𑁨. 𑀯𑀺𑀘𑀬𑀳𑀸𑀭𑀯𑀺𑀪𑀗𑁆𑀕𑁄

𑁧𑁧. 𑀢𑀢𑁆𑀣 𑀓𑀢𑀫𑁄 𑀯𑀺𑀘𑀬𑁄 𑀳𑀸𑀭𑁄? ‘‘𑀬𑀁 𑀧𑀼𑀘𑁆𑀙𑀺𑀢𑀜𑁆𑀘 𑀯𑀺𑀲𑁆𑀲𑀚𑁆𑀚𑀺𑀢𑀜𑁆𑀘𑀸’’𑀢𑀺 𑀕𑀸𑀣𑀸, 𑀅𑀬𑀁 𑀯𑀺𑀘𑀬𑁄 𑀳𑀸𑀭𑁄.

𑀓𑀺𑀁 𑀯𑀺𑀘𑀺𑀦𑀢𑀺? 𑀧𑀤𑀁 𑀯𑀺𑀘𑀺𑀦𑀢𑀺, 𑀧𑀜𑁆𑀳𑀁 𑀯𑀺𑀘𑀺𑀦𑀢𑀺, 𑀯𑀺𑀲𑀚𑁆𑀚𑀦𑀁 [𑀯𑀺𑀲𑁆𑀲𑀚𑁆𑀚𑀦𑀁 (𑀲𑀻. 𑀓.)] 𑀯𑀺𑀘𑀺𑀦𑀢𑀺, 𑀧𑀼𑀩𑁆𑀩𑀸𑀧𑀭𑀁 𑀯𑀺𑀘𑀺𑀦𑀢𑀺, 𑀅𑀲𑁆𑀲𑀸𑀤𑀁 𑀯𑀺𑀘𑀺𑀦𑀢𑀺, 𑀆𑀤𑀻𑀦𑀯𑀁 𑀯𑀺𑀘𑀺𑀦𑀢𑀺, 𑀦𑀺𑀲𑁆𑀲𑀭𑀡𑀁 𑀯𑀺𑀘𑀺𑀦𑀢𑀺, 𑀨𑀮𑀁 𑀯𑀺𑀘𑀺𑀦𑀢𑀺, 𑀉𑀧𑀸𑀬𑀁 𑀯𑀺𑀘𑀺𑀦𑀢𑀺, 𑀆𑀡𑀢𑁆𑀢𑀺𑀁 𑀯𑀺𑀘𑀺𑀦𑀢𑀺, 𑀅𑀦𑀼𑀕𑀻𑀢𑀺𑀁 𑀯𑀺𑀘𑀺𑀦𑀢𑀺, 𑀲𑀩𑁆𑀩𑁂 𑀦𑀯 𑀲𑀼𑀢𑁆𑀢𑀦𑁆𑀢𑁂 𑀯𑀺𑀘𑀺𑀦𑀢𑀺. 𑀬𑀣𑀸 𑀓𑀺𑀁 𑀪𑀯𑁂, 𑀬𑀣𑀸 𑀆𑀬𑀲𑁆𑀫𑀸 𑀅𑀚𑀺𑀢𑁄 𑀧𑀸𑀭𑀸𑀬𑀦𑁂 𑀪𑀕𑀯𑀦𑁆𑀢𑀁 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺 𑁋

‘‘𑀓𑁂𑀦𑀲𑁆𑀲𑀼 [𑀧𑀲𑁆𑀲 𑀲𑀼. 𑀦𑀺. 𑁧𑁦𑁩𑁮] 𑀦𑀺𑀯𑀼𑀢𑁄 𑀮𑁄𑀓𑁄, [𑀇𑀘𑁆𑀘𑀸𑀬𑀲𑁆𑀫𑀸 𑀅𑀚𑀺𑀢𑁄,]

𑀓𑁂𑀦𑀲𑁆𑀲𑀼 𑀦𑀧𑁆𑀧𑀓𑀸𑀲𑀢𑀺;

𑀓𑀺𑀲𑁆𑀲𑀸𑀪𑀺𑀮𑁂𑀧𑀦𑀁 𑀩𑁆𑀭𑀽𑀲𑀺, 𑀓𑀺𑀁 𑀲𑀼 𑀢𑀲𑁆𑀲 𑀫𑀳𑀩𑁆𑀪𑀬’’𑀦𑁆𑀢𑀺.

𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀧𑀤𑀸𑀦𑀺 𑀧𑀼𑀘𑁆𑀙𑀺𑀢𑀸𑀦𑀺, 𑀲𑁄 𑀏𑀓𑁄 𑀧𑀜𑁆𑀳𑁄. 𑀓𑀲𑁆𑀫𑀸? 𑀏𑀓𑀯𑀢𑁆𑀣𑀼 𑀧𑀭𑀺𑀕𑁆𑀕𑀳𑀸, 𑀏𑀯𑀜𑁆𑀳𑀺 𑀆𑀳 ‘‘𑀓𑁂𑀦𑀲𑁆𑀲𑀼 𑀦𑀺𑀯𑀼𑀢𑁄 𑀮𑁄𑀓𑁄’’𑀢𑀺 𑀮𑁄𑀓𑀸𑀥𑀺𑀝𑁆𑀞𑀸𑀦𑀁 𑀧𑀼𑀘𑁆𑀙𑀢𑀺, ‘‘𑀓𑁂𑀦𑀲𑁆𑀲𑀼 𑀦𑀧𑁆𑀧𑀓𑀸𑀲𑀢𑀻’’𑀢𑀺 𑀮𑁄𑀓𑀲𑁆𑀲 𑀅𑀧𑁆𑀧𑀓𑀸𑀲𑀦𑀁 𑀧𑀼𑀘𑁆𑀙𑀢𑀺, ‘‘𑀓𑀺𑀲𑁆𑀲𑀸𑀪𑀺𑀮𑁂𑀧𑀦𑀁 𑀩𑁆𑀭𑀽𑀲𑀻’’𑀢𑀺 𑀮𑁄𑀓𑀲𑁆𑀲 𑀅𑀪𑀺𑀮𑁂𑀧𑀦𑀁 𑀧𑀼𑀘𑁆𑀙𑀢𑀺, ‘‘𑀓𑀺𑀁𑀲𑀼 𑀢𑀲𑁆𑀲 𑀫𑀳𑀩𑁆𑀪𑀬’’𑀦𑁆𑀢𑀺 𑀢𑀲𑁆𑀲𑁂𑀯 𑀮𑁄𑀓𑀲𑁆𑀲 𑀫𑀳𑀸𑀪𑀬𑀁 𑀧𑀼𑀘𑁆𑀙𑀢𑀺. 𑀮𑁄𑀓𑁄 𑀢𑀺𑀯𑀺𑀥𑁄 𑀓𑀺𑀮𑁂𑀲𑀮𑁄𑀓𑁄 𑀪𑀯𑀮𑁄𑀓𑁄 𑀇𑀦𑁆𑀤𑁆𑀭𑀺𑀬𑀮𑁄𑀓𑁄.

𑀢𑀢𑁆𑀣 𑀯𑀺𑀲𑀚𑁆𑀚𑀦𑀸 𑁋

‘‘𑀅𑀯𑀺𑀚𑁆𑀚𑀸𑀬 𑀦𑀺𑀯𑀼𑀢𑁄 𑀮𑁄𑀓𑁄, [𑀅𑀚𑀺𑀢𑀸𑀢𑀺 𑀪𑀕𑀯𑀸,]

𑀯𑀺𑀯𑀺𑀘𑁆𑀙𑀸 [𑀯𑁂𑀯𑀺𑀘𑁆𑀙𑀸 (𑀲𑀼. 𑀦𑀺. 𑁧𑁦𑁩𑁯)] 𑀧𑀫𑀸𑀤𑀸 𑀦𑀧𑁆𑀧𑀓𑀸𑀲𑀢𑀺;

𑀚𑀧𑁆𑀧𑀸𑀪𑀺𑀮𑁂𑀧𑀦𑀁 𑀩𑁆𑀭𑀽𑀫𑀺, 𑀤𑀼𑀓𑁆𑀔𑀫𑀲𑁆𑀲 𑀫𑀳𑀩𑁆𑀪𑀬’’𑀦𑁆𑀢𑀺.

𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀧𑀤𑀸𑀦𑀺 𑀇𑀫𑁂𑀳𑀺 𑀘𑀢𑀽𑀳𑀺 𑀧𑀤𑁂𑀳𑀺 𑀯𑀺𑀲𑀚𑁆𑀚𑀺𑀢𑀸𑀦𑀺 𑀧𑀞𑀫𑀁 𑀧𑀞𑀫𑁂𑀦, 𑀤𑀼𑀢𑀺𑀬𑀁 𑀤𑀼𑀢𑀺𑀬𑁂𑀦, 𑀢𑀢𑀺𑀬𑀁 𑀢𑀢𑀺𑀬𑁂𑀦, 𑀘𑀢𑀼𑀢𑁆𑀣𑀁 𑀘𑀢𑀼𑀢𑁆𑀣𑁂𑀦.

‘‘𑀓𑁂𑀦𑀲𑁆𑀲𑀼 𑀦𑀺𑀯𑀼𑀢𑁄 𑀮𑁄𑀓𑁄’’𑀢𑀺 𑀧𑀜𑁆𑀳𑁂 ‘‘𑀅𑀯𑀺𑀚𑁆𑀚𑀸𑀬 𑀦𑀺𑀯𑀼𑀢𑁄 𑀮𑁄𑀓𑁄’’𑀢𑀺 𑀯𑀺𑀲𑀚𑁆𑀚𑀦𑀸. 𑀦𑀻𑀯𑀭𑀡𑁂𑀳𑀺 𑀦𑀺𑀯𑀼𑀢𑁄 𑀮𑁄𑀓𑁄, 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀸 𑀳𑀺 𑀲𑀩𑁆𑀩𑁂 𑀲𑀢𑁆𑀢𑀸. 𑀬𑀣𑀸𑀳 𑀪𑀕𑀯𑀸 ‘‘𑀲𑀩𑁆𑀩𑀲𑀢𑁆𑀢𑀸𑀦𑀁, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀧𑀸𑀡𑀸𑀦𑀁 𑀲𑀩𑁆𑀩𑀪𑀽𑀢𑀸𑀦𑀁 𑀧𑀭𑀺𑀬𑀸𑀬𑀢𑁄 𑀏𑀓𑀫𑁂𑀯 𑀦𑀻𑀯𑀭𑀡𑀁 𑀯𑀤𑀸𑀫𑀺 𑀬𑀤𑀺𑀤𑀁 𑀅𑀯𑀺𑀚𑁆𑀚𑀸, 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀸 𑀳𑀺 𑀲𑀩𑁆𑀩𑁂 𑀲𑀢𑁆𑀢𑀸. 𑀲𑀩𑁆𑀩𑀲𑁄𑀯, 𑀪𑀺𑀓𑁆𑀔𑀯𑁂, 𑀅𑀯𑀺𑀚𑁆𑀚𑀸𑀬 𑀦𑀺𑀭𑁄𑀥𑀸 𑀘𑀸𑀕𑀸 𑀧𑀝𑀺𑀦𑀺𑀲𑁆𑀲𑀕𑁆𑀕𑀸 𑀦𑀢𑁆𑀣𑀺 𑀲𑀢𑁆𑀢𑀸𑀦𑀁 𑀦𑀻𑀯𑀭𑀡𑀦𑁆𑀢𑀺 𑀯𑀤𑀸𑀫𑀻’’𑀢𑀺. 𑀢𑁂𑀦 𑀘 𑀧𑀞𑀫𑀲𑁆𑀲 𑀧𑀤𑀲𑁆𑀲 𑀯𑀺𑀲𑀚𑁆𑀚𑀦𑀸 𑀬𑀼𑀢𑁆𑀢𑀸.

