𑁨. 𑀬𑀼𑀕𑀦𑀤𑁆𑀥𑀯𑀕𑁆𑀕𑁄

𑁧. 𑀬𑀼𑀕𑀦𑀤𑁆𑀥𑀓𑀣𑀸

𑁧. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀓𑁄𑀲𑀫𑁆𑀩𑀺𑀬𑀁 𑀯𑀺𑀳𑀭𑀢𑀺 𑀖𑁄𑀲𑀺𑀢𑀸𑀭𑀸𑀫𑁂. 𑀢𑀢𑁆𑀭 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀆𑀯𑀼𑀲𑁄 𑀪𑀺𑀓𑁆𑀔𑀯𑁄’’𑀢𑀺. ‘‘𑀆𑀯𑀼𑀲𑁄’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀆𑀬𑀲𑁆𑀫𑀢𑁄 𑀆𑀦𑀦𑁆𑀤𑀲𑁆𑀲 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀏𑀢𑀤𑀯𑁄𑀘 𑁋

‘‘𑀬𑁄 𑀳𑀺 𑀓𑁄𑀘𑀺, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀯𑀸 𑀪𑀺𑀓𑁆𑀔𑀼𑀦𑀻 𑀯𑀸 𑀫𑀫 𑀲𑀦𑁆𑀢𑀺𑀓𑁂 𑀅𑀭𑀳𑀢𑁆𑀢𑀧𑀢𑁆𑀢𑀁 [𑀅𑀭𑀳𑀢𑁆𑀢𑀁 (𑀲𑁆𑀬𑀸.), 𑀅𑀭𑀳𑀢𑁆𑀢𑀧𑀢𑁆𑀢𑀺𑀁 𑀅. 𑀦𑀺. 𑁪.𑁧𑁭𑁦] 𑀩𑁆𑀬𑀸𑀓𑀭𑁄𑀢𑀺, 𑀲𑀩𑁆𑀩𑀲𑁄 𑀘𑀢𑀽𑀳𑀺 𑀫𑀕𑁆𑀕𑁂𑀳𑀺 𑀏𑀢𑁂𑀲𑀁 𑀯𑀸 𑀅𑀜𑁆𑀜𑀢𑀭𑁂𑀦. 𑀓𑀢𑀫𑁂𑀳𑀺 𑀘𑀢𑀽𑀳𑀺?

‘‘𑀇𑀥𑀸𑀯𑀼𑀲𑁄, 𑀪𑀺𑀓𑁆𑀔𑀼 𑀲𑀫𑀣𑀧𑀼𑀩𑁆𑀩𑀗𑁆𑀕𑀫𑀁 𑀯𑀺𑀧𑀲𑁆𑀲𑀦𑀁 𑀪𑀸𑀯𑁂𑀢𑀺. 𑀢𑀲𑁆𑀲 𑀲𑀫𑀣𑀧𑀼𑀩𑁆𑀩𑀗𑁆𑀕𑀫𑀁 𑀯𑀺𑀧𑀲𑁆𑀲𑀦𑀁 𑀪𑀸𑀯𑀬𑀢𑁄 𑀫𑀕𑁆𑀕𑁄 𑀲𑀜𑁆𑀚𑀸𑀬𑀢𑀺. 𑀲𑁄 𑀢𑀁 𑀫𑀕𑁆𑀕𑀁 𑀆𑀲𑁂𑀯𑀢𑀺 𑀪𑀸𑀯𑁂𑀢𑀺 𑀩𑀳𑀼𑀮𑀻𑀓𑀭𑁄𑀢𑀺 [𑀩𑀳𑀼𑀮𑀺𑀁 𑀓𑀭𑁄𑀢𑀺 (𑀓.) 𑀅. 𑀦𑀺. 𑁪.𑁧𑁭𑁦 𑀧𑀲𑁆𑀲𑀺𑀢𑀩𑁆𑀩𑀸]. 𑀢𑀲𑁆𑀲 𑀢𑀁 𑀫𑀕𑁆𑀕𑀁 𑀆𑀲𑁂𑀯𑀢𑁄 𑀪𑀸𑀯𑀬𑀢𑁄 𑀩𑀳𑀼𑀮𑀻𑀓𑀭𑁄𑀢𑁄 𑀲𑀜𑁆𑀜𑁄𑀚𑀦𑀸𑀦𑀺 𑀧𑀳𑀻𑀬𑀦𑁆𑀢𑀺, 𑀅𑀦𑀼𑀲𑀬𑀸 𑀩𑁆𑀬𑀦𑁆𑀢𑀻𑀳𑁄𑀦𑁆𑀢𑀺.

‘‘𑀧𑀼𑀦 𑀘𑀧𑀭𑀁, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀯𑀺𑀧𑀲𑁆𑀲𑀦𑀸𑀧𑀼𑀩𑁆𑀩𑀗𑁆𑀕𑀫𑀁 𑀲𑀫𑀣𑀁 𑀪𑀸𑀯𑁂𑀢𑀺. 𑀢𑀲𑁆𑀲 𑀯𑀺𑀧𑀲𑁆𑀲𑀦𑀸𑀧𑀼𑀩𑁆𑀩𑀗𑁆𑀕𑀫𑀁 𑀲𑀫𑀣𑀁 𑀪𑀸𑀯𑀬𑀢𑁄 𑀫𑀕𑁆𑀕𑁄 𑀲𑀜𑁆𑀚𑀸𑀬𑀢𑀺. 𑀲𑁄 𑀢𑀁 𑀫𑀕𑁆𑀕𑀁 𑀆𑀲𑁂𑀯𑀢𑀺 𑀪𑀸𑀯𑁂𑀢𑀺 𑀩𑀳𑀼𑀮𑀻𑀓𑀭𑁄𑀢𑀺. 𑀢𑀲𑁆𑀲 𑀢𑀁 𑀫𑀕𑁆𑀕𑀁 𑀆𑀲𑁂𑀯𑀢𑁄 𑀪𑀸𑀯𑀬𑀢𑁄 𑀩𑀳𑀼𑀮𑀻𑀓𑀭𑁄𑀢𑁄 𑀲𑀜𑁆𑀜𑁄𑀚𑀦𑀸𑀦𑀺 𑀧𑀳𑀻𑀬𑀦𑁆𑀢𑀺, 𑀅𑀦𑀼𑀲𑀬𑀸 𑀩𑁆𑀬𑀦𑁆𑀢𑀻𑀳𑁄𑀦𑁆𑀢𑀺.

‘‘𑀧𑀼𑀦 𑀘𑀧𑀭𑀁, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀲𑀫𑀣𑀯𑀺𑀧𑀲𑁆𑀲𑀦𑀁 𑀬𑀼𑀕𑀦𑀤𑁆𑀥𑀁 [𑀬𑀼𑀕𑀦𑀦𑁆𑀥𑀁 (𑀓. 𑀲𑀻. 𑀅𑀝𑁆𑀞.)] 𑀪𑀸𑀯𑁂𑀢𑀺. 𑀢𑀲𑁆𑀲 𑀲𑀫𑀣𑀯𑀺𑀧𑀲𑁆𑀲𑀦𑀁 𑀬𑀼𑀕𑀦𑀤𑁆𑀥𑀁 𑀪𑀸𑀯𑀬𑀢𑁄 𑀫𑀕𑁆𑀕𑁄 𑀲𑀜𑁆𑀚𑀸𑀬𑀢𑀺. 𑀲𑁄 𑀢𑀁 𑀫𑀕𑁆𑀕𑀁 𑀆𑀲𑁂𑀯𑀢𑀺 𑀪𑀸𑀯𑁂𑀢𑀺 𑀩𑀳𑀼𑀮𑀻𑀓𑀭𑁄𑀢𑀺. 𑀢𑀲𑁆𑀲 𑀢𑀁 𑀫𑀕𑁆𑀕𑀁 𑀆𑀲𑁂𑀯𑀢𑁄 𑀪𑀸𑀯𑀬𑀢𑁄 𑀩𑀳𑀼𑀮𑀻𑀓𑀭𑁄𑀢𑁄 𑀲𑀜𑁆𑀜𑁄𑀚𑀦𑀸𑀦𑀺 𑀧𑀳𑀻𑀬𑀦𑁆𑀢𑀺, 𑀅𑀦𑀼𑀲𑀬𑀸 𑀩𑁆𑀬𑀦𑁆𑀢𑀻𑀳𑁄𑀦𑁆𑀢𑀺.

‘‘𑀧𑀼𑀦 𑀘𑀧𑀭𑀁, 𑀆𑀯𑀼𑀲𑁄, 𑀪𑀺𑀓𑁆𑀔𑀼𑀦𑁄 𑀥𑀫𑁆𑀫𑀼𑀤𑁆𑀥𑀘𑁆𑀘𑀯𑀺𑀕𑁆𑀕𑀳𑀺𑀢𑀁 𑀫𑀸𑀦𑀲𑀁 𑀳𑁄𑀢𑀺. 𑀲𑁄, 𑀆𑀯𑀼𑀲𑁄, 𑀲𑀫𑀬𑁄 𑀬𑀁 𑀢𑀁 𑀘𑀺𑀢𑁆𑀢𑀁 𑀅𑀚𑁆𑀛𑀢𑁆𑀢𑀫𑁂𑀯 [𑀅𑀚𑁆𑀛𑀢𑁆𑀢𑀜𑁆𑀜𑁂𑀯 (𑀲𑁆𑀬𑀸. 𑀓.)] 𑀲𑀦𑁆𑀢𑀺𑀝𑁆𑀞𑀢𑀺 𑀲𑀦𑁆𑀦𑀺𑀲𑀻𑀤𑀢𑀺 𑀏𑀓𑁄𑀤𑀺 𑀳𑁄𑀢𑀺 𑀲𑀫𑀸𑀥𑀺𑀬𑀢𑀺. 𑀢𑀲𑁆𑀲 𑀫𑀕𑁆𑀕𑁄 𑀲𑀜𑁆𑀚𑀸𑀬𑀢𑀺. 𑀲𑁄 𑀢𑀁 𑀫𑀕𑁆𑀕𑀁 𑀆𑀲𑁂𑀯𑀢𑀺 𑀪𑀸𑀯𑁂𑀢𑀺 𑀩𑀳𑀼𑀮𑀻𑀓𑀭𑁄𑀢𑀺. 𑀢𑀲𑁆𑀲 𑀢𑀁 𑀫𑀕𑁆𑀕𑀁 𑀆𑀲𑁂𑀯𑀢𑁄 𑀪𑀸𑀯𑀬𑀢𑁄 𑀩𑀳𑀼𑀮𑀻𑀓𑀭𑁄𑀢𑁄 𑀲𑀜𑁆𑀜𑁄𑀚𑀦𑀸𑀦𑀺 𑀧𑀳𑀻𑀬𑀦𑁆𑀢𑀺, 𑀅𑀦𑀼𑀲𑀬𑀸 𑀩𑁆𑀬𑀦𑁆𑀢𑀻𑀳𑁄𑀦𑁆𑀢𑀺.

‘‘𑀬𑁄 𑀳𑀺 𑀓𑁄𑀘𑀺, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀯𑀸 𑀪𑀺𑀓𑁆𑀔𑀼𑀦𑀻 𑀯𑀸 𑀫𑀫 𑀲𑀦𑁆𑀢𑀺𑀓𑁂 𑀅𑀭𑀳𑀢𑁆𑀢𑀧𑀢𑁆𑀢𑀁 𑀩𑁆𑀬𑀸𑀓𑀭𑁄𑀢𑀺, 𑀲𑀩𑁆𑀩𑀲𑁄 𑀇𑀫𑁂𑀳𑀺 𑀘𑀢𑀽𑀳𑀺 𑀫𑀕𑁆𑀕𑁂𑀳𑀺, 𑀏𑀢𑁂𑀲𑀁 𑀯𑀸 𑀅𑀜𑁆𑀜𑀢𑀭𑁂𑀦𑀸’’𑀢𑀺.

𑁧. 𑀲𑀼𑀢𑁆𑀢𑀦𑁆𑀢𑀦𑀺𑀤𑁆𑀤𑁂𑀲𑁄

𑁨. 𑀓𑀣𑀁 𑀲𑀫𑀣𑀧𑀼𑀩𑁆𑀩𑀗𑁆𑀕𑀫𑀁 𑀯𑀺𑀧𑀲𑁆𑀲𑀦𑀁 𑀪𑀸𑀯𑁂𑀢𑀺? 𑀦𑁂𑀓𑁆𑀔𑀫𑁆𑀫𑀯𑀲𑁂𑀦 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢𑀸 𑀅𑀯𑀺𑀓𑁆𑀔𑁂𑀧𑁄 𑀲𑀫𑀸𑀥𑀺. 𑀢𑀢𑁆𑀣 𑀚𑀸𑀢𑁂 𑀥𑀫𑁆𑀫𑁂 𑀅𑀦𑀺𑀘𑁆𑀘𑀢𑁄 𑀅𑀦𑀼𑀧𑀲𑁆𑀲𑀦𑀝𑁆𑀞𑁂𑀦 𑀯𑀺𑀧𑀲𑁆𑀲𑀦𑀸, 𑀤𑀼𑀓𑁆𑀔𑀢𑁄 𑀅𑀦𑀼𑀧𑀲𑁆𑀲𑀦𑀝𑁆𑀞𑁂𑀦 𑀯𑀺𑀧𑀲𑁆𑀲𑀦𑀸, 𑀅𑀦𑀢𑁆𑀢𑀢𑁄 𑀅𑀦𑀼𑀧𑀲𑁆𑀲𑀦𑀝𑁆𑀞𑁂𑀦 𑀯𑀺𑀧𑀲𑁆𑀲𑀦𑀸. 𑀇𑀢𑀺 𑀧𑀞𑀫𑀁 𑀲𑀫𑀣𑁄, 𑀧𑀘𑁆𑀙𑀸 𑀯𑀺𑀧𑀲𑁆𑀲𑀦𑀸. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀲𑀫𑀣𑀧𑀼𑀩𑁆𑀩𑀗𑁆𑀕𑀫𑀁 𑀯𑀺𑀧𑀲𑁆𑀲𑀦𑀁 𑀪𑀸𑀯𑁂𑀢𑀻’’𑀢𑀺. 𑀪𑀸𑀯𑁂𑀢𑀻𑀢𑀺 𑀘𑀢𑀲𑁆𑀲𑁄 𑀪𑀸𑀯𑀦𑀸 𑁋 𑀢𑀢𑁆𑀣 𑀚𑀸𑀢𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑀢𑀺𑀯𑀢𑁆𑀢𑀦𑀝𑁆𑀞𑁂𑀦 𑀪𑀸𑀯𑀦𑀸, 𑀇𑀦𑁆𑀤𑁆𑀭𑀺𑀬𑀸𑀦𑀁 𑀏𑀓𑀭𑀲𑀝𑁆𑀞𑁂𑀦 𑀪𑀸𑀯𑀦𑀸, 𑀢𑀤𑀼𑀧𑀕𑀯𑀻𑀭𑀺𑀬𑀯𑀸𑀳𑀦𑀝𑁆𑀞𑁂𑀦 𑀪𑀸𑀯𑀦𑀸, 𑀆𑀲𑁂𑀯𑀦𑀝𑁆𑀞𑁂𑀦 𑀪𑀸𑀯𑀦𑀸.

𑀫𑀕𑁆𑀕𑁄 𑀲𑀜𑁆𑀚𑀸𑀬𑀢𑀻𑀢𑀺 𑀓𑀣𑀁 𑀫𑀕𑁆𑀕𑁄 𑀲𑀜𑁆𑀚𑀸𑀬𑀢𑀺? 𑀤𑀲𑁆𑀲𑀦𑀝𑁆𑀞𑁂𑀦 𑀲𑀫𑁆𑀫𑀸𑀤𑀺𑀝𑁆𑀞𑀺 𑀫𑀕𑁆𑀕𑁄 𑀲𑀜𑁆𑀚𑀸𑀬𑀢𑀺, 𑀅𑀪𑀺𑀦𑀺𑀭𑁄𑀧𑀦𑀝𑁆𑀞𑁂𑀦 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀫𑀕𑁆𑀕𑁄 𑀲𑀜𑁆𑀚𑀸𑀬𑀢𑀺, 𑀧𑀭𑀺𑀕𑁆𑀕𑀳𑀝𑁆𑀞𑁂𑀦 𑀲𑀫𑁆𑀫𑀸𑀯𑀸𑀘𑀸 𑀫𑀕𑁆𑀕𑁄 𑀲𑀜𑁆𑀚𑀸𑀬𑀢𑀺, 𑀲𑀫𑀼𑀝𑁆𑀞𑀸𑀦𑀝𑁆𑀞𑁂𑀦 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀫𑀕𑁆𑀕𑁄 𑀲𑀜𑁆𑀚𑀸𑀬𑀢𑀺, 𑀯𑁄𑀤𑀸𑀦𑀝𑁆𑀞𑁂𑀦 𑀲𑀫𑁆𑀫𑀸𑀆𑀚𑀻𑀯𑁄 𑀫𑀕𑁆𑀕𑁄 𑀲𑀜𑁆𑀚𑀸𑀬𑀢𑀺, 𑀧𑀕𑁆𑀕𑀳𑀝𑁆𑀞𑁂𑀦 𑀲𑀫𑁆𑀫𑀸𑀯𑀸𑀬𑀸𑀫𑁄 𑀫𑀕𑁆𑀕𑁄 𑀲𑀜𑁆𑀚𑀸𑀬𑀢𑀺, 𑀉𑀧𑀝𑁆𑀞𑀸𑀦𑀝𑁆𑀞𑁂𑀦 𑀲𑀫𑁆𑀫𑀸𑀲𑀢𑀺 𑀫𑀕𑁆𑀕𑁄 𑀲𑀜𑁆𑀚𑀸𑀬𑀢𑀺, 𑀅𑀯𑀺𑀓𑁆𑀔𑁂𑀧𑀝𑁆𑀞𑁂𑀦 𑀲𑀫𑁆𑀫𑀸𑀲𑀫𑀸𑀥𑀺 𑀫𑀕𑁆𑀕𑁄 𑀲𑀜𑁆𑀚𑀸𑀬𑀢𑀺 𑁋 𑀏𑀯𑀁 𑀫𑀕𑁆𑀕𑁄 𑀲𑀜𑁆𑀚𑀸𑀬𑀢𑀺.

𑀲𑁄 𑀢𑀁 𑀫𑀕𑁆𑀕𑀁 𑀆𑀲𑁂𑀯𑀢𑀺 𑀪𑀸𑀯𑁂𑀢𑀺 𑀩𑀳𑀼𑀮𑀻𑀓𑀭𑁄𑀢𑀺 𑀆𑀲𑁂𑀯𑀢𑀻𑀢𑀺 𑀓𑀣𑀁 𑀆𑀲𑁂𑀯𑀢𑀺? 𑀆𑀯𑀚𑁆𑀚𑀦𑁆𑀢𑁄 𑀆𑀲𑁂𑀯𑀢𑀺, 𑀚𑀸𑀦𑀦𑁆𑀢𑁄 𑀆𑀲𑁂𑀯𑀢𑀺, 𑀧𑀲𑁆𑀲𑀦𑁆𑀢𑁄 𑀆𑀲𑁂𑀯𑀢𑀺, 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄 𑀆𑀲𑁂𑀯𑀢𑀺, 𑀘𑀺𑀢𑁆𑀢𑀁 𑀅𑀥𑀺𑀝𑁆𑀞𑀳𑀦𑁆𑀢𑁄 𑀆𑀲𑁂𑀯𑀢𑀺, 𑀲𑀤𑁆𑀥𑀸𑀬 𑀅𑀥𑀺𑀫𑀼𑀘𑁆𑀘𑀦𑁆𑀢𑁄 𑀆𑀲𑁂𑀯𑀢𑀺, 𑀯𑀻𑀭𑀺𑀬𑀁 𑀧𑀕𑁆𑀕𑀡𑁆𑀳𑀦𑁆𑀢𑁄 𑀆𑀲𑁂𑀯𑀢𑀺, 𑀲𑀢𑀺𑀁 𑀉𑀧𑀝𑁆𑀞𑀸𑀧𑁂𑀦𑁆𑀢𑁄 𑀆𑀲𑁂𑀯𑀢𑀺, 𑀘𑀺𑀢𑁆𑀢𑀁 𑀲𑀫𑀸𑀤𑀳𑀦𑁆𑀢𑁄 𑀆𑀲𑁂𑀯𑀢𑀺, 𑀧𑀜𑁆𑀜𑀸𑀬 𑀧𑀚𑀸𑀦𑀦𑁆𑀢𑁄 𑀆𑀲𑁂𑀯𑀢𑀺, 𑀅𑀪𑀺𑀜𑁆𑀜𑁂𑀬𑁆𑀬𑀁 𑀅𑀪𑀺𑀚𑀸𑀦𑀦𑁆𑀢𑁄 𑀆𑀲𑁂𑀯𑀢𑀺, 𑀧𑀭𑀺𑀜𑁆𑀜𑁂𑀬𑁆𑀬𑀁 𑀧𑀭𑀺𑀚𑀸𑀦𑀦𑁆𑀢𑁄 𑀆𑀲𑁂𑀯𑀢𑀺, 𑀧𑀳𑀸𑀢𑀩𑁆𑀩𑀁 𑀧𑀚𑀳𑀦𑁆𑀢𑁄 𑀆𑀲𑁂𑀯𑀢𑀺, 𑀪𑀸𑀯𑁂𑀢𑀩𑁆𑀩𑀁 𑀪𑀸𑀯𑁂𑀦𑁆𑀢𑁄 𑀆𑀲𑁂𑀯𑀢𑀺, 𑀲𑀘𑁆𑀙𑀺𑀓𑀸𑀢𑀩𑁆𑀩𑀁 𑀲𑀘𑁆𑀙𑀺𑀓𑀭𑁄𑀦𑁆𑀢𑁄 𑀆𑀲𑁂𑀯𑀢𑀺 𑁋 𑀏𑀯𑀁 𑀆𑀲𑁂𑀯𑀢𑀺.

𑀪𑀸𑀯𑁂𑀢𑀻𑀢𑀺 𑀓𑀣𑀁 𑀪𑀸𑀯𑁂𑀢𑀺? 𑀆𑀯𑀚𑁆𑀚𑀦𑁆𑀢𑁄 𑀪𑀸𑀯𑁂𑀢𑀺, 𑀚𑀸𑀦𑀦𑁆𑀢𑁄 𑀪𑀸𑀯𑁂𑀢𑀺, 𑀧𑀲𑁆𑀲𑀦𑁆𑀢𑁄 𑀪𑀸𑀯𑁂𑀢𑀺, 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄 𑀪𑀸𑀯𑁂𑀢𑀺, 𑀘𑀺𑀢𑁆𑀢𑀁 𑀅𑀥𑀺𑀝𑁆𑀞𑀳𑀦𑁆𑀢𑁄 𑀪𑀸𑀯𑁂𑀢𑀺, 𑀲𑀤𑁆𑀥𑀸𑀬 𑀅𑀥𑀺𑀫𑀼𑀘𑁆𑀘𑀦𑁆𑀢𑁄 𑀪𑀸𑀯𑁂𑀢𑀺, 𑀯𑀻𑀭𑀺𑀬𑀁 𑀧𑀕𑁆𑀕𑀡𑁆𑀳𑀦𑁆𑀢𑁄 𑀪𑀸𑀯𑁂𑀢𑀺, 𑀲𑀢𑀺𑀁 𑀉𑀧𑀝𑁆𑀞𑀸𑀧𑁂𑀦𑁆𑀢𑁄 𑀪𑀸𑀯𑁂𑀢𑀺, 𑀘𑀺𑀢𑁆𑀢𑀁 𑀲𑀫𑀸𑀤𑀳𑀦𑁆𑀢𑁄 𑀪𑀸𑀯𑁂𑀢𑀺, 𑀧𑀜𑁆𑀜𑀸𑀬 𑀧𑀚𑀸𑀦𑀦𑁆𑀢𑁄 𑀪𑀸𑀯𑁂𑀢𑀺, 𑀅𑀪𑀺𑀜𑁆𑀜𑁂𑀬𑁆𑀬𑀁 𑀅𑀪𑀺𑀚𑀸𑀦𑀦𑁆𑀢𑁄 𑀪𑀸𑀯𑁂𑀢𑀺, 𑀧𑀭𑀺𑀜𑁆𑀜𑁂𑀬𑁆𑀬𑀁 𑀧𑀭𑀺𑀚𑀸𑀦𑀦𑁆𑀢𑁄 𑀪𑀸𑀯𑁂𑀢𑀺, 𑀧𑀳𑀸𑀢𑀩𑁆𑀩𑀁 𑀧𑀚𑀳𑀦𑁆𑀢𑁄 𑀪𑀸𑀯𑁂𑀢𑀺, 𑀪𑀸𑀯𑁂𑀢𑀩𑁆𑀩𑀁 𑀪𑀸𑀯𑁂𑀦𑁆𑀢𑁄 𑀪𑀸𑀯𑁂𑀢𑀺, 𑀲𑀘𑁆𑀙𑀺𑀓𑀸𑀢𑀩𑁆𑀩𑀁 𑀲𑀘𑁆𑀙𑀺𑀓𑀭𑁄𑀦𑁆𑀢𑁄 𑀪𑀸𑀯𑁂𑀢𑀺 𑁋 𑀏𑀯𑀁 𑀪𑀸𑀯𑁂𑀢𑀺.

𑀩𑀳𑀼𑀮𑀻𑀓𑀭𑁄𑀢𑀻𑀢𑀺 𑀓𑀣𑀁 𑀩𑀳𑀼𑀮𑀻𑀓𑀭𑁄𑀢𑀺? 𑀆𑀯𑀚𑁆𑀚𑀦𑁆𑀢𑁄 𑀩𑀳𑀼𑀮𑀻𑀓𑀭𑁄𑀢𑀺, 𑀚𑀸𑀦𑀦𑁆𑀢𑁄 𑀩𑀳𑀼𑀮𑀻𑀓𑀭𑁄𑀢𑀺, 𑀧𑀲𑁆𑀲𑀦𑁆𑀢𑁄 𑀩𑀳𑀼𑀮𑀻𑀓𑀭𑁄𑀢𑀺, 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄 𑀩𑀳𑀼𑀮𑀻𑀓𑀭𑁄𑀢𑀺, 𑀘𑀺𑀢𑁆𑀢𑀁 𑀅𑀥𑀺𑀝𑁆𑀞𑀳𑀦𑁆𑀢𑁄 𑀩𑀳𑀼𑀮𑀻𑀓𑀭𑁄𑀢𑀺, 𑀲𑀤𑁆𑀥𑀸𑀬 𑀅𑀥𑀺𑀫𑀼𑀘𑁆𑀘𑀦𑁆𑀢𑁄 𑀩𑀳𑀼𑀮𑀻𑀓𑀭𑁄𑀢𑀺, 𑀯𑀻𑀭𑀺𑀬𑀁 𑀧𑀕𑁆𑀕𑀡𑁆𑀳𑀦𑁆𑀢𑁄 𑀩𑀳𑀼𑀮𑀻𑀓𑀭𑁄𑀢𑀺, 𑀲𑀢𑀺𑀁 𑀉𑀧𑀝𑁆𑀞𑀸𑀧𑁂𑀦𑁆𑀢𑁄 𑀩𑀳𑀼𑀮𑀻𑀓𑀭𑁄𑀢𑀺, 𑀘𑀺𑀢𑁆𑀢𑀁 𑀲𑀫𑀸𑀤𑀳𑀦𑁆𑀢𑁄 𑀩𑀳𑀼𑀮𑀻𑀓𑀭𑁄𑀢𑀺, 𑀧𑀜𑁆𑀜𑀸𑀬 𑀧𑀚𑀸𑀦𑀦𑁆𑀢𑁄 𑀩𑀳𑀼𑀮𑀻𑀓𑀭𑁄𑀢𑀺, 𑀅𑀪𑀺𑀜𑁆𑀜𑁂𑀬𑁆𑀬𑀁 𑀅𑀪𑀺𑀚𑀸𑀦𑀦𑁆𑀢𑁄 𑀩𑀳𑀼𑀮𑀻𑀓𑀭𑁄𑀢𑀺, 𑀧𑀭𑀺𑀜𑁆𑀜𑁂𑀬𑁆𑀬𑀁 𑀧𑀭𑀺𑀚𑀸𑀦𑀦𑁆𑀢𑁄 𑀩𑀳𑀼𑀮𑀻𑀓𑀭𑁄𑀢𑀺, 𑀧𑀳𑀸𑀢𑀩𑁆𑀩𑀁 𑀧𑀚𑀳𑀦𑁆𑀢𑁄 𑀩𑀳𑀼𑀮𑀻𑀓𑀭𑁄𑀢𑀺, 𑀪𑀸𑀯𑁂𑀢𑀩𑁆𑀩𑀁 𑀪𑀸𑀯𑁂𑀦𑁆𑀢𑁄 𑀩𑀳𑀼𑀮𑀻𑀓𑀭𑁄𑀢𑀺, 𑀲𑀘𑁆𑀙𑀺𑀓𑀸𑀢𑀩𑁆𑀩𑀁 𑀲𑀘𑁆𑀙𑀺𑀓𑀭𑁄𑀦𑁆𑀢𑁄 𑀩𑀳𑀼𑀮𑀻𑀓𑀭𑁄𑀢𑀺 𑁋 𑀏𑀯𑀁 𑀩𑀳𑀼𑀮𑀻𑀓𑀭𑁄𑀢𑀺.

𑀢𑀲𑁆𑀲 𑀢𑀁 𑀫𑀕𑁆𑀕𑀁 𑀆𑀲𑁂𑀯𑀢𑁄 𑀪𑀸𑀯𑀬𑀢𑁄 𑀩𑀳𑀼𑀮𑀻𑀓𑀭𑁄𑀢𑁄 𑀲𑀜𑁆𑀜𑁄𑀚𑀦𑀸𑀦𑀺 𑀧𑀳𑀻𑀬𑀦𑁆𑀢𑀺 𑀅𑀦𑀼𑀲𑀬𑀸 𑀩𑁆𑀬𑀦𑁆𑀢𑀻𑀳𑁄𑀦𑁆𑀢𑀻𑀢𑀺 𑀓𑀣𑀁 𑀲𑀜𑁆𑀜𑁄𑀚𑀦𑀸𑀦𑀺 𑀧𑀳𑀻𑀬𑀦𑁆𑀢𑀺, 𑀅𑀦𑀼𑀲𑀬𑀸 𑀩𑁆𑀬𑀦𑁆𑀢𑀻𑀳𑁄𑀦𑁆𑀢𑀺? 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦, 𑀲𑀓𑁆𑀓𑀸𑀬𑀤𑀺𑀝𑁆𑀞𑀺, 𑀯𑀺𑀘𑀺𑀓𑀺𑀘𑁆𑀙𑀸, 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄 𑁋 𑀇𑀫𑀸𑀦𑀺 𑀢𑀻𑀡𑀺 𑀲𑀜𑁆𑀜𑁄𑀚𑀦𑀸𑀦𑀺 𑀧𑀳𑀻𑀬𑀦𑁆𑀢𑀺; 𑀤𑀺𑀝𑁆𑀞𑀸𑀦𑀼𑀲𑀬𑁄, 𑀯𑀺𑀘𑀺𑀓𑀺𑀘𑁆𑀙𑀸𑀦𑀼𑀲𑀬𑁄 𑁋 𑀇𑀫𑁂 𑀤𑁆𑀯𑁂 𑀅𑀦𑀼𑀲𑀬𑀸 𑀩𑁆𑀬𑀦𑁆𑀢𑀻𑀳𑁄𑀦𑁆𑀢𑀺. 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁂𑀦 𑀑𑀴𑀸𑀭𑀺𑀓𑀁 𑀓𑀸𑀫𑀭𑀸𑀕𑀲𑀜𑁆𑀜𑁄𑀚𑀦𑀁, 𑀧𑀝𑀺𑀖𑀲𑀜𑁆𑀜𑁄𑀚𑀦𑀁 𑁋 𑀇𑀫𑀸𑀦𑀺 𑀤𑁆𑀯𑁂 𑀲𑀜𑁆𑀜𑁄𑀚𑀦𑀸𑀦𑀺 𑀧𑀳𑀻𑀬𑀦𑁆𑀢𑀺; 𑀑𑀴𑀸𑀭𑀺𑀓𑁄 𑀓𑀸𑀫𑀭𑀸𑀕𑀸𑀦𑀼𑀲𑀬𑁄, 𑀧𑀝𑀺𑀖𑀸𑀦𑀼𑀲𑀬𑁄 𑁋 𑀇𑀫𑁂 𑀤𑁆𑀯𑁂 𑀅𑀦𑀼𑀲𑀬𑀸 𑀩𑁆𑀬𑀦𑁆𑀢𑀻𑀳𑁄𑀦𑁆𑀢𑀺. 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀅𑀦𑀼𑀲𑀳𑀕𑀢𑀁 𑀓𑀸𑀫𑀭𑀸𑀕𑀲𑀜𑁆𑀜𑁄𑀚𑀦𑀁, 𑀧𑀝𑀺𑀖𑀲𑀜𑁆𑀜𑁄𑀚𑀦𑀁 𑁋 𑀇𑀫𑀸𑀦𑀺 𑀤𑁆𑀯𑁂 𑀲𑀜𑁆𑀜𑁄𑀚𑀦𑀸𑀦𑀺 𑀧𑀳𑀻𑀬𑀦𑁆𑀢𑀺; 𑀅𑀦𑀼𑀲𑀳𑀕𑀢𑁄 𑀓𑀸𑀫𑀭𑀸𑀕𑀸𑀦𑀼𑀲𑀬𑁄, 𑀧𑀝𑀺𑀖𑀸𑀦𑀼𑀲𑀬𑁄 𑁋 𑀇𑀫𑁂 𑀤𑁆𑀯𑁂 𑀅𑀦𑀼𑀲𑀬𑀸 𑀩𑁆𑀬𑀦𑁆𑀢𑀻𑀳𑁄𑀦𑁆𑀢𑀺. 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀭𑀽𑀧𑀭𑀸𑀕𑁄, 𑀅𑀭𑀽𑀧𑀭𑀸𑀕𑁄, 𑀫𑀸𑀦𑁄, 𑀉𑀤𑁆𑀥𑀘𑁆𑀘𑀁, 𑀅𑀯𑀺𑀚𑁆𑀚𑀸 𑁋 𑀇𑀫𑀸𑀦𑀺 𑀧𑀜𑁆𑀘 𑀲𑀜𑁆𑀜𑁄𑀚𑀦𑀸𑀦𑀺 𑀧𑀳𑀻𑀬𑀦𑁆𑀢𑀺; 𑀫𑀸𑀦𑀸𑀦𑀼𑀲𑀬𑁄, 𑀪𑀯𑀭𑀸𑀕𑀸𑀦𑀼𑀲𑀬𑁄, 𑀅𑀯𑀺𑀚𑁆𑀚𑀸𑀦𑀼𑀲𑀬𑁄 𑁋 𑀇𑀫𑁂 𑀢𑀬𑁄 𑀅𑀦𑀼𑀲𑀬𑀸 𑀩𑁆𑀬𑀦𑁆𑀢𑀻𑀳𑁄𑀦𑁆𑀢𑀺. 𑀏𑀯𑀁 𑀲𑀜𑁆𑀜𑁄𑀚𑀦𑀸𑀦𑀺 𑀧𑀳𑀻𑀬𑀦𑁆𑀢𑀺, 𑀅𑀦𑀼𑀲𑀬𑀸 𑀩𑁆𑀬𑀦𑁆𑀢𑀻𑀳𑁄𑀦𑁆𑀢𑀺.

𑁩. 𑀅𑀩𑁆𑀬𑀸𑀧𑀸𑀤𑀯𑀲𑁂𑀦 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢𑀸 𑀅𑀯𑀺𑀓𑁆𑀔𑁂𑀧𑁄 𑀲𑀫𑀸𑀥𑀺…𑀧𑁂… 𑀆𑀮𑁄𑀓𑀲𑀜𑁆𑀜𑀸𑀯𑀲𑁂𑀦 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢𑀸 𑀅𑀯𑀺𑀓𑁆𑀔𑁂𑀧𑁄 𑀲𑀫𑀸𑀥𑀺…𑀧𑁂… 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀻 𑀅𑀲𑁆𑀲𑀸𑀲𑀯𑀲𑁂𑀦 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀻 𑀧𑀲𑁆𑀲𑀸𑀲𑀯𑀲𑁂𑀦 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢𑀸 𑀅𑀯𑀺𑀓𑁆𑀔𑁂𑀧𑁄 𑀲𑀫𑀸𑀥𑀺. 𑀢𑀢𑁆𑀣 𑀚𑀸𑀢𑁂 𑀥𑀫𑁆𑀫𑁂 𑀅𑀦𑀺𑀘𑁆𑀘𑀢𑁄 𑀅𑀦𑀼𑀧𑀲𑁆𑀲𑀦𑀝𑁆𑀞𑁂𑀦 𑀯𑀺𑀧𑀲𑁆𑀲𑀦𑀸, 𑀤𑀼𑀓𑁆𑀔𑀢𑁄 𑀅𑀦𑀼𑀧𑀲𑁆𑀲𑀦𑀝𑁆𑀞𑁂𑀦 𑀯𑀺𑀧𑀲𑁆𑀲𑀦𑀸, 𑀅𑀦𑀢𑁆𑀢𑀢𑁄 𑀅𑀦𑀼𑀧𑀲𑁆𑀲𑀦𑀝𑁆𑀞𑁂𑀦 𑀯𑀺𑀧𑀲𑁆𑀲𑀦𑀸. 𑀇𑀢𑀺 𑀧𑀞𑀫𑀁 𑀲𑀫𑀣𑁄, 𑀧𑀘𑁆𑀙𑀸 𑀯𑀺𑀧𑀲𑁆𑀲𑀦𑀸. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀲𑀫𑀣𑀧𑀼𑀩𑁆𑀩𑀗𑁆𑀕𑀫𑀁 𑀯𑀺𑀧𑀲𑁆𑀲𑀦𑀁 𑀪𑀸𑀯𑁂𑀢𑀻’’𑀢𑀺. 𑀪𑀸𑀯𑁂𑀢𑀻𑀢𑀺 𑀘𑀢𑀲𑁆𑀲𑁄 𑀪𑀸𑀯𑀦𑀸 𑁋 𑀢𑀢𑁆𑀣 𑀚𑀸𑀢𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑀢𑀺𑀯𑀢𑁆𑀢𑀦𑀝𑁆𑀞𑁂𑀦 𑀪𑀸𑀯𑀦𑀸, 𑀇𑀦𑁆𑀤𑁆𑀭𑀺𑀬𑀸𑀦𑀁 𑀏𑀓𑀭𑀲𑀝𑁆𑀞𑁂𑀦 𑀪𑀸𑀯𑀦𑀸, 𑀢𑀤𑀼𑀧𑀕𑀯𑀻𑀭𑀺𑀬𑀯𑀸𑀳𑀦𑀝𑁆𑀞𑁂𑀦 𑀪𑀸𑀯𑀦𑀸, 𑀆𑀲𑁂𑀯𑀦𑀝𑁆𑀞𑁂𑀦 𑀪𑀸𑀯𑀦𑀸.

