𑀲𑀦𑀸. 𑀅𑀦𑀺𑀲𑁆𑀲𑀺𑀢𑁄 𑀦 𑀘𑀮𑀢𑀻𑀢𑀺, 𑀅𑀬𑀁 𑀤𑀼𑀢𑀺𑀬𑀸𑀦𑀼𑀧𑀲𑁆𑀲𑀦𑀸. 𑀏𑀯𑀁 𑀲𑀫𑁆𑀫𑀸…𑀧𑁂… 𑀅𑀣𑀸𑀧𑀭𑀁 𑀏𑀢𑀤𑀯𑁄𑀘 𑀲𑀢𑁆𑀣𑀸 𑁋

𑁭𑁫𑁭. ‘‘𑀅𑀦𑀺𑀲𑁆𑀲𑀺𑀢𑁄 𑀦 𑀘𑀮𑀢𑀺, 𑀦𑀺𑀲𑁆𑀲𑀺𑀢𑁄 𑀘 𑀉𑀧𑀸𑀤𑀺𑀬𑀁;

𑀇𑀢𑁆𑀣𑀪𑀸𑀯𑀜𑁆𑀜𑀣𑀸𑀪𑀸𑀯𑀁, 𑀲𑀁𑀲𑀸𑀭𑀁 𑀦𑀸𑀢𑀺𑀯𑀢𑁆𑀢𑀢𑀺.

𑁭𑁫𑁮. ‘‘𑀏𑀢𑀫𑀸𑀤𑀻𑀦𑀯𑀁 𑀜𑀢𑁆𑀯𑀸, 𑀦𑀺𑀲𑁆𑀲𑀬𑁂𑀲𑀼 𑀫𑀳𑀩𑁆𑀪𑀬𑀁;

𑀅𑀦𑀺𑀲𑁆𑀲𑀺𑀢𑁄 𑀅𑀦𑀼𑀧𑀸𑀤𑀸𑀦𑁄, 𑀲𑀢𑁄 𑀪𑀺𑀓𑁆𑀔𑀼 𑀧𑀭𑀺𑀩𑁆𑀩𑀚𑁂’’𑀢𑀺.

(𑁧𑁪) ‘‘𑀲𑀺𑀬𑀸 𑀅𑀜𑁆𑀜𑁂𑀦𑀧𑀺…𑀧𑁂… 𑀓𑀣𑀜𑁆𑀘 𑀲𑀺𑀬𑀸? 𑀭𑀽𑀧𑁂𑀳𑀺, 𑀪𑀺𑀓𑁆𑀔𑀯𑁂, 𑀅𑀭𑀽𑀧𑀸 [𑀆𑀭𑀼𑀧𑁆𑀧𑀸 (𑀲𑀻. 𑀧𑀻.)] 𑀲𑀦𑁆𑀢𑀢𑀭𑀸𑀢𑀺, 𑀅𑀬𑀫𑁂𑀓𑀸𑀦𑀼𑀧𑀲𑁆𑀲𑀦𑀸. 𑀅𑀭𑀽𑀧𑁂𑀳𑀺 𑀦𑀺𑀭𑁄𑀥𑁄 𑀲𑀦𑁆𑀢𑀢𑀭𑁄𑀢𑀺, 𑀅𑀬𑀁 𑀤𑀼𑀢𑀺𑀬𑀸𑀦𑀼𑀧𑀲𑁆𑀲𑀦𑀸. 𑀏𑀯𑀁 𑀲𑀫𑁆𑀫𑀸…𑀧𑁂… 𑀅𑀣𑀸𑀧𑀭𑀁 𑀏𑀢𑀤𑀯𑁄𑀘 𑀲𑀢𑁆𑀣𑀸 𑁋

