𑁮. 𑀲𑀢𑀺𑀧𑀝𑁆𑀞𑀸𑀦𑀓𑀣𑀸

𑁩𑁪. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. ‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀲𑀢𑀺𑀧𑀝𑁆𑀞𑀸𑀦𑀸. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸, 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁. 𑀯𑁂𑀤𑀦𑀸𑀲𑀼…𑀧𑁂… 𑀘𑀺𑀢𑁆𑀢𑁂… 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸, 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸’’𑀢𑀺.

𑁩𑁫. [𑀓] 𑀓𑀣𑀁 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺? 𑀇𑀥𑁂𑀓𑀘𑁆𑀘𑁄 𑀧𑀣𑀯𑀻𑀓𑀸𑀬𑀁 𑀅𑀦𑀺𑀘𑁆𑀘𑀢𑁄 𑀅𑀦𑀼𑀧𑀲𑁆𑀲𑀢𑀺, 𑀦𑁄 𑀦𑀺𑀘𑁆𑀘𑀢𑁄; 𑀤𑀼𑀓𑁆𑀔𑀢𑁄 𑀅𑀦𑀼𑀧𑀲𑁆𑀲𑀢𑀺, 𑀦𑁄 𑀲𑀼𑀔𑀢𑁄; 𑀅𑀦𑀢𑁆𑀢𑀢𑁄 𑀅𑀦𑀼𑀧𑀲𑁆𑀲𑀢𑀺, 𑀦𑁄 𑀅𑀢𑁆𑀢𑀢𑁄; 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀦𑁄 𑀦𑀦𑁆𑀤𑀢𑀺; 𑀯𑀺𑀭𑀚𑁆𑀚𑀢𑀺, 𑀦𑁄 𑀭𑀚𑁆𑀚𑀢𑀺; 𑀦𑀺𑀭𑁄𑀥𑁂𑀢𑀺, 𑀦𑁄 𑀲𑀫𑀼𑀤𑁂𑀢𑀺, 𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑀺, 𑀦𑁄 𑀆𑀤𑀺𑀬𑀢𑀺. 𑀅𑀦𑀺𑀘𑁆𑀘𑀢𑁄 𑀅𑀦𑀼𑀧𑀲𑁆𑀲𑀦𑁆𑀢𑁄 𑀦𑀺𑀘𑁆𑀘𑀲𑀜𑁆𑀜𑀁 𑀧𑀚𑀳𑀢𑀺, 𑀤𑀼𑀓𑁆𑀔𑀢𑁄 𑀅𑀦𑀼𑀧𑀲𑁆𑀲𑀦𑁆𑀢𑁄 𑀲𑀼𑀔𑀲𑀜𑁆𑀜𑀁 𑀧𑀚𑀳𑀢𑀺, 𑀅𑀦𑀢𑁆𑀢𑀢𑁄 𑀅𑀦𑀼𑀧𑀲𑁆𑀲𑀦𑁆𑀢𑁄 𑀅𑀢𑁆𑀢𑀲𑀜𑁆𑀜𑀁 𑀧𑀚𑀳𑀢𑀺, 𑀦𑀺𑀩𑁆𑀩𑀺𑀦𑁆𑀤𑀦𑁆𑀢𑁄 𑀦𑀦𑁆𑀤𑀺𑀁 𑀧𑀚𑀳𑀢𑀺, 𑀯𑀺𑀭𑀚𑁆𑀚𑀦𑁆𑀢𑁄 𑀭𑀸𑀕𑀁 𑀧𑀚𑀳𑀢𑀺, 𑀦𑀺𑀭𑁄𑀥𑁂𑀦𑁆𑀢𑁄 𑀲𑀫𑀼𑀤𑀬𑀁 𑀧𑀚𑀳𑀢𑀺, 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁆𑀢𑁄 𑀆𑀤𑀸𑀦𑀁 𑀧𑀚𑀳𑀢𑀺. 𑀇𑀫𑁂𑀳𑀺 𑀲𑀢𑁆𑀢𑀳𑀺 𑀆𑀓𑀸𑀭𑁂𑀳𑀺 𑀓𑀸𑀬𑀁 𑀅𑀦𑀼𑀧𑀲𑁆𑀲𑀢𑀺. 𑀓𑀸𑀬𑁄 𑀉𑀧𑀝𑁆𑀞𑀸𑀦𑀁, 𑀦𑁄 𑀲𑀢𑀺. 𑀲𑀢𑀺 𑀉𑀧𑀝𑁆𑀞𑀸𑀦𑀜𑁆𑀘𑁂𑀯 𑀲𑀢𑀺 𑀘. 𑀢𑀸𑀬 𑀲𑀢𑀺𑀬𑀸 𑀢𑁂𑀦 𑀜𑀸𑀡𑁂𑀦 𑀢𑀁 𑀓𑀸𑀬𑀁 𑀅𑀦𑀼𑀧𑀲𑁆𑀲𑀢𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀸’’.

