𑁫. 𑀯𑀺𑀭𑀸𑀕𑀓𑀣𑀸

𑁨𑁮. 𑀯𑀺𑀭𑀸𑀕𑁄 𑀫𑀕𑁆𑀕𑁄, 𑀯𑀺𑀫𑀼𑀢𑁆𑀢𑀺 𑀨𑀮𑀁. 𑀓𑀣𑀁 𑀯𑀺𑀭𑀸𑀕𑁄 𑀫𑀕𑁆𑀕𑁄? 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀓𑁆𑀔𑀡𑁂 𑀤𑀲𑁆𑀲𑀦𑀝𑁆𑀞𑁂𑀦 𑀲𑀫𑁆𑀫𑀸𑀤𑀺𑀝𑁆𑀞𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀯𑀺𑀭𑀚𑁆𑀚𑀢𑀺, 𑀢𑀤𑀦𑀼𑀯𑀢𑁆𑀢𑀓𑀓𑀺𑀮𑁂𑀲𑁂𑀳𑀺 𑀘 𑀔𑀦𑁆𑀥𑁂𑀳𑀺 𑀘 𑀯𑀺𑀭𑀚𑁆𑀚𑀢𑀺, 𑀩𑀳𑀺𑀤𑁆𑀥𑀸 𑀘 𑀲𑀩𑁆𑀩𑀦𑀺𑀫𑀺𑀢𑁆𑀢𑁂𑀳𑀺 𑀯𑀺𑀭𑀚𑁆𑀚𑀢𑀺. 𑀯𑀺𑀭𑀸𑀕𑁄 𑀯𑀺𑀭𑀸𑀕𑀸𑀭𑀫𑁆𑀫𑀡𑁄 𑀯𑀺𑀭𑀸𑀕𑀕𑁄𑀘𑀭𑁄 𑀯𑀺𑀭𑀸𑀕𑁂 𑀲𑀫𑀼𑀤𑀸𑀕𑀢𑁄 [𑀲𑀫𑀼𑀧𑀸𑀕𑀢𑁄 (𑀲𑁆𑀬𑀸.)] 𑀯𑀺𑀭𑀸𑀕𑁂 𑀞𑀺𑀢𑁄 𑀯𑀺𑀭𑀸𑀕𑁂 𑀧𑀢𑀺𑀝𑁆𑀞𑀺𑀢𑁄.

𑀯𑀺𑀭𑀸𑀕𑁄𑀢𑀺 𑀤𑁆𑀯𑁂 𑀯𑀺𑀭𑀸𑀕𑀸 𑁋 𑀦𑀺𑀩𑁆𑀩𑀸𑀦𑀜𑁆𑀘 𑀯𑀺𑀭𑀸𑀕𑁄, 𑀬𑁂 𑀘 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀢𑀸𑀚𑀸𑀢𑀸 𑀥𑀫𑁆𑀫𑀸 𑀲𑀩𑁆𑀩𑁂 𑀯𑀺𑀭𑀸𑀕𑀸 𑀳𑁄𑀦𑁆𑀢𑀻𑀢𑀺 𑁋 𑀯𑀺𑀭𑀸𑀕𑀸. 𑀲𑀳𑀚𑀸𑀢𑀸𑀦𑀺 𑀲𑀢𑁆𑀢𑀗𑁆𑀕𑀸𑀦𑀺 𑀯𑀺𑀭𑀸𑀕𑀁 𑀕𑀘𑁆𑀙𑀦𑁆𑀢𑀻𑀢𑀺 𑁋 𑀯𑀺𑀭𑀸𑀕𑁄 𑀫𑀕𑁆𑀕𑁄. 𑀏𑀢𑁂𑀦 𑀫𑀕𑁆𑀕𑁂𑀦 𑀩𑀼𑀤𑁆𑀥𑀸 𑀘 𑀲𑀸𑀯𑀓𑀸 𑀘 𑀅𑀕𑀢𑀁 𑀤𑀺𑀲𑀁 𑀦𑀺𑀩𑁆𑀩𑀸𑀦𑀁 𑀕𑀘𑁆𑀙𑀦𑁆𑀢𑀻𑀢𑀺 𑁋 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄. 𑀬𑀸𑀯𑀢𑀸 𑀧𑀼𑀣𑀼𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀧𑀭𑀧𑁆𑀧𑀯𑀸𑀤𑀸𑀦𑀁 𑀫𑀕𑁆𑀕𑀸, 𑀅𑀬𑀫𑁂𑀯 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀅𑀕𑁆𑀕𑁄 𑀘 𑀲𑁂𑀝𑁆𑀞𑁄 𑀘 𑀧𑀸𑀫𑁄𑀓𑁆𑀔𑁄 [𑀯𑀺𑀫𑁄𑀓𑁆𑀔𑁄 (𑀲𑁆𑀬𑀸.), 𑀫𑁄𑀓𑁆𑀔𑁄 (𑀅𑀝𑁆𑀞.)] 𑀘 𑀉𑀢𑁆𑀢𑀫𑁄 𑀘 𑀧𑀯𑀭𑁄 𑀘𑀸𑀢𑀺 𑁋 𑀫𑀕𑁆𑀕𑀸𑀦𑀁 𑀅𑀝𑁆𑀞𑀗𑁆𑀕𑀺𑀓𑁄 𑀲𑁂𑀝𑁆𑀞𑁄.

𑀅𑀪𑀺𑀦𑀺𑀭𑁄𑀧𑀦𑀝𑁆𑀞𑁂𑀦 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀸 𑀯𑀺𑀭𑀚𑁆𑀚𑀢𑀺. 𑀧𑀭𑀺𑀕𑁆𑀕𑀳𑀝𑁆𑀞𑁂𑀦 𑀲𑀫𑁆𑀫𑀸𑀯𑀸𑀘𑀸 𑀫𑀺𑀘𑁆𑀙𑀸𑀯𑀸𑀘𑀸𑀬 𑀯𑀺𑀭𑀚𑁆𑀚𑀢𑀺. 𑀲𑀫𑀼𑀝𑁆𑀞𑀸𑀦𑀝𑁆𑀞𑁂𑀦 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀫𑀺𑀘𑁆𑀙𑀸𑀓𑀫𑁆𑀫𑀦𑁆𑀢𑀸 𑀯𑀺𑀭𑀚𑁆𑀚𑀢𑀺. 𑀯𑁄𑀤𑀸𑀦𑀝𑁆𑀞𑁂𑀦 𑀲𑀫𑁆𑀫𑀸𑀆𑀚𑀻𑀯𑁄 𑀫𑀺𑀘𑁆𑀙𑀸𑀆𑀚𑀻𑀯𑀸 𑀯𑀺𑀭𑀚𑁆𑀚𑀢𑀺. 𑀧𑀕𑁆𑀕𑀳𑀝𑁆𑀞𑁂𑀦 𑀲𑀫𑁆𑀫𑀸𑀯𑀸𑀬𑀸𑀫𑁄 𑀫𑀺𑀘𑁆𑀙𑀸𑀯𑀸𑀬𑀸𑀫𑀸 𑀯𑀺𑀭𑀚𑁆𑀚𑀢𑀺. 𑀉𑀧𑀝𑁆𑀞𑀸𑀦𑀝𑁆𑀞𑁂𑀦 𑀲𑀫𑁆𑀫𑀸𑀲𑀢𑀺 𑀫𑀺𑀘𑁆𑀙𑀸𑀲𑀢𑀺𑀬𑀸 𑀯𑀺𑀭𑀚𑁆𑀚𑀢𑀺. 𑀅𑀯𑀺𑀓𑁆𑀔𑁂𑀧𑀝𑁆𑀞𑁂𑀦 𑀲𑀫𑁆𑀫𑀸𑀲𑀫𑀸𑀥𑀺 𑀫𑀺𑀘𑁆𑀙𑀸𑀲𑀫𑀸𑀥𑀺𑀢𑁄 𑀯𑀺𑀭𑀚𑁆𑀚𑀢𑀺. 𑀢𑀤𑀦𑀼𑀯𑀢𑁆𑀢𑀓𑀓𑀺𑀮𑁂𑀲𑁂𑀳𑀺 𑀘 𑀔𑀦𑁆𑀥𑁂𑀳𑀺 𑀘 𑀯𑀺𑀭𑀚𑁆𑀚𑀢𑀺. 𑀩𑀳𑀺𑀤𑁆𑀥𑀸 𑀘 𑀲𑀩𑁆𑀩𑀦𑀺𑀫𑀺𑀢𑁆𑀢𑁂𑀳𑀺 𑀯𑀺𑀭𑀚𑁆𑀚𑀢𑀺. 𑀯𑀺𑀭𑀸𑀕𑁄 𑀯𑀺𑀭𑀸𑀕𑀸𑀭𑀫𑁆𑀫𑀡𑁄 𑀯𑀺𑀭𑀸𑀕𑀕𑁄𑀘𑀭𑁄 𑀯𑀺𑀭𑀸𑀕𑁂 𑀲𑀫𑀼𑀤𑀸𑀕𑀢𑁄 𑀯𑀺𑀭𑀸𑀕𑁂 𑀞𑀺𑀢𑁄 𑀯𑀺𑀭𑀸𑀕𑁂 𑀧𑀢𑀺𑀝𑁆𑀞𑀺𑀢𑁄.

