𑁪. 𑀫𑀕𑁆𑀕𑀗𑁆𑀕𑀯𑀸𑀭𑁄

𑁨𑁬. 𑀲𑀩𑁆𑀩𑁂 𑀲𑀢𑁆𑀢𑀸 𑀅𑀯𑁂𑀭𑀺𑀦𑁄 𑀳𑁄𑀦𑁆𑀢𑀼, 𑀔𑁂𑀫𑀺𑀦𑁄 𑀳𑁄𑀦𑁆𑀢𑀼, 𑀲𑀼𑀔𑀺𑀦𑁄 𑀳𑁄𑀦𑁆𑀢𑀽𑀢𑀺 𑁋 𑀲𑀫𑁆𑀫𑀸 𑀧𑀲𑁆𑀲𑀢𑀺. 𑀲𑀫𑁆𑀫𑀸𑀤𑀺𑀝𑁆𑀞𑀺𑀧𑀭𑀺𑀪𑀸𑀯𑀺𑀢𑀸 𑀳𑁄𑀢𑀺 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺.

𑀲𑀩𑁆𑀩𑁂 𑀲𑀢𑁆𑀢𑀸 𑀅𑀯𑁂𑀭𑀺𑀦𑁄 𑀳𑁄𑀦𑁆𑀢𑀼, 𑀔𑁂𑀫𑀺𑀦𑁄 𑀳𑁄𑀦𑁆𑀢𑀼, 𑀲𑀼𑀔𑀺𑀦𑁄 𑀳𑁄𑀦𑁆𑀢𑀽𑀢𑀺 𑁋 𑀲𑀫𑁆𑀫𑀸 𑀅𑀪𑀺𑀦𑀺𑀭𑁄𑀧𑁂𑀢𑀺. 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀧𑀭𑀺𑀪𑀸𑀯𑀺𑀢𑀸 𑀳𑁄𑀢𑀺 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺.

𑀲𑀩𑁆𑀩𑁂 𑀲𑀢𑁆𑀢𑀸 𑀅𑀯𑁂𑀭𑀺𑀦𑁄 𑀳𑁄𑀦𑁆𑀢𑀼, 𑀔𑁂𑀫𑀺𑀦𑁄 𑀳𑁄𑀦𑁆𑀢𑀼, 𑀲𑀼𑀔𑀺𑀦𑁄 𑀳𑁄𑀦𑁆𑀢𑀽𑀢𑀺 𑁋 𑀲𑀫𑁆𑀫𑀸 𑀧𑀭𑀺𑀕𑁆𑀕𑀡𑁆𑀳𑀸𑀢𑀺. 𑀲𑀫𑁆𑀫𑀸𑀯𑀸𑀘𑀸𑀧𑀭𑀺𑀪𑀸𑀯𑀺𑀢𑀸 𑀳𑁄𑀢𑀺 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺.

𑀲𑀩𑁆𑀩𑁂 𑀲𑀢𑁆𑀢𑀸 𑀅𑀯𑁂𑀭𑀺𑀦𑁄 𑀳𑁄𑀦𑁆𑀢𑀼, 𑀔𑁂𑀫𑀺𑀦𑁄 𑀳𑁄𑀦𑁆𑀢𑀼, 𑀲𑀼𑀔𑀺𑀦𑁄 𑀳𑁄𑀦𑁆𑀢𑀽𑀢𑀺 𑁋 𑀲𑀫𑁆𑀫𑀸 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀧𑀭𑀺𑀪𑀸𑀯𑀺𑀢𑀸 𑀳𑁄𑀢𑀺 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺.

𑀲𑀩𑁆𑀩𑁂 𑀲𑀢𑁆𑀢𑀸 𑀅𑀯𑁂𑀭𑀺𑀦𑁄 𑀳𑁄𑀦𑁆𑀢𑀼, 𑀔𑁂𑀫𑀺𑀦𑁄 𑀳𑁄𑀦𑁆𑀢𑀼, 𑀲𑀼𑀔𑀺𑀦𑁄 𑀳𑁄𑀦𑁆𑀢𑀽𑀢𑀺 𑁋 𑀲𑀫𑁆𑀫𑀸 𑀯𑁄𑀤𑀸𑀧𑁂𑀢𑀺. 𑀲𑀫𑁆𑀫𑀸𑀆𑀚𑀻𑀯𑀧𑀭𑀺𑀪𑀸𑀯𑀺𑀢𑀸 𑀳𑁄𑀢𑀺 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺.

𑀲𑀩𑁆𑀩𑁂 𑀲𑀢𑁆𑀢𑀸 𑀅𑀯𑁂𑀭𑀺𑀦𑁄 𑀳𑁄𑀦𑁆𑀢𑀼, 𑀔𑁂𑀫𑀺𑀦𑁄 𑀳𑁄𑀦𑁆𑀢𑀼, 𑀲𑀼𑀔𑀺𑀦𑁄 𑀳𑁄𑀦𑁆𑀢𑀽𑀢𑀺 𑁋 𑀲𑀫𑁆𑀫𑀸 𑀧𑀕𑁆𑀕𑀡𑁆𑀳𑀸𑀢𑀺. 𑀲𑀫𑁆𑀫𑀸𑀯𑀸𑀬𑀸𑀫𑀧𑀭𑀺𑀪𑀸𑀯𑀺𑀢𑀸 𑀳𑁄𑀢𑀺 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺.

𑀲𑀩𑁆𑀩𑁂 𑀲𑀢𑁆𑀢𑀸 𑀅𑀯𑁂𑀭𑀺𑀦𑁄 𑀳𑁄𑀦𑁆𑀢𑀼, 𑀔𑁂𑀫𑀺𑀦𑁄 𑀳𑁄𑀦𑁆𑀢𑀼, 𑀲𑀼𑀔𑀺𑀦𑁄 𑀳𑁄𑀦𑁆𑀢𑀽𑀢𑀺 𑁋 𑀲𑀫𑁆𑀫𑀸 𑀉𑀧𑀝𑁆𑀞𑀸𑀧𑁂𑀢𑀺. 𑀲𑀫𑁆𑀫𑀸𑀲𑀢𑀺𑀧𑀭𑀺𑀪𑀸𑀯𑀺𑀢𑀸 𑀳𑁄𑀢𑀺 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺.

𑀲𑀩𑁆𑀩𑁂 𑀲𑀢𑁆𑀢𑀸 𑀅𑀯𑁂𑀭𑀺𑀦𑁄 𑀳𑁄𑀦𑁆𑀢𑀼, 𑀔𑁂𑀫𑀺𑀦𑁄 𑀳𑁄𑀦𑁆𑀢𑀼, 𑀲𑀼𑀔𑀺𑀦𑁄 𑀳𑁄𑀦𑁆𑀢𑀽𑀢𑀺 𑁋 𑀲𑀫𑁆𑀫𑀸 𑀲𑀫𑀸𑀤𑀳𑀢𑀺. 𑀲𑀫𑁆𑀫𑀸𑀲𑀫𑀸𑀥𑀺𑀧𑀭𑀺𑀪𑀸𑀯𑀺𑀢𑀸 𑀳𑁄𑀢𑀺 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺.