𑀫𑀕𑁆𑀕𑁄 𑀲𑀜𑁆𑀚𑀸𑀬𑀢𑀻𑀢𑀺 𑀓𑀣𑀁 𑀫𑀕𑁆𑀕𑁄 𑀲𑀜𑁆𑀚𑀸𑀬𑀢𑀺? 𑀤𑀲𑁆𑀲𑀦𑀝𑁆𑀞𑁂𑀦 𑀲𑀫𑁆𑀫𑀸𑀤𑀺𑀝𑁆𑀞𑀺 𑀫𑀕𑁆𑀕𑁄 𑀲𑀜𑁆𑀚𑀸𑀬𑀢𑀺, 𑀅𑀪𑀺𑀦𑀺𑀭𑁄𑀧𑀦𑀝𑁆𑀞𑁂𑀦 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀫𑀕𑁆𑀕𑁄 𑀲𑀜𑁆𑀚𑀸𑀬𑀢𑀺…𑀧𑁂… 𑀅𑀯𑀺𑀓𑁆𑀔𑁂𑀧𑀝𑁆𑀞𑁂𑀦 𑀲𑀫𑁆𑀫𑀸𑀲𑀫𑀸𑀥𑀺 𑀫𑀕𑁆𑀕𑁄 𑀲𑀜𑁆𑀚𑀸𑀬𑀢𑀺. 𑀏𑀯𑀁 𑀫𑀕𑁆𑀕𑁄 𑀲𑀜𑁆𑀚𑀸𑀬𑀢𑀺.

𑀲𑁄 𑀢𑀁 𑀫𑀕𑁆𑀕𑀁 𑀆𑀲𑁂𑀯𑀢𑀺 𑀪𑀸𑀯𑁂𑀢𑀺 𑀩𑀳𑀼𑀮𑀻𑀓𑀭𑁄𑀢𑀺 𑀆𑀲𑁂𑀯𑀢𑀻𑀢𑀺 𑀓𑀣𑀁 𑀆𑀲𑁂𑀯𑀢𑀺? 𑀆𑀯𑀚𑁆𑀚𑀦𑁆𑀢𑁄 𑀆𑀲𑁂𑀯𑀢𑀺…𑀧𑁂… 𑀲𑀘𑁆𑀙𑀺𑀓𑀸𑀢𑀩𑁆𑀩𑀁 𑀲𑀘𑁆𑀙𑀺𑀓𑀭𑁄𑀦𑁆𑀢𑁄 𑀆𑀲𑁂𑀯𑀢𑀺, 𑀏𑀯𑀁 𑀆𑀲𑁂𑀯𑀢𑀺. 𑀪𑀸𑀯𑁂𑀢𑀻𑀢𑀺 𑀓𑀣𑀁 𑀪𑀸𑀯𑁂𑀢𑀺? 𑀆𑀯𑀚𑁆𑀚𑀦𑁆𑀢𑁄 𑀪𑀸𑀯𑁂𑀢𑀺, 𑀚𑀸𑀦𑀦𑁆𑀢𑁄 𑀪𑀸𑀯𑁂𑀢𑀺…𑀧𑁂… 𑀲𑀘𑁆𑀙𑀺𑀓𑀸𑀢𑀩𑁆𑀩𑀁 𑀲𑀘𑁆𑀙𑀺𑀓𑀭𑁄𑀦𑁆𑀢𑁄 𑀪𑀸𑀯𑁂𑀢𑀺, 𑀏𑀯𑀁 𑀪𑀸𑀯𑁂𑀢𑀺. 𑀩𑀳𑀼𑀮𑀻𑀓𑀭𑁄𑀢𑀻𑀢𑀺 𑀓𑀣𑀁 𑀩𑀳𑀼𑀮𑀻𑀓𑀭𑁄𑀢𑀺? 𑀆𑀯𑀚𑁆𑀚𑀦𑁆𑀢𑁄 𑀩𑀳𑀼𑀮𑀻𑀓𑀭𑁄𑀢𑀺, 𑀚𑀸𑀦𑀦𑁆𑀢𑁄 𑀩𑀳𑀼𑀮𑀻𑀓𑀭𑁄𑀢𑀺…𑀧𑁂… 𑀲𑀘𑁆𑀙𑀺𑀓𑀸𑀢𑀩𑁆𑀩𑀁 𑀲𑀘𑁆𑀙𑀺𑀓𑀭𑁄𑀦𑁆𑀢𑁄 𑀩𑀳𑀼𑀮𑀻𑀓𑀭𑁄𑀢𑀺, 𑀏𑀯𑀁 𑀩𑀳𑀼𑀮𑀻𑀓𑀭𑁄𑀢𑀺.

𑀢𑀲𑁆𑀲 𑀢𑀁 𑀫𑀕𑁆𑀕𑀁 𑀆𑀲𑁂𑀯𑀢𑁄 𑀪𑀸𑀯𑀬𑀢𑁄 𑀩𑀳𑀼𑀮𑀻𑀓𑀭𑁄𑀢𑁄 𑀲𑀜𑁆𑀜𑁄𑀚𑀦𑀸𑀦𑀺 𑀧𑀳𑀻𑀬𑀦𑁆𑀢𑀺, 𑀅𑀦𑀼𑀲𑀬𑀸 𑀩𑁆𑀬𑀦𑁆𑀢𑀻𑀳𑁄𑀦𑁆𑀢𑀻𑀢𑀺 𑀓𑀣𑀁 𑀲𑀜𑁆𑀜𑁄𑀚𑀦𑀸 𑀧𑀳𑀻𑀬𑀦𑁆𑀢𑀺, 𑀅𑀦𑀼𑀲𑀬𑀸 𑀩𑁆𑀬𑀦𑁆𑀢𑀻𑀳𑁄𑀦𑁆𑀢𑀺? 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀲𑀓𑁆𑀓𑀸𑀬𑀤𑀺𑀝𑁆𑀞𑀺 𑀯𑀺𑀘𑀺𑀓𑀺𑀘𑁆𑀙𑀸 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄 𑁋 𑀇𑀫𑀸𑀦𑀺 𑀢𑀻𑀡𑀺 𑀲𑀜𑁆𑀜𑁄𑀚𑀦𑀸𑀦𑀺 𑀧𑀳𑀻𑀬𑀦𑁆𑀢𑀺; 𑀤𑀺𑀝𑁆𑀞𑀸𑀦𑀼𑀲𑀬𑁄, 𑀯𑀺𑀘𑀺𑀓𑀺𑀘𑁆𑀙𑀸𑀦𑀼𑀲𑀬𑁄 𑁋 𑀇𑀫𑁂 𑀤𑁆𑀯𑁂 𑀅𑀦𑀼𑀲𑀬𑀸 𑀩𑁆𑀬𑀦𑁆𑀢𑀻𑀳𑁄𑀦𑁆𑀢𑀺. 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁂𑀦 𑀑𑀴𑀸𑀭𑀺𑀓𑀁 𑀓𑀸𑀫𑀭𑀸𑀕𑀲𑀜𑁆𑀜𑁄𑀚𑀦𑀁, 𑀧𑀝𑀺𑀖𑀲𑀜𑁆𑀜𑁄𑀚𑀦𑀁 𑁋 𑀇𑀫𑀸𑀦𑀺 𑀤𑁆𑀯𑁂 𑀲𑀜𑁆𑀜𑁄𑀚𑀦𑀸𑀦𑀺 𑀧𑀳𑀻𑀬𑀦𑁆𑀢𑀺; 𑀑𑀴𑀸𑀭𑀺𑀓𑁄 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀧𑀝𑀺𑀖𑀸𑀦𑀼𑀲𑀬𑁄 𑁋 𑀇𑀫𑁂 𑀤𑁆𑀯𑁂 𑀅𑀦𑀼𑀲𑀬𑀸 𑀩𑁆𑀬𑀦𑁆𑀢𑀻𑀳𑁄𑀦𑁆𑀢𑀺. 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀅𑀦𑀼𑀲𑀳𑀕𑀢𑀁 𑀓𑀸𑀫𑀭𑀸𑀕𑀲𑀜𑁆𑀜𑁄𑀚𑀦𑀁, 𑀧𑀝𑀺𑀖𑀲𑀜𑁆𑀜𑁄𑀚𑀦𑀁 𑁋 𑀇𑀫𑀸𑀦𑀺 𑀤𑁆𑀯𑁂 𑀲𑀜𑁆𑀜𑁄𑀚𑀦𑀸𑀦𑀺 𑀧𑀳𑀻𑀬𑀦𑁆𑀢𑀺; 𑀅𑀦𑀼𑀲𑀳𑀕𑀢𑁄 𑀓𑀸𑀫𑀭𑀸𑀕𑀸𑀦𑀼𑀲𑀬𑁄, 𑀧𑀝𑀺𑀖𑀸𑀦𑀼𑀲𑀬𑁄 𑁋 𑀇𑀫𑁂 𑀤𑁆𑀯𑁂 𑀅𑀦𑀼𑀲𑀬𑀸 𑀩𑁆𑀬𑀦𑁆𑀢𑀻𑀳𑁄𑀦𑁆𑀢𑀺. 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀭𑀽𑀧𑀭𑀸𑀕𑁄, 𑀅𑀭𑀽𑀧𑀭𑀸𑀕𑁄, 𑀫𑀸𑀦𑁄, 𑀉𑀤𑁆𑀥𑀘𑁆𑀘𑀁, 𑀅𑀯𑀺𑀚𑁆𑀚𑀸 𑁋 𑀇𑀫𑀸𑀦𑀺 𑀧𑀜𑁆𑀘 𑀲𑀜𑁆𑀜𑁄𑀚𑀦𑀸𑀦𑀺 𑀧𑀳𑀻𑀬𑀦𑁆𑀢𑀺; 𑀫𑀸𑀦𑀸𑀦𑀼𑀲𑀬𑁄, 𑀪𑀯𑀭𑀸𑀕𑀸𑀦𑀼𑀲𑀬𑁄, 𑀅𑀯𑀺𑀚𑁆𑀚𑀸𑀦𑀼𑀲𑀬𑁄 𑁋 𑀇𑀫𑁂 𑀢𑀬𑁄 𑀅𑀦𑀼𑀲𑀬𑀸 𑀩𑁆𑀬𑀦𑁆𑀢𑀻𑀳𑁄𑀦𑁆𑀢𑀺. 𑀏𑀯𑀁 𑀲𑀜𑁆𑀜𑁄𑀚𑀦𑀸𑀦𑀺 𑀧𑀳𑀻𑀬𑀦𑁆𑀢𑀺, 𑀅𑀦𑀼𑀲𑀬𑀸 𑀩𑁆𑀬𑀦𑁆𑀢𑀻𑀳𑁄𑀦𑁆𑀢𑀺. 𑀏𑀯𑀁 𑀲𑀫𑀣𑀧𑀼𑀩𑁆𑀩𑀗𑁆𑀕𑀫𑀁 𑀯𑀺𑀧𑀲𑁆𑀲𑀦𑀁 𑀪𑀸𑀯𑁂𑀢𑀺.

𑁪. 𑀓𑀣𑀁 𑀯𑀺𑀧𑀲𑁆𑀲𑀦𑀸𑀧𑀼𑀩𑁆𑀩𑀗𑁆𑀕𑀫𑀁 𑀲𑀫𑀣𑀁 𑀪𑀸𑀯𑁂𑀢𑀺? 𑀅𑀦𑀺𑀘𑁆𑀘𑀢𑁄 𑀅𑀦𑀼𑀧𑀲𑁆𑀲𑀦𑀝𑁆𑀞𑁂𑀦 𑀯𑀺𑀧𑀲𑁆𑀲𑀦𑀸, 𑀤𑀼𑀓𑁆𑀔𑀢𑁄 𑀅𑀦𑀼𑀧𑀲𑁆𑀲𑀦𑀝𑁆𑀞𑁂𑀦 𑀯𑀺𑀧𑀲𑁆𑀲𑀦𑀸, 𑀅𑀦𑀢𑁆𑀢𑀢𑁄 𑀅𑀦𑀼𑀧𑀲𑁆𑀲𑀦𑀝𑁆𑀞𑁂𑀦 𑀯𑀺𑀧𑀲𑁆𑀲𑀦𑀸. 𑀢𑀢𑁆𑀣 𑀚𑀸𑀢𑀸𑀦𑀁 𑀥𑀫𑁆𑀫𑀸𑀦𑀜𑁆𑀘 𑀯𑁄𑀲𑀕𑁆𑀕𑀸𑀭𑀫𑁆𑀫𑀡𑀢𑀸 [𑀯𑁄𑀲𑁆𑀲𑀕𑁆𑀕𑀸𑀭𑀫𑁆𑀫𑀡𑀢𑀸 (𑀲𑁆𑀬𑀸. 𑀓.)] 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢𑀸 𑀅𑀯𑀺𑀓𑁆𑀔𑁂𑀧𑁄. 𑀲𑀫𑀸𑀥𑀺 𑀇𑀢𑀺 𑀧𑀞𑀫𑀁 𑀯𑀺𑀧𑀲𑁆𑀲𑀦𑀸, 𑀧𑀘𑁆𑀙𑀸 𑀲𑀫𑀣𑁄. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀯𑀺𑀧𑀲𑁆𑀲𑀦𑀸𑀧𑀼𑀩𑁆𑀩𑀗𑁆𑀕𑀫𑀁 𑀲𑀫𑀣𑀁 𑀪𑀸𑀯𑁂𑀢𑀻’’𑀢𑀺. 𑀪𑀸𑀯𑁂𑀢𑀻𑀢𑀺 𑀘𑀢𑀲𑁆𑀲𑁄 𑀪𑀸𑀯𑀦𑀸 𑁋 𑀆𑀲𑁂𑀯𑀦𑀝𑁆𑀞𑁂𑀦 𑀪𑀸𑀯𑀦𑀸…𑀧𑁂… 𑀫𑀕𑁆𑀕𑁄 𑀲𑀜𑁆𑀚𑀸𑀬𑀢𑀻𑀢𑀺 𑀓𑀣𑀁 𑀫𑀕𑁆𑀕𑁄 𑀲𑀜𑁆𑀚𑀸𑀬𑀢𑀺…𑀧𑁂… 𑀏𑀯𑀁 𑀫𑀕𑁆𑀕𑁄 𑀲𑀜𑁆𑀚𑀸𑀬𑀢𑀺. 𑀏𑀯𑀁 𑀲𑀜𑁆𑀜𑁄𑀚𑀦𑀸𑀦𑀺 𑀧𑀳𑀻𑀬𑀦𑁆𑀢𑀺, 𑀅𑀦𑀼𑀲𑀬𑀸 𑀩𑁆𑀬𑀦𑁆𑀢𑀻𑀳𑁄𑀦𑁆𑀢𑀺.

𑀭𑀽𑀧𑀁 𑀅𑀦𑀺𑀘𑁆𑀘𑀢𑁄 𑀅𑀦𑀼𑀧𑀲𑁆𑀲𑀦𑀝𑁆𑀞𑁂𑀦 𑀯𑀺𑀧𑀲𑁆𑀲𑀦𑀸, 𑀭𑀽𑀧𑀁 𑀤𑀼𑀓𑁆𑀔𑀢𑁄 𑀅𑀦𑀼𑀧𑀲𑁆𑀲𑀦𑀝𑁆𑀞𑁂𑀦 𑀯𑀺𑀧𑀲𑁆𑀲𑀦𑀸, 𑀭𑀽𑀧𑀁 𑀅𑀦𑀢𑁆𑀢𑀢𑁄 𑀅𑀦𑀼𑀧𑀲𑁆𑀲𑀦𑀝𑁆𑀞𑁂𑀦 𑀯𑀺𑀧𑀲𑁆𑀲𑀦𑀸. 𑀢𑀢𑁆𑀣 𑀚𑀸𑀢𑀸𑀦𑀁 𑀥𑀫𑁆𑀫𑀸𑀦𑀜𑁆𑀘 𑀯𑁄𑀲𑀕𑁆𑀕𑀸𑀭𑀫𑁆𑀫𑀡𑀢𑀸 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢𑀸 𑀅𑀯𑀺𑀓𑁆𑀔𑁂𑀧𑁄 𑀲𑀫𑀸𑀥𑀺. 𑀇𑀢𑀺 𑀧𑀞𑀫𑀁 𑀯𑀺𑀧𑀲𑁆𑀲𑀦𑀸, 𑀧𑀘𑁆𑀙𑀸 𑀲𑀫𑀣𑁄. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀯𑀺𑀧𑀲𑁆𑀲𑀦𑀸𑀧𑀼𑀩𑁆𑀩𑀗𑁆𑀕𑀫𑀁 𑀲𑀫𑀣𑀁 𑀪𑀸𑀯𑁂𑀢𑀻’’𑀢𑀺. 𑀪𑀸𑀯𑁂𑀢𑀻𑀢𑀺 𑀘𑀢𑀲𑁆𑀲𑁄 𑀪𑀸𑀯𑀦𑀸 𑁋 𑀆𑀲𑁂𑀯𑀦𑀝𑁆𑀞𑁂𑀦 𑀪𑀸𑀯𑀦𑀸…𑀧𑁂… 𑀫𑀕𑁆𑀕𑁄 𑀲𑀜𑁆𑀚𑀸𑀬𑀢𑀻𑀢𑀺 𑀓𑀣𑀁 𑀫𑀕𑁆𑀕𑁄 𑀲𑀜𑁆𑀚𑀸𑀬𑀢𑀺…𑀧𑁂… 𑀏𑀯𑀁 𑀫𑀕𑁆𑀕𑁄 𑀲𑀜𑁆𑀚𑀸𑀬𑀢𑀺. 𑀏𑀯𑀁 𑀲𑀜𑁆𑀜𑁄𑀚𑀦𑀸𑀦𑀺 𑀧𑀳𑀻𑀬𑀦𑁆𑀢𑀺, 𑀅𑀦𑀼𑀲𑀬𑀸 𑀩𑁆𑀬𑀦𑁆𑀢𑀻𑀳𑁄𑀦𑁆𑀢𑀺.

𑀯𑁂𑀤𑀦𑀁…𑀧𑁂… 𑀲𑀜𑁆𑀜𑀁 … 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁… 𑀘𑀓𑁆𑀔𑀼𑀁…𑀧𑁂… 𑀚𑀭𑀸𑀫𑀭𑀡𑀁 𑀅𑀦𑀺𑀘𑁆𑀘𑀢𑁄 𑀅𑀦𑀼𑀧𑀲𑁆𑀲𑀦𑀝𑁆𑀞𑁂𑀦 𑀯𑀺𑀧𑀲𑁆𑀲𑀦𑀸, 𑀚𑀭𑀸𑀫𑀭𑀡𑀁 𑀤𑀼𑀓𑁆𑀔𑀢𑁄…𑀧𑁂… 𑀅𑀦𑀢𑁆𑀢𑀢𑁄 𑀅𑀦𑀼𑀧𑀲𑁆𑀲𑀦𑀝𑁆𑀞𑁂𑀦 𑀯𑀺𑀧𑀲𑁆𑀲𑀦𑀸. 𑀢𑀢𑁆𑀣 𑀚𑀸𑀢𑀸𑀦𑀁 𑀥𑀫𑁆𑀫𑀸𑀦𑀜𑁆𑀘 𑀯𑁄𑀲𑀕𑁆𑀕𑀸𑀭𑀫𑁆𑀫𑀡𑀢𑀸 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢𑀸 𑀅𑀯𑀺𑀓𑁆𑀔𑁂𑀧𑁄 𑀲𑀫𑀸𑀥𑀺. 𑀇𑀢𑀺 𑀧𑀞𑀫𑀁 𑀯𑀺𑀧𑀲𑁆𑀲𑀦𑀸, 𑀧𑀘𑁆𑀙𑀸 𑀲𑀫𑀣𑁄. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀯𑀺𑀧𑀲𑁆𑀲𑀦𑀸𑀧𑀼𑀩𑁆𑀩𑀗𑁆𑀕𑀫𑀁 𑀲𑀫𑀣𑀁 𑀪𑀸𑀯𑁂𑀢𑀻’’𑀢𑀺. 𑀪𑀸𑀯𑁂𑀢𑀻𑀢𑀺 𑀘𑀢𑀲𑁆𑀲𑁄 𑀪𑀸𑀯𑀦𑀸 𑁋 𑀆𑀲𑁂𑀯𑀦𑀝𑁆𑀞𑁂𑀦 𑀪𑀸𑀯𑀦𑀸…𑀧𑁂… 𑀫𑀕𑁆𑀕𑁄 𑀲𑀜𑁆𑀚𑀸𑀬𑀢𑀻𑀢𑀺 𑀓𑀣𑀁 𑀫𑀕𑁆𑀕𑁄 𑀲𑀜𑁆𑀚𑀸𑀬𑀢𑀺…𑀧𑁂… 𑀏𑀯𑀁 𑀫𑀕𑁆𑀕𑁄 𑀲𑀜𑁆𑀚𑀸𑀬𑀢𑀺. 𑀏𑀯𑀁 𑀲𑀜𑁆𑀜𑁄𑀚𑀦𑀸𑀦𑀺 𑀧𑀳𑀻𑀬𑀦𑁆𑀢𑀺, 𑀅𑀦𑀼𑀲𑀬𑀸 𑀩𑁆𑀬𑀦𑁆𑀢𑀻𑀳𑁄𑀦𑁆𑀢𑀺. 𑀏𑀯𑀁 𑀯𑀺𑀧𑀲𑁆𑀲𑀦𑀸𑀧𑀼𑀩𑁆𑀩𑀗𑁆𑀕𑀫𑀁 𑀲𑀫𑀣𑀁 𑀪𑀸𑀯𑁂𑀢𑀺.

𑁫. 𑀓𑀣𑀁 𑀲𑀫𑀣𑀯𑀺𑀧𑀲𑁆𑀲𑀦𑀁 𑀬𑀼𑀕𑀦𑀤𑁆𑀥𑀁 𑀪𑀸𑀯𑁂𑀢𑀺? 𑀲𑁄𑀴𑀲𑀳𑀺 𑀆𑀓𑀸𑀭𑁂𑀳𑀺 𑀲𑀫𑀣𑀯𑀺𑀧𑀲𑁆𑀲𑀦𑀁 𑀬𑀼𑀕𑀦𑀤𑁆𑀥𑀁 𑀪𑀸𑀯𑁂𑀢𑀺. 𑀆𑀭𑀫𑁆𑀫𑀡𑀝𑁆𑀞𑁂𑀦 𑀕𑁄𑀘𑀭𑀝𑁆𑀞𑁂𑀦 𑀧𑀳𑀸𑀦𑀝𑁆𑀞𑁂𑀦 𑀧𑀭𑀺𑀘𑁆𑀘𑀸𑀕𑀝𑁆𑀞𑁂𑀦 𑀯𑀼𑀝𑁆𑀞𑀸𑀦𑀝𑁆𑀞𑁂𑀦 𑀯𑀺𑀯𑀝𑁆𑀝𑀦𑀝𑁆𑀞𑁂𑀦 𑀲𑀦𑁆𑀢𑀝𑁆𑀞𑁂𑀦 𑀧𑀡𑀻𑀢𑀝𑁆𑀞𑁂𑀦 𑀯𑀺𑀫𑀼𑀢𑁆𑀢𑀝𑁆𑀞𑁂𑀦 𑀅𑀦𑀸𑀲𑀯𑀝𑁆𑀞𑁂𑀦 𑀢𑀭𑀡𑀝𑁆𑀞𑁂𑀦 𑀅𑀦𑀺𑀫𑀺𑀢𑁆𑀢𑀝𑁆𑀞𑁂𑀦 𑀅𑀧𑁆𑀧𑀡𑀺𑀳𑀺𑀢𑀝𑁆𑀞𑁂𑀦 𑀲𑀼𑀜𑁆𑀜𑀢𑀝𑁆𑀞𑁂𑀦 𑀏𑀓𑀭𑀲𑀝𑁆𑀞𑁂𑀦 𑀅𑀦𑀢𑀺𑀯𑀢𑁆𑀢𑀦𑀝𑁆𑀞𑁂𑀦 𑀬𑀼𑀕𑀦𑀤𑁆𑀥𑀝𑁆𑀞𑁂𑀦.

𑀓𑀣𑀁 𑀆𑀭𑀫𑁆𑀫𑀡𑀝𑁆𑀞𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑀁 𑀬𑀼𑀕𑀦𑀤𑁆𑀥𑀁 𑀪𑀸𑀯𑁂𑀢𑀺? 𑀉𑀤𑁆𑀥𑀘𑁆𑀘𑀁 𑀧𑀚𑀳𑀢𑁄 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢𑀸 𑀅𑀯𑀺𑀓𑁆𑀔𑁂𑀧𑁄 𑀲𑀫𑀸𑀥𑀺 𑀦𑀺𑀭𑁄𑀥𑀸𑀭𑀫𑁆𑀫𑀡𑁄, 𑀅𑀯𑀺𑀚𑁆𑀚𑀁 𑀧𑀚𑀳𑀢𑁄 𑀅𑀦𑀼𑀧𑀲𑁆𑀲𑀦𑀝𑁆𑀞𑁂𑀦 𑀯𑀺𑀧𑀲𑁆𑀲𑀦𑀸 𑀦𑀺𑀭𑁄𑀥𑀸𑀭𑀫𑁆𑀫𑀡𑀸. 𑀇𑀢𑀺 𑀆𑀭𑀫𑁆𑀫𑀡𑀝𑁆𑀞𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑀸 𑀏𑀓𑀭𑀲𑀸 𑀳𑁄𑀦𑁆𑀢𑀺, 𑀬𑀼𑀕𑀦𑀤𑁆𑀥𑀸 𑀳𑁄𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀁 𑀦𑀸𑀢𑀺𑀯𑀢𑁆𑀢𑀦𑁆𑀢𑀻𑀢𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀆𑀭𑀫𑁆𑀫𑀡𑀝𑁆𑀞𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑀁 𑀬𑀼𑀕𑀦𑀤𑁆𑀥𑀁 𑀪𑀸𑀯𑁂𑀢𑀻’’𑀢𑀺. 𑀪𑀸𑀯𑁂𑀢𑀻𑀢𑀺 𑀘𑀢𑀲𑁆𑀲𑁄 𑀪𑀸𑀯𑀦𑀸 𑁋 𑀆𑀲𑁂𑀯𑀦𑀝𑁆𑀞𑁂𑀦 𑀪𑀸𑀯𑀦𑀸…𑀧𑁂… 𑀫𑀕𑁆𑀕𑁄 𑀲𑀜𑁆𑀚𑀸𑀬𑀢𑀻𑀢𑀺 𑀓𑀣𑀁 𑀫𑀕𑁆𑀕𑁄 𑀲𑀜𑁆𑀚𑀸𑀬𑀢𑀺…𑀧𑁂… 𑀏𑀯𑀁 𑀫𑀕𑁆𑀕𑁄 𑀲𑀜𑁆𑀚𑀸𑀬𑀢𑀺. 𑀏𑀯𑀁 𑀲𑀜𑁆𑀜𑁄𑀚𑀦𑀸𑀦𑀺 𑀧𑀳𑀻𑀬𑀦𑁆𑀢𑀺, 𑀅𑀦𑀼𑀲𑀬𑀸 𑀩𑁆𑀬𑀦𑁆𑀢𑀻𑀳𑁄𑀦𑁆𑀢𑀺. 𑀏𑀯𑀁 𑀆𑀭𑀫𑁆𑀫𑀡𑀝𑁆𑀞𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑀁 𑀬𑀼𑀕𑀦𑀤𑁆𑀥𑀁 𑀪𑀸𑀯𑁂𑀢𑀺.

𑀓𑀣𑀁 𑀕𑁄𑀘𑀭𑀝𑁆𑀞𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑀁 𑀬𑀼𑀕𑀦𑀤𑁆𑀥𑀁 𑀪𑀸𑀯𑁂𑀢𑀺? 𑀉𑀤𑁆𑀥𑀘𑁆𑀘𑀁 𑀧𑀚𑀳𑀢𑁄 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢𑀸 𑀅𑀯𑀺𑀓𑁆𑀔𑁂𑀧𑁄 𑀲𑀫𑀸𑀥𑀺 𑀦𑀺𑀭𑁄𑀥𑀕𑁄𑀘𑀭𑁄, 𑀅𑀯𑀺𑀚𑁆𑀚𑀁 𑀧𑀚𑀳𑀢𑁄 𑀅𑀦𑀼𑀧𑀲𑁆𑀲𑀦𑀝𑁆𑀞𑁂𑀦 𑀯𑀺𑀧𑀲𑁆𑀲𑀦𑀸 𑀦𑀺𑀭𑁄𑀥𑀕𑁄𑀘𑀭𑀸. 𑀇𑀢𑀺 𑀕𑁄𑀘𑀭𑀝𑁆𑀞𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑀸 𑀏𑀓𑀭𑀲𑀸 𑀳𑁄𑀦𑁆𑀢𑀺, 𑀬𑀼𑀕𑀦𑀤𑁆𑀥𑀸 𑀳𑁄𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀁 𑀦𑀸𑀢𑀺𑀯𑀢𑁆𑀢𑀦𑁆𑀢𑀻𑀢𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀕𑁄𑀘𑀭𑀝𑁆𑀞𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑀁 𑀬𑀼𑀕𑀦𑀤𑁆𑀥𑀁 𑀪𑀸𑀯𑁂𑀢𑀻’’𑀢𑀺.

𑀓𑀣𑀁 𑀧𑀳𑀸𑀦𑀝𑁆𑀞𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑀁 𑀬𑀼𑀕𑀦𑀤𑁆𑀥𑀁 𑀪𑀸𑀯𑁂𑀢𑀺? 𑀉𑀤𑁆𑀥𑀘𑁆𑀘𑀲𑀳𑀕𑀢𑀓𑀺𑀮𑁂𑀲𑁂 𑀘 𑀔𑀦𑁆𑀥𑁂 𑀘 𑀧𑀚𑀳𑀢𑁄 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢𑀸 𑀅𑀯𑀺𑀓𑁆𑀔𑁂𑀧𑁄 𑀲𑀫𑀸𑀥𑀺 𑀦𑀺𑀭𑁄𑀥𑀕𑁄𑀘𑀭𑁄, 𑀅𑀯𑀺𑀚𑁆𑀚𑀸𑀲𑀳𑀕𑀢𑀓𑀺𑀮𑁂𑀲𑁂 𑀘 𑀔𑀦𑁆𑀥𑁂 𑀘 𑀧𑀚𑀳𑀢𑁄 𑀅𑀦𑀼𑀧𑀲𑁆𑀲𑀦𑀝𑁆𑀞𑁂𑀦 𑀯𑀺𑀧𑀲𑁆𑀲𑀦𑀸 𑀦𑀺𑀭𑁄𑀥𑀕𑁄𑀘𑀭𑀸. 𑀇𑀢𑀺 𑀧𑀳𑀸𑀦𑀝𑁆𑀞𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑀸 𑀏𑀓𑀭𑀲𑀸 𑀳𑁄𑀦𑁆𑀢𑀺, 𑀬𑀼𑀕𑀦𑀤𑁆𑀥𑀸 𑀳𑁄𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀁 𑀦𑀸𑀢𑀺𑀯𑀢𑁆𑀢𑀦𑁆𑀢𑀻𑀢𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀧𑀳𑀸𑀦𑀝𑁆𑀞𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑀁 𑀬𑀼𑀕𑀦𑀤𑁆𑀥𑀁 𑀪𑀸𑀯𑁂𑀢𑀻’’𑀢𑀺.

𑀓𑀣𑀁 𑀧𑀭𑀺𑀘𑁆𑀘𑀸𑀕𑀝𑁆𑀞𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑀁 𑀬𑀼𑀕𑀦𑀤𑁆𑀥𑀁 𑀪𑀸𑀯𑁂𑀢𑀺? 𑀉𑀤𑁆𑀥𑀘𑁆𑀘𑀲𑀳𑀕𑀢𑀓𑀺𑀮𑁂𑀲𑁂 𑀘 𑀔𑀦𑁆𑀥𑁂 𑀘 𑀧𑀭𑀺𑀘𑁆𑀘𑀚𑀢𑁄 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢𑀸 𑀅𑀯𑀺𑀓𑁆𑀔𑁂𑀧𑁄 𑀲𑀫𑀸𑀥𑀺 𑀦𑀺𑀭𑁄𑀥𑀕𑁄𑀘𑀭𑁄, 𑀅𑀯𑀺𑀚𑁆𑀚𑀸𑀲𑀳𑀕𑀢𑀓𑀺𑀮𑁂𑀲𑁂 𑀘 𑀔𑀦𑁆𑀥𑁂 𑀘 𑀧𑀭𑀺𑀘𑁆𑀘𑀚𑀢𑁄 𑀅𑀦𑀼𑀧𑀲𑁆𑀲𑀦𑀝𑁆𑀞𑁂𑀦 𑀯𑀺𑀧𑀲𑁆𑀲𑀦𑀸 𑀦𑀺𑀭𑁄𑀥𑀕𑁄𑀘𑀭𑀸. 𑀇𑀢𑀺 𑀧𑀭𑀺𑀘𑁆𑀘𑀸𑀕𑀝𑁆𑀞𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑀸 𑀏𑀓𑀭𑀲𑀸 𑀳𑁄𑀦𑁆𑀢𑀺, 𑀬𑀼𑀕𑀦𑀤𑁆𑀥𑀸 𑀳𑁄𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀁 𑀦𑀸𑀢𑀺𑀯𑀢𑁆𑀢𑀦𑁆𑀢𑀻𑀢𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀧𑀭𑀺𑀘𑁆𑀘𑀸𑀕𑀝𑁆𑀞𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑀁 𑀬𑀼𑀕𑀦𑀤𑁆𑀥𑀁 𑀪𑀸𑀯𑁂𑀢𑀻’’𑀢𑀺.

𑀓𑀣𑀁 𑀯𑀼𑀝𑁆𑀞𑀸𑀦𑀝𑁆𑀞𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑀁 𑀬𑀼𑀕𑀦𑀤𑁆𑀥𑀁 𑀪𑀸𑀯𑁂𑀢𑀺? 𑀉𑀤𑁆𑀥𑀘𑁆𑀘𑀲𑀳𑀕𑀢𑀓𑀺𑀮𑁂𑀲𑁂𑀳𑀺 𑀘 𑀔𑀦𑁆𑀥𑁂𑀳𑀺 𑀘 𑀯𑀼𑀝𑁆𑀞𑀳𑀢𑁄 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢𑀸 𑀅𑀯𑀺𑀓𑁆𑀔𑁂𑀧𑁄 𑀲𑀫𑀸𑀥𑀺 𑀦𑀺𑀭𑁄𑀥𑀕𑁄𑀘𑀭𑁄, 𑀅𑀯𑀺𑀚𑁆𑀚𑀸𑀲𑀳𑀕𑀢𑀓𑀺𑀮𑁂𑀲𑁂𑀳𑀺 𑀘 𑀔𑀦𑁆𑀥𑁂𑀳𑀺 𑀘 𑀯𑀼𑀝𑁆𑀞𑀳𑀢𑁄 𑀅𑀦𑀼𑀧𑀲𑁆𑀲𑀦𑀝𑁆𑀞𑁂𑀦 𑀯𑀺𑀧𑀲𑁆𑀲𑀦𑀸 𑀦𑀺𑀭𑁄𑀥𑀕𑁄𑀘𑀭𑀸. 𑀇𑀢𑀺 𑀯𑀼𑀝𑁆𑀞𑀸𑀦𑀝𑁆𑀞𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑀸 𑀏𑀓𑀭𑀲𑀸 𑀳𑁄𑀦𑁆𑀢𑀺, 𑀬𑀼𑀕𑀦𑀤𑁆𑀥𑀸 𑀳𑁄𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀁 𑀦𑀸𑀢𑀺𑀯𑀢𑁆𑀢𑀦𑁆𑀢𑀻𑀢𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀯𑀼𑀝𑁆𑀞𑀸𑀦𑀝𑁆𑀞𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑀁 𑀬𑀼𑀕𑀦𑀤𑁆𑀥𑀁 𑀪𑀸𑀯𑁂𑀢𑀻’’𑀢𑀺.

𑀓𑀣𑀁 𑀯𑀺𑀯𑀝𑁆𑀝𑀦𑀝𑁆𑀞𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑀁 𑀬𑀼𑀕𑀦𑀤𑁆𑀥𑀁 𑀪𑀸𑀯𑁂𑀢𑀺? 𑀉𑀤𑁆𑀥𑀘𑁆𑀘𑀲𑀳𑀕𑀢𑀓𑀺𑀮𑁂𑀲𑁂𑀳𑀺 𑀘 𑀔𑀦𑁆𑀥𑁂𑀳𑀺 𑀘 𑀯𑀺𑀯𑀝𑁆𑀝𑀢𑁄 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢𑀸 𑀅𑀯𑀺𑀓𑁆𑀔𑁂𑀧𑁄 𑀲𑀫𑀸𑀥𑀺 𑀦𑀺𑀭𑁄𑀥𑀕𑁄𑀘𑀭𑁄, 𑀅𑀯𑀺𑀚𑁆𑀚𑀸𑀲𑀳𑀕𑀢𑀓𑀺𑀮𑁂𑀲𑁂𑀳𑀺 𑀘 𑀔𑀦𑁆𑀥𑁂𑀳𑀺 𑀘 𑀯𑀺𑀯𑀝𑁆𑀝𑀢𑁄 𑀅𑀦𑀼𑀧𑀲𑁆𑀲𑀦𑀝𑁆𑀞𑁂𑀦 𑀯𑀺𑀧𑀲𑁆𑀲𑀦𑀸 𑀦𑀺𑀭𑁄𑀥𑀕𑁄𑀘𑀭𑀸. 𑀇𑀢𑀺 𑀯𑀺𑀯𑀝𑁆𑀝𑀦𑀝𑁆𑀞𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑀸 𑀏𑀓𑀭𑀲𑀸 𑀳𑁄𑀦𑁆𑀢𑀺, 𑀬𑀼𑀕𑀦𑀤𑁆𑀥𑀸 𑀳𑁄𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀁 𑀦𑀸𑀢𑀺𑀯𑀢𑁆𑀢𑀦𑁆𑀢𑀻𑀢𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀯𑀺𑀯𑀝𑁆𑀝𑀦𑀝𑁆𑀞𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑀁 𑀬𑀼𑀕𑀦𑀤𑁆𑀥𑀁 𑀪𑀸𑀯𑁂𑀢𑀻’’𑀢𑀺.

