𑁧𑁨. 𑀑𑀢𑀭𑀡𑀳𑀸𑀭𑀯𑀺𑀪𑀗𑁆𑀕𑁄

𑁪𑁨. 𑀢𑀢𑁆𑀣 𑀓𑀢𑀫𑁄 𑀑𑀢𑀭𑀡𑁄 𑀳𑀸𑀭𑁄? ‘‘𑀬𑁄 𑀘 𑀧𑀝𑀺𑀘𑁆𑀘𑀼𑀧𑁆𑀧𑀸𑀤𑁄’’𑀢𑀺.

‘‘𑀉𑀤𑁆𑀥𑀁 𑀅𑀥𑁄 𑀲𑀩𑁆𑀩𑀥𑀺 𑀯𑀺𑀧𑁆𑀧𑀫𑀼𑀢𑁆𑀢𑁄, 𑀅𑀬𑀁 𑀅𑀳𑀲𑁆𑀫𑀻𑀢𑀺 [𑀅𑀬𑀫𑀳𑀫𑀲𑁆𑀫𑀻𑀢𑀺 (𑀲𑀻.) 𑀧𑀲𑁆𑀲 𑀉𑀤𑀸. 𑁬𑁧] 𑀅𑀦𑀸𑀦𑀼𑀧𑀲𑁆𑀲𑀻;

𑀏𑀯𑀁 𑀯𑀺𑀫𑀼𑀢𑁆𑀢𑁄 𑀉𑀤𑀢𑀸𑀭𑀺 𑀑𑀖𑀁, 𑀅𑀢𑀺𑀡𑁆𑀡𑀧𑀼𑀩𑁆𑀩𑀁 𑀅𑀧𑀼𑀦𑀩𑁆𑀪𑀯𑀸𑀬𑀸’’𑀢𑀺.

‘‘𑀉𑀤𑁆𑀥’’𑀦𑁆𑀢𑀺 𑀭𑀽𑀧𑀥𑀸𑀢𑀼 𑀘 𑀅𑀭𑀽𑀧𑀥𑀸𑀢𑀼 𑀘. ‘‘𑀅𑀥𑁄’’𑀢𑀺 𑀓𑀸𑀫𑀥𑀸𑀢𑀼. ‘‘𑀲𑀩𑁆𑀩𑀥𑀺 𑀯𑀺𑀧𑁆𑀧𑀫𑀼𑀢𑁆𑀢𑁄’’𑀢𑀺 𑀢𑁂𑀥𑀸𑀢𑀼𑀓𑁂 𑀅𑀬𑀁 𑀅𑀲𑁂𑀓𑁆𑀔𑀸𑀯𑀺𑀫𑀼𑀢𑁆𑀢𑀺. 𑀢𑀸𑀦𑀺𑀬𑁂𑀯 𑀅𑀲𑁂𑀓𑁆𑀔𑀸𑀦𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺, 𑀅𑀬𑀁 𑀇𑀦𑁆𑀤𑁆𑀭𑀺𑀬𑁂𑀳𑀺 𑀑𑀢𑀭𑀡𑀸.

𑀢𑀸𑀦𑀺𑀬𑁂𑀯 𑀅𑀲𑁂𑀓𑁆𑀔𑀸𑀦𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀯𑀺𑀚𑁆𑀚𑀸, 𑀯𑀺𑀚𑁆𑀚𑀼𑀧𑁆𑀧𑀸𑀤𑀸 𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑁄, 𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑀸 𑀲𑀗𑁆𑀔𑀸𑀭𑀦𑀺𑀭𑁄𑀥𑁄, 𑀲𑀗𑁆𑀔𑀸𑀭𑀦𑀺𑀭𑁄𑀥𑀸 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑁄, 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑀸 𑀦𑀸𑀫𑀭𑀽𑀧𑀦𑀺𑀭𑁄𑀥𑁄, 𑀦𑀸𑀫𑀭𑀽𑀧𑀦𑀺𑀭𑁄𑀥𑀸 𑀲𑀴𑀸𑀬𑀢𑀦𑀦𑀺𑀭𑁄𑀥𑁄, 𑀲𑀴𑀸𑀬𑀢𑀦𑀦𑀺𑀭𑁄𑀥𑀸 𑀨𑀲𑁆𑀲𑀦𑀺𑀭𑁄𑀥𑁄, 𑀨𑀲𑁆𑀲𑀦𑀺𑀭𑁄𑀥𑀸 𑀯𑁂𑀤𑀦𑀸𑀦𑀺𑀭𑁄𑀥𑁄, 𑀯𑁂𑀤𑀦𑀸𑀦𑀺𑀭𑁄𑀥𑀸 𑀢𑀡𑁆𑀳𑀸𑀦𑀺𑀭𑁄𑀥𑁄, 𑀢𑀡𑁆𑀳𑀸𑀦𑀺𑀭𑁄𑀥𑀸 𑀉𑀧𑀸𑀤𑀸𑀦𑀦𑀺𑀭𑁄𑀥𑁄, 𑀉𑀧𑀸𑀤𑀸𑀦𑀦𑀺𑀭𑁄𑀥𑀸 𑀪𑀯𑀦𑀺𑀭𑁄𑀥𑁄, 𑀪𑀯𑀦𑀺𑀭𑁄𑀥𑀸 𑀚𑀸𑀢𑀺𑀦𑀺𑀭𑁄𑀥𑁄, 𑀚𑀸𑀢𑀺𑀦𑀺𑀭𑁄𑀥𑀸 𑀚𑀭𑀸𑀫𑀭𑀡𑀁 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀦𑀺𑀭𑁄𑀥𑁄 𑀳𑁄𑀢𑀺. 𑀅𑀬𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁂𑀳𑀺 𑀑𑀢𑀭𑀡𑀸.

𑀢𑀸𑀦𑀺𑀬𑁂𑀯 𑀅𑀲𑁂𑀓𑁆𑀔𑀸𑀦𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀲𑀗𑁆𑀕𑀳𑀺𑀢𑀸𑀦𑀺 𑁋 𑀲𑀻𑀮𑀓𑁆𑀔𑀦𑁆𑀥𑁂𑀦 𑀲𑀫𑀸𑀥𑀺𑀓𑁆𑀔𑀦𑁆𑀥𑁂𑀦 𑀧𑀜𑁆𑀜𑀸𑀓𑁆𑀔𑀦𑁆𑀥𑁂𑀦, 𑀅𑀬𑀁 𑀔𑀦𑁆𑀥𑁂𑀳𑀺 𑀑𑀢𑀭𑀡𑀸.

𑀢𑀸𑀦𑀺𑀬𑁂𑀯 𑀅𑀲𑁂𑀓𑁆𑀔𑀸𑀦𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀲𑀗𑁆𑀔𑀸𑀭𑀧𑀭𑀺𑀬𑀸𑀧𑀦𑁆𑀦𑀸𑀦𑀺 𑀬𑁂 𑀲𑀗𑁆𑀔𑀸𑀭𑀸 𑀅𑀦𑀸𑀲𑀯𑀸, 𑀦𑁄 𑀘 𑀪𑀯𑀗𑁆𑀕𑀸, 𑀢𑁂 𑀲𑀗𑁆𑀔𑀸𑀭𑀸 𑀥𑀫𑁆𑀫𑀥𑀸𑀢𑀼𑀲𑀗𑁆𑀕𑀳𑀺𑀢𑀸. 𑀅𑀬𑀁 𑀥𑀸𑀢𑀽𑀳𑀺 𑀑𑀢𑀭𑀡𑀸.

