𑁩. 𑀧𑀜𑁆𑀜𑀸𑀯𑀕𑁆𑀕𑁄

𑁧. 𑀫𑀳𑀸𑀧𑀜𑁆𑀜𑀸𑀓𑀣𑀸

𑁧. 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀓𑀢𑀫𑀁 𑀧𑀜𑁆𑀜𑀁 𑀧𑀭𑀺𑀧𑀽𑀭𑁂𑀢𑀺? 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀓𑀢𑀫𑀁 𑀧𑀜𑁆𑀜𑀁 𑀧𑀭𑀺𑀧𑀽𑀭𑁂𑀢𑀺? 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀓𑀢𑀫𑀁 𑀧𑀜𑁆𑀜𑀁 𑀧𑀭𑀺𑀧𑀽𑀭𑁂𑀢𑀺…𑀧𑁂… 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀦𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀓𑀢𑀫𑀁 𑀧𑀜𑁆𑀜𑀁 𑀧𑀭𑀺𑀧𑀽𑀭𑁂𑀢𑀺?

𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀚𑀯𑀦𑀧𑀜𑁆𑀜𑀁 𑀧𑀭𑀺𑀧𑀽𑀭𑁂𑀢𑀺. 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑀁 𑀧𑀭𑀺𑀧𑀽𑀭𑁂𑀢𑀺. 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀫𑀳𑀸𑀧𑀜𑁆𑀜𑀁 𑀧𑀭𑀺𑀧𑀽𑀭𑁂𑀢𑀺. 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀢𑀺𑀓𑁆𑀔𑀧𑀜𑁆𑀜𑀁 𑀧𑀭𑀺𑀧𑀽𑀭𑁂𑀢𑀺. 𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀦𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀯𑀺𑀧𑀼𑀮𑀧𑀜𑁆𑀜𑀁 𑀧𑀭𑀺𑀧𑀽𑀭𑁂𑀢𑀺. 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀦𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀕𑀫𑁆𑀪𑀻𑀭𑀧𑀜𑁆𑀜𑀁 𑀧𑀭𑀺𑀧𑀽𑀭𑁂𑀢𑀺. 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀦𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀅𑀲𑀸𑀫𑀦𑁆𑀢𑀧𑀜𑁆𑀜𑀁 [𑀅𑀲𑁆𑀲𑀸𑀫𑀦𑁆𑀢𑀧𑀜𑁆𑀜𑀁 (𑀲𑁆𑀬𑀸.)] 𑀧𑀭𑀺𑀧𑀽𑀭𑁂𑀢𑀺. 𑀇𑀫𑀸 𑀲𑀢𑁆𑀢 𑀧𑀜𑁆𑀜𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀧𑀡𑁆𑀟𑀺𑀘𑁆𑀘𑀁 𑀧𑀭𑀺𑀧𑀽𑀭𑁂𑀦𑁆𑀢𑀺. 𑀇𑀫𑀸 𑀅𑀝𑁆𑀞 𑀧𑀜𑁆𑀜𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀧𑀼𑀣𑀼𑀧𑀜𑁆𑀜𑀁 𑀧𑀭𑀺𑀧𑀽𑀭𑁂𑀦𑁆𑀢𑀺. 𑀇𑀫𑀸 𑀦𑀯 𑀧𑀜𑁆𑀜𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀳𑀸𑀲𑀧𑀜𑁆𑀜𑀁 𑀧𑀭𑀺𑀧𑀽𑀭𑁂𑀦𑁆𑀢𑀺.

𑀳𑀸𑀲𑀧𑀜𑁆𑀜𑀸 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸. 𑀢𑀲𑁆𑀲𑀸 𑀅𑀢𑁆𑀣𑀯𑀯𑀢𑁆𑀣𑀸𑀦𑀢𑁄 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸 𑀅𑀥𑀺𑀕𑀢𑀸 𑀳𑁄𑀢𑀺 𑀲𑀘𑁆𑀙𑀺𑀓𑀢𑀸 𑀨𑀲𑁆𑀲𑀺𑀢𑀸 𑀧𑀜𑁆𑀜𑀸𑀬. 𑀥𑀫𑁆𑀫𑀯𑀯𑀢𑁆𑀣𑀸𑀦𑀢𑁄 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸 𑀅𑀥𑀺𑀕𑀢𑀸 𑀳𑁄𑀢𑀺 𑀲𑀘𑁆𑀙𑀺𑀓𑀢𑀸 𑀨𑀲𑁆𑀲𑀺𑀢𑀸 𑀧𑀜𑁆𑀜𑀸𑀬. 𑀦𑀺𑀭𑀼𑀢𑁆𑀢𑀺𑀯𑀯𑀢𑁆𑀣𑀸𑀦𑀢𑁄 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸 𑀅𑀥𑀺𑀕𑀢𑀸 𑀳𑁄𑀢𑀺 𑀲𑀘𑁆𑀙𑀺𑀓𑀢𑀸 𑀨𑀲𑁆𑀲𑀺𑀢𑀸 𑀧𑀜𑁆𑀜𑀸𑀬. 𑀧𑀝𑀺𑀪𑀸𑀦𑀯𑀯𑀢𑁆𑀣𑀸𑀦𑀢𑁄 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸 𑀅𑀥𑀺𑀕𑀢𑀸 𑀳𑁄𑀢𑀺 𑀲𑀘𑁆𑀙𑀺𑀓𑀢𑀸 𑀨𑀲𑁆𑀲𑀺𑀢𑀸 𑀧𑀜𑁆𑀜𑀸𑀬. 𑀢𑀲𑁆𑀲𑀺𑀫𑀸 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸𑀬𑁄 𑀅𑀥𑀺𑀕𑀢𑀸 𑀳𑁄𑀦𑁆𑀢𑀺 𑀲𑀘𑁆𑀙𑀺𑀓𑀢𑀸 𑀨𑀲𑁆𑀲𑀺𑀢𑀸 𑀧𑀜𑁆𑀜𑀸𑀬.

𑀭𑀽𑀧𑁂 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀓𑀢𑀫𑀁 𑀧𑀜𑁆𑀜𑀁 𑀧𑀭𑀺𑀧𑀽𑀭𑁂𑀢𑀺…𑀧𑁂… 𑀭𑀽𑀧𑁂 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀦𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀓𑀢𑀫𑀁 𑀧𑀜𑁆𑀜𑀁 𑀧𑀭𑀺𑀧𑀽𑀭𑁂𑀢𑀺? 𑀭𑀽𑀧𑁂 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀚𑀯𑀦𑀧𑀜𑁆𑀜𑀁 𑀧𑀭𑀺𑀧𑀽𑀭𑁂𑀢𑀺…𑀧𑁂… 𑀭𑀽𑀧𑁂 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀦𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀅𑀲𑀸𑀫𑀦𑁆𑀢𑀧𑀜𑁆𑀜𑀁 𑀧𑀭𑀺𑀧𑀽𑀭𑁂𑀢𑀺. 𑀇𑀫𑀸 𑀲𑀢𑁆𑀢 𑀧𑀜𑁆𑀜𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀧𑀡𑁆𑀟𑀺𑀘𑁆𑀘𑀁 𑀧𑀭𑀺𑀧𑀽𑀭𑁂𑀦𑁆𑀢𑀺. 𑀇𑀫𑀸 𑀅𑀝𑁆𑀞 𑀧𑀜𑁆𑀜𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀧𑀼𑀣𑀼𑀧𑀜𑁆𑀜𑀁 𑀧𑀭𑀺𑀧𑀽𑀭𑁂𑀦𑁆𑀢𑀺. 𑀇𑀫𑀸 𑀦𑀯 𑀧𑀜𑁆𑀜𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀳𑀸𑀲𑀧𑀜𑁆𑀜𑀁 𑀧𑀭𑀺𑀧𑀽𑀭𑁂𑀦𑁆𑀢𑀺.

𑀳𑀸𑀲𑀧𑀜𑁆𑀜𑀸 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸. 𑀢𑀲𑁆𑀲𑀸 𑀅𑀢𑁆𑀣𑀯𑀯𑀢𑁆𑀣𑀸𑀦𑀢𑁄 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸 𑀅𑀥𑀺𑀕𑀢𑀸 𑀳𑁄𑀢𑀺 𑀲𑀘𑁆𑀙𑀺𑀓𑀢𑀸 𑀨𑀲𑁆𑀲𑀺𑀢𑀸 𑀧𑀜𑁆𑀜𑀸𑀬. 𑀥𑀫𑁆𑀫𑀯𑀯𑀢𑁆𑀣𑀸𑀦𑀢𑁄 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸 𑀅𑀥𑀺𑀕𑀢𑀸 𑀳𑁄𑀢𑀺 𑀲𑀘𑁆𑀙𑀺𑀓𑀢𑀸 𑀨𑀲𑁆𑀲𑀺𑀢𑀸 𑀧𑀜𑁆𑀜𑀸𑀬. 𑀦𑀺𑀭𑀼𑀢𑁆𑀢𑀺𑀯𑀯𑀢𑁆𑀣𑀸𑀦𑀢𑁄 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸 𑀅𑀥𑀺𑀕𑀢𑀸 𑀳𑁄𑀢𑀺 𑀲𑀘𑁆𑀙𑀺𑀓𑀢𑀸 𑀨𑀲𑁆𑀲𑀺𑀢𑀸 𑀧𑀜𑁆𑀜𑀸𑀬. 𑀧𑀝𑀺𑀪𑀸𑀦𑀯𑀯𑀢𑁆𑀣𑀸𑀦𑀢𑁄 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸 𑀅𑀥𑀺𑀕𑀢𑀸 𑀳𑁄𑀢𑀺, 𑀲𑀘𑁆𑀙𑀺𑀓𑀢𑀸 𑀨𑀲𑁆𑀲𑀺𑀢𑀸 𑀧𑀜𑁆𑀜𑀸𑀬. 𑀢𑀲𑁆𑀲𑀺𑀫𑀸 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸𑀬𑁄 𑀅𑀥𑀺𑀕𑀢𑀸 𑀳𑁄𑀦𑁆𑀢𑀺 𑀲𑀘𑁆𑀙𑀺𑀓𑀢𑀸 𑀨𑀲𑁆𑀲𑀺𑀢𑀸 𑀧𑀜𑁆𑀜𑀸𑀬.

𑀯𑁂𑀤𑀦𑀸𑀬…𑀧𑁂… 𑀲𑀜𑁆𑀜𑀸𑀬… 𑀲𑀗𑁆𑀔𑀸𑀭𑁂𑀲𑀼… 𑀯𑀺𑀜𑁆𑀜𑀸𑀡𑁂… 𑀘𑀓𑁆𑀔𑀼𑀲𑁆𑀫𑀺𑀁…𑀧𑁂… 𑀚𑀭𑀸𑀫𑀭𑀡𑁂 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀓𑀢𑀫𑀁 𑀧𑀜𑁆𑀜𑀁 𑀧𑀭𑀺𑀧𑀽𑀭𑁂𑀢𑀺…𑀧𑁂… 𑀚𑀭𑀸𑀫𑀭𑀡𑁂 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀦𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀓𑀢𑀫𑀁 𑀧𑀜𑁆𑀜𑀁 𑀧𑀭𑀺𑀧𑀽𑀭𑁂𑀢𑀺? 𑀚𑀭𑀸𑀫𑀭𑀡𑁂 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀚𑀯𑀦𑀧𑀜𑁆𑀜𑀁 𑀧𑀭𑀺𑀧𑀽𑀭𑁂𑀢𑀺…𑀧𑁂… 𑀚𑀭𑀸𑀫𑀭𑀡𑁂 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀦𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀅𑀲𑀸𑀫𑀦𑁆𑀢𑀧𑀜𑁆𑀜𑀁 𑀧𑀭𑀺𑀧𑀽𑀭𑁂𑀢𑀺. 𑀇𑀫𑀸 𑀲𑀢𑁆𑀢 𑀧𑀜𑁆𑀜𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀧𑀡𑁆𑀟𑀺𑀘𑁆𑀘𑀁 𑀧𑀭𑀺𑀧𑀽𑀭𑁂𑀦𑁆𑀢𑀺. 𑀇𑀫𑀸 𑀅𑀝𑁆𑀞 𑀧𑀜𑁆𑀜𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀧𑀼𑀣𑀼𑀧𑀜𑁆𑀜𑀁 𑀧𑀭𑀺𑀧𑀽𑀭𑁂𑀦𑁆𑀢𑀺. 𑀇𑀫𑀸 𑀦𑀯 𑀧𑀜𑁆𑀜𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀳𑀸𑀲𑀧𑀜𑁆𑀜𑀁 𑀧𑀭𑀺𑀧𑀽𑀭𑁂𑀦𑁆𑀢𑀺.

𑁨. 𑀭𑀽𑀧𑁂 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀓𑀢𑀫𑀁 𑀧𑀜𑁆𑀜𑀁 𑀧𑀭𑀺𑀧𑀽𑀭𑁂𑀢𑀺? 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀭𑀽𑀧𑁂 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀓𑀢𑀫𑀁 𑀧𑀜𑁆𑀜𑀁 𑀧𑀭𑀺𑀧𑀽𑀭𑁂𑀢𑀺? 𑀭𑀽𑀧𑁂 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀓𑀢𑀫𑀁 𑀧𑀜𑁆𑀜𑀁 𑀧𑀭𑀺𑀧𑀽𑀭𑁂𑀢𑀺? 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀭𑀽𑀧𑁂 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀓𑀢𑀫𑀁 𑀧𑀜𑁆𑀜𑀁 𑀧𑀭𑀺𑀧𑀽𑀭𑁂𑀢𑀺? 𑀭𑀽𑀧𑁂 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀓𑀢𑀫𑀁 𑀧𑀜𑁆𑀜𑀁 𑀧𑀭𑀺𑀧𑀽𑀭𑁂𑀢𑀺? 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀭𑀽𑀧𑁂 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀓𑀢𑀫𑀁 𑀧𑀜𑁆𑀜𑀁 𑀧𑀭𑀺𑀧𑀽𑀭𑁂𑀢𑀺? 𑀭𑀽𑀧𑁂 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀓𑀢𑀫𑀁 𑀧𑀜𑁆𑀜𑀁 𑀧𑀭𑀺𑀧𑀽𑀭𑁂𑀢𑀺? 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀭𑀽𑀧𑁂 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀓𑀢𑀫𑀁 𑀧𑀜𑁆𑀜𑀁 𑀧𑀭𑀺𑀧𑀽𑀭𑁂𑀢𑀺? 𑀭𑀽𑀧𑁂 𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀦𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀓𑀢𑀫𑀁 𑀧𑀜𑁆𑀜𑀁 𑀧𑀭𑀺𑀧𑀽𑀭𑁂𑀢𑀺? 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀭𑀽𑀧𑁂 𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀦𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀓𑀢𑀫𑀁 𑀧𑀜𑁆𑀜𑀁 𑀧𑀭𑀺𑀧𑀽𑀭𑁂𑀢𑀺? 𑀭𑀽𑀧𑁂 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀦𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀓𑀢𑀫𑀁 𑀧𑀜𑁆𑀜𑀁 𑀧𑀭𑀺𑀧𑀽𑀭𑁂𑀢𑀺? 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀭𑀽𑀧𑁂 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀦𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀓𑀢𑀫𑀁 𑀧𑀜𑁆𑀜𑀁 𑀧𑀭𑀺𑀧𑀽𑀭𑁂𑀢𑀺? 𑀭𑀽𑀧𑁂 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀦𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀓𑀢𑀫𑀁 𑀧𑀜𑁆𑀜𑀁 𑀧𑀭𑀺𑀧𑀽𑀭𑁂𑀢𑀺? 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀭𑀽𑀧𑁂 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀦𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀓𑀢𑀫𑀁 𑀧𑀜𑁆𑀜𑀁 𑀧𑀭𑀺𑀧𑀽𑀭𑁂𑀢𑀺?

𑀭𑀽𑀧𑁂 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀚𑀯𑀦𑀧𑀜𑁆𑀜𑀁 𑀧𑀭𑀺𑀧𑀽𑀭𑁂𑀢𑀺. 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀭𑀽𑀧𑁂 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀚𑀯𑀦𑀧𑀜𑁆𑀜𑀁 𑀧𑀭𑀺𑀧𑀽𑀭𑁂𑀢𑀺. 𑀭𑀽𑀧𑁂 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑀁 𑀧𑀭𑀺𑀧𑀽𑀭𑁂𑀢𑀺. 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀭𑀽𑀧𑁂 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀚𑀯𑀦𑀧𑀜𑁆𑀜𑀁 𑀧𑀭𑀺𑀧𑀽𑀭𑁂𑀢𑀺. 𑀭𑀽𑀧𑁂 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀫𑀳𑀸𑀧𑀜𑁆𑀜𑀁 𑀧𑀭𑀺𑀧𑀽𑀭𑁂𑀢𑀺. 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀭𑀽𑀧𑁂 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀚𑀯𑀦𑀧𑀜𑁆𑀜𑀁 𑀧𑀭𑀺𑀧𑀽𑀭𑁂𑀢𑀺. 𑀭𑀽𑀧𑁂 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀢𑀺𑀓𑁆𑀔𑀧𑀜𑁆𑀜𑀁 𑀧𑀭𑀺𑀧𑀽𑀭𑁂𑀢𑀺. 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀭𑀽𑀧𑁂 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀚𑀯𑀦𑀧𑀜𑁆𑀜𑀁 𑀧𑀭𑀺𑀧𑀽𑀭𑁂𑀢𑀺. 𑀭𑀽𑀧𑁂 𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀦𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀯𑀺𑀧𑀼𑀮𑀧𑀜𑁆𑀜𑀁 𑀧𑀭𑀺𑀧𑀽𑀭𑁂𑀢𑀺. 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀭𑀽𑀧𑁂 𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀦𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀚𑀯𑀦𑀧𑀜𑁆𑀜𑀁 𑀧𑀭𑀺𑀧𑀽𑀭𑁂𑀢𑀺. 𑀭𑀽𑀧𑁂 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀦𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀕𑀫𑁆𑀪𑀻𑀭𑀧𑀜𑁆𑀜𑀁 𑀧𑀭𑀺𑀧𑀽𑀭𑁂𑀢𑀺. 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀭𑀽𑀧𑁂 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀦𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀚𑀯𑀦𑀧𑀜𑁆𑀜𑀁 𑀧𑀭𑀺𑀧𑀽𑀭𑁂𑀢𑀺. 𑀭𑀽𑀧𑁂 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀦𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀅𑀲𑀸𑀫𑀦𑁆𑀢𑀧𑀜𑁆𑀜𑀁 𑀧𑀭𑀺𑀧𑀽𑀭𑁂𑀢𑀺. 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀭𑀽𑀧𑁂 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀦𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀚𑀯𑀦𑀧𑀜𑁆𑀜𑀁 𑀧𑀭𑀺𑀧𑀽𑀭𑁂𑀢𑀺. 𑀇𑀫𑀸 𑀲𑀢𑁆𑀢 𑀧𑀜𑁆𑀜𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀧𑀡𑁆𑀟𑀺𑀘𑁆𑀘𑀁 𑀧𑀭𑀺𑀧𑀽𑀭𑁂𑀦𑁆𑀢𑀺. 𑀇𑀫𑀸 𑀅𑀝𑁆𑀞 𑀧𑀜𑁆𑀜𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀧𑀼𑀣𑀼𑀧𑀜𑁆𑀜𑀁 𑀧𑀭𑀺𑀧𑀽𑀭𑁂𑀦𑁆𑀢𑀺. 𑀇𑀫𑀸 𑀦𑀯 𑀧𑀜𑁆𑀜𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀳𑀸𑀲𑀧𑀜𑁆𑀜𑀁 𑀧𑀭𑀺𑀧𑀽𑀭𑁂𑀦𑁆𑀢𑀺.

𑀯𑁂𑀤𑀦𑀸𑀬…𑀧𑁂… 𑀲𑀜𑁆𑀜𑀸𑀬… 𑀲𑀗𑁆𑀔𑀸𑀭𑁂𑀲𑀼… 𑀯𑀺𑀜𑁆𑀜𑀸𑀡𑁂… 𑀘𑀓𑁆𑀔𑀼𑀲𑁆𑀫𑀺𑀁…𑀧𑁂… 𑀚𑀭𑀸𑀫𑀭𑀡𑁂 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀓𑀢𑀫𑀁 𑀧𑀜𑁆𑀜𑀁 𑀧𑀭𑀺𑀧𑀽𑀭𑁂𑀢𑀺? 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀚𑀭𑀸𑀫𑀭𑀡𑁂 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀓𑀢𑀫𑀁 𑀧𑀜𑁆𑀜𑀁 𑀧𑀭𑀺𑀧𑀽𑀭𑁂𑀢𑀺…𑀧𑁂… 𑀚𑀭𑀸𑀫𑀭𑀡𑁂 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀦𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀓𑀢𑀫𑀁 𑀧𑀜𑁆𑀜𑀁 𑀧𑀭𑀺𑀧𑀽𑀭𑁂𑀢𑀺? 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀚𑀭𑀸𑀫𑀭𑀡𑁂 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀦𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀓𑀢𑀫𑀁 𑀧𑀜𑁆𑀜𑀁 𑀧𑀭𑀺𑀧𑀽𑀭𑁂𑀢𑀺? 𑀚𑀭𑀸𑀫𑀭𑀡𑁂 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀚𑀯𑀦𑀧𑀜𑁆𑀜𑀁 𑀧𑀭𑀺𑀧𑀽𑀭𑁂𑀢𑀺. 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀚𑀭𑀸𑀫𑀭𑀡𑁂 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀚𑀯𑀦𑀧𑀜𑁆𑀜𑀁 𑀧𑀭𑀺𑀧𑀽𑀭𑁂𑀢𑀺…𑀧𑁂… 𑀢𑀲𑁆𑀲𑀺𑀫𑀸 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸𑀬𑁄 𑀅𑀥𑀺𑀕𑀢𑀸 𑀳𑁄𑀦𑁆𑀢𑀺 𑀲𑀘𑁆𑀙𑀺𑀓𑀢𑀸 𑀨𑀲𑁆𑀲𑀺𑀢𑀸 𑀧𑀜𑁆𑀜𑀸𑀬.

𑁩. ‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂 [𑀲𑀁. 𑀦𑀺. 𑁫.𑁧𑁮𑁫𑁧], 𑀥𑀫𑁆𑀫𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀲𑀧𑁆𑀧𑀼𑀭𑀺𑀲𑀲𑀁𑀲𑁂𑀯𑁄, 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀁, 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄, 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀢𑁆𑀢𑀺 𑁋 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀥𑀫𑁆𑀫𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀲𑀁𑀯𑀢𑁆𑀢𑀦𑁆𑀢𑀺.

‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀲𑀓𑀤𑀸𑀕𑀸𑀫𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀲𑀁𑀯𑀢𑁆𑀢𑀦𑁆𑀢𑀺…𑀧𑁂… 𑀅𑀦𑀸𑀕𑀸𑀫𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀲𑀁𑀯𑀢𑁆𑀢𑀦𑁆𑀢𑀺…𑀧𑁂… 𑀅𑀭𑀳𑀢𑁆𑀢𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀲𑀧𑁆𑀧𑀼𑀭𑀺𑀲𑀲𑀁𑀲𑁂𑀯𑁄, 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀁, 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄, 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀢𑁆𑀢𑀺 𑁋 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀥𑀫𑁆𑀫𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀅𑀭𑀳𑀢𑁆𑀢𑀫𑀕𑁆𑀕𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀲𑀁𑀯𑀢𑁆𑀢𑀦𑁆𑀢𑀺.

‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀧𑀜𑁆𑀜𑀸𑀧𑀝𑀺𑀮𑀸𑀪𑀸𑀬 𑀲𑀁𑀯𑀢𑁆𑀢𑀦𑁆𑀢𑀺…𑀧𑁂… 𑀧𑀜𑁆𑀜𑀸𑀩𑀼𑀤𑁆𑀥𑀺𑀬𑀸 𑀲𑀁𑀯𑀢𑁆𑀢𑀦𑁆𑀢𑀺, 𑀧𑀜𑁆𑀜𑀸𑀯𑁂𑀧𑀼𑀮𑁆𑀮𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀫𑀳𑀸𑀧𑀜𑁆𑀜𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀧𑀼𑀣𑀼𑀧𑀜𑁆𑀜𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀯𑀺𑀧𑀼𑀮𑀧𑀜𑁆𑀜𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀕𑀫𑁆𑀪𑀻𑀭𑀧𑀜𑁆𑀜𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀅𑀲𑀸𑀫𑀦𑁆𑀢𑀧𑀜𑁆𑀜𑀢𑀸𑀬 [𑀅𑀲𑁆𑀲𑀸𑀫𑀦𑁆𑀢𑀧𑀜𑁆𑀜𑀢𑀸𑀬 (𑀲𑁆𑀬𑀸.) 𑀲𑀁. 𑀦𑀺. 𑁩 𑀧𑀲𑁆𑀲𑀺𑀢𑀩𑁆𑀩𑀸] 𑀲𑀁𑀯𑀢𑁆𑀢𑀦𑁆𑀢𑀺, 𑀪𑀽𑀭𑀺𑀧𑀜𑁆𑀜𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀧𑀜𑁆𑀜𑀸𑀩𑀸𑀳𑀼𑀮𑁆𑀮𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀲𑀻𑀖𑀧𑀜𑁆𑀜𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀮𑀳𑀼𑀧𑀜𑁆𑀜𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀳𑀸𑀲𑀧𑀜𑁆𑀜𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀚𑀯𑀦𑀧𑀜𑁆𑀜𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀢𑀺𑀓𑁆𑀔𑀧𑀜𑁆𑀜𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀲𑀧𑁆𑀧𑀼𑀭𑀺𑀲𑀲𑀁𑀲𑁂𑀯𑁄, 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀁, 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄, 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀢𑁆𑀢𑀺 𑁋 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀥𑀫𑁆𑀫𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀧𑀜𑁆𑀜𑀸𑀧𑀝𑀺𑀮𑀸𑀪𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀧𑀜𑁆𑀜𑀸𑀩𑀼𑀤𑁆𑀥𑀺𑀬𑀸 𑀲𑀁𑀯𑀢𑁆𑀢𑀦𑁆𑀢𑀺…𑀧𑁂… 𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀺’’.

𑁧. 𑀲𑁄𑀴𑀲𑀧𑀜𑁆𑀜𑀸𑀦𑀺𑀤𑁆𑀤𑁂𑀲𑁄

𑁪. 𑀧𑀜𑁆𑀜𑀸𑀧𑀝𑀺𑀮𑀸𑀪𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀓𑀢𑀫𑁄 𑀧𑀜𑁆𑀜𑀸𑀧𑀝𑀺𑀮𑀸𑀪𑁄? 𑀘𑀢𑀼𑀦𑁆𑀦𑀁 𑀫𑀕𑁆𑀕𑀜𑀸𑀡𑀸𑀦𑀁, 𑀘𑀢𑀼𑀦𑁆𑀦𑀁 𑀨𑀮𑀜𑀸𑀡𑀸𑀦𑀁, 𑀘𑀢𑀼𑀦𑁆𑀦𑀁 𑀧𑀝𑀺𑀲𑀫𑁆𑀪𑀺𑀤𑀸𑀜𑀸𑀡𑀸𑀦𑀁, 𑀙𑀦𑁆𑀦𑀁 𑀅𑀪𑀺𑀜𑁆𑀜𑀸𑀜𑀸𑀡𑀸𑀦𑀁, 𑀢𑁂𑀲𑀢𑁆𑀢𑀢𑀻𑀦𑀁 𑀜𑀸𑀡𑀸𑀦𑀁, 𑀲𑀢𑁆𑀢𑀲𑀢𑁆𑀢𑀢𑀻𑀦𑀁 𑀜𑀸𑀡𑀸𑀦𑀁 𑀮𑀸𑀪𑁄 𑀧𑀝𑀺𑀮𑀸𑀪𑁄 𑀧𑀢𑁆𑀢𑀺 𑀲𑀫𑁆𑀧𑀢𑁆𑀢𑀺 𑀨𑀲𑁆𑀲𑀦𑀸 [𑀨𑀼𑀲𑀦𑀸 (𑀓.)] 𑀲𑀘𑁆𑀙𑀺𑀓𑀺𑀭𑀺𑀬𑀸 𑀉𑀧𑀲𑀫𑁆𑀧𑀤𑀸. 𑀧𑀜𑁆𑀜𑀸𑀧𑀝𑀺𑀮𑀸𑀪𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑁋 𑀅𑀬𑀁 𑀧𑀜𑁆𑀜𑀸 𑀧𑀝𑀺𑀮𑀸𑀪𑁄.

𑀧𑀜𑁆𑀜𑀸𑀩𑀼𑀤𑁆𑀥𑀺𑀬𑀸 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀓𑀢𑀫𑀸 𑀧𑀜𑁆𑀜𑀸𑀩𑀼𑀤𑁆𑀥𑀺? 𑀲𑀢𑁆𑀢𑀦𑁆𑀦𑀜𑁆𑀘 𑀲𑁂𑀓𑁆𑀔𑀸𑀦𑀁 𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀓𑀲𑁆𑀲 𑀘 𑀧𑀜𑁆𑀜𑀸 𑀯𑀟𑁆𑀠𑀢𑀺, 𑀅𑀭𑀳𑀢𑁄 𑀧𑀜𑁆𑀜𑀸 𑀯𑀟𑁆𑀠𑀢𑀺. 𑀯𑀟𑁆𑀠𑀺𑀢𑀯𑀟𑁆𑀠𑀦𑀸 𑀧𑀜𑁆𑀜𑀸𑀩𑀼𑀤𑁆𑀥𑀺𑀬𑀸 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑁋 𑀅𑀬𑀁 𑀧𑀜𑁆𑀜𑀸𑀩𑀼𑀤𑁆𑀥𑀺.

𑀧𑀜𑁆𑀜𑀸𑀯𑁂𑀧𑀼𑀮𑁆𑀮𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀓𑀢𑀫𑀁 𑀧𑀜𑁆𑀜𑀸𑀯𑁂𑀧𑀼𑀮𑁆𑀮𑀁? 𑀲𑀢𑁆𑀢𑀦𑁆𑀦𑀁 𑀲𑁂𑀓𑁆𑀔𑀸𑀦𑀁 𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀓𑀲𑁆𑀲 𑀘 𑀧𑀜𑁆𑀜𑀸𑀯𑁂𑀧𑀼𑀮𑁆𑀮𑀁 𑀕𑀘𑁆𑀙𑀢𑀺. 𑀅𑀭𑀳𑀢𑁄 𑀧𑀜𑁆𑀜𑀸 𑀯𑁂𑀧𑀼𑀮𑁆𑀮𑀕𑀢𑀸 𑀧𑀜𑁆𑀜𑀸𑀯𑁂𑀧𑀼𑀮𑁆𑀮𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑁋 𑀇𑀤𑀁 𑀧𑀜𑁆𑀜𑀸𑀯𑁂𑀧𑀼𑀮𑁆𑀮𑀁.

𑀫𑀳𑀸𑀧𑀜𑁆𑀜𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀓𑀢𑀫𑀸 𑀫𑀳𑀸𑀧𑀜𑁆𑀜𑀸? 𑀫𑀳𑀦𑁆𑀢𑁂 𑀅𑀢𑁆𑀣𑁂 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑁋 𑀫𑀳𑀸𑀧𑀜𑁆𑀜𑀸. 𑀫𑀳𑀦𑁆𑀢𑁂 𑀥𑀫𑁆𑀫𑁂 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑁋 𑀫𑀳𑀸𑀧𑀜𑁆𑀜𑀸. 𑀫𑀳𑀦𑁆𑀢𑀸 𑀦𑀺𑀭𑀼𑀢𑁆𑀢𑀺𑀬𑁄 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑁋 𑀫𑀳𑀸𑀧𑀜𑁆𑀜𑀸. 𑀫𑀳𑀦𑁆𑀢𑀸𑀦𑀺 𑀧𑀝𑀺𑀪𑀸𑀦𑀸𑀦𑀺 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑁋 𑀫𑀳𑀸𑀧𑀜𑁆𑀜𑀸. 𑀫𑀳𑀦𑁆𑀢𑁂 𑀲𑀻𑀮𑀓𑁆𑀔𑀦𑁆𑀥𑁂 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑁋 𑀫𑀳𑀸𑀧𑀜𑁆𑀜𑀸. 𑀫𑀳𑀦𑁆𑀢𑁂 𑀲𑀫𑀸𑀥𑀺𑀓𑁆𑀔𑀦𑁆𑀥𑁂 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑁋 𑀫𑀳𑀸𑀧𑀜𑁆𑀜𑀸. 𑀫𑀳𑀦𑁆𑀢𑁂 𑀧𑀜𑁆𑀜𑀸𑀓𑁆𑀔𑀦𑁆𑀥𑁂 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑁋 𑀫𑀳𑀸𑀧𑀜𑁆𑀜𑀸. 𑀫𑀳𑀦𑁆𑀢𑁂 𑀯𑀺𑀫𑀼𑀢𑁆𑀢𑀺𑀓𑁆𑀔𑀦𑁆𑀥𑁂 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑁋 𑀫𑀳𑀸𑀧𑀜𑁆𑀜𑀸. 𑀫𑀳𑀦𑁆𑀢𑁂 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑁂 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑁋 𑀫𑀳𑀸𑀧𑀜𑁆𑀜𑀸. 𑀫𑀳𑀦𑁆𑀢𑀸𑀦𑀺 𑀞𑀸𑀦𑀸𑀝𑁆𑀞𑀸𑀦𑀸𑀦𑀺 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑁋 𑀫𑀳𑀸𑀧𑀜𑁆𑀜𑀸. 𑀫𑀳𑀦𑁆𑀢𑀸 𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀺𑀬𑁄 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑁋 𑀫𑀳𑀸𑀧𑀜𑁆𑀜𑀸. 𑀫𑀳𑀦𑁆𑀢𑀸𑀦𑀺 𑀅𑀭𑀺𑀬𑀲𑀘𑁆𑀘𑀸𑀦𑀺 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑁋 𑀫𑀳𑀸𑀧𑀜𑁆𑀜𑀸. 𑀫𑀳𑀦𑁆𑀢𑁂 𑀲𑀢𑀺𑀧𑀝𑁆𑀞𑀸𑀦𑁂 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑁋 𑀫𑀳𑀸𑀧𑀜𑁆𑀜𑀸. 𑀫𑀳𑀦𑁆𑀢𑁂 𑀲𑀫𑁆𑀫𑀧𑁆𑀧𑀥𑀸𑀦𑁂 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑁋 𑀫𑀳𑀸𑀧𑀜𑁆𑀜𑀸. 𑀫𑀳𑀦𑁆𑀢𑁂 𑀇𑀤𑁆𑀥𑀺𑀧𑀸𑀤𑁂 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑁋 𑀫𑀳𑀸𑀧𑀜𑁆𑀜𑀸. 𑀫𑀳𑀦𑁆𑀢𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑁋 𑀫𑀳𑀸𑀧𑀜𑁆𑀜𑀸. 𑀫𑀳𑀦𑁆𑀢𑀸𑀦𑀺 𑀩𑀮𑀸𑀦𑀺 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑁋 𑀫𑀳𑀸𑀧𑀜𑁆𑀜𑀸. 𑀫𑀳𑀦𑁆𑀢𑁂 𑀩𑁄𑀚𑁆𑀛𑀗𑁆𑀕𑁂 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑁋 𑀫𑀳𑀸𑀧𑀜𑁆𑀜𑀸. 𑀫𑀳𑀦𑁆𑀢𑀁 𑀅𑀭𑀺𑀬𑀫𑀕𑁆𑀕𑀁 [𑀫𑀳𑀦𑁆𑀢𑁂 𑀅𑀭𑀺𑀬𑀫𑀕𑁆𑀕𑁂 (𑀓.)] 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑁋 𑀫𑀳𑀸𑀧𑀜𑁆𑀜𑀸. 𑀫𑀳𑀦𑁆𑀢𑀸𑀦𑀺 𑀲𑀸𑀫𑀜𑁆𑀜𑀨𑀮𑀸𑀦𑀺 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑁋 𑀫𑀳𑀸𑀧𑀜𑁆𑀜𑀸. 𑀫𑀳𑀦𑁆𑀢𑀸 𑀅𑀪𑀺𑀜𑁆𑀜𑀸𑀬𑁄 [𑀫𑀳𑀸𑀪𑀺𑀜𑁆𑀜𑀸𑀬𑁄 (𑀓.)] 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑁋 𑀫𑀳𑀸𑀧𑀜𑁆𑀜𑀸. 𑀫𑀳𑀦𑁆𑀢𑀁 𑀧𑀭𑀫𑀢𑁆𑀣𑀁 𑀦𑀺𑀩𑁆𑀩𑀸𑀦𑀁 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑁋 𑀫𑀳𑀸𑀧𑀜𑁆𑀜𑀸. 𑀫𑀳𑀸𑀧𑀜𑁆𑀜𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑁋 𑀅𑀬𑀁 𑀫𑀳𑀸𑀧𑀜𑁆𑀜𑀸.

𑀧𑀼𑀣𑀼𑀧𑀜𑁆𑀜𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀓𑀢𑀫𑀸 𑀧𑀼𑀣𑀼𑀧𑀜𑁆𑀜𑀸? 𑀧𑀼𑀣𑀼𑀦𑀸𑀦𑀸𑀔𑀦𑁆𑀥𑁂𑀲𑀼 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑁋 𑀧𑀼𑀣𑀼𑀧𑀜𑁆𑀜𑀸. 𑀧𑀼𑀣𑀼𑀦𑀸𑀦𑀸𑀥𑀸𑀢𑀽𑀲𑀼 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑁋 𑀧𑀼𑀣𑀼𑀧𑀜𑁆𑀜𑀸. 𑀧𑀼𑀣𑀼𑀦𑀸𑀦𑀸𑀆𑀬𑀢𑀦𑁂𑀲𑀼 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑁋 𑀧𑀼𑀣𑀼𑀧𑀜𑁆𑀜𑀸. 𑀧𑀼𑀣𑀼𑀦𑀸𑀦𑀸𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁂𑀲𑀼 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑁋 𑀧𑀼𑀣𑀼𑀧𑀜𑁆𑀜𑀸. 𑀧𑀼𑀣𑀼𑀦𑀸𑀦𑀸𑀲𑀼𑀜𑁆𑀜𑀢𑀫𑀦𑀼𑀧𑀮𑀩𑁆𑀪𑁂𑀲𑀼 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑁋 𑀧𑀼𑀣𑀼𑀧𑀜𑁆𑀜𑀸. 𑀧𑀼𑀣𑀼𑀦𑀸𑀦𑀸𑀅𑀢𑁆𑀣𑁂𑀲𑀼 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑁋 𑀧𑀼𑀣𑀼𑀧𑀜𑁆𑀜𑀸. 𑀧𑀼𑀣𑀼𑀦𑀸𑀦𑀸𑀥𑀫𑁆𑀫𑁂𑀲𑀼 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑁋 𑀧𑀼𑀣𑀼𑀧𑀜𑁆𑀜𑀸. 𑀧𑀼𑀣𑀼𑀦𑀸𑀦𑀸𑀦𑀺𑀭𑀼𑀢𑁆𑀢𑀻𑀲𑀼 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑁋 𑀧𑀼𑀣𑀼𑀧𑀜𑁆𑀜𑀸. 𑀧𑀼𑀣𑀼𑀦𑀸𑀦𑀸𑀧𑀝𑀺𑀪𑀸𑀦𑁂𑀲𑀼 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑁋 𑀧𑀼𑀣𑀼𑀧𑀜𑁆𑀜𑀸. 𑀧𑀼𑀣𑀼𑀦𑀸𑀦𑀸𑀲𑀻𑀮𑀓𑁆𑀔𑀦𑁆𑀥𑁂𑀲𑀼 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑁋 𑀧𑀼𑀣𑀼𑀧𑀜𑁆𑀜𑀸. 𑀧𑀼𑀣𑀼𑀦𑀸𑀦𑀸𑀲𑀫𑀸𑀥𑀺𑀓𑁆𑀔𑀦𑁆𑀥𑁂𑀲𑀼 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑁋 𑀧𑀼𑀣𑀼𑀧𑀜𑁆𑀜𑀸. 𑀧𑀼𑀣𑀼𑀦𑀸𑀦𑀸𑀧𑀜𑁆𑀜𑀸𑀓𑁆𑀔𑀦𑁆𑀥𑁂𑀲𑀼 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑁋 𑀧𑀼𑀣𑀼𑀧𑀜𑁆𑀜𑀸. 𑀧𑀼𑀣𑀼𑀦𑀸𑀦𑀸𑀯𑀺𑀫𑀼𑀢𑁆𑀢𑀺𑀓𑁆𑀔𑀦𑁆𑀥𑁂𑀲𑀼 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑁋 𑀧𑀼𑀣𑀼𑀧𑀜𑁆𑀜𑀸. 𑀧𑀼𑀣𑀼𑀦𑀸𑀦𑀸𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑁂𑀲𑀼 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑁋 𑀧𑀼𑀣𑀼𑀧𑀜𑁆𑀜𑀸. 𑀧𑀼𑀣𑀼𑀦𑀸𑀦𑀸𑀞𑀸𑀦𑀸𑀝𑁆𑀞𑀸𑀦𑁂𑀲𑀼 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑁋 𑀧𑀼𑀣𑀼𑀧𑀜𑁆𑀜𑀸. 𑀧𑀼𑀣𑀼𑀦𑀸𑀦𑀸𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀻𑀲𑀼 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑁋 𑀧𑀼𑀣𑀼𑀧𑀜𑁆𑀜𑀸. 𑀧𑀼𑀣𑀼𑀦𑀸𑀦𑀸𑀅𑀭𑀺𑀬𑀲𑀘𑁆𑀘𑁂𑀲𑀼 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑁋 𑀧𑀼𑀣𑀼𑀧𑀜𑁆𑀜𑀸. 𑀧𑀼𑀣𑀼𑀦𑀸𑀦𑀸𑀲𑀢𑀺𑀧𑀝𑁆𑀞𑀸𑀦𑁂𑀲𑀼 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑁋 𑀧𑀼𑀣𑀼𑀧𑀜𑁆𑀜𑀸. 𑀧𑀼𑀣𑀼𑀦𑀸𑀦𑀸𑀲𑀫𑁆𑀫𑀧𑁆𑀧𑀥𑀸𑀦𑁂𑀲𑀼 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑁋 𑀧𑀼𑀣𑀼𑀧𑀜𑁆𑀜𑀸. 𑀧𑀼𑀣𑀼𑀦𑀸𑀦𑀸𑀇𑀤𑁆𑀥𑀺𑀧𑀸𑀤𑁂𑀲𑀼 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑁋 𑀧𑀼𑀣𑀼𑀧𑀜𑁆𑀜𑀸. 𑀧𑀼𑀣𑀼𑀦𑀸𑀦𑀸𑀇𑀦𑁆𑀤𑁆𑀭𑀺𑀬𑁂𑀲𑀼 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑁋 𑀧𑀼𑀣𑀼𑀧𑀜𑁆𑀜𑀸. 𑀧𑀼𑀣𑀼𑀦𑀸𑀦𑀸𑀩𑀮𑁂𑀲𑀼 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑁋 𑀧𑀼𑀣𑀼𑀧𑀜𑁆𑀜𑀸. 𑀧𑀼𑀣𑀼𑀦𑀸𑀦𑀸𑀩𑁄𑀚𑁆𑀛𑀗𑁆𑀕𑁂𑀲𑀼 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑁋 𑀧𑀼𑀣𑀼𑀧𑀜𑁆𑀜𑀸. 𑀧𑀼𑀣𑀼𑀦𑀸𑀦𑀸𑀅𑀭𑀺𑀬𑀫𑀕𑁆𑀕𑁂𑀲𑀼 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑁋 𑀧𑀼𑀣𑀼𑀧𑀜𑁆𑀜𑀸. 𑀧𑀼𑀣𑀼𑀦𑀸𑀦𑀸𑀲𑀸𑀫𑀜𑁆𑀜𑀨𑀮𑁂𑀲𑀼 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑁋 𑀧𑀼𑀣𑀼𑀧𑀜𑁆𑀜𑀸. 𑀧𑀼𑀣𑀼𑀦𑀸𑀦𑀸𑀅𑀪𑀺𑀜𑁆𑀜𑀸𑀲𑀼 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑁋 𑀧𑀼𑀣𑀼𑀧𑀜𑁆𑀜𑀸. 𑀧𑀼𑀣𑀼𑀚𑁆𑀚𑀦𑀲𑀸𑀥𑀸𑀭𑀡𑁂 𑀥𑀫𑁆𑀫𑁂 𑀅𑀢𑀺𑀓𑁆𑀓𑀫𑁆𑀫 [𑀲𑀫𑀢𑀺𑀓𑁆𑀓𑀫𑁆𑀫 (𑀲𑁆𑀬𑀸.)] 𑀧𑀭𑀫𑀢𑁆𑀣𑁂 𑀦𑀺𑀩𑁆𑀩𑀸𑀦𑁂 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑁋 𑀧𑀼𑀣𑀼𑀧𑀜𑁆𑀜𑀸. 𑀧𑀼𑀣𑀼𑀧𑀜𑁆𑀜𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑁋 𑀅𑀬𑀁 𑀧𑀼𑀣𑀼𑀧𑀜𑁆𑀜𑀸.

𑀯𑀺𑀧𑀼𑀮𑀧𑀜𑁆𑀜𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀓𑀢𑀫𑀸 𑀯𑀺𑀧𑀼𑀮𑀧𑀜𑁆𑀜𑀸? 𑀯𑀺𑀧𑀼𑀮𑁂 𑀅𑀢𑁆𑀣𑁂 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑁋 𑀯𑀺𑀧𑀼𑀮𑀧𑀜𑁆𑀜𑀸. 𑀯𑀺𑀧𑀼𑀮𑁂 𑀥𑀫𑁆𑀫𑁂 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑁋 𑀯𑀺𑀧𑀼𑀮𑀧𑀜𑁆𑀜𑀸. 𑀯𑀺𑀧𑀼𑀮𑀸 𑀦𑀺𑀭𑀼𑀢𑁆𑀢𑀺𑀬𑁄 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑁋 𑀯𑀺𑀧𑀼𑀮𑀧𑀜𑁆𑀜𑀸. 𑀯𑀺𑀧𑀼𑀮𑀸𑀦𑀺 𑀧𑀝𑀺𑀪𑀸𑀦𑀸𑀦𑀺 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑁋 𑀯𑀺𑀧𑀼𑀮𑀧𑀜𑁆𑀜𑀸. 𑀯𑀺𑀧𑀼𑀮𑁂 𑀲𑀻𑀮𑀓𑁆𑀔𑀦𑁆𑀥𑁂 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑁋 𑀯𑀺𑀧𑀼𑀮𑀧𑀜𑁆𑀜𑀸. 𑀯𑀺𑀧𑀼𑀮𑁂 𑀲𑀫𑀸𑀥𑀺𑀓𑁆𑀔𑀦𑁆𑀥𑁂 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑁋 𑀯𑀺𑀧𑀼𑀮𑀧𑀜𑁆𑀜𑀸. 𑀯𑀺𑀧𑀼𑀮𑁂 𑀧𑀜𑁆𑀜𑀸𑀓𑁆𑀔𑀦𑁆𑀥𑁂 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑁋 𑀯𑀺𑀧𑀼𑀮𑀧𑀜𑁆𑀜𑀸. 𑀯𑀺𑀧𑀼𑀮𑁂 𑀯𑀺𑀫𑀼𑀢𑁆𑀢𑀺𑀓𑁆𑀔𑀦𑁆𑀥𑁂 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑁋 𑀯𑀺𑀧𑀼𑀮𑀧𑀜𑁆𑀜𑀸. 𑀯𑀺𑀧𑀼𑀮𑁂 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑁂 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑁋 𑀯𑀺𑀧𑀼𑀮𑀧𑀜𑁆𑀜𑀸. 𑀯𑀺𑀧𑀼𑀮𑀸𑀦𑀺 𑀞𑀸𑀦𑀸𑀝𑁆𑀞𑀸𑀦𑀸𑀦𑀺 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑁋 𑀯𑀺𑀧𑀼𑀮𑀧𑀜𑁆𑀜𑀸. 𑀯𑀺𑀧𑀼𑀮𑀸 𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀺𑀬𑁄 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑁋 𑀯𑀺𑀧𑀼𑀮𑀧𑀜𑁆𑀜𑀸. 𑀯𑀺𑀧𑀼𑀮𑀸𑀦𑀺 𑀅𑀭𑀺𑀬𑀲𑀘𑁆𑀘𑀸𑀦𑀺 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑁋 𑀯𑀺𑀧𑀼𑀮𑀧𑀜𑁆𑀜𑀸. 𑀯𑀺𑀧𑀼𑀮𑁂 𑀲𑀢𑀺𑀧𑀝𑁆𑀞𑀸𑀦𑁂 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑁋 𑀯𑀺𑀧𑀼𑀮𑀧𑀜𑁆𑀜𑀸. 𑀯𑀺𑀧𑀼𑀮𑁂 𑀲𑀫𑁆𑀫𑀧𑁆𑀧𑀥𑀸𑀦𑁂 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑁋 𑀯𑀺𑀧𑀼𑀮𑀧𑀜𑁆𑀜𑀸. 𑀯𑀺𑀧𑀼𑀮𑁂 𑀇𑀤𑁆𑀥𑀺𑀧𑀸𑀤𑁂 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑁋 𑀯𑀺𑀧𑀼𑀮𑀧𑀜𑁆𑀜𑀸. 𑀯𑀺𑀧𑀼𑀮𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑁋 𑀯𑀺𑀧𑀼𑀮𑀧𑀜𑁆𑀜𑀸. 𑀯𑀺𑀧𑀼𑀮𑀸𑀦𑀺 𑀩𑀮𑀸𑀦𑀺 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑁋 𑀯𑀺𑀧𑀼𑀮𑀧𑀜𑁆𑀜𑀸. 𑀯𑀺𑀧𑀼𑀮𑁂 𑀩𑁄𑀚𑁆𑀛𑀗𑁆𑀕𑁂 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑁋 𑀯𑀺𑀧𑀼𑀮𑀧𑀜𑁆𑀜𑀸. 𑀯𑀺𑀧𑀼𑀮𑁂 𑀅𑀭𑀺𑀬𑀫𑀕𑁆𑀕𑁂 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑁋 𑀯𑀺𑀧𑀼𑀮𑀧𑀜𑁆𑀜𑀸. 𑀯𑀺𑀧𑀼𑀮𑀸𑀦𑀺 𑀲𑀸𑀫𑀜𑁆𑀜𑀨𑀮𑀸𑀦𑀺 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑁋 𑀯𑀺𑀧𑀼𑀮𑀧𑀜𑁆𑀜𑀸. 𑀯𑀺𑀧𑀼𑀮𑀸 𑀅𑀪𑀺𑀜𑁆𑀜𑀸𑀬𑁄 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑁋 𑀯𑀺𑀧𑀼𑀮𑀧𑀜𑁆𑀜𑀸. 𑀯𑀺𑀧𑀼𑀮𑀁 𑀧𑀭𑀫𑀢𑁆𑀣𑀁 𑀦𑀺𑀩𑁆𑀩𑀸𑀦𑀁 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑁋 𑀯𑀺𑀧𑀼𑀮𑀧𑀜𑁆𑀜𑀸. 𑀯𑀺𑀧𑀼𑀮𑀧𑀜𑁆𑀜𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑁋 𑀅𑀬𑀁 𑀯𑀺𑀧𑀼𑀮𑀧𑀜𑁆𑀜𑀸.

