𑁩. 𑀧𑀼𑀡𑁆𑀡𑀓𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲𑁄

𑁧𑁨. 𑀅𑀦𑁂𑀚𑀁 𑀫𑀽𑀮𑀤𑀲𑁆𑀲𑀸𑀯𑀺𑀁, [𑀇𑀘𑁆𑀘𑀸𑀬𑀲𑁆𑀫𑀸 𑀧𑀼𑀡𑁆𑀡𑀓𑁄]

𑀅𑀢𑁆𑀣𑀺 𑀧𑀜𑁆𑀳𑁂𑀦 𑀆𑀕𑀫𑀁;

𑀓𑀺𑀁𑀦𑀺𑀲𑁆𑀲𑀺𑀢𑀸 𑀇𑀲𑀬𑁄 𑀫𑀦𑀼𑀚𑀸, 𑀔𑀢𑁆𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑀸 𑀤𑁂𑀯𑀢𑀸𑀦𑀁;

𑀬𑀜𑁆𑀜𑀫𑀓𑀧𑁆𑀧𑀬𑀺𑀁𑀲𑀼 𑀧𑀼𑀣𑀽𑀥 𑀮𑁄𑀓𑁂, 𑀧𑀼𑀘𑁆𑀙𑀸𑀫𑀺 𑀢𑀁 𑀪𑀕𑀯𑀸 𑀩𑁆𑀭𑀽𑀳𑀺 𑀫𑁂𑀢𑀁.

𑀅𑀦𑁂𑀚𑀁 𑀫𑀽𑀮𑀤𑀲𑁆𑀲𑀸𑀯𑀺𑀦𑁆𑀢𑀺 𑀏𑀚𑀸 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸. 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄…𑀧𑁂… 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁 𑀲𑀸 𑀏𑀚𑀸 𑀢𑀡𑁆𑀳𑀸 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀧𑀳𑀻𑀦𑀸 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸. 𑀢𑀲𑁆𑀫𑀸 𑀩𑀼𑀤𑁆𑀥𑁄 𑀅𑀦𑁂𑀚𑁄. 𑀏𑀚𑀸𑀬 𑀧𑀳𑀻𑀦𑀢𑁆𑀢𑀸 𑀅𑀦𑁂𑀚𑁄. 𑀪𑀕𑀯𑀸 𑀮𑀸𑀪𑁂𑀧𑀺 𑀦 𑀇𑀜𑁆𑀚𑀢𑀺, 𑀅𑀮𑀸𑀪𑁂𑀧𑀺 𑀦 𑀇𑀜𑁆𑀚𑀢𑀺, 𑀬𑀲𑁂𑀧𑀺 𑀦 𑀇𑀜𑁆𑀚𑀢𑀺, 𑀅𑀬𑀲𑁂𑀧𑀺 𑀦 𑀇𑀜𑁆𑀚𑀢𑀺, 𑀧𑀲𑀁𑀲𑀸𑀬𑀧𑀺 𑀦 𑀇𑀜𑁆𑀚𑀢𑀺, 𑀦𑀺𑀦𑁆𑀤𑀸𑀬𑀧𑀺 𑀦 𑀇𑀜𑁆𑀚𑀢𑀺, 𑀲𑀼𑀔𑁂𑀧𑀺 𑀦 𑀇𑀜𑁆𑀚𑀢𑀺, 𑀤𑀼𑀓𑁆𑀔𑁂𑀧𑀺 𑀦 𑀇𑀜𑁆𑀚𑀢𑀺 𑀦 𑀘𑀮𑀢𑀺 𑀦 𑀯𑁂𑀥𑀢𑀺 𑀦𑀧𑁆𑀧𑀯𑁂𑀥𑀢𑀻𑀢𑀺 𑁋 𑀅𑀦𑁂𑀚𑀁. 𑀫𑀽𑀮𑀤𑀲𑁆𑀲𑀸𑀯𑀺𑀦𑁆𑀢𑀺 𑀪𑀕𑀯𑀸 𑀫𑀽𑀮𑀤𑀲𑁆𑀲𑀸𑀯𑀻 𑀳𑁂𑀢𑀼𑀤𑀲𑁆𑀲𑀸𑀯𑀻 𑀦𑀺𑀤𑀸𑀦𑀤𑀲𑁆𑀲𑀸𑀯𑀻 𑀲𑀫𑁆𑀪𑀯𑀤𑀲𑁆𑀲𑀸𑀯𑀻 𑀧𑀪𑀯𑀤𑀲𑁆𑀲𑀸𑀯𑀻 𑀲𑀫𑀼𑀝𑁆𑀞𑀸𑀦𑀤𑀲𑁆𑀲𑀸𑀯𑀻 𑀆𑀳𑀸𑀭𑀤𑀲𑁆𑀲𑀸𑀯𑀻 𑀆𑀭𑀫𑁆𑀫𑀡𑀤𑀲𑁆𑀲𑀸𑀯𑀻 𑀧𑀘𑁆𑀘𑀬𑀤𑀲𑁆𑀲𑀸𑀯𑀻 𑀲𑀫𑀼𑀤𑀬𑀤𑀲𑁆𑀲𑀸𑀯𑀻.

𑀢𑀻𑀡𑀺 𑀅𑀓𑀼𑀲𑀮𑀫𑀽𑀮𑀸𑀦𑀺 𑁋 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁, 𑀤𑁄𑀲𑁄 𑀅𑀓𑀼𑀲𑀮𑀫𑀽𑀮𑀁, 𑀫𑁄𑀳𑁄 𑀅𑀓𑀼𑀲𑀮𑀫𑀽𑀮𑀁.

𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 [𑀧𑀲𑁆𑀲 𑀅. 𑀦𑀺. 𑁩.𑁧𑁧𑁨] ‘‘𑀢𑀻𑀡𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀦𑀺𑀤𑀸𑀦𑀸𑀦𑀺 𑀓𑀫𑁆𑀫𑀸𑀦𑀁 𑀲𑀫𑀼𑀤𑀬𑀸𑀬. 𑀓𑀢𑀫𑀸𑀦𑀺 𑀢𑀻𑀡𑀺? 𑀮𑁄𑀪𑁄 𑀦𑀺𑀤𑀸𑀦𑀁 𑀓𑀫𑁆𑀫𑀸𑀦𑀁 𑀲𑀫𑀼𑀤𑀬𑀸𑀬, 𑀤𑁄𑀲𑁄 𑀦𑀺𑀤𑀸𑀦𑀁 𑀓𑀫𑁆𑀫𑀸𑀦𑀁 𑀲𑀫𑀼𑀤𑀬𑀸𑀬, 𑀫𑁄𑀳𑁄 𑀦𑀺𑀤𑀸𑀦𑀁 𑀓𑀫𑁆𑀫𑀸𑀦𑀁 𑀲𑀫𑀼𑀤𑀬𑀸𑀬. 𑀦, 𑀪𑀺𑀓𑁆𑀔𑀯𑁂, 𑀮𑁄𑀪𑀚𑁂𑀦 𑀓𑀫𑁆𑀫𑁂𑀦 𑀤𑁄𑀲𑀚𑁂𑀦 𑀓𑀫𑁆𑀫𑁂𑀦 𑀫𑁄𑀳𑀚𑁂𑀦 𑀓𑀫𑁆𑀫𑁂𑀦 𑀤𑁂𑀯𑀸 𑀧𑀜𑁆𑀜𑀸𑀬𑀦𑁆𑀢𑀺, 𑀫𑀦𑀼𑀲𑁆𑀲𑀸 𑀧𑀜𑁆𑀜𑀸𑀬𑀦𑁆𑀢𑀺, 𑀬𑀸 𑀯𑀸 𑀧𑀦𑀜𑁆𑀜𑀸𑀧𑀺 𑀓𑀸𑀘𑀺 𑀲𑀼𑀕𑀢𑀺𑀬𑁄. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀮𑁄𑀪𑀚𑁂𑀦 𑀓𑀫𑁆𑀫𑁂𑀦 𑀤𑁄𑀲𑀚𑁂𑀦 𑀓𑀫𑁆𑀫𑁂𑀦 𑀫𑁄𑀳𑀚𑁂𑀦 𑀓𑀫𑁆𑀫𑁂𑀦 𑀦𑀺𑀭𑀬𑁄 𑀧𑀜𑁆𑀜𑀸𑀬𑀢𑀺, 𑀢𑀺𑀭𑀘𑁆𑀙𑀸𑀦𑀬𑁄𑀦𑀺 𑀧𑀜𑁆𑀜𑀸𑀬𑀢𑀺, 𑀧𑁂𑀢𑁆𑀢𑀺𑀯𑀺𑀲𑀬𑁄 𑀧𑀜𑁆𑀜𑀸𑀬𑀢𑀺, 𑀬𑀸 𑀯𑀸 𑀧𑀦𑀜𑁆𑀜𑀸𑀧𑀺 𑀓𑀸𑀘𑀺 𑀤𑀼𑀕𑁆𑀕𑀢𑀺𑀬𑁄 𑀦𑀺𑀭𑀬𑁂 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀸 𑀧𑁂𑀢𑁆𑀢𑀺𑀯𑀺𑀲𑀬𑁂 𑀅𑀢𑁆𑀢𑀪𑀸𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺𑀬𑀸’’. 𑀇𑀫𑀸𑀦𑀺 𑀢𑀻𑀡𑀺 𑀅𑀓𑀼𑀲𑀮𑀫𑀽𑀮𑀸𑀦𑀻𑀢𑀺 𑀪𑀕𑀯𑀸 𑀚𑀸𑀦𑀸𑀢𑀺 𑀧𑀲𑁆𑀲𑀢𑀺. 𑀏𑀯𑀫𑁆𑀧𑀺 𑀪𑀕𑀯𑀸 𑀫𑀽𑀮𑀤𑀲𑁆𑀲𑀸𑀯𑀻…𑀧𑁂… 𑀲𑀫𑀼𑀤𑀬𑀤𑀲𑁆𑀲𑀸𑀯𑀻. 𑀢𑀻𑀡𑀺 𑀓𑀼𑀲𑀮𑀫𑀽𑀮𑀸𑀦𑀺 𑁋 𑀅𑀮𑁄𑀪𑁄 𑀓𑀼𑀲𑀮𑀫𑀽𑀮𑀁, 𑀅𑀤𑁄𑀲𑁄 𑀓𑀼𑀲𑀮𑀫𑀽𑀮𑀁, 𑀅𑀫𑁄𑀳𑁄 𑀓𑀼𑀲𑀮𑀫𑀽𑀮𑀁.

𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀢𑀻𑀡𑀺𑀫𑀸𑀦𑀺…𑀧𑁂… 𑀦, 𑀪𑀺𑀓𑁆𑀔𑀯𑁂, 𑀅𑀮𑁄𑀪𑀚𑁂𑀦 𑀓𑀫𑁆𑀫𑁂𑀦 𑀅𑀤𑁄𑀲𑀚𑁂𑀦 𑀓𑀫𑁆𑀫𑁂𑀦 𑀅𑀫𑁄𑀳𑀚𑁂𑀦 𑀓𑀫𑁆𑀫𑁂𑀦 𑀦𑀺𑀭𑀬𑁄 𑀧𑀜𑁆𑀜𑀸𑀬𑀢𑀺, 𑀢𑀺𑀭𑀘𑁆𑀙𑀸𑀦𑀬𑁄𑀦𑀺 𑀧𑀜𑁆𑀜𑀸𑀬𑀢𑀺, 𑀧𑁂𑀢𑁆𑀢𑀺𑀯𑀺𑀲𑀬𑁄 𑀧𑀜𑁆𑀜𑀸𑀬𑀢𑀺, 𑀬𑀸 𑀯𑀸 𑀧𑀦𑀜𑁆𑀜𑀸𑀧𑀺 𑀓𑀸𑀘𑀺 𑀤𑀼𑀕𑁆𑀕𑀢𑀺𑀬𑁄. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀅𑀮𑁄𑀪𑀚𑁂𑀦 𑀓𑀫𑁆𑀫𑁂𑀦 𑀅𑀤𑁄𑀲𑀚𑁂𑀦 𑀓𑀫𑁆𑀫𑁂𑀦 𑀅𑀫𑁄𑀳𑀚𑁂𑀦 𑀓𑀫𑁆𑀫𑁂𑀦 𑀤𑁂𑀯𑀸 𑀧𑀜𑁆𑀜𑀸𑀬𑀦𑁆𑀢𑀺, 𑀫𑀦𑀼𑀲𑁆𑀲𑀸 𑀧𑀜𑁆𑀜𑀸𑀬𑀦𑁆𑀢𑀺, 𑀬𑀸 𑀯𑀸 𑀧𑀦𑀜𑁆𑀜𑀸𑀧𑀺 𑀓𑀸𑀘𑀺 𑀲𑀼𑀕𑀢𑀺𑀬𑁄 𑀤𑁂𑀯𑁂 𑀘 𑀫𑀦𑀼𑀲𑁆𑀲𑁂 𑀘 𑀅𑀢𑁆𑀢𑀪𑀸𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺𑀬𑀸’’. 𑀇𑀫𑀸𑀦𑀺 𑀢𑀻𑀡𑀺 𑀓𑀼𑀲𑀮𑀫𑀽𑀮𑀸𑀦𑀻𑀢𑀺 𑀪𑀕𑀯𑀸 𑀚𑀸𑀦𑀸𑀢𑀺 𑀧𑀲𑁆𑀲𑀢𑀺. 𑀏𑀯𑀫𑁆𑀧𑀺 𑀪𑀕𑀯𑀸 𑀫𑀽𑀮𑀤𑀲𑁆𑀲𑀸𑀯𑀻…𑀧𑁂… 𑀲𑀫𑀼𑀤𑀬𑀤𑀲𑁆𑀲𑀸𑀯𑀻.

𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀬𑁂 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀅𑀓𑀼𑀲𑀮𑀸 𑀅𑀓𑀼𑀲𑀮𑀪𑀸𑀕𑀺𑀬𑀸 𑀅𑀓𑀼𑀲𑀮𑀧𑀓𑁆𑀔𑀺𑀓𑀸 𑀲𑀩𑁆𑀩𑁂 𑀢𑁂 𑀅𑀯𑀺𑀚𑁆𑀚𑀸𑀫𑀽𑀮𑀓𑀸 𑀅𑀯𑀺𑀚𑁆𑀚𑀸𑀲𑀫𑁄𑀲𑀭𑀡𑀸 𑀅𑀯𑀺𑀚𑁆𑀚𑀸𑀲𑀫𑀼𑀕𑁆𑀖𑀸𑀢𑀸’’. 𑀲𑀩𑁆𑀩𑁂 𑀢𑁂 𑀲𑀫𑀼𑀕𑁆𑀖𑀸𑀢𑀁 𑀕𑀘𑁆𑀙𑀦𑁆𑀢𑀻𑀢𑀺 𑀪𑀕𑀯𑀸 𑀚𑀸𑀦𑀸𑀢𑀺 𑀧𑀲𑁆𑀲𑀢𑀺. 𑀏𑀯𑀫𑁆𑀧𑀺 𑀪𑀕𑀯𑀸 𑀫𑀽𑀮𑀤𑀲𑁆𑀲𑀸𑀯𑀻…𑀧𑁂… 𑀲𑀫𑀼𑀤𑀬𑀤𑀲𑁆𑀲𑀸𑀯𑀻.

𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀬𑁂 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀓𑀼𑀲𑀮𑀸 𑀓𑀼𑀲𑀮𑀪𑀸𑀕𑀺𑀬𑀸 𑀓𑀼𑀲𑀮𑀧𑀓𑁆𑀔𑀺𑀓𑀸, 𑀲𑀩𑁆𑀩𑁂 𑀢𑁂 𑀅𑀧𑁆𑀧𑀫𑀸𑀤𑀫𑀽𑀮𑀓𑀸 𑀅𑀧𑁆𑀧𑀫𑀸𑀤𑀲𑀫𑁄𑀲𑀭𑀡𑀸. 𑀅𑀧𑁆𑀧𑀫𑀸𑀤𑁄 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀻’’𑀢𑀺 𑀪𑀕𑀯𑀸 𑀚𑀸𑀦𑀸𑀢𑀺 𑀧𑀲𑁆𑀲𑀢𑀺. 𑀏𑀯𑀫𑁆𑀧𑀺 𑀪𑀕𑀯𑀸 𑀫𑀽𑀮𑀤𑀲𑁆𑀲𑀸𑀯𑀻…𑀧𑁂… 𑀲𑀫𑀼𑀤𑀬𑀤𑀲𑁆𑀲𑀸𑀯𑀻.

𑀅𑀣 𑀯𑀸, 𑀪𑀕𑀯𑀸 𑀚𑀸𑀦𑀸𑀢𑀺 𑀧𑀲𑁆𑀲𑀢𑀺. ‘‘𑀅𑀯𑀺𑀚𑁆𑀚𑀸 𑀫𑀽𑀮𑀁 𑀲𑀗𑁆𑀔𑀸𑀭𑀸𑀦𑀁, 𑀲𑀗𑁆𑀔𑀸𑀭𑀸 𑀫𑀽𑀮𑀁 𑀯𑀺𑀜𑁆𑀜𑀸𑀡𑀲𑁆𑀲, 𑀯𑀺𑀜𑁆𑀜𑀸𑀡𑀁 𑀫𑀽𑀮𑀁 𑀦𑀸𑀫𑀭𑀽𑀧𑀲𑁆𑀲, 𑀦𑀸𑀫𑀭𑀽𑀧𑀁 𑀫𑀽𑀮𑀁 𑀲𑀴𑀸𑀬𑀢𑀦𑀲𑁆𑀲, 𑀲𑀴𑀸𑀬𑀢𑀦𑀁 𑀫𑀽𑀮𑀁 𑀨𑀲𑁆𑀲𑀲𑁆𑀲, 𑀨𑀲𑁆𑀲𑁄 𑀫𑀽𑀮𑀁 𑀯𑁂𑀤𑀦𑀸𑀬, 𑀯𑁂𑀤𑀦𑀸 𑀫𑀽𑀮𑀁 𑀢𑀡𑁆𑀳𑀸𑀬, 𑀢𑀡𑁆𑀳𑀸 𑀫𑀽𑀮𑀁 𑀉𑀧𑀸𑀤𑀸𑀦𑀲𑁆𑀲, 𑀉𑀧𑀸𑀤𑀸𑀦𑀁 𑀫𑀽𑀮𑀁 𑀪𑀯𑀲𑁆𑀲, 𑀪𑀯𑁄 𑀫𑀽𑀮𑀁 𑀚𑀸𑀢𑀺𑀬𑀸, 𑀚𑀸𑀢𑀺 𑀫𑀽𑀮𑀁 𑀚𑀭𑀸𑀫𑀭𑀡𑀲𑁆𑀲𑀸’’𑀢𑀺 𑁋 𑀪𑀕𑀯𑀸 𑀚𑀸𑀦𑀸𑀢𑀺 𑀧𑀲𑁆𑀲𑀢𑀺. 𑀏𑀯𑀫𑁆𑀧𑀺 𑀪𑀕𑀯𑀸 𑀫𑀽𑀮𑀤𑀲𑁆𑀲𑀸𑀯𑀻…𑀧𑁂… 𑀲𑀫𑀼𑀤𑀬𑀤𑀲𑁆𑀲𑀸𑀯𑀻.

