𑁧𑁩. 𑀉𑀤𑀬𑀫𑀸𑀡𑀯𑀧𑀼𑀘𑁆𑀙𑀸

𑁧𑁩𑁦. ‘‘𑀛𑀸𑀬𑀺𑀁 𑀯𑀺𑀭𑀚𑀫𑀸𑀲𑀻𑀦𑀁, [𑀇𑀘𑁆𑀘𑀸𑀬𑀲𑁆𑀫𑀸 𑀉𑀤𑀬𑁄]

𑀓𑀢𑀓𑀺𑀘𑁆𑀘𑀁 𑀅𑀦𑀸𑀲𑀯𑀁;

𑀧𑀸𑀭𑀕𑀼𑀁 𑀲𑀩𑁆𑀩𑀥𑀫𑁆𑀫𑀸𑀦𑀁, 𑀅𑀢𑁆𑀣𑀺 𑀧𑀜𑁆𑀳𑁂𑀦 𑀆𑀕𑀫𑀁;

𑀅𑀜𑁆𑀜𑀸𑀯𑀺𑀫𑁄𑀓𑁆𑀔𑀁 𑀧𑀩𑁆𑀭𑀽𑀳𑀺, 𑀅𑀯𑀺𑀚𑁆𑀚𑀸𑀬 𑀧𑀪𑁂𑀤𑀦𑀁’’.

𑁧𑁩𑁧. ‘‘𑀧𑀳𑀸𑀦𑀁 𑀓𑀸𑀫𑀘𑁆𑀙𑀦𑁆𑀤𑀸𑀦𑀁, [𑀉𑀤𑀬𑀸𑀢𑀺 𑀪𑀕𑀯𑀸]

𑀤𑁄𑀫𑀦𑀲𑁆𑀲𑀸𑀦 𑀘𑀽𑀪𑀬𑀁;

𑀣𑀺𑀦𑀲𑁆𑀲 𑀘 𑀧𑀦𑀽𑀤𑀦𑀁, 𑀓𑀼𑀓𑁆𑀓𑀼𑀘𑁆𑀘𑀸𑀦𑀁 𑀦𑀺𑀯𑀸𑀭𑀡𑀁.

𑁧𑁩𑁨. ‘‘𑀉𑀧𑁂𑀓𑁆𑀔𑀸𑀲𑀢𑀺𑀲𑀁𑀲𑀼𑀤𑁆𑀥𑀁, 𑀥𑀫𑁆𑀫𑀢𑀓𑁆𑀓𑀧𑀼𑀭𑁂𑀚𑀯𑀁;

𑀅𑀜𑁆𑀜𑀸𑀯𑀺𑀫𑁄𑀓𑁆𑀔𑀁 𑀧𑀩𑁆𑀭𑀽𑀫𑀺, 𑀅𑀯𑀺𑀚𑁆𑀚𑀸𑀬 𑀧𑀪𑁂𑀤𑀦𑀁’’.

𑁧𑁩𑁩. ‘‘𑀓𑀺𑀁𑀲𑀼 𑀲𑀁𑀬𑁄𑀚𑀦𑁄 𑀮𑁄𑀓𑁄, 𑀓𑀺𑀁𑀲𑀼 𑀢𑀲𑁆𑀲 𑀯𑀺𑀘𑀸𑀭𑀡𑀁;

𑀓𑀺𑀲𑁆𑀲𑀲𑁆𑀲 𑀯𑀺𑀧𑁆𑀧𑀳𑀸𑀦𑁂𑀦, 𑀦𑀺𑀩𑁆𑀩𑀸𑀦𑀁 𑀇𑀢𑀺 𑀯𑀼𑀘𑁆𑀘𑀢𑀺’’.

𑁧𑁩𑁪. ‘‘𑀦𑀦𑁆𑀤𑀺𑀲𑀁𑀬𑁄𑀚𑀦𑁄 𑀮𑁄𑀓𑁄, 𑀯𑀺𑀢𑀓𑁆𑀓𑀲𑁆𑀲 𑀯𑀺𑀘𑀸𑀭𑀡𑀁;

𑀢𑀡𑁆𑀳𑀸𑀬 𑀯𑀺𑀧𑁆𑀧𑀳𑀸𑀦𑁂𑀦, 𑀦𑀺𑀩𑁆𑀩𑀸𑀦𑀁 𑀇𑀢𑀺 𑀯𑀼𑀘𑁆𑀘𑀢𑀺’’.

𑁧𑁩𑁫. ‘‘𑀓𑀣𑀁 𑀲𑀢𑀲𑁆𑀲 𑀘𑀭𑀢𑁄, 𑀯𑀺𑀜𑁆𑀜𑀸𑀡𑀁 𑀉𑀧𑀭𑀼𑀚𑁆𑀛𑀢𑀺;

𑀪𑀕𑀯𑀦𑁆𑀢𑀁 𑀧𑀼𑀝𑁆𑀞𑀼𑀫𑀸𑀕𑀫𑁆𑀫, 𑀢𑀁 𑀲𑀼𑀡𑁄𑀫 𑀯𑀘𑁄 𑀢𑀯’’.

𑁧𑁩𑁬. ‘‘𑀅𑀚𑁆𑀛𑀢𑁆𑀢𑀜𑁆𑀘 𑀩𑀳𑀺𑀤𑁆𑀥𑀸 𑀘, 𑀯𑁂𑀤𑀦𑀁 𑀦𑀸𑀪𑀺𑀦𑀦𑁆𑀤𑀢𑁄;

𑀏𑀯𑀁 𑀲𑀢𑀲𑁆𑀲 𑀘𑀭𑀢𑁄, 𑀯𑀺𑀜𑁆𑀜𑀸𑀡𑀁 𑀉𑀧𑀭𑀼𑀚𑁆𑀛𑀢𑀻’’𑀢𑀺.

𑀉𑀤𑀬𑀫𑀸𑀡𑀯𑀧𑀼𑀘𑁆𑀙𑀸 𑀢𑁂𑀭𑀲𑀫𑀸.