𑁯. 𑀯𑀺𑀧𑀲𑁆𑀲𑀦𑀸𑀓𑀣𑀸

𑁩𑁬. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀪𑀺𑀓𑁆𑀔𑀯𑁄’’𑀢𑀺. ‘‘𑀪𑀤𑀦𑁆𑀢𑁂’’𑀢𑀺 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀲𑁄 𑀯𑀢, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑀜𑁆𑀘𑀺 [𑀓𑀺𑀜𑁆𑀘𑀺 (𑀓.) 𑀅. 𑀦𑀺. 𑁬.𑁯𑁯-𑁧𑁦𑁦 𑀧𑀲𑁆𑀲𑀺𑀢𑀩𑁆𑀩𑀸] 𑀲𑀗𑁆𑀔𑀸𑀭𑀁 𑀦𑀺𑀘𑁆𑀘𑀢𑁄 𑀲𑀫𑀦𑀼𑀧𑀲𑁆𑀲𑀦𑁆𑀢𑁄 𑀅𑀦𑀼𑀮𑁄𑀫𑀺𑀓𑀸𑀬 𑀔𑀦𑁆𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀪𑀯𑀺𑀲𑁆𑀲𑀢𑀻𑀢𑀺 𑁋 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺; 𑀅𑀦𑀼𑀮𑁄𑀫𑀺𑀓𑀸𑀬 𑀔𑀦𑁆𑀢𑀺𑀬𑀸 𑀅𑀲𑀫𑀦𑁆𑀦𑀸𑀕𑀢𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀺𑀲𑁆𑀲𑀢𑀻𑀢𑀺 𑁋 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺; 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀅𑀦𑁄𑀓𑁆𑀓𑀫𑀫𑀸𑀦𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀯𑀸 𑀲𑀓𑀤𑀸𑀕𑀸𑀫𑀺𑀨𑀮𑀁 𑀯𑀸 𑀅𑀦𑀸𑀕𑀸𑀫𑀺𑀨𑀮𑀁 𑀯𑀸 𑀅𑀭𑀳𑀢𑁆𑀢𑀁 𑀯𑀸 [𑀅𑀭𑀳𑀢𑁆𑀢𑀨𑀮𑀁 𑀯𑀸 (𑀲𑁆𑀬𑀸. 𑀓.) 𑀅. 𑀦𑀺. 𑁬.𑁯𑁮 𑀧𑀲𑁆𑀲𑀺𑀢𑀩𑁆𑀩𑀸] 𑀲𑀘𑁆𑀙𑀺𑀓𑀭𑀺𑀲𑁆𑀲𑀢𑀻𑀢𑀺 𑁋 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺.

‘‘𑀲𑁄 𑀯𑀢, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀩𑁆𑀩𑀲𑀗𑁆𑀔𑀸𑀭𑁂 𑀅𑀦𑀺𑀘𑁆𑀘𑀢𑁄 𑀲𑀫𑀦𑀼𑀧𑀲𑁆𑀲𑀦𑁆𑀢𑁄 𑀅𑀦𑀼𑀮𑁄𑀫𑀺𑀓𑀸𑀬 𑀔𑀦𑁆𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀪𑀯𑀺𑀲𑁆𑀲𑀢𑀻𑀢𑀺 𑁋 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺; 𑀅𑀦𑀼𑀮𑁄𑀫𑀺𑀓𑀸𑀬 𑀔𑀦𑁆𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀺𑀲𑁆𑀲𑀢𑀻𑀢𑀺 𑁋 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺, 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀫𑀸𑀦𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀯𑀸 𑀲𑀓𑀤𑀸𑀕𑀸𑀫𑀺𑀨𑀮𑀁 𑀯𑀸 𑀅𑀦𑀸𑀕𑀸𑀫𑀺𑀨𑀮𑀁 𑀯𑀸 𑀅𑀭𑀳𑀢𑁆𑀢𑀁 𑀯𑀸 𑀲𑀘𑁆𑀙𑀺𑀓𑀭𑀺𑀲𑁆𑀲𑀢𑀻𑀢𑀺 𑁋 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺.

‘‘𑀲𑁄 𑀯𑀢, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑀜𑁆𑀘𑀺 𑀲𑀗𑁆𑀔𑀸𑀭𑀁 𑀲𑀼𑀔𑀢𑁄 𑀲𑀫𑀦𑀼𑀧𑀲𑁆𑀲𑀦𑁆𑀢𑁄 𑀅𑀦𑀼𑀮𑁄𑀫𑀺𑀓𑀸𑀬 𑀔𑀦𑁆𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀪𑀯𑀺𑀲𑁆𑀲𑀢𑀻𑀢𑀺 𑁋 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺; 𑀅𑀦𑀼𑀮𑁄𑀫𑀺𑀓𑀸𑀬 𑀔𑀦𑁆𑀢𑀺𑀬𑀸 𑀅𑀲𑀫𑀦𑁆𑀦𑀸𑀕𑀢𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀺𑀲𑁆𑀲𑀢𑀻𑀢𑀺 𑁋 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺; 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀅𑀦𑁄𑀓𑁆𑀓𑀫𑀫𑀸𑀦𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀯𑀸 𑀲𑀓𑀤𑀸𑀕𑀸𑀫𑀺𑀨𑀮𑀁 𑀯𑀸 𑀅𑀦𑀸𑀕𑀸𑀫𑀺𑀨𑀮𑀁 𑀯𑀸 𑀅𑀭𑀳𑀢𑁆𑀢𑀁 𑀯𑀸 𑀲𑀘𑁆𑀙𑀺𑀓𑀭𑀺𑀲𑁆𑀲𑀢𑀻𑀢𑀺 𑁋 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺.

‘‘𑀲𑁄 𑀯𑀢, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀩𑁆𑀩𑀲𑀗𑁆𑀔𑀸𑀭𑁂 𑀤𑀼𑀓𑁆𑀔𑀢𑁄 𑀲𑀫𑀦𑀼𑀧𑀲𑁆𑀲𑀦𑁆𑀢𑁄 𑀅𑀦𑀼𑀮𑁄𑀫𑀺𑀓𑀸𑀬 𑀔𑀦𑁆𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀪𑀯𑀺𑀲𑁆𑀲𑀢𑀻𑀢𑀺 𑁋 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺; 𑀅𑀦𑀼𑀮𑁄𑀫𑀺𑀓𑀸𑀬 𑀔𑀦𑁆𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀺𑀲𑁆𑀲𑀢𑀻𑀢𑀺 𑁋 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺; 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀫𑀸𑀦𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀯𑀸 𑀲𑀓𑀤𑀸𑀕𑀸𑀫𑀺𑀨𑀮𑀁 𑀯𑀸 𑀅𑀦𑀸𑀕𑀸𑀫𑀺𑀨𑀮𑀁 𑀯𑀸 𑀅𑀭𑀳𑀢𑁆𑀢𑀁 𑀯𑀸 𑀲𑀘𑁆𑀙𑀺𑀓𑀭𑀺𑀲𑁆𑀲𑀢𑀻𑀢𑀺 𑁋 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺.