𑀅𑀣 𑀯𑀸, 𑀪𑀕𑀯𑀸 𑀚𑀸𑀦𑀸𑀢𑀺 𑀧𑀲𑁆𑀲𑀢𑀺. ‘‘𑀘𑀓𑁆𑀔𑀼 𑀫𑀽𑀮𑀁 𑀘𑀓𑁆𑀔𑀼𑀭𑁄𑀕𑀸𑀦𑀁, 𑀲𑁄𑀢𑀁 𑀫𑀽𑀮𑀁 𑀲𑁄𑀢𑀭𑁄𑀕𑀸𑀦𑀁, 𑀖𑀸𑀦𑀁 𑀫𑀽𑀮𑀁 𑀖𑀸𑀦𑀭𑁄𑀕𑀸𑀦𑀁, 𑀚𑀺𑀯𑁆𑀳𑀸 𑀫𑀽𑀮𑀁 𑀚𑀺𑀯𑁆𑀳𑀸𑀭𑁄𑀕𑀸𑀦𑀁, 𑀓𑀸𑀬𑁄 𑀫𑀽𑀮𑀁 𑀓𑀸𑀬𑀭𑁄𑀕𑀸𑀦𑀁, 𑀫𑀦𑁄 𑀫𑀽𑀮𑀁 𑀘𑁂𑀢𑀲𑀺𑀓𑀸𑀦𑀁 𑀤𑀼𑀓𑁆𑀔𑀸𑀦’’𑀦𑁆𑀢𑀺 𑁋 𑀪𑀕𑀯𑀸 𑀚𑀸𑀦𑀸𑀢𑀺 𑀧𑀲𑁆𑀲𑀢𑀺. 𑀏𑀯𑀫𑁆𑀧𑀺 𑀪𑀕𑀯𑀸 𑀫𑀽𑀮𑀤𑀲𑁆𑀲𑀸𑀯𑀻 𑀳𑁂𑀢𑀼𑀤𑀲𑁆𑀲𑀸𑀯𑀻 𑀦𑀺𑀤𑀸𑀦𑀤𑀲𑁆𑀲𑀸𑀯𑀻 𑀲𑀫𑁆𑀪𑀯𑀤𑀲𑁆𑀲𑀸𑀯𑀻 𑀧𑀪𑀯𑀤𑀲𑁆𑀲𑀸𑀯𑀻 𑀲𑀫𑀼𑀝𑁆𑀞𑀸𑀦𑀤𑀲𑁆𑀲𑀸𑀯𑀻 𑀆𑀳𑀸𑀭𑀤𑀲𑁆𑀲𑀸𑀯𑀻 𑀆𑀭𑀫𑁆𑀫𑀡𑀤𑀲𑁆𑀲𑀸𑀯𑀻 𑀧𑀘𑁆𑀘𑀬𑀤𑀲𑁆𑀲𑀸𑀯𑀻 𑀲𑀫𑀼𑀤𑀬𑀤𑀲𑁆𑀲𑀸𑀯𑀻𑀢𑀺 𑁋 𑀅𑀦𑁂𑀚𑀁 𑀫𑀽𑀮𑀤𑀲𑁆𑀲𑀸𑀯𑀻.

𑀇𑀘𑁆𑀘𑀸𑀬𑀲𑁆𑀫𑀸 𑀧𑀼𑀡𑁆𑀡𑀓𑁄𑀢𑀺 𑀇𑀘𑁆𑀘𑀸𑀢𑀺 𑀧𑀤𑀲𑀦𑁆𑀥𑀺…𑀧𑁂… 𑀆𑀬𑀲𑁆𑀫𑀸 𑀧𑀼𑀡𑁆𑀡𑀓𑁄.

𑀅𑀢𑁆𑀣𑀺 𑀧𑀜𑁆𑀳𑁂𑀦 𑀆𑀕𑀫𑀦𑁆𑀢𑀺 𑀧𑀜𑁆𑀳𑁂𑀦 𑀅𑀢𑁆𑀣𑀺𑀓𑁄 𑀆𑀕𑀢𑁄𑀫𑁆𑀳𑀺, [𑀧𑀜𑁆𑀳𑀢𑁆𑀣𑀺𑀓𑀸𑀫𑁆𑀳 𑀆𑀕𑀢𑀸 (𑀩𑀳𑀽𑀲𑀼) 𑀧𑀲𑁆𑀲 𑀫𑀳𑀸𑀦𑀺. 𑁧𑁯𑁨] 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑀼𑀓𑀸𑀫𑁄 𑀆𑀕𑀢𑁄𑀫𑁆𑀳𑀺, 𑀧𑀜𑁆𑀳𑀁 𑀲𑁄𑀢𑀼𑀓𑀸𑀫𑁄 𑀆𑀕𑀢𑁄𑀫𑁆𑀳𑀻𑀢𑀺 𑁋 𑀏𑀯𑀫𑁆𑀧𑀺 𑀅𑀢𑁆𑀣𑀺 𑀧𑀜𑁆𑀳𑁂𑀦 𑀆𑀕𑀫𑀁. 𑀅𑀣 𑀯𑀸, 𑀧𑀜𑁆𑀳𑀢𑁆𑀣𑀺𑀓𑀸𑀦𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑀼𑀓𑀸𑀫𑀸𑀦𑀁 𑀧𑀜𑁆𑀳𑀁 𑀲𑁄𑀢𑀼𑀓𑀸𑀫𑀸𑀦𑀁 𑀆𑀕𑀫𑀦𑀁 𑀅𑀪𑀺𑀓𑁆𑀓𑀫𑀦𑀁 𑀉𑀧𑀲𑀗𑁆𑀓𑀫𑀦𑀁 𑀧𑀬𑀺𑀭𑀼𑀧𑀸𑀲𑀦𑀁 𑀅𑀢𑁆𑀣𑀻𑀢𑀺 𑁋 𑀏𑀯𑀫𑁆𑀧𑀺 𑀅𑀢𑁆𑀣𑀺 𑀧𑀜𑁆𑀳𑁂𑀦 𑀆𑀕𑀫𑀁. 𑀅𑀣 𑀯𑀸, 𑀧𑀜𑁆𑀳𑀸𑀕𑀫𑁄 𑀢𑀼𑀬𑁆𑀳𑀁 𑀅𑀢𑁆𑀣𑀺, 𑀢𑁆𑀯𑀫𑁆𑀧𑀺 𑀧𑀳𑀼 𑀢𑁆𑀯𑀫𑀲𑀺 𑀅𑀮𑀫𑀢𑁆𑀢𑁄. 𑀫𑀬𑀸 𑀧𑀼𑀘𑁆𑀙𑀺𑀢𑀁 𑀓𑀣𑁂𑀢𑀼𑀁 𑀯𑀺𑀲𑀚𑁆𑀚𑁂𑀢𑀼𑀁 𑀯𑀳𑀲𑁆𑀲𑁂𑀢𑀁 𑀪𑀸𑀭𑀦𑁆𑀢𑀺 [𑀯𑀺𑀲𑀚𑁆𑀚𑁂𑀢𑀼𑀁 𑀲𑀦𑁆𑀤𑀲𑁆𑀲𑁂𑀢𑀼𑀁 𑀪𑀡𑀺𑀢𑀼𑀦𑁆𑀢𑀺 (𑀲𑁆𑀬𑀸.) 𑀯𑀳𑀲𑁆𑀲𑀼 + 𑀏𑀢𑀁] 𑁋 𑀏𑀯𑀫𑁆𑀧𑀺 𑀅𑀢𑁆𑀣𑀺 𑀧𑀜𑁆𑀳𑁂𑀦 𑀆𑀕𑀫𑀁.

𑀓𑀺𑀁 𑀦𑀺𑀲𑁆𑀲𑀺𑀢𑀸 𑀇𑀲𑀬𑁄 𑀫𑀦𑀼𑀚𑀸𑀢𑀺 𑀓𑀺𑀁 𑀦𑀺𑀲𑁆𑀲𑀺𑀢𑀸 𑀆𑀲𑀺𑀢𑀸 𑀅𑀮𑁆𑀮𑀻𑀦𑀸 𑀉𑀧𑀕𑀢𑀸 𑀅𑀚𑁆𑀛𑁄𑀲𑀺𑀢𑀸 𑀅𑀥𑀺𑀫𑀼𑀢𑁆𑀢𑀸. 𑀇𑀲𑀬𑁄𑀢𑀺 𑀇𑀲𑀺𑀦𑀸𑀫𑀓𑀸 𑀬𑁂 𑀓𑁂𑀘𑀺 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑀸 𑀆𑀚𑀻𑀯𑀓𑀸 𑀦𑀺𑀕𑀡𑁆𑀞𑀸 𑀚𑀝𑀺𑀮𑀸 𑀢𑀸𑀧𑀲𑀸. 𑀫𑀦𑀼𑀚𑀸𑀢𑀺 𑀫𑀦𑀼𑀲𑁆𑀲𑀸 𑀯𑀼𑀘𑁆𑀘𑀦𑁆𑀢𑀻𑀢𑀺 𑁋 𑀓𑀺𑀁 𑀦𑀺𑀲𑁆𑀲𑀺𑀢𑀸 𑀇𑀲𑀬𑁄 𑀫𑀦𑀼𑀚𑀸.