𑀪𑀸𑀯𑀦𑀸𑀢𑀺 𑀘𑀢𑀲𑁆𑀲𑁄 𑀪𑀸𑀯𑀦𑀸 𑁋 𑀢𑀢𑁆𑀣 𑀚𑀸𑀢𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑀢𑀺𑀯𑀢𑁆𑀢𑀦𑀝𑁆𑀞𑁂𑀦 𑀪𑀸𑀯𑀦𑀸, 𑀇𑀦𑁆𑀤𑁆𑀭𑀺𑀬𑀸𑀦𑀁 𑀏𑀓𑀭𑀲𑀝𑁆𑀞𑁂𑀦 𑀪𑀸𑀯𑀦𑀸, 𑀢𑀤𑀼𑀧𑀕𑀯𑀻𑀭𑀺𑀬𑀯𑀸𑀳𑀦𑀝𑁆𑀞𑁂𑀦 𑀪𑀸𑀯𑀦𑀸, 𑀆𑀲𑁂𑀯𑀦𑀝𑁆𑀞𑁂𑀦 𑀪𑀸𑀯𑀦𑀸.

𑀇𑀥𑁂𑀓𑀘𑁆𑀘𑁄 𑀆𑀧𑁄𑀓𑀸𑀬𑀁…𑀧𑁂… 𑀢𑁂𑀚𑁄𑀓𑀸𑀬𑀁… 𑀯𑀸𑀬𑁄𑀓𑀸𑀬𑀁… 𑀓𑁂𑀲𑀓𑀸𑀬𑀁… 𑀮𑁄𑀫𑀓𑀸𑀬𑀁… 𑀙𑀯𑀺𑀓𑀸𑀬𑀁… 𑀘𑀫𑁆𑀫𑀓𑀸𑀬𑀁… 𑀫𑀁𑀲𑀓𑀸𑀬𑀁… 𑀭𑀼𑀥𑀺𑀭𑀓𑀸𑀬𑀁… 𑀦𑁆𑀳𑀸𑀭𑀼𑀓𑀸𑀬𑀁 [𑀦𑀳𑀸𑀭𑀼𑀓𑀸𑀬𑀁 (𑀲𑁆𑀬𑀸.)] … 𑀅𑀝𑁆𑀞𑀺𑀓𑀸𑀬𑀁… 𑀅𑀝𑁆𑀞𑀺𑀫𑀺𑀜𑁆𑀚𑀓𑀸𑀬𑀁 𑀅𑀦𑀺𑀘𑁆𑀘𑀢𑁄 𑀅𑀦𑀼𑀧𑀲𑁆𑀲𑀢𑀺, 𑀦𑁄 𑀦𑀺𑀘𑁆𑀘𑀢𑁄; 𑀤𑀼𑀓𑁆𑀔𑀢𑁄 𑀅𑀦𑀼𑀧𑀲𑁆𑀲𑀢𑀺, 𑀦𑁄 𑀲𑀼𑀔𑀢𑁄; 𑀅𑀦𑀢𑁆𑀢𑀢𑁄 𑀅𑀦𑀼𑀧𑀲𑁆𑀲𑀢𑀺, 𑀦𑁄 𑀅𑀢𑁆𑀢𑀢𑁄; 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀦𑁄 𑀦𑀦𑁆𑀤𑀢𑀺; 𑀯𑀺𑀭𑀚𑁆𑀚𑀢𑀺, 𑀦𑁄 𑀭𑀚𑁆𑀚𑀢𑀺, 𑀦𑀺𑀭𑁄𑀥𑁂𑀢𑀺, 𑀦𑁄 𑀲𑀫𑀼𑀤𑁂𑀢𑀺; 𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑀺, 𑀦𑁄 𑀆𑀤𑀺𑀬𑀢𑀺. 