𑁩. 𑀬𑀼𑀢𑁆𑀢𑀺𑀳𑀸𑀭𑀯𑀺𑀪𑀗𑁆𑀕𑁄

𑁧𑁮. 𑀢𑀢𑁆𑀣 𑀓𑀢𑀫𑁄 𑀬𑀼𑀢𑁆𑀢𑀺𑀳𑀸𑀭𑁄? ‘‘𑀲𑀩𑁆𑀩𑁂𑀲𑀁 𑀳𑀸𑀭𑀸𑀦’’𑀦𑁆𑀢𑀺, 𑀅𑀬𑀁 𑀬𑀼𑀢𑁆𑀢𑀺𑀳𑀸𑀭𑁄. 𑀓𑀺𑀁 𑀬𑁄𑀚𑀬𑀢𑀺 [𑀬𑁄𑀚𑁂𑀢𑀺 (𑀲𑀻.)]? 𑀘𑀢𑁆𑀢𑀸𑀭𑁄 𑀫𑀳𑀸𑀧𑀤𑁂𑀲𑀸 𑀩𑀼𑀤𑁆𑀥𑀸𑀧𑀤𑁂𑀲𑁄 𑀲𑀗𑁆𑀖𑀸𑀧𑀤𑁂𑀲𑁄 𑀲𑀫𑁆𑀩𑀳𑀼𑀮𑀢𑁆𑀣𑁂𑀭𑀸𑀧𑀤𑁂𑀲𑁄 [𑀲𑀫𑁆𑀧𑀳𑀼𑀮… (𑀓.)] 𑀏𑀓𑀢𑁆𑀣𑁂𑀭𑀸𑀧𑀤𑁂𑀲𑁄. 𑀇𑀫𑁂 𑀘𑀢𑁆𑀢𑀸𑀭𑁄 𑀫𑀳𑀸𑀧𑀤𑁂𑀲𑀸, 𑀢𑀸𑀦𑀺 𑀧𑀤𑀩𑁆𑀬𑀜𑁆𑀚𑀦𑀸𑀦𑀺 𑀲𑀼𑀢𑁆𑀢𑁂 𑀑𑀢𑀸𑀭𑀬𑀺𑀢𑀩𑁆𑀩𑀸𑀦𑀺, 𑀯𑀺𑀦𑀬𑁂 𑀲𑀦𑁆𑀤𑀲𑁆𑀲𑀬𑀺𑀢𑀩𑁆𑀩𑀸𑀦𑀺, 𑀥𑀫𑁆𑀫𑀢𑀸𑀬𑀁 𑀉𑀧𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀸𑀦𑀺.

𑀓𑀢𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀑𑀢𑀸𑀭𑀬𑀺𑀢𑀩𑁆𑀩𑀸𑀦𑀺? 𑀘𑀢𑀽𑀲𑀼 𑀅𑀭𑀺𑀬𑀲𑀘𑁆𑀘𑁂𑀲𑀼. 𑀓𑀢𑀫𑀲𑁆𑀫𑀺𑀁 𑀯𑀺𑀦𑀬𑁂 𑀲𑀦𑁆𑀤𑀲𑁆𑀲𑀬𑀺𑀢𑀩𑁆𑀩𑀸𑀦𑀺? 𑀭𑀸𑀕𑀯𑀺𑀦𑀬𑁂 𑀤𑁄𑀲𑀯𑀺𑀦𑀬𑁂 𑀫𑁄𑀳𑀯𑀺𑀦𑀬𑁂. 𑀓𑀢𑀫𑀺𑀲𑁆𑀲𑀁 [𑀓𑀢𑀫𑀺𑀬𑀁 (𑀲𑀻.)] 𑀥𑀫𑁆𑀫𑀢𑀸𑀬𑀁 𑀉𑀧𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀸𑀦𑀺? 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁂. 𑀬𑀤𑀺 𑀘𑀢𑀽𑀲𑀼 𑀅𑀭𑀺𑀬𑀲𑀘𑁆𑀘𑁂𑀲𑀼 𑀅𑀯𑀢𑀭𑀢𑀺, 𑀓𑀺𑀮𑁂𑀲𑀯𑀺𑀦𑀬𑁂 𑀲𑀦𑁆𑀤𑀺𑀲𑁆𑀲𑀢𑀺, 𑀥𑀫𑁆𑀫𑀢𑀜𑁆𑀘 𑀦 𑀯𑀺𑀮𑁄𑀫𑁂𑀢𑀺, 𑀏𑀯𑀁 𑀆𑀲𑀯𑁂 𑀦 𑀚𑀦𑁂𑀢𑀺. 𑀘𑀢𑀽𑀳𑀺 𑀫𑀳𑀸𑀧𑀤𑁂𑀲𑁂𑀳𑀺 𑀬𑀁 𑀬𑀁 𑀬𑀼𑀚𑁆𑀚𑀢𑀺, 𑀬𑁂𑀦 𑀬𑁂𑀦 𑀬𑀼𑀚𑁆𑀚𑀢𑀺, 𑀬𑀣𑀸 𑀬𑀣𑀸 𑀬𑀼𑀚𑁆𑀚𑀢𑀺, 𑀢𑀁 𑀢𑀁 𑀕𑀳𑁂𑀢𑀩𑁆𑀩𑀁.