‘‘𑀲𑁄 𑀯𑀢, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑀜𑁆𑀘𑀺 𑀥𑀫𑁆𑀫𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀦𑁆𑀢𑁄 𑀅𑀦𑀼𑀮𑁄𑀫𑀺𑀓𑀸𑀬 𑀔𑀦𑁆𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀪𑀯𑀺𑀲𑁆𑀲𑀢𑀻𑀢𑀺 𑁋 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺; 𑀅𑀦𑀼𑀮𑁄𑀫𑀺𑀓𑀸𑀬 𑀔𑀦𑁆𑀢𑀺𑀬𑀸 𑀅𑀲𑀫𑀦𑁆𑀦𑀸𑀕𑀢𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀺𑀲𑁆𑀲𑀢𑀻𑀢𑀺 𑁋 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺; 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀅𑀦𑁄𑀓𑁆𑀓𑀫𑀫𑀸𑀦𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀯𑀸 𑀲𑀓𑀤𑀸𑀕𑀸𑀫𑀺𑀨𑀮𑀁 𑀯𑀸 𑀅𑀦𑀸𑀕𑀸𑀫𑀺𑀨𑀮𑀁 𑀯𑀸 𑀅𑀭𑀳𑀢𑁆𑀢𑀁 𑀯𑀸 𑀲𑀘𑁆𑀙𑀺𑀓𑀭𑀺𑀲𑁆𑀲𑀢𑀻𑀢𑀺 𑁋 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺.

‘‘𑀲𑁄 𑀯𑀢, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀩𑁆𑀩𑀥𑀫𑁆𑀫𑁂 [𑀓𑀜𑁆𑀘𑀺 𑀥𑀫𑁆𑀫𑀁 (𑀲𑁆𑀬𑀸.), 𑀓𑀺𑀜𑁆𑀘𑀺 𑀥𑀫𑁆𑀫𑀁 (𑀓.) 𑀅. 𑀦𑀺. 𑁬.𑁧𑁦𑁦 𑀧𑀲𑁆𑀲𑀺𑀢𑀩𑁆𑀩𑀸] 𑀅𑀦𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀦𑁆𑀢𑁄 𑀅𑀦𑀼𑀮𑁄𑀫𑀺𑀓𑀸𑀬 𑀔𑀦𑁆𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀪𑀯𑀺𑀲𑁆𑀲𑀢𑀻𑀢𑀺 𑁋 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺; 𑀅𑀦𑀼𑀮𑁄𑀫𑀺𑀓𑀸𑀬 𑀔𑀦𑁆𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀺𑀲𑁆𑀲𑀢𑀻𑀢𑀺 𑁋 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺; 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀫𑀸𑀦𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀯𑀸 𑀲𑀓𑀤𑀸𑀕𑀸𑀫𑀺𑀨𑀮𑀁 𑀯𑀸 𑀅𑀦𑀸𑀕𑀸𑀫𑀺𑀨𑀮𑀁 𑀯𑀸 𑀅𑀭𑀳𑀢𑁆𑀢𑀁 𑀯𑀸 𑀲𑀘𑁆𑀙𑀺𑀓𑀭𑀺𑀲𑁆𑀲𑀢𑀻𑀢𑀺 𑁋 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺.

‘‘𑀲𑁄 𑀯𑀢, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦𑀺𑀩𑁆𑀩𑀸𑀦𑀁 𑀤𑀼𑀓𑁆𑀔𑀢𑁄 𑀲𑀫𑀦𑀼𑀧𑀲𑁆𑀲𑀦𑁆𑀢𑁄 𑀅𑀦𑀼𑀮𑁄𑀫𑀺𑀓𑀸𑀬 𑀔𑀦𑁆𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀪𑀯𑀺𑀲𑁆𑀲𑀢𑀻𑀢𑀺 𑁋 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺; 𑀅𑀦𑀼𑀮𑁄𑀫𑀺𑀓𑀸𑀬 𑀔𑀦𑁆𑀢𑀺𑀬𑀸 𑀅𑀲𑀫𑀦𑁆𑀦𑀸𑀕𑀢𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀺𑀲𑁆𑀲𑀢𑀻𑀢𑀺 𑁋 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺; 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀅𑀦𑁄𑀓𑁆𑀓𑀫𑀫𑀸𑀦𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀯𑀸 𑀲𑀓𑀤𑀸𑀕𑀸𑀫𑀺𑀨𑀮𑀁 𑀯𑀸 𑀅𑀦𑀸𑀕𑀸𑀫𑀺𑀨𑀮𑀁 𑀯𑀸 𑀅𑀭𑀳𑀢𑁆𑀢𑀁 𑀯𑀸 𑀲𑀘𑁆𑀙𑀺𑀓𑀭𑀺𑀲𑁆𑀲𑀢𑀻𑀢𑀺 𑁋 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺.

‘‘𑀲𑁄 𑀯𑀢, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦𑀺𑀩𑁆𑀩𑀸𑀦𑀁 𑀲𑀼𑀔𑀢𑁄 𑀲𑀫𑀦𑀼𑀧𑀲𑁆𑀲𑀦𑁆𑀢𑁄 𑀅𑀦𑀼𑀮𑁄𑀫𑀺𑀓𑀸𑀬 𑀔𑀦𑁆𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀪𑀯𑀺𑀲𑁆𑀲𑀢𑀻𑀢𑀺 𑁋 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺; 𑀅𑀦𑀼𑀮𑁄𑀫𑀺𑀓𑀸𑀬 𑀔𑀦𑁆𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀺𑀲𑁆𑀲𑀢𑀻𑀢𑀺 𑁋 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺; 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀫𑀸𑀦𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀯𑀸 𑀲𑀓𑀤𑀸𑀕𑀸𑀫𑀺𑀨𑀮𑀁 𑀯𑀸 𑀅𑀦𑀸𑀕𑀸𑀫𑀺𑀨𑀮𑀁 𑀯𑀸 𑀅𑀭𑀳𑀢𑁆𑀢𑀁 𑀯𑀸 𑀲𑀘𑁆𑀙𑀺𑀓𑀭𑀺𑀲𑁆𑀲𑀢𑀻𑀢𑀺 𑁋 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺’’.