𑀯𑀺𑀭𑀸𑀕𑁄𑀢𑀺 𑀤𑁆𑀯𑁂 𑀯𑀺𑀭𑀸𑀕𑀸 𑁋 𑀦𑀺𑀩𑁆𑀩𑀸𑀦𑀜𑁆𑀘 𑀯𑀺𑀭𑀸𑀕𑁄, 𑀬𑁂 𑀘 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀢𑀸𑀚𑀸𑀢𑀸 𑀥𑀫𑁆𑀫𑀸 𑀲𑀩𑁆𑀩𑁂 𑀯𑀺𑀭𑀸𑀕𑀸 𑀳𑁄𑀦𑁆𑀢𑀻𑀢𑀺 𑁋 𑀯𑀺𑀭𑀸𑀕𑀸. 𑀲𑀳𑀚𑀸𑀢𑀸𑀦𑀺 𑀲𑀢𑁆𑀢𑀗𑁆𑀕𑀸𑀦𑀺 𑀯𑀺𑀭𑀸𑀕𑀁 𑀕𑀘𑁆𑀙𑀦𑁆𑀢𑀻𑀢𑀺 𑁋 𑀯𑀺𑀭𑀸𑀕𑁄 𑀫𑀕𑁆𑀕𑁄. 𑀏𑀢𑁂𑀦 𑀫𑀕𑁆𑀕𑁂𑀦 𑀩𑀼𑀤𑁆𑀥𑀸 𑀘 𑀲𑀸𑀯𑀓𑀸 𑀘 𑀅𑀕𑀢𑀁 𑀤𑀺𑀲𑀁 𑀦𑀺𑀩𑁆𑀩𑀸𑀦𑀁 𑀕𑀘𑁆𑀙𑀦𑁆𑀢𑀻𑀢𑀺 𑁋 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄. 𑀬𑀸𑀯𑀢𑀸 𑀧𑀼𑀣𑀼𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀧𑀭𑀧𑁆𑀧𑀯𑀸𑀤𑀸𑀦𑀁 𑀫𑀕𑁆𑀕𑀸, 𑀅𑀬𑀫𑁂𑀯 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀅𑀕𑁆𑀕𑁄 𑀘 𑀲𑁂𑀝𑁆𑀞𑁄 𑀘 𑀧𑀸𑀫𑁄𑀓𑁆𑀔𑁄 𑀘 𑀉𑀢𑁆𑀢𑀫𑁄 𑀘 𑀧𑀯𑀭𑁄 𑀘𑀸𑀢𑀺 𑁋 𑀫𑀕𑁆𑀕𑀸𑀦𑀁 𑀅𑀝𑁆𑀞𑀗𑁆𑀕𑀺𑀓𑁄 𑀲𑁂𑀝𑁆𑀞𑁄.

𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀓𑁆𑀔𑀡𑁂 𑀤𑀲𑁆𑀲𑀦𑀝𑁆𑀞𑁂𑀦 𑀲𑀫𑁆𑀫𑀸𑀤𑀺𑀝𑁆𑀞𑀺…𑀧𑁂… 𑀅𑀯𑀺𑀓𑁆𑀔𑁂𑀧𑀝𑁆𑀞𑁂𑀦 𑀲𑀫𑁆𑀫𑀸𑀲𑀫𑀸𑀥𑀺 𑀑𑀴𑀸𑀭𑀺𑀓𑀸 𑀓𑀸𑀫𑀭𑀸𑀕𑀲𑀜𑁆𑀜𑁄𑀚𑀦𑀸 𑀧𑀝𑀺𑀖𑀲𑀜𑁆𑀜𑁄𑀚𑀦𑀸 𑀑𑀴𑀸𑀭𑀺𑀓𑀸 𑀓𑀸𑀫𑀭𑀸𑀕𑀸𑀦𑀼𑀲𑀬𑀸 𑀧𑀝𑀺𑀖𑀸𑀦𑀼𑀲𑀬𑀸 𑀯𑀺𑀭𑀚𑁆𑀚𑀢𑀺, 𑀢𑀤𑀦𑀼𑀯𑀢𑁆𑀢𑀓𑀓𑀺𑀮𑁂𑀲𑁂𑀳𑀺 𑀘 𑀔𑀦𑁆𑀥𑁂𑀳𑀺 𑀘 𑀯𑀺𑀭𑀚𑁆𑀚𑀢𑀺, 𑀩𑀳𑀺𑀤𑁆𑀥𑀸 𑀘 𑀲𑀩𑁆𑀩𑀦𑀺𑀫𑀺𑀢𑁆𑀢𑁂𑀳𑀺 𑀯𑀺𑀭𑀚𑁆𑀚𑀢𑀺. 𑀯𑀺𑀭𑀸𑀕𑁄 𑀯𑀺𑀭𑀸𑀕𑀸𑀭𑀫𑁆𑀫𑀡𑁄 𑀯𑀺𑀭𑀸𑀕𑀕𑁄𑀘𑀭𑁄 𑀯𑀺𑀭𑀸𑀕𑁂 𑀲𑀫𑀼𑀤𑀸𑀕𑀢𑁄 𑀯𑀺𑀭𑀸𑀕𑁂 𑀞𑀺𑀢𑁄 𑀯𑀺𑀭𑀸𑀕𑁂 𑀧𑀢𑀺𑀝𑁆𑀞𑀺𑀢𑁄.

𑀯𑀺𑀭𑀸𑀕𑁄𑀢𑀺 𑀤𑁆𑀯𑁂 𑀯𑀺𑀭𑀸𑀕𑀸 𑁋 𑀦𑀺𑀩𑁆𑀩𑀸𑀦𑀜𑁆𑀘 𑀯𑀺𑀭𑀸𑀕𑁄, 𑀬𑁂 𑀘 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀢𑀸𑀚𑀸𑀢𑀸 𑀥𑀫𑁆𑀫𑀸 𑀲𑀩𑁆𑀩𑁂 𑀯𑀺𑀭𑀸𑀕𑀸 𑀳𑁄𑀦𑁆𑀢𑀻𑀢𑀺 𑁋 𑀯𑀺𑀭𑀸𑀕𑀸. 𑀲𑀳𑀚𑀸𑀢𑀸𑀦𑀺 𑀲𑀢𑁆𑀢𑀗𑁆𑀕𑀸𑀦𑀺 𑀯𑀺𑀭𑀸𑀕𑀁 𑀕𑀘𑁆𑀙𑀦𑁆𑀢𑀻𑀢𑀺 𑁋 𑀯𑀺𑀭𑀸𑀕𑁄 𑀫𑀕𑁆𑀕𑁄. 𑀏𑀢𑁂𑀦 𑀫𑀕𑁆𑀕𑁂𑀦 𑀩𑀼𑀤𑁆𑀥𑀸 𑀘 𑀲𑀸𑀯𑀓𑀸 𑀘 𑀅𑀕𑀢𑀁 𑀤𑀺𑀲𑀁 𑀦𑀺𑀩𑁆𑀩𑀸𑀦𑀁 𑀕𑀘𑁆𑀙𑀦𑁆𑀢𑀻𑀢𑀺 𑁋 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄. 𑀬𑀸𑀯𑀢𑀸 𑀧𑀼𑀣𑀼𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀧𑀭𑀧𑁆𑀧𑀯𑀸𑀤𑀸𑀦𑀁 𑀫𑀕𑁆𑀕𑀸. 𑀅𑀬𑀫𑁂𑀯 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀅𑀕𑁆𑀕𑁄 𑀘 𑀲𑁂𑀝𑁆𑀞𑁄 𑀘 𑀧𑀸𑀫𑁄𑀓𑁆𑀔𑁄 𑀘 𑀉𑀢𑁆𑀢𑀫𑁄 𑀘 𑀧𑀯𑀭𑁄 𑀘𑀸𑀢𑀺 𑁋 𑀫𑀕𑁆𑀕𑀸𑀦𑀁 𑀅𑀝𑁆𑀞𑀗𑁆𑀕𑀺𑀓𑁄 𑀲𑁂𑀝𑁆𑀞𑁄.

