𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀔𑀼𑀤𑁆𑀤𑀓𑀦𑀺𑀓𑀸𑀬𑁂

𑀦𑁂𑀢𑁆𑀢𑀺𑀧𑁆𑀧𑀓𑀭𑀡𑀧𑀸𑀴𑀺

𑁧. 𑀲𑀗𑁆𑀕𑀳𑀯𑀸𑀭𑁄

𑀬𑀁 𑀮𑁄𑀓𑁄 𑀧𑀽𑀚𑀬𑀢𑁂, 𑀲𑀮𑁄𑀓𑀧𑀸𑀮𑁄 𑀲𑀤𑀸 𑀦𑀫𑀲𑁆𑀲𑀢𑀺 𑀘;

𑀢𑀲𑁆𑀲𑁂𑀢 𑀲𑀸𑀲𑀦𑀯𑀭𑀁, 𑀯𑀺𑀤𑀽𑀳𑀺 𑀜𑁂𑀬𑁆𑀬𑀁 𑀦𑀭𑀯𑀭𑀲𑁆𑀲.

𑀤𑁆𑀯𑀸𑀤𑀲 𑀧𑀤𑀸𑀦𑀺 𑀲𑀼𑀢𑁆𑀢𑀁, 𑀢𑀁 𑀲𑀩𑁆𑀩𑀁 𑀩𑁆𑀬𑀜𑁆𑀚𑀦𑀜𑁆𑀘 𑀅𑀢𑁆𑀣𑁄 𑀘;

𑀢𑀁 𑀯𑀺𑀜𑁆𑀜𑁂𑀬𑁆𑀬𑀁 𑀉𑀪𑀬𑀁, 𑀓𑁄 𑀅𑀢𑁆𑀣𑁄 𑀩𑁆𑀬𑀜𑁆𑀚𑀦𑀁 𑀓𑀢𑀫𑀁.

𑀲𑁄𑀴𑀲𑀳𑀸𑀭𑀸 𑀦𑁂𑀢𑁆𑀢𑀺 [𑀦𑁂𑀢𑁆𑀢𑀻 (𑀓.)], 𑀧𑀜𑁆𑀘𑀦𑀬𑀸 𑀲𑀸𑀲𑀦𑀲𑁆𑀲 𑀧𑀭𑀺𑀬𑁂𑀝𑁆𑀞𑀺;

𑀅𑀝𑁆𑀞𑀸𑀭𑀲𑀫𑀽𑀮𑀧𑀤𑀸, 𑀫𑀳𑀓𑀘𑁆𑀘𑀸𑀦𑁂𑀦 [𑀫𑀳𑀸𑀓𑀘𑁆𑀘𑀸𑀦𑁂𑀦 (𑀲𑀻.)] 𑀦𑀺𑀤𑁆𑀤𑀺𑀝𑁆𑀞𑀸.

𑀳𑀸𑀭𑀸 𑀩𑁆𑀬𑀜𑁆𑀚𑀦𑀯𑀺𑀘𑀬𑁄, 𑀲𑀼𑀢𑁆𑀢𑀲𑁆𑀲 𑀦𑀬𑀸 𑀢𑀬𑁄 𑀘 𑀲𑀼𑀢𑁆𑀢𑀢𑁆𑀣𑁄;

𑀉𑀪𑀬𑀁 𑀧𑀭𑀺𑀕𑁆𑀕𑀳𑀻𑀢𑀁, 𑀯𑀼𑀘𑁆𑀘𑀢𑀺 𑀲𑀼𑀢𑁆𑀢𑀁 𑀬𑀣𑀸𑀲𑀼𑀢𑁆𑀢𑀁.

𑀬𑀸 𑀘𑁂𑀯 𑀤𑁂𑀲𑀦𑀸 𑀬𑀜𑁆𑀘, 𑀤𑁂𑀲𑀺𑀢𑀁 𑀉𑀪𑀬𑀫𑁂𑀯 𑀯𑀺𑀜𑁆𑀜𑁂𑀬𑁆𑀬𑀁;

𑀢𑀢𑁆𑀭𑀸𑀬𑀫𑀸𑀦𑀼𑀧𑀼𑀩𑁆𑀩𑀻, 𑀦𑀯𑀯𑀺𑀥𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑁂𑀝𑁆𑀞𑀻𑀢𑀺.

𑀲𑀗𑁆𑀕𑀳𑀯𑀸𑀭𑁄.

𑁨. 𑀉𑀤𑁆𑀤𑁂𑀲𑀯𑀸𑀭𑁄

𑁧. 𑀢𑀢𑁆𑀣 𑀓𑀢𑀫𑁂 𑀲𑁄𑀴𑀲 𑀳𑀸𑀭𑀸? 𑀤𑁂𑀲𑀦𑀸 𑀯𑀺𑀘𑀬𑁄 𑀬𑀼𑀢𑁆𑀢𑀺 𑀧𑀤𑀝𑁆𑀞𑀸𑀦𑁄 𑀮𑀓𑁆𑀔𑀡𑁄 𑀘𑀢𑀼𑀩𑁆𑀬𑀽𑀳𑁄 𑀆𑀯𑀝𑁆𑀝𑁄 𑀯𑀺𑀪𑀢𑁆𑀢𑀺 𑀧𑀭𑀺𑀯𑀢𑁆𑀢𑀦𑁄 𑀯𑁂𑀯𑀘𑀦𑁄 𑀧𑀜𑁆𑀜𑀢𑁆𑀢𑀺 𑀑𑀢𑀭𑀡𑁄 𑀲𑁄𑀥𑀦𑁄 𑀅𑀥𑀺𑀝𑁆𑀞𑀸𑀦𑁄 𑀧𑀭𑀺𑀓𑁆𑀔𑀸𑀭𑁄 𑀲𑀫𑀸𑀭𑁄𑀧𑀦𑁄 𑀇𑀢𑀺.

𑀢𑀲𑁆𑀲𑀸𑀦𑀼𑀕𑀻𑀢𑀺

𑀤𑁂𑀲𑀦𑀸 𑀯𑀺𑀘𑀬𑁄 𑀬𑀼𑀢𑁆𑀢𑀺, 𑀧𑀤𑀝𑁆𑀞𑀸𑀦𑁄 𑀘 𑀮𑀓𑁆𑀔𑀡𑁄;

𑀘𑀢𑀼𑀩𑁆𑀬𑀽𑀳𑁄 𑀘 𑀆𑀯𑀝𑁆𑀝𑁄, 𑀯𑀺𑀪𑀢𑁆𑀢𑀺 𑀧𑀭𑀺𑀯𑀢𑁆𑀢𑀦𑁄.

𑀯𑁂𑀯𑀘𑀦𑁄 𑀘 𑀧𑀜𑁆𑀜𑀢𑁆𑀢𑀺, 𑀑𑀢𑀭𑀡𑁄 𑀘 𑀲𑁄𑀥𑀦𑁄;

𑀅𑀥𑀺𑀝𑁆𑀞𑀸𑀦𑁄 𑀧𑀭𑀺𑀓𑁆𑀔𑀸𑀭𑁄, 𑀲𑀫𑀸𑀭𑁄𑀧𑀦𑁄 𑀲𑁄𑀴𑀲𑁄 [𑀲𑁄𑀴𑀲 (𑀲𑀻.)].

𑀏𑀢𑁂 𑀲𑁄𑀴𑀲 𑀳𑀸𑀭𑀸, 𑀧𑀓𑀺𑀢𑁆𑀢𑀺𑀢𑀸 𑀅𑀢𑁆𑀣𑀢𑁄 𑀅𑀲𑀁𑀓𑀺𑀡𑁆𑀡𑀸;

𑀏𑀢𑁂𑀲𑀜𑁆𑀘𑁂𑀯 𑀪𑀯𑀢𑀺, 𑀯𑀺𑀢𑁆𑀣𑀸𑀭𑀢𑀬𑀸 𑀦𑀬𑀯𑀺𑀪𑀢𑁆𑀢𑀻𑀢𑀺.

