𑁫. 𑀥𑁄𑀢𑀓𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲𑁄

𑁩𑁦. 𑀧𑀼𑀘𑁆𑀙𑀸𑀫𑀺 𑀢𑀁 𑀪𑀕𑀯𑀸 𑀩𑁆𑀭𑀽𑀳𑀺 𑀫𑁂𑀢𑀁, [𑀇𑀘𑁆𑀘𑀸𑀬𑀲𑁆𑀫𑀸 𑀥𑁄𑀢𑀓𑁄]

𑀯𑀸𑀘𑀸𑀪𑀺𑀓𑀗𑁆𑀔𑀸𑀫𑀺 𑀫𑀳𑁂𑀲𑀺 𑀢𑀼𑀬𑁆𑀳𑀁;

𑀢𑀯 𑀲𑀼𑀢𑁆𑀯𑀸𑀦 𑀦𑀺𑀕𑁆𑀖𑁄𑀲𑀁, 𑀲𑀺𑀓𑁆𑀔𑁂 𑀦𑀺𑀩𑁆𑀩𑀸𑀦𑀫𑀢𑁆𑀢𑀦𑁄.

𑀧𑀼𑀘𑁆𑀙𑀸𑀫𑀺 𑀢𑀁 𑀪𑀕𑀯𑀸 𑀩𑁆𑀭𑀽𑀳𑀺 𑀫𑁂𑀢𑀦𑁆𑀢𑀺. 𑀧𑀼𑀘𑁆𑀙𑀸𑀫𑀻𑀢𑀺 𑀢𑀺𑀲𑁆𑀲𑁄 𑀧𑀼𑀘𑁆𑀙𑀸 𑁋 𑀅𑀤𑀺𑀝𑁆𑀞𑀚𑁄𑀢𑀦𑀸 𑀧𑀼𑀘𑁆𑀙𑀸, 𑀤𑀺𑀝𑁆𑀞𑀲𑀁𑀲𑀦𑁆𑀤𑀦𑀸 𑀧𑀼𑀘𑁆𑀙𑀸, 𑀯𑀺𑀫𑀢𑀺𑀘𑁆𑀙𑁂𑀤𑀦𑀸 𑀧𑀼𑀘𑁆𑀙𑀸…𑀧𑁂… 𑀇𑀫𑀸 𑀢𑀺𑀲𑁆𑀲𑁄 𑀧𑀼𑀘𑁆𑀙𑀸…𑀧𑁂… 𑀦𑀺𑀩𑁆𑀩𑀸𑀦𑀧𑀼𑀘𑁆𑀙𑀸. 𑀧𑀼𑀘𑁆𑀙𑀸𑀫𑀺 𑀢𑀦𑁆𑀢𑀺 𑀧𑀼𑀘𑁆𑀙𑀸𑀫𑀺 𑀢𑀁 𑀬𑀸𑀘𑀸𑀫𑀺 𑀢𑀁 𑀅𑀚𑁆𑀛𑁂𑀲𑀸𑀫𑀺 𑀢𑀁 𑀧𑀲𑀸𑀤𑁂𑀫𑀺 𑀢𑀁, 𑀓𑀣𑀬𑀲𑁆𑀲𑀼 𑀫𑁂𑀢𑀺 𑁋 𑀧𑀼𑀘𑁆𑀙𑀸𑀫𑀺 𑀢𑀁. 𑀪𑀕𑀯𑀸𑀢𑀺 𑀕𑀸𑀭𑀯𑀸𑀥𑀺𑀯𑀘𑀦𑀫𑁂𑀢𑀁…𑀧𑁂… 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺, 𑀬𑀤𑀺𑀤𑀁 𑀪𑀕𑀯𑀸𑀢𑀺. 𑀩𑁆𑀭𑀽𑀳𑀺 𑀫𑁂𑀢𑀦𑁆𑀢𑀺 𑀩𑁆𑀭𑀽𑀳𑀺 𑀆𑀘𑀺𑀓𑁆𑀔𑀸𑀳𑀺 𑀤𑁂𑀲𑁂𑀳𑀺 𑀧𑀜𑁆𑀜𑀧𑁂𑀳𑀺 𑀧𑀝𑁆𑀞𑀧𑁂𑀳𑀺 𑀯𑀺𑀯𑀭𑀸𑀳𑀺 𑀯𑀺𑀪𑀚𑀸𑀳𑀺 𑀉𑀢𑁆𑀢𑀸𑀦𑀻𑀓𑀭𑁄𑀳𑀺 𑀧𑀓𑀸𑀲𑁂𑀳𑀻𑀢𑀺 𑁋 𑀧𑀼𑀘𑁆𑀙𑀸𑀫𑀺 𑀢𑀁 𑀪𑀕𑀯𑀸 𑀩𑁆𑀭𑀽𑀳𑀺 𑀫𑁂𑀢𑀁.

𑀇𑀘𑁆𑀘𑀸𑀬𑀲𑁆𑀫𑀸 𑀥𑁄𑀢𑀓𑁄𑀢𑀺. 𑀇𑀘𑁆𑀘𑀸𑀢𑀺 𑀧𑀤𑀲𑀦𑁆𑀥𑀺…𑀧𑁂… 𑀆𑀬𑀲𑁆𑀫𑀸𑀢𑀺 𑀧𑀺𑀬𑀯𑀘𑀦𑀁 𑀕𑀭𑀼𑀯𑀘𑀦𑀁 𑀲𑀕𑀸𑀭𑀯𑀲𑀧𑁆𑀧𑀢𑀺𑀲𑁆𑀲𑀸𑀥𑀺𑀯𑀘𑀦𑀫𑁂𑀢𑀁 𑀆𑀬𑀲𑁆𑀫𑀸𑀢𑀺. 𑀥𑁄𑀢𑀓𑁄𑀢𑀺 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀦𑀸𑀫𑀁 𑀲𑀗𑁆𑀔𑀸 𑀲𑀫𑀜𑁆𑀜𑀸 𑀧𑀜𑁆𑀜𑀢𑁆𑀢𑀺 𑀯𑁄𑀳𑀸𑀭𑁄 𑀦𑀸𑀫𑀁 𑀦𑀸𑀫𑀓𑀫𑁆𑀫𑀁 𑀦𑀸𑀫𑀥𑁂𑀬𑁆𑀬𑀁 𑀦𑀺𑀭𑀼𑀢𑁆𑀢𑀺 𑀩𑁆𑀬𑀜𑁆𑀚𑀦𑀁 𑀅𑀪𑀺𑀮𑀸𑀧𑁄𑀢𑀺 𑁋 𑀇𑀘𑁆𑀘𑀸𑀬𑀲𑁆𑀫𑀸 𑀥𑁄𑀢𑀓𑁄.

𑀯𑀸𑀘𑀸𑀪𑀺𑀓𑀗𑁆𑀔𑀸𑀫𑀺 𑀫𑀳𑁂𑀲𑀺 𑀢𑀼𑀬𑁆𑀳𑀦𑁆𑀢𑀺 𑀢𑀼𑀬𑁆𑀳𑀁 𑀯𑀘𑀦𑀁 𑀩𑁆𑀬𑀧𑁆𑀧𑀣𑀁 𑀤𑁂𑀲𑀦𑀁 𑀅𑀦𑀼𑀲𑀸𑀲𑀦𑀁 𑀅𑀦𑀼𑀲𑀺𑀝𑁆𑀞𑀁 𑀓𑀗𑁆𑀔𑀸𑀫𑀺 𑀅𑀪𑀺𑀓𑀗𑁆𑀔𑀸𑀫𑀺 𑀇𑀘𑁆𑀙𑀸𑀫𑀺 𑀲𑀸𑀤𑀺𑀬𑀸𑀫𑀺 𑀧𑀢𑁆𑀣𑀬𑀸𑀫𑀺 𑀧𑀺𑀳𑀬𑀸𑀫𑀺 𑀅𑀪𑀺𑀚𑀧𑁆𑀧𑀸𑀫𑀺. 𑀫𑀳𑁂𑀲𑀻𑀢𑀺 𑀓𑀺𑀁 𑀫𑀳𑁂𑀲𑀺 𑀪𑀕𑀯𑀸? 𑀫𑀳𑀦𑁆𑀢𑀁 𑀲𑀻𑀮𑀓𑁆𑀔𑀦𑁆𑀥𑀁 𑀏𑀲𑀻 𑀕𑀯𑁂𑀲𑀻 𑀧𑀭𑀺𑀬𑁂𑀲𑀻𑀢𑀺 𑀫𑀳𑁂𑀲𑀺…𑀧𑁂… 𑀓𑀳𑀁 𑀦𑀭𑀸𑀲𑀪𑁄𑀢𑀺 𑀫𑀳𑁂𑀲𑀻𑀢𑀺 𑁋 𑀯𑀸𑀘𑀸𑀪𑀺𑀓𑀗𑁆𑀔𑀸𑀫𑀺 𑀫𑀳𑁂𑀲𑀺 𑀢𑀼𑀬𑁆𑀳𑀁.

𑀢𑀯 𑀲𑀼𑀢𑁆𑀯𑀸𑀦 𑀦𑀺𑀕𑁆𑀖𑁄𑀲𑀦𑁆𑀢𑀺 𑀢𑀼𑀬𑁆𑀳𑀁 𑀯𑀘𑀦𑀁 𑀩𑁆𑀬𑀧𑁆𑀧𑀣𑀁 𑀤𑁂𑀲𑀦𑀁 𑀅𑀦𑀼𑀲𑀸𑀲𑀦𑀁 𑀅𑀦𑀼𑀲𑀺𑀝𑁆𑀞𑀁 𑀲𑀼𑀢𑁆𑀯𑀸 𑀲𑀼𑀡𑀺𑀢𑁆𑀯𑀸 𑀉𑀕𑁆𑀕𑀳𑁂𑀢𑁆𑀯𑀸 𑀉𑀧𑀥𑀸𑀭𑀬𑀺𑀢𑁆𑀯𑀸 𑀉𑀧𑀮𑀓𑁆𑀔𑀬𑀺𑀢𑁆𑀯𑀸𑀢𑀺 𑁋 𑀢𑀯 𑀲𑀼𑀢𑁆𑀯𑀸𑀦 𑀦𑀺𑀕𑁆𑀖𑁄𑀲𑀁.

𑀲𑀺𑀓𑁆𑀔𑁂 𑀦𑀺𑀩𑁆𑀩𑀸𑀦𑀫𑀢𑁆𑀢𑀦𑁄𑀢𑀺. 𑀲𑀺𑀓𑁆𑀔𑀸𑀢𑀺 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑁋 𑀅𑀥𑀺𑀲𑀻𑀮𑀲𑀺𑀓𑁆𑀔𑀸, 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸, 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸…𑀧𑁂… 𑀅𑀬𑀁 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸. 𑀦𑀺𑀩𑁆𑀩𑀸𑀦𑀫𑀢𑁆𑀢𑀦𑁄𑀢𑀺 𑀅𑀢𑁆𑀢𑀦𑁄 𑀭𑀸𑀕𑀲𑁆𑀲 𑀦𑀺𑀩𑁆𑀩𑀸𑀧𑀦𑀸𑀬, 𑀤𑁄𑀲𑀲𑁆𑀲 𑀦𑀺𑀩𑁆𑀩𑀸𑀧𑀦𑀸𑀬, 𑀫𑁄𑀳𑀲𑁆𑀲 𑀦𑀺𑀩𑁆𑀩𑀸𑀧𑀦𑀸𑀬, 𑀓𑁄𑀥𑀲𑁆𑀲 𑀦𑀺𑀩𑁆𑀩𑀸𑀧𑀦𑀸𑀬, 𑀉𑀧𑀦𑀸𑀳𑀲𑁆𑀲 𑀦𑀺𑀩𑁆𑀩𑀸𑀧𑀦𑀸𑀬…𑀧𑁂… 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀸𑀦𑀁 𑀲𑀫𑀸𑀬 𑀉𑀧𑀲𑀫𑀸𑀬 𑀯𑀽𑀧𑀲𑀫𑀸𑀬 𑀦𑀺𑀩𑁆𑀩𑀸𑀧𑀦𑀸𑀬 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀬 𑀧𑀝𑀺𑀧𑀲𑁆𑀲𑀤𑁆𑀥𑀺𑀬𑀸 𑀅𑀥𑀺𑀲𑀻𑀮𑀫𑁆𑀧𑀺 𑀲𑀺𑀓𑁆𑀔𑁂𑀬𑁆𑀬, 𑀅𑀥𑀺𑀘𑀺𑀢𑁆𑀢𑀫𑁆𑀧𑀺 𑀲𑀺𑀓𑁆𑀔𑁂𑀬𑁆𑀬, 𑀅𑀥𑀺𑀧𑀜𑁆𑀜𑀫𑁆𑀧𑀺 𑀲𑀺𑀓𑁆𑀔𑁂𑀬𑁆𑀬. 𑀇𑀫𑀸 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸𑀬𑁄 𑀆𑀯𑀚𑁆𑀚𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀚𑀸𑀦𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀧𑀲𑁆𑀲𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀘𑀺𑀢𑁆𑀢𑀁 𑀧𑀤𑀳𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀲𑀤𑁆𑀥𑀸𑀬 𑀅𑀥𑀺𑀫𑀼𑀘𑁆𑀘𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀯𑀻𑀭𑀺𑀬𑀁 𑀧𑀕𑁆𑀕𑀡𑁆𑀳𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀲𑀢𑀺𑀁 𑀉𑀧𑀝𑁆𑀞𑀧𑁂𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀘𑀺𑀢𑁆𑀢𑀁 𑀲𑀫𑀸𑀤𑀳𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀧𑀜𑁆𑀜𑀸𑀬 𑀧𑀚𑀸𑀦𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀅𑀪𑀺𑀜𑁆𑀜𑁂𑀬𑁆𑀬𑀁 𑀅𑀪𑀺𑀚𑀸𑀦𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀧𑀭𑀺𑀜𑁆𑀜𑁂𑀬𑁆𑀬𑀁 𑀧𑀭𑀺𑀚𑀸𑀦𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀧𑀳𑀸𑀢𑀩𑁆𑀩𑀁 𑀧𑀚𑀳𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀪𑀸𑀯𑁂𑀢𑀩𑁆𑀩𑀁 𑀪𑀸𑀯𑁂𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀲𑀘𑁆𑀙𑀺𑀓𑀸𑀢𑀩𑁆𑀩𑀁 𑀲𑀘𑁆𑀙𑀺𑀓𑀭𑁄𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀆𑀘𑀭𑁂𑀬𑁆𑀬 𑀲𑀫𑀸𑀘𑀭𑁂𑀬𑁆𑀬 𑀲𑀫𑀸𑀤𑀸𑀬 𑀯𑀢𑁆𑀢𑁂𑀬𑁆𑀬𑀸𑀢𑀺 𑁋 𑀲𑀺𑀓𑁆𑀔𑁂 𑀦𑀺𑀩𑁆𑀩𑀸𑀦𑀫𑀢𑁆𑀢𑀦𑁄. 𑀢𑁂𑀦𑀸𑀳 𑀲𑁄 𑀩𑁆𑀭𑀸𑀳𑁆𑀫𑀡𑁄 𑁋

‘‘𑀧𑀼𑀘𑁆𑀙𑀸𑀫𑀺 𑀢𑀁 𑀪𑀕𑀯𑀸 𑀩𑁆𑀭𑀽𑀳𑀺 𑀫𑁂𑀢𑀁, [𑀇𑀘𑁆𑀘𑀸𑀬𑀲𑁆𑀫𑀸 𑀥𑁄𑀢𑀓𑁄]

𑀯𑀸𑀘𑀸𑀪𑀺𑀓𑀗𑁆𑀔𑀸𑀫𑀺 𑀫𑀳𑁂𑀲𑀺 𑀢𑀼𑀬𑁆𑀳𑀁;

𑀢𑀯 𑀲𑀼𑀢𑁆𑀯𑀸𑀦 𑀦𑀺𑀕𑁆𑀖𑁄𑀲𑀁, 𑀲𑀺𑀓𑁆𑀔𑁂 𑀦𑀺𑀩𑁆𑀩𑀸𑀦𑀫𑀢𑁆𑀢𑀦𑁄’’𑀢𑀺.