𑁭𑁫𑁯. ‘‘𑀬𑁂 𑀘 𑀭𑀽𑀧𑀽𑀧𑀕𑀸 𑀲𑀢𑁆𑀢𑀸, 𑀬𑁂 𑀘 𑀅𑀭𑀽𑀧𑀝𑁆𑀞𑀸𑀬𑀺𑀦𑁄 [𑀆𑀭𑀼𑀧𑁆𑀧𑀯𑀸𑀲𑀺𑀦𑁄 (𑀲𑀻. 𑀧𑀻.)];

𑀦𑀺𑀭𑁄𑀥𑀁 𑀅𑀧𑁆𑀧𑀚𑀸𑀦𑀦𑁆𑀢𑀸, 𑀆𑀕𑀦𑁆𑀢𑀸𑀭𑁄 𑀧𑀼𑀦𑀩𑁆𑀪𑀯𑀁.

𑁭𑁬𑁦. ‘‘𑀬𑁂 𑀘 𑀭𑀽𑀧𑁂 𑀧𑀭𑀺𑀜𑁆𑀜𑀸𑀬, 𑀅𑀭𑀽𑀧𑁂𑀲𑀼 𑀅𑀲𑀡𑁆𑀞𑀺𑀢𑀸 [𑀲𑀼𑀲𑀡𑁆𑀞𑀺𑀢𑀸 (𑀲𑀻. 𑀲𑁆𑀬𑀸. 𑀧𑀻.)];

𑀦𑀺𑀭𑁄𑀥𑁂 𑀬𑁂 𑀯𑀺𑀫𑀼𑀘𑁆𑀘𑀦𑁆𑀢𑀺, 𑀢𑁂 𑀚𑀦𑀸 𑀫𑀘𑁆𑀘𑀼𑀳𑀸𑀬𑀺𑀦𑁄’’𑀢𑀺.

(𑁧𑁫) ‘‘𑀲𑀺𑀬𑀸 𑀅𑀜𑁆𑀜𑁂𑀦𑀧𑀺…𑀧𑁂… 𑀓𑀣𑀜𑁆𑀘 𑀲𑀺𑀬𑀸? 𑀬𑀁, 𑀪𑀺𑀓𑁆𑀔𑀯𑁂, 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀲𑀫𑀸𑀭𑀓𑀲𑁆𑀲 𑀲𑀩𑁆𑀭𑀳𑁆𑀫𑀓𑀲𑁆𑀲 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀚𑀸𑀬 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀇𑀤𑀁 𑀲𑀘𑁆𑀘𑀦𑁆𑀢𑀺 𑀉𑀧𑀦𑀺𑀚𑁆𑀛𑀸𑀬𑀺𑀢𑀁 𑀢𑀤𑀫𑀭𑀺𑀬𑀸𑀦𑀁 𑀏𑀢𑀁 𑀫𑀼𑀲𑀸𑀢𑀺 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀲𑀼𑀤𑀺𑀝𑁆𑀞𑀁, 𑀅𑀬𑀫𑁂𑀓𑀸𑀦𑀼𑀧𑀲𑁆𑀲𑀦𑀸. 𑀬𑀁, 𑀪𑀺𑀓𑁆𑀔𑀯𑁂, 𑀲𑀤𑁂𑀯𑀓𑀲𑁆𑀲…𑀧𑁂… 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀇𑀤𑀁 𑀫𑀼𑀲𑀸𑀢𑀺 𑀉𑀧𑀦𑀺𑀚𑁆𑀛𑀸𑀬𑀺𑀢𑀁, 𑀢𑀤𑀫𑀭𑀺𑀬𑀸𑀦𑀁 𑀏𑀢𑀁 𑀲𑀘𑁆𑀘𑀦𑁆𑀢𑀺 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀲𑀼𑀤𑀺𑀝𑁆𑀞𑀁, 𑀅𑀬𑀁 𑀤𑀼𑀢𑀺𑀬𑀸𑀦𑀼𑀧𑀲𑁆𑀲𑀦𑀸. 𑀏𑀯𑀁 𑀲𑀫𑁆𑀫𑀸…𑀧𑁂… 𑀅𑀣𑀸𑀧𑀭𑀁 𑀏𑀢𑀤𑀯𑁄𑀘 𑀲𑀢𑁆𑀣𑀸 𑁋