𑁨. 𑀢𑀢𑁆𑀣 𑀓𑀢𑀫𑁂 𑀧𑀜𑁆𑀘 𑀦𑀬𑀸? 𑀦𑀦𑁆𑀤𑀺𑀬𑀸𑀯𑀝𑁆𑀝𑁄 𑀢𑀺𑀧𑀼𑀓𑁆𑀔𑀮𑁄 𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑁄 𑀤𑀺𑀲𑀸𑀮𑁄𑀘𑀦𑁄 𑀅𑀗𑁆𑀓𑀼𑀲𑁄 𑀇𑀢𑀺.

𑀢𑀲𑁆𑀲𑀸𑀦𑀼𑀕𑀻𑀢𑀺

𑀧𑀞𑀫𑁄 𑀦𑀦𑁆𑀤𑀺𑀬𑀸𑀯𑀝𑁆𑀝𑁄, 𑀤𑀼𑀢𑀺𑀬𑁄 𑀘 𑀢𑀺𑀧𑀼𑀓𑁆𑀔𑀮𑁄;

𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑁄 𑀦𑀸𑀫, 𑀢𑀢𑀺𑀬𑁄 𑀦𑀬𑀮𑀜𑁆𑀚𑀓𑁄 [𑀦𑀬𑀮𑀜𑁆𑀙𑀓𑁄 (𑀲𑀻.)].

𑀤𑀺𑀲𑀸𑀮𑁄𑀘𑀦𑀫𑀸𑀳𑀁𑀲𑀼, 𑀘𑀢𑀼𑀢𑁆𑀣𑀁 𑀦𑀬𑀫𑀼𑀢𑁆𑀢𑀫𑀁;

𑀧𑀜𑁆𑀘𑀫𑁄 𑀅𑀗𑁆𑀓𑀼𑀲𑁄 𑀦𑀸𑀫, 𑀲𑀩𑁆𑀩𑁂 𑀧𑀜𑁆𑀘 𑀦𑀬𑀸 𑀕𑀢𑀸𑀢𑀺.

𑁩. 𑀢𑀢𑁆𑀣 𑀓𑀢𑀫𑀸𑀦𑀺 𑀅𑀝𑁆𑀞𑀸𑀭𑀲 𑀫𑀽𑀮𑀧𑀤𑀸𑀦𑀺? 𑀦𑀯 𑀧𑀤𑀸𑀦𑀺 𑀓𑀼𑀲𑀮𑀸𑀦𑀺 𑀦𑀯 𑀧𑀤𑀸𑀦𑀺 𑀅𑀓𑀼𑀲𑀮𑀸𑀦𑀺. 𑀢𑀢𑁆𑀣 𑀓𑀢𑀫𑀸𑀦𑀺 𑀦𑀯 𑀧𑀤𑀸𑀦𑀺 𑀅𑀓𑀼𑀲𑀮𑀸𑀦𑀺, 𑀢𑀡𑁆𑀳𑀸 𑀅𑀯𑀺𑀚𑁆𑀚𑀸 𑀮𑁄𑀪𑁄 𑀤𑁄𑀲𑁄 𑀫𑁄𑀳𑁄 𑀲𑀼𑀪𑀲𑀜𑁆𑀜𑀸 𑀲𑀼𑀔𑀲𑀜𑁆𑀜𑀸 𑀦𑀺𑀘𑁆𑀘𑀲𑀜𑁆𑀜𑀸 𑀅𑀢𑁆𑀢𑀲𑀜𑁆𑀜𑀸𑀢𑀺, 𑀇𑀫𑀸𑀦𑀺 𑀦𑀯 𑀧𑀤𑀸𑀦𑀺 𑀅𑀓𑀼𑀲𑀮𑀸𑀦𑀺, 𑀬𑀢𑁆𑀣 𑀲𑀩𑁆𑀩𑁄 𑀅𑀓𑀼𑀲𑀮𑀧𑀓𑁆𑀔𑁄 𑀲𑀗𑁆𑀕𑀳𑀁 𑀲𑀫𑁄𑀲𑀭𑀡𑀁 𑀕𑀘𑁆𑀙𑀢𑀺.

𑀢𑀢𑁆𑀣 𑀓𑀢𑀫𑀸𑀦𑀺 𑀦𑀯 𑀧𑀤𑀸𑀦𑀺 𑀓𑀼𑀲𑀮𑀸𑀦𑀺? 𑀲𑀫𑀣𑁄 𑀯𑀺𑀧𑀲𑁆𑀲𑀦𑀸 𑀅𑀮𑁄𑀪𑁄 𑀅𑀤𑁄𑀲𑁄 𑀅𑀫𑁄𑀳𑁄 𑀅𑀲𑀼𑀪𑀲𑀜𑁆𑀜𑀸 𑀤𑀼𑀓𑁆𑀔𑀲𑀜𑁆𑀜𑀸 𑀅𑀦𑀺𑀘𑁆𑀘𑀲𑀜𑁆𑀜𑀸 𑀅𑀦𑀢𑁆𑀢𑀲𑀜𑁆𑀜𑀸𑀢𑀺, 𑀇𑀫𑀸𑀦𑀺 𑀦𑀯 𑀧𑀤𑀸𑀦𑀺 𑀓𑀼𑀲𑀮𑀸𑀦𑀺, 𑀬𑀢𑁆𑀣 𑀲𑀩𑁆𑀩𑁄 𑀓𑀼𑀲𑀮𑀧𑀓𑁆𑀔𑁄 𑀲𑀗𑁆𑀕𑀳𑀁 𑀲𑀫𑁄𑀲𑀭𑀡𑀁 𑀕𑀘𑁆𑀙𑀢𑀺.

𑀢𑀢𑁆𑀭𑀺𑀤𑀁 𑀉𑀤𑁆𑀤𑀸𑀦𑀁

𑀢𑀡𑁆𑀳𑀸 𑀘 𑀅𑀯𑀺𑀚𑁆𑀚𑀸𑀧𑀺 𑀘, 𑀮𑁄𑀪𑁄 𑀤𑁄𑀲𑁄 𑀢𑀣𑁂𑀯 𑀫𑁄𑀳𑁄 𑀘;

𑀘𑀢𑀼𑀭𑁄 𑀘 𑀯𑀺𑀧𑀮𑁆𑀮𑀸𑀲𑀸, 𑀓𑀺𑀮𑁂𑀲𑀪𑀽𑀫𑀻 𑀦𑀯 𑀧𑀤𑀸𑀦𑀺.

𑀲𑀫𑀣𑁄 𑀘 𑀯𑀺𑀧𑀲𑁆𑀲𑀦𑀸 𑀘, 𑀓𑀼𑀲𑀮𑀸𑀦𑀺 𑀘 𑀬𑀸𑀦𑀺 𑀢𑀻𑀡𑀺 𑀫𑀽𑀮𑀸𑀦𑀺;

𑀘𑀢𑀼𑀭𑁄 𑀲𑀢𑀺𑀧𑀝𑁆𑀞𑀸𑀦𑀸, 𑀇𑀦𑁆𑀤𑁆𑀭𑀺𑀬𑀪𑀽𑀫𑀻 𑀦𑀯 𑀧𑀤𑀸𑀦𑀺.