𑀅𑀦𑀸𑀕𑀸𑀫𑀺𑀫𑀕𑁆𑀕𑀓𑁆𑀔𑀡𑁂 𑀤𑀲𑁆𑀲𑀦𑀝𑁆𑀞𑁂𑀦 𑀲𑀫𑁆𑀫𑀸𑀤𑀺𑀝𑁆𑀞𑀺…𑀧𑁂… 𑀅𑀯𑀺𑀓𑁆𑀔𑁂𑀧𑀝𑁆𑀞𑁂𑀦 𑀲𑀫𑁆𑀫𑀸𑀲𑀫𑀸𑀥𑀺 𑀅𑀦𑀼𑀲𑀳𑀕𑀢𑀸 𑀓𑀸𑀫𑀭𑀸𑀕𑀲𑀜𑁆𑀜𑁄𑀚𑀦𑀸 𑀧𑀝𑀺𑀖𑀲𑀜𑁆𑀜𑁄𑀚𑀦𑀸 𑀅𑀦𑀼𑀲𑀳𑀕𑀢𑀸 𑀓𑀸𑀫𑀭𑀸𑀕𑀸𑀦𑀼𑀲𑀬𑀸 𑀧𑀝𑀺𑀖𑀸𑀦𑀼𑀲𑀬𑀸 𑀯𑀺𑀭𑀚𑁆𑀚𑀢𑀺, 𑀢𑀤𑀦𑀼𑀯𑀢𑁆𑀢𑀓𑀓𑀺𑀮𑁂𑀲𑁂𑀳𑀺 𑀘 𑀔𑀦𑁆𑀥𑁂𑀳𑀺 𑀘 𑀯𑀺𑀭𑀚𑁆𑀚𑀢𑀺, 𑀩𑀳𑀺𑀤𑁆𑀥𑀸 𑀘 𑀲𑀩𑁆𑀩𑀦𑀺𑀫𑀺𑀢𑁆𑀢𑁂𑀳𑀺 𑀯𑀺𑀭𑀚𑁆𑀚𑀢𑀺. 𑀯𑀺𑀭𑀸𑀕𑁄 𑀯𑀺𑀭𑀸𑀕𑀸𑀭𑀫𑁆𑀫𑀡𑁄…𑀧𑁂… 𑀫𑀕𑁆𑀕𑀸𑀦𑀁 𑀅𑀝𑁆𑀞𑀗𑁆𑀕𑀺𑀓𑁄 𑀲𑁂𑀝𑁆𑀞𑁄.

𑀅𑀭𑀳𑀢𑁆𑀢𑀫𑀕𑁆𑀕𑀓𑁆𑀔𑀡𑁂 𑀤𑀲𑁆𑀲𑀦𑀝𑁆𑀞𑁂𑀦 𑀲𑀫𑁆𑀫𑀸𑀤𑀺𑀝𑁆𑀞𑀺…𑀧𑁂… 𑀅𑀯𑀺𑀓𑁆𑀔𑁂𑀧𑀝𑁆𑀞𑁂𑀦 𑀲𑀫𑁆𑀫𑀸𑀲𑀫𑀸𑀥𑀺 𑀭𑀽𑀧𑀭𑀸𑀕𑀸 𑀅𑀭𑀽𑀧𑀭𑀸𑀕𑀸 𑀫𑀸𑀦𑀸 𑀉𑀤𑁆𑀥𑀘𑁆𑀘𑀸 𑀅𑀯𑀺𑀚𑁆𑀚𑀸𑀬 𑀫𑀸𑀦𑀸𑀦𑀼𑀲𑀬𑀸 𑀪𑀯𑀭𑀸𑀕𑀸𑀦𑀼𑀲𑀬𑀸 𑀅𑀯𑀺𑀚𑁆𑀚𑀸𑀦𑀼𑀲𑀬𑀸 𑀯𑀺𑀭𑀚𑁆𑀚𑀢𑀺, 𑀢𑀤𑀦𑀼𑀯𑀢𑁆𑀢𑀓𑀓𑀺𑀮𑁂𑀲𑁂𑀳𑀺 𑀘 𑀔𑀦𑁆𑀥𑁂𑀳𑀺 𑀘 𑀯𑀺𑀭𑀚𑁆𑀚𑀢𑀺, 𑀩𑀳𑀺𑀤𑁆𑀥𑀸 𑀘 𑀲𑀩𑁆𑀩𑀦𑀺𑀫𑀺𑀢𑁆𑀢𑁂𑀳𑀺 𑀯𑀺𑀭𑀚𑁆𑀚𑀢𑀺 𑀯𑀺𑀭𑀸𑀕𑁄 𑀯𑀺𑀭𑀸𑀕𑀸𑀭𑀫𑁆𑀫𑀡𑁄 𑀯𑀺𑀭𑀸𑀕𑀕𑁄𑀘𑀭𑁄 𑀯𑀺𑀭𑀸𑀕𑁂 𑀲𑀫𑀼𑀤𑀸𑀕𑀢𑁄 𑀯𑀺𑀭𑀸𑀕𑁂 𑀞𑀺𑀢𑁄 𑀯𑀺𑀭𑀸𑀕𑁂 𑀧𑀢𑀺𑀝𑁆𑀞𑀺𑀢𑁄.

𑀯𑀺𑀭𑀸𑀕𑁄𑀢𑀺 𑀤𑁆𑀯𑁂 𑀯𑀺𑀭𑀸𑀕𑀸 𑁋 𑀦𑀺𑀩𑁆𑀩𑀸𑀦𑀜𑁆𑀘 𑀯𑀺𑀭𑀸𑀕𑁄, 𑀬𑁂 𑀘 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀢𑀸𑀚𑀸𑀢𑀸 𑀥𑀫𑁆𑀫𑀸 𑀲𑀩𑁆𑀩𑁂 𑀯𑀺𑀭𑀸𑀕𑀸 𑀳𑁄𑀦𑁆𑀢𑀻𑀢𑀺 𑁋 𑀯𑀺𑀭𑀸𑀕𑀸. 𑀲𑀳𑀚𑀸𑀢𑀸𑀦𑀺 𑀲𑀢𑁆𑀢𑀗𑁆𑀕𑀸𑀦𑀺 𑀯𑀺𑀭𑀸𑀕𑀁 𑀕𑀘𑁆𑀙𑀦𑁆𑀢𑀻𑀢𑀺 𑁋 𑀯𑀺𑀭𑀸𑀕𑁄 𑀫𑀕𑁆𑀕𑁄. 𑀏𑀢𑁂𑀦 𑀫𑀕𑁆𑀕𑁂𑀦 𑀩𑀼𑀤𑁆𑀥𑀸 𑀘 𑀲𑀸𑀯𑀓𑀸 𑀘 𑀅𑀕𑀢𑀁 𑀤𑀺𑀲𑀁 𑀦𑀺𑀩𑁆𑀩𑀸𑀦𑀁 𑀕𑀘𑁆𑀙𑀦𑁆𑀢𑀻𑀢𑀺 𑁋 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄. 𑀬𑀸𑀯𑀢𑀸 𑀧𑀼𑀣𑀼𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀧𑀭𑀧𑁆𑀧𑀯𑀸𑀤𑀸𑀦𑀁 𑀫𑀕𑁆𑀕𑀸. 𑀅𑀬𑀫𑁂𑀯 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀅𑀕𑁆𑀕𑁄 𑀘 𑀲𑁂𑀝𑁆𑀞𑁄 𑀘 𑀧𑀸𑀫𑁄𑀓𑁆𑀔𑁄 𑀘 𑀉𑀢𑁆𑀢𑀫𑁄 𑀘 𑀧𑀯𑀭𑁄 𑀘𑀸𑀢𑀺 𑁋 𑀫𑀕𑁆𑀕𑀸𑀦𑀁 𑀅𑀝𑁆𑀞𑀗𑁆𑀕𑀺𑀓𑁄 𑀲𑁂𑀝𑁆𑀞𑁄.