𑀲𑀸 𑀥𑀫𑁆𑀫𑀥𑀸𑀢𑀼 𑀥𑀫𑁆𑀫𑀸𑀬𑀢𑀦𑀧𑀭𑀺𑀬𑀸𑀧𑀦𑁆𑀦𑀸, 𑀬𑀁 𑀆𑀬𑀢𑀦𑀁 𑀅𑀦𑀸𑀲𑀯𑀁, 𑀦𑁄 𑀘 𑀪𑀯𑀗𑁆𑀕𑀁. 𑀅𑀬𑀁 𑀆𑀬𑀢𑀦𑁂𑀳𑀺 𑀑𑀢𑀭𑀡𑀸.

‘‘𑀅𑀬𑀁 𑀅𑀳𑀲𑁆𑀫𑀻𑀢𑀺 𑀅𑀦𑀸𑀦𑀼𑀧𑀲𑁆𑀲𑀻’’𑀢𑀺 𑀅𑀬𑀁 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸 𑀲𑀫𑀼𑀕𑁆𑀖𑀸𑀢𑁄, 𑀲𑀸 𑀲𑁂𑀓𑁆𑀔𑀸𑀯𑀺𑀫𑀼𑀢𑁆𑀢𑀺, 𑀢𑀸𑀦𑀺𑀬𑁂𑀯 𑀲𑁂𑀓𑁆𑀔𑀸𑀦𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺. 𑀅𑀬𑀁 𑀇𑀦𑁆𑀤𑁆𑀭𑀺𑀬𑁂𑀳𑀺 𑀑𑀢𑀭𑀡𑀸.

𑀢𑀸𑀦𑀺𑀬𑁂𑀯 𑀲𑁂𑀓𑁆𑀔𑀸𑀦𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀯𑀺𑀚𑁆𑀚𑀸, 𑀯𑀺𑀚𑁆𑀚𑀼𑀧𑁆𑀧𑀸𑀤𑀸 𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑁄, 𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑀸 𑀲𑀗𑁆𑀔𑀸𑀭𑀦𑀺𑀭𑁄𑀥𑁄, 𑀏𑀯𑀁 𑀲𑀩𑁆𑀩𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄. 𑀅𑀬𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁂𑀳𑀺 𑀑𑀢𑀭𑀡𑀸.

𑀲𑀸𑀬𑁂𑀯 𑀯𑀺𑀚𑁆𑀚𑀸 𑀧𑀜𑁆𑀜𑀸𑀓𑁆𑀔𑀦𑁆𑀥𑁄. 𑀅𑀬𑀁 𑀔𑀦𑁆𑀥𑁂𑀳𑀺 𑀑𑀢𑀭𑀡𑀸.

𑀲𑀸𑀬𑁂𑀯 𑀯𑀺𑀚𑁆𑀚𑀸 𑀲𑀗𑁆𑀔𑀸𑀭𑀧𑀭𑀺𑀬𑀸𑀧𑀦𑁆𑀦𑀸, 𑀬𑁂 𑀲𑀗𑁆𑀔𑀸𑀭𑀸 𑀅𑀦𑀸𑀲𑀯𑀸, 𑀦𑁄 𑀘 𑀪𑀯𑀗𑁆𑀕𑀸, 𑀢𑁂 𑀲𑀗𑁆𑀔𑀸𑀭𑀸 𑀥𑀫𑁆𑀫𑀥𑀸𑀢𑀼𑀲𑀗𑁆𑀕𑀳𑀺𑀢𑀸, 𑀅𑀬𑀁 𑀥𑀸𑀢𑀽𑀳𑀺 𑀑𑀢𑀭𑀡𑀸.

𑀲𑀸 𑀥𑀫𑁆𑀫𑀥𑀸𑀢𑀼 𑀥𑀫𑁆𑀫𑀸𑀬𑀢𑀦𑀧𑀭𑀺𑀬𑀸𑀧𑀦𑁆𑀦𑀸, 𑀬𑀁 𑀆𑀬𑀢𑀦𑀁 𑀅𑀦𑀸𑀲𑀯𑀁, 𑀦𑁄 𑀘 𑀪𑀯𑀗𑁆𑀕𑀁, 𑀅𑀬𑀁 𑀆𑀬𑀢𑀦𑁂𑀳𑀺 𑀑𑀢𑀭𑀡𑀸.

𑀲𑁂𑀓𑁆𑀔𑀸𑀬 𑀘 𑀯𑀺𑀫𑀼𑀢𑁆𑀢𑀺𑀬𑀸 𑀅𑀲𑁂𑀓𑁆𑀔𑀸𑀬 𑀘 𑀯𑀺𑀫𑀼𑀢𑁆𑀢𑀺𑀬𑀸 𑀯𑀺𑀫𑀼𑀢𑁆𑀢𑁄 𑀉𑀤𑀢𑀸𑀭𑀺 𑀑𑀖𑀁 𑀅𑀢𑀺𑀡𑁆𑀡𑀧𑀼𑀩𑁆𑀩𑀁 𑀅𑀧𑀼𑀦𑀩𑁆𑀪𑀯𑀸𑀬. 𑀢𑁂𑀦𑀸𑀳 𑀪𑀕𑀯𑀸 ‘‘𑀉𑀤𑁆𑀥𑀁 𑀅𑀥𑁄’’𑀢𑀺.

𑁪𑁩. ‘‘𑀦𑀺𑀲𑁆𑀲𑀺𑀢𑀲𑁆𑀲 [𑀧𑀲𑁆𑀲 𑀉𑀤𑀸. 𑁭𑁪] 𑀘𑀮𑀺𑀢𑀁, 𑀅𑀦𑀺𑀲𑁆𑀲𑀺𑀢𑀲𑁆𑀲 𑀘𑀮𑀺𑀢𑀁 𑀦𑀢𑁆𑀣𑀺, 𑀘𑀮𑀺𑀢𑁂 𑀅𑀲𑀢𑀺 𑀧𑀲𑁆𑀲𑀤𑁆𑀥𑀺, 𑀧𑀲𑁆𑀲𑀤𑁆𑀥𑀺𑀬𑀸 𑀲𑀢𑀺 𑀦𑀢𑀺 𑀦 𑀳𑁄𑀢𑀺, 𑀦𑀢𑀺𑀬𑀸 𑀅𑀲𑀢𑀺 𑀆𑀕𑀢𑀺𑀕𑀢𑀺 𑀦 𑀳𑁄𑀢𑀺, 𑀆𑀕𑀢𑀺𑀕𑀢𑀺𑀬𑀸 𑀅𑀲𑀢𑀺 𑀘𑀼𑀢𑀽𑀧𑀧𑀸𑀢𑁄 𑀦 𑀳𑁄𑀢𑀺, 𑀘𑀼𑀢𑀽𑀧𑀧𑀸𑀢𑁂 𑀅𑀲𑀢𑀺 𑀦𑁂𑀯𑀺𑀥 𑀦 𑀳𑀼𑀭𑀁 𑀦 𑀉𑀪𑀬𑀫𑀦𑁆𑀢𑀭𑁂𑀦 𑀏𑀲𑁂𑀯𑀦𑁆𑀢𑁄 𑀤𑀼𑀓𑁆𑀔𑀲𑁆𑀲𑀸’’𑀢𑀺.