𑀦𑀯𑀳𑀺 𑀘 𑀧𑀤𑁂𑀳𑀺 𑀓𑀼𑀲𑀮𑀸, 𑀦𑀯𑀳𑀺 𑀘 𑀬𑀼𑀚𑁆𑀚𑀦𑁆𑀢𑀺 𑀅𑀓𑀼𑀲𑀮𑀧𑀓𑁆𑀔𑀸;

𑀏𑀢𑁂 𑀔𑁄 𑀫𑀽𑀮𑀧𑀤𑀸, 𑀪𑀯𑀦𑁆𑀢𑀺 𑀅𑀝𑁆𑀞𑀸𑀭𑀲 𑀧𑀤𑀸𑀦𑀻𑀢𑀺.

𑀉𑀤𑁆𑀤𑁂𑀲𑀯𑀸𑀭𑁄.

𑁩. 𑀦𑀺𑀤𑁆𑀤𑁂𑀲𑀯𑀸𑀭𑁄

𑁪. 𑀢𑀢𑁆𑀣 𑀲𑀗𑁆𑀔𑁂𑀧𑀢𑁄 𑀦𑁂𑀢𑁆𑀢𑀺 𑀓𑀺𑀢𑁆𑀢𑀺𑀢𑀸.

𑀳𑀸𑀭𑀲𑀗𑁆𑀔𑁂𑀧𑁄

𑁧. 𑀅𑀲𑁆𑀲𑀸𑀤𑀸𑀤𑀻𑀦𑀯𑀢𑀸, 𑀦𑀺𑀲𑁆𑀲𑀭𑀡𑀫𑁆𑀧𑀺 𑀘 𑀨𑀮𑀁 𑀉𑀧𑀸𑀬𑁄 𑀘;

𑀆𑀡𑀢𑁆𑀢𑀻 𑀘 𑀪𑀕𑀯𑀢𑁄, 𑀬𑁄𑀕𑀻𑀦𑀁 𑀤𑁂𑀲𑀦𑀸𑀳𑀸𑀭𑁄.

𑁨. 𑀬𑀁 𑀧𑀼𑀘𑁆𑀙𑀺𑀢𑀜𑁆𑀘 𑀯𑀺𑀲𑁆𑀲𑀚𑁆𑀚𑀺𑀢𑀜𑁆𑀘, 𑀲𑀼𑀢𑁆𑀢𑀲𑁆𑀲 𑀬𑀸 𑀘 𑀅𑀦𑀼𑀕𑀻𑀢𑀺;

𑀲𑀼𑀢𑁆𑀢𑀲𑁆𑀲 𑀬𑁄 𑀧𑀯𑀺𑀘𑀬𑁄, 𑀳𑀸𑀭𑁄 𑀯𑀺𑀘𑀬𑁄𑀢𑀺 𑀦𑀺𑀤𑁆𑀤𑀺𑀝𑁆𑀞𑁄.

𑁩. 𑀲𑀩𑁆𑀩𑁂𑀲𑀁 𑀳𑀸𑀭𑀸𑀦𑀁, 𑀬𑀸 𑀪𑀽𑀫𑀻 𑀬𑁄 𑀘 𑀕𑁄𑀘𑀭𑁄 𑀢𑁂𑀲𑀁;

𑀬𑀼𑀢𑁆𑀢𑀸𑀬𑀼𑀢𑁆𑀢𑀧𑀭𑀺𑀓𑁆𑀔𑀸, 𑀳𑀸𑀭𑁄 𑀬𑀼𑀢𑁆𑀢𑀻𑀢𑀺 𑀦𑀺𑀤𑁆𑀤𑀺𑀝𑁆𑀞𑁄.

𑁪. 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀚𑀺𑀦𑁄, 𑀢𑀲𑁆𑀲 𑀘 𑀥𑀫𑁆𑀫𑀲𑁆𑀲 𑀬𑀁 𑀧𑀤𑀝𑁆𑀞𑀸𑀦𑀁;

𑀇𑀢𑀺 𑀬𑀸𑀯 𑀲𑀩𑁆𑀩𑀥𑀫𑁆𑀫𑀸, 𑀏𑀲𑁄 𑀳𑀸𑀭𑁄 𑀧𑀤𑀝𑁆𑀞𑀸𑀦𑁄.

𑁫. 𑀯𑀼𑀢𑁆𑀢𑀫𑁆𑀳𑀺 𑀏𑀓𑀥𑀫𑁆𑀫𑁂, 𑀬𑁂 𑀥𑀫𑁆𑀫𑀸 𑀏𑀓𑀮𑀓𑁆𑀔𑀡𑀸 𑀓𑁂𑀘𑀺;

𑀯𑀼𑀢𑁆𑀢𑀸 𑀪𑀯𑀦𑁆𑀢𑀺 𑀲𑀩𑁆𑀩𑁂, 𑀲𑁄 𑀳𑀸𑀭𑁄 𑀮𑀓𑁆𑀔𑀡𑁄 𑀦𑀸𑀫.

𑁬. 𑀦𑁂𑀭𑀼𑀢𑁆𑀢𑀫𑀥𑀺𑀧𑁆𑀧𑀸𑀬𑁄, 𑀩𑁆𑀬𑀜𑁆𑀚𑀦𑀫𑀣 𑀤𑁂𑀲𑀦𑀸𑀦𑀺𑀤𑀸𑀦𑀜𑁆𑀘;

𑀧𑀼𑀩𑁆𑀩𑀸𑀧𑀭𑀸𑀦𑀼𑀲𑀦𑁆𑀥𑀻, 𑀏𑀲𑁄 𑀳𑀸𑀭𑁄 𑀘𑀢𑀼𑀩𑁆𑀬𑀽𑀳𑁄.

𑁭. 𑀏𑀓𑀫𑁆𑀳𑀺 𑀧𑀤𑀝𑁆𑀞𑀸𑀦𑁂, 𑀧𑀭𑀺𑀬𑁂𑀲𑀢𑀺 𑀲𑁂𑀲𑀓𑀁 𑀧𑀤𑀝𑁆𑀞𑀸𑀦𑀁;

𑀆𑀯𑀝𑁆𑀝𑀢𑀺 𑀧𑀝𑀺𑀧𑀓𑁆𑀔𑁂, 𑀆𑀯𑀝𑁆𑀝𑁄 𑀦𑀸𑀫 𑀲𑁄 𑀳𑀸𑀭𑁄.

𑁮. 𑀥𑀫𑁆𑀫𑀜𑁆𑀘 𑀧𑀤𑀝𑁆𑀞𑀸𑀦𑀁, 𑀪𑀽𑀫𑀺𑀜𑁆𑀘 𑀯𑀺𑀪𑀚𑁆𑀚𑀢𑁂 𑀅𑀬𑀁 𑀳𑀸𑀭𑁄;

𑀲𑀸𑀥𑀸𑀭𑀡𑁂 𑀅𑀲𑀸𑀥𑀸𑀭𑀡𑁂 𑀘 𑀦𑁂𑀬𑁆𑀬𑁄 𑀯𑀺𑀪𑀢𑁆𑀢𑀻𑀢𑀺.

𑁯. 𑀓𑀼𑀲𑀮𑀸𑀓𑀼𑀲𑀮𑁂 𑀥𑀫𑁆𑀫𑁂, 𑀦𑀺𑀤𑁆𑀤𑀺𑀝𑁆𑀞𑁂 𑀪𑀸𑀯𑀺𑀢𑁂 𑀧𑀳𑀻𑀦𑁂 𑀘;

𑀧𑀭𑀺𑀯𑀢𑁆𑀢𑀢𑀺 𑀧𑀝𑀺𑀧𑀓𑁆𑀔𑁂, 𑀳𑀸𑀭𑁄 𑀧𑀭𑀺𑀯𑀢𑁆𑀢𑀦𑁄 𑀦𑀸𑀫.