𑀤𑀲𑁆𑀲𑀦𑀯𑀺𑀭𑀸𑀕𑁄 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀅𑀪𑀺𑀦𑀺𑀭𑁄𑀧𑀦𑀯𑀺𑀭𑀸𑀕𑁄 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄. 𑀧𑀭𑀺𑀕𑁆𑀕𑀳𑀯𑀺𑀭𑀸𑀕𑁄 𑀲𑀫𑁆𑀫𑀸𑀯𑀸𑀘𑀸. 𑀲𑀫𑀼𑀝𑁆𑀞𑀸𑀦𑀯𑀺𑀭𑀸𑀕𑁄 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄. 𑀯𑁄𑀤𑀸𑀦𑀯𑀺𑀭𑀸𑀕𑁄 𑀲𑀫𑁆𑀫𑀸𑀆𑀚𑀻𑀯𑁄. 𑀧𑀕𑁆𑀕𑀳𑀯𑀺𑀭𑀸𑀕𑁄 𑀲𑀫𑁆𑀫𑀸𑀯𑀸𑀬𑀸𑀫𑁄. 𑀉𑀧𑀝𑁆𑀞𑀸𑀦𑀯𑀺𑀭𑀸𑀕𑁄 𑀲𑀫𑁆𑀫𑀸𑀲𑀢𑀺. 𑀅𑀯𑀺𑀓𑁆𑀔𑁂𑀧𑀯𑀺𑀭𑀸𑀕𑁄 𑀲𑀫𑁆𑀫𑀸𑀲𑀫𑀸𑀥𑀺. 𑀉𑀧𑀝𑁆𑀞𑀸𑀦𑀯𑀺𑀭𑀸𑀕𑁄 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄. 𑀧𑀯𑀺𑀘𑀬𑀯𑀺𑀭𑀸𑀕𑁄 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄. 𑀧𑀕𑁆𑀕𑀳𑀯𑀺𑀭𑀸𑀕𑁄 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄. 𑀨𑀭𑀡𑀯𑀺𑀭𑀸𑀕𑁄 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄. 𑀉𑀧𑀲𑀫𑀯𑀺𑀭𑀸𑀕𑁄 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄. 𑀅𑀯𑀺𑀓𑁆𑀔𑁂𑀧𑀯𑀺𑀭𑀸𑀕𑁄 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄. 𑀧𑀝𑀺𑀲𑀗𑁆𑀔𑀸𑀦𑀯𑀺𑀭𑀸𑀕𑁄 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑁄. 𑀅𑀲𑁆𑀲𑀤𑁆𑀥𑀺𑀬𑁂 𑀅𑀓𑀫𑁆𑀧𑀺𑀬𑀯𑀺𑀭𑀸𑀕𑁄 𑀲𑀤𑁆𑀥𑀸𑀩𑀮𑀁. 𑀓𑁄𑀲𑀚𑁆𑀚𑁂 𑀅𑀓𑀫𑁆𑀧𑀺𑀬𑀯𑀺𑀭𑀸𑀕𑁄 𑀯𑀻𑀭𑀺𑀬𑀩𑀮𑀁. 𑀧𑀫𑀸𑀤𑁂 𑀅𑀓𑀫𑁆𑀧𑀺𑀬𑀯𑀺𑀭𑀸𑀕𑁄 𑀲𑀢𑀺𑀩𑀮𑀁. 𑀉𑀤𑁆𑀥𑀘𑁆𑀘𑁂 𑀅𑀓𑀫𑁆𑀧𑀺𑀬𑀯𑀺𑀭𑀸𑀕𑁄 𑀲𑀫𑀸𑀥𑀺𑀩𑀮𑀁. 𑀅𑀯𑀺𑀚𑁆𑀚𑀸𑀬 𑀅𑀓𑀫𑁆𑀧𑀺𑀬𑀯𑀺𑀭𑀸𑀕𑁄 𑀧𑀜𑁆𑀜𑀸𑀩𑀮𑀁. 𑀅𑀥𑀺𑀫𑁄𑀓𑁆𑀔𑀯𑀺𑀭𑀸𑀕𑁄 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁. 𑀧𑀕𑁆𑀕𑀳𑀯𑀺𑀭𑀸𑀕𑁄 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁. 𑀉𑀧𑀝𑁆𑀞𑀸𑀦𑀯𑀺𑀭𑀸𑀕𑁄 𑀲𑀢𑀺𑀦𑁆𑀤𑁆𑀭𑀺𑀬𑀁. 𑀅𑀯𑀺𑀓𑁆𑀔𑁂𑀧𑀯𑀺𑀭𑀸𑀕𑁄 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁. 𑀤𑀲𑁆𑀲𑀦𑀯𑀺𑀭𑀸𑀕𑁄 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁. 𑀆𑀥𑀺𑀧𑀢𑁂𑀬𑁆𑀬𑀝𑁆𑀞𑁂𑀦 𑀇𑀦𑁆𑀤𑁆𑀭𑀺𑀬𑀸𑀦𑀺 𑀯𑀺𑀭𑀸𑀕𑁄. 𑀅𑀓𑀫𑁆𑀧𑀺𑀬𑀝𑁆𑀞𑁂𑀦 𑀩𑀮𑀁 𑀯𑀺𑀭𑀸𑀕𑁄. 𑀦𑀺𑀬𑁆𑀬𑀸𑀦𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸 𑀯𑀺𑀭𑀸𑀕𑁄. 𑀳𑁂𑀢𑀼𑀝𑁆𑀞𑁂𑀦 𑀫𑀕𑁆𑀕𑁄 𑀯𑀺𑀭𑀸𑀕𑁄. 𑀉𑀧𑀝𑁆𑀞𑀸𑀦𑀝𑁆𑀞𑁂𑀦 𑀲𑀢𑀺𑀧𑀝𑁆𑀞𑀸𑀦𑀸 𑀯𑀺𑀭𑀸𑀕𑁄. 𑀧𑀤𑀳𑀦𑀝𑁆𑀞𑁂𑀦 𑀲𑀫𑁆𑀫𑀧𑁆𑀧𑀥𑀸𑀦𑀸 𑀯𑀺𑀭𑀸𑀕𑁄. 𑀇𑀚𑁆𑀛𑀦𑀝𑁆𑀞𑁂𑀦 𑀇𑀤𑁆𑀥𑀺𑀧𑀸𑀤𑀸 𑀯𑀺𑀭𑀸𑀕𑁄. 𑀢𑀣𑀝𑁆𑀞𑁂𑀦 𑀲𑀘𑁆𑀘𑀸 𑀯𑀺𑀭𑀸𑀕𑁄. 𑀅𑀯𑀺𑀓𑁆𑀔𑁂𑀧𑀝𑁆𑀞𑁂𑀦 𑀲𑀫𑀣𑁄 𑀯𑀺𑀭𑀸𑀕𑁄. 𑀅𑀦𑀼𑀧𑀲𑁆𑀲𑀦𑀝𑁆𑀞𑁂𑀦 𑀯𑀺𑀧𑀲𑁆𑀲𑀦𑀸 𑀯𑀺𑀭𑀸𑀕𑁄. 𑀏𑀓𑀭𑀲𑀝𑁆𑀞𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑀸 𑀯𑀺𑀭𑀸𑀕𑁄. 𑀅𑀦𑀢𑀺𑀯𑀢𑁆𑀢𑀦𑀝𑁆𑀞𑁂𑀦 𑀬𑀼𑀕𑀦𑀤𑁆𑀥𑀁 𑀯𑀺𑀭𑀸𑀕𑁄. 𑀲𑀁𑀯𑀭𑀝𑁆𑀞𑁂𑀦 𑀲𑀻𑀮𑀯𑀺𑀲𑀼𑀤𑁆𑀥𑀺 𑀯𑀺𑀭𑀸𑀕𑁄. 𑀅𑀯𑀺𑀓𑁆𑀔𑁂𑀧𑀝𑁆𑀞𑁂𑀦 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀺 𑀯𑀺𑀭𑀸𑀕𑁄. 𑀤𑀲𑁆𑀲𑀦𑀝𑁆𑀞𑁂𑀦 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺 𑀯𑀺𑀭𑀸𑀕𑁄. 𑀯𑀺𑀫𑀼𑀢𑁆𑀢𑀝𑁆𑀞𑁂𑀦 𑀯𑀺𑀫𑁄𑀓𑁆𑀔𑁄 𑀯𑀺𑀭𑀸𑀕𑁄. 𑀧𑀝𑀺𑀯𑁂𑀥𑀝𑁆𑀞𑁂𑀦 𑀯𑀺𑀚𑁆𑀚𑀸 𑀯𑀺𑀭𑀸𑀕𑁄. 𑀧𑀭𑀺𑀘𑁆𑀘𑀸𑀕𑀝𑁆𑀞𑁂𑀦 𑀯𑀺𑀫𑀼𑀢𑁆𑀢𑀺 𑀯𑀺𑀭𑀸𑀕𑁄. 𑀲𑀫𑀼𑀘𑁆𑀙𑁂𑀤𑀝𑁆𑀞𑁂𑀦 𑀔𑀬𑁂 𑀜𑀸𑀡𑀁 𑀯𑀺𑀭𑀸𑀕𑁄. 𑀙𑀦𑁆𑀤𑁄 𑀫𑀽𑀮𑀝𑁆𑀞𑁂𑀦 𑀯𑀺𑀭𑀸𑀕𑁄. 𑀫𑀦𑀲𑀺𑀓𑀸𑀭𑁄 𑀲𑀫𑀼𑀝𑁆𑀞𑀸𑀦𑀝𑁆𑀞𑁂𑀦 𑀯𑀺𑀭𑀸𑀕𑁄. 𑀨𑀲𑁆𑀲𑁄 𑀲𑀫𑁄𑀥𑀸𑀦𑀝𑁆𑀞𑁂𑀦 𑀯𑀺𑀭𑀸𑀕𑁄. 𑀯𑁂𑀤𑀦𑀸 𑀲𑀫𑁄𑀲𑀭𑀡𑀝𑁆𑀞𑁂𑀦 𑀯𑀺𑀭𑀸𑀕𑁄. 𑀲𑀫𑀸𑀥𑀺 𑀧𑀫𑀼𑀔𑀝𑁆𑀞𑁂𑀦 𑀯𑀺𑀭𑀸𑀕𑁄. 𑀲𑀢𑀺 𑀆𑀥𑀺𑀧𑀢𑁂𑀬𑁆𑀬𑀝𑁆𑀞𑁂𑀦 𑀯𑀺𑀭𑀸𑀕𑁄. 𑀧𑀜𑁆𑀜𑀸 𑀢𑀢𑀼𑀢𑁆𑀢𑀭𑀝𑁆𑀞𑁂𑀦 𑀯𑀺𑀭𑀸𑀕𑁄. 𑀯𑀺𑀫𑀼𑀢𑁆𑀢𑀺 𑀲𑀸𑀭𑀝𑁆𑀞𑁂𑀦 𑀯𑀺𑀭𑀸𑀕𑁄. 𑀅𑀫𑀢𑁄𑀕𑀥𑀁 𑀦𑀺𑀩𑁆𑀩𑀸𑀦𑀁 𑀧𑀭𑀺𑀬𑁄𑀲𑀸𑀦𑀝𑁆𑀞𑁂𑀦 𑀫𑀕𑁆𑀕𑁄.