‘‘𑀓𑁂𑀦𑀲𑁆𑀲𑀼 𑀦𑀧𑁆𑀧𑀓𑀸𑀲𑀢𑀻’’𑀢𑀺 𑀧𑀜𑁆𑀳𑁂 ‘‘𑀯𑀺𑀯𑀺𑀘𑁆𑀙𑀸 𑀧𑀫𑀸𑀤𑀸 𑀦𑀧𑁆𑀧𑀓𑀸𑀲𑀢𑀻’’𑀢𑀺 𑀯𑀺𑀲𑀚𑁆𑀚𑀦𑀸. 𑀬𑁄 𑀧𑀼𑀕𑁆𑀕𑀮𑁄 𑀦𑀻𑀯𑀭𑀡𑁂𑀳𑀺 𑀦𑀺𑀯𑀼𑀢𑁄, 𑀲𑁄 𑀯𑀺𑀯𑀺𑀘𑁆𑀙𑀢𑀺. 𑀯𑀺𑀯𑀺𑀘𑁆𑀙𑀸 𑀦𑀸𑀫 𑀯𑀼𑀘𑁆𑀘𑀢𑀺 𑀯𑀺𑀘𑀺𑀓𑀺𑀘𑁆𑀙𑀸. 𑀲𑁄 𑀯𑀺𑀘𑀺𑀓𑀺𑀘𑁆𑀙𑀦𑁆𑀢𑁄 𑀦𑀸𑀪𑀺𑀲𑀤𑁆𑀤𑀳𑀢𑀺, 𑀦 𑀅𑀪𑀺𑀲𑀤𑁆𑀤𑀳𑀦𑁆𑀢𑁄 𑀯𑀻𑀭𑀺𑀬𑀁 𑀦𑀸𑀭𑀪𑀢𑀺 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀳𑀸𑀦𑀸𑀬 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀲𑀘𑁆𑀙𑀺𑀓𑀺𑀭𑀺𑀬𑀸𑀬. 𑀲𑁄 𑀇𑀥𑀧𑁆𑀧𑀫𑀸𑀤𑀫𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀺 𑀧𑀫𑀢𑁆𑀢𑁄, 𑀲𑀼𑀓𑁆𑀓𑁂 𑀥𑀫𑁆𑀫𑁂 𑀦 𑀉𑀧𑁆𑀧𑀸𑀤𑀺𑀬𑀢𑀺, 𑀢𑀲𑁆𑀲 𑀢𑁂 𑀅𑀦𑀼𑀧𑁆𑀧𑀸𑀤𑀺𑀬𑀫𑀸𑀦𑀸 𑀦𑀧𑁆𑀧𑀓𑀸𑀲𑀦𑁆𑀢𑀺, 𑀬𑀣𑀸𑀳 𑀪𑀕𑀯𑀸 𑁋

‘‘𑀤𑀽𑀭𑁂 𑀲𑀦𑁆𑀢𑁄 𑀧𑀓𑀸𑀲𑀦𑁆𑀢𑀺 [𑀧𑀓𑀸𑀲𑁂𑀦𑁆𑀢𑀺 𑀥. 𑀧. 𑁩𑁦𑁪], 𑀳𑀺𑀫𑀯𑀦𑁆𑀢𑁄𑀯 𑀧𑀩𑁆𑀩𑀢𑁄;

𑀅𑀲𑀦𑁆𑀢𑁂𑀢𑁆𑀣 𑀦 𑀤𑀺𑀲𑁆𑀲𑀦𑁆𑀢𑀺, 𑀭𑀢𑁆𑀢𑀺𑀁 𑀔𑀺𑀢𑁆𑀢𑀸 [𑀭𑀢𑁆𑀢𑀺 𑀔𑀺𑀢𑁆𑀢𑀸 (𑀲𑀻.), 𑀧𑀲𑁆𑀲 𑀥. 𑀧. 𑁩𑁦𑁪] 𑀬𑀣𑀸 𑀲𑀭𑀸;

𑀢𑁂 𑀕𑀼𑀡𑁂𑀳𑀺 𑀧𑀓𑀸𑀲𑀦𑁆𑀢𑀺, 𑀓𑀺𑀢𑁆𑀢𑀺𑀬𑀸 𑀘 𑀬𑀲𑁂𑀦 𑀘𑀸’’𑀢𑀺.

𑀢𑁂𑀦 𑀘 𑀤𑀼𑀢𑀺𑀬𑀲𑁆𑀲 𑀧𑀤𑀲𑁆𑀲 𑀯𑀺𑀲𑀚𑁆𑀚𑀦𑀸 𑀬𑀼𑀢𑁆𑀢𑀸.

‘‘𑀓𑀺𑀲𑁆𑀲𑀸𑀪𑀺𑀮𑁂𑀧𑀦𑀁 𑀩𑁆𑀭𑀽𑀲𑀻’’𑀢𑀺 𑀧𑀜𑁆𑀳𑁂 ‘‘𑀚𑀧𑁆𑀧𑀸𑀪𑀺𑀮𑁂𑀧𑀦𑀁 𑀩𑁆𑀭𑀽𑀫𑀻’’𑀢𑀺 𑀯𑀺𑀲𑀚𑁆𑀚𑀦𑀸. 𑀚𑀧𑁆𑀧𑀸 𑀦𑀸𑀫 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸. 𑀲𑀸 𑀓𑀣𑀁 𑀅𑀪𑀺𑀮𑀺𑀫𑁆𑀧𑀢𑀺? 𑀬𑀣𑀸𑀳 𑀪𑀕𑀯𑀸 𑁋

‘‘𑀭𑀢𑁆𑀢𑁄 𑀅𑀢𑁆𑀣𑀁 𑀦 𑀚𑀸𑀦𑀸𑀢𑀺, 𑀭𑀢𑁆𑀢𑁄 𑀥𑀫𑁆𑀫𑀁 𑀦 𑀧𑀲𑁆𑀲𑀢𑀺;

𑀅𑀦𑁆𑀥𑀦𑁆𑀢𑀫𑀁 [𑀅𑀦𑁆𑀥𑀢𑀫𑀁 (𑀓.)] 𑀢𑀤𑀸 𑀳𑁄𑀢𑀺, 𑀬𑀁 𑀭𑀸𑀕𑁄 𑀲𑀳𑀢𑁂 𑀦𑀭’’𑀦𑁆𑀢𑀺.

𑀲𑀸𑀬𑀁 𑀢𑀡𑁆𑀳𑀸 𑀆𑀲𑀢𑁆𑀢𑀺𑀩𑀳𑀼𑀮𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 ‘‘𑀏𑀯𑀁 𑀅𑀪𑀺𑀚𑀧𑁆𑀧𑀸’’𑀢𑀺 𑀓𑀭𑀺𑀢𑁆𑀯𑀸 𑀢𑀢𑁆𑀣 𑀮𑁄𑀓𑁄 𑀅𑀪𑀺𑀮𑀺𑀢𑁆𑀢𑁄 𑀦𑀸𑀫 𑀪𑀯𑀢𑀺, 𑀢𑁂𑀦 𑀘 𑀢𑀢𑀺𑀬𑀲𑁆𑀲 𑀧𑀤𑀲𑁆𑀲 𑀯𑀺𑀲𑀚𑁆𑀚𑀦𑀸 𑀬𑀼𑀢𑁆𑀢𑀸.

‘‘𑀓𑀺𑀁 𑀲𑀼 𑀢𑀲𑁆𑀲 𑀫𑀳𑀩𑁆𑀪𑀬’’𑀦𑁆𑀢𑀺 𑀧𑀜𑁆𑀳𑁂 ‘‘𑀤𑀼𑀓𑁆𑀔𑀫𑀲𑁆𑀲 𑀫𑀳𑀩𑁆𑀪𑀬’’𑀦𑁆𑀢𑀺 𑀯𑀺𑀲𑀚𑁆𑀚𑀦𑀸. 𑀤𑀼𑀯𑀺𑀥𑀁 𑀤𑀼𑀓𑁆𑀔𑀁 𑁋 𑀓𑀸𑀬𑀺𑀓𑀜𑁆𑀘 𑀘𑁂𑀢𑀲𑀺𑀓𑀜𑁆𑀘. 𑀬𑀁 𑀓𑀸𑀬𑀺𑀓𑀁 𑀇𑀤𑀁 𑀤𑀼𑀓𑁆𑀔𑀁, 𑀬𑀁 𑀘𑁂𑀢𑀲𑀺𑀓𑀁 𑀇𑀤𑀁 𑀤𑁄𑀫𑀦𑀲𑁆𑀲𑀁. 𑀲𑀩𑁆𑀩𑁂 𑀲𑀢𑁆𑀢𑀸 𑀳𑀺 𑀤𑀼𑀓𑁆𑀔𑀲𑁆𑀲 𑀉𑀩𑁆𑀩𑀺𑀚𑁆𑀚𑀦𑁆𑀢𑀺, 𑀦𑀢𑁆𑀣𑀺 𑀪𑀬𑀁 𑀤𑀼𑀓𑁆𑀔𑁂𑀦 𑀲𑀫𑀲𑀫𑀁, 𑀓𑀼𑀢𑁄 𑀯𑀸 𑀧𑀦 𑀢𑀲𑁆𑀲 𑀉𑀢𑁆𑀢𑀭𑀺𑀢𑀭𑀁? 𑀢𑀺𑀲𑁆𑀲𑁄 𑀤𑀼𑀓𑁆𑀔𑀢𑀸 𑁋 𑀤𑀼𑀓𑁆𑀔𑀤𑀼𑀓𑁆𑀔𑀢𑀸 𑀲𑀗𑁆𑀔𑀸𑀭𑀤𑀼𑀓𑁆𑀔𑀢𑀸 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀢𑀸. 𑀢𑀢𑁆𑀣 𑀮𑁄𑀓𑁄 𑀑𑀥𑀲𑁄 𑀓𑀤𑀸𑀘𑀺 𑀓𑀭𑀳𑀘𑀺 𑀤𑀼𑀓𑁆𑀔𑀤𑀼𑀓𑁆𑀔𑀢𑀸𑀬 𑀫𑀼𑀘𑁆𑀘𑀢𑀺. 𑀢𑀣𑀸 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀢𑀸𑀬. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀳𑁄𑀦𑁆𑀢𑀺 𑀮𑁄𑀓𑁂 𑀅𑀧𑁆𑀧𑀸𑀩𑀸𑀥𑀸𑀧𑀺 𑀤𑀻𑀖𑀸𑀬𑀼𑀓𑀸𑀧𑀺. 𑀲𑀗𑁆𑀔𑀸𑀭𑀤𑀼𑀓𑁆𑀔𑀢𑀸𑀬 𑀧𑀦 𑀮𑁄𑀓𑁄 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀫𑀼𑀘𑁆𑀘𑀢𑀺, 𑀢𑀲𑁆𑀫𑀸 𑀲𑀗𑁆𑀔𑀸𑀭𑀤𑀼𑀓𑁆𑀔𑀢𑀸 𑀤𑀼𑀓𑁆𑀔𑀁 𑀮𑁄𑀓𑀲𑁆𑀲𑀸𑀢𑀺 𑀓𑀢𑁆𑀯𑀸 𑀤𑀼𑀓𑁆𑀔𑀫𑀲𑁆𑀲 𑀫𑀳𑀩𑁆𑀪𑀬𑀦𑁆𑀢𑀺. 𑀢𑁂𑀦 𑀘 𑀘𑀢𑀼𑀢𑁆𑀣𑀲𑁆𑀲 𑀧𑀤𑀲𑁆𑀲 𑀯𑀺𑀲𑀚𑁆𑀚𑀦𑀸 𑀬𑀼𑀢𑁆𑀢𑀸. 𑀢𑁂𑀦𑀸𑀳 𑀪𑀕𑀯𑀸 ‘‘𑀅𑀯𑀺𑀚𑁆𑀚𑀸𑀬 𑀦𑀺𑀯𑀼𑀢𑁄 𑀮𑁄𑀓𑁄’’𑀢𑀺.

𑀲𑀯𑀦𑁆𑀢𑀺 𑀲𑀩𑁆𑀩𑀥𑀺 𑀲𑁄𑀢𑀸, [𑀇𑀘𑁆𑀘𑀸𑀬𑀲𑁆𑀫𑀸 𑀅𑀚𑀺𑀢𑁄,]

𑀲𑁄𑀢𑀸𑀦𑀁 𑀓𑀺𑀁 𑀦𑀺𑀯𑀸𑀭𑀡𑀁;

𑀲𑁄𑀢𑀸𑀦𑀁 𑀲𑀁𑀯𑀭𑀁 𑀩𑁆𑀭𑀽𑀳𑀺, 𑀓𑁂𑀦 𑀲𑁄𑀢𑀸 𑀧𑀺𑀥𑀻𑀬𑀭𑁂 [𑀧𑀺𑀣𑀻𑀬𑀭𑁂 (𑀲𑀻.), 𑀧𑀺𑀥𑀺𑀬𑁆𑀬𑀭𑁂 (𑀓.), 𑀧𑀲𑁆𑀲 𑀲𑀼. 𑀦𑀺. 𑁧𑁦𑁪𑁦].

𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀧𑀤𑀸𑀦𑀺 𑀧𑀼𑀘𑁆𑀙𑀺𑀢𑀸𑀦𑀺. 𑀢𑁂 𑀤𑁆𑀯𑁂 𑀧𑀜𑁆𑀳𑀸. 𑀓𑀲𑁆𑀫𑀸? 𑀇𑀫𑁂𑀳𑀺 𑀩𑀢𑁆𑀯𑀸𑀥𑀺𑀯𑀘𑀦𑁂𑀦 𑀧𑀼𑀘𑁆𑀙𑀺𑀢𑀸. 𑀏𑀯𑀁 𑀲𑀫𑀸𑀧𑀦𑁆𑀦𑀲𑁆𑀲 𑀮𑁄𑀓𑀲𑁆𑀲 𑀏𑀯𑀁 𑀲𑀁𑀓𑀺𑀮𑀺𑀝𑁆𑀞𑀲𑁆𑀲 𑀓𑀺𑀁 𑀮𑁄𑀓𑀲𑁆𑀲 𑀯𑁄𑀤𑀸𑀦𑀁 𑀯𑀼𑀝𑁆𑀞𑀸𑀦𑀫𑀺𑀢𑀺, 𑀏𑀯𑀜𑁆𑀳𑀺 𑀆𑀳.