𑀓𑀣𑀁 𑀲𑀦𑁆𑀢𑀝𑁆𑀞𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑀁 𑀬𑀼𑀕𑀦𑀤𑁆𑀥𑀁 𑀪𑀸𑀯𑁂𑀢𑀺? 𑀉𑀤𑁆𑀥𑀘𑁆𑀘𑀁 𑀧𑀚𑀳𑀢𑁄 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢𑀸 𑀅𑀯𑀺𑀓𑁆𑀔𑁂𑀧𑁄 𑀲𑀫𑀸𑀥𑀺 𑀲𑀦𑁆𑀢𑁄 𑀳𑁄𑀦𑁆𑀢𑀺 𑀦𑀺𑀭𑁄𑀥𑀕𑁄𑀘𑀭𑁄, 𑀅𑀯𑀺𑀚𑁆𑀚𑀁 𑀧𑀚𑀳𑀢𑁄 𑀅𑀦𑀼𑀧𑀲𑁆𑀲𑀦𑀝𑁆𑀞𑁂𑀦 𑀯𑀺𑀧𑀲𑁆𑀲𑀦𑀸 𑀲𑀦𑁆𑀢𑀸 𑀳𑁄𑀢𑀺 𑀦𑀺𑀭𑁄𑀥𑀕𑁄𑀘𑀭𑀸. 𑀇𑀢𑀺 𑀲𑀦𑁆𑀢𑀝𑁆𑀞𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑀸 𑀏𑀓𑀭𑀲𑀸 𑀳𑁄𑀦𑁆𑀢𑀺, 𑀬𑀼𑀕𑀦𑀤𑁆𑀥𑀸 𑀳𑁄𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀁 𑀦𑀸𑀢𑀺𑀯𑀢𑁆𑀢𑀦𑁆𑀢𑀻𑀢𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀲𑀦𑁆𑀢𑀝𑁆𑀞𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑀁 𑀬𑀼𑀕𑀦𑀤𑁆𑀥𑀁 𑀪𑀸𑀯𑁂𑀢𑀻’’𑀢𑀺.

𑀓𑀣𑀁 𑀧𑀡𑀻𑀢𑀝𑁆𑀞𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑀁 𑀬𑀼𑀕𑀦𑀤𑁆𑀥𑀁 𑀪𑀸𑀯𑁂𑀢𑀺? 𑀉𑀤𑁆𑀥𑀘𑁆𑀘𑀁 𑀧𑀚𑀳𑀢𑁄 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢𑀸 𑀅𑀯𑀺𑀓𑁆𑀔𑁂𑀧𑁄 𑀲𑀫𑀸𑀥𑀺 𑀧𑀡𑀻𑀢𑁄 𑀳𑁄𑀢𑀺 𑀦𑀺𑀭𑁄𑀥𑀕𑁄𑀘𑀭𑁄, 𑀅𑀯𑀺𑀚𑁆𑀚𑀁 𑀧𑀚𑀳𑀢𑁄 𑀅𑀦𑀼𑀧𑀲𑁆𑀲𑀦𑀝𑁆𑀞𑁂𑀦 𑀯𑀺𑀧𑀲𑁆𑀲𑀦𑀸 𑀧𑀡𑀻𑀢𑀸 𑀳𑁄𑀢𑀺 𑀦𑀺𑀭𑁄𑀥𑀕𑁄𑀘𑀭𑀸. 𑀇𑀢𑀺 𑀧𑀡𑀻𑀢𑀝𑁆𑀞𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑀸 𑀏𑀓𑀭𑀲𑀸 𑀳𑁄𑀦𑁆𑀢𑀺, 𑀬𑀼𑀕𑀦𑀤𑁆𑀥𑀸 𑀳𑁄𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀁 𑀦𑀸𑀢𑀺𑀯𑀢𑁆𑀢𑀦𑁆𑀢𑀻𑀢𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀧𑀡𑀻𑀢𑀝𑁆𑀞𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑀁 𑀬𑀼𑀕𑀦𑀤𑁆𑀥𑀁 𑀪𑀸𑀯𑁂𑀢𑀻’’𑀢𑀺.

𑀓𑀣𑀁 𑀯𑀺𑀫𑀼𑀢𑁆𑀢𑀝𑁆𑀞𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑀁 𑀬𑀼𑀕𑀦𑀤𑁆𑀥𑀁 𑀪𑀸𑀯𑁂𑀢𑀺? 𑀉𑀤𑁆𑀥𑀘𑁆𑀘𑀁 𑀧𑀚𑀳𑀢𑁄 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢𑀸 𑀅𑀯𑀺𑀓𑁆𑀔𑁂𑀧𑁄 𑀲𑀫𑀸𑀥𑀺 𑀓𑀸𑀫𑀸𑀲𑀯𑀸 𑀯𑀺𑀫𑀼𑀢𑁆𑀢𑁄 𑀳𑁄𑀢𑀺 𑀦𑀺𑀭𑁄𑀥𑀕𑁄𑀘𑀭𑁄, 𑀅𑀯𑀺𑀚𑁆𑀚𑀁 𑀧𑀚𑀳𑀢𑁄 𑀅𑀦𑀼𑀧𑀲𑁆𑀲𑀦𑀝𑁆𑀞𑁂𑀦 𑀯𑀺𑀧𑀲𑁆𑀲𑀦𑀸 𑀅𑀯𑀺𑀚𑁆𑀚𑀸𑀲𑀯𑀸 𑀯𑀺𑀫𑀼𑀢𑁆𑀢𑀸 𑀳𑁄𑀢𑀺 𑀦𑀺𑀭𑁄𑀥𑀕𑁄𑀘𑀭𑀸. 𑀇𑀢𑀺 𑀭𑀸𑀕𑀯𑀺𑀭𑀸𑀕𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀅𑀯𑀺𑀚𑁆𑀚𑀸𑀯𑀺𑀭𑀸𑀕𑀸 𑀧𑀜𑁆𑀜𑀸 𑀯𑀺𑀫𑀼𑀢𑁆𑀢𑀝𑁆𑀞𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑀸 𑀏𑀓𑀭𑀲𑀸 𑀳𑁄𑀦𑁆𑀢𑀺, 𑀬𑀼𑀕𑀦𑀤𑁆𑀥𑀸 𑀳𑁄𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀁 𑀦𑀸𑀢𑀺𑀯𑀢𑁆𑀢𑀦𑁆𑀢𑀻𑀢𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀯𑀺𑀫𑀼𑀢𑁆𑀢𑀝𑁆𑀞𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑀁 𑀬𑀼𑀕𑀦𑀤𑁆𑀥𑀁 𑀪𑀸𑀯𑁂𑀢𑀻’’𑀢𑀺.

𑀓𑀣𑀁 𑀅𑀦𑀸𑀲𑀯𑀝𑁆𑀞𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑀁 𑀬𑀼𑀕𑀦𑀤𑁆𑀥𑀁 𑀪𑀸𑀯𑁂𑀢𑀺? 𑀉𑀤𑁆𑀥𑀘𑁆𑀘𑀁 𑀧𑀚𑀳𑀢𑁄 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢𑀸 𑀅𑀯𑀺𑀓𑁆𑀔𑁂𑀧𑁄 𑀲𑀫𑀸𑀥𑀺 𑀓𑀸𑀫𑀸𑀲𑀯𑁂𑀦 𑀅𑀦𑀸𑀲𑀯𑁄 𑀳𑁄𑀢𑀺 𑀦𑀺𑀭𑁄𑀥𑀕𑁄𑀘𑀭𑁄, 𑀅𑀯𑀺𑀚𑁆𑀚𑀁 𑀧𑀚𑀳𑀢𑁄 𑀅𑀦𑀼𑀧𑀲𑁆𑀲𑀦𑀝𑁆𑀞𑁂𑀦 𑀯𑀺𑀧𑀲𑁆𑀲𑀦𑀸 𑀅𑀯𑀺𑀚𑁆𑀚𑀸𑀲𑀯𑁂𑀦 𑀅𑀦𑀸𑀲𑀯𑀸 𑀳𑁄𑀢𑀺 𑀦𑀺𑀭𑁄𑀥𑀕𑁄𑀘𑀭𑀸. 𑀇𑀢𑀺 𑀅𑀦𑀸𑀲𑀯𑀝𑁆𑀞𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑀸 𑀏𑀓𑀭𑀲𑀸 𑀳𑁄𑀦𑁆𑀢𑀺, 𑀬𑀼𑀕𑀦𑀤𑁆𑀥𑀸 𑀳𑁄𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀁 𑀦𑀸𑀢𑀺𑀯𑀢𑁆𑀢𑀦𑁆𑀢𑀻𑀢𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀅𑀦𑀸𑀲𑀯𑀝𑁆𑀞𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑀁 𑀬𑀼𑀕𑀦𑀤𑁆𑀥𑀁 𑀪𑀸𑀯𑁂𑀢𑀻’’𑀢𑀺.

𑀓𑀣𑀁 𑀢𑀭𑀡𑀝𑁆𑀞𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑀁 𑀬𑀼𑀕𑀦𑀤𑁆𑀥𑀁 𑀪𑀸𑀯𑁂𑀢𑀺? 𑀉𑀤𑁆𑀥𑀘𑁆𑀘𑀲𑀳𑀕𑀢𑀓𑀺𑀮𑁂𑀲𑁂 𑀘 𑀔𑀦𑁆𑀥𑁂 𑀘 𑀢𑀭𑀢𑁄 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢𑀸 𑀅𑀯𑀺𑀓𑁆𑀔𑁂𑀧𑁄 𑀲𑀫𑀸𑀥𑀺 𑀦𑀺𑀭𑁄𑀥𑀕𑁄𑀘𑀭𑁄, 𑀅𑀯𑀺𑀚𑁆𑀚𑀸𑀲𑀳𑀕𑀢𑀓𑀺𑀮𑁂𑀲𑁂 𑀘 𑀔𑀦𑁆𑀥𑁂 𑀘 𑀢𑀭𑀢𑁄 𑀅𑀦𑀼𑀧𑀲𑁆𑀲𑀦𑀝𑁆𑀞𑁂𑀦 𑀯𑀺𑀧𑀲𑁆𑀲𑀦𑀸 𑀦𑀺𑀭𑁄𑀥𑀕𑁄𑀘𑀭𑀸. 𑀇𑀢𑀺 𑀢𑀭𑀡𑀝𑁆𑀞𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑀸 𑀏𑀓𑀭𑀲𑀸 𑀳𑁄𑀦𑁆𑀢𑀺, 𑀬𑀼𑀕𑀦𑀤𑁆𑀥𑀸 𑀳𑁄𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀁 𑀦𑀸𑀢𑀺𑀯𑀢𑁆𑀢𑀦𑁆𑀢𑀻𑀢𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀢𑀭𑀡𑀝𑁆𑀞𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑀁 𑀬𑀼𑀕𑀦𑀤𑁆𑀥𑀁 𑀪𑀸𑀯𑁂𑀢𑀻’’𑀢𑀺.

𑀓𑀣𑀁 𑀅𑀦𑀺𑀫𑀺𑀢𑁆𑀢𑀝𑁆𑀞𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑀁 𑀬𑀼𑀕𑀦𑀤𑁆𑀥𑀁 𑀪𑀸𑀯𑁂𑀢𑀺? 𑀉𑀤𑁆𑀥𑀘𑁆𑀘𑀁 𑀧𑀚𑀳𑀢𑁄 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢𑀸 𑀅𑀯𑀺𑀓𑁆𑀔𑁂𑀧𑁄 𑀲𑀫𑀸𑀥𑀺 𑀲𑀩𑁆𑀩𑀦𑀺𑀫𑀺𑀢𑁆𑀢𑁂𑀳𑀺 𑀅𑀦𑀺𑀫𑀺𑀢𑁆𑀢𑁄 𑀳𑁄𑀢𑀺 𑀦𑀺𑀭𑁄𑀥𑀕𑁄𑀘𑀭𑁄, 𑀅𑀯𑀺𑀚𑁆𑀚𑀁 𑀧𑀚𑀳𑀢𑁄 𑀅𑀦𑀼𑀧𑀲𑁆𑀲𑀦𑀝𑁆𑀞𑁂𑀦 𑀯𑀺𑀧𑀲𑁆𑀲𑀦𑀸 𑀲𑀩𑁆𑀩𑀦𑀺𑀫𑀺𑀢𑁆𑀢𑁂𑀳𑀺 𑀅𑀦𑀺𑀫𑀺𑀢𑁆𑀢𑀸 𑀳𑁄𑀢𑀺 𑀦𑀺𑀭𑁄𑀥𑀕𑁄𑀘𑀭𑀸. 𑀇𑀢𑀺 𑀅𑀦𑀺𑀫𑀺𑀢𑁆𑀢𑀝𑁆𑀞𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑀸 𑀏𑀓𑀭𑀲𑀸 𑀳𑁄𑀦𑁆𑀢𑀺, 𑀬𑀼𑀕𑀦𑀤𑁆𑀥𑀸 𑀳𑁄𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀁 𑀦𑀸𑀢𑀺𑀯𑀢𑁆𑀢𑀦𑁆𑀢𑀻𑀢𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀅𑀦𑀺𑀫𑀺𑀢𑁆𑀢𑀝𑁆𑀞𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑀁 𑀬𑀼𑀕𑀦𑀤𑁆𑀥𑀁 𑀪𑀸𑀯𑁂𑀢𑀻’’𑀢𑀺.

𑀓𑀣𑀁 𑀅𑀧𑁆𑀧𑀡𑀺𑀳𑀺𑀢𑀝𑁆𑀞𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑀁 𑀬𑀼𑀕𑀦𑀤𑁆𑀥𑀁 𑀪𑀸𑀯𑁂𑀢𑀺? 𑀉𑀤𑁆𑀥𑀘𑁆𑀘𑀁 𑀧𑀚𑀳𑀢𑁄 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢𑀸 𑀅𑀯𑀺𑀓𑁆𑀔𑁂𑀧𑁄 𑀲𑀫𑀸𑀥𑀺 𑀲𑀩𑁆𑀩𑀧𑀡𑀺𑀥𑀻𑀳𑀺 𑀅𑀧𑁆𑀧𑀡𑀺𑀳𑀺𑀢𑁄 𑀳𑁄𑀢𑀺 𑀦𑀺𑀭𑁄𑀥𑀕𑁄𑀘𑀭𑁄, 𑀅𑀯𑀺𑀚𑁆𑀚𑀁 𑀧𑀚𑀳𑀢𑁄 𑀅𑀦𑀼𑀧𑀲𑁆𑀲𑀦𑀝𑁆𑀞𑁂𑀦 𑀯𑀺𑀧𑀲𑁆𑀲𑀦𑀸 𑀲𑀩𑁆𑀩𑀧𑀡𑀺𑀥𑀻𑀳𑀺 𑀅𑀧𑁆𑀧𑀡𑀺𑀳𑀺𑀢𑀸 𑀳𑁄𑀢𑀺 𑀦𑀺𑀭𑁄𑀥𑀕𑁄𑀘𑀭𑀸. 𑀇𑀢𑀺 𑀅𑀧𑁆𑀧𑀡𑀺𑀳𑀺𑀢𑀝𑁆𑀞𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑀸 𑀏𑀓𑀭𑀲𑀸 𑀳𑁄𑀦𑁆𑀢𑀺, 𑀬𑀼𑀕𑀦𑀤𑁆𑀥𑀸 𑀳𑁄𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀁 𑀦𑀸𑀢𑀺𑀯𑀢𑁆𑀢𑀦𑁆𑀢𑀻𑀢𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀅𑀧𑁆𑀧𑀡𑀺𑀳𑀺𑀢𑀝𑁆𑀞𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑀁 𑀬𑀼𑀕𑀦𑀤𑁆𑀥𑀁 𑀪𑀸𑀯𑁂𑀢𑀻’’𑀢𑀺.

𑀓𑀣𑀁 𑀲𑀼𑀜𑁆𑀜𑀢𑀝𑁆𑀞𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑀁 𑀬𑀼𑀕𑀦𑀤𑁆𑀥𑀁 𑀪𑀸𑀯𑁂𑀢𑀺? 𑀉𑀤𑁆𑀥𑀘𑁆𑀘𑀁 𑀧𑀚𑀳𑀢𑁄 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢𑀸 𑀅𑀯𑀺𑀓𑁆𑀔𑁂𑀧𑁄 𑀲𑀫𑀸𑀥𑀺 𑀲𑀩𑁆𑀩𑀸𑀪𑀺𑀦𑀺𑀯𑁂𑀲𑁂𑀳𑀺 𑀲𑀼𑀜𑁆𑀜𑁄 𑀳𑁄𑀢𑀺 𑀦𑀺𑀭𑁄𑀥𑀕𑁄𑀘𑀭𑁄, 𑀅𑀯𑀺𑀚𑁆𑀚𑀁 𑀧𑀚𑀳𑀢𑁄 𑀅𑀦𑀼𑀧𑀲𑁆𑀲𑀦𑀝𑁆𑀞𑁂𑀦 𑀯𑀺𑀧𑀲𑁆𑀲𑀦𑀸 𑀲𑀩𑁆𑀩𑀸𑀪𑀺𑀦𑀺𑀯𑁂𑀲𑁂𑀳𑀺 𑀲𑀼𑀜𑁆𑀜𑀸 𑀳𑁄𑀢𑀺 𑀦𑀺𑀭𑁄𑀥𑀕𑁄𑀘𑀭𑀸. 𑀇𑀢𑀺 𑀲𑀼𑀜𑁆𑀜𑀢𑀝𑁆𑀞𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑀸 𑀏𑀓𑀭𑀲𑀸 𑀳𑁄𑀦𑁆𑀢𑀺, 𑀬𑀼𑀕𑀦𑀤𑁆𑀥𑀸 𑀳𑁄𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀁 𑀦𑀸𑀢𑀺𑀯𑀢𑁆𑀢𑀦𑁆𑀢𑀻𑀢𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀲𑀼𑀜𑁆𑀜𑀢𑀝𑁆𑀞𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑀁 𑀬𑀼𑀕𑀦𑀤𑁆𑀥𑀁 𑀪𑀸𑀯𑁂𑀢𑀻’’𑀢𑀺. 𑀪𑀸𑀯𑁂𑀢𑀻𑀢𑀺 𑀘𑀢𑀲𑁆𑀲𑁄 𑀪𑀸𑀯𑀦𑀸 𑁋 𑀆𑀲𑁂𑀯𑀦𑀝𑁆𑀞𑁂𑀦 𑀪𑀸𑀯𑀦𑀸…𑀧𑁂… 𑀫𑀕𑁆𑀕𑁄 𑀲𑀜𑁆𑀚𑀸𑀬𑀢𑀻𑀢𑀺 𑀓𑀣𑀁 𑀫𑀕𑁆𑀕𑁄 𑀲𑀜𑁆𑀚𑀸𑀬𑀢𑀺…𑀧𑁂… 𑀏𑀯𑀁 𑀫𑀕𑁆𑀕𑁄 𑀲𑀜𑁆𑀚𑀸𑀬𑀢𑀺. 𑀏𑀯𑀁 𑀲𑀜𑁆𑀜𑁄𑀚𑀦𑀸𑀦𑀺 𑀧𑀳𑀻𑀬𑀦𑁆𑀢𑀺, 𑀅𑀦𑀼𑀲𑀬𑀸 𑀩𑁆𑀬𑀦𑁆𑀢𑀻𑀳𑁄𑀦𑁆𑀢𑀺. 𑀏𑀯𑀁 𑀲𑀼𑀜𑁆𑀜𑀢𑀝𑁆𑀞𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑀁 𑀬𑀼𑀕𑀦𑀤𑁆𑀥𑀁 𑀪𑀸𑀯𑁂𑀢𑀺. 𑀇𑀫𑁂𑀳𑀺 𑀲𑁄𑀴𑀲𑀳𑀺 𑀆𑀓𑀸𑀭𑁂𑀳𑀺 𑀲𑀫𑀣𑀯𑀺𑀧𑀲𑁆𑀲𑀦𑀁 𑀬𑀼𑀕𑀦𑀤𑁆𑀥𑀁 𑀪𑀸𑀯𑁂𑀢𑀺, 𑀏𑀯𑀁 𑀲𑀫𑀣𑀯𑀺𑀧𑀲𑁆𑀲𑀦𑀁 𑀬𑀼𑀕𑀦𑀤𑁆𑀥𑀁 𑀪𑀸𑀯𑁂𑀢𑀺.

𑀲𑀼𑀢𑁆𑀢𑀦𑁆𑀢𑀦𑀺𑀤𑁆𑀤𑁂𑀲𑁄.

𑁨. 𑀥𑀫𑁆𑀫𑀼𑀤𑁆𑀥𑀘𑁆𑀘𑀯𑀸𑀭𑀦𑀺𑀤𑁆𑀤𑁂𑀲𑁄

𑁬. 𑀓𑀣𑀁 𑀥𑀫𑁆𑀫𑀼𑀤𑁆𑀥𑀘𑁆𑀘𑀯𑀺𑀕𑁆𑀕𑀳𑀺𑀢𑀁 𑀫𑀸𑀦𑀲𑀁 𑀳𑁄𑀢𑀺? 𑀅𑀦𑀺𑀘𑁆𑀘𑀢𑁄 𑀫𑀦𑀲𑀺𑀓𑀭𑁄𑀢𑁄 𑀑𑀪𑀸𑀲𑁄 𑀉𑀧𑁆𑀧𑀚𑁆𑀚𑀢𑀺, 𑀑𑀪𑀸𑀲𑁄 𑀥𑀫𑁆𑀫𑁄𑀢𑀺 𑀑𑀪𑀸𑀲𑀁 𑀆𑀯𑀚𑁆𑀚𑀢𑀺, 𑀢𑀢𑁄 𑀯𑀺𑀓𑁆𑀔𑁂𑀧𑁄 𑀉𑀤𑁆𑀥𑀘𑁆𑀘𑀁. 𑀢𑁂𑀦 𑀉𑀤𑁆𑀥𑀘𑁆𑀘𑁂𑀦 𑀯𑀺𑀕𑁆𑀕𑀳𑀺𑀢𑀫𑀸𑀦𑀲𑁄 𑀅𑀦𑀺𑀘𑁆𑀘𑀢𑁄 𑀉𑀧𑀝𑁆𑀞𑀸𑀦𑀁 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺, 𑀤𑀼𑀓𑁆𑀔𑀢𑁄 𑀉𑀧𑀝𑁆𑀞𑀸𑀦𑀁 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺, 𑀅𑀦𑀢𑁆𑀢𑀢𑁄 𑀉𑀧𑀝𑁆𑀞𑀸𑀦𑀁 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀥𑀫𑁆𑀫𑀼𑀤𑁆𑀥𑀘𑁆𑀘𑀯𑀺𑀕𑁆𑀕𑀳𑀺𑀢𑀫𑀸𑀦𑀲𑁄 𑀳𑁄𑀢𑀺 𑀲𑁄 𑀲𑀫𑀬𑁄, 𑀬𑀁 𑀢𑀁 𑀘𑀺𑀢𑁆𑀢𑀁 𑀅𑀚𑁆𑀛𑀢𑁆𑀢𑀫𑁂𑀯 𑀲𑀦𑁆𑀢𑀺𑀝𑁆𑀞𑀢𑀺 𑀲𑀦𑁆𑀦𑀺𑀲𑀻𑀤𑀢𑀺 𑀏𑀓𑁄𑀤𑀺 𑀳𑁄𑀢𑀺 𑀲𑀫𑀸𑀥𑀺𑀬𑀢𑀺. 𑀢𑀲𑁆𑀲 𑀫𑀕𑁆𑀕𑁄 𑀲𑀜𑁆𑀚𑀸𑀬𑀢𑀻’’𑀢𑀺 𑀓𑀣𑀁 𑀫𑀕𑁆𑀕𑁄 𑀲𑀜𑁆𑀚𑀸𑀬𑀢𑀺…𑀧𑁂… 𑀏𑀯𑀁 𑀫𑀕𑁆𑀕𑁄 𑀲𑀜𑁆𑀚𑀸𑀬𑀢𑀺, 𑀏𑀯𑀁 𑀲𑀜𑁆𑀜𑁄𑀚𑀦𑀸𑀦𑀺 𑀧𑀳𑀻𑀬𑀦𑁆𑀢𑀺, 𑀅𑀦𑀼𑀲𑀬𑀸 𑀩𑁆𑀬𑀦𑁆𑀢𑀻𑀳𑁄𑀦𑁆𑀢𑀺.

𑀅𑀦𑀺𑀘𑁆𑀘𑀢𑁄 𑀫𑀦𑀲𑀺𑀓𑀭𑁄𑀢𑁄 𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺, 𑀧𑀻𑀢𑀺 𑀉𑀧𑁆𑀧𑀚𑁆𑀚𑀢𑀺, 𑀧𑀲𑁆𑀲𑀤𑁆𑀥𑀺 𑀉𑀧𑁆𑀧𑀚𑁆𑀚𑀢𑀺, 𑀲𑀼𑀔𑀁 𑀉𑀧𑁆𑀧𑀚𑁆𑀚𑀢𑀺, 𑀅𑀥𑀺𑀫𑁄𑀓𑁆𑀔𑁄 𑀉𑀧𑁆𑀧𑀚𑁆𑀚𑀢𑀺, 𑀧𑀕𑁆𑀕𑀳𑁄 𑀉𑀧𑁆𑀧𑀚𑁆𑀚𑀢𑀺, 𑀉𑀧𑀝𑁆𑀞𑀸𑀦𑀁 𑀉𑀧𑁆𑀧𑀚𑁆𑀚𑀢𑀺, 𑀉𑀧𑁂𑀓𑁆𑀔𑀸 𑀉𑀧𑁆𑀧𑀚𑁆𑀚𑀢𑀺, 𑀦𑀺𑀓𑀦𑁆𑀢𑀺 𑀉𑀧𑁆𑀧𑀚𑁆𑀚𑀢𑀺, ‘𑀦𑀺𑀓𑀦𑁆𑀢𑀺 𑀥𑀫𑁆𑀫𑁄’𑀢𑀺 𑀦𑀺𑀓𑀦𑁆𑀢𑀺𑀁 𑀆𑀯𑀚𑁆𑀚𑀢𑀺. 𑀢𑀢𑁄 𑀯𑀺𑀓𑁆𑀔𑁂𑀧𑁄 𑀉𑀤𑁆𑀥𑀘𑁆𑀘𑀁. 𑀢𑁂𑀦 𑀉𑀤𑁆𑀥𑀘𑁆𑀘𑁂𑀦 𑀯𑀺𑀕𑁆𑀕𑀳𑀺𑀢𑀫𑀸𑀦𑀲𑁄 𑀅𑀦𑀺𑀘𑁆𑀘𑀢𑁄 𑀉𑀧𑀝𑁆𑀞𑀸𑀦𑀁 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺, 𑀤𑀼𑀓𑁆𑀔𑀢𑁄 𑀉𑀧𑀝𑁆𑀞𑀸𑀦𑀁 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺, 𑀅𑀦𑀢𑁆𑀢𑀢𑁄 𑀉𑀧𑀝𑁆𑀞𑀸𑀦𑀁 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀥𑀫𑁆𑀫𑀼𑀤𑁆𑀥𑀘𑁆𑀘𑀯𑀺𑀕𑁆𑀕𑀳𑀺𑀢𑀫𑀸𑀦𑀲𑁄 𑀳𑁄𑀢𑀺 𑀲𑁄 𑀲𑀫𑀬𑁄, 𑀬𑀁 𑀢𑀁 𑀘𑀺𑀢𑁆𑀢𑀁 𑀅𑀚𑁆𑀛𑀢𑁆𑀢𑀫𑁂𑀯 𑀲𑀦𑁆𑀢𑀺𑀝𑁆𑀞𑀢𑀺 𑀲𑀦𑁆𑀦𑀺𑀲𑀻𑀤𑀢𑀺 𑀏𑀓𑁄𑀤𑀺 𑀳𑁄𑀢𑀺 𑀲𑀫𑀸𑀥𑀺𑀬𑀢𑀺. 𑀢𑀲𑁆𑀲 𑀫𑀕𑁆𑀕𑁄 𑀲𑀜𑁆𑀚𑀸𑀬𑀢𑀻’’𑀢𑀺. 𑀓𑀣𑀁 𑀫𑀕𑁆𑀕𑁄 𑀲𑀜𑁆𑀚𑀸𑀬𑀢𑀺…𑀧𑁂… 𑀏𑀯𑀁 𑀫𑀕𑁆𑀕𑁄 𑀲𑀜𑁆𑀚𑀸𑀬𑀢𑀺, 𑀏𑀯𑀁 𑀲𑀜𑁆𑀜𑁄𑀚𑀦𑀸𑀦𑀺 𑀧𑀳𑀻𑀬𑀦𑁆𑀢𑀺, 𑀅𑀦𑀼𑀲𑀬𑀸 𑀩𑁆𑀬𑀦𑁆𑀢𑀻𑀳𑁄𑀦𑁆𑀢𑀺.

𑀤𑀼𑀓𑁆𑀔𑀢𑁄 𑀫𑀦𑀲𑀺𑀓𑀭𑁄𑀢𑁄…𑀧𑁂… 𑀅𑀦𑀢𑁆𑀢𑀢𑁄 𑀫𑀦𑀲𑀺𑀓𑀭𑁄𑀢𑁄 𑀑𑀪𑀸𑀲𑁄 𑀉𑀧𑁆𑀧𑀚𑁆𑀚𑀢𑀺…𑀧𑁂… 𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺, 𑀧𑀻𑀢𑀺 𑀉𑀧𑁆𑀧𑀚𑁆𑀚𑀢𑀺, 𑀧𑀲𑁆𑀲𑀤𑁆𑀥𑀺 𑀉𑀧𑁆𑀧𑀚𑁆𑀚𑀢𑀺, 𑀲𑀼𑀔𑀁 𑀉𑀧𑁆𑀧𑀚𑁆𑀚𑀢𑀺, 𑀅𑀥𑀺𑀫𑁄𑀓𑁆𑀔𑁄 𑀉𑀧𑁆𑀧𑀚𑁆𑀚𑀢𑀺, 𑀧𑀕𑁆𑀕𑀳𑁄 𑀉𑀧𑁆𑀧𑀚𑁆𑀚𑀢𑀺, 𑀉𑀧𑀝𑁆𑀞𑀸𑀦𑀁 𑀉𑀧𑁆𑀧𑀚𑁆𑀚𑀢𑀺, 𑀉𑀧𑁂𑀓𑁆𑀔𑀸 𑀉𑀧𑁆𑀧𑀚𑁆𑀚𑀢𑀺, 𑀦𑀺𑀓𑀦𑁆𑀢𑀺 𑀉𑀧𑁆𑀧𑀚𑁆𑀚𑀢𑀺, ‘𑀦𑀺𑀓𑀦𑁆𑀢𑀺 𑀥𑀫𑁆𑀫𑁄’𑀢𑀺 𑀦𑀺𑀓𑀦𑁆𑀢𑀺𑀁 𑀆𑀯𑀚𑁆𑀚𑀢𑀺. 𑀢𑀢𑁄 𑀯𑀺𑀓𑁆𑀔𑁂𑀧𑁄 𑀉𑀤𑁆𑀥𑀘𑁆𑀘𑀁. 𑀢𑁂𑀦 𑀉𑀤𑁆𑀥𑀘𑁆𑀘𑁂𑀦 𑀯𑀺𑀕𑁆𑀕𑀳𑀺𑀢𑀫𑀸𑀦𑀲𑁄 𑀅𑀦𑀢𑁆𑀢𑀢𑁄 𑀉𑀧𑀝𑁆𑀞𑀸𑀦𑀁, 𑀅𑀦𑀺𑀘𑁆𑀘𑀢𑁄 𑀉𑀧𑀝𑁆𑀞𑀸𑀦𑀁, 𑀤𑀼𑀓𑁆𑀔𑀢𑁄 𑀉𑀧𑀝𑁆𑀞𑀸𑀦𑀁 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀥𑀫𑁆𑀫𑀼𑀤𑁆𑀥𑀘𑁆𑀘𑀯𑀺𑀕𑁆𑀕𑀳𑀺𑀢𑀫𑀸𑀦𑀲𑁄…𑀧𑁂… 𑀏𑀯𑀁 𑀲𑀜𑁆𑀜𑁄𑀚𑀦𑀸𑀦𑀺 𑀧𑀳𑀻𑀬𑀦𑁆𑀢𑀺, 𑀅𑀦𑀼𑀲𑀬𑀸 𑀩𑁆𑀬𑀦𑁆𑀢𑀻𑀳𑁄𑀦𑁆𑀢𑀺’’.

𑀭𑀽𑀧𑀁 𑀅𑀦𑀺𑀘𑁆𑀘𑀢𑁄 𑀫𑀦𑀲𑀺𑀓𑀭𑁄𑀢𑁄…𑀧𑁂… 𑀭𑀽𑀧𑀁 𑀤𑀼𑀓𑁆𑀔𑀢𑁄 𑀫𑀦𑀲𑀺𑀓𑀭𑁄𑀢𑁄… 𑀭𑀽𑀧𑀁 𑀅𑀦𑀢𑁆𑀢𑀢𑁄 𑀫𑀦𑀲𑀺𑀓𑀭𑁄𑀢𑁄… 𑀯𑁂𑀤𑀦𑀁…𑀧𑁂… 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁… 𑀘𑀓𑁆𑀔𑀼𑀁…𑀧𑁂… 𑀚𑀭𑀸𑀫𑀭𑀡𑀁 𑀅𑀦𑀺𑀘𑁆𑀘𑀢𑁄 𑀫𑀦𑀲𑀺𑀓𑀭𑁄𑀢𑁄…𑀧𑁂… 𑀚𑀭𑀸𑀫𑀭𑀡𑀁 𑀤𑀼𑀓𑁆𑀔𑀢𑁄 𑀫𑀦𑀲𑀺𑀓𑀭𑁄𑀢𑁄, 𑀚𑀭𑀸𑀫𑀭𑀡𑀁 𑀅𑀦𑀢𑁆𑀢𑀢𑁄 𑀫𑀦𑀲𑀺𑀓𑀭𑁄𑀢𑁄 𑀑𑀪𑀸𑀲𑁄 𑀉𑀧𑁆𑀧𑀚𑁆𑀚𑀢𑀺…𑀧𑁂… 𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺, 𑀧𑀻𑀢𑀺 𑀉𑀧𑁆𑀧𑀚𑁆𑀚𑀢𑀺, 𑀧𑀲𑁆𑀲𑀤𑁆𑀥𑀺 𑀉𑀧𑁆𑀧𑀚𑁆𑀚𑀢𑀺, 𑀲𑀼𑀔𑀁 𑀉𑀧𑁆𑀧𑀚𑁆𑀚𑀢𑀺, 𑀅𑀥𑀺𑀫𑁄𑀓𑁆𑀔𑁄 𑀉𑀧𑁆𑀧𑀚𑁆𑀚𑀢𑀺, 𑀧𑀕𑁆𑀕𑀳𑁄 𑀉𑀧𑁆𑀧𑀚𑁆𑀚𑀢𑀺, 𑀉𑀧𑀝𑁆𑀞𑀸𑀦𑀁 𑀉𑀧𑁆𑀧𑀚𑁆𑀚𑀢𑀺, 𑀉𑀧𑁂𑀓𑁆𑀔𑀸 𑀉𑀧𑁆𑀧𑀚𑁆𑀚𑀢𑀺, 𑀦𑀺𑀓𑀦𑁆𑀢𑀺 𑀉𑀧𑁆𑀧𑀚𑁆𑀚𑀢𑀺, ‘𑀦𑀺𑀓𑀦𑁆𑀢𑀺 𑀥𑀫𑁆𑀫𑁄’𑀢𑀺 𑀦𑀺𑀓𑀦𑁆𑀢𑀺𑀁 𑀆𑀯𑀚𑁆𑀚𑀢𑀺. 𑀢𑀢𑁄 𑀯𑀺𑀓𑁆𑀔𑁂𑀧𑁄 𑀉𑀤𑁆𑀥𑀘𑁆𑀘𑀁. 𑀢𑁂𑀦 𑀉𑀤𑁆𑀥𑀘𑁆𑀘𑁂𑀦 𑀯𑀺𑀕𑁆𑀕𑀳𑀺𑀢𑀫𑀸𑀦𑀲𑁄. 𑀚𑀭𑀸𑀫𑀭𑀡𑀁 𑀅𑀦𑀢𑁆𑀢𑀢𑁄 𑀉𑀧𑀝𑁆𑀞𑀸𑀦𑀁 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺. 𑀚𑀭𑀸𑀫𑀭𑀡𑀁 𑀅𑀦𑀺𑀘𑁆𑀘𑀢𑁄 𑀉𑀧𑀝𑁆𑀞𑀸𑀦𑀁 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺, 𑀚𑀭𑀸𑀫𑀭𑀡𑀁 𑀤𑀼𑀓𑁆𑀔𑀢𑁄 𑀉𑀧𑀝𑁆𑀞𑀸𑀦𑀁 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀥𑀫𑁆𑀫𑀼𑀤𑁆𑀥𑀘𑁆𑀘𑀯𑀺𑀕𑁆𑀕𑀳𑀺𑀢𑀫𑀸𑀦𑀲𑁄 𑀳𑁄𑀢𑀺. 𑀲𑁄 𑀲𑀫𑀬𑁄, 𑀬𑀁 𑀢𑀁 𑀘𑀺𑀢𑁆𑀢𑀁 𑀅𑀚𑁆𑀛𑀢𑁆𑀢𑀫𑁂𑀯 𑀲𑀦𑁆𑀢𑀺𑀝𑁆𑀞𑀢𑀺 𑀲𑀦𑁆𑀦𑀺𑀲𑀻𑀤𑀢𑀺 𑀏𑀓𑁄𑀤𑀺 𑀳𑁄𑀢𑀺 𑀲𑀫𑀸𑀥𑀺𑀬𑀢𑀺. 𑀢𑀲𑁆𑀲 𑀫𑀕𑁆𑀕𑁄 𑀲𑀜𑁆𑀚𑀸𑀬𑀢𑀻’’𑀢𑀺. 𑀓𑀣𑀁 𑀫𑀕𑁆𑀕𑁄 𑀲𑀜𑁆𑀚𑀸𑀬𑀢𑀺…𑀧𑁂… 𑀏𑀯𑀁 𑀫𑀕𑁆𑀕𑁄 𑀲𑀜𑁆𑀚𑀸𑀬𑀢𑀺. 𑀏𑀯𑀁 𑀲𑀜𑁆𑀜𑁄𑀚𑀦𑀸𑀦𑀺 𑀧𑀳𑀻𑀬𑀦𑁆𑀢𑀺, 𑀅𑀦𑀼𑀲𑀬𑀸 𑀩𑁆𑀬𑀦𑁆𑀢𑀻𑀳𑁄𑀦𑁆𑀢𑀺. 𑀏𑀯𑀁 𑀥𑀫𑁆𑀫𑀼𑀤𑁆𑀥𑀘𑁆𑀘𑀯𑀺𑀕𑁆𑀕𑀳𑀺𑀢𑀁 𑀫𑀸𑀦𑀲𑀁 𑀳𑁄𑀢𑀺.