𑁩𑁭. 𑀓𑀢𑀺𑀳𑀸𑀓𑀸𑀭𑁂𑀳𑀺 𑀅𑀦𑀼𑀮𑁄𑀫𑀺𑀓𑀁 𑀔𑀦𑁆𑀢𑀺𑀁 𑀧𑀝𑀺𑀮𑀪𑀢𑀺, 𑀓𑀢𑀺𑀳𑀸𑀓𑀸𑀭𑁂𑀳𑀺 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀢𑀺? 𑀘𑀢𑁆𑀢𑀸𑀭𑀻𑀲𑀸𑀬 𑀆𑀓𑀸𑀭𑁂𑀳𑀺 𑀅𑀦𑀼𑀮𑁄𑀫𑀺𑀓𑀁 𑀔𑀦𑁆𑀢𑀺𑀁 𑀧𑀝𑀺𑀮𑀪𑀢𑀺, 𑀘𑀢𑁆𑀢𑀸𑀭𑀻𑀲𑀸𑀬 𑀆𑀓𑀸𑀭𑁂𑀳𑀺 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀢𑀺.

𑀓𑀢𑀫𑁂𑀳𑀺 𑀘𑀢𑁆𑀢𑀸𑀭𑀻𑀲𑀸𑀬 𑀆𑀓𑀸𑀭𑁂𑀳𑀺 𑀅𑀦𑀼𑀮𑁄𑀫𑀺𑀓𑀁 𑀔𑀦𑁆𑀢𑀺𑀁 𑀧𑀝𑀺𑀮𑀪𑀢𑀺, 𑀓𑀢𑀫𑀳𑀺 𑀘𑀢𑁆𑀢𑀸𑀭𑀻𑀲𑀸𑀬 𑀆𑀓𑀸𑀭𑁂𑀳𑀺 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀢𑀺? 𑀧𑀜𑁆𑀘𑀓𑁆𑀔𑀦𑁆𑀥𑁂 𑀅𑀦𑀺𑀘𑁆𑀘𑀢𑁄 𑀤𑀼𑀓𑁆𑀔𑀢𑁄 𑀭𑁄𑀕𑀢𑁄 𑀕𑀡𑁆𑀟𑀢𑁄 𑀲𑀮𑁆𑀮𑀢𑁄 𑀅𑀖𑀢𑁄 𑀆𑀩𑀸𑀥𑀢𑁄 𑀧𑀭𑀢𑁄 𑀧𑀮𑁄𑀓𑀢𑁄 𑀈𑀢𑀺𑀢𑁄 𑀉𑀧𑀤𑁆𑀤𑀯𑀢𑁄 𑀪𑀬𑀢𑁄 𑀉𑀧𑀲𑀕𑁆𑀕𑀢𑁄 𑀘𑀮𑀢𑁄 𑀧𑀪𑀗𑁆𑀕𑀼𑀢𑁄 [𑀧𑀪𑀗𑁆𑀕𑀢𑁄 (𑀲𑁆𑀬𑀸.)] 𑀅𑀤𑁆𑀥𑀼𑀯𑀢𑁄 𑀅𑀢𑀸𑀡𑀢𑁄 [𑀅𑀢𑁆𑀢𑀸𑀡𑀢𑁄 (𑀲𑁆𑀬𑀸.)] 𑀅𑀮𑁂𑀡𑀢𑁄 𑀅𑀲𑀭𑀡𑀢𑁄 𑀭𑀺𑀢𑁆𑀢𑀢𑁄 𑀢𑀼𑀘𑁆𑀙𑀢𑁄 𑀲𑀼𑀜𑁆𑀜𑀢𑁄 𑀅𑀦𑀢𑁆𑀢𑀢𑁄 𑀆𑀤𑀻𑀦𑀯𑀢𑁄 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀢𑁄 𑀅𑀲𑀸𑀭𑀓𑀢𑁄 𑀅𑀖𑀫𑀽𑀮𑀢𑁄 𑀯𑀥𑀓𑀢𑁄 𑀯𑀺𑀪𑀯𑀢𑁄 𑀲𑀸𑀲𑀯𑀢𑁄 𑀲𑀗𑁆𑀔𑀢𑀢𑁄 𑀫𑀸𑀭𑀸𑀫𑀺𑀲𑀢𑁄 𑀚𑀸𑀢𑀺𑀥𑀫𑁆𑀫𑀢𑁄 𑀚𑀭𑀸𑀥𑀫𑁆𑀫𑀢𑁄 𑀩𑁆𑀬𑀸𑀥𑀺𑀥𑀫𑁆𑀫𑀢𑁄 𑀫𑀭𑀡𑀥𑀫𑁆𑀫𑀢𑁄 𑀲𑁄𑀓𑀥𑀫𑁆𑀫𑀢𑁄 𑀧𑀭𑀺𑀤𑁂𑀯𑀥𑀫𑁆𑀫𑀢𑁄 𑀉𑀧𑀸𑀬𑀸𑀲𑀥𑀫𑁆𑀫𑀢𑁄 𑀲𑀁𑀓𑀺𑀮𑁂𑀲𑀺𑀓𑀥𑀫𑁆𑀫𑀢𑁄.

𑁩𑁮. 𑀧𑀜𑁆𑀘𑀓𑁆𑀔𑀦𑁆𑀥𑁂 𑀅𑀦𑀺𑀘𑁆𑀘𑀢𑁄 𑀧𑀲𑁆𑀲𑀦𑁆𑀢𑁄 𑀅𑀦𑀼𑀮𑁄𑀫𑀺𑀓𑀁 𑀔𑀦𑁆𑀢𑀺𑀁 𑀧𑀝𑀺𑀮𑀪𑀢𑀺. 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀦𑀺𑀭𑁄𑀥𑁄 𑀦𑀺𑀘𑁆𑀘𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀧𑀲𑁆𑀲𑀦𑁆𑀢𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀢𑀺. 𑀧𑀜𑁆𑀘𑀓𑁆𑀔𑀦𑁆𑀥𑁂 𑀤𑀼𑀓𑁆𑀔𑀢𑁄 𑀧𑀲𑁆𑀲𑀦𑁆𑀢𑁄 𑀅𑀦𑀼𑀮𑁄𑀫𑀺𑀓𑀁 𑀔𑀦𑁆𑀢𑀺𑀁 𑀧𑀝𑀺𑀮𑀪𑀢𑀺. 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀦𑀺𑀭𑁄𑀥𑁄 𑀲𑀼𑀔𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀧𑀲𑁆𑀲𑀦𑁆𑀢𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀢𑀺. 𑀧𑀜𑁆𑀘𑀓𑁆𑀔𑀦𑁆𑀥𑁂 𑀭𑁄𑀕𑀢𑁄 𑀧𑀲𑁆𑀲𑀦𑁆𑀢𑁄 𑀅𑀦𑀼𑀮𑁄𑀫𑀺𑀓𑀁 𑀔𑀦𑁆𑀢𑀺𑀁 𑀧𑀝𑀺𑀮𑀪𑀢𑀺. 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀦𑀺𑀭𑁄𑀥𑁄 𑀆𑀭𑁄𑀕𑁆𑀬𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀧𑀲𑁆𑀲𑀦𑁆𑀢𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀢𑀺. 𑀧𑀜𑁆𑀘𑀓𑁆𑀔𑀦𑁆𑀥𑁂 𑀕𑀡𑁆𑀟𑀢𑁄 𑀧𑀲𑁆𑀲𑀦𑁆𑀢𑁄 𑀅𑀦𑀼𑀮𑁄𑀫𑀺𑀓𑀁 𑀔𑀦𑁆𑀢𑀺𑀁 𑀧𑀝𑀺𑀮𑀪𑀢𑀺. 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀦𑀺𑀭𑁄𑀥𑁄 𑀅𑀕𑀡𑁆𑀟𑀁 [𑀦𑀺𑀕𑀡𑁆𑀟𑁄 (𑀲𑁆𑀬𑀸.)] 𑀦𑀺𑀩𑁆𑀩𑀸𑀦𑀦𑁆𑀢𑀺 𑀧𑀲𑁆𑀲𑀦𑁆𑀢𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀢𑀺. 𑀧𑀜𑁆𑀘𑀓𑁆𑀔𑀦𑁆𑀥𑁂 𑀲𑀮𑁆𑀮𑀢𑁄 𑀧𑀲𑁆𑀲𑀦𑁆𑀢𑁄 𑀅𑀦𑀼𑀮𑁄𑀫𑀺𑀓𑀁 𑀔𑀦𑁆𑀢𑀺𑀁 𑀧𑀝𑀺𑀮𑀪𑀢𑀺. 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀦𑀺𑀭𑁄𑀥𑁄 𑀯𑀺𑀲𑀮𑁆𑀮𑀁 [𑀦𑀺𑀲𑁆𑀲𑀮𑁆𑀮𑀁 (𑀲𑁆𑀬𑀸.)] 𑀦𑀺𑀩𑁆𑀩𑀸𑀦𑀦𑁆𑀢𑀺 𑀧𑀲𑁆𑀲𑀦𑁆𑀢𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀢𑀺.