𑀇𑀫𑁂 𑀅𑀝𑁆𑀞 𑀫𑀕𑁆𑀕𑀗𑁆𑀕𑀸 𑀫𑁂𑀢𑁆𑀢𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀆𑀲𑁂𑀯𑀦𑀸 𑀳𑁄𑀦𑁆𑀢𑀺. 𑀇𑀫𑁂𑀳𑀺 𑀅𑀝𑁆𑀞𑀳𑀺 𑀫𑀕𑁆𑀕𑀗𑁆𑀕𑁂𑀳𑀺 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀆𑀲𑁂𑀯𑀻𑀬𑀢𑀺. 𑀇𑀫𑁂 𑀅𑀝𑁆𑀞 𑀫𑀕𑁆𑀕𑀗𑁆𑀕𑀸 𑀫𑁂𑀢𑁆𑀢𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀪𑀸𑀯𑀦𑀸 𑀳𑁄𑀦𑁆𑀢𑀺. 𑀇𑀫𑁂𑀳𑀺 𑀅𑀝𑁆𑀞𑀳𑀺 𑀫𑀕𑁆𑀕𑀗𑁆𑀕𑁂𑀳𑀺 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀪𑀸𑀯𑀻𑀬𑀢𑀺. 𑀇𑀫𑁂 𑀅𑀝𑁆𑀞 𑀫𑀕𑁆𑀕𑀗𑁆𑀕𑀸 𑀫𑁂𑀢𑁆𑀢𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀩𑀳𑀼𑀮𑀻𑀓𑀢𑀸 𑀳𑁄𑀦𑁆𑀢𑀺. 𑀇𑀫𑁂𑀳𑀺 𑀅𑀝𑁆𑀞𑀳𑀺 𑀫𑀕𑁆𑀕𑀗𑁆𑀕𑁂𑀳𑀺 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀩𑀳𑀼𑀮𑀻𑀓𑀭𑀻𑀬𑀢𑀺. 𑀇𑀫𑁂 𑀅𑀝𑁆𑀞 𑀫𑀕𑁆𑀕𑀗𑁆𑀕𑀸 𑀫𑁂𑀢𑁆𑀢𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀅𑀮𑀗𑁆𑀓𑀸𑀭𑀸 𑀳𑁄𑀦𑁆𑀢𑀺. 𑀇𑀫𑁂𑀳𑀺 𑀅𑀝𑁆𑀞𑀳𑀺 𑀫𑀕𑁆𑀕𑀗𑁆𑀕𑁂𑀳𑀺 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀲𑁆𑀯𑀸𑀮𑀗𑁆𑀓𑀢𑀸 𑀳𑁄𑀦𑁆𑀢𑀺. 𑀇𑀫𑁂 𑀅𑀝𑁆𑀞 𑀫𑀕𑁆𑀕𑀗𑁆𑀕𑀸 𑀫𑁂𑀢𑁆𑀢𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀧𑀭𑀺𑀓𑁆𑀔𑀸𑀭𑀸 𑀳𑁄𑀦𑁆𑀢𑀺. 𑀇𑀫𑁂𑀳𑀺 𑀅𑀝𑁆𑀞𑀳𑀺 𑀫𑀕𑁆𑀕𑀗𑁆𑀕𑁂𑀳𑀺 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀲𑀼𑀧𑀭𑀺𑀓𑁆𑀔𑀢𑀸 𑀳𑁄𑀢𑀺. 𑀇𑀫𑁂 𑀅𑀝𑁆𑀞 𑀫𑀕𑁆𑀕𑀗𑁆𑀕𑀸 𑀫𑁂𑀢𑁆𑀢𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀧𑀭𑀺𑀯𑀸𑀭𑀸 𑀳𑁄𑀦𑁆𑀢𑀺. 𑀇𑀫𑁂𑀳𑀺 𑀅𑀝𑁆𑀞𑀳𑀺 𑀫𑀕𑁆𑀕𑀗𑁆𑀕𑁂𑀳𑀺 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀲𑀼𑀧𑀭𑀺𑀯𑀼𑀢𑀸 𑀳𑁄𑀢𑀺. 𑀇𑀫𑁂 𑀅𑀝𑁆𑀞 𑀫𑀕𑁆𑀕𑀗𑁆𑀕𑀸 𑀫𑁂𑀢𑁆𑀢𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀆𑀲𑁂𑀯𑀦𑀸 𑀳𑁄𑀦𑁆𑀢𑀺, 𑀪𑀸𑀯𑀦𑀸 𑀳𑁄𑀦𑁆𑀢𑀺, 𑀩𑀳𑀼𑀮𑀻𑀓𑀢𑀸 𑀳𑁄𑀦𑁆𑀢𑀺, 𑀅𑀮𑀗𑁆𑀓𑀸𑀭𑀸 𑀳𑁄𑀦𑁆𑀢𑀺, 𑀧𑀭𑀺𑀓𑁆𑀔𑀸𑀭𑀸 𑀳𑁄𑀦𑁆𑀢𑀺, 𑀧𑀭𑀺𑀯𑀸𑀭𑀸 𑀳𑁄𑀦𑁆𑀢𑀺, 𑀧𑀸𑀭𑀺𑀧𑀽𑀭𑀻 𑀳𑁄𑀦𑁆𑀢𑀺, 𑀲𑀳𑀕𑀢𑀸 𑀳𑁄𑀦𑁆𑀢𑀺, 𑀲𑀳𑀚𑀸𑀢𑀸 𑀳𑁄𑀦𑁆𑀢𑀺, 𑀲𑀁𑀲𑀝𑁆𑀞𑀸 𑀳𑁄𑀦𑁆𑀢𑀺, 𑀲𑀫𑁆𑀧𑀬𑀼𑀢𑁆𑀢𑀸 𑀳𑁄𑀦𑁆𑀢𑀺, 𑀧𑀓𑁆𑀔𑀦𑁆𑀤𑀦𑀸 𑀳𑁄𑀦𑁆𑀢𑀺, 𑀧𑀲𑀻𑀤𑀦𑀸 𑀳𑁄𑀦𑁆𑀢𑀺, 𑀲𑀦𑁆𑀢𑀺𑀝𑁆𑀞𑀦𑀸 𑀳𑁄𑀦𑁆𑀢𑀺, 𑀯𑀺𑀫𑀼𑀘𑁆𑀘𑀦𑀸 𑀳𑁄𑀦𑁆𑀢𑀺, ‘‘𑀏𑀢𑀁 𑀲𑀦𑁆𑀢’’𑀦𑁆𑀢𑀺 𑀨𑀲𑁆𑀲𑀦𑀸 𑀳𑁄𑀦𑁆𑀢𑀺, 𑀬𑀸𑀦𑀻𑀓𑀢𑀸 𑀳𑁄𑀦𑁆𑀢𑀺, 𑀯𑀢𑁆𑀣𑀼𑀓𑀢𑀸 𑀳𑁄𑀦𑁆𑀢𑀺, 𑀅𑀦𑀼𑀝𑁆𑀞𑀺𑀢𑀸 𑀳𑁄𑀦𑁆𑀢𑀺, 𑀧𑀭𑀺𑀘𑀺𑀢𑀸 𑀳𑁄𑀦𑁆𑀢𑀺, 𑀲𑀼𑀲𑀫𑀸𑀭𑀤𑁆𑀥𑀸 𑀳𑁄𑀦𑁆𑀢𑀺, 𑀲𑀼𑀪𑀸𑀯𑀺𑀢𑀸 𑀳𑁄𑀦𑁆𑀢𑀺, 𑀲𑁆𑀯𑀸𑀥𑀺𑀝𑁆𑀞𑀺𑀢𑀸 𑀳𑁄𑀦𑁆𑀢𑀺, 𑀲𑀼𑀲𑀫𑀼𑀕𑁆𑀕𑀢𑀸 𑀳𑁄𑀦𑁆𑀢𑀺, 𑀲𑀼𑀯𑀺𑀫𑀼𑀢𑁆𑀢𑀸 𑀳𑁄𑀦𑁆𑀢𑀺 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺 𑀚𑁄𑀢𑁂𑀦𑁆𑀢𑀺 𑀧𑀢𑀸𑀧𑁂𑀦𑁆𑀢𑀺.

