𑁧𑁩. 𑀲𑁄𑀥𑀦𑀳𑀸𑀭𑀯𑀺𑀪𑀗𑁆𑀕𑁄

𑁪𑁫. 𑀢𑀢𑁆𑀣 𑀓𑀢𑀫𑁄 𑀲𑁄𑀥𑀦𑁄 𑀳𑀸𑀭𑁄? ‘‘𑀯𑀺𑀲𑁆𑀲𑀚𑁆𑀚𑀺𑀢𑀫𑁆𑀳𑀺 𑀧𑀜𑁆𑀳𑁂’’𑀢𑀺𑀕𑀸𑀣𑀸. 𑀬𑀣𑀸 𑀆𑀬𑀲𑁆𑀫𑀸 𑀅𑀚𑀺𑀢𑁄 𑀧𑀸𑀭𑀸𑀬𑀦𑁂 𑀪𑀕𑀯𑀦𑁆𑀢𑀁 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺 𑁋

‘‘𑀓𑁂𑀦𑀲𑁆𑀲𑀼 𑀦𑀺𑀯𑀼𑀢𑁄 𑀮𑁄𑀓𑁄, 𑀓𑁂𑀦𑀲𑁆𑀲𑀼 𑀦𑀧𑁆𑀧𑀓𑀸𑀲𑀢𑀺;

𑀓𑀺𑀲𑁆𑀲𑀸𑀪𑀺𑀮𑁂𑀧𑀦𑀁 𑀩𑁆𑀭𑀽𑀲𑀺, 𑀓𑀺𑀁𑀲𑀼 𑀢𑀲𑁆𑀲 𑀫𑀳𑀩𑁆𑀪𑀬’’𑀦𑁆𑀢𑀺.

‘‘𑀅𑀯𑀺𑀚𑁆𑀚𑀸𑀬 𑀦𑀺𑀯𑀼𑀢𑁄 𑀮𑁄𑀓𑁄, [𑀅𑀚𑀺𑀢𑀸𑀢𑀺 𑀪𑀕𑀯𑀸]

𑀯𑀺𑀯𑀺𑀘𑁆𑀙𑀸 𑀧𑀫𑀸𑀤𑀸 𑀦𑀧𑁆𑀧𑀓𑀸𑀲𑀢𑀺;

𑀚𑀧𑁆𑀧𑀸𑀪𑀺𑀮𑁂𑀧𑀦𑀁 𑀩𑁆𑀭𑀽𑀫𑀺, 𑀤𑀼𑀓𑁆𑀔𑀫𑀲𑁆𑀲 𑀫𑀳𑀩𑁆𑀪𑀬’’𑀦𑁆𑀢𑀺.

‘‘𑀓𑁂𑀦𑀲𑁆𑀲𑀼 𑀦𑀺𑀯𑀼𑀢𑁄 𑀮𑁄𑀓𑁄’’𑀢𑀺 𑀧𑀜𑁆𑀳𑁂 ‘‘𑀅𑀯𑀺𑀚𑁆𑀚𑀸𑀬 𑀦𑀺𑀯𑀼𑀢𑁄 𑀮𑁄𑀓𑁄’’𑀢𑀺 𑀪𑀕𑀯𑀸 𑀧𑀤𑀁 𑀲𑁄𑀥𑁂𑀢𑀺, 𑀦𑁄 𑀘 𑀆𑀭𑀫𑁆𑀪𑀁. ‘‘𑀓𑁂𑀦𑀲𑁆𑀲𑀼 𑀦𑀧𑁆𑀧𑀓𑀸𑀲𑀢𑀻’’𑀢𑀺 𑀧𑀜𑁆𑀳𑁂 ‘‘𑀯𑀺𑀯𑀺𑀘𑁆𑀙𑀸 𑀧𑀫𑀸𑀤𑀸 𑀦𑀧𑁆𑀧𑀓𑀸𑀲𑀢𑀻’’𑀢𑀺 𑀪𑀕𑀯𑀸 𑀧𑀤𑀁 𑀲𑁄𑀥𑁂𑀢𑀺, 𑀦𑁄 𑀘 𑀆𑀭𑀫𑁆𑀪𑀁. ‘‘𑀓𑀺𑀲𑁆𑀲𑀸𑀪𑀺𑀮𑁂𑀧𑀦𑀁 𑀩𑁆𑀭𑀽𑀲𑀻’’𑀢𑀺 𑀧𑀜𑁆𑀳𑁂 ‘‘𑀚𑀧𑁆𑀧𑀸𑀪𑀺𑀮𑁂𑀧𑀦𑀁 𑀩𑁆𑀭𑀽𑀫𑀻’’𑀢𑀺 𑀪𑀕𑀯𑀸 𑀧𑀤𑀁 𑀲𑁄𑀥𑁂𑀢𑀺, 𑀦𑁄 𑀘 𑀆𑀭𑀫𑁆𑀪𑀁. ‘‘𑀓𑀺𑀁𑀲𑀼 𑀢𑀲𑁆𑀲 𑀫𑀳𑀩𑁆𑀪𑀬’’𑀦𑁆𑀢𑀺 𑀧𑀜𑁆𑀳𑁂 ‘‘𑀤𑀼𑀓𑁆𑀔𑀫𑀲𑁆𑀲 𑀫𑀳𑀩𑁆𑀪𑀬’’𑀦𑁆𑀢𑀺 𑀲𑀼𑀤𑁆𑀥𑁄 𑀆𑀭𑀫𑁆𑀪𑁄. 𑀢𑁂𑀦𑀸𑀳 𑀪𑀕𑀯𑀸 ‘‘𑀅𑀯𑀺𑀚𑁆𑀚𑀸𑀬 𑀦𑀺𑀯𑀼𑀢𑁄 𑀮𑁄𑀓𑁄’’𑀢𑀺.