𑁭. 𑀑𑀪𑀸𑀲𑁂 𑀘𑁂𑀯 𑀜𑀸𑀡𑁂 𑀘, 𑀧𑀻𑀢𑀺𑀬𑀸 𑀘 𑀯𑀺𑀓𑀫𑁆𑀧𑀢𑀺;

𑀧𑀲𑁆𑀲𑀤𑁆𑀥𑀺𑀬𑀸 𑀲𑀼𑀔𑁂 𑀘𑁂𑀯, 𑀬𑁂𑀳𑀺 𑀘𑀺𑀢𑁆𑀢𑀁 𑀧𑀯𑁂𑀥𑀢𑀺.

𑀅𑀥𑀺𑀫𑁄𑀓𑁆𑀔𑁂 𑀘 𑀧𑀕𑁆𑀕𑀸𑀳𑁂, 𑀉𑀧𑀝𑁆𑀞𑀸𑀦𑁂 𑀘 𑀓𑀫𑁆𑀧𑀢𑀺;

𑀉𑀧𑁂𑀓𑁆𑀔𑀸𑀯𑀚𑁆𑀚𑀦𑀸𑀬 𑀘𑁂𑀯, 𑀉𑀧𑁂𑀓𑁆𑀔𑀸𑀬 𑀘 𑀦𑀺𑀓𑀦𑁆𑀢𑀺𑀬𑀸.

𑀇𑀫𑀸𑀦𑀺 𑀤𑀲 𑀞𑀸𑀦𑀸𑀦𑀺, 𑀧𑀜𑁆𑀜𑀸 𑀬𑀲𑁆𑀲 𑀧𑀭𑀺𑀘𑁆𑀘𑀺𑀢𑀸;

𑀥𑀫𑁆𑀫𑀼𑀤𑁆𑀥𑀘𑁆𑀘𑀓𑀼𑀲𑀮𑁄 𑀳𑁄𑀢𑀺, 𑀦 𑀘 𑀲𑀫𑁆𑀫𑁄𑀳 𑀕𑀘𑁆𑀙𑀢𑀺.

𑀯𑀺𑀓𑁆𑀔𑀺𑀧𑀢𑀺 𑀘𑁂𑀯 𑀓𑀺𑀮𑀺𑀲𑁆𑀲𑀢𑀺 𑀘, 𑀘𑀯𑀢𑀺 𑀘𑀺𑀢𑁆𑀢𑀪𑀸𑀯𑀦𑀸;

𑀯𑀺𑀓𑁆𑀔𑀺𑀧𑀢𑀺 𑀦 𑀓𑀺𑀮𑀺𑀲𑁆𑀲𑀢𑀺, 𑀪𑀸𑀯𑀦𑀸 𑀧𑀭𑀺𑀳𑀸𑀬𑀢𑀺.

𑀯𑀺𑀓𑁆𑀔𑀺𑀧𑀢𑀺 𑀦 𑀓𑀺𑀮𑀺𑀲𑁆𑀲𑀢𑀺, 𑀪𑀸𑀯𑀦𑀸 𑀦 𑀧𑀭𑀺𑀳𑀸𑀬𑀢𑀺;

𑀦 𑀘 𑀯𑀺𑀓𑁆𑀔𑀺𑀧𑀢𑁂 𑀘𑀺𑀢𑁆𑀢𑀁 𑀦 𑀓𑀺𑀮𑀺𑀲𑁆𑀲𑀢𑀺, 𑀦 𑀘𑀯𑀢𑀺 𑀘𑀺𑀢𑁆𑀢𑀪𑀸𑀯𑀦𑀸.

𑀇𑀫𑁂𑀳𑀺 𑀘𑀢𑀽𑀳𑀺 𑀞𑀸𑀦𑁂𑀳𑀺 𑀘𑀺𑀢𑁆𑀢𑀲𑁆𑀲 𑀲𑀗𑁆𑀔𑁂𑀧𑀯𑀺𑀓𑁆𑀔𑁂𑀧𑀯𑀺𑀕𑁆𑀕𑀳𑀺𑀢𑀁 [𑀲𑀗𑁆𑀔𑁂𑀧𑀁 𑀯𑀺𑀓𑁆𑀔𑁂𑀧𑀁 𑀯𑀺𑀕𑁆𑀕𑀳𑀺𑀢𑀁 (𑀲𑁆𑀬𑀸.)] 𑀤𑀲 𑀞𑀸𑀦𑁂 𑀲𑀫𑁆𑀧𑀚𑀸𑀦𑀸𑀢𑀻𑀢𑀺.

𑀬𑀼𑀕𑀦𑀤𑁆𑀥𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨. 𑀲𑀘𑁆𑀘𑀓𑀣𑀸

𑁮. 𑀧𑀼𑀭𑀺𑀫𑀦𑀺𑀤𑀸𑀦𑀁. ‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂 [𑀲𑀁. 𑀦𑀺. 𑁫.𑁧𑁦𑁯𑁦], 𑀢𑀣𑀸𑀦𑀺 𑀅𑀯𑀺𑀢𑀣𑀸𑀦𑀺 𑀅𑀦𑀜𑁆𑀜𑀣𑀸𑀦𑀺. 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺? ‘𑀇𑀤𑀁 𑀤𑀼𑀓𑁆𑀔’𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀢𑀣𑀫𑁂𑀢𑀁 𑀅𑀯𑀺𑀢𑀣𑀫𑁂𑀢𑀁 𑀅𑀦𑀜𑁆𑀜𑀣𑀫𑁂𑀢𑀁; ‘𑀅𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄’𑀢𑀺 𑀢𑀣𑀫𑁂𑀢𑀁 𑀅𑀯𑀺𑀢𑀣𑀫𑁂𑀢𑀁 𑀅𑀦𑀜𑁆𑀜𑀣𑀫𑁂𑀢𑀁, ‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑁄’𑀢𑀺 𑀢𑀣𑀫𑁂𑀢𑀁 𑀅𑀯𑀺𑀢𑀣𑀫𑁂𑀢𑀁 𑀅𑀦𑀜𑁆𑀜𑀣𑀫𑁂𑀢𑀁, ‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’𑀢𑀺 𑀢𑀣𑀫𑁂𑀢𑀁 𑀅𑀯𑀺𑀢𑀣𑀫𑁂𑀢𑀁 𑀅𑀦𑀜𑁆𑀜𑀣𑀫𑁂𑀢𑀁. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑀺 𑀢𑀣𑀸𑀦𑀺 𑀅𑀯𑀺𑀢𑀣𑀸𑀦𑀺 𑀅𑀦𑀜𑁆𑀜𑀣𑀸𑀦𑀺’’.

𑁧. 𑀧𑀞𑀫𑀲𑀼𑀢𑁆𑀢𑀦𑁆𑀢𑀦𑀺𑀤𑁆𑀤𑁂𑀲𑁄

𑀓𑀣𑀁 𑀤𑀼𑀓𑁆𑀔𑀁 𑀢𑀣𑀝𑁆𑀞𑁂𑀦 𑀲𑀘𑁆𑀘𑀁? 𑀘𑀢𑁆𑀢𑀸𑀭𑁄 𑀤𑀼𑀓𑁆𑀔𑀲𑁆𑀲 𑀤𑀼𑀓𑁆𑀔𑀝𑁆𑀞𑀸 𑀢𑀣𑀸 𑀅𑀯𑀺𑀢𑀣𑀸 𑀅𑀦𑀜𑁆𑀜𑀣𑀸. 𑀤𑀼𑀓𑁆𑀔𑀲𑁆𑀲 𑀧𑀻𑀴𑀦𑀝𑁆𑀞𑁄, 𑀲𑀗𑁆𑀔𑀢𑀝𑁆𑀞𑁄, 𑀲𑀦𑁆𑀢𑀸𑀧𑀝𑁆𑀞𑁄, 𑀯𑀺𑀧𑀭𑀺𑀡𑀸𑀫𑀝𑁆𑀞𑁄 𑁋 𑀇𑀫𑁂 𑀘𑀢𑁆𑀢𑀸𑀭𑁄 𑀤𑀼𑀓𑁆𑀔𑀲𑁆𑀲 𑀤𑀼𑀓𑁆𑀔𑀝𑁆𑀞𑀸 𑀢𑀣𑀸 𑀅𑀯𑀺𑀢𑀣𑀸 𑀅𑀦𑀜𑁆𑀜𑀣𑀸. 𑀏𑀯𑀁 𑀤𑀼𑀓𑁆𑀔𑀁 𑀢𑀣𑀝𑁆𑀞𑁂𑀦 𑀲𑀘𑁆𑀘𑀁.

𑀓𑀣𑀁 𑀲𑀫𑀼𑀤𑀬𑁄 𑀢𑀣𑀝𑁆𑀞𑁂𑀦 𑀲𑀘𑁆𑀘𑀁? 𑀘𑀢𑁆𑀢𑀸𑀭𑁄 𑀲𑀫𑀼𑀤𑀬𑀲𑁆𑀲 𑀲𑀫𑀼𑀤𑀬𑀝𑁆𑀞𑀸 𑀢𑀣𑀸 𑀅𑀯𑀺𑀢𑀣𑀸 𑀅𑀦𑀜𑁆𑀜𑀣𑀸. 𑀲𑀫𑀼𑀤𑀬𑀲𑁆𑀲 𑀆𑀬𑀽𑀳𑀦𑀝𑁆𑀞𑁄, 𑀦𑀺𑀤𑀸𑀦𑀝𑁆𑀞𑁄, 𑀲𑀁𑀬𑁄𑀕𑀝𑁆𑀞𑁄 𑀧𑀮𑀺𑀩𑁄𑀥𑀝𑁆𑀞𑁄 𑁋 𑀇𑀫𑁂 𑀘𑀢𑁆𑀢𑀸𑀭𑁄 𑀲𑀫𑀼𑀤𑀬𑀲𑁆𑀲 𑀲𑀫𑀼𑀤𑀬𑀝𑁆𑀞𑀸 𑀢𑀣𑀸 𑀅𑀯𑀺𑀢𑀣𑀸 𑀅𑀦𑀜𑁆𑀜𑀣𑀸. 𑀏𑀯𑀁 𑀲𑀫𑀼𑀤𑀬𑁄 𑀢𑀣𑀝𑁆𑀞𑁂𑀦 𑀲𑀘𑁆𑀘𑀁.

𑀓𑀣𑀁 𑀦𑀺𑀭𑁄𑀥𑁄 𑀢𑀣𑀝𑁆𑀞𑁂𑀦 𑀲𑀘𑁆𑀘𑀁? 𑀘𑀢𑁆𑀢𑀸𑀭𑁄 𑀦𑀺𑀭𑁄𑀥𑀲𑁆𑀲 𑀦𑀺𑀭𑁄𑀥𑀝𑁆𑀞𑀸 𑀢𑀣𑀸 𑀅𑀯𑀺𑀢𑀣𑀸 𑀅𑀦𑀜𑁆𑀜𑀣𑀸. 𑀦𑀺𑀭𑁄𑀥𑀲𑁆𑀲 𑀦𑀺𑀲𑁆𑀲𑀭𑀡𑀝𑁆𑀞𑁄, 𑀯𑀺𑀯𑁂𑀓𑀝𑁆𑀞𑁄, 𑀅𑀲𑀗𑁆𑀔𑀢𑀝𑁆𑀞𑁄, 𑀅𑀫𑀢𑀝𑁆𑀞𑁄 𑁋 𑀇𑀫𑁂 𑀘𑀢𑁆𑀢𑀸𑀭𑁄 𑀦𑀺𑀭𑁄𑀥𑀲𑁆𑀲 𑀦𑀺𑀭𑁄𑀥𑀝𑁆𑀞𑀸 𑀢𑀣𑀸 𑀅𑀯𑀺𑀢𑀣𑀸 𑀅𑀦𑀜𑁆𑀜𑀣𑀸. 𑀏𑀯𑀁 𑀦𑀺𑀭𑁄𑀥𑁄 𑀢𑀣𑀝𑁆𑀞𑁂𑀦 𑀲𑀘𑁆𑀘𑀁.

𑀓𑀣𑀁 𑀫𑀕𑁆𑀕𑁄 𑀢𑀣𑀝𑁆𑀞𑁂𑀦 𑀲𑀘𑁆𑀘𑀁? 𑀘𑀢𑁆𑀢𑀸𑀭𑁄 𑀫𑀕𑁆𑀕𑀲𑁆𑀲 𑀫𑀕𑁆𑀕𑀝𑁆𑀞𑀸 𑀢𑀣𑀸 𑀅𑀯𑀺𑀢𑀣𑀸 𑀅𑀦𑀜𑁆𑀜𑀣𑀸. 𑀫𑀕𑁆𑀕𑀲𑁆𑀲 𑀦𑀺𑀬𑁆𑀬𑀸𑀦𑀝𑁆𑀞𑁄, 𑀳𑁂𑀢𑀼𑀝𑁆𑀞𑁄, 𑀤𑀲𑁆𑀲𑀦𑀝𑁆𑀞𑁄, 𑀆𑀥𑀺𑀧𑀢𑁂𑀬𑁆𑀬𑀝𑁆𑀞𑁄 𑁋 𑀇𑀫𑁂 𑀘𑀢𑁆𑀢𑀸𑀭𑁄 𑀫𑀕𑁆𑀕𑀲𑁆𑀲 𑀫𑀕𑁆𑀕𑀝𑁆𑀞𑀸 𑀢𑀣𑀸 𑀅𑀯𑀺𑀢𑀣𑀸 𑀅𑀦𑀜𑁆𑀜𑀣𑀸. 𑀏𑀯𑀁 𑀫𑀕𑁆𑀕𑁄 𑀢𑀣𑀝𑁆𑀞𑁂𑀦 𑀲𑀘𑁆𑀘𑀁.

𑁯. 𑀓𑀢𑀺𑀳𑀸𑀓𑀸𑀭𑁂𑀳𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀏𑀓𑀧𑁆𑀧𑀝𑀺𑀯𑁂𑀥𑀸𑀦𑀺? 𑀘𑀢𑀽𑀳𑀸𑀓𑀸𑀭𑁂𑀳𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀏𑀓𑀧𑁆𑀧𑀝𑀺𑀯𑁂𑀥𑀸𑀦𑀺. 𑀢𑀣𑀝𑁆𑀞𑁂𑀦, 𑀅𑀦𑀢𑁆𑀢𑀝𑁆𑀞𑁂𑀦, 𑀲𑀘𑁆𑀘𑀝𑁆𑀞𑁂𑀦, 𑀧𑀝𑀺𑀯𑁂𑀥𑀝𑁆𑀞𑁂𑀦 𑁋 𑀇𑀫𑁂𑀳𑀺 𑀘𑀢𑀽𑀳𑀸𑀓𑀸𑀭𑁂𑀳𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀏𑀓𑀲𑀗𑁆𑀕𑀳𑀺𑀢𑀸𑀦𑀺. 𑀬𑀁 𑀏𑀓𑀲𑀗𑁆𑀕𑀳𑀺𑀢𑀁 𑀢𑀁 𑀏𑀓𑀢𑁆𑀢𑀁. 𑀏𑀓𑀢𑁆𑀢𑀁 𑀏𑀓𑁂𑀦 𑀜𑀸𑀡𑁂𑀦 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑁋 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀏𑀓𑀧𑁆𑀧𑀝𑀺𑀯𑁂𑀥𑀸𑀦𑀺.

𑀓𑀣𑀁 𑀢𑀣𑀝𑁆𑀞𑁂𑀦 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀏𑀓𑀧𑁆𑀧𑀝𑀺𑀯𑁂𑀥𑀸𑀦𑀺? 𑀘𑀢𑀽𑀳𑀸𑀓𑀸𑀭𑁂𑀳𑀺 𑀢𑀣𑀝𑁆𑀞𑁂𑀦 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀏𑀓𑀧𑁆𑀧𑀝𑀺𑀯𑁂𑀥𑀸𑀦𑀺. 𑀤𑀼𑀓𑁆𑀔𑀲𑁆𑀲 𑀤𑀼𑀓𑁆𑀔𑀝𑁆𑀞𑁄 𑀢𑀣𑀝𑁆𑀞𑁄, 𑀲𑀫𑀼𑀤𑀬𑀲𑁆𑀲 𑀲𑀫𑀼𑀤𑀬𑀝𑁆𑀞𑁄 𑀢𑀣𑀝𑁆𑀞𑁄, 𑀦𑀺𑀭𑁄𑀥𑀲𑁆𑀲 𑀦𑀺𑀭𑁄𑀥𑀝𑁆𑀞𑁄 𑀢𑀣𑀝𑁆𑀞𑁄, 𑀫𑀕𑁆𑀕𑀲𑁆𑀲 𑀫𑀕𑁆𑀕𑀝𑁆𑀞𑁄 𑀢𑀣𑀝𑁆𑀞𑁄 𑁋 𑀇𑀫𑁂𑀳𑀺 𑀘𑀢𑀽𑀳𑀸𑀓𑀸𑀭𑁂𑀳𑀺 𑀢𑀣𑀝𑁆𑀞𑁂𑀦 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀏𑀓𑀲𑀗𑁆𑀕𑀳𑀺𑀢𑀸𑀦𑀺. 𑀬𑀁 𑀏𑀓𑀲𑀗𑁆𑀕𑀳𑀺𑀢𑀁 𑀢𑀁 𑀏𑀓𑀢𑁆𑀢𑀁. 𑀏𑀓𑀢𑁆𑀢𑀁 𑀏𑀓𑁂𑀦 𑀜𑀸𑀡𑁂𑀦 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑁋 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀏𑀓𑀧𑁆𑀧𑀝𑀺𑀯𑁂𑀥𑀸𑀦𑀺.

𑀓𑀣𑀁 𑀅𑀦𑀢𑁆𑀢𑀝𑁆𑀞𑁂𑀦 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀏𑀓𑀧𑁆𑀧𑀝𑀺𑀯𑁂𑀥𑀸𑀦𑀺? 𑀘𑀢𑀽𑀳𑀸𑀓𑀸𑀭𑁂𑀳𑀺 𑀅𑀦𑀢𑁆𑀢𑀝𑁆𑀞𑁂𑀦 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀏𑀓𑀧𑁆𑀧𑀝𑀺𑀯𑁂𑀥𑀸𑀦𑀺. 𑀤𑀼𑀓𑁆𑀔𑀲𑁆𑀲 𑀤𑀼𑀓𑁆𑀔𑀝𑁆𑀞𑁄 𑀅𑀦𑀢𑁆𑀢𑀝𑁆𑀞𑁄, 𑀲𑀫𑀼𑀤𑀬𑀲𑁆𑀲 𑀲𑀫𑀼𑀤𑀬𑀝𑁆𑀞𑁄 𑀅𑀦𑀢𑁆𑀢𑀝𑁆𑀞𑁄, 𑀦𑀺𑀭𑁄𑀥𑀲𑁆𑀲 𑀦𑀺𑀭𑁄𑀥𑀝𑁆𑀞𑁄 𑀅𑀦𑀢𑁆𑀢𑀝𑁆𑀞𑁄, 𑀫𑀕𑁆𑀕𑀲𑁆𑀲 𑀫𑀕𑁆𑀕𑀝𑁆𑀞𑁄 𑀅𑀦𑀢𑁆𑀢𑀝𑁆𑀞𑁄 𑁋 𑀇𑀫𑁂𑀳𑀺 𑀘𑀢𑀽𑀳𑀸𑀓𑀸𑀭𑁂𑀳𑀺 𑀅𑀦𑀢𑁆𑀢𑀝𑁆𑀞𑁂𑀦 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀏𑀓𑀲𑀗𑁆𑀕𑀳𑀺𑀢𑀸𑀦𑀺. 𑀬𑀁 𑀏𑀓𑀲𑀗𑁆𑀕𑀳𑀺𑀢𑀁 𑀢𑀁 𑀏𑀓𑀢𑁆𑀢𑀁. 𑀏𑀓𑀢𑁆𑀢𑀁 𑀏𑀓𑁂𑀦 𑀜𑀸𑀡𑁂𑀦 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑁋 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀏𑀓𑀧𑁆𑀧𑀝𑀺𑀯𑁂𑀥𑀸𑀦𑀺.

𑀓𑀣𑀁 𑀲𑀘𑁆𑀘𑀝𑁆𑀞𑁂𑀦 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀏𑀓𑀧𑁆𑀧𑀝𑀺𑀯𑁂𑀥𑀸𑀦𑀺? 𑀘𑀢𑀽𑀳𑀸𑀓𑀸𑀭𑁂𑀳𑀺 𑀲𑀘𑁆𑀘𑀝𑁆𑀞𑁂𑀦 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀏𑀓𑀧𑁆𑀧𑀝𑀺𑀯𑁂𑀥𑀸𑀦𑀺. 𑀤𑀼𑀓𑁆𑀔𑀲𑁆𑀲 𑀤𑀼𑀓𑁆𑀔𑀝𑁆𑀞𑁄 𑀲𑀘𑁆𑀘𑀝𑁆𑀞𑁄, 𑀲𑀫𑀼𑀤𑀬𑀲𑁆𑀲 𑀲𑀫𑀼𑀤𑀬𑀝𑁆𑀞𑁄 𑀲𑀘𑁆𑀘𑀝𑁆𑀞𑁄, 𑀦𑀺𑀭𑁄𑀥𑀲𑁆𑀲 𑀦𑀺𑀭𑁄𑀥𑀝𑁆𑀞𑁄 𑀲𑀘𑁆𑀘𑀝𑁆𑀞𑁄, 𑀫𑀕𑁆𑀕𑀲𑁆𑀲 𑀫𑀕𑁆𑀕𑀝𑁆𑀞𑁄 𑀲𑀘𑁆𑀘𑀝𑁆𑀞𑁄 𑁋 𑀇𑀫𑁂𑀳𑀺 𑀘𑀢𑀽𑀳𑀸𑀓𑀸𑀭𑁂𑀳𑀺 𑀲𑀘𑁆𑀘𑀝𑁆𑀞𑁂𑀦 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀏𑀓𑀲𑀗𑁆𑀕𑀳𑀺𑀢𑀸𑀦𑀺. 𑀬𑀁 𑀏𑀓𑀲𑀗𑁆𑀕𑀳𑀺𑀢𑀁 𑀢𑀁 𑀏𑀓𑀢𑁆𑀢𑀁. 𑀏𑀓𑀢𑁆𑀢𑀁 𑀏𑀓𑁂𑀦 𑀜𑀸𑀡𑁂𑀦 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑁋 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀏𑀓𑀧𑁆𑀧𑀝𑀺𑀯𑁂𑀥𑀸𑀦𑀺.

𑀓𑀣𑀁 𑀧𑀝𑀺𑀯𑁂𑀥𑀝𑁆𑀞𑁂𑀦 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀏𑀓𑀧𑁆𑀧𑀝𑀺𑀯𑁂𑀥𑀸𑀦𑀺? 𑀘𑀢𑀽𑀳𑀸𑀓𑀸𑀭𑁂𑀳𑀺 𑀧𑀝𑀺𑀯𑁂𑀥𑀝𑁆𑀞𑁂𑀦 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀏𑀓𑀧𑁆𑀧𑀝𑀺𑀯𑁂𑀥𑀸𑀦𑀺. 𑀤𑀼𑀓𑁆𑀔𑀲𑁆𑀲 𑀤𑀼𑀓𑁆𑀔𑀝𑁆𑀞𑁄 𑀧𑀝𑀺𑀯𑁂𑀥𑀝𑁆𑀞𑁄, 𑀲𑀫𑀼𑀤𑀬𑀲𑁆𑀲 𑀲𑀫𑀼𑀤𑀬𑀝𑁆𑀞𑁄 𑀧𑀝𑀺𑀯𑁂𑀥𑀝𑁆𑀞𑁄 𑀦𑀺𑀭𑁄𑀥𑀲𑁆𑀲 𑀦𑀺𑀭𑁄𑀥𑀝𑁆𑀞𑁄 𑀧𑀝𑀺𑀯𑁂𑀥𑀝𑁆𑀞𑁄, 𑀫𑀕𑁆𑀕𑀲𑁆𑀲 𑀫𑀕𑁆𑀕𑀝𑁆𑀞𑁄 𑀧𑀝𑀺𑀯𑁂𑀥𑀝𑁆𑀞𑁄 𑁋 𑀇𑀫𑁂𑀳𑀺 𑀘𑀢𑀽𑀳𑀸𑀓𑀸𑀭𑁂𑀳𑀺 𑀧𑀝𑀺𑀯𑁂𑀥𑀝𑁆𑀞𑁂𑀦 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀏𑀓𑀲𑀗𑁆𑀕𑀳𑀺𑀢𑀸𑀦𑀺 𑀬𑀁 𑀏𑀓𑀲𑀗𑁆𑀕𑀳𑀺𑀢𑀁 𑀢𑀁 𑀏𑀓𑀢𑁆𑀢𑀁. 𑀏𑀓𑀢𑁆𑀢𑀁 𑀏𑀓𑁂𑀦 𑀜𑀸𑀡𑁂𑀦 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑁋 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀏𑀓𑀧𑁆𑀧𑀝𑀺𑀯𑁂𑀥𑀸𑀦𑀺.

𑁧𑁦. 𑀓𑀢𑀺𑀳𑀸𑀓𑀸𑀭𑁂𑀳𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀏𑀓𑀧𑁆𑀧𑀝𑀺𑀯𑁂𑀥𑀸𑀦𑀺? 𑀬𑀁 𑀅𑀦𑀺𑀘𑁆𑀘𑀁 𑀢𑀁 𑀤𑀼𑀓𑁆𑀔𑀁, 𑀬𑀁 𑀤𑀼𑀓𑁆𑀔𑀁 𑀢𑀁 𑀅𑀦𑀺𑀘𑁆𑀘𑀁, 𑀬𑀁 𑀅𑀦𑀺𑀘𑁆𑀘𑀜𑁆𑀘 𑀤𑀼𑀓𑁆𑀔𑀜𑁆𑀘 𑀢𑀁 𑀅𑀦𑀢𑁆𑀢𑀸. 𑀬𑀁 𑀅𑀦𑀺𑀘𑁆𑀘𑀜𑁆𑀘 𑀤𑀼𑀓𑁆𑀔𑀜𑁆𑀘 𑀅𑀦𑀢𑁆𑀢𑀸 𑀘 𑀢𑀁 𑀢𑀣𑀁. 𑀬𑀁 𑀅𑀦𑀺𑀘𑁆𑀘𑀁 𑀘 𑀤𑀼𑀓𑁆𑀔𑀜𑁆𑀘 𑀅𑀦𑀢𑁆𑀢𑀸 𑀘 𑀢𑀣𑀜𑁆𑀘 𑀢𑀁 𑀲𑀘𑁆𑀘𑀁. 𑀬𑀁 𑀅𑀦𑀺𑀘𑁆𑀘𑀜𑁆𑀘 𑀤𑀼𑀓𑁆𑀔𑀜𑁆𑀘 𑀅𑀦𑀢𑁆𑀢𑀸 𑀘 𑀢𑀣𑀜𑁆𑀘 𑀲𑀘𑁆𑀘𑀜𑁆𑀘 𑀢𑀁 𑀏𑀓𑀲𑀗𑁆𑀕𑀳𑀺𑀢𑀁. 𑀬𑀁 𑀏𑀓𑀲𑀗𑁆𑀕𑀳𑀺𑀢𑀁 𑀢𑀁 𑀏𑀓𑀢𑁆𑀢𑀁. 𑀏𑀓𑀢𑁆𑀢𑀁 𑀏𑀓𑁂𑀦 𑀜𑀸𑀡𑁂𑀦 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑁋 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀏𑀓𑀧𑁆𑀧𑀝𑀺𑀯𑁂𑀥𑀸𑀦𑀺.

𑀓𑀢𑀺𑀳𑀸𑀓𑀸𑀭𑁂𑀳𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀏𑀓𑀧𑁆𑀧𑀝𑀺𑀯𑁂𑀥𑀸𑀦𑀺? 𑀦𑀯𑀳𑀸𑀓𑀸𑀭𑁂𑀳𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀏𑀓𑀧𑁆𑀧𑀝𑀺𑀯𑁂𑀥𑀸𑀦𑀺. 𑀢𑀣𑀝𑁆𑀞𑁂𑀦, 𑀅𑀦𑀢𑁆𑀢𑀝𑁆𑀞𑁂𑀦, 𑀲𑀘𑁆𑀘𑀝𑁆𑀞𑁂𑀦, 𑀧𑀝𑀺𑀯𑁂𑀥𑀝𑁆𑀞𑁂𑀦, 𑀅𑀪𑀺𑀜𑁆𑀜𑀝𑁆𑀞𑁂𑀦, 𑀧𑀭𑀺𑀜𑁆𑀜𑀝𑁆𑀞𑁂𑀦, 𑀧𑀳𑀸𑀦𑀝𑁆𑀞𑁂𑀦, 𑀪𑀸𑀯𑀦𑀝𑁆𑀞𑁂𑀦, 𑀲𑀘𑁆𑀙𑀺𑀓𑀺𑀭𑀺𑀬𑀝𑁆𑀞𑁂𑀦 𑁋 𑀇𑀫𑁂𑀳𑀺 𑀦𑀯𑀳𑀸𑀓𑀸𑀭𑁂𑀳𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀏𑀓𑀲𑀗𑁆𑀕𑀳𑀺𑀢𑀸𑀦𑀺. 𑀬𑀁 𑀏𑀓𑀲𑀗𑁆𑀕𑀳𑀺𑀢𑀁 𑀢𑀁 𑀏𑀓𑀢𑁆𑀢𑀁. 𑀏𑀓𑀢𑁆𑀢𑀁 𑀏𑀓𑁂𑀦 𑀜𑀸𑀡𑁂𑀦 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑁋 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀏𑀓𑀧𑁆𑀧𑀝𑀺𑀯𑁂𑀥𑀸𑀦𑀺.

𑀓𑀣𑀁 𑀢𑀣𑀝𑁆𑀞𑁂𑀦 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀏𑀓𑀧𑁆𑀧𑀝𑀺𑀯𑁂𑀥𑀸𑀦𑀺? 𑀦𑀯𑀳𑀸𑀓𑀸𑀭𑁂𑀳𑀺 𑀢𑀣𑀝𑁆𑀞𑁂𑀦 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀏𑀓𑀧𑁆𑀧𑀝𑀺𑀯𑁂𑀥𑀸𑀦𑀺. 𑀤𑀼𑀓𑁆𑀔𑀲𑁆𑀲 𑀤𑀼𑀓𑁆𑀔𑀝𑁆𑀞𑁄 𑀢𑀣𑀝𑁆𑀞𑁄, 𑀲𑀫𑀼𑀤𑀬𑀲𑁆𑀲 𑀲𑀫𑀼𑀤𑀬𑀝𑁆𑀞𑁄 𑀢𑀣𑀝𑁆𑀞𑁄, 𑀦𑀺𑀭𑁄𑀥𑀲𑁆𑀲 𑀦𑀺𑀭𑁄𑀥𑀝𑁆𑀞𑁄 𑀢𑀣𑀝𑁆𑀞𑁄, 𑀫𑀕𑁆𑀕𑀲𑁆𑀲 𑀫𑀕𑁆𑀕𑀝𑁆𑀞𑁄 𑀢𑀣𑀝𑁆𑀞𑁄, 𑀅𑀪𑀺𑀜𑁆𑀜𑀸𑀬 𑀅𑀪𑀺𑀜𑁆𑀜𑀝𑁆𑀞𑁄 𑀢𑀣𑀝𑁆𑀞𑁄, 𑀧𑀭𑀺𑀜𑁆𑀜𑀸𑀬 𑀧𑀭𑀺𑀜𑁆𑀜𑀝𑁆𑀞𑁄 𑀢𑀣𑀝𑁆𑀞𑁄, 𑀧𑀳𑀸𑀦𑀲𑁆𑀲 𑀧𑀳𑀸𑀦𑀝𑁆𑀞𑁄 𑀢𑀣𑀝𑁆𑀞𑁄, 𑀪𑀸𑀯𑀦𑀸𑀬 𑀪𑀸𑀯𑀦𑀝𑁆𑀞𑁄 𑀢𑀣𑀝𑁆𑀞𑁄, 𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀲𑀘𑁆𑀙𑀺𑀓𑀺𑀭𑀺𑀬𑀝𑁆𑀞𑁄 𑀢𑀣𑀝𑁆𑀞𑁄 𑁋 𑀇𑀫𑁂𑀳𑀺 𑀦𑀯𑀳𑀸𑀓𑀸𑀭𑁂𑀳𑀺 𑀢𑀣𑀝𑁆𑀞𑁂𑀦 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀏𑀓𑀲𑀗𑁆𑀕𑀳𑀺𑀢𑀸𑀦𑀺. 𑀬𑀁 𑀏𑀓𑀲𑀗𑁆𑀕𑀳𑀺𑀢𑀁 𑀢𑀁 𑀏𑀓𑀢𑁆𑀢𑀁. 𑀏𑀓𑀢𑁆𑀢𑀁 𑀏𑀓𑁂𑀦 𑀜𑀸𑀡𑁂𑀦 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑁋 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀏𑀓𑀧𑁆𑀧𑀝𑀺𑀯𑁂𑀥𑀸𑀦𑀺.

𑀓𑀣𑀁 𑀅𑀦𑀢𑁆𑀢𑀝𑁆𑀞𑁂𑀦… 𑀲𑀘𑁆𑀘𑀝𑁆𑀞𑁂𑀦… 𑀧𑀝𑀺𑀯𑁂𑀥𑀝𑁆𑀞𑁂𑀦 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀏𑀓𑀧𑁆𑀧𑀝𑀺𑀯𑁂𑀥𑀸𑀦𑀺? 𑀦𑀯𑀳𑀸𑀓𑀸𑀭𑁂𑀳𑀺 𑀧𑀝𑀺𑀯𑁂𑀥𑀝𑁆𑀞𑁂𑀦 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀏𑀓𑀧𑁆𑀧𑀝𑀺𑀯𑁂𑀥𑀸𑀦𑀺. 𑀤𑀼𑀓𑁆𑀔𑀲𑁆𑀲 𑀤𑀼𑀓𑁆𑀔𑀝𑁆𑀞𑁄 𑀧𑀝𑀺𑀯𑁂𑀥𑀝𑁆𑀞𑁄, 𑀲𑀫𑀼𑀤𑀬𑀲𑁆𑀲 𑀲𑀫𑀼𑀤𑀬𑀝𑁆𑀞𑁄 𑀧𑀝𑀺𑀯𑁂𑀥𑀝𑁆𑀞𑁄, 𑀦𑀺𑀭𑁄𑀥𑀲𑁆𑀲 𑀦𑀺𑀭𑁄𑀥𑀝𑁆𑀞𑁄 𑀧𑀝𑀺𑀯𑁂𑀥𑀝𑁆𑀞𑁄, 𑀫𑀕𑁆𑀕𑀲𑁆𑀲 𑀫𑀕𑁆𑀕𑀝𑁆𑀞𑁄 𑀧𑀝𑀺𑀯𑁂𑀥𑀝𑁆𑀞𑁄, 𑀅𑀪𑀺𑀜𑁆𑀜𑀸𑀬 𑀅𑀪𑀺𑀜𑁆𑀜𑀝𑁆𑀞𑁄 𑀧𑀝𑀺𑀯𑁂𑀥𑀝𑁆𑀞𑁄, 𑀧𑀭𑀺𑀜𑁆𑀜𑀸𑀬 𑀧𑀭𑀺𑀜𑁆𑀜𑀝𑁆𑀞𑁄 𑀧𑀝𑀺𑀯𑁂𑀥𑀝𑁆𑀞𑁄, 𑀧𑀳𑀸𑀦𑀲𑁆𑀲 𑀧𑀳𑀸𑀦𑀝𑁆𑀞𑁄 𑀧𑀝𑀺𑀯𑁂𑀥𑀝𑁆𑀞𑁄, 𑀪𑀸𑀯𑀦𑀸𑀬 𑀪𑀸𑀯𑀦𑀝𑁆𑀞𑁄 𑀧𑀝𑀺𑀯𑁂𑀥𑀝𑁆𑀞𑁄, 𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀲𑀘𑁆𑀙𑀺𑀓𑀺𑀭𑀺𑀬𑀝𑁆𑀞𑁄 𑀧𑀝𑀺𑀯𑁂𑀥𑀝𑁆𑀞𑁄 𑁋 𑀇𑀫𑁂𑀳𑀺 𑀦𑀯𑀳𑀸𑀓𑀸𑀭𑁂𑀳𑀺 𑀧𑀝𑀺𑀯𑁂𑀥𑀝𑁆𑀞𑁂𑀦 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀏𑀓𑀲𑀗𑁆𑀕𑀳𑀺𑀢𑀸𑀦𑀺. 𑀬𑀁 𑀏𑀓𑀲𑀗𑁆𑀕𑀳𑀺𑀢𑀁 𑀢𑀁 𑀏𑀓𑀢𑁆𑀢𑀁. 𑀏𑀓𑀢𑁆𑀢𑀁 𑀏𑀓𑁂𑀦 𑀜𑀸𑀡𑁂𑀦 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑁋 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀏𑀓𑀧𑁆𑀧𑀝𑀺𑀯𑁂𑀥𑀸𑀦𑀺.