𑁨𑁭. 𑀲𑀩𑁆𑀩𑁂𑀲𑀁 𑀧𑀸𑀡𑀸𑀦𑀁…𑀧𑁂… 𑀲𑀩𑁆𑀩𑁂𑀲𑀁 𑀪𑀽𑀢𑀸𑀦𑀁… 𑀲𑀩𑁆𑀩𑁂𑀲𑀁 𑀧𑀼𑀕𑁆𑀕𑀮𑀸𑀦𑀁… 𑀲𑀩𑁆𑀩𑁂𑀲𑀁 𑀅𑀢𑁆𑀢𑀪𑀸𑀯𑀧𑀭𑀺𑀬𑀸𑀧𑀦𑁆𑀦𑀸𑀦𑀁… 𑀲𑀩𑁆𑀩𑀸𑀲𑀁 𑀇𑀢𑁆𑀣𑀻𑀦𑀁… 𑀲𑀩𑁆𑀩𑁂𑀲𑀁 𑀧𑀼𑀭𑀺𑀲𑀸𑀦𑀁… 𑀲𑀩𑁆𑀩𑁂𑀲𑀁 𑀅𑀭𑀺𑀬𑀸𑀦𑀁… 𑀲𑀩𑁆𑀩𑁂𑀲𑀁 𑀅𑀦𑀭𑀺𑀬𑀸𑀦𑀁… 𑀲𑀩𑁆𑀩𑁂𑀲𑀁 𑀤𑁂𑀯𑀸𑀦𑀁… 𑀲𑀩𑁆𑀩𑁂𑀲𑀁 𑀫𑀦𑀼𑀲𑁆𑀲𑀸𑀦𑀁… 𑀲𑀩𑁆𑀩𑁂𑀲𑀁 𑀯𑀺𑀦𑀺𑀧𑀸𑀢𑀺𑀓𑀸𑀦𑀁 𑀧𑀻𑀴𑀦𑀁 𑀯𑀚𑁆𑀚𑁂𑀢𑁆𑀯𑀸 𑀅𑀧𑀻𑀴𑀦𑀸𑀬, 𑀉𑀧𑀖𑀸𑀢𑀁 𑀯𑀚𑁆𑀚𑁂𑀢𑁆𑀯𑀸 𑀅𑀦𑀼𑀧𑀖𑀸𑀢𑁂𑀦, 𑀲𑀦𑁆𑀢𑀸𑀧𑀁 𑀯𑀚𑁆𑀚𑁂𑀢𑁆𑀯𑀸 𑀅𑀲𑀦𑁆𑀢𑀸𑀧𑁂𑀦, 𑀧𑀭𑀺𑀬𑀸𑀤𑀸𑀦𑀁 𑀯𑀚𑁆𑀚𑁂𑀢𑁆𑀯𑀸 𑀅𑀧𑀭𑀺𑀬𑀸𑀤𑀸𑀦𑁂𑀦, 𑀯𑀺𑀳𑁂𑀲𑀁 𑀯𑀚𑁆𑀚𑁂𑀢𑁆𑀯𑀸 𑀅𑀯𑀺𑀳𑁂𑀲𑀸𑀬, 𑀲𑀩𑁆𑀩𑁂 𑀯𑀺𑀦𑀺𑀧𑀸𑀢𑀺𑀓𑀸 𑀅𑀯𑁂𑀭𑀺𑀦𑁄 𑀳𑁄𑀦𑁆𑀢𑀼 𑀫𑀸 𑀯𑁂𑀭𑀺𑀦𑁄, 𑀲𑀼𑀔𑀺𑀦𑁄 𑀳𑁄𑀦𑁆𑀢𑀼 𑀫𑀸 𑀤𑀼𑀓𑁆𑀔𑀺𑀦𑁄, 𑀲𑀼𑀔𑀺𑀢𑀢𑁆𑀢𑀸 𑀳𑁄𑀦𑁆𑀢𑀼 𑀫𑀸 𑀤𑀼𑀓𑁆𑀔𑀺𑀢𑀢𑁆𑀢𑀸𑀢𑀺 𑁋 𑀇𑀫𑁂𑀳𑀺 𑀅𑀝𑁆𑀞𑀳𑀸𑀓𑀸𑀭𑁂𑀳𑀺 𑀲𑀩𑁆𑀩𑁂 𑀯𑀺𑀦𑀺𑀧𑀸𑀢𑀺𑀓𑁂 𑀫𑁂𑀢𑁆𑀢𑀸𑀬𑀢𑀻𑀢𑀺 𑁋 𑀫𑁂𑀢𑁆𑀢𑀸. 𑀢𑀁 𑀥𑀫𑁆𑀫𑀁 𑀘𑁂𑀢𑀬𑀢𑀻𑀢𑀺 𑁋 𑀘𑁂𑀢𑁄. 𑀲𑀩𑁆𑀩𑀩𑁆𑀬𑀸𑀧𑀸𑀤𑀧𑀭𑀺𑀬𑀼𑀝𑁆𑀞𑀸𑀦𑁂𑀳𑀺 𑀯𑀺𑀫𑀼𑀘𑁆𑀘𑀢𑀻𑀢𑀺 𑁋 𑀯𑀺𑀫𑀼𑀢𑁆𑀢𑀺. 𑀫𑁂𑀢𑁆𑀢𑀸 𑀘 𑀘𑁂𑀢𑁄 𑀘 𑀯𑀺𑀫𑀼𑀢𑁆𑀢𑀺 𑀘𑀸𑀢𑀺 𑁋 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺.

𑀲𑀩𑁆𑀩𑁂 𑀯𑀺𑀦𑀺𑀧𑀸𑀢𑀺𑀓𑀸 𑀅𑀯𑁂𑀭𑀺𑀦𑁄 𑀳𑁄𑀦𑁆𑀢𑀼, 𑀔𑁂𑀫𑀺𑀦𑁄 𑀳𑁄𑀦𑁆𑀢𑀼, 𑀲𑀼𑀔𑀺𑀦𑁄 𑀳𑁄𑀦𑁆𑀢𑀽𑀢𑀺 𑁋 𑀲𑀤𑁆𑀥𑀸𑀬 𑀅𑀥𑀺𑀫𑀼𑀘𑁆𑀘𑀢𑀺. 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀧𑀭𑀺𑀪𑀸𑀯𑀺𑀢𑀸 𑀳𑁄𑀢𑀺 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺…𑀧𑁂… 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺 𑀚𑁄𑀢𑁂𑀦𑁆𑀢𑀺 𑀧𑀢𑀸𑀧𑁂𑀦𑁆𑀢𑀺.

