𑁧𑁦. 𑀫𑀸𑀢𑀺𑀓𑀸𑀓𑀣𑀸

𑁪𑁦. 𑀦𑀺𑀘𑁆𑀙𑀸𑀢𑁄 [𑀦𑀺𑀘𑁆𑀙𑀸𑀢𑁄 𑀫𑀼𑀘𑁆𑀘𑀢𑀻𑀢𑀺 (𑀲𑁆𑀬𑀸.)], 𑀫𑁄𑀓𑁆𑀔𑁄 𑀯𑀺𑀫𑁄𑀓𑁆𑀔𑁄, 𑀯𑀺𑀚𑁆𑀚𑀸𑀯𑀺𑀫𑀼𑀢𑁆𑀢𑀺, 𑀅𑀥𑀺𑀲𑀻𑀮𑀁, 𑀅𑀥𑀺𑀘𑀺𑀢𑁆𑀢𑀁, 𑀅𑀥𑀺𑀧𑀜𑁆𑀜𑀸, 𑀧𑀲𑁆𑀲𑀤𑁆𑀥𑀺, 𑀜𑀸𑀡𑀁, 𑀤𑀲𑁆𑀲𑀦𑀁 𑀯𑀺𑀲𑀼𑀤𑁆𑀥𑀺 [𑀲𑀼𑀤𑁆𑀥𑀺 (𑀲𑁆𑀬𑀸.)] 𑀦𑁂𑀓𑁆𑀔𑀫𑁆𑀫𑀁, 𑀦𑀺𑀲𑁆𑀲𑀭𑀡𑀁 𑀧𑀯𑀺𑀯𑁂𑀓𑁄, 𑀯𑁄𑀲𑁆𑀲𑀕𑁆𑀕𑁄, 𑀘𑀭𑀺𑀬𑀸, 𑀛𑀸𑀦𑀯𑀺𑀫𑁄𑀓𑁆𑀔𑁄, 𑀪𑀸𑀯𑀦𑀸, 𑀅𑀥𑀺𑀝𑁆𑀞𑀸𑀦𑀁, 𑀚𑀻𑀯𑀺𑀢𑀁.

𑁪𑁧. 𑀦𑀺𑀘𑁆𑀙𑀸𑀢𑁄𑀢𑀺 𑀦𑁂𑀓𑁆𑀔𑀫𑁆𑀫𑁂𑀦 𑀓𑀸𑀫𑀘𑁆𑀙𑀦𑁆𑀤𑀢𑁄 𑀦𑀺𑀘𑁆𑀙𑀸𑀢𑁄, 𑀅𑀩𑁆𑀬𑀸𑀧𑀸𑀤𑁂𑀦 𑀩𑁆𑀬𑀸𑀧𑀸𑀤𑀢𑁄 𑀦𑀺𑀘𑁆𑀙𑀸𑀢𑁄…𑀧𑁂… 𑀧𑀞𑀫𑁂𑀦 𑀛𑀸𑀦𑁂𑀦 𑀦𑀻𑀯𑀭𑀡𑁂𑀳𑀺 𑀦𑀺𑀘𑁆𑀙𑀸𑀢𑁄…𑀧𑁂… 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀲𑀩𑁆𑀩𑀓𑀺𑀮𑁂𑀲𑁂𑀳𑀺 𑀦𑀺𑀘𑁆𑀙𑀸𑀢𑁄.

𑀫𑁄𑀓𑁆𑀔𑁄 𑀯𑀺𑀫𑁄𑀓𑁆𑀔𑁄𑀢𑀺 𑀦𑁂𑀓𑁆𑀔𑀫𑁆𑀫𑁂𑀦 𑀓𑀸𑀫𑀘𑁆𑀙𑀦𑁆𑀤𑀢𑁄 𑀫𑀼𑀘𑁆𑀘𑀢𑀻𑀢𑀺 𑁋 𑀫𑁄𑀓𑁆𑀔𑁄 𑀯𑀺𑀫𑁄𑀓𑁆𑀔𑁄. 𑀅𑀩𑁆𑀬𑀸𑀧𑀸𑀤𑁂𑀦 𑀩𑁆𑀬𑀸𑀧𑀸𑀤𑀢𑁄 𑀫𑀼𑀘𑁆𑀘𑀢𑀻𑀢𑀺 𑁋 𑀫𑁄𑀓𑁆𑀔𑁄 𑀯𑀺𑀫𑁄𑀓𑁆𑀔𑁄…𑀧𑁂… 𑀧𑀞𑀫𑁂𑀦 𑀛𑀸𑀦𑁂𑀦 𑀦𑀻𑀯𑀭𑀡𑁂𑀳𑀺 𑀫𑀼𑀘𑁆𑀘𑀢𑀻𑀢𑀺 𑁋 𑀫𑁄𑀓𑁆𑀔𑁄 𑀯𑀺𑀫𑁄𑀓𑁆𑀔𑁄…𑀧𑁂… 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀲𑀩𑁆𑀩𑀓𑀺𑀮𑁂𑀲𑁂𑀳𑀺 𑀫𑀼𑀘𑁆𑀘𑀢𑀻𑀢𑀺 𑁋 𑀫𑁄𑀓𑁆𑀔𑁄 𑀯𑀺𑀫𑁄𑀓𑁆𑀔𑁄.

