𑁬. 𑀧𑀸𑀝𑀺𑀳𑀸𑀭𑀺𑀬𑀓𑀣𑀸

𑁩𑁦. ‘‘𑀢𑀻𑀡𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂 [𑀅. 𑀦𑀺. 𑁩.𑁬𑁧 𑀧𑀲𑁆𑀲𑀺𑀢𑀩𑁆𑀩𑀸], 𑀧𑀸𑀝𑀺𑀳𑀸𑀭𑀺𑀬𑀸𑀦𑀺. 𑀓𑀢𑀫𑀸𑀦𑀺 𑀢𑀻𑀡𑀺? 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁, 𑀆𑀤𑁂𑀲𑀦𑀸𑀧𑀸𑀝𑀺𑀳𑀸𑀭𑀺𑀬𑀁, 𑀅𑀦𑀼𑀲𑀸𑀲𑀦𑀻𑀧𑀸𑀝𑀺𑀳𑀸𑀭𑀺𑀬𑀁.

‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀅𑀦𑁂𑀓𑀯𑀺𑀳𑀺𑀢𑀁 𑀇𑀤𑁆𑀥𑀺𑀯𑀺𑀥𑀁 𑀧𑀘𑁆𑀘𑀦𑀼𑀪𑁄𑀢𑀺 𑁋 𑀏𑀓𑁄𑀧𑀺 𑀳𑀼𑀢𑁆𑀯𑀸 𑀩𑀳𑀼𑀥𑀸 𑀳𑁄𑀢𑀺, 𑀩𑀳𑀼𑀥𑀸𑀧𑀺 𑀳𑀼𑀢𑁆𑀯𑀸 𑀏𑀓𑁄 𑀳𑁄𑀢𑀺; 𑀆𑀯𑀺𑀪𑀸𑀯𑀁 𑀢𑀺𑀭𑁄𑀪𑀸𑀯𑀁…𑀧𑁂… 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸𑀧𑀺 𑀓𑀸𑀬𑁂𑀦 𑀯𑀲𑀁 𑀯𑀢𑁆𑀢𑁂𑀢𑀺. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁.

‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀆𑀤𑁂𑀲𑀦𑀸𑀧𑀸𑀝𑀺𑀳𑀸𑀭𑀺𑀬𑀁? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀦𑀺𑀫𑀺𑀢𑁆𑀢𑁂𑀦 𑀆𑀤𑀺𑀲𑀢𑀺 𑁋 ‘𑀏𑀯𑀫𑁆𑀧𑀺 𑀢𑁂 𑀫𑀦𑁄, 𑀇𑀢𑁆𑀣𑀫𑁆𑀧𑀺 𑀢𑁂 𑀫𑀦𑁄, 𑀇𑀢𑀺𑀧𑀺 𑀢𑁂 𑀘𑀺𑀢𑁆𑀢’𑀦𑁆𑀢𑀺. 𑀲𑁄 𑀩𑀳𑀼𑀁 𑀘𑁂𑀧𑀺 𑀆𑀤𑀺𑀲𑀢𑀺, 𑀢𑀣𑁂𑀯 𑀢𑀁 𑀳𑁄𑀢𑀺, 𑀦𑁄 𑀅𑀜𑁆𑀜𑀣𑀸. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀦 𑀳𑁂𑀯 𑀔𑁄 𑀦𑀺𑀫𑀺𑀢𑁆𑀢𑁂𑀦 𑀆𑀤𑀺𑀲𑀢𑀺, 𑀅𑀧𑀺 𑀘 𑀔𑁄 𑀫𑀦𑀼𑀲𑁆𑀲𑀸𑀦𑀁 𑀯𑀸 𑀅𑀫𑀦𑀼𑀲𑁆𑀲𑀸𑀦𑀁 𑀯𑀸 𑀤𑁂𑀯𑀢𑀸𑀦𑀁 𑀯𑀸 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀆𑀤𑀺𑀲𑀢𑀺 𑁋 ‘𑀏𑀯𑀫𑁆𑀧𑀺 𑀢𑁂 𑀫𑀦𑁄, 𑀇𑀢𑁆𑀣𑀫𑁆𑀧𑀺 𑀢𑁂 𑀫𑀦𑁄, 𑀇𑀢𑀺𑀧𑀺 𑀢𑁂 𑀘𑀺𑀢𑁆𑀢’𑀦𑁆𑀢𑀺. 𑀲𑁄 𑀩𑀳𑀼𑀁 𑀘𑁂𑀧𑀺 𑀆𑀤𑀺𑀲𑀢𑀺, 𑀢𑀣𑁂𑀯 𑀢𑀁 𑀳𑁄𑀢𑀺, 𑀦𑁄 𑀅𑀜𑁆𑀜𑀣𑀸. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀦 𑀳𑁂𑀯 𑀔𑁄 𑀦𑀺𑀫𑀺𑀢𑁆𑀢𑁂𑀦 𑀆𑀤𑀺𑀲𑀢𑀺, 𑀦𑀧𑀺 𑀫𑀦𑀼𑀲𑁆𑀲𑀸𑀦𑀁 𑀯𑀸 𑀅𑀫𑀦𑀼𑀲𑁆𑀲𑀸𑀦𑀁 𑀯𑀸 𑀤𑁂𑀯𑀢𑀸𑀦𑀁 𑀯𑀸 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀆𑀤𑀺𑀲𑀢𑀺, 𑀅𑀧𑀺 𑀘 𑀔𑁄 𑀯𑀺𑀢𑀓𑁆𑀓𑀬𑀢𑁄 𑀯𑀺𑀘𑀸𑀭𑀬𑀢𑁄 𑀯𑀺𑀢𑀓𑁆𑀓𑀯𑀺𑀧𑁆𑀨𑀸𑀭𑀲𑀤𑁆𑀤𑀁 𑀲𑀼𑀢𑁆𑀯𑀸 𑀆𑀤𑀺𑀲𑀢𑀺 𑁋 ‘𑀏𑀯𑀫𑁆𑀧𑀺 𑀢𑁂 𑀫𑀦𑁄, 𑀇𑀢𑁆𑀣𑀫𑁆𑀧𑀺 𑀢𑁂 𑀫𑀦𑁄, 𑀇𑀢𑀺𑀧𑀺 𑀢𑁂 𑀘𑀺𑀢𑁆𑀢’𑀦𑁆𑀢𑀺. 𑀲𑁄 𑀩𑀳𑀼𑀁 𑀘𑁂𑀧𑀺 𑀆𑀤𑀺𑀲𑀢𑀺, 𑀢𑀣𑁂𑀯 𑀢𑀁 𑀳𑁄𑀢𑀺, 𑀦𑁄 𑀅𑀜𑁆𑀜𑀣𑀸. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀦 𑀳𑁂𑀯 𑀔𑁄 𑀦𑀺𑀫𑀺𑀢𑁆𑀢𑁂𑀦 𑀆𑀤𑀺𑀲𑀢𑀺, 𑀦𑀧𑀺 𑀫𑀦𑀼𑀲𑁆𑀲𑀸𑀦𑀁 𑀯𑀸 𑀅𑀫𑀦𑀼𑀲𑁆𑀲𑀸𑀦𑀁 𑀯𑀸 𑀤𑁂𑀯𑀢𑀸𑀦𑀁 𑀯𑀸 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀆𑀤𑀺𑀲𑀢𑀺, 𑀦𑀧𑀺 𑀯𑀺𑀢𑀓𑁆𑀓𑀬𑀢𑁄 𑀯𑀺𑀘𑀸𑀭𑀬𑀢𑁄 𑀯𑀺𑀢𑀓𑁆𑀓𑀯𑀺𑀧𑁆𑀨𑀸𑀭𑀲𑀤𑁆𑀤𑀁 𑀲𑀼𑀢𑁆𑀯𑀸 𑀆𑀤𑀺𑀲𑀢𑀺, 𑀅𑀧𑀺 𑀘 𑀔𑁄 𑀅𑀯𑀺𑀢𑀓𑁆𑀓𑀁 𑀅𑀯𑀺𑀘𑀸𑀭𑀁 𑀲𑀫𑀸𑀥𑀺𑀁 𑀲𑀫𑀸𑀧𑀦𑁆𑀦𑀲𑁆𑀲 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀧𑀚𑀸𑀦𑀸𑀢𑀺 𑁋 ‘𑀬𑀣𑀸 𑀇𑀫𑀲𑁆𑀲 𑀪𑁄𑀢𑁄 𑀫𑀦𑁄𑀲𑀗𑁆𑀔𑀸𑀭𑀸 𑀧𑀡𑀺𑀳𑀺𑀢𑀸 𑀇𑀫𑀲𑁆𑀲 [𑀢𑀣𑀸 𑀇𑀫𑀲𑁆𑀲 (𑀲𑁆𑀬𑀸.), 𑀬𑀣𑀸 𑀇𑀫𑀲𑁆𑀲 (𑀓.) 𑀅. 𑀦𑀺. 𑁩.𑁬𑁧 𑀧𑀲𑁆𑀲𑀺𑀢𑀩𑁆𑀩𑀸] 𑀘𑀺𑀢𑁆𑀢𑀲𑁆𑀲 𑀅𑀦𑀦𑁆𑀢𑀭𑀸 𑀅𑀫𑀼𑀓𑀁 𑀦𑀸𑀫 𑀯𑀺𑀢𑀓𑁆𑀓𑀁 𑀯𑀺𑀢𑀓𑁆𑀓𑀬𑀺𑀲𑁆𑀲𑀢𑀻’𑀢𑀺 [𑀯𑀺𑀢𑀓𑁆𑀓𑁂𑀲𑁆𑀲𑀢𑀻𑀢𑀺 (𑀲𑁆𑀬𑀸.) 𑀅. 𑀦𑀺. 𑁩.𑁬𑁧]. 𑀲𑁄 𑀩𑀳𑀼𑀁 𑀘𑁂𑀧𑀺 𑀆𑀤𑀺𑀲𑀢𑀺, 𑀢𑀣𑁂𑀯 𑀢𑀁 𑀳𑁄𑀢𑀺, 𑀦𑁄 𑀅𑀜𑁆𑀜𑀣𑀸. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀆𑀤𑁂𑀲𑀦𑀸𑀧𑀸𑀝𑀺𑀳𑀸𑀭𑀺𑀬𑀁.

‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀅𑀦𑀼𑀲𑀸𑀲𑀦𑀻𑀧𑀸𑀝𑀺𑀳𑀸𑀭𑀺𑀬𑀁? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀏𑀯𑀫𑀦𑀼𑀲𑀸𑀲𑀢𑀺 𑁋 ‘𑀏𑀯𑀁 𑀯𑀺𑀢𑀓𑁆𑀓𑁂𑀣, 𑀫𑀸 𑀏𑀯𑀁 𑀯𑀺𑀢𑀓𑁆𑀓𑀬𑀺𑀢𑁆𑀣. 𑀏𑀯𑀁 𑀫𑀦𑀲𑀺 𑀓𑀭𑁄𑀣, 𑀫𑀸 𑀏𑀯𑀁 𑀫𑀦𑀲𑀺 𑀓𑀭𑀺𑀢𑁆𑀣. 𑀇𑀤𑀁 𑀧𑀚𑀳𑀣, 𑀇𑀤𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀣𑀸’𑀢𑀺. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀦𑀼𑀲𑀸𑀲𑀦𑀻𑀧𑀸𑀝𑀺𑀳𑀸𑀭𑀺𑀬𑀁. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀡𑀺 𑀧𑀸𑀝𑀺𑀳𑀸𑀭𑀺𑀬𑀸𑀦𑀺’’.

𑁩𑁧. 𑀦𑁂𑀓𑁆𑀔𑀫𑁆𑀫𑀁 𑀇𑀚𑁆𑀛𑀢𑀻𑀢𑀺 𑁋 𑀇𑀤𑁆𑀥𑀺. 𑀓𑀸𑀫𑀘𑁆𑀙𑀦𑁆𑀤𑀁 𑀧𑀝𑀺𑀳𑀭𑀢𑀻𑀢𑀺 𑁋 𑀧𑀸𑀝𑀺𑀳𑀸𑀭𑀺𑀬𑀁. 𑀬𑁂 𑀢𑁂𑀦 𑀦𑁂𑀓𑁆𑀔𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑀸, 𑀲𑀩𑁆𑀩𑁂 𑀢𑁂 𑀯𑀺𑀲𑀼𑀤𑁆𑀥𑀘𑀺𑀢𑁆𑀢𑀸 𑀅𑀦𑀸𑀯𑀺𑀮𑀲𑀗𑁆𑀓𑀧𑁆𑀧𑀸𑀢𑀺 𑁋 𑀆𑀤𑁂𑀲𑀦𑀸𑀧𑀸𑀝𑀺𑀳𑀸𑀭𑀺𑀬𑀁. ‘‘𑀢𑀁 𑀔𑁄 𑀧𑀦 𑀦𑁂𑀓𑁆𑀔𑀫𑁆𑀫𑀁 𑀏𑀯𑀁 𑀆𑀲𑁂𑀯𑀺𑀢𑀩𑁆𑀩𑀁, 𑀏𑀯𑀁 𑀪𑀸𑀯𑁂𑀢𑀩𑁆𑀩𑀁, 𑀏𑀯𑀁 𑀩𑀳𑀼𑀮𑀻𑀓𑀸𑀢𑀩𑁆𑀩𑀁, 𑀏𑀯𑀁 𑀢𑀤𑀦𑀼𑀥𑀫𑁆𑀫𑀢𑀸 𑀲𑀢𑀺 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑀸’’𑀢𑀺 𑁋 𑀅𑀦𑀼𑀲𑀸𑀲𑀦𑀻𑀧𑀸𑀝𑀺𑀳𑀸𑀭𑀺𑀬𑀁.

