𑁭. 𑀲𑀫𑀲𑀻𑀲𑀓𑀣𑀸

𑁩𑁩. 𑀲𑀩𑁆𑀩𑀥𑀫𑁆𑀫𑀸𑀦𑀁 [𑀲𑀩𑁆𑀩𑁂𑀲𑀁 𑀥𑀫𑁆𑀫𑀸𑀦𑀁 (𑀓.) 𑀧𑀝𑀺. 𑀫. 𑁧.𑁮𑁭 𑀧𑀲𑁆𑀲𑀺𑀢𑀩𑁆𑀩𑀸] 𑀲𑀫𑁆𑀫𑀸𑀲𑀫𑀼𑀘𑁆𑀙𑁂𑀤𑁂 𑀦𑀺𑀭𑁄𑀥𑁂 𑀘 𑀅𑀦𑀼𑀧𑀝𑁆𑀞𑀸𑀦𑀢𑀸 𑀧𑀜𑁆𑀜𑀸 𑀲𑀫𑀲𑀻𑀲𑀝𑁆𑀞𑁂 𑀜𑀸𑀡𑀁.

𑀲𑀩𑁆𑀩𑀥𑀫𑁆𑀫𑀸𑀦𑀦𑁆𑀢𑀺 𑀧𑀜𑁆𑀘𑀓𑁆𑀔𑀦𑁆𑀥𑀸, 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺, 𑀅𑀝𑁆𑀞𑀸𑀭𑀲 𑀥𑀸𑀢𑀼𑀬𑁄, 𑀓𑀼𑀲𑀮𑀸 𑀥𑀫𑁆𑀫𑀸, 𑀅𑀓𑀼𑀲𑀮𑀸 𑀥𑀫𑁆𑀫𑀸, 𑀅𑀩𑁆𑀬𑀸𑀓𑀢𑀸 𑀥𑀫𑁆𑀫𑀸, 𑀓𑀸𑀫𑀸𑀯𑀘𑀭𑀸 𑀥𑀫𑁆𑀫𑀸, 𑀭𑀽𑀧𑀸𑀯𑀘𑀭𑀸 𑀥𑀫𑁆𑀫𑀸, 𑀅𑀭𑀽𑀧𑀸𑀯𑀘𑀭𑀸 𑀥𑀫𑁆𑀫𑀸, 𑀅𑀧𑀭𑀺𑀬𑀸𑀧𑀦𑁆𑀦𑀸 𑀥𑀫𑁆𑀫𑀸. 𑀲𑀫𑁆𑀫𑀸 𑀲𑀫𑀼𑀘𑁆𑀙𑁂𑀤𑁂𑀢𑀺 𑀦𑁂𑀓𑁆𑀔𑀫𑁆𑀫𑁂𑀦 𑀓𑀸𑀫𑀘𑁆𑀙𑀦𑁆𑀤𑀁 𑀲𑀫𑁆𑀫𑀸 𑀲𑀫𑀼𑀘𑁆𑀙𑀺𑀦𑁆𑀤𑀢𑀺, 𑀅𑀩𑁆𑀬𑀸𑀧𑀸𑀤𑁂𑀦 𑀩𑁆𑀬𑀸𑀧𑀸𑀤𑀁 𑀲𑀫𑁆𑀫𑀸 𑀲𑀫𑀼𑀘𑁆𑀙𑀺𑀦𑁆𑀤𑀢𑀺, 𑀆𑀮𑁄𑀓𑀲𑀜𑁆𑀜𑀸𑀬 𑀣𑀺𑀦𑀫𑀺𑀤𑁆𑀥𑀁 𑀲𑀫𑁆𑀫𑀸 𑀲𑀫𑀼𑀘𑁆𑀙𑀺𑀦𑁆𑀤𑀢𑀺, 𑀅𑀯𑀺𑀓𑁆𑀔𑁂𑀧𑁂𑀦 𑀉𑀤𑁆𑀥𑀘𑁆𑀘𑀁 𑀲𑀫𑁆𑀫𑀸 𑀲𑀫𑀼𑀘𑁆𑀙𑀺𑀦𑁆𑀤𑀢𑀺, 𑀥𑀫𑁆𑀫𑀯𑀯𑀢𑁆𑀣𑀸𑀦𑁂𑀦 𑀯𑀺𑀘𑀺𑀓𑀺𑀘𑁆𑀙𑀁 𑀲𑀫𑁆𑀫𑀸 𑀲𑀫𑀼𑀘𑁆𑀙𑀺𑀦𑁆𑀤𑀢𑀺, 𑀜𑀸𑀡𑁂𑀦 𑀅𑀯𑀺𑀚𑁆𑀚𑀁 𑀲𑀫𑁆𑀫𑀸 𑀲𑀫𑀼𑀘𑁆𑀙𑀺𑀦𑁆𑀤𑀢𑀺, 𑀧𑀸𑀫𑁄𑀚𑁆𑀚𑁂𑀦 𑀅𑀭𑀢𑀺𑀁 𑀲𑀫𑁆𑀫𑀸 𑀲𑀫𑀼𑀘𑁆𑀙𑀺𑀦𑁆𑀤𑀢𑀺, 𑀧𑀞𑀫𑁂𑀦 𑀛𑀸𑀦𑁂𑀦 𑀦𑀻𑀯𑀭𑀡𑁂 𑀲𑀫𑁆𑀫𑀸 𑀲𑀫𑀼𑀘𑁆𑀙𑀺𑀦𑁆𑀤𑀢𑀺…𑀧𑁂… 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀲𑀩𑁆𑀩𑀓𑀺𑀮𑁂𑀲𑁂 𑀲𑀫𑁆𑀫𑀸 𑀲𑀫𑀼𑀘𑁆𑀙𑀺𑀦𑁆𑀤𑀢𑀺.