𑀧𑀜𑁆𑀘𑀓𑁆𑀔𑀦𑁆𑀥𑁂 𑀅𑀖𑀢𑁄 𑀧𑀲𑁆𑀲𑀦𑁆𑀢𑁄 𑀅𑀦𑀼𑀮𑁄𑀫𑀺𑀓𑀁 𑀔𑀦𑁆𑀢𑀺𑀁 𑀧𑀝𑀺𑀮𑀪𑀢𑀺. 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀦𑀺𑀭𑁄𑀥𑁄 𑀅𑀦𑀖𑁄 𑀦𑀺𑀩𑁆𑀩𑀸𑀦𑀦𑁆𑀢𑀺 𑀧𑀲𑁆𑀲𑀦𑁆𑀢𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀢𑀺. 𑀧𑀜𑁆𑀘𑀓𑁆𑀔𑀦𑁆𑀥𑁂 𑀆𑀩𑀸𑀥𑀢𑁄 𑀧𑀲𑁆𑀲𑀦𑁆𑀢𑁄 𑀅𑀦𑀼𑀮𑁄𑀫𑀺𑀓𑀁 𑀔𑀦𑁆𑀢𑀺𑀁 𑀧𑀝𑀺𑀮𑀪𑀢𑀺. 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀦𑀺𑀭𑁄𑀥𑁄 𑀅𑀦𑀸𑀩𑀸𑀥𑁄 𑀦𑀺𑀩𑁆𑀩𑀸𑀦𑀦𑁆𑀢𑀺 𑀧𑀲𑁆𑀲𑀦𑁆𑀢𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀢𑀺. 𑀧𑀜𑁆𑀘𑀓𑁆𑀔𑀦𑁆𑀥𑁂 𑀧𑀭𑀢𑁄 𑀧𑀲𑁆𑀲𑀦𑁆𑀢𑁄 𑀅𑀦𑀼𑀮𑁄𑀫𑀺𑀓𑀁 𑀔𑀦𑁆𑀢𑀺𑀁 𑀧𑀝𑀺𑀮𑀪𑀢𑀺. 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀦𑀺𑀭𑁄𑀥𑁄 𑀅𑀧𑀭𑀧𑁆𑀧𑀘𑁆𑀘𑀬𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀧𑀲𑁆𑀲𑀦𑁆𑀢𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀢𑀺. 𑀧𑀜𑁆𑀘𑀓𑁆𑀔𑀦𑁆𑀥𑁂 𑀧𑀮𑁄𑀓𑀢𑁄 𑀧𑀲𑁆𑀲𑀦𑁆𑀢𑁄 𑀅𑀦𑀼𑀮𑁄𑀫𑀺𑀓𑀁 𑀔𑀦𑁆𑀢𑀺𑀁 𑀧𑀝𑀺𑀮𑀪𑀢𑀺. 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀦𑀺𑀭𑁄𑀥𑁄 𑀅𑀧𑀮𑁄𑀓𑀥𑀫𑁆𑀫𑁄 𑀦𑀺𑀩𑁆𑀩𑀸𑀦𑀦𑁆𑀢𑀺 𑀧𑀲𑁆𑀲𑀦𑁆𑀢𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀢𑀺. 𑀧𑀜𑁆𑀘𑀓𑁆𑀔𑀦𑁆𑀥𑁂 𑀈𑀢𑀺𑀢𑁄 𑀧𑀲𑁆𑀲𑀦𑁆𑀢𑁄 𑀅𑀦𑀼𑀮𑁄𑀫𑀺𑀓𑀁 𑀔𑀦𑁆𑀢𑀺𑀁 𑀧𑀝𑀺𑀮𑀪𑀢𑀺. 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀦𑀺𑀭𑁄𑀥𑁄 𑀅𑀦𑀻𑀢𑀺𑀓𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀧𑀲𑁆𑀲𑀦𑁆𑀢𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀢𑀺.