𑀅𑀩𑁆𑀬𑀸𑀧𑀸𑀤𑁄 𑀇𑀚𑁆𑀛𑀢𑀻𑀢𑀺 𑁋 𑀇𑀤𑁆𑀥𑀺. 𑀩𑁆𑀬𑀸𑀧𑀸𑀤𑀁 𑀧𑀝𑀺𑀳𑀭𑀢𑀻𑀢𑀺 𑁋 𑀧𑀸𑀝𑀺𑀳𑀸𑀭𑀺𑀬𑀁. 𑀬𑁂 𑀢𑁂𑀦 𑀅𑀩𑁆𑀬𑀸𑀧𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑀸, 𑀲𑀩𑁆𑀩𑁂 𑀢𑁂 𑀯𑀺𑀲𑀼𑀤𑁆𑀥𑀘𑀺𑀢𑁆𑀢𑀸 𑀅𑀦𑀸𑀯𑀺𑀮𑀲𑀗𑁆𑀓𑀧𑁆𑀧𑀸𑀢𑀺 𑁋 𑀆𑀤𑁂𑀲𑀦𑀸𑀧𑀸𑀝𑀺𑀳𑀸𑀭𑀺𑀬𑀁. ‘‘𑀲𑁄 𑀔𑁄 𑀧𑀦 𑀅𑀩𑁆𑀬𑀸𑀧𑀸𑀤𑁄 𑀏𑀯𑀁 𑀆𑀲𑁂𑀯𑀺𑀢𑀩𑁆𑀩𑁄, 𑀏𑀯𑀁 𑀪𑀸𑀯𑁂𑀢𑀩𑁆𑀩𑁄, 𑀏𑀯𑀁 𑀩𑀳𑀼𑀮𑀻𑀓𑀸𑀢𑀩𑁆𑀩𑁄, 𑀏𑀯𑀁 𑀢𑀤𑀦𑀼𑀥𑀫𑁆𑀫𑀢𑀸 𑀲𑀢𑀺 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑀸’’𑀢𑀺 𑁋 𑀅𑀦𑀼𑀲𑀸𑀲𑀦𑀻𑀧𑀸𑀝𑀺𑀳𑀸𑀭𑀺𑀬𑀁.

𑀆𑀮𑁄𑀓𑀲𑀜𑁆𑀜𑀸 𑀇𑀚𑁆𑀛𑀢𑀻𑀢𑀺 𑁋 𑀇𑀤𑁆𑀥𑀺. 𑀣𑀺𑀦𑀫𑀺𑀤𑁆𑀥𑀁 𑀧𑀝𑀺𑀳𑀭𑀢𑀻𑀢𑀺 𑁋 𑀧𑀸𑀝𑀺𑀳𑀸𑀭𑀺𑀬𑀁. 𑀬𑁂 𑀢𑀸𑀬 𑀆𑀮𑁄𑀓𑀲𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑀸, 𑀲𑀩𑁆𑀩𑁂 𑀢𑁂 𑀯𑀺𑀲𑀼𑀤𑁆𑀥𑀘𑀺𑀢𑁆𑀢𑀸 𑀅𑀦𑀸𑀯𑀺𑀮𑀲𑀗𑁆𑀓𑀧𑁆𑀧𑀸𑀢𑀺 𑁋 𑀆𑀤𑁂𑀲𑀦𑀸𑀧𑀸𑀝𑀺𑀳𑀸𑀭𑀺𑀬𑀁. ‘‘𑀲𑀸 𑀔𑁄 𑀧𑀦 𑀆𑀮𑁄𑀓𑀲𑀜𑁆𑀜𑀸 𑀏𑀯𑀁 𑀆𑀲𑁂𑀯𑀺𑀢𑀩𑁆𑀩𑀸, 𑀏𑀯𑀁 𑀪𑀸𑀯𑁂𑀢𑀩𑁆𑀩𑀸, 𑀏𑀯𑀁 𑀩𑀳𑀼𑀮𑀻𑀓𑀸𑀢𑀩𑁆𑀩𑀸, 𑀏𑀯𑀁 𑀢𑀤𑀦𑀼𑀥𑀫𑁆𑀫𑀢𑀸 𑀲𑀢𑀺 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑀸’’𑀢𑀺 𑁋 𑀅𑀦𑀼𑀲𑀸𑀲𑀦𑀻𑀧𑀸𑀝𑀺𑀳𑀸𑀭𑀺𑀬𑀁.