𑀅𑀦𑀺𑀘𑁆𑀘𑀢𑁄 𑀅𑀦𑀼𑀧𑀲𑁆𑀲𑀦𑁆𑀢𑁄 𑀦𑀺𑀘𑁆𑀘𑀲𑀜𑁆𑀜𑀁 𑀧𑀚𑀳𑀢𑀺, 𑀤𑀼𑀓𑁆𑀔𑀢𑁄 𑀅𑀦𑀼𑀧𑀲𑁆𑀲𑀦𑁆𑀢𑁄 𑀲𑀼𑀔𑀲𑀜𑁆𑀜𑀁 𑀧𑀚𑀳𑀢𑀺, 𑀅𑀦𑀢𑁆𑀢𑀢𑁄 𑀅𑀦𑀼𑀧𑀲𑁆𑀲𑀦𑁆𑀢𑁄 𑀅𑀢𑁆𑀢𑀲𑀜𑁆𑀜𑀁 𑀧𑀚𑀳𑀢𑀺, 𑀦𑀺𑀩𑁆𑀩𑀺𑀦𑁆𑀤𑀦𑁆𑀢𑁄 𑀦𑀦𑁆𑀤𑀺𑀁 𑀧𑀚𑀳𑀢𑀺, 𑀯𑀺𑀭𑀚𑁆𑀚𑀦𑁆𑀢𑁄 𑀭𑀸𑀕𑀁 𑀧𑀚𑀳𑀢𑀺, 𑀦𑀺𑀭𑁄𑀥𑁂𑀦𑁆𑀢𑁄 𑀲𑀫𑀼𑀤𑀬𑀁 𑀧𑀚𑀳𑀢𑀺, 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁆𑀢𑁄 𑀆𑀤𑀸𑀦𑀁 𑀧𑀚𑀳𑀢𑀺. 𑀇𑀫𑁂𑀳𑀺 𑀲𑀢𑁆𑀢𑀳𑀺 𑀆𑀓𑀸𑀭𑁂𑀳𑀺 𑀓𑀸𑀬𑀁 𑀅𑀦𑀼𑀧𑀲𑁆𑀲𑀢𑀺. 𑀓𑀸𑀬𑁄 𑀉𑀧𑀝𑁆𑀞𑀸𑀦𑀁, 𑀦𑁄 𑀲𑀢𑀺. 𑀲𑀢𑀺 𑀉𑀧𑀝𑁆𑀞𑀸𑀦𑀜𑁆𑀘𑁂𑀯 𑀲𑀢𑀺 𑀘. 𑀢𑀸𑀬 𑀲𑀢𑀺𑀬𑀸 𑀢𑁂𑀦 𑀜𑀸𑀡𑁂𑀦 𑀢𑀁 𑀓𑀸𑀬𑀁 𑀅𑀦𑀼𑀧𑀲𑁆𑀲𑀢𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀸’’.

𑀪𑀸𑀯𑀦𑀸𑀢𑀺 𑀘𑀢𑀲𑁆𑀲𑁄 𑀪𑀸𑀯𑀦𑀸 𑁋 𑀢𑀢𑁆𑀣 𑀚𑀸𑀢𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑀢𑀺𑀯𑀢𑁆𑀢𑀦𑀝𑁆𑀞𑁂𑀦 𑀪𑀸𑀯𑀦𑀸, 𑀇𑀦𑁆𑀤𑁆𑀭𑀺𑀬𑀸𑀦𑀁 𑀏𑀓𑀭𑀲𑀝𑁆𑀞𑁂𑀦 𑀪𑀸𑀯𑀦𑀸, 𑀢𑀤𑀼𑀧𑀕𑀯𑀻𑀭𑀺𑀬𑀯𑀸𑀳𑀦𑀝𑁆𑀞𑁂𑀦 𑀪𑀸𑀯𑀦𑀸, 𑀆𑀲𑁂𑀯𑀦𑀝𑁆𑀞𑁂𑀦 𑀪𑀸𑀯𑀦𑀸. 𑀏𑀯𑀁 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺.