𑀲𑀯𑀦𑁆𑀢𑀺 𑀲𑀩𑁆𑀩𑀥𑀺 𑀲𑁄𑀢𑀸𑀢𑀺. 𑀅𑀲𑀫𑀸𑀳𑀺𑀢𑀲𑁆𑀲 𑀲𑀯𑀦𑁆𑀢𑀺 𑀅𑀪𑀺𑀚𑁆𑀛𑀸𑀩𑁆𑀬𑀸𑀧𑀸𑀤𑀧𑁆𑀧𑀫𑀸𑀤𑀩𑀳𑀼𑀮𑀲𑁆𑀲. 𑀢𑀢𑁆𑀣 𑀬𑀸 𑀅𑀪𑀺𑀚𑁆𑀛𑀸 𑀅𑀬𑀁 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁, 𑀬𑁄 𑀩𑁆𑀬𑀸𑀧𑀸𑀤𑁄 𑀅𑀬𑀁 𑀤𑁄𑀲𑁄 𑀅𑀓𑀼𑀲𑀮𑀫𑀽𑀮𑀁, 𑀬𑁄 𑀧𑀫𑀸𑀤𑁄 𑀅𑀬𑀁 𑀫𑁄𑀳𑁄 𑀅𑀓𑀼𑀲𑀮𑀫𑀽𑀮𑀁. 𑀢𑀲𑁆𑀲𑁂𑀯𑀁 𑀅𑀲𑀫𑀸𑀳𑀺𑀢𑀲𑁆𑀲 𑀙𑀲𑀼 𑀆𑀬𑀢𑀦𑁂𑀲𑀼 𑀢𑀡𑁆𑀳𑀸 𑀲𑀯𑀦𑁆𑀢𑀺 𑀭𑀽𑀧𑀢𑀡𑁆𑀳𑀸 𑀲𑀤𑁆𑀤𑀢𑀡𑁆𑀳𑀸 𑀕𑀦𑁆𑀥𑀢𑀡𑁆𑀳𑀸 𑀭𑀲𑀢𑀡𑁆𑀳𑀸 𑀨𑁄𑀝𑁆𑀞𑀩𑁆𑀩𑀢𑀡𑁆𑀳𑀸 𑀥𑀫𑁆𑀫𑀢𑀡𑁆𑀳𑀸, 𑀬𑀣𑀸𑀳 𑀪𑀕𑀯𑀸 𑁋

‘‘𑀲𑀯𑀢𑀻’’𑀢𑀺 𑀘 𑀔𑁄, 𑀪𑀺𑀓𑁆𑀔𑀯𑁂, 𑀙𑀦𑁆𑀦𑁂𑀢𑀁 𑀅𑀚𑁆𑀛𑀢𑁆𑀢𑀺𑀓𑀸𑀦𑀁 𑀆𑀬𑀢𑀦𑀸𑀦𑀁 𑀅𑀥𑀺𑀯𑀘𑀦𑀁. 𑀘𑀓𑁆𑀔𑀼 𑀲𑀯𑀢𑀺 𑀫𑀦𑀸𑀧𑀺𑀓𑁂𑀲𑀼 𑀭𑀽𑀧𑁂𑀲𑀼, 𑀅𑀫𑀦𑀸𑀧𑀺𑀓𑁂𑀲𑀼 [𑀅𑀫𑀦𑀸𑀧𑀺𑀬𑁂𑀲𑀼 (𑀓.)] 𑀧𑀝𑀺𑀳𑀜𑁆𑀜𑀢𑀻𑀢𑀺. 𑀲𑁄𑀢𑀁…𑀧𑁂… 𑀖𑀸𑀦𑀁… 𑀚𑀺𑀯𑁆𑀳𑀸… 𑀓𑀸𑀬𑁄… 𑀫𑀦𑁄 𑀲𑀯𑀢𑀺 𑀫𑀦𑀸𑀧𑀺𑀓𑁂𑀲𑀼 𑀥𑀫𑁆𑀫𑁂𑀲𑀼 𑀅𑀫𑀦𑀸𑀧𑀺𑀓𑁂𑀲𑀼 𑀧𑀝𑀺𑀳𑀜𑁆𑀜𑀢𑀻𑀢𑀺. 𑀇𑀢𑀺 𑀲𑀩𑁆𑀩𑀸 𑀘 𑀲𑀯𑀢𑀺, 𑀲𑀩𑁆𑀩𑀣𑀸 𑀘 𑀲𑀯𑀢𑀺. 𑀢𑁂𑀦𑀸𑀳 ‘‘𑀲𑀯𑀦𑁆𑀢𑀺 𑀲𑀩𑁆𑀩𑀥𑀺 𑀲𑁄𑀢𑀸’’𑀢𑀺.

‘‘𑀲𑁄𑀢𑀸𑀦𑀁 𑀓𑀺𑀁 𑀦𑀺𑀯𑀸𑀭𑀡’’𑀦𑁆𑀢𑀺 𑀧𑀭𑀺𑀬𑀼𑀝𑁆𑀞𑀸𑀦𑀯𑀺𑀖𑀸𑀢𑀁 𑀧𑀼𑀘𑁆𑀙𑀢𑀺, 𑀇𑀤𑀁 𑀯𑁄𑀤𑀸𑀦𑀁. ‘‘𑀲𑁄𑀢𑀸𑀦𑀁 𑀲𑀁𑀯𑀭𑀁 𑀩𑁆𑀭𑀽𑀳𑀺, 𑀓𑁂𑀦 𑀲𑁄𑀢𑀸 𑀧𑀺𑀥𑀻𑀬𑀭𑁂’’𑀢𑀺 𑀅𑀦𑀼𑀲𑀬𑀲𑀫𑀼𑀕𑁆𑀖𑀸𑀢𑀁 𑀧𑀼𑀘𑁆𑀙𑀢𑀺, 𑀇𑀤𑀁 𑀯𑀼𑀝𑁆𑀞𑀸𑀦𑀁.

𑀢𑀢𑁆𑀣 𑀯𑀺𑀲𑀚𑁆𑀚𑀦𑀸 𑁋

‘‘𑀬𑀸𑀦𑀺 𑀲𑁄𑀢𑀸𑀦𑀺 𑀮𑁄𑀓𑀲𑁆𑀫𑀺𑀁, [𑀅𑀚𑀺𑀢𑀸𑀢𑀺 𑀪𑀕𑀯𑀸,]

𑀲𑀢𑀺 𑀢𑁂𑀲𑀁 𑀦𑀺𑀯𑀸𑀭𑀡𑀁;

𑀲𑁄𑀢𑀸𑀦𑀁 𑀲𑀁𑀯𑀭𑀁 𑀩𑁆𑀭𑀽𑀫𑀺, 𑀧𑀜𑁆𑀜𑀸𑀬𑁂𑀢𑁂 𑀧𑀺𑀥𑀻𑀬𑀭𑁂’’𑀢𑀺.

𑀓𑀸𑀬𑀕𑀢𑀸𑀬 𑀲𑀢𑀺𑀬𑀸 𑀪𑀸𑀯𑀺𑀢𑀸𑀬 𑀩𑀳𑀼𑀮𑀻𑀓𑀢𑀸𑀬 𑀘𑀓𑁆𑀔𑀼 𑀦𑀸𑀯𑀺𑀜𑁆𑀙𑀢𑀺 𑀫𑀦𑀸𑀧𑀺𑀓𑁂𑀲𑀼 𑀭𑀽𑀧𑁂𑀲𑀼, 𑀅𑀫𑀦𑀸𑀧𑀺𑀓𑁂𑀲𑀼 𑀦 𑀧𑀝𑀺𑀳𑀜𑁆𑀜𑀢𑀺, 𑀲𑁄𑀢𑀁…𑀧𑁂… 𑀖𑀸𑀦𑀁… 𑀚𑀺𑀯𑁆𑀳𑀸… 𑀓𑀸𑀬𑁄… 𑀫𑀦𑁄 𑀦𑀸𑀯𑀺𑀜𑁆𑀙𑀢𑀺 𑀫𑀦𑀸𑀧𑀺𑀓𑁂𑀲𑀼 𑀥𑀫𑁆𑀫𑁂𑀲𑀼, 𑀅𑀫𑀦𑀸𑀧𑀺𑀓𑁂𑀲𑀼 𑀦 𑀧𑀝𑀺𑀳𑀜𑁆𑀜𑀢𑀺. 𑀓𑁂𑀦 𑀓𑀸𑀭𑀡𑁂𑀦? 𑀲𑀁𑀯𑀼𑀢𑀦𑀺𑀯𑀸𑀭𑀺𑀢𑀢𑁆𑀢𑀸 𑀇𑀦𑁆𑀤𑁆𑀭𑀺𑀬𑀸𑀦𑀁. 𑀓𑁂𑀦 𑀢𑁂 𑀲𑀁𑀯𑀼𑀢𑀦𑀺𑀯𑀸𑀭𑀺𑀢𑀸? 𑀲𑀢𑀺𑀆𑀭𑀓𑁆𑀔𑁂𑀦. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀲𑀢𑀺 𑀢𑁂𑀲𑀁 𑀦𑀺𑀯𑀸𑀭𑀡’’𑀦𑁆𑀢𑀺.

𑀧𑀜𑁆𑀜𑀸𑀬 𑀅𑀦𑀼𑀲𑀬𑀸 𑀧𑀳𑀻𑀬𑀦𑁆𑀢𑀺, 𑀅𑀦𑀼𑀲𑀬𑁂𑀲𑀼 𑀧𑀳𑀻𑀦𑁂𑀲𑀼 𑀧𑀭𑀺𑀬𑀼𑀝𑁆𑀞𑀸𑀦𑀸 𑀧𑀳𑀻𑀬𑀦𑁆𑀢𑀺. 𑀓𑀺𑀲𑁆𑀲 [𑀢𑀲𑁆𑀲 (𑀲𑀻.)], 𑀅𑀦𑀼𑀲𑀬𑀲𑁆𑀲 𑀧𑀳𑀻𑀦𑀢𑁆𑀢𑀸? 𑀢𑀁 𑀬𑀣𑀸 𑀔𑀦𑁆𑀥𑀯𑀦𑁆𑀢𑀲𑁆𑀲 𑀭𑀼𑀓𑁆𑀔𑀲𑁆𑀲 𑀅𑀦𑀯𑀲𑁂𑀲𑀫𑀽𑀮𑀼𑀤𑁆𑀥𑀭𑀡𑁂 𑀓𑀢𑁂 𑀧𑀼𑀧𑁆𑀨𑀨𑀮𑀧𑀮𑁆𑀮𑀯𑀗𑁆𑀓𑀼𑀭𑀲𑀦𑁆𑀢𑀢𑀺 𑀲𑀫𑀼𑀘𑁆𑀙𑀺𑀦𑁆𑀦𑀸 𑀪𑀯𑀢𑀺. 𑀏𑀯𑀁 𑀅𑀦𑀼𑀲𑀬𑁂𑀲𑀼 𑀧𑀳𑀻𑀦𑁂𑀲𑀼 𑀧𑀭𑀺𑀬𑀼𑀝𑁆𑀞𑀸𑀦𑀲𑀦𑁆𑀢𑀢𑀺 𑀲𑀫𑀼𑀘𑁆𑀙𑀺𑀦𑁆𑀦𑀸 𑀪𑀯𑀢𑀺 𑀧𑀺𑀤𑀳𑀺𑀢𑀸 𑀧𑀝𑀺𑀘𑁆𑀙𑀦𑁆𑀦𑀸. 𑀓𑁂𑀦? 𑀧𑀜𑁆𑀜𑀸𑀬. 𑀢𑁂𑀦𑀸𑀳 𑀪𑀕𑀯𑀸 ‘‘𑀧𑀜𑁆𑀜𑀸𑀬𑁂𑀢𑁂 𑀧𑀺𑀥𑀻𑀬𑀭𑁂’’𑀢𑀺.

‘‘𑀧𑀜𑁆𑀜𑀸 𑀘𑁂𑀯 𑀲𑀢𑀺 𑀘, [𑀇𑀘𑁆𑀘𑀸𑀬𑀲𑁆𑀫𑀸 𑀅𑀚𑀺𑀢𑁄,]

𑀦𑀸𑀫𑀭𑀽𑀧𑀜𑁆𑀘 𑀫𑀸𑀭𑀺𑀲;

𑀏𑀢𑀁 𑀫𑁂 𑀧𑀼𑀝𑁆𑀞𑁄 𑀧𑀩𑁆𑀭𑀽𑀳𑀺, 𑀓𑀢𑁆𑀣𑁂𑀢𑀁 𑀉𑀧𑀭𑀼𑀚𑁆𑀛𑀢𑀻’’𑀢𑀺.

