𑁫. 𑀅𑀪𑀺𑀜𑁆𑀜𑀸𑀤𑀺𑀯𑀸𑀭𑁄

𑁩𑁪. ‘‘‘𑀬𑀸𑀯𑀢𑀸 𑀅𑀪𑀺𑀜𑁆𑀜𑀸𑀬 𑀅𑀪𑀺𑀜𑁆𑀜𑀝𑁆𑀞𑁄 𑀜𑀸𑀢𑁄 𑀤𑀺𑀝𑁆𑀞𑁄 𑀯𑀺𑀤𑀺𑀢𑁄 𑀲𑀘𑁆𑀙𑀺𑀓𑀢𑁄 𑀨𑀲𑁆𑀲𑀺𑀢𑁄 𑀧𑀜𑁆𑀜𑀸𑀬. 𑀅𑀨𑀲𑁆𑀲𑀺𑀢𑁄 𑀧𑀜𑁆𑀜𑀸𑀬 𑀅𑀪𑀺𑀜𑁆𑀜𑀝𑁆𑀞𑁄 𑀦𑀢𑁆𑀣𑀻’𑀢𑀺 𑁋 𑀘𑀓𑁆𑀔𑀼𑀁 𑀉𑀤𑀧𑀸𑀤𑀺, 𑀜𑀸𑀡𑀁 𑀉𑀤𑀧𑀸𑀤𑀺, 𑀧𑀜𑁆𑀜𑀸 𑀉𑀤𑀧𑀸𑀤𑀺, 𑀯𑀺𑀚𑁆𑀚𑀸 𑀉𑀤𑀧𑀸𑀤𑀺, 𑀆𑀮𑁄𑀓𑁄 𑀉𑀤𑀧𑀸𑀤𑀺’’. 𑀅𑀪𑀺𑀜𑁆𑀜𑀸𑀬 𑀅𑀪𑀺𑀜𑁆𑀜𑀝𑁆𑀞𑁂 𑀧𑀜𑁆𑀘𑀯𑀻𑀲𑀢𑀺 𑀥𑀫𑁆𑀫𑀸, 𑀧𑀜𑁆𑀘𑀯𑀻𑀲𑀢𑀺 𑀅𑀢𑁆𑀣𑀸, 𑀧𑀜𑁆𑀜𑀸𑀲 𑀦𑀺𑀭𑀼𑀢𑁆𑀢𑀺𑀬𑁄, 𑀲𑀢𑀁 𑀜𑀸𑀡𑀸𑀦𑀺.

‘‘‘𑀬𑀸𑀯𑀢𑀸 𑀧𑀭𑀺𑀜𑁆𑀜𑀸𑀬 𑀧𑀭𑀺𑀜𑁆𑀜𑀝𑁆𑀞𑁄…𑀧𑁂… 𑀬𑀸𑀯𑀢𑀸 𑀧𑀳𑀸𑀦𑀲𑁆𑀲 𑀧𑀳𑀸𑀦𑀝𑁆𑀞𑁄…𑀧𑁂… 𑀬𑀸𑀯𑀢𑀸 𑀪𑀸𑀯𑀦𑀸𑀬 𑀪𑀸𑀯𑀦𑀝𑁆𑀞𑁄…𑀧𑁂… 𑀬𑀸𑀯𑀢𑀸 𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀲𑀘𑁆𑀙𑀺𑀓𑀺𑀭𑀺𑀬𑀝𑁆𑀞𑁄 𑀜𑀸𑀢𑁄 𑀤𑀺𑀝𑁆𑀞𑁄 𑀯𑀺𑀤𑀺𑀢𑁄 𑀲𑀘𑁆𑀙𑀺𑀓𑀢𑁄 𑀨𑀲𑁆𑀲𑀺𑀢𑁄 𑀧𑀜𑁆𑀜𑀸𑀬. 𑀅𑀨𑀲𑁆𑀲𑀺𑀢𑁄 𑀧𑀜𑁆𑀜𑀸𑀬 𑀲𑀘𑁆𑀙𑀺𑀓𑀺𑀭𑀺𑀬𑀝𑁆𑀞𑁄 𑀦𑀢𑁆𑀣𑀻’𑀢𑀺 𑁋 𑀘𑀓𑁆𑀔𑀼𑀁 𑀉𑀤𑀧𑀸𑀤𑀺, 𑀜𑀸𑀡𑀁 𑀉𑀤𑀧𑀸𑀤𑀺, 𑀧𑀜𑁆𑀜𑀸 𑀉𑀤𑀧𑀸𑀤𑀺, 𑀯𑀺𑀚𑁆𑀚𑀸 𑀉𑀤𑀧𑀸𑀤𑀺, 𑀆𑀮𑁄𑀓𑁄 𑀉𑀤𑀧𑀸𑀤𑀺’’. 𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀲𑀘𑁆𑀙𑀺𑀓𑀺𑀭𑀺𑀬𑀝𑁆𑀞𑁂 𑀧𑀜𑁆𑀘𑀯𑀻𑀲𑀢𑀺 𑀥𑀫𑁆𑀫𑀸, 𑀧𑀜𑁆𑀘𑀯𑀻𑀲𑀢𑀺 𑀅𑀢𑁆𑀣𑀸, 𑀧𑀜𑁆𑀜𑀸𑀲 𑀦𑀺𑀭𑀼𑀢𑁆𑀢𑀺𑀬𑁄, 𑀲𑀢𑀁 𑀜𑀸𑀡𑀸𑀦𑀺.

𑀅𑀪𑀺𑀜𑁆𑀜𑀸𑀬 𑀅𑀪𑀺𑀜𑁆𑀜𑀝𑁆𑀞𑁂, 𑀧𑀭𑀺𑀜𑁆𑀜𑀸𑀬 𑀧𑀭𑀺𑀜𑁆𑀜𑀝𑁆𑀞𑁂, 𑀧𑀳𑀸𑀦𑀸𑀬 𑀧𑀳𑀸𑀦𑀝𑁆𑀞𑁂, 𑀪𑀸𑀯𑀦𑀸𑀬 𑀪𑀸𑀯𑀦𑀝𑁆𑀞𑁂, 𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀲𑀘𑁆𑀙𑀺𑀓𑀺𑀭𑀺𑀬𑀝𑁆𑀞𑁂 𑀧𑀜𑁆𑀘𑀯𑀻𑀲𑀲𑀢𑀁 𑀥𑀫𑁆𑀫𑀸, 𑀧𑀜𑁆𑀘𑀯𑀻𑀲𑀲𑀢𑀁 𑀅𑀢𑁆𑀣𑀸, 𑀅𑀟𑁆𑀠𑀢𑁂𑀬𑁆𑀬𑀸𑀦𑀺 𑀦𑀺𑀭𑀼𑀢𑁆𑀢𑀺𑀲𑀢𑀸𑀦𑀺, 𑀧𑀜𑁆𑀘 𑀜𑀸𑀡𑀲𑀢𑀸𑀦𑀺.