𑀅𑀯𑀺𑀓𑁆𑀔𑁂𑀧𑁄 𑀇𑀚𑁆𑀛𑀢𑀻𑀢𑀺 𑁋 𑀇𑀤𑁆𑀥𑀺. 𑀉𑀤𑁆𑀥𑀘𑁆𑀘𑀁 𑀧𑀝𑀺𑀳𑀭𑀢𑀻𑀢𑀺 𑁋 𑀧𑀸𑀝𑀺𑀳𑀸𑀭𑀺𑀬𑀁. 𑀬𑁂 𑀢𑁂𑀦 𑀅𑀯𑀺𑀓𑁆𑀔𑁂𑀧𑁂𑀦 𑀲𑀫𑀦𑁆𑀦𑀸𑀕𑀢𑀸, 𑀲𑀩𑁆𑀩𑁂 𑀢𑁂 𑀯𑀺𑀲𑀼𑀤𑁆𑀥𑀘𑀺𑀢𑁆𑀢𑀸 𑀅𑀦𑀸𑀯𑀺𑀮𑀲𑀗𑁆𑀓𑀧𑁆𑀧𑀸𑀢𑀺 𑁋 𑀆𑀤𑁂𑀲𑀦𑀸𑀧𑀸𑀝𑀺𑀳𑀸𑀭𑀺𑀬𑀁. ‘‘𑀲𑁄 𑀔𑁄 𑀧𑀦 𑀅𑀯𑀺𑀓𑁆𑀔𑁂𑀧𑁄 𑀏𑀯𑀁 𑀆𑀲𑁂𑀯𑀺𑀢𑀩𑁆𑀩𑁄, 𑀏𑀯𑀁 𑀪𑀸𑀯𑁂𑀢𑀩𑁆𑀩𑁄, 𑀏𑀯𑀁 𑀩𑀳𑀼𑀮𑀻𑀓𑀸𑀢𑀩𑁆𑀩𑁄, 𑀏𑀯𑀁 𑀢𑀤𑀦𑀼𑀥𑀫𑁆𑀫𑀢𑀸 𑀲𑀢𑀺 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑀸’’𑀢𑀺 𑁋 𑀅𑀦𑀼𑀲𑀸𑀲𑀦𑀻𑀧𑀸𑀝𑀺𑀳𑀸𑀭𑀺𑀬𑀁.

𑀥𑀫𑁆𑀫𑀯𑀯𑀢𑁆𑀣𑀸𑀦𑀁 𑀇𑀚𑁆𑀛𑀢𑀻𑀢𑀺 𑁋 𑀇𑀤𑁆𑀥𑀺. 𑀯𑀺𑀘𑀺𑀓𑀺𑀘𑁆𑀙𑀁 𑀧𑀝𑀺𑀳𑀭𑀢𑀻𑀢𑀺 𑁋 𑀧𑀸𑀝𑀺𑀳𑀸𑀭𑀺𑀬𑀁. 𑀬𑁂 𑀢𑁂𑀦 𑀥𑀫𑁆𑀫𑀯𑀯𑀢𑁆𑀣𑀸𑀦𑁂𑀦 𑀲𑀫𑀦𑁆𑀦𑀸𑀕𑀢𑀸, 𑀲𑀩𑁆𑀩𑁂 𑀢𑁂 𑀯𑀺𑀲𑀼𑀤𑁆𑀥𑀘𑀺𑀢𑁆𑀢𑀸 𑀅𑀦𑀸𑀯𑀺𑀮𑀲𑀗𑁆𑀓𑀧𑁆𑀧𑀸𑀢𑀺 𑁋 𑀆𑀤𑁂𑀲𑀦𑀸𑀧𑀸𑀝𑀺𑀳𑀸𑀭𑀺𑀬𑀁. ‘‘𑀢𑀁 𑀔𑁄 𑀧𑀦 𑀥𑀫𑁆𑀫𑀯𑀯𑀢𑁆𑀣𑀸𑀦𑀁 𑀏𑀯𑀁 𑀆𑀲𑁂𑀯𑀺𑀢𑀩𑁆𑀩𑀁, 𑀏𑀯𑀁 𑀪𑀸𑀯𑁂𑀢𑀩𑁆𑀩𑀁, 𑀏𑀯𑀁 𑀩𑀳𑀼𑀮𑀻𑀓𑀸𑀢𑀩𑁆𑀩𑀁, 𑀏𑀯𑀁 𑀢𑀤𑀦𑀼𑀥𑀫𑁆𑀫𑀢𑀸, 𑀲𑀢𑀺 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑀸’’𑀢𑀺 𑁋 𑀅𑀦𑀼𑀲𑀸𑀲𑀦𑀻𑀧𑀸𑀝𑀺𑀳𑀸𑀭𑀺𑀬𑀁.