𑁧𑁧. 𑀓𑀢𑀺𑀳𑀸𑀓𑀸𑀭𑁂𑀳𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀏𑀓𑀧𑁆𑀧𑀝𑀺𑀯𑁂𑀥𑀸𑀦𑀺? 𑀤𑁆𑀯𑀸𑀤𑀲𑀳𑀺 𑀆𑀓𑀸𑀭𑁂𑀳𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀏𑀓𑀧𑁆𑀧𑀝𑀺𑀯𑁂𑀥𑀸𑀦𑀺. 𑀢𑀣𑀝𑁆𑀞𑁂𑀦, 𑀅𑀦𑀢𑁆𑀢𑀝𑁆𑀞𑁂𑀦, 𑀲𑀘𑁆𑀘𑀝𑁆𑀞𑁂𑀦, 𑀧𑀝𑀺𑀯𑁂𑀥𑀝𑁆𑀞𑁂𑀦, 𑀅𑀪𑀺𑀚𑀸𑀦𑀦𑀝𑁆𑀞𑁂𑀦, 𑀧𑀭𑀺𑀚𑀸𑀦𑀦𑀝𑁆𑀞𑁂𑀦, 𑀥𑀫𑁆𑀫𑀝𑁆𑀞𑁂𑀦, 𑀢𑀣𑀝𑁆𑀞𑁂𑀦, 𑀜𑀸𑀢𑀝𑁆𑀞𑁂𑀦, 𑀲𑀘𑁆𑀙𑀺𑀓𑀺𑀭𑀺𑀬𑀝𑁆𑀞𑁂𑀦, 𑀨𑀲𑁆𑀲𑀦𑀝𑁆𑀞𑁂𑀦, 𑀅𑀪𑀺𑀲𑀫𑀬𑀝𑁆𑀞𑁂𑀦 𑁋 𑀇𑀫𑁂𑀳𑀺 𑀤𑁆𑀯𑀸𑀤𑀲𑀳𑀺 𑀆𑀓𑀸𑀭𑁂𑀳𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀏𑀓𑀲𑀗𑁆𑀕𑀳𑀺𑀢𑀸𑀦𑀺. 𑀬𑀁 𑀏𑀓𑀲𑀗𑁆𑀕𑀳𑀺𑀢𑀁 𑀢𑀁 𑀏𑀓𑀢𑁆𑀢𑀁. 𑀏𑀓𑀢𑁆𑀢𑀁 𑀏𑀓𑁂𑀦 𑀜𑀸𑀡𑁂𑀦 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑁋 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀏𑀓𑀧𑁆𑀧𑀝𑀺𑀯𑁂𑀥𑀸𑀦𑀺.

𑀓𑀣𑀁 𑀢𑀣𑀝𑁆𑀞𑁂𑀦 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀏𑀓𑀧𑁆𑀧𑀝𑀺𑀯𑁂𑀥𑀸𑀦𑀺? 𑀲𑁄𑀴𑀲𑀳𑀺 𑀆𑀓𑀸𑀭𑁂𑀳𑀺 𑀢𑀣𑀝𑁆𑀞𑁂𑀦 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀏𑀓𑀧𑁆𑀧𑀝𑀺𑀯𑁂𑀥𑀸𑀦𑀺. 𑀤𑀼𑀓𑁆𑀔𑀲𑁆𑀲 𑀧𑀻𑀴𑀦𑀝𑁆𑀞𑁄, 𑀲𑀗𑁆𑀔𑀢𑀝𑁆𑀞𑁄, 𑀲𑀦𑁆𑀢𑀸𑀧𑀝𑁆𑀞𑁄, 𑀯𑀺𑀧𑀭𑀺𑀡𑀸𑀫𑀝𑁆𑀞𑁄, 𑀢𑀣𑀝𑁆𑀞𑁄; 𑀲𑀫𑀼𑀤𑀬𑀲𑁆𑀲 𑀆𑀬𑀽𑀳𑀦𑀝𑁆𑀞𑁄, 𑀦𑀺𑀤𑀸𑀦𑀝𑁆𑀞𑁄, 𑀲𑀁𑀬𑁄𑀕𑀝𑁆𑀞𑁄, 𑀧𑀮𑀺𑀩𑁄𑀥𑀝𑁆𑀞𑁄 𑀢𑀣𑀝𑁆𑀞𑁄; 𑀦𑀺𑀭𑁄𑀥𑀲𑁆𑀲 𑀦𑀺𑀲𑁆𑀲𑀭𑀡𑀝𑁆𑀞𑁄, 𑀯𑀺𑀯𑁂𑀓𑀝𑁆𑀞𑁄, 𑀅𑀲𑀗𑁆𑀔𑀢𑀝𑁆𑀞𑁄, 𑀅𑀫𑀢𑀝𑁆𑀞𑁄 𑀢𑀣𑀝𑁆𑀞𑁄; 𑀫𑀕𑁆𑀕𑀲𑁆𑀲 𑀦𑀺𑀬𑁆𑀬𑀸𑀦𑀝𑁆𑀞𑁄, 𑀳𑁂𑀢𑀼𑀝𑁆𑀞𑁄, 𑀤𑀲𑁆𑀲𑀦𑀝𑁆𑀞𑁄, 𑀆𑀥𑀺𑀧𑀢𑁂𑀬𑁆𑀬𑀝𑁆𑀞𑁄 𑀢𑀣𑀝𑁆𑀞𑁄 𑁋 𑀇𑀫𑁂𑀳𑀺 𑀲𑁄𑀴𑀲𑀳𑀺 𑀆𑀓𑀸𑀭𑁂𑀳𑀺 𑀢𑀣𑀝𑁆𑀞𑁂𑀦 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀏𑀓𑀲𑀗𑁆𑀕𑀳𑀺𑀢𑀸𑀦𑀺. 𑀬𑀁 𑀏𑀓𑀲𑀗𑁆𑀕𑀳𑀺𑀢𑀁 𑀢𑀁 𑀏𑀓𑀢𑁆𑀢𑀁. 𑀏𑀓𑀢𑁆𑀢𑀁 𑀏𑀓𑁂𑀦 𑀜𑀸𑀡𑁂𑀦 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑁋 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀏𑀓𑀧𑁆𑀧𑀝𑀺𑀯𑁂𑀥𑀸𑀦𑀺.

𑀓𑀣𑀁 𑀅𑀦𑀢𑁆𑀢𑀝𑁆𑀞𑁂𑀦…𑀧𑁂… 𑀲𑀘𑁆𑀘𑀝𑁆𑀞𑁂𑀦… 𑀧𑀝𑀺𑀯𑁂𑀥𑀝𑁆𑀞𑁂𑀦… 𑀅𑀪𑀺𑀚𑀸𑀦𑀦𑀝𑁆𑀞𑁂𑀦… 𑀧𑀭𑀺𑀚𑀸𑀦𑀦𑀝𑁆𑀞𑁂𑀦… 𑀥𑀫𑁆𑀫𑀝𑁆𑀞𑁂𑀦… 𑀢𑀣𑀝𑁆𑀞𑁂𑀦… 𑀜𑀸𑀢𑀝𑁆𑀞𑁂𑀦… 𑀲𑀘𑁆𑀙𑀺𑀓𑀺𑀭𑀺𑀬𑀝𑁆𑀞𑁂𑀦… 𑀨𑀲𑁆𑀲𑀦𑀝𑁆𑀞𑁂𑀦… 𑀅𑀪𑀺𑀲𑀫𑀬𑀝𑁆𑀞𑁂𑀦 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀏𑀓𑀧𑁆𑀧𑀝𑀺𑀯𑁂𑀥𑀸𑀦𑀺? 𑀲𑁄𑀴𑀲𑀳𑀺 𑀆𑀓𑀸𑀭𑁂𑀳𑀺 𑀅𑀪𑀺𑀲𑀫𑀬𑀝𑁆𑀞𑁂𑀦 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀏𑀓𑀧𑁆𑀧𑀝𑀺𑀯𑁂𑀥𑀸𑀦𑀺. 𑀤𑀼𑀓𑁆𑀔𑀲𑁆𑀲 𑀧𑀻𑀴𑀦𑀝𑁆𑀞𑁄, 𑀲𑀗𑁆𑀔𑀢𑀝𑁆𑀞𑁄, 𑀲𑀦𑁆𑀢𑀸𑀧𑀝𑁆𑀞𑁄, 𑀯𑀺𑀧𑀭𑀺𑀡𑀸𑀫𑀝𑁆𑀞𑁄, 𑀅𑀪𑀺𑀲𑀫𑀬𑀝𑁆𑀞𑁄; 𑀲𑀫𑀼𑀤𑀬𑀲𑁆𑀲 𑀆𑀬𑀽𑀳𑀦𑀝𑁆𑀞𑁄, 𑀦𑀺𑀤𑀸𑀦𑀝𑁆𑀞𑁄, 𑀲𑀁𑀬𑁄𑀕𑀝𑁆𑀞𑁄, 𑀧𑀮𑀺𑀩𑁄𑀥𑀝𑁆𑀞𑁄, 𑀅𑀪𑀺𑀲𑀫𑀬𑀝𑁆𑀞𑁄; 𑀦𑀺𑀭𑁄𑀥𑀲𑁆𑀲 𑀦𑀺𑀲𑁆𑀲𑀭𑀡𑀝𑁆𑀞𑁄, 𑀯𑀺𑀯𑁂𑀓𑀝𑁆𑀞𑁄, 𑀅𑀲𑀗𑁆𑀔𑀢𑀝𑁆𑀞𑁄, 𑀅𑀫𑀢𑀝𑁆𑀞𑁄, 𑀅𑀪𑀺𑀲𑀫𑀬𑀝𑁆𑀞𑁄; 𑀫𑀕𑁆𑀕𑀲𑁆𑀲 𑀦𑀺𑀬𑁆𑀬𑀸𑀦𑀝𑁆𑀞𑁄, 𑀳𑁂𑀢𑀼𑀝𑁆𑀞𑁄, 𑀤𑀲𑁆𑀲𑀦𑀝𑁆𑀞𑁄, 𑀆𑀥𑀺𑀧𑀢𑁂𑀬𑁆𑀬𑀝𑁆𑀞𑁄, 𑀅𑀪𑀺𑀲𑀫𑀬𑀝𑁆𑀞𑁄 𑁋 𑀇𑀫𑁂𑀳𑀺 𑀲𑁄𑀴𑀲𑀳𑀺 𑀆𑀓𑀸𑀭𑁂𑀳𑀺 𑀅𑀪𑀺𑀲𑀫𑀬𑀝𑁆𑀞𑁂𑀦 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀏𑀓𑀲𑀗𑁆𑀕𑀳𑀺𑀢𑀸𑀦𑀺. 𑀬𑀁 𑀏𑀓𑀲𑀗𑁆𑀕𑀳𑀺𑀢𑀁 𑀢𑀁 𑀏𑀓𑀢𑁆𑀢𑀁. 𑀏𑀓𑀢𑁆𑀢𑀁 𑀏𑀓𑁂𑀦 𑀜𑀸𑀡𑁂𑀦 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑁋 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀏𑀓𑀧𑁆𑀧𑀝𑀺𑀯𑁂𑀥𑀸𑀦𑀺.

𑁧𑁨. 𑀲𑀘𑁆𑀘𑀸𑀦𑀁 𑀓𑀢𑀺 𑀮𑀓𑁆𑀔𑀡𑀸𑀦𑀺? 𑀲𑀘𑁆𑀘𑀸𑀦𑀁 𑀤𑁆𑀯𑁂 𑀮𑀓𑁆𑀔𑀡𑀸𑀦𑀺. 𑀲𑀗𑁆𑀔𑀢𑀮𑀓𑁆𑀔𑀡𑀜𑁆𑀘, 𑀅𑀲𑀗𑁆𑀔𑀢𑀮𑀓𑁆𑀔𑀡𑀜𑁆𑀘 𑁋 𑀲𑀘𑁆𑀘𑀸𑀦𑀁 𑀇𑀫𑀸𑀦𑀺 𑀤𑁆𑀯𑁂 𑀮𑀓𑁆𑀔𑀡𑀸𑀦𑀺.

𑀲𑀘𑁆𑀘𑀸𑀦𑀁 𑀓𑀢𑀺 𑀮𑀓𑁆𑀔𑀡𑀸𑀦𑀺? 𑀲𑀘𑁆𑀘𑀸𑀦𑀁 𑀙 𑀮𑀓𑁆𑀔𑀡𑀸𑀦𑀺. 𑀲𑀗𑁆𑀔𑀢𑀸𑀦𑀁 𑀲𑀘𑁆𑀘𑀸𑀦𑀁 𑀉𑀧𑁆𑀧𑀸𑀤𑁄 𑀧𑀜𑁆𑀜𑀸𑀬𑀢𑀺, 𑀯𑀬𑁄 𑀧𑀜𑁆𑀜𑀸𑀬𑀢𑀺, 𑀞𑀺𑀢𑀸𑀦𑀁 𑀅𑀜𑁆𑀜𑀣𑀢𑁆𑀢𑀁 𑀧𑀜𑁆𑀜𑀸𑀬𑀢𑀺 𑀅𑀲𑀗𑁆𑀔𑀢𑀲𑁆𑀲 𑀲𑀘𑁆𑀘𑀲𑁆𑀲 𑀦 𑀉𑀧𑁆𑀧𑀸𑀤𑁄 𑀧𑀜𑁆𑀜𑀸𑀬𑀢𑀺, 𑀦 𑀯𑀬𑁄 𑀧𑀜𑁆𑀜𑀸𑀬𑀢𑀺, 𑀦 𑀞𑀺𑀢𑀲𑁆𑀲 𑀅𑀜𑁆𑀜𑀣𑀢𑁆𑀢𑀁 𑀧𑀜𑁆𑀜𑀸𑀬𑀢𑀺 𑁋 𑀲𑀘𑁆𑀘𑀸𑀦𑀁 𑀇𑀫𑀸𑀦𑀺 𑀙 𑀮𑀓𑁆𑀔𑀡𑀸𑀦𑀺.

𑀲𑀘𑁆𑀘𑀸𑀦𑀁 𑀓𑀢𑀺 𑀮𑀓𑁆𑀔𑀡𑀸𑀦𑀺? 𑀲𑀘𑁆𑀘𑀸𑀦𑀁 𑀤𑁆𑀯𑀸𑀤𑀲 𑀮𑀓𑁆𑀔𑀡𑀸𑀦𑀺. 𑀤𑀼𑀓𑁆𑀔𑀲𑀘𑁆𑀘𑀲𑁆𑀲 𑀉𑀧𑁆𑀧𑀸𑀤𑁄 𑀧𑀜𑁆𑀜𑀸𑀬𑀢𑀺, 𑀯𑀬𑁄 𑀧𑀜𑁆𑀜𑀸𑀬𑀢𑀺, 𑀞𑀺𑀢𑀲𑁆𑀲 𑀅𑀜𑁆𑀜𑀣𑀢𑁆𑀢𑀁 𑀧𑀜𑁆𑀜𑀸𑀬𑀢𑀺; 𑀲𑀫𑀼𑀤𑀬𑀲𑀘𑁆𑀘𑀲𑁆𑀲 𑀉𑀧𑁆𑀧𑀸𑀤𑁄 𑀧𑀜𑁆𑀜𑀸𑀬𑀢𑀺, 𑀯𑀬𑁄 𑀧𑀜𑁆𑀜𑀸𑀬𑀢𑀺, 𑀞𑀺𑀢𑀲𑁆𑀲 𑀅𑀜𑁆𑀜𑀣𑀢𑁆𑀢𑀁 𑀧𑀜𑁆𑀜𑀸𑀬𑀢𑀺; 𑀫𑀕𑁆𑀕𑀲𑀘𑁆𑀘𑀲𑁆𑀲 𑀉𑀧𑁆𑀧𑀸𑀤𑁄 𑀧𑀜𑁆𑀜𑀸𑀬𑀢𑀺, 𑀯𑀬𑁄 𑀧𑀜𑁆𑀜𑀸𑀬𑀢𑀺, 𑀞𑀺𑀢𑀲𑁆𑀲 𑀅𑀜𑁆𑀜𑀣𑀢𑁆𑀢𑀁 𑀧𑀜𑁆𑀜𑀸𑀬𑀢𑀺; 𑀦𑀺𑀭𑁄𑀥𑀲𑀘𑁆𑀘𑀲𑁆𑀲 𑀦 𑀉𑀧𑁆𑀧𑀸𑀤𑁄 𑀧𑀜𑁆𑀜𑀸𑀬𑀢𑀺, 𑀦 𑀯𑀬𑁄 𑀧𑀜𑁆𑀜𑀸𑀬𑀢𑀺, 𑀦 𑀞𑀺𑀢𑀲𑁆𑀲 𑀅𑀜𑁆𑀜𑀣𑀢𑁆𑀢𑀁 𑀧𑀜𑁆𑀜𑀸𑀬𑀢𑀺 𑁋 𑀲𑀘𑁆𑀘𑀸𑀦𑀁 𑀇𑀫𑀸𑀦𑀺 𑀤𑁆𑀯𑀸𑀤𑀲 𑀮𑀓𑁆𑀔𑀡𑀸𑀦𑀺.

𑀘𑀢𑀼𑀦𑁆𑀦𑀁 𑀲𑀘𑁆𑀘𑀸𑀦𑀁 𑀓𑀢𑀺 𑀓𑀼𑀲𑀮𑀸, 𑀓𑀢𑀺 𑀅𑀓𑀼𑀲𑀮𑀸, 𑀓𑀢𑀺 𑀅𑀩𑁆𑀬𑀸𑀓𑀢𑀸? 𑀲𑀫𑀼𑀤𑀬𑀲𑀘𑁆𑀘𑀁 𑀅𑀓𑀼𑀲𑀮𑀁, 𑀫𑀕𑁆𑀕𑀲𑀘𑁆𑀘𑀁 𑀓𑀼𑀲𑀮𑀁, 𑀦𑀺𑀭𑁄𑀥𑀲𑀘𑁆𑀘𑀁 𑀅𑀩𑁆𑀬𑀸𑀓𑀢𑀁. 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀓𑀼𑀲𑀮𑀁, 𑀲𑀺𑀬𑀸 𑀅𑀓𑀼𑀲𑀮𑀁, 𑀲𑀺𑀬𑀸 𑀅𑀩𑁆𑀬𑀸𑀓𑀢𑀁.

𑀲𑀺𑀬𑀸 𑀢𑀻𑀡𑀺 𑀲𑀘𑁆𑀘𑀸𑀦𑀺 𑀏𑀓𑀲𑀘𑁆𑀘𑁂𑀦 𑀲𑀗𑁆𑀕𑀳𑀺𑀢𑀸𑀦𑀺, 𑀏𑀓𑀲𑀘𑁆𑀘𑀁 𑀢𑀻𑀳𑀺 𑀲𑀘𑁆𑀘𑁂𑀳𑀺 𑀲𑀗𑁆𑀕𑀳𑀺𑀢𑀁? 𑀯𑀢𑁆𑀣𑀼𑀯𑀲𑁂𑀦 𑀧𑀭𑀺𑀬𑀸𑀬𑁂𑀦 𑀲𑀺𑀬𑀸𑀢𑀺. 𑀓𑀣𑀜𑁆𑀘 𑀲𑀺𑀬𑀸? 𑀬𑀁 𑀤𑀼𑀓𑁆𑀔𑀲𑀘𑁆𑀘𑀁 𑀅𑀓𑀼𑀲𑀮𑀁, 𑀲𑀫𑀼𑀤𑀬𑀲𑀘𑁆𑀘𑀁 𑀅𑀓𑀼𑀲𑀮𑀁 𑁋 𑀏𑀯𑀁 𑀅𑀓𑀼𑀲𑀮𑀝𑁆𑀞𑁂𑀦 𑀤𑁆𑀯𑁂 𑀲𑀘𑁆𑀘𑀸𑀦𑀺 𑀏𑀓𑀲𑀘𑁆𑀘𑁂𑀦 𑀲𑀗𑁆𑀕𑀳𑀺𑀢𑀸𑀦𑀺, 𑀏𑀓𑀲𑀘𑁆𑀘𑀁 𑀤𑁆𑀯𑀻𑀳𑀺 𑀲𑀘𑁆𑀘𑁂𑀳𑀺 𑀲𑀗𑁆𑀕𑀳𑀺𑀢𑀁. 𑀬𑀁 𑀤𑀼𑀓𑁆𑀔𑀲𑀘𑁆𑀘𑀁 𑀓𑀼𑀲𑀮𑀁, 𑀫𑀕𑁆𑀕𑀲𑀘𑁆𑀘𑀁 𑀓𑀼𑀲𑀮𑀁 𑁋 𑀏𑀯𑀁 𑀓𑀼𑀲𑀮𑀝𑁆𑀞𑁂𑀦 𑀤𑁆𑀯𑁂 𑀲𑀘𑁆𑀘𑀸𑀦𑀺 𑀏𑀓𑀲𑀘𑁆𑀘𑁂𑀦 𑀲𑀗𑁆𑀕𑀳𑀺𑀢𑀸𑀦𑀺, 𑀏𑀓𑀲𑀘𑁆𑀘𑀁 𑀤𑁆𑀯𑀻𑀳𑀺 𑀲𑀘𑁆𑀘𑁂𑀳𑀺 𑀲𑀗𑁆𑀕𑀳𑀺𑀢𑀁. 𑀬𑀁 𑀤𑀼𑀓𑁆𑀔𑀲𑀘𑁆𑀘𑀁 𑀅𑀩𑁆𑀬𑀸𑀓𑀢𑀁, 𑀦𑀺𑀭𑁄𑀥𑀲𑀘𑁆𑀘𑀁 𑀅𑀩𑁆𑀬𑀸𑀓𑀢𑀁 𑁋 𑀏𑀯𑀁 𑀅𑀩𑁆𑀬𑀸𑀓𑀢𑀝𑁆𑀞𑁂𑀦 𑀤𑁆𑀯𑁂 𑀲𑀘𑁆𑀘𑀸𑀦𑀺 𑀏𑀓𑀲𑀘𑁆𑀘𑁂𑀦 𑀲𑀗𑁆𑀕𑀳𑀺𑀢𑀸𑀦𑀺, 𑀏𑀓𑀲𑀘𑁆𑀘𑀁 𑀤𑁆𑀯𑀻𑀳𑀺 𑀲𑀘𑁆𑀘𑁂𑀳𑀺 𑀲𑀗𑁆𑀕𑀳𑀺𑀢𑀁. 𑀏𑀯𑀁 𑀲𑀺𑀬𑀸 𑀢𑀻𑀡𑀺 𑀲𑀘𑁆𑀘𑀸𑀦𑀺 𑀏𑀓𑀲𑀘𑁆𑀘𑁂𑀦 𑀲𑀗𑁆𑀕𑀳𑀺𑀢𑀸𑀦𑀺, 𑀏𑀓𑀲𑀘𑁆𑀘𑀁 𑀢𑀻𑀳𑀺 𑀲𑀘𑁆𑀘𑁂𑀳𑀺 𑀲𑀗𑁆𑀕𑀳𑀺𑀢𑀁 𑀯𑀢𑁆𑀣𑀼𑀯𑀲𑁂𑀦 𑀧𑀭𑀺𑀬𑀸𑀬𑁂𑀦𑀸𑀢𑀺.

𑁨. 𑀤𑀼𑀢𑀺𑀬𑀲𑀼𑀢𑁆𑀢𑀦𑁆𑀢𑀧𑀸𑀴𑀺

𑁧𑁩. ‘‘𑀧𑀼𑀩𑁆𑀩𑁂 𑀫𑁂, 𑀪𑀺𑀓𑁆𑀔𑀯𑁂 [𑀲𑀁. 𑀦𑀺. 𑁩.𑁨𑁬], 𑀲𑀫𑁆𑀩𑁄𑀥𑀸 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲𑁂𑀯 𑀲𑀢𑁄 𑀏𑀢𑀤𑀳𑁄𑀲𑀺 𑁋 ‘𑀓𑁄 𑀦𑀼 𑀔𑁄 𑀭𑀽𑀧𑀲𑁆𑀲 𑀅𑀲𑁆𑀲𑀸𑀤𑁄, 𑀓𑁄 𑀆𑀤𑀻𑀦𑀯𑁄, 𑀓𑀺𑀁 𑀦𑀺𑀲𑁆𑀲𑀭𑀡𑀁; 𑀓𑁄 𑀯𑁂𑀤𑀦𑀸𑀬 𑀅𑀲𑁆𑀲𑀸𑀤𑁄, 𑀓𑁄 𑀆𑀤𑀻𑀦𑀯𑁄, 𑀓𑀺𑀁 𑀦𑀺𑀲𑁆𑀲𑀭𑀡𑀁; 𑀓𑁄 𑀲𑀜𑁆𑀜𑀸𑀬 𑀅𑀲𑁆𑀲𑀸𑀤𑁄, 𑀓𑁄 𑀆𑀤𑀻𑀦𑀯𑁄, 𑀓𑀺𑀁 𑀦𑀺𑀲𑁆𑀲𑀭𑀡𑀁; 𑀓𑁄 𑀲𑀗𑁆𑀔𑀸𑀭𑀸𑀦𑀁 𑀅𑀲𑁆𑀲𑀸𑀤𑁄, 𑀓𑁄 𑀆𑀤𑀻𑀦𑀯𑁄, 𑀓𑀺𑀁 𑀦𑀺𑀲𑁆𑀲𑀭𑀡𑀁; 𑀓𑁄 𑀯𑀺𑀜𑁆𑀜𑀸𑀡𑀲𑁆𑀲 𑀅𑀲𑁆𑀲𑀸𑀤𑁄, 𑀓𑁄 𑀆𑀤𑀻𑀦𑀯𑁄, 𑀓𑀺𑀁 𑀦𑀺𑀲𑁆𑀲𑀭𑀡’𑀦𑁆𑀢𑀺? 𑀢𑀲𑁆𑀲 𑀫𑀬𑁆𑀳𑀁, 𑀪𑀺𑀓𑁆𑀔𑀯𑁂, 𑀏𑀢𑀤𑀳𑁄𑀲𑀺 𑁋 ‘𑀬𑀁 𑀔𑁄 𑀭𑀽𑀧𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀲𑀼𑀔𑀁 𑀲𑁄𑀫𑀦𑀲𑁆𑀲𑀁 𑁋 𑀅𑀬𑀁 𑀭𑀽𑀧𑀲𑁆𑀲 𑀅𑀲𑁆𑀲𑀸𑀤𑁄. 𑀬𑀁 𑀭𑀽𑀧𑀁 𑀅𑀦𑀺𑀘𑁆𑀘𑀁, 𑀢𑀁 𑀤𑀼𑀓𑁆𑀔𑀁 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀁 𑁋 𑀅𑀬𑀁 𑀭𑀽𑀧𑀲𑁆𑀲 𑀆𑀤𑀻𑀦𑀯𑁄. 𑀬𑁄 𑀭𑀽𑀧𑀲𑁆𑀫𑀺𑀁 𑀙𑀦𑁆𑀤𑀭𑀸𑀕𑀯𑀺𑀦𑀬𑁄 𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑀁 𑁋 𑀇𑀤𑀁 𑀭𑀽𑀧𑀲𑁆𑀲 𑀦𑀺𑀲𑁆𑀲𑀭𑀡𑀁. 𑀬𑀁 𑀯𑁂𑀤𑀦𑀁 𑀧𑀝𑀺𑀘𑁆𑀘…𑀧𑁂… 𑀬𑀁 𑀲𑀜𑁆𑀜𑀁 𑀧𑀝𑀺𑀘𑁆𑀘… 𑀬𑀁 𑀲𑀗𑁆𑀔𑀸𑀭𑁂 𑀧𑀝𑀺𑀘𑁆𑀘… 𑀬𑀁 𑀯𑀺𑀜𑁆𑀜𑀸𑀡𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀲𑀼𑀔𑀁 𑀲𑁄𑀫𑀦𑀲𑁆𑀲𑀁 𑁋 𑀅𑀬𑀁 𑀯𑀺𑀜𑁆𑀜𑀸𑀡𑀲𑁆𑀲 𑀅𑀲𑁆𑀲𑀸𑀤𑁄. 𑀬𑀁 𑀯𑀺𑀜𑁆𑀜𑀸𑀡𑀁 𑀅𑀦𑀺𑀘𑁆𑀘𑀁 𑀢𑀁 𑀤𑀼𑀓𑁆𑀔𑀁 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀁 𑁋 𑀅𑀬𑀁 𑀯𑀺𑀜𑁆𑀜𑀸𑀡𑀲𑁆𑀲 𑀆𑀤𑀻𑀦𑀯𑁄. 𑀬𑁄 𑀯𑀺𑀜𑁆𑀜𑀸𑀡𑀲𑁆𑀫𑀺𑀁 𑀙𑀦𑁆𑀤𑀭𑀸𑀕𑀯𑀺𑀦𑀬𑁄 𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑀁 𑁋 𑀇𑀤𑀁 𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀲𑁆𑀲𑀭𑀡𑀁’’.

‘‘𑀬𑀸𑀯𑀓𑀻𑀯𑀜𑁆𑀘𑀸𑀳𑀁, 𑀪𑀺𑀓𑁆𑀔𑀯𑁂, 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀁 𑀏𑀯𑀁 𑀅𑀲𑁆𑀲𑀸𑀤𑀜𑁆𑀘 𑀅𑀲𑁆𑀲𑀸𑀤𑀢𑁄 𑀆𑀤𑀻𑀦𑀯𑀜𑁆𑀘 𑀆𑀤𑀻𑀦𑀯𑀢𑁄 𑀦𑀺𑀲𑁆𑀲𑀭𑀡𑀜𑁆𑀘 𑀦𑀺𑀲𑁆𑀲𑀭𑀡𑀢𑁄 𑀬𑀣𑀸𑀪𑀽𑀢𑀁 𑀦𑀸𑀩𑁆𑀪𑀜𑁆𑀜𑀸𑀲𑀺𑀁, 𑀦𑁂𑀯 𑀢𑀸𑀯𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀤𑁂𑀯𑀓𑁂 𑀮𑁄𑀓𑁂 𑀲𑀫𑀸𑀭𑀓𑁂 𑀲𑀩𑁆𑀭𑀳𑁆𑀫𑀓𑁂 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀚𑀸𑀬 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 ‘𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄’𑀢𑀺 𑀧𑀘𑁆𑀘𑀜𑁆𑀜𑀸𑀲𑀺𑀁 [𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀧𑀘𑁆𑀘𑀜𑁆𑀜𑀸𑀲𑀺𑀁 (𑀲𑁆𑀬𑀸.) 𑀲𑀁. 𑀦𑀺. 𑁩.𑁨𑁬 𑀧𑀲𑁆𑀲𑀺𑀢𑀩𑁆𑀩𑀸] 𑀬𑀢𑁄 𑀘 𑀔𑁆𑀯𑀸𑀳𑀁, 𑀪𑀺𑀓𑁆𑀔𑀯𑁂, 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀁 𑀏𑀯𑀁 𑀅𑀲𑁆𑀲𑀸𑀤𑀜𑁆𑀘 𑀅𑀲𑁆𑀲𑀸𑀤𑀢𑁄 𑀆𑀤𑀻𑀦𑀯𑀜𑁆𑀘 𑀆𑀤𑀻𑀦𑀯𑀢𑁄 𑀦𑀺𑀲𑁆𑀲𑀭𑀡𑀜𑁆𑀘 𑀦𑀺𑀲𑁆𑀲𑀭𑀡𑀢𑁄 𑀬𑀣𑀸𑀪𑀽𑀢𑀁 𑀅𑀩𑁆𑀪𑀜𑁆𑀜𑀸𑀲𑀺𑀁, 𑀅𑀣𑀸𑀳𑀁, 𑀪𑀺𑀓𑁆𑀔𑀯𑁂, ‘𑀲𑀤𑁂𑀯𑀓𑁂 𑀮𑁄𑀓𑁂 𑀲𑀫𑀸𑀭𑀓𑁂 𑀲𑀩𑁆𑀭𑀳𑁆𑀫𑀓𑁂 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀚𑀸𑀬 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄’𑀢𑀺 𑀧𑀘𑁆𑀘𑀜𑁆𑀜𑀸𑀲𑀺𑀁. 𑀜𑀸𑀡𑀜𑁆𑀘 𑀧𑀦 𑀫𑁂 𑀤𑀲𑁆𑀲𑀦𑀁 𑀉𑀤𑀧𑀸𑀤𑀺 𑁋 ‘𑀅𑀓𑀼𑀧𑁆𑀧𑀸 𑀫𑁂 𑀯𑀺𑀫𑀼𑀢𑁆𑀢𑀺 [𑀘𑁂𑀢𑁄𑀯𑀺𑀫𑀼𑀢𑁆𑀢𑀺 (𑀲𑁆𑀬𑀸. 𑀓.) 𑀲𑀁. 𑀦𑀺. 𑁩.𑁨𑁭 𑀧𑀲𑁆𑀲𑀺𑀢𑀩𑁆𑀩𑀸]. 𑀅𑀬𑀫𑀦𑁆𑀢𑀺𑀫𑀸 𑀚𑀸𑀢𑀺, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄’’’𑀢𑀺.

𑁩. 𑀤𑀼𑀢𑀺𑀬𑀲𑀼𑀢𑁆𑀢𑀦𑁆𑀢𑀦𑀺𑀤𑁆𑀤𑁂𑀲𑁄

𑁧𑁪. 𑀬𑀁 𑀭𑀽𑀧𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀲𑀼𑀔𑀁 𑀲𑁄𑀫𑀦𑀲𑁆𑀲𑀁, 𑀅𑀬𑀁 𑀭𑀽𑀧𑀲𑁆𑀲 𑀅𑀲𑁆𑀲𑀸𑀤𑁄𑀢𑀺 𑁋 𑀧𑀳𑀸𑀦𑀧𑁆𑀧𑀝𑀺𑀯𑁂𑀥𑁄 𑀲𑀫𑀼𑀤𑀬𑀲𑀘𑁆𑀘𑀁. 𑀬𑀁 𑀭𑀽𑀧𑀁 𑀅𑀦𑀺𑀘𑁆𑀘𑀁 𑀢𑀁 𑀤𑀼𑀓𑁆𑀔𑀁 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀁, 𑀅𑀬𑀁 𑀭𑀽𑀧𑀲𑁆𑀲 𑀆𑀤𑀻𑀦𑀯𑁄𑀢𑀺 𑁋 𑀧𑀭𑀺𑀜𑁆𑀜𑀸𑀧𑀝𑀺𑀯𑁂𑀥𑁄 𑀤𑀼𑀓𑁆𑀔𑀲𑀘𑁆𑀘𑀁. 𑀬𑁄 𑀭𑀽𑀧𑀲𑁆𑀫𑀺𑀁 𑀙𑀦𑁆𑀤𑀭𑀸𑀕𑀯𑀺𑀦𑀬𑁄 𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑀁, 𑀇𑀤𑀁 𑀭𑀽𑀧𑀲𑁆𑀲 𑀦𑀺𑀲𑁆𑀲𑀭𑀡𑀦𑁆𑀢𑀺 𑁋 𑀲𑀘𑁆𑀙𑀺𑀓𑀺𑀭𑀺𑀬𑀸𑀧𑀝𑀺𑀯𑁂𑀥𑁄 𑀦𑀺𑀭𑁄𑀥𑀲𑀘𑁆𑀘𑀁. 𑀬𑀸 𑀇𑀫𑁂𑀲𑀼 𑀢𑀻𑀲𑀼 𑀞𑀸𑀦𑁂𑀲𑀼 𑀤𑀺𑀝𑁆𑀞𑀺 𑀲𑀗𑁆𑀓𑀧𑁆𑀧𑁄 𑀯𑀸𑀘𑀸 𑀓𑀫𑁆𑀫𑀦𑁆𑀢𑁄 𑀆𑀚𑀻𑀯𑁄 𑀯𑀸𑀬𑀸𑀫𑁄 𑀲𑀢𑀺 𑀲𑀫𑀸𑀥𑀺 𑁋 𑀪𑀸𑀯𑀦𑀸𑀧𑀝𑀺𑀯𑁂𑀥𑁄 𑀫𑀕𑁆𑀕𑀲𑀘𑁆𑀘𑀁.

𑀬𑀁 𑀯𑁂𑀤𑀦𑀁 𑀧𑀝𑀺𑀘𑁆𑀘…𑀧𑁂… 𑀬𑀁 𑀲𑀜𑁆𑀜𑀁 𑀧𑀝𑀺𑀘𑁆𑀘… 𑀬𑀁 𑀲𑀗𑁆𑀔𑀸𑀭𑁂 𑀧𑀝𑀺𑀘𑁆𑀘… 𑀬𑀁 𑀯𑀺𑀜𑁆𑀜𑀸𑀡𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀲𑀼𑀔𑀁 𑀲𑁄𑀫𑀦𑀲𑁆𑀲𑀁, 𑀅𑀬𑀁 𑀯𑀺𑀜𑁆𑀜𑀸𑀡𑀲𑁆𑀲 𑀅𑀲𑁆𑀲𑀸𑀤𑁄𑀢𑀺 𑁋 𑀧𑀳𑀸𑀦𑀧𑁆𑀧𑀝𑀺𑀯𑁂𑀥𑁄 𑀲𑀫𑀼𑀤𑀬𑀲𑀘𑁆𑀘𑀁. 𑀬𑀁 𑀯𑀺𑀜𑁆𑀜𑀸𑀡𑀁 𑀅𑀦𑀺𑀘𑁆𑀘𑀁 𑀢𑀁 𑀤𑀼𑀓𑁆𑀔𑀁 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀁, 𑀅𑀬𑀁 𑀯𑀺𑀜𑁆𑀜𑀸𑀡𑀲𑁆𑀲 𑀆𑀤𑀻𑀦𑀯𑁄𑀢𑀺 𑁋 𑀧𑀭𑀺𑀜𑁆𑀜𑀸𑀧𑀝𑀺𑀯𑁂𑀥𑁄 𑀤𑀼𑀓𑁆𑀔𑀲𑀘𑁆𑀘𑀁. 𑀬𑁄 𑀯𑀺𑀜𑁆𑀜𑀸𑀡𑀲𑁆𑀫𑀺𑀁 𑀙𑀦𑁆𑀤𑀭𑀸𑀕𑀯𑀺𑀦𑀬𑁄 𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑀁, 𑀇𑀤𑀁 𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀲𑁆𑀲𑀭𑀡𑀦𑁆𑀢𑀺 𑁋 𑀲𑀘𑁆𑀙𑀺𑀓𑀺𑀭𑀺𑀬𑀸𑀧𑀝𑀺𑀯𑁂𑀥𑁄 𑀦𑀺𑀭𑁄𑀥𑀲𑀘𑁆𑀘𑀁. 𑀬𑀸 𑀇𑀫𑁂𑀲𑀼 𑀢𑀻𑀲𑀼 𑀞𑀸𑀦𑁂𑀲𑀼 𑀤𑀺𑀝𑁆𑀞𑀺 𑀲𑀗𑁆𑀓𑀧𑁆𑀧𑁄 𑀯𑀸𑀘𑀸 𑀓𑀫𑁆𑀫𑀦𑁆𑀢𑁄 𑀆𑀚𑀻𑀯𑁄 𑀯𑀸𑀬𑀸𑀫𑁄 𑀲𑀢𑀺 𑀲𑀫𑀸𑀥𑀺 𑁋 𑀪𑀸𑀯𑀦𑀸𑀧𑀝𑀺𑀯𑁂𑀥𑁄 𑀫𑀕𑁆𑀕𑀲𑀘𑁆𑀘𑀁.