𑀲𑀩𑁆𑀩𑁂𑀲𑀁 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀲𑀢𑁆𑀢𑀸𑀦𑀁…𑀧𑁂… 𑀲𑀩𑁆𑀩𑁂𑀲𑀁 𑀧𑀘𑁆𑀙𑀺𑀫𑀸𑀬 𑀤𑀺𑀲𑀸𑀬 𑀲𑀢𑁆𑀢𑀸𑀦𑀁… 𑀲𑀩𑁆𑀩𑁂𑀲𑀁 𑀉𑀢𑁆𑀢𑀭𑀸𑀬 𑀤𑀺𑀲𑀸𑀬 𑀲𑀢𑁆𑀢𑀸𑀦𑀁… 𑀲𑀩𑁆𑀩𑁂𑀲𑀁 𑀤𑀓𑁆𑀔𑀺𑀡𑀸𑀬 𑀤𑀺𑀲𑀸𑀬 𑀲𑀢𑁆𑀢𑀸𑀦𑀁… 𑀲𑀩𑁆𑀩𑁂𑀲𑀁 𑀧𑀼𑀭𑀢𑁆𑀣𑀺𑀫𑀸𑀬 𑀅𑀦𑀼𑀤𑀺𑀲𑀸𑀬 𑀲𑀢𑁆𑀢𑀸𑀦𑀁… 𑀲𑀩𑁆𑀩𑁂𑀲𑀁 𑀧𑀘𑁆𑀙𑀺𑀫𑀸𑀬 𑀅𑀦𑀼𑀤𑀺𑀲𑀸𑀬 𑀲𑀢𑁆𑀢𑀸𑀦𑀁… 𑀲𑀩𑁆𑀩𑁂𑀲𑀁 𑀉𑀢𑁆𑀢𑀭𑀸𑀬 𑀅𑀦𑀼𑀤𑀺𑀲𑀸𑀬 𑀲𑀢𑁆𑀢𑀸𑀦𑀁… 𑀲𑀩𑁆𑀩𑁂𑀲𑀁 𑀤𑀓𑁆𑀔𑀺𑀡𑀸𑀬 𑀅𑀦𑀼𑀤𑀺𑀲𑀸𑀬 𑀲𑀢𑁆𑀢𑀸𑀦𑀁… 𑀲𑀩𑁆𑀩𑁂𑀲𑀁 𑀳𑁂𑀝𑁆𑀞𑀺𑀫𑀸𑀬 𑀤𑀺𑀲𑀸𑀬 𑀲𑀢𑁆𑀢𑀸𑀦𑀁… 𑀲𑀩𑁆𑀩𑁂𑀲𑀁 𑀉𑀧𑀭𑀺𑀫𑀸𑀬 𑀤𑀺𑀲𑀸𑀬 𑀲𑀢𑁆𑀢𑀸𑀦𑀁 𑀧𑀻𑀴𑀦𑀁 𑀯𑀚𑁆𑀚𑁂𑀢𑁆𑀯𑀸 𑀅𑀧𑀻𑀴𑀦𑀸𑀬, 𑀉𑀧𑀖𑀸𑀢𑀁 𑀯𑀚𑁆𑀚𑁂𑀢𑁆𑀯𑀸 𑀅𑀦𑀼𑀧𑀖𑀸𑀢𑁂𑀦, 𑀲𑀦𑁆𑀢𑀸𑀧𑀁 𑀯𑀚𑁆𑀚𑁂𑀢𑁆𑀯𑀸 𑀅𑀲𑀦𑁆𑀢𑀸𑀧𑁂𑀦, 𑀧𑀭𑀺𑀬𑀸𑀤𑀸𑀦𑀁 𑀯𑀚𑁆𑀚𑁂𑀢𑁆𑀯𑀸 𑀅𑀧𑀭𑀺𑀬𑀸𑀤𑀸𑀦𑁂𑀦, 𑀯𑀺𑀳𑁂𑀲𑀁 𑀯𑀚𑁆𑀚𑁂𑀢𑁆𑀯𑀸 𑀅𑀯𑀺𑀳𑁂𑀲𑀸𑀬, 𑀲𑀩𑁆𑀩𑁂 𑀉𑀧𑀭𑀺𑀫𑀸𑀬 𑀤𑀺𑀲𑀸𑀬 𑀲𑀢𑁆𑀢𑀸 𑀅𑀯𑁂𑀭𑀺𑀦𑁄 𑀳𑁄𑀦𑁆𑀢𑀼 𑀫𑀸 𑀯𑁂𑀭𑀺𑀦𑁄, 𑀲𑀼𑀔𑀺𑀦𑁄 𑀳𑁄𑀦𑁆𑀢𑀼 𑀫𑀸 𑀤𑀼𑀓𑁆𑀔𑀺𑀦𑁄, 𑀲𑀼𑀔𑀺𑀢𑀢𑁆𑀢𑀸 𑀳𑁄𑀦𑁆𑀢𑀼 𑀫𑀸 𑀤𑀼𑀓𑁆𑀔𑀺𑀢𑀢𑁆𑀢𑀸𑀢𑀺 𑁋 𑀇𑀫𑁂𑀳𑀺 𑀅𑀝𑁆𑀞𑀳𑀸𑀓𑀸𑀭𑁂𑀳𑀺 𑀲𑀩𑁆𑀩𑁂 𑀉𑀧𑀭𑀺𑀫𑀸𑀬 𑀤𑀺𑀲𑀸𑀬 𑀲𑀢𑁆𑀢𑁂 𑀫𑁂𑀢𑁆𑀢𑀸𑀬𑀢𑀻𑀢𑀺 𑁋 𑀫𑁂𑀢𑁆𑀢𑀸. 𑀢𑀁 𑀥𑀫𑁆𑀫𑀁 𑀘𑁂𑀢𑀬𑀢𑀻𑀢𑀺 𑁋 𑀘𑁂𑀢𑁄. 𑀲𑀩𑁆𑀩𑀩𑁆𑀬𑀸𑀧𑀸𑀤𑀧𑀭𑀺𑀬𑀼𑀝𑁆𑀞𑀸𑀦𑁂𑀳𑀺 𑀯𑀺𑀫𑀼𑀘𑁆𑀘𑀢𑀻𑀢𑀺 𑁋 𑀯𑀺𑀫𑀼𑀢𑁆𑀢𑀺. 𑀫𑁂𑀢𑁆𑀢𑀸 𑀘 𑀘𑁂𑀢𑁄 𑀘 𑀯𑀺𑀫𑀼𑀢𑁆𑀢𑀺 𑀘𑀸𑀢𑀺 𑁋 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺.