𑀕𑀫𑁆𑀪𑀻𑀭𑀧𑀜𑁆𑀜𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀓𑀢𑀫𑀸 𑀕𑀫𑁆𑀪𑀻𑀭𑀧𑀜𑁆𑀜𑀸? 𑀕𑀫𑁆𑀪𑀻𑀭𑁂𑀲𑀼 𑀔𑀦𑁆𑀥𑁂𑀲𑀼 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑁋 𑀕𑀫𑁆𑀪𑀻𑀭𑀧𑀜𑁆𑀜𑀸. 𑀕𑀫𑁆𑀪𑀻𑀭𑀸𑀲𑀼 𑀥𑀸𑀢𑀽𑀲𑀼 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑁋 𑀕𑀫𑁆𑀪𑀻𑀭𑀧𑀜𑁆𑀜𑀸. 𑀕𑀫𑁆𑀪𑀻𑀭𑁂𑀲𑀼 𑀆𑀬𑀢𑀦𑁂𑀲𑀼 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑁋 𑀕𑀫𑁆𑀪𑀻𑀭𑀧𑀜𑁆𑀜𑀸. 𑀕𑀫𑁆𑀪𑀻𑀭𑁂𑀲𑀼 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁂𑀲𑀼 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑁋 𑀕𑀫𑁆𑀪𑀻𑀭𑀧𑀜𑁆𑀜𑀸. 𑀕𑀫𑁆𑀪𑀻𑀭𑁂𑀲𑀼 𑀲𑀼𑀜𑁆𑀜𑀢𑀫𑀦𑀼𑀧𑀮𑀩𑁆𑀪𑁂𑀲𑀼 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑁋 𑀕𑀫𑁆𑀪𑀻𑀭𑀧𑀜𑁆𑀜𑀸. 𑀕𑀫𑁆𑀪𑀻𑀭𑁂𑀲𑀼 𑀅𑀢𑁆𑀣𑁂𑀲𑀼 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑁋 𑀕𑀫𑁆𑀪𑀻𑀭𑀧𑀜𑁆𑀜𑀸. 𑀕𑀫𑁆𑀪𑀻𑀭𑁂𑀲𑀼 𑀥𑀫𑁆𑀫𑁂𑀲𑀼 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑁋 𑀕𑀫𑁆𑀪𑀻𑀭𑀧𑀜𑁆𑀜𑀸. 𑀕𑀫𑁆𑀪𑀻𑀭𑀸𑀲𑀼 𑀦𑀺𑀭𑀼𑀢𑁆𑀢𑀻𑀲𑀼 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑁋 𑀕𑀫𑁆𑀪𑀻𑀭𑀧𑀜𑁆𑀜𑀸. 𑀕𑀫𑁆𑀪𑀻𑀭𑁂𑀲𑀼 𑀧𑀝𑀺𑀪𑀸𑀦𑁂𑀲𑀼 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑁋 𑀕𑀫𑁆𑀪𑀻𑀭𑀧𑀜𑁆𑀜𑀸. 𑀕𑀫𑁆𑀪𑀻𑀭𑁂𑀲𑀼 𑀲𑀻𑀮𑀓𑁆𑀔𑀦𑁆𑀥𑁂𑀲𑀼 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑁋 𑀕𑀫𑁆𑀪𑀻𑀭𑀧𑀜𑁆𑀜𑀸. 𑀕𑀫𑁆𑀪𑀻𑀭𑁂𑀲𑀼 𑀲𑀫𑀸𑀥𑀺𑀓𑁆𑀔𑀦𑁆𑀥𑁂𑀲𑀼 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑁋 𑀕𑀫𑁆𑀪𑀻𑀭𑀧𑀜𑁆𑀜𑀸. 𑀕𑀫𑁆𑀪𑀻𑀭𑁂𑀲𑀼 𑀧𑀜𑁆𑀜𑀸𑀓𑁆𑀔𑀦𑁆𑀥𑁂𑀲𑀼 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑁋 𑀕𑀫𑁆𑀪𑀻𑀭𑀧𑀜𑁆𑀜𑀸. 𑀕𑀫𑁆𑀪𑀻𑀭𑁂𑀲𑀼 𑀯𑀺𑀫𑀼𑀢𑁆𑀢𑀺𑀓𑁆𑀔𑀦𑁆𑀥𑁂𑀲𑀼 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑁋 𑀕𑀫𑁆𑀪𑀻𑀭𑀧𑀜𑁆𑀜𑀸. 𑀕𑀫𑁆𑀪𑀻𑀭𑁂𑀲𑀼 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑁂𑀲𑀼 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑁋 𑀕𑀫𑁆𑀪𑀻𑀭𑀧𑀜𑁆𑀜𑀸. 𑀕𑀫𑁆𑀪𑀻𑀭𑁂𑀲𑀼 𑀞𑀸𑀦𑀸𑀝𑁆𑀞𑀸𑀦𑁂𑀲𑀼 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑁋 𑀕𑀫𑁆𑀪𑀻𑀭𑀧𑀜𑁆𑀜𑀸. 𑀕𑀫𑁆𑀪𑀻𑀭𑀸𑀲𑀼 𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀻𑀲𑀼 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑁋 𑀕𑀫𑁆𑀪𑀻𑀭𑀧𑀜𑁆𑀜𑀸. 𑀕𑀫𑁆𑀪𑀻𑀭𑁂𑀲𑀼 𑀅𑀭𑀺𑀬𑀲𑀘𑁆𑀘𑁂𑀲𑀼 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑁋 𑀕𑀫𑁆𑀪𑀻𑀭𑀧𑀜𑁆𑀜𑀸. 𑀕𑀫𑁆𑀪𑀻𑀭𑁂𑀲𑀼 𑀲𑀢𑀺𑀧𑀝𑁆𑀞𑀸𑀦𑁂𑀲𑀼 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑁋 𑀕𑀫𑁆𑀪𑀻𑀭𑀧𑀜𑁆𑀜𑀸. 𑀕𑀫𑁆𑀪𑀻𑀭𑁂𑀲𑀼 𑀲𑀫𑁆𑀫𑀧𑁆𑀧𑀥𑀸𑀦𑁂𑀲𑀼 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑁋 𑀕𑀫𑁆𑀪𑀻𑀭𑀧𑀜𑁆𑀜𑀸. 𑀕𑀫𑁆𑀪𑀻𑀭𑁂𑀲𑀼 𑀇𑀤𑁆𑀥𑀺𑀧𑀸𑀤𑁂𑀲𑀼 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑁋 𑀕𑀫𑁆𑀪𑀻𑀭𑀧𑀜𑁆𑀜𑀸. 𑀕𑀫𑁆𑀪𑀻𑀭𑁂𑀲𑀼 𑀇𑀦𑁆𑀤𑁆𑀭𑀺𑀬𑁂𑀲𑀼 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑁋 𑀕𑀫𑁆𑀪𑀻𑀭𑀧𑀜𑁆𑀜𑀸. 𑀕𑀫𑁆𑀪𑀻𑀭𑁂𑀲𑀼 𑀩𑀮𑁂𑀲𑀼 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑁋 𑀕𑀫𑁆𑀪𑀻𑀭𑀧𑀜𑁆𑀜𑀸. 𑀕𑀫𑁆𑀪𑀻𑀭𑁂𑀲𑀼 𑀩𑁄𑀚𑁆𑀛𑀗𑁆𑀕𑁂𑀲𑀼 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑁋 𑀕𑀫𑁆𑀪𑀻𑀭𑀧𑀜𑁆𑀜𑀸. 𑀕𑀫𑁆𑀪𑀻𑀭𑁂𑀲𑀼 𑀅𑀭𑀺𑀬𑀫𑀕𑁆𑀕𑁂𑀲𑀼 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑁋 𑀕𑀫𑁆𑀪𑀻𑀭𑀧𑀜𑁆𑀜𑀸. 𑀕𑀫𑁆𑀪𑀻𑀭𑁂𑀲𑀼 𑀲𑀸𑀫𑀜𑁆𑀜𑀨𑀮𑁂𑀲𑀼 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑁋 𑀕𑀫𑁆𑀪𑀻𑀭𑀧𑀜𑁆𑀜𑀸. 𑀕𑀫𑁆𑀪𑀻𑀭𑀸𑀲𑀼 𑀅𑀪𑀺𑀜𑁆𑀜𑀸𑀲𑀼 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑁋 𑀕𑀫𑁆𑀪𑀻𑀭𑀧𑀜𑁆𑀜𑀸. 𑀕𑀫𑁆𑀪𑀻𑀭𑁂 𑀧𑀭𑀫𑀢𑁆𑀣𑁂 𑀦𑀺𑀩𑁆𑀩𑀸𑀦𑁂 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑁋 𑀕𑀫𑁆𑀪𑀻𑀭𑀧𑀜𑁆𑀜𑀸. 𑀕𑀫𑁆𑀪𑀻𑀭𑀧𑀜𑁆𑀜𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑁋 𑀅𑀬𑀁 𑀕𑀫𑁆𑀪𑀻𑀭𑀧𑀜𑁆𑀜𑀸.

𑀅𑀲𑀸𑀫𑀦𑁆𑀢𑀧𑀜𑁆𑀜𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀓𑀢𑀫𑀸 𑀅𑀲𑀸𑀫𑀦𑁆𑀢𑀧𑀜𑁆𑀜𑀸? 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀢𑁆𑀣𑀯𑀯𑀢𑁆𑀣𑀸𑀦𑀢𑁄 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸 𑀅𑀥𑀺𑀕𑀢𑀸 𑀳𑁄𑀢𑀺 𑀲𑀘𑁆𑀙𑀺𑀓𑀢𑀸 𑀨𑀲𑁆𑀲𑀺𑀢𑀸 𑀧𑀜𑁆𑀜𑀸𑀬, 𑀥𑀫𑁆𑀫𑀯𑀯𑀢𑁆𑀣𑀸𑀦𑀢𑁄 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸 𑀅𑀥𑀺𑀕𑀢𑀸 𑀳𑁄𑀢𑀺 𑀲𑀘𑁆𑀙𑀺𑀓𑀢𑀸 𑀨𑀲𑁆𑀲𑀺𑀢𑀸 𑀧𑀜𑁆𑀜𑀸𑀬, 𑀦𑀺𑀭𑀼𑀢𑁆𑀢𑀺𑀯𑀯𑀢𑁆𑀣𑀸𑀦𑀢𑁄 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸 𑀅𑀥𑀺𑀕𑀢𑀸 𑀳𑁄𑀢𑀺 𑀲𑀘𑁆𑀙𑀺𑀓𑀢𑀸 𑀨𑀲𑁆𑀲𑀺𑀢𑀸 𑀧𑀜𑁆𑀜𑀸𑀬, 𑀧𑀝𑀺𑀪𑀸𑀦𑀯𑀯𑀢𑁆𑀣𑀸𑀦𑀢𑁄 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸 𑀅𑀥𑀺𑀕𑀢𑀸 𑀳𑁄𑀢𑀺 𑀲𑀘𑁆𑀙𑀺𑀓𑀢𑀸 𑀨𑀲𑁆𑀲𑀺𑀢𑀸 𑀧𑀜𑁆𑀜𑀸𑀬, 𑀢𑀲𑁆𑀲 𑀅𑀢𑁆𑀣𑁂 𑀘 𑀥𑀫𑁆𑀫𑁂 𑀘 𑀦𑀺𑀭𑀼𑀢𑁆𑀢𑀺𑀬𑀸 𑀘 𑀧𑀝𑀺𑀪𑀸𑀦𑁂 𑀘 𑀦 𑀅𑀜𑁆𑀜𑁄 𑀓𑁄𑀘𑀺 𑀲𑀓𑁆𑀓𑁄𑀢𑀺 𑀅𑀪𑀺𑀲𑀫𑁆𑀪𑀯𑀺𑀢𑀼𑀁. 𑀅𑀦𑀪𑀺𑀲𑀫𑁆𑀪𑀯𑀦𑀻𑀬𑁄 𑀘 𑀲𑁄 𑀅𑀜𑁆𑀜𑁂𑀳𑀻𑀢𑀺 𑁋 𑀅𑀲𑀸𑀫𑀦𑁆𑀢𑀧𑀜𑁆𑀜𑁄.

𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀓𑀲𑁆𑀲 𑀧𑀜𑁆𑀜𑀸 𑀅𑀝𑁆𑀞𑀫𑀓𑀲𑁆𑀲 𑀧𑀜𑁆𑀜𑀸𑀬 𑀤𑀽𑀭𑁂 𑀯𑀺𑀤𑀽𑀭𑁂 𑀲𑀼𑀯𑀺𑀤𑀽𑀭𑁂 𑀦 𑀲𑀦𑁆𑀢𑀺𑀓𑁂 𑀦 𑀲𑀸𑀫𑀦𑁆𑀢𑀸. 𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀓𑀁 𑀉𑀧𑀸𑀤𑀸𑀬 𑀅𑀝𑁆𑀞𑀫𑀓𑁄 𑀅𑀲𑀸𑀫𑀦𑁆𑀢𑀧𑀜𑁆𑀜𑁄. 𑀅𑀝𑁆𑀞𑀫𑀓𑀲𑁆𑀲 𑀧𑀜𑁆𑀜𑀸 𑀲𑁄𑀢𑀸𑀧𑀦𑁆𑀦𑀲𑁆𑀲 𑀧𑀜𑁆𑀜𑀸𑀬 𑀤𑀽𑀭𑁂 𑀯𑀺𑀤𑀽𑀭𑁂 𑀲𑀼𑀯𑀺𑀤𑀽𑀭𑁂 𑀦 𑀲𑀦𑁆𑀢𑀺𑀓𑁂 𑀦 𑀲𑀸𑀫𑀦𑁆𑀢𑀸. 𑀅𑀝𑁆𑀞𑀫𑀓𑀁 𑀉𑀧𑀸𑀤𑀸𑀬 𑀲𑁄𑀢𑀸𑀧𑀦𑁆𑀦𑁄 𑀅𑀲𑀸𑀫𑀦𑁆𑀢𑀧𑀜𑁆𑀜𑁄. 𑀲𑁄𑀢𑀸𑀧𑀦𑁆𑀦𑀲𑁆𑀲 𑀧𑀜𑁆𑀜𑀸 𑀲𑀓𑀤𑀸𑀕𑀸𑀫𑀺𑀲𑁆𑀲 𑀧𑀜𑁆𑀜𑀸𑀬 𑀤𑀽𑀭𑁂 𑀯𑀺𑀤𑀽𑀭𑁂 𑀲𑀼𑀯𑀺𑀤𑀽𑀭𑁂 𑀦 𑀲𑀦𑁆𑀢𑀺𑀓𑁂 𑀦 𑀲𑀸𑀫𑀦𑁆𑀢𑀸. 𑀲𑁄𑀢𑀸𑀧𑀦𑁆𑀦𑀁 𑀉𑀧𑀸𑀤𑀸𑀬 𑀲𑀓𑀤𑀸𑀕𑀸𑀫𑀺 𑀅𑀲𑀸𑀫𑀦𑁆𑀢𑀧𑀜𑁆𑀜𑁄. 𑀲𑀓𑀤𑀸𑀕𑀸𑀫𑀺𑀲𑁆𑀲 𑀧𑀜𑁆𑀜𑀸 𑀅𑀦𑀸𑀕𑀸𑀫𑀺𑀲𑁆𑀲 𑀧𑀜𑁆𑀜𑀸𑀬 𑀤𑀽𑀭𑁂 𑀯𑀺𑀤𑀽𑀭𑁂 𑀲𑀼𑀯𑀺𑀤𑀽𑀭𑁂 𑀦 𑀲𑀦𑁆𑀢𑀺𑀓𑁂 𑀦 𑀲𑀸𑀫𑀦𑁆𑀢𑀸. 𑀲𑀓𑀤𑀸𑀕𑀸𑀫𑀺𑀁 𑀉𑀧𑀸𑀤𑀸𑀬 𑀅𑀦𑀸𑀕𑀸𑀫𑀻 𑀅𑀲𑀸𑀫𑀦𑁆𑀢𑀧𑀜𑁆𑀜𑁄. 𑀅𑀦𑀸𑀕𑀸𑀫𑀺𑀲𑁆𑀲 𑀧𑀜𑁆𑀜𑀸 𑀅𑀭𑀳𑀢𑁄 𑀧𑀜𑁆𑀜𑀸𑀬 𑀤𑀽𑀭𑁂 𑀯𑀺𑀤𑀽𑀭𑁂 𑀲𑀼𑀯𑀺𑀤𑀽𑀭𑁂 𑀦 𑀲𑀦𑁆𑀢𑀺𑀓𑁂 𑀦 𑀲𑀸𑀫𑀦𑁆𑀢𑀸. 𑀅𑀦𑀸𑀕𑀸𑀫𑀺𑀁 𑀉𑀧𑀸𑀤𑀸𑀬 𑀅𑀭𑀳𑀸 𑀅𑀲𑀸𑀫𑀦𑁆𑀢𑀧𑀜𑁆𑀜𑁄. 𑀅𑀭𑀳𑀢𑁄 𑀧𑀜𑁆𑀜𑀸 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑀲𑁆𑀲 [𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 (𑀲𑁆𑀬𑀸. 𑀓.) 𑀅𑀝𑁆𑀞𑀓𑀣𑀸 𑀑𑀮𑁄𑀓𑁂𑀢𑀩𑁆𑀩𑀸] 𑀧𑀜𑁆𑀜𑀸𑀬 𑀤𑀽𑀭𑁂 𑀯𑀺𑀤𑀽𑀭𑁂 𑀲𑀼𑀯𑀺𑀤𑀽𑀭𑁂 𑀦 𑀲𑀦𑁆𑀢𑀺𑀓𑁂 𑀦 𑀲𑀸𑀫𑀦𑁆𑀢𑀸. 𑀅𑀭𑀳𑀦𑁆𑀢𑀁 𑀉𑀧𑀸𑀤𑀸𑀬 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀅𑀲𑀸𑀫𑀦𑁆𑀢𑀧𑀜𑁆𑀜𑁄. 𑀧𑀘𑁆𑀘𑁂𑀓𑀩𑀼𑀤𑁆𑀥𑀜𑁆𑀘 𑀲𑀤𑁂𑀯𑀓𑀜𑁆𑀘 𑀮𑁄𑀓𑀁 𑀉𑀧𑀸𑀤𑀸𑀬 𑀢𑀣𑀸𑀕𑀢𑁄 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀅𑀕𑁆𑀕𑁄 𑀅𑀲𑀸𑀫𑀦𑁆𑀢𑀧𑀜𑁆𑀜𑁄.

𑁫. 𑀧𑀜𑁆𑀜𑀸𑀧𑀪𑁂𑀤𑀓𑀼𑀲𑀮𑁄 𑀧𑀪𑀺𑀦𑁆𑀦𑀜𑀸𑀡𑁄 𑀅𑀥𑀺𑀕𑀢𑀧𑁆𑀧𑀝𑀺𑀲𑀫𑁆𑀪𑀺𑀤𑁄 𑀘𑀢𑀼𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑁄 𑀤𑀲𑀩𑀮𑀥𑀸𑀭𑀻 𑀧𑀼𑀭𑀺𑀲𑀸𑀲𑀪𑁄 𑀧𑀼𑀭𑀺𑀲𑀲𑀻𑀳𑁄 𑀧𑀼𑀭𑀺𑀲𑀦𑀸𑀕𑁄 𑀧𑀼𑀭𑀺𑀲𑀸𑀚𑀜𑁆𑀜𑁄 𑀧𑀼𑀭𑀺𑀲𑀥𑁄𑀭𑀬𑁆𑀳𑁄 𑀅𑀦𑀦𑁆𑀢𑀜𑀸𑀡𑁄 𑀅𑀦𑀦𑁆𑀢𑀢𑁂𑀚𑁄 𑀅𑀦𑀦𑁆𑀢𑀬𑀲𑁄 𑀅𑀟𑁆𑀠𑁄 𑀫𑀳𑀤𑁆𑀥𑀦𑁄 𑀥𑀦𑀯𑀸 𑀦𑁂𑀢𑀸 𑀯𑀺𑀦𑁂𑀢𑀸 𑀅𑀦𑀼𑀦𑁂𑀢𑀸 𑀧𑀜𑁆𑀜𑀸𑀧𑁂𑀢𑀸 𑀦𑀺𑀚𑁆𑀛𑀸𑀧𑁂𑀢𑀸 𑀧𑁂𑀓𑁆𑀔𑁂𑀢𑀸 𑀧𑀲𑀸𑀤𑁂𑀢𑀸. 𑀲𑁄 𑀳𑀺 𑀪𑀕𑀯𑀸 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀫𑀕𑁆𑀕𑀲𑁆𑀲 𑀉𑀧𑁆𑀧𑀸𑀤𑁂𑀢𑀸, 𑀅𑀲𑀜𑁆𑀚𑀸𑀢𑀲𑁆𑀲 𑀫𑀕𑁆𑀕𑀲𑁆𑀲 𑀲𑀜𑁆𑀚𑀦𑁂𑀢𑀸 [𑀲𑀜𑁆𑀚𑀸𑀦𑁂𑀢𑀸 (𑀲𑁆𑀬𑀸.)], 𑀅𑀦𑀓𑁆𑀔𑀸𑀢𑀲𑁆𑀲 𑀫𑀕𑁆𑀕𑀲𑁆𑀲 𑀅𑀓𑁆𑀔𑀸𑀢𑀸, 𑀫𑀕𑁆𑀕𑀜𑁆𑀜𑀽 𑀫𑀕𑁆𑀕𑀯𑀺𑀤𑀽 𑀫𑀕𑁆𑀕𑀓𑁄𑀯𑀺𑀤𑁄 𑀫𑀕𑁆𑀕𑀸𑀦𑀼𑀕𑀸𑀫𑀻 [𑀫𑀕𑁆𑀕𑀸𑀦𑀼𑀕𑀸 (𑀲𑁆𑀬𑀸.) 𑀫𑀳𑀸𑀦𑀺. 𑁬𑁯 𑀧𑀲𑁆𑀲𑀺𑀢𑀩𑁆𑀩𑁄] 𑀘 𑀧𑀦𑀲𑁆𑀲 𑀏𑀢𑀭𑀳𑀺 𑀲𑀸𑀯𑀓𑀸 𑀯𑀺𑀳𑀭𑀦𑁆𑀢𑀺 𑀧𑀘𑁆𑀙𑀸 𑀲𑀫𑀦𑁆𑀦𑀸𑀕𑀢𑀸.

𑀲𑁄 𑀳𑀺 𑀪𑀕𑀯𑀸 𑀚𑀸𑀦𑀁 𑀚𑀸𑀦𑀸𑀢𑀺, 𑀧𑀲𑁆𑀲𑀁 𑀧𑀲𑁆𑀲𑀢𑀺, 𑀘𑀓𑁆𑀔𑀼𑀪𑀽𑀢𑁄 𑀜𑀸𑀡𑀪𑀽𑀢𑁄 𑀥𑀫𑁆𑀫𑀪𑀽𑀢𑁄 𑀩𑁆𑀭𑀳𑁆𑀫𑀪𑀽𑀢𑁄 𑀯𑀢𑁆𑀢𑀸 𑀧𑀯𑀢𑁆𑀢𑀸 𑀅𑀢𑁆𑀣𑀲𑁆𑀲 𑀦𑀺𑀦𑁆𑀦𑁂𑀢𑀸 𑀅𑀫𑀢𑀲𑁆𑀲 𑀤𑀸𑀢𑀸 𑀥𑀫𑁆𑀫𑀲𑁆𑀲𑀸𑀫𑀻 𑀢𑀣𑀸𑀕𑀢𑁄. 𑀦𑀢𑁆𑀣𑀺 𑀢𑀲𑁆𑀲 𑀪𑀕𑀯𑀢𑁄 𑀅𑀜𑁆𑀜𑀸𑀢𑀁 𑀅𑀤𑀺𑀝𑁆𑀞𑀁 𑀅𑀯𑀺𑀤𑀺𑀢𑀁 𑀅𑀲𑀘𑁆𑀙𑀺𑀓𑀢𑀁 𑀅𑀨𑀲𑁆𑀲𑀺𑀢𑀁 𑀧𑀜𑁆𑀜𑀸𑀬. 𑀅𑀢𑀻𑀢𑀁 𑀅𑀦𑀸𑀕𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 [𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 (𑀲𑁆𑀬𑀸.) 𑀫𑀳𑀸𑀦𑀺. 𑁬𑁯] 𑀉𑀧𑀸𑀤𑀸𑀬 𑀲𑀩𑁆𑀩𑁂 𑀥𑀫𑁆𑀫𑀸 𑀲𑀩𑁆𑀩𑀸𑀓𑀸𑀭𑁂𑀦 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀜𑀸𑀡𑀫𑀼𑀔𑁂 𑀆𑀧𑀸𑀣𑀁 𑀆𑀕𑀘𑁆𑀙𑀦𑁆𑀢𑀺. 𑀬𑀁 𑀓𑀺𑀜𑁆𑀘𑀺 𑀦𑁂𑀬𑁆𑀬𑀁 𑀦𑀸𑀫 𑀅𑀢𑁆𑀣𑀺 𑀢𑀁 𑀲𑀩𑁆𑀩𑀁 𑀚𑀸𑀦𑀺𑀢𑀩𑁆𑀩𑀁 [𑀲𑀩𑁆𑀩𑀁 𑀥𑀫𑁆𑀫𑀁 𑀚𑀸𑀦𑀺𑀢𑀩𑁆𑀩𑀁 (𑀓.)]. 𑀅𑀢𑁆𑀢𑀢𑁆𑀣𑁄 𑀯𑀸 𑀧𑀭𑀢𑁆𑀣𑁄 𑀯𑀸 𑀉𑀪𑀬𑀢𑁆𑀣𑁄 𑀯𑀸 𑀤𑀺𑀝𑁆𑀞𑀥𑀫𑁆𑀫𑀺𑀓𑁄 𑀯𑀸 𑀅𑀢𑁆𑀣𑁄 𑀲𑀫𑁆𑀧𑀭𑀸𑀬𑀺𑀓𑁄 𑀯𑀸 𑀅𑀢𑁆𑀣𑁄 𑀉𑀢𑁆𑀢𑀸𑀦𑁄 𑀯𑀸 𑀅𑀢𑁆𑀣𑁄 𑀕𑀫𑁆𑀪𑀻𑀭𑁄 𑀯𑀸 𑀅𑀢𑁆𑀣𑁄 𑀕𑀽𑀴𑁆𑀳𑁄 𑀯𑀸 𑀅𑀢𑁆𑀣𑁄 𑀧𑀝𑀺𑀘𑁆𑀙𑀦𑁆𑀦𑁄 𑀯𑀸 𑀅𑀢𑁆𑀣𑁄 𑀦𑁂𑀬𑁆𑀬𑁄 𑀯𑀸 𑀅𑀢𑁆𑀣𑁄 𑀦𑀻𑀢𑁄 𑀯𑀸 𑀅𑀢𑁆𑀣𑁄 𑀅𑀦𑀯𑀚𑁆𑀚𑁄 𑀯𑀸 𑀅𑀢𑁆𑀣𑁄 𑀦𑀺𑀓𑁆𑀓𑀺𑀮𑁂𑀲𑁄 𑀯𑀸 𑀅𑀢𑁆𑀣𑁄 𑀯𑁄𑀤𑀸𑀦𑁄 𑀯𑀸 𑀅𑀢𑁆𑀣𑁄 𑀧𑀭𑀫𑀢𑁆𑀣𑁄 𑀯𑀸 𑀅𑀢𑁆𑀣𑁄, 𑀲𑀩𑁆𑀩𑀁 𑀢𑀁 𑀅𑀦𑁆𑀢𑁄𑀩𑀼𑀤𑁆𑀥𑀜𑀸𑀡𑁂 𑀧𑀭𑀺𑀯𑀢𑁆𑀢𑀢𑀺.

𑀲𑀩𑁆𑀩𑀁 𑀓𑀸𑀬𑀓𑀫𑁆𑀫𑀁 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀺. 𑀲𑀩𑁆𑀩𑀁 𑀯𑀘𑀻𑀓𑀫𑁆𑀫𑀁 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀺. 𑀲𑀩𑁆𑀩𑀁 𑀫𑀦𑁄𑀓𑀫𑁆𑀫𑀁 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀺. 𑀅𑀢𑀻𑀢𑁂 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀅𑀧𑁆𑀧𑀝𑀺𑀳𑀢𑀁 𑀜𑀸𑀡𑀁. 𑀅𑀦𑀸𑀕𑀢𑁂 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀅𑀧𑁆𑀧𑀝𑀺𑀳𑀢𑀁 𑀜𑀸𑀡𑀁. 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀅𑀧𑁆𑀧𑀝𑀺𑀳𑀢𑀁 𑀜𑀸𑀡𑀁. 𑀬𑀸𑀯𑀢𑀓𑀁 𑀦𑁂𑀬𑁆𑀬𑀁 𑀢𑀸𑀯𑀢𑀓𑀁 𑀜𑀸𑀡𑀁, 𑀬𑀸𑀯𑀢𑀓𑀁 𑀜𑀸𑀡𑀁 𑀢𑀸𑀯𑀢𑀓𑀁 𑀦𑁂𑀬𑁆𑀬𑀁. 𑀦𑁂𑀬𑁆𑀬𑀧𑀭𑀺𑀬𑀦𑁆𑀢𑀺𑀓𑀁 𑀜𑀸𑀡𑀁, 𑀜𑀸𑀡𑀧𑀭𑀺𑀬𑀦𑁆𑀢𑀺𑀓𑀁 𑀦𑁂𑀬𑁆𑀬𑀁. 𑀦𑁂𑀬𑁆𑀬𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀜𑀸𑀡𑀁 𑀦𑀧𑁆𑀧𑀯𑀢𑁆𑀢𑀢𑀺. 𑀜𑀸𑀡𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀦𑁂𑀬𑁆𑀬𑀧𑀣𑁄 𑀦𑀢𑁆𑀣𑀺. 𑀅𑀜𑁆𑀜𑀫𑀜𑁆𑀜𑀧𑀭𑀺𑀬𑀦𑁆𑀢𑀝𑁆𑀞𑀸𑀬𑀺𑀦𑁄 𑀢𑁂 𑀥𑀫𑁆𑀫𑀸. 𑀬𑀣𑀸 𑀤𑁆𑀯𑀺𑀦𑁆𑀦𑀁 𑀲𑀫𑀼𑀕𑁆𑀕𑀧𑀝𑀮𑀸𑀦𑀁 𑀲𑀫𑁆𑀫𑀸 𑀨𑀼𑀲𑀺𑀢𑀸𑀦𑀁 [𑀲𑀼𑀨𑀼𑀲𑁆𑀲𑀺𑀢𑀸𑀦𑀁 (𑀲𑁆𑀬𑀸. 𑀓.)] 𑀳𑁂𑀝𑁆𑀞𑀺𑀫𑀁 𑀲𑀫𑀼𑀕𑁆𑀕𑀧𑀝𑀮𑀁 𑀉𑀧𑀭𑀺𑀫𑀁 𑀦𑀸𑀢𑀺𑀯𑀢𑁆𑀢𑀢𑀺, 𑀉𑀧𑀭𑀺𑀫𑀁 𑀲𑀫𑀼𑀕𑁆𑀕𑀧𑀝𑀮𑀁 𑀳𑁂𑀝𑁆𑀞𑀺𑀫𑀁 𑀦𑀸𑀢𑀺𑀯𑀢𑁆𑀢𑀢𑀺, 𑀅𑀜𑁆𑀜𑀫𑀜𑁆𑀜𑀧𑀭𑀺𑀬𑀦𑁆𑀢𑀝𑁆𑀞𑀸𑀬𑀺𑀦𑁄; 𑀏𑀯𑀫𑁂𑀯 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀦𑁂𑀬𑁆𑀬𑀜𑁆𑀘 𑀜𑀸𑀡𑀜𑁆𑀘 𑀅𑀜𑁆𑀜𑀫𑀜𑁆𑀜𑀧𑀭𑀺𑀬𑀦𑁆𑀢𑀝𑁆𑀞𑀸𑀬𑀺𑀦𑁄. 𑀬𑀸𑀯𑀢𑀓𑀁 𑀦𑁂𑀬𑁆𑀬𑀁 𑀢𑀸𑀯𑀢𑀓𑀁 𑀜𑀸𑀡𑀁, 𑀬𑀸𑀯𑀢𑀓𑀁 𑀜𑀸𑀡𑀁 𑀢𑀸𑀯𑀢𑀓𑀁 𑀦𑁂𑀬𑁆𑀬𑀁. 𑀦𑁂𑀬𑁆𑀬𑀧𑀭𑀺𑀬𑀦𑁆𑀢𑀺𑀓𑀁 𑀜𑀸𑀡𑀁, 𑀜𑀸𑀡𑀧𑀭𑀺𑀬𑀦𑁆𑀢𑀺𑀓𑀁 𑀦𑁂𑀬𑁆𑀬𑀁. 𑀦𑁂𑀬𑁆𑀬𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀜𑀸𑀡𑀁 𑀦𑀧𑁆𑀧𑀯𑀢𑁆𑀢𑀢𑀺. 𑀜𑀸𑀡𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀦𑁂𑀬𑁆𑀬𑀧𑀣𑁄 𑀦𑀢𑁆𑀣𑀺. 𑀅𑀜𑁆𑀜𑀫𑀜𑁆𑀜𑀧𑀭𑀺𑀬𑀦𑁆𑀢𑀝𑁆𑀞𑀸𑀬𑀺𑀦𑁄 𑀢𑁂 𑀥𑀫𑁆𑀫𑀸. 𑀲𑀩𑁆𑀩𑀥𑀫𑁆𑀫𑁂𑀲𑀼 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀜𑀸𑀡𑀁 𑀧𑀯𑀢𑁆𑀢𑀢𑀺.

𑀲𑀩𑁆𑀩𑁂 𑀥𑀫𑁆𑀫𑀸 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀆𑀯𑀚𑁆𑀚𑀦𑀧𑁆𑀧𑀝𑀺𑀩𑀤𑁆𑀥𑀸 𑀆𑀓𑀗𑁆𑀔𑀧𑁆𑀧𑀝𑀺𑀩𑀤𑁆𑀥𑀸 𑀫𑀦𑀲𑀺𑀓𑀸𑀭𑀧𑁆𑀧𑀝𑀺𑀩𑀤𑁆𑀥𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑀧𑁆𑀧𑀝𑀺𑀩𑀤𑁆𑀥𑀸. 𑀲𑀩𑁆𑀩𑀲𑀢𑁆𑀢𑁂𑀲𑀼 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀜𑀸𑀡𑀁 𑀧𑀯𑀢𑁆𑀢𑀢𑀺. 𑀲𑀩𑁆𑀩𑁂𑀲𑀁 𑀲𑀢𑁆𑀢𑀸𑀦𑀁 𑀩𑀼𑀤𑁆𑀥𑁄 𑀆𑀲𑀬𑀁 𑀚𑀸𑀦𑀸𑀢𑀺, 𑀅𑀦𑀼𑀲𑀬𑀁 𑀚𑀸𑀦𑀸𑀢𑀺, 𑀘𑀭𑀺𑀢𑀁 [𑀘𑀭𑀺𑀬𑀁 (𑀲𑁆𑀬𑀸.) 𑀫𑀳𑀸𑀦𑀺. 𑁬𑁯 𑀧𑀲𑁆𑀲𑀺𑀢𑀩𑁆𑀩𑀸] 𑀚𑀸𑀦𑀸𑀢𑀺, 𑀅𑀥𑀺𑀫𑀼𑀢𑁆𑀢𑀺𑀁 𑀚𑀸𑀦𑀸𑀢𑀺. 𑀅𑀧𑁆𑀧𑀭𑀚𑀓𑁆𑀔𑁂 𑀫𑀳𑀸𑀭𑀚𑀓𑁆𑀔𑁂 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁂 𑀫𑀼𑀤𑀺𑀦𑁆𑀤𑁆𑀭𑀺𑀬𑁂 𑀲𑁆𑀯𑀸𑀓𑀸𑀭𑁂 𑀤𑁆𑀯𑀸𑀓𑀸𑀭𑁂 𑀲𑀼𑀯𑀺𑀜𑁆𑀜𑀸𑀧𑀬𑁂 𑀤𑀼𑀯𑀺𑀜𑁆𑀜𑀸𑀧𑀬𑁂 𑀪𑀩𑁆𑀩𑀸𑀪𑀩𑁆𑀩𑁂 𑀲𑀢𑁆𑀢𑁂 𑀧𑀚𑀸𑀦𑀸𑀢𑀺. 𑀲𑀤𑁂𑀯𑀓𑁄 𑀮𑁄𑀓𑁄 𑀲𑀫𑀸𑀭𑀓𑁄 𑀲𑀩𑁆𑀭𑀳𑁆𑀫𑀓𑁄 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀻 𑀧𑀚𑀸 𑀲𑀤𑁂𑀯𑀫𑀦𑀼𑀲𑁆𑀲𑀸 𑀅𑀦𑁆𑀢𑁄𑀩𑀼𑀤𑁆𑀥𑀜𑀸𑀡𑁂 𑀧𑀭𑀺𑀯𑀢𑁆𑀢𑀢𑀺.

𑀬𑀣𑀸 𑀬𑁂 𑀓𑁂𑀘𑀺 𑀫𑀘𑁆𑀙𑀓𑀘𑁆𑀙𑀧𑀸, 𑀅𑀦𑁆𑀢𑀫𑀲𑁄 𑀢𑀺𑀫𑀺𑀢𑀺𑀫𑀺𑀗𑁆𑀕𑀮𑀁 𑀉𑀧𑀸𑀤𑀸𑀬, 𑀅𑀦𑁆𑀢𑁄𑀫𑀳𑀸𑀲𑀫𑀼𑀤𑁆𑀤𑁂 𑀧𑀭𑀺𑀯𑀢𑁆𑀢𑀦𑁆𑀢𑀺, 𑀏𑀯𑀫𑁂𑀯𑀁 𑀲𑀤𑁂𑀯𑀓𑁄 𑀮𑁄𑀓𑁄 𑀲𑀫𑀸𑀭𑀓𑁄 𑀲𑀩𑁆𑀭𑀳𑁆𑀫𑀓𑁄 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀻 𑀧𑀚𑀸 𑀲𑀤𑁂𑀯𑀫𑀦𑀼𑀲𑁆𑀲𑀸 𑀅𑀦𑁆𑀢𑁄𑀩𑀼𑀤𑁆𑀥𑀜𑀸𑀡𑁂 𑀧𑀭𑀺𑀯𑀢𑁆𑀢𑀢𑀺. 𑀬𑀣𑀸 𑀬𑁂 𑀓𑁂𑀘𑀺 𑀧𑀓𑁆𑀔𑀺𑀦𑁄, 𑀅𑀦𑁆𑀢𑀫𑀲𑁄 𑀕𑀭𑀼𑀴𑀁 𑀯𑁂𑀦𑀢𑁂𑀬𑁆𑀬𑀁 𑀉𑀧𑀸𑀤𑀸𑀬, 𑀆𑀓𑀸𑀲𑀲𑁆𑀲 𑀧𑀤𑁂𑀲𑁂 𑀧𑀭𑀺𑀯𑀢𑁆𑀢𑀦𑁆𑀢𑀺; 𑀏𑀯𑀫𑁂𑀯 𑀬𑁂𑀧𑀺 𑀢𑁂 𑀲𑀸𑀭𑀺𑀧𑀼𑀢𑁆𑀢𑀲𑀫𑀸 𑀧𑀜𑁆𑀜𑀸𑀬 𑀢𑁂𑀧𑀺 𑀩𑀼𑀤𑁆𑀥𑀜𑀸𑀡𑀲𑁆𑀲 𑀧𑀤𑁂𑀲𑁂 𑀧𑀭𑀺𑀯𑀢𑁆𑀢𑀦𑁆𑀢𑀺. 𑀩𑀼𑀤𑁆𑀥𑀜𑀸𑀡𑀁 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀧𑀜𑁆𑀜𑀁 𑀨𑀭𑀺𑀢𑁆𑀯𑀸 𑀅𑀢𑀺𑀖𑀁𑀲𑀺𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀬𑁂𑀧𑀺 𑀢𑁂 𑀔𑀢𑁆𑀢𑀺𑀬𑀧𑀡𑁆𑀟𑀺𑀢𑀸 𑀩𑁆𑀭𑀸𑀳𑁆𑀫𑀡𑀧𑀡𑁆𑀟𑀺𑀢𑀸 𑀕𑀳𑀧𑀢𑀺𑀧𑀡𑁆𑀟𑀺𑀢𑀸 𑀲𑀫𑀡𑀧𑀡𑁆𑀟𑀺𑀢𑀸 𑀦𑀺𑀧𑀼𑀡𑀸 𑀓𑀢𑀧𑀭𑀧𑁆𑀧𑀯𑀸𑀤𑀸 𑀯𑀸𑀮𑀯𑁂𑀥𑀺𑀭𑀽𑀧𑀸 𑀯𑁄𑀪𑀺𑀦𑁆𑀤𑀦𑁆𑀢𑀸 [𑀢𑁂 𑀪𑀺𑀦𑁆𑀤𑀦𑁆𑀢𑀸 (𑀲𑁆𑀬𑀸. 𑀓.)] 𑀫𑀜𑁆𑀜𑁂 𑀘𑀭𑀦𑁆𑀢𑀺 𑀧𑀜𑁆𑀜𑀸𑀕𑀢𑁂𑀦 𑀤𑀺𑀝𑁆𑀞𑀺𑀕𑀢𑀸𑀦𑀺, 𑀢𑁂 𑀧𑀜𑁆𑀳𑀁 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀢𑀣𑀸𑀕𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑀦𑁆𑀢𑀺 𑀕𑀽𑀴𑁆𑀳𑀸𑀦𑀺 𑀘 𑀧𑀝𑀺𑀘𑁆𑀙𑀦𑁆𑀦𑀸𑀦𑀺 𑀘, 𑀓𑀣𑀺𑀢𑀸 𑀯𑀺𑀲𑀚𑁆𑀚𑀺𑀢𑀸 𑀘 𑀢𑁂 𑀧𑀜𑁆𑀳𑀸 𑀪𑀕𑀯𑀢𑀸 𑀳𑁄𑀦𑁆𑀢𑀺 𑀦𑀺𑀤𑁆𑀤𑀺𑀝𑁆𑀞𑀓𑀸𑀭𑀡𑀸 [𑀦𑀺𑀤𑁆𑀤𑀺𑀝𑁆𑀞𑀺𑀓𑀸𑀭𑀡𑀸 (𑀲𑁆𑀬𑀸.)]. 𑀉𑀧𑀓𑁆𑀔𑀺𑀢𑁆𑀢𑀓𑀸 𑀘 𑀢𑁂 𑀪𑀕𑀯𑀢𑁄 𑀲𑀫𑁆𑀧𑀚𑁆𑀚𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀢𑀢𑁆𑀣 𑀅𑀢𑀺𑀭𑁄𑀘𑀢𑀺 𑀬𑀤𑀺𑀤𑀁 𑀧𑀜𑁆𑀜𑀸𑀬𑀸𑀢𑀺. 𑀅𑀕𑁆𑀕𑁄 𑀅𑀲𑀸𑀫𑀦𑁆𑀢𑀧𑀜𑁆𑀜𑁄, 𑀅𑀲𑀸𑀫𑀦𑁆𑀢𑀧𑀜𑁆𑀜𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑁋 𑀅𑀬𑀁 𑀅𑀲𑀸𑀫𑀦𑁆𑀢𑀧𑀜𑁆𑀜𑀸.

𑁬. 𑀪𑀽𑀭𑀺𑀧𑀜𑁆𑀜𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀓𑀢𑀫𑀸 𑀪𑀽𑀭𑀺𑀧𑀜𑁆𑀜𑀸? 𑀭𑀸𑀕𑀁 𑀅𑀪𑀺𑀪𑀼𑀬𑁆𑀬𑀢𑀻𑀢𑀺 𑁋 𑀪𑀽𑀭𑀺𑀧𑀜𑁆𑀜𑀸. 𑀅𑀪𑀺𑀪𑀯𑀺𑀢𑀸𑀢𑀺 𑁋 𑀪𑀽𑀭𑀺𑀧𑀜𑁆𑀜𑀸. 𑀤𑁄𑀲𑀁 𑀅𑀪𑀺𑀪𑀼𑀬𑁆𑀬𑀢𑀻𑀢𑀺 𑁋 𑀪𑀽𑀭𑀺𑀧𑀜𑁆𑀜𑀸. 𑀅𑀪𑀺𑀪𑀯𑀺𑀢𑀸𑀢𑀺 𑁋 𑀪𑀽𑀭𑀺𑀧𑀜𑁆𑀜𑀸. 𑀫𑁄𑀳𑀁 𑀅𑀪𑀺𑀪𑀼𑀬𑁆𑀬𑀢𑀻𑀢𑀺 𑁋 𑀪𑀽𑀭𑀺𑀧𑀜𑁆𑀜𑀸. 𑀅𑀪𑀺𑀪𑀯𑀺𑀢𑀸𑀢𑀺 𑁋 𑀪𑀽𑀭𑀺𑀧𑀜𑁆𑀜𑀸. 𑀓𑁄𑀥𑀁…𑀧𑁂… 𑀉𑀧𑀦𑀸𑀳𑀁 … 𑀫𑀓𑁆𑀔𑀁… 𑀧𑀴𑀸𑀲𑀁… 𑀇𑀲𑁆𑀲𑀁… 𑀫𑀘𑁆𑀙𑀭𑀺𑀬𑀁… 𑀫𑀸𑀬𑀁… 𑀲𑀸𑀞𑁂𑀬𑁆𑀬𑀁… 𑀣𑀫𑁆𑀪𑀁… 𑀲𑀸𑀭𑀫𑁆𑀪𑀁… 𑀫𑀸𑀦𑀁… 𑀅𑀢𑀺𑀫𑀸𑀦𑀁… 𑀫𑀤𑀁… 𑀧𑀫𑀸𑀤𑀁… 𑀲𑀩𑁆𑀩𑁂 𑀓𑀺𑀮𑁂𑀲𑁂… 𑀲𑀩𑁆𑀩𑁂 𑀤𑀼𑀘𑁆𑀘𑀭𑀺𑀢𑁂… 𑀲𑀩𑁆𑀩𑁂 𑀅𑀪𑀺𑀲𑀗𑁆𑀔𑀸𑀭𑁂…𑀧𑁂… 𑀲𑀩𑁆𑀩𑁂 𑀪𑀯𑀕𑀸𑀫𑀺𑀓𑀫𑁆𑀫𑁂 𑀅𑀪𑀺𑀪𑀼𑀬𑁆𑀬𑀢𑀻𑀢𑀺 𑁋 𑀪𑀽𑀭𑀺𑀧𑀜𑁆𑀜𑀸. 𑀅𑀪𑀺𑀪𑀯𑀺𑀢𑀸𑀢𑀺 𑁋 𑀪𑀽𑀭𑀺𑀧𑀜𑁆𑀜𑀸. 𑀭𑀸𑀕𑁄 𑀅𑀭𑀺. 𑀢𑀁 𑀅𑀭𑀺𑀁 𑀫𑀤𑁆𑀤𑀦𑀺𑀧𑀜𑁆𑀜𑀸𑀢𑀺 𑁋 𑀪𑀽𑀭𑀺𑀧𑀜𑁆𑀜𑀸. 𑀤𑁄𑀲𑁄 𑀅𑀭𑀺. 𑀢𑀁 𑀅𑀭𑀺𑀁 𑀫𑀤𑁆𑀤𑀦𑀺𑀧𑀜𑁆𑀜𑀸𑀢𑀺 𑁋 𑀪𑀽𑀭𑀺𑀧𑀜𑁆𑀜𑀸. 𑀫𑁄𑀳𑁄 𑀅𑀭𑀺. 𑀢𑀁 𑀅𑀭𑀺𑀁 𑀫𑀤𑁆𑀤𑀦𑀺𑀧𑀜𑁆𑀜𑀸𑀢𑀺 𑁋 𑀪𑀽𑀭𑀺𑀧𑀜𑁆𑀜𑀸. 𑀓𑁄𑀥𑁄…𑀧𑁂… 𑀉𑀧𑀦𑀸𑀳𑁄… 𑀫𑀓𑁆𑀔𑁄… 𑀧𑀴𑀸𑀲𑁄… 𑀇𑀲𑁆𑀲𑀸… 𑀫𑀘𑁆𑀙𑀭𑀺𑀬𑀁… 𑀫𑀸𑀬𑀸… 𑀲𑀸𑀞𑁂𑀬𑁆𑀬𑀁… 𑀣𑀫𑁆𑀪𑁄… 𑀲𑀸𑀭𑀫𑁆𑀪𑁄… 𑀫𑀸𑀦𑁄… 𑀅𑀢𑀺𑀫𑀸𑀦𑁄… 𑀫𑀤𑁄… 𑀧𑀫𑀸𑀤𑁄… 𑀲𑀩𑁆𑀩𑁂 𑀓𑀺𑀮𑁂𑀲𑀸… 𑀲𑀩𑁆𑀩𑁂 𑀤𑀼𑀘𑁆𑀘𑀭𑀺𑀢𑀸… 𑀲𑀩𑁆𑀩𑁂 𑀅𑀪𑀺𑀲𑀗𑁆𑀔𑀸𑀭𑀸…𑀧𑁂… 𑀲𑀩𑁆𑀩𑁂 𑀪𑀯𑀕𑀸𑀫𑀺𑀓𑀫𑁆𑀫𑀸 𑀅𑀭𑀺. 𑀢𑀁 𑀅𑀭𑀺𑀁 𑀫𑀤𑁆𑀤𑀦𑀺𑀧𑀜𑁆𑀜𑀸𑀢𑀺 𑁋 𑀪𑀽𑀭𑀺𑀧𑀜𑁆𑀜𑀸. 𑀪𑀽𑀭𑀺 𑀯𑀼𑀘𑁆𑀘𑀢𑀺 𑀧𑀣𑀯𑀻 [𑀧𑀞𑀯𑀻 (𑀲𑁆𑀬𑀸.)]. 𑀢𑀸𑀬 𑀧𑀣𑀯𑀺𑀲𑀫𑀸𑀬 𑀯𑀺𑀢𑁆𑀣𑀢𑀸𑀬 𑀯𑀺𑀧𑀼𑀮𑀸𑀬 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁄𑀢𑀺 𑁋 𑀪𑀽𑀭𑀺𑀧𑀜𑁆𑀜𑀸. 𑀅𑀧𑀺 𑀘, 𑀧𑀜𑁆𑀜𑀸𑀬 𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀪𑀽𑀭𑀺 𑀫𑁂𑀥𑀸 𑀧𑀭𑀺𑀡𑀸𑀬𑀺𑀓𑀸𑀢𑀺 𑁋 𑀪𑀽𑀭𑀺𑀧𑀜𑁆𑀜𑀸. 𑀪𑀽𑀭𑀺𑀧𑀜𑁆𑀜𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑁋 𑀅𑀬𑀁 𑀪𑀽𑀭𑀺𑀧𑀜𑁆𑀜𑀸.