𑁧𑁯. 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑁂𑀦 𑀓𑀢𑀺 𑀧𑀤𑀸𑀦𑀺 𑀧𑀜𑁆𑀳𑁂𑀢𑀺 𑀧𑀤𑀲𑁄 𑀧𑀭𑀺𑀬𑁄𑀕𑀸𑀳𑀺𑀢𑀩𑁆𑀩𑀁 𑀯𑀺𑀘𑁂𑀢𑀩𑁆𑀩𑀁? 𑀬𑀤𑀺 𑀲𑀩𑁆𑀩𑀸𑀦𑀺 𑀧𑀤𑀸𑀦𑀺 𑀏𑀓𑀁 𑀅𑀢𑁆𑀣𑀁 𑀅𑀪𑀺𑀯𑀤𑀦𑁆𑀢𑀺, 𑀏𑀓𑁄 𑀧𑀜𑁆𑀳𑁄. 𑀅𑀣 𑀘𑀢𑁆𑀢𑀸𑀭𑀺 𑀧𑀤𑀸𑀦𑀺 𑀏𑀓𑀁 𑀅𑀢𑁆𑀣𑀁 𑀅𑀪𑀺𑀯𑀤𑀦𑁆𑀢𑀺, 𑀏𑀓𑁄 𑀧𑀜𑁆𑀳𑁄. 𑀅𑀣 𑀢𑀻𑀡𑀺 𑀧𑀤𑀸𑀦𑀺 𑀏𑀓𑀁 𑀅𑀢𑁆𑀣𑀁 𑀅𑀪𑀺𑀯𑀤𑀦𑁆𑀢𑀺, 𑀏𑀓𑁄 𑀧𑀜𑁆𑀳𑁄. 𑀅𑀣 𑀤𑁆𑀯𑁂 𑀧𑀤𑀸𑀦𑀺 𑀏𑀓𑀁 𑀅𑀢𑁆𑀣𑀁 𑀅𑀪𑀺𑀯𑀤𑀦𑁆𑀢𑀺, 𑀏𑀓𑁄 𑀧𑀜𑁆𑀳𑁄. 𑀅𑀣 𑀏𑀓𑀁 𑀧𑀤𑀁 𑀏𑀓𑀁 𑀅𑀢𑁆𑀣𑀁 𑀅𑀪𑀺𑀯𑀤𑀢𑀺, 𑀏𑀓𑁄 𑀧𑀜𑁆𑀳𑁄. 𑀢𑀁 𑀉𑀧𑀧𑀭𑀺𑀓𑁆𑀔𑀫𑀸𑀦𑁂𑀦 𑀅𑀜𑁆𑀜𑀸𑀢𑀩𑁆𑀩𑀁 𑀓𑀺𑀁 𑀇𑀫𑁂 𑀥𑀫𑁆𑀫𑀸 𑀦𑀸𑀦𑀢𑁆𑀣𑀸 𑀦𑀸𑀦𑀸𑀩𑁆𑀬𑀜𑁆𑀚𑀦𑀸, 𑀉𑀤𑀸𑀳𑀼 𑀇𑀫𑁂𑀲𑀁 𑀥𑀫𑁆𑀫𑀸𑀦𑀁 𑀏𑀓𑁄 𑀅𑀢𑁆𑀣𑁄 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦𑀦𑁆𑀢𑀺. 𑀬𑀣𑀸 𑀓𑀺𑀁 𑀪𑀯𑁂? 𑀬𑀣𑀸 𑀲𑀸 𑀤𑁂𑀯𑀢𑀸 𑀪𑀕𑀯𑀦𑁆𑀢𑀁 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺.

‘‘𑀓𑁂𑀦𑀲𑁆𑀲𑀼𑀩𑁆𑀪𑀸𑀳𑀢𑁄 [𑀧𑀲𑁆𑀲 𑀲. 𑀦𑀺. 𑁧.𑁬𑁬] 𑀮𑁄𑀓𑁄, 𑀓𑁂𑀦𑀲𑁆𑀲𑀼 𑀧𑀭𑀺𑀯𑀸𑀭𑀺𑀢𑁄;

𑀓𑁂𑀦 𑀲𑀮𑁆𑀮𑁂𑀦 𑀑𑀢𑀺𑀡𑁆𑀡𑁄, 𑀓𑀺𑀲𑁆𑀲 𑀥𑀽𑀧𑀸𑀬𑀺𑀢𑁄 𑀲𑀤𑀸’’𑀢𑀺.

𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀧𑀤𑀸𑀦𑀺 𑀧𑀼𑀘𑁆𑀙𑀺𑀢𑀸𑀦𑀺. 𑀢𑁂 𑀢𑀬𑁄 𑀧𑀜𑁆𑀳𑀸 𑀓𑀣𑀁 𑀜𑀸𑀬𑀢𑀺? 𑀪𑀕𑀯𑀸 𑀳𑀺 𑀤𑁂𑀯𑀢𑀸𑀬 𑀯𑀺𑀲𑀚𑁆𑀚𑁂𑀢𑀺.

‘‘𑀫𑀘𑁆𑀘𑀼𑀦𑀸𑀩𑁆𑀪𑀸𑀳𑀢𑁄 [𑀫𑀘𑁆𑀘𑀼𑀦𑀩𑁆𑀪𑀸𑀳𑀢𑁄 (𑀓.) 𑀣𑁂𑀭𑀕𑀸. 𑁪𑁪𑁮; 𑀲𑀁. 𑀦𑀺. 𑁧.𑁬𑁬 𑀧𑀲𑁆𑀲𑀺𑀢𑀩𑁆𑀩𑀁] 𑀮𑁄𑀓𑁄, 𑀚𑀭𑀸𑀬 𑀧𑀭𑀺𑀯𑀸𑀭𑀺𑀢𑁄;

𑀢𑀡𑁆𑀳𑀸𑀲𑀮𑁆𑀮𑁂𑀦 𑀑𑀢𑀺𑀡𑁆𑀡𑁄, 𑀇𑀘𑁆𑀙𑀸𑀥𑀽𑀧𑀸𑀬𑀺𑀢𑁄 𑀲𑀤𑀸’’𑀢𑀺.