‘‘𑀲𑀯𑀦𑁆𑀢𑀺 𑀲𑀩𑁆𑀩𑀥𑀺 𑀲𑁄𑀢𑀸, [𑀇𑀘𑁆𑀘𑀸𑀬𑀲𑁆𑀫𑀸 𑀅𑀚𑀺𑀢𑁄]

𑀲𑁄𑀢𑀸𑀦𑀁 𑀓𑀺𑀁 𑀦𑀺𑀯𑀸𑀭𑀡𑀁;

𑀲𑁄𑀢𑀸𑀦𑀁 𑀲𑀁𑀯𑀭𑀁 𑀩𑁆𑀭𑀽𑀳𑀺, 𑀓𑁂𑀦 𑀲𑁄𑀢𑀸 𑀧𑀺𑀥𑀻𑀬𑀭𑁂’’𑀢𑀺.

‘‘𑀬𑀸𑀦𑀺 𑀲𑁄𑀢𑀸𑀦𑀺 𑀮𑁄𑀓𑀲𑁆𑀫𑀺𑀁, [𑀅𑀚𑀺𑀢𑀸𑀢𑀺 𑀪𑀕𑀯𑀸]

𑀲𑀢𑀺 𑀢𑁂𑀲𑀁 𑀦𑀺𑀯𑀸𑀭𑀡𑀁;

𑀲𑁄𑀢𑀸𑀦𑀁 𑀲𑀁𑀯𑀭𑀁 𑀩𑁆𑀭𑀽𑀫𑀺, 𑀧𑀜𑁆𑀜𑀸𑀬𑁂𑀢𑁂 𑀧𑀺𑀥𑀻𑀬𑀭𑁂’’𑀢𑀺.

‘‘𑀲𑀯𑀦𑁆𑀢𑀺 𑀲𑀩𑁆𑀩𑀥𑀺 𑀲𑁄𑀢𑀸, 𑀲𑁄𑀢𑀸𑀦𑀁 𑀓𑀺𑀁 𑀦𑀺𑀯𑀸𑀭𑀡’’𑀦𑁆𑀢𑀺 𑀧𑀜𑁆𑀳𑁂 ‘‘𑀬𑀸𑀦𑀺 𑀲𑁄𑀢𑀸𑀦𑀺 𑀮𑁄𑀓𑀲𑁆𑀫𑀺𑀁, 𑀲𑀢𑀺 𑀢𑁂𑀲𑀁 𑀦𑀺𑀯𑀸𑀭𑀡’’𑀦𑁆𑀢𑀺 𑀪𑀕𑀯𑀸 𑀧𑀤𑀁 𑀲𑁄𑀥𑁂𑀢𑀺, 𑀦𑁄 𑀘 𑀆𑀭𑀫𑁆𑀪𑀁. ‘‘𑀲𑁄𑀢𑀸𑀦𑀁 𑀲𑀁𑀯𑀭𑀁 𑀩𑁆𑀭𑀽𑀳𑀺, 𑀓𑁂𑀦 𑀲𑁄𑀢𑀸 𑀧𑀺𑀥𑀻𑀬𑀭𑁂’’𑀢𑀺 𑀧𑀜𑁆𑀳𑁂 ‘‘𑀲𑁄𑀢𑀸𑀦𑀁 𑀲𑀁𑀯𑀭𑀁 𑀩𑁆𑀭𑀽𑀫𑀺, 𑀧𑀜𑁆𑀜𑀸𑀬𑁂𑀢𑁂 𑀧𑀺𑀥𑀻𑀬𑀭𑁂’’𑀢𑀺 𑀲𑀼𑀤𑁆𑀥𑁄 𑀆𑀭𑀫𑁆𑀪𑁄. 𑀢𑁂𑀦𑀸𑀳 𑀪𑀕𑀯𑀸 ‘‘𑀬𑀸𑀦𑀺 𑀲𑁄𑀢𑀸𑀦𑀺 𑀮𑁄𑀓𑀲𑁆𑀫𑀺’’𑀦𑁆𑀢𑀺.