𑁩𑁧. 𑀢𑁂𑀦𑀳𑀸𑀢𑀧𑁆𑀧𑀁 𑀓𑀭𑁄𑀳𑀺, [𑀥𑁄𑀢𑀓𑀸𑀢𑀺 𑀪𑀕𑀯𑀸]

𑀇𑀥𑁂𑀯 𑀦𑀺𑀧𑀓𑁄 𑀲𑀢𑁄;

𑀇𑀢𑁄 𑀲𑀼𑀢𑁆𑀯𑀸𑀦 𑀦𑀺𑀕𑁆𑀖𑁄𑀲𑀁, 𑀲𑀺𑀓𑁆𑀔𑁂 𑀦𑀺𑀩𑁆𑀩𑀸𑀦𑀫𑀢𑁆𑀢𑀦𑁄.

𑀢𑁂𑀦𑀳𑀸𑀢𑀧𑁆𑀧𑀁 𑀓𑀭𑁄𑀳𑀻𑀢𑀺 𑀆𑀢𑀧𑁆𑀧𑀁 𑀓𑀭𑁄𑀳𑀺, 𑀉𑀲𑁆𑀲𑀸𑀳𑀁 𑀓𑀭𑁄𑀳𑀺, 𑀉𑀲𑁆𑀲𑁄𑀴𑁆𑀳𑀺𑀁 𑀓𑀭𑁄𑀳𑀺, 𑀣𑀸𑀫𑀁 𑀓𑀭𑁄𑀳𑀺, 𑀥𑀺𑀢𑀺𑀁 𑀓𑀭𑁄𑀳𑀺, 𑀯𑀻𑀭𑀺𑀬𑀁 𑀓𑀭𑁄𑀳𑀺, 𑀙𑀦𑁆𑀤𑀁 𑀚𑀦𑁂𑀳𑀺 𑀲𑀜𑁆𑀚𑀦𑁂𑀳𑀺 𑀉𑀧𑀝𑁆𑀞𑀧𑁂𑀳𑀺 𑀲𑀫𑀼𑀝𑁆𑀞𑀧𑁂𑀳𑀺 𑀦𑀺𑀩𑁆𑀩𑀢𑁆𑀢𑁂𑀳𑀺 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀳𑀻𑀢𑀺 𑁋 𑀢𑁂𑀦𑀳𑀸𑀢𑀧𑁆𑀧𑀁 𑀓𑀭𑁄𑀳𑀺.

𑀥𑁄𑀢𑀓𑀸𑀢𑀺 𑀪𑀕𑀯𑀸 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀦𑀸𑀫𑁂𑀦 𑀆𑀮𑀧𑀢𑀺. 𑀪𑀕𑀯𑀸𑀢𑀺 𑀕𑀸𑀭𑀯𑀸𑀥𑀺𑀯𑀘𑀦𑀫𑁂𑀢𑀁…𑀧𑁂… 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺, 𑀬𑀤𑀺𑀤𑀁 𑀪𑀕𑀯𑀸𑀢𑀺 𑁋 𑀥𑁄𑀢𑀓𑀸𑀢𑀺 𑀪𑀕𑀯𑀸.

𑀇𑀥𑁂𑀯 𑀦𑀺𑀧𑀓𑁄 𑀲𑀢𑁄𑀢𑀺. 𑀇𑀥𑀸𑀢𑀺 𑀇𑀫𑀺𑀲𑁆𑀲𑀸 𑀤𑀺𑀝𑁆𑀞𑀺𑀬𑀸 𑀇𑀫𑀺𑀲𑁆𑀲𑀸 𑀔𑀦𑁆𑀢𑀺𑀬𑀸 𑀇𑀫𑀺𑀲𑁆𑀲𑀸 𑀭𑀼𑀘𑀺𑀬𑀸 𑀇𑀫𑀲𑁆𑀫𑀺𑀁 𑀆𑀤𑀸𑀬𑁂 𑀇𑀫𑀲𑁆𑀫𑀺𑀁 𑀥𑀫𑁆𑀫𑁂 𑀇𑀫𑀲𑁆𑀫𑀺𑀁 𑀯𑀺𑀦𑀬𑁂 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀇𑀫𑀲𑁆𑀫𑀺𑀁 𑀧𑀸𑀯𑀘𑀦𑁂 𑀇𑀫𑀲𑁆𑀫𑀺𑀁 𑀩𑁆𑀭𑀳𑁆𑀫𑀘𑀭𑀺𑀬𑁂 𑀇𑀫𑀲𑁆𑀫𑀺𑀁 𑀲𑀢𑁆𑀣𑀼𑀲𑀸𑀲𑀦𑁂 𑀇𑀫𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀇𑀫𑀲𑁆𑀫𑀺𑀁 𑀫𑀦𑀼𑀲𑁆𑀲𑀮𑁄𑀓𑁂. 𑀦𑀺𑀧𑀓𑁄𑀢𑀺 𑀦𑀺𑀧𑀓𑁄 𑀧𑀡𑁆𑀟𑀺𑀢𑁄 𑀧𑀜𑁆𑀜𑀯𑀸 𑀩𑀼𑀤𑁆𑀥𑀺𑀫𑀸 𑀜𑀸𑀡𑀻 𑀯𑀺𑀪𑀸𑀯𑀻 𑀫𑁂𑀥𑀸𑀯𑀻. 𑀲𑀢𑁄𑀢𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀲𑀢𑁄 𑁋 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁 𑀪𑀸𑀯𑁂𑀦𑁆𑀢𑁄 𑀲𑀢𑁄…𑀧𑁂… 𑀲𑁄 𑀯𑀼𑀘𑁆𑀘𑀢𑀺 𑀲𑀢𑁄𑀢𑀺 𑁋 𑀇𑀥𑁂𑀯 𑀦𑀺𑀧𑀓𑁄 𑀲𑀢𑁄.

𑀇𑀢𑁄 𑀲𑀼𑀢𑁆𑀯𑀸𑀦 𑀦𑀺𑀕𑁆𑀖𑁄𑀲𑀦𑁆𑀢𑀺 𑀇𑀢𑁄 𑀫𑀬𑁆𑀳𑀁 𑀯𑀘𑀦𑀁 𑀩𑁆𑀬𑀧𑁆𑀧𑀣𑀁 𑀤𑁂𑀲𑀦𑀁 𑀅𑀦𑀼𑀲𑀸𑀲𑀦𑀁 𑀅𑀦𑀼𑀲𑀺𑀝𑁆𑀞𑀁 𑀲𑀼𑀢𑁆𑀯𑀸 𑀲𑀼𑀡𑀺𑀢𑁆𑀯𑀸 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀉𑀧𑀥𑀸𑀭𑀬𑀺𑀢𑁆𑀯𑀸 𑀉𑀧𑀮𑀓𑁆𑀔𑀬𑀺𑀢𑁆𑀯𑀸𑀢𑀺 𑁋 𑀇𑀢𑁄 𑀲𑀼𑀢𑁆𑀯𑀸𑀦 𑀦𑀺𑀕𑁆𑀖𑁄𑀲𑀁.

‘‘𑀢𑁂𑀦𑀳𑀸𑀢𑀧𑁆𑀧𑀁 𑀓𑀭𑁄𑀳𑀺, [𑀥𑁄𑀢𑀓𑀸𑀢𑀺 𑀪𑀕𑀯𑀸]

𑀇𑀥𑁂𑀯 𑀦𑀺𑀧𑀓𑁄 𑀲𑀢𑁄;

𑀇𑀢𑁄 𑀲𑀼𑀢𑁆𑀯𑀸𑀦 𑀦𑀺𑀕𑁆𑀖𑁄𑀲𑀁, 𑀲𑀺𑀓𑁆𑀔𑁂 𑀦𑀺𑀩𑁆𑀩𑀸𑀦𑀫𑀢𑁆𑀢𑀦𑁄’’𑀢𑀺.

𑁩𑁨. 𑀧𑀲𑁆𑀲𑀸𑀫𑀳𑀁 𑀤𑁂𑀯𑀫𑀦𑀼𑀲𑁆𑀲𑀮𑁄𑀓𑁂,𑀅𑀓𑀺𑀜𑁆𑀘𑀦𑀁 𑀩𑁆𑀭𑀸𑀳𑁆𑀫𑀡𑀫𑀺𑀭𑀺𑀬𑀫𑀸𑀦𑀁;

𑀢𑀁 𑀢𑀁 𑀦𑀫𑀲𑁆𑀲𑀸𑀫𑀺 𑀲𑀫𑀦𑁆𑀢𑀘𑀓𑁆𑀔𑀼, 𑀧𑀫𑀼𑀜𑁆𑀘 𑀫𑀁 𑀲𑀓𑁆𑀓 𑀓𑀣𑀁𑀓𑀣𑀸𑀳𑀺.

𑀧𑀲𑁆𑀲𑀸𑀫𑀳𑀁 𑀤𑁂𑀯𑀫𑀦𑀼𑀲𑁆𑀲𑀮𑁄𑀓𑁂𑀢𑀺. 𑀤𑁂𑀯𑀸𑀢𑀺 𑀢𑀬𑁄 𑀤𑁂𑀯𑀸 𑁋 𑀲𑀫𑁆𑀫𑀼𑀢𑀺𑀤𑁂𑀯𑀸, 𑀉𑀧𑀧𑀢𑁆𑀢𑀺𑀤𑁂𑀯𑀸, 𑀯𑀺𑀲𑀼𑀤𑁆𑀥𑀺𑀤𑁂𑀯𑀸. 𑀓𑀢𑀫𑁂 𑀲𑀫𑁆𑀫𑀼𑀢𑀺𑀤𑁂𑀯𑀸? 𑀲𑀫𑁆𑀫𑀼𑀢𑀺𑀤𑁂𑀯𑀸 𑀯𑀼𑀘𑁆𑀘𑀦𑁆𑀢𑀺 𑀭𑀸𑀚𑀸𑀦𑁄 𑀘 𑀭𑀸𑀚𑀓𑀼𑀫𑀸𑀭𑀸 𑀘 𑀤𑁂𑀯𑀺𑀬𑁄 𑀘. 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀲𑀫𑁆𑀫𑀼𑀢𑀺𑀤𑁂𑀯𑀸. 𑀓𑀢𑀫𑁂 𑀉𑀧𑀧𑀢𑁆𑀢𑀺𑀤𑁂𑀯𑀸? 𑀉𑀧𑀧𑀢𑁆𑀢𑀺𑀤𑁂𑀯𑀸 𑀯𑀼𑀘𑁆𑀘𑀦𑁆𑀢𑀺 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸 𑀤𑁂𑀯𑀸 𑀬𑀸𑀫𑀸 𑀤𑁂𑀯𑀸 𑀢𑀼𑀲𑀺𑀢𑀸 𑀤𑁂𑀯𑀸 𑀦𑀺𑀫𑁆𑀫𑀸𑀦𑀭𑀢𑀻 𑀤𑁂𑀯𑀸 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀻 𑀤𑁂𑀯𑀸 𑀩𑁆𑀭𑀳𑁆𑀫𑀓𑀸𑀬𑀺𑀓𑀸 𑀤𑁂𑀯𑀸 𑀬𑁂 𑀘 𑀤𑁂𑀯𑀸 𑀢𑀤𑀼𑀢𑁆𑀢𑀭𑀺 [𑀢𑀢𑁆𑀭𑀼𑀧𑀭𑀺 (𑀲𑁆𑀬𑀸.)]. 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀉𑀧𑀧𑀢𑁆𑀢𑀺𑀤𑁂𑀯𑀸. 𑀓𑀢𑀫𑁂 𑀯𑀺𑀲𑀼𑀤𑁆𑀥𑀺𑀤𑁂𑀯𑀸? 𑀯𑀺𑀲𑀼𑀤𑁆𑀥𑀺𑀤𑁂𑀯𑀸 𑀯𑀼𑀘𑁆𑀘𑀦𑁆𑀢𑀺 𑀢𑀣𑀸𑀕𑀢𑀲𑀸𑀯𑀓𑀸 𑀅𑀭𑀳𑀦𑁆𑀢𑁄 𑀔𑀻𑀡𑀸𑀲𑀯𑀸 𑀬𑁂 𑀘 𑀧𑀘𑁆𑀘𑁂𑀓𑀩𑀼𑀤𑁆𑀥𑀸. 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀯𑀺𑀲𑀼𑀤𑁆𑀥𑀺𑀤𑁂𑀯𑀸. 𑀪𑀕𑀯𑀸 𑀲𑀫𑁆𑀫𑀼𑀢𑀺𑀤𑁂𑀯𑀸𑀦𑀜𑁆𑀘 𑀉𑀧𑀧𑀢𑁆𑀢𑀺𑀤𑁂𑀯𑀸𑀦𑀜𑁆𑀘 𑀯𑀺𑀲𑀼𑀤𑁆𑀥𑀺𑀤𑁂𑀯𑀸𑀦𑀜𑁆𑀘 𑀤𑁂𑀯𑁄 𑀘 𑀅𑀢𑀺𑀤𑁂𑀯𑁄 𑀘 𑀤𑁂𑀯𑀸𑀢𑀺𑀤𑁂𑀯𑁄 𑀘 𑀲𑀻𑀳𑀲𑀻𑀳𑁄 𑀦𑀸𑀕𑀦𑀸𑀕𑁄 𑀕𑀡𑀺𑀕𑀡𑀻 𑀫𑀼𑀦𑀺𑀫𑀼𑀦𑀻 𑀭𑀸𑀚𑀭𑀸𑀚𑀸. 𑀧𑀲𑁆𑀲𑀸𑀫𑀳𑀁 𑀤𑁂𑀯𑀫𑀦𑀼𑀲𑁆𑀲𑀮𑁄𑀓𑁂𑀢𑀺 𑀫𑀦𑀼𑀲𑁆𑀲𑀮𑁄𑀓𑁂 𑀤𑁂𑀯𑀁 𑀧𑀲𑁆𑀲𑀸𑀫𑀺 𑀅𑀢𑀺𑀤𑁂𑀯𑀁 𑀧𑀲𑁆𑀲𑀸𑀫𑀺 𑀤𑁂𑀯𑀸𑀢𑀺𑀤𑁂𑀯𑀁 𑀧𑀲𑁆𑀲𑀸𑀫𑀺 𑀤𑀓𑁆𑀔𑀸𑀫𑀺 𑀑𑀮𑁄𑀓𑁂𑀫𑀺 𑀦𑀺𑀚𑁆𑀛𑀸𑀬𑀸𑀫𑀺 𑀉𑀧𑀧𑀭𑀺𑀓𑁆𑀔𑀸𑀫𑀻𑀢𑀺 𑁋 𑀧𑀲𑁆𑀲𑀸𑀫𑀳𑀁 𑀤𑁂𑀯𑀫𑀦𑀼𑀲𑁆𑀲𑀮𑁄𑀓𑁂.