𑁨𑁦. 𑀢𑀢𑁆𑀣 𑀚𑀭𑀸 𑀘 𑀫𑀭𑀡𑀜𑁆𑀘 𑀇𑀫𑀸𑀦𑀺 𑀤𑁆𑀯𑁂 𑀲𑀗𑁆𑀔𑀢𑀲𑁆𑀲 𑀲𑀗𑁆𑀔𑀢𑀮𑀓𑁆𑀔𑀡𑀸𑀦𑀺. 𑀚𑀭𑀸𑀬𑀁 𑀞𑀺𑀢𑀲𑁆𑀲 𑀅𑀜𑁆𑀜𑀣𑀢𑁆𑀢𑀁, 𑀫𑀭𑀡𑀁 𑀯𑀬𑁄. 𑀢𑀢𑁆𑀣 𑀚𑀭𑀸𑀬 𑀘 𑀫𑀭𑀡𑀲𑁆𑀲 𑀘 𑀅𑀢𑁆𑀣𑀢𑁄 𑀦𑀸𑀦𑀢𑁆𑀢𑀁. 𑀓𑁂𑀦 𑀓𑀸𑀭𑀡𑁂𑀦, 𑀕𑀩𑁆𑀪𑀕𑀢𑀸𑀧𑀺 𑀳𑀺 𑀫𑀻𑀬𑀦𑁆𑀢𑀺, 𑀦 𑀘 𑀢𑁂 𑀚𑀺𑀡𑁆𑀡𑀸 𑀪𑀯𑀦𑁆𑀢𑀺. 𑀅𑀢𑁆𑀣𑀺 𑀘 𑀤𑁂𑀯𑀸𑀦𑀁 𑀫𑀭𑀡𑀁, 𑀦 𑀘 𑀢𑁂𑀲𑀁 𑀲𑀭𑀻𑀭𑀸𑀦𑀺 𑀚𑀻𑀭𑀦𑁆𑀢𑀺. 𑀲𑀓𑁆𑀓𑀢𑁂𑀯 𑀚𑀭𑀸𑀬 𑀧𑀝𑀺𑀓𑀫𑁆𑀫𑀁 𑀓𑀸𑀢𑀼𑀁, 𑀦 𑀧𑀦 𑀲𑀓𑁆𑀓𑀢𑁂 𑀫𑀭𑀡𑀲𑁆𑀲 𑀧𑀝𑀺𑀓𑀫𑁆𑀫𑀁 𑀓𑀸𑀢𑀼𑀁 𑀅𑀜𑁆𑀜𑀢𑁆𑀭𑁂𑀯 𑀇𑀤𑁆𑀥𑀺𑀫𑀦𑁆𑀢𑀸𑀦𑀁 𑀇𑀤𑁆𑀥𑀺𑀯𑀺𑀲𑀬𑀸. 𑀬𑀁 𑀧𑀦𑀸𑀳 𑀢𑀡𑁆𑀳𑀸𑀲𑀮𑁆𑀮𑁂𑀦 𑀑𑀢𑀺𑀡𑁆𑀡𑁄𑀢𑀺 𑀤𑀺𑀲𑁆𑀲𑀦𑁆𑀢𑀺 𑀯𑀻𑀢𑀭𑀸𑀕𑀸 𑀚𑀻𑀭𑀦𑁆𑀢𑀸𑀧𑀺 𑀫𑀻𑀬𑀦𑁆𑀢𑀸𑀧𑀺. 𑀬𑀤𑀺 𑀘 𑀬𑀣𑀸 𑀚𑀭𑀸𑀫𑀭𑀡𑀁, 𑀏𑀯𑀁 𑀢𑀡𑁆𑀳𑀸𑀧𑀺 𑀲𑀺𑀬𑀸. 𑀏𑀯𑀁 𑀲𑀦𑁆𑀢𑁂 𑀲𑀩𑁆𑀩𑁂 𑀬𑁄𑀩𑁆𑀩𑀦𑀝𑁆𑀞𑀸𑀧𑀺 𑀯𑀺𑀕𑀢𑀢𑀡𑁆𑀳𑀸 𑀲𑀺𑀬𑀼𑀁. 𑀬𑀣𑀸 𑀘 𑀢𑀡𑁆𑀳𑀸 𑀤𑀼𑀓𑁆𑀔𑀲𑁆𑀲 𑀲𑀫𑀼𑀤𑀬𑁄, 𑀏𑀯𑀁 𑀚𑀭𑀸𑀫𑀭𑀡𑀫𑁆𑀧𑀺 𑀲𑀺𑀬𑀸 𑀤𑀼𑀓𑁆𑀔𑀲𑁆𑀲 𑀲𑀫𑀼𑀤𑀬𑁄, 𑀦 𑀘 𑀲𑀺𑀬𑀸 𑀢𑀡𑁆𑀳𑀸 𑀤𑀼𑀓𑁆𑀔𑀲𑁆𑀲 𑀲𑀫𑀼𑀤𑀬𑁄, 𑀦 𑀳𑀺 𑀚𑀭𑀸𑀫𑀭𑀡𑀁 𑀤𑀼𑀓𑁆𑀔𑀲𑁆𑀲 𑀲𑀫𑀼𑀤𑀬𑁄, 𑀢𑀡𑁆𑀳𑀸 𑀤𑀼𑀓𑁆𑀔𑀲𑁆𑀲 𑀲𑀫𑀼𑀤𑀬𑁄. 𑀬𑀣𑀸 𑀘 𑀢𑀡𑁆𑀳𑀸 𑀫𑀕𑁆𑀕𑀯𑀚𑁆𑀛𑀸, 𑀏𑀯𑀁 𑀚𑀭𑀸𑀫𑀭𑀡𑀫𑁆𑀧𑀺 𑀲𑀺𑀬𑀸 𑀫𑀕𑁆𑀕𑀯𑀚𑁆𑀛𑀁. 𑀇𑀫𑀸𑀬 𑀬𑀼𑀢𑁆𑀢𑀺𑀬𑀸 𑀅𑀜𑁆𑀜𑀫𑀜𑁆𑀜𑁂𑀳𑀺 𑀓𑀸𑀭𑀡𑁂𑀳𑀺 𑀕𑀯𑁂𑀲𑀺𑀢𑀩𑁆𑀩𑀁. 𑀬𑀤𑀺 𑀘 𑀲𑀦𑁆𑀤𑀺𑀲𑁆𑀲𑀢𑀺 𑀬𑀼𑀢𑁆𑀢𑀺𑀲𑀫𑀸𑀭𑀽𑀴𑁆𑀳𑀁 𑀅𑀢𑁆𑀣𑀢𑁄 𑀘 𑀅𑀜𑁆𑀜𑀢𑁆𑀢𑀁, 𑀩𑁆𑀬𑀜𑁆𑀚𑀦𑀢𑁄𑀧𑀺 𑀕𑀯𑁂𑀲𑀺𑀢𑀩𑁆𑀩𑀁.