[𑀔] 𑀓𑀣𑀁 𑀯𑁂𑀤𑀦𑀸𑀲𑀼 𑀯𑁂𑀤𑀦𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺? 𑀇𑀥𑁂𑀓𑀘𑁆𑀘𑁄 𑀲𑀼𑀔𑀁 𑀯𑁂𑀤𑀦𑀁 𑀅𑀦𑀺𑀘𑁆𑀘𑀢𑁄 𑀅𑀦𑀼𑀧𑀲𑁆𑀲𑀢𑀺, 𑀦𑁄 𑀦𑀺𑀘𑁆𑀘𑀢𑁄…𑀧𑁂… 𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑀺, 𑀦𑁄 𑀆𑀤𑀺𑀬𑀢𑀺. 𑀅𑀦𑀺𑀘𑁆𑀘𑀢𑁄 𑀅𑀦𑀼𑀧𑀲𑁆𑀲𑀦𑁆𑀢𑁄 𑀦𑀺𑀘𑁆𑀘𑀲𑀜𑁆𑀜𑀁 𑀧𑀚𑀳𑀢𑀺…𑀧𑁂… 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁆𑀢𑁄 𑀆𑀤𑀸𑀦𑀁 𑀧𑀚𑀳𑀢𑀺. 𑀇𑀫𑁂𑀳𑀺 𑀲𑀢𑁆𑀢𑀳𑀺 𑀆𑀓𑀸𑀭𑁂𑀳𑀺 𑀯𑁂𑀤𑀦𑀁 𑀅𑀦𑀼𑀧𑀲𑁆𑀲𑀢𑀺. 𑀯𑁂𑀤𑀦𑀸 𑀉𑀧𑀝𑁆𑀞𑀸𑀦𑀁, 𑀦𑁄 𑀲𑀢𑀺. 𑀲𑀢𑀺 𑀉𑀧𑀝𑁆𑀞𑀸𑀦𑀜𑁆𑀘𑁂𑀯 𑀲𑀢𑀺 𑀘. 𑀢𑀸𑀬 𑀲𑀢𑀺𑀬𑀸 𑀢𑁂𑀦 𑀜𑀸𑀡𑁂𑀦 𑀢𑀁 𑀯𑁂𑀤𑀦𑀁 𑀅𑀦𑀼𑀧𑀲𑁆𑀲𑀢𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀯𑁂𑀤𑀦𑀸𑀲𑀼 𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀸’’.