𑀧𑀜𑁆𑀜𑀸𑀩𑀸𑀳𑀼𑀮𑁆𑀮𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀓𑀢𑀫𑀁 𑀧𑀜𑁆𑀜𑀸𑀩𑀸𑀳𑀼𑀮𑁆𑀮𑀁? 𑀇𑀥𑁂𑀓𑀘𑁆𑀘𑁄 𑀧𑀜𑁆𑀜𑀸𑀕𑀭𑀼𑀓𑁄 𑀳𑁄𑀢𑀺 𑀧𑀜𑁆𑀜𑀸𑀘𑀭𑀺𑀢𑁄 𑀧𑀜𑁆𑀜𑀸𑀲𑀬𑁄 𑀧𑀜𑁆𑀜𑀸𑀥𑀺𑀫𑀼𑀢𑁆𑀢𑁄 𑀧𑀜𑁆𑀜𑀸𑀥𑀚𑁄 𑀧𑀜𑁆𑀜𑀸𑀓𑁂𑀢𑀼 𑀧𑀜𑁆𑀜𑀸𑀥𑀺𑀧𑀢𑁂𑀬𑁆𑀬𑁄 𑀯𑀺𑀘𑀬𑀩𑀳𑀼𑀮𑁄 𑀧𑀯𑀺𑀘𑀬𑀩𑀳𑀼𑀮𑁄 𑀑𑀓𑁆𑀔𑀸𑀬𑀦𑀩𑀳𑀼𑀮𑁄 𑀲𑀫𑁄𑀓𑁆𑀔𑀸𑀬𑀦𑀩𑀳𑀼𑀮𑁄 [𑀲𑀫𑁆𑀧𑁂𑀓𑁆𑀔𑀸𑀬𑀦𑀩𑀳𑀼𑀮𑁄 (𑀲𑁆𑀬𑀸. 𑀓.) 𑀫𑀳𑀸𑀦𑀺. 𑁨𑁦𑁪 𑀧𑀲𑁆𑀲𑀺𑀢𑀩𑁆𑀩𑀸] 𑀲𑀫𑁆𑀧𑁂𑀓𑁆𑀔𑀸𑀬𑀦𑀥𑀫𑁆𑀫𑁄 𑀯𑀺𑀪𑀽𑀢𑀯𑀺𑀳𑀸𑀭𑀻 𑀢𑀘𑁆𑀘𑀭𑀺𑀢𑁄 𑀢𑀕𑁆𑀕𑀭𑀼𑀓𑁄 𑀢𑀩𑁆𑀩𑀳𑀼𑀮𑁄 𑀢𑀦𑁆𑀦𑀺𑀦𑁆𑀦𑁄 𑀢𑀧𑁆𑀧𑁄𑀡𑁄 𑀢𑀧𑁆𑀧𑀩𑁆𑀪𑀸𑀭𑁄 𑀢𑀤𑀥𑀺𑀫𑀼𑀢𑁆𑀢𑁄 𑀢𑀤𑀥𑀺𑀧𑀢𑁂𑀬𑁆𑀬𑁄. 𑀬𑀣𑀸 𑀕𑀡𑀕𑀭𑀼𑀓𑁄 𑀯𑀼𑀘𑁆𑀘𑀢𑀺 ‘‘𑀕𑀡𑀩𑀸𑀳𑀼𑀮𑀺𑀓𑁄’’𑀢𑀺, 𑀘𑀻𑀯𑀭𑀕𑀭𑀼𑀓𑁄 𑀯𑀼𑀘𑁆𑀘𑀢𑀺 ‘‘𑀘𑀻𑀯𑀭𑀩𑀸𑀳𑀼𑀮𑀺𑀓𑁄’’𑀢𑀺, 𑀧𑀢𑁆𑀢𑀕𑀭𑀼𑀓𑁄 𑀯𑀼𑀘𑁆𑀘𑀢𑀺 ‘‘𑀧𑀢𑁆𑀢𑀩𑀸𑀳𑀼𑀮𑀺𑀓𑁄’’𑀢𑀺, 𑀲𑁂𑀦𑀸𑀲𑀦𑀕𑀭𑀼𑀓𑁄 𑀯𑀼𑀘𑁆𑀘𑀢𑀺 ‘‘𑀲𑁂𑀦𑀸𑀲𑀦𑀩𑀸𑀳𑀼𑀮𑀺𑀓𑁄’’𑀢𑀺; 𑀏𑀯𑀫𑁂𑀯𑀁 𑀇𑀥𑁂𑀓𑀘𑁆𑀘𑁄 𑀧𑀜𑁆𑀜𑀸 𑀕𑀭𑀼𑀓𑁄 𑀳𑁄𑀢𑀺 𑀧𑀜𑁆𑀜𑀸𑀘𑀭𑀺𑀢𑁄 𑀧𑀜𑁆𑀜𑀸𑀲𑀬𑁄 𑀧𑀜𑁆𑀜𑀸𑀥𑀺𑀫𑀼𑀢𑁆𑀢𑁄 𑀧𑀜𑁆𑀜𑀸𑀥𑀚𑁄 𑀧𑀜𑁆𑀜𑀸𑀓𑁂𑀢𑀼 𑀧𑀜𑁆𑀜𑀸𑀥𑀺𑀧𑀢𑁂𑀬𑁆𑀬𑁄 𑀯𑀺𑀘𑀬𑀩𑀳𑀼𑀮𑁄 𑀧𑀯𑀺𑀘𑀬𑀩𑀳𑀼𑀮𑁄 𑀑𑀓𑁆𑀔𑀸𑀬𑀦𑀩𑀳𑀼𑀮𑁄 𑀲𑀫𑁄𑀓𑁆𑀔𑀸𑀬𑀦𑀩𑀳𑀼𑀮𑁄 𑀲𑀫𑁆𑀧𑁂𑀓𑁆𑀔𑀸𑀬𑀦𑀥𑀫𑁆𑀫𑁄 𑀯𑀺𑀪𑀽𑀢𑀯𑀺𑀳𑀸𑀭𑀻 𑀢𑀘𑁆𑀘𑀭𑀺𑀢𑁄 𑀢𑀕𑁆𑀕𑀭𑀼𑀓𑁄 𑀢𑀩𑁆𑀩𑀳𑀼𑀮𑁄 𑀢𑀦𑁆𑀦𑀺𑀦𑁆𑀦𑁄 𑀢𑀧𑁆𑀧𑁄𑀡𑁄 𑀢𑀧𑁆𑀧𑀩𑁆𑀪𑀸𑀭𑁄 𑀢𑀤𑀥𑀺𑀫𑀼𑀢𑁆𑀢𑁄 𑀢𑀤𑀥𑀺𑀧𑀢𑁂𑀬𑁆𑀬𑁄. 𑀧𑀜𑁆𑀜𑀸𑀩𑀸𑀳𑀼𑀮𑁆𑀮𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑁋 𑀇𑀤𑀁 𑀧𑀜𑁆𑀜𑀸𑀩𑀸𑀳𑀼𑀮𑁆𑀮𑀁.

𑀲𑀻𑀖𑀧𑀜𑁆𑀜𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀓𑀢𑀫𑀸 𑀲𑀻𑀖𑀧𑀜𑁆𑀜𑀸? 𑀲𑀻𑀖𑀁 𑀲𑀻𑀖𑀁 𑀲𑀻𑀮𑀸𑀦𑀺 𑀧𑀭𑀺𑀧𑀽𑀭𑁂𑀢𑀻𑀢𑀺 𑁋 𑀲𑀻𑀖𑀧𑀜𑁆𑀜𑀸. 𑀲𑀻𑀖𑀁 𑀲𑀻𑀖𑀁 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀁 𑀧𑀭𑀺𑀧𑀽𑀭𑁂𑀢𑀻𑀢𑀺 𑁋 𑀲𑀻𑀖𑀧𑀜𑁆𑀜𑀸. 𑀲𑀻𑀖𑀁 𑀲𑀻𑀖𑀁 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀁 𑀧𑀭𑀺𑀧𑀽𑀭𑁂𑀢𑀻𑀢𑀺 𑁋 𑀲𑀻𑀖𑀧𑀜𑁆𑀜𑀸. 𑀲𑀻𑀖𑀁 𑀲𑀻𑀖𑀁 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑀁 𑀧𑀭𑀺𑀧𑀽𑀭𑁂𑀢𑀻𑀢𑀺 𑁋 𑀲𑀻𑀖𑀧𑀜𑁆𑀜𑀸. 𑀲𑀻𑀖𑀁 𑀲𑀻𑀖𑀁 𑀲𑀻𑀮𑀓𑁆𑀔𑀦𑁆𑀥𑀁 𑀧𑀭𑀺𑀧𑀽𑀭𑁂𑀢𑀻𑀢𑀺 𑁋 𑀲𑀻𑀖𑀧𑀜𑁆𑀜𑀸. 𑀲𑀻𑀖𑀁 𑀲𑀻𑀖𑀁 𑀲𑀫𑀸𑀥𑀺𑀓𑁆𑀔𑀦𑁆𑀥𑀁 𑀧𑀭𑀺𑀧𑀽𑀭𑁂𑀢𑀻𑀢𑀺 𑁋 𑀲𑀻𑀖𑀧𑀜𑁆𑀜𑀸. 𑀲𑀻𑀖𑀁 𑀲𑀻𑀖𑀁 𑀧𑀜𑁆𑀜𑀸𑀓𑁆𑀔𑀦𑁆𑀥𑀁 𑀧𑀭𑀺𑀧𑀽𑀭𑁂𑀢𑀻𑀢𑀺 𑁋 𑀲𑀻𑀖𑀧𑀜𑁆𑀜𑀸. 𑀲𑀻𑀖𑀁 𑀲𑀻𑀖𑀁 𑀯𑀺𑀫𑀼𑀢𑁆𑀢𑀺𑀓𑁆𑀔𑀦𑁆𑀥𑀁 𑀧𑀭𑀺𑀧𑀽𑀭𑁂𑀢𑀻𑀢𑀺 𑁋 𑀲𑀻𑀖𑀧𑀜𑁆𑀜𑀸. 𑀲𑀻𑀖𑀁 𑀲𑀻𑀖𑀁 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑀁 𑀧𑀭𑀺𑀧𑀽𑀭𑁂𑀢𑀻𑀢𑀺 𑁋 𑀲𑀻𑀖𑀧𑀜𑁆𑀜𑀸. 𑀲𑀻𑀖𑀁 𑀲𑀻𑀖𑀁 𑀞𑀸𑀦𑀸𑀝𑁆𑀞𑀸𑀦𑀸𑀦𑀺 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑁋 𑀲𑀻𑀖𑀧𑀜𑁆𑀜𑀸. 𑀲𑀻𑀖𑀁 𑀲𑀻𑀖𑀁 𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀺𑀬𑁄 𑀧𑀭𑀺𑀧𑀽𑀭𑁂𑀢𑀻𑀢𑀺 𑁋 𑀲𑀻𑀖𑀧𑀜𑁆𑀜𑀸. 𑀲𑀻𑀖𑀁 𑀲𑀻𑀖𑀁 𑀅𑀭𑀺𑀬𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑁋 𑀲𑀻𑀖𑀧𑀜𑁆𑀜𑀸. 𑀲𑀻𑀖𑀁 𑀲𑀻𑀖𑀁 𑀲𑀢𑀺𑀧𑀝𑁆𑀞𑀸𑀦𑁂 𑀪𑀸𑀯𑁂𑀢𑀻𑀢𑀺 𑁋 𑀲𑀻𑀖𑀧𑀜𑁆𑀜𑀸. 𑀲𑀻𑀖𑀁 𑀲𑀻𑀖𑀁 𑀲𑀫𑁆𑀫𑀧𑁆𑀧𑀥𑀸𑀦𑁂 𑀪𑀸𑀯𑁂𑀢𑀻𑀢𑀺 𑁋 𑀲𑀻𑀖𑀧𑀜𑁆𑀜𑀸. 𑀲𑀻𑀖𑀁 𑀲𑀻𑀖𑀁 𑀇𑀤𑁆𑀥𑀺𑀧𑀸𑀤𑁂 𑀪𑀸𑀯𑁂𑀢𑀻𑀢𑀺 𑁋 𑀲𑀻𑀖𑀧𑀜𑁆𑀜𑀸. 𑀲𑀻𑀖𑀁 𑀲𑀻𑀖𑀁 𑀇𑀦𑁆𑀤𑁆𑀭𑀺𑀬𑀸𑀦𑀺 𑀪𑀸𑀯𑁂𑀢𑀻𑀢𑀺 𑁋 𑀲𑀻𑀖𑀧𑀜𑁆𑀜𑀸. 𑀲𑀻𑀖𑀁 𑀲𑀻𑀖𑀁 𑀩𑀮𑀸𑀦𑀺 𑀪𑀸𑀯𑁂𑀢𑀻𑀢𑀺 𑁋 𑀲𑀻𑀖𑀧𑀜𑁆𑀜𑀸. 𑀲𑀻𑀖𑀁 𑀲𑀻𑀖𑀁 𑀩𑁄𑀚𑁆𑀛𑀗𑁆𑀕𑁂 𑀪𑀸𑀯𑁂𑀢𑀻𑀢𑀺 𑁋 𑀲𑀻𑀖𑀧𑀜𑁆𑀜𑀸. 𑀲𑀻𑀖𑀁 𑀲𑀻𑀖𑀁 𑀅𑀭𑀺𑀬𑀫𑀕𑁆𑀕𑀁 𑀪𑀸𑀯𑁂𑀢𑀻𑀢𑀺 𑁋 𑀲𑀻𑀖𑀧𑀜𑁆𑀜𑀸. 𑀲𑀻𑀖𑀁 𑀲𑀻𑀖𑀁 𑀲𑀸𑀫𑀜𑁆𑀜𑀨𑀮𑀸𑀦𑀺 𑀲𑀘𑁆𑀙𑀺𑀓𑀭𑁄𑀢𑀻𑀢𑀺 𑁋 𑀲𑀻𑀖𑀧𑀜𑁆𑀜𑀸. 𑀲𑀻𑀖𑀁 𑀲𑀻𑀖𑀁 𑀅𑀪𑀺𑀜𑁆𑀜𑀸𑀬𑁄 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑁋 𑀲𑀻𑀖𑀧𑀜𑁆𑀜𑀸. 𑀲𑀻𑀖𑀁 𑀲𑀻𑀖𑀁 𑀧𑀭𑀫𑀢𑁆𑀣𑀁 𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀭𑁄𑀢𑀻𑀢𑀺 𑁋 𑀲𑀻𑀖𑀧𑀜𑁆𑀜𑀸. 𑀲𑀻𑀖𑀧𑀜𑁆𑀜𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑁋 𑀅𑀬𑀁 𑀲𑀻𑀖𑀧𑀜𑁆𑀜𑀸.

𑀮𑀳𑀼𑀧𑀜𑁆𑀜𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀓𑀢𑀫𑀸 𑀮𑀳𑀼𑀧𑀜𑁆𑀜𑀸? 𑀮𑀳𑀼𑀁 𑀮𑀳𑀼𑀁 𑀲𑀻𑀮𑀸𑀦𑀺 𑀧𑀭𑀺𑀧𑀽𑀭𑁂𑀢𑀻𑀢𑀺 𑁋 𑀮𑀳𑀼𑀧𑀜𑁆𑀜𑀸. 𑀮𑀳𑀼𑀁 𑀮𑀳𑀼𑀁 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀁 𑀧𑀭𑀺𑀧𑀽𑀭𑁂𑀢𑀻𑀢𑀺 𑁋 𑀮𑀳𑀼𑀧𑀜𑁆𑀜𑀸. 𑀮𑀳𑀼𑀁 𑀮𑀳𑀼𑀁 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀁 𑀧𑀭𑀺𑀧𑀽𑀭𑁂𑀢𑀻𑀢𑀺 𑁋 𑀮𑀳𑀼𑀧𑀜𑁆𑀜𑀸. 𑀮𑀳𑀼𑀁 𑀮𑀳𑀼𑀁 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑀁 𑀧𑀭𑀺𑀧𑀽𑀭𑁂𑀢𑀻𑀢𑀺 𑁋 𑀮𑀳𑀼𑀧𑀜𑁆𑀜𑀸. 𑀮𑀳𑀼𑀁 𑀮𑀳𑀼𑀁 𑀲𑀻𑀮𑀓𑁆𑀔𑀦𑁆𑀥𑀁 …𑀧𑁂… 𑀲𑀫𑀸𑀥𑀺𑀓𑁆𑀔𑀦𑁆𑀥𑀁 … 𑀧𑀜𑁆𑀜𑀸𑀓𑁆𑀔𑀦𑁆𑀥𑀁… 𑀯𑀺𑀫𑀼𑀢𑁆𑀢𑀺𑀓𑁆𑀔𑀦𑁆𑀥𑀁… 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑀁 𑀧𑀭𑀺𑀧𑀽𑀭𑁂𑀢𑀻𑀢𑀺 𑁋 𑀮𑀳𑀼𑀧𑀜𑁆𑀜𑀸. 𑀮𑀳𑀼𑀁 𑀮𑀳𑀼𑀁 𑀞𑀸𑀦𑀸𑀝𑁆𑀞𑀸𑀦𑀸𑀦𑀺 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑁋 𑀮𑀳𑀼𑀧𑀜𑁆𑀜𑀸. 𑀮𑀳𑀼𑀁 𑀮𑀳𑀼𑀁 𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀺𑀬𑁄 𑀧𑀭𑀺𑀧𑀽𑀭𑁂𑀢𑀻𑀢𑀺 𑁋 𑀮𑀳𑀼𑀧𑀜𑁆𑀜𑀸. 𑀮𑀳𑀼𑀁 𑀮𑀳𑀼𑀁 𑀅𑀭𑀺𑀬𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑁋 𑀮𑀳𑀼𑀧𑀜𑁆𑀜𑀸. 𑀮𑀳𑀼𑀁 𑀮𑀳𑀼𑀁 𑀲𑀢𑀺𑀧𑀝𑁆𑀞𑀸𑀦𑁂 𑀪𑀸𑀯𑁂𑀢𑀻𑀢𑀺 𑁋 𑀮𑀳𑀼𑀧𑀜𑁆𑀜𑀸. 𑀮𑀳𑀼𑀁 𑀮𑀳𑀼𑀁 𑀲𑀫𑁆𑀫𑀧𑁆𑀧𑀥𑀸𑀦𑁂 𑀪𑀸𑀯𑁂𑀢𑀻𑀢𑀺 𑁋 𑀮𑀳𑀼𑀧𑀜𑁆𑀜𑀸. 𑀮𑀳𑀼𑀁 𑀮𑀳𑀼𑀁 𑀇𑀤𑁆𑀥𑀺𑀧𑀸𑀤𑁂 𑀪𑀸𑀯𑁂𑀢𑀻𑀢𑀺 𑁋 𑀮𑀳𑀼𑀧𑀜𑁆𑀜𑀸. 𑀮𑀳𑀼𑀁 𑀮𑀳𑀼𑀁 𑀇𑀦𑁆𑀤𑁆𑀭𑀺𑀬𑀸𑀦𑀺 𑀪𑀸𑀯𑁂𑀢𑀻𑀢𑀺 𑁋 𑀮𑀳𑀼𑀧𑀜𑁆𑀜𑀸. 𑀮𑀳𑀼𑀁 𑀮𑀳𑀼𑀁 𑀩𑀮𑀸𑀦𑀺 𑀪𑀸𑀯𑁂𑀢𑀻𑀢𑀺 𑁋 𑀮𑀳𑀼𑀧𑀜𑁆𑀜𑀸. 𑀮𑀳𑀼𑀁 𑀮𑀳𑀼𑀁 𑀩𑁄𑀚𑁆𑀛𑀗𑁆𑀕𑁂 𑀪𑀸𑀯𑁂𑀢𑀻𑀢𑀺 𑁋 𑀮𑀳𑀼𑀧𑀜𑁆𑀜𑀸. 𑀮𑀳𑀼𑀁 𑀮𑀳𑀼𑀁 𑀅𑀭𑀺𑀬𑀫𑀕𑁆𑀕𑀁 𑀪𑀸𑀯𑁂𑀢𑀻𑀢𑀺 𑁋 𑀮𑀳𑀼𑀧𑀜𑁆𑀜𑀸. 𑀮𑀳𑀼𑀁 𑀮𑀳𑀼𑀁 𑀲𑀸𑀫𑀜𑁆𑀜𑀨𑀮𑀸𑀦𑀺 𑀲𑀘𑁆𑀙𑀺𑀓𑀭𑁄𑀢𑀻𑀢𑀺 𑁋 𑀮𑀳𑀼𑀧𑀜𑁆𑀜𑀸. 𑀮𑀳𑀼𑀁 𑀮𑀳𑀼𑀁 𑀅𑀪𑀺𑀜𑁆𑀜𑀸𑀬𑁄 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑁋 𑀮𑀳𑀼𑀧𑀜𑁆𑀜𑀸. 𑀮𑀳𑀼𑀁 𑀮𑀳𑀼𑀁 𑀧𑀭𑀫𑀢𑁆𑀣𑀁 𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀭𑁄𑀢𑀻𑀢𑀺 𑁋 𑀮𑀳𑀼𑀧𑀜𑁆𑀜𑀸. 𑀮𑀳𑀼𑀧𑀜𑁆𑀜𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑁋 𑀅𑀬𑀁 𑀮𑀳𑀼𑀧𑀜𑁆𑀜𑀸.

𑀳𑀸𑀲𑀧𑀜𑁆𑀜𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀓𑀢𑀫𑀸 𑀳𑀸𑀲𑀧𑀜𑁆𑀜𑀸? 𑀇𑀥𑁂𑀓𑀘𑁆𑀘𑁄 𑀳𑀸𑀲𑀩𑀳𑀼𑀮𑁄 𑀯𑁂𑀤𑀩𑀳𑀼𑀮𑁄 𑀢𑀼𑀝𑁆𑀞𑀺𑀩𑀳𑀼𑀮𑁄 𑀧𑀸𑀫𑁄𑀚𑁆𑀚𑀩𑀳𑀼𑀮𑁄 𑀲𑀻𑀮𑀸𑀦𑀺 𑀧𑀭𑀺𑀧𑀽𑀭𑁂𑀢𑀻𑀢𑀺 𑁋 𑀳𑀸𑀲𑀧𑀜𑁆𑀜𑀸. 𑀳𑀸𑀲𑀩𑀳𑀼𑀮𑁄 𑀯𑁂𑀤𑀩𑀳𑀼𑀮𑁄 𑀢𑀼𑀝𑁆𑀞𑀺𑀩𑀳𑀼𑀮𑁄 𑀧𑀸𑀫𑁄𑀚𑁆𑀚𑀩𑀳𑀼𑀮𑁄 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀁 𑀧𑀭𑀺𑀧𑀽𑀭𑁂𑀢𑀻𑀢𑀺 𑁋 𑀳𑀸𑀲𑀧𑀜𑁆𑀜𑀸. 𑀳𑀸𑀲𑀩𑀳𑀼𑀮𑁄 𑀯𑁂𑀤𑀩𑀳𑀼𑀮𑁄 𑀢𑀼𑀝𑁆𑀞𑀺𑀩𑀳𑀼𑀮𑁄 𑀧𑀸𑀫𑁄𑀚𑁆𑀚𑀩𑀳𑀼𑀮𑁄 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀁 𑀧𑀭𑀺𑀧𑀽𑀭𑁂𑀢𑀻𑀢𑀺 𑁋 𑀳𑀸𑀲𑀧𑀜𑁆𑀜𑀸. 𑀳𑀸𑀲𑀩𑀳𑀼𑀮𑁄 𑀯𑁂𑀤𑀩𑀳𑀼𑀮𑁄 𑀢𑀼𑀝𑁆𑀞𑀺𑀩𑀳𑀼𑀮𑁄 𑀧𑀸𑀫𑁄𑀚𑁆𑀚𑀩𑀳𑀼𑀮𑁄 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑀁 𑀧𑀭𑀺𑀧𑀽𑀭𑁂𑀢𑀻𑀢𑀺 𑁋 𑀳𑀸𑀲𑀧𑀜𑁆𑀜𑀸. 𑀳𑀸𑀲𑀩𑀳𑀼𑀮𑁄 𑀯𑁂𑀤𑀩𑀳𑀼𑀮𑁄 𑀢𑀼𑀝𑁆𑀞𑀺𑀩𑀳𑀼𑀮𑁄 𑀧𑀸𑀫𑁄𑀚𑁆𑀚𑀩𑀳𑀼𑀮𑁄 𑀲𑀻𑀮𑀓𑁆𑀔𑀦𑁆𑀥𑀁…𑀧𑁂… 𑀲𑀫𑀸𑀥𑀺𑀓𑁆𑀔𑀦𑁆𑀥𑀁… 𑀧𑀜𑁆𑀜𑀸𑀓𑁆𑀔𑀦𑁆𑀥𑀁… 𑀯𑀺𑀫𑀼𑀢𑁆𑀢𑀺𑀓𑁆𑀔𑀦𑁆𑀥𑀁… 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑀁 𑀧𑀭𑀺𑀧𑀽𑀭𑁂𑀢𑀻𑀢𑀺…𑀧𑁂… 𑀞𑀸𑀦𑀸𑀝𑁆𑀞𑀸𑀦𑀸𑀦𑀺 𑀧𑀝𑀺𑀯𑀺𑀚𑁆𑀛𑀢𑀻𑀢𑀺… 𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀺𑀬𑁄 𑀧𑀭𑀺𑀧𑀽𑀭𑁂𑀢𑀻𑀢𑀺 … 𑀅𑀭𑀺𑀬𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀚𑁆𑀛𑀢𑀻𑀢𑀺… 𑀲𑀢𑀺𑀧𑀝𑁆𑀞𑀸𑀦𑁂 𑀪𑀸𑀯𑁂𑀢𑀻𑀢𑀺… 𑀲𑀫𑁆𑀫𑀧𑁆𑀧𑀥𑀸𑀦𑁂 𑀪𑀸𑀯𑁂𑀢𑀻𑀢𑀺… 𑀇𑀤𑁆𑀥𑀺𑀧𑀸𑀤𑁂 𑀪𑀸𑀯𑁂𑀢𑀻𑀢𑀺… 𑀇𑀦𑁆𑀤𑁆𑀭𑀺𑀬𑀸𑀦𑀺 𑀪𑀸𑀯𑁂𑀢𑀻𑀢𑀺… 𑀩𑀮𑀸𑀦𑀺 𑀪𑀸𑀯𑁂𑀢𑀻𑀢𑀺… 𑀩𑁄𑀚𑁆𑀛𑀗𑁆𑀕𑁂 𑀪𑀸𑀯𑁂𑀢𑀻𑀢𑀺 … 𑀅𑀭𑀺𑀬𑀫𑀕𑁆𑀕𑀁 𑀪𑀸𑀯𑁂𑀢𑀻𑀢𑀺…𑀧𑁂… 𑀲𑀸𑀫𑀜𑁆𑀜𑀨𑀮𑀸𑀦𑀺 𑀲𑀘𑁆𑀙𑀺𑀓𑀭𑁄𑀢𑀻𑀢𑀺 𑁋 𑀳𑀸𑀲𑀧𑀜𑁆𑀜𑀸. 𑀳𑀸𑀲𑀩𑀳𑀼𑀮𑁄 𑀯𑁂𑀤𑀩𑀳𑀼𑀮𑁄 𑀢𑀼𑀝𑁆𑀞𑀺𑀩𑀳𑀼𑀮𑁄 𑀧𑀸𑀫𑁄𑀚𑁆𑀚𑀩𑀳𑀼𑀮𑁄 𑀅𑀪𑀺𑀜𑁆𑀜𑀸𑀬𑁄 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑁋 𑀳𑀸𑀲𑀧𑀜𑁆𑀜𑀸. 𑀳𑀸𑀲𑀩𑀳𑀼𑀮𑁄 𑀯𑁂𑀤𑀩𑀳𑀼𑀮𑁄 𑀢𑀼𑀝𑁆𑀞𑀺𑀩𑀳𑀼𑀮𑁄 𑀧𑀸𑀫𑁄𑀚𑁆𑀚𑀩𑀳𑀼𑀮𑁄 𑀧𑀭𑀫𑀢𑁆𑀣𑀁 𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀭𑁄𑀢𑀻𑀢𑀺 𑁋 𑀳𑀸𑀲𑀧𑀜𑁆𑀜𑀸. 𑀳𑀸𑀲𑀧𑀜𑁆𑀜𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑁋 𑀅𑀬𑀁 𑀳𑀸𑀲𑀧𑀜𑁆𑀜𑀸.

𑁭. 𑀚𑀯𑀦𑀧𑀜𑁆𑀜𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀓𑀢𑀫𑀸 𑀚𑀯𑀦𑀧𑀜𑁆𑀜𑀸? 𑀬𑀁 𑀓𑀺𑀜𑁆𑀘𑀺 𑀭𑀽𑀧𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀑𑀴𑀸𑀭𑀺𑀓𑀁 𑀯𑀸 𑀲𑀼𑀔𑀼𑀫𑀁 𑀯𑀸 𑀳𑀻𑀦𑀁 𑀯𑀸 𑀧𑀡𑀻𑀢𑀁 𑀯𑀸 𑀬𑀁 𑀤𑀽𑀭𑁂 𑀲𑀦𑁆𑀢𑀺𑀓𑁂 𑀯𑀸, 𑀲𑀩𑁆𑀩𑀁 𑀭𑀽𑀧𑀁 𑀅𑀦𑀺𑀘𑁆𑀘𑀢𑁄 𑀔𑀺𑀧𑁆𑀧𑀁 𑀚𑀯𑀢𑀻𑀢𑀺 𑁋 𑀚𑀯𑀦𑀧𑀜𑁆𑀜𑀸. 𑀤𑀼𑀓𑁆𑀔𑀢𑁄 𑀔𑀺𑀧𑁆𑀧𑀁 𑀚𑀯𑀢𑀻𑀢𑀺 𑁋 𑀚𑀯𑀦𑀧𑀜𑁆𑀜𑀸. 𑀅𑀦𑀢𑁆𑀢𑀢𑁄 𑀔𑀺𑀧𑁆𑀧𑀁 𑀚𑀯𑀢𑀻𑀢𑀺 𑁋 𑀚𑀯𑀦𑀧𑀜𑁆𑀜𑀸. 𑀬𑀸 𑀓𑀸𑀘𑀺 𑀯𑁂𑀤𑀦𑀸…𑀧𑁂… 𑀬𑀸 𑀓𑀸𑀘𑀺 𑀲𑀜𑁆𑀜𑀸… 𑀬𑁂 𑀓𑁂𑀘𑀺 𑀲𑀗𑁆𑀔𑀸𑀭𑀸… 𑀬𑀁 𑀓𑀺𑀜𑁆𑀘𑀺 𑀯𑀺𑀜𑁆𑀜𑀸𑀡𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀑𑀴𑀸𑀭𑀺𑀓𑀁 𑀯𑀸 𑀲𑀼𑀔𑀼𑀫𑀁 𑀯𑀸 𑀳𑀻𑀦𑀁 𑀯𑀸 𑀧𑀡𑀻𑀢𑀁 𑀯𑀸 𑀬𑀁 𑀤𑀽𑀭𑁂 𑀲𑀦𑁆𑀢𑀺𑀓𑁂 𑀯𑀸, 𑀲𑀩𑁆𑀩𑀁 𑀯𑀺𑀜𑁆𑀜𑀸𑀡𑀁 𑀅𑀦𑀺𑀘𑁆𑀘𑀢𑁄 𑀔𑀺𑀧𑁆𑀧𑀁 𑀚𑀯𑀢𑀻𑀢𑀺 𑁋 𑀚𑀯𑀦𑀧𑀜𑁆𑀜𑀸. 𑀤𑀼𑀓𑁆𑀔𑀢𑁄 𑀔𑀺𑀧𑁆𑀧𑀁 𑀚𑀯𑀢𑀻𑀢𑀺 𑁋 𑀚𑀯𑀦𑀧𑀜𑁆𑀜𑀸. 𑀅𑀦𑀢𑁆𑀢𑀢𑁄 𑀔𑀺𑀧𑁆𑀧𑀁 𑀚𑀯𑀢𑀻𑀢𑀺 𑁋 𑀚𑀯𑀦𑀧𑀜𑁆𑀜𑀸. 𑀘𑀓𑁆𑀔𑀼…𑀧𑁂… 𑀚𑀭𑀸𑀫𑀭𑀡𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀦𑀺𑀘𑁆𑀘𑀢𑁄 𑀔𑀺𑀧𑁆𑀧𑀁 𑀚𑀯𑀢𑀻𑀢𑀺 𑁋 𑀚𑀯𑀦𑀧𑀜𑁆𑀜𑀸. 𑀤𑀼𑀓𑁆𑀔𑀢𑁄 𑀔𑀺𑀧𑁆𑀧𑀁 𑀚𑀯𑀢𑀻𑀢𑀺 𑁋 𑀚𑀯𑀦𑀧𑀜𑁆𑀜𑀸. 𑀅𑀦𑀢𑁆𑀢𑀢𑁄 𑀔𑀺𑀧𑁆𑀧𑀁 𑀚𑀯𑀢𑀻𑀢𑀺 𑁋 𑀚𑀯𑀦𑀧𑀜𑁆𑀜𑀸.

𑀭𑀽𑀧𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀦𑀺𑀘𑁆𑀘𑀁 𑀔𑀬𑀝𑁆𑀞𑁂𑀦 𑀤𑀼𑀓𑁆𑀔𑀁 𑀪𑀬𑀝𑁆𑀞𑁂𑀦 𑀅𑀦𑀢𑁆𑀢𑀸 𑀅𑀲𑀸𑀭𑀓𑀝𑁆𑀞𑁂𑀦𑀸𑀢𑀺 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸 𑀭𑀽𑀧𑀦𑀺𑀭𑁄𑀥𑁂 𑀦𑀺𑀩𑁆𑀩𑀸𑀦𑁂 𑀔𑀺𑀧𑁆𑀧𑀁 𑀚𑀯𑀢𑀻𑀢𑀺 𑁋 𑀚𑀯𑀦𑀧𑀜𑁆𑀜𑀸. 𑀯𑁂𑀤𑀦𑀸…𑀧𑁂… 𑀲𑀜𑁆𑀜𑀸… 𑀲𑀗𑁆𑀔𑀸𑀭𑀸… 𑀯𑀺𑀜𑁆𑀜𑀸𑀡𑀁… 𑀘𑀓𑁆𑀔𑀼…𑀧𑁂… 𑀚𑀭𑀸𑀫𑀭𑀡𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀦𑀺𑀘𑁆𑀘𑀁 𑀔𑀬𑀝𑁆𑀞𑁂𑀦 𑀤𑀼𑀓𑁆𑀔𑀁 𑀪𑀬𑀝𑁆𑀞𑁂𑀦 𑀅𑀦𑀢𑁆𑀢𑀸 𑀅𑀲𑀸𑀭𑀓𑀝𑁆𑀞𑁂𑀦𑀸𑀢𑀺 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸 𑀚𑀭𑀸𑀫𑀭𑀡𑀦𑀺𑀭𑁄𑀥𑁂 [𑀚𑀭𑀸𑀫𑀭𑀡𑀁 𑀭𑀽𑀧𑀦𑀺𑀭𑁄𑀥𑁂 (𑀲𑁆𑀬𑀸.)] 𑀦𑀺𑀩𑁆𑀩𑀸𑀦𑁂 𑀔𑀺𑀧𑁆𑀧𑀁 𑀚𑀯𑀢𑀻𑀢𑀺 𑁋 𑀚𑀯𑀦𑀧𑀜𑁆𑀜𑀸.

𑀭𑀽𑀧𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀦𑀺𑀘𑁆𑀘𑀁 𑀲𑀗𑁆𑀔𑀢𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀔𑀬𑀥𑀫𑁆𑀫𑀁 𑀯𑀬𑀥𑀫𑁆𑀫𑀁 𑀯𑀺𑀭𑀸𑀕𑀥𑀫𑁆𑀫𑀁 𑀦𑀺𑀭𑁄𑀥𑀥𑀫𑁆𑀫𑀦𑁆𑀢𑀺 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸 𑀭𑀽𑀧𑀦𑀺𑀭𑁄𑀥𑁂 𑀦𑀺𑀩𑁆𑀩𑀸𑀦𑁂 𑀔𑀺𑀧𑁆𑀧𑀁 𑀚𑀯𑀢𑀻𑀢𑀺 𑁋 𑀚𑀯𑀦𑀧𑀜𑁆𑀜𑀸. 𑀯𑁂𑀤𑀦𑀸…𑀧𑁂… 𑀲𑀜𑁆𑀜𑀸… 𑀲𑀗𑁆𑀔𑀸𑀭𑀸… 𑀯𑀺𑀜𑁆𑀜𑀸𑀡𑀁… 𑀘𑀓𑁆𑀔𑀼…𑀧𑁂… 𑀚𑀭𑀸𑀫𑀭𑀡𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀦𑀺𑀘𑁆𑀘𑀁 𑀲𑀗𑁆𑀔𑀢𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀔𑀬𑀥𑀫𑁆𑀫𑀁 𑀯𑀬𑀥𑀫𑁆𑀫𑀁 𑀯𑀺𑀭𑀸𑀕𑀥𑀫𑁆𑀫𑀁 𑀦𑀺𑀭𑁄𑀥𑀥𑀫𑁆𑀫𑀦𑁆𑀢𑀺 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸 𑀚𑀭𑀸𑀫𑀭𑀡𑀦𑀺𑀭𑁄𑀥𑁂 𑀦𑀺𑀩𑁆𑀩𑀸𑀦𑁂 𑀔𑀺𑀧𑁆𑀧𑀁 𑀚𑀯𑀢𑀻𑀢𑀺 𑁋 𑀚𑀯𑀦𑀧𑀜𑁆𑀜𑀸. 𑀚𑀯𑀦𑀧𑀜𑁆𑀜𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑁋 𑀅𑀬𑀁 𑀚𑀯𑀦𑀧𑀜𑁆𑀜𑀸.

𑀢𑀺𑀓𑁆𑀔𑀧𑀜𑁆𑀜𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀓𑀢𑀫𑀸 𑀢𑀺𑀓𑁆𑀔𑀧𑀜𑁆𑀜𑀸? 𑀔𑀺𑀧𑁆𑀧𑀁 𑀓𑀺𑀮𑁂𑀲𑁂 𑀙𑀺𑀦𑁆𑀤𑀢𑀻𑀢𑀺 𑁋 𑀢𑀺𑀓𑁆𑀔𑀧𑀜𑁆𑀜𑀸. 𑀉𑀧𑁆𑀧𑀦𑁆𑀦𑀁 𑀓𑀸𑀫𑀯𑀺𑀢𑀓𑁆𑀓𑀁 𑀦𑀸𑀥𑀺𑀯𑀸𑀲𑁂𑀢𑀺 𑀧𑀚𑀳𑀢𑀺 𑀯𑀺𑀦𑁄𑀤𑁂𑀢𑀺 𑀩𑁆𑀬𑀦𑁆𑀢𑀻𑀓𑀭𑁄𑀢𑀺 [𑀩𑁆𑀬𑀦𑁆𑀢𑀺𑀁 𑀓𑀭𑁄𑀢𑀺 (𑀓.)] 𑀅𑀦𑀪𑀸𑀯𑀁 𑀕𑀫𑁂𑀢𑀻𑀢𑀺 𑁋 𑀢𑀺𑀓𑁆𑀔𑀧𑀜𑁆𑀜𑀸. 𑀉𑀧𑁆𑀧𑀦𑁆𑀦𑀁 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑀁 𑀦𑀸𑀥𑀺𑀯𑀸𑀲𑁂𑀢𑀺 𑀧𑀚𑀳𑀢𑀺 𑀯𑀺𑀦𑁄𑀤𑁂𑀢𑀺 𑀩𑁆𑀬𑀦𑁆𑀢𑀻𑀓𑀭𑁄𑀢𑀺 𑀅𑀦𑀪𑀸𑀯𑀁 𑀕𑀫𑁂𑀢𑀻𑀢𑀺 𑁋 𑀢𑀺𑀓𑁆𑀔𑀧𑀜𑁆𑀜𑀸. 𑀉𑀧𑁆𑀧𑀦𑁆𑀦𑀁 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑀁 𑀦𑀸𑀥𑀺𑀯𑀸𑀲𑁂𑀢𑀺…𑀧𑁂… 𑀉𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑁂 𑀧𑀸𑀧𑀓𑁂 𑀅𑀓𑀼𑀲𑀮𑁂 𑀥𑀫𑁆𑀫𑁂 𑀦𑀸𑀥𑀺𑀯𑀸𑀲𑁂𑀢𑀺 𑀧𑀚𑀳𑀢𑀺 𑀯𑀺𑀦𑁄𑀤𑁂𑀢𑀺 𑀩𑁆𑀬𑀦𑁆𑀢𑀻𑀓𑀭𑁄𑀢𑀺 𑀅𑀦𑀪𑀸𑀯𑀁 𑀕𑀫𑁂𑀢𑀻𑀢𑀺 𑁋 𑀢𑀺𑀓𑁆𑀔𑀧𑀜𑁆𑀜𑀸. 𑀉𑀧𑁆𑀧𑀦𑁆𑀦𑀁 𑀭𑀸𑀕𑀁 𑀦𑀸𑀥𑀺𑀯𑀸𑀲𑁂𑀢𑀺 𑀧𑀚𑀳𑀢𑀺 𑀯𑀺𑀦𑁄𑀤𑁂𑀢𑀺 𑀩𑁆𑀬𑀦𑁆𑀢𑀻𑀓𑀭𑁄𑀢𑀺 𑀅𑀦𑀪𑀸𑀯𑀁 𑀕𑀫𑁂𑀢𑀻𑀢𑀺 𑁋 𑀢𑀺𑀓𑁆𑀔𑀧𑀜𑁆𑀜𑀸. 𑀉𑀧𑁆𑀧𑀦𑁆𑀦𑀁 𑀤𑁄𑀲𑀁…𑀧𑁂… 𑀉𑀧𑁆𑀧𑀦𑁆𑀦𑀁 𑀫𑁄𑀳𑀁 … 𑀉𑀧𑁆𑀧𑀦𑁆𑀦𑀁 𑀓𑁄𑀥𑀁… 𑀉𑀧𑁆𑀧𑀦𑁆𑀦𑀁 𑀉𑀧𑀦𑀸𑀳𑀁… 𑀫𑀓𑁆𑀔𑀁… 𑀧𑀴𑀸𑀲𑀁… 𑀇𑀲𑁆𑀲𑀁… 𑀫𑀘𑁆𑀙𑀭𑀺𑀬𑀁… 𑀫𑀸𑀬𑀁… 𑀲𑀸𑀞𑁂𑀬𑁆𑀬𑀁… 𑀣𑀫𑁆𑀪𑀁… 𑀲𑀸𑀭𑀫𑁆𑀪𑀁… 𑀫𑀸𑀦𑀁… 𑀅𑀢𑀺𑀫𑀸𑀦𑀁… 𑀫𑀤𑀁… 𑀧𑀫𑀸𑀤𑀁… 𑀲𑀩𑁆𑀩𑁂 𑀓𑀺𑀮𑁂𑀲𑁂… 𑀲𑀩𑁆𑀩𑁂 𑀤𑀼𑀘𑁆𑀘𑀭𑀺𑀢𑁂… 𑀲𑀩𑁆𑀩𑁂 𑀅𑀪𑀺𑀲𑀗𑁆𑀔𑀸𑀭𑁂…𑀧𑁂… 𑀲𑀩𑁆𑀩𑁂 𑀪𑀯𑀕𑀸𑀫𑀺𑀓𑀫𑁆𑀫𑁂 𑀦𑀸𑀥𑀺𑀯𑀸𑀲𑁂𑀢𑀺 𑀧𑀚𑀳𑀢𑀺 𑀯𑀺𑀦𑁄𑀤𑁂𑀢𑀺 𑀩𑁆𑀬𑀦𑁆𑀢𑀻𑀓𑀭𑁄𑀢𑀺 𑀅𑀦𑀪𑀸𑀯𑀁 𑀕𑀫𑁂𑀢𑀻𑀢𑀺 𑁋 𑀢𑀺𑀓𑁆𑀔𑀧𑀜𑁆𑀜𑀸. 𑀏𑀓𑀲𑁆𑀫𑀺𑀁 𑀆𑀲𑀦𑁂 𑀘𑀢𑁆𑀢𑀸𑀭𑁄 𑀘 𑀅𑀭𑀺𑀬𑀫𑀕𑁆𑀕𑀸 𑀘𑀢𑁆𑀢𑀸𑀭𑀺 𑀘 𑀲𑀸𑀫𑀜𑁆𑀜𑀨𑀮𑀸𑀦𑀺 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸𑀬𑁄 𑀙 𑀅𑀪𑀺𑀜𑁆𑀜𑀸𑀬𑁄 𑀅𑀥𑀺𑀕𑀢𑀸 𑀳𑁄𑀦𑁆𑀢𑀺 𑀲𑀘𑁆𑀙𑀺𑀓𑀢𑀸 𑀨𑀲𑁆𑀲𑀺𑀢𑀸 𑀧𑀜𑁆𑀜𑀸𑀬𑀸𑀢𑀺 𑁋 𑀢𑀺𑀓𑁆𑀔𑀧𑀜𑁆𑀜𑀸. 𑀢𑀺𑀓𑁆𑀔𑀧𑀜𑁆𑀜𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑁋 𑀅𑀬𑀁 𑀢𑀺𑀓𑁆𑀔𑀧𑀜𑁆𑀜𑀸.

𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀓𑀢𑀫𑀸 𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑀸? 𑀇𑀥𑁂𑀓𑀘𑁆𑀘𑁄 𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼 𑀉𑀩𑁆𑀩𑁂𑀕𑀩𑀳𑀼𑀮𑁄 𑀳𑁄𑀢𑀺 𑀉𑀢𑁆𑀢𑀸𑀲𑀩𑀳𑀼𑀮𑁄 𑀉𑀓𑁆𑀓𑀡𑁆𑀞𑀦𑀩𑀳𑀼𑀮𑁄 𑀅𑀭𑀢𑀺𑀩𑀳𑀼𑀮𑁄 𑀅𑀦𑀪𑀺𑀭𑀢𑀺𑀩𑀳𑀼𑀮𑁄. 𑀩𑀳𑀺𑀫𑀼𑀔𑁄 𑀦 𑀭𑀫𑀢𑀺 𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼. 𑀅𑀦𑀺𑀩𑁆𑀩𑀺𑀤𑁆𑀥𑀧𑀼𑀩𑁆𑀩𑀁 𑀅𑀧𑁆𑀧𑀤𑀸𑀮𑀺𑀢𑀧𑀼𑀩𑁆𑀩𑀁 𑀮𑁄𑀪𑀓𑁆𑀔𑀦𑁆𑀥𑀁 𑀦𑀺𑀩𑁆𑀩𑀺𑀚𑁆𑀛𑀢𑀺 𑀧𑀤𑀸𑀮𑁂𑀢𑀻𑀢𑀺 𑁋 𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑀸. 𑀅𑀦𑀺𑀩𑁆𑀩𑀺𑀤𑁆𑀥𑀧𑀼𑀩𑁆𑀩𑀁 𑀅𑀧𑁆𑀧𑀤𑀸𑀮𑀺𑀢𑀧𑀼𑀩𑁆𑀩𑀁 𑀤𑁄𑀲𑀓𑁆𑀔𑀦𑁆𑀥𑀁 𑀦𑀺𑀩𑁆𑀩𑀺𑀚𑁆𑀛𑀢𑀺 𑀧𑀤𑀸𑀮𑁂𑀢𑀻𑀢𑀺 𑁋 𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑀸. 𑀅𑀦𑀺𑀩𑁆𑀩𑀺𑀤𑁆𑀥𑀧𑀼𑀩𑁆𑀩𑀁 𑀅𑀧𑁆𑀧𑀤𑀸𑀮𑀺𑀢𑀧𑀼𑀩𑁆𑀩𑀁 𑀫𑁄𑀳𑀓𑁆𑀔𑀦𑁆𑀥𑀁 𑀦𑀺𑀩𑁆𑀩𑀺𑀚𑁆𑀛𑀢𑀺 𑀧𑀤𑀸𑀮𑁂𑀢𑀻𑀢𑀺 𑁋 𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑀸. 𑀅𑀦𑀺𑀩𑁆𑀩𑀺𑀤𑁆𑀥𑀧𑀼𑀩𑁆𑀩𑀁 𑀅𑀧𑁆𑀧𑀤𑀸𑀮𑀺𑀢𑀧𑀼𑀩𑁆𑀩𑀁 𑀓𑁄𑀥𑀁…𑀧𑁂… 𑀉𑀧𑀦𑀸𑀳𑀁… 𑀫𑀓𑁆𑀔𑀁… 𑀧𑀴𑀸𑀲𑀁… 𑀇𑀲𑁆𑀲𑀁… 𑀫𑀘𑁆𑀙𑀭𑀺𑀬𑀁… 𑀫𑀸𑀬𑀁… 𑀲𑀸𑀞𑁂𑀬𑁆𑀬𑀁… 𑀣𑀫𑁆𑀪𑀁… 𑀲𑀸𑀭𑀫𑁆𑀪𑀁… 𑀫𑀸𑀦𑀁… 𑀅𑀢𑀺𑀫𑀸𑀦𑀁… 𑀫𑀤𑀁… 𑀧𑀫𑀸𑀤𑀁… 𑀲𑀩𑁆𑀩𑁂 𑀓𑀺𑀮𑁂𑀲𑁂… 𑀲𑀩𑁆𑀩𑁂 𑀤𑀼𑀘𑁆𑀘𑀭𑀺𑀢𑁂… 𑀲𑀩𑁆𑀩𑁂 𑀅𑀪𑀺𑀲𑀗𑁆𑀔𑀸𑀭𑁂…𑀧𑁂… 𑀲𑀩𑁆𑀩𑁂 𑀪𑀯𑀕𑀸𑀫𑀺𑀓𑀫𑁆𑀫𑁂 𑀦𑀺𑀩𑁆𑀩𑀺𑀚𑁆𑀛𑀢𑀺 𑀧𑀤𑀸𑀮𑁂𑀢𑀻𑀢𑀺 𑁋 𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑀸. 𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑁋 𑀅𑀬𑀁 𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑀸.

𑀇𑀫𑀸 𑀲𑁄𑀴𑀲 𑀧𑀜𑁆𑀜𑀸𑀬𑁄. 𑀇𑀫𑀸𑀳𑀺 𑀲𑁄𑀴𑀲𑀳𑀺 𑀧𑀜𑁆𑀜𑀸𑀳𑀺 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀧𑀝𑀺𑀲𑀫𑁆𑀪𑀺𑀤𑀧𑁆𑀧𑀢𑁆𑀢𑁄.