𑁭𑁬𑁧. ‘‘𑀅𑀦𑀢𑁆𑀢𑀦𑀺 𑀅𑀢𑁆𑀢𑀫𑀸𑀦𑀺𑀁 [𑀅𑀢𑁆𑀢𑀫𑀸𑀦𑀻 (𑀲𑁆𑀬𑀸.), 𑀅𑀢𑁆𑀢𑀫𑀸𑀦𑀁 (𑀧𑀻. 𑀓.)], 𑀧𑀲𑁆𑀲 𑀮𑁄𑀓𑀁 𑀲𑀤𑁂𑀯𑀓𑀁;

𑀦𑀺𑀯𑀺𑀝𑁆𑀞𑀁 𑀦𑀸𑀫𑀭𑀽𑀧𑀲𑁆𑀫𑀺𑀁, 𑀇𑀤𑀁 𑀲𑀘𑁆𑀘𑀦𑁆𑀢𑀺 𑀫𑀜𑁆𑀜𑀢𑀺.

𑁭𑁬𑁨. ‘‘𑀬𑁂𑀦 𑀬𑁂𑀦 𑀳𑀺 𑀫𑀜𑁆𑀜𑀦𑁆𑀢𑀺, 𑀢𑀢𑁄 𑀢𑀁 𑀳𑁄𑀢𑀺 𑀅𑀜𑁆𑀜𑀣𑀸;

𑀢𑀜𑁆𑀳𑀺 𑀢𑀲𑁆𑀲 𑀫𑀼𑀲𑀸 𑀳𑁄𑀢𑀺, 𑀫𑁄𑀲𑀥𑀫𑁆𑀫𑀜𑁆𑀳𑀺 𑀇𑀢𑁆𑀢𑀭𑀁.

𑁭𑁬𑁩. ‘‘𑀅𑀫𑁄𑀲𑀥𑀫𑁆𑀫𑀁 𑀦𑀺𑀩𑁆𑀩𑀸𑀦𑀁, 𑀢𑀤𑀭𑀺𑀬𑀸 𑀲𑀘𑁆𑀘𑀢𑁄 𑀯𑀺𑀤𑀽;

𑀢𑁂 𑀯𑁂 𑀲𑀘𑁆𑀘𑀸𑀪𑀺𑀲𑀫𑀬𑀸, 𑀦𑀺𑀘𑁆𑀙𑀸𑀢𑀸 𑀧𑀭𑀺𑀦𑀺𑀩𑁆𑀩𑀼𑀢𑀸’’𑀢𑀺.