𑀯𑀺𑀚𑁆𑀚𑀸𑀯𑀺𑀫𑀼𑀢𑁆𑀢𑀻𑀢𑀺 𑀦𑁂𑀓𑁆𑀔𑀫𑁆𑀫𑀁 𑀯𑀺𑀚𑁆𑀚𑀢𑀻𑀢𑀺 𑀯𑀺𑀚𑁆𑀚𑀸, 𑀓𑀸𑀫𑀘𑁆𑀙𑀦𑁆𑀤𑀢𑁄 𑀫𑀼𑀘𑁆𑀘𑀢𑀻𑀢𑀺 𑀯𑀺𑀫𑀼𑀢𑁆𑀢𑀺. 𑀯𑀺𑀚𑁆𑀚𑀦𑁆𑀢𑁄 𑀫𑀼𑀘𑁆𑀘𑀢𑀺, 𑀫𑀼𑀘𑁆𑀘𑀦𑁆𑀢𑁄 𑀯𑀺𑀚𑁆𑀚𑀢𑀻𑀢𑀺 𑁋 𑀯𑀺𑀚𑁆𑀚𑀸𑀯𑀺𑀫𑀼𑀢𑁆𑀢𑀺. 𑀅𑀩𑁆𑀬𑀸𑀧𑀸𑀤𑁄 [𑀅𑀩𑁆𑀬𑀸𑀧𑀸𑀤𑀁 (𑀲𑁆𑀬𑀸.)] 𑀯𑀺𑀚𑁆𑀚𑀢𑀻𑀢𑀺 𑀯𑀺𑀚𑁆𑀚𑀸, 𑀩𑁆𑀬𑀸𑀧𑀸𑀤𑀢𑁄 𑀯𑀺𑀫𑀼𑀘𑁆𑀘𑀢𑀻𑀢𑀺 𑀯𑀺𑀫𑀼𑀢𑁆𑀢𑀺. 𑀯𑀺𑀚𑁆𑀚𑀦𑁆𑀢𑁄 𑀫𑀼𑀘𑁆𑀘𑀢𑀺, 𑀫𑀼𑀘𑁆𑀘𑀦𑁆𑀢𑁄 𑀯𑀺𑀚𑁆𑀚𑀢𑀻𑀢𑀺 𑁋 𑀯𑀺𑀚𑁆𑀚𑀸𑀯𑀺𑀫𑀼𑀢𑁆𑀢𑀺…𑀧𑁂… 𑀅𑀭𑀳𑀢𑁆𑀢𑀫𑀕𑁆𑀕𑁄 𑀯𑀺𑀚𑁆𑀚𑀢𑀻𑀢𑀺 𑀯𑀺𑀚𑁆𑀚𑀸, 𑀲𑀩𑁆𑀩𑀓𑀺𑀮𑁂𑀲𑁂𑀳𑀺 𑀫𑀼𑀘𑁆𑀘𑀢𑀻𑀢𑀺 𑀯𑀺𑀫𑀼𑀢𑁆𑀢𑀺. 𑀯𑀺𑀚𑁆𑀚𑀦𑁆𑀢𑁄 𑀫𑀼𑀘𑁆𑀘𑀢𑀺, 𑀫𑀼𑀘𑁆𑀘𑀦𑁆𑀢𑁄 𑀯𑀺𑀚𑁆𑀚𑀢𑀻𑀢𑀺 𑁋 𑀯𑀺𑀚𑁆𑀚𑀸𑀯𑀺𑀫𑀼𑀢𑁆𑀢𑀺.