𑀲𑀮𑁆𑀮𑁄𑀢𑀺 𑀯𑀸 𑀥𑀽𑀧𑀸𑀬𑀦𑀦𑁆𑀢𑀺 𑀯𑀸 𑀇𑀫𑁂𑀲𑀁 𑀥𑀫𑁆𑀫𑀸𑀦𑀁 𑀅𑀢𑁆𑀣𑀢𑁄 𑀏𑀓𑀢𑁆𑀢𑀁. 𑀦 𑀳𑀺 𑀬𑀼𑀚𑁆𑀚𑀢𑀺 𑀇𑀘𑁆𑀙𑀸𑀬 𑀘 𑀢𑀡𑁆𑀳𑀸𑀬 𑀘 𑀅𑀢𑁆𑀣𑀢𑁄 𑀅𑀜𑁆𑀜𑀢𑁆𑀢𑀁. 𑀢𑀡𑁆𑀳𑀸𑀬 𑀅𑀥𑀺𑀧𑁆𑀧𑀸𑀬𑁂 𑀅𑀧𑀭𑀺𑀧𑀽𑀭𑀫𑀸𑀦𑁂 𑀦𑀯𑀲𑀼 𑀆𑀖𑀸𑀢𑀯𑀢𑁆𑀣𑀽𑀲𑀼 𑀓𑁄𑀥𑁄 𑀘 𑀉𑀧𑀦𑀸𑀳𑁄 𑀘 𑀉𑀧𑁆𑀧𑀚𑁆𑀚𑀢𑀺. 𑀇𑀫𑀸𑀬 𑀬𑀼𑀢𑁆𑀢𑀺𑀬𑀸 𑀚𑀭𑀸𑀬 𑀘 𑀫𑀭𑀡𑀲𑁆𑀲 𑀘 𑀢𑀡𑁆𑀳𑀸𑀬 𑀘 𑀅𑀢𑁆𑀣𑀢𑁄 𑀅𑀜𑁆𑀜𑀢𑁆𑀢𑀁.