𑀤𑀲𑁆𑀲𑀦𑀫𑀕𑁆𑀕𑁄 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀅𑀪𑀺𑀦𑀺𑀭𑁄𑀧𑀦𑀫𑀕𑁆𑀕𑁄 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄…𑀧𑁂… 𑀅𑀫𑀢𑁄𑀕𑀥𑀁 𑀦𑀺𑀩𑁆𑀩𑀸𑀦𑀁 𑀧𑀭𑀺𑀬𑁄𑀲𑀸𑀦𑀝𑁆𑀞𑁂𑀦 𑀫𑀕𑁆𑀕𑁄. 𑀏𑀯𑀁 𑀯𑀺𑀭𑀸𑀕𑁄 𑀫𑀕𑁆𑀕𑁄.

𑁨𑁯. 𑀓𑀣𑀁 𑀯𑀺𑀫𑀼𑀢𑁆𑀢𑀺 𑀨𑀮𑀁? 𑀲𑁄𑀢𑀸𑀧𑀢𑁆𑀢𑀺𑀨𑀮𑀓𑁆𑀔𑀡𑁂 𑀤𑀲𑁆𑀲𑀦𑀝𑁆𑀞𑁂𑀦 𑀲𑀫𑁆𑀫𑀸𑀤𑀺𑀝𑁆𑀞𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀯𑀺𑀫𑀼𑀢𑁆𑀢𑀸 𑀳𑁄𑀢𑀺, 𑀢𑀤𑀦𑀼𑀯𑀢𑁆𑀢𑀓𑀓𑀺𑀮𑁂𑀲𑁂𑀳𑀺 𑀘 𑀔𑀦𑁆𑀥𑁂𑀳𑀺 𑀘 𑀯𑀺𑀫𑀼𑀢𑁆𑀢𑀸 𑀳𑁄𑀢𑀺, 𑀩𑀳𑀺𑀤𑁆𑀥𑀸 𑀘 𑀲𑀩𑁆𑀩𑀦𑀺𑀫𑀺𑀢𑁆𑀢𑁂𑀳𑀺 𑀯𑀺𑀫𑀼𑀢𑁆𑀢𑀸 𑀳𑁄𑀢𑀺, 𑀯𑀺𑀫𑀼𑀢𑁆𑀢𑀺 𑀯𑀺𑀫𑀼𑀢𑁆𑀢𑀸𑀭𑀫𑁆𑀫𑀡𑀸 𑀯𑀺𑀫𑀼𑀢𑁆𑀢𑀺𑀕𑁄𑀘𑀭𑀸 𑀯𑀺𑀫𑀼𑀢𑁆𑀢𑀺𑀬𑀸 𑀲𑀫𑀼𑀤𑀸𑀕𑀢𑀸 𑀯𑀺𑀫𑀼𑀢𑁆𑀢𑀺𑀬𑀸 𑀞𑀺𑀢𑀸 𑀯𑀺𑀫𑀼𑀢𑁆𑀢𑀺𑀬𑀸 𑀧𑀢𑀺𑀝𑁆𑀞𑀺𑀢𑀸. 𑀯𑀺𑀫𑀼𑀢𑁆𑀢𑀻𑀢𑀺 𑀤𑁆𑀯𑁂 𑀫𑀼𑀢𑁆𑀢𑀺𑀬𑁄 𑁋 𑀦𑀺𑀩𑁆𑀩𑀸𑀦𑀜𑁆𑀘 𑀯𑀺𑀫𑀼𑀢𑁆𑀢𑀺, 𑀬𑁂 𑀘 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀢𑀸𑀚𑀸𑀢𑀸 𑀥𑀫𑁆𑀫𑀸 𑀲𑀩𑁆𑀩𑁂 𑀘 𑀯𑀺𑀫𑀼𑀢𑁆𑀢𑀸 𑀳𑁄𑀦𑁆𑀢𑀻𑀢𑀺 𑁋 𑀯𑀺𑀫𑀼𑀢𑁆𑀢𑀺 𑀨𑀮𑀁.

𑀅𑀪𑀺𑀦𑀺𑀭𑁄𑀧𑀦𑀝𑁆𑀞𑁂𑀦 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀸 𑀯𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀢𑀤𑀦𑀼𑀯𑀢𑁆𑀢𑀓𑀓𑀺𑀮𑁂𑀲𑁂𑀳𑀺 𑀘 𑀔𑀦𑁆𑀥𑁂𑀳𑀺 𑀘 𑀯𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀩𑀳𑀺𑀤𑁆𑀥𑀸 𑀘 𑀲𑀩𑁆𑀩𑀦𑀺𑀫𑀺𑀢𑁆𑀢𑁂𑀳𑀺 𑀯𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀯𑀺𑀫𑀼𑀢𑁆𑀢𑀺 𑀯𑀺𑀫𑀼𑀢𑁆𑀢𑀸𑀭𑀫𑁆𑀫𑀡𑀸 𑀯𑀺𑀫𑀼𑀢𑁆𑀢𑀺𑀕𑁄𑀘𑀭𑀸 𑀯𑀺𑀫𑀼𑀢𑁆𑀢𑀺𑀬𑀸 𑀲𑀫𑀼𑀤𑀸𑀕𑀢𑀸 𑀯𑀺𑀫𑀼𑀢𑁆𑀢𑀺𑀬𑀸 𑀞𑀺𑀢𑀸 𑀯𑀺𑀫𑀼𑀢𑁆𑀢𑀺𑀬𑀸 𑀧𑀢𑀺𑀝𑁆𑀞𑀺𑀢𑀸. 𑀯𑀺𑀫𑀼𑀢𑁆𑀢𑀻𑀢𑀺 𑀤𑁆𑀯𑁂 𑀯𑀺𑀫𑀼𑀢𑁆𑀢𑀺𑀬𑁄 𑁋 𑀦𑀺𑀩𑁆𑀩𑀸𑀦𑀜𑁆𑀘 𑀯𑀺𑀫𑀼𑀢𑁆𑀢𑀺, 𑀬𑁂 𑀘 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀢𑀸𑀚𑀸𑀢𑀸 𑀥𑀫𑁆𑀫𑀸 𑀲𑀩𑁆𑀩𑁂 𑀯𑀺𑀫𑀼𑀢𑁆𑀢𑀸 𑀳𑁄𑀦𑁆𑀢𑀻𑀢𑀺 𑁋 𑀯𑀺𑀫𑀼𑀢𑁆𑀢𑀺 𑀨𑀮𑀁.