𑁧𑁦. 𑀯𑁂𑀯𑀘𑀦𑀸𑀦𑀺 𑀩𑀳𑀽𑀦𑀺 𑀢𑀼, 𑀲𑀼𑀢𑁆𑀢𑁂 𑀯𑀼𑀢𑁆𑀢𑀸𑀦𑀺 𑀏𑀓𑀥𑀫𑁆𑀫𑀲𑁆𑀲;

𑀬𑁄 𑀚𑀸𑀦𑀸𑀢𑀺 𑀲𑀼𑀢𑁆𑀢𑀯𑀺𑀤𑀽, 𑀯𑁂𑀯𑀘𑀦𑁄 𑀦𑀸𑀫 𑀲𑁄 𑀳𑀸𑀭𑁄.

𑁧𑁧. 𑀏𑀓𑀁 𑀪𑀕𑀯𑀸 𑀥𑀫𑁆𑀫𑀁, 𑀧𑀜𑁆𑀜𑀢𑁆𑀢𑀻𑀳𑀺 𑀯𑀺𑀯𑀺𑀥𑀸𑀳𑀺 𑀤𑁂𑀲𑁂𑀢𑀺;

𑀲𑁄 𑀆𑀓𑀸𑀭𑁄 𑀜𑁂𑀬𑁆𑀬𑁄, 𑀧𑀜𑁆𑀜𑀢𑁆𑀢𑀻 𑀦𑀸𑀫 𑀳𑀸𑀭𑁄𑀢𑀺.

𑁧𑁨. 𑀬𑁄 𑀘 𑀧𑀝𑀺𑀘𑁆𑀘𑀼𑀧𑁆𑀧𑀸𑀤𑁄, 𑀇𑀦𑁆𑀤𑁆𑀭𑀺𑀬𑀔𑀦𑁆𑀥𑀸 𑀘 𑀥𑀸𑀢𑀼 𑀆𑀬𑀢𑀦𑀸;

𑀏𑀢𑁂𑀳𑀺 𑀑𑀢𑀭𑀢𑀺 𑀬𑁄, 𑀑𑀢𑀭𑀡𑁄 𑀦𑀸𑀫 𑀲𑁄 𑀳𑀸𑀭𑁄.

𑁧𑁩. 𑀯𑀺𑀲𑁆𑀲𑀚𑁆𑀚𑀺𑀢𑀫𑁆𑀳𑀺 𑀧𑀜𑁆𑀳𑁂, 𑀕𑀸𑀣𑀸𑀬𑀁 𑀧𑀼𑀘𑁆𑀙𑀺𑀢𑀸𑀬𑀫𑀸𑀭𑀩𑁆𑀪;

𑀲𑀼𑀤𑁆𑀥𑀸𑀲𑀼𑀤𑁆𑀥𑀧𑀭𑀺𑀓𑁆𑀔𑀸, 𑀳𑀸𑀭𑁄 𑀲𑁄 𑀲𑁄𑀥𑀦𑁄 𑀦𑀸𑀫.

𑁧𑁪. 𑀏𑀓𑀢𑁆𑀢𑀢𑀸𑀬 𑀥𑀫𑁆𑀫𑀸, 𑀬𑁂𑀧𑀺 𑀘 𑀯𑁂𑀫𑀢𑁆𑀢𑀢𑀸𑀬 𑀦𑀺𑀤𑁆𑀤𑀺𑀝𑁆𑀞𑀸;

𑀢𑁂𑀦 𑀯𑀺𑀓𑀧𑁆𑀧𑀬𑀺𑀢𑀩𑁆𑀩𑀸, 𑀏𑀲𑁄 𑀳𑀸𑀭𑁄 𑀅𑀥𑀺𑀝𑁆𑀞𑀸𑀦𑁄.

𑁧𑁫. 𑀬𑁂 𑀥𑀫𑁆𑀫𑀸 𑀬𑀁 𑀥𑀫𑁆𑀫𑀁, 𑀚𑀦𑀬𑀦𑁆𑀢𑀺𑀧𑁆𑀧𑀘𑁆𑀘𑀬𑀸 𑀧𑀭𑀫𑁆𑀧𑀭𑀢𑁄;

𑀳𑁂𑀢𑀼𑀫𑀯𑀓𑀟𑁆𑀠𑀬𑀺𑀢𑁆𑀯𑀸, 𑀏𑀲𑁄 𑀳𑀸𑀭𑁄 𑀧𑀭𑀺𑀓𑁆𑀔𑀸𑀭𑁄.

𑁧𑁬. 𑀬𑁂 𑀥𑀫𑁆𑀫𑀸 𑀬𑀁 𑀫𑀽𑀮𑀸, 𑀬𑁂 𑀘𑁂𑀓𑀢𑁆𑀣𑀸 𑀧𑀓𑀸𑀲𑀺𑀢𑀸 𑀫𑀼𑀦𑀺𑀦𑀸;

𑀢𑁂 𑀲𑀫𑀭𑁄𑀧𑀬𑀺𑀢𑀩𑁆𑀩𑀸, 𑀏𑀲 𑀲𑀫𑀸𑀭𑁄𑀧𑀦𑁄 𑀳𑀸𑀭𑁄.

𑀦𑀬𑀲𑀗𑁆𑀔𑁂𑀧𑁄

𑁧𑁭. 𑀢𑀡𑁆𑀳𑀜𑁆𑀘 𑀅𑀯𑀺𑀚𑁆𑀚𑀫𑁆𑀧𑀺 𑀘, 𑀲𑀫𑀣𑁂𑀦 𑀯𑀺𑀧𑀲𑁆𑀲𑀦𑀸 𑀬𑁄 𑀦𑁂𑀢𑀺;

𑀲𑀘𑁆𑀘𑁂𑀳𑀺 𑀬𑁄𑀚𑀬𑀺𑀢𑁆𑀯𑀸, 𑀅𑀬𑀁 𑀦𑀬𑁄 𑀦𑀦𑁆𑀤𑀺𑀬𑀸𑀯𑀝𑁆𑀝𑁄.

𑁧𑁮. 𑀬𑁄 𑀅𑀓𑀼𑀲𑀮𑁂 𑀲𑀫𑀽𑀮𑁂𑀳𑀺, 𑀦𑁂𑀢𑀺 𑀓𑀼𑀲𑀮𑁂 𑀘 𑀓𑀼𑀲𑀮𑀫𑀽𑀮𑁂𑀳𑀺;

𑀪𑀽𑀢𑀁 𑀢𑀣𑀁 𑀅𑀯𑀺𑀢𑀣𑀁, 𑀢𑀺𑀧𑀼𑀓𑁆𑀔𑀮𑀁 𑀢𑀁 𑀦𑀬𑀁 𑀆𑀳𑀼.

𑁧𑁯. 𑀬𑁄 𑀦𑁂𑀢𑀺 𑀯𑀺𑀧𑀮𑁆𑀮𑀸𑀲𑁂𑀳𑀺, 𑀓𑀺𑀮𑁂𑀲𑁂 𑀇𑀦𑁆𑀤𑁆𑀭𑀺𑀬𑁂𑀳𑀺 𑀲𑀤𑁆𑀥𑀫𑁆𑀫𑁂;

𑀏𑀢𑀁 𑀦𑀬𑀁 𑀦𑀬𑀯𑀺𑀤𑀽, 𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑀁 𑀆𑀳𑀼.

𑁨𑁦. 𑀯𑁂𑀬𑁆𑀬𑀸𑀓𑀭𑀡𑁂𑀲𑀼 𑀳𑀺 𑀬𑁂, 𑀓𑀼𑀲𑀮𑀸𑀓𑀼𑀲𑀮𑀸 𑀢𑀳𑀺𑀁 𑀢𑀳𑀺𑀁 𑀯𑀼𑀢𑁆𑀢𑀸;

𑀫𑀦𑀲𑀸 𑀯𑁄𑀮𑁄𑀓𑀬𑀢𑁂, 𑀢𑀁 𑀔𑀼 𑀤𑀺𑀲𑀸𑀮𑁄𑀘𑀦𑀁 𑀆𑀳𑀼.