𑀅𑀥𑀺𑀲𑀻𑀮𑀁 𑀅𑀥𑀺𑀘𑀺𑀢𑁆𑀢𑀁 𑀅𑀥𑀺𑀧𑀜𑁆𑀜𑀸𑀢𑀺 𑀦𑁂𑀓𑁆𑀔𑀫𑁆𑀫𑁂𑀦 𑀓𑀸𑀫𑀘𑁆𑀙𑀦𑁆𑀤𑀁, 𑀲𑀁𑀯𑀭𑀝𑁆𑀞𑁂𑀦 𑀲𑀻𑀮𑀯𑀺𑀲𑀼𑀤𑁆𑀥𑀺, 𑀅𑀯𑀺𑀓𑁆𑀔𑁂𑀧𑀝𑁆𑀞𑁂𑀦 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀺, 𑀤𑀲𑁆𑀲𑀦𑀝𑁆𑀞𑁂𑀦 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺. 𑀬𑁄 𑀢𑀢𑁆𑀣 𑀲𑀁𑀯𑀭𑀝𑁆𑀞𑁄, 𑀅𑀬𑀁 𑀅𑀥𑀺𑀲𑀻𑀮𑀲𑀺𑀓𑁆𑀔𑀸. 𑀬𑁄 𑀢𑀢𑁆𑀣 𑀅𑀯𑀺𑀓𑁆𑀔𑁂𑀧𑀝𑁆𑀞𑁄, 𑀅𑀬𑀁 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸. 𑀬𑁄 𑀢𑀢𑁆𑀣 𑀤𑀲𑁆𑀲𑀦𑀝𑁆𑀞𑁄, 𑀅𑀬𑀁 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸. 𑀅𑀩𑁆𑀬𑀸𑀧𑀸𑀤𑁂𑀦 𑀩𑁆𑀬𑀸𑀧𑀸𑀤𑀁 𑀲𑀁𑀯𑀭𑀝𑁆𑀞𑁂𑀦 𑀲𑀻𑀮𑀯𑀺𑀲𑀼𑀤𑁆𑀥𑀺…𑀧𑁂… 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀲𑀩𑁆𑀩𑀓𑀺𑀮𑁂𑀲𑁂 𑀲𑀁𑀯𑀭𑀝𑁆𑀞𑁂𑀦 𑀲𑀻𑀮𑀯𑀺𑀲𑀼𑀤𑁆𑀥𑀺, 𑀅𑀯𑀺𑀓𑁆𑀔𑁂𑀧𑀝𑁆𑀞𑁂𑀦 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀺. 𑀤𑀲𑁆𑀲𑀦𑀝𑁆𑀞𑁂𑀦 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺. 𑀬𑁄 𑀢𑀢𑁆𑀣 𑀲𑀁𑀯𑀭𑀝𑁆𑀞𑁄, 𑀅𑀬𑀁 𑀅𑀥𑀺𑀲𑀻𑀮𑀲𑀺𑀓𑁆𑀔𑀸. 𑀬𑁄 𑀢𑀢𑁆𑀣 𑀅𑀯𑀺𑀓𑁆𑀔𑁂𑀧𑀝𑁆𑀞𑁄, 𑀅𑀬𑀁 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸. 𑀬𑁄 𑀢𑀢𑁆𑀣 𑀤𑀲𑁆𑀲𑀦𑀝𑁆𑀞𑁄, 𑀅𑀬𑀁 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸.

𑀧𑀲𑁆𑀲𑀤𑁆𑀥𑀻𑀢𑀺 𑀦𑁂𑀓𑁆𑀔𑀫𑁆𑀫𑁂𑀦 𑀓𑀸𑀫𑀘𑁆𑀙𑀦𑁆𑀤𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀺, 𑀅𑀩𑁆𑀬𑀸𑀧𑀸𑀤𑁂𑀦 𑀩𑁆𑀬𑀸𑀧𑀸𑀤𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀺…𑀧𑁂… 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀲𑀩𑁆𑀩𑀓𑀺𑀮𑁂𑀲𑁂 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀺.

𑀜𑀸𑀡𑀦𑁆𑀢𑀺 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀧𑀳𑀻𑀦𑀢𑁆𑀢𑀸 𑀦𑁂𑀓𑁆𑀔𑀫𑁆𑀫𑀁 𑀜𑀸𑀢𑀝𑁆𑀞𑁂𑀦 𑀜𑀸𑀡𑀁; 𑀩𑁆𑀬𑀸𑀧𑀸𑀤𑀲𑁆𑀲 𑀧𑀳𑀻𑀦𑀢𑁆𑀢𑀸 𑀅𑀩𑁆𑀬𑀸𑀧𑀸𑀤𑁄 𑀜𑀸𑀢𑀝𑁆𑀞𑁂𑀦 𑀜𑀸𑀡𑀁…𑀧𑁂… 𑀲𑀩𑁆𑀩𑀓𑀺𑀮𑁂𑀲𑀸𑀦𑀁 𑀧𑀳𑀻𑀦𑀢𑁆𑀢𑀸 𑀅𑀭𑀳𑀢𑁆𑀢𑀫𑀕𑁆𑀕𑁄 𑀜𑀸𑀢𑀝𑁆𑀞𑁂𑀦 𑀜𑀸𑀡𑀁.

𑀤𑀲𑁆𑀲𑀦𑀦𑁆𑀢𑀺 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀧𑀳𑀻𑀦𑀢𑁆𑀢𑀸 𑀦𑁂𑀓𑁆𑀔𑀫𑁆𑀫𑀁 𑀤𑀺𑀝𑁆𑀞𑀢𑁆𑀢𑀸 𑀤𑀲𑁆𑀲𑀦𑀁. 𑀩𑁆𑀬𑀸𑀧𑀸𑀤𑀲𑁆𑀲 𑀧𑀳𑀻𑀦𑀢𑁆𑀢𑀸 𑀅𑀩𑁆𑀬𑀸𑀧𑀸𑀤𑁄 𑀤𑀺𑀝𑁆𑀞𑀢𑁆𑀢𑀸 𑀤𑀲𑁆𑀲𑀦𑀁…𑀧𑁂… 𑀲𑀩𑁆𑀩𑀓𑀺𑀮𑁂𑀲𑀸𑀦𑀁 𑀧𑀳𑀻𑀦𑀢𑁆𑀢𑀸 𑀅𑀭𑀳𑀢𑁆𑀢𑀫𑀕𑁆𑀕𑁄 𑀤𑀺𑀝𑁆𑀞𑀢𑁆𑀢𑀸 𑀤𑀲𑁆𑀲𑀦𑀁.