(𑁧𑁬) ‘‘‘𑀲𑀺𑀬𑀸 𑀅𑀜𑁆𑀜𑁂𑀦𑀧𑀺 𑀧𑀭𑀺𑀬𑀸𑀬𑁂𑀦 𑀲𑀫𑁆𑀫𑀸 𑀤𑁆𑀯𑀬𑀢𑀸𑀦𑀼𑀧𑀲𑁆𑀲𑀦𑀸’𑀢𑀺, 𑀇𑀢𑀺 𑀘𑁂, 𑀪𑀺𑀓𑁆𑀔𑀯𑁂, 𑀧𑀼𑀘𑁆𑀙𑀺𑀢𑀸𑀭𑁄 𑀅𑀲𑁆𑀲𑀼; ‘𑀲𑀺𑀬𑀸’𑀢𑀺𑀲𑁆𑀲𑀼 𑀯𑀘𑀦𑀻𑀬𑀸. 𑀓𑀣𑀜𑁆𑀘 𑀲𑀺𑀬𑀸? 𑀬𑀁, 𑀪𑀺𑀓𑁆𑀔𑀯𑁂, 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀲𑀫𑀸𑀭𑀓𑀲𑁆𑀲 𑀲𑀩𑁆𑀭𑀳𑁆𑀫𑀓𑀲𑁆𑀲 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀚𑀸𑀬 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀇𑀤𑀁 𑀲𑀼𑀔𑀦𑁆𑀢𑀺 𑀉𑀧𑀦𑀺𑀚𑁆𑀛𑀸𑀬𑀺𑀢𑀁, 𑀢𑀤𑀫𑀭𑀺𑀬𑀸𑀦𑀁 𑀏𑀢𑀁 𑀤𑀼𑀓𑁆𑀔𑀦𑁆𑀢𑀺 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀲𑀼𑀤𑀺𑀝𑁆𑀞𑀁, 𑀅𑀬𑀫𑁂𑀓𑀸𑀦𑀼𑀧𑀲𑁆𑀲𑀦𑀸. 𑀬𑀁, 𑀪𑀺𑀓𑁆𑀔𑀯𑁂, 𑀲𑀤𑁂𑀯𑀓𑀲𑁆𑀲…𑀧𑁂… 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀇𑀤𑀁 𑀤𑀼𑀓𑁆𑀔𑀦𑁆𑀢𑀺 𑀉𑀧𑀦𑀺𑀚𑁆𑀛𑀸𑀬𑀺𑀢𑀁 𑀢𑀤𑀫𑀭𑀺𑀬𑀸𑀦𑀁 𑀏𑀢𑀁 𑀲𑀼𑀔𑀦𑁆𑀢𑀺 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀲𑀼𑀤𑀺𑀝𑁆𑀞𑀁, 𑀅𑀬𑀁 𑀤𑀼𑀢𑀺𑀬𑀸𑀦𑀼𑀧𑀲𑁆𑀲𑀦𑀸. 𑀏𑀯𑀁 𑀲𑀫𑁆𑀫𑀸 𑀤𑁆𑀯𑀬𑀢𑀸𑀦𑀼𑀧𑀲𑁆𑀲𑀺𑀦𑁄 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀅𑀧𑁆𑀧𑀫𑀢𑁆𑀢𑀲𑁆𑀲 𑀆𑀢𑀸𑀧𑀺𑀦𑁄 𑀧𑀳𑀺𑀢𑀢𑁆𑀢𑀲𑁆𑀲 𑀯𑀺𑀳𑀭𑀢𑁄 𑀤𑁆𑀯𑀺𑀦𑁆𑀦𑀁 𑀨𑀮𑀸𑀦𑀁 𑀅𑀜𑁆𑀜𑀢𑀭𑀁 𑀨𑀮𑀁 𑀧𑀸𑀝𑀺𑀓𑀗𑁆𑀔𑀁 𑁋 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀅𑀜𑁆𑀜𑀸, 𑀲𑀢𑀺 𑀯𑀸 𑀉𑀧𑀸𑀤𑀺𑀲𑁂𑀲𑁂 𑀅𑀦𑀸𑀕𑀸𑀫𑀺𑀢𑀸𑀢𑀺. 𑀇𑀤𑀫𑀯𑁄𑀘 𑀪𑀕𑀯𑀸. 𑀇𑀤𑀁 𑀯𑀢𑁆𑀯𑀸𑀦 𑀲𑀼𑀕𑀢𑁄 𑀅𑀣𑀸𑀧𑀭𑀁 𑀏𑀢𑀤𑀯𑁄𑀘 𑀲𑀢𑁆𑀣𑀸 𑁋

𑁭𑁬𑁪. ‘‘𑀭𑀽𑀧𑀸 𑀲𑀤𑁆𑀤𑀸 𑀭𑀲𑀸 𑀕𑀦𑁆𑀥𑀸, 𑀨𑀲𑁆𑀲𑀸 𑀥𑀫𑁆𑀫𑀸 𑀘 𑀓𑁂𑀯𑀮𑀸;

𑀇𑀝𑁆𑀞𑀸 𑀓𑀦𑁆𑀢𑀸 𑀫𑀦𑀸𑀧𑀸 𑀘, 𑀬𑀸𑀯𑀢𑀢𑁆𑀣𑀻𑀢𑀺 𑀯𑀼𑀘𑁆𑀘𑀢𑀺.