𑀔𑀢𑁆𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑀸 𑀤𑁂𑀯𑀢𑀸𑀦𑀦𑁆𑀢𑀺. 𑀔𑀢𑁆𑀢𑀺𑀬𑀸𑀢𑀺 𑀬𑁂 𑀓𑁂𑀘𑀺 𑀔𑀢𑁆𑀢𑀺𑀬𑀚𑀸𑀢𑀺𑀓𑀸. 𑀩𑁆𑀭𑀸𑀳𑁆𑀫𑀡𑀸𑀢𑀺 𑀬𑁂 𑀓𑁂𑀘𑀺 𑀪𑁄𑀯𑀸𑀤𑀺𑀓𑀸. 𑀤𑁂𑀯𑀢𑀸𑀦𑀦𑁆𑀢𑀺 𑀆𑀚𑀻𑀯𑀓𑀲𑀸𑀯𑀓𑀸𑀦𑀁 𑀆𑀚𑀻𑀯𑀓𑀸 𑀤𑁂𑀯𑀢𑀸, 𑀦𑀺𑀕𑀡𑁆𑀞𑀲𑀸𑀯𑀓𑀸𑀦𑀁 𑀦𑀺𑀕𑀡𑁆𑀞𑀸 𑀤𑁂𑀯𑀢𑀸, 𑀚𑀝𑀺𑀮𑀲𑀸𑀯𑀓𑀸𑀦𑀁 𑀚𑀝𑀺𑀮𑀸 𑀤𑁂𑀯𑀢𑀸, 𑀧𑀭𑀺𑀩𑁆𑀩𑀸𑀚𑀓𑀲𑀸𑀯𑀓𑀸𑀦𑀁 𑀧𑀭𑀺𑀩𑁆𑀩𑀸𑀚𑀓𑀸 𑀤𑁂𑀯𑀢𑀸, 𑀅𑀯𑀺𑀭𑀼𑀤𑁆𑀥𑀓𑀲𑀸𑀯𑀓𑀸𑀦𑀁 𑀅𑀯𑀺𑀭𑀼𑀤𑁆𑀥𑀓𑀸 [𑀅𑀯𑀭𑀼𑀤𑁆𑀥𑀓𑀲𑀸𑀯𑀓𑀸𑀦𑀁 𑀅𑀯𑀭𑀼𑀤𑁆𑀥𑀓𑀸 (𑀲𑁆𑀬𑀸.)] 𑀤𑁂𑀯𑀢𑀸, 𑀳𑀢𑁆𑀣𑀺𑀯𑀢𑀺𑀓𑀸𑀦𑀁 𑀳𑀢𑁆𑀣𑀻 𑀤𑁂𑀯𑀢𑀸, 𑀅𑀲𑁆𑀲𑀯𑀢𑀺𑀓𑀸𑀦𑀁 𑀅𑀲𑁆𑀲𑀸 𑀤𑁂𑀯𑀢𑀸, 𑀕𑁄𑀯𑀢𑀺𑀓𑀸𑀦𑀁 𑀕𑀸𑀯𑁄 𑀤𑁂𑀯𑀢𑀸, 𑀓𑀼𑀓𑁆𑀓𑀼𑀭𑀯𑀢𑀺𑀓𑀸𑀦𑀁 𑀓𑀼𑀓𑁆𑀓𑀼𑀭𑀸 𑀤𑁂𑀯𑀢𑀸, 𑀓𑀸𑀓𑀯𑀢𑀺𑀓𑀸𑀦𑀁 𑀓𑀸𑀓𑀸 𑀤𑁂𑀯𑀢𑀸, 𑀯𑀸𑀲𑀼𑀤𑁂𑀯𑀯𑀢𑀺𑀓𑀸𑀦𑀁 𑀯𑀸𑀲𑀼𑀤𑁂𑀯𑁄 𑀤𑁂𑀯𑀢𑀸, 𑀩𑀮𑀤𑁂𑀯𑀯𑀢𑀺𑀓𑀸𑀦𑀁 𑀩𑀮𑀤𑁂𑀯𑁄 𑀤𑁂𑀯𑀢𑀸, 𑀧𑀼𑀡𑁆𑀡𑀪𑀤𑁆𑀤𑀯𑀢𑀺𑀓𑀸𑀦𑀁 𑀧𑀼𑀡𑁆𑀡𑀪𑀤𑁆𑀤𑁄 𑀤𑁂𑀯𑀢𑀸, 𑀫𑀡𑀺𑀪𑀤𑁆𑀤𑀯𑀢𑀺𑀓𑀸𑀦𑀁 𑀫𑀡𑀺𑀪𑀤𑁆𑀤𑁄 𑀤𑁂𑀯𑀢𑀸, 𑀅𑀕𑁆𑀕𑀺𑀯𑀢𑀺𑀓𑀸𑀦𑀁 𑀅𑀕𑁆𑀕𑀺 𑀤𑁂𑀯𑀢𑀸, 𑀦𑀸𑀕𑀯𑀢𑀺𑀓𑀸𑀦𑀁 𑀦𑀸𑀕𑀸 𑀤𑁂𑀯𑀢𑀸, 𑀲𑀼𑀧𑀡𑁆𑀡𑀯𑀢𑀺𑀓𑀸𑀦𑀁 𑀲𑀼𑀧𑀡𑁆𑀡𑀸 𑀤𑁂𑀯𑀢𑀸, 𑀬𑀓𑁆𑀔𑀯𑀢𑀺𑀓𑀸𑀦𑀁 𑀬𑀓𑁆𑀔𑀸 𑀤𑁂𑀯𑀢𑀸, 𑀅𑀲𑀼𑀭𑀯𑀢𑀺𑀓𑀸𑀦𑀁 𑀅𑀲𑀼𑀭𑀸 𑀤𑁂𑀯𑀢𑀸, 𑀕𑀦𑁆𑀥𑀩𑁆𑀩𑀯𑀢𑀺𑀓𑀸𑀦𑀁 𑀕𑀦𑁆𑀥𑀩𑁆𑀩𑀸 𑀤𑁂𑀯𑀢𑀸, 𑀫𑀳𑀸𑀭𑀸𑀚𑀯𑀢𑀺𑀓𑀸𑀦𑀁 𑀫𑀳𑀸𑀭𑀸𑀚𑀸𑀦𑁄 𑀤𑁂𑀯𑀢𑀸, 𑀘𑀦𑁆𑀤𑀯𑀢𑀺𑀓𑀸𑀦𑀁 𑀘𑀦𑁆𑀤𑁄 𑀤𑁂𑀯𑀢𑀸, 𑀲𑀽𑀭𑀺𑀬𑀯𑀢𑀺𑀓𑀸𑀦𑀁 𑀲𑀽𑀭𑀺𑀬𑁄 𑀤𑁂𑀯𑀢𑀸, 𑀇𑀦𑁆𑀤𑀯𑀢𑀺𑀓𑀸𑀦𑀁 𑀇𑀦𑁆𑀤𑁄 𑀤𑁂𑀯𑀢𑀸, 𑀩𑁆𑀭𑀳𑁆𑀫𑀯𑀢𑀺𑀓𑀸𑀦𑀁 𑀩𑁆𑀭𑀳𑁆𑀫𑀸 𑀤𑁂𑀯𑀢𑀸, 𑀤𑁂𑀯𑀯𑀢𑀺𑀓𑀸𑀦𑀁 𑀤𑁂𑀯𑁄 𑀤𑁂𑀯𑀢𑀸, 𑀤𑀺𑀲𑀸𑀯𑀢𑀺𑀓𑀸𑀦𑀁 𑀤𑀺𑀲𑀸 𑀤𑁂𑀯𑀢𑀸, 𑀬𑁂 𑀬𑁂𑀲𑀁 𑀤𑀓𑁆𑀔𑀺𑀡𑁂𑀬𑁆𑀬𑀸 𑀢𑁂 𑀢𑁂𑀲𑀁 𑀤𑁂𑀯𑀢𑀸𑀢𑀺 𑁋 𑀔𑀢𑁆𑀢𑀺𑀬𑀩𑁆𑀭𑀸𑀳𑁆𑀫𑀡𑀸 𑀤𑁂𑀯𑀢𑀸𑀦𑀁.

𑀬𑀜𑁆𑀜𑀫𑀓𑀧𑁆𑀧𑀬𑀺𑀁𑀲𑀼 𑀧𑀼𑀣𑀽𑀥 𑀮𑁄𑀓𑁂𑀢𑀺 𑀬𑀜𑁆𑀜𑀁 𑀯𑀼𑀘𑁆𑀘𑀢𑀺 𑀤𑁂𑀬𑁆𑀬𑀥𑀫𑁆𑀫𑁄 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁 𑀅𑀦𑁆𑀦𑀁 𑀧𑀸𑀦𑀁 𑀯𑀢𑁆𑀣𑀁 𑀬𑀸𑀦𑀁 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀁 [𑀫𑀸𑀮𑀸𑀕𑀦𑁆𑀥𑀁 𑀯𑀺𑀮𑁂𑀧𑀦𑀁 (𑀲𑁆𑀬𑀸.) 𑀇𑀢𑀺𑀯𑀼. 𑁭𑁫] 𑀲𑁂𑀬𑁆𑀬𑀸𑀯𑀲𑀣𑀧𑀤𑀻𑀧𑁂𑀬𑁆𑀬𑀁. 𑀬𑀜𑁆𑀜𑀫𑀓𑀧𑁆𑀧𑀬𑀺𑀁𑀲𑀽𑀢𑀺 𑀬𑁂𑀧𑀺 𑀬𑀜𑁆𑀜𑀁 𑀏𑀲𑀦𑁆𑀢𑀺 𑀕𑀯𑁂𑀲𑀦𑁆𑀢𑀺 𑀧𑀭𑀺𑀬𑁂𑀲𑀦𑁆𑀢𑀺 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁 𑀅𑀦𑁆𑀦𑀁 𑀧𑀸𑀦𑀁 𑀯𑀢𑁆𑀣𑀁 𑀬𑀸𑀦𑀁 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀁 𑀲𑁂𑀬𑁆𑀬𑀸𑀯𑀲𑀣𑀧𑀤𑀻𑀧𑁂𑀬𑁆𑀬𑀁, 𑀢𑁂𑀧𑀺 𑀬𑀜𑁆𑀜𑀁 𑀓𑀧𑁆𑀧𑁂𑀦𑁆𑀢𑀺. 𑀬𑁂𑀧𑀺 𑀬𑀜𑁆𑀜𑀁 𑀅𑀪𑀺𑀲𑀗𑁆𑀔𑀭𑁄𑀦𑁆𑀢𑀺 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁 𑀅𑀦𑁆𑀦𑀁 𑀧𑀸𑀦𑀁…𑀧𑁂… 𑀲𑁂𑀬𑁆𑀬𑀸𑀯𑀲𑀣𑀧𑀤𑀻𑀧𑁂𑀬𑁆𑀬𑀁, 𑀢𑁂𑀧𑀺 𑀬𑀜𑁆𑀜𑀁 𑀓𑀧𑁆𑀧𑁂𑀦𑁆𑀢𑀺. 𑀬𑁂𑀧𑀺 𑀬𑀜𑁆𑀜𑀁 𑀤𑁂𑀦𑁆𑀢𑀺 𑀬𑀚𑀦𑁆𑀢𑀺 𑀧𑀭𑀺𑀘𑁆𑀘𑀚𑀦𑁆𑀢𑀺 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁 𑀅𑀦𑁆𑀦𑀁 𑀧𑀸𑀦𑀁…𑀧𑁂… 𑀲𑁂𑀬𑁆𑀬𑀸𑀯𑀲𑀣𑀧𑀤𑀻𑀧𑁂𑀬𑁆𑀬𑀁, 𑀢𑁂𑀧𑀺 𑀬𑀜𑁆𑀜𑀁 𑀓𑀧𑁆𑀧𑁂𑀦𑁆𑀢𑀺. 𑀧𑀼𑀣𑀽𑀢𑀺 𑀬𑀜𑁆𑀜𑀸 𑀯𑀸 𑀏𑀢𑁂 𑀧𑀼𑀣𑀽, 𑀬𑀜𑁆𑀜𑀬𑀸𑀚𑀓𑀸 [𑀬𑀜𑁆𑀜𑀬𑀚𑀓𑀸 (𑀲𑁆𑀬𑀸.)] 𑀯𑀸 𑀏𑀢𑁂 𑀧𑀼𑀣𑀽, 𑀤𑀓𑁆𑀔𑀺𑀡𑁂𑀬𑁆𑀬𑀸 𑀯𑀸 𑀏𑀢𑁂 𑀧𑀼𑀣𑀽. 𑀓𑀣𑀁 𑀬𑀜𑁆𑀜𑀸 𑀯𑀸 𑀏𑀢𑁂 𑀧𑀼𑀣𑀽? 𑀩𑀳𑀼𑀓𑀸𑀦𑀁 𑀏𑀢𑁂 𑀬𑀜𑁆𑀜𑀸 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸 𑀅𑀦𑁆𑀦𑀁 𑀧𑀸𑀦𑀁 𑀯𑀢𑁆𑀣𑀁 𑀬𑀸𑀦𑀁 𑀫𑀸𑀮𑀁 𑀕𑀦𑁆𑀥𑀁 𑀯𑀺𑀮𑁂𑀧𑀦𑀁 𑀲𑁂𑀬𑁆𑀬𑀸𑀯𑀲𑀣𑀧𑀤𑀻𑀧𑁂𑀬𑁆𑀬𑀁 𑁋 𑀏𑀯𑀁 𑀬𑀜𑁆𑀜𑀸 𑀯𑀸 𑀏𑀢𑁂 𑀧𑀼𑀣𑀽.