𑁧𑁫. 𑀲𑀘𑁆𑀘𑀦𑁆𑀢𑀺 𑀓𑀢𑀺𑀳𑀸𑀓𑀸𑀭𑁂𑀳𑀺 𑀲𑀘𑁆𑀘𑀁? 𑀏𑀲𑀦𑀝𑁆𑀞𑁂𑀦, 𑀧𑀭𑀺𑀕𑁆𑀕𑀳𑀝𑁆𑀞𑁂𑀦, 𑀧𑀝𑀺𑀯𑁂𑀥𑀝𑁆𑀞𑁂𑀦. 𑀓𑀣𑀁 𑀏𑀲𑀦𑀝𑁆𑀞𑁂𑀦 𑀲𑀘𑁆𑀘𑀁? 𑀚𑀭𑀸𑀫𑀭𑀡𑀁 𑀓𑀺𑀁𑀦𑀺𑀤𑀸𑀦𑀁, 𑀓𑀺𑀁𑀲𑀫𑀼𑀤𑀬𑀁, 𑀓𑀺𑀁𑀚𑀸𑀢𑀺𑀓𑀁, 𑀓𑀺𑀁𑀧𑀪𑀯𑀦𑁆𑀢𑀺 𑁋 𑀏𑀯𑀁 𑀏𑀲𑀦𑀝𑁆𑀞𑁂𑀦 𑀲𑀘𑁆𑀘𑀁. 𑀚𑀭𑀸𑀫𑀭𑀡𑀁 𑀚𑀸𑀢𑀺𑀦𑀺𑀤𑀸𑀦𑀁, 𑀚𑀸𑀢𑀺𑀲𑀫𑀼𑀤𑀬𑀁, 𑀚𑀸𑀢𑀺𑀚𑀸𑀢𑀺𑀓𑀁, 𑀚𑀸𑀢𑀺𑀧𑁆𑀧𑀪𑀯𑀦𑁆𑀢𑀺 𑁋 𑀏𑀯𑀁 𑀧𑀭𑀺𑀕𑁆𑀕𑀳𑀝𑁆𑀞𑁂𑀦 𑀲𑀘𑁆𑀘𑀁. 𑀚𑀭𑀸𑀫𑀭𑀡𑀜𑁆𑀘 𑀧𑀚𑀸𑀦𑀸𑀢𑀺, 𑀚𑀭𑀸𑀫𑀭𑀡𑀲𑀫𑀼𑀤𑀬𑀜𑁆𑀘 𑀧𑀚𑀸𑀦𑀸𑀢𑀺, 𑀚𑀭𑀸𑀫𑀭𑀡𑀦𑀺𑀭𑁄𑀥𑀜𑁆𑀘 𑀧𑀚𑀸𑀦𑀸𑀢𑀺, 𑀚𑀭𑀸𑀫𑀭𑀡𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀜𑁆𑀘 𑀧𑀚𑀸𑀦𑀸𑀢𑀺 𑁋 𑀏𑀯𑀁 𑀧𑀝𑀺𑀯𑁂𑀥𑀝𑁆𑀞𑁂𑀦 𑀲𑀘𑁆𑀘𑀁.

𑀚𑀸𑀢𑀺 𑀓𑀺𑀁𑀦𑀺𑀤𑀸𑀦𑀸, 𑀓𑀺𑀁𑀲𑀫𑀼𑀤𑀬𑀸, 𑀓𑀺𑀁𑀚𑀸𑀢𑀺𑀓𑀸, 𑀓𑀺𑀁𑀧𑀪𑀯𑀸𑀢𑀺 𑁋 𑀏𑀯𑀁 𑀏𑀲𑀦𑀝𑁆𑀞𑁂𑀦 𑀲𑀘𑁆𑀘𑀁. 𑀚𑀸𑀢𑀺 𑀪𑀯𑀦𑀺𑀤𑀸𑀦𑀸, 𑀪𑀯𑀲𑀫𑀼𑀤𑀬𑀸, 𑀪𑀯𑀚𑀸𑀢𑀺𑀓𑀸, 𑀪𑀯𑀧𑁆𑀧𑀪𑀯𑀸𑀢𑀺 𑁋 𑀏𑀯𑀁 𑀧𑀭𑀺𑀕𑁆𑀕𑀳𑀝𑁆𑀞𑁂𑀦 𑀲𑀘𑁆𑀘𑀁. 𑀚𑀸𑀢𑀺𑀜𑁆𑀘 𑀧𑀚𑀸𑀦𑀸𑀢𑀺, 𑀚𑀸𑀢𑀺𑀲𑀫𑀼𑀤𑀬𑀜𑁆𑀘 𑀧𑀚𑀸𑀦𑀸𑀢𑀺, 𑀚𑀸𑀢𑀺𑀦𑀺𑀭𑁄𑀥𑀜𑁆𑀘 𑀧𑀚𑀸𑀦𑀸𑀢𑀺, 𑀚𑀸𑀢𑀺𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀜𑁆𑀘 𑀧𑀚𑀸𑀦𑀸𑀢𑀺 𑁋 𑀏𑀯𑀁 𑀧𑀝𑀺𑀯𑁂𑀥𑀝𑁆𑀞𑁂𑀦 𑀲𑀘𑁆𑀘𑀁.

𑀪𑀯𑁄 𑀓𑀺𑀁𑀦𑀺𑀤𑀸𑀦𑁄, 𑀓𑀺𑀁𑀲𑀫𑀼𑀤𑀬𑁄, 𑀓𑀺𑀁𑀚𑀸𑀢𑀺𑀓𑁄, 𑀓𑀺𑀁𑀧𑀪𑀯𑁄𑀢𑀺 𑁋 𑀏𑀯𑀁 𑀏𑀲𑀦𑀝𑁆𑀞𑁂𑀦 𑀲𑀘𑁆𑀘𑀁. 𑀪𑀯𑁄 𑀉𑀧𑀸𑀤𑀸𑀦𑀦𑀺𑀤𑀸𑀦𑁄, 𑀉𑀧𑀸𑀤𑀸𑀦𑀲𑀫𑀼𑀤𑀬𑁄, 𑀉𑀧𑀸𑀤𑀸𑀦𑀚𑀸𑀢𑀺𑀓𑁄, 𑀉𑀧𑀸𑀤𑀸𑀦𑀧𑁆𑀧𑀪𑀯𑁄𑀢𑀺 𑁋 𑀏𑀯𑀁 𑀧𑀭𑀺𑀕𑁆𑀕𑀳𑀝𑁆𑀞𑁂𑀦 𑀲𑀘𑁆𑀘𑀁. 𑀪𑀯𑀁 𑀘 𑀧𑀚𑀸𑀦𑀸𑀢𑀺, 𑀪𑀯𑀲𑀫𑀼𑀤𑀬𑀜𑁆𑀘 𑀧𑀚𑀸𑀦𑀸𑀢𑀺, 𑀪𑀯𑀦𑀺𑀭𑁄𑀥𑀜𑁆𑀘 𑀧𑀚𑀸𑀦𑀸𑀢𑀺, 𑀪𑀯𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀜𑁆𑀘 𑀧𑀚𑀸𑀦𑀸𑀢𑀺 𑁋 𑀏𑀯𑀁 𑀧𑀝𑀺𑀯𑁂𑀥𑀝𑁆𑀞𑁂𑀦 𑀲𑀘𑁆𑀘𑀁.

𑀉𑀧𑀸𑀤𑀸𑀦𑀁 𑀓𑀺𑀁𑀦𑀺𑀤𑀸𑀦𑀁, 𑀓𑀺𑀁𑀲𑀫𑀼𑀤𑀬𑀁, 𑀓𑀺𑀁𑀚𑀸𑀢𑀺𑀓𑀁, 𑀓𑀺𑀁𑀧𑀪𑀯𑀦𑁆𑀢𑀺 𑁋 𑀏𑀯𑀁 𑀏𑀲𑀦𑀝𑁆𑀞𑁂𑀦 𑀲𑀘𑁆𑀘𑀁. 𑀉𑀧𑀸𑀤𑀸𑀦𑀁 𑀢𑀡𑁆𑀳𑀸𑀦𑀺𑀤𑀸𑀦𑀁, 𑀢𑀡𑁆𑀳𑀸𑀲𑀫𑀼𑀤𑀬𑀁, 𑀢𑀡𑁆𑀳𑀸𑀚𑀸𑀢𑀺𑀓𑀁, 𑀢𑀡𑁆𑀳𑀸𑀧𑀪𑀯𑀦𑁆𑀢𑀺 𑁋 𑀏𑀯𑀁 𑀧𑀭𑀺𑀕𑁆𑀕𑀳𑀝𑁆𑀞𑁂𑀦 𑀲𑀘𑁆𑀘𑀁. 𑀉𑀧𑀸𑀤𑀸𑀦𑀜𑁆𑀘 𑀧𑀚𑀸𑀦𑀸𑀢𑀺, 𑀉𑀧𑀸𑀤𑀸𑀦𑀲𑀫𑀼𑀤𑀬𑀜𑁆𑀘 𑀧𑀚𑀸𑀦𑀸𑀢𑀺, 𑀉𑀧𑀸𑀤𑀸𑀦𑀦𑀺𑀭𑁄𑀥𑀜𑁆𑀘 𑀧𑀚𑀸𑀦𑀸𑀢𑀺 𑀉𑀧𑀸𑀤𑀸𑀦𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀜𑁆𑀘 𑀧𑀚𑀸𑀦𑀸𑀢𑀺 𑁋 𑀏𑀯𑀁 𑀧𑀝𑀺𑀯𑁂𑀥𑀝𑁆𑀞𑁂𑀦 𑀲𑀘𑁆𑀘𑀁.

𑀢𑀡𑁆𑀳𑀸 𑀓𑀺𑀁𑀦𑀺𑀤𑀸𑀦𑀸, 𑀓𑀺𑀁𑀲𑀫𑀼𑀤𑀬𑀸, 𑀓𑀺𑀁𑀚𑀸𑀢𑀺𑀓𑀸, 𑀓𑀺𑀁𑀧𑀪𑀯𑀸𑀢𑀺 𑁋 𑀏𑀯𑀁 𑀏𑀲𑀦𑀝𑁆𑀞𑁂𑀦 𑀲𑀘𑁆𑀘𑀁. 𑀢𑀡𑁆𑀳𑀸 𑀯𑁂𑀤𑀦𑀸𑀦𑀺𑀤𑀸𑀦𑀸, 𑀯𑁂𑀤𑀦𑀸𑀲𑀫𑀼𑀤𑀬𑀸, 𑀯𑁂𑀤𑀦𑀸𑀚𑀸𑀢𑀺𑀓𑀸, 𑀯𑁂𑀤𑀦𑀸𑀧𑀪𑀯𑀸𑀢𑀺 𑁋 𑀏𑀯𑀁 𑀧𑀭𑀺𑀕𑁆𑀕𑀳𑀝𑁆𑀞𑁂𑀦 𑀲𑀘𑁆𑀘𑀁. 𑀢𑀡𑁆𑀳𑀜𑁆𑀘 𑀧𑀚𑀸𑀦𑀸𑀢𑀺, 𑀢𑀡𑁆𑀳𑀸𑀲𑀫𑀼𑀤𑀬𑀜𑁆𑀘 𑀧𑀚𑀸𑀦𑀸𑀢𑀺, 𑀢𑀡𑁆𑀳𑀸𑀦𑀺𑀭𑁄𑀥𑀜𑁆𑀘 𑀧𑀚𑀸𑀦𑀸𑀢𑀺, 𑀢𑀡𑁆𑀳𑀸𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀜𑁆𑀘 𑀧𑀚𑀸𑀦𑀸𑀢𑀺 𑁋 𑀏𑀯𑀁 𑀧𑀝𑀺𑀯𑁂𑀥𑀝𑁆𑀞𑁂𑀦 𑀲𑀘𑁆𑀘𑀁.

𑀯𑁂𑀤𑀦𑀸 𑀓𑀺𑀁𑀦𑀺𑀤𑀸𑀦𑀸, 𑀓𑀺𑀁𑀲𑀫𑀼𑀤𑀬𑀸, 𑀓𑀺𑀁𑀚𑀸𑀢𑀺𑀓𑀸, 𑀓𑀺𑀁𑀧𑀪𑀯𑀸𑀢𑀺 𑁋 𑀏𑀯𑀁 𑀏𑀲𑀦𑀝𑁆𑀞𑁂𑀦 𑀲𑀘𑁆𑀘𑀁. 𑀯𑁂𑀤𑀦𑀸 𑀨𑀲𑁆𑀲𑀦𑀺𑀤𑀸𑀦𑀸, 𑀨𑀲𑁆𑀲𑀲𑀫𑀼𑀤𑀬𑀸, 𑀨𑀲𑁆𑀲𑀚𑀸𑀢𑀺𑀓𑀸, 𑀨𑀲𑁆𑀲𑀧𑁆𑀧𑀪𑀯𑀸𑀢𑀺 𑁋 𑀏𑀯𑀁 𑀧𑀭𑀺𑀕𑁆𑀕𑀳𑀝𑁆𑀞𑁂𑀦 𑀲𑀘𑁆𑀘𑀁. 𑀯𑁂𑀤𑀦𑀜𑁆𑀘 𑀧𑀚𑀸𑀦𑀸𑀢𑀺, 𑀯𑁂𑀤𑀦𑀸𑀲𑀫𑀼𑀤𑀬𑀜𑁆𑀘 𑀧𑀚𑀸𑀦𑀸𑀢𑀺, 𑀯𑁂𑀤𑀦𑀸𑀦𑀺𑀭𑁄𑀥𑀜𑁆𑀘 𑀧𑀚𑀸𑀦𑀸𑀢𑀺, 𑀯𑁂𑀤𑀦𑀸𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀜𑁆𑀘 𑀧𑀚𑀸𑀦𑀸𑀢𑀺 𑁋 𑀏𑀯𑀁 𑀧𑀝𑀺𑀯𑁂𑀥𑀝𑁆𑀞𑁂𑀦 𑀲𑀘𑁆𑀘𑀁.

𑀨𑀲𑁆𑀲𑁄 𑀓𑀺𑀁𑀦𑀺𑀤𑀸𑀦𑁄, 𑀓𑀺𑀁𑀲𑀫𑀼𑀤𑀬𑁄, 𑀓𑀺𑀁𑀚𑀸𑀢𑀺𑀓𑁄, 𑀓𑀺𑀁𑀧𑀪𑀯𑁄𑀢𑀺 𑁋 𑀏𑀯𑀁 𑀏𑀲𑀦𑀝𑁆𑀞𑁂𑀦 𑀲𑀘𑁆𑀘𑀁. 𑀨𑀲𑁆𑀲𑁄 𑀲𑀴𑀸𑀬𑀢𑀦𑀦𑀺𑀤𑀸𑀦𑁄, 𑀲𑀴𑀸𑀬𑀢𑀦𑀲𑀫𑀼𑀤𑀬𑁄, 𑀲𑀴𑀸𑀬𑀢𑀦𑀚𑀸𑀢𑀺𑀓𑁄, 𑀲𑀴𑀸𑀬𑀢𑀦𑀧𑁆𑀧𑀪𑀯𑁄𑀢𑀺 𑁋 𑀏𑀯𑀁 𑀧𑀭𑀺𑀕𑁆𑀕𑀳𑀝𑁆𑀞𑁂𑀦 𑀲𑀘𑁆𑀘𑀁. 𑀨𑀲𑁆𑀲𑀜𑁆𑀘 𑀧𑀚𑀸𑀦𑀸𑀢𑀺, 𑀨𑀲𑁆𑀲𑀲𑀫𑀼𑀤𑀬𑀜𑁆𑀘 𑀧𑀚𑀸𑀦𑀸𑀢𑀺, 𑀨𑀲𑁆𑀲𑀦𑀺𑀭𑁄𑀥𑀜𑁆𑀘 𑀧𑀚𑀸𑀦𑀸𑀢𑀺, 𑀨𑀲𑁆𑀲𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀜𑁆𑀘 𑀧𑀚𑀸𑀦𑀸𑀢𑀺 𑁋 𑀏𑀯𑀁 𑀧𑀝𑀺𑀯𑁂𑀥𑀝𑁆𑀞𑁂𑀦 𑀲𑀘𑁆𑀘𑀁.

𑀲𑀴𑀸𑀬𑀢𑀦𑀁 𑀓𑀺𑀁𑀦𑀺𑀤𑀸𑀦𑀁, 𑀓𑀺𑀁𑀲𑀫𑀼𑀤𑀬𑀁, 𑀓𑀺𑀁𑀚𑀸𑀢𑀺𑀓𑀁, 𑀓𑀺𑀁𑀧𑀪𑀯𑀦𑁆𑀢𑀺 𑁋 𑀏𑀯𑀁 𑀏𑀲𑀦𑀝𑁆𑀞𑁂𑀦 𑀲𑀘𑁆𑀘𑀁. 𑀲𑀴𑀸𑀬𑀢𑀦𑀁 𑀦𑀸𑀫𑀭𑀽𑀧𑀦𑀺𑀤𑀸𑀦𑀁, 𑀦𑀸𑀫𑀭𑀽𑀧𑀲𑀫𑀼𑀤𑀬𑀁, 𑀦𑀸𑀫𑀭𑀽𑀧𑀚𑀸𑀢𑀺𑀓𑀁, 𑀦𑀸𑀫𑀭𑀽𑀧𑀧𑁆𑀧𑀪𑀯𑀦𑁆𑀢𑀺 𑁋 𑀏𑀯𑀁 𑀧𑀭𑀺𑀕𑁆𑀕𑀳𑀝𑁆𑀞𑁂𑀦 𑀲𑀘𑁆𑀘𑀁. 𑀲𑀴𑀸𑀬𑀢𑀦𑀜𑁆𑀘 𑀧𑀚𑀸𑀦𑀸𑀢𑀺, 𑀲𑀴𑀸𑀬𑀢𑀦𑀲𑀫𑀼𑀤𑀬𑀜𑁆𑀘 𑀧𑀚𑀸𑀦𑀸𑀢𑀺, 𑀲𑀴𑀸𑀬𑀢𑀦𑀦𑀺𑀭𑁄𑀥𑀜𑁆𑀘 𑀧𑀚𑀸𑀦𑀸𑀢𑀺, 𑀲𑀴𑀸𑀬𑀢𑀦𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀜𑁆𑀘 𑀧𑀚𑀸𑀦𑀸𑀢𑀺 𑁋 𑀏𑀯𑀁 𑀧𑀝𑀺𑀯𑁂𑀥𑀝𑁆𑀞𑁂𑀦 𑀲𑀘𑁆𑀘𑀁.

𑀦𑀸𑀫𑀭𑀽𑀧𑀁 𑀓𑀺𑀁𑀦𑀺𑀤𑀸𑀦𑀁, 𑀓𑀺𑀁𑀲𑀫𑀼𑀤𑀬𑀁, 𑀓𑀺𑀁𑀚𑀸𑀢𑀺𑀓𑀁, 𑀓𑀺𑀁𑀧𑀪𑀯𑀦𑁆𑀢𑀺 𑁋 𑀏𑀯𑀁 𑀏𑀲𑀦𑀝𑁆𑀞𑁂𑀦 𑀲𑀘𑁆𑀘𑀁. 𑀦𑀸𑀫𑀭𑀽𑀧𑀁 𑀯𑀺𑀜𑁆𑀜𑀸𑀡𑀦𑀺𑀤𑀸𑀦𑀁, 𑀯𑀺𑀜𑁆𑀜𑀸𑀡𑀲𑀫𑀼𑀤𑀬𑀁, 𑀯𑀺𑀜𑁆𑀜𑀸𑀡𑀚𑀸𑀢𑀺𑀓𑀁, 𑀯𑀺𑀜𑁆𑀜𑀸𑀡𑀧𑁆𑀧𑀪𑀯𑀦𑁆𑀢𑀺 𑁋 𑀏𑀯𑀁 𑀧𑀭𑀺𑀕𑁆𑀕𑀳𑀝𑁆𑀞𑁂𑀦 𑀲𑀘𑁆𑀘𑀁. 𑀦𑀸𑀫𑀭𑀽𑀧𑀜𑁆𑀘 𑀧𑀚𑀸𑀦𑀸𑀢𑀺, 𑀦𑀸𑀫𑀭𑀽𑀧𑀲𑀫𑀼𑀤𑀬𑀜𑁆𑀘 𑀧𑀚𑀸𑀦𑀸𑀢𑀺, 𑀦𑀸𑀫𑀭𑀽𑀧𑀦𑀺𑀭𑁄𑀥𑀜𑁆𑀘 𑀧𑀚𑀸𑀦𑀸𑀢𑀺, 𑀦𑀸𑀫𑀭𑀽𑀧𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀜𑁆𑀘 𑀧𑀚𑀸𑀦𑀸𑀢𑀺 𑁋 𑀏𑀯𑀁 𑀧𑀝𑀺𑀯𑁂𑀥𑀝𑁆𑀞𑁂𑀦 𑀲𑀘𑁆𑀘𑀁.

𑀯𑀺𑀜𑁆𑀜𑀸𑀡𑀁 𑀓𑀺𑀁𑀦𑀺𑀤𑀸𑀦𑀁, 𑀓𑀺𑀁𑀲𑀫𑀼𑀤𑀬𑀁, 𑀓𑀺𑀁𑀚𑀸𑀢𑀺𑀓𑀁, 𑀓𑀺𑀁𑀧𑀪𑀯𑀦𑁆𑀢𑀺 𑁋 𑀏𑀯𑀁 𑀏𑀲𑀦𑀝𑁆𑀞𑁂𑀦 𑀲𑀘𑁆𑀘𑀁. 𑀯𑀺𑀜𑁆𑀜𑀸𑀡𑀁 𑀲𑀗𑁆𑀔𑀸𑀭𑀦𑀺𑀤𑀸𑀦𑀁, 𑀲𑀗𑁆𑀔𑀸𑀭𑀲𑀫𑀼𑀤𑀬𑀁, 𑀲𑀗𑁆𑀔𑀸𑀭𑀚𑀸𑀢𑀺𑀓𑀁, 𑀲𑀗𑁆𑀔𑀸𑀭𑀧𑁆𑀧𑀪𑀯𑀦𑁆𑀢𑀺 𑁋 𑀏𑀯𑀁 𑀧𑀭𑀺𑀕𑁆𑀕𑀳𑀝𑁆𑀞𑁂𑀦 𑀲𑀘𑁆𑀘𑀁. 𑀯𑀺𑀜𑁆𑀜𑀸𑀡𑀜𑁆𑀘 𑀧𑀚𑀸𑀦𑀸𑀢𑀺, 𑀯𑀺𑀜𑁆𑀜𑀸𑀡𑀲𑀫𑀼𑀤𑀬𑀜𑁆𑀘 𑀧𑀚𑀸𑀦𑀸𑀢𑀺, 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑀜𑁆𑀘 𑀧𑀚𑀸𑀦𑀸𑀢𑀺, 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀜𑁆𑀘 𑀧𑀚𑀸𑀦𑀸𑀢𑀺 𑁋 𑀏𑀯𑀁 𑀧𑀝𑀺𑀯𑁂𑀥𑀝𑁆𑀞𑁂𑀦 𑀲𑀘𑁆𑀘𑀁.

𑀲𑀗𑁆𑀔𑀸𑀭𑀸 𑀓𑀺𑀁𑀦𑀺𑀤𑀸𑀦𑀸, 𑀓𑀺𑀁𑀲𑀫𑀼𑀤𑀬𑀸, 𑀓𑀺𑀁𑀚𑀸𑀢𑀺𑀓𑀸, 𑀓𑀺𑀁𑀧𑀪𑀯𑀸𑀢𑀺 𑁋 𑀏𑀯𑀁 𑀏𑀲𑀦𑀝𑁆𑀞𑁂𑀦 𑀲𑀘𑁆𑀘𑀁. 𑀲𑀗𑁆𑀔𑀸𑀭𑀸 𑀅𑀯𑀺𑀚𑁆𑀚𑀸𑀦𑀺𑀤𑀸𑀦𑀸, 𑀅𑀯𑀺𑀚𑁆𑀚𑀸𑀲𑀫𑀼𑀤𑀬𑀸, 𑀅𑀯𑀺𑀚𑁆𑀚𑀸𑀚𑀸𑀢𑀺𑀓𑀸, 𑀅𑀯𑀺𑀚𑁆𑀚𑀸𑀧𑀪𑀯𑀸𑀢𑀺 𑁋 𑀏𑀯𑀁 𑀧𑀭𑀺𑀕𑁆𑀕𑀳𑀝𑁆𑀞𑁂𑀦 𑀲𑀘𑁆𑀘𑀁. 𑀲𑀗𑁆𑀔𑀸𑀭𑁂 𑀘 𑀧𑀚𑀸𑀦𑀸𑀢𑀺, 𑀲𑀗𑁆𑀔𑀸𑀭𑀲𑀫𑀼𑀤𑀬𑀜𑁆𑀘 𑀧𑀚𑀸𑀦𑀸𑀢𑀺, 𑀲𑀗𑁆𑀔𑀸𑀭𑀦𑀺𑀭𑁄𑀥𑀜𑁆𑀘 𑀧𑀚𑀸𑀦𑀸𑀢𑀺, 𑀲𑀗𑁆𑀔𑀸𑀭𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀜𑁆𑀘 𑀧𑀚𑀸𑀦𑀸𑀢𑀺 𑁋 𑀏𑀯𑀁 𑀧𑀝𑀺𑀯𑁂𑀥𑀝𑁆𑀞𑁂𑀦 𑀲𑀘𑁆𑀘𑀁.

𑁧𑁬. 𑀚𑀭𑀸𑀫𑀭𑀡𑀁 𑀤𑀼𑀓𑁆𑀔𑀲𑀘𑁆𑀘𑀁, 𑀚𑀸𑀢𑀺 𑀲𑀫𑀼𑀤𑀬𑀲𑀘𑁆𑀘𑀁, 𑀉𑀪𑀺𑀦𑁆𑀦𑀫𑁆𑀧𑀺 𑀦𑀺𑀲𑁆𑀲𑀭𑀡𑀁 𑀦𑀺𑀭𑁄𑀥𑀲𑀘𑁆𑀘𑀁, 𑀦𑀺𑀭𑁄𑀥𑀧𑁆𑀧𑀚𑀸𑀦𑀦𑀸 𑀫𑀕𑁆𑀕𑀲𑀘𑁆𑀘𑀁. 𑀚𑀸𑀢𑀺 𑀤𑀼𑀓𑁆𑀔𑀲𑀘𑁆𑀘𑀁, 𑀪𑀯𑁄 𑀲𑀫𑀼𑀤𑀬𑀲𑀘𑁆𑀘𑀁, 𑀉𑀪𑀺𑀦𑁆𑀦𑀫𑁆𑀧𑀺 𑀦𑀺𑀲𑁆𑀲𑀭𑀡𑀁 𑀦𑀺𑀭𑁄𑀥𑀲𑀘𑁆𑀘𑀁, 𑀦𑀺𑀭𑁄𑀥𑀧𑁆𑀧𑀚𑀸𑀦𑀦𑀸 𑀫𑀕𑁆𑀕𑀲𑀘𑁆𑀘𑀁. 𑀪𑀯𑁄 𑀤𑀼𑀓𑁆𑀔𑀲𑀘𑁆𑀘𑀁, 𑀉𑀧𑀸𑀤𑀸𑀦𑀁 𑀲𑀫𑀼𑀤𑀬𑀲𑀘𑁆𑀘𑀁, 𑀉𑀪𑀺𑀦𑁆𑀦𑀫𑁆𑀧𑀺 𑀦𑀺𑀲𑁆𑀲𑀭𑀡𑀁 𑀦𑀺𑀭𑁄𑀥𑀲𑀘𑁆𑀘𑀁, 𑀦𑀺𑀭𑁄𑀥𑀧𑁆𑀧𑀚𑀸𑀦𑀦𑀸 𑀫𑀕𑁆𑀕𑀲𑀘𑁆𑀘𑀁. 𑀉𑀧𑀸𑀤𑀸𑀦𑀁 𑀤𑀼𑀓𑁆𑀔𑀲𑀘𑁆𑀘𑀁, 𑀢𑀡𑁆𑀳𑀸 𑀲𑀫𑀼𑀤𑀬𑀲𑀘𑁆𑀘𑀁, 𑀉𑀪𑀺𑀦𑁆𑀦𑀫𑁆𑀧𑀺 𑀦𑀺𑀲𑁆𑀲𑀭𑀡𑀁 𑀦𑀺𑀭𑁄𑀥𑀲𑀘𑁆𑀘𑀁, 𑀦𑀺𑀭𑁄𑀥𑀧𑁆𑀧𑀚𑀸𑀦𑀦𑀸 𑀫𑀕𑁆𑀕𑀲𑀘𑁆𑀘𑀁. 𑀢𑀡𑁆𑀳𑀸 𑀤𑀼𑀓𑁆𑀔𑀲𑀘𑁆𑀘𑀁, 𑀯𑁂𑀤𑀦𑀸 𑀲𑀫𑀼𑀤𑀬𑀲𑀘𑁆𑀘𑀁, 𑀉𑀪𑀺𑀦𑁆𑀦𑀫𑁆𑀧𑀺 𑀦𑀺𑀲𑁆𑀲𑀭𑀡𑀁 𑀦𑀺𑀭𑁄𑀥𑀲𑀘𑁆𑀘𑀁, 𑀦𑀺𑀭𑁄𑀥𑀧𑁆𑀧𑀚𑀸𑀦𑀦𑀸 𑀫𑀕𑁆𑀕𑀲𑀘𑁆𑀘𑀁. 𑀯𑁂𑀤𑀦𑀸 𑀤𑀼𑀓𑁆𑀔𑀲𑀘𑁆𑀘𑀁, 𑀨𑀲𑁆𑀲𑁄 𑀲𑀫𑀼𑀤𑀬𑀲𑀘𑁆𑀘𑀁, 𑀉𑀪𑀺𑀦𑁆𑀦𑀫𑁆𑀧𑀺 𑀦𑀺𑀲𑁆𑀲𑀭𑀡𑀁 𑀦𑀺𑀭𑁄𑀥𑀲𑀘𑁆𑀘𑀁, 𑀦𑀺𑀭𑁄𑀥𑀧𑁆𑀧𑀚𑀸𑀦𑀦𑀸 𑀫𑀕𑁆𑀕𑀲𑀘𑁆𑀘𑀁. 𑀨𑀲𑁆𑀲𑁄 𑀤𑀼𑀓𑁆𑀔𑀲𑀘𑁆𑀘𑀁, 𑀲𑀴𑀸𑀬𑀢𑀦𑀁 𑀲𑀫𑀼𑀤𑀬𑀲𑀘𑁆𑀘𑀁, 𑀉𑀪𑀺𑀦𑁆𑀦𑀫𑁆𑀧𑀺 𑀦𑀺𑀲𑁆𑀲𑀭𑀡𑀁 𑀦𑀺𑀭𑁄𑀥𑀲𑀘𑁆𑀘𑀁, 𑀦𑀺𑀭𑁄𑀥𑀧𑁆𑀧𑀚𑀸𑀦𑀦𑀸 𑀫𑀕𑁆𑀕𑀲𑀘𑁆𑀘𑀁. 𑀲𑀴𑀸𑀬𑀢𑀦𑀁 𑀤𑀼𑀓𑁆𑀔𑀲𑀘𑁆𑀘𑀁, 𑀦𑀸𑀫𑀭𑀽𑀧𑀁 𑀲𑀫𑀼𑀤𑀬𑀲𑀘𑁆𑀘𑀁, 𑀉𑀪𑀺𑀦𑁆𑀦𑀫𑁆𑀧𑀺 𑀦𑀺𑀲𑁆𑀲𑀭𑀡𑀁 𑀦𑀺𑀭𑁄𑀥𑀲𑀘𑁆𑀘𑀁, 𑀦𑀺𑀭𑁄𑀥𑀧𑁆𑀧𑀚𑀸𑀦𑀦𑀸 𑀫𑀕𑁆𑀕𑀲𑀘𑁆𑀘𑀁. 𑀦𑀸𑀫𑀭𑀽𑀧𑀁 𑀤𑀼𑀓𑁆𑀔𑀲𑀘𑁆𑀘𑀁, 𑀯𑀺𑀜𑁆𑀜𑀸𑀡𑀁 𑀲𑀫𑀼𑀤𑀬𑀲𑀘𑁆𑀘𑀁, 𑀉𑀪𑀺𑀦𑁆𑀦𑀫𑁆𑀧𑀺 𑀦𑀺𑀲𑁆𑀲𑀭𑀡𑀁 𑀦𑀺𑀭𑁄𑀥𑀲𑀘𑁆𑀘𑀁, 𑀦𑀺𑀭𑁄𑀥𑀧𑁆𑀧𑀚𑀸𑀦𑀦𑀸 𑀫𑀕𑁆𑀕𑀲𑀘𑁆𑀘𑀁. 𑀯𑀺𑀜𑁆𑀜𑀸𑀡𑀁 𑀤𑀼𑀓𑁆𑀔𑀲𑀘𑁆𑀘𑀁, 𑀲𑀗𑁆𑀔𑀸𑀭𑀸 𑀲𑀫𑀼𑀤𑀬𑀲𑀘𑁆𑀘𑀁, 𑀉𑀪𑀺𑀦𑁆𑀦𑀫𑁆𑀧𑀺 𑀦𑀺𑀲𑁆𑀲𑀭𑀡𑀁 𑀦𑀺𑀭𑁄𑀥𑀲𑀘𑁆𑀘𑀁, 𑀦𑀺𑀭𑁄𑀥𑀧𑁆𑀧𑀚𑀸𑀦𑀦𑀸 𑀫𑀕𑁆𑀕𑀲𑀘𑁆𑀘𑀁. 𑀲𑀗𑁆𑀔𑀸𑀭𑀸 𑀤𑀼𑀓𑁆𑀔𑀲𑀘𑁆𑀘𑀁, 𑀅𑀯𑀺𑀚𑁆𑀚𑀸 𑀲𑀫𑀼𑀤𑀬𑀲𑀘𑁆𑀘𑀁, 𑀉𑀪𑀺𑀦𑁆𑀦𑀫𑁆𑀧𑀺 𑀦𑀺𑀲𑁆𑀲𑀭𑀡𑀁 𑀦𑀺𑀭𑁄𑀥𑀲𑀘𑁆𑀘𑀁, 𑀦𑀺𑀭𑁄𑀥𑀧𑁆𑀧𑀚𑀸𑀦𑀦𑀸 𑀫𑀕𑁆𑀕𑀲𑀘𑁆𑀘𑀁.

𑀚𑀭𑀸𑀫𑀭𑀡𑀁 𑀲𑀺𑀬𑀸 𑀤𑀼𑀓𑁆𑀔𑀲𑀘𑁆𑀘𑀁, 𑀲𑀺𑀬𑀸 𑀲𑀫𑀼𑀤𑀬𑀲𑀘𑁆𑀘𑀁, 𑀉𑀪𑀺𑀦𑁆𑀦𑀫𑁆𑀧𑀺 𑀦𑀺𑀲𑁆𑀲𑀭𑀡𑀁 𑀦𑀺𑀭𑁄𑀥𑀲𑀘𑁆𑀘𑀁, 𑀦𑀺𑀭𑁄𑀥𑀧𑁆𑀧𑀚𑀸𑀦𑀦𑀸 𑀫𑀕𑁆𑀕𑀲𑀘𑁆𑀘𑀁. 𑀚𑀸𑀢𑀺 𑀲𑀺𑀬𑀸 𑀤𑀼𑀓𑁆𑀔𑀲𑀘𑁆𑀘𑀁, 𑀲𑀺𑀬𑀸 𑀲𑀫𑀼𑀤𑀬𑀲𑀘𑁆𑀘𑀁…𑀧𑁂… 𑀪𑀯𑁄 𑀲𑀺𑀬𑀸 𑀤𑀼𑀓𑁆𑀔𑀲𑀘𑁆𑀘𑀁, 𑀲𑀺𑀬𑀸 𑀲𑀫𑀼𑀤𑀬𑀲𑀘𑁆𑀘𑀁, 𑀉𑀪𑀺𑀦𑁆𑀦𑀫𑁆𑀧𑀺 𑀦𑀺𑀲𑁆𑀲𑀭𑀡𑀁 𑀦𑀺𑀭𑁄𑀥𑀲𑀘𑁆𑀘𑀁, 𑀦𑀺𑀭𑁄𑀥𑀧𑁆𑀧𑀚𑀸𑀦𑀦𑀸 𑀫𑀕𑁆𑀕𑀲𑀘𑁆𑀘𑀦𑁆𑀢𑀺.

𑀪𑀸𑀡𑀯𑀸𑀭𑁄.