𑀧𑀜𑁆𑀘𑀓𑁆𑀔𑀦𑁆𑀥𑁂 𑀉𑀧𑀤𑁆𑀤𑀯𑀢𑁄 𑀧𑀲𑁆𑀲𑀦𑁆𑀢𑁄 𑀅𑀦𑀼𑀮𑁄𑀫𑀺𑀓𑀁 𑀔𑀦𑁆𑀢𑀺𑀁 𑀧𑀝𑀺𑀮𑀪𑀢𑀺. 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀦𑀺𑀭𑁄𑀥𑁄 𑀅𑀦𑀼𑀧𑀤𑁆𑀤𑀯𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀧𑀲𑁆𑀲𑀦𑁆𑀢𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀢𑀺. 𑀧𑀜𑁆𑀘𑀓𑁆𑀔𑀦𑁆𑀥𑁂 𑀪𑀬𑀢𑁄 𑀧𑀲𑁆𑀲𑀦𑁆𑀢𑁄 𑀅𑀦𑀼𑀮𑁄𑀫𑀺𑀓𑀁 𑀔𑀦𑁆𑀢𑀺𑀁 𑀧𑀝𑀺𑀮𑀪𑀢𑀺. 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀦𑀺𑀭𑁄𑀥𑁄 𑀅𑀪𑀬𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀧𑀲𑁆𑀲𑀦𑁆𑀢𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀢𑀺. 𑀧𑀜𑁆𑀘𑀓𑁆𑀔𑀦𑁆𑀥𑁂 𑀉𑀧𑀲𑀕𑁆𑀕𑀢𑁄 𑀧𑀲𑁆𑀲𑀦𑁆𑀢𑁄 𑀅𑀦𑀼𑀮𑁄𑀫𑀺𑀓𑀁 𑀔𑀦𑁆𑀢𑀺𑀁 𑀧𑀝𑀺𑀮𑀪𑀢𑀺. 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀦𑀺𑀭𑁄𑀥𑁄 𑀅𑀦𑀼𑀧𑀲𑀕𑁆𑀕𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀧𑀲𑁆𑀲𑀦𑁆𑀢𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀢𑀺. 𑀧𑀜𑁆𑀘𑀓𑁆𑀔𑀦𑁆𑀥𑁂 𑀘𑀮𑀢𑁄 𑀧𑀲𑁆𑀲𑀦𑁆𑀢𑁄 𑀅𑀦𑀼𑀮𑁄𑀫𑀺𑀓𑀁 𑀔𑀦𑁆𑀢𑀺𑀁 𑀧𑀝𑀺𑀮𑀪𑀢𑀺. 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀦𑀺𑀭𑁄𑀥𑁄 𑀅𑀘𑀮𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀧𑀲𑁆𑀲𑀦𑁆𑀢𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀢𑀺. 𑀧𑀜𑁆𑀘𑀓𑁆𑀔𑀦𑁆𑀥𑁂 𑀧𑀪𑀗𑁆𑀕𑀼𑀢𑁄 𑀧𑀲𑁆𑀲𑀦𑁆𑀢𑁄 𑀅𑀦𑀼𑀮𑁄𑀫𑀺𑀓𑀁 𑀔𑀦𑁆𑀢𑀺𑀁 𑀧𑀝𑀺𑀮𑀪𑀢𑀺. 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀦𑀺𑀭𑁄𑀥𑁄 𑀅𑀧𑀪𑀗𑁆𑀕𑀼 [𑀅𑀧𑁆𑀧𑀪𑀗𑁆𑀕𑀁 (𑀲𑁆𑀬𑀸.)] 𑀦𑀺𑀩𑁆𑀩𑀸𑀦𑀦𑁆𑀢𑀺 𑀧𑀲𑁆𑀲𑀦𑁆𑀢𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀢𑀺.

𑀧𑀜𑁆𑀘𑀓𑁆𑀔𑀦𑁆𑀥𑁂 𑀅𑀤𑁆𑀥𑀼𑀯𑀢𑁄 𑀧𑀲𑁆𑀲𑀦𑁆𑀢𑁄 𑀅𑀦𑀼𑀮𑁄𑀫𑀺𑀓𑀁 𑀔𑀦𑁆𑀢𑀺𑀁 𑀧𑀝𑀺𑀮𑀪𑀢𑀺. 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀦𑀺𑀭𑁄𑀥𑁄 𑀥𑀼𑀯𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀧𑀲𑁆𑀲𑀦𑁆𑀢𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀢𑀺. 𑀧𑀜𑁆𑀘𑀓𑁆𑀔𑀦𑁆𑀥𑁂 𑀅𑀢𑀸𑀡𑀢𑁄 𑀧𑀲𑁆𑀲𑀦𑁆𑀢𑁄 𑀅𑀦𑀼𑀮𑁄𑀫𑀺𑀓𑀁 𑀔𑀦𑁆𑀢𑀺𑀁 𑀧𑀝𑀺𑀮𑀪𑀢𑀺. 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀦𑀺𑀭𑁄𑀥𑁄 𑀢𑀸𑀡𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀧𑀲𑁆𑀲𑀦𑁆𑀢𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀢𑀺. 𑀧𑀜𑁆𑀘𑀓𑁆𑀔𑀦𑁆𑀥𑁂 𑀅𑀮𑁂𑀡𑀢𑁄 𑀧𑀲𑁆𑀲𑀦𑁆𑀢𑁄 𑀅𑀦𑀼𑀮𑁄𑀫𑀺𑀓𑀁 𑀔𑀦𑁆𑀢𑀺𑀁 𑀧𑀝𑀺𑀮𑀪𑀢𑀺. 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀦𑀺𑀭𑁄𑀥𑁄 𑀮𑁂𑀡𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀧𑀲𑁆𑀲𑀦𑁆𑀢𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀢𑀺. 𑀧𑀜𑁆𑀘𑀓𑁆𑀔𑀦𑁆𑀥𑁂 𑀅𑀲𑀭𑀡𑀢𑁄 𑀧𑀲𑁆𑀲𑀦𑁆𑀢𑁄 𑀅𑀦𑀼𑀮𑁄𑀫𑀺𑀓𑀁 𑀔𑀦𑁆𑀢𑀺𑀁 𑀧𑀝𑀺𑀮𑀪𑀢𑀺. 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀦𑀺𑀭𑁄𑀥𑁄 𑀲𑀭𑀡𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀧𑀲𑁆𑀲𑀦𑁆𑀢𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀢𑀺. 𑀧𑀜𑁆𑀘𑀓𑁆𑀔𑀦𑁆𑀥𑁂 𑀭𑀺𑀢𑁆𑀢𑀢𑁄 𑀧𑀲𑁆𑀲𑀦𑁆𑀢𑁄 𑀅𑀦𑀼𑀮𑁄𑀫𑀺𑀓𑀁 𑀔𑀦𑁆𑀢𑀺𑀁 𑀧𑀝𑀺𑀮𑀪𑀢𑀺. 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀦𑀺𑀭𑁄𑀥𑁄 𑀅𑀭𑀺𑀢𑁆𑀢𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀧𑀲𑁆𑀲𑀦𑁆𑀢𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀢𑀺.