𑁨. 𑀧𑀼𑀕𑁆𑀕𑀮𑀯𑀺𑀲𑁂𑀲𑀦𑀺𑀤𑁆𑀤𑁂𑀲𑁄

𑁮. 𑀤𑁆𑀯𑁂 𑀧𑀼𑀕𑁆𑀕𑀮𑀸 𑀧𑀝𑀺𑀲𑀫𑁆𑀪𑀺𑀤𑀧𑁆𑀧𑀢𑁆𑀢𑀸 𑁋 𑀏𑀓𑁄 𑀧𑀼𑀩𑁆𑀩𑀬𑁄𑀕𑀲𑀫𑁆𑀧𑀦𑁆𑀦𑁄, 𑀏𑀓𑁄 𑀦 𑀧𑀼𑀩𑁆𑀩𑀬𑁄𑀕𑀲𑀫𑁆𑀧𑀦𑁆𑀦𑁄. 𑀬𑁄 𑀧𑀼𑀩𑁆𑀩𑀬𑁄𑀕𑀲𑀫𑁆𑀧𑀦𑁆𑀦𑁄 𑀲𑁄 𑀢𑁂𑀦 𑀅𑀢𑀺𑀭𑁂𑀓𑁄 𑀳𑁄𑀢𑀺, 𑀅𑀥𑀺𑀓𑁄 𑀳𑁄𑀢𑀺, 𑀯𑀺𑀲𑁂𑀲𑁄 𑀳𑁄𑀢𑀺. 𑀢𑀲𑁆𑀲 𑀜𑀸𑀡𑀁 𑀧𑀪𑀺𑀚𑁆𑀚𑀢𑀺.

𑀤𑁆𑀯𑁂 𑀧𑀼𑀕𑁆𑀕𑀮𑀸 𑀧𑀝𑀺𑀲𑀫𑁆𑀪𑀺𑀤𑀧𑁆𑀧𑀢𑁆𑀢𑀸, 𑀤𑁆𑀯𑁂𑀧𑀺 𑀧𑀼𑀩𑁆𑀩𑀬𑁄𑀕𑀲𑀫𑁆𑀧𑀦𑁆𑀦𑀸 𑁋 𑀏𑀓𑁄 𑀩𑀳𑀼𑀲𑁆𑀲𑀼𑀢𑁄, 𑀏𑀓𑁄 𑀦 𑀩𑀳𑀼𑀲𑁆𑀲𑀼𑀢𑁄. 𑀬𑁄 𑀩𑀳𑀼𑀲𑁆𑀲𑀼𑀢𑁄, 𑀲𑁄 𑀢𑁂𑀦 𑀅𑀢𑀺𑀭𑁂𑀓𑁄 𑀳𑁄𑀢𑀺, 𑀅𑀥𑀺𑀓𑁄 𑀳𑁄𑀢𑀺, 𑀯𑀺𑀲𑁂𑀲𑁄 𑀳𑁄𑀢𑀺. 𑀢𑀲𑁆𑀲 𑀜𑀸𑀡𑀁 𑀧𑀪𑀺𑀚𑁆𑀚𑀢𑀺.

𑀤𑁆𑀯𑁂 𑀧𑀼𑀕𑁆𑀕𑀮𑀸 𑀧𑀝𑀺𑀲𑀫𑁆𑀪𑀺𑀤𑀧𑁆𑀧𑀢𑁆𑀢𑀸, 𑀤𑁆𑀯𑁂𑀧𑀺 𑀧𑀼𑀩𑁆𑀩𑀬𑁄𑀕𑀲𑀫𑁆𑀧𑀦𑁆𑀦𑀸, 𑀤𑁆𑀯𑁂𑀧𑀺 𑀩𑀳𑀼𑀲𑁆𑀲𑀼𑀢𑀸 𑁋 𑀏𑀓𑁄 𑀤𑁂𑀲𑀦𑀸𑀩𑀳𑀼𑀮𑁄, 𑀏𑀓𑁄 𑀦 𑀤𑁂𑀲𑀦𑀸𑀩𑀳𑀼𑀮𑁄. 𑀬𑁄 𑀤𑁂𑀲𑀦𑀸𑀩𑀳𑀼𑀮𑁄, 𑀲𑁄 𑀢𑁂𑀦 𑀅𑀢𑀺𑀭𑁂𑀓𑁄 𑀳𑁄𑀢𑀺, 𑀅𑀥𑀺𑀓𑁄 𑀳𑁄𑀢𑀺, 𑀯𑀺𑀲𑁂𑀲𑁄 𑀳𑁄𑀢𑀺. 𑀢𑀲𑁆𑀲 𑀜𑀸𑀡𑀁 𑀧𑀪𑀺𑀚𑁆𑀚𑀢𑀺.

𑀤𑁆𑀯𑁂 𑀧𑀼𑀕𑁆𑀕𑀮𑀸 𑀧𑀝𑀺𑀲𑀫𑁆𑀪𑀺𑀤𑀧𑁆𑀧𑀢𑁆𑀢𑀸, 𑀤𑁆𑀯𑁂𑀧𑀺 𑀧𑀼𑀩𑁆𑀩𑀬𑁄𑀕𑀲𑀫𑁆𑀧𑀦𑁆𑀦𑀸, 𑀤𑁆𑀯𑁂𑀧𑀺 𑀩𑀳𑀼𑀲𑁆𑀲𑀼𑀢𑀸, 𑀤𑁆𑀯𑁂𑀧𑀺 𑀤𑁂𑀲𑀦𑀸𑀩𑀳𑀼𑀮𑀸 𑁋 𑀏𑀓𑁄 𑀕𑀭𑀽𑀧𑀦𑀺𑀲𑁆𑀲𑀺𑀢𑁄, 𑀏𑀓𑁄 𑀦 𑀕𑀭𑀽𑀧𑀦𑀺𑀲𑁆𑀲𑀺𑀢𑁄. 𑀬𑁄 𑀕𑀭𑀽𑀧𑀦𑀺𑀲𑁆𑀲𑀺𑀢𑁄, 𑀲𑁄 𑀢𑁂𑀦 𑀅𑀢𑀺𑀭𑁂𑀓𑁄 𑀳𑁄𑀢𑀺, 𑀅𑀥𑀺𑀓𑁄 𑀳𑁄𑀢𑀺, 𑀯𑀺𑀲𑁂𑀲𑁄 𑀳𑁄𑀢𑀺. 𑀢𑀲𑁆𑀲 𑀜𑀸𑀡𑀁 𑀧𑀪𑀺𑀚𑁆𑀚𑀢𑀺.

𑀤𑁆𑀯𑁂 𑀧𑀼𑀕𑁆𑀕𑀮𑀸 𑀧𑀝𑀺𑀲𑀫𑁆𑀪𑀺𑀤𑀧𑁆𑀧𑀢𑁆𑀢𑀸, 𑀤𑁆𑀯𑁂𑀧𑀺 𑀧𑀼𑀩𑁆𑀩𑀬𑁄𑀕𑀲𑀫𑁆𑀧𑀦𑁆𑀦𑀸, 𑀤𑁆𑀯𑁂𑀧𑀺 𑀩𑀳𑀼𑀲𑁆𑀲𑀼𑀢𑀸, 𑀤𑁆𑀯𑁂𑀧𑀺 𑀤𑁂𑀲𑀦𑀸𑀩𑀳𑀼𑀮𑀸, 𑀤𑁆𑀯𑁂𑀧𑀺 𑀕𑀭𑀽𑀧𑀦𑀺𑀲𑁆𑀲𑀺𑀢𑀸 𑁋 𑀏𑀓𑁄 𑀯𑀺𑀳𑀸𑀭𑀩𑀳𑀼𑀮𑁄, 𑀏𑀓𑁄 𑀦 𑀯𑀺𑀳𑀸𑀭𑀩𑀳𑀼𑀮𑁄. 𑀬𑁄 𑀯𑀺𑀳𑀸𑀭𑀩𑀳𑀼𑀮𑁄, 𑀲𑁄 𑀢𑁂𑀦 𑀅𑀢𑀺𑀭𑁂𑀓𑁄 𑀳𑁄𑀢𑀺, 𑀅𑀥𑀺𑀓𑁄 𑀳𑁄𑀢𑀺, 𑀯𑀺𑀲𑁂𑀲𑁄 𑀳𑁄𑀢𑀺. 𑀢𑀲𑁆𑀲 𑀜𑀸𑀡𑀁 𑀧𑀪𑀺𑀚𑁆𑀚𑀢𑀺.

𑀤𑁆𑀯𑁂 𑀧𑀼𑀕𑁆𑀕𑀮𑀸 𑀧𑀝𑀺𑀲𑀫𑁆𑀪𑀺𑀤𑀧𑁆𑀧𑀢𑁆𑀢𑀸, 𑀤𑁆𑀯𑁂𑀧𑀺 𑀧𑀼𑀩𑁆𑀩𑀬𑁄𑀕𑀲𑀫𑁆𑀧𑀦𑁆𑀦𑀸, 𑀤𑁆𑀯𑁂𑀧𑀺 𑀩𑀳𑀼𑀲𑁆𑀲𑀼𑀢𑀸, 𑀤𑁆𑀯𑁂𑀧𑀺 𑀤𑁂𑀲𑀦𑀸𑀩𑀳𑀼𑀮𑀸, 𑀤𑁆𑀯𑁂𑀧𑀺 𑀕𑀭𑀽𑀧𑀦𑀺𑀲𑁆𑀲𑀺𑀢𑀸, 𑀤𑁆𑀯𑁂𑀧𑀺 𑀯𑀺𑀳𑀸𑀭𑀩𑀳𑀼𑀮𑀸 𑁋 𑀏𑀓𑁄 𑀧𑀘𑁆𑀘𑀯𑁂𑀓𑁆𑀔𑀡𑀸𑀩𑀳𑀼𑀮𑁄, 𑀏𑀓𑁄 𑀦 𑀧𑀘𑁆𑀘𑀯𑁂𑀓𑁆𑀔𑀡𑀸𑀩𑀳𑀼𑀮𑁄. 𑀬𑁄 𑀧𑀘𑁆𑀘𑀯𑁂𑀓𑁆𑀔𑀡𑀸𑀩𑀳𑀼𑀮𑁄, 𑀲𑁄 𑀢𑁂𑀦 𑀅𑀢𑀺𑀭𑁂𑀓𑁄 𑀳𑁄𑀢𑀺, 𑀅𑀥𑀺𑀓𑁄 𑀳𑁄𑀢𑀺, 𑀯𑀺𑀲𑁂𑀲𑁄 𑀳𑁄𑀢𑀺. 𑀢𑀲𑁆𑀲 𑀜𑀸𑀡𑀁 𑀧𑀪𑀺𑀚𑁆𑀚𑀢𑀺.

𑀤𑁆𑀯𑁂 𑀧𑀼𑀕𑁆𑀕𑀮𑀸 𑀧𑀝𑀺𑀲𑀫𑁆𑀪𑀺𑀤𑀧𑁆𑀧𑀢𑁆𑀢𑀸, 𑀤𑁆𑀯𑁂𑀧𑀺 𑀧𑀼𑀩𑁆𑀩𑀬𑁄𑀕𑀲𑀫𑁆𑀧𑀦𑁆𑀦𑀸, 𑀤𑁆𑀯𑁂𑀧𑀺 𑀩𑀳𑀼𑀲𑁆𑀲𑀼𑀢𑀸, 𑀤𑁆𑀯𑁂𑀧𑀺 𑀤𑁂𑀲𑀦𑀸𑀩𑀳𑀼𑀮𑀸, 𑀤𑁆𑀯𑁂𑀧𑀺 𑀕𑀭𑀽𑀧𑀦𑀺𑀲𑁆𑀲𑀺𑀢𑀸, 𑀤𑁆𑀯𑁂𑀧𑀺 𑀯𑀺𑀳𑀸𑀭𑀩𑀳𑀼𑀮𑀸, 𑀤𑁆𑀯𑁂𑀧𑀺 𑀧𑀘𑁆𑀘𑀯𑁂𑀓𑁆𑀔𑀡𑀸𑀩𑀳𑀼𑀮𑀸 𑁋 𑀏𑀓𑁄 𑀲𑁂𑀔𑀧𑀝𑀺𑀲𑀫𑁆𑀪𑀺𑀤𑀧𑁆𑀧𑀢𑁆𑀢𑁄, 𑀏𑀓𑁄 𑀅𑀲𑁂𑀔𑀧𑀝𑀺𑀲𑀫𑁆𑀪𑀺𑀤𑀧𑁆𑀧𑀢𑁆𑀢𑁄. 𑀬𑁄 𑀅𑀲𑁂𑀔𑀧𑀝𑀺𑀲𑀫𑁆𑀪𑀺𑀤𑀧𑁆𑀧𑀢𑁆𑀢𑁄, 𑀲𑁄 𑀢𑁂𑀦 𑀅𑀢𑀺𑀭𑁂𑀓𑁄 𑀳𑁄𑀢𑀺, 𑀅𑀥𑀺𑀓𑁄 𑀳𑁄𑀢𑀺, 𑀯𑀺𑀲𑁂𑀲𑁄 𑀳𑁄𑀢𑀺. 𑀢𑀲𑁆𑀲 𑀜𑀸𑀡𑀁 𑀧𑀪𑀺𑀚𑁆𑀚𑀢𑀺.

𑀤𑁆𑀯𑁂 𑀧𑀼𑀕𑁆𑀕𑀮𑀸 𑀧𑀝𑀺𑀲𑀫𑁆𑀪𑀺𑀤𑀧𑁆𑀧𑀢𑁆𑀢𑀸, 𑀤𑁆𑀯𑁂𑀧𑀺 𑀧𑀼𑀩𑁆𑀩𑀬𑁄𑀕𑀲𑀫𑁆𑀧𑀦𑁆𑀦𑀸, 𑀤𑁆𑀯𑁂𑀧𑀺 𑀩𑀳𑀼𑀲𑁆𑀲𑀼𑀢𑀸, 𑀤𑁆𑀯𑁂𑀧𑀺 𑀤𑁂𑀲𑀦𑀸𑀩𑀳𑀼𑀮𑀸, 𑀤𑁆𑀯𑁂𑀧𑀺 𑀕𑀭𑀽𑀧𑀦𑀺𑀲𑁆𑀲𑀺𑀢𑀸, 𑀤𑁆𑀯𑁂𑀧𑀺 𑀯𑀺𑀳𑀸𑀭𑀩𑀳𑀼𑀮𑀸, 𑀤𑁆𑀯𑁂𑀧𑀺 𑀧𑀘𑁆𑀘𑀯𑁂𑀓𑁆𑀔𑀡𑀸𑀩𑀳𑀼𑀮𑀸, 𑀤𑁆𑀯𑁂𑀧𑀺 𑀅𑀲𑁂𑀔𑀧𑀝𑀺𑀲𑀫𑁆𑀪𑀺𑀤𑀧𑁆𑀧𑀢𑁆𑀢𑀸 𑁋 𑀏𑀓𑁄 𑀲𑀸𑀯𑀓𑀧𑀸𑀭𑀫𑀺𑀧𑁆𑀧𑀢𑁆𑀢𑁄, 𑀏𑀓𑁄 𑀦 𑀲𑀸𑀯𑀓𑀧𑀸𑀭𑀫𑀺𑀧𑁆𑀧𑀢𑁆𑀢𑁄. 𑀬𑁄 𑀲𑀸𑀯𑀓𑀧𑀸𑀭𑀫𑀺𑀧𑁆𑀧𑀢𑁆𑀢𑁄, 𑀲𑁄 𑀢𑁂𑀦 𑀅𑀢𑀺𑀭𑁂𑀓𑁄 𑀳𑁄𑀢𑀺, 𑀅𑀥𑀺𑀓𑁄 𑀳𑁄𑀢𑀺, 𑀯𑀺𑀲𑁂𑀲𑁄 𑀳𑁄𑀢𑀺. 𑀢𑀲𑁆𑀲 𑀜𑀸𑀡𑀁 𑀧𑀪𑀺𑀚𑁆𑀚𑀢𑀺.

𑀤𑁆𑀯𑁂 𑀧𑀼𑀕𑁆𑀕𑀮𑀸 𑀧𑀝𑀺𑀲𑀫𑁆𑀪𑀺𑀤𑀧𑁆𑀧𑀢𑁆𑀢𑀸, 𑀤𑁆𑀯𑁂𑀧𑀺 𑀧𑀼𑀩𑁆𑀩𑀬𑁄𑀕𑀲𑀫𑁆𑀧𑀦𑁆𑀦𑀸, 𑀤𑁆𑀯𑁂𑀧𑀺 𑀩𑀳𑀼𑀲𑁆𑀲𑀼𑀢𑀸, 𑀤𑁆𑀯𑁂𑀧𑀺 𑀤𑁂𑀲𑀦𑀸𑀩𑀳𑀼𑀮𑀸, 𑀤𑁆𑀯𑁂𑀧𑀺 𑀕𑀭𑀽𑀧𑀦𑀺𑀲𑁆𑀲𑀺𑀢𑀸, 𑀤𑁆𑀯𑁂𑀧𑀺 𑀯𑀺𑀳𑀸𑀭𑀩𑀳𑀼𑀮𑀸, 𑀤𑁆𑀯𑁂𑀧𑀺 𑀧𑀘𑁆𑀘𑀯𑁂𑀓𑁆𑀔𑀡𑀸𑀩𑀳𑀼𑀮𑀸, 𑀤𑁆𑀯𑁂𑀧𑀺 𑀅𑀲𑁂𑀔𑀧𑀝𑀺𑀲𑀫𑁆𑀪𑀺𑀤𑀧𑁆𑀧𑀢𑁆𑀢𑀸 𑁋 𑀏𑀓𑁄 𑀲𑀸𑀯𑀓𑀧𑀸𑀭𑀫𑀺𑀧𑁆𑀧𑀢𑁆𑀢𑁄, 𑀏𑀓𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄. 𑀬𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄, 𑀲𑁄 𑀢𑁂𑀦 𑀅𑀢𑀺𑀭𑁂𑀓𑁄 𑀳𑁄𑀢𑀺, 𑀅𑀥𑀺𑀓𑁄 𑀳𑁄𑀢𑀺, 𑀯𑀺𑀲𑁂𑀲𑁄 𑀳𑁄𑀢𑀺. 𑀢𑀲𑁆𑀲 𑀜𑀸𑀡𑀁 𑀧𑀪𑀺𑀚𑁆𑀚𑀢𑀺.

𑀧𑀘𑁆𑀘𑁂𑀓𑀩𑀼𑀤𑁆𑀥𑀜𑁆𑀘 𑀲𑀤𑁂𑀯𑀓𑀜𑁆𑀘 𑀮𑁄𑀓𑀁 𑀉𑀧𑀸𑀤𑀸𑀬 𑀢𑀣𑀸𑀕𑀢𑁄 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀅𑀕𑁆𑀕𑁄 𑀧𑀝𑀺𑀲𑀫𑁆𑀪𑀺𑀤𑀧𑁆𑀧𑀢𑁆𑀢𑁄 𑀧𑀜𑁆𑀜𑀸𑀧𑀪𑁂𑀤𑀓𑀼𑀲𑀮𑁄 𑀧𑀪𑀺𑀦𑁆𑀦𑀜𑀸𑀡𑁄 𑀅𑀥𑀺𑀕𑀢𑀧𑀝𑀺𑀲𑀫𑁆𑀪𑀺𑀤𑁄 𑀘𑀢𑀼𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑁄 𑀤𑀲𑀩𑀮𑀥𑀸𑀭𑀻 𑀧𑀼𑀭𑀺𑀲𑀸𑀲𑀪𑁄 𑀧𑀼𑀭𑀺𑀲𑀲𑀻𑀳𑁄…𑀧𑁂… 𑀬𑁂𑀧𑀺 𑀢𑁂 𑀔𑀢𑁆𑀢𑀺𑀬𑀧𑀡𑁆𑀟𑀺𑀢𑀸 𑀩𑁆𑀭𑀸𑀳𑁆𑀫𑀡𑀧𑀡𑁆𑀟𑀺𑀢𑀸 𑀕𑀳𑀧𑀢𑀺𑀧𑀡𑁆𑀟𑀺𑀢𑀸 𑀲𑀫𑀡𑀧𑀡𑁆𑀟𑀺𑀢𑀸 𑀦𑀺𑀧𑀼𑀡𑀸 𑀓𑀢𑀧𑀭𑀧𑁆𑀧𑀯𑀸𑀤𑀸 𑀯𑀸𑀮𑀯𑁂𑀥𑀺𑀭𑀽𑀧𑀸 𑀯𑁄𑀪𑀺𑀦𑁆𑀤𑀦𑁆𑀢𑀸 𑀫𑀜𑁆𑀜𑁂 𑀘𑀭𑀦𑁆𑀢𑀺 𑀧𑀜𑁆𑀜𑀸𑀕𑀢𑁂𑀦 𑀤𑀺𑀝𑁆𑀞𑀺𑀕𑀢𑀸𑀦𑀺, 𑀢𑁂 𑀧𑀜𑁆𑀳𑀁 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀢𑀣𑀸𑀕𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑀦𑁆𑀢𑀺 𑀕𑀽𑀴𑁆𑀳𑀸𑀦𑀺 𑀘 𑀧𑀝𑀺𑀘𑁆𑀙𑀦𑁆𑀦𑀸𑀦𑀺 𑀘. 𑀓𑀣𑀺𑀢𑀸 𑀯𑀺𑀲𑀚𑁆𑀚𑀺𑀢𑀸 𑀘 𑀢𑁂 𑀧𑀜𑁆𑀳𑀸 𑀪𑀕𑀯𑀢𑀸 𑀳𑁄𑀦𑁆𑀢𑀺 𑀦𑀺𑀤𑁆𑀤𑀺𑀝𑁆𑀞𑀓𑀸𑀭𑀡𑀸, 𑀉𑀧𑀓𑁆𑀔𑀺𑀢𑁆𑀢𑀓𑀸 𑀘 𑀢𑁂 𑀪𑀕𑀯𑀢𑁄 𑀲𑀫𑁆𑀧𑀚𑁆𑀚𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀢𑀢𑁆𑀣 𑀅𑀢𑀺𑀭𑁄𑀘𑀢𑀺, 𑀬𑀤𑀺𑀤𑀁 𑀧𑀜𑁆𑀜𑀸𑀬𑀸𑀢𑀺 𑀅𑀕𑁆𑀕𑁄 𑀧𑀝𑀺𑀲𑀫𑁆𑀪𑀺𑀤𑀧𑁆𑀧𑀢𑁆𑀢𑁄𑀢𑀺.

𑀫𑀳𑀸𑀧𑀜𑁆𑀜𑀸𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨. 𑀇𑀤𑁆𑀥𑀺𑀓𑀣𑀸

𑁯. 𑀓𑀸 𑀇𑀤𑁆𑀥𑀺? 𑀓𑀢𑀺 𑀇𑀤𑁆𑀥𑀺𑀬𑁄? 𑀇𑀤𑁆𑀥𑀺𑀬𑀸 𑀓𑀢𑀺 𑀪𑀽𑀫𑀺𑀬𑁄, 𑀓𑀢𑀺 𑀧𑀸𑀤𑀸, 𑀓𑀢𑀺 𑀧𑀤𑀸𑀦𑀺, 𑀓𑀢𑀺 𑀫𑀽𑀮𑀸𑀦𑀺? 𑀓𑀸 𑀇𑀤𑁆𑀥𑀻𑀢𑀺? 𑀇𑀚𑁆𑀛𑀦𑀝𑁆𑀞𑁂𑀦 𑀇𑀤𑁆𑀥𑀺. 𑀓𑀢𑀺 𑀇𑀤𑁆𑀥𑀺𑀬𑁄𑀢𑀺? 𑀤𑀲 𑀇𑀤𑁆𑀥𑀺𑀬𑁄. 𑀇𑀤𑁆𑀥𑀺𑀬𑀸 𑀓𑀢𑀺 𑀪𑀽𑀫𑀺𑀬𑁄𑀢𑀺? 𑀇𑀤𑁆𑀥𑀺𑀬𑀸 𑀘𑀢𑀲𑁆𑀲𑁄 𑀪𑀽𑀫𑀺𑀬𑁄, 𑀘𑀢𑁆𑀢𑀸𑀭𑁄 𑀧𑀸𑀤𑀸, 𑀅𑀝𑁆𑀞 𑀧𑀤𑀸𑀦𑀺, 𑀲𑁄𑀴𑀲 𑀫𑀽𑀮𑀸𑀦𑀺.

𑁧𑁦. 𑀓𑀢𑀫𑀸 𑀤𑀲 𑀇𑀤𑁆𑀥𑀺𑀬𑁄? 𑀅𑀥𑀺𑀝𑁆𑀞𑀸𑀦𑀸 𑀇𑀤𑁆𑀥𑀺, 𑀯𑀺𑀓𑀼𑀩𑁆𑀩𑀦𑀸 𑀇𑀤𑁆𑀥𑀺, 𑀫𑀦𑁄𑀫𑀬𑀸 𑀇𑀤𑁆𑀥𑀺, 𑀜𑀸𑀡𑀯𑀺𑀧𑁆𑀨𑀸𑀭𑀸 𑀇𑀤𑁆𑀥𑀺, 𑀲𑀫𑀸𑀥𑀺𑀯𑀺𑀧𑁆𑀨𑀸𑀭𑀸 𑀇𑀤𑁆𑀥𑀺, 𑀅𑀭𑀺𑀬𑀸 𑀇𑀤𑁆𑀥𑀺, 𑀓𑀫𑁆𑀫𑀯𑀺𑀧𑀸𑀓𑀚𑀸 𑀇𑀤𑁆𑀥𑀺, 𑀧𑀼𑀜𑁆𑀜𑀯𑀢𑁄 𑀇𑀤𑁆𑀥𑀺, 𑀯𑀺𑀚𑁆𑀚𑀸𑀫𑀬𑀸 𑀇𑀤𑁆𑀥𑀺, 𑀢𑀢𑁆𑀣 𑀢𑀢𑁆𑀣 𑀲𑀫𑁆𑀫𑀸 𑀧𑀬𑁄𑀕𑀧𑀘𑁆𑀘𑀬𑀸 [𑀲𑀫𑁆𑀫𑀧𑁆𑀧𑀬𑁄𑀕𑀧𑀘𑁆𑀘𑀬𑀸 (𑀲𑁆𑀬𑀸. 𑀓.)] 𑀇𑀚𑁆𑀛𑀦𑀝𑁆𑀞𑁂𑀦 𑀇𑀤𑁆𑀥𑀺.

𑀇𑀤𑁆𑀥𑀺𑀬𑀸 𑀓𑀢𑀫𑀸 𑀘𑀢𑀲𑁆𑀲𑁄 𑀪𑀽𑀫𑀺𑀬𑁄? 𑀯𑀺𑀯𑁂𑀓𑀚𑀸𑀪𑀽𑀫𑀺 𑀧𑀞𑀫𑀁 𑀛𑀸𑀦𑀁, 𑀧𑀻𑀢𑀺𑀲𑀼𑀔𑀪𑀽𑀫𑀺 𑀤𑀼𑀢𑀺𑀬𑀁 𑀛𑀸𑀦𑀁, 𑀉𑀧𑁂𑀓𑁆𑀔𑀸𑀲𑀼𑀔𑀪𑀽𑀫𑀺 𑀢𑀢𑀺𑀬𑀁 𑀛𑀸𑀦𑀁, 𑀅𑀤𑀼𑀓𑁆𑀔𑀫𑀲𑀼𑀔𑀸𑀪𑀽𑀫𑀺 𑀘𑀢𑀼𑀢𑁆𑀣𑀁 𑀛𑀸𑀦𑀁. 𑀇𑀤𑁆𑀥𑀺𑀬𑀸 𑀇𑀫𑀸 𑀘𑀢𑀲𑁆𑀲𑁄 𑀪𑀽𑀫𑀺𑀬𑁄 𑀇𑀤𑁆𑀥𑀺𑀮𑀸𑀪𑀸𑀬 𑀇𑀤𑁆𑀥𑀺𑀧𑀝𑀺𑀮𑀸𑀪𑀸𑀬 𑀇𑀤𑁆𑀥𑀺𑀯𑀺𑀓𑀼𑀩𑁆𑀩𑀦𑀢𑀸𑀬 𑀇𑀤𑁆𑀥𑀺𑀯𑀺𑀲𑀯𑀺𑀢𑀸𑀬 𑀇𑀤𑁆𑀥𑀺𑀯𑀲𑀻𑀪𑀸𑀯𑀸𑀬 𑀇𑀤𑁆𑀥𑀺𑀯𑁂𑀲𑀸𑀭𑀚𑁆𑀚𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺.

𑀇𑀤𑁆𑀥𑀺𑀬𑀸 𑀓𑀢𑀫𑁂 𑀘𑀢𑁆𑀢𑀸𑀭𑁄 𑀧𑀸𑀤𑀸? 𑀇𑀥 𑀪𑀺𑀓𑁆𑀔𑀼 𑀙𑀦𑁆𑀤𑀲𑀫𑀸𑀥𑀺𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺, 𑀘𑀺𑀢𑁆𑀢𑀲𑀫𑀸𑀥𑀺𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺, 𑀯𑀻𑀭𑀺𑀬𑀲𑀫𑀸𑀥𑀺𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺, 𑀯𑀻𑀫𑀁𑀲𑀸𑀲𑀫𑀸𑀥𑀺𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺. 𑀇𑀤𑁆𑀥𑀺𑀬𑀸 𑀇𑀫𑁂 𑀘𑀢𑁆𑀢𑀸𑀭𑁄 𑀧𑀸𑀤𑀸 𑀇𑀤𑁆𑀥𑀺𑀮𑀸𑀪𑀸𑀬 𑀇𑀤𑁆𑀥𑀺𑀧𑀝𑀺𑀮𑀸𑀪𑀸𑀬 𑀇𑀤𑁆𑀥𑀺𑀯𑀺𑀓𑀼𑀩𑁆𑀩𑀦𑀢𑀸𑀬 𑀇𑀤𑁆𑀥𑀺𑀯𑀺𑀲𑀯𑀺𑀢𑀸𑀬 𑀇𑀤𑁆𑀥𑀺𑀯𑀲𑀻𑀪𑀸𑀯𑀸𑀬 𑀇𑀤𑁆𑀥𑀺𑀯𑁂𑀲𑀸𑀭𑀚𑁆𑀚𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺.

𑀇𑀤𑁆𑀥𑀺𑀬𑀸 𑀓𑀢𑀫𑀸𑀦𑀺 𑀅𑀝𑁆𑀞 𑀧𑀤𑀸𑀦𑀺? 𑀙𑀦𑁆𑀤𑀁 𑀘𑁂 𑀪𑀺𑀓𑁆𑀔𑀼 𑀦𑀺𑀲𑁆𑀲𑀸𑀬 𑀮𑀪𑀢𑀺 𑀲𑀫𑀸𑀥𑀺𑀁, 𑀮𑀪𑀢𑀺 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢𑀁. 𑀙𑀦𑁆𑀤𑁄 𑀦 𑀲𑀫𑀸𑀥𑀺, 𑀲𑀫𑀸𑀥𑀺 𑀦 𑀙𑀦𑁆𑀤𑁄. 𑀅𑀜𑁆𑀜𑁄 𑀙𑀦𑁆𑀤𑁄, 𑀅𑀜𑁆𑀜𑁄 𑀲𑀫𑀸𑀥𑀺. 𑀯𑀻𑀭𑀺𑀬𑀁 𑀘𑁂 𑀪𑀺𑀓𑁆𑀔𑀼 𑀦𑀺𑀲𑁆𑀲𑀸𑀬 𑀮𑀪𑀢𑀺 𑀲𑀫𑀸𑀥𑀺𑀁, 𑀮𑀪𑀢𑀺 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢𑀁. 𑀯𑀻𑀭𑀺𑀬𑀁 𑀦 𑀲𑀫𑀸𑀥𑀺, 𑀲𑀫𑀸𑀥𑀺 𑀦 𑀯𑀻𑀭𑀺𑀬𑀁. 𑀅𑀜𑁆𑀜𑀁 𑀯𑀻𑀭𑀺𑀬𑀁, 𑀅𑀜𑁆𑀜𑁄 𑀲𑀫𑀸𑀥𑀺. 𑀘𑀺𑀢𑁆𑀢𑀁 𑀘𑁂 𑀪𑀺𑀓𑁆𑀔𑀼 𑀦𑀺𑀲𑁆𑀲𑀸𑀬 𑀮𑀪𑀢𑀺 𑀲𑀫𑀸𑀥𑀺𑀁, 𑀮𑀪𑀢𑀺 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢𑀁. 𑀘𑀺𑀢𑁆𑀢𑀁 𑀦 𑀲𑀫𑀸𑀥𑀺, 𑀲𑀫𑀸𑀥𑀺 𑀦 𑀘𑀺𑀢𑁆𑀢𑀁. 𑀅𑀜𑁆𑀜𑀁 𑀘𑀺𑀢𑁆𑀢𑀁, 𑀅𑀜𑁆𑀜𑁄 𑀲𑀫𑀸𑀥𑀺. 𑀯𑀻𑀫𑀁𑀲𑀁 𑀘𑁂 𑀪𑀺𑀓𑁆𑀔𑀼 𑀦𑀺𑀲𑁆𑀲𑀸𑀬 𑀮𑀪𑀢𑀺 𑀲𑀫𑀸𑀥𑀺𑀁, 𑀮𑀪𑀢𑀺 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢𑀁. 𑀯𑀻𑀫𑀁𑀲𑀸 𑀦 𑀲𑀫𑀸𑀥𑀺, 𑀲𑀫𑀸𑀥𑀺 𑀦 𑀯𑀻𑀫𑀁𑀲𑀸. 𑀅𑀜𑁆𑀜𑀸 𑀯𑀻𑀫𑀁𑀲𑀸, 𑀅𑀜𑁆𑀜𑁄 𑀲𑀫𑀸𑀥𑀺. 𑀇𑀤𑁆𑀥𑀺𑀬𑀸 𑀇𑀫𑀸𑀦𑀺 𑀅𑀝𑁆𑀞 𑀧𑀤𑀸𑀦𑀺 𑀇𑀤𑁆𑀥𑀺𑀮𑀸𑀪𑀸𑀬 𑀇𑀤𑁆𑀥𑀺𑀧𑀝𑀺𑀮𑀸𑀪𑀸𑀬 𑀇𑀤𑁆𑀥𑀺𑀯𑀺𑀓𑀼𑀩𑁆𑀩𑀦𑀢𑀸𑀬 𑀇𑀤𑁆𑀥𑀺𑀯𑀺𑀲𑀯𑀺𑀢𑀸𑀬 𑀇𑀤𑁆𑀥𑀺𑀯𑀲𑀻𑀪𑀸𑀯𑀸𑀬 𑀇𑀤𑁆𑀥𑀺𑀯𑁂𑀲𑀸𑀭𑀚𑁆𑀚𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺.

𑀇𑀤𑁆𑀥𑀺𑀬𑀸 𑀓𑀢𑀫𑀸𑀦𑀺 𑀲𑁄𑀴𑀲 𑀫𑀽𑀮𑀸𑀦𑀺? 𑀅𑀦𑁄𑀦𑀢𑀁 [𑀅𑀦𑁄𑀡𑀢𑀁 (𑀓.)] 𑀘𑀺𑀢𑁆𑀢𑀁 𑀓𑁄𑀲𑀚𑁆𑀚𑁂 𑀦 𑀇𑀜𑁆𑀚𑀢𑀻𑀢𑀺 𑁋 𑀆𑀦𑁂𑀜𑁆𑀚𑀁. 𑀅𑀦𑀼𑀦𑁆𑀦𑀢𑀁 [(𑀅𑀦𑀼𑀡𑁆𑀡𑀢𑀁 (𑀓.)] 𑀘𑀺𑀢𑁆𑀢𑀁 𑀉𑀤𑁆𑀥𑀘𑁆𑀘𑁂 𑀦 𑀇𑀜𑁆𑀚𑀢𑀻𑀢𑀺 𑁋 𑀆𑀦𑁂𑀜𑁆𑀚𑀁. 𑀅𑀦𑀪𑀺𑀦𑀢𑀁 𑀘𑀺𑀢𑁆𑀢𑀁 𑀭𑀸𑀕𑁂 𑀦 𑀇𑀜𑁆𑀚𑀢𑀻𑀢𑀺 𑁋 𑀆𑀦𑁂𑀜𑁆𑀚𑀁. 𑀅𑀦𑀧𑀦𑀢𑀁 𑀘𑀺𑀢𑁆𑀢𑀁 𑀩𑁆𑀬𑀸𑀧𑀸𑀤𑁂 𑀦 𑀇𑀜𑁆𑀚𑀢𑀻𑀢𑀺 𑁋 𑀆𑀦𑁂𑀜𑁆𑀚𑀁. 𑀅𑀦𑀺𑀲𑁆𑀲𑀺𑀢𑀁 𑀘𑀺𑀢𑁆𑀢𑀁 𑀤𑀺𑀝𑁆𑀞𑀺𑀬𑀸 𑀦 𑀇𑀜𑁆𑀚𑀢𑀻𑀢𑀺 𑁋 𑀆𑀦𑁂𑀜𑁆𑀚𑀁. 𑀅𑀧𑁆𑀧𑀝𑀺𑀩𑀤𑁆𑀥𑀁 𑀘𑀺𑀢𑁆𑀢𑀁 𑀙𑀦𑁆𑀤𑀭𑀸𑀕𑁂 𑀦 𑀇𑀜𑁆𑀚𑀢𑀻𑀢𑀺 𑁋 𑀆𑀦𑁂𑀜𑁆𑀚𑀁. 𑀯𑀺𑀧𑁆𑀧𑀫𑀼𑀢𑁆𑀢𑀁 𑀘𑀺𑀢𑁆𑀢𑀁 𑀓𑀸𑀫𑀭𑀸𑀕𑁂 𑀦 𑀇𑀜𑁆𑀚𑀢𑀻𑀢𑀺 𑁋 𑀆𑀦𑁂𑀜𑁆𑀚𑀁. 𑀯𑀺𑀲𑀜𑁆𑀜𑀼𑀢𑁆𑀢𑀁 𑀘𑀺𑀢𑁆𑀢𑀁 𑀓𑀺𑀮𑁂𑀲𑁂 𑀦 𑀇𑀜𑁆𑀚𑀢𑀻𑀢𑀺 𑁋 𑀆𑀦𑁂𑀜𑁆𑀚𑀁. 𑀯𑀺𑀫𑀭𑀺𑀬𑀸𑀤𑀺𑀓𑀢𑀁 𑀘𑀺𑀢𑁆𑀢𑀁 𑀓𑀺𑀮𑁂𑀲𑀫𑀭𑀺𑀬𑀸𑀤𑁂 𑀦 𑀇𑀜𑁆𑀚𑀢𑀻𑀢𑀺 𑁋 𑀆𑀦𑁂𑀜𑁆𑀚𑀁. 𑀏𑀓𑀢𑁆𑀢𑀕𑀢𑀁 [𑀏𑀓𑀕𑁆𑀕𑀢𑀁 (𑀲𑁆𑀬𑀸.)] 𑀘𑀺𑀢𑁆𑀢𑀁 𑀦𑀸𑀦𑀢𑁆𑀢𑀓𑀺𑀮𑁂𑀲𑁂𑀳𑀺 [𑀦𑀸𑀦𑀢𑁆𑀢𑀓𑀺𑀮𑁂𑀲𑁂 (𑀲𑁆𑀬𑀸.)] 𑀦 𑀇𑀜𑁆𑀚𑀢𑀻𑀢𑀺 𑁋 𑀆𑀦𑁂𑀜𑁆𑀚𑀁. 𑀲𑀤𑁆𑀥𑀸𑀬 𑀧𑀭𑀺𑀕𑁆𑀕𑀳𑀺𑀢𑀁 𑀘𑀺𑀢𑁆𑀢𑀁 𑀅𑀲𑁆𑀲𑀤𑁆𑀥𑀺𑀬𑁂 𑀦 𑀇𑀜𑁆𑀚𑀢𑀻𑀢𑀺 𑁋 𑀆𑀦𑁂𑀜𑁆𑀚𑀁. 𑀯𑀻𑀭𑀺𑀬𑁂𑀦 𑀧𑀭𑀺𑀕𑁆𑀕𑀳𑀺𑀢𑀁 𑀘𑀺𑀢𑁆𑀢𑀁 𑀓𑁄𑀲𑀚𑁆𑀚𑁂 𑀦 𑀇𑀜𑁆𑀚𑀢𑀻𑀢𑀺 𑁋 𑀆𑀦𑁂𑀜𑁆𑀚𑀁. 𑀲𑀢𑀺𑀬𑀸 𑀧𑀭𑀺𑀕𑁆𑀕𑀳𑀺𑀢𑀁 𑀘𑀺𑀢𑁆𑀢𑀁 𑀧𑀫𑀸𑀤𑁂 𑀦 𑀇𑀜𑁆𑀚𑀢𑀻𑀢𑀺 𑁋 𑀆𑀦𑁂𑀜𑁆𑀚𑀁. 𑀲𑀫𑀸𑀥𑀺𑀦𑀸 𑀧𑀭𑀺𑀕𑁆𑀕𑀳𑀺𑀢𑀁 𑀘𑀺𑀢𑁆𑀢𑀁 𑀉𑀤𑁆𑀥𑀘𑁆𑀘𑁂 𑀦 𑀇𑀜𑁆𑀚𑀢𑀻𑀢𑀺 𑁋 𑀆𑀦𑁂𑀜𑁆𑀚𑀁. 𑀧𑀜𑁆𑀜𑀸𑀬 𑀧𑀭𑀺𑀕𑁆𑀕𑀳𑀺𑀢𑀁 𑀘𑀺𑀢𑁆𑀢𑀁 𑀅𑀯𑀺𑀚𑁆𑀚𑀸𑀬 𑀦 𑀇𑀜𑁆𑀚𑀢𑀻𑀢𑀺 𑁋 𑀆𑀦𑁂𑀜𑁆𑀚𑀁. 𑀑𑀪𑀸𑀲𑀕𑀢𑀁 𑀘𑀺𑀢𑁆𑀢𑀁 𑀅𑀯𑀺𑀚𑁆𑀚𑀦𑁆𑀥𑀓𑀸𑀭𑁂 𑀦 𑀇𑀜𑁆𑀚𑀢𑀻𑀢𑀺 𑁋 𑀆𑀦𑁂𑀜𑁆𑀚𑀁. 𑀇𑀤𑁆𑀥𑀺𑀬𑀸 𑀇𑀫𑀸𑀦𑀺 𑀲𑁄𑀴𑀲 𑀫𑀽𑀮𑀸𑀦𑀺 𑀇𑀤𑁆𑀥𑀺𑀮𑀸𑀪𑀸𑀬 𑀇𑀤𑁆𑀥𑀺𑀧𑀝𑀺𑀮𑀸𑀪𑀸𑀬 𑀇𑀤𑁆𑀥𑀺𑀯𑀺𑀓𑀼𑀩𑁆𑀩𑀦𑀢𑀸𑀬 𑀇𑀤𑁆𑀥𑀺𑀯𑀺𑀲𑀯𑀺𑀢𑀸𑀬 𑀇𑀤𑁆𑀥𑀺𑀯𑀲𑀻𑀪𑀸𑀯𑀸𑀬 𑀇𑀤𑁆𑀥𑀺𑀯𑁂𑀲𑀸𑀭𑀚𑁆𑀚𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺.

𑀤𑀲𑀇𑀤𑁆𑀥𑀺𑀦𑀺𑀤𑁆𑀤𑁂𑀲𑁄

𑁧𑁦. 𑀓𑀢𑀫𑀸 𑀅𑀥𑀺𑀝𑁆𑀞𑀸𑀦𑀸 𑀇𑀤𑁆𑀥𑀺? 𑀇𑀥 𑀪𑀺𑀓𑁆𑀔𑀼 𑀅𑀦𑁂𑀓𑀯𑀺𑀳𑀺𑀢𑀁 𑀇𑀤𑁆𑀥𑀺𑀯𑀺𑀥𑀁 𑀧𑀘𑁆𑀘𑀦𑀼𑀪𑁄𑀢𑀺 𑁋 𑀏𑀓𑁄𑀧𑀺 𑀳𑀼𑀢𑁆𑀯𑀸 𑀩𑀳𑀼𑀥𑀸 𑀳𑁄𑀢𑀺, 𑀩𑀳𑀼𑀥𑀸𑀧𑀺 𑀳𑀼𑀢𑁆𑀯𑀸 𑀏𑀓𑁄 𑀳𑁄𑀢𑀺; 𑀆𑀯𑀺𑀪𑀸𑀯𑀁 𑀢𑀺𑀭𑁄𑀪𑀸𑀯𑀁; 𑀢𑀺𑀭𑁄𑀓𑀼𑀝𑁆𑀝𑀁 𑀢𑀺𑀭𑁄𑀧𑀸𑀓𑀸𑀭𑀁 𑀢𑀺𑀭𑁄𑀧𑀩𑁆𑀩𑀢𑀁 𑀅𑀲𑀚𑁆𑀚𑀫𑀸𑀦𑁄 𑀕𑀘𑁆𑀙𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀆𑀓𑀸𑀲𑁂. 𑀧𑀣𑀯𑀺𑀬𑀸𑀧𑀺 𑀉𑀫𑁆𑀫𑀼𑀚𑁆𑀚𑀦𑀺𑀫𑀼𑀚𑁆𑀚𑀁 𑀓𑀭𑁄𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀉𑀤𑀓𑁂. 𑀉𑀤𑀓𑁂𑀧𑀺 𑀅𑀪𑀺𑀚𑁆𑀚𑀫𑀸𑀦𑁂 [𑀅𑀪𑀺𑀚𑁆𑀚𑀫𑀸𑀦𑁄 (𑀓.) 𑀤𑀻. 𑀦𑀺. 𑁧.𑁨𑁩𑁮 𑀧𑀲𑁆𑀲𑀺𑀢𑀩𑁆𑀩𑀸] 𑀕𑀘𑁆𑀙𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀧𑀣𑀯𑀺𑀬𑀁. 𑀆𑀓𑀸𑀲𑁂𑀧𑀺 𑀧𑀮𑁆𑀮𑀗𑁆𑀓𑁂𑀦 𑀓𑀫𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀧𑀓𑁆𑀔𑀻 𑀲𑀓𑀼𑀡𑁄. 𑀇𑀫𑁂𑀧𑀺 𑀘𑀦𑁆𑀤𑀺𑀫𑀲𑀽𑀭𑀺𑀬𑁂 𑀏𑀯𑀁𑀫𑀳𑀺𑀤𑁆𑀥𑀺𑀓𑁂 𑀏𑀯𑀁𑀫𑀳𑀸𑀦𑀼𑀪𑀸𑀯𑁂 𑀧𑀸𑀡𑀺𑀦𑀸 𑀧𑀭𑀸𑀫𑀲𑀢𑀺 𑀧𑀭𑀺𑀫𑀚𑁆𑀚𑀢𑀺. 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸𑀧𑀺 𑀓𑀸𑀬𑁂𑀦 𑀯𑀲𑀁 𑀯𑀢𑁆𑀢𑁂𑀢𑀻𑀢𑀺.

𑀇𑀥𑀸𑀢𑀺 𑀇𑀫𑀺𑀲𑁆𑀲𑀸 𑀤𑀺𑀝𑁆𑀞𑀺𑀬𑀸 𑀇𑀫𑀺𑀲𑁆𑀲𑀸 𑀔𑀦𑁆𑀢𑀺𑀬𑀸 𑀇𑀫𑀺𑀲𑁆𑀲𑀸 𑀭𑀼𑀘𑀺𑀬𑀸 𑀇𑀫𑀲𑁆𑀫𑀺𑀁 𑀆𑀤𑀸𑀬𑁂 𑀇𑀫𑀲𑁆𑀫𑀺𑀁 𑀥𑀫𑁆𑀫𑁂 𑀇𑀫𑀲𑁆𑀫𑀺𑀁 𑀯𑀺𑀦𑀬𑁂 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀇𑀫𑀲𑁆𑀫𑀺𑀁 𑀧𑀸𑀯𑀘𑀦𑁂 𑀇𑀫𑀲𑁆𑀫𑀺𑀁 𑀩𑁆𑀭𑀳𑁆𑀫𑀘𑀭𑀺𑀬𑁂 𑀇𑀫𑀲𑁆𑀫𑀺𑀁 𑀲𑀢𑁆𑀣𑀼𑀲𑀸𑀲𑀦𑁂. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀇𑀥𑀸’’𑀢𑀺. 𑀪𑀺𑀓𑁆𑀔𑀽𑀢𑀺 𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀓𑁄 𑀯𑀸 𑀳𑁄𑀢𑀺 𑀪𑀺𑀓𑁆𑀔𑀼 𑀲𑁂𑀔𑁄 𑀯𑀸 𑀅𑀭𑀳𑀸 𑀯𑀸 𑀅𑀓𑀼𑀧𑁆𑀧𑀥𑀫𑁆𑀫𑁄. 𑀅𑀦𑁂𑀓𑀯𑀺𑀳𑀺𑀢𑀁 𑀇𑀤𑁆𑀥𑀺𑀯𑀺𑀥𑀁 𑀧𑀘𑁆𑀘𑀦𑀼𑀪𑁄𑀢𑀻𑀢𑀺 𑀦𑀸𑀦𑀧𑁆𑀧𑀓𑀸𑀭𑀁 𑀇𑀤𑁆𑀥𑀺𑀯𑀺𑀥𑀁 𑀧𑀘𑁆𑀘𑀦𑀼𑀪𑁄𑀢𑀺. 𑀏𑀓𑁄𑀧𑀺 𑀳𑀼𑀢𑁆𑀯𑀸 𑀩𑀳𑀼𑀥𑀸 𑀳𑁄𑀢𑀻𑀢𑀺 𑀧𑀓𑀢𑀺𑀬𑀸 𑀏𑀓𑁄 𑀩𑀳𑀼𑀓𑀁 𑀆𑀯𑀚𑁆𑀚𑀢𑀺, 𑀲𑀢𑀁 𑀯𑀸 𑀲𑀳𑀲𑁆𑀲𑀁 𑀯𑀸 𑀲𑀢𑀲𑀳𑀲𑁆𑀲𑀁 𑀯𑀸 𑀆𑀯𑀚𑁆𑀚𑀢𑀺. 𑀆𑀯𑀚𑁆𑀚𑀺𑀢𑁆𑀯𑀸 𑀜𑀸𑀡𑁂𑀦 𑀅𑀥𑀺𑀝𑁆𑀞𑀸𑀢𑀺 𑁋 ‘‘𑀩𑀳𑀼𑀮𑁄 𑀳𑁄𑀫𑀻’’𑀢𑀺 [𑀳𑁄𑀢𑀽𑀢𑀺 (𑀓.)]. 𑀩𑀳𑀼𑀮𑁄 𑀳𑁄𑀢𑀺. 𑀬𑀣𑀸𑀬𑀲𑁆𑀫𑀸 𑀘𑀽𑀴𑀧𑀦𑁆𑀣𑀓𑁄 [𑀘𑀼𑀮𑁆𑀮𑀧𑀦𑁆𑀣𑀓𑁄 (𑀲𑁆𑀬𑀸.)] 𑀏𑀓𑁄𑀧𑀺 𑀳𑀼𑀢𑁆𑀯𑀸 𑀩𑀳𑀼𑀥𑀸 𑀳𑁄𑀢𑀺, 𑀏𑀯𑀫𑁂𑀯𑀁 𑀲𑁄 𑀇𑀤𑁆𑀥𑀺𑀫𑀸 𑀘𑁂𑀢𑁄𑀯𑀲𑀺𑀧𑁆𑀧𑀢𑁆𑀢𑁄 𑀏𑀓𑁄𑀧𑀺 𑀳𑀼𑀢𑁆𑀯𑀸 𑀩𑀳𑀼𑀥𑀸 𑀳𑁄𑀢𑀺. 𑀩𑀳𑀼𑀥𑀸𑀧𑀺 𑀳𑀼𑀢𑁆𑀯𑀸 𑀏𑀓𑁄 𑀳𑁄𑀢𑀻𑀢𑀺 𑀧𑀓𑀢𑀺𑀬𑀸 𑀩𑀳𑀼𑀓𑁄 𑀏𑀓𑀁 𑀆𑀯𑀚𑁆𑀚𑀢𑀺; 𑀆𑀯𑀚𑁆𑀚𑀺𑀢𑁆𑀯𑀸 𑀜𑀸𑀡𑁂𑀦 𑀅𑀥𑀺𑀝𑁆𑀞𑀸𑀢𑀺 𑁋 ‘‘𑀏𑀓𑁄 𑀳𑁄𑀫𑀻’’𑀢𑀺. 𑀏𑀓𑁄 𑀳𑁄𑀢𑀺. 𑀬𑀣𑀸𑀬𑀲𑁆𑀫𑀸 𑀘𑀽𑀴𑀧𑀦𑁆𑀣𑀓𑁄 𑀩𑀳𑀼𑀥𑀸𑀧𑀺 𑀳𑀼𑀢𑁆𑀯𑀸 𑀏𑀓𑁄 𑀳𑁄𑀢𑀺, 𑀏𑀯𑀫𑁂𑀯𑀁 𑀲𑁄 𑀇𑀤𑁆𑀥𑀺𑀫𑀸 𑀘𑁂𑀢𑁄𑀯𑀲𑀺𑀧𑁆𑀧𑀢𑁆𑀢𑁄 𑀩𑀳𑀼𑀥𑀸𑀧𑀺 𑀳𑀼𑀢𑁆𑀯𑀸 𑀏𑀓𑁄 𑀳𑁄𑀢𑀺.