𑀲𑀘𑁆𑀘𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁩. 𑀩𑁄𑀚𑁆𑀛𑀗𑁆𑀕𑀓𑀣𑀸

𑁧𑁭. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. ‘‘𑀲𑀢𑁆𑀢𑀺𑀫𑁂, 𑀪𑀺𑀓𑁆𑀔𑀯𑁂 [𑀲𑀁. 𑀦𑀺. 𑁫.𑁨𑁦𑁦], 𑀩𑁄𑀚𑁆𑀛𑀗𑁆𑀕𑀸. 𑀓𑀢𑀫𑁂 𑀲𑀢𑁆𑀢? 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑁋 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸’’.

𑀩𑁄𑀚𑁆𑀛𑀗𑁆𑀕𑀸𑀢𑀺 𑀓𑁂𑀦𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸? 𑀩𑁄𑀥𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀅𑀦𑀼𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀧𑀝𑀺𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀲𑀫𑁆𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸.

𑀩𑀼𑀚𑁆𑀛𑀦𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀅𑀦𑀼𑀩𑀼𑀚𑁆𑀛𑀦𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀧𑀝𑀺𑀩𑀼𑀚𑁆𑀛𑀦𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀲𑀫𑁆𑀩𑀼𑀚𑁆𑀛𑀦𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸.

𑀩𑁄𑀥𑁂𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀅𑀦𑀼𑀩𑁄𑀥𑁂𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀧𑀝𑀺𑀩𑁄𑀥𑁂𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀲𑀫𑁆𑀩𑁄𑀥𑁂𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸.

𑀩𑁄𑀥𑀦𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀅𑀦𑀼𑀩𑁄𑀥𑀦𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀧𑀝𑀺𑀩𑁄𑀥𑀦𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀲𑀫𑁆𑀩𑁄𑀥𑀦𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸.

𑀩𑁄𑀥𑀺𑀧𑀓𑁆𑀔𑀺𑀬𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀅𑀦𑀼𑀩𑁄𑀥𑀺𑀧𑀓𑁆𑀔𑀺𑀬𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀧𑀝𑀺𑀩𑁄𑀥𑀺𑀧𑀓𑁆𑀔𑀺𑀬𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀲𑀫𑁆𑀩𑁄𑀥𑀺𑀧𑀓𑁆𑀔𑀺𑀬𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸.

𑀩𑀼𑀤𑁆𑀥𑀺𑀮𑀪𑀦𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀩𑀼𑀤𑁆𑀥𑀺𑀧𑀝𑀺𑀮𑀪𑀦𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀩𑀼𑀤𑁆𑀥𑀺𑀭𑁄𑀧𑀦𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀩𑀼𑀤𑁆𑀥𑀺𑀅𑀪𑀺𑀭𑁄𑀧𑀦𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀩𑀼𑀤𑁆𑀥𑀺𑀧𑀸𑀧𑀦𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀩𑀼𑀤𑁆𑀥𑀺𑀲𑀫𑁆𑀧𑀸𑀧𑀦𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸.

𑀫𑀽𑀮𑀫𑀽𑀮𑀓𑀸𑀤𑀺𑀤𑀲𑀓𑀁

𑁧𑁮. 𑀫𑀽𑀮𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀫𑀽𑀮𑀘𑀭𑀺𑀬𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀫𑀽𑀮𑀧𑀭𑀺𑀕𑁆𑀕𑀳𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀫𑀽𑀮𑀧𑀭𑀺𑀯𑀸𑀭𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀫𑀽𑀮𑀧𑀭𑀺𑀧𑀽𑀭𑀡𑀝𑁆𑀞𑁂𑀦 [𑀫𑀽𑀮𑀧𑀭𑀺𑀧𑀽𑀭𑀝𑁆𑀞𑁂𑀦 (𑀲𑁆𑀬𑀸. 𑀓.) 𑀏𑀯𑀫𑀼𑀧𑀭𑀺𑀧𑀺] 𑀩𑁄𑀚𑁆𑀛𑀗𑁆𑀕𑀸, 𑀫𑀽𑀮𑀧𑀭𑀺𑀧𑀸𑀓𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀫𑀽𑀮𑀧𑀝𑀺𑀲𑀫𑁆𑀪𑀺𑀤𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀫𑀽𑀮𑀧𑀝𑀺𑀲𑀫𑁆𑀪𑀺𑀤𑀸𑀧𑀸𑀧𑀦𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀫𑀽𑀮𑀧𑀝𑀺𑀲𑀫𑁆𑀪𑀺𑀤𑀸𑀬 𑀯𑀲𑀻𑀪𑀸𑀯𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀫𑀽𑀮𑀧𑀝𑀺𑀲𑀫𑁆𑀪𑀺𑀤𑀸𑀬 𑀯𑀲𑀻𑀪𑀸𑀯𑀧𑁆𑀧𑀢𑁆𑀢𑀸𑀦𑀫𑁆𑀧𑀺 𑀩𑁄𑀚𑁆𑀛𑀗𑁆𑀕𑀸.

𑀳𑁂𑀢𑀼𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀳𑁂𑀢𑀼𑀘𑀭𑀺𑀬𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀳𑁂𑀢𑀼𑀧𑀭𑀺𑀕𑁆𑀕𑀳𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀳𑁂𑀢𑀼𑀧𑀭𑀺𑀯𑀸𑀭𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀳𑁂𑀢𑀼𑀧𑀭𑀺𑀧𑀽𑀭𑀡𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀳𑁂𑀢𑀼𑀧𑀭𑀺𑀧𑀸𑀓𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀳𑁂𑀢𑀼𑀧𑀝𑀺𑀲𑀫𑁆𑀪𑀺𑀤𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀳𑁂𑀢𑀼𑀧𑀝𑀺𑀲𑀫𑁆𑀪𑀺𑀤𑀸𑀧𑀸𑀧𑀦𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀳𑁂𑀢𑀼𑀧𑀝𑀺𑀲𑀫𑁆𑀪𑀺𑀤𑀸𑀬 𑀯𑀲𑀻𑀪𑀸𑀯𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀳𑁂𑀢𑀼𑀧𑀝𑀺𑀲𑀫𑁆𑀪𑀺𑀤𑀸𑀬 𑀯𑀲𑀻𑀪𑀸𑀯𑀧𑁆𑀧𑀢𑁆𑀢𑀸𑀦𑀫𑁆𑀧𑀺 𑀩𑁄𑀚𑁆𑀛𑀗𑁆𑀕𑀸.

𑀧𑀘𑁆𑀘𑀬𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀧𑀘𑁆𑀘𑀬𑀘𑀭𑀺𑀬𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀧𑀘𑁆𑀘𑀬𑀧𑀭𑀺𑀯𑀸𑀭𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀧𑀘𑁆𑀘𑀬𑀧𑀭𑀺𑀧𑀽𑀭𑀡𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀧𑀘𑁆𑀘𑀬𑀧𑀭𑀺𑀧𑀸𑀓𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀧𑀘𑁆𑀘𑀬𑀧𑀝𑀺𑀲𑀫𑁆𑀪𑀺𑀤𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀧𑀘𑁆𑀘𑀬𑀧𑀝𑀺𑀲𑀫𑁆𑀪𑀺𑀤𑀸𑀧𑀸𑀧𑀦𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀧𑀘𑁆𑀘𑀬𑀧𑀝𑀺𑀲𑀫𑁆𑀪𑀺𑀤𑀸𑀬 𑀯𑀲𑀻𑀪𑀸𑀯𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀧𑀘𑁆𑀘𑀬𑀧𑀝𑀺𑀲𑀫𑁆𑀪𑀺𑀤𑀸𑀬 𑀯𑀲𑀻𑀪𑀸𑀯𑀧𑁆𑀧𑀢𑁆𑀢𑀸𑀦𑀫𑁆𑀧𑀺 𑀩𑁄𑀚𑁆𑀛𑀗𑁆𑀕𑀸.

𑀯𑀺𑀲𑀼𑀤𑁆𑀥𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀯𑀺𑀲𑀼𑀤𑁆𑀥𑀺𑀘𑀭𑀺𑀬𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀯𑀺𑀲𑀼𑀤𑁆𑀥𑀺𑀧𑀭𑀺𑀕𑁆𑀕𑀳𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀯𑀺𑀲𑀼𑀤𑁆𑀥𑀺𑀧𑀭𑀺𑀯𑀸𑀭𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀯𑀺𑀲𑀼𑀤𑁆𑀥𑀺𑀧𑀭𑀺𑀧𑀽𑀭𑀡𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀯𑀺𑀲𑀼𑀤𑁆𑀥𑀺𑀧𑀭𑀺𑀧𑀸𑀓𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀯𑀺𑀲𑀼𑀤𑁆𑀥𑀺𑀧𑀝𑀺𑀲𑀫𑁆𑀪𑀺𑀤𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀯𑀺𑀲𑀼𑀤𑁆𑀥𑀺𑀧𑀝𑀺𑀲𑀫𑁆𑀪𑀺𑀤𑀸𑀧𑀸𑀧𑀦𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀯𑀺𑀲𑀼𑀤𑁆𑀥𑀺𑀧𑀝𑀺𑀲𑀫𑁆𑀪𑀺𑀤𑀸𑀬 𑀯𑀲𑀻𑀪𑀸𑀯𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀯𑀺𑀲𑀼𑀤𑁆𑀥𑀺𑀧𑀝𑀺𑀲𑀫𑁆𑀪𑀺𑀤𑀸𑀬 𑀯𑀲𑀻𑀪𑀸𑀯𑀧𑁆𑀧𑀢𑁆𑀢𑀸𑀦𑀫𑁆𑀧𑀺 𑀩𑁄𑀚𑁆𑀛𑀗𑁆𑀕𑀸.

𑀅𑀦𑀯𑀚𑁆𑀚𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀅𑀦𑀯𑀚𑁆𑀚𑀘𑀭𑀺𑀬𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀅𑀦𑀯𑀚𑁆𑀚𑀧𑀭𑀺𑀕𑁆𑀕𑀳𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀅𑀦𑀯𑀚𑁆𑀚𑀧𑀭𑀺𑀯𑀸𑀭𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀅𑀦𑀯𑀚𑁆𑀚𑀧𑀭𑀺𑀧𑀽𑀭𑀡𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀅𑀦𑀯𑀚𑁆𑀚𑀧𑀭𑀺𑀧𑀸𑀓𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀅𑀦𑀯𑀚𑁆𑀚𑀧𑀝𑀺𑀲𑀫𑁆𑀪𑀺𑀤𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀅𑀦𑀯𑀚𑁆𑀚𑀧𑀝𑀺𑀲𑀫𑁆𑀪𑀺𑀤𑀸𑀧𑀸𑀧𑀦𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀅𑀦𑀯𑀚𑁆𑀚𑀧𑀝𑀺𑀲𑀫𑁆𑀪𑀺𑀤𑀸𑀬 𑀯𑀲𑀻𑀪𑀸𑀯𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀅𑀦𑀯𑀚𑁆𑀚𑀧𑀝𑀺𑀲𑀫𑁆𑀪𑀺𑀤𑀸𑀬 𑀯𑀲𑀻𑀪𑀸𑀯𑀧𑁆𑀧𑀢𑁆𑀢𑀸𑀦𑀫𑁆𑀧𑀺 𑀩𑁄𑀚𑁆𑀛𑀗𑁆𑀕𑀸.

𑀦𑁂𑀓𑁆𑀔𑀫𑁆𑀫𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀦𑁂𑀓𑁆𑀔𑀫𑁆𑀫𑀘𑀭𑀺𑀬𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀦𑁂𑀓𑁆𑀔𑀫𑁆𑀫𑀧𑀭𑀺𑀕𑁆𑀕𑀳𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀦𑁂𑀓𑁆𑀔𑀫𑁆𑀫𑀧𑀭𑀺𑀯𑀸𑀭𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀦𑁂𑀓𑁆𑀔𑀫𑁆𑀫𑀧𑀭𑀺𑀧𑀽𑀭𑀡𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀦𑁂𑀓𑁆𑀔𑀫𑁆𑀫𑀧𑀭𑀺𑀧𑀸𑀓𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀦𑁂𑀓𑁆𑀔𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀦𑁂𑀓𑁆𑀔𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸𑀧𑀸𑀧𑀦𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀦𑁂𑀓𑁆𑀔𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸𑀬 𑀯𑀲𑀻𑀪𑀸𑀯𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀦𑁂𑀓𑁆𑀔𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸𑀬 𑀯𑀲𑀻𑀪𑀸𑀯𑀧𑁆𑀧𑀢𑁆𑀢𑀸𑀦𑀫𑁆𑀧𑀺 𑀩𑁄𑀚𑁆𑀛𑀗𑁆𑀕𑀸.

𑀯𑀺𑀫𑀼𑀢𑁆𑀢𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀯𑀺𑀫𑀼𑀢𑁆𑀢𑀺𑀘𑀭𑀺𑀬𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀯𑀺𑀫𑀼𑀢𑁆𑀢𑀺𑀧𑀭𑀺𑀕𑁆𑀕𑀳𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀯𑀺𑀫𑀼𑀢𑁆𑀢𑀺𑀧𑀭𑀺𑀯𑀸𑀭𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀽𑀭𑀡𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀓𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀯𑀺𑀫𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀯𑀺𑀫𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸𑀧𑀸𑀧𑀦𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀯𑀺𑀫𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸𑀬 𑀯𑀲𑀻𑀪𑀸𑀯𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀯𑀺𑀫𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸𑀬 𑀯𑀲𑀻𑀪𑀸𑀯𑀧𑁆𑀧𑀢𑁆𑀢𑀸𑀦𑀫𑁆𑀧𑀺 𑀩𑁄𑀚𑁆𑀛𑀗𑁆𑀕𑀸.

𑀅𑀦𑀸𑀲𑀯𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀅𑀦𑀸𑀲𑀯𑀘𑀭𑀺𑀬𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀅𑀦𑀸𑀲𑀯𑀧𑀭𑀺𑀕𑁆𑀕𑀳𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀅𑀦𑀸𑀲𑀯𑀧𑀭𑀺𑀯𑀸𑀭𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀅𑀦𑀸𑀲𑀯𑀧𑀭𑀺𑀧𑀽𑀭𑀡𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀅𑀦𑀸𑀲𑀯𑀧𑀭𑀺𑀧𑀸𑀓𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀅𑀦𑀸𑀲𑀯𑀧𑀝𑀺𑀲𑀫𑁆𑀪𑀺𑀤𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀅𑀦𑀸𑀲𑀯𑀧𑀝𑀺𑀲𑀫𑁆𑀪𑀺𑀤𑀸𑀧𑀸𑀧𑀦𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀅𑀦𑀸𑀲𑀯𑀧𑀝𑀺𑀲𑀫𑁆𑀪𑀺𑀤𑀸𑀬 𑀯𑀲𑀻𑀪𑀸𑀯𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀅𑀦𑀸𑀲𑀯𑀧𑀝𑀺𑀲𑀫𑁆𑀪𑀺𑀤𑀸𑀬 𑀯𑀲𑀻𑀪𑀸𑀯𑀧𑁆𑀧𑀢𑁆𑀢𑀸𑀦𑀫𑁆𑀧𑀺 𑀩𑁄𑀚𑁆𑀛𑀗𑁆𑀕𑀸.

𑀯𑀺𑀯𑁂𑀓𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀯𑀺𑀯𑁂𑀓𑀘𑀭𑀺𑀬𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀯𑀺𑀯𑁂𑀓𑀧𑀭𑀺𑀕𑁆𑀕𑀳𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀯𑀺𑀯𑁂𑀓𑀧𑀭𑀺𑀯𑀸𑀭𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀯𑀺𑀯𑁂𑀓𑀧𑀭𑀺𑀧𑀽𑀭𑀡𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀯𑀺𑀯𑁂𑀓𑀧𑀭𑀺𑀧𑀸𑀓𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀯𑀺𑀯𑁂𑀓𑀧𑀝𑀺𑀲𑀫𑁆𑀪𑀺𑀤𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀯𑀺𑀯𑁂𑀓𑀧𑀝𑀺𑀲𑀫𑁆𑀪𑀺𑀤𑀸𑀧𑀸𑀧𑀦𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀯𑀺𑀯𑁂𑀓𑀧𑀝𑀺𑀲𑀫𑁆𑀪𑀺𑀤𑀸𑀬 𑀯𑀲𑀻𑀪𑀸𑀯𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀯𑀺𑀯𑁂𑀓𑀧𑀝𑀺𑀲𑀫𑁆𑀪𑀺𑀤𑀸𑀬 𑀯𑀲𑀻𑀪𑀸𑀯𑀧𑁆𑀧𑀢𑁆𑀢𑀸𑀦𑀫𑁆𑀧𑀺 𑀩𑁄𑀚𑁆𑀛𑀗𑁆𑀕𑀸.

𑀯𑁄𑀲𑀕𑁆𑀕𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀯𑁄𑀲𑀕𑁆𑀕𑀘𑀭𑀺𑀬𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀯𑁄𑀲𑀕𑁆𑀕𑀧𑀭𑀺𑀕𑁆𑀕𑀳𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀯𑁄𑀲𑀕𑁆𑀕𑀧𑀭𑀺𑀯𑀸𑀭𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀯𑁄𑀲𑀕𑁆𑀕𑀧𑀭𑀺𑀧𑀽𑀭𑀡𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀯𑁄𑀲𑀕𑁆𑀕𑀧𑀭𑀺𑀧𑀸𑀓𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀯𑁄𑀲𑀕𑁆𑀕𑀧𑀝𑀺𑀲𑀫𑁆𑀪𑀺𑀤𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀯𑁄𑀲𑀕𑁆𑀕𑀧𑀝𑀺𑀲𑀫𑁆𑀪𑀺𑀤𑀸𑀧𑀸𑀧𑀦𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀯𑁄𑀲𑀕𑁆𑀕𑀧𑀝𑀺𑀲𑀫𑁆𑀪𑀺𑀤𑀸𑀬 𑀯𑀲𑀻𑀪𑀸𑀯𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸, 𑀯𑁄𑀲𑀕𑁆𑀕𑀧𑀝𑀺𑀲𑀫𑁆𑀪𑀺𑀤𑀸𑀬 𑀯𑀲𑀻𑀪𑀸𑀯𑀧𑁆𑀧𑀢𑁆𑀢𑀸𑀦𑀫𑁆𑀧𑀺 𑀩𑁄𑀚𑁆𑀛𑀗𑁆𑀕𑀸.

𑁧𑁯. 𑀫𑀽𑀮𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀳𑁂𑀢𑀼𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀧𑀘𑁆𑀘𑀬𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀯𑀺𑀲𑀼𑀤𑁆𑀥𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀅𑀦𑀯𑀚𑁆𑀚𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀦𑁂𑀓𑁆𑀔𑀫𑁆𑀫𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀯𑀺𑀫𑀼𑀢𑁆𑀢𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀅𑀦𑀸𑀲𑀯𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀯𑀺𑀯𑁂𑀓𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀯𑁄𑀲𑀕𑁆𑀕𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸.

𑀫𑀽𑀮𑀘𑀭𑀺𑀬𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀳𑁂𑀢𑀼𑀘𑀭𑀺𑀬𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀧𑀘𑁆𑀘𑀬𑀘𑀭𑀺𑀬𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀯𑀺𑀲𑀼𑀤𑁆𑀥𑀺𑀘𑀭𑀺𑀬𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀅𑀦𑀯𑀚𑁆𑀚𑀘𑀭𑀺𑀬𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀦𑁂𑀓𑁆𑀔𑀫𑁆𑀫𑀘𑀭𑀺𑀬𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀯𑀺𑀫𑀼𑀢𑁆𑀢𑀺𑀘𑀭𑀺𑀬𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀅𑀦𑀸𑀲𑀯𑀘𑀭𑀺𑀬𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀯𑀺𑀯𑁂𑀓𑀘𑀭𑀺𑀬𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀯𑁄𑀲𑀕𑁆𑀕𑀘𑀭𑀺𑀬𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸.

𑀫𑀽𑀮𑀧𑀭𑀺𑀕𑁆𑀕𑀳𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸…𑀧𑁂… 𑀯𑁄𑀲𑀕𑁆𑀕𑀧𑀭𑀺𑀕𑁆𑀕𑀳𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀫𑀽𑀮𑀧𑀭𑀺𑀯𑀸𑀭𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸…𑀧𑁂… 𑀯𑁄𑀲𑀕𑁆𑀕𑀧𑀭𑀺𑀯𑀸𑀭𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀫𑀽𑀮𑀧𑀭𑀺𑀧𑀽𑀭𑀡𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸…𑀧𑁂… 𑀯𑁄𑀲𑀕𑁆𑀕𑀧𑀭𑀺𑀧𑀽𑀭𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀫𑀽𑀮𑀧𑀭𑀺𑀧𑀸𑀓𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸…𑀧𑁂… 𑀯𑁄𑀲𑀕𑁆𑀕𑀧𑀭𑀺𑀧𑀸𑀓𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀫𑀽𑀮𑀧𑀝𑀺𑀲𑀫𑁆𑀪𑀺𑀤𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸…𑀧𑁂… 𑀯𑁄𑀲𑀕𑁆𑀕𑀧𑀝𑀺𑀲𑀫𑁆𑀪𑀺𑀤𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀫𑀽𑀮𑀧𑀝𑀺𑀲𑀫𑁆𑀪𑀺𑀤𑀸𑀧𑀸𑀧𑀦𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸…𑀧𑁂… 𑀯𑁄𑀲𑀕𑁆𑀕𑀧𑀝𑀺𑀲𑀫𑁆𑀪𑀺𑀤𑀸𑀧𑀸𑀧𑀦𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀫𑀽𑀮𑀧𑀝𑀺𑀲𑀫𑁆𑀪𑀺𑀤𑀸𑀬 𑀯𑀲𑀻𑀪𑀸𑀯𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸…𑀧𑁂… 𑀯𑁄𑀲𑀕𑁆𑀕𑀧𑀝𑀺𑀲𑀫𑁆𑀪𑀺𑀤𑀸𑀬 𑀯𑀲𑀻𑀪𑀸𑀯𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸…𑀧𑁂….

𑀧𑀭𑀺𑀕𑁆𑀕𑀳𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀧𑀭𑀺𑀯𑀸𑀭𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀧𑀭𑀺𑀧𑀽𑀭𑀡𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀏𑀓𑀕𑁆𑀕𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀅𑀯𑀺𑀓𑁆𑀔𑁂𑀧𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀧𑀕𑁆𑀕𑀳𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀅𑀯𑀺𑀲𑀸𑀭𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀅𑀦𑀸𑀯𑀺𑀮𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀅𑀦𑀺𑀜𑁆𑀚𑀦𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀏𑀓𑀢𑁆𑀢𑀼𑀧𑀝𑁆𑀞𑀸𑀦𑀯𑀲𑁂𑀦 𑀘𑀺𑀢𑁆𑀢𑀲𑁆𑀲 𑀞𑀺𑀢𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀆𑀭𑀫𑁆𑀫𑀡𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀕𑁄𑀘𑀭𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀧𑀳𑀸𑀦𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀧𑀭𑀺𑀘𑁆𑀘𑀸𑀕𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀯𑀼𑀝𑁆𑀞𑀸𑀦𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀯𑀺𑀯𑀝𑁆𑀝𑀦𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀲𑀦𑁆𑀢𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀧𑀡𑀻𑀢𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀯𑀺𑀫𑀼𑀢𑁆𑀢𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀅𑀦𑀸𑀲𑀯𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀢𑀭𑀡𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀅𑀦𑀺𑀫𑀺𑀢𑁆𑀢𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀅𑀧𑁆𑀧𑀡𑀺𑀳𑀺𑀢𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀲𑀼𑀜𑁆𑀜𑀢𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀏𑀓𑀭𑀲𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀅𑀦𑀢𑀺𑀯𑀢𑁆𑀢𑀦𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀬𑀼𑀕𑀦𑀤𑁆𑀥𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀦𑀺𑀬𑁆𑀬𑀸𑀦𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀳𑁂𑀢𑀼𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀤𑀲𑁆𑀲𑀦𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀆𑀥𑀺𑀧𑀢𑁂𑀬𑁆𑀬𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸.

𑀲𑀫𑀣𑀲𑁆𑀲 𑀅𑀯𑀺𑀓𑁆𑀔𑁂𑀧𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀯𑀺𑀧𑀲𑁆𑀲𑀦𑀸𑀬 𑀅𑀦𑀼𑀧𑀲𑁆𑀲𑀦𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀲𑀫𑀣𑀯𑀺𑀧𑀲𑁆𑀲𑀦𑀸𑀦𑀁 𑀏𑀓𑀭𑀲𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀬𑀼𑀕𑀦𑀤𑁆𑀥𑀲𑁆𑀲 𑀅𑀦𑀢𑀺𑀯𑀢𑁆𑀢𑀦𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀲𑀺𑀓𑁆𑀔𑀸𑀬 𑀲𑀫𑀸𑀤𑀸𑀦𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀆𑀭𑀫𑁆𑀫𑀡𑀲𑁆𑀲 𑀕𑁄𑀘𑀭𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀮𑀻𑀦𑀲𑁆𑀲 𑀘𑀺𑀢𑁆𑀢𑀲𑁆𑀲 𑀧𑀕𑁆𑀕𑀳𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀉𑀤𑁆𑀥𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀦𑀺𑀕𑁆𑀕𑀳𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀉𑀪𑁄𑀯𑀺𑀲𑀼𑀤𑁆𑀥𑀸𑀦𑀁 𑀅𑀚𑁆𑀛𑀼𑀧𑁂𑀓𑁆𑀔𑀦𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀯𑀺𑀲𑁂𑀲𑀸𑀥𑀺𑀕𑀫𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀉𑀢𑁆𑀢𑀭𑀺 𑀧𑀝𑀺𑀯𑁂𑀥𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀲𑀘𑁆𑀘𑀸𑀪𑀺𑀲𑀫𑀬𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀦𑀺𑀭𑁄𑀥𑁂 𑀧𑀢𑀺𑀝𑁆𑀞𑀸𑀧𑀓𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸.

𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀅𑀥𑀺𑀫𑁄𑀓𑁆𑀔𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸…𑀧𑁂… 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀲𑁆𑀲 𑀤𑀲𑁆𑀲𑀦𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀲𑀤𑁆𑀥𑀸𑀩𑀮𑀲𑁆𑀲 𑀅𑀲𑁆𑀲𑀤𑁆𑀥𑀺𑀬𑁂 𑀅𑀓𑀫𑁆𑀧𑀺𑀬𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸…𑀧𑁂… 𑀧𑀜𑁆𑀜𑀸𑀩𑀮𑀲𑁆𑀲 𑀅𑀯𑀺𑀚𑁆𑀚𑀸𑀬 𑀅𑀓𑀫𑁆𑀧𑀺𑀬𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑀝𑁆𑀞𑀸𑀦𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸…𑀧𑁂… 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀧𑀝𑀺𑀲𑀗𑁆𑀔𑀸𑀦𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀤𑀲𑁆𑀲𑀦𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸…𑀧𑁂… 𑀲𑀫𑁆𑀫𑀸𑀲𑀫𑀸𑀥𑀺𑀲𑁆𑀲 𑀅𑀯𑀺𑀓𑁆𑀔𑁂𑀧𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸.

𑀇𑀦𑁆𑀤𑁆𑀭𑀺𑀬𑀸𑀦𑀁 𑀆𑀥𑀺𑀧𑀢𑁂𑀬𑁆𑀬𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀩𑀮𑀸𑀦𑀁 𑀅𑀓𑀫𑁆𑀧𑀺𑀬𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀦𑀺𑀬𑁆𑀬𑀸𑀦𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀫𑀕𑁆𑀕𑀲𑁆𑀲 𑀳𑁂𑀢𑀼𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀲𑀢𑀺𑀧𑀝𑁆𑀞𑀸𑀦𑀸𑀦𑀁 𑀉𑀧𑀝𑁆𑀞𑀸𑀦𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀲𑀫𑁆𑀫𑀧𑁆𑀧𑀥𑀸𑀦𑀸𑀦𑀁 𑀧𑀤𑀳𑀦𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀇𑀤𑁆𑀥𑀺𑀧𑀸𑀤𑀸𑀦𑀁 𑀇𑀚𑁆𑀛𑀦𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀲𑀘𑁆𑀘𑀸𑀦𑀁 𑀢𑀣𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀧𑀬𑁄𑀕𑀸𑀦𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀨𑀮𑀸𑀦𑀁 𑀲𑀘𑁆𑀙𑀺𑀓𑀺𑀭𑀺𑀬𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸.

𑀯𑀺𑀢𑀓𑁆𑀓𑀲𑁆𑀲 𑀅𑀪𑀺𑀦𑀺𑀭𑁄𑀧𑀦𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀯𑀺𑀘𑀸𑀭𑀲𑁆𑀲 𑀉𑀧𑀯𑀺𑀘𑀸𑀭𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀧𑀻𑀢𑀺𑀬𑀸 𑀨𑀭𑀡𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀲𑀼𑀔𑀲𑁆𑀲 𑀅𑀪𑀺𑀲𑀦𑁆𑀤𑀦𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸.

𑀆𑀯𑀚𑁆𑀚𑀦𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀯𑀺𑀚𑀸𑀦𑀦𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀧𑀚𑀸𑀦𑀦𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀲𑀜𑁆𑀚𑀸𑀦𑀦𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀏𑀓𑁄𑀤𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀅𑀪𑀺𑀜𑁆𑀜𑀸𑀬 𑀜𑀸𑀢𑀝𑁆𑀞𑀁 [𑀅𑀪𑀺𑀜𑁆𑀜𑁂𑀬𑁆𑀬𑀢𑁆𑀣𑀁 (𑀲𑁆𑀬𑀸.)] 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀧𑀭𑀺𑀜𑁆𑀜𑀸𑀬 𑀢𑀻𑀭𑀡𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀧𑀳𑀸𑀦𑀲𑁆𑀲 𑀧𑀭𑀺𑀘𑁆𑀘𑀸𑀕𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀪𑀸𑀯𑀦𑀸𑀬 𑀏𑀓𑀭𑀲𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀨𑀲𑁆𑀲𑀦𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀔𑀦𑁆𑀥𑀸𑀦𑀁 𑀔𑀦𑁆𑀥𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀥𑀸𑀢𑀽𑀦𑀁 𑀥𑀸𑀢𑀼𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀆𑀬𑀢𑀦𑀸𑀦𑀁 𑀆𑀬𑀢𑀦𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀲𑀗𑁆𑀔𑀢𑀸𑀦𑀁 𑀲𑀗𑁆𑀔𑀢𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀅𑀲𑀗𑁆𑀔𑀢𑀲𑁆𑀲 𑀅𑀲𑀗𑁆𑀔𑀢𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸.

𑀘𑀺𑀢𑁆𑀢𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀘𑀺𑀢𑁆𑀢𑀸𑀦𑀦𑁆𑀢𑀭𑀺𑀬𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀘𑀺𑀢𑁆𑀢𑀲𑁆𑀲 𑀯𑀼𑀝𑁆𑀞𑀸𑀦𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀘𑀺𑀢𑁆𑀢𑀲𑁆𑀲 𑀯𑀺𑀯𑀝𑁆𑀝𑀦𑀝𑁆𑀞𑀁 [𑀯𑀺𑀯𑀚𑁆𑀚𑀦𑀝𑁆𑀞𑀁 (𑀲𑁆𑀬𑀸.)] 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀘𑀺𑀢𑁆𑀢𑀲𑁆𑀲 𑀳𑁂𑀢𑀼𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀘𑀺𑀢𑁆𑀢𑀲𑁆𑀲 𑀧𑀘𑁆𑀘𑀬𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀘𑀺𑀢𑁆𑀢𑀲𑁆𑀲 𑀯𑀢𑁆𑀣𑀼𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀘𑀺𑀢𑁆𑀢𑀲𑁆𑀲 𑀪𑀽𑀫𑀝𑁆𑀞𑀁 [𑀪𑀼𑀫𑁆𑀫𑀝𑁆𑀞𑀁 (𑀲𑁆𑀬𑀸.) 𑀧𑀝𑀺. 𑀫. 𑁧.𑁧𑁪 𑀧𑀲𑁆𑀲𑀺𑀢𑀩𑁆𑀩𑀸] 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀘𑀺𑀢𑁆𑀢𑀲𑁆𑀲 𑀆𑀭𑀫𑁆𑀫𑀡𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀘𑀺𑀢𑁆𑀢𑀲𑁆𑀲 𑀕𑁄𑀘𑀭𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀘𑀺𑀢𑁆𑀢𑀲𑁆𑀲 𑀘𑀭𑀺𑀬𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀘𑀺𑀢𑁆𑀢𑀲𑁆𑀲 𑀕𑀢𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀘𑀺𑀢𑁆𑀢𑀲𑁆𑀲 𑀅𑀪𑀺𑀦𑀻𑀳𑀸𑀭𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀘𑀺𑀢𑁆𑀢𑀲𑁆𑀲 𑀦𑀺𑀬𑁆𑀬𑀸𑀦𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀘𑀺𑀢𑁆𑀢𑀲𑁆𑀲 𑀦𑀺𑀲𑁆𑀲𑀭𑀡𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸.

𑀏𑀓𑀢𑁆𑀢𑁂 𑀆𑀯𑀚𑁆𑀚𑀦𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀏𑀓𑀢𑁆𑀢𑁂 𑀯𑀺𑀚𑀸𑀦𑀦𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀏𑀓𑀢𑁆𑀢𑁂 𑀧𑀚𑀸𑀦𑀦𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀏𑀓𑀢𑁆𑀢𑁂 𑀲𑀜𑁆𑀚𑀸𑀦𑀦𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀏𑀓𑀢𑁆𑀢𑁂 𑀏𑀓𑁄𑀤𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. ( ) [(𑀏𑀓𑀢𑁆𑀢𑁂 𑀉𑀧𑀦𑀺𑀩𑀦𑁆𑀥𑀦𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸) (𑀲𑀩𑁆𑀩𑀢𑁆𑀣)]. 𑀏𑀓𑀢𑁆𑀢𑁂 𑀧𑀓𑁆𑀔𑀦𑁆𑀤𑀦𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀏𑀓𑀢𑁆𑀢𑁂 𑀧𑀲𑀻𑀤𑀦𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀏𑀓𑀢𑁆𑀢𑁂 𑀲𑀦𑁆𑀢𑀺𑀝𑁆𑀞𑀦𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀏𑀓𑀢𑁆𑀢𑁂 𑀯𑀺𑀫𑀼𑀘𑁆𑀘𑀦𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀏𑀓𑀢𑁆𑀢𑁂 𑀏𑀢𑀁 𑀲𑀦𑁆𑀢𑀦𑁆𑀢𑀺 𑀧𑀲𑁆𑀲𑀦𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀏𑀓𑀢𑁆𑀢𑁂 𑀬𑀸𑀦𑀻𑀓𑀢𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀏𑀓𑀢𑁆𑀢𑁂 𑀯𑀢𑁆𑀣𑀼𑀓𑀢𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀏𑀓𑀢𑁆𑀢𑁂 𑀅𑀦𑀼𑀝𑁆𑀞𑀺𑀢𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀏𑀓𑀢𑁆𑀢𑁂 𑀧𑀭𑀺𑀘𑀺𑀢𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀏𑀓𑀢𑁆𑀢𑁂 𑀲𑀼𑀲𑀫𑀸𑀭𑀤𑁆𑀥𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀏𑀓𑀢𑁆𑀢𑁂 𑀧𑀭𑀺𑀕𑁆𑀕𑀳𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀏𑀓𑀢𑁆𑀢𑁂 𑀧𑀭𑀺𑀯𑀸𑀭𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀏𑀓𑀢𑁆𑀢𑁂 𑀧𑀭𑀺𑀧𑀽𑀭𑀡𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀏𑀓𑀢𑁆𑀢𑁂 𑀲𑀫𑁄𑀥𑀸𑀦𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀏𑀓𑀢𑁆𑀢𑁂 𑀅𑀥𑀺𑀝𑁆𑀞𑀸𑀦𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀏𑀓𑀢𑁆𑀢𑁂 𑀆𑀲𑁂𑀯𑀦𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀏𑀓𑀢𑁆𑀢𑁂 𑀪𑀸𑀯𑀦𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀏𑀓𑀢𑁆𑀢𑁂 𑀩𑀳𑀼𑀮𑀻𑀓𑀫𑁆𑀫𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀏𑀓𑀢𑁆𑀢𑁂 𑀲𑀼𑀲𑀫𑀼𑀕𑁆𑀕𑀢𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀏𑀓𑀢𑁆𑀢𑁂 𑀲𑀼𑀯𑀺𑀫𑀼𑀢𑁆𑀢𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀏𑀓𑀢𑁆𑀢𑁂 𑀩𑀼𑀚𑁆𑀛𑀦𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀏𑀓𑀢𑁆𑀢𑁂 𑀅𑀦𑀼𑀩𑀼𑀚𑁆𑀛𑀦𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀏𑀓𑀢𑁆𑀢𑁂 𑀧𑀝𑀺𑀩𑀼𑀚𑁆𑀛𑀦𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀏𑀓𑀢𑁆𑀢𑁂 𑀲𑀫𑁆𑀩𑀼𑀚𑁆𑀛𑀦𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀏𑀓𑀢𑁆𑀢𑁂 𑀩𑁄𑀥𑀦𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀏𑀓𑀢𑁆𑀢𑁂 𑀅𑀦𑀼𑀩𑁄𑀥𑀦𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀏𑀓𑀢𑁆𑀢𑁂 𑀧𑀝𑀺𑀩𑁄𑀥𑀦𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀏𑀓𑀢𑁆𑀢𑁂 𑀲𑀫𑁆𑀩𑀼𑀚𑁆𑀛𑀦𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀏𑀓𑀢𑁆𑀢𑁂 𑀩𑁄𑀥𑀺𑀧𑀓𑁆𑀔𑀺𑀬𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀏𑀓𑀢𑁆𑀢𑁂 𑀅𑀦𑀼𑀩𑁄𑀥𑀺𑀧𑀓𑁆𑀔𑀺𑀬𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀏𑀓𑀢𑁆𑀢𑁂 𑀧𑀝𑀺𑀩𑁄𑀥𑀺𑀧𑀓𑁆𑀔𑀺𑀬𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀏𑀓𑀢𑁆𑀢𑁂 𑀲𑀫𑁆𑀩𑁄𑀥𑀺𑀧𑀓𑁆𑀔𑀺𑀬𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀏𑀓𑀢𑁆𑀢𑁂 𑀚𑁄𑀢𑀦𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀏𑀓𑀢𑁆𑀢𑁂 𑀉𑀚𑁆𑀚𑁄𑀢𑀦𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀏𑀓𑀢𑁆𑀢𑁂 𑀅𑀦𑀼𑀚𑁄𑀢𑀦𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀏𑀓𑀢𑁆𑀢𑁂 𑀧𑀝𑀺𑀚𑁄𑀢𑀦𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀏𑀓𑀢𑁆𑀢𑁂 𑀲𑀜𑁆𑀚𑁄𑀢𑀦𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸.