𑀧𑀭𑀺𑀕𑁆𑀕𑀳𑀝𑁆𑀞𑁂𑀦 𑀲𑀫𑁆𑀫𑀸𑀯𑀸𑀘𑀸 𑀫𑀺𑀘𑁆𑀙𑀸𑀯𑀸𑀘𑀸𑀬 𑀯𑀺𑀫𑀼𑀢𑁆𑀢𑀸 𑀳𑁄𑀢𑀺, 𑀲𑀫𑀼𑀝𑁆𑀞𑀸𑀦𑀝𑁆𑀞𑁂𑀦 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀫𑀺𑀘𑁆𑀙𑀸𑀓𑀫𑁆𑀫𑀦𑁆𑀢𑀸 𑀯𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀯𑁄𑀤𑀸𑀦𑀝𑁆𑀞𑁂𑀦 𑀲𑀫𑁆𑀫𑀸𑀆𑀚𑀻𑀯𑁄 𑀫𑀺𑀘𑁆𑀙𑀸𑀆𑀚𑀻𑀯𑀸 𑀯𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀧𑀕𑁆𑀕𑀳𑀝𑁆𑀞𑁂𑀦 𑀲𑀫𑁆𑀫𑀸𑀯𑀸𑀬𑀸𑀫𑁄 𑀫𑀺𑀘𑁆𑀙𑀸𑀯𑀸𑀬𑀸𑀫𑀸 𑀯𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀉𑀧𑀝𑁆𑀞𑀸𑀦𑀝𑁆𑀞𑁂𑀦 𑀲𑀫𑁆𑀫𑀸𑀲𑀢𑀺 𑀫𑀺𑀘𑁆𑀙𑀸𑀲𑀢𑀺𑀬𑀸 𑀯𑀺𑀫𑀼𑀢𑁆𑀢𑀸 𑀳𑁄𑀢𑀺, 𑀅𑀯𑀺𑀓𑁆𑀔𑁂𑀧𑀝𑁆𑀞𑁂𑀦 𑀲𑀫𑁆𑀫𑀸𑀲𑀫𑀸𑀥𑀺 𑀫𑀺𑀘𑁆𑀙𑀸𑀲𑀫𑀸𑀥𑀺𑀢𑁄 𑀯𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀢𑀤𑀦𑀼𑀯𑀢𑁆𑀢𑀓𑀓𑀺𑀮𑁂𑀲𑁂𑀳𑀺 𑀘 𑀔𑀦𑁆𑀥𑁂𑀳𑀺 𑀘 𑀯𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀩𑀳𑀺𑀤𑁆𑀥𑀸 𑀘 𑀲𑀩𑁆𑀩𑀦𑀺𑀫𑀺𑀢𑁆𑀢𑁂𑀳𑀺 𑀯𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀯𑀺𑀫𑀼𑀢𑁆𑀢𑀺 𑀯𑀺𑀫𑀼𑀢𑁆𑀢𑀸𑀭𑀫𑁆𑀫𑀡𑀸 𑀯𑀺𑀫𑀼𑀢𑁆𑀢𑀺𑀕𑁄𑀘𑀭𑀸 𑀯𑀺𑀫𑀼𑀢𑁆𑀢𑀺𑀬𑀸 𑀲𑀫𑀼𑀤𑀸𑀕𑀢𑀸 𑀯𑀺𑀫𑀼𑀢𑁆𑀢𑀺𑀬𑀸 𑀞𑀺𑀢𑀸 𑀯𑀺𑀫𑀼𑀢𑁆𑀢𑀺𑀬𑀸 𑀧𑀢𑀺𑀝𑁆𑀞𑀺𑀢𑀸. 𑀯𑀺𑀫𑀼𑀢𑁆𑀢𑀻𑀢𑀺. 𑀤𑁆𑀯𑁂 𑀯𑀺𑀫𑀼𑀢𑁆𑀢𑀺𑀬𑁄 𑁋 𑀦𑀺𑀩𑁆𑀩𑀸𑀦𑀜𑁆𑀘 𑀯𑀺𑀫𑀼𑀢𑁆𑀢𑀺, 𑀬𑁂 𑀘 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀢𑀸𑀚𑀸𑀢𑀸 𑀥𑀫𑁆𑀫𑀸 𑀲𑀩𑁆𑀩𑁂 𑀯𑀺𑀫𑀼𑀢𑁆𑀢𑀸 𑀳𑁄𑀦𑁆𑀢𑀻𑀢𑀺 𑁋 𑀯𑀺𑀫𑀼𑀢𑁆𑀢𑀺 𑀨𑀮𑀁.

𑀲𑀓𑀤𑀸𑀕𑀸𑀫𑀺𑀨𑀮𑀓𑁆𑀔𑀡𑁂 𑀤𑀲𑁆𑀲𑀦𑀝𑁆𑀞𑁂𑀦 𑀲𑀫𑁆𑀫𑀸𑀤𑀺𑀝𑁆𑀞𑀺…𑀧𑁂… 𑀅𑀯𑀺𑀓𑁆𑀔𑁂𑀧𑀝𑁆𑀞𑁂𑀦 𑀲𑀫𑁆𑀫𑀸𑀲𑀫𑀸𑀥𑀺 𑀑𑀴𑀸𑀭𑀺𑀓𑀸 𑀓𑀸𑀫𑀭𑀸𑀕𑀲𑀜𑁆𑀜𑁄𑀚𑀦𑀸 𑀧𑀝𑀺𑀖𑀲𑀜𑁆𑀜𑁄𑀚𑀦𑀸 𑀑𑀴𑀸𑀭𑀺𑀓𑀸 𑀓𑀸𑀫𑀭𑀸𑀕𑀸𑀦𑀼𑀲𑀬𑀸 𑀧𑀝𑀺𑀖𑀸𑀦𑀼𑀲𑀬𑀸 𑀯𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀢𑀤𑀦𑀼𑀯𑀢𑁆𑀢𑀓𑀓𑀺𑀮𑁂𑀲𑁂𑀳𑀺 𑀘 𑀔𑀦𑁆𑀥𑁂𑀳𑀺 𑀘 𑀯𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀩𑀳𑀺𑀤𑁆𑀥𑀸 𑀘 𑀲𑀩𑁆𑀩𑀦𑀺𑀫𑀺𑀢𑁆𑀢𑁂𑀳𑀺 𑀯𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀯𑀺𑀫𑀼𑀢𑁆𑀢𑀺 𑀯𑀺𑀫𑀼𑀢𑁆𑀢𑀸𑀭𑀫𑁆𑀫𑀡𑀸 𑀯𑀺𑀫𑀼𑀢𑁆𑀢𑀺𑀕𑁄𑀘𑀭𑀸 𑀯𑀺𑀫𑀼𑀢𑁆𑀢𑀺𑀬𑀸 𑀲𑀫𑀼𑀤𑀸𑀕𑀢𑀸 𑀯𑀺𑀫𑀼𑀢𑁆𑀢𑀺𑀬𑀸 𑀞𑀺𑀢𑀸 𑀯𑀺𑀫𑀼𑀢𑁆𑀢𑀺𑀬𑀸 𑀧𑀢𑀺𑀝𑁆𑀞𑀺𑀢𑀸. 𑀯𑀺𑀫𑀼𑀢𑁆𑀢𑀻𑀢𑀺 𑀤𑁆𑀯𑁂 𑀯𑀺𑀫𑀼𑀢𑁆𑀢𑀺𑀬𑁄 𑁋 𑀦𑀺𑀩𑁆𑀩𑀸𑀦𑀜𑁆𑀘 𑀯𑀺𑀫𑀼𑀢𑁆𑀢𑀺, 𑀬𑁂 𑀘 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀢𑀸𑀚𑀸𑀢𑀸 𑀥𑀫𑁆𑀫𑀸 𑀲𑀩𑁆𑀩𑁂 𑀯𑀺𑀫𑀼𑀢𑁆𑀢𑀸 𑀳𑁄𑀦𑁆𑀢𑀻𑀢𑀺 𑁋 𑀯𑀺𑀫𑀼𑀢𑁆𑀢𑀺 𑀨𑀮𑀁.