𑁧𑁧. 𑀆𑀯𑀺𑀪𑀸𑀯𑀦𑁆𑀢𑀺 𑀓𑁂𑀦𑀘𑀺 𑀅𑀦𑀸𑀯𑀝𑀁 𑀳𑁄𑀢𑀺 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀁 𑀯𑀺𑀯𑀝𑀁 𑀧𑀸𑀓𑀝𑀁. 𑀢𑀺𑀭𑁄𑀪𑀸𑀯𑀦𑁆𑀢𑀺 𑀓𑁂𑀦𑀘𑀺 𑀆𑀯𑀝𑀁 𑀳𑁄𑀢𑀺 𑀧𑀝𑀺𑀘𑁆𑀙𑀦𑁆𑀦𑀁 𑀧𑀺𑀳𑀺𑀢𑀁 𑀧𑀝𑀺𑀓𑀼𑀚𑁆𑀚𑀺𑀢𑀁. 𑀢𑀺𑀭𑁄𑀓𑀼𑀝𑁆𑀝𑀁 𑀢𑀺𑀭𑁄𑀧𑀸𑀓𑀸𑀭𑀁 𑀢𑀺𑀭𑁄𑀧𑀩𑁆𑀩𑀢𑀁 𑀅𑀲𑀚𑁆𑀚𑀫𑀸𑀦𑁄 𑀕𑀘𑁆𑀙𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀆𑀓𑀸𑀲𑁂𑀢𑀺 𑀧𑀓𑀢𑀺𑀬𑀸 𑀆𑀓𑀸𑀲𑀓𑀲𑀺𑀡𑀲𑀫𑀸𑀧𑀢𑁆𑀢𑀺𑀬𑀸 𑀮𑀸𑀪𑀻 𑀳𑁄𑀢𑀺. 𑀢𑀺𑀭𑁄𑀓𑀼𑀝𑁆𑀝𑀁 𑀢𑀺𑀭𑁄𑀧𑀸𑀓𑀸𑀭𑀁 𑀢𑀺𑀭𑁄𑀧𑀩𑁆𑀩𑀢𑀁 𑀆𑀯𑀚𑁆𑀚𑀢𑀺. 𑀆𑀯𑀚𑁆𑀚𑀺𑀢𑁆𑀯𑀸 𑀜𑀸𑀡𑁂𑀦 𑀅𑀥𑀺𑀝𑁆𑀞𑀸𑀢𑀺 𑁋 ‘‘𑀆𑀓𑀸𑀲𑁄 𑀳𑁄𑀢𑀽’’𑀢𑀺. 𑀆𑀓𑀸𑀲𑁄 𑀳𑁄𑀢𑀺. 𑀢𑀺𑀭𑁄𑀓𑀼𑀝𑁆𑀝𑀁 𑀢𑀺𑀭𑁄𑀧𑀸𑀓𑀸𑀭𑀁 𑀢𑀺𑀭𑁄𑀧𑀩𑁆𑀩𑀢𑀁 𑀅𑀲𑀚𑁆𑀚𑀫𑀸𑀦𑁄 𑀕𑀘𑁆𑀙𑀢𑀺. 𑀬𑀣𑀸 𑀫𑀦𑀼𑀲𑁆𑀲𑀸 𑀧𑀓𑀢𑀺𑀬𑀸 𑀅𑀦𑀺𑀤𑁆𑀥𑀺𑀫𑀦𑁆𑀢𑁄 𑀓𑁂𑀦𑀘𑀺 𑀅𑀦𑀸𑀯𑀝𑁂 𑀅𑀧𑀭𑀺𑀓𑁆𑀔𑀺𑀢𑁆𑀢𑁂 𑀅𑀲𑀚𑁆𑀚𑀫𑀸𑀦𑀸 𑀕𑀘𑁆𑀙𑀦𑁆𑀢𑀺, 𑀏𑀯𑀫𑁂𑀯𑀁 𑀲𑁄 𑀇𑀤𑁆𑀥𑀺𑀫𑀸 𑀘𑁂𑀢𑁄𑀯𑀲𑀺𑀧𑁆𑀧𑀢𑁆𑀢𑁄 𑀢𑀺𑀭𑁄𑀓𑀼𑀝𑁆𑀝𑀁 𑀢𑀺𑀭𑁄𑀧𑀸𑀓𑀸𑀭𑀁 𑀢𑀺𑀭𑁄𑀧𑀩𑁆𑀩𑀢𑀁 𑀅𑀲𑀚𑁆𑀚𑀫𑀸𑀦𑁄 𑀕𑀘𑁆𑀙𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀆𑀓𑀸𑀲𑁂.

𑀧𑀣𑀯𑀺𑀬𑀸𑀧𑀺 𑀉𑀫𑁆𑀫𑀼𑀚𑁆𑀚𑀦𑀺𑀫𑀼𑀚𑁆𑀚𑀁 𑀓𑀭𑁄𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀉𑀤𑀓𑁂𑀢𑀺 𑀧𑀓𑀢𑀺𑀬𑀸 𑀆𑀧𑁄𑀓𑀲𑀺𑀡𑀲𑀫𑀸𑀧𑀢𑁆𑀢𑀺𑀬𑀸 𑀮𑀸𑀪𑀻 𑀳𑁄𑀢𑀺. 𑀧𑀣𑀯𑀺𑀁 𑀆𑀯𑀚𑁆𑀚𑀢𑀺. 𑀆𑀯𑀚𑁆𑀚𑀺𑀢𑁆𑀯𑀸 𑀜𑀸𑀡𑁂𑀦 𑀅𑀥𑀺𑀝𑁆𑀞𑀸𑀢𑀺 𑁋 ‘‘𑀉𑀤𑀓𑀁 𑀳𑁄𑀢𑀽’’𑀢𑀺. 𑀉𑀤𑀓𑀁 𑀳𑁄𑀢𑀺. 𑀲𑁄 𑀧𑀣𑀯𑀺𑀬𑀸 𑀉𑀫𑁆𑀫𑀼𑀚𑁆𑀚𑀦𑀺𑀫𑀼𑀚𑁆𑀚𑀁 𑀓𑀭𑁄𑀢𑀺. 𑀬𑀣𑀸 𑀫𑀦𑀼𑀲𑁆𑀲𑀸 𑀧𑀓𑀢𑀺𑀬𑀸 𑀅𑀦𑀺𑀤𑁆𑀥𑀺𑀫𑀦𑁆𑀢𑁄 𑀉𑀤𑀓𑁂 𑀉𑀫𑁆𑀫𑀼𑀚𑁆𑀚𑀦𑀺𑀫𑀼𑀚𑁆𑀚𑀁 𑀓𑀭𑁄𑀦𑁆𑀢𑀺, 𑀏𑀯𑀫𑁂𑀯𑀁 𑀲𑁄 𑀇𑀤𑁆𑀥𑀺𑀫𑀸 𑀘𑁂𑀢𑁄𑀯𑀲𑀺𑀧𑁆𑀧𑀢𑁆𑀢𑁄 𑀧𑀣𑀯𑀺𑀬𑀸 𑀉𑀫𑁆𑀫𑀼𑀚𑁆𑀚𑀦𑀺𑀫𑀼𑀚𑁆𑀚𑀁 𑀓𑀭𑁄𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀉𑀤𑀓𑁂.

𑀉𑀤𑀓𑁂𑀧𑀺 𑀅𑀪𑀺𑀚𑁆𑀚𑀫𑀸𑀦𑁂 𑀕𑀘𑁆𑀙𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀧𑀣𑀯𑀺𑀬𑀦𑁆𑀢𑀺 𑀧𑀓𑀢𑀺𑀬𑀸 𑀧𑀣𑀯𑀻𑀓𑀲𑀺𑀡𑀲𑀫𑀸𑀧𑀢𑁆𑀢𑀺𑀬𑀸 𑀮𑀸𑀪𑀻 𑀳𑁄𑀢𑀺. 𑀉𑀤𑀓𑀁 𑀆𑀯𑀚𑁆𑀚𑀢𑀺. 𑀆𑀯𑀚𑁆𑀚𑀺𑀢𑁆𑀯𑀸 𑀜𑀸𑀡𑁂𑀦 𑀅𑀥𑀺𑀝𑁆𑀞𑀸𑀢𑀺 𑁋 ‘‘𑀧𑀣𑀯𑀻 𑀳𑁄𑀢𑀽’’𑀢𑀺. 𑀧𑀣𑀯𑀻 𑀳𑁄𑀢𑀺. 𑀲𑁄 𑀅𑀪𑀺𑀚𑁆𑀚𑀫𑀸𑀦𑁂 𑀉𑀤𑀓𑁂 𑀕𑀘𑁆𑀙𑀢𑀺. 𑀬𑀣𑀸 𑀫𑀦𑀼𑀲𑁆𑀲𑀸 𑀧𑀓𑀢𑀺𑀬𑀸 𑀅𑀦𑀺𑀤𑁆𑀥𑀺𑀫𑀦𑁆𑀢𑁄 𑀅𑀪𑀺𑀚𑁆𑀚𑀫𑀸𑀦𑀸𑀬 𑀧𑀣𑀯𑀺𑀬𑀸 𑀕𑀘𑁆𑀙𑀦𑁆𑀢𑀺, 𑀏𑀯𑀫𑁂𑀯𑀁 𑀲𑁄 𑀇𑀤𑁆𑀥𑀺𑀫𑀸 𑀘𑁂𑀢𑁄𑀯𑀲𑀺𑀧𑁆𑀧𑀢𑁆𑀢𑁄 𑀅𑀪𑀺𑀚𑁆𑀚𑀫𑀸𑀦𑁂 𑀉𑀤𑀓𑁂 𑀕𑀘𑁆𑀙𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀧𑀣𑀯𑀺𑀬𑀁.

𑀆𑀓𑀸𑀲𑁂𑀧𑀺 𑀧𑀮𑁆𑀮𑀗𑁆𑀓𑁂𑀦 𑀓𑀫𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀧𑀓𑁆𑀔𑀻 𑀲𑀓𑀼𑀡𑁄𑀢𑀺 𑀧𑀓𑀢𑀺𑀬𑀸 𑀧𑀣𑀯𑀻𑀓𑀲𑀺𑀡𑀲𑀫𑀸𑀧𑀢𑁆𑀢𑀺𑀬𑀸 𑀮𑀸𑀪𑀻 𑀳𑁄𑀢𑀺. 𑀆𑀓𑀸𑀲𑀁 𑀆𑀯𑀚𑁆𑀚𑀢𑀺. 𑀆𑀯𑀚𑁆𑀚𑀺𑀢𑁆𑀯𑀸 𑀜𑀸𑀡𑁂𑀦 𑀅𑀥𑀺𑀝𑁆𑀞𑀸𑀢𑀺 𑁋 ‘‘𑀧𑀣𑀯𑀻 𑀳𑁄𑀢𑀽’’𑀢𑀺. 𑀧𑀣𑀯𑀻 𑀳𑁄𑀢𑀺. 𑀲𑁄 𑀆𑀓𑀸𑀲𑁂 𑀅𑀦𑁆𑀢𑀮𑀺𑀓𑁆𑀔𑁂 𑀘𑀗𑁆𑀓𑀫𑀢𑀺𑀧𑀺 𑀢𑀺𑀝𑁆𑀞𑀢𑀺𑀧𑀺 𑀦𑀺𑀲𑀻𑀤𑀢𑀺𑀧𑀺 𑀲𑁂𑀬𑁆𑀬𑀫𑁆𑀧𑀺 𑀓𑀧𑁆𑀧𑁂𑀢𑀺. 𑀬𑀣𑀸 𑀫𑀦𑀼𑀲𑁆𑀲𑀸 𑀧𑀓𑀢𑀺𑀬𑀸 𑀅𑀦𑀺𑀤𑁆𑀥𑀺𑀫𑀦𑁆𑀢𑁄 𑀧𑀣𑀯𑀺𑀬𑀸 𑀘𑀗𑁆𑀓𑀫𑀦𑁆𑀢𑀺𑀧𑀺 𑀢𑀺𑀝𑁆𑀞𑀦𑁆𑀢𑀺𑀧𑀺 𑀦𑀺𑀲𑀻𑀤𑀦𑁆𑀢𑀺𑀧𑀺 𑀲𑁂𑀬𑁆𑀬𑀫𑁆𑀧𑀺 𑀓𑀧𑁆𑀧𑁂𑀦𑁆𑀢𑀺, 𑀏𑀯𑀫𑁂𑀯𑀁 𑀲𑁄 𑀇𑀤𑁆𑀥𑀺𑀫𑀸 𑀘𑁂𑀢𑁄𑀯𑀲𑀺𑀧𑁆𑀧𑀢𑁆𑀢𑁄 𑀆𑀓𑀸𑀲𑁂 𑀅𑀦𑁆𑀢𑀮𑀺𑀓𑁆𑀔𑁂 𑀘𑀗𑁆𑀓𑀫𑀢𑀺𑀧𑀺 𑀢𑀺𑀝𑁆𑀞𑀢𑀺𑀧𑀺 𑀦𑀺𑀲𑀻𑀤𑀢𑀺𑀧𑀺 𑀲𑁂𑀬𑁆𑀬𑀫𑁆𑀧𑀺 𑀓𑀧𑁆𑀧𑁂𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀧𑀓𑁆𑀔𑀻 𑀲𑀓𑀼𑀡𑁄.

𑁧𑁨. 𑀇𑀫𑁂𑀧𑀺 𑀘𑀦𑁆𑀤𑀺𑀫𑀲𑀽𑀭𑀺𑀬𑁂 𑀏𑀯𑀁𑀫𑀳𑀺𑀤𑁆𑀥𑀺𑀓𑁂 𑀏𑀯𑀁𑀫𑀳𑀸𑀦𑀼𑀪𑀸𑀯𑁂 𑀧𑀸𑀡𑀺𑀦𑀸 𑀧𑀭𑀸𑀫𑀲𑀢𑀺 𑀧𑀭𑀺𑀫𑀚𑁆𑀚𑀢𑀻𑀢𑀺 𑀇𑀥 𑀲𑁄 𑀇𑀤𑁆𑀥𑀺𑀫𑀸 𑀘𑁂𑀢𑁄𑀯𑀲𑀺𑀧𑁆𑀧𑀢𑁆𑀢𑁄 𑀦𑀺𑀲𑀺𑀦𑁆𑀦𑀓𑁄 𑀯𑀸 𑀦𑀺𑀧𑀦𑁆𑀦𑀓𑁄 𑀯𑀸 𑀘𑀦𑁆𑀤𑀺𑀫𑀲𑀽𑀭𑀺𑀬𑁂 𑀆𑀯𑀚𑁆𑀚𑀢𑀺. 𑀆𑀯𑀚𑁆𑀚𑀺𑀢𑁆𑀯𑀸 𑀜𑀸𑀡𑁂𑀦 𑀅𑀥𑀺𑀝𑁆𑀞𑀸𑀢𑀺 𑁋 ‘‘𑀳𑀢𑁆𑀣𑀧𑀸𑀲𑁂 𑀳𑁄𑀢𑀽’’𑀢𑀺. 𑀳𑀢𑁆𑀣𑀧𑀸𑀲𑁂 𑀳𑁄𑀢𑀺. 𑀲𑁄 𑀦𑀺𑀲𑀺𑀦𑁆𑀦𑀓𑁄 𑀯𑀸 𑀦𑀺𑀧𑀦𑁆𑀦𑀓𑁄 𑀯𑀸 𑀘𑀦𑁆𑀤𑀺𑀫𑀲𑀽𑀭𑀺𑀬𑁂 𑀧𑀸𑀡𑀺𑀦𑀸 𑀆𑀫𑀲𑀢𑀺 𑀧𑀭𑀸𑀫𑀲𑀢𑀺 𑀧𑀭𑀺𑀫𑀚𑁆𑀚𑀢𑀺. 𑀬𑀣𑀸 𑀫𑀦𑀼𑀲𑁆𑀲𑀸 𑀧𑀓𑀢𑀺𑀬𑀸 𑀅𑀦𑀺𑀤𑁆𑀥𑀺𑀫𑀦𑁆𑀢𑁄 𑀓𑀺𑀜𑁆𑀘𑀺𑀤𑁂𑀯 𑀭𑀽𑀧𑀕𑀢𑀁 𑀳𑀢𑁆𑀣𑀧𑀸𑀲𑁂 𑀆𑀫𑀲𑀦𑁆𑀢𑀺 𑀧𑀭𑀸𑀫𑀲𑀦𑁆𑀢𑀺 𑀧𑀭𑀺𑀫𑀚𑁆𑀚𑀦𑁆𑀢𑀺, 𑀏𑀯𑀫𑁂𑀯𑀁 𑀲𑁄 𑀇𑀤𑁆𑀥𑀺𑀫𑀸 𑀘𑁂𑀢𑁄𑀯𑀲𑀺𑀧𑁆𑀧𑀢𑁆𑀢𑁄 𑀦𑀺𑀲𑀺𑀦𑁆𑀦𑀓𑁄 𑀯𑀸 𑀦𑀺𑀧𑀦𑁆𑀦𑀓𑁄 𑀯𑀸 𑀘𑀦𑁆𑀤𑀺𑀫𑀲𑀽𑀭𑀺𑀬𑁂 𑀧𑀸𑀡𑀺𑀦𑀸 𑀆𑀫𑀲𑀢𑀺 𑀧𑀭𑀸𑀫𑀲𑀢𑀺 𑀧𑀭𑀺𑀫𑀚𑁆𑀚𑀢𑀺.

𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸𑀧𑀺 𑀓𑀸𑀬𑁂𑀦 𑀯𑀲𑀁 𑀯𑀢𑁆𑀢𑁂𑀢𑀻𑀢𑀺 𑀲𑀘𑁂 𑀲𑁄 𑀇𑀤𑁆𑀥𑀺𑀫𑀸 𑀘𑁂𑀢𑁄𑀯𑀲𑀺𑀧𑁆𑀧𑀢𑁆𑀢𑁄 𑀩𑁆𑀭𑀳𑁆𑀫𑀮𑁄𑀓𑀁 𑀕𑀦𑁆𑀢𑀼𑀓𑀸𑀫𑁄 𑀳𑁄𑀢𑀺, 𑀤𑀽𑀭𑁂𑀧𑀺 𑀲𑀦𑁆𑀢𑀺𑀓𑁂 𑀅𑀥𑀺𑀝𑁆𑀞𑀸𑀢𑀺 𑁋 ‘‘𑀲𑀦𑁆𑀢𑀺𑀓𑁂 𑀳𑁄𑀢𑀽’’𑀢𑀺. 𑀲𑀦𑁆𑀢𑀺𑀓𑁂 𑀳𑁄𑀢𑀺. 𑀲𑀦𑁆𑀢𑀺𑀓𑁂𑀧𑀺 𑀤𑀽𑀭𑁂 𑀅𑀥𑀺𑀝𑁆𑀞𑀸𑀢𑀺 𑁋 ‘‘𑀤𑀽𑀭𑁂 𑀳𑁄𑀢𑀽’’𑀢𑀺. 𑀤𑀽𑀭𑁂 𑀳𑁄𑀢𑀺. 𑀩𑀳𑀼𑀓𑀫𑁆𑀧𑀺 𑀣𑁄𑀓𑀁 𑀅𑀥𑀺𑀝𑁆𑀞𑀸𑀢𑀺 𑁋 ‘‘𑀣𑁄𑀓𑀁 𑀳𑁄𑀢𑀽’’𑀢𑀺. 𑀣𑁄𑀓𑀁 𑀳𑁄𑀢𑀺. 𑀣𑁄𑀓𑀫𑁆𑀧𑀺 𑀩𑀳𑀼𑀓𑀁 𑀅𑀥𑀺𑀝𑁆𑀞𑀸𑀢𑀺 𑁋 ‘‘𑀩𑀳𑀼𑀓𑀁 𑀳𑁄𑀢𑀽’’𑀢𑀺. 𑀩𑀳𑀼𑀓𑀁 𑀳𑁄𑀢𑀺. 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀢𑀲𑁆𑀲 𑀩𑁆𑀭𑀳𑁆𑀫𑀼𑀦𑁄 𑀭𑀽𑀧𑀁 𑀧𑀲𑁆𑀲𑀢𑀺. 𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸 𑀢𑀲𑁆𑀲 𑀩𑁆𑀭𑀳𑁆𑀫𑀼𑀦𑁄 𑀲𑀤𑁆𑀤𑀁 𑀲𑀼𑀡𑀸𑀢𑀺. 𑀘𑁂𑀢𑁄𑀧𑀭𑀺𑀬𑀜𑀸𑀡𑁂𑀦 𑀢𑀲𑁆𑀲 𑀩𑁆𑀭𑀳𑁆𑀫𑀼𑀦𑁄 𑀘𑀺𑀢𑁆𑀢𑀁 𑀧𑀚𑀸𑀦𑀸𑀢𑀺. 𑀲𑀘𑁂 𑀲𑁄 𑀇𑀤𑁆𑀥𑀺𑀫𑀸 𑀘𑁂𑀢𑁄𑀯𑀲𑀺𑀧𑁆𑀧𑀢𑁆𑀢𑁄 𑀤𑀺𑀲𑁆𑀲𑀫𑀸𑀦𑁂𑀦 𑀓𑀸𑀬𑁂𑀦 𑀩𑁆𑀭𑀳𑁆𑀫𑀮𑁄𑀓𑀁 𑀕𑀦𑁆𑀢𑀼𑀓𑀸𑀫𑁄 𑀳𑁄𑀢𑀺, 𑀓𑀸𑀬𑀯𑀲𑁂𑀦 𑀘𑀺𑀢𑁆𑀢𑀁 𑀧𑀭𑀺𑀡𑀸𑀫𑁂𑀢𑀺, 𑀓𑀸𑀬𑀯𑀲𑁂𑀦 𑀘𑀺𑀢𑁆𑀢𑀁 𑀅𑀥𑀺𑀝𑁆𑀞𑀸𑀢𑀺. 𑀓𑀸𑀬𑀯𑀲𑁂𑀦 𑀘𑀺𑀢𑁆𑀢𑀁 𑀧𑀭𑀺𑀡𑀸𑀫𑁂𑀢𑁆𑀯𑀸, 𑀓𑀸𑀬𑀯𑀲𑁂𑀦 𑀘𑀺𑀢𑁆𑀢𑀁 𑀅𑀥𑀺𑀝𑁆𑀞𑀳𑀺𑀢𑁆𑀯𑀸, 𑀲𑀼𑀔𑀲𑀜𑁆𑀜𑀜𑁆𑀘 𑀮𑀳𑀼𑀲𑀜𑁆𑀜𑀜𑁆𑀘 𑀑𑀓𑁆𑀓𑀫𑀺𑀢𑁆𑀯𑀸 𑀤𑀺𑀲𑁆𑀲𑀫𑀸𑀦𑁂𑀦 𑀓𑀸𑀬𑁂𑀦 𑀩𑁆𑀭𑀳𑁆𑀫𑀮𑁄𑀓𑀁 𑀕𑀘𑁆𑀙𑀢𑀺. 𑀲𑀘𑁂 𑀲𑁄 𑀇𑀤𑁆𑀥𑀺𑀫𑀸 𑀘𑁂𑀢𑁄𑀯𑀲𑀺𑀧𑁆𑀧𑀢𑁆𑀢𑁄 𑀅𑀤𑀺𑀲𑁆𑀲𑀫𑀸𑀦𑁂𑀦 𑀓𑀸𑀬𑁂𑀦 𑀩𑁆𑀭𑀳𑁆𑀫𑀮𑁄𑀓𑀁 𑀕𑀦𑁆𑀢𑀼𑀓𑀸𑀫𑁄 𑀳𑁄𑀢𑀺, 𑀘𑀺𑀢𑁆𑀢𑀯𑀲𑁂𑀦 𑀓𑀸𑀬𑀁 𑀧𑀭𑀺𑀡𑀸𑀫𑁂𑀢𑀺, 𑀘𑀺𑀢𑁆𑀢𑀯𑀲𑁂𑀦 𑀓𑀸𑀬𑀁 𑀅𑀥𑀺𑀝𑁆𑀞𑀸𑀢𑀺. 𑀘𑀺𑀢𑁆𑀢𑀯𑀲𑁂𑀦 𑀓𑀸𑀬𑀁 𑀧𑀭𑀺𑀡𑀸𑀫𑁂𑀢𑁆𑀯𑀸, 𑀘𑀺𑀢𑁆𑀢𑀯𑀲𑁂𑀦 𑀓𑀸𑀬𑀁 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀲𑀼𑀔𑀲𑀜𑁆𑀜𑀜𑁆𑀘 𑀮𑀳𑀼𑀲𑀜𑁆𑀜𑀜𑁆𑀘 𑀑𑀓𑁆𑀓𑀫𑀺𑀢𑁆𑀯𑀸 𑀅𑀤𑀺𑀲𑁆𑀲𑀫𑀸𑀦𑁂𑀦 𑀓𑀸𑀬𑁂𑀦 𑀩𑁆𑀭𑀳𑁆𑀫𑀮𑁄𑀓𑀁 𑀕𑀘𑁆𑀙𑀢𑀺. 𑀲𑁄 𑀢𑀲𑁆𑀲 𑀩𑁆𑀭𑀳𑁆𑀫𑀼𑀦𑁄 𑀧𑀼𑀭𑀢𑁄 𑀭𑀽𑀧𑀺𑀁 [𑀭𑀽𑀧𑀁 (𑀲𑁆𑀬𑀸. 𑀓.) 𑀤𑀻. 𑀦𑀺. 𑁧.𑁨𑁩𑁬 𑀧𑀲𑁆𑀲𑀺𑀢𑀩𑁆𑀩𑀸] 𑀅𑀪𑀺𑀦𑀺𑀫𑁆𑀫𑀺𑀦𑀸𑀢𑀺 𑀫𑀦𑁄𑀫𑀬𑀁 𑀲𑀩𑁆𑀩𑀗𑁆𑀕𑀧𑀘𑁆𑀘𑀗𑁆𑀕𑀺𑀁 [𑀲𑀩𑁆𑀩𑀗𑁆𑀕𑀧𑀘𑁆𑀘𑀗𑁆𑀕𑀁 (𑀲𑁆𑀬𑀸. 𑀓.)] 𑀅𑀳𑀻𑀦𑀺𑀦𑁆𑀤𑁆𑀭𑀺𑀬𑀁. 𑀲𑀘𑁂 𑀲𑁄 𑀇𑀤𑁆𑀥𑀺𑀫𑀸 𑀘𑀗𑁆𑀓𑀫𑀢𑀺, 𑀦𑀺𑀫𑁆𑀫𑀺𑀢𑁄𑀧𑀺 𑀢𑀢𑁆𑀣 𑀘𑀗𑁆𑀓𑀫𑀢𑀺. 𑀲𑀘𑁂 𑀲𑁄 𑀇𑀤𑁆𑀥𑀺𑀫𑀸 𑀢𑀺𑀝𑁆𑀞𑀢𑀺, 𑀦𑀺𑀫𑁆𑀫𑀺𑀢𑁄𑀧𑀺 𑀢𑀢𑁆𑀣 𑀢𑀺𑀝𑁆𑀞𑀢𑀺. 𑀲𑀘𑁂 𑀲𑁄 𑀇𑀤𑁆𑀥𑀺𑀫𑀸 𑀦𑀺𑀲𑀻𑀤𑀢𑀺, 𑀦𑀺𑀫𑁆𑀫𑀺𑀢𑁄𑀧𑀺 𑀢𑀢𑁆𑀣 𑀦𑀺𑀲𑀻𑀤𑀢𑀺. 𑀲𑀘𑁂 𑀲𑁄 𑀇𑀤𑁆𑀥𑀺𑀫𑀸 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺, 𑀦𑀺𑀫𑁆𑀫𑀺𑀢𑁄𑀧𑀺 𑀢𑀢𑁆𑀣 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺. 𑀲𑀘𑁂 𑀲𑁄 𑀇𑀤𑁆𑀥𑀺𑀫𑀸 𑀥𑀽𑀫𑀸𑀬𑀢𑀺, 𑀦𑀺𑀫𑁆𑀫𑀺𑀢𑁄𑀧𑀺 𑀢𑀢𑁆𑀣 𑀥𑀽𑀫𑀸𑀬𑀢𑀺. 𑀲𑀘𑁂 𑀲𑁄 𑀇𑀤𑁆𑀥𑀺𑀫𑀸 𑀧𑀚𑁆𑀚𑀮𑀢𑀺, 𑀦𑀺𑀫𑁆𑀫𑀺𑀢𑁄𑀧𑀺 𑀢𑀢𑁆𑀣 𑀧𑀚𑁆𑀚𑀮𑀢𑀺. 𑀲𑀘𑁂 𑀲𑁄 𑀇𑀤𑁆𑀥𑀺𑀫𑀸 𑀥𑀫𑁆𑀫𑀁 𑀪𑀸𑀲𑀢𑀺, 𑀦𑀺𑀫𑁆𑀫𑀺𑀢𑁄𑀧𑀺 𑀢𑀢𑁆𑀣 𑀥𑀫𑁆𑀫𑀁 𑀪𑀸𑀲𑀢𑀺. 𑀲𑀘𑁂 𑀲𑁄 𑀇𑀤𑁆𑀥𑀺𑀫𑀸 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺, 𑀦𑀺𑀫𑁆𑀫𑀺𑀢𑁄𑀧𑀺 𑀢𑀢𑁆𑀣 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺. 𑀲𑀘𑁂 𑀲𑁄 𑀇𑀤𑁆𑀥𑀺𑀫𑀸 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀯𑀺𑀲𑀚𑁆𑀚𑁂𑀢𑀺, 𑀦𑀺𑀫𑁆𑀫𑀺𑀢𑁄𑀧𑀺 𑀢𑀢𑁆𑀣 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀯𑀺𑀲𑀚𑁆𑀚𑁂𑀢𑀺. 𑀲𑀘𑁂 𑀲𑁄 𑀇𑀤𑁆𑀥𑀺𑀫𑀸 𑀢𑁂𑀦 𑀩𑁆𑀭𑀳𑁆𑀫𑀼𑀦𑀸 𑀲𑀤𑁆𑀥𑀺𑀁 𑀲𑀦𑁆𑀢𑀺𑀝𑁆𑀞𑀢𑀺 𑀲𑀮𑁆𑀮𑀧𑀢𑀺 𑀲𑀸𑀓𑀘𑁆𑀙𑀁 𑀲𑀫𑀸𑀧𑀚𑁆𑀚𑀢𑀺, 𑀦𑀺𑀫𑁆𑀫𑀺𑀢𑁄𑀧𑀺 𑀢𑀢𑁆𑀣 𑀢𑁂𑀦 𑀩𑁆𑀭𑀳𑁆𑀫𑀼𑀦𑀸 𑀲𑀤𑁆𑀥𑀺𑀁 𑀲𑀦𑁆𑀢𑀺𑀝𑁆𑀞𑀢𑀺 𑀲𑀮𑁆𑀮𑀧𑀢𑀺 𑀲𑀸𑀓𑀘𑁆𑀙𑀁 𑀲𑀫𑀸𑀧𑀚𑁆𑀚𑀢𑀺. 𑀬𑀜𑁆𑀜𑀤𑁂𑀯 𑀲𑁄 𑀇𑀤𑁆𑀥𑀺𑀫𑀸 𑀓𑀭𑁄𑀢𑀺, 𑀢𑀁 𑀢𑀤𑁂𑀯 𑀳𑀺 𑀲𑁄 𑀦𑀺𑀫𑁆𑀫𑀺𑀢𑁄 𑀓𑀭𑁄𑀢𑀻𑀢𑀺 𑁋 𑀅𑀬𑀁 𑀅𑀥𑀺𑀝𑁆𑀞𑀸𑀦𑀸 𑀇𑀤𑁆𑀥𑀺.

𑁧𑁩. 𑀓𑀢𑀫𑀸 𑀯𑀺𑀓𑀼𑀩𑁆𑀩𑀦𑀸 𑀇𑀤𑁆𑀥𑀺? 𑀲𑀺𑀔𑀺𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀅𑀪𑀺𑀪𑀽 𑀦𑀸𑀫 𑀲𑀸𑀯𑀓𑁄 𑀩𑁆𑀭𑀳𑁆𑀫𑀮𑁄𑀓𑁂 𑀞𑀺𑀢𑁄 𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 [𑀲𑀳𑀲𑁆𑀲𑀻𑀮𑁄𑀓𑀥𑀸𑀢𑀼𑀁 (𑀲𑁆𑀬𑀸.) 𑀯𑀢𑁆𑀣𑀼 𑀲𑀁. 𑀦𑀺. 𑁧.𑁧𑁮𑁫] 𑀲𑀭𑁂𑀦 𑀯𑀺𑀜𑁆𑀜𑀸𑀧𑁂𑀲𑀺. 𑀲𑁄 𑀤𑀺𑀲𑁆𑀲𑀫𑀸𑀦𑁂𑀦𑀧𑀺 𑀓𑀸𑀬𑁂𑀦 𑀥𑀫𑁆𑀫𑀁 𑀤𑁂𑀲𑁂𑀲𑀺; 𑀅𑀤𑀺𑀲𑁆𑀲𑀫𑀸𑀦𑁂𑀦𑀧𑀺 𑀓𑀸𑀬𑁂𑀦 𑀥𑀫𑁆𑀫𑀁 𑀤𑁂𑀲𑁂𑀲𑀺; 𑀤𑀺𑀲𑁆𑀲𑀫𑀸𑀦𑁂𑀦𑀧𑀺 𑀳𑁂𑀝𑁆𑀞𑀺𑀫𑁂𑀦 𑀉𑀧𑀟𑁆𑀠𑀓𑀸𑀬𑁂𑀦 𑀅𑀤𑀺𑀲𑁆𑀲𑀫𑀸𑀦𑁂𑀦𑀧𑀺 𑀉𑀧𑀭𑀺𑀫𑁂𑀦 𑀉𑀧𑀟𑁆𑀠𑀓𑀸𑀬𑁂𑀦 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀤𑀺𑀲𑁆𑀲𑀫𑀸𑀦𑁂𑀦𑀧𑀺 𑀉𑀧𑀭𑀺𑀫𑁂𑀦 𑀉𑀧𑀟𑁆𑀠𑀓𑀸𑀬𑁂𑀦, 𑀅𑀤𑀺𑀲𑁆𑀲𑀫𑀸𑀦𑁂𑀦𑀧𑀺 𑀳𑁂𑀝𑁆𑀞𑀺𑀫𑁂𑀦 𑀉𑀧𑀟𑁆𑀠𑀓𑀸𑀬𑁂𑀦 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀲𑁄 𑀧𑀓𑀢𑀺𑀯𑀡𑁆𑀡𑀁 𑀯𑀺𑀚𑀳𑀺𑀢𑁆𑀯𑀸 𑀓𑀼𑀫𑀸𑀭𑀓𑀯𑀡𑁆𑀡𑀁 𑀯𑀸 𑀤𑀲𑁆𑀲𑁂𑀢𑀺, 𑀦𑀸𑀕𑀯𑀡𑁆𑀡𑀁 𑀯𑀸 𑀤𑀲𑁆𑀲𑁂𑀢𑀺, 𑀲𑀼𑀧𑀡𑁆𑀡𑀯𑀡𑁆𑀡𑀁 𑀯𑀸 𑀤𑀲𑁆𑀲𑁂𑀢𑀺, 𑀬𑀓𑁆𑀔𑀯𑀡𑁆𑀡𑀁 𑀯𑀸 𑀤𑀲𑁆𑀲𑁂𑀢𑀺, 𑀇𑀦𑁆𑀤𑀯𑀡𑁆𑀡𑀁 𑀯𑀸 [𑀅𑀲𑀼𑀭𑀯𑀡𑁆𑀡𑀁 𑀯𑀸 𑀤𑀲𑁆𑀲𑁂𑀢𑀺, 𑀇𑀦𑁆𑀤𑀯𑀡𑁆𑀡𑀁 𑀯𑀸 (𑀲𑁆𑀬𑀸.)] 𑀤𑀲𑁆𑀲𑁂𑀢𑀺, 𑀤𑁂𑀯𑀯𑀡𑁆𑀡𑀁 𑀯𑀸 𑀤𑀲𑁆𑀲𑁂𑀢𑀺, 𑀩𑁆𑀭𑀳𑁆𑀫𑀯𑀡𑁆𑀡𑀁 𑀯𑀸 𑀤𑀲𑁆𑀲𑁂𑀢𑀺, 𑀲𑀫𑀼𑀤𑁆𑀤𑀯𑀡𑁆𑀡𑀁 𑀯𑀸 𑀤𑀲𑁆𑀲𑁂𑀢𑀺, 𑀧𑀩𑁆𑀩𑀢𑀯𑀡𑁆𑀡𑀁 𑀯𑀸 𑀤𑀲𑁆𑀲𑁂𑀢𑀺, 𑀯𑀦𑀯𑀡𑁆𑀡𑀁 𑀯𑀸 𑀤𑀲𑁆𑀲𑁂𑀢𑀺, 𑀲𑀻𑀳𑀯𑀡𑁆𑀡𑀁 𑀯𑀸 𑀤𑀲𑁆𑀲𑁂𑀢𑀺, 𑀩𑁆𑀬𑀕𑁆𑀖𑀯𑀡𑁆𑀡𑀁 𑀯𑀸 𑀤𑀲𑁆𑀲𑁂𑀢𑀺, 𑀤𑀻𑀧𑀺𑀯𑀡𑁆𑀡𑀁 𑀯𑀸 𑀤𑀲𑁆𑀲𑁂𑀢𑀺, 𑀳𑀢𑁆𑀣𑀺𑀫𑁆𑀧𑀺 𑀤𑀲𑁆𑀲𑁂𑀢𑀺, 𑀅𑀲𑁆𑀲𑀫𑁆𑀧𑀺 𑀤𑀲𑁆𑀲𑁂𑀢𑀺, 𑀭𑀣𑀫𑁆𑀧𑀺 𑀤𑀲𑁆𑀲𑁂𑀢𑀺, 𑀧𑀢𑁆𑀢𑀺𑀫𑁆𑀧𑀺 𑀤𑀲𑁆𑀲𑁂𑀢𑀺, 𑀯𑀺𑀯𑀺𑀥𑀫𑁆𑀧𑀺 𑀲𑁂𑀦𑀸𑀩𑁆𑀬𑀽𑀳𑀁 𑀤𑀲𑁆𑀲𑁂𑀢𑀻𑀢𑀺 𑁋 𑀅𑀬𑀁 𑀯𑀺𑀓𑀼𑀩𑁆𑀩𑀦𑀸 𑀇𑀤𑁆𑀥𑀺.

𑁧𑁪. 𑀓𑀢𑀫𑀸 𑀫𑀦𑁄𑀫𑀬𑀸 𑀇𑀤𑁆𑀥𑀺? 𑀇𑀥 𑀪𑀺𑀓𑁆𑀔𑀼 𑀇𑀫𑀫𑁆𑀳𑀸 𑀓𑀸𑀬𑀸 𑀅𑀜𑁆𑀜𑀁 𑀓𑀸𑀬𑀁 𑀅𑀪𑀺𑀦𑀺𑀫𑁆𑀫𑀺𑀦𑀸𑀢𑀺 𑀭𑀽𑀧𑀺𑀁 𑀫𑀦𑁄𑀫𑀬𑀁 𑀲𑀩𑁆𑀩𑀗𑁆𑀕𑀧𑀘𑁆𑀘𑀗𑁆𑀕𑀺𑀁 𑀅𑀳𑀻𑀦𑀺𑀦𑁆𑀤𑁆𑀭𑀺𑀬𑀁. 𑀲𑁂𑀬𑁆𑀬𑀣𑀸𑀧𑀺 𑀧𑀼𑀭𑀺𑀲𑁄 𑀫𑀼𑀜𑁆𑀚𑀫𑁆𑀳𑀸 𑀈𑀲𑀺𑀓𑀁 𑀧𑀯𑀸𑀳𑁂𑀬𑁆𑀬. 𑀢𑀲𑁆𑀲 𑀏𑀯𑀫𑀲𑁆𑀲 𑁋 ‘‘𑀅𑀬𑀁 𑀫𑀼𑀜𑁆𑀚𑁄, 𑀅𑀬𑀁 𑀈𑀲𑀺𑀓𑀸. 𑀅𑀜𑁆𑀜𑁄 𑀫𑀼𑀜𑁆𑀚𑁄, 𑀅𑀜𑁆𑀜𑀸 𑀈𑀲𑀺𑀓𑀸. 𑀫𑀼𑀜𑁆𑀚𑀫𑁆𑀳𑀸 𑀢𑁆𑀯𑁂𑀯 𑀈𑀲𑀺𑀓𑀸 𑀧𑀯𑀸𑀴𑁆𑀳𑀸’’𑀢𑀺. 𑀲𑁂𑀬𑁆𑀬𑀣𑀸 𑀯𑀸 𑀧𑀦 𑀧𑀼𑀭𑀺𑀲𑁄 𑀅𑀲𑀺𑀁 𑀓𑁄𑀲𑀺𑀬𑀸 𑀧𑀯𑀸𑀳𑁂𑀬𑁆𑀬. 𑀢𑀲𑁆𑀲 𑀏𑀯𑀫𑀲𑁆𑀲 𑁋 ‘‘𑀅𑀬𑀁 𑀅𑀲𑀺, 𑀅𑀬𑀁 𑀓𑁄𑀲𑀺. 𑀅𑀜𑁆𑀜𑁄 𑀅𑀲𑀺, 𑀅𑀜𑁆𑀜𑀸 𑀓𑁄𑀲𑀺. 𑀓𑁄𑀲𑀺𑀬𑀸 𑀢𑁆𑀯𑁂𑀯 𑀅𑀲𑀺 𑀧𑀯𑀸𑀴𑁆𑀳𑁄’’𑀢𑀺. 𑀲𑁂𑀬𑁆𑀬𑀣𑀸 𑀯𑀸 𑀧𑀦 𑀧𑀼𑀭𑀺𑀲𑁄 𑀅𑀳𑀺𑀁 𑀓𑀭𑀡𑁆𑀟𑀸 𑀉𑀤𑁆𑀥𑀭𑁂𑀬𑁆𑀬. 𑀢𑀲𑁆𑀲 𑀏𑀯𑀫𑀲𑁆𑀲 𑁋 ‘‘𑀅𑀬𑀁 𑀅𑀳𑀺, 𑀅𑀬𑀁 𑀓𑀭𑀡𑁆𑀟𑁄. 𑀅𑀜𑁆𑀜𑁄 𑀅𑀳𑀺, 𑀅𑀜𑁆𑀜𑁄 𑀓𑀭𑀡𑁆𑀟𑁄. 𑀓𑀭𑀡𑁆𑀟𑀸 𑀢𑁆𑀯𑁂𑀯 𑀅𑀳𑀺 𑀉𑀩𑁆𑀪𑀢𑁄’’𑀢𑀺. 𑀏𑀯𑀫𑁂𑀯𑀁 𑀪𑀺𑀓𑁆𑀔𑀼 𑀇𑀫𑀫𑁆𑀳𑀸 𑀓𑀸𑀬𑀸 𑀅𑀜𑁆𑀜𑀁 𑀓𑀸𑀬𑀁 𑀅𑀪𑀺𑀦𑀺𑀫𑁆𑀫𑀺𑀦𑀸𑀢𑀺 𑀭𑀽𑀧𑀺𑀁 𑀫𑀦𑁄𑀫𑀬𑀁 𑀲𑀩𑁆𑀩𑀗𑁆𑀕𑀧𑀘𑁆𑀘𑀗𑁆𑀕𑀺𑀁 𑀅𑀳𑀻𑀦𑀺𑀦𑁆𑀤𑁆𑀭𑀺𑀬𑀁. 𑀅𑀬𑀁 𑀫𑀦𑁄𑀫𑀬𑀸 𑀇𑀤𑁆𑀥𑀺.

𑁧𑁫. 𑀓𑀢𑀫𑀸 𑀜𑀸𑀡𑀯𑀺𑀧𑁆𑀨𑀸𑀭𑀸 𑀇𑀤𑁆𑀥𑀺? 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸 𑀦𑀺𑀘𑁆𑀘𑀲𑀜𑁆𑀜𑀸𑀬 𑀧𑀳𑀸𑀦𑀝𑁆𑀞𑁄 𑀇𑀚𑁆𑀛𑀢𑀻𑀢𑀺 𑁋 𑀜𑀸𑀡𑀯𑀺𑀧𑁆𑀨𑀸𑀭𑀸 𑀇𑀤𑁆𑀥𑀺. 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸 𑀲𑀼𑀔𑀲𑀜𑁆𑀜𑀸𑀬… 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸 𑀅𑀢𑁆𑀢𑀲𑀜𑁆𑀜𑀸𑀬… 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸𑀬 𑀦𑀦𑁆𑀤𑀺𑀬𑀸… 𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀦𑀸𑀬 𑀭𑀸𑀕𑀲𑁆𑀲… 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀦𑀸𑀬 𑀲𑀫𑀼𑀤𑀬𑀲𑁆𑀲… 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀦𑀸𑀬 𑀆𑀤𑀸𑀦𑀲𑁆𑀲 𑀧𑀳𑀸𑀦𑀝𑁆𑀞𑁄 𑀇𑀚𑁆𑀛𑀢𑀻𑀢𑀺 𑁋 𑀜𑀸𑀡𑀯𑀺𑀧𑁆𑀨𑀸𑀭𑀸 𑀇𑀤𑁆𑀥𑀺. 𑀆𑀬𑀲𑁆𑀫𑀢𑁄 𑀩𑀸𑀓𑀼𑀮𑀲𑁆𑀲 𑀜𑀸𑀡𑀯𑀺𑀧𑁆𑀨𑀸𑀭𑀸 𑀇𑀤𑁆𑀥𑀺, 𑀆𑀬𑀲𑁆𑀫𑀢𑁄 𑀲𑀁𑀓𑀺𑀘𑁆𑀘𑀲𑁆𑀲 𑀜𑀸𑀡𑀯𑀺𑀧𑁆𑀨𑀸𑀭𑀸 𑀇𑀤𑁆𑀥𑀺, 𑀆𑀬𑀲𑁆𑀫𑀢𑁄 𑀪𑀽𑀢𑀧𑀸𑀮𑀲𑁆𑀲 𑀜𑀸𑀡𑀯𑀺𑀧𑁆𑀨𑀸𑀭𑀸 𑀇𑀤𑁆𑀥𑀺. 𑀅𑀬𑀁 𑀜𑀸𑀡𑀯𑀺𑀧𑁆𑀨𑀸𑀭𑀸 𑀇𑀤𑁆𑀥𑀺.