𑁨𑁧. 𑀑𑀮𑁄𑀓𑁂𑀢𑁆𑀯𑀸 𑀤𑀺𑀲𑀮𑁄𑀘𑀦𑁂𑀦, 𑀉𑀓𑁆𑀔𑀺𑀧𑀺𑀬 𑀬𑀁 𑀲𑀫𑀸𑀦𑁂𑀢𑀺;

𑀲𑀩𑁆𑀩𑁂 𑀓𑀼𑀲𑀮𑀸𑀓𑀼𑀲𑀮𑁂, 𑀅𑀬𑀁 𑀦𑀬𑁄 𑀅𑀗𑁆𑀓𑀼𑀲𑁄 𑀦𑀸𑀫.

𑁨𑁨. 𑀲𑁄𑀴𑀲 𑀳𑀸𑀭𑀸 𑀧𑀞𑀫𑀁, 𑀤𑀺𑀲𑀮𑁄𑀘𑀦𑀢𑁄 [𑀤𑀺𑀲𑀮𑁄𑀘𑀦𑁂𑀦 (𑀓.)] 𑀤𑀺𑀲𑀸 𑀯𑀺𑀮𑁄𑀓𑁂𑀢𑁆𑀯𑀸;

𑀲𑀗𑁆𑀔𑀺𑀧𑀺𑀬 𑀅𑀗𑁆𑀓𑀼𑀲𑁂𑀦 𑀳𑀺, 𑀦𑀬𑁂𑀳𑀺 𑀢𑀻𑀳𑀺 𑀦𑀺𑀤𑁆𑀤𑀺𑀲𑁂 𑀲𑀼𑀢𑁆𑀢𑀁.

𑀤𑁆𑀯𑀸𑀤𑀲𑀧𑀤

𑁨𑁩. 𑀅𑀓𑁆𑀔𑀭𑀁 𑀧𑀤𑀁 𑀩𑁆𑀬𑀜𑁆𑀚𑀦𑀁, 𑀦𑀺𑀭𑀼𑀢𑁆𑀢𑀺 𑀢𑀣𑁂𑀯 𑀦𑀺𑀤𑁆𑀤𑁂𑀲𑁄;

𑀆𑀓𑀸𑀭𑀙𑀝𑁆𑀞𑀯𑀘𑀦𑀁, 𑀏𑀢𑁆𑀢𑀸𑀯 𑀩𑁆𑀬𑀜𑁆𑀚𑀦𑀁 𑀲𑀩𑁆𑀩𑀁.

𑁨𑁪. 𑀲𑀗𑁆𑀓𑀸𑀲𑀦𑀸 𑀧𑀓𑀸𑀲𑀦𑀸, 𑀯𑀺𑀯𑀭𑀡𑀸 𑀯𑀺𑀪𑀚𑀦𑀼𑀢𑁆𑀢𑀸𑀦𑀻𑀓𑀫𑁆𑀫𑀧𑀜𑁆𑀜𑀢𑁆𑀢𑀺;

𑀏𑀢𑁂𑀳𑀺 𑀙𑀳𑀺 𑀧𑀤𑁂𑀳𑀺, 𑀅𑀢𑁆𑀣𑁄 𑀓𑀫𑁆𑀫𑀜𑁆𑀘 𑀦𑀺𑀤𑁆𑀤𑀺𑀝𑁆𑀞𑀁.

𑁨𑁫. 𑀢𑀻𑀡𑀺 𑀘 𑀦𑀬𑀸 𑀅𑀦𑀽𑀦𑀸, 𑀅𑀢𑁆𑀣𑀲𑁆𑀲 𑀘 𑀙𑀧𑁆𑀧𑀤𑀸𑀦𑀺 𑀕𑀡𑀺𑀢𑀸𑀦𑀺;

𑀦𑀯𑀳𑀺 𑀧𑀤𑁂𑀳𑀺 𑀪𑀕𑀯𑀢𑁄, 𑀯𑀘𑀦𑀲𑁆𑀲𑀢𑁆𑀣𑁄 𑀲𑀫𑀸𑀬𑀼𑀢𑁆𑀢𑁄.

𑁨𑁬. 𑀅𑀢𑁆𑀣𑀲𑁆𑀲 𑀦𑀯𑀧𑁆𑀧𑀤𑀸𑀦𑀺, 𑀩𑁆𑀬𑀜𑁆𑀚𑀦𑀧𑀭𑀺𑀬𑁂𑀝𑁆𑀞𑀺𑀬𑀸 𑀘𑀢𑀼𑀩𑁆𑀩𑀻𑀲;

𑀉𑀪𑀬𑀁 𑀲𑀗𑁆𑀓𑀮𑀬𑀺𑀢𑁆𑀯𑀸 [𑀲𑀗𑁆𑀔𑁂𑀧𑀬𑀢𑁄 (𑀓.)], 𑀢𑁂𑀢𑁆𑀢𑀺𑀁𑀲𑀸 𑀏𑀢𑁆𑀢𑀺𑀓𑀸 𑀦𑁂𑀢𑁆𑀢𑀻𑀢𑀺.

𑀦𑀺𑀤𑁆𑀤𑁂𑀲𑀯𑀸𑀭𑁄.

𑁪. 𑀧𑀝𑀺𑀦𑀺𑀤𑁆𑀤𑁂𑀲𑀯𑀸𑀭𑁄

𑁧. 𑀤𑁂𑀲𑀦𑀸𑀳𑀸𑀭𑀯𑀺𑀪𑀗𑁆𑀕𑁄

𑁫. 𑀢𑀢𑁆𑀣 𑀓𑀢𑀫𑁄 𑀤𑁂𑀲𑀦𑀸𑀳𑀸𑀭𑁄? ‘‘𑀅𑀲𑁆𑀲𑀸𑀤𑀸𑀤𑀻𑀦𑀯𑀢𑀸’’𑀢𑀺 𑀕𑀸𑀣𑀸 𑀅𑀬𑀁 𑀤𑁂𑀲𑀦𑀸𑀳𑀸𑀭𑁄. 𑀓𑀺𑀁 𑀤𑁂𑀲𑀬𑀢𑀺? 𑀅𑀲𑁆𑀲𑀸𑀤𑀁 𑀆𑀤𑀻𑀦𑀯𑀁 𑀦𑀺𑀲𑁆𑀲𑀭𑀡𑀁 𑀨𑀮𑀁 𑀉𑀧𑀸𑀬𑀁 𑀆𑀡𑀢𑁆𑀢𑀺𑀁. 𑀥𑀫𑁆𑀫𑀁 𑀯𑁄, 𑀪𑀺𑀓𑁆𑀔𑀯𑁂, 𑀤𑁂𑀲𑁂𑀲𑁆𑀲𑀸𑀫𑀺 𑀆𑀤𑀺𑀓𑀮𑁆𑀬𑀸𑀡𑀁 𑀫𑀚𑁆𑀛𑁂𑀓𑀮𑁆𑀬𑀸𑀡𑀁 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀲𑁆𑀲𑀸𑀫𑀻𑀢𑀺.

𑀢𑀢𑁆𑀣 𑀓𑀢𑀫𑁄 𑀅𑀲𑁆𑀲𑀸𑀤𑁄?