𑀦𑀺𑀭𑁄𑀥𑁂𑀢𑀺 𑀦𑁂𑀓𑁆𑀔𑀫𑁆𑀫𑁂𑀦 𑀓𑀸𑀫𑀘𑁆𑀙𑀦𑁆𑀤𑀁 𑀦𑀺𑀭𑁄𑀥𑁂𑀢𑀺, 𑀅𑀩𑁆𑀬𑀸𑀧𑀸𑀤𑁂𑀦 𑀩𑁆𑀬𑀸𑀧𑀸𑀤𑀁 𑀦𑀺𑀭𑁄𑀥𑁂𑀢𑀺, 𑀆𑀮𑁄𑀓𑀲𑀜𑁆𑀜𑀸𑀬 𑀣𑀺𑀦𑀫𑀺𑀤𑁆𑀥𑀁 𑀦𑀺𑀭𑁄𑀥𑁂𑀢𑀺, 𑀅𑀯𑀺𑀓𑁆𑀔𑁂𑀧𑁂𑀦 𑀉𑀤𑁆𑀥𑀘𑁆𑀘𑀁 𑀦𑀺𑀭𑁄𑀥𑁂𑀢𑀺, 𑀥𑀫𑁆𑀫𑀯𑀯𑀢𑁆𑀣𑀸𑀦𑁂𑀦 𑀯𑀺𑀘𑀺𑀓𑀺𑀘𑁆𑀙𑀁 𑀦𑀺𑀭𑁄𑀥𑁂𑀢𑀺, 𑀜𑀸𑀡𑁂𑀦 𑀅𑀯𑀺𑀚𑁆𑀚𑀁 𑀦𑀺𑀭𑁄𑀥𑁂𑀢𑀺, 𑀧𑀸𑀫𑁄𑀚𑁆𑀚𑁂𑀦 𑀅𑀭𑀢𑀺𑀁 𑀦𑀺𑀭𑁄𑀥𑁂𑀢𑀺, 𑀧𑀞𑀫𑁂𑀦 𑀛𑀸𑀦𑁂𑀦 𑀦𑀻𑀯𑀭𑀡𑁂 𑀦𑀺𑀭𑁄𑀥𑁂𑀢𑀺…𑀧𑁂… 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀲𑀩𑁆𑀩𑀓𑀺𑀮𑁂𑀲𑁂 𑀦𑀺𑀭𑁄𑀥𑁂𑀢𑀺.