‘‘𑀬𑀫𑁂𑀢𑀁 𑀧𑀜𑁆𑀳𑀁 𑀅𑀧𑀼𑀘𑁆𑀙𑀺 [𑀫𑀁 𑀧𑀼𑀘𑁆𑀙𑀺 (𑀓.), 𑀧𑀲𑁆𑀲 𑀲𑀼. 𑀦𑀺. 𑁧𑁦𑁪𑁩], 𑀅𑀚𑀺𑀢 𑀢𑀁 𑀯𑀤𑀸𑀫𑀺 𑀢𑁂;

𑀬𑀢𑁆𑀣 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘, 𑀅𑀲𑁂𑀲𑀁 𑀉𑀧𑀭𑀼𑀚𑁆𑀛𑀢𑀺;

𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀭𑁄𑀥𑁂𑀦, 𑀏𑀢𑁆𑀣𑁂𑀢𑀁 𑀉𑀧𑀭𑀼𑀚𑁆𑀛𑀢𑀻’’𑀢𑀺.

𑀅𑀬𑀁 𑀧𑀜𑁆𑀳𑁂 [𑀧𑀜𑁆𑀳𑁄 (𑀲𑀻. 𑀓.) 𑀦𑁂𑀢𑁆𑀢𑀺𑀯𑀺𑀪𑀸𑀯𑀦𑀻 𑀧𑀲𑁆𑀲𑀺𑀢𑀩𑁆𑀩𑀸] 𑀅𑀦𑀼𑀲𑀦𑁆𑀥𑀺𑀁 𑀧𑀼𑀘𑁆𑀙𑀢𑀺. 𑀅𑀦𑀼𑀲𑀦𑁆𑀥𑀺𑀁 𑀧𑀼𑀘𑁆𑀙𑀦𑁆𑀢𑁄 𑀓𑀺𑀁 𑀧𑀼𑀘𑁆𑀙𑀢𑀺? 𑀅𑀦𑀼𑀧𑀸𑀤𑀺𑀲𑁂𑀲𑀁 𑀦𑀺𑀩𑁆𑀩𑀸𑀦𑀥𑀸𑀢𑀼𑀁. 𑀢𑀻𑀡𑀺 𑀘 𑀲𑀘𑁆𑀘𑀸𑀦𑀺 𑀲𑀗𑁆𑀔𑀢𑀸𑀦𑀺 𑀦𑀺𑀭𑁄𑀥𑀥𑀫𑁆𑀫𑀸𑀦𑀺 𑀤𑀼𑀓𑁆𑀔𑀁 𑀲𑀫𑀼𑀤𑀬𑁄 𑀫𑀕𑁆𑀕𑁄, 𑀦𑀺𑀭𑁄𑀥𑁄 𑀅𑀲𑀗𑁆𑀔𑀢𑁄. 𑀢𑀢𑁆𑀣 𑀲𑀫𑀼𑀤𑀬𑁄 𑀤𑁆𑀯𑀻𑀲𑀼 𑀪𑀽𑀫𑀻𑀲𑀼 𑀧𑀳𑀻𑀬𑀢𑀺 𑀤𑀲𑁆𑀲𑀦𑀪𑀽𑀫𑀺𑀬𑀸 𑀘 𑀪𑀸𑀯𑀦𑀸𑀪𑀽𑀫𑀺𑀬𑀸 𑀘. 𑀤𑀲𑁆𑀲𑀦𑁂𑀦 𑀢𑀻𑀡𑀺 𑀲𑀁𑀬𑁄𑀚𑀦𑀸𑀦𑀺 𑀧𑀳𑀻𑀬𑀦𑁆𑀢𑀺 𑀲𑀓𑁆𑀓𑀸𑀬𑀤𑀺𑀝𑁆𑀞𑀺 𑀯𑀺𑀘𑀺𑀓𑀺𑀘𑁆𑀙𑀸 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄, 𑀪𑀸𑀯𑀦𑀸𑀬 𑀲𑀢𑁆𑀢 𑀲𑀁𑀬𑁄𑀚𑀦𑀸𑀦𑀺 𑀧𑀳𑀻𑀬𑀦𑁆𑀢𑀺 𑀓𑀸𑀫𑀘𑁆𑀙𑀦𑁆𑀤𑁄 𑀩𑁆𑀬𑀸𑀧𑀸𑀤𑁄 𑀭𑀽𑀧𑀭𑀸𑀕𑁄 𑀅𑀭𑀽𑀧𑀭𑀸𑀕𑁄 𑀫𑀸𑀦𑁄 𑀉𑀤𑁆𑀥𑀘𑁆𑀘𑀁 𑀅𑀯𑀺𑀚𑁆𑀚𑀸𑀯𑀲𑁂𑀲𑀸 [𑀅𑀯𑀺𑀚𑁆𑀚𑀸 𑀘 𑀦𑀺𑀭𑀯𑀲𑁂𑀲𑀸 (𑀲𑀻. 𑀓.)]. 𑀢𑁂𑀥𑀸𑀢𑀼𑀓𑁂 𑀇𑀫𑀸𑀦𑀺 𑀤𑀲 𑀲𑀁𑀬𑁄𑀚𑀦𑀸𑀦𑀺 𑀧𑀜𑁆𑀘𑁄𑀭𑀫𑁆𑀪𑀸𑀕𑀺𑀬𑀸𑀦𑀺 𑀧𑀜𑁆𑀘𑀼𑀤𑁆𑀥𑀫𑁆𑀪𑀸𑀕𑀺𑀬𑀸𑀦𑀺.

𑁧𑁨. 𑀢𑀢𑁆𑀣 𑀢𑀻𑀡𑀺 𑀲𑀁𑀬𑁄𑀚𑀦𑀸𑀦𑀺 𑀲𑀓𑁆𑀓𑀸𑀬𑀤𑀺𑀝𑁆𑀞𑀺 𑀯𑀺𑀘𑀺𑀓𑀺𑀘𑁆𑀙𑀸 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀁 𑀅𑀥𑀺𑀝𑁆𑀞𑀸𑀬 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀲𑀢𑁆𑀢 𑀲𑀁𑀬𑁄𑀚𑀦𑀸𑀦𑀺 𑀓𑀸𑀫𑀘𑁆𑀙𑀦𑁆𑀤𑁄 𑀩𑁆𑀬𑀸𑀧𑀸𑀤𑁄 𑀭𑀽𑀧𑀭𑀸𑀕𑁄 𑀅𑀭𑀽𑀧𑀭𑀸𑀕𑁄 𑀫𑀸𑀦𑁄 𑀉𑀤𑁆𑀥𑀘𑁆𑀘𑀁 𑀅𑀯𑀺𑀚𑁆𑀚𑀸𑀯𑀲𑁂𑀲𑀸 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀅𑀥𑀺𑀝𑁆𑀞𑀸𑀬 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀬𑀁 𑀧𑀦 𑀏𑀯𑀁 𑀚𑀸𑀦𑀸𑀢𑀺 ‘‘𑀔𑀻𑀡𑀸 𑀫𑁂 𑀚𑀸𑀢𑀻’’𑀢𑀺, 𑀇𑀤𑀁 𑀔𑀬𑁂 𑀜𑀸𑀡𑀁. ‘‘𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’’𑀢𑀺 𑀧𑀚𑀸𑀦𑀸𑀢𑀺, 𑀇𑀤𑀁 𑀅𑀦𑀼𑀧𑁆𑀧𑀸𑀤𑁂 𑀜𑀸𑀡𑀁. 𑀇𑀫𑀸𑀦𑀺 𑀤𑁆𑀯𑁂 𑀜𑀸𑀡𑀸𑀦𑀺 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁. 𑀢𑀢𑁆𑀣 𑀬𑀜𑁆𑀘 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀁 𑀬𑀜𑁆𑀘 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁, 𑀇𑀫𑀸𑀦𑀺 𑀅𑀕𑁆𑀕𑀨𑀮𑀁 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀦𑁆𑀢𑀲𑁆𑀲 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀢𑀢𑁆𑀣 𑀬𑀜𑁆𑀘 𑀔𑀬𑁂 𑀜𑀸𑀡𑀁 𑀬𑀜𑁆𑀘 𑀅𑀦𑀼𑀧𑁆𑀧𑀸𑀤𑁂 𑀜𑀸𑀡𑀁, 𑀇𑀫𑀸𑀦𑀺 𑀤𑁆𑀯𑁂 𑀜𑀸𑀡𑀸𑀦𑀺 𑀏𑀓𑀧𑀜𑁆𑀜𑀸.

𑀅𑀧𑀺 𑀘 𑀆𑀭𑀫𑁆𑀫𑀡𑀲𑀗𑁆𑀓𑁂𑀢𑁂𑀦 𑀤𑁆𑀯𑁂 𑀦𑀸𑀫𑀸𑀦𑀺 𑀮𑀩𑁆𑀪𑀦𑁆𑀢𑀺, ‘‘𑀔𑀻𑀡𑀸 𑀫𑁂 𑀚𑀸𑀢𑀻’’𑀢𑀺 𑀧𑀚𑀸𑀦𑀦𑁆𑀢𑀲𑁆𑀲 𑀔𑀬𑁂 𑀜𑀸𑀡𑀦𑁆𑀢𑀺 𑀦𑀸𑀫𑀁 𑀮𑀪𑀢𑀺, ‘‘𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’’𑀢𑀺 𑀧𑀚𑀸𑀦𑀦𑁆𑀢𑀲𑁆𑀲 𑀅𑀦𑀼𑀧𑁆𑀧𑀸𑀤𑁂 𑀜𑀸𑀡𑀦𑁆𑀢𑀺 𑀦𑀸𑀫𑀁 𑀮𑀪𑀢𑀺. 𑀲𑀸 𑀧𑀚𑀸𑀦𑀦𑀝𑁆𑀞𑁂𑀦 𑀧𑀜𑁆𑀜𑀸, 𑀬𑀣𑀸𑀤𑀺𑀝𑁆𑀞𑀁 𑀅𑀧𑀺𑀮𑀸𑀧𑀦𑀝𑁆𑀞𑁂𑀦 𑀲𑀢𑀺.

𑁧𑁩. 𑀢𑀢𑁆𑀣 𑀬𑁂 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸, 𑀇𑀤𑀁 𑀦𑀸𑀫𑀭𑀽𑀧𑀁. 𑀢𑀢𑁆𑀣 𑀬𑁂 𑀨𑀲𑁆𑀲𑀧𑀜𑁆𑀘𑀫𑀓𑀸 𑀥𑀫𑁆𑀫𑀸, 𑀇𑀤𑀁 𑀦𑀸𑀫𑀁. 𑀬𑀸𑀦𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀭𑀽𑀧𑀸𑀦𑀺, 𑀇𑀤𑀁 𑀭𑀽𑀧𑀁. 𑀢𑀤𑀼𑀪𑀬𑀁 𑀦𑀸𑀫𑀭𑀽𑀧𑀁 𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁 𑀢𑀲𑁆𑀲 𑀦𑀺𑀭𑁄𑀥𑀁 𑀪𑀕𑀯𑀦𑁆𑀢𑀁 𑀧𑀼𑀘𑁆𑀙𑀦𑁆𑀢𑁄 𑀆𑀬𑀲𑁆𑀫𑀸 𑀅𑀚𑀺𑀢𑁄 𑀧𑀸𑀭𑀸𑀬𑀦𑁂 𑀏𑀯𑀫𑀸𑀳 𑁋

‘‘𑀧𑀜𑁆𑀜𑀸 𑀘𑁂𑀯 𑀲𑀢𑀺 𑀘, 𑀦𑀸𑀫𑀭𑀽𑀧𑀜𑁆𑀘 𑀫𑀸𑀭𑀺𑀲;

𑀏𑀢𑀁 𑀫𑁂 𑀧𑀼𑀝𑁆𑀞𑁄 𑀧𑀩𑁆𑀭𑀽𑀳𑀺, 𑀓𑀢𑁆𑀣𑁂𑀢𑀁 𑀉𑀧𑀭𑀼𑀚𑁆𑀛𑀢𑀻’’𑀢𑀺.