‘‘𑀦𑀺𑀲𑁆𑀲𑀺𑀢𑀲𑁆𑀲 𑀘𑀮𑀺𑀢’’𑀦𑁆𑀢𑀺 𑀦𑀺𑀲𑁆𑀲𑀬𑁄 𑀦𑀸𑀫 𑀤𑀼𑀯𑀺𑀥𑁄 𑀢𑀡𑁆𑀳𑀸𑀦𑀺𑀲𑁆𑀲𑀬𑁄 𑀘 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑁄 𑀘. 𑀢𑀢𑁆𑀣 𑀬𑀸 𑀭𑀢𑁆𑀢𑀲𑁆𑀲 𑀘𑁂𑀢𑀦𑀸, 𑀅𑀬𑀁 𑀢𑀡𑁆𑀳𑀸𑀦𑀺𑀲𑁆𑀲𑀬𑁄; 𑀬𑀸 𑀫𑀽𑀴𑁆𑀳𑀲𑁆𑀲 𑀘𑁂𑀢𑀦𑀸, 𑀅𑀬𑀁 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑁄. 𑀘𑁂𑀢𑀦𑀸 𑀧𑀦 𑀲𑀗𑁆𑀔𑀸𑀭𑀸, 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁, 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀁, 𑀏𑀯𑀁 𑀲𑀩𑁆𑀩𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄. 𑀅𑀬𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁂𑀳𑀺 𑀑𑀢𑀭𑀡𑀸.

𑀢𑀢𑁆𑀣 𑀬𑀸 𑀭𑀢𑁆𑀢𑀲𑁆𑀲 𑀯𑁂𑀤𑀦𑀸, 𑀅𑀬𑀁 𑀲𑀼𑀔𑀸 𑀯𑁂𑀤𑀦𑀸. 𑀬𑀸 𑀲𑀫𑁆𑀫𑀽𑀴𑁆𑀳𑀲𑁆𑀲 𑀯𑁂𑀤𑀦𑀸, 𑀅𑀬𑀁 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸, 𑀇𑀫𑀸 𑀤𑁆𑀯𑁂 𑀯𑁂𑀤𑀦𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄. 𑀅𑀬𑀁 𑀔𑀦𑁆𑀥𑁂𑀳𑀺 𑀑𑀢𑀭𑀡𑀸.

𑀢𑀢𑁆𑀣 𑀲𑀼𑀔𑀸 𑀯𑁂𑀤𑀦𑀸 𑀤𑁆𑀯𑁂 𑀇𑀦𑁆𑀤𑁆𑀭𑀺𑀬𑀸𑀦𑀺 𑀲𑀼𑀔𑀺𑀦𑁆𑀤𑁆𑀭𑀺𑀬𑀁 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀜𑁆𑀘, 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸 𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀁. 𑀅𑀬𑀁 𑀇𑀦𑁆𑀤𑁆𑀭𑀺𑀬𑁂𑀳𑀺 𑀑𑀢𑀭𑀡𑀸.

𑀢𑀸𑀦𑀺𑀬𑁂𑀯 𑀇𑀦𑁆𑀤𑁆𑀭𑀺𑀬𑀸𑀦𑀺 𑀲𑀗𑁆𑀔𑀸𑀭𑀧𑀭𑀺𑀬𑀸𑀧𑀦𑁆𑀦𑀸𑀦𑀺, 𑀬𑁂 𑀲𑀗𑁆𑀔𑀸𑀭𑀸 𑀲𑀸𑀲𑀯𑀸 𑀪𑀯𑀗𑁆𑀕𑀸, 𑀢𑁂 𑀲𑀗𑁆𑀔𑀸𑀭𑀸 𑀥𑀫𑁆𑀫𑀥𑀸𑀢𑀼𑀲𑀗𑁆𑀕𑀳𑀺𑀢𑀸. 𑀅𑀬𑀁 𑀥𑀸𑀢𑀽𑀳𑀺 𑀑𑀢𑀭𑀡𑀸.

𑀲𑀸 𑀥𑀫𑁆𑀫𑀥𑀸𑀢𑀼 𑀥𑀫𑁆𑀫𑀸𑀬𑀢𑀦𑀧𑀭𑀺𑀬𑀸𑀧𑀦𑁆𑀦𑀸, 𑀬𑀁 𑀆𑀬𑀢𑀦𑀁 𑀲𑀸𑀲𑀯𑀁 𑀪𑀯𑀗𑁆𑀕𑀁, 𑀅𑀬𑀁 𑀆𑀬𑀢𑀦𑁂𑀳𑀺 𑀑𑀢𑀭𑀡𑀸.

‘‘𑀅𑀦𑀺𑀲𑁆𑀲𑀺𑀢𑀲𑁆𑀲 𑀘𑀮𑀺𑀢𑀁 𑀦𑀢𑁆𑀣𑀻’’𑀢𑀺 𑀲𑀫𑀣𑀯𑀲𑁂𑀦 𑀯𑀸 𑀢𑀡𑁆𑀳𑀸𑀬 𑀅𑀦𑀺𑀲𑁆𑀲𑀺𑀢𑁄 𑀯𑀺𑀧𑀲𑁆𑀲𑀦𑀸𑀯𑀲𑁂 𑀯𑀸 𑀤𑀺𑀝𑁆𑀞𑀺𑀬𑀸 𑀅𑀦𑀺𑀲𑁆𑀲𑀺𑀢𑁄. 𑀬𑀸 𑀯𑀺𑀧𑀲𑁆𑀲𑀦𑀸 𑀅𑀬𑀁 𑀯𑀺𑀚𑁆𑀚𑀸, 𑀯𑀺𑀚𑁆𑀚𑀼𑀧𑁆𑀧𑀸𑀤𑀸 𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑁄, 𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑀸 𑀲𑀗𑁆𑀔𑀸𑀭𑀦𑀺𑀭𑁄𑀥𑁄, 𑀲𑀗𑁆𑀔𑀸𑀭𑀦𑀺𑀭𑁄𑀥𑀸 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑁄, 𑀏𑀯𑀁 𑀲𑀩𑁆𑀩𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄. 𑀅𑀬𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁂𑀳𑀺 𑀑𑀢𑀭𑀡𑀸.

𑀲𑀸𑀬𑁂𑀯 𑀯𑀺𑀧𑀲𑁆𑀲𑀦𑀸 𑀧𑀜𑁆𑀜𑀸𑀓𑁆𑀔𑀦𑁆𑀥𑁄. 𑀅𑀬𑀁 𑀔𑀦𑁆𑀥𑁂𑀳𑀺 𑀑𑀢𑀭𑀡𑀸.

𑀲𑀸𑀬𑁂𑀯 𑀯𑀺𑀧𑀲𑁆𑀲𑀦𑀸 𑀤𑁆𑀯𑁂 𑀇𑀦𑁆𑀤𑁆𑀭𑀺𑀬𑀸𑀦𑀺 𑁋 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀜𑁆𑀘 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀜𑁆𑀘. 𑀅𑀬𑀁 𑀇𑀦𑁆𑀤𑁆𑀭𑀺𑀬𑁂𑀳𑀺 𑀑𑀢𑀭𑀡𑀸.