𑀪𑀸𑀯𑀦𑀸𑀢𑀺 𑀘𑀢𑀲𑁆𑀲𑁄 𑀪𑀸𑀯𑀦𑀸…𑀧𑁂… 𑀆𑀲𑁂𑀯𑀦𑀝𑁆𑀞𑁂𑀦 𑀪𑀸𑀯𑀦𑀸…𑀧𑁂… 𑀇𑀥𑁂𑀓𑀘𑁆𑀘𑁄 𑀤𑀼𑀓𑁆𑀔𑀁 𑀯𑁂𑀤𑀦𑀁…𑀧𑁂… 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑁂𑀤𑀦𑀁… 𑀲𑀸𑀫𑀺𑀲𑀁 𑀲𑀼𑀔𑀁 𑀯𑁂𑀤𑀦𑀁… 𑀦𑀺𑀭𑀸𑀫𑀺𑀲𑀁 𑀲𑀼𑀔𑀁 𑀯𑁂𑀤𑀦𑀁… 𑀲𑀸𑀫𑀺𑀲𑀁 𑀤𑀼𑀓𑁆𑀔𑀁 𑀯𑁂𑀤𑀦𑀁… 𑀦𑀺𑀭𑀸𑀫𑀺𑀲𑀁 𑀤𑀼𑀓𑁆𑀔𑀁 𑀯𑁂𑀤𑀦𑀁… 𑀲𑀸𑀫𑀺𑀲𑀁 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑁂𑀤𑀦𑀁… 𑀦𑀺𑀭𑀸𑀫𑀺𑀲𑀁 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑁂𑀤𑀦𑀁… 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀁 𑀯𑁂𑀤𑀦𑀁… 𑀲𑁄𑀢𑀲𑀫𑁆𑀨𑀲𑁆𑀲𑀚𑀁 𑀯𑁂𑀤𑀦𑀁… 𑀖𑀸𑀦𑀲𑀫𑁆𑀨𑀲𑁆𑀲𑀚𑀁 𑀯𑁂𑀤𑀦𑀁… 𑀚𑀺𑀯𑁆𑀳𑀸𑀲𑀫𑁆𑀨𑀲𑁆𑀲𑀚𑀁 𑀯𑁂𑀤𑀦𑀁… 𑀓𑀸𑀬𑀲𑀫𑁆𑀨𑀲𑁆𑀲𑀚𑀁 𑀯𑁂𑀤𑀦𑀁… 𑀫𑀦𑁄𑀲𑀫𑁆𑀨𑀲𑁆𑀲𑀚𑀁 𑀯𑁂𑀤𑀦𑀁 𑀅𑀦𑀺𑀘𑁆𑀘𑀢𑁄 𑀅𑀦𑀼𑀧𑀲𑁆𑀲𑀢𑀺, 𑀦𑁄 𑀦𑀺𑀘𑁆𑀘𑀢𑁄…𑀧𑁂… 𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑀺, 𑀦𑁄 𑀆𑀤𑀺𑀬𑀢𑀺. 𑀅𑀦𑀺𑀘𑁆𑀘𑀢𑁄 𑀅𑀦𑀼𑀧𑀲𑁆𑀲𑀦𑁆𑀢𑁄 𑀦𑀺𑀘𑁆𑀘𑀲𑀜𑁆𑀜𑀁 𑀧𑀚𑀳𑀢𑀺…𑀧𑁂… 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁆𑀢𑁄 𑀆𑀤𑀸𑀦𑀁 𑀧𑀚𑀳𑀢𑀺. 𑀇𑀫𑁂𑀳𑀺 𑀲𑀢𑁆𑀢𑀳𑀺 𑀆𑀓𑀸𑀭𑁂𑀳𑀺 𑀯𑁂𑀤𑀦𑀁 𑀅𑀦𑀼𑀧𑀲𑁆𑀲𑀢𑀺. 𑀯𑁂𑀤𑀦𑀸 𑀉𑀧𑀝𑁆𑀞𑀸𑀦𑀁, 𑀦𑁄 𑀲𑀢𑀺. 𑀲𑀢𑀺 𑀉𑀧𑀝𑁆𑀞𑀸𑀦𑀜𑁆𑀘𑁂𑀯 𑀲𑀢𑀺 𑀘. 