𑁧𑁨. 𑀪𑀤𑁆𑀭𑀸𑀯𑀼𑀥𑀫𑀸𑀡𑀯𑀧𑀼𑀘𑁆𑀙𑀸

𑁧𑁨𑁬. ‘‘𑀑𑀓𑀜𑁆𑀚𑀳𑀁 𑀢𑀡𑁆𑀳𑀘𑁆𑀙𑀺𑀤𑀁 𑀅𑀦𑁂𑀚𑀁, [𑀇𑀘𑁆𑀘𑀸𑀬𑀲𑁆𑀫𑀸 𑀪𑀤𑁆𑀭𑀸𑀯𑀼𑀥𑁄]

𑀦𑀦𑁆𑀤𑀺𑀜𑁆𑀚𑀳𑀁 𑀑𑀖𑀢𑀺𑀡𑁆𑀡𑀁 𑀯𑀺𑀫𑀼𑀢𑁆𑀢𑀁;

𑀓𑀧𑁆𑀧𑀜𑁆𑀚𑀳𑀁 𑀅𑀪𑀺𑀬𑀸𑀘𑁂 𑀲𑀼𑀫𑁂𑀥𑀁, 𑀲𑀼𑀢𑁆𑀯𑀸𑀦 𑀦𑀸𑀕𑀲𑁆𑀲 𑀅𑀧𑀦𑀫𑀺𑀲𑁆𑀲𑀦𑁆𑀢𑀺 𑀇𑀢𑁄.

𑁧𑁨𑁭. ‘‘𑀦𑀸𑀦𑀸𑀚𑀦𑀸 𑀚𑀦𑀧𑀤𑁂𑀳𑀺 𑀲𑀗𑁆𑀕𑀢𑀸,

𑀢𑀯 𑀯𑀻𑀭 𑀯𑀸𑀓𑁆𑀬𑀁 𑀅𑀪𑀺𑀓𑀗𑁆𑀔𑀫𑀸𑀦𑀸;

𑀢𑁂𑀲𑀁 𑀢𑀼𑀯𑀁 𑀲𑀸𑀥𑀼 𑀯𑀺𑀬𑀸𑀓𑀭𑁄𑀳𑀺, 𑀢𑀣𑀸 𑀳𑀺 𑀢𑁂 𑀯𑀺𑀤𑀺𑀢𑁄 𑀏𑀲 𑀥𑀫𑁆𑀫𑁄’’.

𑁧𑁨𑁮. ‘‘𑀆𑀤𑀸𑀦𑀢𑀡𑁆𑀳𑀁 𑀯𑀺𑀦𑀬𑁂𑀣 𑀲𑀩𑁆𑀩𑀁, [𑀪𑀤𑁆𑀭𑀸𑀯𑀼𑀥𑀸𑀢𑀺 𑀪𑀕𑀯𑀸]

𑀉𑀤𑁆𑀥𑀁 𑀅𑀥𑁄 𑀢𑀺𑀭𑀺𑀬𑀜𑁆𑀘𑀸𑀧𑀺 𑀫𑀚𑁆𑀛𑁂;

𑀬𑀁 𑀬𑀜𑁆𑀳𑀺 𑀮𑁄𑀓𑀲𑁆𑀫𑀺𑀫𑀼𑀧𑀸𑀤𑀺𑀬𑀦𑁆𑀢𑀺, 𑀢𑁂𑀦𑁂𑀯 𑀫𑀸𑀭𑁄 𑀅𑀦𑁆𑀯𑁂𑀢𑀺 𑀚𑀦𑁆𑀢𑀼𑀁.

𑁧𑁨𑁯. ‘‘𑀢𑀲𑁆𑀫𑀸 𑀧𑀚𑀸𑀦𑀁 𑀦 𑀉𑀧𑀸𑀤𑀺𑀬𑁂𑀣, 𑀪𑀺𑀓𑁆𑀔𑀼 𑀲𑀢𑁄 𑀓𑀺𑀜𑁆𑀘𑀦𑀁 𑀲𑀩𑁆𑀩𑀮𑁄𑀓𑁂;

𑀆𑀤𑀸𑀦𑀲𑀢𑁆𑀢𑁂 𑀇𑀢𑀺 𑀧𑁂𑀓𑁆𑀔𑀫𑀸𑀦𑁄, 𑀧𑀚𑀁 𑀇𑀫𑀁 𑀫𑀘𑁆𑀘𑀼𑀥𑁂𑀬𑁆𑀬𑁂 𑀯𑀺𑀲𑀢𑁆𑀢’’𑀦𑁆𑀢𑀺.

𑀪𑀤𑁆𑀭𑀸𑀯𑀼𑀥𑀫𑀸𑀡𑀯𑀧𑀼𑀘𑁆𑀙𑀸 𑀤𑁆𑀯𑀸𑀤𑀲𑀫𑀸.