𑀲𑀸𑀬𑁂𑀯 𑀯𑀺𑀧𑀲𑁆𑀲𑀦𑀸 𑀲𑀗𑁆𑀔𑀸𑀭𑀧𑀭𑀺𑀬𑀸𑀧𑀦𑁆𑀦𑀸, 𑀬𑁂 𑀲𑀗𑁆𑀔𑀸𑀭𑀸 𑀅𑀦𑀸𑀲𑀯𑀸, 𑀦𑁄 𑀘 𑀪𑀯𑀗𑁆𑀕𑀸, 𑀢𑁂 𑀲𑀗𑁆𑀔𑀸𑀭𑀸 𑀥𑀫𑁆𑀫𑀥𑀸𑀢𑀼𑀲𑀗𑁆𑀕𑀳𑀺𑀢𑀸. 𑀅𑀬𑀁 𑀥𑀸𑀢𑀽𑀳𑀺 𑀑𑀢𑀭𑀡𑀸.

‘‘𑀧𑀲𑁆𑀲𑀤𑁆𑀥𑀺𑀬𑀸 𑀲𑀢𑀻’’𑀢𑀺 𑀤𑀼𑀯𑀺𑀥𑀸 𑀧𑀲𑁆𑀲𑀤𑁆𑀥𑀺 𑀓𑀸𑀬𑀺𑀓𑀸 𑀘 𑀘𑁂𑀢𑀲𑀺𑀓𑀸 𑀘. 𑀬𑀁 𑀓𑀸𑀬𑀺𑀓𑀁 𑀲𑀼𑀔𑀁, 𑀅𑀬𑀁 𑀓𑀸𑀬𑀧𑀲𑁆𑀲𑀤𑁆𑀥𑀺. 𑀬𑀁 𑀘𑁂𑀢𑀲𑀺𑀓𑀁 𑀲𑀼𑀔𑀁, 𑀅𑀬𑀁 𑀘𑁂𑀢𑀲𑀺𑀓𑀸 𑀧𑀲𑁆𑀲𑀤𑁆𑀥𑀺. 𑀧𑀲𑁆𑀲𑀤𑁆𑀥𑀓𑀸𑀬𑁄 𑀲𑀼𑀔𑀁 𑀯𑁂𑀤𑀺𑀬𑀢𑀺 [𑀯𑁂𑀤𑀬𑀢𑀺 (𑀓.)], 𑀲𑀼𑀔𑀺𑀦𑁄 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀺, 𑀲𑀫𑀸𑀳𑀺𑀢𑁄 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀬𑀣𑀸𑀪𑀽𑀢𑀁 𑀧𑀚𑀸𑀦𑀦𑁆𑀢𑁄 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀦𑀺𑀩𑁆𑀩𑀺𑀦𑁆𑀤𑀦𑁆𑀢𑁄 𑀯𑀺𑀭𑀚𑁆𑀚𑀢𑀺, 𑀯𑀺𑀭𑀸𑀕𑀸 𑀯𑀺𑀫𑀼𑀘𑁆𑀘𑀢𑀺, 𑀯𑀺𑀫𑀼𑀢𑁆𑀢𑀲𑁆𑀫𑀺𑀁 ‘‘𑀯𑀺𑀫𑀼𑀢𑁆𑀢’’𑀫𑀺𑀢𑀺 [𑀯𑀺𑀫𑀼𑀢𑁆𑀢𑀫𑁆𑀳𑀻𑀢𑀺 (𑀲𑀻. 𑀓.)] 𑀜𑀸𑀡𑀁 𑀳𑁄𑀢𑀺, ‘‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’’𑀢𑀺 𑀧𑀚𑀸𑀦𑀸𑀢𑀺. 𑀲𑁄 𑀦 𑀦𑀫𑀢𑀺 𑀭𑀽𑀧𑁂𑀲𑀼, 𑀦 𑀲𑀤𑁆𑀤𑁂𑀲𑀼, 𑀦 𑀕𑀦𑁆𑀥𑁂𑀲𑀼, 𑀦 𑀭𑀲𑁂𑀲𑀼, 𑀦 𑀨𑁄𑀝𑁆𑀞𑀩𑁆𑀩𑁂𑀲𑀼, 𑀦 𑀥𑀫𑁆𑀫𑁂𑀲𑀼 𑀔𑀬𑀸 𑀭𑀸𑀕𑀲𑁆𑀲 𑀔𑀬𑀸 𑀤𑁄𑀲𑀲𑁆𑀲 𑀔𑀬𑀸 𑀫𑁄𑀳𑀲𑁆𑀲 𑀬𑁂𑀦 𑀭𑀽𑀧𑁂𑀦 𑀢𑀣𑀸𑀕𑀢𑀁 𑀢𑀺𑀝𑁆𑀞𑀦𑁆𑀢𑀁 𑀘𑀭𑀦𑁆𑀢𑀁 𑀧𑀜𑁆𑀜𑀸𑀧𑀬𑀫𑀸𑀦𑁄 𑀧𑀜𑁆𑀜𑀸𑀧𑁂𑀬𑁆𑀬, 𑀢𑀲𑁆𑀲 𑀭𑀽𑀧𑀲𑁆𑀲 𑀔𑀬𑀸 𑀯𑀺𑀭𑀸𑀕𑀸 𑀦𑀺𑀭𑁄𑀥𑀸 𑀘𑀸𑀕𑀸 𑀧𑀝𑀺𑀦𑀺𑀲𑁆𑀲𑀕𑁆𑀕𑀸 𑀭𑀽𑀧𑀲𑀗𑁆𑀔𑀬𑁂 𑀯𑀺𑀫𑀼𑀢𑁆𑀢𑁄, 𑀢𑀣𑀸𑀕𑀢𑁄 𑀅𑀢𑁆𑀣𑀻𑀢𑀺𑀧𑀺 𑀦 𑀉𑀧𑁂𑀢𑀺, 𑀦𑀢𑁆𑀣𑀻𑀢𑀺𑀧𑀺 𑀦 𑀉𑀧𑁂𑀢𑀺, 𑀅𑀢𑁆𑀣𑀺 𑀦𑀢𑁆𑀣𑀻𑀢𑀺𑀧𑀺 𑀦 𑀉𑀧𑁂𑀢𑀺, 𑀦𑁂𑀯𑀢𑁆𑀣𑀺 𑀦𑁄 𑀦𑀢𑁆𑀣𑀻𑀢𑀺𑀧𑀺 𑀦 𑀉𑀧𑁂𑀢𑀺. 𑀅𑀣 𑀔𑁄 𑀕𑀫𑁆𑀪𑀻𑀭𑁄 𑀅𑀧𑁆𑀧𑀫𑁂𑀬𑁆𑀬𑁄 𑀅𑀲𑀗𑁆𑀔𑁂𑀬𑁆𑀬𑁄 𑀦𑀺𑀩𑁆𑀩𑀼𑀢𑁄𑀢𑀺𑀬𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺 𑀔𑀬𑀸 𑀭𑀸𑀕𑀲𑁆𑀲, 𑀔𑀬𑀸 𑀤𑁄𑀲𑀲𑁆𑀲, 𑀔𑀬𑀸 𑀫𑁄𑀳𑀲𑁆𑀲.