𑀓𑀣𑀁 𑀬𑀜𑁆𑀜𑀬𑀸𑀚𑀓𑀸 𑀯𑀸 𑀏𑀢𑁂 𑀧𑀼𑀣𑀽? 𑀩𑀳𑀼𑀓𑀸 𑀏𑀢𑁂 𑀬𑀜𑁆𑀜𑀬𑀸𑀚𑀓𑀸 𑀔𑀢𑁆𑀢𑀺𑀬𑀸 𑀘 𑀩𑁆𑀭𑀸𑀳𑁆𑀫𑀡𑀸 𑀘 𑀯𑁂𑀲𑁆𑀲𑀸 𑀘 𑀲𑀼𑀤𑁆𑀤𑀸 𑀘 𑀕𑀳𑀝𑁆𑀞𑀸 𑀘 𑀧𑀩𑁆𑀩𑀚𑀺𑀢𑀸 𑀘 𑀤𑁂𑀯𑀸 𑀘 𑀫𑀦𑀼𑀲𑁆𑀲𑀸 𑀘 𑁋 𑀏𑀯𑀁 𑀬𑀜𑁆𑀜𑀬𑀸𑀚𑀓𑀸 𑀯𑀸 𑀏𑀢𑁂 𑀧𑀼𑀣𑀽.

𑀓𑀣𑀁 𑀤𑀓𑁆𑀔𑀺𑀡𑁂𑀬𑁆𑀬𑀸 𑀯𑀸 𑀏𑀢𑁂 𑀧𑀼𑀣𑀽? 𑀩𑀳𑀼𑀓𑀸 𑀏𑀢𑁂 𑀤𑀓𑁆𑀔𑀺𑀡𑁂𑀬𑁆𑀬𑀸 𑀧𑀼𑀣𑀽 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀓𑀧𑀡𑀤𑁆𑀥𑀺𑀓𑀯𑀦𑀺𑀩𑁆𑀩𑀓𑀬𑀸𑀘𑀓𑀸 [… 𑀯𑀡𑀺𑀩𑁆𑀩𑀓𑀲𑀸𑀯𑀓𑀸 (𑀲𑁆𑀬𑀸.) 𑀇𑀢𑀺𑀯𑀼. 𑁭𑁫] 𑁋 𑀏𑀯𑀁 𑀤𑀓𑁆𑀔𑀺𑀡𑁂𑀬𑁆𑀬𑀸 𑀯𑀸 𑀏𑀢𑁂 𑀧𑀼𑀣𑀽. 𑀇𑀥 𑀮𑁄𑀓𑁂𑀢𑀺 𑀫𑀦𑀼𑀲𑁆𑀲𑀮𑁄𑀓𑁂𑀢𑀺 𑀬𑀜𑁆𑀜𑀫𑀓𑀧𑁆𑀧𑀬𑀺𑀁𑀲𑀼 𑁋 𑀧𑀼𑀣𑀽𑀥 𑀮𑁄𑀓𑁂.

𑀧𑀼𑀘𑁆𑀙𑀸𑀫𑀺 𑀢𑀁 𑀪𑀕𑀯𑀸 𑀩𑁆𑀭𑀽𑀳𑀺 𑀫𑁂𑀢𑀦𑁆𑀢𑀺. 𑀧𑀼𑀘𑁆𑀙𑀸𑀢𑀺 𑀢𑀺𑀲𑁆𑀲𑁄 𑀧𑀼𑀘𑁆𑀙𑀸 𑁋 𑀅𑀤𑀺𑀝𑁆𑀞𑀚𑁄𑀢𑀦𑀸 𑀧𑀼𑀘𑁆𑀙𑀸, 𑀤𑀺𑀝𑁆𑀞𑀲𑀁𑀲𑀦𑁆𑀤𑀦𑀸 𑀧𑀼𑀘𑁆𑀙𑀸, 𑀯𑀺𑀫𑀢𑀺𑀘𑁆𑀙𑁂𑀤𑀦𑀸 𑀧𑀼𑀘𑁆𑀙𑀸. 𑀓𑀢𑀫𑀸 𑀅𑀤𑀺𑀝𑁆𑀞𑀚𑁄𑀢𑀦𑀸 𑀧𑀼𑀘𑁆𑀙𑀸? 𑀧𑀓𑀢𑀺𑀬𑀸 𑀮𑀓𑁆𑀔𑀡𑀁 𑀅𑀜𑁆𑀜𑀸𑀢𑀁 𑀳𑁄𑀢𑀺 𑀅𑀤𑀺𑀝𑁆𑀞𑀁 𑀅𑀢𑀼𑀮𑀺𑀢𑀁 𑀅𑀢𑀻𑀭𑀺𑀢𑀁 𑀅𑀯𑀺𑀪𑀽𑀢𑀁 𑀅𑀯𑀺𑀪𑀸𑀯𑀺𑀢𑀁, 𑀢𑀲𑁆𑀲 𑀜𑀸𑀡𑀸𑀬 𑀤𑀲𑁆𑀲𑀦𑀸𑀬 𑀢𑀼𑀮𑀦𑀸𑀬 𑀢𑀻𑀭𑀡𑀸𑀬 𑀯𑀺𑀪𑀽𑀢𑀢𑁆𑀣𑀸𑀬 𑀯𑀺𑀪𑀸𑀯𑀦𑀢𑁆𑀣𑀸𑀬 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺 𑁋 𑀅𑀬𑀁 𑀅𑀤𑀺𑀝𑁆𑀞𑀚𑁄𑀢𑀦𑀸 𑀧𑀼𑀘𑁆𑀙𑀸.

𑀓𑀢𑀫𑀸 𑀤𑀺𑀝𑁆𑀞𑀲𑀁𑀲𑀦𑁆𑀤𑀦𑀸 𑀧𑀼𑀘𑁆𑀙𑀸? 𑀧𑀓𑀢𑀺𑀬𑀸 𑀮𑀓𑁆𑀔𑀡𑀁 𑀜𑀸𑀢𑀁 𑀳𑁄𑀢𑀺 𑀤𑀺𑀝𑁆𑀞𑀁 𑀢𑀼𑀮𑀺𑀢𑀁 𑀢𑀻𑀭𑀺𑀢𑀁 𑀯𑀺𑀪𑀽𑀢𑀁 𑀯𑀺𑀪𑀸𑀯𑀺𑀢𑀁. 𑀅𑀜𑁆𑀜𑁂𑀳𑀺 𑀧𑀡𑁆𑀟𑀺𑀢𑁂𑀳𑀺 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀦𑀢𑁆𑀣𑀸𑀬 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺 𑁋 𑀅𑀬𑀁 𑀤𑀺𑀝𑁆𑀞𑀲𑀁𑀲𑀦𑁆𑀤𑀦𑀸 𑀧𑀼𑀘𑁆𑀙𑀸.

𑀓𑀢𑀫𑀸 𑀯𑀺𑀫𑀢𑀺𑀘𑁆𑀙𑁂𑀤𑀦𑀸 𑀧𑀼𑀘𑁆𑀙𑀸? 𑀧𑀓𑀢𑀺𑀬𑀸 𑀲𑀁𑀲𑀬𑀧𑀓𑁆𑀔𑀦𑁆𑀤𑁄 [𑀲𑀁𑀲𑀬𑀧𑀓𑁆𑀔𑀦𑁆𑀦𑁄 (𑀲𑁆𑀬𑀸.)] 𑀳𑁄𑀢𑀺 𑀯𑀺𑀫𑀢𑀺𑀧𑀓𑁆𑀔𑀦𑁆𑀤𑁄 𑀤𑁆𑀯𑁂𑀴𑁆𑀳𑀓𑀚𑀸𑀢𑁄 𑁋 ‘‘𑀏𑀯𑀁 𑀦𑀼 𑀔𑁄, 𑀦 𑀦𑀼 𑀔𑁄, 𑀓𑀺𑀁 𑀦𑀼 𑀔𑁄, 𑀓𑀣𑀁 𑀦𑀼 𑀔𑁄’’𑀢𑀺! 𑀲𑁄 𑀯𑀺𑀫𑀢𑀺𑀘𑁆𑀙𑁂𑀤𑀦𑀢𑁆𑀣𑀸𑀬 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺 𑁋 𑀅𑀬𑀁 𑀯𑀺𑀫𑀢𑀺𑀘𑁆𑀙𑁂𑀤𑀦𑀸 𑀧𑀼𑀘𑁆𑀙𑀸. 𑀇𑀫𑀸 𑀢𑀺𑀲𑁆𑀲𑁄 𑀧𑀼𑀘𑁆𑀙𑀸.