𑀧𑀜𑁆𑀘𑀓𑁆𑀔𑀦𑁆𑀥𑁂 𑀢𑀼𑀘𑁆𑀙𑀢𑁄 𑀧𑀲𑁆𑀲𑀦𑁆𑀢𑁄 𑀅𑀦𑀼𑀮𑁄𑀫𑀺𑀓𑀁 𑀔𑀦𑁆𑀢𑀺𑀁 𑀧𑀝𑀺𑀮𑀪𑀢𑀺. 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀦𑀺𑀭𑁄𑀥𑁄 𑀅𑀢𑀼𑀘𑁆𑀙𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀧𑀲𑁆𑀲𑀦𑁆𑀢𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀢𑀺. 𑀧𑀜𑁆𑀘𑀓𑁆𑀔𑀦𑁆𑀥𑁂 𑀲𑀼𑀜𑁆𑀜𑀢𑁄 𑀧𑀲𑁆𑀲𑀦𑁆𑀢𑁄 𑀅𑀦𑀼𑀮𑁄𑀫𑀺𑀓𑀁 𑀔𑀦𑁆𑀢𑀺𑀁 𑀧𑀝𑀺𑀮𑀪𑀢𑀺. 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀦𑀺𑀭𑁄𑀥𑁄 𑀧𑀭𑀫𑀲𑀼𑀜𑁆𑀜𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀧𑀲𑁆𑀲𑀦𑁆𑀢𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀢𑀺. 𑀧𑀜𑁆𑀘𑀓𑁆𑀔𑀦𑁆𑀥𑁂 𑀅𑀦𑀢𑁆𑀢𑀢𑁄 𑀧𑀲𑁆𑀲𑀦𑁆𑀢𑁄 𑀅𑀦𑀼𑀮𑁄𑀫𑀺𑀓𑀁 𑀔𑀦𑁆𑀢𑀺𑀁 𑀧𑀝𑀺𑀮𑀪𑀢𑀺. 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀦𑀺𑀭𑁄𑀥𑁄 𑀧𑀭𑀫𑀢𑁆𑀣𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀧𑀲𑁆𑀲𑀦𑁆𑀢𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀢𑀺. 𑀧𑀜𑁆𑀘𑀓𑁆𑀔𑀦𑁆𑀥𑁂 𑀆𑀤𑀻𑀦𑀯𑀢𑁄 𑀧𑀲𑁆𑀲𑀦𑁆𑀢𑁄 𑀅𑀦𑀼𑀮𑁄𑀫𑀺𑀓𑀁 𑀔𑀦𑁆𑀢𑀺𑀁 𑀧𑀝𑀺𑀮𑀪𑀢𑀺. 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀦𑀺𑀭𑁄𑀥𑁄 𑀅𑀦𑀸𑀤𑀻𑀦𑀯𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀧𑀲𑁆𑀲𑀦𑁆𑀢𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀢𑀺. 𑀧𑀜𑁆𑀘𑀓𑁆𑀔𑀦𑁆𑀥𑁂 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀢𑁄 𑀧𑀲𑁆𑀲𑀦𑁆𑀢𑁄 𑀅𑀦𑀼𑀮𑁄𑀫𑀺𑀓𑀁 𑀔𑀦𑁆𑀢𑀺𑀁 𑀧𑀝𑀺𑀮𑀪𑀢𑀺. 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀦𑀺𑀭𑁄𑀥𑁄 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀧𑀲𑁆𑀲𑀦𑁆𑀢𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀢𑀺.

𑀧𑀜𑁆𑀘𑀓𑁆𑀔𑀦𑁆𑀥𑁂 𑀅𑀲𑀸𑀭𑀓𑀢𑁄 𑀧𑀲𑁆𑀲𑀦𑁆𑀢𑁄 𑀅𑀦𑀼𑀮𑁄𑀫𑀺𑀓𑀁 𑀔𑀦𑁆𑀢𑀺𑀁 𑀧𑀝𑀺𑀮𑀪𑀢𑀺. 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀦𑀺𑀭𑁄𑀥𑁄 𑀲𑀸𑀭𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀧𑀲𑁆𑀲𑀦𑁆𑀢𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀢𑀺. 𑀧𑀜𑁆𑀘𑀓𑁆𑀔𑀦𑁆𑀥𑁂 𑀅𑀖𑀫𑀽𑀮𑀢𑁄 𑀧𑀲𑁆𑀲𑀦𑁆𑀢𑁄 𑀅𑀦𑀼𑀮𑁄𑀫𑀺𑀓𑀁 𑀔𑀦𑁆𑀢𑀺𑀁 𑀧𑀝𑀺𑀮𑀪𑀢𑀺. 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀦𑀺𑀭𑁄𑀥𑁄 𑀅𑀦𑀖𑀫𑀽𑀮𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀧𑀲𑁆𑀲𑀦𑁆𑀢𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀢𑀺. 𑀧𑀜𑁆𑀘𑀓𑁆𑀔𑀦𑁆𑀥𑁂 𑀯𑀥𑀓𑀢𑁄 𑀧𑀲𑁆𑀲𑀦𑁆𑀢𑁄 𑀅𑀦𑀼𑀮𑁄𑀫𑀺𑀓𑀁 𑀔𑀦𑁆𑀢𑀺𑀁 𑀧𑀝𑀺𑀮𑀪𑀢𑀺. 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀦𑀺𑀭𑁄𑀥𑁄 𑀅𑀯𑀥𑀓𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀧𑀲𑁆𑀲𑀦𑁆𑀢𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀢𑀺. 𑀧𑀜𑁆𑀘𑀓𑁆𑀔𑀦𑁆𑀥𑁂 𑀯𑀺𑀪𑀯𑀢𑁄 𑀧𑀲𑁆𑀲𑀦𑁆𑀢𑁄 𑀅𑀦𑀼𑀮𑁄𑀫𑀺𑀓𑀁 𑀔𑀦𑁆𑀢𑀺𑀁 𑀧𑀝𑀺𑀮𑀪𑀢𑀺. 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀦𑀺𑀭𑁄𑀥𑁄 𑀅𑀯𑀺𑀪𑀯𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀧𑀲𑁆𑀲𑀦𑁆𑀢𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀢𑀺. 𑀧𑀜𑁆𑀘𑀓𑁆𑀔𑀦𑁆𑀥𑁂 𑀲𑀸𑀲𑀯𑀢𑁄 𑀧𑀲𑁆𑀲𑀦𑁆𑀢𑁄 𑀅𑀦𑀼𑀮𑁄𑀫𑀺𑀓𑀁 𑀔𑀦𑁆𑀢𑀺𑀁 𑀧𑀝𑀺𑀮𑀪𑀢𑀺. 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀦𑀺𑀭𑁄𑀥𑁄 𑀅𑀦𑀸𑀲𑀯𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀧𑀲𑁆𑀲𑀦𑁆𑀢𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀢𑀺.