𑀬𑀸𑀬 𑀯𑁂𑀤𑀦𑀸𑀬…𑀧𑁂… 𑀬𑀸𑀬 𑀲𑀜𑁆𑀜𑀸𑀬. 𑀬𑁂𑀳𑀺 𑀲𑀗𑁆𑀔𑀸𑀭𑁂𑀳𑀺. 𑀬𑁂𑀦 𑀯𑀺𑀜𑁆𑀜𑀸𑀡𑁂𑀦 𑀢𑀣𑀸𑀕𑀢𑀁 𑀢𑀺𑀝𑁆𑀞𑀦𑁆𑀢𑀁 𑀘𑀭𑀦𑁆𑀢𑀁 𑀧𑀜𑁆𑀜𑀸𑀧𑀬𑀫𑀸𑀦𑁄 𑀧𑀜𑁆𑀜𑀸𑀧𑁂𑀬𑁆𑀬, 𑀢𑀲𑁆𑀲 𑀯𑀺𑀜𑁆𑀜𑀸𑀡𑀲𑁆𑀲 𑀔𑀬𑀸 𑀯𑀺𑀭𑀸𑀕𑀸 𑀦𑀺𑀭𑁄𑀥𑀸 𑀘𑀸𑀕𑀸 𑀧𑀝𑀺𑀦𑀺𑀲𑁆𑀲𑀕𑁆𑀕𑀸 𑀯𑀺𑀜𑁆𑀜𑀸𑀡𑀲𑀗𑁆𑀔𑀬𑁂 𑀯𑀺𑀫𑀼𑀢𑁆𑀢𑁄, 𑀢𑀣𑀸𑀕𑀢𑁄 𑀅𑀢𑁆𑀣𑀻𑀢𑀺𑀧𑀺 𑀦 𑀉𑀧𑁂𑀢𑀺, 𑀦𑀢𑁆𑀣𑀻𑀢𑀺𑀧𑀺 𑀦 𑀉𑀧𑁂𑀢𑀺, 𑀅𑀢𑁆𑀣𑀺 𑀦𑀢𑁆𑀣𑀻𑀢𑀺𑀧𑀺 𑀦 𑀉𑀧𑁂𑀢𑀺, 𑀦𑁂𑀯𑀢𑁆𑀣𑀺 𑀦𑁄 𑀦𑀢𑁆𑀣𑀻𑀢𑀺𑀧𑀺 𑀦 𑀉𑀧𑁂𑀢𑀺. 𑀅𑀣 𑀔𑁄 𑀕𑀫𑁆𑀪𑀻𑀭𑁄 𑀅𑀧𑁆𑀧𑀫𑁂𑀬𑁆𑀬𑁄 𑀅𑀲𑀗𑁆𑀔𑁂𑀬𑁆𑀬𑁄 𑀦𑀺𑀩𑁆𑀩𑀼𑀢𑁄𑀢𑀺𑀬𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺 𑀔𑀬𑀸 𑀭𑀸𑀕𑀲𑁆𑀲, 𑀔𑀬𑀸 𑀤𑁄𑀲𑀲𑁆𑀲, 𑀔𑀬𑀸 𑀫𑁄𑀳𑀲𑁆𑀲. ‘‘𑀆𑀕𑀢𑀻’’𑀢𑀺 𑀇𑀥𑀸𑀕𑀢𑀺. ‘‘𑀕𑀢𑀻’’𑀢𑀺 𑀧𑁂𑀘𑁆𑀘𑀪𑀯𑁄. 𑀆𑀕𑀢𑀺𑀕𑀢𑀻𑀧𑀺 𑀦 𑀪𑀯𑀦𑁆𑀢𑀺, ‘‘𑀦𑁂𑀯𑀺𑀥𑀸’’𑀢𑀺 𑀙𑀲𑀼 𑀅𑀚𑁆𑀛𑀢𑁆𑀢𑀺𑀓𑁂𑀲𑀼 𑀆𑀬𑀢𑀦𑁂𑀲𑀼. ‘‘𑀦 𑀳𑀼𑀭’’𑀦𑁆𑀢𑀺 𑀙𑀲𑀼 𑀩𑀸𑀳𑀺𑀭𑁂𑀲𑀼 𑀆𑀬𑀢𑀦𑁂𑀲𑀼. ‘‘𑀦 𑀉𑀪𑀬𑀫𑀦𑁆𑀢𑀭𑁂𑀦𑀸’’𑀢𑀺 𑀨𑀲𑁆𑀲𑀲𑀫𑀼𑀤𑀺𑀢𑁂𑀲𑀼 𑀥𑀫𑁆𑀫𑁂𑀲𑀼 𑀅𑀢𑁆𑀢𑀸𑀦𑀁 𑀦 𑀧𑀲𑁆𑀲𑀢𑀺. ‘‘𑀏𑀲𑁂𑀯𑀦𑁆𑀢𑁄 𑀤𑀼𑀓𑁆𑀔𑀲𑁆𑀲𑀸’’𑀢𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄. 𑀲𑁄 𑀤𑀼𑀯𑀺𑀥𑁄 𑀮𑁄𑀓𑀺𑀬𑁄 𑀘 𑀮𑁄𑀓𑀼𑀢𑁆𑀢𑀭𑁄 𑀘. 𑀢𑀢𑁆𑀣 𑀮𑁄𑀓𑀺𑀬𑁄 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸, 𑀬𑀸𑀯 𑀚𑀭𑀸𑀫𑀭𑀡𑀸. 𑀮𑁄𑀓𑀼𑀢𑁆𑀢𑀭𑁄 𑀲𑀻𑀮𑀯𑀢𑁄 𑀅𑀯𑀺𑀧𑁆𑀧𑀝𑀺𑀲𑀸𑀭𑁄 𑀚𑀸𑀬𑀢𑀺, 𑀬𑀸𑀯 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀧𑀚𑀸𑀦𑀸𑀢𑀺. 𑀢𑁂𑀦𑀸𑀳 𑀪𑀕𑀯𑀸 ‘‘𑀦𑀺𑀲𑁆𑀲𑀺𑀢𑀲𑁆𑀲 𑀘𑀮𑀺𑀢𑀁 𑀅𑀦𑀺𑀲𑁆𑀲𑀺𑀢𑀲𑁆𑀲 𑀘𑀮𑀺𑀢𑀁 𑀦𑀢𑁆𑀣𑀺…𑀧𑁂… 𑀏𑀲𑁂𑀯𑀦𑁆𑀢𑁄 𑀤𑀼𑀓𑁆𑀔𑀲𑁆𑀲𑀸’’𑀢𑀺.