𑁧𑁬. 𑀓𑀢𑀫𑀸 𑀲𑀫𑀸𑀥𑀺𑀯𑀺𑀧𑁆𑀨𑀸𑀭𑀸 𑀇𑀤𑁆𑀥𑀺? 𑀧𑀞𑀫𑁂𑀦 𑀛𑀸𑀦𑁂𑀦 𑀦𑀻𑀯𑀭𑀡𑀸𑀦𑀁 𑀧𑀳𑀸𑀦𑀝𑁆𑀞𑁄 𑀇𑀚𑁆𑀛𑀢𑀻𑀢𑀺 𑁋 𑀲𑀫𑀸𑀥𑀺𑀯𑀺𑀧𑁆𑀨𑀸𑀭𑀸 𑀇𑀤𑁆𑀥𑀺. 𑀤𑀼𑀢𑀺𑀬𑁂𑀦 𑀛𑀸𑀦𑁂𑀦 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀧𑀳𑀸𑀦𑀝𑁆𑀞𑁄 𑀇𑀚𑁆𑀛𑀢𑀻𑀢𑀺 𑁋 𑀲𑀫𑀸𑀥𑀺𑀯𑀺𑀧𑁆𑀨𑀸𑀭𑀸 𑀇𑀤𑁆𑀥𑀺. 𑀢𑀢𑀺𑀬𑁂𑀦 𑀛𑀸𑀦𑁂𑀦 𑀧𑀻𑀢𑀺𑀬𑀸 𑀧𑀳𑀸𑀦𑀝𑁆𑀞𑁄 𑀇𑀚𑁆𑀛𑀢𑀻𑀢𑀺…𑀧𑁂… 𑀘𑀢𑀼𑀢𑁆𑀣𑁂𑀦 𑀛𑀸𑀦𑁂𑀦 𑀲𑀼𑀔𑀤𑀼𑀓𑁆𑀔𑀸𑀦𑀁 𑀧𑀳𑀸𑀦𑀝𑁆𑀞𑁄 𑀇𑀚𑁆𑀛𑀢𑀻𑀢𑀺…𑀧𑁂… 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀭𑀽𑀧𑀲𑀜𑁆𑀜𑀸𑀬 𑀧𑀝𑀺𑀖𑀲𑀜𑁆𑀜𑀸𑀬 𑀦𑀸𑀦𑀢𑁆𑀢𑀲𑀜𑁆𑀜𑀸𑀬 𑀧𑀳𑀸𑀦𑀝𑁆𑀞𑁄 𑀇𑀚𑁆𑀛𑀢𑀻𑀢𑀺…𑀧𑁂… 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀜𑁆𑀜𑀸𑀬 𑀧𑀳𑀸𑀦𑀝𑁆𑀞𑁄 𑀇𑀚𑁆𑀛𑀢𑀻𑀢𑀺…𑀧𑁂… 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀜𑁆𑀜𑀸𑀬 𑀧𑀳𑀸𑀦𑀝𑁆𑀞𑁄 𑀇𑀚𑁆𑀛𑀢𑀻𑀢𑀺…𑀧𑁂… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀜𑁆𑀜𑀸𑀬 𑀧𑀳𑀸𑀦𑀝𑁆𑀞𑁄 𑀇𑀚𑁆𑀛𑀢𑀻𑀢𑀺 𑁋 𑀲𑀫𑀸𑀥𑀺𑀯𑀺𑀧𑁆𑀨𑀸𑀭𑀸 𑀇𑀤𑁆𑀥𑀺. 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀲𑀫𑀸𑀥𑀺𑀯𑀺𑀧𑁆𑀨𑀸𑀭𑀸 𑀇𑀤𑁆𑀥𑀺, 𑀆𑀬𑀲𑁆𑀫𑀢𑁄 𑀲𑀜𑁆𑀚𑀻𑀯𑀲𑁆𑀲 𑀲𑀫𑀸𑀥𑀺𑀯𑀺𑀧𑁆𑀨𑀸𑀭𑀸 𑀇𑀤𑁆𑀥𑀺, 𑀆𑀬𑀲𑁆𑀫𑀢𑁄 𑀔𑀸𑀡𑀼𑀓𑁄𑀡𑁆𑀟𑀜𑁆𑀜𑀲𑁆𑀲 𑀲𑀫𑀸𑀥𑀺𑀯𑀺𑀧𑁆𑀨𑀸𑀭𑀸 𑀇𑀤𑁆𑀥𑀺, 𑀉𑀢𑁆𑀢𑀭𑀸𑀬 𑀉𑀧𑀸𑀲𑀺𑀓𑀸𑀬 𑀲𑀫𑀸𑀥𑀺𑀯𑀺𑀧𑁆𑀨𑀸𑀭𑀸 𑀇𑀤𑁆𑀥𑀺, 𑀲𑀸𑀫𑀸𑀯𑀢𑀺𑀬𑀸 𑀉𑀧𑀸𑀲𑀺𑀓𑀸𑀬 𑀲𑀫𑀸𑀥𑀺𑀯𑀺𑀧𑁆𑀨𑀸𑀭𑀸 𑀇𑀤𑁆𑀥𑀺. 𑀅𑀬𑀁 𑀲𑀫𑀸𑀥𑀺𑀯𑀺𑀧𑁆𑀨𑀸𑀭𑀸 𑀇𑀤𑁆𑀥𑀺.

𑁧𑁭. 𑀓𑀢𑀫𑀸 𑀅𑀭𑀺𑀬𑀸 𑀇𑀤𑁆𑀥𑀺? 𑀇𑀥 𑀪𑀺𑀓𑁆𑀔𑀼 [𑀫. 𑀦𑀺. 𑁩.𑁪𑁬𑁨 𑀧𑀲𑁆𑀲𑀺𑀢𑀩𑁆𑀩𑀸] 𑀲𑀘𑁂 𑀆𑀓𑀗𑁆𑀔𑀢𑀺 𑁋 ‘‘𑀧𑀝𑀺𑀓𑀽𑀮𑁂 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑁂𑀬𑁆𑀬’’𑀦𑁆𑀢𑀺, 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀻 𑀢𑀢𑁆𑀣 𑀯𑀺𑀳𑀭𑀢𑀺. 𑀲𑀘𑁂 𑀆𑀓𑀗𑁆𑀔𑀢𑀺 𑁋 ‘‘𑀅𑀧𑁆𑀧𑀝𑀺𑀓𑀽𑀮𑁂 𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑁂𑀬𑁆𑀬’’𑀦𑁆𑀢𑀺, 𑀧𑀝𑀺𑀓𑀽𑀮𑀲𑀜𑁆𑀜𑀻 𑀢𑀢𑁆𑀣 𑀯𑀺𑀳𑀭𑀢𑀺. 𑀲𑀘𑁂 𑀆𑀓𑀗𑁆𑀔𑀢𑀺 𑁋 ‘‘𑀧𑀝𑀺𑀓𑀽𑀮𑁂 𑀘 𑀅𑀧𑁆𑀧𑀝𑀺𑀓𑀽𑀮𑁂 𑀘 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑁂𑀬𑁆𑀬’’𑀦𑁆𑀢𑀺, 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀻 𑀢𑀢𑁆𑀣 𑀯𑀺𑀳𑀭𑀢𑀺. 𑀲𑀘𑁂 𑀆𑀓𑀗𑁆𑀔𑀢𑀺 𑁋 ‘‘𑀅𑀧𑁆𑀧𑀝𑀺𑀓𑀽𑀮𑁂 𑀘 𑀧𑀝𑀺𑀓𑀽𑀮𑁂 𑀘 𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑁂𑀬𑁆𑀬’’𑀦𑁆𑀢𑀺, 𑀧𑀝𑀺𑀓𑀽𑀮𑀲𑀜𑁆𑀜𑀻 𑀢𑀢𑁆𑀣 𑀯𑀺𑀳𑀭𑀢𑀺. 𑀲𑀘𑁂 𑀆𑀓𑀗𑁆𑀔𑀢𑀺 𑁋 ‘‘𑀧𑀝𑀺𑀓𑀽𑀮𑁂 𑀘 𑀅𑀧𑁆𑀧𑀝𑀺𑀓𑀽𑀮𑁂 𑀘 𑀢𑀤𑀼𑀪𑀬𑀁 𑀅𑀪𑀺𑀦𑀺𑀯𑀚𑁆𑀚𑁂𑀢𑁆𑀯𑀸 𑀉𑀧𑁂𑀓𑁆𑀔𑀓𑁄 𑀯𑀺𑀳𑀭𑁂𑀬𑁆𑀬𑀁 𑀲𑀢𑁄 𑀲𑀫𑁆𑀧𑀚𑀸𑀦𑁄’’𑀢𑀺, 𑀉𑀧𑁂𑀓𑁆𑀔𑀓𑁄 𑀢𑀢𑁆𑀣 𑀯𑀺𑀳𑀭𑀢𑀺 𑀲𑀢𑁄 𑀲𑀫𑁆𑀧𑀚𑀸𑀦𑁄.

𑀓𑀣𑀁 𑀧𑀝𑀺𑀓𑀽𑀮𑁂 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑀢𑀺? 𑀅𑀦𑀺𑀝𑁆𑀞𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀫𑁂𑀢𑁆𑀢𑀸𑀬 𑀯𑀸 𑀨𑀭𑀢𑀺, 𑀥𑀸𑀢𑀼𑀢𑁄 𑀯𑀸 𑀉𑀧𑀲𑀁𑀳𑀭𑀢𑀺. 𑀏𑀯𑀁 𑀧𑀝𑀺𑀓𑀽𑀮𑁂 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑀢𑀺.

𑀓𑀣𑀁 𑀅𑀧𑁆𑀧𑀝𑀺𑀓𑀽𑀮𑁂 𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑀢𑀺? 𑀇𑀝𑁆𑀞𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀅𑀲𑀼𑀪𑀸𑀬 𑀯𑀸 𑀨𑀭𑀢𑀺, 𑀅𑀦𑀺𑀘𑁆𑀘𑀢𑁄 𑀯𑀸 𑀉𑀧𑀲𑀁𑀳𑀭𑀢𑀺. 𑀏𑀯𑀁 𑀅𑀧𑁆𑀧𑀝𑀺𑀓𑀽𑀮𑁂 𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑀢𑀺.

𑀓𑀣𑀁 𑀧𑀝𑀺𑀓𑀽𑀮𑁂 𑀘 𑀅𑀧𑁆𑀧𑀝𑀺𑀓𑀽𑀮𑁂 𑀘 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑀢𑀺? 𑀅𑀦𑀺𑀝𑁆𑀞𑀲𑁆𑀫𑀺𑀜𑁆𑀘 𑀇𑀝𑁆𑀞𑀲𑁆𑀫𑀺𑀜𑁆𑀘 𑀯𑀢𑁆𑀣𑀼𑀲𑁆𑀫𑀺𑀁 𑀫𑁂𑀢𑁆𑀢𑀸𑀬 𑀯𑀸 𑀨𑀭𑀢𑀺, 𑀥𑀸𑀢𑀼𑀢𑁄 𑀯𑀸 𑀉𑀧𑀲𑀁𑀳𑀭𑀢𑀺. 𑀏𑀯𑀁 𑀧𑀝𑀺𑀓𑀽𑀮𑁂 𑀘 𑀅𑀧𑁆𑀧𑀝𑀺𑀓𑀽𑀮𑁂 𑀘 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑀢𑀺.

𑀓𑀣𑀁 𑀅𑀧𑁆𑀧𑀝𑀺𑀓𑀽𑀮𑁂 𑀘 𑀧𑀝𑀺𑀓𑀽𑀮𑁂 𑀘 𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑀢𑀺? 𑀇𑀝𑁆𑀞𑀲𑁆𑀫𑀺𑀜𑁆𑀘 𑀅𑀦𑀺𑀝𑁆𑀞𑀲𑁆𑀫𑀺𑀜𑁆𑀘 𑀯𑀢𑁆𑀣𑀼𑀲𑁆𑀫𑀺𑀁 𑀅𑀲𑀼𑀪𑀸𑀬 𑀯𑀸 𑀨𑀭𑀢𑀺, 𑀅𑀦𑀺𑀘𑁆𑀘𑀢𑁄 𑀯𑀸 𑀉𑀧𑀲𑀁𑀳𑀭𑀢𑀺. 𑀏𑀯𑀁 𑀅𑀧𑁆𑀧𑀝𑀺𑀓𑀽𑀮𑁂 𑀘 𑀧𑀝𑀺𑀓𑀽𑀮𑁂 𑀘 𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑀢𑀺.

𑀓𑀣𑀁 𑀧𑀝𑀺𑀓𑀽𑀮𑁂 𑀘 𑀅𑀧𑁆𑀧𑀝𑀺𑀓𑀽𑀮𑁂 𑀘 𑀢𑀤𑀼𑀪𑀬𑀁 𑀅𑀪𑀺𑀦𑀺𑀯𑀚𑁆𑀚𑁂𑀢𑁆𑀯𑀸 𑀉𑀧𑁂𑀓𑁆𑀔𑀓𑁄 𑀯𑀺𑀳𑀭𑀢𑀺 𑀲𑀢𑁄 𑀲𑀫𑁆𑀧𑀚𑀸𑀦𑁄? 𑀇𑀥 𑀪𑀺𑀓𑁆𑀔𑀼 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀦𑁂𑀯 𑀲𑀼𑀫𑀦𑁄 𑀳𑁄𑀢𑀺 𑀦 𑀤𑀼𑀫𑁆𑀫𑀦𑁄, 𑀉𑀧𑁂𑀓𑁆𑀔𑀓𑁄 𑀯𑀺𑀳𑀭𑀢𑀺 𑀲𑀢𑁄 𑀲𑀫𑁆𑀧𑀚𑀸𑀦𑁄. 𑀲𑁄𑀢𑁂𑀦 𑀲𑀤𑁆𑀤𑀁 𑀲𑀼𑀢𑁆𑀯𑀸…𑀧𑁂… 𑀖𑀸𑀦𑁂𑀦 𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸… 𑀚𑀺𑀯𑁆𑀳𑀸𑀬 𑀭𑀲𑀁 𑀲𑀸𑀬𑀺𑀢𑁆𑀯𑀸… 𑀓𑀸𑀬𑁂𑀦 𑀨𑁄𑀝𑁆𑀞𑀩𑁆𑀩𑀁 𑀨𑀼𑀲𑀺𑀢𑁆𑀯𑀸… 𑀫𑀦𑀲𑀸 𑀥𑀫𑁆𑀫𑀁 𑀯𑀺𑀜𑁆𑀜𑀸𑀬 𑀦𑁂𑀯 𑀲𑀼𑀫𑀦𑁄 𑀳𑁄𑀢𑀺 𑀦 𑀤𑀼𑀫𑁆𑀫𑀦𑁄, 𑀉𑀧𑁂𑀓𑁆𑀔𑀓𑁄 𑀯𑀺𑀳𑀭𑀢𑀺 𑀲𑀢𑁄 𑀲𑀫𑁆𑀧𑀚𑀸𑀦𑁄. 𑀏𑀯𑀁 𑀧𑀝𑀺𑀓𑀽𑀮𑁂 𑀘 𑀅𑀧𑁆𑀧𑀝𑀺𑀓𑀽𑀮𑁂 𑀘 𑀢𑀤𑀼𑀪𑀬𑀁 𑀅𑀪𑀺𑀦𑀺𑀯𑀚𑁆𑀚𑁂𑀢𑁆𑀯𑀸 𑀉𑀧𑁂𑀓𑁆𑀔𑀓𑁄 𑀯𑀺𑀳𑀭𑀢𑀺 𑀲𑀢𑁄 𑀲𑀫𑁆𑀧𑀚𑀸𑀦𑁄. 𑀅𑀬𑀁 𑀅𑀭𑀺𑀬𑀸 𑀇𑀤𑁆𑀥𑀺.

𑁧𑁮. 𑀓𑀢𑀫𑀸 𑀓𑀫𑁆𑀫𑀯𑀺𑀧𑀸𑀓𑀚𑀸 𑀇𑀤𑁆𑀥𑀺? 𑀲𑀩𑁆𑀩𑁂𑀲𑀁 𑀧𑀓𑁆𑀔𑀻𑀦𑀁, 𑀲𑀩𑁆𑀩𑁂𑀲𑀁 𑀤𑁂𑀯𑀸𑀦𑀁, 𑀏𑀓𑀘𑁆𑀘𑀸𑀦𑀁 𑀫𑀦𑀼𑀲𑁆𑀲𑀸𑀦𑀁, 𑀏𑀓𑀘𑁆𑀘𑀸𑀦𑀁 𑀯𑀺𑀦𑀺𑀧𑀸𑀢𑀺𑀓𑀸𑀦𑀁. 𑀅𑀬𑀁 𑀓𑀫𑁆𑀫𑀯𑀺𑀧𑀸𑀓𑀚𑀸 𑀇𑀤𑁆𑀥𑀺.

𑀓𑀢𑀫𑀸 𑀧𑀼𑀜𑁆𑀜𑀯𑀢𑁄 𑀇𑀤𑁆𑀥𑀺? 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 [𑀘𑀓𑁆𑀓𑀯𑀢𑁆𑀢𑀺 (𑀲𑁆𑀬𑀸.)] 𑀯𑁂𑀳𑀸𑀲𑀁 𑀕𑀘𑁆𑀙𑀢𑀺 𑀲𑀤𑁆𑀥𑀺𑀁 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬, 𑀅𑀦𑁆𑀢𑀫𑀲𑁄 𑀅𑀲𑁆𑀲𑀩𑀦𑁆𑀥𑀕𑁄𑀧𑀼𑀭𑀺𑀲𑁂 [𑀅𑀲𑁆𑀲𑀩𑀦𑁆𑀥𑀕𑁄𑀧𑀓𑁂 𑀧𑀼𑀭𑀺𑀲𑁂 (𑀲𑁆𑀬𑀸.)] 𑀉𑀧𑀸𑀤𑀸𑀬. 𑀚𑁄𑀢𑀺𑀓𑀲𑁆𑀲 𑀕𑀳𑀧𑀢𑀺𑀲𑁆𑀲 𑀧𑀼𑀜𑁆𑀜𑀯𑀢𑁄 𑀇𑀤𑁆𑀥𑀺, 𑀚𑀝𑀺𑀮𑀲𑁆𑀲 𑀕𑀳𑀧𑀢𑀺𑀲𑁆𑀲 𑀧𑀼𑀜𑁆𑀜𑀯𑀢𑁄 𑀇𑀤𑁆𑀥𑀺, 𑀫𑁂𑀡𑁆𑀟𑀓𑀲𑁆𑀲 𑀕𑀳𑀧𑀢𑀺𑀲𑁆𑀲 𑀧𑀼𑀜𑁆𑀜𑀯𑀢𑁄 𑀇𑀤𑁆𑀥𑀺, 𑀖𑁄𑀲𑀺𑀢𑀲𑁆𑀲 𑀕𑀳𑀧𑀢𑀺𑀲𑁆𑀲 𑀧𑀼𑀜𑁆𑀜𑀯𑀢𑁄 𑀇𑀤𑁆𑀥𑀺, 𑀧𑀜𑁆𑀘𑀦𑁆𑀦𑀁 𑀫𑀳𑀸𑀧𑀼𑀜𑁆𑀜𑀸𑀦𑀁 𑀧𑀼𑀜𑁆𑀜𑀯𑀢𑁄 𑀇𑀤𑁆𑀥𑀺. 𑀅𑀬𑀁 𑀧𑀼𑀜𑁆𑀜𑀯𑀢𑁄 𑀇𑀤𑁆𑀥𑀺.

𑀓𑀢𑀫𑀸 𑀯𑀺𑀚𑁆𑀚𑀸𑀫𑀬𑀸 𑀇𑀤𑁆𑀥𑀺? 𑀯𑀺𑀚𑁆𑀚𑀸𑀥𑀭𑀸 𑀯𑀺𑀚𑁆𑀚𑀁 𑀧𑀭𑀺𑀚𑀧𑁆𑀧𑁂𑀢𑁆𑀯𑀸 𑀯𑁂𑀳𑀸𑀲𑀁 𑀕𑀘𑁆𑀙𑀦𑁆𑀢𑀺, 𑀆𑀓𑀸𑀲𑁂 𑀅𑀦𑁆𑀢𑀮𑀺𑀓𑁆𑀔𑁂 𑀳𑀢𑁆𑀣𑀺𑀫𑁆𑀧𑀺 𑀤𑀲𑁆𑀲𑁂𑀦𑁆𑀢𑀺, 𑀅𑀲𑁆𑀲𑀫𑁆𑀧𑀺 𑀤𑀲𑁆𑀲𑁂𑀦𑁆𑀢𑀺, 𑀭𑀣𑀫𑁆𑀧𑀺 𑀤𑀲𑁆𑀲𑁂𑀦𑁆𑀢𑀺, 𑀧𑀢𑁆𑀢𑀺𑀫𑁆𑀧𑀺 𑀤𑀲𑁆𑀲𑁂𑀦𑁆𑀢𑀺, 𑀯𑀺𑀯𑀺𑀥𑀫𑁆𑀧𑀺 𑀲𑁂𑀦𑀸𑀩𑁆𑀬𑀽𑀳𑀁 𑀤𑀲𑁆𑀲𑁂𑀦𑁆𑀢𑀺. 𑀅𑀬𑀁 𑀯𑀺𑀚𑁆𑀚𑀸𑀫𑀬𑀸 𑀇𑀤𑁆𑀥𑀺.

𑀓𑀣𑀁 𑀢𑀢𑁆𑀣 𑀢𑀢𑁆𑀣 𑀲𑀫𑁆𑀫𑀸 𑀧𑀬𑁄𑀕𑀧𑀘𑁆𑀘𑀬𑀸 𑀇𑀚𑁆𑀛𑀦𑀝𑁆𑀞𑁂𑀦 𑀇𑀤𑁆𑀥𑀺? 𑀦𑁂𑀓𑁆𑀔𑀫𑁆𑀫𑁂𑀦 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀧𑀳𑀸𑀦𑀝𑁆𑀞𑁄 𑀇𑀚𑁆𑀛𑀢𑀻𑀢𑀺 𑁋 𑀢𑀢𑁆𑀣 𑀢𑀢𑁆𑀣 𑀲𑀫𑁆𑀫𑀸 𑀧𑀬𑁄𑀕𑀧𑀘𑁆𑀘𑀬𑀸 𑀇𑀚𑁆𑀛𑀦𑀝𑁆𑀞𑁂𑀦 𑀇𑀤𑁆𑀥𑀺. 𑀅𑀩𑁆𑀬𑀸𑀧𑀸𑀤𑁂𑀦 𑀩𑁆𑀬𑀸𑀧𑀸𑀤𑀲𑁆𑀲 𑀧𑀳𑀸𑀦𑀝𑁆𑀞𑁄 𑀇𑀚𑁆𑀛𑀢𑀻𑀢𑀺 𑁋 𑀢𑀢𑁆𑀣 𑀢𑀢𑁆𑀣 𑀲𑀫𑁆𑀫𑀸 𑀧𑀬𑁄𑀕𑀧𑀘𑁆𑀘𑀬𑀸 𑀇𑀚𑁆𑀛𑀦𑀝𑁆𑀞𑁂𑀦 𑀇𑀤𑁆𑀥𑀺…𑀧𑁂… 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀲𑀩𑁆𑀩𑀓𑀺𑀮𑁂𑀲𑀸𑀦𑀁 𑀧𑀳𑀸𑀦𑀝𑁆𑀞𑁄 𑀇𑀚𑁆𑀛𑀢𑀻𑀢𑀺 𑁋 𑀢𑀢𑁆𑀣 𑀢𑀢𑁆𑀣 𑀲𑀫𑁆𑀫𑀸 𑀧𑀬𑁄𑀕𑀧𑀘𑁆𑀘𑀬𑀸 𑀇𑀚𑁆𑀛𑀦𑀝𑁆𑀞𑁂𑀦 𑀇𑀤𑁆𑀥𑀺. 𑀏𑀯𑀁 𑀢𑀢𑁆𑀣 𑀢𑀢𑁆𑀣 𑀲𑀫𑁆𑀫𑀸 𑀧𑀬𑁄𑀕𑀧𑀘𑁆𑀘𑀬𑀸 𑀇𑀚𑁆𑀛𑀦𑀝𑁆𑀞𑁂𑀦 𑀇𑀤𑁆𑀥𑀺. 𑀇𑀫𑀸 𑀤𑀲 𑀇𑀤𑁆𑀥𑀺𑀬𑁄.

𑀇𑀤𑁆𑀥𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁩. 𑀅𑀪𑀺𑀲𑀫𑀬𑀓𑀣𑀸

𑁧𑁯. 𑀅𑀪𑀺𑀲𑀫𑀬𑁄𑀢𑀺. 𑀓𑁂𑀦 𑀅𑀪𑀺𑀲𑀫𑁂𑀢𑀺? 𑀘𑀺𑀢𑁆𑀢𑁂𑀦 𑀅𑀪𑀺𑀲𑀫𑁂𑀢𑀺.

𑀳𑀜𑁆𑀘𑀺 𑀘𑀺𑀢𑁆𑀢𑁂𑀦 𑀅𑀪𑀺𑀲𑀫𑁂𑀢𑀺, 𑀢𑁂𑀦 𑀳𑀺 𑀅𑀜𑁆𑀜𑀸𑀡𑀻 𑀅𑀪𑀺𑀲𑀫𑁂𑀢𑀺? 𑀦 𑀅𑀜𑁆𑀜𑀸𑀡𑀻 𑀅𑀪𑀺𑀲𑀫𑁂𑀢𑀺. 𑀜𑀸𑀡𑁂𑀦 𑀅𑀪𑀺𑀲𑀫𑁂𑀢𑀺.

𑀳𑀜𑁆𑀘𑀺 𑀜𑀸𑀡𑁂𑀦 𑀅𑀪𑀺𑀲𑀫𑁂𑀢𑀺, 𑀢𑁂𑀦 𑀳𑀺 𑀅𑀘𑀺𑀢𑁆𑀢𑁂𑀦 𑀘 𑀜𑀸𑀡𑁂𑀦 𑀘 𑀅𑀘𑀺𑀢𑁆𑀢𑀓𑁄 [𑀢𑁂𑀦 𑀳𑀺 𑀅𑀘𑀺𑀢𑁆𑀢𑀓𑁄 (𑀲𑁆𑀬𑀸.)] 𑀅𑀪𑀺𑀲𑀫𑁂𑀢𑀺? 𑀦 𑀅𑀘𑀺𑀢𑁆𑀢𑀓𑁄 𑀅𑀪𑀺𑀲𑀫𑁂𑀢𑀺. 𑀘𑀺𑀢𑁆𑀢𑁂𑀦 𑀘 𑀜𑀸𑀡𑁂𑀦 𑀘 𑀅𑀪𑀺𑀲𑀫𑁂𑀢𑀺.

𑀳𑀜𑁆𑀘𑀺 𑀘𑀺𑀢𑁆𑀢𑁂𑀦 𑀘 𑀜𑀸𑀡𑁂𑀦 𑀘 𑀅𑀪𑀺𑀲𑀫𑁂𑀢𑀺, 𑀢𑁂𑀦 𑀳𑀺 𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑁂𑀦 𑀘 𑀜𑀸𑀡𑁂𑀦 𑀘 𑀅𑀪𑀺𑀲𑀫𑁂𑀢𑀺? 𑀦 𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑁂𑀦 𑀘 𑀜𑀸𑀡𑁂𑀦 𑀘 𑀅𑀪𑀺𑀲𑀫𑁂𑀢𑀺.

𑀢𑁂𑀦 𑀳𑀺 𑀭𑀽𑀧𑀸𑀯𑀘𑀭𑀘𑀺𑀢𑁆𑀢𑁂𑀦 𑀘 𑀜𑀸𑀡𑁂𑀦 𑀘 𑀅𑀪𑀺𑀲𑀫𑁂𑀢𑀺? 𑀦 𑀭𑀽𑀧𑀸𑀯𑀘𑀭𑀘𑀺𑀢𑁆𑀢𑁂𑀦 𑀘 𑀜𑀸𑀡𑁂𑀦 𑀘 𑀅𑀪𑀺𑀲𑀫𑁂𑀢𑀺.

𑀢𑁂𑀦 𑀳𑀺 𑀅𑀭𑀽𑀧𑀸𑀯𑀘𑀭𑀘𑀺𑀢𑁆𑀢𑁂𑀦 𑀘 𑀜𑀸𑀡𑁂𑀦 𑀘 𑀅𑀪𑀺𑀲𑀫𑁂𑀢𑀺? 𑀦 𑀅𑀭𑀽𑀧𑀸𑀯𑀘𑀭𑀘𑀺𑀢𑁆𑀢𑁂𑀦 𑀘 𑀜𑀸𑀡𑁂𑀦 𑀘 𑀅𑀪𑀺𑀲𑀫𑁂𑀢𑀺.

𑀢𑁂𑀦 𑀳𑀺 𑀓𑀫𑁆𑀫𑀲𑁆𑀲𑀓𑀢𑀘𑀺𑀢𑁆𑀢𑁂𑀦 𑀘 𑀜𑀸𑀡𑁂𑀦 𑀘 𑀅𑀪𑀺𑀲𑀫𑁂𑀢𑀺? 𑀦 𑀓𑀫𑁆𑀫𑀲𑁆𑀲𑀓𑀢𑀘𑀺𑀢𑁆𑀢𑁂𑀦 𑀘 𑀜𑀸𑀡𑁂𑀦 𑀘 𑀅𑀪𑀺𑀲𑀫𑁂𑀢𑀺.

𑀢𑁂𑀦 𑀳𑀺 𑀲𑀘𑁆𑀘𑀸𑀦𑀼𑀮𑁄𑀫𑀺𑀓𑀘𑀺𑀢𑁆𑀢𑁂𑀦 𑀘 𑀜𑀸𑀡𑁂𑀦 𑀘 𑀅𑀪𑀺𑀲𑀫𑁂𑀢𑀺? 𑀦 𑀲𑀘𑁆𑀘𑀸𑀦𑀼𑀮𑁄𑀫𑀺𑀓𑀘𑀺𑀢𑁆𑀢𑁂𑀦 𑀘 𑀜𑀸𑀡𑁂𑀦 𑀘 𑀅𑀪𑀺𑀲𑀫𑁂𑀢𑀺.

𑀢𑁂𑀦 𑀳𑀺 𑀅𑀢𑀻𑀢𑀘𑀺𑀢𑁆𑀢𑁂𑀦 𑀘 𑀜𑀸𑀡𑁂𑀦 𑀘 𑀅𑀪𑀺𑀲𑀫𑁂𑀢𑀺? 𑀦 𑀅𑀢𑀻𑀢𑀘𑀺𑀢𑁆𑀢𑁂𑀦 𑀘 𑀜𑀸𑀡𑁂𑀦 𑀘 𑀅𑀪𑀺𑀲𑀫𑁂𑀢𑀺.

𑀢𑁂𑀦 𑀳𑀺 𑀅𑀦𑀸𑀕𑀢𑀘𑀺𑀢𑁆𑀢𑁂𑀦 𑀘 𑀜𑀸𑀡𑁂𑀦 𑀘 𑀅𑀪𑀺𑀲𑀫𑁂𑀢𑀺? 𑀦 𑀅𑀦𑀸𑀕𑀢𑀘𑀺𑀢𑁆𑀢𑁂𑀦 𑀘 𑀜𑀸𑀡𑁂𑀦 𑀘 𑀅𑀪𑀺𑀲𑀫𑁂𑀢𑀺.

𑀢𑁂𑀦 𑀳𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀮𑁄𑀓𑀺𑀬𑀘𑀺𑀢𑁆𑀢𑁂𑀦 𑀘 𑀜𑀸𑀡𑁂𑀦 𑀘 𑀅𑀪𑀺𑀲𑀫𑁂𑀢𑀺? 𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀮𑁄𑀓𑀺𑀬𑀘𑀺𑀢𑁆𑀢𑁂𑀦 𑀘 𑀜𑀸𑀡𑁂𑀦 𑀘 𑀅𑀪𑀺𑀲𑀫𑁂𑀢𑀺. 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀓𑁆𑀔𑀡𑁂 𑀧𑀘𑁆𑀘𑀼𑀧𑁆𑀧𑀦𑁆𑀦𑀘𑀺𑀢𑁆𑀢𑁂𑀦 𑀘 𑀜𑀸𑀡𑁂𑀦 𑀘 𑀅𑀪𑀺𑀲𑀫𑁂𑀢𑀺.

𑀓𑀣𑀁 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀓𑁆𑀔𑀡𑁂 𑀧𑀘𑁆𑀘𑀼𑀧𑁆𑀧𑀦𑁆𑀦𑀘𑀺𑀢𑁆𑀢𑁂𑀦 𑀘 𑀜𑀸𑀡𑁂𑀦 𑀘 𑀅𑀪𑀺𑀲𑀫𑁂𑀢𑀺? 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀓𑁆𑀔𑀡𑁂 𑀉𑀧𑁆𑀧𑀸𑀤𑀸𑀥𑀺𑀧𑀢𑁂𑀬𑁆𑀬𑀁 𑀘𑀺𑀢𑁆𑀢𑀁 𑀜𑀸𑀡𑀲𑁆𑀲 𑀳𑁂𑀢𑀼 𑀧𑀘𑁆𑀘𑀬𑁄 𑀘. 𑀢𑀁𑀲𑀫𑁆𑀧𑀬𑀼𑀢𑁆𑀢𑀁 𑀦𑀺𑀭𑁄𑀥𑀕𑁄𑀘𑀭𑀁 𑀤𑀲𑁆𑀲𑀦𑀸𑀥𑀺𑀧𑀢𑁂𑀬𑁆𑀬𑀁 𑀜𑀸𑀡𑀁 𑀘𑀺𑀢𑁆𑀢𑀲𑁆𑀲 𑀳𑁂𑀢𑀼 𑀧𑀘𑁆𑀘𑀬𑁄 𑀘. 𑀢𑀁𑀲𑀫𑁆𑀧𑀬𑀼𑀢𑁆𑀢𑀁 𑀜𑀸𑀡𑀁 𑀦𑀺𑀭𑁄𑀥𑀕𑁄𑀘𑀭𑀁. 𑀏𑀯𑀁 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀓𑁆𑀔𑀡𑁂 𑀧𑀘𑁆𑀘𑀼𑀧𑁆𑀧𑀦𑁆𑀦𑀘𑀺𑀢𑁆𑀢𑁂𑀦 𑀘 𑀜𑀸𑀡𑁂𑀦 𑀘 𑀅𑀪𑀺𑀲𑀫𑁂𑀢𑀺.

𑁨𑁦. 𑀓𑀺𑀁 𑀦𑀼 𑀏𑀢𑁆𑀢𑀓𑁄𑀬𑁂𑀯 𑀅𑀪𑀺𑀲𑀫𑀬𑁄𑀢𑀺? 𑀦 𑀳𑀺.𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀓𑁆𑀔𑀡𑁂 𑀤𑀲𑁆𑀲𑀦𑀸𑀪𑀺𑀲𑀫𑀬𑁄 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀅𑀪𑀺𑀦𑀺𑀭𑁄𑀧𑀦𑀸𑀪𑀺𑀲𑀫𑀬𑁄 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄, 𑀧𑀭𑀺𑀕𑁆𑀕𑀳𑀸𑀪𑀺𑀲𑀫𑀬𑁄 𑀲𑀫𑁆𑀫𑀸𑀯𑀸𑀘𑀸, 𑀲𑀫𑀼𑀝𑁆𑀞𑀸𑀦𑀸𑀪𑀺𑀲𑀫𑀬𑁄 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄, 𑀯𑁄𑀤𑀸𑀦𑀸𑀪𑀺𑀲𑀫𑀬𑁄 𑀲𑀫𑁆𑀫𑀸𑀆𑀚𑀻𑀯𑁄, 𑀧𑀕𑁆𑀕𑀳𑀸𑀪𑀺𑀲𑀫𑀬𑁄 𑀲𑀫𑁆𑀫𑀸𑀯𑀸𑀬𑀸𑀫𑁄, 𑀉𑀧𑀝𑁆𑀞𑀸𑀦𑀸𑀪𑀺𑀲𑀫𑀬𑁄 𑀲𑀫𑁆𑀫𑀸𑀲𑀢𑀺, 𑀅𑀯𑀺𑀓𑁆𑀔𑁂𑀧𑀸𑀪𑀺𑀲𑀫𑀬𑁄 𑀲𑀫𑁆𑀫𑀸𑀲𑀫𑀸𑀥𑀺; 𑀉𑀧𑀝𑁆𑀞𑀸𑀦𑀸𑀪𑀺𑀲𑀫𑀬𑁄 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀧𑀯𑀺𑀘𑀬𑀸𑀪𑀺𑀲𑀫𑀬𑁄 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀧𑀕𑁆𑀕𑀳𑀸𑀪𑀺𑀲𑀫𑀬𑁄 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀨𑀭𑀡𑀸𑀪𑀺𑀲𑀫𑀬𑁄 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀉𑀧𑀲𑀫𑀸𑀪𑀺𑀲𑀫𑀬𑁄 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀅𑀯𑀺𑀓𑁆𑀔𑁂𑀧𑀸𑀪𑀺𑀲𑀫𑀬𑁄 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀧𑀝𑀺𑀲𑀗𑁆𑀔𑀸𑀦𑀸𑀪𑀺𑀲𑀫𑀬𑁄 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑁄; 𑀅𑀲𑁆𑀲𑀤𑁆𑀥𑀺𑀬𑁂 𑀅𑀓𑀫𑁆𑀧𑀺𑀬𑀸𑀪𑀺𑀲𑀫𑀬𑁄 𑀲𑀤𑁆𑀥𑀸𑀩𑀮𑀁, 𑀓𑁄𑀲𑀚𑁆𑀚𑁂 𑀅𑀓𑀫𑁆𑀧𑀺𑀬𑀸𑀪𑀺𑀲𑀫𑀬𑁄 𑀯𑀻𑀭𑀺𑀬𑀩𑀮𑀁, 𑀧𑀫𑀸𑀤𑁂 𑀅𑀓𑀫𑁆𑀧𑀺𑀬𑀸𑀪𑀺𑀲𑀫𑀬𑁄 𑀲𑀢𑀺𑀩𑀮𑀁, 𑀉𑀤𑁆𑀥𑀘𑁆𑀘𑁂 𑀅𑀓𑀫𑁆𑀧𑀺𑀬𑀸𑀪𑀺𑀲𑀫𑀬𑁄 𑀲𑀫𑀸𑀥𑀺𑀩𑀮𑀁, 𑀅𑀯𑀺𑀚𑁆𑀚𑀸𑀬 𑀅𑀓𑀫𑁆𑀧𑀺𑀬𑀸𑀪𑀺𑀲𑀫𑀬𑁄 𑀧𑀜𑁆𑀜𑀸𑀩𑀮𑀁; 𑀅𑀥𑀺𑀫𑁄𑀓𑁆𑀔𑀸𑀪𑀺𑀲𑀫𑀬𑁄 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁, 𑀧𑀕𑁆𑀕𑀳𑀸𑀪𑀺𑀲𑀫𑀬𑁄 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁, 𑀉𑀧𑀝𑁆𑀞𑀸𑀦𑀸𑀪𑀺𑀲𑀫𑀬𑁄 𑀲𑀢𑀺𑀦𑁆𑀤𑁆𑀭𑀺𑀬𑀁, 𑀅𑀯𑀺𑀓𑁆𑀔𑁂𑀧𑀸𑀪𑀺𑀲𑀫𑀬𑁄 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁, 𑀤𑀲𑁆𑀲𑀦𑀸𑀪𑀺𑀲𑀫𑀬𑁄 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁. 𑀆𑀥𑀺𑀧𑀢𑁂𑀬𑁆𑀬𑀝𑁆𑀞𑁂𑀦 𑀇𑀦𑁆𑀤𑁆𑀭𑀺𑀬𑀸𑀪𑀺𑀲𑀫𑀬𑁄, 𑀅𑀓𑀫𑁆𑀧𑀺𑀬𑀝𑁆𑀞𑁂𑀦 𑀩𑀮𑀸𑀪𑀺𑀲𑀫𑀬𑁄, 𑀦𑀺𑀬𑁆𑀬𑀸𑀦𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸𑀪𑀺𑀲𑀫𑀬𑁄, 𑀳𑁂𑀢𑀼𑀝𑁆𑀞𑁂𑀦 𑀫𑀕𑁆𑀕𑀸𑀪𑀺𑀲𑀫𑀬𑁄, 𑀉𑀧𑀝𑁆𑀞𑀸𑀦𑀝𑁆𑀞𑁂𑀦 𑀲𑀢𑀺𑀧𑀝𑁆𑀞𑀸𑀦𑀸𑀪𑀺𑀲𑀫𑀬𑁄, 𑀧𑀤𑀳𑀝𑁆𑀞𑁂𑀦 𑀲𑀫𑁆𑀫𑀧𑁆𑀧𑀥𑀸𑀦𑀸𑀪𑀺𑀲𑀫𑀬𑁄, 𑀇𑀚𑁆𑀛𑀦𑀝𑁆𑀞𑁂𑀦 𑀇𑀤𑁆𑀥𑀺𑀧𑀸𑀤𑀸𑀪𑀺𑀲𑀫𑀬𑁄, 𑀢𑀣𑀝𑁆𑀞𑁂𑀦 𑀲𑀘𑁆𑀘𑀸𑀪𑀺𑀲𑀫𑀬𑁄, 𑀅𑀯𑀺𑀓𑁆𑀔𑁂𑀧𑀝𑁆𑀞𑁂𑀦 𑀲𑀫𑀣𑀸𑀪𑀺𑀲𑀫𑀬𑁄, 𑀅𑀦𑀼𑀧𑀲𑁆𑀲𑀦𑀝𑁆𑀞𑁂𑀦 𑀯𑀺𑀧𑀲𑁆𑀲𑀦𑀸𑀪𑀺𑀲𑀫𑀬𑁄, 𑀏𑀓𑀭𑀲𑀝𑁆𑀞𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑀸𑀪𑀺𑀲𑀫𑀬𑁄, 𑀅𑀦𑀢𑀺𑀯𑀢𑁆𑀢𑀦𑀝𑁆𑀞𑁂𑀦 𑀬𑀼𑀕𑀦𑀤𑁆𑀥𑀸𑀪𑀺𑀲𑀫𑀬𑁄, 𑀲𑀁𑀯𑀭𑀝𑁆𑀞𑁂𑀦 𑀲𑀻𑀮𑀯𑀺𑀲𑀼𑀤𑁆𑀥𑀺𑀅𑀪𑀺𑀲𑀫𑀬𑁄, 𑀅𑀯𑀺𑀓𑁆𑀔𑁂𑀧𑀝𑁆𑀞𑁂𑀦 𑀯𑀺𑀲𑀼𑀤𑁆𑀥𑀺𑀅𑀪𑀺𑀲𑀫𑀬𑁄, 𑀤𑀲𑁆𑀲𑀦𑀝𑁆𑀞𑁂𑀦 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺𑀅𑀪𑀺𑀲𑀫𑀬𑁄, 𑀫𑀼𑀢𑁆𑀢𑀝𑁆𑀞𑁂𑀦 𑀯𑀺𑀫𑁄𑀓𑁆𑀔𑀸𑀪𑀺𑀲𑀫𑀬𑁄, 𑀧𑀝𑀺𑀯𑁂𑀥𑀝𑁆𑀞𑁂𑀦 𑀯𑀺𑀚𑁆𑀚𑀸𑀪𑀺𑀲𑀫𑀬𑁄, 𑀧𑀭𑀺𑀘𑁆𑀘𑀸𑀕𑀝𑁆𑀞𑁂𑀦 𑀯𑀺𑀫𑀼𑀢𑁆𑀢𑀺𑀅𑀪𑀺𑀲𑀫𑀬𑁄, 𑀲𑀫𑀼𑀘𑁆𑀙𑁂𑀤𑀝𑁆𑀞𑁂𑀦 𑀔𑀬𑁂 𑀜𑀸𑀡𑀁 𑀅𑀪𑀺𑀲𑀫𑀬𑁄. 𑀙𑀦𑁆𑀤𑁄 𑀫𑀽𑀮𑀝𑁆𑀞𑁂𑀦 𑀅𑀪𑀺𑀲𑀫𑀬𑁄, 𑀫𑀦𑀲𑀺𑀓𑀸𑀭𑁄 𑀲𑀫𑀼𑀝𑁆𑀞𑀸𑀦𑀝𑁆𑀞𑁂𑀦 𑀅𑀪𑀺𑀲𑀫𑀬𑁄, 𑀨𑀲𑁆𑀲𑁄 𑀲𑀫𑁄𑀥𑀸𑀦𑀝𑁆𑀞𑁂𑀦 𑀅𑀪𑀺𑀲𑀫𑀬𑁄, 𑀯𑁂𑀤𑀦𑀸 𑀲𑀫𑁄𑀲𑀭𑀡𑀝𑁆𑀞𑁂𑀦 𑀅𑀪𑀺𑀲𑀫𑀬𑁄, 𑀲𑀫𑀸𑀥𑀺 𑀧𑀫𑀼𑀔𑀝𑁆𑀞𑁂𑀦 𑀅𑀪𑀺𑀲𑀫𑀬𑁄, 𑀲𑀢𑀺 𑀆𑀥𑀺𑀧𑀢𑁂𑀬𑁆𑀬𑀝𑁆𑀞𑁂𑀦 𑀅𑀪𑀺𑀲𑀫𑀬𑁄, 𑀧𑀜𑁆𑀜𑀸 𑀢𑀢𑀼𑀢𑁆𑀢𑀭𑀝𑁆𑀞𑁂𑀦 𑀅𑀪𑀺𑀲𑀫𑀬𑁄, 𑀯𑀺𑀫𑀼𑀢𑁆𑀢𑀺 𑀲𑀸𑀭𑀝𑁆𑀞𑁂𑀦 𑀅𑀪𑀺𑀲𑀫𑀬𑁄, 𑀅𑀫𑀢𑁄𑀕𑀥𑀁 𑀦𑀺𑀩𑁆𑀩𑀸𑀦𑀁 𑀧𑀭𑀺𑀬𑁄𑀲𑀸𑀦𑀝𑁆𑀞𑁂𑀦 𑀅𑀪𑀺𑀲𑀫𑀬𑁄.

𑁨𑁧. 𑀓𑀺𑀁 𑀦𑀼 𑀏𑀢𑁆𑀢𑀓𑁄𑀬𑁂𑀯 𑀅𑀪𑀺𑀲𑀫𑀬𑁄𑀢𑀺? 𑀦 𑀳𑀺. 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀓𑁆𑀔𑀡𑁂 𑀤𑀲𑁆𑀲𑀦𑀸𑀪𑀺𑀲𑀫𑀬𑁄 𑀲𑀫𑁆𑀫𑀸𑀤𑀺𑀝𑁆𑀞𑀺…𑀧𑁂… 𑀅𑀫𑀢𑁄𑀕𑀥𑀁 𑀦𑀺𑀩𑁆𑀩𑀸𑀦𑀁 𑀧𑀭𑀺𑀬𑁄𑀲𑀸𑀦𑀝𑁆𑀞𑁂𑀦 𑀅𑀪𑀺𑀲𑀫𑀬𑁄.

𑀓𑀺𑀁 𑀦𑀼 𑀏𑀢𑁆𑀢𑀓𑁄𑀬𑁂𑀯 𑀅𑀪𑀺𑀲𑀫𑀬𑁄𑀢𑀺? 𑀦 𑀳𑀺. 𑀲𑁄𑀢𑀸𑀧𑀢𑁆𑀢𑀺𑀨𑀮𑀓𑁆𑀔𑀡𑁂 𑀤𑀲𑁆𑀲𑀦𑀸𑀪𑀺𑀲𑀫𑀬𑁄 𑀲𑀫𑁆𑀫𑀸𑀤𑀺𑀝𑁆𑀞𑀺…𑀧𑁂… 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀝𑁆𑀞𑁂𑀦 𑀅𑀦𑀼𑀧𑁆𑀧𑀸𑀤𑁂 𑀜𑀸𑀡𑀁 𑀅𑀪𑀺𑀲𑀫𑀬𑁄. 𑀙𑀦𑁆𑀤𑁄 𑀫𑀽𑀮𑀝𑁆𑀞𑁂𑀦 𑀅𑀪𑀺𑀲𑀫𑀬𑁄…𑀧𑁂… 𑀅𑀫𑀢𑁄𑀕𑀥𑀁 𑁫 𑀦𑀺𑀩𑁆𑀩𑀸𑀦𑀁 𑀧𑀭𑀺𑀬𑁄𑀲𑀸𑀦𑀝𑁆𑀞𑁂𑀦 𑀅𑀪𑀺𑀲𑀫𑀬𑁄.

𑀓𑀺𑀁 𑀦𑀼 𑀏𑀢𑁆𑀢𑀓𑁄𑀬𑁂𑀯 𑀅𑀪𑀺𑀲𑀫𑀬𑁄𑀢𑀺?

𑀦 𑀳𑀺. 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀓𑁆𑀔𑀡𑁂…𑀧𑁂… 𑀲𑀓𑀤𑀸𑀕𑀸𑀫𑀺𑀨𑀮𑀓𑁆𑀔𑀡𑁂… 𑀅𑀦𑀸𑀕𑀸𑀫𑀺𑀫𑀕𑁆𑀕𑀓𑁆𑀔𑀡𑁂… 𑀅𑀦𑀸𑀕𑀸𑀫𑀺𑀨𑀮𑀓𑁆𑀔𑀡𑁂… 𑀅𑀭𑀳𑀢𑁆𑀢𑀫𑀕𑁆𑀕𑀓𑁆𑀔𑀡𑁂…𑀧𑁂… 𑀅𑀭𑀳𑀢𑁆𑀢𑀨𑀮𑀓𑁆𑀔𑀡𑁂 𑀤𑀲𑁆𑀲𑀦𑀸𑀪𑀺𑀲𑀫𑀬𑁄 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀅𑀪𑀺𑀦𑀺𑀭𑁄𑀧𑀦𑀸𑀪𑀺𑀲𑀫𑀬𑁄 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄…𑀧𑁂… 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀝𑁆𑀞𑁂𑀦 𑀅𑀦𑀼𑀧𑁆𑀧𑀸𑀤𑁂 𑀜𑀸𑀡𑀁 𑀅𑀪𑀺𑀲𑀫𑀬𑁄. 𑀙𑀦𑁆𑀤𑁄 𑀫𑀽𑀮𑀝𑁆𑀞𑁂𑀦 𑀅𑀪𑀺𑀲𑀫𑀬𑁄…𑀧𑁂… 𑀅𑀫𑀢𑁄𑀕𑀥𑀁 𑀦𑀺𑀩𑁆𑀩𑀸𑀦𑀁 𑀧𑀭𑀺𑀬𑁄𑀲𑀸𑀦𑀝𑁆𑀞𑁂𑀦 𑀅𑀪𑀺𑀲𑀫𑀬𑁄.