𑀧𑀜𑁆𑀘𑀓𑁆𑀔𑀦𑁆𑀥𑁂 𑀲𑀗𑁆𑀔𑀢𑀢𑁄 𑀧𑀲𑁆𑀲𑀦𑁆𑀢𑁄 𑀅𑀦𑀼𑀮𑁄𑀫𑀺𑀓𑀁 𑀔𑀦𑁆𑀢𑀺𑀁 𑀧𑀝𑀺𑀮𑀪𑀢𑀺. 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀦𑀺𑀭𑁄𑀥𑁄 𑀅𑀲𑀗𑁆𑀔𑀢𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀧𑀲𑁆𑀲𑀦𑁆𑀢𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀢𑀺. 𑀧𑀜𑁆𑀘𑀓𑁆𑀔𑀦𑁆𑀥𑁂 𑀫𑀸𑀭𑀸𑀫𑀺𑀲𑀢𑁄 𑀧𑀲𑁆𑀲𑀦𑁆𑀢𑁄 𑀅𑀦𑀼𑀮𑁄𑀫𑀺𑀓𑀁 𑀔𑀦𑁆𑀢𑀺𑀁 𑀧𑀝𑀺𑀮𑀪𑀢𑀺. 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀦𑀺𑀭𑁄𑀥𑁄 𑀦𑀺𑀭𑀸𑀫𑀺𑀲𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀧𑀲𑁆𑀲𑀦𑁆𑀢𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀢𑀺. 𑀧𑀜𑁆𑀘𑀓𑁆𑀔𑀦𑁆𑀥𑁂 𑀚𑀸𑀢𑀺𑀥𑀫𑁆𑀫𑀢𑁄 𑀧𑀲𑁆𑀲𑀦𑁆𑀢𑁄 𑀅𑀦𑀼𑀮𑁄𑀫𑀺𑀓𑀁 𑀔𑀦𑁆𑀢𑀺𑀁 𑀧𑀝𑀺𑀮𑀪𑀢𑀺. 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀦𑀺𑀭𑁄𑀥𑁄 𑀅𑀚𑀸𑀢𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀧𑀲𑁆𑀲𑀦𑁆𑀢𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀢𑀺. 𑀧𑀜𑁆𑀘𑀓𑁆𑀔𑀦𑁆𑀥𑁂 𑀚𑀭𑀸𑀥𑀫𑁆𑀫𑀢𑁄 𑀧𑀲𑁆𑀲𑀦𑁆𑀢𑁄 𑀅𑀦𑀼𑀮𑁄𑀫𑀺𑀓𑀁 𑀔𑀦𑁆𑀢𑀺𑀁 𑀧𑀝𑀺𑀮𑀪𑀢𑀺. 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀦𑀺𑀭𑁄𑀥𑁄 𑀅𑀚𑀭𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀧𑀲𑁆𑀲𑀦𑁆𑀢𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀢𑀺. 𑀧𑀜𑁆𑀘𑀓𑁆𑀔𑀦𑁆𑀥𑁂 𑀩𑁆𑀬𑀸𑀥𑀺𑀥𑀫𑁆𑀫𑀢𑁄 𑀧𑀲𑁆𑀲𑀦𑁆𑀢𑁄 𑀅𑀦𑀼𑀮𑁄𑀫𑀺𑀓𑀁 𑀔𑀦𑁆𑀢𑀺𑀁 𑀧𑀝𑀺𑀮𑀪𑀢𑀺. 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀦𑀺𑀭𑁄𑀥𑁄 𑀅𑀩𑁆𑀬𑀸𑀥𑀺 [𑀅𑀩𑁆𑀬𑀸𑀥𑀺𑀥𑀫𑁆𑀫𑀁 (𑀲𑁆𑀬𑀸.)] 𑀦𑀺𑀩𑁆𑀩𑀸𑀦𑀦𑁆𑀢𑀺 𑀧𑀲𑁆𑀲𑀦𑁆𑀢𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀢𑀺.

𑀧𑀜𑁆𑀘𑀓𑁆𑀔𑀦𑁆𑀥𑁂 𑀫𑀭𑀡𑀥𑀫𑁆𑀫𑀢𑁄 𑀧𑀲𑁆𑀲𑀦𑁆𑀢𑁄 𑀅𑀦𑀼𑀮𑁄𑀫𑀺𑀓𑀁 𑀔𑀦𑁆𑀢𑀺𑀁 𑀧𑀝𑀺𑀮𑀪𑀢𑀺. 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀦𑀺𑀭𑁄𑀥𑁄 𑀅𑀫𑀢𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀧𑀲𑁆𑀲𑀦𑁆𑀢𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀢𑀺. 𑀧𑀜𑁆𑀘𑀓𑁆𑀔𑀦𑁆𑀥𑁂 𑀲𑁄𑀓𑀥𑀫𑁆𑀫𑀢𑁄 𑀧𑀲𑁆𑀲𑀦𑁆𑀢𑁄 𑀅𑀦𑀼𑀮𑁄𑀫𑀺𑀓𑀁 𑀔𑀦𑁆𑀢𑀺𑀁 𑀧𑀝𑀺𑀮𑀪𑀢𑀺. 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀦𑀺𑀭𑁄𑀥𑁄 𑀅𑀲𑁄𑀓𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀧𑀲𑁆𑀲𑀦𑁆𑀢𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀢𑀺. 𑀧𑀜𑁆𑀘𑀓𑁆𑀔𑀦𑁆𑀥𑁂 𑀧𑀭𑀺𑀤𑁂𑀯𑀥𑀫𑁆𑀫𑀢𑁄 𑀧𑀲𑁆𑀲𑀦𑁆𑀢𑁄 𑀅𑀦𑀼𑀮𑁄𑀫𑀺𑀓𑀁 𑀔𑀦𑁆𑀢𑀺𑀁 𑀧𑀝𑀺𑀮𑀪𑀢𑀺. 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀦𑀺𑀭𑁄𑀥𑁄 𑀅𑀧𑀭𑀺𑀤𑁂𑀯𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀧𑀲𑁆𑀲𑀦𑁆𑀢𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀢𑀺. 𑀧𑀜𑁆𑀘𑀓𑁆𑀔𑀦𑁆𑀥𑁂 𑀉𑀧𑀸𑀬𑀸𑀲𑀥𑀫𑁆𑀫𑀢𑁄 𑀧𑀲𑁆𑀲𑀦𑁆𑀢𑁄 𑀅𑀦𑀼𑀮𑁄𑀫𑀺𑀓𑀁 𑀔𑀦𑁆𑀢𑀺𑀁 𑀧𑀝𑀺𑀮𑀪𑀢𑀺. 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀦𑀺𑀭𑁄𑀥𑁄 𑀅𑀦𑀼𑀧𑀸𑀬𑀸𑀲𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀧𑀲𑁆𑀲𑀦𑁆𑀢𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀢𑀺. 𑀧𑀜𑁆𑀘𑀓𑁆𑀔𑀦𑁆𑀥𑁂 𑀲𑀁𑀓𑀺𑀮𑁂𑀲𑀺𑀓𑀥𑀫𑁆𑀫𑀢𑁄 𑀧𑀲𑁆𑀲𑀦𑁆𑀢𑁄 𑀅𑀦𑀼𑀮𑁄𑀫𑀺𑀓𑀁 𑀔𑀦𑁆𑀢𑀺𑀁 𑀧𑀝𑀺𑀮𑀪𑀢𑀺. 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀦𑀺𑀭𑁄𑀥𑁄 𑀅𑀲𑀁𑀓𑀺𑀮𑀺𑀝𑁆𑀞𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀧𑀲𑁆𑀲𑀦𑁆𑀢𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀢𑀺.