𑀯𑀺𑀲𑀼𑀤𑁆𑀥𑀻𑀢𑀺 𑀓𑀸𑀫𑀘𑁆𑀙𑀦𑁆𑀤𑀁 𑀧𑀚𑀳𑀦𑁆𑀢𑁄 𑀦𑁂𑀓𑁆𑀔𑀫𑁆𑀫𑁂𑀦 𑀯𑀺𑀲𑀼𑀚𑁆𑀛𑀢𑀺. 𑀩𑁆𑀬𑀸𑀧𑀸𑀤𑀁 𑀧𑀚𑀳𑀦𑁆𑀢𑁄 𑀅𑀩𑁆𑀬𑀸𑀧𑀸𑀤𑁂𑀦 𑀯𑀺𑀲𑀼𑀚𑁆𑀛𑀢𑀺…𑀧𑁂… 𑀲𑀩𑁆𑀩𑀓𑀺𑀮𑁂𑀲𑁂 𑀧𑀚𑀳𑀦𑁆𑀢𑁄 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀯𑀺𑀲𑀼𑀚𑁆𑀛𑀢𑀺.

𑀦𑁂𑀓𑁆𑀔𑀫𑁆𑀫𑀦𑁆𑀢𑀺 𑀓𑀸𑀫𑀸𑀦𑀫𑁂𑀢𑀁 𑀦𑀺𑀲𑁆𑀲𑀭𑀡𑀁, 𑀬𑀤𑀺𑀤𑀁 𑀦𑁂𑀓𑁆𑀔𑀫𑁆𑀫𑀁. 𑀭𑀽𑀧𑀸𑀦𑀫𑁂𑀢𑀁 𑀦𑀺𑀲𑁆𑀲𑀭𑀡𑀁, 𑀬𑀤𑀺𑀤𑀁 𑀆𑀭𑀼𑀧𑁆𑀧𑀁. 𑀬𑀁 𑀔𑁄 𑀧𑀦 𑀓𑀺𑀜𑁆𑀘𑀺 𑀪𑀽𑀢𑀁 𑀲𑀗𑁆𑀔𑀢𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁, 𑀦𑀺𑀭𑁄𑀥𑁄 𑀢𑀲𑁆𑀲 𑀦𑁂𑀓𑁆𑀔𑀫𑁆𑀫𑀁. 𑀩𑁆𑀬𑀸𑀧𑀸𑀤𑀲𑁆𑀲 𑀅𑀩𑁆𑀬𑀸𑀧𑀸𑀤𑁄 𑀦𑁂𑀓𑁆𑀔𑀫𑁆𑀫𑀁. 𑀣𑀺𑀦𑀫𑀺𑀤𑁆𑀥𑀲𑁆𑀲 𑀆𑀮𑁄𑀓𑀲𑀜𑁆𑀜𑀸 𑀦𑁂𑀓𑁆𑀔𑀫𑁆𑀫𑀁…𑀧𑁂… 𑀲𑀩𑁆𑀩𑀓𑀺𑀮𑁂𑀲𑀸𑀦𑀁 𑀅𑀭𑀳𑀢𑁆𑀢𑀫𑀕𑁆𑀕𑁄 𑀦𑁂𑀓𑁆𑀔𑀫𑁆𑀫𑀁.

𑀦𑀺𑀲𑁆𑀲𑀭𑀡𑀦𑁆𑀢𑀺 𑀓𑀸𑀫𑀸𑀦𑀫𑁂𑀢𑀁 𑀦𑀺𑀲𑁆𑀲𑀭𑀡𑀁, 𑀬𑀤𑀺𑀤𑀁 𑀦𑁂𑀓𑁆𑀔𑀫𑁆𑀫𑀁. 𑀭𑀽𑀧𑀸𑀦𑀫𑁂𑀢𑀁 𑀦𑀺𑀲𑁆𑀲𑀭𑀡𑀁, 𑀬𑀤𑀺𑀤𑀁 𑀆𑀭𑀼𑀧𑁆𑀧𑀁. 𑀬𑀁 𑀔𑁄 𑀧𑀦 𑀓𑀺𑀜𑁆𑀘𑀺 𑀪𑀽𑀢𑀁 𑀲𑀗𑁆𑀔𑀢𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁, 𑀦𑀺𑀭𑁄𑀥𑁄 𑀢𑀲𑁆𑀲 𑀦𑀺𑀲𑁆𑀲𑀭𑀡𑀁. 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀦𑁂𑀓𑁆𑀔𑀫𑁆𑀫𑀁 𑀦𑀺𑀲𑁆𑀲𑀭𑀡𑀁. 𑀩𑁆𑀬𑀸𑀧𑀸𑀤𑀲𑁆𑀲 𑀅𑀩𑁆𑀬𑀸𑀧𑀸𑀤𑁄 𑀦𑀺𑀲𑁆𑀲𑀭𑀡𑀁…𑀧𑁂… 𑀲𑀩𑁆𑀩𑀓𑀺𑀮𑁂𑀲𑀸𑀦𑀁 𑀅𑀭𑀳𑀢𑁆𑀢𑀫𑀕𑁆𑀕𑁄 𑀦𑀺𑀲𑁆𑀲𑀭𑀡𑀁.