𑀅𑀦𑀼𑀧𑀝𑁆𑀞𑀸𑀦𑀢𑀸𑀢𑀺 𑀦𑁂𑀓𑁆𑀔𑀫𑁆𑀫𑀁 𑀧𑀝𑀺𑀮𑀤𑁆𑀥𑀲𑁆𑀲 𑀓𑀸𑀫𑀘𑁆𑀙𑀦𑁆𑀤𑁄 𑀦 𑀉𑀧𑀝𑁆𑀞𑀸𑀢𑀺, 𑀅𑀩𑁆𑀬𑀸𑀧𑀸𑀤𑀁 𑀧𑀝𑀺𑀮𑀤𑁆𑀥𑀲𑁆𑀲 𑀩𑁆𑀬𑀸𑀧𑀸𑀤𑁄 𑀦 𑀉𑀧𑀝𑁆𑀞𑀸𑀢𑀺, 𑀆𑀮𑁄𑀓𑀲𑀜𑁆𑀜𑀁 𑀧𑀝𑀺𑀮𑀤𑁆𑀥𑀲𑁆𑀲 𑀣𑀺𑀦𑀫𑀺𑀤𑁆𑀥𑀁 𑀦 𑀉𑀧𑀝𑁆𑀞𑀸𑀢𑀺, 𑀅𑀯𑀺𑀓𑁆𑀔𑁂𑀧𑀁 𑀧𑀝𑀺𑀮𑀤𑁆𑀥𑀲𑁆𑀲 𑀉𑀤𑁆𑀥𑀘𑁆𑀘𑀁 𑀦 𑀉𑀧𑀝𑁆𑀞𑀸𑀢𑀺, 𑀥𑀫𑁆𑀫𑀯𑀯𑀢𑁆𑀣𑀸𑀦𑀁 𑀧𑀝𑀺𑀮𑀤𑁆𑀥𑀲𑁆𑀲 𑀯𑀺𑀘𑀺𑀓𑀺𑀘𑁆𑀙𑀸 𑀦 𑀉𑀧𑀝𑁆𑀞𑀸𑀢𑀺, 𑀜𑀸𑀡𑀁 𑀧𑀝𑀺𑀮𑀤𑁆𑀥𑀲𑁆𑀲 𑀅𑀯𑀺𑀚𑁆𑀚𑀸 𑀦 𑀉𑀧𑀝𑁆𑀞𑀸𑀢𑀺, 𑀧𑀸𑀫𑁄𑀚𑁆𑀚𑀁 𑀧𑀝𑀺𑀮𑀤𑁆𑀥𑀲𑁆𑀲 𑀅𑀭𑀢𑀺 𑀦 𑀉𑀧𑀝𑁆𑀞𑀸𑀢𑀺, 𑀧𑀞𑀫𑀁 𑀛𑀸𑀦𑀁 𑀧𑀝𑀺𑀮𑀤𑁆𑀥𑀲𑁆𑀲 𑀦𑀻𑀯𑀭𑀡𑀸 𑀦 𑀉𑀧𑀝𑁆𑀞𑀦𑁆𑀢𑀺…𑀧𑁂… 𑀅𑀭𑀳𑀢𑁆𑀢𑀫𑀕𑁆𑀕𑀁 𑀧𑀝𑀺𑀮𑀤𑁆𑀥𑀲𑁆𑀲 𑀲𑀩𑁆𑀩𑀓𑀺𑀮𑁂𑀲𑀸 𑀦 𑀉𑀧𑀝𑁆𑀞𑀦𑁆𑀢𑀺.