𑁪𑁪. ‘‘𑀬𑁂 𑀓𑁂𑀘𑀺 𑀲𑁄𑀓𑀸 𑀧𑀭𑀺𑀤𑁂𑀯𑀺𑀢𑀸 𑀯𑀸, 𑀤𑀼𑀓𑁆𑀔𑀸 [𑀤𑀼𑀓𑁆𑀔𑀁 (𑀲𑀻. 𑀓.) 𑀧𑀲𑁆𑀲 𑀉𑀤𑀸. 𑁭𑁮] 𑀘 𑀮𑁄𑀓𑀲𑁆𑀫𑀺𑀫𑀦𑁂𑀓𑀭𑀽𑀧𑀸;

𑀧𑀺𑀬𑀁 𑀧𑀝𑀺𑀘𑁆𑀘𑀧𑁆𑀧𑀪𑀯𑀦𑁆𑀢𑀺 𑀏𑀢𑁂, 𑀧𑀺𑀬𑁂 𑀅𑀲𑀦𑁆𑀢𑁂 𑀦 𑀪𑀯𑀦𑁆𑀢𑀺 𑀏𑀢𑁂.

𑀢𑀲𑁆𑀫𑀸 𑀳𑀺 𑀢𑁂 𑀲𑀼𑀔𑀺𑀦𑁄 𑀯𑀻𑀢𑀲𑁄𑀓𑀸, 𑀬𑁂𑀲𑀁 𑀧𑀺𑀬𑀁 𑀦𑀢𑁆𑀣𑀺 𑀓𑀼𑀳𑀺𑀜𑁆𑀘𑀺 𑀮𑁄𑀓𑁂;

𑀢𑀲𑁆𑀫𑀸 𑀅𑀲𑁄𑀓𑀁 𑀯𑀺𑀭𑀚𑀁 𑀧𑀢𑁆𑀣𑀬𑀸𑀦𑁄, 𑀧𑀺𑀬𑀁 𑀦 𑀓𑀬𑀺𑀭𑀸𑀣 𑀓𑀼𑀳𑀺𑀜𑁆𑀘𑀺 𑀮𑁄𑀓𑁂’’𑀢𑀺.

‘‘𑀬𑁂 𑀓𑁂𑀘𑀺 𑀲𑁄𑀓𑀸 𑀧𑀭𑀺𑀤𑁂𑀯𑀺𑀢𑀸 𑀯𑀸, 𑀤𑀼𑀓𑁆𑀔𑀸 𑀘 𑀮𑁄𑀓𑀲𑁆𑀫𑀺𑀫𑀦𑁂𑀓𑀭𑀽𑀧𑀸 𑀧𑀺𑀬𑀁 𑀧𑀝𑀺𑀘𑁆𑀘𑀧𑁆𑀧𑀪𑀯𑀦𑁆𑀢𑀺 𑀏𑀢𑁂’’𑀢𑀺 𑁋 𑀅𑀬𑀁 𑀤𑀼𑀓𑁆𑀔𑀸 𑀯𑁂𑀤𑀦𑀸. ‘‘𑀧𑀺𑀬𑁂 𑀅𑀲𑀦𑁆𑀢𑁂 𑀦 𑀪𑀯𑀦𑁆𑀢𑀺 𑀏𑀢𑁂’’𑀢𑀺 𑁋 𑀅𑀬𑀁 𑀲𑀼𑀔𑀸 𑀯𑁂𑀤𑀦𑀸. 𑀯𑁂𑀤𑀦𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄. 𑀅𑀬𑀁 𑀔𑀦𑁆𑀥𑁂𑀳𑀺 𑀑𑀢𑀭𑀡𑀸.

𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸, 𑀢𑀡𑁆𑀳𑀸𑀧𑀘𑁆𑀘𑀬𑀸 𑀉𑀧𑀸𑀤𑀸𑀦𑀁, 𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄, 𑀪𑀯𑀧𑀘𑁆𑀘𑀬𑀸 𑀚𑀸𑀢𑀺, 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀁, 𑀏𑀯𑀁 𑀲𑀩𑁆𑀩𑀁. 𑀅𑀬𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁂𑀳𑀺 𑀑𑀢𑀭𑀡𑀸.

𑀢𑀢𑁆𑀣 𑀲𑀼𑀔𑀸 𑀯𑁂𑀤𑀦𑀸 𑀤𑁆𑀯𑁂 𑀇𑀦𑁆𑀤𑁆𑀭𑀺𑀬𑀸𑀦𑀺 𑁋 𑀲𑀼𑀔𑀺𑀦𑁆𑀤𑁆𑀭𑀺𑀬𑀁 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀜𑁆𑀘. 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀤𑁆𑀯𑁂 𑀇𑀦𑁆𑀤𑁆𑀭𑀺𑀬𑀸𑀦𑀺 𑁋 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀜𑁆𑀘. 𑀅𑀬𑀁 𑀇𑀦𑁆𑀤𑁆𑀭𑀺𑀬𑁂𑀳𑀺 𑀑𑀢𑀭𑀡𑀸.

𑀲𑀸 𑀥𑀫𑁆𑀫𑀥𑀸𑀢𑀼 𑀥𑀫𑁆𑀫𑀸𑀬𑀢𑀦𑀧𑀭𑀺𑀬𑀸𑀧𑀦𑁆𑀦𑀸, 𑀬𑀁 𑀆𑀬𑀢𑀦𑀁 𑀲𑀸𑀲𑀯𑀁 𑀪𑀯𑀗𑁆𑀕𑀁. 𑀅𑀬𑀁 𑀆𑀬𑀢𑀦𑁂𑀳𑀺 𑀑𑀢𑀭𑀡𑀸.

𑀢𑀲𑁆𑀫𑀸 𑀳𑀺 𑀢𑁂 𑀲𑀼𑀔𑀺𑀦𑁄 𑀯𑀻𑀢𑀲𑁄𑀓𑀸, 𑀬𑁂𑀲𑀁 𑀧𑀺𑀬𑀁 𑀦𑀢𑁆𑀣𑀺 𑀓𑀼𑀳𑀺𑀜𑁆𑀘𑀺 𑀮𑁄𑀓𑁂;

𑀢𑀲𑁆𑀫𑀸 𑀅𑀲𑁄𑀓𑀁 𑀯𑀺𑀭𑀚𑀁 𑀧𑀢𑁆𑀣𑀬𑀸𑀦𑁄, 𑀧𑀺𑀬𑀁 𑀦 𑀓𑀬𑀺𑀭𑀸𑀣 𑀓𑀼𑀳𑀺𑀜𑁆𑀘𑀺 𑀮𑁄𑀓𑁂𑀢𑀺.

𑀇𑀤𑀁 𑀢𑀡𑁆𑀳𑀸𑀧𑀳𑀸𑀦𑀁. 𑀢𑀡𑁆𑀳𑀸𑀦𑀺𑀭𑁄𑀥𑀸 𑀉𑀧𑀸𑀤𑀸𑀦𑀦𑀺𑀭𑁄𑀥𑁄, 𑀉𑀧𑀸𑀤𑀸𑀦𑀦𑀺𑀭𑁄𑀥𑀸 𑀪𑀯𑀦𑀺𑀭𑁄𑀥𑁄, 𑀏𑀯𑀁 𑀲𑀩𑁆𑀩𑀁. 𑀅𑀬𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁂𑀳𑀺 𑀑𑀢𑀭𑀡𑀸.