𑀧𑀯𑀺𑀯𑁂𑀓𑁄𑀢𑀺 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀦𑁂𑀓𑁆𑀔𑀫𑁆𑀫𑀁 𑀧𑀯𑀺𑀯𑁂𑀓𑁄 …𑀧𑁂… 𑀲𑀩𑁆𑀩𑀓𑀺𑀮𑁂𑀲𑀸𑀦𑀁 𑀅𑀭𑀳𑀢𑁆𑀢𑀫𑀕𑁆𑀕𑁄 𑀧𑀯𑀺𑀯𑁂𑀓𑁄.

𑀯𑁄𑀲𑁆𑀲𑀕𑁆𑀕𑁄𑀢𑀺 𑀦𑁂𑀓𑁆𑀔𑀫𑁆𑀫𑁂𑀦 𑀓𑀸𑀫𑀘𑁆𑀙𑀦𑁆𑀤𑀁 𑀯𑁄𑀲𑁆𑀲𑀚𑁆𑀚𑀢𑀻𑀢𑀺 𑁋 𑀯𑁄𑀲𑁆𑀲𑀕𑁆𑀕𑁄. 𑀅𑀩𑁆𑀬𑀸𑀧𑀸𑀤𑁂𑀦 𑀩𑁆𑀬𑀸𑀧𑀸𑀤𑀁 𑀯𑁄𑀲𑁆𑀲𑀚𑁆𑀚𑀢𑀻𑀢𑀺 𑁋 𑀯𑁄𑀲𑁆𑀲𑀕𑁆𑀕𑁄…𑀧𑁂… 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀲𑀩𑁆𑀩𑀓𑀺𑀮𑁂𑀲𑁂 𑀯𑁄𑀲𑁆𑀲𑀚𑁆𑀚𑀢𑀻𑀢𑀺 𑁋 𑀯𑁄𑀲𑁆𑀲𑀕𑁆𑀕𑁄.

𑀘𑀭𑀺𑀬𑀸𑀢𑀺 𑀓𑀸𑀫𑀘𑁆𑀙𑀦𑁆𑀤𑀁 𑀧𑀚𑀳𑀦𑁆𑀢𑁄 𑀦𑁂𑀓𑁆𑀔𑀫𑁆𑀫𑁂𑀦 𑀘𑀭𑀢𑀺. 𑀩𑁆𑀬𑀸𑀧𑀸𑀤𑀁 𑀧𑀚𑀳𑀦𑁆𑀢𑁄 𑀅𑀩𑁆𑀬𑀸𑀧𑀸𑀤𑁂𑀦 𑀘𑀭𑀢𑀺…𑀧𑁂… 𑀲𑀩𑁆𑀩𑀓𑀺𑀮𑁂𑀲𑁂 𑀧𑀚𑀳𑀦𑁆𑀢𑁄 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀘𑀭𑀢𑀺.