𑀅𑀧𑀭𑀸𑀧𑀺 𑀢𑀺𑀲𑁆𑀲𑁄 𑀧𑀼𑀘𑁆𑀙𑀸 𑁋 𑀫𑀦𑀼𑀲𑁆𑀲𑀧𑀼𑀘𑁆𑀙𑀸, 𑀅𑀫𑀦𑀼𑀲𑁆𑀲𑀧𑀼𑀘𑁆𑀙𑀸, 𑀦𑀺𑀫𑁆𑀫𑀺𑀢𑀧𑀼𑀘𑁆𑀙𑀸. 𑀓𑀢𑀫𑀸 𑀫𑀦𑀼𑀲𑁆𑀲𑀧𑀼𑀘𑁆𑀙𑀸? 𑀫𑀦𑀼𑀲𑁆𑀲𑀸 𑀩𑀼𑀤𑁆𑀥𑀁 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑀦𑁆𑀢𑀺, 𑀪𑀺𑀓𑁆𑀔𑀽 𑀧𑀼𑀘𑁆𑀙𑀦𑁆𑀢𑀺, 𑀪𑀺𑀓𑁆𑀔𑀼𑀦𑀺𑀬𑁄 𑀧𑀼𑀘𑁆𑀙𑀦𑁆𑀢𑀺, 𑀉𑀧𑀸𑀲𑀓𑀸 𑀧𑀼𑀘𑁆𑀙𑀦𑁆𑀢𑀺, 𑀉𑀧𑀸𑀲𑀺𑀓𑀸𑀬𑁄 𑀧𑀼𑀘𑁆𑀙𑀦𑁆𑀢𑀺, 𑀭𑀸𑀚𑀸𑀦𑁄 𑀧𑀼𑀘𑁆𑀙𑀦𑁆𑀢𑀺, 𑀔𑀢𑁆𑀢𑀺𑀬𑀸 𑀧𑀼𑀘𑁆𑀙𑀦𑁆𑀢𑀺, 𑀩𑁆𑀭𑀸𑀳𑁆𑀫𑀡𑀸 𑀧𑀼𑀘𑁆𑀙𑀦𑁆𑀢𑀺, 𑀯𑁂𑀲𑁆𑀲𑀸 𑀧𑀼𑀘𑁆𑀙𑀦𑁆𑀢𑀺, 𑀲𑀼𑀤𑁆𑀤𑀸 𑀧𑀼𑀘𑁆𑀙𑀦𑁆𑀢𑀺, 𑀕𑀳𑀝𑁆𑀞𑀸 𑀧𑀼𑀘𑁆𑀙𑀦𑁆𑀢𑀺, 𑀧𑀩𑁆𑀩𑀚𑀺𑀢𑀸 𑀧𑀼𑀘𑁆𑀙𑀦𑁆𑀢𑀺 𑁋 𑀅𑀬𑀁 𑀫𑀦𑀼𑀲𑁆𑀲𑀧𑀼𑀘𑁆𑀙𑀸.

𑀓𑀢𑀫𑀸 𑀅𑀫𑀦𑀼𑀲𑁆𑀲𑀧𑀼𑀘𑁆𑀙𑀸? 𑀅𑀫𑀦𑀼𑀲𑁆𑀲𑀸 𑀩𑀼𑀤𑁆𑀥𑀁 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑀺, 𑀦𑀸𑀕𑀸 𑀧𑀼𑀘𑁆𑀙𑀦𑁆𑀢𑀺, 𑀲𑀼𑀧𑀡𑁆𑀡𑀸 𑀧𑀼𑀘𑁆𑀙𑀦𑁆𑀢𑀺, 𑀬𑀓𑁆𑀔𑀸 𑀧𑀼𑀘𑁆𑀙𑀦𑁆𑀢𑀺, 𑀅𑀲𑀼𑀭𑀸 𑀧𑀼𑀘𑁆𑀙𑀦𑁆𑀢𑀺, 𑀕𑀦𑁆𑀥𑀩𑁆𑀩𑀸 𑀧𑀼𑀘𑁆𑀙𑀦𑁆𑀢𑀺, 𑀫𑀳𑀸𑀭𑀸𑀚𑀸𑀦𑁄 𑀧𑀼𑀘𑁆𑀙𑀦𑁆𑀢𑀺, 𑀇𑀦𑁆𑀤𑀸 𑀧𑀼𑀘𑁆𑀙𑀦𑁆𑀢𑀺, 𑀩𑁆𑀭𑀳𑁆𑀫𑀸𑀦𑁄 𑀧𑀼𑀘𑁆𑀙𑀦𑁆𑀢𑀺, 𑀤𑁂𑀯𑀢𑀸𑀬𑁄 𑀧𑀼𑀘𑁆𑀙𑀦𑁆𑀢𑀺 𑁋 𑀅𑀬𑀁 𑀅𑀫𑀦𑀼𑀲𑁆𑀲𑀧𑀼𑀘𑁆𑀙𑀸.

𑀓𑀢𑀫𑀸 𑀦𑀺𑀫𑁆𑀫𑀺𑀢𑀧𑀼𑀘𑁆𑀙𑀸? 𑀬𑀁 𑀪𑀕𑀯𑀸 𑀭𑀽𑀧𑀁 𑀅𑀪𑀺𑀦𑀺𑀫𑁆𑀫𑀺𑀦𑀸𑀢𑀺 𑀫𑀦𑁄𑀫𑀬𑀁 𑀲𑀩𑁆𑀩𑀗𑁆𑀕𑀧𑀘𑁆𑀘𑀗𑁆𑀕𑀁 𑀅𑀳𑀻𑀦𑀺𑀦𑁆𑀤𑁆𑀭𑀺𑀬𑀁, 𑀲𑁄 𑀦𑀺𑀫𑁆𑀫𑀺𑀢𑁄 𑀩𑀼𑀤𑁆𑀥𑀁 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺; 𑀪𑀕𑀯𑀸 𑀯𑀺𑀲𑀚𑁆𑀚𑁂𑀢𑀺 [𑀯𑀺𑀲𑁆𑀲𑀚𑁆𑀚𑁂𑀢𑀺 (𑀓.)] 𑁋 𑀅𑀬𑀁 𑀦𑀺𑀫𑁆𑀫𑀺𑀢𑀧𑀼𑀘𑁆𑀙𑀸. 𑀇𑀫𑀸 𑀢𑀺𑀲𑁆𑀲𑁄 𑀧𑀼𑀘𑁆𑀙𑀸.

𑀅𑀧𑀭𑀸𑀧𑀺 𑀢𑀺𑀲𑁆𑀲𑁄 𑀧𑀼𑀘𑁆𑀙𑀸 𑁋 𑀅𑀢𑁆𑀢𑀢𑁆𑀣𑀧𑀼𑀘𑁆𑀙𑀸, 𑀧𑀭𑀢𑁆𑀣𑀧𑀼𑀘𑁆𑀙𑀸, 𑀉𑀪𑀬𑀢𑁆𑀣𑀧𑀼𑀘𑁆𑀙𑀸. 𑀅𑀧𑀭𑀸𑀧𑀺 𑀢𑀺𑀲𑁆𑀲𑁄 𑀧𑀼𑀘𑁆𑀙𑀸 𑁋 𑀤𑀺𑀝𑁆𑀞𑀥𑀫𑁆𑀫𑀺𑀓𑀢𑁆𑀣𑀧𑀼𑀘𑁆𑀙𑀸, 𑀲𑀫𑁆𑀧𑀭𑀸𑀬𑀺𑀓𑀢𑁆𑀣𑀧𑀼𑀘𑁆𑀙𑀸, 𑀧𑀭𑀫𑀢𑁆𑀣𑀧𑀼𑀘𑁆𑀙𑀸. 𑀅𑀧𑀭𑀸𑀧𑀺 𑀢𑀺𑀲𑁆𑀲𑁄 𑀧𑀼𑀘𑁆𑀙𑀸 𑁋 𑀅𑀦𑀯𑀚𑁆𑀚𑀢𑁆𑀣𑀧𑀼𑀘𑁆𑀙𑀸, 𑀦𑀺𑀓𑁆𑀓𑀺𑀮𑁂𑀲𑀢𑁆𑀣𑀧𑀼𑀘𑁆𑀙𑀸, 𑀯𑁄𑀤𑀸𑀦𑀢𑁆𑀣𑀧𑀼𑀘𑁆𑀙𑀸. 𑀅𑀧𑀭𑀸𑀧𑀺 𑀢𑀺𑀲𑁆𑀲𑁄 𑀧𑀼𑀘𑁆𑀙𑀸 𑁋 𑀅𑀢𑀻𑀢𑀧𑀼𑀘𑁆𑀙𑀸, 𑀅𑀦𑀸𑀕𑀢𑀧𑀼𑀘𑁆𑀙𑀸, 𑀧𑀘𑁆𑀘𑀼𑀧𑁆𑀧𑀦𑁆𑀦𑀧𑀼𑀘𑁆𑀙𑀸. 𑀅𑀧𑀭𑀸𑀧𑀺 𑀢𑀺𑀲𑁆𑀲𑁄 𑀧𑀼𑀘𑁆𑀙𑀸 𑁋 𑀅𑀚𑁆𑀛𑀢𑁆𑀢𑀧𑀼𑀘𑁆𑀙𑀸, 𑀩𑀳𑀺𑀤𑁆𑀥𑀸𑀧𑀼𑀘𑁆𑀙𑀸, 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀧𑀼𑀘𑁆𑀙𑀸. 𑀅𑀧𑀭𑀸𑀧𑀺 𑀢𑀺𑀲𑁆𑀲𑁄 𑀧𑀼𑀘𑁆𑀙𑀸 𑁋 𑀓𑀼𑀲𑀮𑀧𑀼𑀘𑁆𑀙𑀸, 𑀅𑀓𑀼𑀲𑀮𑀧𑀼𑀘𑁆𑀙𑀸, 𑀅𑀩𑁆𑀬𑀸𑀓𑀢𑀧𑀼𑀘𑁆𑀙𑀸. 𑀅𑀧𑀭𑀸𑀧𑀺 𑀢𑀺𑀲𑁆𑀲𑁄 𑀧𑀼𑀘𑁆𑀙𑀸 𑁋 𑀔𑀦𑁆𑀥𑀧𑀼𑀘𑁆𑀙𑀸, 𑀥𑀸𑀢𑀼𑀧𑀼𑀘𑁆𑀙𑀸, 𑀆𑀬𑀢𑀦𑀧𑀼𑀘𑁆𑀙𑀸. 𑀅𑀧𑀭𑀸𑀧𑀺 𑀢𑀺𑀲𑁆𑀲𑁄 𑀧𑀼𑀘𑁆𑀙𑀸 𑁋 𑀲𑀢𑀺𑀧𑀝𑁆𑀞𑀸𑀦𑀧𑀼𑀘𑁆𑀙𑀸, 𑀲𑀫𑁆𑀫𑀧𑁆𑀧𑀥𑀸𑀦𑀧𑀼𑀘𑁆𑀙𑀸, 𑀇𑀤𑁆𑀥𑀺𑀧𑀸𑀤𑀧𑀼𑀘𑁆𑀙𑀸. 𑀅𑀧𑀭𑀸𑀧𑀺 𑀢𑀺𑀲𑁆𑀲𑁄 𑀧𑀼𑀘𑁆𑀙𑀸 𑁋 𑀇𑀦𑁆𑀤𑁆𑀭𑀺𑀬𑀧𑀼𑀘𑁆𑀙𑀸, 𑀩𑀮𑀧𑀼𑀘𑁆𑀙𑀸, 𑀩𑁄𑀚𑁆𑀛𑀗𑁆𑀕𑀧𑀼𑀘𑁆𑀙𑀸. 𑀅𑀧𑀭𑀸𑀧𑀺 𑀢𑀺𑀲𑁆𑀲𑁄 𑀧𑀼𑀘𑁆𑀙𑀸 𑁋 𑀫𑀕𑁆𑀕𑀧𑀼𑀘𑁆𑀙𑀸, 𑀨𑀮𑀧𑀼𑀘𑁆𑀙𑀸, 𑀦𑀺𑀩𑁆𑀩𑀸𑀦𑀧𑀼𑀘𑁆𑀙𑀸.