𑀆𑀓𑀺𑀜𑁆𑀘𑀦𑀁 𑀩𑁆𑀭𑀸𑀳𑁆𑀫𑀡𑀫𑀺𑀭𑀺𑀬𑀫𑀸𑀦𑀦𑁆𑀢𑀺. 𑀅𑀓𑀺𑀜𑁆𑀘𑀦𑀦𑁆𑀢𑀺 𑀭𑀸𑀕𑀓𑀺𑀜𑁆𑀘𑀦𑀁 𑀤𑁄𑀲𑀓𑀺𑀜𑁆𑀘𑀦𑀁 𑀫𑁄𑀳𑀓𑀺𑀜𑁆𑀘𑀦𑀁 𑀫𑀸𑀦𑀓𑀺𑀜𑁆𑀘𑀦𑀁 𑀤𑀺𑀝𑁆𑀞𑀺𑀓𑀺𑀜𑁆𑀘𑀦𑀁 𑀓𑀺𑀮𑁂𑀲𑀓𑀺𑀜𑁆𑀘𑀦𑀁 𑀤𑀼𑀘𑁆𑀘𑀭𑀺𑀢𑀓𑀺𑀜𑁆𑀘𑀦𑀁, 𑀢𑁂 𑀓𑀺𑀜𑁆𑀘𑀦𑀸 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀧𑀳𑀻𑀦𑀸 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸, 𑀢𑀲𑁆𑀫𑀸 𑀩𑀼𑀤𑁆𑀥𑁄 𑀅𑀓𑀺𑀜𑁆𑀘𑀦𑁄. 𑀩𑁆𑀭𑀸𑀳𑁆𑀫𑀡𑁄𑀢𑀺 𑀪𑀕𑀯𑀸 𑀲𑀢𑁆𑀢𑀦𑁆𑀦𑀁 𑀥𑀫𑁆𑀫𑀸𑀦𑀁 𑀩𑀸𑀳𑀺𑀢𑀢𑁆𑀢𑀸 𑀩𑁆𑀭𑀸𑀳𑁆𑀫𑀡𑁄 𑁋 𑀲𑀓𑁆𑀓𑀸𑀬𑀤𑀺𑀝𑁆𑀞𑀺 𑀩𑀸𑀳𑀺𑀢𑀸 𑀳𑁄𑀢𑀺, 𑀯𑀺𑀘𑀺𑀓𑀺𑀘𑁆𑀙𑀸 𑀩𑀸𑀳𑀺𑀢𑀸 𑀳𑁄𑀢𑀺, 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄 𑀩𑀸𑀳𑀺𑀢𑁄 𑀳𑁄𑀢𑀺, 𑀭𑀸𑀕𑁄 𑀩𑀸𑀳𑀺𑀢𑁄 𑀳𑁄𑀢𑀺, 𑀤𑁄𑀲𑁄 𑀩𑀸𑀳𑀺𑀢𑁄 𑀳𑁄𑀢𑀺, 𑀫𑁄𑀳𑁄 𑀩𑀸𑀳𑀺𑀢𑁄 𑀳𑁄𑀢𑀺, 𑀫𑀸𑀦𑁄 𑀩𑀸𑀳𑀺𑀢𑁄 𑀳𑁄𑀢𑀺, 𑀩𑀸𑀳𑀺𑀢𑀸𑀲𑁆𑀲 𑀳𑁄𑀦𑁆𑀢𑀺 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀁𑀓𑀺𑀮𑁂𑀲𑀺𑀓𑀸 𑀧𑁄𑀦𑁄𑀪𑀯𑀺𑀓𑀸 𑀲𑀤𑀭𑀸 𑀤𑀼𑀓𑁆𑀔𑀯𑀺𑀧𑀸𑀓𑀸 𑀆𑀬𑀢𑀺𑀁 𑀚𑀸𑀢𑀺𑀚𑀭𑀸𑀫𑀭𑀡𑀺𑀬𑀸.

𑀩𑀸𑀳𑀺𑀢𑁆𑀯𑀸 𑀲𑀩𑁆𑀩𑀧𑀸𑀧𑀓𑀸𑀦𑀺, [𑀲𑀪𑀺𑀬𑀸𑀢𑀺 𑀪𑀕𑀯𑀸]

𑀯𑀺𑀫𑀮𑁄 𑀲𑀸𑀥𑀼𑀲𑀫𑀸𑀳𑀺𑀢𑁄 𑀞𑀺𑀢𑀢𑁆𑀢𑁄;

𑀲𑀁𑀲𑀸𑀭𑀫𑀢𑀺𑀘𑁆𑀘 𑀓𑁂𑀯𑀮𑀻 𑀲𑁄, 𑀅𑀲𑀺𑀢𑁄 𑀢𑀸𑀤𑀺 𑀧𑀯𑀼𑀘𑁆𑀘𑀢𑁂 𑀲 𑀩𑁆𑀭𑀳𑁆𑀫𑀸𑀢𑀺.

𑀇𑀭𑀺𑀬𑀫𑀸𑀦𑀦𑁆𑀢𑀺 𑀘𑀭𑀦𑁆𑀢𑀁 𑀯𑀺𑀳𑀭𑀦𑁆𑀢𑀁 𑀇𑀭𑀺𑀬𑀦𑁆𑀢𑀁 𑀯𑀢𑁆𑀢𑁂𑀦𑁆𑀢𑀁 𑀧𑀸𑀮𑁂𑀦𑁆𑀢𑀁 𑀬𑀧𑁂𑀦𑁆𑀢𑀁 𑀬𑀸𑀧𑁂𑀦𑁆𑀢𑀦𑁆𑀢𑀺 𑁋 𑀅𑀓𑀺𑀜𑁆𑀘𑀦𑀁 𑀩𑁆𑀭𑀸𑀳𑁆𑀫𑀡𑀫𑀺𑀭𑀺𑀬𑀫𑀸𑀦𑀁.

𑀢𑀁 𑀢𑀁 𑀦𑀫𑀲𑁆𑀲𑀸𑀫𑀺 𑀲𑀫𑀦𑁆𑀢𑀘𑀓𑁆𑀔𑀽𑀢𑀺. 𑀢𑀦𑁆𑀢𑀺 𑀪𑀕𑀯𑀦𑁆𑀢𑀁 𑀪𑀡𑀢𑀺. 𑀦𑀫𑀲𑁆𑀲𑀸𑀫𑀻𑀢𑀺 𑀓𑀸𑀬𑁂𑀦 𑀯𑀸 𑀦𑀫𑀲𑁆𑀲𑀸𑀫𑀺, 𑀯𑀸𑀘𑀸𑀬 𑀯𑀸 𑀦𑀫𑀲𑁆𑀲𑀸𑀫𑀺, 𑀘𑀺𑀢𑁆𑀢𑁂𑀦 𑀯𑀸 𑀦𑀫𑀲𑁆𑀲𑀸𑀫𑀺, 𑀅𑀦𑁆𑀯𑀢𑁆𑀣𑀧𑀝𑀺𑀧𑀢𑁆𑀢𑀺𑀬𑀸 𑀯𑀸 𑀦𑀫𑀲𑁆𑀲𑀸𑀫𑀺, 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀢𑁆𑀢𑀺𑀬𑀸 𑀯𑀸 𑀦𑀫𑀲𑁆𑀲𑀸𑀫𑀺 𑀲𑀓𑁆𑀓𑀭𑁄𑀫𑀺 𑀕𑀭𑀼𑀁 𑀓𑀭𑁄𑀫𑀺 𑀫𑀸𑀦𑁂𑀫𑀺 𑀧𑀽𑀚𑁂𑀫𑀺. 𑀲𑀫𑀦𑁆𑀢𑀘𑀓𑁆𑀔𑀽𑀢𑀺 𑀲𑀫𑀦𑁆𑀢𑀘𑀓𑁆𑀔𑀼 𑀯𑀼𑀘𑁆𑀘𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀁. 𑀪𑀕𑀯𑀸 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑁂𑀦 𑀉𑀧𑁂𑀢𑁄 𑀲𑀫𑀼𑀧𑁂𑀢𑁄 𑀉𑀧𑀸𑀕𑀢𑁄 𑀲𑀫𑀼𑀧𑀸𑀕𑀢𑁄 𑀉𑀧𑀧𑀦𑁆𑀦𑁄 𑀲𑀫𑀼𑀧𑀧𑀦𑁆𑀦𑁄 𑀲𑀫𑀦𑁆𑀦𑀸𑀕𑀢𑁄.

‘‘𑀦 𑀢𑀲𑁆𑀲 𑀅𑀤𑁆𑀤𑀺𑀝𑁆𑀞𑀫𑀺𑀥𑀢𑁆𑀣𑀺 [𑀅𑀤𑀺𑀝𑁆𑀞𑀫𑀺𑀥𑀢𑁆𑀣𑀺 (𑀲𑁆𑀬𑀸. 𑀓.) 𑀫𑀳𑀸𑀦𑀺. 𑁧𑁫𑁬] 𑀓𑀺𑀜𑁆𑀘𑀺, 𑀅𑀣𑁄 𑀅𑀯𑀺𑀜𑁆𑀜𑀸𑀢𑀫𑀚𑀸𑀦𑀺𑀢𑀩𑁆𑀩𑀁;

𑀲𑀩𑁆𑀩𑀁 𑀅𑀪𑀺𑀜𑁆𑀜𑀸𑀲𑀺 𑀬𑀤𑀢𑁆𑀣𑀺 𑀦𑁂𑀬𑁆𑀬𑀁, 𑀢𑀣𑀸𑀕𑀢𑁄 𑀢𑁂𑀦 𑀲𑀫𑀦𑁆𑀢𑀘𑀓𑁆𑀔𑀽’’𑀢𑀺.

𑀢𑀁 𑀢𑀁 𑀦𑀫𑀲𑁆𑀲𑀸𑀫𑀺 𑀲𑀫𑀦𑁆𑀢𑀘𑀓𑁆𑀔𑀼.

𑀧𑀫𑀼𑀜𑁆𑀘 𑀫𑀁 𑀲𑀓𑁆𑀓 𑀓𑀣𑀁𑀓𑀣𑀸𑀳𑀻𑀢𑀺. 𑀲𑀓𑁆𑀓𑀸𑀢𑀺 𑀲𑀓𑁆𑀓𑁄 𑀪𑀕𑀯𑀸 𑀲𑀓𑁆𑀬𑀓𑀼𑀮𑀸 𑀧𑀩𑁆𑀩𑀚𑀺𑀢𑁄𑀢𑀺𑀧𑀺 𑀲𑀓𑁆𑀓𑁄. 𑀅𑀣 𑀯𑀸, 𑀅𑀟𑁆𑀠𑁄 [𑀅𑀤𑁆𑀥𑁄 (𑀲𑁆𑀬𑀸. 𑀓.)] 𑀫𑀳𑀤𑁆𑀥𑀦𑁄 𑀥𑀦𑀯𑀸𑀢𑀺𑀧𑀺 𑀲𑀓𑁆𑀓𑁄. 𑀢𑀲𑁆𑀲𑀺𑀫𑀸𑀦𑀺 𑀥𑀦𑀸𑀦𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀤𑁆𑀥𑀸𑀥𑀦𑀁 𑀲𑀻𑀮𑀥𑀦𑀁 𑀳𑀺𑀭𑀺𑀥𑀦𑀁 𑀑𑀢𑁆𑀢𑀧𑁆𑀧𑀥𑀦𑀁 𑀲𑀼𑀢𑀥𑀦𑀁 𑀘𑀸𑀕𑀥𑀦𑀁 𑀧𑀜𑁆𑀜𑀸𑀥𑀦𑀁 𑀲𑀢𑀺𑀧𑀝𑁆𑀞𑀸𑀦𑀥𑀦𑀁 𑀲𑀫𑁆𑀫𑀧𑁆𑀧𑀥𑀸𑀦𑀥𑀦𑀁 𑀇𑀤𑁆𑀥𑀺𑀧𑀸𑀤𑀥𑀦𑀁 𑀇𑀦𑁆𑀤𑁆𑀭𑀺𑀬𑀥𑀦𑀁 𑀩𑀮𑀥𑀦𑀁 𑀩𑁄𑀚𑁆𑀛𑀗𑁆𑀕𑀥𑀦𑀁 𑀫𑀕𑁆𑀕𑀥𑀦𑀁 𑀨𑀮𑀥𑀦𑀁 𑀦𑀺𑀩𑁆𑀩𑀸𑀦𑀥𑀦𑀁. 𑀇𑀫𑁂𑀳𑀺 𑀅𑀦𑁂𑀓𑀯𑀺𑀥𑁂𑀳𑀺 𑀥𑀦𑀭𑀢𑀦𑁂𑀳𑀺 𑀅𑀟𑁆𑀠𑁄 𑀫𑀳𑀤𑁆𑀥𑀦𑁄 𑀥𑀦𑀯𑀸𑀢𑀺𑀧𑀺 𑀲𑀓𑁆𑀓𑁄. 𑀅𑀣 𑀯𑀸, 𑀲𑀓𑁆𑀓𑁄 𑀧𑀳𑀼 𑀯𑀺𑀲𑀯𑀻 𑀅𑀮𑀫𑀢𑁆𑀢𑁄 𑀲𑀽𑀭𑁄 𑀯𑀻𑀭𑁄 𑀯𑀺𑀓𑁆𑀓𑀦𑁆𑀢𑁄 𑀅𑀪𑀻𑀭𑀽 𑀅𑀘𑁆𑀙𑀫𑁆𑀪𑀻 𑀅𑀦𑀼𑀢𑁆𑀭𑀸𑀲𑀻 𑀅𑀧𑀮𑀸𑀬𑀻 𑀧𑀳𑀻𑀦𑀪𑀬𑀪𑁂𑀭𑀯𑁄 𑀯𑀺𑀕𑀢𑀮𑁄𑀫𑀳𑀁𑀲𑁄𑀢𑀺𑀧𑀺 𑀲𑀓𑁆𑀓𑁄. 𑀓𑀣𑀁𑀓𑀣𑀸 𑀯𑀼𑀘𑁆𑀘𑀢𑀺 𑀯𑀺𑀘𑀺𑀓𑀺𑀘𑁆𑀙𑀸. 𑀤𑀼𑀓𑁆𑀔𑁂 𑀓𑀗𑁆𑀔𑀸, 𑀤𑀼𑀓𑁆𑀔𑀲𑀫𑀼𑀤𑀬𑁂 𑀓𑀗𑁆𑀔𑀸, 𑀤𑀼𑀓𑁆𑀔𑀦𑀺𑀭𑁄𑀥𑁂 𑀓𑀗𑁆𑀔𑀸, 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀓𑀗𑁆𑀔𑀸, 𑀧𑀼𑀩𑁆𑀩𑀦𑁆𑀢𑁂 𑀓𑀗𑁆𑀔𑀸, 𑀅𑀧𑀭𑀦𑁆𑀢𑁂 𑀓𑀗𑁆𑀔𑀸, 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑁂 𑀓𑀗𑁆𑀔𑀸, 𑀇𑀤𑀧𑁆𑀧𑀘𑁆𑀘𑀬𑀢𑀸𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀼 𑀓𑀗𑁆𑀔𑀸. 𑀬𑀸 𑀏𑀯𑀭𑀽𑀧𑀸 𑀓𑀗𑁆𑀔𑀸 𑀓𑀗𑁆𑀔𑀸𑀬𑀦𑀸 𑀓𑀗𑁆𑀔𑀸𑀬𑀺𑀢𑀢𑁆𑀢𑀁 𑀯𑀺𑀫𑀢𑀺 𑀯𑀺𑀘𑀺𑀓𑀺𑀘𑁆𑀙𑀸 𑀤𑁆𑀯𑁂𑀴𑁆𑀳𑀓𑀁 𑀤𑁆𑀯𑁂𑀥𑀸𑀧𑀣𑁄 𑀲𑀁𑀲𑀬𑁄 𑀅𑀦𑁂𑀓𑀁𑀲𑀕𑁆𑀕𑀸𑀳𑁄 𑀆𑀲𑀧𑁆𑀧𑀦𑀸 𑀧𑀭𑀺𑀲𑀧𑁆𑀧𑀦𑀸 𑀅𑀧𑀭𑀺𑀬𑁄𑀕𑀸𑀳𑀦𑀸 𑀙𑀫𑁆𑀪𑀺𑀢𑀢𑁆𑀢𑀁 𑀘𑀺𑀢𑁆𑀢𑀲𑁆𑀲 𑀫𑀦𑁄𑀯𑀺𑀮𑁂𑀔𑁄. 𑀧𑀫𑀼𑀜𑁆𑀘 𑀫𑀁 𑀲𑀓𑁆𑀓 𑀓𑀣𑀁𑀓𑀣𑀸𑀳𑀻𑀢𑀺 𑀫𑀼𑀜𑁆𑀘 𑀫𑀁 𑀧𑀫𑀼𑀜𑁆𑀘 𑀫𑀁 𑀫𑁄𑀘𑁂𑀳𑀺 𑀫𑀁 𑀧𑀫𑁄𑀘𑁂𑀳𑀺 𑀫𑀁 𑀉𑀤𑁆𑀥𑀭 𑀫𑀁 𑀲𑀫𑀼𑀤𑁆𑀥𑀭 𑀫𑀁 𑀯𑀼𑀝𑁆𑀞𑀸𑀧𑁂𑀳𑀺 𑀫𑀁 𑀓𑀣𑀁𑀓𑀣𑀸𑀲𑀮𑁆𑀮𑀢𑁄𑀢𑀺 𑁋 𑀧𑀫𑀼𑀜𑁆𑀘 𑀫𑀁 𑀲𑀓𑁆𑀓 𑀓𑀣𑀁𑀓𑀣𑀸𑀳𑀺. 𑀢𑁂𑀦𑀸𑀳 𑀲𑁄 𑀩𑁆𑀭𑀸𑀳𑁆𑀫𑀡𑁄 𑁋