𑀬𑁆𑀯𑀸𑀬𑀁 [𑀲𑁆𑀬𑀸𑀬𑀁 (𑀲𑁆𑀬𑀸. 𑀧𑀻.)] 𑀓𑀺𑀮𑁂𑀲𑁂 𑀧𑀚𑀳𑀢𑀺, 𑀅𑀢𑀻𑀢𑁂 𑀓𑀺𑀮𑁂𑀲𑁂 𑀧𑀚𑀳𑀢𑀺…𑀧𑁂… 𑀅𑀦𑀸𑀕𑀢𑁂 𑀓𑀺𑀮𑁂𑀲𑁂 𑀧𑀚𑀳𑀢𑀺, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀓𑀺𑀮𑁂𑀲𑁂 𑀧𑀚𑀳𑀢𑀺, 𑀅𑀢𑀻𑀢𑁂 𑀓𑀺𑀮𑁂𑀲𑁂 𑀧𑀚𑀳𑀢𑀻𑀢𑀺. 𑀳𑀜𑁆𑀘𑀺 𑀅𑀢𑀻𑀢𑁂 𑀓𑀺𑀮𑁂𑀲𑁂 𑀧𑀚𑀳𑀢𑀺, 𑀢𑁂𑀦 𑀳𑀺 𑀔𑀻𑀡𑀁 𑀔𑁂𑀧𑁂𑀢𑀺, 𑀦𑀺𑀭𑀼𑀤𑁆𑀥𑀁 𑀦𑀺𑀭𑁄𑀥𑁂𑀢𑀺, 𑀯𑀺𑀕𑀢𑀁 𑀯𑀺𑀕𑀫𑁂𑀢𑀺, 𑀅𑀢𑁆𑀣𑀗𑁆𑀕𑀢𑀁 𑀅𑀢𑁆𑀣𑀗𑁆𑀕𑀫𑁂𑀢𑀺, 𑀅𑀢𑀻𑀢𑀁 𑀬𑀁 𑀦 𑀅𑀢𑁆𑀣𑀺 𑀢𑀁 𑀧𑀚𑀳𑀢𑀻𑀢𑀺? 𑀦 𑀅𑀢𑀻𑀢𑁂 𑀓𑀺𑀮𑁂𑀲𑁂 𑀧𑀚𑀳𑀢𑀻𑀢𑀺. 𑀅𑀦𑀸𑀕𑀢𑁂 𑀓𑀺𑀮𑁂𑀲𑁂 𑀧𑀚𑀳𑀢𑀻𑀢𑀺. 𑀳𑀜𑁆𑀘𑀺 𑀅𑀦𑀸𑀕𑀢𑁂 𑀓𑀺𑀮𑁂𑀲𑁂 𑀧𑀚𑀳𑀢𑀺, 𑀢𑁂𑀦 𑀳𑀺 𑀅𑀚𑀸𑀢𑀁 𑀧𑀚𑀳𑀢𑀺, 𑀅𑀦𑀺𑀩𑁆𑀩𑀢𑁆𑀢𑀁 𑀧𑀚𑀳𑀢𑀺, 𑀅𑀦𑀼𑀧𑁆𑀧𑀦𑁆𑀦𑀁 𑀧𑀚𑀳𑀢𑀺, 𑀅𑀧𑀸𑀢𑀼𑀪𑀽𑀢𑀁 𑀧𑀚𑀳𑀢𑀺, 𑀅𑀦𑀸𑀕𑀢𑀁 𑀬𑀁 𑀦 𑀅𑀢𑁆𑀣𑀺 𑀢𑀁 𑀧𑀚𑀳𑀢𑀻𑀢𑀺? 𑀦 𑀅𑀦𑀸𑀕𑀢𑁂 𑀓𑀺𑀮𑁂𑀲𑁂 𑀧𑀚𑀳𑀢𑀻𑀢𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀓𑀺𑀮𑁂𑀲𑁂 𑀧𑀚𑀳𑀢𑀻𑀢𑀺. 𑀳𑀜𑁆𑀘𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀓𑀺𑀮𑁂𑀲𑁂 𑀧𑀚𑀳𑀢𑀺, 𑀢𑁂𑀦 𑀳𑀺 𑀭𑀢𑁆𑀢𑁄 𑀭𑀸𑀕𑀁 𑀧𑀚𑀳𑀢𑀺, 𑀤𑀼𑀝𑁆𑀞𑁄 𑀤𑁄𑀲𑀁 𑀧𑀚𑀳𑀢𑀺, 𑀫𑀽𑀴𑁆𑀳𑁄 𑀫𑁄𑀳𑀁 𑀧𑀚𑀳𑀢𑀺, 𑀯𑀺𑀦𑀺𑀩𑀤𑁆𑀥𑁄 𑀫𑀸𑀦𑀁 𑀧𑀚𑀳𑀢𑀺, 𑀧𑀭𑀸𑀫𑀝𑁆𑀞𑁄 𑀤𑀺𑀝𑁆𑀞𑀺𑀁 𑀧𑀚𑀳𑀢𑀺,

𑀯𑀺𑀓𑁆𑀔𑁂𑀧𑀕𑀢𑁄 𑀉𑀤𑁆𑀥𑀘𑁆𑀘𑀁 𑀧𑀚𑀳𑀢𑀺, 𑀅𑀦𑀺𑀝𑁆𑀞𑀗𑁆𑀕𑀢𑁄 𑀯𑀺𑀘𑀺𑀓𑀺𑀘𑁆𑀙𑀁 𑀧𑀚𑀳𑀢𑀺, 𑀣𑀸𑀫𑀕𑀢𑁄 𑀅𑀦𑀼𑀲𑀬𑀁 𑀧𑀚𑀳𑀢𑀺, 𑀓𑀡𑁆𑀳𑀲𑀼𑀓𑁆𑀓𑀥𑀫𑁆𑀫𑀸 𑀬𑀼𑀕𑀦𑀤𑁆𑀥𑀸 𑀲𑀫𑀫𑁂𑀯 𑀯𑀢𑁆𑀢𑀦𑁆𑀢𑀺, 𑀲𑀁𑀓𑀺𑀮𑁂𑀲𑀺𑀓𑀸 [𑀢𑀁𑀲𑀁𑀓𑀺𑀮𑁂𑀲𑀺𑀓𑀸 (𑀲𑁆𑀬𑀸. 𑀓.)] 𑀫𑀕𑁆𑀕𑀪𑀸𑀯𑀦𑀸 𑀳𑁄𑀢𑀺?

𑀦 𑀳𑀺 𑀅𑀢𑀻𑀢𑁂 𑀓𑀺𑀮𑁂𑀲𑁂 𑀧𑀚𑀳𑀢𑀺, 𑀦 𑀅𑀦𑀸𑀕𑀢𑁂 𑀓𑀺𑀮𑁂𑀲𑁂 𑀧𑀚𑀳𑀢𑀺, 𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀓𑀺𑀮𑁂𑀲𑁂 𑀧𑀚𑀳𑀢𑀻𑀢𑀺. 𑀳𑀜𑁆𑀘𑀺 𑀦 𑀅𑀢𑀻𑀢𑁂 𑀓𑀺𑀮𑁂𑀲𑁂 𑀧𑀚𑀳𑀢𑀺, 𑀦 𑀅𑀦𑀸𑀕𑀢𑁂…𑀧𑁂… 𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀓𑀺𑀮𑁂𑀲𑁂 𑀧𑀚𑀳𑀢𑀺, 𑀢𑁂𑀦 𑀳𑀺 𑀦𑀢𑁆𑀣𑀺 𑀫𑀕𑁆𑀕𑀪𑀸𑀯𑀦𑀸, 𑀦𑀢𑁆𑀣𑀺 𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸, 𑀦𑀢𑁆𑀣𑀺 𑀓𑀺𑀮𑁂𑀲𑀧𑁆𑀧𑀳𑀸𑀦𑀁, 𑀦𑀢𑁆𑀣𑀺 𑀥𑀫𑁆𑀫𑀸𑀪𑀺𑀲𑀫𑀬𑁄𑀢𑀺? 𑀅𑀢𑁆𑀣𑀺 𑀫𑀕𑁆𑀕𑀪𑀸𑀯𑀦𑀸, 𑀅𑀢𑁆𑀣𑀺 𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸, 𑀅𑀢𑁆𑀣𑀺 𑀓𑀺𑀮𑁂𑀲𑀧𑁆𑀧𑀳𑀸𑀦𑀁, 𑀅𑀢𑁆𑀣𑀺 𑀥𑀫𑁆𑀫𑀸𑀪𑀺𑀲𑀫𑀬𑁄. 𑀬𑀣𑀸 𑀓𑀣𑀁 𑀯𑀺𑀬? 𑀲𑁂𑀬𑁆𑀬𑀣𑀸𑀧𑀺 𑀢𑀭𑀼𑀡𑁄 𑀭𑀼𑀓𑁆𑀔𑁄 𑀅𑀚𑀸𑀢𑀨𑀮𑁄. 𑀢𑀫𑁂𑀦𑀁 𑀧𑀼𑀭𑀺𑀲𑁄 𑀫𑀽𑀮𑀁 𑀙𑀺𑀦𑁆𑀤𑁂𑀬𑁆𑀬. 𑀬𑁂 𑀢𑀲𑁆𑀲 𑀭𑀼𑀓𑁆𑀔𑀲𑁆𑀲 𑀅𑀚𑀸𑀢𑀨𑀮𑀸, 𑀢𑁂 𑀅𑀚𑀸𑀢𑀸𑀬𑁂𑀯 𑀦 𑀚𑀸𑀬𑀦𑁆𑀢𑀺, 𑀅𑀦𑀺𑀩𑁆𑀩𑀢𑁆𑀢𑀸𑀬𑁂𑀯 𑀦 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀅𑀦𑀼𑀧𑁆𑀧𑀦𑁆𑀦𑀸𑀬𑁂𑀯 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀅𑀧𑀸𑀢𑀼𑀪𑀽𑀢𑀸𑀬𑁂𑀯 𑀦 𑀧𑀸𑀢𑀼𑀪𑀯𑀦𑁆𑀢𑀺. 𑀏𑀯𑀫𑁂𑀯𑀁 𑀉𑀧𑁆𑀧𑀸𑀤𑁄 𑀳𑁂𑀢𑀼, 𑀉𑀧𑁆𑀧𑀸𑀤𑁄 𑀧𑀘𑁆𑀘𑀬𑁄 𑀓𑀺𑀮𑁂𑀲𑀸𑀦𑀁 𑀦𑀺𑀩𑁆𑀩𑀢𑁆𑀢𑀺𑀬𑀸𑀢𑀺. 𑀉𑀧𑁆𑀧𑀸𑀤𑁂 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀅𑀦𑀼𑀧𑁆𑀧𑀸𑀤𑁂 𑀘𑀺𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀺. 𑀅𑀦𑀼𑀧𑁆𑀧𑀸𑀤𑁂 𑀘𑀺𑀢𑁆𑀢𑀲𑁆𑀲 𑀧𑀓𑁆𑀔𑀦𑁆𑀤𑀢𑁆𑀢𑀸 𑀬𑁂 𑀉𑀧𑁆𑀧𑀸𑀤𑀧𑀘𑁆𑀘𑀬𑀸 𑀓𑀺𑀮𑁂𑀲𑀸 𑀦𑀺𑀩𑁆𑀩𑀢𑁆𑀢𑁂𑀬𑁆𑀬𑀼𑀁, 𑀢𑁂 𑀅𑀚𑀸𑀢𑀸𑀬𑁂𑀯 𑀦 𑀚𑀸𑀬𑀦𑁆𑀢𑀺, 𑀅𑀦𑀺𑀩𑁆𑀩𑀢𑁆𑀢𑀸𑀬𑁂𑀯 𑀦 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀅𑀦𑀼𑀧𑁆𑀧𑀦𑁆𑀦𑀸𑀬𑁂𑀯 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀅𑀧𑀸𑀢𑀼𑀪𑀽𑀢𑀸𑀬𑁂𑀯 𑀦 𑀧𑀸𑀢𑀼𑀪𑀯𑀦𑁆𑀢𑀺. 𑀏𑀯𑀁 𑀳𑁂𑀢𑀼𑀦𑀺𑀭𑁄𑀥𑀸 𑀤𑀼𑀓𑁆𑀔𑀦𑀺𑀭𑁄𑀥𑁄. 𑀧𑀯𑀢𑁆𑀢𑀁 𑀳𑁂𑀢𑀼, 𑀦𑀺𑀫𑀺𑀢𑁆𑀢𑀁 𑀳𑁂𑀢𑀼, 𑀆𑀬𑀽𑀳𑀦𑀸 𑀳𑁂𑀢𑀼. 𑀆𑀬𑀽𑀳𑀦𑀸 𑀧𑀘𑁆𑀘𑀬𑁄 𑀓𑀺𑀮𑁂𑀲𑀸𑀦𑀁 𑀦𑀺𑀩𑁆𑀩𑀢𑁆𑀢𑀺𑀬𑀸𑀢𑀺. 𑀆𑀬𑀽𑀳𑀦𑁂 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀅𑀦𑀸𑀬𑀽𑀳𑀦𑁂 𑀘𑀺𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀺. 𑀅𑀦𑀸𑀬𑀽𑀳𑀦𑁂 𑀘𑀺𑀢𑁆𑀢𑀲𑁆𑀲 𑀧𑀓𑁆𑀔𑀦𑁆𑀤𑀢𑁆𑀢𑀸, 𑀬𑁂 𑀆𑀬𑀽𑀳𑀦𑀧𑀘𑁆𑀘𑀬𑀸 𑀓𑀺𑀮𑁂𑀲𑀸 𑀦𑀺𑀩𑁆𑀩𑀢𑁆𑀢𑁂𑀬𑁆𑀬𑀼𑀁, 𑀢𑁂 𑀅𑀚𑀸𑀢𑀸𑀬𑁂𑀯 𑀦 𑀚𑀸𑀬𑀦𑁆𑀢𑀺, 𑀅𑀦𑀺𑀩𑁆𑀩𑀢𑁆𑀢𑀸𑀬𑁂𑀯 𑀦 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀅𑀦𑀼𑀧𑁆𑀧𑀦𑁆𑀦𑀸𑀬𑁂𑀯 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀅𑀧𑀸𑀢𑀼𑀪𑀽𑀢𑀸𑀬𑁂𑀯 𑀦 𑀧𑀸𑀢𑀼𑀪𑀯𑀦𑁆𑀢𑀺. 𑀏𑀯𑀁 𑀳𑁂𑀢𑀼𑀦𑀺𑀭𑁄𑀥𑀸 𑀤𑀼𑀓𑁆𑀔𑀦𑀺𑀭𑁄𑀥𑁄. 𑀏𑀯𑀁 𑀅𑀢𑁆𑀣𑀺 𑀫𑀕𑁆𑀕𑀪𑀸𑀯𑀦𑀸, 𑀅𑀢𑁆𑀣𑀺 𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸, 𑀅𑀢𑁆𑀣𑀺 𑀓𑀺𑀮𑁂𑀲𑀧𑁆𑀧𑀳𑀸𑀦𑀁, 𑀅𑀢𑁆𑀣𑀺 𑀥𑀫𑁆𑀫𑀸𑀪𑀺𑀲𑀫𑀬𑁄𑀢𑀺.

𑀅𑀪𑀺𑀲𑀫𑀬𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁪. 𑀯𑀺𑀯𑁂𑀓𑀓𑀣𑀸

𑁨𑁨. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁 [𑀲𑀁 𑀦𑀺. 𑁩.𑁫.𑁧𑁪𑁯 𑀧𑀲𑁆𑀲𑀺𑀢𑀩𑁆𑀩𑀸]. ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀬𑁂 𑀓𑁂𑀘𑀺 𑀩𑀮𑀓𑀭𑀡𑀻𑀬𑀸 𑀓𑀫𑁆𑀫𑀦𑁆𑀢𑀸 𑀓𑀭𑀻𑀬𑀦𑁆𑀢𑀺, 𑀲𑀩𑁆𑀩𑁂 𑀢𑁂 𑀧𑀣𑀯𑀺𑀁 𑀦𑀺𑀲𑁆𑀲𑀸𑀬 𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀸𑀬 𑀏𑀯𑀫𑁂𑀢𑁂 𑀩𑀮𑀓𑀭𑀡𑀻𑀬𑀸 𑀓𑀫𑁆𑀫𑀦𑁆𑀢𑀸 𑀓𑀭𑀻𑀬𑀦𑁆𑀢𑀺, 𑀏𑀯𑀫𑁂𑀯𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀻𑀮𑀁 𑀦𑀺𑀲𑁆𑀲𑀸𑀬 𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀪𑀸𑀯𑁂𑀢𑀺, 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀩𑀳𑀼𑀮𑀻𑀓𑀭𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀻𑀮𑀁 𑀦𑀺𑀲𑁆𑀲𑀸𑀬 𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀪𑀸𑀯𑁂𑀢𑀺, 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀩𑀳𑀼𑀮𑀻𑀓𑀭𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀪𑀸𑀯𑁂𑀢𑀺 𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁 𑀯𑀺𑀭𑀸𑀕𑀦𑀺𑀲𑁆𑀲𑀺𑀢𑀁 𑀦𑀺𑀭𑁄𑀥𑀦𑀺𑀲𑁆𑀲𑀺𑀢𑀁 𑀯𑁄𑀲𑁆𑀲𑀕𑁆𑀕𑀧𑀭𑀺𑀡𑀸𑀫𑀺𑀁. 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀁…𑀧𑁂… 𑀲𑀫𑁆𑀫𑀸𑀯𑀸𑀘𑀁… 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀁… 𑀲𑀫𑁆𑀫𑀸𑀆𑀚𑀻𑀯𑀁… 𑀲𑀫𑁆𑀫𑀸𑀯𑀸𑀬𑀸𑀫𑀁… 𑀲𑀫𑁆𑀫𑀸𑀲𑀢𑀺𑀁… 𑀲𑀫𑁆𑀫𑀸𑀲𑀫𑀸𑀥𑀺𑀁 𑀪𑀸𑀯𑁂𑀢𑀺 𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁 𑀯𑀺𑀭𑀸𑀕𑀦𑀺𑀲𑁆𑀲𑀺𑀢𑀁 𑀦𑀺𑀭𑁄𑀥𑀦𑀺𑀲𑁆𑀲𑀺𑀢𑀁 𑀯𑁄𑀲𑁆𑀲𑀕𑁆𑀕𑀧𑀭𑀺𑀡𑀸𑀫𑀺𑀁. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀻𑀮𑀁 𑀦𑀺𑀲𑁆𑀲𑀸𑀬 𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀪𑀸𑀯𑁂𑀢𑀺, 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀩𑀳𑀼𑀮𑀻𑀓𑀭𑁄𑀢𑀺.

𑁨𑁩. ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀬𑁂 𑀓𑁂𑀘𑀺 [𑀬𑁂𑀧𑀺𑀫𑁂 (𑀲𑁆𑀬𑀸.) 𑀲𑀁. 𑀦𑀺. 𑁫.𑁧𑁫𑁦 𑀧𑀲𑁆𑀲𑀺𑀢𑀩𑁆𑀩𑀸] 𑀩𑀻𑀚𑀕𑀸𑀫𑀪𑀽𑀢𑀕𑀸𑀫𑀸 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀦𑁆𑀢𑀺, 𑀲𑀩𑁆𑀩𑁂 𑀢𑁂 𑀧𑀣𑀯𑀺𑀁 𑀦𑀺𑀲𑁆𑀲𑀸𑀬 𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀸𑀬 𑀏𑀯𑀫𑁂𑀢𑁂 𑀩𑀻𑀚𑀕𑀸𑀫𑀪𑀽𑀢𑀕𑀸𑀫𑀸 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀦𑁆𑀢𑀺; 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀻𑀮𑀁 𑀦𑀺𑀲𑁆𑀲𑀸𑀬 𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀪𑀸𑀯𑁂𑀦𑁆𑀢𑁄 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀩𑀳𑀼𑀮𑀻𑀓𑀭𑁄𑀦𑁆𑀢𑁄 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀧𑀸𑀧𑀼𑀡𑀸𑀢𑀺 𑀥𑀫𑁆𑀫𑁂𑀲𑀼.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀻𑀮𑀁 𑀦𑀺𑀲𑁆𑀲𑀸𑀬 𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀪𑀸𑀯𑁂𑀦𑁆𑀢𑁄 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀩𑀳𑀼𑀮𑀻𑀓𑀭𑁄𑀦𑁆𑀢𑁄 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀧𑀸𑀧𑀼𑀡𑀸𑀢𑀺 𑀥𑀫𑁆𑀫𑁂𑀲𑀼? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀪𑀸𑀯𑁂𑀢𑀺 𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁 𑀯𑀺𑀭𑀸𑀕𑀦𑀺𑀲𑁆𑀲𑀺𑀢𑀁 𑀦𑀺𑀭𑁄𑀥𑀦𑀺𑀲𑁆𑀲𑀺𑀢𑀁 𑀯𑁄𑀲𑁆𑀲𑀕𑁆𑀕𑀧𑀭𑀺𑀡𑀸𑀫𑀺𑀁. 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀁 𑀪𑀸𑀯𑁂𑀢𑀺…𑀧𑁂… 𑀲𑀫𑁆𑀫𑀸𑀯𑀸𑀘𑀁 𑀪𑀸𑀯𑁂𑀢𑀺… 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀁 𑀪𑀸𑀯𑁂𑀢𑀺… 𑀲𑀫𑁆𑀫𑀸𑀆𑀚𑀻𑀯𑀁 𑀪𑀸𑀯𑁂𑀢𑀺… 𑀲𑀫𑁆𑀫𑀸𑀯𑀸𑀬𑀸𑀫𑀁 𑀪𑀸𑀯𑁂𑀢𑀺… 𑀲𑀫𑁆𑀫𑀸𑀲𑀢𑀺𑀁 𑀪𑀸𑀯𑁂𑀢𑀺… 𑀲𑀫𑁆𑀫𑀸𑀲𑀫𑀸𑀥𑀺𑀁 𑀪𑀸𑀯𑁂𑀢𑀺 𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁 𑀯𑀺𑀭𑀸𑀕𑀦𑀺𑀲𑁆𑀲𑀺𑀢𑀁 𑀦𑀺𑀭𑁄𑀥𑀦𑀺𑀲𑁆𑀲𑀺𑀢𑀁 𑀯𑁄𑀲𑁆𑀲𑀕𑁆𑀕𑀧𑀭𑀺𑀡𑀸𑀫𑀺𑀁. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀻𑀮𑀁 𑀦𑀺𑀲𑁆𑀲𑀸𑀬 𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀪𑀸𑀯𑁂𑀦𑁆𑀢𑁄 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀩𑀳𑀼𑀮𑀻𑀓𑀭𑁄𑀦𑁆𑀢𑁄 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀧𑀸𑀧𑀼𑀡𑀸𑀢𑀺 𑀥𑀫𑁆𑀫𑁂𑀲𑀽’’𑀢𑀺.

𑁧. 𑀫𑀕𑁆𑀕𑀗𑁆𑀕𑀦𑀺𑀤𑁆𑀤𑁂𑀲𑁄

𑁨𑁪. 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀧𑀜𑁆𑀘 𑀯𑀺𑀯𑁂𑀓𑀸, 𑀧𑀜𑁆𑀘 𑀯𑀺𑀭𑀸𑀕𑀸, 𑀧𑀜𑁆𑀘 𑀦𑀺𑀭𑁄𑀥𑀸, 𑀧𑀜𑁆𑀘 𑀯𑁄𑀲𑁆𑀲𑀕𑁆𑀕𑀸, 𑀤𑁆𑀯𑀸𑀤𑀲 𑀦𑀺𑀲𑁆𑀲𑀬𑀸. 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀲𑁆𑀲…𑀧𑁂… 𑀲𑀫𑁆𑀫𑀸𑀯𑀸𑀘𑀸𑀬… 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀲𑁆𑀲… 𑀲𑀫𑁆𑀫𑀸𑀆𑀚𑀻𑀯𑀲𑁆𑀲… 𑀲𑀫𑁆𑀫𑀸𑀯𑀸𑀬𑀸𑀫𑀲𑁆𑀲… 𑀲𑀫𑁆𑀫𑀸𑀲𑀢𑀺𑀬𑀸… 𑀲𑀫𑁆𑀫𑀸𑀲𑀫𑀸𑀥𑀺𑀲𑁆𑀲 𑀧𑀜𑁆𑀘 𑀯𑀺𑀯𑁂𑀓𑀸, 𑀧𑀜𑁆𑀘 𑀯𑀺𑀭𑀸𑀕𑀸, 𑀧𑀜𑁆𑀘 𑀦𑀺𑀭𑁄𑀥𑀸, 𑀧𑀜𑁆𑀘 𑀯𑁄𑀲𑁆𑀲𑀕𑁆𑀕𑀸, 𑀤𑁆𑀯𑀸𑀤𑀲 𑀦𑀺𑀲𑁆𑀲𑀬𑀸.

𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀓𑀢𑀫𑁂 𑀧𑀜𑁆𑀘 𑀯𑀺𑀯𑁂𑀓𑀸? 𑀯𑀺𑀓𑁆𑀔𑀫𑁆𑀪𑀦𑀯𑀺𑀯𑁂𑀓𑁄, 𑀢𑀤𑀗𑁆𑀕𑀯𑀺𑀯𑁂𑀓𑁄 𑀲𑀫𑀼𑀘𑁆𑀙𑁂𑀤𑀯𑀺𑀯𑁂𑀓𑁄, 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀯𑀺𑀯𑁂𑀓𑁄, 𑀦𑀺𑀲𑁆𑀲𑀭𑀡𑀯𑀺𑀯𑁂𑀓𑁄. 𑀯𑀺𑀓𑁆𑀔𑀫𑁆𑀪𑀦𑀯𑀺𑀯𑁂𑀓𑁄 𑀘 𑀦𑀻𑀯𑀭𑀡𑀸𑀦𑀁 𑀧𑀞𑀫𑀚𑁆𑀛𑀸𑀦𑀁 𑀪𑀸𑀯𑀬𑀢𑁄, 𑀢𑀤𑀗𑁆𑀕𑀯𑀺𑀯𑁂𑀓𑁄 𑀘 𑀤𑀺𑀝𑁆𑀞𑀺𑀕𑀢𑀸𑀦𑀁 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁 𑀲𑀫𑀸𑀥𑀺𑀁 𑀪𑀸𑀯𑀬𑀢𑁄, 𑀲𑀫𑀼𑀘𑁆𑀙𑁂𑀤𑀯𑀺𑀯𑁂𑀓𑁄 𑀘 𑀮𑁄𑀓𑀼𑀢𑁆𑀢𑀭𑀁 𑀔𑀬𑀕𑀸𑀫𑀺𑀫𑀕𑁆𑀕𑀁 𑀪𑀸𑀯𑀬𑀢𑁄, 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀯𑀺𑀯𑁂𑀓𑁄 𑀘 𑀨𑀮𑀓𑁆𑀔𑀡𑁂, 𑀦𑀺𑀲𑁆𑀲𑀭𑀡𑀯𑀺𑀯𑁂𑀓𑁄 𑀘 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁. 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀇𑀫𑁂 𑀧𑀜𑁆𑀘 𑀯𑀺𑀯𑁂𑀓𑀸. 𑀇𑀫𑁂𑀲𑀼 𑀧𑀜𑁆𑀘𑀲𑀼 𑀯𑀺𑀯𑁂𑀓𑁂𑀲𑀼 𑀙𑀦𑁆𑀤𑀚𑀸𑀢𑁄 𑀳𑁄𑀢𑀺 𑀲𑀤𑁆𑀥𑀸𑀥𑀺𑀫𑀼𑀢𑁆𑀢𑁄, 𑀘𑀺𑀢𑁆𑀢𑀜𑁆𑀘𑀲𑁆𑀲 𑀲𑁆𑀯𑀸𑀥𑀺𑀝𑁆𑀞𑀺𑀢𑀁.

𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀓𑀢𑀫𑁂 𑀧𑀜𑁆𑀘 𑀯𑀺𑀭𑀸𑀕𑀸? 𑀯𑀺𑀓𑁆𑀔𑀫𑁆𑀪𑀦𑀯𑀺𑀭𑀸𑀕𑁄, 𑀢𑀤𑀗𑁆𑀕𑀯𑀺𑀭𑀸𑀕𑁄, 𑀲𑀫𑀼𑀘𑁆𑀙𑁂𑀤𑀯𑀺𑀭𑀸𑀕𑁄, 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀯𑀺𑀭𑀸𑀕𑁄, 𑀦𑀺𑀲𑁆𑀲𑀭𑀡𑀯𑀺𑀭𑀸𑀕𑁄. 𑀯𑀺𑀓𑁆𑀔𑀫𑁆𑀪𑀦𑀯𑀺𑀭𑀸𑀕𑁄 𑀘 𑀦𑀻𑀯𑀭𑀡𑀸𑀦𑀁 𑀧𑀞𑀫𑀚𑁆𑀛𑀸𑀦𑀁 𑀪𑀸𑀯𑀬𑀢𑁄, 𑀢𑀤𑀗𑁆𑀕𑀯𑀺𑀭𑀸𑀕𑁄 𑀘 𑀤𑀺𑀝𑁆𑀞𑀺𑀕𑀢𑀸𑀦𑀁 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁 𑀲𑀫𑀸𑀥𑀺𑀁 𑀪𑀸𑀯𑀬𑀢𑁄, 𑀲𑀫𑀼𑀘𑁆𑀙𑁂𑀤𑀯𑀺𑀭𑀸𑀕𑁄 𑀘 𑀮𑁄𑀓𑀼𑀢𑁆𑀢𑀭𑀁 𑀔𑀬𑀕𑀸𑀫𑀺𑀫𑀕𑁆𑀕𑀁 𑀪𑀸𑀯𑀬𑀢𑁄, 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀯𑀺𑀭𑀸𑀕𑁄 𑀘 𑀨𑀮𑀓𑁆𑀔𑀡𑁂, 𑀦𑀺𑀲𑁆𑀲𑀭𑀡𑀯𑀺𑀭𑀸𑀕𑁄 𑀘 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁. 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀇𑀫𑁂 𑀧𑀜𑁆𑀘 𑀯𑀺𑀭𑀸𑀕𑀸. 𑀇𑀫𑁂𑀲𑀼 𑀧𑀜𑁆𑀘𑀲𑀼 𑀯𑀺𑀭𑀸𑀕𑁂𑀲𑀼 𑀙𑀦𑁆𑀤𑀚𑀸𑀢𑁄 𑀳𑁄𑀢𑀺 𑀲𑀤𑁆𑀥𑀸𑀥𑀺𑀫𑀼𑀢𑁆𑀢𑁄, 𑀘𑀺𑀢𑁆𑀢𑀜𑁆𑀘𑀲𑁆𑀲 𑀲𑁆𑀯𑀸𑀥𑀺𑀝𑁆𑀞𑀺𑀢𑀁.

𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀓𑀢𑀫𑁂 𑀧𑀜𑁆𑀘 𑀦𑀺𑀭𑁄𑀥𑀸? 𑀯𑀺𑀓𑁆𑀔𑀫𑁆𑀪𑀦𑀦𑀺𑀭𑁄𑀥𑁄, 𑀢𑀤𑀗𑁆𑀕𑀦𑀺𑀭𑁄𑀥𑁄, 𑀲𑀫𑀼𑀘𑁆𑀙𑁂𑀤𑀦𑀺𑀭𑁄𑀥𑁄, 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀦𑀺𑀭𑁄𑀥𑁄, 𑀦𑀺𑀲𑁆𑀲𑀭𑀡𑀦𑀺𑀭𑁄𑀥𑁄. 𑀯𑀺𑀓𑁆𑀔𑀫𑁆𑀪𑀦𑀦𑀺𑀭𑁄𑀥𑁄 𑀘 𑀦𑀻𑀯𑀭𑀡𑀸𑀦𑀁 𑀧𑀞𑀫𑀚𑁆𑀛𑀸𑀦𑀁 𑀪𑀸𑀯𑀬𑀢𑁄, 𑀢𑀤𑀗𑁆𑀕𑀦𑀺𑀭𑁄𑀥𑁄 𑀘 𑀤𑀺𑀝𑁆𑀞𑀺𑀕𑀢𑀸𑀦𑀁 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁 𑀲𑀫𑀸𑀥𑀺𑀁 𑀪𑀸𑀯𑀬𑀢𑁄, 𑀲𑀫𑀼𑀘𑁆𑀙𑁂𑀤𑀦𑀺𑀭𑁄𑀥𑁄 𑀘 𑀮𑁄𑀓𑀼𑀢𑁆𑀢𑀭𑀁 𑀔𑀬𑀕𑀸𑀫𑀺𑀫𑀕𑁆𑀕𑀁 𑀪𑀸𑀯𑀬𑀢𑁄, 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀦𑀺𑀭𑁄𑀥𑁄 𑀘 𑀨𑀮𑀓𑁆𑀔𑀡𑁂, 𑀦𑀺𑀲𑁆𑀲𑀭𑀡𑀦𑀺𑀭𑁄𑀥𑁄 𑀘 𑀅𑀫𑀢𑀸 𑀥𑀸𑀢𑀼. 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀇𑀫𑁂 𑀧𑀜𑁆𑀘 𑀦𑀺𑀭𑁄𑀥𑀸. 𑀇𑀫𑁂𑀲𑀼 𑀧𑀜𑁆𑀘𑀲𑀼 𑀦𑀺𑀭𑁄𑀥𑁂𑀲𑀼 𑀙𑀦𑁆𑀤𑀚𑀸𑀢𑁄 𑀳𑁄𑀢𑀺 𑀲𑀤𑁆𑀥𑀸𑀥𑀺𑀫𑀼𑀢𑁆𑀢𑁄, 𑀘𑀺𑀢𑁆𑀢𑀜𑁆𑀘𑀲𑁆𑀲 𑀲𑁆𑀯𑀸𑀥𑀺𑀝𑁆𑀞𑀺𑀢𑀁.

𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀓𑀢𑀫𑁂 𑀧𑀜𑁆𑀘 𑀯𑁄𑀲𑁆𑀲𑀕𑁆𑀕𑀸? 𑀯𑀺𑀓𑁆𑀔𑀫𑁆𑀪𑀦𑀯𑁄𑀲𑁆𑀲𑀕𑁆𑀕𑁄, 𑀢𑀤𑀗𑁆𑀕𑀯𑁄𑀲𑁆𑀲𑀕𑁆𑀕𑁄, 𑀲𑀫𑀼𑀘𑁆𑀙𑁂𑀤𑀯𑁄𑀲𑁆𑀲𑀕𑁆𑀕𑁄, 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀯𑁄𑀲𑁆𑀲𑀕𑁆𑀕𑁄, 𑀦𑀺𑀲𑁆𑀲𑀭𑀡𑀯𑁄𑀲𑁆𑀲𑀕𑁆𑀕𑁄. 𑀯𑀺𑀓𑁆𑀔𑀫𑁆𑀪𑀦𑀯𑁄𑀲𑁆𑀲𑀕𑁆𑀕𑁄 𑀘 𑀦𑀻𑀯𑀭𑀡𑀸𑀦𑀁 𑀧𑀞𑀫𑀚𑁆𑀛𑀸𑀦𑀁 𑀪𑀸𑀯𑀬𑀢𑁄, 𑀢𑀤𑀗𑁆𑀕𑀯𑁄𑀲𑁆𑀲𑀕𑁆𑀕𑁄 𑀘 𑀤𑀺𑀝𑁆𑀞𑀺𑀕𑀢𑀸𑀦𑀁 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁 𑀲𑀫𑀸𑀥𑀺𑀁 𑀪𑀸𑀯𑀬𑀢𑁄, 𑀲𑀫𑀼𑀘𑁆𑀙𑁂𑀤𑀯𑁄𑀲𑁆𑀲𑀕𑁆𑀕𑁄 𑀘 𑀮𑁄𑀓𑀼𑀢𑁆𑀢𑀭𑀁 𑀔𑀬𑀕𑀸𑀫𑀺𑀫𑀕𑁆𑀕𑀁 𑀪𑀸𑀯𑀬𑀢𑁄, 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀯𑁄𑀲𑁆𑀲𑀕𑁆𑀕𑁄 𑀘 𑀨𑀮𑀓𑁆𑀔𑀡𑁂, 𑀦𑀺𑀲𑁆𑀲𑀭𑀡𑀯𑁄𑀲𑁆𑀲𑀕𑁆𑀕𑁄 𑀘 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁. 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀇𑀫𑁂 𑀧𑀜𑁆𑀘 𑀯𑁄𑀲𑁆𑀲𑀕𑁆𑀕𑀸. 𑀇𑀫𑁂𑀲𑀼 𑀧𑀜𑁆𑀘𑀲𑀼 𑀯𑁄𑀲𑁆𑀲𑀕𑁆𑀕𑁂𑀲𑀼 𑀙𑀦𑁆𑀤𑀚𑀸𑀢𑁄 𑀳𑁄𑀢𑀺 𑀲𑀤𑁆𑀥𑀸𑀥𑀺𑀫𑀼𑀢𑁆𑀢𑁄, 𑀘𑀺𑀢𑁆𑀢𑀜𑁆𑀘𑀲𑁆𑀲 𑀲𑁆𑀯𑀸𑀥𑀺𑀝𑁆𑀞𑀺𑀢𑀁. 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀇𑀫𑁂 𑀧𑀜𑁆𑀘 𑀯𑀺𑀯𑁂𑀓𑀸, 𑀧𑀜𑁆𑀘 𑀯𑀺𑀭𑀸𑀕𑀸, 𑀧𑀜𑁆𑀘 𑀦𑀺𑀭𑁄𑀥𑀸, 𑀧𑀜𑁆𑀘 𑀯𑁄𑀲𑁆𑀲𑀕𑁆𑀕𑀸, 𑀤𑁆𑀯𑀸𑀤𑀲 𑀦𑀺𑀲𑁆𑀲𑀬𑀸.

𑁨𑁫. 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀲𑁆𑀲 …𑀧𑁂… 𑀲𑀫𑁆𑀫𑀸𑀯𑀸𑀘𑀸𑀬… 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀲𑁆𑀲… 𑀲𑀫𑁆𑀫𑀸𑀆𑀚𑀻𑀯𑀲𑁆𑀲… 𑀲𑀫𑁆𑀫𑀸𑀯𑀸𑀬𑀸𑀫𑀲𑁆𑀲… 𑀲𑀫𑁆𑀫𑀸𑀲𑀢𑀺𑀬𑀸… 𑀲𑀫𑁆𑀫𑀸𑀲𑀫𑀸𑀥𑀺𑀲𑁆𑀲 𑀓𑀢𑀫𑁂 𑀧𑀜𑁆𑀘 𑀯𑀺𑀯𑁂𑀓𑀸? 𑀯𑀺𑀓𑁆𑀔𑀫𑁆𑀪𑀦𑀯𑀺𑀯𑁂𑀓𑁄, 𑀢𑀤𑀗𑁆𑀕𑀯𑀺𑀯𑁂𑀓𑁄, 𑀲𑀫𑀼𑀘𑁆𑀙𑁂𑀤𑀯𑀺𑀯𑁂𑀓𑁄, 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀯𑀺𑀯𑁂𑀓𑁄, 𑀦𑀺𑀲𑁆𑀲𑀭𑀡𑀯𑀺𑀯𑁂𑀓𑁄. 𑀯𑀺𑀓𑁆𑀔𑀫𑁆𑀪𑀦𑀯𑀺𑀯𑁂𑀓𑁄 𑀘 𑀦𑀻𑀯𑀭𑀡𑀸𑀦𑀁 𑀧𑀞𑀫𑀚𑁆𑀛𑀸𑀦𑀁 𑀪𑀸𑀯𑀬𑀢𑁄, 𑀢𑀤𑀗𑁆𑀕𑀯𑀺𑀯𑁂𑀓𑁄 𑀘 𑀤𑀺𑀝𑁆𑀞𑀺𑀕𑀢𑀸𑀦𑀁 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁 𑀲𑀫𑀸𑀥𑀺𑀁 𑀪𑀸𑀯𑀬𑀢𑁄, 𑀲𑀫𑀼𑀘𑁆𑀙𑁂𑀤𑀯𑀺𑀯𑁂𑀓𑁄 𑀘 𑀮𑁄𑀓𑀼𑀢𑁆𑀢𑀭𑀁 𑀔𑀬𑀕𑀸𑀫𑀺𑀫𑀕𑁆𑀕𑀁 𑀪𑀸𑀯𑀬𑀢𑁄, 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀯𑀺𑀯𑁂𑀓𑁄 𑀘 𑀨𑀮𑀓𑁆𑀔𑀡𑁂 𑀦𑀺𑀲𑁆𑀲𑀭𑀡𑀯𑀺𑀯𑁂𑀓𑁄 𑀘 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁. 𑀲𑀫𑁆𑀫𑀸𑀲𑀫𑀸𑀥𑀺𑀲𑁆𑀲 𑀇𑀫𑁂 𑀧𑀜𑁆𑀘 𑀯𑀺𑀯𑁂𑀓𑀸. 𑀇𑀫𑁂𑀲𑀼 𑀧𑀜𑁆𑀘𑀲𑀼 𑀯𑀺𑀯𑁂𑀓𑁂𑀲𑀼 𑀙𑀦𑁆𑀤𑀚𑀸𑀢𑁄 𑀳𑁄𑀢𑀺 𑀲𑀤𑁆𑀥𑀸𑀥𑀺𑀫𑀼𑀢𑁆𑀢𑁄, 𑀘𑀺𑀢𑁆𑀢𑀜𑁆𑀘𑀲𑁆𑀲 𑀲𑁆𑀯𑀸𑀥𑀺𑀝𑁆𑀞𑀺𑀢𑀁.

𑀲𑀫𑁆𑀫𑀸𑀲𑀫𑀸𑀥𑀺𑀲𑁆𑀲 𑀓𑀢𑀫𑁂 𑀧𑀜𑁆𑀘 𑀯𑀺𑀭𑀸𑀕𑀸? 𑀯𑀺𑀓𑁆𑀔𑀫𑁆𑀪𑀦𑀯𑀺𑀭𑀸𑀕𑁄, 𑀢𑀤𑀗𑁆𑀕𑀯𑀺𑀭𑀸𑀕𑁄, 𑀲𑀫𑀼𑀘𑁆𑀙𑁂𑀤𑀯𑀺𑀭𑀸𑀕𑁄, 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀯𑀺𑀭𑀸𑀕𑁄, 𑀦𑀺𑀲𑁆𑀲𑀭𑀡𑀯𑀺𑀭𑀸𑀕𑁄. 𑀯𑀺𑀓𑁆𑀔𑀫𑁆𑀪𑀦𑀯𑀺𑀭𑀸𑀕𑁄 𑀘 𑀦𑀻𑀯𑀭𑀡𑀸𑀦𑀁 𑀧𑀞𑀫𑀚𑁆𑀛𑀸𑀦𑀁 𑀪𑀸𑀯𑀬𑀢𑁄, 𑀢𑀤𑀗𑁆𑀕𑀯𑀺𑀭𑀸𑀕𑁄 𑀘 𑀤𑀺𑀝𑁆𑀞𑀺𑀕𑀢𑀸𑀦𑀁 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁 𑀲𑀫𑀸𑀥𑀺𑀁 𑀪𑀸𑀯𑀬𑀢𑁄, 𑀲𑀫𑀼𑀘𑁆𑀙𑁂𑀤𑀯𑀺𑀭𑀸𑀕𑁄 𑀘 𑀮𑁄𑀓𑀼𑀢𑁆𑀢𑀭𑀁 𑀔𑀬𑀕𑀸𑀫𑀺𑀫𑀕𑁆𑀕𑀁 𑀪𑀸𑀯𑀬𑀢𑁄, 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀯𑀺𑀭𑀸𑀕𑁄 𑀘 𑀨𑀮𑀓𑁆𑀔𑀡𑁂, 𑀦𑀺𑀲𑁆𑀲𑀭𑀡𑀯𑀺𑀭𑀸𑀕𑁄 𑀘 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁. 𑀲𑀫𑁆𑀫𑀸𑀲𑀫𑀸𑀥𑀺𑀲𑁆𑀲 𑀇𑀫𑁂 𑀧𑀜𑁆𑀘 𑀯𑀺𑀭𑀸𑀕𑀸. 𑀇𑀫𑁂𑀲𑀼 𑀧𑀜𑁆𑀘𑀲𑀼 𑀯𑀺𑀭𑀸𑀕𑁂𑀲𑀼 𑀙𑀦𑁆𑀤𑀚𑀸𑀢𑁄 𑀳𑁄𑀢𑀺 𑀲𑀤𑁆𑀥𑀸𑀥𑀺𑀫𑀼𑀢𑁆𑀢𑁄, 𑀘𑀺𑀢𑁆𑀢𑀜𑁆𑀘𑀲𑁆𑀲 𑀲𑁆𑀯𑀸𑀥𑀺𑀝𑁆𑀞𑀺𑀢𑀁.

𑀲𑀫𑁆𑀫𑀸𑀲𑀫𑀸𑀥𑀺𑀲𑁆𑀲 𑀓𑀢𑀫𑁂 𑀧𑀜𑁆𑀘 𑀦𑀺𑀭𑁄𑀥𑀸? 𑀯𑀺𑀓𑁆𑀔𑀫𑁆𑀪𑀦𑀦𑀺𑀭𑁄𑀥𑁄, 𑀢𑀤𑀗𑁆𑀕𑀦𑀺𑀭𑁄𑀥𑁄, 𑀲𑀫𑀼𑀘𑁆𑀙𑁂𑀤𑀦𑀺𑀭𑁄𑀥𑁄, 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀦𑀺𑀭𑁄𑀥𑁄, 𑀦𑀺𑀲𑁆𑀲𑀭𑀡𑀦𑀺𑀭𑁄𑀥𑁄. 𑀯𑀺𑀓𑁆𑀔𑀫𑁆𑀪𑀦𑀦𑀺𑀭𑁄𑀥𑁄 𑀘 𑀦𑀻𑀯𑀭𑀡𑀸𑀦𑀁 𑀧𑀞𑀫𑀚𑁆𑀛𑀸𑀦𑀁 𑀪𑀸𑀯𑀬𑀢𑁄, 𑀢𑀤𑀗𑁆𑀕𑀦𑀺𑀭𑁄𑀥𑁄 𑀘 𑀤𑀺𑀝𑁆𑀞𑀺𑀕𑀢𑀸𑀦𑀁 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁 𑀲𑀫𑀸𑀥𑀺𑀁 𑀪𑀸𑀯𑀬𑀢𑁄, 𑀲𑀫𑀼𑀘𑁆𑀙𑁂𑀤𑀦𑀺𑀭𑁄𑀥𑁄 𑀘 𑀮𑁄𑀓𑀼𑀢𑁆𑀢𑀭𑀁 𑀔𑀬𑀕𑀸𑀫𑀺𑀫𑀕𑁆𑀕𑀁 𑀪𑀸𑀯𑀬𑀢𑁄, 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀦𑀺𑀭𑁄𑀥𑁄 𑀘 𑀨𑀮𑀓𑁆𑀔𑀡𑁂, 𑀦𑀺𑀲𑁆𑀲𑀭𑀡𑀦𑀺𑀭𑁄𑀥𑁄 𑀘 𑀅𑀫𑀢𑀸 𑀥𑀸𑀢𑀼. 𑀲𑀫𑁆𑀫𑀸𑀲𑀫𑀸𑀥𑀺𑀲𑁆𑀲 𑀇𑀫𑁂 𑀧𑀜𑁆𑀘 𑀦𑀺𑀭𑁄𑀥𑀸. 𑀇𑀫𑁂𑀲𑀼 𑀧𑀜𑁆𑀘𑀲𑀼 𑀦𑀺𑀭𑁄𑀥𑁂𑀲𑀼 𑀙𑀦𑁆𑀤𑀚𑀸𑀢𑁄 𑀳𑁄𑀢𑀺 𑀲𑀤𑁆𑀥𑀸𑀥𑀺𑀫𑀼𑀢𑁆𑀢𑁄, 𑀘𑀺𑀢𑁆𑀢𑀜𑁆𑀘𑀲𑁆𑀲 𑀲𑁆𑀯𑀸𑀥𑀺𑀝𑁆𑀞𑀺𑀢𑀁.

𑀲𑀫𑁆𑀫𑀸𑀲𑀫𑀸𑀥𑀺𑀲𑁆𑀲 𑀓𑀢𑀫𑁂 𑀧𑀜𑁆𑀘 𑀯𑁄𑀲𑁆𑀲𑀕𑁆𑀕𑀸? 𑀯𑀺𑀓𑁆𑀔𑀫𑁆𑀪𑀦𑀯𑁄𑀲𑁆𑀲𑀕𑁆𑀕𑁄, 𑀢𑀤𑀗𑁆𑀕𑀯𑁄𑀲𑁆𑀲𑀕𑁆𑀕𑁄, 𑀲𑀫𑀼𑀘𑁆𑀙𑁂𑀤𑀯𑁄𑀲𑁆𑀲𑀕𑁆𑀕𑁄, 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀯𑁄𑀲𑁆𑀲𑀕𑁆𑀕𑁄, 𑀦𑀺𑀲𑁆𑀲𑀭𑀡𑀯𑁄𑀲𑁆𑀲𑀕𑁆𑀕𑁄. 𑀯𑀺𑀓𑁆𑀔𑀫𑁆𑀪𑀦𑀯𑁄𑀲𑁆𑀲𑀕𑁆𑀕𑁄 𑀘 𑀦𑀻𑀯𑀭𑀡𑀸𑀦𑀁 𑀧𑀞𑀫𑀚𑁆𑀛𑀸𑀦𑀁 𑀪𑀸𑀯𑀬𑀢𑁄, 𑀢𑀤𑀗𑁆𑀕𑀯𑁄𑀲𑁆𑀲𑀕𑁆𑀕𑁄 𑀘 𑀤𑀺𑀝𑁆𑀞𑀺𑀕𑀢𑀸𑀦𑀁 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁 𑀲𑀫𑀸𑀥𑀺𑀁 𑀪𑀸𑀯𑀬𑀢𑁄, 𑀲𑀫𑀼𑀘𑁆𑀙𑁂𑀤𑀯𑁄𑀲𑁆𑀲𑀕𑁆𑀕𑁄 𑀘 𑀮𑁄𑀓𑀼𑀢𑁆𑀢𑀭𑀁 𑀔𑀬𑀕𑀸𑀫𑀺𑀫𑀕𑁆𑀕𑀁 𑀪𑀸𑀯𑀬𑀢𑁄, 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀯𑁄𑀲𑁆𑀲𑀕𑁆𑀕𑁄 𑀘 𑀨𑀮𑀓𑁆𑀔𑀡𑁂, 𑀦𑀺𑀲𑁆𑀲𑀭𑀡𑀯𑁄𑀲𑁆𑀲𑀕𑁆𑀕𑁄 𑀘 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁. 𑀲𑀫𑁆𑀫𑀸𑀲𑀫𑀸𑀥𑀺𑀲𑁆𑀲 𑀇𑀫𑁂 𑀧𑀜𑁆𑀘 𑀯𑁄𑀲𑁆𑀲𑀕𑁆𑀕𑀸. 𑀇𑀫𑁂𑀲𑀼 𑀧𑀜𑁆𑀘𑀲𑀼 𑀯𑁄𑀲𑁆𑀲𑀕𑁆𑀕𑁂𑀲𑀼 𑀙𑀦𑁆𑀤𑀚𑀸𑀢𑁄 𑀳𑁄𑀢𑀺 𑀲𑀤𑁆𑀥𑀸𑀥𑀺𑀫𑀼𑀢𑁆𑀢𑁄, 𑀘𑀺𑀢𑁆𑀢𑀜𑁆𑀘𑀲𑁆𑀲 𑀲𑁆𑀯𑀸𑀥𑀺𑀝𑁆𑀞𑀺𑀢𑀁. 𑀲𑀫𑁆𑀫𑀸𑀲𑀫𑀸𑀥𑀺𑀲𑁆𑀲 𑀇𑀫𑁂 𑀧𑀜𑁆𑀘 𑀯𑀺𑀯𑁂𑀓𑀸, 𑀧𑀜𑁆𑀘 𑀯𑀺𑀭𑀸𑀕𑀸, 𑀧𑀜𑁆𑀘 𑀦𑀺𑀭𑁄𑀥𑀸, 𑀧𑀜𑁆𑀘 𑀯𑁄𑀲𑁆𑀲𑀕𑁆𑀕𑀸, 𑀤𑁆𑀯𑀸𑀤𑀲 𑀦𑀺𑀲𑁆𑀲𑀬𑀸.