𑀢𑀢𑁆𑀣 𑀲𑀢𑀺 𑀘 𑀧𑀜𑁆𑀜𑀸 𑀘 𑀘𑀢𑁆𑀢𑀸𑀭𑀺 𑀇𑀦𑁆𑀤𑁆𑀭𑀺𑀬𑀸𑀦𑀺, 𑀲𑀢𑀺 𑀤𑁆𑀯𑁂 𑀇𑀦𑁆𑀤𑁆𑀭𑀺𑀬𑀸𑀦𑀺 𑀲𑀢𑀺𑀦𑁆𑀤𑁆𑀭𑀺𑀬𑀜𑁆𑀘 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀜𑁆𑀘, 𑀧𑀜𑁆𑀜𑀸 𑀤𑁆𑀯𑁂 𑀇𑀦𑁆𑀤𑁆𑀭𑀺𑀬𑀸𑀦𑀺 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀜𑁆𑀘 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀜𑁆𑀘. 𑀬𑀸 𑀇𑀫𑁂𑀲𑀼 𑀘𑀢𑀽𑀲𑀼 𑀇𑀦𑁆𑀤𑁆𑀭𑀺𑀬𑁂𑀲𑀼 𑀲𑀤𑁆𑀤𑀳𑀦𑀸 𑀑𑀓𑀧𑁆𑀧𑀦𑀸, 𑀇𑀤𑀁 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁. 𑀢𑀢𑁆𑀣 𑀬𑀸 𑀲𑀤𑁆𑀥𑀸𑀥𑀺𑀧𑀢𑁂𑀬𑁆𑀬𑀸 𑀘𑀺𑀢𑁆𑀢𑁂𑀓𑀕𑁆𑀕𑀢𑀸, 𑀅𑀬𑀁 𑀙𑀦𑁆𑀤𑀲𑀫𑀸𑀥𑀺. 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀓𑀺𑀮𑁂𑀲𑀸𑀦𑀁 𑀯𑀺𑀓𑁆𑀔𑀫𑁆𑀪𑀦𑀢𑀸𑀬 𑀧𑀝𑀺𑀲𑀗𑁆𑀔𑀸𑀦𑀩𑀮𑁂𑀦 𑀯𑀸 𑀪𑀸𑀯𑀦𑀸𑀩𑀮𑁂𑀦 𑀯𑀸, 𑀇𑀤𑀁 𑀧𑀳𑀸𑀦𑀁. 𑀢𑀢𑁆𑀣 𑀬𑁂 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀯𑀺𑀢𑀓𑁆𑀓𑀯𑀺𑀘𑀸𑀭𑀸 𑀲𑀜𑁆𑀜𑀸𑀯𑁂𑀤𑀬𑀺𑀢𑀸 𑀲𑀭𑀲𑀗𑁆𑀓𑀧𑁆𑀧𑀸, 𑀇𑀫𑁂 𑀲𑀗𑁆𑀔𑀸𑀭𑀸. 𑀇𑀢𑀺 𑀧𑀼𑀭𑀺𑀫𑀓𑁄 𑀘 𑀙𑀦𑁆𑀤𑀲𑀫𑀸𑀥𑀺, 𑀓𑀺𑀮𑁂𑀲𑀯𑀺𑀓𑁆𑀔𑀫𑁆𑀪𑀦𑀢𑀸𑀬 𑀘 𑀧𑀳𑀸𑀦𑀁 𑀇𑀫𑁂 𑀘 𑀲𑀗𑁆𑀔𑀸𑀭𑀸, 𑀢𑀤𑀼𑀪𑀬𑀁 𑀙𑀦𑁆𑀤𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺 𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁 𑀯𑀺𑀭𑀸𑀕𑀦𑀺𑀲𑁆𑀲𑀺𑀢𑀁 𑀦𑀺𑀭𑁄𑀥𑀦𑀺𑀲𑁆𑀲𑀺𑀢𑀁 𑀯𑁄𑀲𑁆𑀲𑀕𑁆𑀕𑀧𑀭𑀺𑀡𑀸𑀫𑀺𑀁. 𑀢𑀢𑁆𑀣 𑀬𑀸 𑀯𑀻𑀭𑀺𑀬𑀸𑀥𑀺𑀧𑀢𑁂𑀬𑁆𑀬𑀸 𑀘𑀺𑀢𑁆𑀢𑁂𑀓𑀕𑁆𑀕𑀢𑀸, 𑀅𑀬𑀁 𑀯𑀻𑀭𑀺𑀬𑀲𑀫𑀸𑀥𑀺…𑀧𑁂… 𑀢𑀢𑁆𑀣 𑀬𑀸 𑀘𑀺𑀢𑁆𑀢𑀸𑀥𑀺𑀧𑀢𑁂𑀬𑁆𑀬𑀸 𑀘𑀺𑀢𑁆𑀢𑁂𑀓𑀕𑁆𑀕𑀢𑀸, 𑀅𑀬𑀁 𑀘𑀺𑀢𑁆𑀢𑀲𑀫𑀸𑀥𑀺…𑀧𑁂… 𑀢𑀢𑁆𑀣 𑀬𑀸 𑀯𑀻𑀫𑀁𑀲𑀸𑀥𑀺𑀧𑀢𑁂𑀬𑁆𑀬𑀸 𑀘𑀺𑀢𑁆𑀢𑁂𑀓𑀕𑁆𑀕𑀢𑀸, 𑀅𑀬𑀁 𑀯𑀻𑀫𑀁𑀲𑀸𑀲𑀫𑀸𑀥𑀺. 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀓𑀺𑀮𑁂𑀲𑀸𑀦𑀁 𑀯𑀺𑀓𑁆𑀔𑀫𑁆𑀪𑀦𑀢𑀸𑀬 𑀧𑀝𑀺𑀲𑀗𑁆𑀔𑀸𑀦𑀩𑀮𑁂𑀦 𑀯𑀸 𑀪𑀸𑀯𑀦𑀸𑀩𑀮𑁂𑀦 𑀯𑀸, 𑀇𑀤𑀁 𑀧𑀳𑀸𑀦𑀁. 𑀢𑀢𑁆𑀣 𑀬𑁂 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀯𑀺𑀢𑀓𑁆𑀓𑀯𑀺𑀘𑀸𑀭𑀸 𑀲𑀜𑁆𑀜𑀸𑀯𑁂𑀤𑀬𑀺𑀢𑀸 𑀲𑀭𑀲𑀗𑁆𑀓𑀧𑁆𑀧𑀸, 𑀇𑀫𑁂 𑀲𑀗𑁆𑀔𑀸𑀭𑀸. 𑀇𑀢𑀺 𑀧𑀼𑀭𑀺𑀫𑀓𑁄 𑀘 𑀯𑀻𑀫𑀁𑀲𑀸𑀲𑀫𑀸𑀥𑀺, 𑀓𑀺𑀮𑁂𑀲𑀯𑀺𑀓𑁆𑀔𑀫𑁆𑀪𑀦𑀢𑀸𑀬 𑀘 𑀧𑀳𑀸𑀦𑀁 𑀇𑀫𑁂 𑀘 𑀲𑀗𑁆𑀔𑀸𑀭𑀸, 𑀢𑀤𑀼𑀪𑀬𑀁 𑀯𑀻𑀫𑀁𑀲𑀸𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺 𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁 𑀯𑀺𑀭𑀸𑀕𑀦𑀺𑀲𑁆𑀲𑀺𑀢𑀁 𑀦𑀺𑀭𑁄𑀥𑀦𑀺𑀲𑁆𑀲𑀺𑀢𑀁 𑀯𑁄𑀲𑁆𑀲𑀕𑁆𑀕𑀧𑀭𑀺𑀡𑀸𑀫𑀺𑀁.

𑁧𑁪. 𑀲𑀩𑁆𑀩𑁄 𑀲𑀫𑀸𑀥𑀺 𑀜𑀸𑀡𑀫𑀽𑀮𑀓𑁄 𑀜𑀸𑀡𑀧𑀼𑀩𑁆𑀩𑀗𑁆𑀕𑀫𑁄 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀺.

𑀬𑀣𑀸 𑀧𑀼𑀭𑁂 𑀢𑀣𑀸 𑀧𑀘𑁆𑀙𑀸, 𑀬𑀣𑀸 𑀧𑀘𑁆𑀙𑀸 𑀢𑀣𑀸 𑀧𑀼𑀭𑁂;

𑀬𑀣𑀸 𑀤𑀺𑀯𑀸 𑀢𑀣𑀸 𑀭𑀢𑁆𑀢𑀺𑀁 [𑀭𑀢𑁆𑀢𑀺 (𑀓.) 𑀅𑀬𑀁 𑀕𑀸𑀣𑀸 𑀣𑁂𑀭𑀕𑀸. 𑁩𑁯𑁭 𑀤𑀺𑀲𑁆𑀲𑀢𑀺], 𑀬𑀣𑀸 𑀭𑀢𑁆𑀢𑀺𑀁 𑀢𑀣𑀸 𑀤𑀺𑀯𑀸.

𑀇𑀢𑀺 𑀯𑀺𑀯𑀝𑁂𑀦 𑀘𑁂𑀢𑀲𑀸 𑀅𑀧𑀭𑀺𑀬𑁄𑀦𑀤𑁆𑀥𑁂𑀦 𑀲𑀧𑁆𑀧𑀪𑀸𑀲𑀁 𑀘𑀺𑀢𑁆𑀢𑀁 𑀪𑀸𑀯𑁂𑀢𑀺. 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀓𑀼𑀲𑀮𑀸𑀦𑀺 𑀘𑀺𑀢𑁆𑀢𑀲𑀳𑀪𑀽𑀦𑀺 𑀘𑀺𑀢𑁆𑀢𑁂 𑀉𑀧𑁆𑀧𑀚𑁆𑀚𑀫𑀸𑀦𑁂 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀘𑀺𑀢𑁆𑀢𑁂 𑀦𑀺𑀭𑀼𑀚𑁆𑀛𑀫𑀸𑀦𑁂 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀦𑀸𑀫𑀭𑀽𑀧𑀜𑁆𑀘 𑀯𑀺𑀜𑁆𑀜𑀸𑀡𑀳𑁂𑀢𑀼𑀓𑀁 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀺𑀩𑁆𑀩𑀢𑁆𑀢𑀁, 𑀢𑀲𑁆𑀲 𑀫𑀕𑁆𑀕𑁂𑀦 𑀳𑁂𑀢𑀼 𑀉𑀧𑀘𑁆𑀙𑀺𑀦𑁆𑀦𑁄, 𑀯𑀺𑀜𑁆𑀜𑀸𑀡𑀁 𑀅𑀦𑀸𑀳𑀸𑀭𑀁 𑀅𑀦𑀪𑀺𑀦𑀦𑁆𑀤𑀺𑀢𑀁 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀁 𑀢𑀁 𑀦𑀺𑀭𑀼𑀚𑁆𑀛𑀢𑀺. 𑀦𑀸𑀫𑀭𑀽𑀧𑀫𑀧𑀺 𑀅𑀳𑁂𑀢𑀼 𑀅𑀧𑁆𑀧𑀘𑁆𑀘𑀬𑀁 𑀧𑀼𑀦𑀩𑁆𑀪𑀯𑀁 𑀦 𑀦𑀺𑀩𑁆𑀩𑀢𑁆𑀢𑀬𑀢𑀺 [𑀦𑀺𑀩𑁆𑀩𑀢𑁆𑀢𑀺𑀬𑀢𑀺 (𑀓.)]. 𑀏𑀯𑀁 𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀭𑁄𑀥𑀸 𑀧𑀜𑁆𑀜𑀸 𑀘 𑀲𑀢𑀺 𑀘 𑀦𑀸𑀫𑀭𑀽𑀧𑀜𑁆𑀘 𑀦𑀺𑀭𑀼𑀚𑁆𑀛𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀬𑀫𑁂𑀢𑀁 𑀧𑀜𑁆𑀳𑀁 𑀅𑀧𑀼𑀘𑁆𑀙𑀺, 𑀅𑀚𑀺𑀢 𑀢𑀁 𑀯𑀤𑀸𑀫𑀺 𑀢𑁂;

𑀬𑀢𑁆𑀣 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘, 𑀅𑀲𑁂𑀲𑀁 𑀉𑀧𑀭𑀼𑀚𑁆𑀛𑀢𑀺;

𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀭𑁄𑀥𑁂𑀦, 𑀏𑀢𑁆𑀣𑁂𑀢𑀁 𑀉𑀧𑀭𑀼𑀚𑁆𑀛𑀢𑀻’’𑀢𑀺.

‘‘𑀬𑁂 𑀘 [𑀅𑀬𑀁 𑀕𑀸𑀣𑀸 𑀲𑀼. 𑀦𑀺. 𑁧𑁦𑁪𑁪 𑀅𑀜𑁆𑀜𑀣𑀸 𑀤𑀺𑀲𑁆𑀲𑀢𑀺] 𑀲𑀗𑁆𑀔𑀸𑀢𑀥𑀫𑁆𑀫𑀸𑀲𑁂, [𑀇𑀘𑁆𑀘𑀸𑀬𑀲𑁆𑀫𑀸 𑀅𑀚𑀺𑀢𑁄]

𑀬𑁂 𑀘 𑀲𑁂𑀓𑁆𑀔𑀸 𑀧𑀼𑀣𑀽 𑀇𑀥;

𑀢𑁂𑀲𑀁 𑀫𑁂 𑀦𑀺𑀧𑀓𑁄 𑀇𑀭𑀺𑀬𑀁, 𑀧𑀼𑀝𑁆𑀞𑁄 𑀧𑀩𑁆𑀭𑀽𑀳𑀺 𑀫𑀸𑀭𑀺𑀲𑀸’’𑀢𑀺.