𑀛𑀸𑀦𑀯𑀺𑀫𑁄𑀓𑁆𑀔𑁄𑀢𑀺 𑀦𑁂𑀓𑁆𑀔𑀫𑁆𑀫𑀁 𑀛𑀸𑀬𑀢𑀻𑀢𑀺 𑁋 𑀛𑀸𑀦𑀁. 𑀓𑀸𑀫𑀘𑁆𑀙𑀦𑁆𑀤𑀁 𑀛𑀸𑀧𑁂𑀢𑀻𑀢𑀺 𑁋 𑀛𑀸𑀦𑀁. 𑀛𑀸𑀬𑀦𑁆𑀢𑁄 𑀫𑀼𑀘𑁆𑀘𑀢𑀻𑀢𑀺 𑁋 𑀛𑀸𑀦𑀯𑀺𑀫𑁄𑀓𑁆𑀔𑁄. 𑀛𑀸𑀧𑁂𑀦𑁆𑀢𑁄 𑀫𑀼𑀘𑁆𑀘𑀢𑀻𑀢𑀺 𑁋 𑀛𑀸𑀦𑀯𑀺𑀫𑁄𑀓𑁆𑀔𑁄. 𑀛𑀸𑀬𑀦𑁆𑀢𑀻𑀢𑀺 𑀥𑀫𑁆𑀫𑀸. 𑀛𑀸𑀧𑁂𑀦𑁆𑀢𑀻𑀢𑀺 𑀓𑀺𑀮𑁂𑀲𑁂. 𑀛𑀸𑀢𑁂 𑀘 𑀛𑀸𑀧𑁂 𑀘 𑀚𑀸𑀦𑀸𑀢𑀻𑀢𑀺 𑁋 𑀛𑀸𑀦𑀛𑀸𑀬𑀻 [𑀛𑀸𑀦𑀯𑀺𑀫𑁄𑀓𑁆𑀔𑁄 (𑀲𑁆𑀬𑀸.) 𑀅𑀝𑁆𑀞𑀓𑀣𑀸 𑀑𑀮𑁄𑀓𑁂𑀢𑀩𑁆𑀩𑀸]. 𑀅𑀩𑁆𑀬𑀸𑀧𑀸𑀤𑁄 𑀛𑀸𑀬𑀢𑀻𑀢𑀺 𑀛𑀸𑀦𑀁. 𑀩𑁆𑀬𑀸𑀧𑀸𑀤𑀁 𑀛𑀸𑀧𑁂𑀢𑀻𑀢𑀺 𑁋 𑀛𑀸𑀦𑀁…𑀧𑁂… 𑀆𑀮𑁄𑀓𑀲𑀜𑁆𑀜𑀸 𑀛𑀸𑀬𑀢𑀻𑀢𑀺 𑁋 𑀛𑀸𑀦𑀁. 𑀣𑀺𑀦𑀫𑀺𑀤𑁆𑀥𑀁 𑀛𑀸𑀧𑁂𑀢𑀻𑀢𑀺 𑁋 𑀛𑀸𑀦𑀁…𑀧𑁂… 𑀅𑀭𑀳𑀢𑁆𑀢𑀫𑀕𑁆𑀕𑁄 𑀛𑀸𑀬𑀢𑀻𑀢𑀺 𑁋 𑀛𑀸𑀦𑀁. 𑀲𑀩𑁆𑀩𑀓𑀺𑀮𑁂𑀲𑁂 𑀛𑀸𑀧𑁂𑀢𑀻𑀢𑀺 𑁋 𑀛𑀸𑀦𑀁. 𑀛𑀸𑀬𑀦𑁆𑀢𑁄 𑀫𑀼𑀘𑁆𑀘𑀢𑀻𑀢𑀺 𑁋 𑀛𑀸𑀦𑀯𑀺𑀫𑁄𑀓𑁆𑀔𑁄. 𑀛𑀸𑀧𑁂𑀦𑁆𑀢𑁄 𑀫𑀼𑀘𑁆𑀘𑀢𑀻𑀢𑀺 𑁋 𑀛𑀸𑀦𑀯𑀺𑀫𑁄𑀓𑁆𑀔𑁄. 𑀛𑀸𑀬𑀦𑁆𑀢𑀻𑀢𑀺 𑁋 𑀥𑀫𑁆𑀫𑀸. 𑀛𑀸𑀧𑁂𑀦𑁆𑀢𑀻𑀢𑀺 𑁋 𑀓𑀺𑀮𑁂𑀲𑁂. 𑀛𑀸𑀢𑁂 𑀘 𑀛𑀸𑀧𑁂 𑀘 𑀚𑀸𑀦𑀸𑀢𑀻𑀢𑀺 𑁋 𑀛𑀸𑀦𑀛𑀸𑀬𑀻.