𑀲𑀩𑁆𑀩𑁂 𑀉𑀧𑀭𑀺𑀫𑀸𑀬 𑀤𑀺𑀲𑀸𑀬 𑀲𑀢𑁆𑀢𑀸 𑀅𑀯𑁂𑀭𑀺𑀦𑁄 𑀳𑁄𑀦𑁆𑀢𑀼, 𑀔𑁂𑀫𑀺𑀦𑁄 𑀳𑁄𑀦𑁆𑀢𑀼, 𑀲𑀼𑀔𑀺𑀦𑁄 𑀳𑁄𑀦𑁆𑀢𑀽𑀢𑀺 𑁋 𑀲𑀤𑁆𑀥𑀸𑀬 𑀅𑀥𑀺𑀫𑀼𑀘𑁆𑀘𑀢𑀺. 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀧𑀭𑀺𑀪𑀸𑀯𑀺𑀢𑀸 𑀳𑁄𑀢𑀺 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺…𑀧𑁂… 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺 𑀚𑁄𑀢𑁂𑀦𑁆𑀢𑀺 𑀧𑀢𑀸𑀧𑁂𑀦𑁆𑀢𑀺.

𑀲𑀩𑁆𑀩𑁂𑀲𑀁 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀧𑀸𑀡𑀸𑀦𑀁…𑀧𑁂… 𑀪𑀽𑀢𑀸𑀦𑀁… 𑀧𑀼𑀕𑁆𑀕𑀮𑀸𑀦𑀁 𑀅𑀢𑁆𑀢𑀪𑀸𑀯𑀧𑀭𑀺𑀬𑀸𑀧𑀦𑁆𑀦𑀸𑀦𑀁… 𑀲𑀩𑁆𑀩𑀸𑀲𑀁 𑀇𑀢𑁆𑀣𑀻𑀦𑀁… 𑀲𑀩𑁆𑀩𑁂𑀲𑀁 𑀧𑀼𑀭𑀺𑀲𑀸𑀦𑀁… 𑀲𑀩𑁆𑀩𑁂𑀲𑀁 𑀅𑀭𑀺𑀬𑀸𑀦𑀁… 𑀲𑀩𑁆𑀩𑁂𑀲𑀁 𑀅𑀦𑀭𑀺𑀬𑀸𑀦𑀁… 𑀲𑀩𑁆𑀩𑁂𑀲𑀁 𑀤𑁂𑀯𑀸𑀦𑀁… 𑀲𑀩𑁆𑀩𑁂𑀲𑀁 𑀫𑀦𑀼𑀲𑁆𑀲𑀸𑀦𑀁… 𑀲𑀩𑁆𑀩𑁂𑀲𑀁 𑀯𑀺𑀦𑀺𑀧𑀸𑀢𑀺𑀓𑀸𑀦𑀁… 𑀲𑀩𑁆𑀩𑁂𑀲𑀁 𑀧𑀘𑁆𑀙𑀺𑀫𑀸𑀬 𑀤𑀺𑀲𑀸𑀬 𑀯𑀺𑀦𑀺𑀧𑀸𑀢𑀺𑀓𑀸𑀦𑀁… 𑀲𑀩𑁆𑀩𑁂𑀲𑀁 𑀉𑀢𑁆𑀢𑀭𑀸𑀬 𑀤𑀺𑀲𑀸𑀬 𑀯𑀺𑀦𑀺𑀧𑀸𑀢𑀺𑀓𑀸𑀦𑀁… 𑀲𑀩𑁆𑀩𑁂𑀲𑀁 𑀤𑀓𑁆𑀔𑀺𑀡𑀸𑀬 𑀤𑀺𑀲𑀸𑀬 𑀯𑀺𑀦𑀺𑀧𑀸𑀢𑀺𑀓𑀸𑀦𑀁… 𑀲𑀩𑁆𑀩𑁂𑀲𑀁 𑀧𑀼𑀭𑀢𑁆𑀣𑀺𑀫𑀸𑀬 𑀅𑀦𑀼𑀤𑀺𑀲𑀸𑀬 𑀯𑀺𑀦𑀺𑀧𑀸𑀢𑀺𑀓𑀸𑀦𑀁… 𑀲𑀩𑁆𑀩𑁂𑀲𑀁 𑀧𑀘𑁆𑀙𑀺𑀫𑀸𑀬 𑀅𑀦𑀼𑀤𑀺𑀲𑀸𑀬 𑀯𑀺𑀦𑀺𑀧𑀸𑀢𑀺𑀓𑀸𑀦𑀁… 𑀲𑀩𑁆𑀩𑁂𑀲𑀁 𑀉𑀢𑁆𑀢𑀭𑀸𑀬 𑀅𑀦𑀼𑀤𑀺𑀲𑀸𑀬 𑀯𑀺𑀦𑀺𑀧𑀸𑀢𑀺𑀓𑀸𑀦𑀁… 𑀲𑀩𑁆𑀩𑁂𑀲𑀁 𑀤𑀓𑁆𑀔𑀺𑀡𑀸𑀬 𑀅𑀦𑀼𑀤𑀺𑀲𑀸𑀬 𑀯𑀺𑀦𑀺𑀧𑀸𑀢𑀺𑀓𑀸𑀦𑀁… 𑀲𑀩𑁆𑀩𑁂𑀲𑀁 𑀳𑁂𑀝𑁆𑀞𑀺𑀫𑀸𑀬 𑀤𑀺𑀲𑀸𑀬 𑀯𑀺𑀦𑀺𑀧𑀸𑀢𑀺𑀓𑀸𑀦𑀁… 𑀲𑀩𑁆𑀩𑁂𑀲𑀁 𑀉𑀧𑀭𑀺𑀫𑀸𑀬 𑀤𑀺𑀲𑀸𑀬 𑀯𑀺𑀦𑀺𑀧𑀸𑀢𑀺𑀓𑀸𑀦𑀁 𑀧𑀻𑀴𑀦𑀁 𑀯𑀚𑁆𑀚𑁂𑀢𑁆𑀯𑀸 𑀅𑀧𑀻𑀴𑀦𑀸𑀬, 𑀉𑀧𑀖𑀸𑀢𑀁 𑀯𑀚𑁆𑀚𑁂𑀢𑁆𑀯𑀸 𑀅𑀦𑀼𑀧𑀖𑀸𑀢𑁂𑀦, 𑀲𑀦𑁆𑀢𑀸𑀧𑀁 𑀯𑀚𑁆𑀚𑁂𑀢𑁆𑀯𑀸 𑀅𑀲𑀦𑁆𑀢𑀸𑀧𑁂𑀦, 𑀧𑀭𑀺𑀬𑀸𑀤𑀸𑀦𑀁 𑀯𑀚𑁆𑀚𑁂𑀢𑁆𑀯𑀸 𑀅𑀧𑀭𑀺𑀬𑀸𑀤𑀸𑀦𑁂𑀦, 𑀯𑀺𑀳𑁂𑀲𑀁 𑀯𑀚𑁆𑀚𑁂𑀢𑁆𑀯𑀸 𑀅𑀯𑀺𑀳𑁂𑀲𑀸𑀬, 𑀲𑀩𑁆𑀩𑁂 𑀉𑀧𑀭𑀺𑀫𑀸𑀬 𑀤𑀺𑀲𑀸𑀬 𑀯𑀺𑀦𑀺𑀧𑀸𑀢𑀺𑀓𑀸 𑀅𑀯𑁂𑀭𑀺𑀦𑁄 𑀳𑁄𑀦𑁆𑀢𑀼 𑀫𑀸 𑀯𑁂𑀭𑀺𑀦𑁄, 𑀲𑀼𑀔𑀺𑀦𑁄 𑀳𑁄𑀦𑁆𑀢𑀼 𑀫𑀸 𑀤𑀼𑀓𑁆𑀔𑀺𑀦𑁄, 𑀲𑀼𑀔𑀺𑀢𑀢𑁆𑀢𑀸 𑀳𑁄𑀦𑁆𑀢𑀼 𑀫𑀸 𑀤𑀼𑀓𑁆𑀔𑀺𑀢𑀢𑁆𑀢𑀸𑀢𑀺 𑁋 𑀇𑀫𑁂𑀳𑀺 𑀅𑀝𑁆𑀞𑀳𑀸𑀓𑀸𑀭𑁂𑀳𑀺 𑀲𑀩𑁆𑀩𑁂 𑀉𑀧𑀭𑀺𑀫𑀸𑀬 𑀤𑀺𑀲𑀸𑀬 𑀯𑀺𑀦𑀺𑀧𑀸𑀢𑀺𑀓𑁂 𑀫𑁂𑀢𑁆𑀢𑀸𑀬𑀢𑀻𑀢𑀺 𑁋 𑀫𑁂𑀢𑁆𑀢𑀸. 𑀢𑀁 𑀥𑀫𑁆𑀫𑀁 𑀘𑁂𑀢𑀬𑀢𑀻𑀢𑀺 𑁋 𑀘𑁂𑀢𑁄. 𑀲𑀩𑁆𑀩𑀩𑁆𑀬𑀸𑀧𑀸𑀤𑀧𑀭𑀺𑀬𑀼𑀝𑁆𑀞𑀸𑀦𑁂𑀳𑀺 𑀯𑀺𑀫𑀼𑀘𑁆𑀘𑀢𑀻𑀢𑀺 𑁋 𑀯𑀺𑀫𑀼𑀢𑁆𑀢𑀺. 𑀫𑁂𑀢𑁆𑀢𑀸 𑀘 𑀘𑁂𑀢𑁄 𑀘 𑀯𑀺𑀫𑀼𑀢𑁆𑀢𑀺 𑀘𑀸𑀢𑀺 𑁋 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺.