𑀧𑀼𑀘𑁆𑀙𑀸𑀫𑀺 𑀢𑀦𑁆𑀢𑀺 𑀧𑀼𑀘𑁆𑀙𑀸𑀫𑀺 𑀢𑀁 𑀬𑀸𑀘𑀸𑀫𑀺 𑀢𑀁 𑀅𑀚𑁆𑀛𑁂𑀲𑀸𑀫𑀺 𑀢𑀁 𑀧𑀲𑀸𑀤𑁂𑀫𑀺 𑀢𑀁 ‘‘𑀓𑀣𑀬𑀲𑁆𑀲𑀼 𑀫𑁂’’𑀢𑀺 𑀧𑀼𑀘𑁆𑀙𑀸𑀫𑀺 𑀢𑀁. 𑀪𑀕𑀯𑀸𑀢𑀺 𑀕𑀸𑀭𑀯𑀸𑀥𑀺𑀯𑀘𑀦𑀫𑁂𑀢𑀁… 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺 𑁋 𑀬𑀤𑀺𑀤𑀁 𑀪𑀕𑀯𑀸𑀢𑀺. 𑀩𑁆𑀭𑀽𑀳𑀺 𑀫𑁂𑀢𑀦𑁆𑀢𑀺 𑀩𑁆𑀭𑀽𑀳𑀺 𑀆𑀘𑀺𑀓𑁆𑀔𑀸𑀳𑀺 𑀤𑁂𑀲𑁂𑀳𑀺 𑀧𑀜𑁆𑀜𑀧𑁂𑀳𑀺 𑀧𑀝𑁆𑀞𑀧𑁂𑀳𑀺 𑀯𑀺𑀯𑀭𑀸𑀳𑀺 𑀯𑀺𑀪𑀚𑀸𑀳𑀺 𑀉𑀢𑁆𑀢𑀸𑀦𑀻𑀓𑀭𑁄𑀳𑀺 𑀧𑀓𑀸𑀲𑁂𑀳𑀻𑀢𑀺 𑁋 𑀧𑀼𑀘𑁆𑀙𑀸𑀫𑀺 𑀢𑀁 𑀪𑀕𑀯𑀸 𑀩𑁆𑀭𑀽𑀳𑀺 𑀫𑁂𑀢𑀁. 𑀢𑁂𑀦𑀸𑀳 𑀲𑁄 𑀩𑁆𑀭𑀸𑀳𑁆𑀫𑀡𑁄 𑁋

‘‘𑀅𑀦𑁂𑀚𑀁 𑀫𑀽𑀮𑀤𑀲𑁆𑀲𑀸𑀯𑀺𑀁, [𑀇𑀘𑁆𑀘𑀸𑀬𑀲𑁆𑀫𑀸 𑀧𑀼𑀡𑁆𑀡𑀓𑁄]

𑀅𑀢𑁆𑀣𑀺 𑀧𑀜𑁆𑀳𑁂𑀦 𑀆𑀕𑀫𑀁;

𑀓𑀺𑀁 𑀦𑀺𑀲𑁆𑀲𑀺𑀢𑀸 𑀇𑀲𑀬𑁄 𑀫𑀦𑀼𑀚𑀸, 𑀔𑀢𑁆𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑀸 𑀤𑁂𑀯𑀢𑀸𑀦𑀁;

𑀬𑀜𑁆𑀜𑀫𑀓𑀧𑁆𑀧𑀬𑀺𑀁𑀲𑀼 𑀧𑀼𑀣𑀽𑀥 𑀮𑁄𑀓𑁂, 𑀧𑀼𑀘𑁆𑀙𑀸𑀫𑀺 𑀢𑀁 𑀪𑀕𑀯𑀸 𑀩𑁆𑀭𑀽𑀳𑀺 𑀫𑁂𑀢’’𑀦𑁆𑀢𑀺.

𑁧𑁩. 𑀬𑁂 𑀓𑁂𑀘𑀺𑀫𑁂 𑀇𑀲𑀬𑁄 𑀫𑀦𑀼𑀚𑀸, [𑀧𑀼𑀡𑁆𑀡𑀓𑀸𑀢𑀺 𑀪𑀕𑀯𑀸]

𑀔𑀢𑁆𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑀸 𑀤𑁂𑀯𑀢𑀸𑀦𑀁;

𑀬𑀜𑁆𑀜𑀫𑀓𑀧𑁆𑀧𑀬𑀺𑀁𑀲𑀼 𑀧𑀼𑀣𑀽𑀥 𑀮𑁄𑀓𑁂, 𑀆𑀲𑀻𑀲𑀫𑀸𑀦𑀸 𑀧𑀼𑀡𑁆𑀡𑀓 𑀇𑀢𑁆𑀣𑀢𑁆𑀢𑀁 [𑀇𑀢𑁆𑀣𑀢𑀁 (𑀲𑁆𑀬𑀸.), 𑀇𑀢𑁆𑀣𑀪𑀸𑀯𑀁 (𑀓.)] ;

𑀚𑀭𑀁 𑀲𑀺𑀢𑀸 𑀬𑀜𑁆𑀜𑀫𑀓𑀧𑁆𑀧𑀬𑀺𑀁𑀲𑀼.

𑀬𑁂 𑀓𑁂𑀘𑀺𑀫𑁂 𑀇𑀲𑀬𑁄 𑀫𑀦𑀼𑀚𑀸𑀢𑀺. 𑀬𑁂 𑀓𑁂𑀘𑀻𑀢𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀩𑁆𑀩𑀣𑀸 𑀲𑀩𑁆𑀩𑀁 𑀅𑀲𑁂𑀲𑀁 𑀦𑀺𑀲𑁆𑀲𑁂𑀲𑀁 𑀧𑀭𑀺𑀬𑀸𑀤𑀺𑀬𑀦𑀯𑀘𑀦𑀫𑁂𑀢𑀁 𑁋 𑀬𑁂 𑀓𑁂𑀘𑀻𑀢𑀺. 𑀇𑀲𑀬𑁄𑀢𑀺 𑀇𑀲𑀺𑀦𑀸𑀫𑀓𑀸 𑀬𑁂 𑀓𑁂𑀘𑀺 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑀸 𑀆𑀚𑀻𑀯𑀓𑀸 𑀦𑀺𑀕𑀡𑁆𑀞𑀸 𑀚𑀝𑀺𑀮𑀸 𑀢𑀸𑀧𑀲𑀸. 𑀫𑀦𑀼𑀚𑀸𑀢𑀺 𑀫𑀦𑀼𑀲𑁆𑀲𑀸 𑀯𑀼𑀘𑁆𑀘𑀦𑁆𑀢𑀻𑀢𑀺 𑁋 𑀬𑁂 𑀓𑁂𑀘𑀺𑀫𑁂 𑀇𑀲𑀬𑁄 𑀫𑀦𑀼𑀚𑀸 𑀧𑀼𑀡𑁆𑀡𑀓𑀸𑀢𑀺 𑀪𑀕𑀯𑀸.