𑁧𑁫. 𑀇𑀫𑀸𑀦𑀺 𑀢𑀻𑀡𑀺 𑀧𑀤𑀸𑀦𑀺 𑀧𑀼𑀘𑁆𑀙𑀺𑀢𑀸𑀦𑀺, 𑀢𑁂 𑀢𑀬𑁄 𑀧𑀜𑁆𑀳𑀸. 𑀓𑀺𑀲𑁆𑀲? 𑀲𑁂𑀔𑀸𑀲𑁂𑀔𑀯𑀺𑀧𑀲𑁆𑀲𑀦𑀸𑀧𑀼𑀩𑁆𑀩𑀗𑁆𑀕𑀫𑀧𑁆𑀧𑀳𑀸𑀦𑀬𑁄𑀕𑁂𑀦, 𑀏𑀯𑀜𑁆𑀳𑀺 𑀆𑀳. ‘‘𑀬𑁂 𑀘 𑀲𑀗𑁆𑀔𑀸𑀢𑀥𑀫𑁆𑀫𑀸𑀲𑁂’’𑀢𑀺 𑀅𑀭𑀳𑀢𑁆𑀢𑀁 𑀧𑀼𑀘𑁆𑀙𑀢𑀺, ‘‘𑀬𑁂 𑀘 𑀲𑁂𑀔𑀸 𑀧𑀼𑀣𑀽 𑀇𑀥𑀸’’𑀢𑀺 𑀲𑁂𑀔𑀁 𑀧𑀼𑀘𑁆𑀙𑀢𑀺, ‘‘𑀢𑁂𑀲𑀁 𑀫𑁂 𑀦𑀺𑀧𑀓𑁄 𑀇𑀭𑀺𑀬𑀁, 𑀧𑀼𑀝𑁆𑀞𑁄 𑀧𑀩𑁆𑀭𑀽𑀳𑀺 𑀫𑀸𑀭𑀺𑀲𑀸’’𑀢𑀺 𑀯𑀺𑀧𑀲𑁆𑀲𑀦𑀸𑀧𑀼𑀩𑁆𑀩𑀗𑁆𑀕𑀫𑀁 𑀧𑀳𑀸𑀦𑀁 𑀧𑀼𑀘𑁆𑀙𑀢𑀺.

𑀢𑀢𑁆𑀣 𑀯𑀺𑀲𑀚𑁆𑀚𑀦𑀸 𑁋

‘‘𑀓𑀸𑀫𑁂𑀲𑀼 𑀦𑀸𑀪𑀺𑀕𑀺𑀚𑁆𑀛𑁂𑀬𑁆𑀬, [𑀅𑀚𑀺𑀢𑀸𑀢𑀺 𑀪𑀕𑀯𑀸]

𑀫𑀦𑀲𑀸𑀦𑀸𑀯𑀺𑀮𑁄 𑀲𑀺𑀬𑀸;

𑀓𑀼𑀲𑀮𑁄 𑀲𑀩𑁆𑀩𑀥𑀫𑁆𑀫𑀸𑀦𑀁, 𑀲𑀢𑁄 𑀪𑀺𑀓𑁆𑀔𑀼 𑀧𑀭𑀺𑀩𑁆𑀩𑀚𑁂’’𑀢𑀺.

𑀪𑀕𑀯𑀢𑁄 𑀲𑀩𑁆𑀩𑀁 𑀓𑀸𑀬𑀓𑀫𑁆𑀫𑀁 𑀜𑀸𑀡𑀧𑀼𑀩𑁆𑀩𑀗𑁆𑀕𑀫𑀁 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀺, 𑀲𑀩𑁆𑀩𑀁 𑀯𑀘𑀻𑀓𑀫𑁆𑀫𑀁 𑀜𑀸𑀡𑀧𑀼𑀩𑁆𑀩𑀗𑁆𑀕𑀫𑀁 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀺, 𑀲𑀩𑁆𑀩𑀁 𑀫𑀦𑁄𑀓𑀫𑁆𑀫𑀁 𑀜𑀸𑀡𑀧𑀼𑀩𑁆𑀩𑀗𑁆𑀕𑀫𑀁 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀺. 𑀅𑀢𑀻𑀢𑁂 𑀅𑀁𑀲𑁂 𑀅𑀧𑁆𑀧𑀝𑀺𑀳𑀢𑀜𑀸𑀡𑀤𑀲𑁆𑀲𑀦𑀁, 𑀅𑀦𑀸𑀕𑀢𑁂 𑀅𑀁𑀲𑁂 𑀅𑀧𑁆𑀧𑀝𑀺𑀳𑀢𑀜𑀸𑀡𑀤𑀲𑁆𑀲𑀦𑀁, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀅𑀁𑀲𑁂 𑀅𑀧𑁆𑀧𑀝𑀺𑀳𑀢𑀜𑀸𑀡𑀤𑀲𑁆𑀲𑀦𑀁.

𑀓𑁄 𑀘 𑀜𑀸𑀡𑀤𑀲𑁆𑀲𑀦𑀲𑁆𑀲 𑀧𑀝𑀺𑀖𑀸𑀢𑁄? 𑀬𑀁 𑀅𑀦𑀺𑀘𑁆𑀘𑁂 𑀤𑀼𑀓𑁆𑀔𑁂 𑀅𑀦𑀢𑁆𑀢𑀦𑀺 𑀘 𑀅𑀜𑁆𑀜𑀸𑀡𑀁 𑀅𑀤𑀲𑁆𑀲𑀦𑀁, 𑀅𑀬𑀁 𑀜𑀸𑀡𑀤𑀲𑁆𑀲𑀦𑀲𑁆𑀲 𑀧𑀝𑀺𑀖𑀸𑀢𑁄. 𑀬𑀣𑀸 𑀇𑀥 𑀧𑀼𑀭𑀺𑀲𑁄 𑀢𑀸𑀭𑀓𑀭𑀽𑀧𑀸𑀦𑀺 𑀧𑀲𑁆𑀲𑁂𑀬𑁆𑀬, 𑀦𑁄 𑀘 𑀕𑀡𑀦𑀲𑀗𑁆𑀓𑁂𑀢𑁂𑀦 𑀚𑀸𑀦𑁂𑀬𑁆𑀬, 𑀅𑀬𑀁 𑀜𑀸𑀡𑀤𑀲𑁆𑀲𑀦𑀲𑁆𑀲 𑀧𑀝𑀺𑀖𑀸𑀢𑁄.

𑀪𑀕𑀯𑀢𑁄 𑀧𑀦 𑀅𑀧𑁆𑀧𑀝𑀺𑀳𑀢𑀜𑀸𑀡𑀤𑀲𑁆𑀲𑀦𑀁, 𑀅𑀦𑀸𑀯𑀭𑀡𑀜𑀸𑀡𑀤𑀲𑁆𑀲𑀦𑀸 𑀳𑀺 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄. 𑀢𑀢𑁆𑀣 𑀲𑁂𑀔𑁂𑀦 𑀤𑁆𑀯𑀻𑀲𑀼 𑀥𑀫𑁆𑀫𑁂𑀲𑀼 𑀘𑀺𑀢𑁆𑀢𑀁 𑀭𑀓𑁆𑀔𑀺𑀢𑀩𑁆𑀩𑀁 𑀕𑁂𑀥𑀸 𑀘 𑀭𑀚𑀦𑀻𑀬𑁂𑀲𑀼 𑀥𑀫𑁆𑀫𑁂𑀲𑀼, 𑀤𑁄𑀲𑀸 𑀘 𑀧𑀭𑀺𑀬𑀼𑀝𑁆𑀞𑀸𑀦𑀻𑀬𑁂𑀲𑀼. 𑀢𑀢𑁆𑀣 𑀬𑀸 𑀇𑀘𑁆𑀙𑀸 𑀫𑀼𑀘𑁆𑀙𑀸 𑀧𑀢𑁆𑀣𑀦𑀸 𑀧𑀺𑀬𑀸𑀬𑀦𑀸 𑀓𑀻𑀴𑀦𑀸, 𑀢𑀁 𑀪𑀕𑀯𑀸 𑀦𑀺𑀯𑀸𑀭𑁂𑀦𑁆𑀢𑁄 𑀏𑀯𑀫𑀸𑀳 ‘‘𑀓𑀸𑀫𑁂𑀲𑀼 𑀦𑀸𑀪𑀺𑀕𑀺𑀚𑁆𑀛𑁂𑀬𑁆𑀬𑀸’’𑀢𑀺.

‘‘𑀫𑀦𑀲𑀸𑀦𑀸𑀯𑀺𑀮𑁄 𑀲𑀺𑀬𑀸’’𑀢𑀺 𑀧𑀭𑀺𑀬𑀼𑀝𑁆𑀞𑀸𑀦𑀯𑀺𑀖𑀸𑀢𑀁 𑀆𑀳. 𑀢𑀣𑀸 𑀳𑀺 𑀲𑁂𑀔𑁄 𑀅𑀪𑀺𑀕𑀺𑀚𑁆𑀛𑀦𑁆𑀢𑁄 𑀅𑀲𑀫𑀼𑀧𑁆𑀧𑀦𑁆𑀦𑀜𑁆𑀘 𑀓𑀺𑀮𑁂𑀲𑀁 𑀉𑀧𑁆𑀧𑀸𑀤𑁂𑀢𑀺, 𑀉𑀧𑁆𑀧𑀦𑁆𑀦𑀜𑁆𑀘 𑀓𑀺𑀮𑁂𑀲𑀁 𑀨𑀸𑀢𑀺𑀁 𑀓𑀭𑁄𑀢𑀺. 𑀬𑁄 𑀧𑀦 𑀅𑀦𑀸𑀯𑀺𑀮𑀲𑀗𑁆𑀓𑀧𑁆𑀧𑁄 𑀅𑀦𑀪𑀺𑀕𑀺𑀚𑁆𑀛𑀦𑁆𑀢𑁄 𑀯𑀸𑀬𑀫𑀢𑀺, 𑀲𑁄 𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑀼𑀧𑁆𑀧𑀸𑀤𑀸𑀬 𑀙𑀦𑁆𑀤𑀁 𑀚𑀦𑁂𑀢𑀺 𑀯𑀸𑀬𑀫𑀢𑀺 𑀯𑀻𑀭𑀺𑀬𑀁 𑀆𑀭𑀪𑀢𑀺 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀺 𑀧𑀤𑀳𑀢𑀺. 𑀲𑁄 𑀉𑀧𑁆𑀧𑀦𑁆𑀦𑀸𑀦𑀁 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀳𑀸𑀦𑀸𑀬 𑀙𑀦𑁆𑀤𑀁 𑀚𑀦𑁂𑀢𑀺 𑀯𑀸𑀬𑀫𑀢𑀺 𑀯𑀻𑀭𑀺𑀬𑀁 𑀆𑀭𑀪𑀢𑀺 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀺 𑀧𑀤𑀳𑀢𑀺. 𑀲𑁄 𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀉𑀧𑁆𑀧𑀸𑀤𑀸𑀬 𑀙𑀦𑁆𑀤𑀁 𑀚𑀦𑁂𑀢𑀺 𑀯𑀸𑀬𑀫𑀢𑀺 𑀯𑀻𑀭𑀺𑀬𑀁 𑀆𑀭𑀪𑀢𑀺 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀺 𑀧𑀤𑀳𑀢𑀺. 𑀲𑁄 𑀉𑀧𑁆𑀧𑀦𑁆𑀦𑀸𑀦𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀞𑀺𑀢𑀺𑀬𑀸 𑀅𑀲𑀫𑁆𑀫𑁄𑀲𑀸𑀬 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀺𑀬𑀸 𑀙𑀦𑁆𑀤𑀁 𑀚𑀦𑁂𑀢𑀺 𑀯𑀸𑀬𑀫𑀢𑀺 𑀯𑀻𑀭𑀺𑀬𑀁 𑀆𑀭𑀪𑀢𑀺 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀺 𑀧𑀤𑀳𑀢𑀺.