𑀢𑀁𑀬𑁂𑀯 𑀢𑀡𑁆𑀳𑀸𑀧𑀳𑀸𑀦𑀁 𑀲𑀫𑀣𑁄. 𑀲𑁄 𑀲𑀫𑀣𑁄 𑀤𑁆𑀯𑁂 𑀇𑀦𑁆𑀤𑁆𑀭𑀺𑀬𑀸𑀦𑀺 𑀲𑀢𑀺𑀦𑁆𑀤𑁆𑀭𑀺𑀬𑀁 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀜𑁆𑀘. 𑀅𑀬𑀁 𑀇𑀦𑁆𑀤𑁆𑀭𑀺𑀬𑁂𑀳𑀺 𑀑𑀢𑀭𑀡𑀸.

𑀲𑁄𑀬𑁂𑀯 𑀲𑀫𑀣𑁄 𑀲𑀫𑀸𑀥𑀺𑀓𑁆𑀔𑀦𑁆𑀥𑁄. 𑀅𑀬𑀁 𑀔𑀦𑁆𑀥𑁂𑀳𑀺 𑀑𑀢𑀭𑀡𑀸.

𑀲𑁄𑀬𑁂𑀯 𑀲𑀫𑀣𑁄 𑀲𑀗𑁆𑀔𑀸𑀭𑀧𑀭𑀺𑀬𑀸𑀧𑀦𑁆𑀦𑁄, 𑀬𑁂 𑀲𑀗𑁆𑀔𑀸𑀭𑀸 𑀅𑀦𑀸𑀲𑀯𑀸, 𑀦𑁄 𑀘 𑀪𑀯𑀗𑁆𑀕𑀸, 𑀢𑁂 𑀲𑀗𑁆𑀔𑀸𑀭𑀸 𑀥𑀫𑁆𑀫𑀥𑀸𑀢𑀼𑀲𑀗𑁆𑀕𑀳𑀺𑀢𑀸. 𑀅𑀬𑀁 𑀥𑀸𑀢𑀽𑀳𑀺 𑀑𑀢𑀭𑀡𑀸.

𑀲𑀸 𑀥𑀫𑁆𑀫𑀥𑀸𑀢𑀼 𑀥𑀫𑁆𑀫𑀸𑀬𑀢𑀦𑀧𑀭𑀺𑀬𑀸𑀧𑀦𑁆𑀦𑀸, 𑀬𑀁 𑀆𑀬𑀢𑀦𑀁 𑀅𑀦𑀸𑀲𑀯𑀁, 𑀦𑁄 𑀘 𑀪𑀯𑀗𑁆𑀕𑀁. 𑀅𑀬𑀁 𑀆𑀬𑀢𑀦𑁂𑀳𑀺 𑀑𑀢𑀭𑀡𑀸. 𑀢𑁂𑀦𑀸𑀳 𑀪𑀕𑀯𑀸 ‘‘𑀬𑁂 𑀓𑁂𑀘𑀺 𑀲𑁄𑀓𑀸’’𑀢𑀺.

𑀓𑀸𑀫𑀁 𑀓𑀸𑀫𑀬𑀫𑀸𑀦𑀲𑁆𑀲, 𑀢𑀲𑁆𑀲 𑀘𑁂 𑀢𑀁 𑀲𑀫𑀺𑀚𑁆𑀛𑀢𑀺;

𑀅𑀤𑁆𑀥𑀸 𑀧𑀻𑀢𑀺𑀫𑀦𑁄 𑀳𑁄𑀢𑀺, 𑀮𑀤𑁆𑀥𑀸 𑀫𑀘𑁆𑀘𑁄 𑀬𑀤𑀺𑀘𑁆𑀙𑀢𑀺.

𑀢𑀲𑁆𑀲 𑀘𑁂 𑀓𑀸𑀫𑀬𑀸𑀦𑀲𑁆𑀲, 𑀙𑀦𑁆𑀤𑀚𑀸𑀢𑀲𑁆𑀲 𑀚𑀦𑁆𑀢𑀼𑀦𑁄;

𑀢𑁂 𑀓𑀸𑀫𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀲𑀮𑁆𑀮𑀯𑀺𑀤𑁆𑀥𑁄𑀯 𑀭𑀼𑀧𑁆𑀧𑀢𑀺.

𑀬𑁄 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀢𑀺, 𑀲𑀧𑁆𑀧𑀲𑁆𑀲𑁂𑀯 [𑀲𑀩𑁆𑀩𑀲𑁆𑀲𑁂𑀯 (𑀓.) 𑀧𑀲𑁆𑀲 𑀲𑀼. 𑀦𑀺. 𑁭𑁭𑁪] 𑀧𑀤𑀸 𑀲𑀺𑀭𑁄;

𑀲𑁄𑀫𑀁 𑀯𑀺𑀲𑀢𑁆𑀢𑀺𑀓𑀁 𑀮𑁄𑀓𑁂, 𑀲𑀢𑁄 𑀲𑀫𑀢𑀺𑀯𑀢𑁆𑀢𑀢𑀻𑀢𑀺.

𑀢𑀢𑁆𑀣 𑀬𑀸 𑀧𑀻𑀢𑀺𑀫𑀦𑀢𑀸, 𑀅𑀬𑀁 𑀅𑀦𑀼𑀦𑀬𑁄. 𑀬𑀤𑀸𑀳 𑀲𑀮𑁆𑀮𑀯𑀺𑀤𑁆𑀥𑁄𑀯 𑀭𑀼𑀧𑁆𑀧𑀢𑀻𑀢𑀺, 𑀇𑀤𑀁 𑀧𑀝𑀺𑀖𑀁. 𑀅𑀦𑀼𑀦𑀬𑀁 𑀧𑀝𑀺𑀖𑀜𑁆𑀘 𑀧𑀦 𑀢𑀡𑁆𑀳𑀸𑀧𑀓𑁆𑀔𑁄, 𑀢𑀡𑁆𑀳𑀸𑀬 𑀘 𑀧𑀦 𑀤𑀲𑀭𑀽𑀧𑀻𑀦𑀺 𑀆𑀬𑀢𑀦𑀸𑀦𑀺 𑀧𑀤𑀝𑁆𑀞𑀸𑀦𑀁. 𑀅𑀬𑀁 𑀆𑀬𑀢𑀦𑁂𑀳𑀺 𑀑𑀢𑀭𑀡𑀸.

𑀢𑀸𑀦𑀺𑀬𑁂𑀯 𑀤𑀲 𑀭𑀽𑀧𑀻𑀦𑀺 𑀭𑀽𑀧𑀓𑀸𑀬𑁄 𑀦𑀸𑀫𑀲𑀫𑁆𑀧𑀬𑀼𑀢𑁆𑀢𑁄, 𑀢𑀤𑀼𑀪𑀬𑀁 𑀦𑀸𑀫𑀭𑀽𑀧𑀁, 𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦𑀁, 𑀲𑀴𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄, 𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸, 𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸, 𑀏𑀯𑀁 𑀲𑀩𑁆𑀩𑀁. 𑀅𑀬𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁂𑀳𑀺 𑀑𑀢𑀭𑀡𑀸.