𑀢𑀸𑀬 𑀲𑀢𑀺𑀬𑀸 𑀢𑁂𑀦 𑀜𑀸𑀡𑁂𑀦 𑀢𑀁 𑀯𑁂𑀤𑀦𑀁 𑀅𑀦𑀼𑀧𑀲𑁆𑀲𑀢𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀯𑁂𑀤𑀦𑀸𑀲𑀼 𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀸’’.

𑀪𑀸𑀯𑀦𑀸𑀢𑀺 𑀘𑀢𑀲𑁆𑀲𑁄 𑀪𑀸𑀯𑀦𑀸…𑀧𑁂… 𑀏𑀯𑀁 𑀯𑁂𑀤𑀦𑀸𑀲𑀼 𑀯𑁂𑀤𑀦𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺.

[𑀕] 𑀓𑀣𑀁 𑀘𑀺𑀢𑁆𑀢𑁂 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺? 𑀇𑀥𑁂𑀓𑀘𑁆𑀘𑁄 𑀲𑀭𑀸𑀕𑀁 𑀘𑀺𑀢𑁆𑀢𑀁 𑀅𑀦𑀺𑀘𑁆𑀘𑀢𑁄 𑀅𑀦𑀼𑀧𑀲𑁆𑀲𑀢𑀺, 𑀦𑁄 𑀦𑀺𑀘𑁆𑀘𑀢𑁄…𑀧𑁂… 𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑀺, 𑀦𑁄 𑀆𑀤𑀺𑀬𑀢𑀺. 𑀅𑀦𑀺𑀘𑁆𑀘𑀢𑁄 𑀅𑀦𑀼𑀧𑀲𑁆𑀲𑀦𑁆𑀢𑁄 𑀦𑀺𑀘𑁆𑀘𑀲𑀜𑁆𑀜𑀁 𑀧𑀚𑀳𑀢𑀺…𑀧𑁂… 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁆𑀢𑁄 𑀆𑀤𑀸𑀦𑀁 𑀧𑀚𑀳𑀢𑀺. 𑀇𑀫𑁂𑀳𑀺 𑀲𑀢𑁆𑀢𑀳𑀺 𑀆𑀓𑀸𑀭𑁂𑀳𑀺 𑀘𑀺𑀢𑁆𑀢𑀁 𑀅𑀦𑀼𑀧𑀲𑁆𑀲𑀢𑀺. 𑀘𑀺𑀢𑁆𑀢𑀁 𑀉𑀧𑀝𑁆𑀞𑀸𑀦𑀁, 𑀦𑁄 𑀲𑀢𑀺. 𑀲𑀢𑀺 𑀉𑀧𑀝𑁆𑀞𑀸𑀦𑀜𑁆𑀘𑁂𑀯 𑀲𑀢𑀺 𑀘. 𑀢𑀸𑀬 𑀲𑀢𑀺𑀬𑀸 𑀢𑁂𑀦 𑀜𑀸𑀡𑁂𑀦 𑀢𑀁 𑀘𑀺𑀢𑁆𑀢𑀁 𑀅𑀦𑀼𑀧𑀲𑁆𑀲𑀢𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀘𑀺𑀢𑁆𑀢𑁂 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀸’’.