‘‘𑀓𑀸𑀫𑀁 [𑀓𑀸𑀫𑀫𑀸𑀤𑀺𑀓𑀸 𑀇𑀫𑀸 𑀙 𑀕𑀸𑀣𑀸 𑀲𑀼. 𑀦𑀺. 𑁭𑁭𑁨 𑀧𑀲𑁆𑀲𑀺𑀢𑀩𑁆𑀩𑀸] 𑀓𑀸𑀫𑀬𑀫𑀸𑀦𑀲𑁆𑀲, 𑀢𑀲𑁆𑀲 𑀘𑁂𑀢𑀁 𑀲𑀫𑀺𑀚𑁆𑀛𑀢𑀺;

𑀅𑀤𑁆𑀥𑀸 𑀧𑀻𑀢𑀺𑀫𑀦𑁄 𑀳𑁄𑀢𑀺, 𑀮𑀤𑁆𑀥𑀸 𑀫𑀘𑁆𑀘𑁄 𑀬𑀤𑀺𑀘𑁆𑀙𑀢𑀻’’𑀢𑀺.

𑀅𑀬𑀁 𑀅𑀲𑁆𑀲𑀸𑀤𑁄.

𑀢𑀢𑁆𑀣 𑀓𑀢𑀫𑁄 𑀆𑀤𑀻𑀦𑀯𑁄?

‘‘𑀢𑀲𑁆𑀲 𑀘𑁂 𑀓𑀸𑀫𑀬𑀸𑀦𑀲𑁆𑀲, 𑀙𑀦𑁆𑀤𑀚𑀸𑀢𑀲𑁆𑀲 𑀚𑀦𑁆𑀢𑀼𑀦𑁄;

𑀢𑁂 𑀓𑀸𑀫𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀲𑀮𑁆𑀮𑀯𑀺𑀤𑁆𑀥𑁄𑀯 𑀭𑀼𑀧𑁆𑀧𑀢𑀻’’𑀢𑀺.

𑀅𑀬𑀁 𑀆𑀤𑀻𑀦𑀯𑁄.

𑀢𑀢𑁆𑀣 𑀓𑀢𑀫𑀁 𑀦𑀺𑀲𑁆𑀲𑀭𑀡𑀁?

‘‘𑀬𑁄 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀢𑀺, 𑀲𑀧𑁆𑀧𑀲𑁆𑀲𑁂𑀯 𑀧𑀤𑀸 𑀲𑀺𑀭𑁄;

𑀲𑁄𑀫𑀁 𑀯𑀺𑀲𑀢𑁆𑀢𑀺𑀓𑀁 𑀮𑁄𑀓𑁂, 𑀲𑀢𑁄 𑀲𑀫𑀢𑀺𑀯𑀢𑁆𑀢𑀢𑀻’’𑀢𑀺.

𑀇𑀤𑀁 𑀦𑀺𑀲𑁆𑀲𑀭𑀡𑀁.

𑀢𑀢𑁆𑀣 𑀓𑀢𑀫𑁄 𑀅𑀲𑁆𑀲𑀸𑀤𑁄?

‘‘𑀔𑁂𑀢𑁆𑀢𑀁 𑀯𑀢𑁆𑀣𑀼𑀁 𑀳𑀺𑀭𑀜𑁆𑀜𑀁 𑀯𑀸, 𑀕𑀯𑀸𑀲𑁆𑀲𑀁 𑀤𑀸𑀲𑀧𑁄𑀭𑀺𑀲𑀁;

𑀣𑀺𑀬𑁄 𑀩𑀦𑁆𑀥𑀽 𑀧𑀼𑀣𑀽 𑀓𑀸𑀫𑁂, 𑀬𑁄 𑀦𑀭𑁄 𑀅𑀦𑀼𑀕𑀺𑀚𑁆𑀛𑀢𑀻’’𑀢𑀺.

𑀅𑀬𑀁 𑀅𑀲𑁆𑀲𑀸𑀤𑁄.

𑀢𑀢𑁆𑀣 𑀓𑀢𑀫𑁄 𑀆𑀤𑀻𑀦𑀯𑁄?

‘‘𑀅𑀩𑀮𑀸 𑀦𑀁 𑀩𑀮𑀻𑀬𑀦𑁆𑀢𑀺, 𑀫𑀤𑁆𑀤𑀦𑁆𑀢𑁂 𑀦𑀁 𑀧𑀭𑀺𑀲𑁆𑀲𑀬𑀸;

𑀢𑀢𑁄 𑀦𑀁 𑀤𑀼𑀓𑁆𑀔𑀫𑀦𑁆𑀯𑁂𑀢𑀺, 𑀦𑀸𑀯𑀁 𑀪𑀺𑀦𑁆𑀦𑀫𑀺𑀯𑁄𑀤𑀓’’𑀦𑁆𑀢𑀺.

𑀅𑀬𑀁 𑀆𑀤𑀻𑀦𑀯𑁄.

𑀢𑀢𑁆𑀣 𑀓𑀢𑀫𑀁 𑀦𑀺𑀲𑁆𑀲𑀭𑀡𑀁?

‘‘𑀢𑀲𑁆𑀫𑀸 𑀚𑀦𑁆𑀢𑀼 𑀲𑀤𑀸 𑀲𑀢𑁄, 𑀓𑀸𑀫𑀸𑀦𑀺 𑀧𑀭𑀺𑀯𑀚𑁆𑀚𑀬𑁂;

𑀢𑁂 𑀧𑀳𑀸𑀬 𑀢𑀭𑁂 𑀑𑀖𑀁, 𑀦𑀸𑀯𑀁 𑀲𑀺𑀢𑁆𑀯𑀸𑀯 𑀧𑀸𑀭𑀕𑀽’’𑀢𑀺.

𑀇𑀤𑀁 𑀦𑀺𑀲𑁆𑀲𑀭𑀡𑀁.

𑀢𑀢𑁆𑀣 𑀓𑀢𑀫𑀁 𑀨𑀮𑀁?

‘‘𑀥𑀫𑁆𑀫𑁄 𑀳𑀯𑁂 𑀭𑀓𑁆𑀔𑀢𑀺 𑀥𑀫𑁆𑀫𑀘𑀸𑀭𑀺𑀁, 𑀙𑀢𑁆𑀢𑀁 𑀫𑀳𑀦𑁆𑀢𑀁 𑀬𑀣 𑀯𑀲𑁆𑀲𑀓𑀸𑀮𑁂;

𑀏𑀲𑀸𑀦𑀺𑀲𑀁𑀲𑁄 𑀥𑀫𑁆𑀫𑁂 𑀲𑀼𑀘𑀺𑀡𑁆𑀡𑁂, 𑀦 𑀤𑀼𑀕𑁆𑀕𑀢𑀺𑀁 𑀕𑀘𑁆𑀙𑀢𑀺 𑀥𑀫𑁆𑀫𑀘𑀸𑀭𑀻’’𑀢𑀺.

𑀇𑀤𑀁 𑀨𑀮𑀁.

𑀢𑀢𑁆𑀣 𑀓𑀢𑀫𑁄 𑀉𑀧𑀸𑀬𑁄?

‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺…𑀧𑁂…

‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 [𑀧𑀲𑁆𑀲 𑀥. 𑀧. 𑁨𑁭𑁭] 𑀤𑀼𑀓𑁆𑀔𑀸’’𑀢𑀺…𑀧𑁂…

‘‘𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸’’𑀢𑀺, 𑀬𑀤𑀸 𑀧𑀜𑁆𑀜𑀸𑀬 𑀧𑀲𑁆𑀲𑀢𑀺;

𑀅𑀣 𑀦𑀺𑀩𑁆𑀩𑀺𑀦𑁆𑀤𑀢𑀺 𑀤𑀼𑀓𑁆𑀔𑁂, 𑀏𑀲 𑀫𑀕𑁆𑀕𑁄 𑀯𑀺𑀲𑀼𑀤𑁆𑀥𑀺𑀬𑀸’’𑀢𑀺.

𑀅𑀬𑀁 𑀉𑀧𑀸𑀬𑁄.