‘‘𑀧𑀲𑁆𑀲𑀸𑀫𑀳𑀁 𑀤𑁂𑀯𑀫𑀦𑀼𑀲𑁆𑀲𑀮𑁄𑀓𑁂, 𑀅𑀓𑀺𑀜𑁆𑀘𑀦𑀁 𑀩𑁆𑀭𑀸𑀳𑁆𑀫𑀡𑀫𑀺𑀭𑀺𑀬𑀫𑀸𑀦𑀁;

𑀢𑀁 𑀢𑀁 𑀦𑀫𑀲𑁆𑀲𑀸𑀫𑀺 𑀲𑀫𑀦𑁆𑀢𑀘𑀓𑁆𑀔𑀼, 𑀧𑀫𑀼𑀜𑁆𑀘 𑀫𑀁 𑀲𑀓𑁆𑀓 𑀓𑀣𑀁𑀓𑀣𑀸𑀳𑀻’’𑀢𑀺.

𑁩𑁩. 𑀦𑀸𑀳𑀁 𑀲𑀳𑀺𑀲𑁆𑀲𑀸𑀫𑀺 𑀧𑀫𑁄𑀘𑀦𑀸𑀬, 𑀓𑀣𑀁𑀓𑀣𑀺𑀁 𑀥𑁄𑀢𑀓 𑀓𑀜𑁆𑀘𑀺 𑀮𑁄𑀓𑁂;

𑀥𑀫𑁆𑀫𑀜𑁆𑀘 𑀲𑁂𑀝𑁆𑀞𑀁 𑀆𑀚𑀸𑀦𑀫𑀸𑀦𑁄, 𑀏𑀯𑀁 𑀢𑀼𑀯𑀁 𑀑𑀖𑀫𑀺𑀫𑀁 𑀢𑀭𑁂𑀲𑀺.

𑀦𑀸𑀳𑀁 𑀲𑀳𑀺𑀲𑁆𑀲𑀸𑀫𑀺 [𑀲𑀫𑀻𑀳𑀸𑀫𑀺 (𑀓.)] 𑀧𑀫𑁄𑀘𑀦𑀸𑀬𑀸𑀢𑀺 𑀦𑀸𑀳𑀁 𑀢𑀁 𑀲𑀓𑁆𑀓𑁄𑀫𑀺 𑀫𑀼𑀜𑁆𑀘𑀺𑀢𑀼𑀁 𑀧𑀫𑀼𑀜𑁆𑀘𑀺𑀢𑀼𑀁 𑀫𑁄𑀘𑁂𑀢𑀼𑀁 𑀧𑀫𑁄𑀘𑁂𑀢𑀼𑀁 𑀉𑀤𑁆𑀥𑀭𑀺𑀢𑀼𑀁 𑀲𑀫𑀼𑀤𑁆𑀥𑀭𑀺𑀢𑀼𑀁 𑀉𑀝𑁆𑀞𑀸𑀧𑁂𑀢𑀼𑀁 𑀲𑀫𑀼𑀝𑁆𑀞𑀸𑀧𑁂𑀢𑀼𑀁 𑀓𑀣𑀁𑀓𑀣𑀸𑀲𑀮𑁆𑀮𑀢𑁄𑀢𑀺. 𑀏𑀯𑀫𑁆𑀧𑀺 𑀦𑀸𑀳𑀁 𑀲𑀳𑀺𑀲𑁆𑀲𑀸𑀫𑀺 𑀧𑀫𑁄𑀘𑀦𑀸𑀬. 𑀅𑀣 𑀯𑀸, 𑀦 𑀈𑀳𑀸𑀫𑀺 𑀦 𑀲𑀫𑀻𑀳𑀸𑀫𑀺 𑀦 𑀉𑀲𑁆𑀲𑀳𑀸𑀫𑀺 𑀦 𑀯𑀸𑀬𑀫𑀸𑀫𑀺 𑀦 𑀉𑀲𑁆𑀲𑀸𑀳𑀁 𑀓𑀭𑁄𑀫𑀺 𑀦 𑀉𑀲𑁆𑀲𑁄𑀴𑁆𑀳𑀺𑀁 𑀓𑀭𑁄𑀫𑀺 𑀦 𑀣𑀸𑀫𑀁 𑀓𑀭𑁄𑀫𑀺 𑀦 𑀥𑀺𑀢𑀺𑀁 𑀓𑀭𑁄𑀫𑀺 𑀦 𑀯𑀻𑀭𑀺𑀬𑀁 𑀓𑀭𑁄𑀫𑀺 𑀦 𑀙𑀦𑁆𑀤𑀁 𑀚𑀦𑁂𑀫𑀺 𑀦 𑀲𑀜𑁆𑀚𑀦𑁂𑀫𑀺 𑀦 𑀦𑀺𑀩𑁆𑀩𑀢𑁆𑀢𑁂𑀫𑀺 𑀦 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀫𑀺 𑀅𑀲𑁆𑀲𑀤𑁆𑀥𑁂 𑀧𑀼𑀕𑁆𑀕𑀮𑁂 𑀅𑀘𑁆𑀙𑀦𑁆𑀤𑀺𑀓𑁂 𑀓𑀼𑀲𑀻𑀢𑁂 𑀳𑀻𑀦𑀯𑀻𑀭𑀺𑀬𑁂 𑀅𑀧𑁆𑀧𑀝𑀺𑀧𑀚𑁆𑀚𑀫𑀸𑀦𑁂 𑀥𑀫𑁆𑀫𑀤𑁂𑀲𑀦𑀸𑀬𑀸𑀢𑀺. 𑀏𑀯𑀫𑁆𑀧𑀺 𑀦𑀸𑀳𑀁 𑀲𑀳𑀺𑀲𑁆𑀲𑀸𑀫𑀺 𑀧𑀫𑁄𑀘𑀦𑀸𑀬. 𑀅𑀣 𑀯𑀸, 𑀦𑀢𑁆𑀣𑀜𑁆𑀜𑁄 𑀓𑁄𑀘𑀺 𑀫𑁄𑀘𑁂𑀢𑀸. 𑀢𑁂 𑀬𑀤𑀺 𑀫𑁄𑀘𑁂𑀬𑁆𑀬𑀼𑀁 𑀲𑀓𑁂𑀦 𑀣𑀸𑀫𑁂𑀦 𑀲𑀓𑁂𑀦 𑀩𑀮𑁂𑀦 𑀲𑀓𑁂𑀦 𑀯𑀻𑀭𑀺𑀬𑁂𑀦 𑀲𑀓𑁂𑀦 𑀧𑀭𑀓𑁆𑀓𑀫𑁂𑀦 𑀲𑀓𑁂𑀦 𑀧𑀼𑀭𑀺𑀲𑀣𑀸𑀫𑁂𑀦 𑀲𑀓𑁂𑀦 𑀧𑀼𑀭𑀺𑀲𑀩𑀮𑁂𑀦 𑀲𑀓𑁂𑀦 𑀧𑀼𑀭𑀺𑀲𑀯𑀻𑀭𑀺𑀬𑁂𑀦 𑀲𑀓𑁂𑀦 𑀧𑀼𑀭𑀺𑀲𑀧𑀭𑀓𑁆𑀓𑀫𑁂𑀦 𑀅𑀢𑁆𑀢𑀦𑀸 𑀲𑀫𑁆𑀫𑀸𑀧𑀝𑀺𑀧𑀤𑀁 𑀅𑀦𑀼𑀮𑁄𑀫𑀧𑀝𑀺𑀧𑀤𑀁 𑀅𑀧𑀘𑁆𑀘𑀦𑀻𑀓𑀧𑀝𑀺𑀧𑀤𑀁 𑀅𑀦𑁆𑀯𑀢𑁆𑀣𑀧𑀝𑀺𑀧𑀤𑀁 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀤𑀁 𑀧𑀝𑀺𑀧𑀚𑁆𑀚𑀫𑀸𑀦𑀸 𑀫𑁄𑀘𑁂𑀬𑁆𑀬𑀼𑀦𑁆𑀢𑀺. 𑀏𑀯𑀫𑁆𑀧𑀺 𑀦𑀸𑀳𑀁 𑀲𑀳𑀺𑀲𑁆𑀲𑀸𑀫𑀺 𑀧𑀫𑁄𑀘𑀦𑀸𑀬.

𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀲𑁄 𑀯𑀢, 𑀘𑀼𑀦𑁆𑀤, 𑀅𑀢𑁆𑀢𑀦𑀸 𑀧𑀮𑀺𑀧𑀧𑀮𑀺𑀧𑀦𑁆𑀦𑁄 𑀧𑀭𑀁 𑀧𑀮𑀺𑀧𑀧𑀮𑀺𑀧𑀦𑁆𑀦𑀁 𑀉𑀤𑁆𑀥𑀭𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀲𑁄 𑀯𑀢, 𑀘𑀼𑀦𑁆𑀤, 𑀅𑀢𑁆𑀢𑀦𑀸 𑀅𑀤𑀦𑁆𑀢𑁄 𑀅𑀯𑀺𑀦𑀻𑀢𑁄 𑀅𑀧𑀭𑀺𑀦𑀺𑀩𑁆𑀩𑀼𑀢𑁄 𑀧𑀭𑀁 𑀤𑀫𑁂𑀲𑁆𑀲𑀢𑀺 𑀯𑀺𑀦𑁂𑀲𑁆𑀲𑀢𑀺 𑀧𑀭𑀺𑀦𑀺𑀩𑁆𑀩𑀸𑀧𑁂𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀻𑀢𑀺. 𑀏𑀯𑀫𑁆𑀧𑀺 𑀦𑀸𑀳𑀁 𑀲𑀳𑀺𑀲𑁆𑀲𑀸𑀫𑀺 𑀧𑀫𑁄𑀘𑀦𑀸𑀬.

𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋

‘‘𑀅𑀢𑁆𑀢𑀦𑀸 𑀳𑀺 [𑀅𑀢𑁆𑀢𑀦𑀸𑀯 (𑀩𑀳𑀽𑀲𑀼) 𑀥. 𑀧. 𑁧𑁬𑁫] 𑀓𑀢𑀁 𑀧𑀸𑀧𑀁, 𑀅𑀢𑁆𑀢𑀦𑀸 𑀲𑀁𑀓𑀺𑀮𑀺𑀲𑁆𑀲𑀢𑀺;

𑀅𑀢𑁆𑀢𑀦𑀸 𑀅𑀓𑀢𑀁 𑀧𑀸𑀧𑀁, 𑀅𑀢𑁆𑀢𑀦𑀸𑀯 𑀯𑀺𑀲𑀼𑀚𑁆𑀛𑀢𑀺;

𑀲𑀼𑀤𑁆𑀥𑀺 𑀅𑀲𑀼𑀤𑁆𑀥𑀺 𑀧𑀘𑁆𑀘𑀢𑁆𑀢𑀁, 𑀦𑀸𑀜𑁆𑀜𑁄 𑀅𑀜𑁆𑀜𑀁 𑀯𑀺𑀲𑁄𑀥𑀬𑁂’’𑀢𑀺.

𑀏𑀯𑀫𑁆𑀧𑀺 𑀦𑀸𑀳𑀁 𑀲𑀳𑀺𑀲𑁆𑀲𑀸𑀫𑀺 𑀧𑀫𑁄𑀘𑀦𑀸𑀬.

𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀏𑀯𑀫𑁂𑀯 𑀔𑁄, 𑀩𑁆𑀭𑀸𑀳𑁆𑀫𑀡, 𑀢𑀺𑀝𑁆𑀞𑀢𑁂𑀯 𑀦𑀺𑀩𑁆𑀩𑀸𑀦𑀁 𑀢𑀺𑀝𑁆𑀞𑀢𑀺 𑀦𑀺𑀩𑁆𑀩𑀸𑀦𑀕𑀸𑀫𑀺𑀫𑀕𑁆𑀕𑁄 𑀢𑀺𑀝𑁆𑀞𑀸𑀫𑀳𑀁 𑀲𑀫𑀸𑀤𑀧𑁂𑀢𑀸, 𑀅𑀣 𑀘 𑀧𑀦 𑀫𑀫 𑀲𑀸𑀯𑀓𑀸 𑀫𑀬𑀸 𑀏𑀯𑀁 𑀑𑀯𑀤𑀺𑀬𑀫𑀸𑀦𑀸 𑀏𑀯𑀁 𑀅𑀦𑀼𑀲𑀸𑀲𑀺𑀬𑀫𑀸𑀦𑀸 𑀅𑀧𑁆𑀧𑁂𑀓𑀘𑁆𑀘𑁂 𑀅𑀘𑁆𑀘𑀦𑁆𑀢𑀦𑀺𑀝𑁆𑀞𑀁 𑀦𑀺𑀩𑁆𑀩𑀸𑀦𑀁 𑀆𑀭𑀸𑀥𑁂𑀦𑁆𑀢𑀺 𑀏𑀓𑀘𑁆𑀘𑁂 𑀦𑀸𑀭𑀸𑀥𑁂𑀦𑁆𑀢𑀻𑀢𑀺. 𑀏𑀢𑁆𑀣 𑀓𑁆𑀬𑀸𑀳𑀁, 𑀩𑁆𑀭𑀸𑀳𑁆𑀫𑀡 𑀓𑀭𑁄𑀫𑀺? 𑀫𑀕𑁆𑀕𑀓𑁆𑀔𑀸𑀬𑀻, 𑀩𑁆𑀭𑀸𑀳𑁆𑀫𑀡, 𑀢𑀣𑀸𑀕𑀢𑁄. 𑀫𑀕𑁆𑀕𑀁 𑀩𑀼𑀤𑁆𑀥𑁄 𑀆𑀘𑀺𑀓𑁆𑀔𑀢𑀺. 𑀅𑀢𑁆𑀢𑀦𑀸 𑀧𑀝𑀺𑀧𑀚𑁆𑀚𑀫𑀸𑀦𑀸 𑀫𑀼𑀘𑁆𑀘𑁂𑀬𑁆𑀬𑀼𑀦𑁆𑀢𑀺 [𑀫𑀼𑀜𑁆𑀘𑁂𑀬𑁆𑀬𑀼𑀦𑁆𑀢𑀺 (𑀲𑁆𑀬𑀸.)]. 𑀏𑀯𑀫𑁆𑀧𑀺 𑀦𑀸𑀳𑀁 𑀲𑀳𑀺𑀲𑁆𑀲𑀸𑀫𑀺 𑀧𑀫𑁄𑀘𑀦𑀸𑀬’’.