𑁧𑁬. 𑀓𑀢𑀫𑁂 [𑀓𑀢𑀫𑁂 𑀘 (𑀅𑀝𑁆𑀞.)] 𑀅𑀦𑀼𑀧𑁆𑀧𑀦𑁆𑀦𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸? 𑀓𑀸𑀫𑀯𑀺𑀢𑀓𑁆𑀓𑁄 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁄 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁄, 𑀇𑀫𑁂 𑀅𑀦𑀼𑀧𑁆𑀧𑀦𑁆𑀦𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸. 𑀓𑀢𑀫𑁂 𑀉𑀧𑁆𑀧𑀦𑁆𑀦𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸? 𑀅𑀦𑀼𑀲𑀬𑀸 𑀅𑀓𑀼𑀲𑀮𑀫𑀽𑀮𑀸𑀦𑀺, 𑀇𑀫𑁂 𑀉𑀧𑁆𑀧𑀦𑁆𑀦𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸. 𑀓𑀢𑀫𑁂 𑀅𑀦𑀼𑀧𑁆𑀧𑀦𑁆𑀦𑀸 𑀓𑀼𑀲𑀮𑀸 𑀥𑀫𑁆𑀫𑀸? 𑀬𑀸𑀦𑀺 𑀲𑁄𑀢𑀸𑀧𑀦𑁆𑀦𑀲𑁆𑀲 𑀇𑀦𑁆𑀤𑁆𑀭𑀺𑀬𑀸𑀦𑀺, 𑀇𑀫𑁂 𑀅𑀦𑀼𑀧𑁆𑀧𑀦𑁆𑀦𑀸 𑀓𑀼𑀲𑀮𑀸 𑀥𑀫𑁆𑀫𑀸. 𑀓𑀢𑀫𑁂 𑀉𑀧𑁆𑀧𑀦𑁆𑀦𑀸 𑀓𑀼𑀲𑀮𑀸 𑀥𑀫𑁆𑀫𑀸? 𑀬𑀸𑀦𑀺 𑀅𑀝𑁆𑀞𑀫𑀓𑀲𑁆𑀲 𑀇𑀦𑁆𑀤𑁆𑀭𑀺𑀬𑀸𑀦𑀺, 𑀇𑀫𑁂 𑀉𑀧𑁆𑀧𑀦𑁆𑀦𑀸 𑀓𑀼𑀲𑀮𑀸 𑀥𑀫𑁆𑀫𑀸.

𑀬𑁂𑀦 𑀓𑀸𑀫𑀯𑀺𑀢𑀓𑁆𑀓𑀁 𑀯𑀸𑀭𑁂𑀢𑀺, 𑀇𑀤𑀁 𑀲𑀢𑀺𑀦𑁆𑀤𑁆𑀭𑀺𑀬𑀁. 𑀬𑁂𑀦 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑀁 𑀯𑀸𑀭𑁂𑀢𑀺, 𑀇𑀤𑀁 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁. 𑀬𑁂𑀦 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑀁 𑀯𑀸𑀭𑁂𑀢𑀺, 𑀇𑀤𑀁 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁.

𑀬𑁂𑀦 𑀉𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑁂 𑀧𑀸𑀧𑀓𑁂 𑀅𑀓𑀼𑀲𑀮𑁂 𑀥𑀫𑁆𑀫𑁂 𑀧𑀚𑀳𑀢𑀺 𑀯𑀺𑀦𑁄𑀤𑁂𑀢𑀺 𑀩𑁆𑀬𑀦𑁆𑀢𑀻𑀓𑀭𑁄𑀢𑀺 𑀅𑀦𑀪𑀸𑀯𑀁 𑀕𑀫𑁂𑀢𑀺 𑀦𑀸𑀥𑀺𑀯𑀸𑀲𑁂𑀢𑀺, 𑀇𑀤𑀁 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁. 𑀬𑀸 𑀇𑀫𑁂𑀲𑀼 𑀘𑀢𑀽𑀲𑀼 𑀇𑀦𑁆𑀤𑁆𑀭𑀺𑀬𑁂𑀲𑀼 𑀲𑀤𑁆𑀤𑀳𑀦𑀸 𑀑𑀓𑀧𑁆𑀧𑀦𑀸, 𑀇𑀤𑀁 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁.

𑀢𑀢𑁆𑀣 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀓𑀢𑁆𑀣 𑀤𑀝𑁆𑀞𑀩𑁆𑀩𑀁? 𑀘𑀢𑀽𑀲𑀼 𑀲𑁄𑀢𑀸𑀧𑀢𑁆𑀢𑀺𑀬𑀗𑁆𑀕𑁂𑀲𑀼. 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀓𑀢𑁆𑀣 𑀤𑀝𑁆𑀞𑀩𑁆𑀩𑀁? 𑀘𑀢𑀽𑀲𑀼 𑀲𑀫𑁆𑀫𑀧𑁆𑀧𑀥𑀸𑀦𑁂𑀲𑀼. 𑀲𑀢𑀺𑀦𑁆𑀤𑁆𑀭𑀺𑀬𑀁 𑀓𑀢𑁆𑀣 𑀤𑀝𑁆𑀞𑀩𑁆𑀩𑀁? 𑀘𑀢𑀽𑀲𑀼 𑀲𑀢𑀺𑀧𑀝𑁆𑀞𑀸𑀦𑁂𑀲𑀼. 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀓𑀢𑁆𑀣 𑀤𑀝𑁆𑀞𑀩𑁆𑀩𑀁? 𑀘𑀢𑀽𑀲𑀼 𑀛𑀸𑀦𑁂𑀲𑀼. 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀓𑀢𑁆𑀣 𑀤𑀝𑁆𑀞𑀩𑁆𑀩𑀁? 𑀘𑀢𑀽𑀲𑀼 𑀅𑀭𑀺𑀬𑀲𑀘𑁆𑀘𑁂𑀲𑀼. 𑀏𑀯𑀁 𑀲𑁂𑀔𑁄 𑀲𑀩𑁆𑀩𑁂𑀳𑀺 𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀅𑀧𑁆𑀧𑀫𑀢𑁆𑀢𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸 𑀅𑀦𑀸𑀯𑀺𑀮𑀢𑀸𑀬 𑀫𑀦𑀲𑀸. 𑀢𑁂𑀦𑀸𑀳 𑀪𑀕𑀯𑀸 ‘‘𑀫𑀦𑀲𑀸𑀦𑀸𑀯𑀺𑀮𑁄𑀲𑀺𑀬𑀸’’𑀢𑀺.

𑁧𑁭. ‘‘𑀓𑀼𑀲𑀮𑁄 𑀲𑀩𑁆𑀩𑀥𑀫𑁆𑀫𑀸𑀦’’𑀦𑁆𑀢𑀺 𑀮𑁄𑀓𑁄 𑀦𑀸𑀫 𑀢𑀺𑀯𑀺𑀥𑁄 𑀓𑀺𑀮𑁂𑀲𑀮𑁄𑀓𑁄 𑀪𑀯𑀮𑁄𑀓𑁄 𑀇𑀦𑁆𑀤𑁆𑀭𑀺𑀬𑀮𑁄𑀓𑁄. 𑀢𑀢𑁆𑀣 𑀓𑀺𑀮𑁂𑀲𑀮𑁄𑀓𑁂𑀦 𑀪𑀯𑀮𑁄𑀓𑁄 𑀲𑀫𑀼𑀤𑀸𑀕𑀘𑁆𑀙𑀢𑀺, 𑀲𑁄 𑀇𑀦𑁆𑀤𑁆𑀭𑀺𑀬𑀸𑀦𑀺 𑀦𑀺𑀩𑁆𑀩𑀢𑁆𑀢𑁂𑀢𑀺, 𑀇𑀦𑁆𑀤𑁆𑀭𑀺𑀬𑁂𑀲𑀼 𑀪𑀸𑀯𑀺𑀬𑀫𑀸𑀦𑁂𑀲𑀼 𑀦𑁂𑀬𑁆𑀬𑀲𑁆𑀲 𑀧𑀭𑀺𑀜𑁆𑀜𑀸 𑀪𑀯𑀢𑀺. 𑀲𑀸 𑀤𑀼𑀯𑀺𑀥𑁂𑀦 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑀸 𑀤𑀲𑁆𑀲𑀦𑀧𑀭𑀺𑀜𑁆𑀜𑀸𑀬 𑀘 𑀪𑀸𑀯𑀦𑀸𑀧𑀭𑀺𑀜𑁆𑀜𑀸𑀬 𑀘. 𑀬𑀤𑀸 𑀳𑀺 𑀲𑁂𑀔𑁄 𑀜𑁂𑀬𑁆𑀬𑀁 𑀧𑀭𑀺𑀚𑀸𑀦𑀸𑀢𑀺, 𑀢𑀤𑀸 𑀦𑀺𑀩𑁆𑀩𑀺𑀤𑀸𑀲𑀳𑀕𑀢𑁂𑀳𑀺 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑁂𑀳𑀺 𑀦𑁂𑀬𑁆𑀬𑀁 𑀧𑀭𑀺𑀜𑁆𑀜𑀸𑀢𑀁 𑀪𑀯𑀢𑀺. 𑀢𑀲𑁆𑀲 𑀤𑁆𑀯𑁂 𑀥𑀫𑁆𑀫𑀸 𑀓𑁄𑀲𑀮𑁆𑀮𑀁 𑀕𑀘𑁆𑀙𑀦𑁆𑀢𑀺 𑁋 𑀤𑀲𑁆𑀲𑀦𑀓𑁄𑀲𑀮𑁆𑀮𑀜𑁆𑀘 𑀪𑀸𑀯𑀦𑀸𑀓𑁄𑀲𑀮𑁆𑀮𑀜𑁆𑀘.

𑀢𑀁 𑀜𑀸𑀡𑀁 𑀧𑀜𑁆𑀘𑀯𑀺𑀥𑁂𑀦 𑀯𑁂𑀤𑀺𑀢𑀩𑁆𑀩𑀁ः 𑀅𑀪𑀺𑀜𑁆𑀜𑀸 𑀧𑀭𑀺𑀜𑁆𑀜𑀸 𑀧𑀳𑀸𑀦𑀁 𑀪𑀸𑀯𑀦𑀸 𑀲𑀘𑁆𑀙𑀺𑀓𑀺𑀭𑀺𑀬𑀸. 𑀢𑀢𑁆𑀣 𑀓𑀢𑀫𑀸 𑀅𑀪𑀺𑀜𑁆𑀜𑀸? 𑀬𑀁 𑀥𑀫𑁆𑀫𑀸𑀦𑀁 𑀲𑀮𑀓𑁆𑀔𑀡𑁂 𑀜𑀸𑀡𑀁 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸 𑀘 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸 𑀘, 𑀅𑀬𑀁 𑀅𑀪𑀺𑀜𑁆𑀜𑀸.

𑀢𑀢𑁆𑀣 𑀓𑀢𑀫𑀸 𑀧𑀭𑀺𑀜𑁆𑀜𑀸? 𑀏𑀯𑀁 𑀅𑀪𑀺𑀚𑀸𑀦𑀺𑀢𑁆𑀯𑀸 𑀬𑀸 𑀧𑀭𑀺𑀚𑀸𑀦𑀦𑀸 ‘‘𑀇𑀤𑀁 𑀓𑀼𑀲𑀮𑀁, 𑀇𑀤𑀁 𑀅𑀓𑀼𑀲𑀮𑀁, 𑀇𑀤𑀁 𑀲𑀸𑀯𑀚𑁆𑀚𑀁, 𑀇𑀤𑀁 𑀅𑀦𑀯𑀚𑁆𑀚𑀁, 𑀇𑀤𑀁 𑀓𑀡𑁆𑀳𑀁, 𑀇𑀤𑀁 𑀲𑀼𑀓𑁆𑀓𑀁, 𑀇𑀤𑀁 𑀲𑁂𑀯𑀺𑀢𑀩𑁆𑀩𑀁, 𑀇𑀤𑀁 𑀦 𑀲𑁂𑀯𑀺𑀢𑀩𑁆𑀩𑀁, 𑀇𑀫𑁂 𑀥𑀫𑁆𑀫𑀸 𑀏𑀯𑀁𑀕𑀳𑀺𑀢𑀸, 𑀇𑀤𑀁 𑀨𑀮𑀁 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺 [𑀦𑀺𑀩𑁆𑀩𑀢𑁆𑀢𑀸𑀧𑁂𑀦𑁆𑀢𑀺 (𑀓.)], 𑀢𑁂𑀲𑀁 𑀏𑀯𑀁𑀕𑀳𑀺𑀢𑀸𑀦𑀁 𑀅𑀬𑀁 𑀅𑀢𑁆𑀣𑁄’’𑀢𑀺, 𑀅𑀬𑀁 𑀧𑀭𑀺𑀜𑁆𑀜𑀸.