𑀜𑀸𑀡𑀁 𑀇𑀚𑁆𑀛𑀢𑀻𑀢𑀺 𑁋 𑀇𑀤𑁆𑀥𑀺. 𑀅𑀯𑀺𑀚𑁆𑀚𑀁 𑀧𑀝𑀺𑀳𑀭𑀢𑀻𑀢𑀺 𑁋 𑀧𑀸𑀝𑀺𑀳𑀸𑀭𑀺𑀬𑀁. 𑀬𑁂 𑀢𑁂𑀦 𑀜𑀸𑀡𑁂𑀦 𑀲𑀫𑀦𑁆𑀦𑀸𑀕𑀢𑀸, 𑀲𑀩𑁆𑀩𑁂 𑀢𑁂 𑀯𑀺𑀲𑀼𑀤𑁆𑀥𑀘𑀺𑀢𑁆𑀢𑀸 𑀅𑀦𑀸𑀯𑀺𑀮𑀲𑀗𑁆𑀓𑀧𑁆𑀧𑀸𑀢𑀺 𑁋 𑀆𑀤𑁂𑀲𑀦𑀸𑀧𑀸𑀝𑀺𑀳𑀸𑀭𑀺𑀬𑀁. ‘‘𑀢𑀁 𑀔𑁄 𑀧𑀦 𑀜𑀸𑀡𑀁 𑀏𑀯𑀁 𑀆𑀲𑁂𑀯𑀺𑀢𑀩𑁆𑀩𑀁, 𑀏𑀯𑀁 𑀪𑀸𑀯𑁂𑀢𑀩𑁆𑀩𑀁, 𑀏𑀯𑀁 𑀩𑀳𑀼𑀮𑀻𑀓𑀸𑀢𑀩𑁆𑀩𑀁, 𑀏𑀯𑀁 𑀢𑀤𑀦𑀼𑀥𑀫𑁆𑀫𑀢𑀸 𑀲𑀢𑀺 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑀸’’𑀢𑀺 𑁋 𑀅𑀦𑀼𑀲𑀸𑀲𑀦𑀻𑀧𑀸𑀝𑀺𑀳𑀸𑀭𑀺𑀬𑀁.

𑀧𑀸𑀫𑁄𑀚𑁆𑀚𑀁 𑀇𑀚𑁆𑀛𑀢𑀻𑀢𑀺 𑁋 𑀇𑀤𑁆𑀥𑀺. 𑀅𑀭𑀢𑀺𑀁 𑀧𑀝𑀺𑀳𑀭𑀢𑀻𑀢𑀺 𑁋 𑀧𑀸𑀝𑀺𑀳𑀸𑀭𑀺𑀬𑀁. 𑀬𑁂 𑀢𑁂𑀦 𑀧𑀸𑀫𑁄𑀚𑁆𑀚𑁂𑀦 𑀲𑀫𑀦𑁆𑀦𑀸𑀕𑀢𑀸, 𑀲𑀩𑁆𑀩𑁂 𑀢𑁂 𑀯𑀺𑀲𑀼𑀤𑁆𑀥𑀘𑀺𑀢𑁆𑀢𑀸 𑀅𑀦𑀸𑀯𑀺𑀮𑀲𑀗𑁆𑀓𑀧𑁆𑀧𑀸𑀢𑀺 𑁋 𑀆𑀤𑁂𑀲𑀦𑀸𑀧𑀸𑀝𑀺𑀳𑀸𑀭𑀺𑀬𑀁. ‘‘𑀢𑀁 𑀔𑁄 𑀧𑀦 𑀧𑀸𑀫𑁄𑀚𑁆𑀚𑀁 𑀏𑀯𑀁 𑀆𑀲𑁂𑀯𑀺𑀢𑀩𑁆𑀩𑀁, 𑀏𑀯𑀁 𑀪𑀸𑀯𑁂𑀢𑀩𑁆𑀩𑀁, 𑀏𑀯𑀁 𑀩𑀳𑀼𑀮𑀻𑀓𑀸𑀢𑀩𑁆𑀩𑀁, 𑀏𑀯𑀁 𑀢𑀤𑀦𑀼𑀥𑀫𑁆𑀫𑀢𑀸 𑀲𑀢𑀺 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑀸’’𑀢𑀺 𑁋 𑀅𑀦𑀼𑀲𑀸𑀲𑀦𑀻𑀧𑀸𑀝𑀺𑀳𑀸𑀭𑀺𑀬𑀁…𑀧𑁂….