𑀲𑀫𑀦𑁆𑀢𑀺 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀧𑀳𑀻𑀦𑀢𑁆𑀢𑀸 𑀦𑁂𑀓𑁆𑀔𑀫𑁆𑀫𑀁 𑀲𑀫𑀁, 𑀩𑁆𑀬𑀸𑀧𑀸𑀤𑀲𑁆𑀲 𑀧𑀳𑀻𑀦𑀢𑁆𑀢𑀸 𑀅𑀩𑁆𑀬𑀸𑀧𑀸𑀤𑁄 𑀲𑀫𑀁, 𑀣𑀺𑀦𑀫𑀺𑀤𑁆𑀥𑀲𑁆𑀲 𑀧𑀳𑀻𑀦𑀢𑁆𑀢𑀸 𑀆𑀮𑁄𑀓𑀲𑀜𑁆𑀜𑀸 𑀲𑀫𑀁, 𑀉𑀤𑁆𑀥𑀘𑁆𑀘𑀲𑁆𑀲 𑀧𑀳𑀻𑀦𑀢𑁆𑀢𑀸 𑀅𑀯𑀺𑀓𑁆𑀔𑁂𑀧𑁄 𑀲𑀫𑀁, 𑀯𑀺𑀘𑀺𑀓𑀺𑀘𑁆𑀙𑀸𑀬 𑀧𑀳𑀻𑀦𑀢𑁆𑀢𑀸 𑀥𑀫𑁆𑀫𑀯𑀯𑀢𑁆𑀣𑀸𑀦𑀁 𑀲𑀫𑀁, 𑀅𑀯𑀺𑀚𑁆𑀚𑀸𑀬 𑀧𑀳𑀻𑀦𑀢𑁆𑀢𑀸 𑀜𑀸𑀡𑀁 𑀲𑀫𑀁, 𑀅𑀭𑀢𑀺𑀬𑀸 𑀧𑀳𑀻𑀦𑀢𑁆𑀢𑀸 𑀧𑀸𑀫𑁄𑀚𑁆𑀚𑀁 𑀲𑀫𑀁, 𑀦𑀻𑀯𑀭𑀡𑀸𑀦𑀁 𑀧𑀳𑀻𑀦𑀢𑁆𑀢𑀸 𑀧𑀞𑀫𑀁 𑀛𑀸𑀦𑀁 𑀲𑀫𑀁…𑀧𑁂… 𑀲𑀩𑁆𑀩𑀓𑀺𑀮𑁂𑀲𑀸𑀦𑀁 𑀧𑀳𑀻𑀦𑀢𑁆𑀢𑀸 𑀅𑀭𑀳𑀢𑁆𑀢𑀫𑀕𑁆𑀕𑁄 𑀲𑀫𑀁.

𑀲𑀻𑀲𑀦𑁆𑀢𑀺 𑀢𑁂𑀭𑀲 𑀲𑀻𑀲𑀸𑀦𑀺 𑁋 𑀧𑀮𑀺𑀩𑁄𑀥𑀲𑀻𑀲𑀜𑁆𑀘 𑀢𑀡𑁆𑀳𑀸, 𑀯𑀺𑀦𑀺𑀩𑀦𑁆𑀥𑀦𑀲𑀻𑀲𑀜𑁆𑀘 𑀫𑀸𑀦𑁄, 𑀧𑀭𑀸𑀫𑀸𑀲𑀲𑀻𑀲𑀜𑁆𑀘 𑀤𑀺𑀝𑁆𑀞𑀺, 𑀯𑀺𑀓𑁆𑀔𑁂𑀧𑀲𑀻𑀲𑀜𑁆𑀘 𑀉𑀤𑁆𑀥𑀘𑁆𑀘𑀁, 𑀲𑀁𑀓𑀺𑀮𑁂𑀲𑀲𑀻𑀲𑀜𑁆𑀘 𑀅𑀯𑀺𑀚𑁆𑀚𑀸, 𑀅𑀥𑀺𑀫𑁄𑀓𑁆𑀔𑀲𑀻𑀲𑀜𑁆𑀘 𑀲𑀤𑁆𑀥𑀸, 𑀧𑀕𑁆𑀕𑀳𑀲𑀻𑀲𑀜𑁆𑀘 𑀯𑀻𑀭𑀺𑀬𑀁, 𑀉𑀧𑀝𑁆𑀞𑀸𑀦𑀲𑀻𑀲𑀜𑁆𑀘 𑀲𑀢𑀺, 𑀅𑀯𑀺𑀓𑁆𑀔𑁂𑀧𑀲𑀻𑀲𑀜𑁆𑀘 𑀲𑀫𑀸𑀥𑀺, 𑀤𑀲𑁆𑀲𑀦𑀲𑀻𑀲𑀜𑁆𑀘 𑀧𑀜𑁆𑀜𑀸, 𑀧𑀯𑀢𑁆𑀢𑀲𑀻𑀲𑀜𑁆𑀘 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁, 𑀕𑁄𑀘𑀭𑀲𑀻𑀲𑀜𑁆𑀘 𑀯𑀺𑀫𑁄𑀓𑁆𑀔𑁄, 𑀲𑀗𑁆𑀔𑀸𑀭𑀲𑀻𑀲𑀜𑁆𑀘 𑀦𑀺𑀭𑁄𑀥𑁄𑀢𑀺.

𑀲𑀫𑀲𑀻𑀲𑀓𑀣𑀸 𑀦𑀺𑀝𑁆𑀞𑀺𑀢𑀸.