𑁩𑁯. 𑀅𑀦𑀺𑀘𑁆𑀘𑀢𑁄𑀢𑀺, 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸. 𑀤𑀼𑀓𑁆𑀔𑀢𑁄𑀢𑀺, 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸. 𑀭𑁄𑀕𑀢𑁄𑀢𑀺, 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸. 𑀕𑀡𑁆𑀟𑀢𑁄𑀢𑀺, 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸. 𑀲𑀮𑁆𑀮𑀢𑁄𑀢𑀺, 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸. 𑀅𑀖𑀢𑁄𑀢𑀺, 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸. 𑀆𑀩𑀸𑀥𑀢𑁄𑀢𑀺, 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸. 𑀧𑀭𑀢𑁄𑀢𑀺, 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸. 𑀧𑀮𑁄𑀓𑀢𑁄𑀢𑀺, 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸. 𑀈𑀢𑀺𑀢𑁄𑀢𑀺, 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸.

𑀉𑀧𑀤𑁆𑀤𑀯𑀢𑁄𑀢𑀺, 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸. 𑀪𑀬𑀢𑁄𑀢𑀺, 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸. 𑀉𑀧𑀲𑀕𑁆𑀕𑀢𑁄𑀢𑀺, 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸. 𑀘𑀮𑀢𑁄𑀢𑀺, 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸. 𑀧𑀪𑀗𑁆𑀕𑀼𑀢𑁄𑀢𑀺, 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸. 𑀅𑀤𑁆𑀥𑀼𑀯𑀢𑁄𑀢𑀺, 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸. 𑀅𑀢𑀸𑀡𑀢𑁄𑀢𑀺, 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸. 𑀅𑀮𑁂𑀡𑀢𑁄𑀢𑀺, 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸. 𑀅𑀲𑀭𑀡𑀢𑁄𑀢𑀺, 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸. 𑀭𑀺𑀢𑁆𑀢𑀢𑁄𑀢𑀺, 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸.

𑀢𑀼𑀘𑁆𑀙𑀢𑁄𑀢𑀺, 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸. 𑀲𑀼𑀜𑁆𑀜𑀢𑁄𑀢𑀺, 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸. 𑀅𑀦𑀢𑁆𑀢𑀢𑁄𑀢𑀺, 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸. 𑀆𑀤𑀻𑀦𑀯𑀢𑁄𑀢𑀺, 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸. 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀢𑁄𑀢𑀺, 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸. 𑀅𑀲𑀸𑀭𑀓𑀢𑁄𑀢𑀺, 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸. 𑀅𑀖𑀫𑀽𑀮𑀢𑁄𑀢𑀺, 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸. 𑀯𑀥𑀓𑀢𑁄𑀢𑀺, 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸. 𑀯𑀺𑀪𑀯𑀢𑁄𑀢𑀺, 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸. 𑀲𑀸𑀲𑀯𑀢𑁄𑀢𑀺, 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸.

𑀲𑀗𑁆𑀔𑀢𑀢𑁄𑀢𑀺, 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸. 𑀫𑀸𑀭𑀸𑀫𑀺𑀲𑀢𑁄𑀢𑀺, 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸. 𑀚𑀸𑀢𑀺𑀥𑀫𑁆𑀫𑀢𑁄𑀢𑀺, 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸. 𑀚𑀭𑀸𑀥𑀫𑁆𑀫𑀢𑁄𑀢𑀺, 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸. 𑀩𑁆𑀬𑀸𑀥𑀺𑀥𑀫𑁆𑀫𑀢𑁄𑀢𑀺, 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸. 𑀫𑀭𑀡𑀥𑀫𑁆𑀫𑀢𑁄𑀢𑀺, 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸. 𑀲𑁄𑀓𑀥𑀫𑁆𑀫𑀢𑁄𑀢𑀺, 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸. 𑀧𑀭𑀺𑀤𑁂𑀯𑀥𑀫𑁆𑀫𑀢𑁄𑀢𑀺, 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸. 𑀉𑀧𑀸𑀬𑀸𑀲𑀥𑀫𑁆𑀫𑀢𑁄𑀢𑀺, 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸. 𑀲𑀁𑀓𑀺𑀮𑁂𑀲𑀺𑀓𑀥𑀫𑁆𑀫𑀢𑁄𑀢𑀺, 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸.

𑀇𑀫𑁂𑀳𑀺 𑀘𑀢𑁆𑀢𑀸𑀮𑀻𑀲𑀸𑀬 𑀆𑀓𑀸𑀭𑁂𑀳𑀺 𑀅𑀦𑀼𑀮𑁄𑀫𑀺𑀓𑀁 𑀔𑀦𑁆𑀢𑀺𑀁 𑀧𑀝𑀺𑀮𑀪𑀢𑀺. 𑀇𑀫𑁂𑀳𑀺 𑀘𑀢𑁆𑀢𑀸𑀮𑀻𑀲𑀸𑀬 𑀆𑀓𑀸𑀭𑁂𑀳𑀺 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀢𑀺.

𑀇𑀫𑁂𑀳𑀺 𑀘𑀢𑁆𑀢𑀸𑀮𑀻𑀲𑀸𑀬 𑀆𑀓𑀸𑀭𑁂𑀳𑀺 𑀅𑀦𑀼𑀮𑁄𑀫𑀺𑀓𑀁 𑀔𑀦𑁆𑀢𑀺𑀁 𑀧𑀝𑀺𑀮𑀪𑀦𑁆𑀢𑀲𑁆𑀲, 𑀇𑀫𑁂𑀳𑀺 𑀘𑀢𑁆𑀢𑀸𑀮𑀻𑀲𑀸𑀬 𑀆𑀓𑀸𑀭𑁂𑀳𑀺 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀦𑁆𑀢𑀲𑁆𑀲 𑀓𑀢𑀺 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸, 𑀓𑀢𑀺 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸, 𑀓𑀢𑀺 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸?

𑀧𑀜𑁆𑀘𑀯𑀻𑀲𑀢𑀺 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸, 𑀧𑀜𑁆𑀜𑀸𑀲 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸;

𑀲𑀢𑀁 𑀧𑀜𑁆𑀘𑀯𑀻𑀲𑀢𑀺 𑀘𑁂𑀯, 𑀬𑀸𑀦𑀺 𑀤𑀼𑀓𑁆𑀔𑁂 𑀧𑀯𑀼𑀘𑁆𑀘𑀭𑁂𑀢𑀺.

𑀯𑀺𑀧𑀲𑁆𑀲𑀦𑀸𑀓𑀣𑀸 𑀦𑀺𑀝𑁆𑀞𑀺𑀢𑀸.