𑁭𑁬𑁫. ‘‘𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲, 𑀏𑀢𑁂 𑀯𑁄 𑀲𑀼𑀔𑀲𑀫𑁆𑀫𑀢𑀸;

𑀬𑀢𑁆𑀣 𑀘𑁂𑀢𑁂 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀢𑀁 𑀦𑁂𑀲𑀁 𑀤𑀼𑀓𑁆𑀔𑀲𑀫𑁆𑀫𑀢𑀁.

𑁭𑁬𑁬. ‘‘𑀲𑀼𑀔𑀦𑁆𑀢𑀺 𑀤𑀺𑀝𑁆𑀞𑀫𑀭𑀺𑀬𑁂𑀳𑀺, 𑀲𑀓𑁆𑀓𑀸𑀬𑀲𑁆𑀲𑀼𑀧𑀭𑁄𑀥𑀦𑀁;

𑀧𑀘𑁆𑀘𑀦𑀻𑀓𑀫𑀺𑀤𑀁 𑀳𑁄𑀢𑀺, 𑀲𑀩𑁆𑀩𑀮𑁄𑀓𑁂𑀦 𑀧𑀲𑁆𑀲𑀢𑀁.

𑁭𑁬𑁭. ‘‘𑀬𑀁 𑀧𑀭𑁂 𑀲𑀼𑀔𑀢𑁄 𑀆𑀳𑀼, 𑀢𑀤𑀭𑀺𑀬𑀸 𑀆𑀳𑀼 𑀤𑀼𑀓𑁆𑀔𑀢𑁄;

𑀬𑀁 𑀧𑀭𑁂 𑀤𑀼𑀓𑁆𑀔𑀢𑁄 𑀆𑀳𑀼, 𑀢𑀤𑀭𑀺𑀬𑀸 𑀲𑀼𑀔𑀢𑁄 𑀯𑀺𑀤𑀽.

𑁭𑁬𑁮. ‘‘𑀧𑀲𑁆𑀲 𑀥𑀫𑁆𑀫𑀁 𑀤𑀼𑀭𑀸𑀚𑀸𑀦𑀁, 𑀲𑀫𑁆𑀧𑀫𑀽𑀴𑁆𑀳𑁂𑀢𑁆𑀣𑀯𑀺𑀤𑁆𑀤𑀲𑀼 [𑀲𑀫𑁆𑀧𑀫𑀽𑀴𑁆𑀳𑁂𑀢𑁆𑀣 𑀅𑀯𑀺𑀤𑁆𑀤𑀲𑀼 (𑀲𑀻. 𑀧𑀻.), 𑀲𑀫𑁆𑀫𑀽𑀴𑁆𑀳𑁂𑀢𑁆𑀣 𑀅𑀯𑀺𑀤𑁆𑀤𑀲𑀼 (?)];

𑀦𑀺𑀯𑀼𑀢𑀸𑀦𑀁 𑀢𑀫𑁄 𑀳𑁄𑀢𑀺, 𑀅𑀦𑁆𑀥𑀓𑀸𑀭𑁄 𑀅𑀧𑀲𑁆𑀲𑀢𑀁.

𑁭𑁬𑁯. ‘‘𑀲𑀢𑀜𑁆𑀘 𑀯𑀺𑀯𑀝𑀁 𑀳𑁄𑀢𑀺, 𑀆𑀮𑁄𑀓𑁄 𑀧𑀲𑁆𑀲𑀢𑀸𑀫𑀺𑀯;

𑀲𑀦𑁆𑀢𑀺𑀓𑁂 𑀦 𑀯𑀺𑀚𑀸𑀦𑀦𑁆𑀢𑀺, 𑀫𑀕𑁆𑀕𑀸 𑀥𑀫𑁆𑀫𑀲𑁆𑀲 𑀓𑁄𑀯𑀺𑀤𑀸.