𑀢𑀢𑁆𑀣 𑀓𑀢𑀫𑀸 𑀆𑀡𑀢𑁆𑀢𑀺?

‘‘𑀘𑀓𑁆𑀔𑀼𑀫𑀸 [𑀧𑀲𑁆𑀲 𑀉𑀤𑀸. 𑁪𑁩] 𑀯𑀺𑀲𑀫𑀸𑀦𑀻𑀯, 𑀯𑀺𑀚𑁆𑀚𑀫𑀸𑀦𑁂 𑀧𑀭𑀓𑁆𑀓𑀫𑁂;

𑀧𑀡𑁆𑀟𑀺𑀢𑁄 𑀚𑀻𑀯𑀮𑁄𑀓𑀲𑁆𑀫𑀺𑀁, 𑀧𑀸𑀧𑀸𑀦𑀺 𑀧𑀭𑀺𑀯𑀚𑁆𑀚𑀬𑁂’’𑀢𑀺.

𑀅𑀬𑀁 𑀆𑀡𑀢𑁆𑀢𑀺.

‘‘‘𑀲𑀼𑀜𑁆𑀜𑀢𑁄 𑀮𑁄𑀓𑀁 𑀅𑀯𑁂𑀓𑁆𑀔𑀲𑁆𑀲𑀼,

𑀫𑁄𑀖𑀭𑀸𑀚𑀸’𑀢𑀺 𑀆𑀡𑀢𑁆𑀢𑀺, ‘𑀲𑀤𑀸 𑀲𑀢𑁄’𑀢𑀺 𑀉𑀧𑀸𑀬𑁄;

‘𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺𑀁 𑀊𑀳𑀘𑁆𑀘 [𑀉𑀳𑀘𑁆𑀘 (𑀓.) 𑀧𑀲𑁆𑀲 𑀲𑀼. 𑀦𑀺. 𑁧𑁧𑁨𑁫], 𑀏𑀯𑀁 𑀫𑀘𑁆𑀘𑀼𑀢𑀭𑁄 𑀲𑀺𑀬𑀸’’’.

𑀇𑀤𑀁 𑀨𑀮𑀁.

𑁬. 𑀢𑀢𑁆𑀣 𑀪𑀕𑀯𑀸 𑀉𑀕𑁆𑀖𑀝𑀺𑀢𑀜𑁆𑀜𑀼𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀦𑀺𑀲𑁆𑀲𑀭𑀡𑀁 𑀤𑁂𑀲𑀬𑀢𑀺, 𑀯𑀺𑀧𑀜𑁆𑀘𑀺𑀢𑀜𑁆𑀜𑀼𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀤𑁂𑀲𑀬𑀢𑀺, 𑀦𑁂𑀬𑁆𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀤𑁂𑀲𑀬𑀢𑀺.

𑀢𑀢𑁆𑀣 𑀘𑀢𑀲𑁆𑀲𑁄 𑀧𑀝𑀺𑀧𑀤𑀸, 𑀘𑀢𑁆𑀢𑀸𑀭𑁄 𑀧𑀼𑀕𑁆𑀕𑀮𑀸. 𑀢𑀡𑁆𑀳𑀸𑀘𑀭𑀺𑀢𑁄 𑀫𑀦𑁆𑀤𑁄 𑀲𑀢𑀺𑀦𑁆𑀤𑁆𑀭𑀺𑀬𑁂𑀦 𑀤𑀼𑀓𑁆𑀔𑀸𑀬 𑀧𑀝𑀺𑀧𑀤𑀸𑀬 𑀤𑀦𑁆𑀥𑀸𑀪𑀺𑀜𑁆𑀜𑀸𑀬 𑀦𑀺𑀬𑁆𑀬𑀸𑀢𑀺 𑀲𑀢𑀺𑀧𑀝𑁆𑀞𑀸𑀦𑁂𑀳𑀺 𑀦𑀺𑀲𑁆𑀲𑀬𑁂𑀳𑀺. 𑀢𑀡𑁆𑀳𑀸𑀘𑀭𑀺𑀢𑁄 𑀉𑀤𑀢𑁆𑀢𑁄 [𑀉𑀤𑀢𑁆𑀣𑁄 (𑀲𑀻.) 𑀉 + 𑀆 + 𑀤𑀸 + 𑀢] 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑁂𑀦 𑀤𑀼𑀓𑁆𑀔𑀸𑀬 𑀧𑀝𑀺𑀧𑀤𑀸𑀬 𑀔𑀺𑀧𑁆𑀧𑀸𑀪𑀺𑀜𑁆𑀜𑀸𑀬 𑀦𑀺𑀬𑁆𑀬𑀸𑀢𑀺 𑀛𑀸𑀦𑁂𑀳𑀺 𑀦𑀺𑀲𑁆𑀲𑀬𑁂𑀳𑀺. 𑀤𑀺𑀝𑁆𑀞𑀺𑀘𑀭𑀺𑀢𑁄 𑀫𑀦𑁆𑀤𑁄 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑁂𑀦 𑀲𑀼𑀔𑀸𑀬 𑀧𑀝𑀺𑀧𑀤𑀸𑀬 𑀤𑀦𑁆𑀥𑀸𑀪𑀺𑀜𑁆𑀜𑀸𑀬 𑀦𑀺𑀬𑁆𑀬𑀸𑀢𑀺 𑀲𑀫𑁆𑀫𑀧𑁆𑀧𑀥𑀸𑀦𑁂𑀳𑀺 𑀦𑀺𑀲𑁆𑀲𑀬𑁂𑀳𑀺. 𑀤𑀺𑀝𑁆𑀞𑀺𑀘𑀭𑀺𑀢𑁄 𑀉𑀤𑀢𑁆𑀢𑁄 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑁂𑀦 𑀲𑀼𑀔𑀸𑀬 𑀧𑀝𑀺𑀧𑀤𑀸𑀬 𑀔𑀺𑀧𑁆𑀧𑀸𑀪𑀺𑀜𑁆𑀜𑀸𑀬 𑀦𑀺𑀬𑁆𑀬𑀸𑀢𑀺 𑀲𑀘𑁆𑀘𑁂𑀳𑀺 𑀦𑀺𑀲𑁆𑀲𑀬𑁂𑀳𑀺.

𑀉𑀪𑁄 𑀢𑀡𑁆𑀳𑀸𑀘𑀭𑀺𑀢𑀸 𑀲𑀫𑀣𑀧𑀼𑀩𑁆𑀩𑀗𑁆𑀕𑀫𑀸𑀬 𑀯𑀺𑀧𑀲𑁆𑀲𑀦𑀸 𑀦𑀺𑀬𑁆𑀬𑀦𑁆𑀢𑀺 𑀭𑀸𑀕𑀯𑀺𑀭𑀸𑀕𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸. 𑀉𑀪𑁄 𑀤𑀺𑀝𑁆𑀞𑀺𑀘𑀭𑀺𑀢𑀸 𑀯𑀺𑀧𑀲𑁆𑀲𑀦𑀸𑀧𑀼𑀩𑁆𑀩𑀗𑁆𑀕𑀫𑁂 𑀲𑀫𑀣𑁂𑀦 𑀦𑀺𑀬𑁆𑀬𑀦𑁆𑀢𑀺 𑀅𑀯𑀺𑀚𑁆𑀚𑀸𑀯𑀺𑀭𑀸𑀕𑀸𑀬 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀬𑀸.