𑀏𑀯𑀁 𑀧𑀭𑀺𑀚𑀸𑀦𑀺𑀢𑁆𑀯𑀸 𑀢𑀬𑁄 𑀥𑀫𑁆𑀫𑀸 𑀅𑀯𑀲𑀺𑀝𑁆𑀞𑀸 𑀪𑀯𑀦𑁆𑀢𑀺 𑀧𑀳𑀸𑀢𑀩𑁆𑀩𑀸 𑀪𑀸𑀯𑁂𑀢𑀩𑁆𑀩𑀸 𑀲𑀘𑁆𑀙𑀺𑀓𑀸𑀢𑀩𑁆𑀩𑀸 𑀘. 𑀢𑀢𑁆𑀣 𑀓𑀢𑀫𑁂 𑀥𑀫𑁆𑀫𑀸 𑀧𑀳𑀸𑀢𑀩𑁆𑀩𑀸? 𑀬𑁂 𑀅𑀓𑀼𑀲𑀮𑀸. 𑀢𑀢𑁆𑀣 𑀓𑀢𑀫𑁂 𑀥𑀫𑁆𑀫𑀸 𑀪𑀸𑀯𑁂𑀢𑀩𑁆𑀩𑀸? 𑀬𑁂 𑀓𑀼𑀲𑀮𑀸. 𑀢𑀢𑁆𑀣 𑀓𑀢𑀫𑁂 𑀥𑀫𑁆𑀫𑀸 𑀲𑀘𑁆𑀙𑀺𑀓𑀸𑀢𑀩𑁆𑀩𑀸? 𑀬𑀁 𑀅𑀲𑀗𑁆𑀔𑀢𑀁. 𑀬𑁄 𑀏𑀯𑀁 𑀚𑀸𑀦𑀸𑀢𑀺 𑀅𑀬𑀁 𑀯𑀼𑀘𑁆𑀘𑀢𑀺 𑀅𑀢𑁆𑀣𑀓𑀼𑀲𑀮𑁄 𑀥𑀫𑁆𑀫𑀓𑀼𑀲𑀮𑁄 𑀓𑀮𑁆𑀬𑀸𑀡𑀢𑀸𑀓𑀼𑀲𑀮𑁄 𑀨𑀮𑀢𑀸𑀓𑀼𑀲𑀮𑁄, 𑀆𑀬𑀓𑀼𑀲𑀮𑁄 𑀅𑀧𑀸𑀬𑀓𑀼𑀲𑀮𑁄 𑀉𑀧𑀸𑀬𑀓𑀼𑀲𑀮𑁄 𑀫𑀳𑀢𑀸 𑀓𑁄𑀲𑀮𑁆𑀮𑁂𑀦 𑀲𑀫𑀦𑁆𑀦𑀸𑀕𑀢𑁄𑀢𑀺, 𑀢𑁂𑀦𑀸𑀳 𑀪𑀕𑀯𑀸 ‘‘𑀓𑀼𑀲𑀮𑁄 𑀲𑀩𑁆𑀩𑀥𑀫𑁆𑀫𑀸𑀦’’𑀦𑁆𑀢𑀺.

‘‘𑀲𑀢𑁄 𑀪𑀺𑀓𑁆𑀔𑀼 𑀧𑀭𑀺𑀩𑁆𑀩𑀚𑁂’’𑀢𑀺 𑀢𑁂𑀦 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀢𑁆𑀣𑀁 𑀅𑀪𑀺𑀓𑁆𑀓𑀦𑁆𑀢𑁂 𑀧𑀝𑀺𑀓𑁆𑀓𑀦𑁆𑀢𑁂 𑀆𑀮𑁄𑀓𑀺𑀢𑁂 𑀯𑀺𑀮𑁄𑀓𑀺𑀢𑁂 𑀲𑀫𑀺𑀜𑁆𑀚𑀺𑀢𑁂 [𑀲𑀫𑁆𑀫𑀺𑀜𑁆𑀚𑀺𑀢𑁂 (𑀲𑀻.)] 𑀧𑀲𑀸𑀭𑀺𑀢𑁂 𑀲𑀗𑁆𑀖𑀸𑀝𑀺𑀧𑀢𑁆𑀢𑀘𑀻𑀯𑀭𑀥𑀸𑀭𑀡𑁂 𑀅𑀲𑀺𑀢𑁂 𑀧𑀻𑀢𑁂 𑀔𑀸𑀬𑀺𑀢𑁂 𑀲𑀸𑀬𑀺𑀢𑁂 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀓𑀫𑁆𑀫𑁂 𑀕𑀢𑁂 𑀞𑀺𑀢𑁂 𑀦𑀺𑀲𑀺𑀦𑁆𑀦𑁂 𑀲𑀼𑀢𑁆𑀢𑁂 𑀚𑀸𑀕𑀭𑀺𑀢𑁂 𑀪𑀸𑀲𑀺𑀢𑁂 𑀢𑀼𑀡𑁆𑀳𑀺𑀪𑀸𑀯𑁂 𑀲𑀢𑁂𑀦 𑀲𑀫𑁆𑀧𑀚𑀸𑀦𑁂𑀦 𑀯𑀺𑀳𑀸𑀢𑀩𑁆𑀩𑀁. 𑀇𑀫𑀸 𑀤𑁆𑀯𑁂 𑀘𑀭𑀺𑀬𑀸 𑀅𑀦𑀼𑀜𑁆𑀜𑀸𑀢𑀸 𑀪𑀕𑀯𑀢𑀸 𑀏𑀓𑀸 𑀯𑀺𑀲𑀼𑀤𑁆𑀥𑀸𑀦𑀁, 𑀏𑀓𑀸 𑀯𑀺𑀲𑀼𑀚𑁆𑀛𑀦𑁆𑀢𑀸𑀦𑀁. 𑀓𑁂 𑀯𑀺𑀲𑀼𑀤𑁆𑀥𑀸? 𑀅𑀭𑀳𑀦𑁆𑀢𑁄. 𑀓𑁂 𑀯𑀺𑀲𑀼𑀚𑁆𑀛𑀦𑁆𑀢𑀸? 𑀲𑁂𑀓𑁆𑀔𑀸. 𑀓𑀢𑀓𑀺𑀘𑁆𑀘𑀸𑀦𑀺 𑀳𑀺 𑀅𑀭𑀳𑀢𑁄 𑀇𑀦𑁆𑀤𑁆𑀭𑀺𑀬𑀸𑀦𑀺. 𑀬𑀁 𑀩𑁄𑀚𑁆𑀛𑀁, 𑀢𑀁 𑀘𑀢𑀼𑀩𑁆𑀩𑀺𑀥𑀁 𑀤𑀼𑀓𑁆𑀔𑀲𑁆𑀲 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑁂𑀦 𑀲𑀫𑀼𑀤𑀬𑀲𑁆𑀲 𑀧𑀳𑀸𑀦𑀸𑀪𑀺𑀲𑀫𑀬𑁂𑀦 𑀫𑀕𑁆𑀕𑀲𑁆𑀲 𑀪𑀸𑀯𑀦𑀸𑀪𑀺𑀲𑀫𑀬𑁂𑀦 𑀦𑀺𑀭𑁄𑀥𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀺𑀲𑀫𑀬𑁂𑀦, 𑀇𑀤𑀁 𑀘𑀢𑀼𑀩𑁆𑀩𑀺𑀥𑀁 𑀩𑁄𑀚𑁆𑀛𑀁 𑀬𑁄 𑀏𑀯𑀁 𑀚𑀸𑀦𑀸𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀲𑀢𑁄 𑀅𑀪𑀺𑀓𑁆𑀓𑀫𑀢𑀺 𑀲𑀢𑁄 𑀧𑀝𑀺𑀓𑁆𑀓𑀫𑀢𑀺 𑀔𑀬𑀸 𑀭𑀸𑀕𑀲𑁆𑀲 𑀔𑀬𑀸 𑀤𑁄𑀲𑀲𑁆𑀲 𑀔𑀬𑀸 𑀫𑁄𑀳𑀲𑁆𑀲. 𑀢𑁂𑀦𑀸𑀳 𑀪𑀕𑀯𑀸 ‘‘𑀲𑀢𑁄 𑀪𑀺𑀓𑁆𑀔𑀼 𑀧𑀭𑀺𑀩𑁆𑀩𑀚𑁂’’𑀢𑀺, 𑀢𑁂𑀦𑀸𑀳 𑁋

‘‘𑀓𑀸𑀫𑁂𑀲𑀼 𑀦𑀸𑀪𑀺𑀕𑀺𑀚𑁆𑀛𑁂𑀬𑁆𑀬, [𑀅𑀚𑀺𑀢𑀸𑀢𑀺 𑀪𑀕𑀯𑀸]

𑀫𑀦𑀲𑀸𑀦𑀸𑀯𑀺𑀮𑁄 𑀲𑀺𑀬𑀸;

𑀓𑀼𑀲𑀮𑁄 𑀲𑀩𑁆𑀩𑀥𑀫𑁆𑀫𑀸𑀦𑀁, 𑀲𑀢𑁄 𑀪𑀺𑀓𑁆𑀔𑀼 𑀧𑀭𑀺𑀩𑁆𑀩𑀚𑁂’’𑀢𑀺.

𑀏𑀯𑀁 𑀧𑀼𑀘𑁆𑀙𑀺𑀢𑀩𑁆𑀩𑀁, 𑀏𑀯𑀁 𑀯𑀺𑀲𑀚𑁆𑀚𑀺𑀢𑀩𑁆𑀩𑀁. 𑀲𑀼𑀢𑁆𑀢𑀲𑁆𑀲 𑀘 𑀅𑀦𑀼𑀕𑀻𑀢𑀺 𑀅𑀢𑁆𑀣𑀢𑁄 𑀘 𑀩𑁆𑀬𑀜𑁆𑀚𑀦𑀢𑁄 𑀘 𑀲𑀫𑀸𑀦𑁂𑀢𑀩𑁆𑀩𑀸 [𑀲𑀫𑀸𑀦𑀬𑀺𑀢𑀩𑁆𑀩𑀸 (𑀲𑀻. 𑀓.)]. 𑀅𑀢𑁆𑀣𑀸𑀧𑀕𑀢𑀁 𑀳𑀺 𑀩𑁆𑀬𑀜𑁆𑀚𑀦𑀁 𑀲𑀫𑁆𑀨𑀧𑁆𑀧𑀮𑀸𑀧𑀁 𑀪𑀯𑀢𑀺. 𑀤𑀼𑀦𑁆𑀦𑀺𑀓𑁆𑀔𑀺𑀢𑁆𑀢𑀲𑁆𑀲 𑀧𑀤𑀩𑁆𑀬𑀜𑁆𑀚𑀦𑀲𑁆𑀲 𑀅𑀢𑁆𑀣𑁄𑀧𑀺 𑀤𑀼𑀦𑁆𑀦𑀬𑁄 𑀪𑀯𑀢𑀺, 𑀢𑀲𑁆𑀫𑀸 𑀅𑀢𑁆𑀣𑀩𑁆𑀬𑀜𑁆𑀚𑀦𑀽𑀧𑁂𑀢𑀁 𑀲𑀗𑁆𑀕𑀸𑀬𑀺𑀢𑀩𑁆𑀩𑀁. 𑀲𑀼𑀢𑁆𑀢𑀜𑁆𑀘 𑀧𑀯𑀺𑀘𑀺𑀦𑀺𑀢𑀩𑁆𑀩𑀁. 𑀓𑀺𑀁 𑀇𑀤𑀁 𑀲𑀼𑀢𑁆𑀢𑀁 𑀆𑀳𑀘𑁆𑀘 𑀯𑀘𑀦𑀁 𑀅𑀦𑀼𑀲𑀦𑁆𑀥𑀺𑀯𑀘𑀦𑀁 𑀦𑀻𑀢𑀢𑁆𑀣𑀁 𑀦𑁂𑀬𑁆𑀬𑀢𑁆𑀣𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁 𑀅𑀲𑁂𑀓𑁆𑀔𑀪𑀸𑀕𑀺𑀬𑀁? 𑀓𑀼𑀳𑀺𑀁 𑀇𑀫𑀲𑁆𑀲 𑀲𑀼𑀢𑁆𑀢𑀲𑁆𑀲 𑀲𑀩𑁆𑀩𑀸𑀦𑀺 𑀲𑀘𑁆𑀘𑀸𑀦𑀺 𑀧𑀲𑁆𑀲𑀺𑀢𑀩𑁆𑀩𑀸𑀦𑀺, 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑁂𑀢𑀺? 𑀏𑀯𑀁 𑀲𑀼𑀢𑁆𑀢𑀁 𑀧𑀯𑀺𑀘𑁂𑀢𑀩𑁆𑀩𑀁. 𑀢𑁂𑀦𑀸𑀳 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀬𑀦𑁄 𑁋 ‘‘𑀬𑀁 𑀧𑀼𑀘𑁆𑀙𑀺𑀢𑀜𑁆𑀘 𑀯𑀺𑀲𑁆𑀲𑀚𑁆𑀚𑀺𑀢𑀜𑁆𑀘, 𑀲𑀼𑀢𑁆𑀢𑀲𑁆𑀲 𑀬𑀸 𑀘 𑀅𑀦𑀼𑀕𑀻𑀢𑀻’’𑀢𑀺.

𑀦𑀺𑀬𑀼𑀢𑁆𑀢𑁄 𑀯𑀺𑀘𑀬𑁄 𑀳𑀸𑀭𑁄.