𑀅𑀦𑀸𑀕𑀸𑀫𑀺𑀨𑀮𑀓𑁆𑀔𑀡𑁂 𑀤𑀲𑁆𑀲𑀦𑀝𑁆𑀞𑁂𑀦 𑀲𑀫𑁆𑀫𑀸𑀤𑀺𑀝𑁆𑀞𑀺…𑀧𑁂… 𑀅𑀯𑀺𑀓𑁆𑀔𑁂𑀧𑀝𑁆𑀞𑁂𑀦 𑀲𑀫𑁆𑀫𑀸𑀲𑀫𑀸𑀥𑀺 𑀅𑀦𑀼𑀲𑀳𑀕𑀢𑀸 𑀓𑀸𑀫𑀭𑀸𑀕𑀲𑀜𑁆𑀜𑁄𑀚𑀦𑀸 𑀧𑀝𑀺𑀖𑀲𑀜𑁆𑀜𑁄𑀚𑀦𑀸 𑀅𑀦𑀼𑀲𑀳𑀕𑀢𑀸 𑀓𑀸𑀫𑀭𑀸𑀕𑀸𑀦𑀼𑀲𑀬𑀸 𑀧𑀝𑀺𑀖𑀸𑀦𑀼𑀲𑀬𑀸 𑀯𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀢𑀤𑀦𑀼𑀯𑀢𑁆𑀢𑀓𑀓𑀺𑀮𑁂𑀲𑁂𑀳𑀺 𑀘 𑀔𑀦𑁆𑀥𑁂𑀳𑀺 𑀘 𑀯𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀩𑀳𑀺𑀤𑁆𑀥𑀸 𑀘 𑀲𑀩𑁆𑀩𑀦𑀺𑀫𑀺𑀢𑁆𑀢𑁂𑀳𑀺 𑀯𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀯𑀺𑀫𑀼𑀢𑁆𑀢𑀺 𑀯𑀺𑀫𑀼𑀢𑁆𑀢𑀸𑀭𑀫𑁆𑀫𑀡𑀸 𑀯𑀺𑀫𑀼𑀢𑁆𑀢𑀺𑀕𑁄𑀘𑀭𑀸 𑀯𑀺𑀫𑀼𑀢𑁆𑀢𑀺𑀬𑀸 𑀲𑀫𑀼𑀤𑀸𑀕𑀢𑀸 𑀯𑀺𑀫𑀼𑀢𑁆𑀢𑀺𑀬𑀸 𑀞𑀺𑀢𑀸 𑀯𑀺𑀫𑀼𑀢𑁆𑀢𑀺𑀬𑀸 𑀧𑀢𑀺𑀝𑁆𑀞𑀺𑀢𑀸…𑀧𑁂….

𑀅𑀭𑀳𑀢𑁆𑀢𑀨𑀮𑀓𑁆𑀔𑀡𑁂 𑀤𑀲𑁆𑀲𑀦𑀝𑁆𑀞𑁂𑀦 𑀲𑀫𑁆𑀫𑀸𑀤𑀺𑀝𑁆𑀞𑀺…𑀧𑁂… 𑀅𑀯𑀺𑀓𑁆𑀔𑁂𑀧𑀝𑁆𑀞𑁂𑀦 𑀲𑀫𑁆𑀫𑀸𑀲𑀫𑀸𑀥𑀺 𑀭𑀽𑀧𑀭𑀸𑀕𑀸 𑀅𑀭𑀽𑀧𑀭𑀸𑀕𑀸 𑀫𑀸𑀦𑀸 𑀉𑀤𑁆𑀥𑀘𑁆𑀘𑀸 𑀅𑀯𑀺𑀚𑁆𑀚𑀸𑀬 𑀫𑀸𑀦𑀸𑀦𑀼𑀲𑀬𑀸 𑀪𑀯𑀭𑀸𑀕𑀸𑀦𑀼𑀲𑀬𑀸 𑀅𑀯𑀺𑀚𑁆𑀚𑀸𑀦𑀼𑀲𑀬𑀸 𑀯𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀢𑀤𑀦𑀼𑀯𑀢𑁆𑀢𑀓𑀓𑀺𑀮𑁂𑀲𑁂𑀳𑀺 𑀘 𑀔𑀦𑁆𑀥𑁂𑀳𑀺 𑀘 𑀯𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀩𑀳𑀺𑀤𑁆𑀥𑀸 𑀘 𑀲𑀩𑁆𑀩𑀦𑀺𑀫𑀺𑀢𑁆𑀢𑁂𑀳𑀺 𑀯𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀯𑀺𑀫𑀼𑀢𑁆𑀢𑀺 𑀯𑀺𑀫𑀼𑀢𑁆𑀢𑀸𑀭𑀫𑁆𑀫𑀡𑀸 𑀯𑀺𑀫𑀼𑀢𑁆𑀢𑀺𑀕𑁄𑀘𑀭𑀸 𑀯𑀺𑀫𑀼𑀢𑁆𑀢𑀺𑀬𑀸 𑀲𑀫𑀼𑀤𑀸𑀕𑀢𑀸 𑀯𑀺𑀫𑀼𑀢𑁆𑀢𑀺𑀬𑀸 𑀞𑀺𑀢𑀸 𑀯𑀺𑀫𑀼𑀢𑁆𑀢𑀺𑀬𑀸 𑀧𑀢𑀺𑀝𑁆𑀞𑀺𑀢𑀸. 𑀯𑀺𑀫𑀼𑀢𑁆𑀢𑀻𑀢𑀺 𑀤𑁆𑀯𑁂 𑀯𑀺𑀫𑀼𑀢𑁆𑀢𑀺𑀬𑁄 𑁋 𑀦𑀺𑀩𑁆𑀩𑀸𑀦𑀜𑁆𑀘 𑀯𑀺𑀫𑀼𑀢𑁆𑀢𑀺, 𑀬𑁂 𑀘 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀢𑀸 𑀚𑀸𑀢𑀸 𑀥𑀫𑁆𑀫𑀸 𑀲𑀩𑁆𑀩𑁂 𑀯𑀺𑀫𑀼𑀢𑁆𑀢𑀸 𑀳𑁄𑀦𑁆𑀢𑀻𑀢𑀺 𑁋 𑀯𑀺𑀫𑀼𑀢𑁆𑀢𑀺 𑀨𑀮𑀁.

𑀤𑀲𑁆𑀲𑀦𑀯𑀺𑀫𑀼𑀢𑁆𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺…𑀧𑁂… 𑀅𑀯𑀺𑀓𑁆𑀔𑁂𑀧𑀯𑀺𑀫𑀼𑀢𑁆𑀢𑀺 𑀲𑀫𑁆𑀫𑀸𑀲𑀫𑀸𑀥𑀺, 𑀉𑀧𑀝𑁆𑀞𑀸𑀦𑀯𑀺𑀫𑀼𑀢𑁆𑀢𑀺 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀧𑀝𑀺𑀲𑀗𑁆𑀔𑀸𑀦𑀯𑀺𑀫𑀼𑀢𑁆𑀢𑀺 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑁄. 𑀅𑀲𑁆𑀲𑀤𑁆𑀥𑀺𑀬𑁂 𑀅𑀓𑀫𑁆𑀧𑀺𑀬𑀯𑀺𑀫𑀼𑀢𑁆𑀢𑀺 𑀲𑀤𑁆𑀥𑀸𑀩𑀮𑀁…𑀧𑁂… 𑀅𑀯𑀺𑀚𑁆𑀚𑀸𑀬 𑀅𑀓𑀫𑁆𑀧𑀺𑀬𑀯𑀺𑀫𑀼𑀢𑁆𑀢𑀺 𑀧𑀜𑁆𑀜𑀸𑀩𑀮𑀁. 𑀅𑀥𑀺𑀫𑁄𑀓𑁆𑀔𑀯𑀺𑀫𑀼𑀢𑁆𑀢𑀺 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁…𑀧𑁂… 𑀤𑀲𑁆𑀲𑀦𑀯𑀺𑀫𑀼𑀢𑁆𑀢𑀺 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁.