𑀧𑀢𑀸𑀧𑀦𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀯𑀺𑀭𑁄𑀘𑀦𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀓𑀺𑀮𑁂𑀲𑀸𑀦𑀁 𑀲𑀦𑁆𑀢𑀸𑀧𑀦𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀅𑀫𑀮𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀯𑀺𑀫𑀮𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀦𑀺𑀫𑁆𑀫𑀮𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀲𑀫𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀲𑀫𑀬𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀯𑀺𑀯𑁂𑀓𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀯𑀺𑀯𑁂𑀓𑀘𑀭𑀺𑀬𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀯𑀺𑀭𑀸𑀕𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀯𑀺𑀭𑀸𑀕𑀘𑀭𑀺𑀬𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀦𑀺𑀭𑁄𑀥𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀦𑀺𑀭𑁄𑀥𑀘𑀭𑀺𑀬𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀯𑁄𑀲𑀕𑁆𑀕𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀯𑁄𑀲𑀕𑁆𑀕𑀘𑀭𑀺𑀬𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀯𑀺𑀫𑀼𑀢𑁆𑀢𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀯𑀺𑀫𑀼𑀢𑁆𑀢𑀺𑀘𑀭𑀺𑀬𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸.

𑀙𑀦𑁆𑀤𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀙𑀦𑁆𑀤𑀲𑁆𑀲 𑀫𑀽𑀮𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀙𑀦𑁆𑀤𑀲𑁆𑀲 𑀧𑀸𑀤𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀙𑀦𑁆𑀤𑀲𑁆𑀲 𑀧𑀥𑀸𑀦𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀙𑀦𑁆𑀤𑀲𑁆𑀲 𑀇𑀚𑁆𑀛𑀦𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀙𑀦𑁆𑀤𑀲𑁆𑀲 𑀅𑀥𑀺𑀫𑁄𑀓𑁆𑀔𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀙𑀦𑁆𑀤𑀲𑁆𑀲 𑀧𑀕𑁆𑀕𑀳𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀙𑀦𑁆𑀤𑀲𑁆𑀲 𑀉𑀧𑀝𑁆𑀞𑀸𑀦𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀙𑀦𑁆𑀤𑀲𑁆𑀲 𑀅𑀯𑀺𑀓𑁆𑀔𑁂𑀧𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀙𑀦𑁆𑀤𑀲𑁆𑀲 𑀤𑀲𑁆𑀲𑀦𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸.

𑀯𑀻𑀭𑀺𑀬𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸…𑀧𑁂… 𑀘𑀺𑀢𑁆𑀢𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸…𑀧𑁂… 𑀯𑀻𑀫𑀁𑀲𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀯𑀻𑀫𑀁𑀲𑀸𑀬 𑀫𑀽𑀮𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀯𑀻𑀫𑀁𑀲𑀸𑀬 𑀧𑀸𑀤𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀯𑀻𑀫𑀁𑀲𑀸𑀬 𑀧𑀥𑀸𑀦𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀯𑀻𑀫𑀁𑀲𑀸𑀬 𑀇𑀚𑁆𑀛𑀦𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀯𑀻𑀫𑀁𑀲𑀸𑀬 𑀅𑀥𑀺𑀫𑁄𑀓𑁆𑀔𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀯𑀻𑀫𑀁𑀲𑀸𑀬 𑀧𑀕𑁆𑀕𑀳𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀯𑀻𑀫𑀁𑀲𑀸𑀬 𑀉𑀧𑀝𑁆𑀞𑀸𑀦𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀯𑀻𑀫𑀁𑀲𑀸𑀬 𑀅𑀯𑀺𑀓𑁆𑀔𑁂𑀧𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀯𑀻𑀫𑀁𑀲𑀸𑀬 𑀤𑀲𑁆𑀲𑀦𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸.

𑀤𑀼𑀓𑁆𑀔𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀤𑀼𑀓𑁆𑀔𑀲𑁆𑀲 𑀧𑀻𑀴𑀦𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀤𑀼𑀓𑁆𑀔𑀲𑁆𑀲 𑀲𑀗𑁆𑀔𑀢𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀤𑀼𑀓𑁆𑀔𑀲𑁆𑀲 𑀲𑀦𑁆𑀢𑀸𑀧𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀤𑀼𑀓𑁆𑀔𑀲𑁆𑀲 𑀯𑀺𑀧𑀭𑀺𑀡𑀸𑀫𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀲𑀫𑀼𑀤𑀬𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀲𑀫𑀼𑀤𑀬𑀲𑁆𑀲 𑀆𑀬𑀽𑀳𑀦𑀝𑁆𑀞𑀁 𑀦𑀺𑀤𑀸𑀦𑀝𑁆𑀞𑀁 𑀲𑀜𑁆𑀜𑁄𑀕𑀝𑁆𑀞𑀁 𑀧𑀮𑀺𑀩𑁄𑀥𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀦𑀺𑀭𑁄𑀥𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀦𑀺𑀭𑁄𑀥𑀲𑁆𑀲 𑀦𑀺𑀲𑁆𑀲𑀭𑀡𑀝𑁆𑀞𑀁 𑀯𑀺𑀯𑁂𑀓𑀝𑁆𑀞𑀁 𑀅𑀲𑀗𑁆𑀔𑀢𑀝𑁆𑀞𑀁 𑀅𑀫𑀢𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀫𑀕𑁆𑀕𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀫𑀕𑁆𑀕𑀲𑁆𑀲 𑀦𑀺𑀬𑁆𑀬𑀸𑀦𑀝𑁆𑀞𑀁 𑀳𑁂𑀢𑀼𑀝𑁆𑀞𑀁 𑀤𑀲𑁆𑀲𑀦𑀝𑁆𑀞𑀁 𑀆𑀥𑀺𑀧𑀢𑁂𑀬𑁆𑀬𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸.

𑀢𑀣𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀅𑀦𑀢𑁆𑀢𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀲𑀘𑁆𑀘𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀧𑀝𑀺𑀯𑁂𑀥𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀅𑀪𑀺𑀚𑀸𑀦𑀦𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀧𑀭𑀺𑀚𑀸𑀦𑀦𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀥𑀫𑁆𑀫𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀥𑀸𑀢𑀼𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀜𑀸𑀢𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀲𑀘𑁆𑀙𑀺𑀓𑀺𑀭𑀺𑀬𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀨𑀲𑁆𑀲𑀦𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀅𑀪𑀺𑀲𑀫𑀬𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸.

𑀦𑁂𑀓𑁆𑀔𑀫𑁆𑀫𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀅𑀩𑁆𑀬𑀸𑀧𑀸𑀤𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀆𑀮𑁄𑀓𑀲𑀜𑁆𑀜𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀅𑀯𑀺𑀓𑁆𑀔𑁂𑀧𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀥𑀫𑁆𑀫𑀯𑀯𑀢𑁆𑀣𑀸𑀦𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀜𑀸𑀡𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀧𑀸𑀫𑁄𑀚𑁆𑀚𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀧𑀞𑀫𑀁 𑀛𑀸𑀦𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸…𑀧𑁂… 𑀅𑀭𑀳𑀢𑁆𑀢𑀫𑀕𑁆𑀕𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀅𑀭𑀳𑀢𑁆𑀢𑀨𑀮𑀲𑀫𑀸𑀧𑀢𑁆𑀢𑀺𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸.

𑀅𑀥𑀺𑀫𑁄𑀓𑁆𑀔𑀝𑁆𑀞𑁂𑀦 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸…𑀧𑁂… 𑀤𑀲𑁆𑀲𑀦𑀝𑁆𑀞𑁂𑀦 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀅𑀲𑁆𑀲𑀤𑁆𑀥𑀺𑀬𑁂 𑀅𑀓𑀫𑁆𑀧𑀺𑀬𑀝𑁆𑀞𑁂𑀦 𑀲𑀤𑁆𑀥𑀸𑀩𑀮𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸…𑀧𑁂… 𑀅𑀯𑀺𑀚𑁆𑀚𑀸𑀬 𑀅𑀓𑀫𑁆𑀧𑀺𑀬𑀝𑁆𑀞𑁂𑀦 𑀧𑀜𑁆𑀜𑀸𑀩𑀮𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀉𑀧𑀝𑁆𑀞𑀸𑀦𑀝𑁆𑀞𑁂𑀦 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸…𑀧𑁂… 𑀧𑀝𑀺𑀲𑀗𑁆𑀔𑀸𑀦𑀝𑁆𑀞𑁂𑀦 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸.

𑀤𑀲𑁆𑀲𑀦𑀝𑁆𑀞𑁂𑀦 𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸…𑀧𑁂… 𑀅𑀯𑀺𑀓𑁆𑀔𑁂𑀧𑀝𑁆𑀞𑁂𑀦 𑀲𑀫𑁆𑀫𑀸𑀲𑀫𑀸𑀥𑀺𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀆𑀥𑀺𑀧𑀢𑁂𑀬𑁆𑀬𑀝𑁆𑀞𑁂𑀦 𑀇𑀦𑁆𑀤𑁆𑀭𑀺𑀬𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀅𑀓𑀫𑁆𑀧𑀺𑀬𑀝𑁆𑀞𑁂𑀦 𑀩𑀮𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀦𑀺𑀬𑁆𑀬𑀸𑀦𑀝𑁆𑀞𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀳𑁂𑀢𑀼𑀝𑁆𑀞𑁂𑀦 𑀫𑀕𑁆𑀕𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀉𑀧𑀝𑁆𑀞𑀸𑀦𑀝𑁆𑀞𑁂𑀦 𑀲𑀢𑀺𑀧𑀝𑁆𑀞𑀸𑀦𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀧𑀤𑀳𑀦𑀝𑁆𑀞𑁂𑀦 𑀲𑀫𑁆𑀫𑀧𑁆𑀧𑀥𑀸𑀦𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀇𑀚𑁆𑀛𑀦𑀝𑁆𑀞𑁂𑀦 𑀇𑀤𑁆𑀥𑀺𑀧𑀸𑀤𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀢𑀣𑀝𑁆𑀞𑁂𑀦 𑀲𑀘𑁆𑀘𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀅𑀯𑀺𑀓𑁆𑀔𑁂𑀧𑀝𑁆𑀞𑁂𑀦 𑀲𑀫𑀣𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀅𑀦𑀼𑀧𑀲𑁆𑀲𑀦𑀝𑁆𑀞𑁂 𑀯𑀺𑀧𑀲𑁆𑀲𑀦𑀁 …𑀧𑁂… 𑀏𑀓𑀭𑀲𑀝𑁆𑀞𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀅𑀦𑀢𑀺𑀯𑀢𑁆𑀢𑀦𑀝𑁆𑀞𑁂𑀦 𑀬𑀼𑀕𑀦𑀤𑁆𑀥𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀲𑀁𑀯𑀭𑀝𑁆𑀞𑁂𑀦 𑀲𑀻𑀮𑀯𑀺𑀲𑀼𑀤𑁆𑀥𑀺𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀅𑀯𑀺𑀓𑁆𑀔𑁂𑀧𑀝𑁆𑀞𑁂𑀦 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀺𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀤𑀲𑁆𑀲𑀦𑀝𑁆𑀞𑁂𑀦 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀫𑀼𑀢𑁆𑀢𑀝𑁆𑀞𑁂𑀦 𑀯𑀺𑀫𑁄𑀓𑁆𑀔𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀧𑀝𑀺𑀯𑁂𑀥𑀝𑁆𑀞𑁂𑀦 𑀯𑀺𑀚𑁆𑀚𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀧𑀭𑀺𑀘𑁆𑀘𑀸𑀕𑀝𑁆𑀞𑁂𑀦 𑀯𑀺𑀫𑀼𑀢𑁆𑀢𑀺𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀲𑀫𑀼𑀘𑁆𑀙𑁂𑀤𑀝𑁆𑀞𑁂𑀦 𑀔𑀬𑁂 𑀜𑀸𑀡𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀝𑁆𑀞𑁂𑀦 𑀅𑀦𑀼𑀧𑁆𑀧𑀸𑀤𑁂 𑀜𑀸𑀡𑀁 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸.

𑀙𑀦𑁆𑀤𑀁 𑀫𑀽𑀮𑀝𑁆𑀞𑁂𑀦 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀫𑀦𑀲𑀺𑀓𑀸𑀭𑀁 𑀲𑀫𑀼𑀝𑁆𑀞𑀸𑀦𑀝𑁆𑀞𑁂𑀦 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀨𑀲𑁆𑀲𑀁 𑀲𑀫𑁄𑀥𑀸𑀦𑀝𑁆𑀞𑁂𑀦 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀯𑁂𑀤𑀦𑀁 𑀲𑀫𑁄𑀲𑀭𑀡𑀝𑁆𑀞𑁂𑀦 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀲𑀫𑀸𑀥𑀺𑀁 𑀧𑀫𑀼𑀔𑀝𑁆𑀞𑁂𑀦 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀲𑀢𑀺𑀁 𑀆𑀥𑀺𑀧𑀢𑁂𑀬𑁆𑀬𑀝𑁆𑀞𑁂𑀦 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀧𑀜𑁆𑀜𑀁 𑀢𑀢𑀼𑀢𑁆𑀢𑀭𑀝𑁆𑀞𑁂𑀦 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀯𑀺𑀫𑀼𑀢𑁆𑀢𑀺𑀁 𑀲𑀸𑀭𑀝𑁆𑀞𑁂𑀦 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸. 𑀅𑀫𑀢𑁄𑀕𑀥𑀁 𑀦𑀺𑀩𑁆𑀩𑀸𑀦𑀁 𑀧𑀭𑀺𑀬𑁄𑀲𑀸𑀦𑀝𑁆𑀞𑁂𑀦 𑀩𑀼𑀚𑁆𑀛𑀦𑁆𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑀸.

𑁨𑁦. 𑀲𑀸𑀯𑀢𑁆𑀣𑀺𑀦𑀺𑀤𑀸𑀦𑀁. 𑀢𑀢𑁆𑀭 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀆𑀯𑀼𑀲𑁄 𑀪𑀺𑀓𑁆𑀔𑀯𑁄’’𑀢𑀺 [𑀆𑀯𑀼𑀲𑁄𑀢𑀺 (𑀲𑁆𑀬𑀸.) 𑀲𑀁. 𑀦𑀺. 𑁫.𑁧𑁮𑁫 𑀧𑀲𑁆𑀲𑀺𑀢𑀩𑁆𑀩𑀸]. ‘‘𑀆𑀯𑀼𑀲𑁄’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀏𑀢𑀤𑀯𑁄𑀘 𑁋

‘‘𑀲𑀢𑁆𑀢𑀺𑀫𑁂, 𑀆𑀯𑀼𑀲𑁄, 𑀩𑁄𑀚𑁆𑀛𑀗𑁆𑀕𑀸. 𑀓𑀢𑀫𑁂 𑀲𑀢𑁆𑀢? 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄…𑀧𑁂… 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑁋 𑀇𑀫𑁂 𑀔𑁄, 𑀆𑀯𑀼𑀲𑁄, 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸. 𑀇𑀫𑁂𑀲𑀁 𑀔𑁆𑀯𑀸𑀳𑀁, 𑀆𑀯𑀼𑀲𑁄, 𑀲𑀢𑁆𑀢𑀦𑁆𑀦𑀁 𑀩𑁄𑀚𑁆𑀛𑀗𑁆𑀕𑀸𑀦𑀁 𑀬𑁂𑀦 𑀬𑁂𑀦 𑀩𑁄𑀚𑁆𑀛𑀗𑁆𑀕𑁂𑀦 𑀆𑀓𑀗𑁆𑀔𑀸𑀫𑀺 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀯𑀺𑀳𑀭𑀺𑀢𑀼𑀁, 𑀢𑁂𑀦 𑀢𑁂𑀦 𑀩𑁄𑀚𑁆𑀛𑀗𑁆𑀕𑁂𑀦 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀯𑀺𑀳𑀭𑀸𑀫𑀺. 𑀬𑁂𑀦 𑀬𑁂𑀦 𑀩𑁄𑀚𑁆𑀛𑀗𑁆𑀕𑁂𑀦 𑀆𑀓𑀗𑁆𑀔𑀸𑀫𑀺 𑀫𑀚𑁆𑀛𑀦𑁆𑀳𑀺𑀓𑀲𑀫𑀬𑀁…𑀧𑁂… 𑀲𑀸𑀬𑀦𑁆𑀳𑀲𑀫𑀬𑀁 𑀯𑀺𑀳𑀭𑀺𑀢𑀼𑀁, 𑀢𑁂𑀦 𑀢𑁂𑀦 𑀩𑁄𑀚𑁆𑀛𑀗𑁆𑀕𑁂𑀦 𑀲𑀸𑀬𑀦𑁆𑀳𑀲𑀫𑀬𑀁 𑀯𑀺𑀳𑀭𑀸𑀫𑀺. 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀇𑀢𑀺 𑀘𑁂 𑀫𑁂, ‘𑀆𑀯𑀼𑀲𑁄, 𑀳𑁄𑀢𑀺, 𑀅𑀧𑁆𑀧𑀫𑀸𑀡𑁄’𑀢𑀺 𑀫𑁂 𑀳𑁄𑀢𑀺, ‘𑀲𑀼𑀲𑀫𑀸𑀭𑀤𑁆𑀥𑁄’𑀢𑀺 𑀫𑁂 𑀳𑁄𑀢𑀺. 𑀢𑀺𑀝𑁆𑀞𑀦𑁆𑀢𑀜𑁆𑀘 𑀦𑀁 [𑀢𑀺𑀝𑁆𑀞𑀦𑁆𑀢𑀁 𑀘𑀭𑀁 (𑀲𑁆𑀬𑀸.) 𑀲𑀁. 𑀦𑀺. 𑁫.𑁧𑁮𑁫 𑀧𑀲𑁆𑀲𑀺𑀢𑀩𑁆𑀩𑀸] ‘𑀢𑀺𑀝𑁆𑀞𑀢𑀻’𑀢𑀺 𑀧𑀚𑀸𑀦𑀸𑀫𑀺. 𑀲𑀘𑁂𑀧𑀺 𑀫𑁂 𑀘𑀯𑀢𑀺, ‘𑀇𑀤𑀧𑁆𑀧𑀘𑁆𑀘𑀬𑀸 𑀫𑁂 𑀘𑀯𑀢𑀻’𑀢𑀺 𑀧𑀚𑀸𑀦𑀸𑀫𑀺. 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄…𑀧𑁂… 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀇𑀢𑀺 𑀘𑁂 𑀫𑁂, 𑀆𑀯𑀼𑀲𑁄, 𑀳𑁄𑀢𑀺, ‘𑀅𑀧𑁆𑀧𑀫𑀸𑀡𑁄’𑀢𑀺 𑀫𑁂 𑀳𑁄𑀢𑀺, ‘𑀲𑀼𑀲𑀫𑀸𑀭𑀤𑁆𑀥𑁄’𑀢𑀺 𑀫𑁂 𑀳𑁄𑀢𑀺. 𑀢𑀺𑀝𑁆𑀞𑀦𑁆𑀢𑀜𑁆𑀘 𑀦𑀁 ‘𑀢𑀺𑀝𑁆𑀞𑀢𑀻’𑀢𑀺 𑀧𑀚𑀸𑀦𑀸𑀫𑀺. 𑀲𑀘𑁂𑀧𑀺 𑀫𑁂 𑀘𑀯𑀢𑀺, ‘𑀇𑀤𑀧𑁆𑀧𑀘𑁆𑀘𑀬𑀸 𑀫𑁂 𑀘𑀯𑀢𑀻’𑀢𑀺 𑀧𑀚𑀸𑀦𑀸𑀫𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀆𑀯𑀼𑀲𑁄, 𑀭𑀜𑁆𑀜𑁄 𑀯𑀸 𑀭𑀸𑀚𑀫𑀳𑀸𑀫𑀢𑁆𑀢𑀲𑁆𑀲 𑀯𑀸 𑀦𑀸𑀦𑀸𑀭𑀢𑁆𑀢𑀸𑀦𑀁 𑀤𑀼𑀲𑁆𑀲𑀸𑀦𑀁 𑀤𑀼𑀲𑁆𑀲𑀓𑀭𑀡𑁆𑀟𑀓𑁄 𑀧𑀽𑀭𑁄 𑀅𑀲𑁆𑀲. 𑀲𑁄 𑀬𑀜𑁆𑀜𑀤𑁂𑀯 𑀤𑀼𑀲𑁆𑀲𑀬𑀼𑀕𑀁 𑀆𑀓𑀗𑁆𑀔𑁂𑀬𑁆𑀬 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀧𑀸𑀭𑀼𑀧𑀺𑀢𑀼𑀁, 𑀢𑀁 𑀢𑀤𑁂𑀯 𑀤𑀼𑀲𑁆𑀲𑀬𑀼𑀕𑀁 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀧𑀸𑀭𑀼𑀧𑁂𑀬𑁆𑀬. 𑀬𑀜𑁆𑀜𑀤𑁂𑀯 𑀤𑀼𑀲𑁆𑀲𑀬𑀼𑀕𑀁 𑀆𑀓𑀗𑁆𑀔𑁂𑀬𑁆𑀬 𑀫𑀚𑁆𑀛𑀦𑁆𑀳𑀺𑀓𑀲𑀫𑀬𑀁…𑀧𑁂… 𑀲𑀸𑀬𑀦𑁆𑀳𑀲𑀫𑀬𑀁 𑀧𑀸𑀭𑀼𑀧𑀺𑀢𑀼𑀁, 𑀢𑀁 𑀢𑀤𑁂𑀯 𑀤𑀼𑀲𑁆𑀲𑀬𑀼𑀕𑀁 𑀲𑀸𑀬𑀦𑁆𑀳𑀲𑀫𑀬𑀁 𑀧𑀸𑀭𑀼𑀧𑁂𑀬𑁆𑀬. 𑀏𑀯𑀫𑁂𑀯 𑀔𑁆𑀯𑀸𑀳𑀁, 𑀆𑀯𑀼𑀲𑁄, 𑀇𑀫𑁂𑀲𑀁 𑀲𑀢𑁆𑀢𑀦𑁆𑀦𑀁 𑀩𑁄𑀚𑁆𑀛𑀗𑁆𑀕𑀸𑀦𑀁 𑀬𑁂𑀦 𑀬𑁂𑀦 𑀩𑁄𑀚𑁆𑀛𑀗𑁆𑀕𑁂𑀦 𑀆𑀓𑀗𑁆𑀔𑀸𑀫𑀺 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀯𑀺𑀳𑀭𑀺𑀢𑀼𑀁, 𑀢𑁂𑀦 𑀢𑁂𑀦 𑀩𑁄𑀚𑁆𑀛𑀗𑁆𑀕𑁂𑀦 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀯𑀺𑀳𑀭𑀸𑀫𑀺. 𑀬𑁂𑀦 𑀬𑁂𑀦 𑀩𑁄𑀚𑁆𑀛𑀗𑁆𑀕𑁂𑀦 𑀆𑀓𑀗𑁆𑀔𑀸𑀫𑀺 𑀫𑀚𑁆𑀛𑀦𑁆𑀳𑀺𑀓𑀲𑀫𑀬𑀁…𑀧𑁂… 𑀲𑀸𑀬𑀦𑁆𑀳𑀲𑀫𑀬𑀁 𑀯𑀺𑀳𑀭𑀺𑀢𑀼𑀁, 𑀢𑁂𑀦 𑀢𑁂𑀦 𑀩𑁄𑀚𑁆𑀛𑀗𑁆𑀕𑁂𑀦 𑀲𑀸𑀬𑀦𑁆𑀳𑀲𑀫𑀬𑀁 𑀯𑀺𑀳𑀭𑀸𑀫𑀺. 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀇𑀢𑀺 𑀘𑁂 𑀫𑁂, 𑀆𑀯𑀼𑀲𑁄, 𑀳𑁄𑀢𑀺, ‘𑀅𑀧𑁆𑀧𑀫𑀸𑀡𑁄’𑀢𑀺 𑀫𑁂 𑀳𑁄𑀢𑀺, ‘𑀲𑀼𑀲𑀫𑀸𑀭𑀤𑁆𑀥𑁄’𑀢𑀺 𑀫𑁂 𑀳𑁄𑀢𑀺. 𑀢𑀺𑀝𑁆𑀞𑀦𑁆𑀢𑀜𑁆𑀘 𑀦𑀁 ‘𑀢𑀺𑀝𑁆𑀞𑀢𑀻’𑀢𑀺 𑀧𑀚𑀸𑀦𑀸𑀫𑀺. 𑀲𑀘𑁂𑀧𑀺 𑀫𑁂 𑀘𑀯𑀢𑀺, ‘𑀇𑀤𑀧𑁆𑀧𑀘𑁆𑀘𑀬𑀸 𑀫𑁂 𑀘𑀯𑀢𑀻’𑀢𑀺 𑀧𑀚𑀸𑀦𑀸𑀫𑀺…𑀧𑁂… 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀇𑀢𑀺 𑀘𑁂 𑀫𑁂, 𑀆𑀯𑀼𑀲𑁄, 𑀳𑁄𑀢𑀺, ‘𑀅𑀧𑁆𑀧𑀫𑀸𑀡𑁄’𑀢𑀺 𑀫𑁂 𑀳𑁄𑀢𑀺, ‘𑀲𑀼𑀲𑀫𑀸𑀭𑀤𑁆𑀥𑁄’𑀢𑀺 𑀫𑁂 𑀳𑁄𑀢𑀺. 𑀢𑀺𑀝𑁆𑀞𑀦𑁆𑀢𑀜𑁆𑀘 𑀦𑀁 ‘𑀢𑀺𑀝𑁆𑀞𑀢𑀻’𑀢𑀺 𑀧𑀚𑀸𑀦𑀸𑀫𑀺. 𑀲𑀘𑁂𑀧𑀺 𑀫𑁂 𑀘𑀯𑀢𑀺, ‘𑀇𑀤𑀧𑁆𑀧𑀘𑁆𑀘𑀬𑀸 𑀫𑁂 𑀘𑀯𑀢𑀻’𑀢𑀺 𑀧𑀚𑀸𑀦𑀸𑀫𑀺’’.

𑀲𑀼𑀢𑁆𑀢𑀦𑁆𑀢𑀦𑀺𑀤𑁆𑀤𑁂𑀲𑁄

𑁨𑁧. 𑀓𑀣𑀁 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀇𑀢𑀺 𑀘𑁂 𑀫𑁂 𑀳𑁄𑀢𑀻𑀢𑀺 𑀩𑁄𑀚𑁆𑀛𑀗𑁆𑀕𑁄? 𑀬𑀸𑀯𑀢𑀸 𑀦𑀺𑀭𑁄𑀥𑀽𑀧𑀝𑁆𑀞𑀸𑀢𑀺 𑀢𑀸𑀯𑀢𑀸 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄. 𑀇𑀢𑀺 𑀘𑁂 𑀫𑁂 𑀳𑁄𑀢𑀻𑀢𑀺 𑀩𑁄𑀚𑁆𑀛𑀗𑁆𑀕𑁄. 𑀲𑁂𑀬𑁆𑀬𑀣𑀸𑀧𑀺 𑀢𑁂𑀮𑀧𑁆𑀧𑀤𑀻𑀧𑀲𑁆𑀲 𑀛𑀸𑀬𑀢𑁄 𑀬𑀸𑀯𑀢𑀸 𑀅𑀘𑁆𑀘𑀺 𑀢𑀸𑀯𑀢𑀸 𑀯𑀡𑁆𑀡𑁄, 𑀬𑀸𑀯𑀢𑀸 𑀯𑀡𑁆𑀡𑁄 𑀢𑀸𑀯𑀢𑀸 𑀅𑀘𑁆𑀘𑀺. 𑀏𑀯𑀫𑁂𑀯 𑀬𑀸𑀯𑀢𑀸 𑀦𑀺𑀭𑁄𑀥𑀽𑀧𑀝𑁆𑀞𑀸𑀢𑀺 𑀢𑀸𑀯𑀢𑀸 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄. 𑀇𑀢𑀺 𑀘𑁂 𑀫𑁂 𑀳𑁄𑀢𑀻𑀢𑀺 𑀩𑁄𑀚𑁆𑀛𑀗𑁆𑀕𑁄.

𑀓𑀣𑀁 𑀅𑀧𑁆𑀧𑀫𑀸𑀡𑁄 𑀇𑀢𑀺 𑀘𑁂 𑀫𑁂 𑀳𑁄𑀢𑀻𑀢𑀺 𑀩𑁄𑀚𑁆𑀛𑀗𑁆𑀕𑁄? 𑀧𑀫𑀸𑀡𑀩𑀤𑁆𑀥𑀸 [𑀧𑀫𑀸𑀡𑀯𑀦𑁆𑀢𑀸 (𑀲𑁆𑀬𑀸.), 𑀅𑀝𑁆𑀞𑀓𑀣𑀸 𑀑𑀮𑁄𑀓𑁂𑀢𑀩𑁆𑀩𑀸] 𑀓𑀺𑀮𑁂𑀲𑀸, 𑀲𑀩𑁆𑀩𑁂 𑀘 𑀧𑀭𑀺𑀬𑀼𑀝𑁆𑀞𑀸𑀦𑀸, 𑀬𑁂 𑀘 𑀲𑀗𑁆𑀔𑀸𑀭𑀸 𑀧𑁄𑀦𑁄𑀪𑀯𑀺𑀓𑀸 𑀅𑀧𑁆𑀧𑀫𑀸𑀡𑁄 𑀦𑀺𑀭𑁄𑀥𑁄 𑀅𑀘𑀮𑀝𑁆𑀞𑁂𑀦 𑀅𑀲𑀗𑁆𑀔𑀢𑀝𑁆𑀞𑁂𑀦. 𑀬𑀸𑀯𑀢𑀸 𑀦𑀺𑀭𑁄𑀥𑀽𑀧𑀝𑁆𑀞𑀸𑀢𑀺 𑀢𑀸𑀯𑀢𑀸 𑀅𑀧𑁆𑀧𑀫𑀸𑀡𑁄. 𑀇𑀢𑀺 𑀘𑁂 𑀫𑁂 𑀳𑁄𑀢𑀻𑀢𑀺 𑀩𑁄𑀚𑁆𑀛𑀗𑁆𑀕𑁄.

𑀓𑀣𑀁 𑀲𑀼𑀲𑀫𑀸𑀭𑀤𑁆𑀥𑁄 𑀇𑀢𑀺 𑀘𑁂 𑀫𑁂 𑀳𑁄𑀢𑀻𑀢𑀺 𑁋 𑀩𑁄𑀚𑁆𑀛𑀗𑁆𑀕𑁄? 𑀯𑀺𑀲𑀫𑀸 𑀓𑀺𑀮𑁂𑀲𑀸, 𑀲𑀩𑁆𑀩𑁂 𑀘 𑀧𑀭𑀺𑀬𑀼𑀝𑁆𑀞𑀸𑀦𑀸, 𑀬𑁂 𑀘 𑀲𑀗𑁆𑀔𑀸𑀭𑀸 𑀧𑁄𑀦𑁄𑀪𑀯𑀺𑀓𑀸, 𑀲𑀫𑀥𑀫𑁆𑀫𑁄 𑀦𑀺𑀭𑁄𑀥𑁄 𑀲𑀦𑁆𑀢𑀝𑁆𑀞𑁂𑀦 𑀧𑀡𑀻𑀢𑀝𑁆𑀞𑁂𑀦. 𑀬𑀸𑀯𑀢𑀸 𑀦𑀺𑀭𑁄𑀥𑀽𑀧𑀝𑁆𑀞𑀸𑀢𑀺 𑀢𑀸𑀯𑀢𑀸 𑀲𑀼𑀲𑀫𑀸𑀭𑀤𑁆𑀥𑁄 𑀇𑀢𑀺 𑀘𑁂 𑀫𑁂 𑀳𑁄𑀢𑀻𑀢𑀺 𑀩𑁄𑀚𑁆𑀛𑀗𑁆𑀕𑁄.

𑀓𑀣𑀁 ‘‘𑀢𑀺𑀝𑁆𑀞𑀦𑁆𑀢𑀜𑁆𑀘 𑀦𑀁 𑀢𑀺𑀝𑁆𑀞𑀢𑀻’’𑀢𑀺 𑀧𑀚𑀸𑀦𑀸𑀫𑀺; 𑀲𑀘𑁂𑀧𑀺 𑀘𑀯𑀢𑀺 ‘‘𑀇𑀤𑀧𑁆𑀧𑀘𑁆𑀘𑀬𑀸 𑀘𑀯𑀢𑀻’’𑀢𑀺 𑀧𑀚𑀸𑀦𑀸𑀫𑀺? 𑀓𑀢𑀺𑀳𑀸𑀓𑀸𑀭𑁂𑀳𑀺 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀢𑀺𑀝𑁆𑀞𑀢𑀺? 𑀓𑀢𑀺𑀳𑀸𑀓𑀸𑀭𑁂𑀳𑀺 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀘𑀯𑀢𑀺? 𑀅𑀝𑁆𑀞𑀳𑀸𑀓𑀸𑀭𑁂𑀳𑀺 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀢𑀺𑀝𑁆𑀞𑀢𑀺. 𑀅𑀝𑁆𑀞𑀳𑀸𑀓𑀸𑀭𑁂𑀳𑀺 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀘𑀯𑀢𑀺.

𑀓𑀢𑀫𑁂𑀳𑀺 𑀅𑀝𑁆𑀞𑀳𑀸𑀓𑀸𑀭𑁂𑀳𑀺 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀢𑀺𑀝𑁆𑀞𑀢𑀺? 𑀅𑀦𑀼𑀧𑁆𑀧𑀸𑀤𑀁 𑀆𑀯𑀚𑁆𑀚𑀺𑀢𑀢𑁆𑀢𑀸 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀢𑀺𑀝𑁆𑀞𑀢𑀺, 𑀉𑀧𑁆𑀧𑀸𑀤𑀁 𑀅𑀦𑀸𑀯𑀚𑁆𑀚𑀺𑀢𑀢𑁆𑀢𑀸 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀢𑀺𑀝𑁆𑀞𑀢𑀺, 𑀅𑀧𑁆𑀧𑀯𑀢𑁆𑀢𑀁 𑀆𑀯𑀚𑁆𑀚𑀺𑀢𑀢𑁆𑀢𑀸 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀢𑀺𑀝𑁆𑀞𑀢𑀺, 𑀧𑀯𑀢𑁆𑀢𑀁 𑀅𑀦𑀸𑀯𑀚𑁆𑀚𑀺𑀢𑀢𑁆𑀢𑀸 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀢𑀺𑀝𑁆𑀞𑀢𑀺, 𑀅𑀦𑀺𑀫𑀺𑀢𑁆𑀢𑀁 𑀆𑀯𑀚𑁆𑀚𑀺𑀢𑀢𑁆𑀢𑀸 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀢𑀺𑀝𑁆𑀞𑀢𑀺, 𑀦𑀺𑀫𑀺𑀢𑁆𑀢𑀁 𑀅𑀦𑀸𑀯𑀚𑁆𑀚𑀺𑀢𑀢𑁆𑀢𑀸 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀢𑀺𑀝𑁆𑀞𑀢𑀺, 𑀦𑀺𑀭𑁄𑀥𑀁 𑀆𑀯𑀚𑁆𑀚𑀺𑀢𑀢𑁆𑀢𑀸 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀢𑀺𑀝𑁆𑀞𑀢𑀺, 𑀲𑀗𑁆𑀔𑀸𑀭𑁂 𑀅𑀦𑀸𑀯𑀚𑁆𑀚𑀺𑀢𑀢𑁆𑀢𑀸 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀢𑀺𑀝𑁆𑀞𑀢𑀺 𑁋 𑀇𑀫𑁂𑀳𑀺 𑀅𑀝𑁆𑀞𑀳𑀸𑀓𑀸𑀭𑁂𑀳𑀺 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀢𑀺𑀝𑁆𑀞𑀢𑀺.

𑀓𑀢𑀫𑁂𑀳𑀺 𑀅𑀝𑁆𑀞𑀳𑀸𑀓𑀸𑀭𑁂𑀳𑀺 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀘𑀯𑀢𑀺? 𑀉𑀧𑁆𑀧𑀸𑀤𑀁 𑀆𑀯𑀚𑁆𑀚𑀺𑀢𑀢𑁆𑀢𑀸 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀘𑀯𑀢𑀺, 𑀅𑀦𑀼𑀧𑁆𑀧𑀸𑀤𑀁 𑀅𑀦𑀸𑀯𑀚𑁆𑀚𑀺𑀢𑀢𑁆𑀢𑀸 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀘𑀯𑀢𑀺, 𑀧𑀯𑀢𑁆𑀢𑀁 𑀆𑀯𑀚𑁆𑀚𑀺𑀢𑀢𑁆𑀢𑀸 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀘𑀯𑀢𑀺, 𑀅𑀧𑁆𑀧𑀯𑀢𑁆𑀢𑀁 𑀅𑀦𑀸𑀯𑀚𑁆𑀚𑀺𑀢𑀢𑁆𑀢𑀸 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀘𑀯𑀢𑀺, 𑀦𑀺𑀫𑀺𑀢𑁆𑀢𑀁 𑀆𑀯𑀚𑁆𑀚𑀺𑀢𑀢𑁆𑀢𑀸 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀘𑀯𑀢𑀺, 𑀅𑀦𑀺𑀫𑀺𑀢𑁆𑀢𑀁 𑀅𑀦𑀸𑀯𑀚𑁆𑀚𑀺𑀢𑀢𑁆𑀢𑀸 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀘𑀯𑀢𑀺, 𑀲𑀗𑁆𑀔𑀸𑀭𑁂 𑀆𑀯𑀚𑁆𑀚𑀺𑀢𑀢𑁆𑀢𑀸 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀘𑀯𑀢𑀺, 𑀦𑀺𑀭𑁄𑀥𑀁 𑀅𑀦𑀸𑀯𑀚𑁆𑀚𑀺𑀢𑀢𑁆𑀢𑀸 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀘𑀯𑀢𑀺 𑁋 𑀇𑀫𑁂𑀳𑀺 𑀅𑀝𑁆𑀞𑀳𑀸𑀓𑀸𑀭𑁂𑀳𑀺 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀘𑀯𑀢𑀺. 𑀏𑀯𑀁 ‘‘𑀢𑀺𑀝𑁆𑀞𑀦𑁆𑀢𑀜𑁆𑀘 𑀦𑀁 𑀢𑀺𑀝𑁆𑀞𑀢𑀻’’𑀢𑀺 𑀧𑀚𑀸𑀦𑀸𑀫𑀺. 𑀲𑀘𑁂𑀧𑀺 𑀘𑀯𑀢𑀺, ‘‘𑀇𑀤𑀧𑁆𑀧𑀘𑁆𑀘𑀬𑀸 𑀫𑁂 𑀘𑀯𑀢𑀻’’𑀢𑀺 𑀧𑀚𑀸𑀦𑀸𑀫𑀺…𑀧𑁂….