𑀢𑀢𑁆𑀣 𑀬𑁂 𑀲𑀫𑀣𑀧𑀼𑀩𑁆𑀩𑀗𑁆𑀕𑀫𑀸𑀳𑀺 𑀧𑀝𑀺𑀧𑀤𑀸𑀳𑀺 𑀦𑀺𑀬𑁆𑀬𑀦𑁆𑀢𑀺, 𑀢𑁂 𑀦𑀦𑁆𑀤𑀺𑀬𑀸𑀯𑀝𑁆𑀝𑁂𑀦 𑀦𑀬𑁂𑀦 𑀳𑀸𑀢𑀩𑁆𑀩𑀸, 𑀬𑁂 𑀯𑀺𑀧𑀲𑁆𑀲𑀦𑀸𑀧𑀼𑀩𑁆𑀩𑀗𑁆𑀕𑀫𑀸𑀳𑀺 𑀧𑀝𑀺𑀧𑀤𑀸𑀳𑀺 𑀦𑀺𑀬𑁆𑀬𑀦𑁆𑀢𑀺, 𑀢𑁂 𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑁂𑀦 𑀦𑀬𑁂𑀦 𑀳𑀸𑀢𑀩𑁆𑀩𑀸.

𑁭. 𑀲𑁆𑀯𑀸𑀬𑀁 𑀳𑀸𑀭𑁄 𑀓𑀢𑁆𑀣 𑀲𑀫𑁆𑀪𑀯𑀢𑀺, 𑀬𑀲𑁆𑀲 𑀲𑀢𑁆𑀣𑀸 𑀯𑀸 𑀥𑀫𑁆𑀫𑀁 𑀤𑁂𑀲𑀬𑀢𑀺 𑀅𑀜𑁆𑀜𑀢𑀭𑁄 𑀯𑀸 𑀕𑀭𑀼𑀝𑁆𑀞𑀸𑀦𑀻𑀬𑁄 𑀲𑀩𑁆𑀭𑀳𑁆𑀫𑀘𑀸𑀭𑀻, 𑀲𑁄 𑀢𑀁 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀲𑀤𑁆𑀥𑀁 𑀧𑀝𑀺𑀮𑀪𑀢𑀺. 𑀢𑀢𑁆𑀣 𑀬𑀸 𑀯𑀻𑀫𑀁𑀲𑀸 𑀉𑀲𑁆𑀲𑀸𑀳𑀦𑀸 𑀢𑀼𑀮𑀦𑀸 𑀉𑀧𑀧𑀭𑀺𑀓𑁆𑀔𑀸, 𑀅𑀬𑀁 𑀲𑀼𑀢𑀫𑀬𑀻 𑀧𑀜𑁆𑀜𑀸. 𑀢𑀣𑀸 𑀲𑀼𑀢𑁂𑀦 𑀦𑀺𑀲𑁆𑀲𑀬𑁂𑀦 𑀬𑀸 𑀯𑀻𑀫𑀁𑀲𑀸 𑀢𑀼𑀮𑀦𑀸 𑀉𑀧𑀧𑀭𑀺𑀓𑁆𑀔𑀸 𑀫𑀦𑀲𑀸𑀦𑀼𑀧𑁂𑀓𑁆𑀔𑀡𑀸, 𑀅𑀬𑀁 𑀘𑀺𑀦𑁆𑀢𑀸𑀫𑀬𑀻 𑀧𑀜𑁆𑀜𑀸. 𑀇𑀫𑀸𑀳𑀺 𑀤𑁆𑀯𑀻𑀳𑀺 𑀧𑀜𑁆𑀜𑀸𑀳𑀺 𑀫𑀦𑀲𑀺𑀓𑀸𑀭𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀬𑀁 𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺 𑀤𑀲𑁆𑀲𑀦𑀪𑀽𑀫𑀺𑀬𑀁 𑀯𑀸 𑀪𑀸𑀯𑀦𑀸𑀪𑀽𑀫𑀺𑀬𑀁 𑀯𑀸, 𑀅𑀬𑀁 𑀪𑀸𑀯𑀦𑀸𑀫𑀬𑀻 𑀧𑀜𑁆𑀜𑀸.

𑁮. 𑀧𑀭𑀢𑁄𑀖𑁄𑀲𑀸 𑀲𑀼𑀢𑀫𑀬𑀻 𑀧𑀜𑁆𑀜𑀸. 𑀧𑀘𑁆𑀘𑀢𑁆𑀢𑀲𑀫𑀼𑀝𑁆𑀞𑀺𑀢𑀸 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀸 𑀘𑀺𑀦𑁆𑀢𑀸𑀫𑀬𑀻 𑀧𑀜𑁆𑀜𑀸. 𑀬𑀁 𑀧𑀭𑀢𑁄 𑀘 𑀖𑁄𑀲𑁂𑀦 𑀧𑀘𑁆𑀘𑀢𑁆𑀢𑀲𑀫𑀼𑀝𑁆𑀞𑀺𑀢𑁂𑀦 𑀘 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦 𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺, 𑀅𑀬𑀁 𑀪𑀸𑀯𑀦𑀸𑀫𑀬𑀻 𑀧𑀜𑁆𑀜𑀸. 𑀬𑀲𑁆𑀲 𑀇𑀫𑀸 𑀤𑁆𑀯𑁂 𑀧𑀜𑁆𑀜𑀸 𑀅𑀢𑁆𑀣𑀺 𑀲𑀼𑀢𑀫𑀬𑀻 𑀘𑀺𑀦𑁆𑀢𑀸𑀫𑀬𑀻 𑀘, 𑀅𑀬𑀁 𑀉𑀕𑁆𑀖𑀝𑀺𑀢𑀜𑁆𑀜𑀽. 𑀬𑀲𑁆𑀲 𑀲𑀼𑀢𑀫𑀬𑀻 𑀧𑀜𑁆𑀜𑀸 𑀅𑀢𑁆𑀣𑀺, 𑀘𑀺𑀦𑁆𑀢𑀸𑀫𑀬𑀻 𑀦𑀢𑁆𑀣𑀺, 𑀅𑀬𑀁 𑀯𑀺𑀧𑀜𑁆𑀘𑀺𑀢𑀜𑁆𑀜𑀽 [𑀯𑀺𑀧𑀘𑁆𑀘𑀺𑀢𑀜𑁆𑀜𑀽 (𑀲𑀻.)]. 𑀬𑀲𑁆𑀲 𑀦𑁂𑀯 𑀲𑀼𑀢𑀫𑀬𑀻 𑀧𑀜𑁆𑀜𑀸 𑀅𑀢𑁆𑀣𑀺 𑀦 𑀘𑀺𑀦𑁆𑀢𑀸𑀫𑀬𑀻, 𑀅𑀬𑀁 𑀦𑁂𑀬𑁆𑀬𑁄.

𑁯. 𑀲𑀸𑀬𑀁 𑀥𑀫𑁆𑀫𑀤𑁂𑀲𑀦𑀸 𑀓𑀺𑀁 𑀤𑁂𑀲𑀬𑀢𑀺? 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀤𑀼𑀓𑁆𑀔𑀁 𑀲𑀫𑀼𑀤𑀬𑀁 𑀦𑀺𑀭𑁄𑀥𑀁 𑀫𑀕𑁆𑀕𑀁. 𑀆𑀤𑀻𑀦𑀯𑁄 𑀘 𑀨𑀮𑀜𑁆𑀘 𑀤𑀼𑀓𑁆𑀔𑀁, 𑀅𑀲𑁆𑀲𑀸𑀤𑁄 𑀲𑀫𑀼𑀤𑀬𑁄, 𑀦𑀺𑀲𑁆𑀲𑀭𑀡𑀁 𑀦𑀺𑀭𑁄𑀥𑁄, 𑀉𑀧𑀸𑀬𑁄 𑀆𑀡𑀢𑁆𑀢𑀺 𑀘 𑀫𑀕𑁆𑀕𑁄. 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺. 𑀇𑀤𑀁 𑀥𑀫𑁆𑀫𑀘𑀓𑁆𑀓𑀁.