𑀬𑀁 𑀧𑀦𑀺𑀤𑀁 𑀪𑀕𑀯𑀢𑀸 𑀤𑁆𑀯𑀻𑀳𑀺 𑀦𑀸𑀫𑁂𑀳𑀺 𑀅𑀪𑀺𑀮𑀧𑀺𑀢𑀁 𑀇𑀘𑁆𑀙𑀸𑀢𑀺𑀧𑀺 𑀢𑀡𑁆𑀳𑀸𑀢𑀺𑀧𑀺, 𑀇𑀤𑀁 𑀪𑀕𑀯𑀢𑀸 𑀩𑀸𑀳𑀺𑀭𑀸𑀦𑀁 𑀯𑀢𑁆𑀣𑀽𑀦𑀁 𑀆𑀭𑀫𑁆𑀫𑀡𑀯𑀲𑁂𑀦 𑀤𑁆𑀯𑀻𑀳𑀺 𑀦𑀸𑀫𑁂𑀳𑀺 𑀅𑀪𑀺𑀮𑀧𑀺𑀢𑀁 𑀇𑀘𑁆𑀙𑀸𑀢𑀺𑀧𑀺 𑀢𑀡𑁆𑀳𑀸𑀢𑀺𑀧𑀺, 𑀲𑀩𑁆𑀩𑀸 𑀳𑀺 𑀢𑀡𑁆𑀳𑀸 𑀅𑀚𑁆𑀛𑁄𑀲𑀸𑀦𑀮𑀓𑁆𑀔𑀡𑁂𑀦 𑀏𑀓𑀮𑀓𑁆𑀔𑀡𑀸. 𑀬𑀣𑀸 𑀲𑀩𑁆𑀩𑁄 𑀅𑀕𑁆𑀕𑀺 𑀉𑀡𑁆𑀳𑀢𑁆𑀢𑀮𑀓𑁆𑀔𑀡𑁂𑀦 𑀏𑀓𑀮𑀓𑁆𑀔𑀡𑁄, 𑀅𑀧𑀺 𑀘 𑀉𑀧𑀸𑀤𑀸𑀦𑀯𑀲𑁂𑀦 𑀅𑀜𑁆𑀜𑀫𑀜𑁆𑀜𑀸𑀦𑀺 𑀦𑀸𑀫𑀸𑀦𑀺 𑀮𑀪𑀢𑀺, 𑀓𑀝𑁆𑀞𑀕𑁆𑀕𑀻𑀢𑀺𑀧𑀺 𑀢𑀺𑀡𑀕𑁆𑀕𑀻𑀢𑀺𑀧𑀺 𑀲𑀓𑀮𑀺𑀓𑀕𑁆𑀕𑀻𑀢𑀺𑀧𑀺 𑀕𑁄𑀫𑀬𑀕𑁆𑀕𑀻𑀢𑀺𑀧𑀺 𑀣𑀼𑀲𑀕𑁆𑀕𑀻𑀢𑀺𑀧𑀺 𑀲𑀗𑁆𑀓𑀸𑀭𑀕𑁆𑀕𑀻𑀢𑀺𑀧𑀺, 𑀲𑀩𑁆𑀩𑁄 𑀳𑀺 𑀅𑀕𑁆𑀕𑀺 𑀉𑀡𑁆𑀳𑀢𑁆𑀢𑀮𑀓𑁆𑀔𑀡𑁄𑀯. 𑀏𑀯𑀁 𑀲𑀩𑁆𑀩𑀸 𑀢𑀡𑁆𑀳𑀸 𑀅𑀚𑁆𑀛𑁄𑀲𑀸𑀦𑀮𑀓𑁆𑀔𑀡𑁂𑀦 𑀏𑀓𑀮𑀓𑁆𑀔𑀡𑀸, 𑀅𑀧𑀺 𑀢𑀼 𑀆𑀭𑀫𑁆𑀫𑀡𑀉𑀧𑀸𑀤𑀸𑀦𑀯𑀲𑁂𑀦 𑀅𑀜𑁆𑀜𑀫𑀜𑁆𑀜𑁂𑀳𑀺 𑀦𑀸𑀫𑁂𑀳𑀺 𑀅𑀪𑀺𑀮𑀧𑀺𑀢𑀸 𑀇𑀘𑁆𑀙𑀸𑀇𑀢𑀺𑀧𑀺 𑀢𑀡𑁆𑀳𑀸𑀇𑀢𑀺𑀧𑀺 𑀲𑀮𑁆𑀮𑁄𑀇𑀢𑀺𑀧𑀺 𑀥𑀽𑀧𑀸𑀬𑀦𑀸𑀇𑀢𑀺𑀧𑀺 𑀲𑀭𑀺𑀢𑀸𑀇𑀢𑀺𑀧𑀺 𑀯𑀺𑀲𑀢𑁆𑀢𑀺𑀓𑀸𑀇𑀢𑀺𑀧𑀺 𑀲𑀺𑀦𑁂𑀳𑁄𑀇𑀢𑀺𑀧𑀺 𑀓𑀺𑀮𑀫𑀣𑁄𑀇𑀢𑀺𑀧𑀺 𑀮𑀢𑀸𑀇𑀢𑀺𑀧𑀺 𑀫𑀜𑁆𑀜𑀦𑀸𑀇𑀢𑀺𑀧𑀺 𑀩𑀦𑁆𑀥𑁄𑀇𑀢𑀺𑀧𑀺 𑀆𑀲𑀸𑀇𑀢𑀺𑀧𑀺 𑀧𑀺𑀧𑀸𑀲𑀸𑀇𑀢𑀺𑀧𑀺 𑀅𑀪𑀺𑀦𑀦𑁆𑀤𑀦𑀸𑀇𑀢𑀺𑀧𑀺, 𑀇𑀢𑀺 𑀲𑀩𑁆𑀩𑀸 𑀢𑀡𑁆𑀳𑀸 𑀅𑀚𑁆𑀛𑁄𑀲𑀸𑀦𑀮𑀓𑁆𑀔𑀡𑁂𑀦 𑀏𑀓𑀮𑀓𑁆𑀔𑀡𑀸. 𑀬𑀣𑀸 𑀘 𑀯𑁂𑀯𑀘𑀦𑁂 𑀯𑀼𑀢𑁆𑀢𑀸.

‘‘𑀆𑀲𑀸 𑀘 𑀧𑀺𑀳𑀸 𑀅𑀪𑀺𑀦𑀦𑁆𑀤𑀦𑀸 𑀘, 𑀅𑀦𑁂𑀓𑀥𑀸𑀢𑀽𑀲𑀼 𑀲𑀭𑀸 𑀧𑀢𑀺𑀝𑁆𑀞𑀺𑀢𑀸;

𑀅𑀜𑁆𑀜𑀸𑀡𑀫𑀽𑀮𑀧𑁆𑀧𑀪𑀯𑀸 𑀧𑀚𑀧𑁆𑀧𑀺𑀢𑀸, 𑀲𑀩𑁆𑀩𑀸 𑀫𑀬𑀸 𑀩𑁆𑀬𑀦𑁆𑀢𑀺𑀓𑀢𑀸 𑀲𑀫𑀽𑀮𑀓𑀸’’𑀢𑀺 [𑀲𑀫𑀽𑀮𑀺𑀓𑀸 (𑀲𑀻.)].