𑁪𑁨. 𑀪𑀸𑀯𑀦𑀸 𑀅𑀥𑀺𑀝𑁆𑀞𑀸𑀦𑀁 𑀚𑀻𑀯𑀺𑀢𑀦𑁆𑀢𑀺 𑀓𑀸𑀫𑀘𑁆𑀙𑀦𑁆𑀤𑀁 𑀧𑀚𑀳𑀦𑁆𑀢𑁄 𑀦𑁂𑀓𑁆𑀔𑀫𑁆𑀫𑀁 𑀪𑀸𑀯𑁂𑀢𑀻𑀢𑀺 𑁋 𑀪𑀸𑀯𑀦𑀸𑀲𑀫𑁆𑀧𑀦𑁆𑀦𑁄. 𑀦𑁂𑀓𑁆𑀔𑀫𑁆𑀫𑀯𑀲𑁂𑀦 𑀘𑀺𑀢𑁆𑀢𑀁 𑀅𑀥𑀺𑀝𑁆𑀞𑀸𑀢𑀻𑀢𑀺 𑁋 𑀅𑀥𑀺𑀝𑁆𑀞𑀸𑀦𑀲𑀫𑁆𑀧𑀦𑁆𑀦𑁄. 𑀲𑁆𑀯𑀸𑀬𑀁 𑀏𑀯𑀁 𑀪𑀸𑀯𑀦𑀸𑀲𑀫𑁆𑀧𑀦𑁆𑀦𑁄 𑀅𑀥𑀺𑀝𑁆𑀞𑀸𑀦𑀲𑀫𑁆𑀧𑀦𑁆𑀦𑁄 𑀲𑀫𑀁 𑀚𑀻𑀯𑀢𑀺, 𑀦𑁄 𑀯𑀺𑀲𑀫𑀁; 𑀲𑀫𑁆𑀫𑀸 𑀚𑀻𑀯𑀢𑀺, 𑀦𑁄 𑀫𑀺𑀘𑁆𑀙𑀸; 𑀯𑀺𑀲𑀼𑀤𑁆𑀥𑀁 𑀚𑀻𑀯𑀢𑀺, 𑀦𑁄 𑀓𑀺𑀮𑀺𑀝𑁆𑀞𑀦𑁆𑀢𑀺 𑁋 𑀆𑀚𑀻𑀯𑀲𑀫𑁆𑀧𑀦𑁆𑀦𑁄. 𑀲𑁆𑀯𑀸𑀬𑀁 𑀏𑀯𑀁 𑀪𑀸𑀯𑀦𑀸𑀲𑀫𑁆𑀧𑀦𑁆𑀦𑁄 𑀅𑀥𑀺𑀝𑁆𑀞𑀸𑀦𑀲𑀫𑁆𑀧𑀦𑁆𑀦𑁄 𑀆𑀚𑀻𑀯𑀲𑀫𑁆𑀧𑀦𑁆𑀦𑁄 𑀬𑀜𑁆𑀜𑀤𑁂𑀯 𑀧𑀭𑀺𑀲𑀁 𑀉𑀧𑀲𑀗𑁆𑀓𑀫𑀢𑀺 𑁋 𑀬𑀤𑀺 𑀔𑀢𑁆𑀢𑀺𑀬𑀧𑀭𑀺𑀲𑀁 𑀬𑀤𑀺 𑀩𑁆𑀭𑀸𑀳𑁆𑀫𑀡𑀧𑀭𑀺𑀲𑀁 𑀬𑀤𑀺 𑀕𑀳𑀧𑀢𑀺𑀧𑀭𑀺𑀲𑀁 𑀬𑀤𑀺 𑀲𑀫𑀡𑀧𑀭𑀺𑀲𑀁 𑁋 𑀯𑀺𑀲𑀸𑀭𑀤𑁄 𑀉𑀧𑀲𑀗𑁆𑀓𑀫𑀢𑀺 𑀅𑀫𑀗𑁆𑀓𑀼𑀪𑀽𑀢𑁄. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀢𑀣𑀸 𑀳𑀺 𑀲𑁄 𑀪𑀸𑀯𑀦𑀸𑀲𑀫𑁆𑀧𑀦𑁆𑀦𑁄 𑀅𑀥𑀺𑀝𑁆𑀞𑀸𑀦𑀲𑀫𑁆𑀧𑀦𑁆𑀦𑁄 𑀆𑀚𑀻𑀯𑀲𑀫𑁆𑀧𑀦𑁆𑀦𑁄.