𑀆𑀥𑀺𑀧𑀢𑁂𑀬𑁆𑀬𑀝𑁆𑀞𑁂𑀦 𑀇𑀦𑁆𑀤𑁆𑀭𑀺𑀬𑀸 𑀯𑀺𑀫𑀼𑀢𑁆𑀢𑀺. 𑀅𑀓𑀫𑁆𑀧𑀺𑀬𑀝𑁆𑀞𑁂𑀦 𑀩𑀮𑀸 𑀯𑀺𑀫𑀼𑀢𑁆𑀢𑀺, 𑀦𑀺𑀬𑁆𑀬𑀸𑀦𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸 𑀯𑀺𑀫𑀼𑀢𑁆𑀢𑀺, 𑀳𑁂𑀢𑀼𑀝𑁆𑀞𑁂𑀦 𑀫𑀕𑁆𑀕𑁄 𑀯𑀺𑀫𑀼𑀢𑁆𑀢𑀺, 𑀉𑀧𑀝𑁆𑀞𑀸𑀦𑀝𑁆𑀞𑁂𑀦 𑀲𑀢𑀺𑀧𑀝𑁆𑀞𑀸𑀦𑀸 𑀯𑀺𑀫𑀼𑀢𑁆𑀢𑀺, 𑀧𑀤𑀳𑀦𑀝𑁆𑀞𑁂𑀦 𑀲𑀫𑁆𑀫𑀧𑁆𑀧𑀥𑀸𑀦𑀸 𑀯𑀺𑀫𑀼𑀢𑁆𑀢𑀺, 𑀇𑀚𑁆𑀛𑀦𑀝𑁆𑀞𑁂𑀦 𑀇𑀤𑁆𑀥𑀺𑀧𑀸𑀤𑀸 𑀯𑀺𑀫𑀼𑀢𑁆𑀢𑀺, 𑀢𑀣𑀝𑁆𑀞𑁂𑀦 𑀲𑀘𑁆𑀘𑀸 𑀯𑀺𑀫𑀼𑀢𑁆𑀢𑀺, 𑀅𑀯𑀺𑀓𑁆𑀔𑁂𑀧𑀝𑁆𑀞𑁂𑀦 𑀲𑀫𑀣𑁄 𑀯𑀺𑀫𑀼𑀢𑁆𑀢𑀺, 𑀅𑀦𑀼𑀧𑀲𑁆𑀲𑀦𑀝𑁆𑀞𑁂𑀦 𑀯𑀺𑀧𑀲𑁆𑀲𑀦𑀸 𑀯𑀺𑀫𑀼𑀢𑁆𑀢𑀺, 𑀏𑀓𑀭𑀲𑀝𑁆𑀞𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑀸 𑀯𑀺𑀫𑀼𑀢𑁆𑀢𑀺, 𑀅𑀦𑀢𑀺𑀯𑀢𑁆𑀢𑀦𑀝𑁆𑀞𑁂𑀦 𑀬𑀼𑀕𑀦𑀤𑁆𑀥𑀁 𑀯𑀺𑀫𑀼𑀢𑁆𑀢𑀺, 𑀲𑀁𑀯𑀭𑀝𑁆𑀞𑁂𑀦 𑀲𑀻𑀮𑀯𑀺𑀲𑀼𑀤𑁆𑀥𑀺 𑀯𑀺𑀫𑀼𑀢𑁆𑀢𑀺, 𑀅𑀯𑀺𑀓𑁆𑀔𑁂𑀧𑀝𑁆𑀞𑁂𑀦 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀺 𑀯𑀺𑀫𑀼𑀢𑁆𑀢𑀺, 𑀤𑀲𑁆𑀲𑀦𑀝𑁆𑀞𑁂𑀦 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺 𑀯𑀺𑀫𑀼𑀢𑁆𑀢𑀺, 𑀯𑀺𑀫𑀼𑀢𑁆𑀢𑀝𑁆𑀞𑁂𑀦 𑀯𑀺𑀫𑁄𑀓𑁆𑀔𑁄 𑀯𑀺𑀫𑀼𑀢𑁆𑀢𑀺, 𑀧𑀝𑀺𑀯𑁂𑀥𑀝𑁆𑀞𑁂𑀦 𑀯𑀺𑀚𑁆𑀚𑀸 𑀯𑀺𑀫𑀼𑀢𑁆𑀢𑀺, 𑀧𑀭𑀺𑀘𑁆𑀘𑀸𑀕𑀝𑁆𑀞𑁂𑀦 𑀯𑀺𑀫𑀼𑀢𑁆𑀢𑀺 𑀯𑀺𑀫𑀼𑀢𑁆𑀢𑀺, 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀝𑁆𑀞𑁂𑀦 𑀅𑀦𑀼𑀧𑁆𑀧𑀸𑀤𑁂 𑀜𑀸𑀡𑀁 𑀯𑀺𑀫𑀼𑀢𑁆𑀢𑀺, 𑀙𑀦𑁆𑀤𑁄 𑀫𑀽𑀮𑀝𑁆𑀞𑁂𑀦 𑀯𑀺𑀫𑀼𑀢𑁆𑀢𑀺, 𑀫𑀦𑀲𑀺𑀓𑀸𑀭𑁄 𑀲𑀫𑀼𑀝𑁆𑀞𑀸𑀦𑀝𑁆𑀞𑁂𑀦 𑀯𑀺𑀫𑀼𑀢𑁆𑀢𑀺, 𑀨𑀲𑁆𑀲𑁄 𑀲𑀫𑁄𑀥𑀸𑀦𑀝𑁆𑀞𑁂𑀦 𑀯𑀺𑀫𑀼𑀢𑁆𑀢𑀺, 𑀯𑁂𑀤𑀦𑀸 𑀲𑀫𑁄𑀲𑀭𑀡𑀝𑁆𑀞𑁂𑀦 𑀯𑀺𑀫𑀼𑀢𑁆𑀢𑀺, 𑀲𑀫𑀸𑀥𑀺 𑀧𑀫𑀼𑀔𑀝𑁆𑀞𑁂𑀦 𑀯𑀺𑀫𑀼𑀢𑁆𑀢𑀺, 𑀲𑀢𑀺 𑀆𑀥𑀺𑀧𑀢𑁂𑀬𑁆𑀬𑀝𑁆𑀞𑁂𑀦 𑀯𑀺𑀫𑀼𑀢𑁆𑀢𑀺, 𑀧𑀜𑁆𑀜𑀸 𑀢𑀢𑀼𑀢𑁆𑀢𑀭𑀝𑁆𑀞𑁂𑀦 𑀯𑀺𑀫𑀼𑀢𑁆𑀢𑀺, 𑀯𑀺𑀫𑀼𑀢𑁆𑀢𑀺 𑀲𑀸𑀭𑀝𑁆𑀞𑁂𑀦 𑀯𑀺𑀫𑀼𑀢𑁆𑀢𑀺, 𑀅𑀫𑀢𑁄𑀕𑀥𑀁 𑀦𑀺𑀩𑁆𑀩𑀸𑀦𑀁 𑀧𑀭𑀺𑀬𑁄𑀲𑀸𑀦𑀝𑁆𑀞𑁂𑀦 𑀯𑀺𑀫𑀼𑀢𑁆𑀢𑀺. 𑀏𑀯𑀁 𑀯𑀺𑀫𑀼𑀢𑁆𑀢𑀺 𑀨𑀮𑀁. 𑀏𑀯𑀁 𑀯𑀺𑀭𑀸𑀕𑁄 𑀫𑀕𑁆𑀕𑁄, 𑀯𑀺𑀫𑀼𑀢𑁆𑀢𑀺 𑀨𑀮𑀦𑁆𑀢𑀺.

𑀯𑀺𑀭𑀸𑀕𑀓𑀣𑀸 𑀦𑀺𑀝𑁆𑀞𑀺𑀢𑀸.