𑀢𑀡𑁆𑀳𑀸𑀬𑁂𑀢𑀁 𑀯𑁂𑀯𑀘𑀦𑀁. 𑀬𑀣𑀸𑀳 𑀪𑀕𑀯𑀸 𑁋 𑀭𑀽𑀧𑁂 𑀢𑀺𑀲𑁆𑀲 𑀅𑀯𑀺𑀕𑀢𑀭𑀸𑀕𑀲𑁆𑀲 𑀅𑀯𑀺𑀕𑀢𑀘𑁆𑀙𑀦𑁆𑀤𑀲𑁆𑀲 𑀅𑀯𑀺𑀕𑀢𑀧𑁂𑀫𑀲𑁆𑀲 𑀅𑀯𑀺𑀕𑀢𑀧𑀺𑀧𑀸𑀲𑀲𑁆𑀲 𑀅𑀯𑀺𑀕𑀢𑀧𑀭𑀺𑀴𑀸𑀳𑀲𑁆𑀲. 𑀏𑀯𑀁 𑀯𑁂𑀤𑀦𑀸𑀬 𑀲𑀜𑁆𑀜𑀸𑀬 𑀲𑀗𑁆𑀔𑀸𑀭𑁂𑀲𑀼 𑀯𑀺𑀜𑁆𑀜𑀸𑀡𑁂 𑀅𑀯𑀺𑀕𑀢𑀭𑀸𑀕𑀲𑁆𑀲 𑀅𑀯𑀺𑀕𑀢𑀘𑁆𑀙𑀦𑁆𑀤𑀲𑁆𑀲 𑀅𑀯𑀺𑀕𑀢𑀧𑁂𑀫𑀲𑁆𑀲 𑀅𑀯𑀺𑀕𑀢𑀧𑀺𑀧𑀸𑀲𑀲𑁆𑀲 𑀅𑀯𑀺𑀕𑀢𑀧𑀭𑀺𑀴𑀸𑀳𑀲𑁆𑀲 𑀲𑀩𑁆𑀩𑀁 𑀲𑀼𑀢𑁆𑀢𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. 𑀢𑀡𑁆𑀳𑀸𑀬𑁂𑀢𑀁 𑀯𑁂𑀯𑀘𑀦𑀁. 𑀏𑀯𑀁 𑀬𑀼𑀚𑁆𑀚𑀢𑀺.

𑁨𑁧. 𑀲𑀩𑁆𑀩𑁄 𑀤𑀼𑀓𑁆𑀔𑀽𑀧𑀘𑀸𑀭𑁄 𑀓𑀸𑀫𑀢𑀡𑁆𑀳𑀸𑀲𑀗𑁆𑀔𑀸𑀭𑀫𑀽𑀮𑀓𑁄, 𑀦 𑀧𑀦 𑀬𑀼𑀚𑁆𑀚𑀢𑀺 𑀲𑀩𑁆𑀩𑁄 𑀦𑀺𑀩𑁆𑀩𑀺𑀤𑀽𑀧𑀘𑀸𑀭𑁄 𑀓𑀸𑀫𑀢𑀡𑁆𑀳𑀸𑀧𑀭𑀺𑀓𑁆𑀔𑀸𑀭𑀫𑀽𑀮𑀓𑁄. 𑀇𑀫𑀸𑀬 𑀬𑀼𑀢𑁆𑀢𑀺𑀬𑀸 𑀅𑀜𑁆𑀜𑀫𑀜𑁆𑀜𑁂𑀳𑀺 𑀓𑀸𑀭𑀡𑁂𑀳𑀺 𑀕𑀯𑁂𑀲𑀺𑀢𑀩𑁆𑀩𑀁.

𑀬𑀣𑀸 𑀳𑀺 [𑀬𑀣𑀸𑀳 (𑀲𑀻.)] 𑀪𑀕𑀯𑀸 𑀭𑀸𑀕𑀘𑀭𑀺𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀲𑀼𑀪𑀁 𑀤𑁂𑀲𑀬𑀢𑀺, 𑀤𑁄𑀲𑀘𑀭𑀺𑀢𑀲𑁆𑀲 𑀪𑀕𑀯𑀸 𑀧𑀼𑀕𑁆𑀕𑀮𑀲𑁆𑀲 𑀫𑁂𑀢𑁆𑀢𑀁 𑀤𑁂𑀲𑀬𑀢𑀺. 𑀫𑁄𑀳𑀘𑀭𑀺𑀢𑀲𑁆𑀲 𑀪𑀕𑀯𑀸 𑀧𑀼𑀕𑁆𑀕𑀮𑀲𑁆𑀲 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀁 𑀤𑁂𑀲𑀬𑀢𑀺. 𑀬𑀤𑀺 𑀳𑀺 𑀪𑀕𑀯𑀸 𑀭𑀸𑀕𑀘𑀭𑀺𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀫𑁂𑀢𑁆𑀢𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀤𑁂𑀲𑁂𑀬𑁆𑀬. 𑀲𑀼𑀔𑀁 𑀯𑀸 𑀧𑀝𑀺𑀧𑀤𑀁 𑀤𑀦𑁆𑀥𑀸𑀪𑀺𑀜𑁆𑀜𑀁 𑀲𑀼𑀔𑀁 𑀯𑀸 𑀧𑀝𑀺𑀧𑀤𑀁 𑀔𑀺𑀧𑁆𑀧𑀸𑀪𑀺𑀜𑁆𑀜𑀁 𑀯𑀺𑀧𑀲𑁆𑀲𑀦𑀸𑀧𑀼𑀩𑁆𑀩𑀗𑁆𑀕𑀫𑀁 𑀯𑀸 𑀧𑀳𑀸𑀦𑀁 𑀤𑁂𑀲𑁂𑀬𑁆𑀬, 𑀦 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸. 𑀏𑀯𑀁 𑀬𑀁 𑀓𑀺𑀜𑁆𑀘𑀺 𑀭𑀸𑀕𑀲𑁆𑀲 𑀅𑀦𑀼𑀮𑁄𑀫𑀧𑁆𑀧𑀳𑀸𑀦𑀁 𑀤𑁄𑀲𑀲𑁆𑀲 𑀅𑀦𑀼𑀮𑁄𑀫𑀧𑁆𑀧𑀳𑀸𑀦𑀁 𑀫𑁄𑀳𑀲𑁆𑀲 𑀅𑀦𑀼𑀮𑁄𑀫𑀧𑁆𑀧𑀳𑀸𑀦𑀁. 𑀲𑀩𑁆𑀩𑀁 𑀢𑀁 𑀯𑀺𑀘𑀬𑁂𑀦 𑀳𑀸𑀭𑁂𑀦 𑀯𑀺𑀘𑀺𑀦𑀺𑀢𑁆𑀯𑀸 𑀬𑀼𑀢𑁆𑀢𑀺𑀳𑀸𑀭𑁂𑀦 𑀬𑁄𑀚𑁂𑀢𑀩𑁆𑀩𑀁. 𑀬𑀸𑀯𑀢𑀺𑀓𑀸 𑀜𑀸𑀡𑀲𑁆𑀲 𑀪𑀽𑀫𑀺.