𑀢𑀤𑁂𑀯 𑀦𑀸𑀫𑀭𑀽𑀧𑀁 𑀧𑀜𑁆𑀘𑀓𑁆𑀔𑀦𑁆𑀥𑁄; 𑀅𑀬𑀁 𑀔𑀦𑁆𑀥𑁂𑀳𑀺 𑀑𑀢𑀭𑀡𑀸;

𑀢𑀤𑁂𑀯 𑀦𑀸𑀫𑀭𑀽𑀧𑀁 𑀅𑀝𑁆𑀞𑀸𑀭𑀲 𑀥𑀸𑀢𑀼𑀬𑁄; 𑀅𑀬𑀁 𑀥𑀸𑀢𑀽𑀳𑀺 𑀑𑀢𑀭𑀡𑀸;

𑀢𑀢𑁆𑀣 𑀬𑁄 𑀭𑀽𑀧𑀓𑀸𑀬𑁄 𑀇𑀫𑀸𑀦𑀺 𑀧𑀜𑁆𑀘 𑀭𑀽𑀧𑀻𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺, 𑀬𑁄 𑀦𑀸𑀫𑀓𑀸𑀬𑁄 𑀇𑀫𑀸𑀦𑀺 𑀧𑀜𑁆𑀘 𑀅𑀭𑀽𑀧𑀻𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺, 𑀇𑀫𑀸𑀦𑀺 𑀤𑀲 𑀇𑀦𑁆𑀤𑁆𑀭𑀺𑀬𑀸𑀦𑀺. 𑀅𑀬𑀁 𑀇𑀦𑁆𑀤𑁆𑀭𑀺𑀬𑁂𑀳𑀺 𑀑𑀢𑀭𑀡𑀸.

𑀢𑀢𑁆𑀣 𑀬𑀤𑀸𑀳 𑁋

‘‘𑀬𑁄 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀢𑀺, 𑀲𑀧𑁆𑀧𑀲𑁆𑀲𑁂𑀯 𑀧𑀤𑀸 𑀲𑀺𑀭𑁄;

𑀲𑁄𑀫𑀁 𑀯𑀺𑀲𑀢𑁆𑀢𑀺𑀓𑀁 𑀮𑁄𑀓𑁂, 𑀲𑀢𑁄 𑀲𑀫𑀢𑀺𑀯𑀢𑁆𑀢𑀢𑀻’’𑀢𑀺.

𑀅𑀬𑀁 𑀲𑀉𑀧𑀸𑀤𑀺𑀲𑁂𑀲𑀸 𑀦𑀺𑀩𑁆𑀩𑀸𑀦𑀥𑀸𑀢𑀼, 𑀅𑀬𑀁 𑀥𑀸𑀢𑀽𑀳𑀺 𑀑𑀢𑀭𑀡𑀸.

𑀲𑀸𑀬𑁂𑀯 𑀲𑀉𑀧𑀸𑀤𑀺𑀲𑁂𑀲𑀸 𑀦𑀺𑀩𑁆𑀩𑀸𑀦𑀥𑀸𑀢𑀼 𑀯𑀺𑀚𑁆𑀚𑀸, 𑀯𑀺𑀚𑁆𑀚𑀼𑀧𑁆𑀧𑀸𑀤𑀸 𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑁄, 𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑀸 𑀲𑀗𑁆𑀔𑀸𑀭𑀦𑀺𑀭𑁄𑀥𑁄, 𑀏𑀯𑀁 𑀲𑀩𑁆𑀩𑀁. 𑀅𑀬𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁂𑀳𑀺 𑀑𑀢𑀭𑀡𑀸.

𑀲𑀸𑀬𑁂𑀯 𑀯𑀺𑀚𑁆𑀚𑀸 𑀧𑀜𑁆𑀜𑀸𑀓𑁆𑀔𑀦𑁆𑀥𑁄. 𑀅𑀬𑀁 𑀔𑀦𑁆𑀥𑁂𑀳𑀺 𑀑𑀢𑀭𑀡𑀸.

𑀲𑀸𑀬𑁂𑀯 𑀯𑀺𑀚𑁆𑀚𑀸 𑀤𑁆𑀯𑁂 𑀇𑀦𑁆𑀤𑁆𑀭𑀺𑀬𑀸𑀦𑀺 𑁋 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀜𑁆𑀘. 𑀅𑀬𑀁 𑀇𑀦𑁆𑀤𑁆𑀭𑀺𑀬𑁂𑀳𑀺 𑀑𑀢𑀭𑀡𑀸.

𑀲𑀸𑀬𑁂𑀯 𑀯𑀺𑀚𑁆𑀚𑀸 𑀲𑀗𑁆𑀔𑀸𑀭𑀧𑀭𑀺𑀬𑀸𑀧𑀦𑁆𑀦𑀸, 𑀬𑁂 𑀲𑀗𑁆𑀔𑀸𑀭𑀸 𑀅𑀦𑀸𑀲𑀯𑀸, 𑀦𑁄 𑀘 𑀪𑀯𑀗𑁆𑀕𑀸, 𑀢𑁂 𑀲𑀗𑁆𑀔𑀸𑀭𑀸 𑀥𑀫𑁆𑀫𑀥𑀸𑀢𑀼𑀲𑀗𑁆𑀕𑀳𑀺𑀢𑀸. 𑀅𑀬𑀁 𑀥𑀸𑀢𑀽𑀳𑀺 𑀑𑀢𑀭𑀡𑀸.

𑀲𑀸 𑀥𑀫𑁆𑀫𑀥𑀸𑀢𑀼 𑀥𑀫𑁆𑀫𑀸𑀬𑀢𑀦𑀧𑀭𑀺𑀬𑀸𑀧𑀦𑁆𑀦𑀸, 𑀬𑀁 𑀆𑀬𑀢𑀦𑀁 𑀅𑀦𑀸𑀲𑀯𑀁, 𑀦𑁄 𑀘 𑀪𑀯𑀗𑁆𑀕𑀁. 𑀅𑀬𑀁 𑀆𑀬𑀢𑀦𑁂𑀳𑀺 𑀑𑀢𑀭𑀡𑀸. 𑀢𑁂𑀦𑀸𑀳 𑀪𑀕𑀯𑀸 ‘‘𑀓𑀸𑀫𑀁 𑀓𑀸𑀫𑀬𑀫𑀸𑀦𑀲𑁆𑀲𑀸’’𑀢𑀺.

𑀏𑀢𑁆𑀢𑀸𑀯𑀢𑀸 𑀧𑀝𑀺𑀘𑁆𑀘 𑀇𑀦𑁆𑀤𑁆𑀭𑀺𑀬𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑀸𑀦𑀺 𑀲𑀫𑁄𑀲𑀭𑀡𑁄𑀢𑀭𑀡𑀸𑀦𑀺 𑀪𑀯𑀦𑁆𑀢𑀺. 𑀏𑀯𑀁 𑀧𑀝𑀺𑀘𑁆𑀘 𑀇𑀦𑁆𑀤𑁆𑀭𑀺𑀬𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑀸𑀦𑀺 𑀑𑀢𑀸𑀭𑁂𑀢𑀩𑁆𑀩𑀸𑀦𑀺. 𑀢𑁂𑀦𑀸𑀳 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀬𑀦𑁄 ‘‘𑀬𑁄 𑀘 𑀧𑀝𑀺𑀘𑁆𑀘𑀼𑀧𑁆𑀧𑀸𑀤𑁄’’𑀢𑀺.

𑀦𑀺𑀬𑀼𑀢𑁆𑀢𑁄 𑀑𑀢𑀭𑀡𑁄 𑀳𑀸𑀭𑁄.