𑀧𑀞𑀫𑀁 𑀛𑀸𑀦𑀁 𑀇𑀚𑁆𑀛𑀢𑀻𑀢𑀺 𑁋 𑀇𑀤𑁆𑀥𑀺. 𑀦𑀻𑀯𑀭𑀡𑁂 𑀧𑀝𑀺𑀳𑀭𑀢𑀻𑀢𑀺 𑁋 𑀧𑀸𑀝𑀺𑀳𑀸𑀭𑀺𑀬𑀁. 𑀬𑁂 𑀢𑁂𑀦 𑀧𑀞𑀫𑁂𑀦 𑀛𑀸𑀦𑁂𑀦 𑀲𑀫𑀦𑁆𑀦𑀸𑀕𑀢𑀸, 𑀲𑀩𑁆𑀩𑁂 𑀢𑁂 𑀯𑀺𑀲𑀼𑀤𑁆𑀥𑀘𑀺𑀢𑁆𑀢𑀸 𑀅𑀦𑀸𑀯𑀺𑀮𑀲𑀗𑁆𑀓𑀧𑁆𑀧𑀸𑀢𑀺 𑁋 𑀆𑀤𑁂𑀲𑀦𑀸𑀧𑀸𑀝𑀺𑀳𑀸𑀭𑀺𑀬𑀁. ‘‘𑀢𑀁 𑀔𑁄 𑀧𑀦 𑀧𑀞𑀫𑀁 𑀛𑀸𑀦𑀁 𑀏𑀯𑀁 𑀆𑀲𑁂𑀯𑀺𑀢𑀩𑁆𑀩𑀁, 𑀏𑀯𑀁 𑀪𑀸𑀯𑁂𑀢𑀩𑁆𑀩𑀁, 𑀏𑀯𑀁 𑀩𑀳𑀼𑀮𑀻𑀓𑀸𑀢𑀩𑁆𑀩𑀁, 𑀏𑀯𑀁 𑀢𑀤𑀦𑀼𑀥𑀫𑁆𑀫𑀢𑀸 𑀲𑀢𑀺 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑀸’’𑀢𑀺 𑁋 𑀅𑀦𑀼𑀲𑀸𑀲𑀦𑀻𑀧𑀸𑀝𑀺𑀳𑀸𑀭𑀺𑀬𑀁…𑀧𑁂….

𑀅𑀭𑀳𑀢𑁆𑀢𑀫𑀕𑁆𑀕𑁄 𑀇𑀚𑁆𑀛𑀢𑀻𑀢𑀺 𑁋 𑀇𑀤𑁆𑀥𑀺. 𑀲𑀩𑁆𑀩𑀓𑀺𑀮𑁂𑀲𑁂 𑀧𑀝𑀺𑀳𑀭𑀢𑀻𑀢𑀺 𑁋 𑀧𑀸𑀝𑀺𑀳𑀸𑀭𑀺𑀬𑀁. 𑀬𑁂 𑀢𑁂𑀦 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀲𑀫𑀦𑁆𑀦𑀸𑀕𑀢𑀸, 𑀲𑀩𑁆𑀩𑁂 𑀢𑁂 𑀯𑀺𑀲𑀼𑀤𑁆𑀥𑀘𑀺𑀢𑁆𑀢𑀸 𑀅𑀦𑀸𑀯𑀺𑀮𑀲𑀗𑁆𑀓𑀧𑁆𑀧𑀸𑀢𑀺 𑁋 𑀆𑀤𑁂𑀲𑀦𑀸𑀧𑀸𑀝𑀺𑀳𑀸𑀭𑀺𑀬𑀁. ‘‘𑀲𑁄 𑀔𑁄 𑀧𑀦 𑀅𑀭𑀳𑀢𑁆𑀢𑀫𑀕𑁆𑀕𑁄 𑀏𑀯𑀁 𑀆𑀲𑁂𑀯𑀺𑀢𑀩𑁆𑀩𑁄, 𑀏𑀯𑀁 𑀪𑀸𑀯𑁂𑀢𑀩𑁆𑀩𑁄, 𑀏𑀯𑀁 𑀩𑀳𑀼𑀮𑀻𑀓𑀸𑀢𑀩𑁆𑀩𑁄, 𑀏𑀯𑀁 𑀢𑀤𑀦𑀼𑀥𑀫𑁆𑀫𑀢𑀸 𑀲𑀢𑀺 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑀸’’𑀢𑀺 𑁋 𑀅𑀦𑀼𑀲𑀸𑀲𑀦𑀻𑀧𑀸𑀝𑀺𑀳𑀸𑀭𑀺𑀬𑀁.