𑀓𑀣𑀁𑀓𑀣𑀺𑀁 𑀥𑁄𑀢𑀓 𑀓𑀜𑁆𑀘𑀺 𑀮𑁄𑀓𑁂𑀢𑀺 𑀓𑀣𑀁𑀓𑀣𑀺𑀁 𑀧𑀼𑀕𑁆𑀕𑀮𑀁 𑀲𑀓𑀗𑁆𑀔𑀁 𑀲𑀔𑀺𑀮𑀁 𑀲𑀤𑁆𑀯𑁂𑀴𑁆𑀳𑀓𑀁 𑀲𑀯𑀺𑀘𑀺𑀓𑀺𑀘𑁆𑀙𑀁. 𑀓𑀜𑁆𑀘𑀻𑀢𑀺 𑀓𑀜𑁆𑀘𑀺 𑀔𑀢𑁆𑀢𑀺𑀬𑀁 𑀯𑀸 𑀩𑁆𑀭𑀸𑀳𑁆𑀫𑀡𑀁 𑀯𑀸 𑀯𑁂𑀲𑁆𑀲𑀁 𑀯𑀸 𑀲𑀼𑀤𑁆𑀤𑀁 𑀯𑀸 𑀕𑀳𑀝𑁆𑀞𑀁 𑀯𑀸 𑀧𑀩𑁆𑀩𑀚𑀺𑀢𑀁 𑀯𑀸 𑀤𑁂𑀯𑀁 𑀯𑀸 𑀫𑀦𑀼𑀲𑁆𑀲𑀁 𑀯𑀸. 𑀮𑁄𑀓𑁂𑀢𑀺 𑀅𑀧𑀸𑀬𑀮𑁄𑀓𑁂…𑀧𑁂… 𑀆𑀬𑀢𑀦𑀮𑁄𑀓𑁂𑀢𑀺 𑁋 𑀓𑀣𑀁𑀓𑀣𑀺𑀁 𑀥𑁄𑀢𑀓 𑀓𑀜𑁆𑀘𑀺 𑀮𑁄𑀓𑁂.

𑀥𑀫𑁆𑀫𑀜𑁆𑀘 𑀲𑁂𑀝𑁆𑀞𑀁 𑀆𑀚𑀸𑀦𑀫𑀸𑀦𑁄𑀢𑀺 𑀥𑀫𑁆𑀫𑀁 𑀲𑁂𑀝𑁆𑀞𑀁 𑀯𑀼𑀘𑁆𑀘𑀢𑀺 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁. 𑀬𑁄 𑀲𑁄 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀢𑀡𑁆𑀳𑀓𑁆𑀔𑀬𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁. 𑀲𑁂𑀝𑁆𑀞𑀦𑁆𑀢𑀺 𑀅𑀕𑁆𑀕𑀁 𑀲𑁂𑀝𑁆𑀞𑀁 𑀯𑀺𑀲𑁂𑀝𑁆𑀞𑀁 𑀧𑀸𑀫𑁄𑀓𑁆𑀔𑀁 𑀉𑀢𑁆𑀢𑀫𑀁 𑀧𑀯𑀭𑀁 𑀥𑀫𑁆𑀫𑀁 𑀆𑀚𑀸𑀦𑀫𑀸𑀦𑁄 𑀯𑀺𑀚𑀸𑀦𑀫𑀸𑀦𑁄 𑀧𑀝𑀺𑀯𑀺𑀚𑀸𑀦𑀫𑀸𑀦𑁄 𑀧𑀝𑀺𑀯𑀺𑀚𑁆𑀛𑀫𑀸𑀦𑁄𑀢𑀺 𑁋 𑀥𑀫𑁆𑀫𑀜𑁆𑀘 𑀲𑁂𑀝𑁆𑀞𑀁 𑀆𑀚𑀸𑀦𑀫𑀸𑀦𑁄.

𑀏𑀯𑀁 𑀢𑀼𑀯𑀁 𑀑𑀖𑀫𑀺𑀫𑀁 𑀢𑀭𑁂𑀲𑀻𑀢𑀺 𑀏𑀯𑀁 𑀓𑀸𑀫𑁄𑀖𑀁 𑀪𑀯𑁄𑀖𑀁 𑀤𑀺𑀝𑁆𑀞𑁄𑀖𑀁 𑀅𑀯𑀺𑀚𑁆𑀚𑁄𑀖𑀁 𑀢𑀭𑁂𑀬𑁆𑀬𑀸𑀲𑀺 𑀉𑀢𑁆𑀢𑀭𑁂𑀬𑁆𑀬𑀸𑀲𑀺 𑀧𑀢𑀭𑁂𑀬𑁆𑀬𑀸𑀲𑀺 𑀲𑀫𑀢𑀺𑀓𑁆𑀓𑀫𑁂𑀬𑁆𑀬𑀸𑀲𑀺 𑀯𑀻𑀢𑀺𑀯𑀢𑁆𑀢𑁂𑀬𑁆𑀬𑀸𑀲𑀻𑀢𑀺 𑁋 𑀏𑀯𑀁 𑀢𑀼𑀯𑀁 𑀑𑀖𑀫𑀺𑀫𑀁 𑀢𑀭𑁂𑀲𑀺. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀦𑀸𑀳𑀁 𑀲𑀳𑀺𑀲𑁆𑀲𑀸𑀫𑀺 𑀧𑀫𑁄𑀘𑀦𑀸𑀬, 𑀓𑀣𑀁𑀓𑀣𑀺𑀁 𑀥𑁄𑀢𑀓 𑀓𑀜𑁆𑀘𑀺 𑀮𑁄𑀓𑁂;

𑀥𑀫𑁆𑀫𑀜𑁆𑀘 𑀲𑁂𑀝𑁆𑀞𑀁 𑀆𑀚𑀸𑀦𑀫𑀸𑀦𑁄, 𑀏𑀯𑀁 𑀢𑀼𑀯𑀁 𑀑𑀖𑀫𑀺𑀫𑀁 𑀢𑀭𑁂𑀲𑀻’’𑀢𑀺.

𑁩𑁪. 𑀅𑀦𑀼𑀲𑀸𑀲 𑀩𑁆𑀭𑀳𑁆𑀫𑁂 𑀓𑀭𑀼𑀡𑀸𑀬𑀫𑀸𑀦𑁄, 𑀯𑀺𑀯𑁂𑀓𑀥𑀫𑁆𑀫𑀁 𑀬𑀫𑀳𑀁 𑀯𑀺𑀚𑀜𑁆𑀜𑀁;

𑀬𑀣𑀸𑀳𑀁 𑀆𑀓𑀸𑀲𑁄𑀯 [𑀆𑀓𑀸𑀲𑁄 𑀘 (𑀲𑁆𑀬𑀸.)] 𑀅𑀩𑁆𑀬𑀸𑀧𑀚𑁆𑀚𑀫𑀸𑀦𑁄 [𑀅𑀩𑁆𑀬𑀸𑀧𑀚𑁆𑀛𑀫𑀸𑀦𑁄 (𑀲𑁆𑀬𑀸.)], 𑀇𑀥𑁂𑀯 𑀲𑀦𑁆𑀢𑁄 𑀅𑀲𑀺𑀢𑁄 𑀘𑀭𑁂𑀬𑁆𑀬𑀁.

𑀅𑀦𑀼𑀲𑀸𑀲 𑀩𑁆𑀭𑀳𑁆𑀫𑁂 𑀓𑀭𑀼𑀡𑀸𑀬𑀫𑀸𑀦𑁄𑀢𑀺 𑀅𑀦𑀼𑀲𑀸𑀲 𑀩𑁆𑀭𑀳𑁆𑀫𑁂 𑀅𑀦𑀼𑀕𑁆𑀕𑀡𑁆𑀳 𑀩𑁆𑀭𑀳𑁆𑀫𑁂 𑀅𑀦𑀼𑀓𑀫𑁆𑀧 𑀩𑁆𑀭𑀳𑁆𑀫𑁂𑀢𑀺 𑁋 𑀅𑀦𑀼𑀲𑀸𑀲 𑀩𑁆𑀭𑀳𑁆𑀫𑁂. 𑀓𑀭𑀼𑀡𑀸𑀬𑀫𑀸𑀦𑁄𑀢𑀺 𑀓𑀭𑀼𑀡𑀸𑀬𑀫𑀸𑀦𑁄 𑀅𑀦𑀼𑀤𑀬𑀫𑀸𑀦𑁄 [𑀅𑀦𑀼𑀤𑁆𑀤𑀬𑀫𑀸𑀦𑁄 (𑀩𑀳𑀽𑀲𑀼)] 𑀅𑀦𑀼𑀭𑀓𑁆𑀔𑀫𑀸𑀦𑁄 𑀅𑀦𑀼𑀕𑁆𑀕𑀡𑁆𑀳𑀫𑀸𑀦𑁄 𑀅𑀦𑀼𑀓𑀫𑁆𑀧𑀫𑀸𑀦𑁄𑀢𑀺 𑁋 𑀅𑀦𑀼𑀲𑀸𑀲 𑀩𑁆𑀭𑀳𑁆𑀫𑁂 𑀓𑀭𑀼𑀡𑀸𑀬𑀫𑀸𑀦𑁄.

𑀯𑀺𑀯𑁂𑀓𑀥𑀫𑁆𑀫𑀁 𑀬𑀫𑀳𑀁 𑀯𑀺𑀚𑀜𑁆𑀜𑀦𑁆𑀢𑀺 𑀯𑀺𑀯𑁂𑀓𑀥𑀫𑁆𑀫𑀁 𑀯𑀼𑀘𑁆𑀘𑀢𑀺 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁. 𑀬𑁄 𑀲𑁄 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀢𑀡𑁆𑀳𑀓𑁆𑀔𑀬𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁. 𑀬𑀫𑀳𑀁 𑀯𑀺𑀚𑀜𑁆𑀜𑀦𑁆𑀢𑀺 𑀬𑀫𑀳𑀁 𑀚𑀸𑀦𑁂𑀬𑁆𑀬𑀁 𑀆𑀚𑀸𑀦𑁂𑀬𑁆𑀬𑀁 𑀯𑀺𑀚𑀸𑀦𑁂𑀬𑁆𑀬𑀁 𑀧𑀝𑀺𑀯𑀺𑀚𑀸𑀦𑁂𑀬𑁆𑀬𑀁 𑀧𑀝𑀺𑀯𑀺𑀚𑁆𑀛𑁂𑀬𑁆𑀬𑀁 𑀅𑀥𑀺𑀕𑀘𑁆𑀙𑁂𑀬𑁆𑀬𑀁 𑀨𑀲𑁆𑀲𑁂𑀬𑁆𑀬𑀁 𑀲𑀘𑁆𑀙𑀺𑀓𑀭𑁂𑀬𑁆𑀬𑀦𑁆𑀢𑀺 𑁋 𑀯𑀺𑀯𑁂𑀓𑀥𑀫𑁆𑀫𑀁 𑀬𑀫𑀳𑀁 𑀯𑀺𑀚𑀜𑁆𑀜𑀁.

𑀬𑀣𑀸𑀳𑀁 𑀆𑀓𑀸𑀲𑁄𑀯 𑀅𑀩𑁆𑀬𑀸𑀧𑀚𑁆𑀚𑀫𑀸𑀦𑁄𑀢𑀺 𑀬𑀣𑀸 𑀆𑀓𑀸𑀲𑁄 𑀦 𑀧𑀚𑁆𑀚𑀢𑀺 𑀦 𑀕𑀡𑁆𑀳𑀢𑀺 [𑀦𑀢𑁆𑀣𑀺… 𑀲𑁆𑀬𑀸. … 𑀧𑁄𑀢𑁆𑀣𑀓𑁂] 𑀦 𑀩𑀚𑁆𑀛𑀢𑀺 𑀦 𑀧𑀮𑀺𑀩𑀚𑁆𑀛𑀢𑀺, 𑀏𑀯𑀁 𑀅𑀧𑀚𑁆𑀚𑀫𑀸𑀦𑁄 𑀅𑀕𑀡𑁆𑀳𑀫𑀸𑀦𑁄 𑀅𑀩𑀚𑁆𑀛𑀫𑀸𑀦𑁄 𑀅𑀧𑀮𑀺𑀩𑀚𑁆𑀛𑀫𑀸𑀦𑁄𑀢𑀺 𑁋 𑀏𑀯𑀫𑁆𑀧𑀺 𑀆𑀓𑀸𑀲𑁄𑀯 𑀅𑀩𑁆𑀬𑀸𑀧𑀚𑁆𑀚𑀫𑀸𑀦𑁄. 𑀬𑀣𑀸 𑀆𑀓𑀸𑀲𑁄 𑀦 𑀭𑀚𑁆𑀚𑀢𑀺 𑀮𑀸𑀔𑀸𑀬 𑀯𑀸 𑀳𑀮𑀺𑀤𑁆𑀤𑀺𑀬𑀸 [𑀳𑀮𑀺𑀤𑁆𑀤𑁂𑀦 (𑀲𑁆𑀬𑀸.)] 𑀯𑀸 𑀦𑀻𑀮𑀺𑀬𑀸 [𑀦𑀻𑀮𑁂𑀦 (𑀲𑁆𑀬𑀸.)] 𑀯𑀸 𑀫𑀜𑁆𑀚𑁂𑀝𑁆𑀞𑀸𑀬 𑀯𑀸 𑀏𑀯𑀁 𑀅𑀭𑀚𑁆𑀚𑀫𑀸𑀦𑁄 𑀅𑀤𑀼𑀲𑁆𑀲𑀫𑀸𑀦𑁄 𑀅𑀫𑀼𑀬𑁆𑀳𑀫𑀸𑀦𑁄 𑀅𑀓𑀺𑀮𑀺𑀲𑁆𑀲𑀫𑀸𑀦𑁄𑀢𑀺 [𑀅𑀓𑀺𑀮𑀺𑀬𑀫𑀸𑀦𑁄 (𑀲𑁆𑀬𑀸.)] 𑁋 𑀏𑀯𑀫𑁆𑀧𑀺 𑀆𑀓𑀸𑀲𑁄𑀯 𑀅𑀩𑁆𑀬𑀸𑀧𑀚𑁆𑀚𑀫𑀸𑀦𑁄. 𑀬𑀣𑀸 𑀆𑀓𑀸𑀲𑁄 𑀦 𑀓𑀼𑀧𑁆𑀧𑀢𑀺 𑀦 𑀩𑁆𑀬𑀸𑀧𑀚𑁆𑀚𑀢𑀺 𑀦 𑀧𑀢𑀺𑀮𑀻𑀬𑀢𑀺 [𑀧𑀢𑀺𑀝𑁆𑀞𑀺𑀬𑀢𑀺 (𑀓.)] 𑀦 𑀧𑀝𑀺𑀳𑀜𑁆𑀜𑀢𑀺, 𑀏𑀯𑀁 𑀅𑀓𑀼𑀧𑁆𑀧𑀫𑀸𑀦𑁄 𑀅𑀩𑁆𑀬𑀸𑀧𑀚𑁆𑀚𑀫𑀸𑀦𑁄 𑀅𑀧𑁆𑀧𑀢𑀺𑀮𑀻𑀬𑀫𑀸𑀦𑁄 𑀅𑀧𑁆𑀧𑀝𑀺𑀳𑀜𑁆𑀜𑀫𑀸𑀦𑁄 𑀅𑀧𑁆𑀧𑀝𑀺𑀳𑀢𑀫𑀸𑀦𑁄𑀢𑀺 𑁋 𑀏𑀯𑀫𑁆𑀧𑀺 𑀆𑀓𑀸𑀲𑁄𑀯 𑀅𑀩𑁆𑀬𑀸𑀧𑀚𑁆𑀚𑀫𑀸𑀦𑁄.