𑀩𑁆𑀬𑀸𑀧𑀸𑀤𑀁 𑀧𑀚𑀳𑀦𑁆𑀢𑁄 𑀅𑀩𑁆𑀬𑀸𑀧𑀸𑀤𑀁 𑀪𑀸𑀯𑁂𑀢𑀻𑀢𑀺 𑁋 𑀪𑀸𑀯𑀦𑀸𑀲𑀫𑁆𑀧𑀦𑁆𑀦𑁄…𑀧𑁂… 𑀣𑀺𑀦𑀫𑀺𑀤𑁆𑀥𑀁 𑀧𑀚𑀳𑀦𑁆𑀢𑁄 𑀆𑀮𑁄𑀓𑀲𑀜𑁆𑀜𑀁 𑀪𑀸𑀯𑁂𑀢𑀻𑀢𑀺 𑁋 𑀪𑀸𑀯𑀦𑀸𑀲𑀫𑁆𑀧𑀦𑁆𑀦𑁄…𑀧𑁂… 𑀉𑀤𑁆𑀥𑀘𑁆𑀘𑀁 𑀧𑀚𑀳𑀦𑁆𑀢𑁄 𑀅𑀯𑀺𑀓𑁆𑀔𑁂𑀧𑀁 𑀪𑀸𑀯𑁂𑀢𑀻𑀢𑀺 𑁋 𑀪𑀸𑀯𑀦𑀸𑀲𑀫𑁆𑀧𑀦𑁆𑀦𑁄…𑀧𑁂… 𑀯𑀺𑀘𑀺𑀓𑀺𑀘𑁆𑀙𑀁 𑀧𑀚𑀳𑀦𑁆𑀢𑁄 𑀥𑀫𑁆𑀫𑀯𑀯𑀢𑁆𑀣𑀸𑀦𑀁 𑀪𑀸𑀯𑁂𑀢𑀻𑀢𑀺 𑁋 𑀪𑀸𑀯𑀦𑀸𑀲𑀫𑁆𑀧𑀦𑁆𑀦𑁄…𑀧𑁂… 𑀅𑀯𑀺𑀚𑁆𑀚𑀁 𑀧𑀚𑀳𑀦𑁆𑀢𑁄 𑀯𑀺𑀚𑁆𑀚𑀁 𑀪𑀸𑀯𑁂𑀢𑀻𑀢𑀺 𑁋 𑀪𑀸𑀯𑀦𑀸𑀲𑀫𑁆𑀧𑀦𑁆𑀦𑁄…𑀧𑁂… 𑀅𑀭𑀢𑀺𑀁 𑀧𑀚𑀳𑀦𑁆𑀢𑁄 𑀧𑀸𑀫𑁄𑀚𑁆𑀚𑀁 𑀪𑀸𑀯𑁂𑀢𑀻𑀢𑀺 𑁋 𑀪𑀸𑀯𑀦𑀸𑀲𑀫𑁆𑀧𑀦𑁆𑀦𑁄…𑀧𑁂… 𑀦𑀻𑀯𑀭𑀡𑁂 𑀧𑀚𑀳𑀦𑁆𑀢𑁄 𑀧𑀞𑀫𑀁 𑀛𑀸𑀦𑀁 𑀪𑀸𑀯𑁂𑀢𑀻𑀢𑀺 𑁋 𑀪𑀸𑀯𑀦𑀸𑀲𑀫𑁆𑀧𑀦𑁆𑀦𑁄…𑀧𑁂… 𑀲𑀩𑁆𑀩𑀓𑀺𑀮𑁂𑀲𑁂 𑀧𑀚𑀳𑀦𑁆𑀢𑁄 𑀅𑀭𑀳𑀢𑁆𑀢𑀫𑀕𑁆𑀕𑀁 𑀪𑀸𑀯𑁂𑀢𑀻𑀢𑀺 𑁋 𑀪𑀸𑀯𑀦𑀸𑀲𑀫𑁆𑀧𑀦𑁆𑀦𑁄. 𑀅𑀭𑀳𑀢𑁆𑀢𑀫𑀕𑁆𑀕𑀯𑀲𑁂𑀦 𑀘𑀺𑀢𑁆𑀢𑀁 𑀅𑀥𑀺𑀝𑁆𑀞𑀸𑀢𑀻𑀢𑀺 𑁋 𑀅𑀥𑀺𑀝𑁆𑀞𑀸𑀦𑀲𑀫𑁆𑀧𑀦𑁆𑀦𑁄. 𑀲𑁆𑀯𑀸𑀬𑀁 𑀏𑀯𑀁 𑀪𑀸𑀯𑀦𑀸𑀲𑀫𑁆𑀧𑀦𑁆𑀦𑁄 𑀅𑀥𑀺𑀝𑁆𑀞𑀸𑀦𑀲𑀫𑁆𑀧𑀦𑁆𑀦𑁄 𑀲𑀫𑀁 𑀚𑀻𑀯𑀢𑀺, 𑀦𑁄 𑀯𑀺𑀲𑀫𑀁; 𑀲𑀫𑁆𑀫𑀸 𑀚𑀻𑀯𑀢𑀺, 𑀦𑁄 𑀫𑀺𑀘𑁆𑀙𑀸; 𑀯𑀺𑀲𑀼𑀤𑁆𑀥𑀁 𑀚𑀻𑀯𑀢𑀺, 𑀦𑁄 𑀓𑀺𑀮𑀺𑀝𑁆𑀞𑀦𑁆𑀢𑀺 𑁋 𑀆𑀚𑀻𑀯𑀲𑀫𑁆𑀧𑀦𑁆𑀦𑁄. 𑀲𑁆𑀯𑀸𑀬𑀁 𑀏𑀯𑀁 𑀪𑀸𑀯𑀦𑀸𑀲𑀫𑁆𑀧𑀦𑁆𑀦𑁄 𑀅𑀥𑀺𑀝𑁆𑀞𑀸𑀦𑀲𑀫𑁆𑀧𑀦𑁆𑀦𑁄 𑀆𑀚𑀻𑀯𑀲𑀫𑁆𑀧𑀦𑁆𑀦𑁄 𑀬𑀜𑁆𑀜𑀤𑁂𑀯 𑀧𑀭𑀺𑀲𑀁 𑀉𑀧𑀲𑀗𑁆𑀓𑀫𑀢𑀺 𑁋 𑀬𑀤𑀺 𑀔𑀢𑁆𑀢𑀺𑀬𑀧𑀭𑀺𑀲𑀁 𑀬𑀤𑀺 𑀩𑁆𑀭𑀸𑀳𑁆𑀫𑀡𑀧𑀭𑀺𑀲𑀁 𑀬𑀤𑀺 𑀕𑀳𑀧𑀢𑀺𑀧𑀭𑀺𑀲𑀁 𑀬𑀤𑀺 𑀲𑀫𑀡𑀧𑀭𑀺𑀲𑀁 𑁋 𑀯𑀺𑀲𑀸𑀭𑀤𑁄 𑀉𑀧𑀲𑀗𑁆𑀓𑀫𑀢𑀺 𑀅𑀫𑀗𑁆𑀓𑀼𑀪𑀽𑀢𑁄. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀢𑀣𑀸 𑀳𑀺 𑀲𑁄 𑀪𑀸𑀯𑀦𑀸𑀲𑀫𑁆𑀧𑀦𑁆𑀦𑁄 𑀅𑀥𑀺𑀝𑁆𑀞𑀸𑀦𑀲𑀫𑁆𑀧𑀦𑁆𑀦𑁄 𑀆𑀚𑀻𑀯𑀲𑀫𑁆𑀧𑀦𑁆𑀦𑁄𑀢𑀺.

𑀫𑀸𑀢𑀺𑀓𑀸𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀧𑀜𑁆𑀜𑀸𑀯𑀕𑁆𑀕𑁄 𑀢𑀢𑀺𑀬𑁄.