𑀲𑀩𑁆𑀩𑁂 𑀉𑀧𑀭𑀺𑀫𑀸𑀬 𑀤𑀺𑀲𑀸𑀬 𑀯𑀺𑀦𑀺𑀧𑀸𑀢𑀺𑀓𑀸 𑀅𑀯𑁂𑀭𑀺𑀦𑁄 𑀳𑁄𑀦𑁆𑀢𑀼, 𑀔𑁂𑀫𑀺𑀦𑁄 𑀳𑁄𑀦𑁆𑀢𑀼, 𑀲𑀼𑀔𑀺𑀦𑁄 𑀳𑁄𑀦𑁆𑀢𑀽𑀢𑀺 𑁋 𑀲𑀤𑁆𑀥𑀸𑀬 𑀅𑀥𑀺𑀫𑀼𑀘𑁆𑀘𑀢𑀺. 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀧𑀭𑀺𑀪𑀸𑀯𑀺𑀢𑀸 𑀳𑁄𑀢𑀺 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺.

𑀲𑀩𑁆𑀩𑁂 𑀉𑀧𑀭𑀺𑀫𑀸𑀬 𑀤𑀺𑀲𑀸𑀬 𑀯𑀺𑀦𑀺𑀧𑀸𑀢𑀺𑀓𑀸 𑀅𑀯𑁂𑀭𑀺𑀦𑁄 𑀳𑁄𑀦𑁆𑀢𑀼, 𑀔𑁂𑀫𑀺𑀦𑁄 𑀳𑁄𑀦𑁆𑀢𑀼, 𑀲𑀼𑀔𑀺𑀦𑁄 𑀳𑁄𑀦𑁆𑀢𑀽𑀢𑀺 𑁋 𑀯𑀻𑀭𑀺𑀬𑀁 𑀧𑀕𑁆𑀕𑀡𑁆𑀳𑀸𑀢𑀺. 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀧𑀭𑀺𑀪𑀸𑀯𑀺𑀢𑀸 𑀳𑁄𑀢𑀺 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺.

𑀲𑀢𑀺𑀁 𑀉𑀧𑀝𑁆𑀞𑀸𑀧𑁂𑀢𑀺. 𑀲𑀢𑀺𑀦𑁆𑀤𑁆𑀭𑀺𑀬𑀧𑀭𑀺𑀪𑀸𑀯𑀺𑀢𑀸 𑀳𑁄𑀢𑀺 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺. 𑀘𑀺𑀢𑁆𑀢𑀁 𑀲𑀫𑀸𑀤𑀳𑀢𑀺. 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀧𑀭𑀺𑀪𑀸𑀯𑀺𑀢𑀸 𑀳𑁄𑀢𑀺 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺. 𑀧𑀜𑁆𑀜𑀸𑀬 𑀧𑀚𑀸𑀦𑀸𑀢𑀺. 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀧𑀭𑀺𑀪𑀸𑀯𑀺𑀢𑀸 𑀳𑁄𑀢𑀺 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺.

𑀇𑀫𑀸𑀦𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀫𑁂𑀢𑁆𑀢𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀆𑀲𑁂𑀯𑀦𑀸 𑀳𑁄𑀦𑁆𑀢𑀺. 𑀇𑀫𑁂𑀳𑀺 𑀧𑀜𑁆𑀘𑀳𑀺 𑀇𑀦𑁆𑀤𑁆𑀭𑀺𑀬𑁂𑀳𑀺 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀆𑀲𑁂𑀯𑀻𑀬𑀢𑀺…𑀧𑁂… 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺 𑀚𑁄𑀢𑁂𑀦𑁆𑀢𑀺 𑀧𑀢𑀸𑀧𑁂𑀦𑁆𑀢𑀺.

𑀲𑀩𑁆𑀩𑁂 𑀉𑀧𑀭𑀺𑀫𑀸𑀬 𑀤𑀺𑀲𑀸𑀬 𑀯𑀺𑀦𑀺𑀧𑀸𑀢𑀺𑀓𑀸 𑀅𑀯𑁂𑀭𑀺𑀦𑁄 𑀳𑁄𑀦𑁆𑀢𑀼, 𑀔𑁂𑀫𑀺𑀦𑁄 𑀳𑁄𑀦𑁆𑀢𑀼, 𑀲𑀼𑀔𑀺𑀦𑁄 𑀳𑁄𑀦𑁆𑀢𑀽𑀢𑀺 𑁋 𑀅𑀲𑁆𑀲𑀤𑁆𑀥𑀺𑀬𑁂 𑀦 𑀓𑀫𑁆𑀧𑀢𑀺. 𑀲𑀤𑁆𑀥𑀸𑀩𑀮𑀧𑀭𑀺𑀪𑀸𑀯𑀺𑀢𑀸 𑀳𑁄𑀢𑀺 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺. 𑀓𑁄𑀲𑀚𑁆𑀚𑁂 𑀦 𑀓𑀫𑁆𑀧𑀢𑀺. 𑀯𑀻𑀭𑀺𑀬𑀩𑀮𑀧𑀭𑀺𑀪𑀸𑀯𑀺𑀢𑀸 𑀳𑁄𑀢𑀺 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺. 𑀧𑀫𑀸𑀤𑁂 𑀦 𑀓𑀫𑁆𑀧𑀢𑀺. 𑀲𑀢𑀺𑀩𑀮𑀧𑀭𑀺𑀪𑀸𑀯𑀺𑀢𑀸 𑀳𑁄𑀢𑀺 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺. 𑀉𑀤𑁆𑀥𑀘𑁆𑀘𑁂 𑀦 𑀓𑀫𑁆𑀧𑀢𑀺. 𑀲𑀫𑀸𑀥𑀺𑀩𑀮𑀧𑀭𑀺𑀪𑀸𑀯𑀺𑀢𑀸 𑀳𑁄𑀢𑀺 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺. 𑀅𑀯𑀺𑀚𑁆𑀚𑀸𑀬 𑀦 𑀓𑀫𑁆𑀧𑀢𑀺. 𑀧𑀜𑁆𑀜𑀸𑀩𑀮𑀧𑀭𑀺𑀪𑀸𑀯𑀺𑀢𑀸 𑀳𑁄𑀢𑀺 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺.