𑁭𑁭𑁦. ‘‘𑀪𑀯𑀭𑀸𑀕𑀧𑀭𑁂𑀢𑁂𑀳𑀺, 𑀪𑀯𑀲𑁄𑀢𑀸𑀦𑀼𑀲𑀸𑀭𑀺𑀪𑀺;

𑀫𑀸𑀭𑀥𑁂𑀬𑁆𑀬𑀸𑀦𑀼𑀧𑀦𑁆𑀦𑁂𑀳𑀺, 𑀦𑀸𑀬𑀁 𑀥𑀫𑁆𑀫𑁄 𑀲𑀼𑀲𑀫𑁆𑀩𑀼𑀥𑁄.

𑁭𑁭𑁧. ‘‘𑀓𑁄 𑀦𑀼 𑀅𑀜𑁆𑀜𑀢𑁆𑀭𑀫𑀭𑀺𑀬𑁂𑀳𑀺, 𑀧𑀤𑀁 𑀲𑀫𑁆𑀩𑀼𑀤𑁆𑀥𑀼𑀫𑀭𑀳𑀢𑀺;

𑀬𑀁 𑀧𑀤𑀁 𑀲𑀫𑁆𑀫𑀤𑀜𑁆𑀜𑀸𑀬, 𑀧𑀭𑀺𑀦𑀺𑀩𑁆𑀩𑀦𑁆𑀢𑀺 𑀅𑀦𑀸𑀲𑀯𑀸’’𑀢𑀺.

𑀇𑀤𑀫𑀯𑁄𑀘 𑀪𑀕𑀯𑀸. 𑀅𑀢𑁆𑀢𑀫𑀦𑀸 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀼𑀦𑁆𑀢𑀺. 𑀇𑀫𑀲𑁆𑀫𑀺𑀁 𑀘 [𑀇𑀫𑀲𑁆𑀫𑀺𑀁 𑀔𑁄 (𑀲𑀻.)] 𑀧𑀦 𑀯𑁂𑀬𑁆𑀬𑀸𑀓𑀭𑀡𑀲𑁆𑀫𑀺𑀁 𑀪𑀜𑁆𑀜𑀫𑀸𑀦𑁂 𑀲𑀝𑁆𑀞𑀺𑀫𑀢𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀸𑀦𑀺 𑀯𑀺𑀫𑀼𑀘𑁆𑀘𑀺𑀁𑀲𑀽𑀢𑀺.

𑀤𑁆𑀯𑀬𑀢𑀸𑀦𑀼𑀧𑀲𑁆𑀲𑀦𑀸𑀲𑀼𑀢𑁆𑀢𑀁 𑀤𑁆𑀯𑀸𑀤𑀲𑀫𑀁 𑀦𑀺𑀝𑁆𑀞𑀺𑀢𑀁.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀲𑀘𑁆𑀘𑀁 𑀉𑀧𑀥𑀺 𑀅𑀯𑀺𑀚𑁆𑀚𑀸 𑀘, 𑀲𑀗𑁆𑀔𑀸𑀭𑁂 𑀯𑀺𑀜𑁆𑀜𑀸𑀡𑀧𑀜𑁆𑀘𑀫𑀁;

𑀨𑀲𑁆𑀲𑀯𑁂𑀤𑀦𑀺𑀬𑀸 𑀢𑀡𑁆𑀳𑀸, 𑀉𑀧𑀸𑀤𑀸𑀦𑀸𑀭𑀫𑁆𑀪𑀆𑀳𑀸𑀭𑀸;

𑀇𑀜𑁆𑀚𑀺𑀢𑀁 𑀘𑀮𑀺𑀢𑀁 𑀭𑀽𑀧𑀁, 𑀲𑀘𑁆𑀘𑀁 𑀤𑀼𑀓𑁆𑀔𑁂𑀦 𑀲𑁄𑀴𑀲𑀸𑀢𑀺.

𑀫𑀳𑀸𑀯𑀕𑁆𑀕𑁄 𑀢𑀢𑀺𑀬𑁄 𑀦𑀺𑀝𑁆𑀞𑀺𑀢𑁄.