𑀇𑀥𑁂𑀯 𑀲𑀦𑁆𑀢𑁄 𑀅𑀲𑀺𑀢𑁄 𑀘𑀭𑁂𑀬𑁆𑀬𑀦𑁆𑀢𑀺. 𑀇𑀥𑁂𑀯 𑀲𑀦𑁆𑀢𑁄𑀢𑀺 𑀇𑀥𑁂𑀯 𑀲𑀦𑁆𑀢𑁄 𑀇𑀥𑁂𑀯 𑀲𑀫𑀸𑀦𑁄 𑀇𑀥𑁂𑀯 𑀦𑀺𑀲𑀺𑀦𑁆𑀦𑁄 𑀲𑀫𑀸𑀦𑁄 𑀇𑀫𑀲𑁆𑀫𑀺𑀁𑀬𑁂𑀯 𑀆𑀲𑀦𑁂 𑀦𑀺𑀲𑀺𑀦𑁆𑀦𑁄 𑀲𑀫𑀸𑀦𑁄 𑀇𑀫𑀺𑀲𑁆𑀲𑀸𑀬𑁂𑀯 𑀧𑀭𑀺𑀲𑀸𑀬 𑀦𑀺𑀲𑀺𑀦𑁆𑀦𑁄 𑀲𑀫𑀸𑀦𑁄𑀢𑀺, 𑀏𑀯𑀫𑁆𑀧𑀺 𑁋 𑀇𑀥𑁂𑀯 𑀲𑀦𑁆𑀢𑁄. 𑀅𑀣 𑀯𑀸, 𑀇𑀥𑁂𑀯 𑀲𑀦𑁆𑀢𑁄 𑀉𑀧𑀲𑀦𑁆𑀢𑁄 𑀯𑀽𑀧𑀲𑀦𑁆𑀢𑁄 𑀦𑀺𑀩𑁆𑀩𑀼𑀢𑁄 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑁄𑀢𑀺, 𑀏𑀯𑀫𑁆𑀧𑀺 𑁋 𑀇𑀥𑁂𑀯 𑀲𑀦𑁆𑀢𑁄. 𑀅𑀲𑀺𑀢𑁄𑀢𑀺 𑀤𑁆𑀯𑁂 𑀦𑀺𑀲𑁆𑀲𑀬𑀸 𑁋 𑀢𑀡𑁆𑀳𑀸𑀦𑀺𑀲𑁆𑀲𑀬𑁄 𑀘 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑁄 𑀘…𑀧𑁂… 𑀅𑀬𑀁 𑀢𑀡𑁆𑀳𑀸𑀦𑀺𑀲𑁆𑀲𑀬𑁄…𑀧𑁂… 𑀅𑀬𑀁 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑁄… 𑀢𑀡𑁆𑀳𑀸𑀦𑀺𑀲𑁆𑀲𑀬𑀁 𑀧𑀳𑀸𑀬 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑀁 𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀘𑀓𑁆𑀔𑀼𑀁 𑀅𑀦𑀺𑀲𑁆𑀲𑀺𑀢𑁄, 𑀲𑁄𑀢𑀁 𑀅𑀦𑀺𑀲𑁆𑀲𑀺𑀢𑁄, 𑀖𑀸𑀦𑀁 𑀅𑀦𑀺𑀲𑁆𑀲𑀺𑀢𑁄, 𑀚𑀺𑀯𑁆𑀳𑀁 𑀅𑀦𑀺𑀲𑁆𑀲𑀺𑀢𑁄, 𑀓𑀸𑀬𑀁 𑀅𑀦𑀺𑀲𑁆𑀲𑀺𑀢𑁄, 𑀫𑀦𑀁 𑀅𑀦𑀺𑀲𑁆𑀲𑀺𑀢𑁄, 𑀭𑀽𑀧𑁂… 𑀲𑀤𑁆𑀤𑁂… 𑀕𑀦𑁆𑀥𑁂 … 𑀭𑀲𑁂… 𑀨𑁄𑀝𑁆𑀞𑀩𑁆𑀩𑁂… 𑀥𑀫𑁆𑀫𑁂… 𑀓𑀼𑀮𑀁… 𑀕𑀡𑀁… 𑀆𑀯𑀸𑀲𑀁… 𑀮𑀸𑀪𑀁… 𑀬𑀲𑀁… 𑀧𑀲𑀁𑀲𑀁… 𑀲𑀼𑀔𑀁… 𑀘𑀻𑀯𑀭𑀁… 𑀧𑀺𑀡𑁆𑀟𑀧𑀸𑀢𑀁… 𑀲𑁂𑀦𑀸𑀲𑀦𑀁… 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁… 𑀓𑀸𑀫𑀥𑀸𑀢𑀼𑀁… 𑀭𑀽𑀧𑀥𑀸𑀢𑀼𑀁… 𑀅𑀭𑀽𑀧𑀥𑀸𑀢𑀼𑀁… 𑀓𑀸𑀫𑀪𑀯𑀁… 𑀭𑀽𑀧𑀪𑀯𑀁… 𑀅𑀭𑀽𑀧𑀪𑀯𑀁… 𑀲𑀜𑁆𑀜𑀸𑀪𑀯𑀁… 𑀅𑀲𑀜𑁆𑀜𑀸𑀪𑀯𑀁… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀪𑀯𑀁… 𑀏𑀓𑀯𑁄𑀓𑀸𑀭𑀪𑀯𑀁… 𑀘𑀢𑀼𑀯𑁄𑀓𑀸𑀭𑀪𑀯𑀁… 𑀧𑀜𑁆𑀘𑀯𑁄𑀓𑀸𑀭𑀪𑀯𑀁… 𑀅𑀢𑀻𑀢𑀁… 𑀅𑀦𑀸𑀕𑀢𑀁… 𑀧𑀘𑁆𑀘𑀼𑀧𑁆𑀧𑀦𑁆𑀦𑀁… 𑀤𑀺𑀝𑁆𑀞𑀲𑀼𑀢𑀫𑀼𑀢𑀯𑀺𑀜𑁆𑀜𑀸𑀢𑀩𑁆𑀩𑁂 [𑀤𑀺𑀝𑁆𑀞𑀁, 𑀲𑀼𑀢𑀁, 𑀫𑀼𑀢𑀁, 𑀯𑀺𑀜𑁆𑀜𑀸𑀢𑀁, 𑀲𑀩𑁆𑀩𑁂. 𑀫𑀳𑀸𑀦𑀺. 𑁪𑁬 𑀧𑀲𑁆𑀲𑀺𑀢𑀩𑁆𑀩𑀁] 𑀥𑀫𑁆𑀫𑁂 𑀅𑀲𑀺𑀢𑁄 𑀅𑀦𑀺𑀲𑁆𑀲𑀺𑀢𑁄 𑀅𑀦𑀮𑁆𑀮𑀻𑀦𑁄 𑀅𑀦𑀼𑀧𑀕𑀢𑁄 𑀅𑀦𑀚𑁆𑀛𑁄𑀲𑀺𑀢𑁄 𑀅𑀦𑀥𑀺𑀫𑀼𑀢𑁆𑀢𑁄 𑀦𑀺𑀓𑁆𑀔𑀦𑁆𑀢𑁄 𑀦𑀺𑀲𑁆𑀲𑀝𑁄 [𑀦𑀺𑀲𑁆𑀲𑀝𑁆𑀞𑁄 (𑀲𑁆𑀬𑀸.)] 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀲𑀁𑀬𑀼𑀢𑁆𑀢𑁄 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑁂𑀢𑀲𑀸. 𑀘𑀭𑁂𑀬𑁆𑀬𑀦𑁆𑀢𑀺 𑀘𑀭𑁂𑀬𑁆𑀬𑀁 𑀯𑀺𑀳𑀭𑁂𑀬𑁆𑀬𑀁 𑀇𑀭𑀺𑀬𑁂𑀬𑁆𑀬𑀁 𑀯𑀢𑁆𑀢𑁂𑀬𑁆𑀬𑀁 𑀬𑀧𑁂𑀬𑁆𑀬𑀁 𑀬𑀸𑀧𑁂𑀬𑁆𑀬𑀦𑁆𑀢𑀺 𑁋 𑀇𑀥𑁂𑀯 𑀲𑀦𑁆𑀢𑁄 𑀅𑀲𑀺𑀢𑁄 𑀘𑀭𑁂𑀬𑁆𑀬𑀁. 𑀢𑁂𑀦𑀸𑀳 𑀲𑁄 𑀩𑁆𑀭𑀸𑀳𑁆𑀫𑀡𑁄 𑁋

‘‘𑀅𑀦𑀼𑀲𑀸𑀲 𑀩𑁆𑀭𑀳𑁆𑀫𑁂 𑀓𑀭𑀼𑀡𑀸𑀬𑀫𑀸𑀦𑁄, 𑀯𑀺𑀯𑁂𑀓𑀥𑀫𑁆𑀫𑀁 𑀬𑀫𑀳𑀁 𑀯𑀺𑀚𑀜𑁆𑀜𑀁;

𑀬𑀣𑀸𑀳𑀁 𑀆𑀓𑀸𑀲𑁄𑀯 𑀅𑀩𑁆𑀬𑀸𑀧𑀚𑁆𑀚𑀫𑀸𑀦𑁄, 𑀇𑀥𑁂𑀯 𑀲𑀦𑁆𑀢𑁄 𑀅𑀲𑀺𑀢𑁄 𑀘𑀭𑁂𑀬𑁆𑀬’’𑀦𑁆𑀢𑀺.

𑁩𑁫. 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺 𑀢𑁂 𑀲𑀦𑁆𑀢𑀺𑀁, [𑀥𑁄𑀢𑀓𑀸𑀢𑀺 𑀪𑀕𑀯𑀸]

𑀤𑀺𑀝𑁆𑀞𑁂 𑀥𑀫𑁆𑀫𑁂 𑀅𑀦𑀻𑀢𑀺𑀳𑀁;

𑀬𑀁 𑀯𑀺𑀤𑀺𑀢𑁆𑀯𑀸 𑀲𑀢𑁄 𑀘𑀭𑀁, 𑀢𑀭𑁂 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓𑀁.

𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺 𑀢𑁂 𑀲𑀦𑁆𑀢𑀺𑀦𑁆𑀢𑀺 𑀭𑀸𑀕𑀲𑁆𑀲 𑀲𑀦𑁆𑀢𑀺𑀁, 𑀤𑁄𑀲𑀲𑁆𑀲 𑀲𑀦𑁆𑀢𑀺𑀁, 𑀫𑁄𑀳𑀲𑁆𑀲 𑀲𑀦𑁆𑀢𑀺𑀁, 𑀓𑁄𑀥𑀲𑁆𑀲 𑀲𑀦𑁆𑀢𑀺𑀁, 𑀉𑀧𑀦𑀸𑀳𑀲𑁆𑀲…𑀧𑁂… 𑀫𑀓𑁆𑀔𑀲𑁆𑀲… 𑀧𑀴𑀸𑀲𑀲𑁆𑀲… 𑀇𑀲𑁆𑀲𑀸𑀬… 𑀫𑀘𑁆𑀙𑀭𑀺𑀬𑀲𑁆𑀲… 𑀫𑀸𑀬𑀸𑀬… 𑀲𑀸𑀞𑁂𑀬𑁆𑀬𑀲𑁆𑀲… 𑀣𑀫𑁆𑀪𑀲𑁆𑀲… 𑀲𑀸𑀭𑀫𑁆𑀪𑀲𑁆𑀲… 𑀫𑀸𑀦𑀲𑁆𑀲… 𑀅𑀢𑀺𑀫𑀸𑀦𑀲𑁆𑀲… 𑀫𑀤𑀲𑁆𑀲… 𑀧𑀫𑀸𑀤𑀲𑁆𑀲… 𑀲𑀩𑁆𑀩𑀓𑀺𑀮𑁂𑀲𑀸𑀦𑀁… 𑀲𑀩𑁆𑀩𑀤𑀼𑀘𑁆𑀘𑀭𑀺𑀢𑀸𑀦𑀁… 𑀲𑀩𑁆𑀩𑀤𑀭𑀣𑀸𑀦𑀁… 𑀲𑀩𑁆𑀩𑀧𑀭𑀺𑀴𑀸𑀳𑀸𑀦𑀁… 𑀲𑀩𑁆𑀩𑀲𑀦𑁆𑀢𑀸𑀧𑀸𑀦𑀁… 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀸𑀦𑀁 𑀲𑀦𑁆𑀢𑀺𑀁 𑀉𑀧𑀲𑀦𑁆𑀢𑀺𑀁 𑀯𑀽𑀧𑀲𑀦𑁆𑀢𑀺𑀁 𑀦𑀺𑀩𑁆𑀩𑀼𑀢𑀺𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺 𑀧𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺 𑀆𑀘𑀺𑀓𑁆𑀔𑀺𑀲𑁆𑀲𑀸𑀫𑀺 𑀤𑁂𑀲𑁂𑀲𑁆𑀲𑀸𑀫𑀺 𑀧𑀜𑁆𑀜𑀧𑁂𑀲𑁆𑀲𑀸𑀫𑀺 𑀧𑀝𑁆𑀞𑀧𑁂𑀲𑁆𑀲𑀸𑀫𑀺 𑀯𑀺𑀯𑀭𑀺𑀲𑁆𑀲𑀸𑀫𑀺 𑀯𑀺𑀪𑀚𑀺𑀲𑁆𑀲𑀸𑀫𑀺 𑀉𑀢𑁆𑀢𑀸𑀦𑀻𑀓𑀭𑀺𑀲𑁆𑀲𑀸𑀫𑀺 𑀧𑀓𑀸𑀲𑀺𑀲𑁆𑀲𑀸𑀫𑀻𑀢𑀺 𑁋 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺 𑀢𑁂 𑀲𑀦𑁆𑀢𑀺𑀁.

𑀥𑁄𑀢𑀓𑀸𑀢𑀺 𑀪𑀕𑀯𑀸𑀢𑀺. 𑀥𑁄𑀢𑀓𑀸𑀢𑀺 𑀪𑀕𑀯𑀸 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀦𑀸𑀫𑁂𑀦 𑀆𑀮𑀧𑀢𑀺. 𑀪𑀕𑀯𑀸𑀢𑀺 𑀕𑀸𑀭𑀯𑀸𑀥𑀺𑀯𑀘𑀦𑀫𑁂𑀢𑀁…𑀧𑁂… 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺, 𑀬𑀤𑀺𑀤𑀁 𑀪𑀕𑀯𑀸𑀢𑀺 𑁋 𑀥𑁄𑀢𑀓𑀸𑀢𑀺 𑀪𑀕𑀯𑀸.