𑀪𑀸𑀯𑀦𑀸𑀢𑀺 𑀘𑀢𑀲𑁆𑀲𑁄 𑀪𑀸𑀯𑀦𑀸…𑀧𑁂… 𑀆𑀲𑁂𑀯𑀦𑀝𑁆𑀞𑁂𑀦 𑀪𑀸𑀯𑀦𑀸.

𑀇𑀥𑁂𑀓𑀘𑁆𑀘𑁄 𑀯𑀻𑀢𑀭𑀸𑀕𑀁 𑀘𑀺𑀢𑁆𑀢𑀁…𑀧𑁂… 𑀲𑀤𑁄𑀲𑀁 𑀘𑀺𑀢𑁆𑀢𑀁… 𑀯𑀻𑀢𑀤𑁄𑀲𑀁 𑀘𑀺𑀢𑁆𑀢𑀁… 𑀲𑀫𑁄𑀳𑀁 𑀘𑀺𑀢𑁆𑀢𑀁… 𑀯𑀻𑀢𑀫𑁄𑀳𑀁 𑀘𑀺𑀢𑁆𑀢𑀁… 𑀲𑀁𑀔𑀺𑀢𑁆𑀢𑀁 𑀘𑀺𑀢𑁆𑀢𑀁… 𑀯𑀺𑀓𑁆𑀔𑀺𑀢𑁆𑀢𑀁 𑀘𑀺𑀢𑁆𑀢𑀁… 𑀫𑀳𑀕𑁆𑀕𑀢𑀁 𑀘𑀺𑀢𑁆𑀢𑀁… 𑀅𑀫𑀳𑀕𑁆𑀕𑀢𑀁 𑀘𑀺𑀢𑁆𑀢𑀁… 𑀲𑀉𑀢𑁆𑀢𑀭𑀁 𑀘𑀺𑀢𑁆𑀢𑀁… 𑀅𑀦𑀼𑀢𑁆𑀢𑀭𑀁 𑀘𑀺𑀢𑁆𑀢𑀁… 𑀲𑀫𑀸𑀳𑀺𑀢𑀁 𑀘𑀺𑀢𑁆𑀢𑀁… 𑀅𑀲𑀫𑀸𑀳𑀺𑀢𑀁 𑀘𑀺𑀢𑁆𑀢𑀁… 𑀯𑀺𑀫𑀼𑀢𑁆𑀢𑀁 𑀘𑀺𑀢𑁆𑀢𑀁… 𑀅𑀯𑀺𑀫𑀼𑀢𑁆𑀢𑀁 𑀘𑀺𑀢𑁆𑀢𑀁… 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁… 𑀲𑁄𑀢𑀯𑀺𑀜𑁆𑀜𑀸𑀡𑀁… 𑀖𑀸𑀦𑀯𑀺𑀜𑁆𑀜𑀸𑀡𑀁… 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀁… 𑀓𑀸𑀬𑀯𑀺𑀜𑁆𑀜𑀸𑀡𑀁… 𑀫𑀦𑁄𑀯𑀺𑀜𑁆𑀜𑀸𑀡𑀁 𑀅𑀦𑀺𑀘𑁆𑀘𑀢𑁄 𑀅𑀦𑀼𑀧𑀲𑁆𑀲𑀢𑀺, 𑀦𑁄 𑀦𑀺𑀘𑁆𑀘𑀢𑁄…𑀧𑁂… 𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑀺, 𑀦𑁄 𑀆𑀤𑀺𑀬𑀢𑀺. 𑀅𑀦𑀺𑀘𑁆𑀘𑀢𑁄 𑀅𑀦𑀼𑀧𑀲𑁆𑀲𑀦𑁆𑀢𑁄 𑀦𑀺𑀘𑁆𑀘𑀲𑀜𑁆𑀜𑀁 𑀧𑀚𑀳𑀢𑀺…𑀧𑁂… 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁆𑀢𑁄 𑀆𑀤𑀸𑀦𑀁 𑀧𑀚𑀳𑀢𑀺. 𑀇𑀫𑁂𑀳𑀺 𑀲𑀢𑁆𑀢𑀳𑀺 𑀆𑀓𑀸𑀭𑁂𑀳𑀺 𑀘𑀺𑀢𑁆𑀢𑀁 𑀅𑀦𑀼𑀧𑀲𑁆𑀲𑀢𑀺. 𑀘𑀺𑀢𑁆𑀢𑀁 𑀉𑀧𑀝𑁆𑀞𑀸𑀦𑀁, 𑀦𑁄 𑀲𑀢𑀺. 𑀲𑀢𑀺 𑀉𑀧𑀝𑁆𑀞𑀸𑀦𑀜𑁆𑀘𑁂𑀯 𑀲𑀢𑀺 𑀘. 𑀢𑀸𑀬 𑀲𑀢𑀺𑀬𑀸 𑀢𑁂𑀦 𑀜𑀸𑀡𑁂𑀦 𑀢𑀁 𑀘𑀺𑀢𑁆𑀢𑀁 𑀅𑀦𑀼𑀧𑀲𑁆𑀲𑀢𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀘𑀺𑀢𑁆𑀢𑁂 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀸’’.