‘‘𑀧𑀜𑁆𑀜𑀸 𑀘𑁂𑀯 𑀲𑀢𑀺 𑀘, [𑀇𑀘𑁆𑀘𑀸𑀬𑀲𑁆𑀫𑀸 𑀅𑀚𑀺𑀢𑁄]

𑀦𑀸𑀫𑀭𑀽𑀧𑀜𑁆𑀘 [𑀦𑀸𑀫𑀁 𑀭𑀽𑀧𑀜𑁆𑀘 (𑀓.) 𑀧𑀲𑁆𑀲 𑀲𑀼. 𑀦𑀺. 𑁧𑁦𑁪𑁨] 𑀫𑀸𑀭𑀺𑀲;

𑀏𑀢𑀁 𑀫𑁂 𑀧𑀼𑀝𑁆𑀞𑁄 𑀧𑀩𑁆𑀭𑀽𑀳𑀺, 𑀓𑀢𑁆𑀣𑁂𑀢𑀁 𑀉𑀧𑀭𑀼𑀚𑁆𑀛𑀢𑀻’’𑀢𑀺.

𑀧𑀜𑁆𑀳𑁂 𑁋

‘‘𑀬𑀫𑁂𑀢𑀁 𑀧𑀜𑁆𑀳𑀁 𑀅𑀧𑀼𑀘𑁆𑀙𑀺, 𑀅𑀚𑀺𑀢 𑀢𑀁 𑀯𑀤𑀸𑀫𑀺 𑀢𑁂;

𑀬𑀢𑁆𑀣 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘, 𑀅𑀲𑁂𑀲𑀁 𑀉𑀧𑀭𑀼𑀚𑁆𑀛𑀢𑀺;

𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀭𑁄𑀥𑁂𑀦, 𑀏𑀢𑁆𑀣𑁂𑀢𑀁 𑀉𑀧𑀭𑀼𑀚𑁆𑀛𑀢𑀻’’𑀢𑀺.

𑀲𑀼𑀤𑁆𑀥𑁄 𑀆𑀭𑀫𑁆𑀪𑁄. 𑀢𑁂𑀦𑀸𑀳 𑀪𑀕𑀯𑀸 ‘‘𑀬𑀫𑁂𑀢𑀁 𑀧𑀜𑁆𑀳𑀁 𑀅𑀧𑀼𑀘𑁆𑀙𑀻’’𑀢𑀺. 𑀬𑀢𑁆𑀣 𑀏𑀯𑀁 𑀲𑀼𑀤𑁆𑀥𑁄 𑀆𑀭𑀫𑁆𑀪𑁄, 𑀲𑁄 𑀧𑀜𑁆𑀳𑁄 𑀯𑀺𑀲𑀚𑁆𑀚𑀺𑀢𑁄 𑀪𑀯𑀢𑀺. 𑀬𑀢𑁆𑀣 𑀧𑀦 𑀆𑀭𑀫𑁆𑀪𑁄 𑀅𑀲𑀼𑀤𑁆𑀥𑁄, 𑀦 𑀢𑀸𑀯 𑀲𑁄 𑀧𑀜𑁆𑀳𑁄 𑀯𑀺𑀲𑀚𑁆𑀚𑀺𑀢𑁄 𑀪𑀯𑀢𑀺. 𑀢𑁂𑀦𑀸𑀳 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀬𑀦𑁄 ‘‘𑀯𑀺𑀲𑁆𑀲𑀚𑁆𑀚𑀺𑀢𑀫𑁆𑀳𑀺 𑀧𑀜𑁆𑀳𑁂’’𑀢𑀺.

𑀦𑀺𑀬𑀼𑀢𑁆𑀢𑁄 𑀲𑁄𑀥𑀦𑁄 𑀳𑀸𑀭𑁄.