𑀤𑀺𑀝𑁆𑀞𑁂 𑀥𑀫𑁆𑀫𑁂 𑀅𑀦𑀻𑀢𑀺𑀳𑀦𑁆𑀢𑀺. 𑀤𑀺𑀝𑁆𑀞𑁂 𑀥𑀫𑁆𑀫𑁂𑀢𑀺 𑀤𑀺𑀝𑁆𑀞𑁂 𑀥𑀫𑁆𑀫𑁂 𑀜𑀸𑀢𑁂 𑀥𑀫𑁆𑀫𑁂 𑀢𑀼𑀮𑀺𑀢𑁂 𑀥𑀫𑁆𑀫𑁂 𑀢𑀻𑀭𑀺𑀢𑁂 𑀥𑀫𑁆𑀫𑁂 𑀯𑀺𑀪𑀽𑀢𑁂 𑀥𑀫𑁆𑀫𑁂 𑀯𑀺𑀪𑀸𑀯𑀺𑀢𑁂 𑀥𑀫𑁆𑀫𑁂 𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸𑀢𑀺…𑀧𑁂… 𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫𑀦𑁆𑀢𑀺 𑀤𑀺𑀝𑁆𑀞𑁂 𑀥𑀫𑁆𑀫𑁂 𑀜𑀸𑀢𑁂 𑀥𑀫𑁆𑀫𑁂 𑀢𑀼𑀮𑀺𑀢𑁂 𑀥𑀫𑁆𑀫𑁂 𑀢𑀻𑀭𑀺𑀢𑁂 𑀥𑀫𑁆𑀫𑁂 𑀯𑀺𑀪𑀸𑀯𑀺𑀢𑁂 𑀥𑀫𑁆𑀫𑁂 𑀯𑀺𑀪𑀽𑀢𑁂 𑀥𑀫𑁆𑀫𑁂𑀢𑀺, 𑀏𑀯𑀫𑁆𑀧𑀺 𑁋 𑀤𑀺𑀝𑁆𑀞𑁂 𑀥𑀫𑁆𑀫𑁂…𑀧𑁂…. 𑀅𑀣 𑀯𑀸, 𑀤𑀼𑀓𑁆𑀔𑁂 𑀤𑀺𑀝𑁆𑀞𑁂 𑀤𑀼𑀓𑁆𑀔𑀁 𑀓𑀣𑀬𑀺𑀲𑁆𑀲𑀸𑀫𑀺, 𑀲𑀫𑀼𑀤𑀬𑁂 𑀤𑀺𑀝𑁆𑀞𑁂 𑀲𑀫𑀼𑀤𑀬𑀁 𑀓𑀣𑀬𑀺𑀲𑁆𑀲𑀸𑀫𑀺, 𑀫𑀕𑁆𑀕𑁂 𑀤𑀺𑀝𑁆𑀞𑁂 𑀫𑀕𑁆𑀕𑀁 𑀓𑀣𑀬𑀺𑀲𑁆𑀲𑀸𑀫𑀺, 𑀦𑀺𑀭𑁄𑀥𑁂 𑀤𑀺𑀝𑁆𑀞𑁂 𑀦𑀺𑀭𑁄𑀥𑀁 𑀓𑀣𑀬𑀺𑀲𑁆𑀲𑀸𑀫𑀻𑀢𑀺, 𑀏𑀯𑀫𑁆𑀧𑀺 𑁋 𑀤𑀺𑀝𑁆𑀞𑁂 𑀥𑀫𑁆𑀫𑁂…𑀧𑁂…. 𑀅𑀣 𑀯𑀸, 𑀲𑀦𑁆𑀤𑀺𑀝𑁆𑀞𑀺𑀓𑀁 𑀅𑀓𑀸𑀮𑀺𑀓𑀁 𑀏𑀳𑀺𑀧𑀲𑁆𑀲𑀺𑀓𑀁 𑀑𑀧𑀦𑁂𑀬𑁆𑀬𑀺𑀓𑀁 [𑀑𑀧𑀦𑀬𑀺𑀓𑀁 (𑀲𑁆𑀬𑀸. 𑀓.)] 𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁 𑀯𑀺𑀜𑁆𑀜𑀽𑀳𑀻𑀢𑀺, 𑀏𑀯𑀫𑁆𑀧𑀺 𑁋 𑀤𑀺𑀝𑁆𑀞𑁂 𑀥𑀫𑁆𑀫𑁂. 𑀅𑀦𑀻𑀢𑀺𑀳𑀦𑁆𑀢𑀺 𑀦 𑀇𑀢𑀺𑀳𑀻𑀢𑀺𑀳𑀁 𑀦 𑀇𑀢𑀺𑀓𑀺𑀭𑀸𑀬 𑀦 𑀧𑀭𑀫𑁆𑀧𑀭𑀸𑀬 𑀦 𑀧𑀺𑀝𑀓𑀲𑀫𑁆𑀧𑀤𑀸𑀬 𑀦 𑀢𑀓𑁆𑀓𑀳𑁂𑀢𑀼 𑀦 𑀦𑀬𑀳𑁂𑀢𑀼 𑀦 𑀆𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑁂𑀦 𑀦 𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀬𑀸 𑀲𑀸𑀫𑀁 𑀲𑀬𑀫𑀪𑀺𑀜𑁆𑀜𑀸𑀢𑀁 𑀅𑀢𑁆𑀢𑀧𑀘𑁆𑀘𑀓𑁆𑀔𑀥𑀫𑁆𑀫𑀁, 𑀢𑀁 𑀓𑀣𑀬𑀺𑀲𑁆𑀲𑀸𑀫𑀻𑀢𑀺 𑁋 𑀤𑀺𑀝𑁆𑀞𑁂 𑀥𑀫𑁆𑀫𑁂 𑀅𑀦𑀻𑀢𑀺𑀳𑀁.

𑀬𑀁 𑀯𑀺𑀤𑀺𑀢𑁆𑀯𑀸 𑀲𑀢𑁄 𑀘𑀭𑀦𑁆𑀢𑀺 𑀬𑀁 𑀯𑀺𑀤𑀺𑀢𑀁 𑀓𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸; ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺 𑀯𑀺𑀤𑀺𑀢𑀁 𑀓𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸; ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀤𑀼𑀓𑁆𑀔𑀸’’𑀢𑀺…𑀧𑁂… ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸’’𑀢𑀺…𑀧𑁂… ‘‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺 𑀯𑀺𑀤𑀺𑀢𑀁 𑀓𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸. 𑀲𑀢𑁄𑀢𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀲𑀢𑁄 𑁋 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁 𑀪𑀸𑀯𑁂𑀦𑁆𑀢𑁄 𑀲𑀢𑁄…𑀧𑁂… 𑀲𑁄 𑀯𑀼𑀘𑁆𑀘𑀢𑀺 𑀲𑀢𑁄. 𑀘𑀭𑀦𑁆𑀢𑀺 𑀘𑀭𑀦𑁆𑀢𑁄 𑀯𑀺𑀳𑀭𑀦𑁆𑀢𑁄 𑀇𑀭𑀺𑀬𑀦𑁆𑀢𑁄 𑀯𑀢𑁆𑀢𑁂𑀦𑁆𑀢𑁄 𑀧𑀸𑀮𑁂𑀦𑁆𑀢𑁄 𑀬𑀧𑁂𑀦𑁆𑀢𑁄 𑀬𑀸𑀧𑁂𑀦𑁆𑀢𑁄𑀢𑀺 𑁋 𑀬𑀁 𑀯𑀺𑀤𑀺𑀢𑁆𑀯𑀸 𑀲𑀢𑁄 𑀘𑀭𑀁.

𑀢𑀭𑁂 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓𑀦𑁆𑀢𑀺 𑀯𑀺𑀲𑀢𑁆𑀢𑀺𑀓𑀸 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸. 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄…𑀧𑁂… 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁. 𑀯𑀺𑀲𑀢𑁆𑀢𑀺𑀓𑀸𑀢𑀺 𑀓𑁂𑀦𑀝𑁆𑀞𑁂𑀦 𑀯𑀺𑀲𑀢𑁆𑀢𑀺𑀓𑀸…𑀧𑁂… 𑀯𑀺𑀲𑀝𑀸 𑀯𑀺𑀢𑁆𑀣𑀢𑀸𑀢𑀺 𑀯𑀺𑀲𑀢𑁆𑀢𑀺𑀓𑀸. 𑀮𑁄𑀓𑁂𑀢𑀺 𑀅𑀧𑀸𑀬𑀮𑁄𑀓𑁂…𑀧𑁂… 𑀆𑀬𑀢𑀦𑀮𑁄𑀓𑁂. 𑀢𑀭𑁂 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓𑀦𑁆𑀢𑀺 𑀮𑁄𑀓𑁂 𑀯𑁂𑀲𑀸 𑀯𑀺𑀲𑀢𑁆𑀢𑀺𑀓𑀸, 𑀮𑁄𑀓𑁂 𑀯𑁂𑀢𑀁 𑀯𑀺𑀲𑀢𑁆𑀢𑀺𑀓𑀁 𑀲𑀢𑁄 𑀢𑀭𑁂𑀬𑁆𑀬 𑀉𑀢𑁆𑀢𑀭𑁂𑀬𑁆𑀬 𑀧𑀢𑀭𑁂𑀬𑁆𑀬 𑀲𑀫𑀢𑀺𑀓𑁆𑀓𑀫𑁂𑀬𑁆𑀬 𑀯𑀻𑀢𑀺𑀯𑀢𑁆𑀢𑁂𑀬𑁆𑀬𑀸𑀢𑀺 𑁋 𑀢𑀭𑁂 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓𑀁. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺 𑀢𑁂 𑀲𑀦𑁆𑀢𑀺𑀁, [𑀥𑁄𑀢𑀓𑀸𑀢𑀺 𑀪𑀕𑀯𑀸]

𑀤𑀺𑀝𑁆𑀞𑁂 𑀥𑀫𑁆𑀫𑁂 𑀅𑀦𑀻𑀢𑀺𑀳𑀁;

𑀬𑀁 𑀯𑀺𑀤𑀺𑀢𑁆𑀯𑀸 𑀲𑀢𑁄 𑀘𑀭𑀁, 𑀢𑀭𑁂 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓’’𑀦𑁆𑀢𑀺.

𑁩𑁬. 𑀢𑀜𑁆𑀘𑀸𑀳𑀁 𑀅𑀪𑀺𑀦𑀦𑁆𑀤𑀸𑀫𑀺, 𑀫𑀳𑁂𑀲𑀺 𑀲𑀦𑁆𑀢𑀺𑀫𑀼𑀢𑁆𑀢𑀫𑀁;

𑀬𑀁 𑀯𑀺𑀤𑀺𑀢𑁆𑀯𑀸 𑀲𑀢𑁄 𑀘𑀭𑀁, 𑀢𑀭𑁂 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓𑀁.

𑀢𑀜𑁆𑀘𑀸𑀳𑀁 𑀅𑀪𑀺𑀦𑀦𑁆𑀤𑀸𑀫𑀻𑀢𑀺. 𑀢𑀦𑁆𑀢𑀺 𑀢𑀼𑀬𑁆𑀳𑀁 𑀯𑀘𑀦𑀁 𑀩𑁆𑀬𑀧𑁆𑀧𑀣𑀁 𑀤𑁂𑀲𑀦𑀁 𑀅𑀦𑀼𑀲𑀸𑀲𑀦𑀁 𑀅𑀦𑀼𑀲𑀺𑀝𑁆𑀞𑀁 𑀦𑀦𑁆𑀤𑀸𑀫𑀺 𑀅𑀪𑀺𑀦𑀦𑁆𑀤𑀸𑀫𑀺 𑀫𑁄𑀤𑀸𑀫𑀺 𑀅𑀦𑀼𑀫𑁄𑀤𑀸𑀫𑀺 𑀇𑀘𑁆𑀙𑀸𑀫𑀺 𑀲𑀸𑀤𑀺𑀬𑀸𑀫𑀺 𑀧𑀢𑁆𑀣𑀬𑀸𑀫𑀺 𑀧𑀺𑀳𑀬𑀸𑀫𑀺 𑀅𑀪𑀺𑀚𑀧𑁆𑀧𑀸𑀫𑀻𑀢𑀺 𑁋 𑀢𑀜𑁆𑀘𑀸𑀳𑀁 𑀅𑀪𑀺𑀦𑀦𑁆𑀤𑀸𑀫𑀺.

𑀫𑀳𑁂𑀲𑀺𑀲𑀦𑁆𑀢𑀺𑀫𑀼𑀢𑁆𑀢𑀫𑀦𑁆𑀢𑀺. 𑀫𑀳𑁂𑀲𑀻𑀢𑀺 𑀓𑀺𑀁 𑀫𑀳𑁂𑀲𑀺 𑀪𑀕𑀯𑀸? 𑀫𑀳𑀦𑁆𑀢𑀁 𑀲𑀻𑀮𑀓𑁆𑀔𑀦𑁆𑀥𑀁 𑀏𑀲𑀻 𑀕𑀯𑁂𑀲𑀻 𑀧𑀭𑀺𑀬𑁂𑀲𑀻𑀢𑀺 𑀫𑀳𑁂𑀲𑀺, 𑀫𑀳𑀦𑁆𑀢𑀁 𑀲𑀫𑀸𑀥𑀺𑀓𑁆𑀔𑀦𑁆𑀥𑀁…𑀧𑁂… 𑀓𑀳𑀁 𑀦𑀭𑀸𑀲𑀪𑁄𑀢𑀺 𑀫𑀳𑁂𑀲𑀺. 𑀲𑀦𑁆𑀢𑀺𑀫𑀼𑀢𑁆𑀢𑀫𑀦𑁆𑀢𑀺 𑀲𑀦𑁆𑀢𑀺 𑀯𑀼𑀘𑁆𑀘𑀢𑀺 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁. 𑀬𑁄 𑀲𑁄 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀢𑀡𑁆𑀳𑀓𑁆𑀔𑀬𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁. 𑀉𑀢𑁆𑀢𑀫𑀦𑁆𑀢𑀺 𑀅𑀕𑁆𑀕𑀁 𑀲𑁂𑀝𑁆𑀞𑀁 𑀯𑀺𑀲𑁂𑀝𑁆𑀞𑀁 𑀧𑀸𑀫𑁄𑀓𑁆𑀔𑀁 𑀉𑀢𑁆𑀢𑀫𑀁 𑀧𑀯𑀭𑀦𑁆𑀢𑀺 𑁋 𑀫𑀳𑁂𑀲𑀺 𑀲𑀦𑁆𑀢𑀺𑀫𑀼𑀢𑁆𑀢𑀫𑀁.

𑀬𑀁 𑀯𑀺𑀤𑀺𑀢𑁆𑀯𑀸 𑀲𑀢𑁄 𑀘𑀭𑀦𑁆𑀢𑀺 𑀬𑀁 𑀯𑀺𑀤𑀺𑀢𑀁 𑀓𑀢𑁆𑀯𑀸…𑀧𑁂… ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺 𑀯𑀺𑀤𑀺𑀢𑀁 𑀓𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸; ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀤𑀼𑀓𑁆𑀔𑀸’’𑀢𑀺… ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸’’𑀢𑀺…𑀧𑁂… ‘‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺 𑀯𑀺𑀤𑀺𑀢𑀁 𑀓𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸. 𑀲𑀢𑁄𑀢𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀲𑀢𑁄 𑁋 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁 𑀪𑀸𑀯𑁂𑀦𑁆𑀢𑁄 𑀲𑀢𑁄…𑀧𑁂… 𑀲𑁄 𑀯𑀼𑀘𑁆𑀘𑀢𑀺 𑀲𑀢𑁄. 𑀘𑀭𑀦𑁆𑀢𑀺 𑀘𑀭𑀦𑁆𑀢𑁄…𑀧𑁂… 𑀬𑀸𑀧𑁂𑀦𑁆𑀢𑁄𑀢𑀺 𑁋 𑀬𑀁 𑀯𑀺𑀤𑀺𑀢𑁆𑀯𑀸 𑀲𑀢𑁄 𑀘𑀭𑀁.