𑁩𑁨. 𑀦𑁂𑀓𑁆𑀔𑀫𑁆𑀫𑀁 𑀇𑀚𑁆𑀛𑀢𑀻𑀢𑀺 𑁋 𑀇𑀤𑁆𑀥𑀺. 𑀓𑀸𑀫𑀘𑁆𑀙𑀦𑁆𑀤𑀁 𑀧𑀝𑀺𑀳𑀭𑀢𑀻𑀢𑀺 𑁋 𑀧𑀸𑀝𑀺𑀳𑀸𑀭𑀺𑀬𑀁. 𑀬𑀸 𑀘 𑀇𑀤𑁆𑀥𑀺 𑀬𑀜𑁆𑀘 𑀧𑀸𑀝𑀺𑀳𑀸𑀭𑀺𑀬𑀁, 𑀇𑀤𑀁 𑀯𑀼𑀘𑁆𑀘𑀢𑀺 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁. 𑀅𑀩𑁆𑀬𑀸𑀧𑀸𑀤𑁄 𑀇𑀚𑁆𑀛𑀢𑀻𑀢𑀺 𑁋 𑀇𑀤𑁆𑀥𑀺. 𑀩𑁆𑀬𑀸𑀧𑀸𑀤𑀁 𑀧𑀝𑀺𑀳𑀭𑀢𑀻𑀢𑀺 𑁋 𑀧𑀸𑀝𑀺𑀳𑀸𑀭𑀺𑀬𑀁. 𑀬𑀸 𑀘 𑀇𑀤𑁆𑀥𑀺 𑀬𑀜𑁆𑀘 𑀧𑀸𑀝𑀺𑀳𑀸𑀭𑀺𑀬𑀁, 𑀇𑀤𑀁 𑀯𑀼𑀘𑁆𑀘𑀢𑀺 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁. 𑀆𑀮𑁄𑀓𑀲𑀜𑁆𑀜𑀸 𑀇𑀚𑁆𑀛𑀢𑀻𑀢𑀺 𑁋 𑀇𑀤𑁆𑀥𑀺. 𑀣𑀺𑀦𑀫𑀺𑀤𑁆𑀥𑀁 𑀧𑀝𑀺𑀳𑀭𑀢𑀻𑀢𑀺 𑁋 𑀧𑀸𑀝𑀺𑀳𑀸𑀭𑀺𑀬𑀁…𑀧𑁂… 𑀅𑀭𑀳𑀢𑁆𑀢𑀫𑀕𑁆𑀕𑁄 𑀇𑀚𑁆𑀛𑀢𑀻𑀢𑀺 𑁋 𑀇𑀤𑁆𑀥𑀺. 𑀲𑀩𑁆𑀩𑀓𑀺𑀮𑁂𑀲𑁂 𑀧𑀝𑀺𑀳𑀭𑀢𑀻𑀢𑀺 𑁋 𑀧𑀸𑀝𑀺𑀳𑀸𑀭𑀺𑀬𑀁. 𑀬𑀸 𑀘 𑀇𑀤𑁆𑀥𑀺 𑀬𑀜𑁆𑀘 𑀧𑀸𑀝𑀺𑀳𑀸𑀭𑀺𑀬𑀁, 𑀇𑀤𑀁 𑀯𑀼𑀘𑁆𑀘𑀢𑀺 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀦𑁆𑀢𑀺.

𑀧𑀸𑀝𑀺𑀳𑀸𑀭𑀺𑀬𑀓𑀣𑀸 𑀦𑀺𑀝𑁆𑀞𑀺𑀢𑀸.