𑀇𑀫𑀸𑀦𑀺 𑀧𑀜𑁆𑀘 𑀩𑀮𑀸𑀦𑀺 𑀫𑁂𑀢𑁆𑀢𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀆𑀲𑁂𑀯𑀦𑀸 𑀳𑁄𑀦𑁆𑀢𑀺. 𑀇𑀫𑁂𑀳𑀺 𑀧𑀜𑁆𑀘𑀳𑀺 𑀩𑀮𑁂𑀳𑀺 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀆𑀲𑁂𑀯𑀻𑀬𑀢𑀺…𑀧𑁂… 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺 𑀚𑁄𑀢𑁂𑀦𑁆𑀢𑀺 𑀧𑀢𑀸𑀧𑁂𑀦𑁆𑀢𑀺.

𑀲𑀩𑁆𑀩𑁂 𑀉𑀧𑀭𑀺𑀫𑀸𑀬 𑀤𑀺𑀲𑀸𑀬 𑀯𑀺𑀦𑀺𑀧𑀸𑀢𑀺𑀓𑀸 𑀅𑀯𑁂𑀭𑀺𑀦𑁄 𑀳𑁄𑀦𑁆𑀢𑀼, 𑀔𑁂𑀫𑀺𑀦𑁄 𑀳𑁄𑀦𑁆𑀢𑀼, 𑀲𑀼𑀔𑀺𑀦𑁄 𑀳𑁄𑀦𑁆𑀢𑀽𑀢𑀺 𑁋 𑀲𑀢𑀺𑀁 𑀉𑀧𑀝𑁆𑀞𑀸𑀧𑁂𑀢𑀺. 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀧𑀭𑀺𑀪𑀸𑀯𑀺𑀢𑀸 𑀳𑁄𑀢𑀺 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺.

𑀧𑀜𑁆𑀜𑀸𑀬 𑀧𑀯𑀺𑀘𑀺𑀦𑀸𑀢𑀺. 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀧𑀭𑀺𑀪𑀸𑀯𑀺𑀢𑀸 𑀳𑁄𑀢𑀺 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺. 𑀯𑀻𑀭𑀺𑀬𑀁 𑀧𑀕𑁆𑀕𑀡𑁆𑀳𑀸𑀢𑀺. 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀧𑀭𑀺𑀪𑀸𑀯𑀺𑀢𑀸 𑀳𑁄𑀢𑀺 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺. 𑀧𑀭𑀺𑀴𑀸𑀳𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀺. 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀧𑀭𑀺𑀪𑀸𑀯𑀺𑀢𑀸 𑀳𑁄𑀢𑀺 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺. 𑀤𑀼𑀝𑁆𑀞𑀼𑀮𑁆𑀮𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀺. 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀧𑀭𑀺𑀪𑀸𑀯𑀺𑀢𑀸 𑀳𑁄𑀢𑀺 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺. 𑀘𑀺𑀢𑁆𑀢𑀁 𑀲𑀫𑀸𑀤𑀳𑀢𑀺. 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀧𑀭𑀺𑀪𑀸𑀯𑀺𑀢𑀸 𑀳𑁄𑀢𑀺 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺. 𑀜𑀸𑀡𑁂𑀦 𑀓𑀺𑀮𑁂𑀲𑁂 𑀧𑀝𑀺𑀲𑀗𑁆𑀔𑀸𑀢𑀺. 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀧𑀭𑀺𑀪𑀸𑀯𑀺𑀢𑀸 𑀳𑁄𑀢𑀺 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺.

𑀇𑀫𑁂 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸 𑀫𑁂𑀢𑁆𑀢𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀆𑀲𑁂𑀯𑀦𑀸 𑀳𑁄𑀦𑁆𑀢𑀺. 𑀇𑀫𑁂𑀳𑀺 𑀲𑀢𑁆𑀢𑀳𑀺 𑀩𑁄𑀚𑁆𑀛𑀗𑁆𑀕𑁂𑀳𑀺 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀆𑀲𑁂𑀯𑀻𑀬𑀢𑀺…𑀧𑁂… 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺 𑀚𑁄𑀢𑁂𑀦𑁆𑀢𑀺 𑀧𑀢𑀸𑀧𑁂𑀦𑁆𑀢𑀺.

𑀲𑀩𑁆𑀩𑁂 𑀉𑀧𑀭𑀺𑀫𑀸𑀬 𑀤𑀺𑀲𑀸𑀬 𑀯𑀺𑀦𑀺𑀧𑀸𑀢𑀺𑀓𑀸 𑀅𑀯𑁂𑀭𑀺𑀦𑁄 𑀳𑁄𑀦𑁆𑀢𑀼, 𑀔𑁂𑀫𑀺𑀦𑁄 𑀳𑁄𑀦𑁆𑀢𑀼, 𑀲𑀼𑀔𑀺𑀦𑁄 𑀳𑁄𑀦𑁆𑀢𑀽𑀢𑀺 𑁋 𑀲𑀫𑁆𑀫𑀸 𑀧𑀲𑁆𑀲𑀢𑀺. 𑀲𑀫𑁆𑀫𑀸𑀤𑀺𑀝𑁆𑀞𑀺 𑀧𑀭𑀺𑀪𑀸𑀯𑀺𑀢𑀸 𑀳𑁄𑀢𑀺 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺. 𑀲𑀫𑁆𑀫𑀸 𑀅𑀪𑀺𑀦𑀺𑀭𑁄𑀧𑁂𑀢𑀺. 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀧𑀭𑀺𑀪𑀸𑀯𑀺𑀢𑀸 𑀳𑁄𑀢𑀺 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺. 𑀲𑀫𑁆𑀫𑀸 𑀧𑀭𑀺𑀕𑁆𑀕𑀡𑁆𑀳𑀸𑀢𑀺. 𑀲𑀫𑁆𑀫𑀸𑀯𑀸𑀘𑀸𑀧𑀭𑀺𑀪𑀸𑀯𑀺𑀢𑀸 𑀳𑁄𑀢𑀺 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺. 𑀲𑀫𑁆𑀫𑀸 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀧𑀭𑀺𑀪𑀸𑀯𑀺𑀢𑀸 𑀳𑁄𑀢𑀺 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺. 𑀲𑀫𑁆𑀫𑀸 𑀯𑁄𑀤𑀸𑀧𑁂𑀢𑀺. 𑀲𑀫𑁆𑀫𑀸 𑀆𑀚𑀻𑀯𑀧𑀭𑀺𑀪𑀸𑀯𑀺𑀢𑀸 𑀳𑁄𑀢𑀺 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺. 𑀲𑀫𑁆𑀫𑀸 𑀧𑀕𑁆𑀕𑀡𑁆𑀳𑀸𑀢𑀺. 𑀲𑀫𑁆𑀫𑀸𑀯𑀸𑀬𑀸𑀫𑀧𑀭𑀺𑀪𑀸𑀯𑀺𑀢𑀸 𑀳𑁄𑀢𑀺 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺. 𑀲𑀫𑁆𑀫𑀸 𑀉𑀧𑀝𑁆𑀞𑀸𑀢𑀺. 𑀲𑀫𑁆𑀫𑀸𑀲𑀢𑀺𑀧𑀭𑀺𑀪𑀸𑀯𑀺𑀢𑀸 𑀳𑁄𑀢𑀺 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺. 𑀲𑀫𑁆𑀫𑀸 𑀲𑀫𑀸𑀤𑀳𑀢𑀺. 𑀲𑀫𑁆𑀫𑀸𑀲𑀫𑀸𑀥𑀺𑀧𑀭𑀺𑀪𑀸𑀯𑀺𑀢𑀸 𑀳𑁄𑀢𑀺 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺.