𑀢𑀭𑁂 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓𑀦𑁆𑀢𑀺. 𑀯𑀺𑀲𑀢𑁆𑀢𑀺𑀓𑀸 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸. 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄…𑀧𑁂… 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁. 𑀯𑀺𑀲𑀢𑁆𑀢𑀺𑀓𑀸𑀢𑀺 𑀓𑁂𑀦𑀝𑁆𑀞𑁂𑀦 𑀯𑀺𑀲𑀢𑁆𑀢𑀺𑀓𑀸…𑀧𑁂… 𑀯𑀺𑀲𑀝𑀸 𑀯𑀺𑀢𑁆𑀣𑀢𑀸𑀢𑀺 𑀯𑀺𑀲𑀢𑁆𑀢𑀺𑀓𑀸. 𑀮𑁄𑀓𑁂𑀢𑀺 𑀅𑀧𑀸𑀬𑀮𑁄𑀓𑁂…𑀧𑁂… 𑀆𑀬𑀢𑀦𑀮𑁄𑀓𑁂. 𑀢𑀭𑁂 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓𑀦𑁆𑀢𑀺 𑀮𑁄𑀓𑁂 𑀯𑁂𑀲𑀸 𑀯𑀺𑀲𑀢𑁆𑀢𑀺𑀓𑀸, 𑀮𑁄𑀓𑁂 𑀯𑁂𑀢𑀁 𑀯𑀺𑀲𑀢𑁆𑀢𑀺𑀓𑀁 𑀲𑀢𑁄 𑀢𑀭𑁂𑀬𑁆𑀬𑀁 𑀉𑀢𑁆𑀢𑀭𑁂𑀬𑁆𑀬𑀁…𑀧𑁂… 𑀯𑀻𑀢𑀺𑀯𑀢𑁆𑀢𑁂𑀬𑁆𑀬𑀦𑁆𑀢𑀺 𑁋 𑀢𑀭𑁂 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓𑀁. 𑀢𑁂𑀦𑀸𑀳 𑀲𑁄 𑀩𑁆𑀭𑀸𑀳𑁆𑀫𑀡𑁄 𑁋

‘‘𑀢𑀜𑁆𑀘𑀸𑀳𑀁 𑀅𑀪𑀺𑀦𑀦𑁆𑀤𑀸𑀫𑀺, 𑀫𑀳𑁂𑀲𑀺 𑀲𑀦𑁆𑀢𑀺𑀫𑀼𑀢𑁆𑀢𑀫𑀁;

𑀬𑀁 𑀯𑀺𑀤𑀺𑀢𑁆𑀯𑀸 𑀲𑀢𑁄 𑀘𑀭𑀁, 𑀢𑀭𑁂 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓’’𑀦𑁆𑀢𑀺.

𑁩𑁭. 𑀬𑀁 𑀓𑀺𑀜𑁆𑀘𑀺 𑀲𑀫𑁆𑀧𑀚𑀸𑀦𑀸𑀲𑀺, [𑀥𑁄𑀢𑀓𑀸𑀢𑀺 𑀪𑀕𑀯𑀸]

𑀉𑀤𑁆𑀥𑀁 𑀅𑀥𑁄 𑀢𑀺𑀭𑀺𑀬𑀜𑁆𑀘𑀸𑀧𑀺 𑀫𑀚𑁆𑀛𑁂;

𑀏𑀢𑀁 𑀯𑀺𑀤𑀺𑀢𑁆𑀯𑀸 𑀲𑀗𑁆𑀕𑁄𑀢𑀺 𑀮𑁄𑀓𑁂, 𑀪𑀯𑀸𑀪𑀯𑀸𑀬 𑀫𑀸𑀓𑀸𑀲𑀺 𑀢𑀡𑁆𑀳𑀁.

𑀬𑀁 𑀓𑀺𑀜𑁆𑀘𑀺 𑀲𑀫𑁆𑀧𑀚𑀸𑀦𑀸𑀲𑀻𑀢𑀺 𑀬𑀁 𑀓𑀺𑀜𑁆𑀘𑀺 𑀲𑀫𑁆𑀧𑀚𑀸𑀦𑀸𑀲𑀺 𑀆𑀚𑀸𑀦𑀸𑀲𑀺 𑀧𑀝𑀺𑀯𑀺𑀚𑀸𑀦𑀸𑀲𑀺 𑀧𑀝𑀺𑀯𑀺𑀚𑁆𑀛𑀲𑀻𑀢𑀺 𑁋 𑀬𑀁 𑀓𑀺𑀜𑁆𑀘𑀺 𑀲𑀫𑁆𑀧𑀚𑀸𑀦𑀸𑀲𑀺. 𑀥𑁄𑀢𑀓𑀸𑀢𑀺 𑀪𑀕𑀯𑀸𑀢𑀺. 𑀥𑁄𑀢𑀓𑀸𑀢𑀺 𑀪𑀕𑀯𑀸 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀦𑀸𑀫𑁂𑀦 𑀆𑀮𑀧𑀢𑀺. 𑀪𑀕𑀯𑀸𑀢𑀺 𑀕𑀸𑀭𑀯𑀸𑀥𑀺𑀯𑀘𑀦𑀫𑁂𑀢𑀁…𑀧𑁂… 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺, 𑀬𑀤𑀺𑀤𑀁 𑀪𑀕𑀯𑀸𑀢𑀺 𑁋 𑀥𑁄𑀢𑀓𑀸𑀢𑀺 𑀪𑀕𑀯𑀸.

𑀉𑀤𑁆𑀥𑀁 𑀅𑀥𑁄 𑀢𑀺𑀭𑀺𑀬𑀜𑁆𑀘𑀸𑀧𑀺 𑀫𑀚𑁆𑀛𑁂𑀢𑀺. 𑀉𑀤𑁆𑀥𑀦𑁆𑀢𑀺 𑀅𑀦𑀸𑀕𑀢𑀁; 𑀅𑀥𑁄𑀢𑀺 𑀅𑀢𑀻𑀢𑀁; 𑀢𑀺𑀭𑀺𑀬𑀜𑁆𑀘𑀸𑀧𑀺 𑀫𑀚𑁆𑀛𑁂𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀁. 𑀉𑀤𑁆𑀥𑀦𑁆𑀢𑀺 𑀤𑁂𑀯𑀮𑁄𑀓𑁄; 𑀅𑀥𑁄𑀢𑀺 𑀅𑀧𑀸𑀬𑀮𑁄𑀓𑁄; 𑀢𑀺𑀭𑀺𑀬𑀜𑁆𑀘𑀸𑀧𑀺 𑀫𑀚𑁆𑀛𑁂𑀢𑀺 𑀫𑀦𑀼𑀲𑁆𑀲𑀮𑁄𑀓𑁄. 𑀅𑀣 𑀯𑀸, 𑀉𑀤𑁆𑀥𑀦𑁆𑀢𑀺 𑀓𑀼𑀲𑀮𑀸 𑀥𑀫𑁆𑀫𑀸; 𑀅𑀥𑁄𑀢𑀺 𑀅𑀓𑀼𑀲𑀮𑀸 𑀥𑀫𑁆𑀫𑀸; 𑀢𑀺𑀭𑀺𑀬𑀜𑁆𑀘𑀸𑀧𑀺 𑀫𑀚𑁆𑀛𑁂𑀢𑀺 𑀅𑀩𑁆𑀬𑀸𑀓𑀢𑀸 𑀥𑀫𑁆𑀫𑀸. 𑀉𑀤𑁆𑀥𑀦𑁆𑀢𑀺 𑀅𑀭𑀽𑀧𑀥𑀸𑀢𑀼; 𑀅𑀥𑁄𑀢𑀺 𑀓𑀸𑀫𑀥𑀸𑀢𑀼; 𑀢𑀺𑀭𑀺𑀬𑀜𑁆𑀘𑀸𑀧𑀺 𑀫𑀚𑁆𑀛𑁂𑀢𑀺 𑀭𑀽𑀧𑀥𑀸𑀢𑀼. 𑀉𑀤𑁆𑀥𑀦𑁆𑀢𑀺 𑀲𑀼𑀔𑀸 𑀯𑁂𑀤𑀦𑀸; 𑀅𑀥𑁄𑀢𑀺 𑀤𑀼𑀓𑁆𑀔𑀸 𑀯𑁂𑀤𑀦𑀸; 𑀢𑀺𑀭𑀺𑀬𑀜𑁆𑀘𑀸𑀧𑀺 𑀫𑀚𑁆𑀛𑁂𑀢𑀺 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸. 𑀉𑀤𑁆𑀥𑀦𑁆𑀢𑀺 𑀉𑀤𑁆𑀥𑀁 𑀧𑀸𑀤𑀢𑀮𑀸; 𑀅𑀥𑁄𑀢𑀺 𑀅𑀥𑁄 𑀓𑁂𑀲𑀫𑀢𑁆𑀣𑀓𑀸; 𑀢𑀺𑀭𑀺𑀬𑀜𑁆𑀘𑀸𑀧𑀺 𑀫𑀚𑁆𑀛𑁂𑀢𑀺 𑀯𑁂𑀫𑀚𑁆𑀛𑁂𑀢𑀺 𑁋 𑀉𑀤𑁆𑀥𑀁 𑀅𑀥𑁄 𑀢𑀺𑀭𑀺𑀬𑀜𑁆𑀘𑀸𑀧𑀺 𑀫𑀚𑁆𑀛𑁂.

𑀏𑀢𑀁 𑀯𑀺𑀤𑀺𑀢𑁆𑀯𑀸 𑀲𑀗𑁆𑀕𑁄𑀢𑀺 𑀮𑁄𑀓𑁂𑀢𑀺 𑀲𑀗𑁆𑀕𑁄 𑀏𑀲𑁄 𑀮𑀕𑁆𑀕𑀦𑀁 𑀏𑀢𑀁 𑀩𑀦𑁆𑀥𑀦𑀁 𑀏𑀢𑀁 𑀧𑀮𑀺𑀩𑁄𑀥𑁄 𑀏𑀲𑁄𑀢𑀺 𑀜𑀢𑁆𑀯𑀸 𑀚𑀸𑀦𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸𑀢𑀺 𑁋 𑀏𑀢𑀁 𑀯𑀺𑀤𑀺𑀢𑁆𑀯𑀸 𑀲𑀗𑁆𑀕𑁄𑀢𑀺 𑀮𑁄𑀓𑁂.

𑀪𑀯𑀸𑀪𑀯𑀸𑀬 𑀫𑀸𑀓𑀸𑀲𑀺 𑀢𑀡𑁆𑀳𑀦𑁆𑀢𑀺. 𑀢𑀡𑁆𑀳𑀸𑀢𑀺 𑀭𑀽𑀧𑀢𑀡𑁆𑀳𑀸 𑀲𑀤𑁆𑀤𑀢𑀡𑁆𑀳𑀸…𑀧𑁂… 𑀥𑀫𑁆𑀫𑀢𑀡𑁆𑀳𑀸. 𑀪𑀯𑀸𑀪𑀯𑀸𑀬𑀸𑀢𑀺 𑀪𑀯𑀸𑀪𑀯𑀸𑀬 𑀓𑀫𑁆𑀫𑀪𑀯𑀸𑀬 𑀧𑀼𑀦𑀩𑁆𑀪𑀯𑀸𑀬 𑀓𑀸𑀫𑀪𑀯𑀸𑀬, 𑀓𑀫𑁆𑀫𑀪𑀯𑀸𑀬 𑀓𑀸𑀫𑀪𑀯𑀸𑀬 𑀧𑀼𑀦𑀩𑁆𑀪𑀯𑀸𑀬 𑀭𑀽𑀧𑀪𑀯𑀸𑀬, 𑀓𑀫𑁆𑀫𑀪𑀯𑀸𑀬 𑀭𑀽𑀧𑀪𑀯𑀸𑀬 𑀧𑀼𑀦𑀩𑁆𑀪𑀯𑀸𑀬 𑀅𑀭𑀽𑀧𑀪𑀯𑀸𑀬, 𑀓𑀫𑁆𑀫𑀪𑀯𑀸𑀬 𑀅𑀭𑀽𑀧𑀪𑀯𑀸𑀬 𑀧𑀼𑀦𑀩𑁆𑀪𑀯𑀸𑀬 𑀧𑀼𑀦𑀧𑁆𑀧𑀼𑀦𑀩𑁆𑀪𑀯𑀸𑀬, 𑀧𑀼𑀦𑀧𑁆𑀧𑀼𑀦𑀕𑀢𑀺𑀬𑀸 𑀧𑀼𑀦𑀧𑁆𑀧𑀼𑀦𑀉𑀧𑀧𑀢𑁆𑀢𑀺𑀬𑀸 𑀧𑀼𑀦𑀧𑁆𑀧𑀼𑀦𑀧𑀝𑀺𑀲𑀦𑁆𑀥𑀺𑀬𑀸 𑀧𑀼𑀦𑀧𑁆𑀧𑀼𑀦𑀅𑀢𑁆𑀢𑀪𑀸𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺𑀬𑀸 𑀢𑀡𑁆𑀳𑀁 𑀫𑀸𑀓𑀸𑀲𑀺 𑀫𑀸 𑀚𑀦𑁂𑀲𑀺 𑀫𑀸 𑀲𑀜𑁆𑀚𑀦𑁂𑀲𑀺 𑀫𑀸 𑀦𑀺𑀩𑁆𑀩𑀢𑁆𑀢𑁂𑀲𑀺 𑀫𑀸𑀪𑀺𑀦𑀺𑀩𑁆𑀩𑀢𑁆𑀢𑁂𑀲𑀺, 𑀧𑀚𑀳 𑀯𑀺𑀦𑁄𑀤𑁂𑀳𑀺 𑀩𑁆𑀬𑀦𑁆𑀢𑀻𑀓𑀭𑁄𑀳𑀺 𑀅𑀦𑀪𑀸𑀯𑀁 𑀕𑀫𑁂𑀳𑀻𑀢𑀺 𑁋 𑀪𑀯𑀸𑀪𑀯𑀸𑀬 𑀫𑀸𑀓𑀸𑀲𑀺 𑀢𑀡𑁆𑀳𑀦𑁆𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀬𑀁 𑀓𑀺𑀜𑁆𑀘𑀺 𑀲𑀫𑁆𑀧𑀚𑀸𑀦𑀸𑀲𑀺, [𑀥𑁄𑀢𑀓𑀸𑀢𑀺 𑀪𑀕𑀯𑀸]

𑀉𑀤𑁆𑀥𑀁 𑀅𑀥𑁄 𑀢𑀺𑀭𑀺𑀬𑀜𑁆𑀘𑀸𑀧𑀺 𑀫𑀚𑁆𑀛𑁂;

𑀏𑀢𑀁 𑀯𑀺𑀤𑀺𑀢𑁆𑀯𑀸 𑀲𑀗𑁆𑀕𑁄𑀢𑀺 𑀮𑁄𑀓𑁂, 𑀪𑀯𑀸𑀪𑀯𑀸𑀬 𑀫𑀸𑀓𑀸𑀲𑀺 𑀢𑀡𑁆𑀳’’𑀦𑁆𑀢𑀺.

𑀲𑀳 𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑀸…𑀧𑁂… 𑀲𑀢𑁆𑀣𑀸 𑀫𑁂, 𑀪𑀦𑁆𑀢𑁂 𑀪𑀕𑀯𑀸, 𑀲𑀸𑀯𑀓𑁄𑀳𑀫𑀲𑁆𑀫𑀻𑀢𑀺.

𑀥𑁄𑀢𑀓𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲𑁄 𑀧𑀜𑁆𑀘𑀫𑁄.