𑀫𑁂𑀢𑁆𑀢𑀸𑀯𑀺𑀳𑀸𑀭𑀺𑀲𑁆𑀲 𑀲𑀢𑁄 𑀩𑁆𑀬𑀸𑀧𑀸𑀤𑁄 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀞𑀲𑁆𑀲𑀢𑀻𑀢𑀺 𑀦 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸, 𑀩𑁆𑀬𑀸𑀧𑀸𑀤𑁄 𑀧𑀳𑀸𑀦𑀁 𑀅𑀩𑁆𑀪𑀢𑁆𑀣𑀁 𑀕𑀘𑁆𑀙𑀢𑀻𑀢𑀺 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸. 𑀓𑀭𑀼𑀡𑀸𑀯𑀺𑀳𑀸𑀭𑀺𑀲𑁆𑀲 𑀲𑀢𑁄 𑀯𑀺𑀳𑁂𑀲𑀸 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀞𑀲𑁆𑀲𑀢𑀻𑀢𑀺 𑀦 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸, 𑀯𑀺𑀳𑁂𑀲𑀸 𑀧𑀳𑀸𑀦𑀁 𑀅𑀩𑁆𑀪𑀢𑁆𑀣𑀁 𑀕𑀘𑁆𑀙𑀢𑀻𑀢𑀺 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸. 𑀫𑀼𑀤𑀺𑀢𑀸 𑀯𑀺𑀳𑀸𑀭𑀺𑀲𑁆𑀲 𑀲𑀢𑁄 𑀅𑀭𑀢𑀺 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀞𑀲𑁆𑀲𑀢𑀻𑀢𑀺 𑀦 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸, 𑀅𑀭𑀢𑀺 𑀧𑀳𑀸𑀦𑀁 𑀅𑀩𑁆𑀪𑀢𑁆𑀣𑀁 𑀕𑀘𑁆𑀙𑀢𑀻𑀢𑀺 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸. 𑀉𑀧𑁂𑀓𑁆𑀔𑀸𑀯𑀺𑀳𑀸𑀭𑀺𑀲𑁆𑀲 𑀲𑀢𑁄 𑀭𑀸𑀕𑁄 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀞𑀲𑁆𑀲𑀢𑀻𑀢𑀺 𑀦 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸, 𑀭𑀸𑀕𑁄 𑀧𑀳𑀸𑀦𑀁 𑀅𑀩𑁆𑀪𑀢𑁆𑀣𑀁 𑀕𑀘𑁆𑀙𑀢𑀻𑀢𑀺 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸. 𑀅𑀦𑀺𑀫𑀺𑀢𑁆𑀢𑀯𑀺𑀳𑀸𑀭𑀺𑀲𑁆𑀲 𑀲𑀢𑁄 𑀦𑀺𑀫𑀺𑀢𑁆𑀢𑀸𑀦𑀼𑀲𑀸𑀭𑀻 𑀢𑁂𑀦 𑀢𑁂𑀦𑁂𑀯 𑀯𑀺𑀜𑁆𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑀦 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸, 𑀦𑀺𑀫𑀺𑀢𑁆𑀢𑀁 𑀧𑀳𑀸𑀦𑀁 𑀅𑀩𑁆𑀪𑀢𑁆𑀣𑀁 𑀕𑀘𑁆𑀙𑀢𑀻𑀢𑀺 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸. 𑀅𑀲𑁆𑀫𑀻𑀢𑀺 𑀯𑀺𑀕𑀢𑀁 𑀅𑀬𑀫𑀳𑀫𑀲𑁆𑀫𑀻𑀢𑀺 𑀦 𑀲𑀫𑀦𑀼𑀧𑀲𑁆𑀲𑀸𑀫𑀺. 𑀅𑀣 𑀘 𑀧𑀦 𑀫𑁂 𑀓𑀺𑀲𑁆𑀫𑀻𑀢𑀺 𑀓𑀣𑀲𑁆𑀫𑀻𑀢𑀺 𑀯𑀺𑀘𑀺𑀓𑀺𑀘𑁆𑀙𑀸 𑀓𑀣𑀁𑀓𑀣𑀸𑀲𑀮𑁆𑀮𑀁 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀞𑀲𑁆𑀲𑀢𑀻𑀢𑀺 𑀦 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸, 𑀯𑀺𑀘𑀺𑀓𑀺𑀘𑁆𑀙𑀸 𑀓𑀣𑀁𑀓𑀣𑀸𑀲𑀮𑁆𑀮𑀁 𑀧𑀳𑀸𑀦𑀁 𑀅𑀩𑁆𑀪𑀢𑁆𑀣𑀁 𑀕𑀘𑁆𑀙𑀢𑀻𑀢𑀺 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸.