𑀇𑀫𑁂 𑀅𑀝𑁆𑀞 𑀫𑀕𑁆𑀕𑀗𑁆𑀕𑀸 𑀫𑁂𑀢𑁆𑀢𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀆𑀲𑁂𑀯𑀦𑀸 𑀳𑁄𑀦𑁆𑀢𑀺. 𑀇𑀫𑁂𑀳𑀺 𑀅𑀝𑁆𑀞𑀳𑀺 𑀫𑀕𑁆𑀕𑀗𑁆𑀕𑁂𑀳𑀺 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀆𑀲𑁂𑀯𑀻𑀬𑀢𑀺…𑀧𑁂… 𑀇𑀫𑁂 𑀅𑀝𑁆𑀞 𑀫𑀕𑁆𑀕𑀗𑁆𑀕𑀸 𑀫𑁂𑀢𑁆𑀢𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀧𑀭𑀺𑀪𑀸𑀯𑀺𑀢𑀸 𑀳𑁄𑀦𑁆𑀢𑀺. 𑀇𑀫𑁂𑀳𑀺 𑀅𑀝𑁆𑀞𑀳𑀺 𑀫𑀕𑁆𑀕𑀗𑁆𑀕𑁂𑀳𑀺 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀲𑀼𑀧𑀭𑀺𑀯𑀼𑀢𑀸 𑀳𑁄𑀢𑀺. 𑀇𑀫𑁂 𑀅𑀝𑁆𑀞 𑀫𑀕𑁆𑀕𑀗𑁆𑀕𑀸 𑀫𑁂𑀢𑁆𑀢𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀆𑀲𑁂𑀯𑀦𑀸 𑀳𑁄𑀦𑁆𑀢𑀺, 𑀪𑀸𑀯𑀦𑀸 𑀳𑁄𑀦𑁆𑀢𑀺, 𑀩𑀳𑀼𑀮𑀻𑀓𑀢𑀸 𑀳𑁄𑀦𑁆𑀢𑀺, 𑀅𑀮𑀗𑁆𑀓𑀸𑀭𑀸 𑀳𑁄𑀦𑁆𑀢𑀺, 𑀧𑀭𑀺𑀓𑁆𑀔𑀸𑀭𑀸 𑀳𑁄𑀦𑁆𑀢𑀺, 𑀧𑀭𑀺𑀯𑀸𑀭𑀸 𑀳𑁄𑀦𑁆𑀢𑀺, 𑀧𑀸𑀭𑀺𑀧𑀽𑀭𑀻 𑀳𑁄𑀦𑁆𑀢𑀺, 𑀲𑀳𑀕𑀢𑀸 𑀳𑁄𑀦𑁆𑀢𑀺, 𑀲𑀳𑀚𑀸𑀢𑀸 𑀳𑁄𑀦𑁆𑀢𑀺, 𑀲𑀁𑀲𑀝𑁆𑀞𑀸 𑀳𑁄𑀦𑁆𑀢𑀺, 𑀲𑀫𑁆𑀧𑀬𑀼𑀢𑁆𑀢𑀸 𑀳𑁄𑀦𑁆𑀢𑀺, 𑀧𑀓𑁆𑀔𑀦𑁆𑀤𑀦𑀸 𑀳𑁄𑀦𑁆𑀢𑀺, 𑀧𑀲𑀻𑀤𑀦𑀸 𑀳𑁄𑀦𑁆𑀢𑀺, 𑀲𑀦𑁆𑀢𑀺𑀝𑁆𑀞𑀦𑀸 𑀳𑁄𑀦𑁆𑀢𑀺, 𑀯𑀺𑀫𑀼𑀘𑁆𑀘𑀦𑀸 𑀳𑁄𑀦𑁆𑀢𑀺, ‘‘𑀏𑀢𑀁 𑀲𑀦𑁆𑀢’’𑀦𑁆𑀢𑀺 𑀨𑀲𑁆𑀲𑀦𑀸 𑀳𑁄𑀦𑁆𑀢𑀺, 𑀬𑀸𑀦𑀻𑀓𑀢𑀸 𑀳𑁄𑀦𑁆𑀢𑀺, 𑀯𑀢𑁆𑀣𑀼𑀓𑀢𑀸 𑀳𑁄𑀦𑁆𑀢𑀺, 𑀅𑀦𑀼𑀝𑁆𑀞𑀺𑀢𑀸 𑀳𑁄𑀦𑁆𑀢𑀺, 𑀧𑀭𑀺𑀘𑀺𑀢𑀸 𑀳𑁄𑀦𑁆𑀢𑀺, 𑀲𑀼𑀲𑀫𑀸𑀭𑀤𑁆𑀥𑀸 𑀳𑁄𑀦𑁆𑀢𑀺, 𑀲𑀼𑀪𑀸𑀯𑀺𑀢𑀸 𑀳𑁄𑀦𑁆𑀢𑀺, 𑀲𑁆𑀯𑀸𑀥𑀺𑀝𑁆𑀞𑀺𑀢𑀸 𑀳𑁄𑀦𑁆𑀢𑀺, 𑀲𑀼𑀲𑀫𑀼𑀕𑁆𑀕𑀢𑀸 𑀳𑁄𑀦𑁆𑀢𑀺, 𑀲𑀼𑀯𑀺𑀫𑀼𑀢𑁆𑀢𑀸 𑀳𑁄𑀦𑁆𑀢𑀺 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺 𑀚𑁄𑀢𑁂𑀦𑁆𑀢𑀺 𑀧𑀢𑀸𑀧𑁂𑀦𑁆𑀢𑀻𑀢𑀺.

𑀫𑁂𑀢𑁆𑀢𑀸𑀓𑀣𑀸 𑀦𑀺𑀝𑁆𑀞𑀺𑀢𑀸.