𑀪𑀸𑀯𑀦𑀸𑀢𑀺 𑀘𑀢𑀲𑁆𑀲𑁄 𑀪𑀸𑀯𑀦𑀸…𑀧𑁂… 𑀆𑀲𑁂𑀯𑀦𑀝𑁆𑀞𑁂𑀦 𑀪𑀸𑀯𑀦𑀸. 𑀏𑀯𑀁 𑀘𑀺𑀢𑁆𑀢𑁂 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺.

[𑀖] 𑀓𑀣𑀁 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺? 𑀇𑀥𑁂𑀓𑀘𑁆𑀘𑁄 𑀞𑀧𑁂𑀢𑁆𑀯𑀸 𑀓𑀸𑀬𑀁 𑀞𑀧𑁂𑀢𑁆𑀯𑀸 𑀯𑁂𑀤𑀦𑀁 𑀞𑀧𑁂𑀢𑁆𑀯𑀸 𑀘𑀺𑀢𑁆𑀢𑀁 𑀢𑀤𑀯𑀲𑁂𑀲𑁂 𑀥𑀫𑁆𑀫𑁂 𑀅𑀦𑀺𑀘𑁆𑀘𑀢𑁄 𑀅𑀦𑀼𑀧𑀲𑁆𑀲𑀢𑀺, 𑀦𑁄 𑀦𑀺𑀘𑁆𑀘𑀢𑁄; 𑀤𑀼𑀓𑁆𑀔𑀢𑁄 𑀅𑀦𑀼𑀧𑀲𑁆𑀲𑀢𑀺, 𑀦𑁄 𑀲𑀼𑀔𑀢𑁄; 𑀅𑀦𑀢𑁆𑀢𑀢𑁄 𑀅𑀦𑀼𑀧𑀲𑁆𑀲𑀢𑀺, 𑀦𑁄 𑀅𑀢𑁆𑀢𑀢𑁄; 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀦𑁄 𑀦𑀦𑁆𑀤𑀢𑀺; 𑀯𑀺𑀭𑀚𑁆𑀚𑀢𑀺, 𑀦𑁄 𑀭𑀚𑁆𑀚𑀢𑀺; 𑀦𑀺𑀭𑁄𑀥𑁂𑀢𑀺, 𑀦𑁄 𑀲𑀫𑀼𑀤𑁂𑀢𑀺; 𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑀺, 𑀦𑁄 𑀆𑀤𑀺𑀬𑀢𑀺. 𑀅𑀦𑀺𑀘𑁆𑀘𑀢𑁄 𑀅𑀦𑀼𑀧𑀲𑁆𑀲𑀦𑁆𑀢𑁄 𑀦𑀺𑀘𑁆𑀘𑀲𑀜𑁆𑀜𑀁 𑀧𑀚𑀳𑀢𑀺, 𑀤𑀼𑀓𑁆𑀔𑀢𑁄 𑀅𑀦𑀼𑀧𑀲𑁆𑀲𑀦𑁆𑀢𑁄 𑀲𑀼𑀔𑀲𑀜𑁆𑀜𑀁 𑀧𑀚𑀳𑀢𑀺, 𑀅𑀦𑀢𑁆𑀢𑀢𑁄 𑀅𑀦𑀼𑀧𑀲𑁆𑀲𑀦𑁆𑀢𑁄 𑀅𑀢𑁆𑀢𑀲𑀜𑁆𑀜𑀁 𑀧𑀚𑀳𑀢𑀺, 𑀦𑀺𑀩𑁆𑀩𑀺𑀦𑁆𑀤𑀦𑁆𑀢𑁄 𑀦𑀦𑁆𑀤𑀺𑀁 𑀧𑀚𑀳𑀢𑀺, 𑀯𑀺𑀭𑀚𑁆𑀚𑀦𑁆𑀢𑁄 𑀭𑀸𑀕𑀁 𑀧𑀚𑀳𑀢𑀺, 𑀦𑀺𑀭𑁄𑀥𑁂𑀦𑁆𑀢𑁄 𑀲𑀫𑀼𑀤𑀬𑀁 𑀧𑀚𑀳𑀢𑀺, 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁆𑀢𑁄 𑀆𑀤𑀸𑀦𑀁 𑀧𑀚𑀳𑀢𑀺. 𑀇𑀫𑁂𑀳𑀺 𑀲𑀢𑁆𑀢𑀳𑀺 𑀆𑀓𑀸𑀭𑁂𑀳𑀺 𑀢𑁂 𑀥𑀫𑁆𑀫𑁂 𑀅𑀦𑀼𑀧𑀲𑁆𑀲𑀢𑀺. 𑀥𑀫𑁆𑀫𑀸 𑀉𑀧𑀝𑁆𑀞𑀸𑀦𑀁, 𑀦𑁄 𑀲𑀢𑀺. 𑀲𑀢𑀺 𑀉𑀧𑀝𑁆𑀞𑀸𑀦𑀜𑁆𑀘𑁂𑀯 𑀲𑀢𑀺 𑀘. 𑀢𑀸𑀬 𑀲𑀢𑀺𑀬𑀸 𑀢𑁂𑀦 𑀜𑀸𑀡𑁂𑀦 𑀢𑁂 𑀥𑀫𑁆𑀫𑁂 𑀅𑀦𑀼𑀧𑀲𑁆𑀲𑀢𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀸’’.

𑀪𑀸𑀯𑀦𑀸𑀢𑀺 𑀘𑀢𑀲𑁆𑀲𑁄 𑀪𑀸𑀯𑀦𑀸 𑁋 𑀢𑀢𑁆𑀣 𑀚𑀸𑀢𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑀢𑀺𑀯𑀢𑁆𑀢𑀦𑀝𑁆𑀞𑁂𑀦 𑀪𑀸𑀯𑀦𑀸, 𑀇𑀦𑁆𑀤𑁆𑀭𑀺𑀬𑀸𑀦𑀁 𑀏𑀓𑀭𑀲𑀝𑁆𑀞𑁂𑀦 𑀪𑀸𑀯𑀦𑀸, 𑀢𑀤𑀼𑀧𑀕𑀯𑀻𑀭𑀺𑀬𑀯𑀸𑀳𑀦𑀝𑁆𑀞𑁂𑀦 𑀪𑀸𑀯𑀦𑀸, 𑀆𑀲𑁂𑀯𑀦𑀝𑁆𑀞𑁂𑀦 𑀪𑀸𑀯𑀦𑀸. 𑀏𑀯𑀁 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀻𑀢𑀺.

𑀲𑀢𑀺𑀧𑀝𑁆𑀞𑀸𑀦𑀓𑀣𑀸 𑀦𑀺𑀝𑁆𑀞𑀺𑀢𑀸.