𑁨𑁬. ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀬𑁂 𑀓𑁂𑀘𑀺 𑀩𑀮𑀓𑀭𑀡𑀻𑀬𑀸 𑀓𑀫𑁆𑀫𑀦𑁆𑀢𑀸 𑀓𑀭𑀻𑀬𑀦𑁆𑀢𑀺, 𑀲𑀩𑁆𑀩𑁂 𑀢𑁂 𑀧𑀣𑀯𑀺𑀁 𑀦𑀺𑀲𑁆𑀲𑀸𑀬 𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀸𑀬 𑀏𑀯𑀫𑁂𑀢𑁂 𑀩𑀮𑀓𑀭𑀡𑀻𑀬𑀸 𑀓𑀫𑁆𑀫𑀦𑁆𑀢𑀸 𑀓𑀭𑀻𑀬𑀦𑁆𑀢𑀺; 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀻𑀮𑀁 𑀦𑀺𑀲𑁆𑀲𑀸𑀬 𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑁂 𑀪𑀸𑀯𑁂𑀢𑀺, 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑁂 𑀩𑀳𑀼𑀮𑀻𑀓𑀭𑁄𑀢𑀺…𑀧𑁂… 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑁂 𑀪𑀸𑀯𑁂𑀦𑁆𑀢𑁄 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑁂 𑀩𑀳𑀼𑀮𑀻𑀓𑀭𑁄𑀦𑁆𑀢𑁄 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀧𑀸𑀧𑀼𑀡𑀸𑀢𑀺 𑀥𑀫𑁆𑀫𑁂𑀲𑀼…𑀧𑁂… 𑀧𑀜𑁆𑀘 𑀩𑀮𑀸𑀦𑀺 𑀪𑀸𑀯𑁂𑀢𑀺, 𑀧𑀜𑁆𑀘 𑀩𑀮𑀸𑀦𑀺 𑀩𑀳𑀼𑀮𑀻𑀓𑀭𑁄𑀢𑀺…𑀧𑁂… 𑀧𑀜𑁆𑀘 𑀩𑀮𑀸𑀦𑀺 𑀪𑀸𑀯𑁂𑀦𑁆𑀢𑁄 𑀧𑀜𑁆𑀘 𑀩𑀮𑀸𑀦𑀺 𑀩𑀳𑀼𑀮𑀻𑀓𑀭𑁄𑀦𑁆𑀢𑁄 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀧𑀸𑀧𑀼𑀡𑀸𑀢𑀺 𑀥𑀫𑁆𑀫𑁂𑀲𑀼…𑀧𑁂… 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀪𑀸𑀯𑁂𑀢𑀺, 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀩𑀳𑀼𑀮𑀻𑀓𑀭𑁄𑀢𑀺…𑀧𑁂….

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀬𑁂 𑀓𑁂𑀘𑀺 𑀩𑀻𑀚𑀕𑀸𑀫𑀪𑀽𑀢𑀕𑀸𑀫𑀸 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀦𑁆𑀢𑀺, 𑀲𑀩𑁆𑀩𑁂 𑀢𑁂 𑀧𑀣𑀯𑀺𑀁 𑀦𑀺𑀲𑁆𑀲𑀸𑀬 𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀸𑀬 𑀏𑀯𑀫𑁂𑀢𑁂 𑀩𑀻𑀚𑀕𑀸𑀫𑀪𑀽𑀢𑀕𑀸𑀫𑀸 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀦𑁆𑀢𑀺, 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀻𑀮𑀁 𑀦𑀺𑀲𑁆𑀲𑀸𑀬 𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀪𑀸𑀯𑁂𑀦𑁆𑀢𑁄 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀩𑀳𑀼𑀮𑀻𑀓𑀭𑁄𑀦𑁆𑀢𑁄 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀧𑀸𑀧𑀼𑀡𑀸𑀢𑀺 𑀥𑀫𑁆𑀫𑁂𑀲𑀼.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀻𑀮𑀁 𑀦𑀺𑀲𑁆𑀲𑀸𑀬 𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀪𑀸𑀯𑁂𑀦𑁆𑀢𑁄 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀩𑀳𑀼𑀮𑀻𑀓𑀭𑁄𑀦𑁆𑀢𑁄 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀧𑀸𑀧𑀼𑀡𑀸𑀢𑀺 𑀥𑀫𑁆𑀫𑁂𑀲𑀼? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀪𑀸𑀯𑁂𑀢𑀺 𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁 𑀯𑀺𑀭𑀸𑀕𑀦𑀺𑀲𑁆𑀲𑀺𑀢𑀁 𑀦𑀺𑀭𑁄𑀥𑀦𑀺𑀲𑁆𑀲𑀺𑀢𑀁 𑀯𑁄𑀲𑁆𑀲𑀕𑁆𑀕𑀧𑀭𑀺𑀡𑀸𑀫𑀺𑀁. 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀪𑀸𑀯𑁂𑀢𑀺…𑀧𑁂… 𑀲𑀢𑀺𑀦𑁆𑀤𑁆𑀭𑀺𑀬𑀁 𑀪𑀸𑀯𑁂𑀢𑀺…𑀧𑁂… 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀪𑀸𑀯𑁂𑀢𑀺…𑀧𑁂… 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀪𑀸𑀯𑁂𑀢𑀺 𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁 𑀯𑀺𑀭𑀸𑀕𑀦𑀺𑀲𑁆𑀲𑀺𑀢𑀁 𑀦𑀺𑀭𑁄𑀥𑀦𑀺𑀲𑁆𑀲𑀺𑀢𑀁 𑀯𑁄𑀲𑁆𑀲𑀕𑁆𑀕𑀧𑀭𑀺𑀡𑀸𑀫𑀺𑀁. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀻𑀮𑀁 𑀦𑀺𑀲𑁆𑀲𑀸𑀬…𑀧𑁂… 𑀧𑀸𑀧𑀼𑀡𑀸𑀢𑀺 𑀥𑀫𑁆𑀫𑁂𑀲𑀽’’𑀢𑀺.

𑁨. 𑀇𑀦𑁆𑀤𑁆𑀭𑀺𑀬𑀦𑀺𑀤𑁆𑀤𑁂𑀲𑁄

𑁨𑁭. 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀧𑀜𑁆𑀘 𑀯𑀺𑀯𑁂𑀓𑀸, 𑀧𑀜𑁆𑀘 𑀯𑀺𑀭𑀸𑀕𑀸, 𑀧𑀜𑁆𑀘 𑀦𑀺𑀭𑁄𑀥𑀸, 𑀧𑀜𑁆𑀘 𑀯𑁄𑀲𑁆𑀲𑀕𑁆𑀕𑀸, 𑀤𑁆𑀯𑀸𑀤𑀲 𑀦𑀺𑀲𑁆𑀲𑀬𑀸. 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀲𑁆𑀲…𑀧𑁂… 𑀲𑀢𑀺𑀦𑁆𑀤𑁆𑀭𑀺𑀬𑀲𑁆𑀲… 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀲𑁆𑀲… 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀲𑁆𑀲 𑀧𑀜𑁆𑀘 𑀯𑀺𑀯𑁂𑀓𑀸, 𑀧𑀜𑁆𑀘 𑀯𑀺𑀭𑀸𑀕𑀸, 𑀧𑀜𑁆𑀘 𑀦𑀺𑀭𑁄𑀥𑀸, 𑀧𑀜𑁆𑀘 𑀯𑁄𑀲𑁆𑀲𑀕𑁆𑀕𑀸, 𑀤𑁆𑀯𑀸𑀤𑀲 𑀦𑀺𑀲𑁆𑀲𑀬𑀸.

𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀓𑀢𑀫𑁂 𑀧𑀜𑁆𑀘 𑀯𑀺𑀯𑁂𑀓𑀸? 𑀯𑀺𑀓𑁆𑀔𑀫𑁆𑀪𑀦𑀯𑀺𑀯𑁂𑀓𑁄, 𑀢𑀤𑀗𑁆𑀕𑀯𑀺𑀯𑁂𑀓𑁄, 𑀲𑀫𑀼𑀘𑁆𑀙𑁂𑀤𑀯𑀺𑀯𑁂𑀓𑁄, 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀯𑀺𑀯𑁂𑀓𑁄, 𑀦𑀺𑀲𑁆𑀲𑀭𑀡𑀯𑀺𑀯𑁂𑀓𑁄. 𑀯𑀺𑀓𑁆𑀔𑀫𑁆𑀪𑀦𑀯𑀺𑀯𑁂𑀓𑁄 𑀘 𑀦𑀻𑀯𑀭𑀡𑀸𑀦𑀁 𑀧𑀞𑀫𑀚𑁆𑀛𑀸𑀦𑀁 𑀪𑀸𑀯𑀬𑀢𑁄, 𑀢𑀤𑀗𑁆𑀕𑀯𑀺𑀯𑁂𑀓𑁄 𑀘 𑀤𑀺𑀝𑁆𑀞𑀺𑀕𑀢𑀸𑀦𑀁 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁 𑀲𑀫𑀸𑀥𑀺𑀁 𑀪𑀸𑀯𑀬𑀢𑁄, 𑀲𑀫𑀼𑀘𑁆𑀙𑁂𑀤𑀯𑀺𑀯𑁂𑀓𑁄 𑀘 𑀮𑁄𑀓𑀼𑀢𑁆𑀢𑀭𑀁 𑀔𑀬𑀕𑀸𑀫𑀺𑀫𑀕𑁆𑀕𑀁 𑀪𑀸𑀯𑀬𑀢𑁄, 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀯𑀺𑀯𑁂𑀓𑁄 𑀘 𑀨𑀮𑀓𑁆𑀔𑀡𑁂, 𑀦𑀺𑀲𑁆𑀲𑀭𑀡𑀯𑀺𑀯𑁂𑀓𑁄 𑀘 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁. 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀇𑀫𑁂 𑀧𑀜𑁆𑀘 𑀯𑀺𑀯𑁂𑀓𑀸. 𑀇𑀫𑁂𑀲𑀼 𑀧𑀜𑁆𑀘𑀲𑀼 𑀯𑀺𑀯𑁂𑀓𑁂𑀲𑀼 𑀙𑀦𑁆𑀤𑀚𑀸𑀢𑁄 𑀳𑁄𑀢𑀺 𑀲𑀤𑁆𑀥𑀸𑀥𑀺𑀫𑀼𑀢𑁆𑀢𑁄, 𑀘𑀺𑀢𑁆𑀢𑀜𑁆𑀘𑀲𑁆𑀲 𑀲𑁆𑀯𑀸𑀥𑀺𑀝𑁆𑀞𑀺𑀢𑀁…𑀧𑁂… 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀇𑀫𑁂 𑀧𑀜𑁆𑀘 𑀯𑀺𑀯𑁂𑀓𑀸, 𑀧𑀜𑁆𑀘 𑀯𑀺𑀭𑀸𑀕𑀸, 𑀧𑀜𑁆𑀘 𑀦𑀺𑀭𑁄𑀥𑀸, 𑀧𑀜𑁆𑀘 𑀯𑁄𑀲𑁆𑀲𑀕𑁆𑀕𑀸, 𑀤𑁆𑀯𑀸𑀤𑀲 𑀦𑀺𑀲𑁆𑀲𑀬𑀸.

𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀲𑁆𑀲…𑀧𑁂… 𑀲𑀢𑀺𑀦𑁆𑀤𑁆𑀭𑀺𑀬𑀲𑁆𑀲…𑀧𑁂… 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀲𑁆𑀲… 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀲𑁆𑀲 𑀓𑀢𑀫𑁂 𑀧𑀜𑁆𑀘 𑀯𑀺𑀯𑁂𑀓𑀸? 𑀯𑀺𑀓𑁆𑀔𑀫𑁆𑀪𑀦𑀯𑀺𑀯𑁂𑀓𑁄, 𑀢𑀤𑀗𑁆𑀕𑀯𑀺𑀯𑁂𑀓𑁄, 𑀲𑀫𑀼𑀘𑁆𑀙𑁂𑀤𑀯𑀺𑀯𑁂𑀓𑁄, 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀯𑀺𑀯𑁂𑀓𑁄, 𑀦𑀺𑀲𑁆𑀲𑀭𑀡𑀯𑀺𑀯𑁂𑀓𑁄…𑀧𑁂… 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀲𑁆𑀲 𑀇𑀫𑁂 𑀧𑀜𑁆𑀘 𑀯𑀺𑀯𑁂𑀓𑀸, 𑀧𑀜𑁆𑀘 𑀯𑀺𑀭𑀸𑀕𑀸, 𑀧𑀜𑁆𑀘 𑀦𑀺𑀭𑁄𑀥𑀸, 𑀧𑀜𑁆𑀘 𑀯𑁄𑀲𑁆𑀲𑀕𑁆𑀕𑀸, 𑀤𑁆𑀯𑀸𑀤𑀲 𑀦𑀺𑀲𑁆𑀲𑀬𑀸𑀢𑀺.

𑀯𑀺𑀯𑁂𑀓𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁫. 𑀘𑀭𑀺𑀬𑀸𑀓𑀣𑀸

𑁨𑁮. 𑀘𑀭𑀺𑀬𑀸𑀢𑀺, 𑀅𑀝𑁆𑀞 𑀘𑀭𑀺𑀬𑀸𑀬𑁄 𑁋 𑀇𑀭𑀺𑀬𑀸𑀧𑀣𑀘𑀭𑀺𑀬𑀸, 𑀆𑀬𑀢𑀦𑀘𑀭𑀺𑀬𑀸, 𑀲𑀢𑀺𑀘𑀭𑀺𑀬𑀸, 𑀲𑀫𑀸𑀥𑀺𑀘𑀭𑀺𑀬𑀸, 𑀜𑀸𑀡𑀘𑀭𑀺𑀬𑀸, 𑀫𑀕𑁆𑀕𑀘𑀭𑀺𑀬𑀸, 𑀧𑀢𑁆𑀢𑀺𑀘𑀭𑀺𑀬𑀸, 𑀮𑁄𑀓𑀢𑁆𑀣𑀘𑀭𑀺𑀬𑀸𑀢𑀺.

𑀇𑀭𑀺𑀬𑀸𑀧𑀣𑀘𑀭𑀺𑀬𑀸𑀢𑀺 𑀘𑀢𑀽𑀲𑀼 𑀇𑀭𑀺𑀬𑀸𑀧𑀣𑁂𑀲𑀼. 𑀆𑀬𑀢𑀦𑀘𑀭𑀺𑀬𑀸𑀢𑀺 𑀙𑀲𑀼 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑁂𑀲𑀼 𑀆𑀬𑀢𑀦𑁂𑀲𑀼. 𑀲𑀢𑀺𑀘𑀭𑀺𑀬𑀸𑀢𑀺 𑀘𑀢𑀽𑀲𑀼 𑀲𑀢𑀺𑀧𑀝𑁆𑀞𑀸𑀦𑁂𑀲𑀼. 𑀲𑀫𑀸𑀥𑀺𑀘𑀭𑀺𑀬𑀸𑀢𑀺 𑀘𑀢𑀽𑀲𑀼 𑀛𑀸𑀦𑁂𑀲𑀼. 𑀜𑀸𑀡𑀘𑀭𑀺𑀬𑀸𑀢𑀺 𑀘𑀢𑀽𑀲𑀼 𑀅𑀭𑀺𑀬𑀲𑀘𑁆𑀘𑁂𑀲𑀼. 𑀫𑀕𑁆𑀕𑀘𑀭𑀺𑀬𑀸𑀢𑀺 𑀘𑀢𑀽𑀲𑀼 𑀅𑀭𑀺𑀬𑀫𑀕𑁆𑀕𑁂𑀲𑀼. 𑀧𑀢𑁆𑀢𑀺𑀘𑀭𑀺𑀬𑀸𑀢𑀺 𑀘𑀢𑀽𑀲𑀼 𑀲𑀸𑀫𑀜𑁆𑀜𑀨𑀮𑁂𑀲𑀼. 𑀮𑁄𑀓𑀢𑁆𑀣𑀘𑀭𑀺𑀬𑀸𑀢𑀺 𑀢𑀣𑀸𑀕𑀢𑁂𑀲𑀼 𑀅𑀭𑀳𑀦𑁆𑀢𑁂𑀲𑀼 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀲𑀼 𑀧𑀤𑁂𑀲𑁂 [𑀧𑀤𑁂𑀲𑁄 (𑀲𑁆𑀬𑀸.)] 𑀧𑀘𑁆𑀘𑁂𑀓𑀩𑀼𑀤𑁆𑀥𑁂𑀲𑀼 𑀧𑀤𑁂𑀲𑁂 𑀲𑀸𑀯𑀓𑁂𑀲𑀼.

𑀇𑀭𑀺𑀬𑀸𑀧𑀣𑀘𑀭𑀺𑀬𑀸 𑀘 𑀧𑀡𑀺𑀥𑀺𑀲𑀫𑁆𑀧𑀦𑁆𑀦𑀸𑀦𑀁. 𑀆𑀬𑀢𑀦𑀘𑀭𑀺𑀬𑀸 𑀘 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀸𑀦𑀁. 𑀲𑀢𑀺𑀘𑀭𑀺𑀬𑀸 𑀘 𑀅𑀧𑁆𑀧𑀫𑀸𑀤𑀯𑀺𑀳𑀸𑀭𑀻𑀦𑀁. 𑀲𑀫𑀸𑀥𑀺𑀘𑀭𑀺𑀬𑀸 𑀘 𑀅𑀥𑀺𑀘𑀺𑀢𑁆𑀢𑀫𑀦𑀼𑀬𑀼𑀢𑁆𑀢𑀸𑀦𑀁. 𑀜𑀸𑀡𑀘𑀭𑀺𑀬𑀸 𑀘 𑀩𑀼𑀤𑁆𑀥𑀺𑀲𑀫𑁆𑀧𑀦𑁆𑀦𑀸𑀦𑀁. 𑀫𑀕𑁆𑀕𑀘𑀭𑀺𑀬𑀸 𑀘 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑀸𑀦𑀁. 𑀧𑀢𑁆𑀢𑀺𑀘𑀭𑀺𑀬𑀸 𑀘 𑀅𑀥𑀺𑀕𑀢𑀨𑀮𑀸𑀦𑀁. 𑀮𑁄𑀓𑀢𑁆𑀣𑀘𑀭𑀺𑀬𑀸 𑀘 𑀢𑀣𑀸𑀕𑀢𑀸𑀦𑀁 𑀅𑀭𑀳𑀦𑁆𑀢𑀸𑀦𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀦𑀁 𑀧𑀤𑁂𑀲𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀧𑀤𑁂𑀲𑁂 𑀲𑀸𑀯𑀓𑀸𑀦𑀁. 𑀇𑀫𑀸 𑀅𑀝𑁆𑀞 𑀘𑀭𑀺𑀬𑀸𑀬𑁄.

𑁨𑁯. 𑀅𑀧𑀭𑀸𑀧𑀺 𑀅𑀝𑁆𑀞 𑀘𑀭𑀺𑀬𑀸𑀬𑁄. 𑀅𑀥𑀺𑀫𑀼𑀘𑁆𑀘𑀦𑁆𑀢𑁄 𑀲𑀤𑁆𑀥𑀸𑀬 𑀘𑀭𑀢𑀺, 𑀧𑀕𑁆𑀕𑀡𑁆𑀳𑀦𑁆𑀢𑁄 𑀯𑀻𑀭𑀺𑀬𑁂𑀦 𑀘𑀭𑀢𑀺, 𑀉𑀧𑀝𑁆𑀞𑀸𑀧𑁂𑀦𑁆𑀢𑁄 𑀲𑀢𑀺𑀬𑀸 𑀘𑀭𑀢𑀺, 𑀅𑀯𑀺𑀓𑁆𑀔𑁂𑀧𑀁 𑀓𑀭𑁄𑀦𑁆𑀢𑁄 𑀲𑀫𑀸𑀥𑀺𑀦𑀸 𑀘𑀭𑀢𑀺, 𑀧𑀚𑀸𑀦𑀦𑁆𑀢𑁄 𑀧𑀜𑁆𑀜𑀸𑀬 𑀘𑀭𑀢𑀺, 𑀯𑀺𑀚𑀸𑀦𑀦𑁆𑀢𑁄 𑀯𑀺𑀜𑁆𑀜𑀸𑀡𑀘𑀭𑀺𑀬𑀸𑀬 𑀘𑀭𑀢𑀺, 𑀏𑀯𑀁 𑀧𑀝𑀺𑀧𑀦𑁆𑀦𑀲𑁆𑀲 𑀓𑀼𑀲𑀮𑀸 𑀥𑀫𑁆𑀫𑀸 𑀆𑀬𑀸𑀧𑁂𑀦𑁆𑀢𑀻𑀢𑀺 𑀆𑀬𑀢𑀦𑀘𑀭𑀺𑀬𑀸𑀬 𑀘𑀭𑀢𑀺, 𑀏𑀯𑀁 𑀧𑀝𑀺𑀧𑀦𑁆𑀦𑁄 𑀯𑀺𑀲𑁂𑀲𑀫𑀥𑀺𑀕𑀘𑁆𑀙𑀢𑀻𑀢𑀺 𑀯𑀺𑀲𑁂𑀲𑀘𑀭𑀺𑀬𑀸𑀬 𑀘𑀭𑀢𑀺. 𑀇𑀫𑀸 𑀅𑀝𑁆𑀞 𑀘𑀭𑀺𑀬𑀸𑀬𑁄.

𑀅𑀧𑀭𑀸𑀧𑀺 𑀅𑀝𑁆𑀞 𑀘𑀭𑀺𑀬𑀸𑀬𑁄. 𑀤𑀲𑁆𑀲𑀦𑀘𑀭𑀺𑀬𑀸 𑀘 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸, 𑀅𑀪𑀺𑀦𑀺𑀭𑁄𑀧𑀦𑀘𑀭𑀺𑀬𑀸 𑀘 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀲𑁆𑀲, 𑀧𑀭𑀺𑀕𑁆𑀕𑀳𑀘𑀭𑀺𑀬𑀸 𑀘 𑀲𑀫𑁆𑀫𑀸𑀯𑀸𑀘𑀸𑀬, 𑀲𑀫𑀼𑀝𑁆𑀞𑀸𑀦𑀘𑀭𑀺𑀬𑀸 𑀘 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀲𑁆𑀲, 𑀯𑁄𑀤𑀸𑀦𑀘𑀭𑀺𑀬𑀸 𑀘 𑀲𑀫𑁆𑀫𑀸𑀆𑀚𑀻𑀯𑀲𑁆𑀲, 𑀧𑀕𑁆𑀕𑀳𑀘𑀭𑀺𑀬𑀸 𑀘 𑀲𑀫𑁆𑀫𑀸𑀯𑀸𑀬𑀸𑀫𑀲𑁆𑀲, 𑀉𑀧𑀝𑁆𑀞𑀸𑀦𑀘𑀭𑀺𑀬𑀸 𑀘 𑀲𑀫𑁆𑀫𑀸𑀲𑀢𑀺𑀬𑀸, 𑀅𑀯𑀺𑀓𑁆𑀔𑁂𑀧𑀘𑀭𑀺𑀬𑀸 𑀘 𑀲𑀫𑁆𑀫𑀸𑀲𑀫𑀸𑀥𑀺𑀲𑁆𑀲. 𑀇𑀫𑀸 𑀅𑀝𑁆𑀞 𑀘𑀭𑀺𑀬𑀸𑀬𑁄𑀢𑀺.

𑀘𑀭𑀺𑀬𑀸𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁬. 𑀧𑀸𑀝𑀺𑀳𑀸𑀭𑀺𑀬𑀓𑀣𑀸

𑁩𑁦. ‘‘𑀢𑀻𑀡𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂 [𑀅. 𑀦𑀺. 𑁩.𑁬𑁧 𑀧𑀲𑁆𑀲𑀺𑀢𑀩𑁆𑀩𑀸], 𑀧𑀸𑀝𑀺𑀳𑀸𑀭𑀺𑀬𑀸𑀦𑀺. 𑀓𑀢𑀫𑀸𑀦𑀺 𑀢𑀻𑀡𑀺? 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁, 𑀆𑀤𑁂𑀲𑀦𑀸𑀧𑀸𑀝𑀺𑀳𑀸𑀭𑀺𑀬𑀁, 𑀅𑀦𑀼𑀲𑀸𑀲𑀦𑀻𑀧𑀸𑀝𑀺𑀳𑀸𑀭𑀺𑀬𑀁.

‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀅𑀦𑁂𑀓𑀯𑀺𑀳𑀺𑀢𑀁 𑀇𑀤𑁆𑀥𑀺𑀯𑀺𑀥𑀁 𑀧𑀘𑁆𑀘𑀦𑀼𑀪𑁄𑀢𑀺 𑁋 𑀏𑀓𑁄𑀧𑀺 𑀳𑀼𑀢𑁆𑀯𑀸 𑀩𑀳𑀼𑀥𑀸 𑀳𑁄𑀢𑀺, 𑀩𑀳𑀼𑀥𑀸𑀧𑀺 𑀳𑀼𑀢𑁆𑀯𑀸 𑀏𑀓𑁄 𑀳𑁄𑀢𑀺; 𑀆𑀯𑀺𑀪𑀸𑀯𑀁 𑀢𑀺𑀭𑁄𑀪𑀸𑀯𑀁…𑀧𑁂… 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸𑀧𑀺 𑀓𑀸𑀬𑁂𑀦 𑀯𑀲𑀁 𑀯𑀢𑁆𑀢𑁂𑀢𑀺. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁.

‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀆𑀤𑁂𑀲𑀦𑀸𑀧𑀸𑀝𑀺𑀳𑀸𑀭𑀺𑀬𑀁? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀦𑀺𑀫𑀺𑀢𑁆𑀢𑁂𑀦 𑀆𑀤𑀺𑀲𑀢𑀺 𑁋 ‘𑀏𑀯𑀫𑁆𑀧𑀺 𑀢𑁂 𑀫𑀦𑁄, 𑀇𑀢𑁆𑀣𑀫𑁆𑀧𑀺 𑀢𑁂 𑀫𑀦𑁄, 𑀇𑀢𑀺𑀧𑀺 𑀢𑁂 𑀘𑀺𑀢𑁆𑀢’𑀦𑁆𑀢𑀺. 𑀲𑁄 𑀩𑀳𑀼𑀁 𑀘𑁂𑀧𑀺 𑀆𑀤𑀺𑀲𑀢𑀺, 𑀢𑀣𑁂𑀯 𑀢𑀁 𑀳𑁄𑀢𑀺, 𑀦𑁄 𑀅𑀜𑁆𑀜𑀣𑀸. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀦 𑀳𑁂𑀯 𑀔𑁄 𑀦𑀺𑀫𑀺𑀢𑁆𑀢𑁂𑀦 𑀆𑀤𑀺𑀲𑀢𑀺, 𑀅𑀧𑀺 𑀘 𑀔𑁄 𑀫𑀦𑀼𑀲𑁆𑀲𑀸𑀦𑀁 𑀯𑀸 𑀅𑀫𑀦𑀼𑀲𑁆𑀲𑀸𑀦𑀁 𑀯𑀸 𑀤𑁂𑀯𑀢𑀸𑀦𑀁 𑀯𑀸 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀆𑀤𑀺𑀲𑀢𑀺 𑁋 ‘𑀏𑀯𑀫𑁆𑀧𑀺 𑀢𑁂 𑀫𑀦𑁄, 𑀇𑀢𑁆𑀣𑀫𑁆𑀧𑀺 𑀢𑁂 𑀫𑀦𑁄, 𑀇𑀢𑀺𑀧𑀺 𑀢𑁂 𑀘𑀺𑀢𑁆𑀢’𑀦𑁆𑀢𑀺. 𑀲𑁄 𑀩𑀳𑀼𑀁 𑀘𑁂𑀧𑀺 𑀆𑀤𑀺𑀲𑀢𑀺, 𑀢𑀣𑁂𑀯 𑀢𑀁 𑀳𑁄𑀢𑀺, 𑀦𑁄 𑀅𑀜𑁆𑀜𑀣𑀸. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀦 𑀳𑁂𑀯 𑀔𑁄 𑀦𑀺𑀫𑀺𑀢𑁆𑀢𑁂𑀦 𑀆𑀤𑀺𑀲𑀢𑀺, 𑀦𑀧𑀺 𑀫𑀦𑀼𑀲𑁆𑀲𑀸𑀦𑀁 𑀯𑀸 𑀅𑀫𑀦𑀼𑀲𑁆𑀲𑀸𑀦𑀁 𑀯𑀸 𑀤𑁂𑀯𑀢𑀸𑀦𑀁 𑀯𑀸 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀆𑀤𑀺𑀲𑀢𑀺, 𑀅𑀧𑀺 𑀘 𑀔𑁄 𑀯𑀺𑀢𑀓𑁆𑀓𑀬𑀢𑁄 𑀯𑀺𑀘𑀸𑀭𑀬𑀢𑁄 𑀯𑀺𑀢𑀓𑁆𑀓𑀯𑀺𑀧𑁆𑀨𑀸𑀭𑀲𑀤𑁆𑀤𑀁 𑀲𑀼𑀢𑁆𑀯𑀸 𑀆𑀤𑀺𑀲𑀢𑀺 𑁋 ‘𑀏𑀯𑀫𑁆𑀧𑀺 𑀢𑁂 𑀫𑀦𑁄, 𑀇𑀢𑁆𑀣𑀫𑁆𑀧𑀺 𑀢𑁂 𑀫𑀦𑁄, 𑀇𑀢𑀺𑀧𑀺 𑀢𑁂 𑀘𑀺𑀢𑁆𑀢’𑀦𑁆𑀢𑀺. 𑀲𑁄 𑀩𑀳𑀼𑀁 𑀘𑁂𑀧𑀺 𑀆𑀤𑀺𑀲𑀢𑀺, 𑀢𑀣𑁂𑀯 𑀢𑀁 𑀳𑁄𑀢𑀺, 𑀦𑁄 𑀅𑀜𑁆𑀜𑀣𑀸. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀦 𑀳𑁂𑀯 𑀔𑁄 𑀦𑀺𑀫𑀺𑀢𑁆𑀢𑁂𑀦 𑀆𑀤𑀺𑀲𑀢𑀺, 𑀦𑀧𑀺 𑀫𑀦𑀼𑀲𑁆𑀲𑀸𑀦𑀁 𑀯𑀸 𑀅𑀫𑀦𑀼𑀲𑁆𑀲𑀸𑀦𑀁 𑀯𑀸 𑀤𑁂𑀯𑀢𑀸𑀦𑀁 𑀯𑀸 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀆𑀤𑀺𑀲𑀢𑀺, 𑀦𑀧𑀺 𑀯𑀺𑀢𑀓𑁆𑀓𑀬𑀢𑁄 𑀯𑀺𑀘𑀸𑀭𑀬𑀢𑁄 𑀯𑀺𑀢𑀓𑁆𑀓𑀯𑀺𑀧𑁆𑀨𑀸𑀭𑀲𑀤𑁆𑀤𑀁 𑀲𑀼𑀢𑁆𑀯𑀸 𑀆𑀤𑀺𑀲𑀢𑀺, 𑀅𑀧𑀺 𑀘 𑀔𑁄 𑀅𑀯𑀺𑀢𑀓𑁆𑀓𑀁 𑀅𑀯𑀺𑀘𑀸𑀭𑀁 𑀲𑀫𑀸𑀥𑀺𑀁 𑀲𑀫𑀸𑀧𑀦𑁆𑀦𑀲𑁆𑀲 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀧𑀚𑀸𑀦𑀸𑀢𑀺 𑁋 ‘𑀬𑀣𑀸 𑀇𑀫𑀲𑁆𑀲 𑀪𑁄𑀢𑁄 𑀫𑀦𑁄𑀲𑀗𑁆𑀔𑀸𑀭𑀸 𑀧𑀡𑀺𑀳𑀺𑀢𑀸 𑀇𑀫𑀲𑁆𑀲 [𑀢𑀣𑀸 𑀇𑀫𑀲𑁆𑀲 (𑀲𑁆𑀬𑀸.), 𑀬𑀣𑀸 𑀇𑀫𑀲𑁆𑀲 (𑀓.) 𑀅. 𑀦𑀺. 𑁩.𑁬𑁧 𑀧𑀲𑁆𑀲𑀺𑀢𑀩𑁆𑀩𑀸] 𑀘𑀺𑀢𑁆𑀢𑀲𑁆𑀲 𑀅𑀦𑀦𑁆𑀢𑀭𑀸 𑀅𑀫𑀼𑀓𑀁 𑀦𑀸𑀫 𑀯𑀺𑀢𑀓𑁆𑀓𑀁 𑀯𑀺𑀢𑀓𑁆𑀓𑀬𑀺𑀲𑁆𑀲𑀢𑀻’𑀢𑀺 [𑀯𑀺𑀢𑀓𑁆𑀓𑁂𑀲𑁆𑀲𑀢𑀻𑀢𑀺 (𑀲𑁆𑀬𑀸.) 𑀅. 𑀦𑀺. 𑁩.𑁬𑁧]. 𑀲𑁄 𑀩𑀳𑀼𑀁 𑀘𑁂𑀧𑀺 𑀆𑀤𑀺𑀲𑀢𑀺, 𑀢𑀣𑁂𑀯 𑀢𑀁 𑀳𑁄𑀢𑀺, 𑀦𑁄 𑀅𑀜𑁆𑀜𑀣𑀸. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀆𑀤𑁂𑀲𑀦𑀸𑀧𑀸𑀝𑀺𑀳𑀸𑀭𑀺𑀬𑀁.

‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀅𑀦𑀼𑀲𑀸𑀲𑀦𑀻𑀧𑀸𑀝𑀺𑀳𑀸𑀭𑀺𑀬𑀁? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀏𑀯𑀫𑀦𑀼𑀲𑀸𑀲𑀢𑀺 𑁋 ‘𑀏𑀯𑀁 𑀯𑀺𑀢𑀓𑁆𑀓𑁂𑀣, 𑀫𑀸 𑀏𑀯𑀁 𑀯𑀺𑀢𑀓𑁆𑀓𑀬𑀺𑀢𑁆𑀣. 𑀏𑀯𑀁 𑀫𑀦𑀲𑀺 𑀓𑀭𑁄𑀣, 𑀫𑀸 𑀏𑀯𑀁 𑀫𑀦𑀲𑀺 𑀓𑀭𑀺𑀢𑁆𑀣. 𑀇𑀤𑀁 𑀧𑀚𑀳𑀣, 𑀇𑀤𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀣𑀸’𑀢𑀺. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀦𑀼𑀲𑀸𑀲𑀦𑀻𑀧𑀸𑀝𑀺𑀳𑀸𑀭𑀺𑀬𑀁. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀡𑀺 𑀧𑀸𑀝𑀺𑀳𑀸𑀭𑀺𑀬𑀸𑀦𑀺’’.

𑁩𑁧. 𑀦𑁂𑀓𑁆𑀔𑀫𑁆𑀫𑀁 𑀇𑀚𑁆𑀛𑀢𑀻𑀢𑀺 𑁋 𑀇𑀤𑁆𑀥𑀺. 𑀓𑀸𑀫𑀘𑁆𑀙𑀦𑁆𑀤𑀁 𑀧𑀝𑀺𑀳𑀭𑀢𑀻𑀢𑀺 𑁋 𑀧𑀸𑀝𑀺𑀳𑀸𑀭𑀺𑀬𑀁. 𑀬𑁂 𑀢𑁂𑀦 𑀦𑁂𑀓𑁆𑀔𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑀸, 𑀲𑀩𑁆𑀩𑁂 𑀢𑁂 𑀯𑀺𑀲𑀼𑀤𑁆𑀥𑀘𑀺𑀢𑁆𑀢𑀸 𑀅𑀦𑀸𑀯𑀺𑀮𑀲𑀗𑁆𑀓𑀧𑁆𑀧𑀸𑀢𑀺 𑁋 𑀆𑀤𑁂𑀲𑀦𑀸𑀧𑀸𑀝𑀺𑀳𑀸𑀭𑀺𑀬𑀁. ‘‘𑀢𑀁 𑀔𑁄 𑀧𑀦 𑀦𑁂𑀓𑁆𑀔𑀫𑁆𑀫𑀁 𑀏𑀯𑀁 𑀆𑀲𑁂𑀯𑀺𑀢𑀩𑁆𑀩𑀁, 𑀏𑀯𑀁 𑀪𑀸𑀯𑁂𑀢𑀩𑁆𑀩𑀁, 𑀏𑀯𑀁 𑀩𑀳𑀼𑀮𑀻𑀓𑀸𑀢𑀩𑁆𑀩𑀁, 𑀏𑀯𑀁 𑀢𑀤𑀦𑀼𑀥𑀫𑁆𑀫𑀢𑀸 𑀲𑀢𑀺 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑀸’’𑀢𑀺 𑁋 𑀅𑀦𑀼𑀲𑀸𑀲𑀦𑀻𑀧𑀸𑀝𑀺𑀳𑀸𑀭𑀺𑀬𑀁.

𑀅𑀩𑁆𑀬𑀸𑀧𑀸𑀤𑁄 𑀇𑀚𑁆𑀛𑀢𑀻𑀢𑀺 𑁋 𑀇𑀤𑁆𑀥𑀺. 𑀩𑁆𑀬𑀸𑀧𑀸𑀤𑀁 𑀧𑀝𑀺𑀳𑀭𑀢𑀻𑀢𑀺 𑁋 𑀧𑀸𑀝𑀺𑀳𑀸𑀭𑀺𑀬𑀁. 𑀬𑁂 𑀢𑁂𑀦 𑀅𑀩𑁆𑀬𑀸𑀧𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑀸, 𑀲𑀩𑁆𑀩𑁂 𑀢𑁂 𑀯𑀺𑀲𑀼𑀤𑁆𑀥𑀘𑀺𑀢𑁆𑀢𑀸 𑀅𑀦𑀸𑀯𑀺𑀮𑀲𑀗𑁆𑀓𑀧𑁆𑀧𑀸𑀢𑀺 𑁋 𑀆𑀤𑁂𑀲𑀦𑀸𑀧𑀸𑀝𑀺𑀳𑀸𑀭𑀺𑀬𑀁. ‘‘𑀲𑁄 𑀔𑁄 𑀧𑀦 𑀅𑀩𑁆𑀬𑀸𑀧𑀸𑀤𑁄 𑀏𑀯𑀁 𑀆𑀲𑁂𑀯𑀺𑀢𑀩𑁆𑀩𑁄, 𑀏𑀯𑀁 𑀪𑀸𑀯𑁂𑀢𑀩𑁆𑀩𑁄, 𑀏𑀯𑀁 𑀩𑀳𑀼𑀮𑀻𑀓𑀸𑀢𑀩𑁆𑀩𑁄, 𑀏𑀯𑀁 𑀢𑀤𑀦𑀼𑀥𑀫𑁆𑀫𑀢𑀸 𑀲𑀢𑀺 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑀸’’𑀢𑀺 𑁋 𑀅𑀦𑀼𑀲𑀸𑀲𑀦𑀻𑀧𑀸𑀝𑀺𑀳𑀸𑀭𑀺𑀬𑀁.

𑀆𑀮𑁄𑀓𑀲𑀜𑁆𑀜𑀸 𑀇𑀚𑁆𑀛𑀢𑀻𑀢𑀺 𑁋 𑀇𑀤𑁆𑀥𑀺. 𑀣𑀺𑀦𑀫𑀺𑀤𑁆𑀥𑀁 𑀧𑀝𑀺𑀳𑀭𑀢𑀻𑀢𑀺 𑁋 𑀧𑀸𑀝𑀺𑀳𑀸𑀭𑀺𑀬𑀁. 𑀬𑁂 𑀢𑀸𑀬 𑀆𑀮𑁄𑀓𑀲𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑀸, 𑀲𑀩𑁆𑀩𑁂 𑀢𑁂 𑀯𑀺𑀲𑀼𑀤𑁆𑀥𑀘𑀺𑀢𑁆𑀢𑀸 𑀅𑀦𑀸𑀯𑀺𑀮𑀲𑀗𑁆𑀓𑀧𑁆𑀧𑀸𑀢𑀺 𑁋 𑀆𑀤𑁂𑀲𑀦𑀸𑀧𑀸𑀝𑀺𑀳𑀸𑀭𑀺𑀬𑀁. ‘‘𑀲𑀸 𑀔𑁄 𑀧𑀦 𑀆𑀮𑁄𑀓𑀲𑀜𑁆𑀜𑀸 𑀏𑀯𑀁 𑀆𑀲𑁂𑀯𑀺𑀢𑀩𑁆𑀩𑀸, 𑀏𑀯𑀁 𑀪𑀸𑀯𑁂𑀢𑀩𑁆𑀩𑀸, 𑀏𑀯𑀁 𑀩𑀳𑀼𑀮𑀻𑀓𑀸𑀢𑀩𑁆𑀩𑀸, 𑀏𑀯𑀁 𑀢𑀤𑀦𑀼𑀥𑀫𑁆𑀫𑀢𑀸 𑀲𑀢𑀺 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑀸’’𑀢𑀺 𑁋 𑀅𑀦𑀼𑀲𑀸𑀲𑀦𑀻𑀧𑀸𑀝𑀺𑀳𑀸𑀭𑀺𑀬𑀁.

𑀅𑀯𑀺𑀓𑁆𑀔𑁂𑀧𑁄 𑀇𑀚𑁆𑀛𑀢𑀻𑀢𑀺 𑁋 𑀇𑀤𑁆𑀥𑀺. 𑀉𑀤𑁆𑀥𑀘𑁆𑀘𑀁 𑀧𑀝𑀺𑀳𑀭𑀢𑀻𑀢𑀺 𑁋 𑀧𑀸𑀝𑀺𑀳𑀸𑀭𑀺𑀬𑀁. 𑀬𑁂 𑀢𑁂𑀦 𑀅𑀯𑀺𑀓𑁆𑀔𑁂𑀧𑁂𑀦 𑀲𑀫𑀦𑁆𑀦𑀸𑀕𑀢𑀸, 𑀲𑀩𑁆𑀩𑁂 𑀢𑁂 𑀯𑀺𑀲𑀼𑀤𑁆𑀥𑀘𑀺𑀢𑁆𑀢𑀸 𑀅𑀦𑀸𑀯𑀺𑀮𑀲𑀗𑁆𑀓𑀧𑁆𑀧𑀸𑀢𑀺 𑁋 𑀆𑀤𑁂𑀲𑀦𑀸𑀧𑀸𑀝𑀺𑀳𑀸𑀭𑀺𑀬𑀁. ‘‘𑀲𑁄 𑀔𑁄 𑀧𑀦 𑀅𑀯𑀺𑀓𑁆𑀔𑁂𑀧𑁄 𑀏𑀯𑀁 𑀆𑀲𑁂𑀯𑀺𑀢𑀩𑁆𑀩𑁄, 𑀏𑀯𑀁 𑀪𑀸𑀯𑁂𑀢𑀩𑁆𑀩𑁄, 𑀏𑀯𑀁 𑀩𑀳𑀼𑀮𑀻𑀓𑀸𑀢𑀩𑁆𑀩𑁄, 𑀏𑀯𑀁 𑀢𑀤𑀦𑀼𑀥𑀫𑁆𑀫𑀢𑀸 𑀲𑀢𑀺 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑀸’’𑀢𑀺 𑁋 𑀅𑀦𑀼𑀲𑀸𑀲𑀦𑀻𑀧𑀸𑀝𑀺𑀳𑀸𑀭𑀺𑀬𑀁.

𑀥𑀫𑁆𑀫𑀯𑀯𑀢𑁆𑀣𑀸𑀦𑀁 𑀇𑀚𑁆𑀛𑀢𑀻𑀢𑀺 𑁋 𑀇𑀤𑁆𑀥𑀺. 𑀯𑀺𑀘𑀺𑀓𑀺𑀘𑁆𑀙𑀁 𑀧𑀝𑀺𑀳𑀭𑀢𑀻𑀢𑀺 𑁋 𑀧𑀸𑀝𑀺𑀳𑀸𑀭𑀺𑀬𑀁. 𑀬𑁂 𑀢𑁂𑀦 𑀥𑀫𑁆𑀫𑀯𑀯𑀢𑁆𑀣𑀸𑀦𑁂𑀦 𑀲𑀫𑀦𑁆𑀦𑀸𑀕𑀢𑀸, 𑀲𑀩𑁆𑀩𑁂 𑀢𑁂 𑀯𑀺𑀲𑀼𑀤𑁆𑀥𑀘𑀺𑀢𑁆𑀢𑀸 𑀅𑀦𑀸𑀯𑀺𑀮𑀲𑀗𑁆𑀓𑀧𑁆𑀧𑀸𑀢𑀺 𑁋 𑀆𑀤𑁂𑀲𑀦𑀸𑀧𑀸𑀝𑀺𑀳𑀸𑀭𑀺𑀬𑀁. ‘‘𑀢𑀁 𑀔𑁄 𑀧𑀦 𑀥𑀫𑁆𑀫𑀯𑀯𑀢𑁆𑀣𑀸𑀦𑀁 𑀏𑀯𑀁 𑀆𑀲𑁂𑀯𑀺𑀢𑀩𑁆𑀩𑀁, 𑀏𑀯𑀁 𑀪𑀸𑀯𑁂𑀢𑀩𑁆𑀩𑀁, 𑀏𑀯𑀁 𑀩𑀳𑀼𑀮𑀻𑀓𑀸𑀢𑀩𑁆𑀩𑀁, 𑀏𑀯𑀁 𑀢𑀤𑀦𑀼𑀥𑀫𑁆𑀫𑀢𑀸, 𑀲𑀢𑀺 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑀸’’𑀢𑀺 𑁋 𑀅𑀦𑀼𑀲𑀸𑀲𑀦𑀻𑀧𑀸𑀝𑀺𑀳𑀸𑀭𑀺𑀬𑀁.

𑀜𑀸𑀡𑀁 𑀇𑀚𑁆𑀛𑀢𑀻𑀢𑀺 𑁋 𑀇𑀤𑁆𑀥𑀺. 𑀅𑀯𑀺𑀚𑁆𑀚𑀁 𑀧𑀝𑀺𑀳𑀭𑀢𑀻𑀢𑀺 𑁋 𑀧𑀸𑀝𑀺𑀳𑀸𑀭𑀺𑀬𑀁. 𑀬𑁂 𑀢𑁂𑀦 𑀜𑀸𑀡𑁂𑀦 𑀲𑀫𑀦𑁆𑀦𑀸𑀕𑀢𑀸, 𑀲𑀩𑁆𑀩𑁂 𑀢𑁂 𑀯𑀺𑀲𑀼𑀤𑁆𑀥𑀘𑀺𑀢𑁆𑀢𑀸 𑀅𑀦𑀸𑀯𑀺𑀮𑀲𑀗𑁆𑀓𑀧𑁆𑀧𑀸𑀢𑀺 𑁋 𑀆𑀤𑁂𑀲𑀦𑀸𑀧𑀸𑀝𑀺𑀳𑀸𑀭𑀺𑀬𑀁. ‘‘𑀢𑀁 𑀔𑁄 𑀧𑀦 𑀜𑀸𑀡𑀁 𑀏𑀯𑀁 𑀆𑀲𑁂𑀯𑀺𑀢𑀩𑁆𑀩𑀁, 𑀏𑀯𑀁 𑀪𑀸𑀯𑁂𑀢𑀩𑁆𑀩𑀁, 𑀏𑀯𑀁 𑀩𑀳𑀼𑀮𑀻𑀓𑀸𑀢𑀩𑁆𑀩𑀁, 𑀏𑀯𑀁 𑀢𑀤𑀦𑀼𑀥𑀫𑁆𑀫𑀢𑀸 𑀲𑀢𑀺 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑀸’’𑀢𑀺 𑁋 𑀅𑀦𑀼𑀲𑀸𑀲𑀦𑀻𑀧𑀸𑀝𑀺𑀳𑀸𑀭𑀺𑀬𑀁.

𑀧𑀸𑀫𑁄𑀚𑁆𑀚𑀁 𑀇𑀚𑁆𑀛𑀢𑀻𑀢𑀺 𑁋 𑀇𑀤𑁆𑀥𑀺. 𑀅𑀭𑀢𑀺𑀁 𑀧𑀝𑀺𑀳𑀭𑀢𑀻𑀢𑀺 𑁋 𑀧𑀸𑀝𑀺𑀳𑀸𑀭𑀺𑀬𑀁. 𑀬𑁂 𑀢𑁂𑀦 𑀧𑀸𑀫𑁄𑀚𑁆𑀚𑁂𑀦 𑀲𑀫𑀦𑁆𑀦𑀸𑀕𑀢𑀸, 𑀲𑀩𑁆𑀩𑁂 𑀢𑁂 𑀯𑀺𑀲𑀼𑀤𑁆𑀥𑀘𑀺𑀢𑁆𑀢𑀸 𑀅𑀦𑀸𑀯𑀺𑀮𑀲𑀗𑁆𑀓𑀧𑁆𑀧𑀸𑀢𑀺 𑁋 𑀆𑀤𑁂𑀲𑀦𑀸𑀧𑀸𑀝𑀺𑀳𑀸𑀭𑀺𑀬𑀁. ‘‘𑀢𑀁 𑀔𑁄 𑀧𑀦 𑀧𑀸𑀫𑁄𑀚𑁆𑀚𑀁 𑀏𑀯𑀁 𑀆𑀲𑁂𑀯𑀺𑀢𑀩𑁆𑀩𑀁, 𑀏𑀯𑀁 𑀪𑀸𑀯𑁂𑀢𑀩𑁆𑀩𑀁, 𑀏𑀯𑀁 𑀩𑀳𑀼𑀮𑀻𑀓𑀸𑀢𑀩𑁆𑀩𑀁, 𑀏𑀯𑀁 𑀢𑀤𑀦𑀼𑀥𑀫𑁆𑀫𑀢𑀸 𑀲𑀢𑀺 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑀸’’𑀢𑀺 𑁋 𑀅𑀦𑀼𑀲𑀸𑀲𑀦𑀻𑀧𑀸𑀝𑀺𑀳𑀸𑀭𑀺𑀬𑀁…𑀧𑁂….

𑀧𑀞𑀫𑀁 𑀛𑀸𑀦𑀁 𑀇𑀚𑁆𑀛𑀢𑀻𑀢𑀺 𑁋 𑀇𑀤𑁆𑀥𑀺. 𑀦𑀻𑀯𑀭𑀡𑁂 𑀧𑀝𑀺𑀳𑀭𑀢𑀻𑀢𑀺 𑁋 𑀧𑀸𑀝𑀺𑀳𑀸𑀭𑀺𑀬𑀁. 𑀬𑁂 𑀢𑁂𑀦 𑀧𑀞𑀫𑁂𑀦 𑀛𑀸𑀦𑁂𑀦 𑀲𑀫𑀦𑁆𑀦𑀸𑀕𑀢𑀸, 𑀲𑀩𑁆𑀩𑁂 𑀢𑁂 𑀯𑀺𑀲𑀼𑀤𑁆𑀥𑀘𑀺𑀢𑁆𑀢𑀸 𑀅𑀦𑀸𑀯𑀺𑀮𑀲𑀗𑁆𑀓𑀧𑁆𑀧𑀸𑀢𑀺 𑁋 𑀆𑀤𑁂𑀲𑀦𑀸𑀧𑀸𑀝𑀺𑀳𑀸𑀭𑀺𑀬𑀁. ‘‘𑀢𑀁 𑀔𑁄 𑀧𑀦 𑀧𑀞𑀫𑀁 𑀛𑀸𑀦𑀁 𑀏𑀯𑀁 𑀆𑀲𑁂𑀯𑀺𑀢𑀩𑁆𑀩𑀁, 𑀏𑀯𑀁 𑀪𑀸𑀯𑁂𑀢𑀩𑁆𑀩𑀁, 𑀏𑀯𑀁 𑀩𑀳𑀼𑀮𑀻𑀓𑀸𑀢𑀩𑁆𑀩𑀁, 𑀏𑀯𑀁 𑀢𑀤𑀦𑀼𑀥𑀫𑁆𑀫𑀢𑀸 𑀲𑀢𑀺 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑀸’’𑀢𑀺 𑁋 𑀅𑀦𑀼𑀲𑀸𑀲𑀦𑀻𑀧𑀸𑀝𑀺𑀳𑀸𑀭𑀺𑀬𑀁…𑀧𑁂….