𑀬𑀣𑀸 𑀯𑀸 𑀧𑀦 𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀲𑀢𑁄 𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑀸 𑀯𑀺𑀲𑁂𑀲𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀦 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸, 𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸. 𑀯𑀺𑀢𑀓𑁆𑀓𑀲𑀳𑀕𑀢𑀸 𑀯𑀸 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸 𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀦 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸, 𑀯𑀺𑀲𑁂𑀲𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸. 𑀤𑀼𑀢𑀺𑀬𑀁 𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀲𑀢𑁄 𑀯𑀺𑀢𑀓𑁆𑀓𑀯𑀺𑀘𑀸𑀭𑀲𑀳𑀕𑀢𑀸 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸 𑀯𑀺𑀲𑁂𑀲𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀦 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸, 𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸. 𑀉𑀧𑁂𑀓𑁆𑀔𑀸𑀲𑀼𑀔𑀲𑀳𑀕𑀢𑀸 𑀯𑀸 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸 𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀦 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸, 𑀯𑀺𑀲𑁂𑀲𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸. 𑀢𑀢𑀺𑀬𑀁 𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀲𑀢𑁄 𑀧𑀻𑀢𑀺𑀲𑀼𑀔𑀲𑀳𑀕𑀢𑀸 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸 𑀯𑀺𑀲𑁂𑀲𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀦 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸, 𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸, 𑀉𑀧𑁂𑀓𑁆𑀔𑀸𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀲𑀳𑀕𑀢𑀸 𑀯𑀸 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸 𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀦 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸, 𑀯𑀺𑀲𑁂𑀲𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸. 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀲𑀢𑁄 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸 𑀯𑀺𑀲𑁂𑀲𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀦 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸, 𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸. 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀳𑀕𑀢𑀸 𑀯𑀸 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸 𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀦 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸, 𑀯𑀺𑀲𑁂𑀲𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸.

𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀲𑀢𑁄 𑀭𑀽𑀧𑀲𑀳𑀕𑀢𑀸 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸 𑀯𑀺𑀲𑁂𑀲𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀦 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸, 𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸. 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀳𑀕𑀢𑀸 𑀯𑀸 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸 𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀦 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸, 𑀯𑀺𑀲𑁂𑀲𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸. 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀲𑀢𑁄 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀳𑀕𑀢𑀸 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸 𑀯𑀺𑀲𑁂𑀲𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀦 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸, 𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸. 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀳𑀕𑀢𑀸 𑀯𑀸 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸 𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀦 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸, 𑀯𑀺𑀲𑁂𑀲𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸.

𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀲𑀢𑁄 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀳𑀕𑀢𑀸 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸 𑀯𑀺𑀲𑁂𑀲𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀦 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸, 𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸. 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀳𑀕𑀢𑀸 𑀯𑀸 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸 𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀦 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸, 𑀯𑀺𑀲𑁂𑀲𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸. 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀲𑀢𑁄 𑀲𑀜𑁆𑀜𑀽𑀧𑀘𑀸𑀭𑀸 𑀯𑀺𑀲𑁂𑀲𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀦 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸, 𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸. 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀲𑀳𑀕𑀢𑀸 𑀯𑀸 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸 𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀦 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸, 𑀯𑀺𑀲𑁂𑀲𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸. 𑀓𑀮𑁆𑀮𑀢𑀸𑀧𑀭𑀺𑀘𑀺𑀢𑀁 𑀘𑀺𑀢𑁆𑀢𑀁 𑀦 𑀘 𑀅𑀪𑀺𑀦𑀻𑀳𑀸𑀭𑀁 𑀔𑀫𑀢𑀻𑀢𑀺 𑀦 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸, 𑀓𑀮𑁆𑀮𑀢𑀸𑀧𑀭𑀺𑀘𑀺𑀢𑀁 𑀘𑀺𑀢𑁆𑀢𑀁 𑀅𑀣 𑀘 𑀅𑀪𑀺𑀦𑀻𑀳𑀸𑀭𑀁 𑀔𑀫𑀢𑀻𑀢𑀺 𑀬𑀼𑀚𑁆𑀚𑀢𑀺 𑀤𑁂𑀲𑀦𑀸.

𑀏𑀯𑀁 𑀲𑀩𑁆𑀩𑁂 𑀦𑀯𑀲𑀼𑀢𑁆𑀢𑀦𑁆𑀢𑀸 𑀬𑀣𑀸𑀥𑀫𑁆𑀫𑀁 𑀬𑀣𑀸𑀯𑀺𑀦𑀬𑀁 𑀬𑀣𑀸𑀲𑀢𑁆𑀣𑀼𑀲𑀸𑀲𑀦𑀁 𑀲𑀩𑁆𑀩𑀢𑁄 𑀯𑀺𑀘𑀬𑁂𑀦 𑀳𑀸𑀭𑁂𑀦 𑀯𑀺𑀘𑀺𑀦𑀺𑀢𑁆𑀯𑀸 𑀬𑀼𑀢𑁆𑀢𑀺𑀳𑀸𑀭𑁂𑀦 𑀬𑁄𑀚𑁂𑀢𑀩𑁆𑀩𑀸𑀢𑀺. 𑀢𑁂𑀦𑀸𑀳 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀬𑀦𑁄 ‘‘𑀲𑀩𑁆𑀩𑁂𑀲𑀁 𑀳𑀸𑀭𑀸𑀦𑀁 𑀬𑀸 𑀪𑀽𑀫𑀺 𑀬𑁄 𑀘 𑀕𑁄𑀘𑀭𑁄 𑀢𑁂𑀲’’𑀦𑁆𑀢𑀺.

𑀦𑀺𑀬𑀼𑀢𑁆𑀢𑁄 𑀬𑀼𑀢𑁆𑀢𑀺 𑀳𑀸𑀭𑁄.