𑀔𑀢𑁆𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑀸 𑀤𑁂𑀯𑀢𑀸𑀦𑀦𑁆𑀢𑀺. 𑀔𑀢𑁆𑀢𑀺𑀬𑀸𑀢𑀺 𑀬𑁂 𑀓𑁂𑀘𑀺 𑀔𑀢𑁆𑀢𑀺𑀬𑀚𑀸𑀢𑀺𑀓𑀸. 𑀩𑁆𑀭𑀸𑀳𑁆𑀫𑀡𑀸𑀢𑀺 𑀬𑁂 𑀓𑁂𑀘𑀺 𑀪𑁄𑀯𑀸𑀤𑀺𑀓𑀸. 𑀤𑁂𑀯𑀢𑀸𑀦𑀦𑁆𑀢𑀺 𑀆𑀚𑀻𑀯𑀓𑀲𑀸𑀯𑀓𑀸𑀦𑀁 𑀆𑀚𑀻𑀯𑀓𑀸 𑀤𑁂𑀯𑀢𑀸…𑀧𑁂… 𑀤𑀺𑀲𑀸𑀯𑀢𑀺𑀓𑀸𑀦𑀁 𑀤𑀺𑀲𑀸 𑀤𑁂𑀯𑀢𑀸. 𑀬𑁂 𑀬𑁂𑀲𑀁 𑀤𑀓𑁆𑀔𑀺𑀡𑁂𑀬𑁆𑀬𑀸, 𑀢𑁂 𑀢𑁂𑀲𑀁 𑀤𑁂𑀯𑀢𑀸𑀢𑀺 𑁋 𑀔𑀢𑁆𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑀸 𑀤𑁂𑀯𑀢𑀸𑀦𑀁.

𑀬𑀜𑁆𑀜𑀫𑀓𑀧𑁆𑀧𑀬𑀺𑀁𑀲𑀼 𑀧𑀼𑀣𑀽𑀥 𑀮𑁄𑀓𑁂𑀢𑀺. 𑀬𑀜𑁆𑀜𑀁 𑀯𑀼𑀘𑁆𑀘𑀢𑀺 𑀤𑁂𑀬𑁆𑀬𑀥𑀫𑁆𑀫𑁄 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁 𑀅𑀦𑁆𑀦𑀁 𑀧𑀸𑀦𑀁…𑀧𑁂… 𑀲𑁂𑀬𑁆𑀬𑀸𑀯𑀲𑀣𑀧𑀤𑀻𑀧𑁂𑀬𑁆𑀬𑀁. 𑀬𑀜𑁆𑀜𑀫𑀓𑀧𑁆𑀧𑀬𑀺𑀁𑀲𑀽𑀢𑀺 𑀬𑁂𑀧𑀺 𑀬𑀜𑁆𑀜𑀁 𑀏𑀲𑀦𑁆𑀢𑀺 𑀕𑀯𑁂𑀲𑀦𑁆𑀢𑀺 𑀧𑀭𑀺𑀬𑁂𑀲𑀦𑁆𑀢𑀺…𑀧𑁂… 𑀲𑁂𑀬𑁆𑀬𑀸𑀯𑀲𑀣𑀧𑀤𑀻𑀧𑁂𑀬𑁆𑀬𑀁, 𑀢𑁂𑀧𑀺 𑀬𑀜𑁆𑀜𑀁 𑀓𑀧𑁆𑀧𑁂𑀦𑁆𑀢𑀺. 𑀧𑀼𑀣𑀽𑀢𑀺 𑀬𑀜𑁆𑀜𑀸 𑀯𑀸 𑀏𑀢𑁂 𑀧𑀼𑀣𑀽, 𑀬𑀜𑁆𑀜𑀬𑀸𑀚𑀓𑀸 𑀯𑀸 𑀏𑀢𑁂 𑀧𑀼𑀣𑀽, 𑀤𑀓𑁆𑀔𑀺𑀡𑁂𑀬𑁆𑀬𑀸 𑀯𑀸 𑀏𑀢𑁂 𑀧𑀼𑀣𑀽…𑀧𑁂… 𑀏𑀯𑀁 𑀤𑀓𑁆𑀔𑀺𑀡𑁂𑀬𑁆𑀬𑀸 𑀯𑀸 𑀏𑀢𑁂 𑀧𑀼𑀣𑀽. 𑀇𑀥 𑀮𑁄𑀓𑁂𑀢𑀺 𑀫𑀦𑀼𑀲𑁆𑀲𑀮𑁄𑀓𑁂𑀢𑀺 𑀬𑀜𑁆𑀜𑀫𑀓𑀧𑁆𑀧𑀬𑀺𑀁𑀲𑀼 𑁋 𑀧𑀼𑀣𑀽𑀥 𑀮𑁄𑀓𑁂.

𑀆𑀲𑀻𑀲𑀫𑀸𑀦𑀸 𑀧𑀼𑀡𑁆𑀡𑀓 𑀇𑀢𑁆𑀣𑀢𑁆𑀢𑀦𑁆𑀢𑀺. 𑀆𑀲𑀻𑀲𑀫𑀸𑀦𑀸𑀢𑀺 𑀭𑀽𑀧𑀧𑀝𑀺𑀮𑀸𑀪𑀁 𑀆𑀲𑀻𑀲𑀫𑀸𑀦𑀸, 𑀲𑀤𑁆𑀤𑀧𑀝𑀺𑀮𑀸𑀪𑀁 𑀆𑀲𑀻𑀲𑀫𑀸𑀦𑀸, 𑀕𑀦𑁆𑀥𑀧𑀝𑀺𑀮𑀸𑀪𑀁 𑀆𑀲𑀻𑀲𑀫𑀸𑀦𑀸, 𑀭𑀲𑀧𑀝𑀺𑀮𑀸𑀪𑀁 𑀆𑀲𑀻𑀲𑀫𑀸𑀦𑀸, 𑀨𑁄𑀝𑁆𑀞𑀩𑁆𑀩𑀧𑀝𑀺𑀮𑀸𑀪𑀁 𑀆𑀲𑀻𑀲𑀫𑀸𑀦𑀸, 𑀧𑀼𑀢𑁆𑀢𑀧𑀝𑀺𑀮𑀸𑀪𑀁 𑀆𑀲𑀻𑀲𑀫𑀸𑀦𑀸, 𑀤𑀸𑀭𑀧𑀝𑀺𑀮𑀸𑀪𑀁 𑀆𑀲𑀻𑀲𑀫𑀸𑀦𑀸, 𑀥𑀦𑀧𑀝𑀺𑀮𑀸𑀪𑀁 𑀆𑀲𑀻𑀲𑀫𑀸𑀦𑀸, 𑀬𑀲𑀧𑀝𑀺𑀮𑀸𑀪𑀁 𑀆𑀲𑀻𑀲𑀫𑀸𑀦𑀸, 𑀇𑀲𑁆𑀲𑀭𑀺𑀬𑀧𑀝𑀺𑀮𑀸𑀪𑀁 𑀆𑀲𑀻𑀲𑀫𑀸𑀦𑀸, 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀓𑀼𑀮𑁂 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑀁 𑀆𑀲𑀻𑀲𑀫𑀸𑀦𑀸, 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀓𑀼𑀮𑁂 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑀁 𑀆𑀲𑀻𑀲𑀫𑀸𑀦𑀸, 𑀕𑀳𑀧𑀢𑀺𑀫𑀳𑀸𑀲𑀸𑀮𑀓𑀼𑀮𑁂 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑀁 𑀆𑀲𑀻𑀲𑀫𑀸𑀦𑀸, 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑁂𑀲𑀼 [𑀘𑀸𑀢𑀼𑀫𑁆𑀫𑀳𑀸𑀭𑀸𑀚𑀺𑀓𑁂𑀲𑀼 (𑀲𑁆𑀬𑀸.)] 𑀤𑁂𑀯𑁂𑀲𑀼 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑀁 𑀆𑀲𑀻𑀲𑀫𑀸𑀦𑀸, 𑀢𑀸𑀯𑀢𑀺𑀁𑀲𑁂𑀲𑀼 𑀤𑁂𑀯𑁂𑀲𑀼 𑀬𑀸𑀫𑁂𑀲𑀼 𑀤𑁂𑀯𑁂𑀲𑀼 𑀢𑀼𑀲𑀺𑀢𑁂𑀲𑀼 𑀤𑁂𑀯𑁂𑀲𑀼 𑀦𑀺𑀫𑁆𑀫𑀸𑀦𑀭𑀢𑀻𑀲𑀼 𑀤𑁂𑀯𑁂𑀲𑀼 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀻𑀲𑀼 𑀤𑁂𑀯𑁂𑀲𑀼 𑀩𑁆𑀭𑀳𑁆𑀫𑀓𑀸𑀬𑀺𑀓𑁂𑀲𑀼 𑀤𑁂𑀯𑁂𑀲𑀼 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑀁 𑀆𑀲𑀻𑀲𑀫𑀸𑀦𑀸 𑀇𑀘𑁆𑀙𑀫𑀸𑀦𑀸 𑀲𑀸𑀤𑀺𑀬𑀫𑀸𑀦𑀸 𑀧𑀢𑁆𑀣𑀬𑀫𑀸𑀦𑀸 𑀧𑀺𑀳𑀬𑀫𑀸𑀦𑀸 𑀅𑀪𑀺𑀚𑀧𑁆𑀧𑀫𑀸𑀦𑀸𑀢𑀺 𑀆𑀲𑀻𑀲𑀫𑀸𑀦𑀸.

𑀧𑀼𑀡𑁆𑀡𑀓 𑀇𑀢𑁆𑀣𑀢𑁆𑀢𑀦𑁆𑀢𑀺 𑀏𑀢𑁆𑀣 𑀅𑀢𑁆𑀢𑀪𑀸𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺𑀁 𑀆𑀲𑀻𑀲𑀫𑀸𑀦𑀸 𑀏𑀢𑁆𑀣 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀓𑀼𑀮𑁂 𑀅𑀢𑁆𑀢𑀪𑀸𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺𑀁 𑀆𑀲𑀻𑀲𑀫𑀸𑀦𑀸…𑀧𑁂… 𑀏𑀢𑁆𑀣 𑀩𑁆𑀭𑀳𑁆𑀫𑀓𑀸𑀬𑀺𑀓𑁂𑀲𑀼 𑀤𑁂𑀯𑁂𑀲𑀼 𑀅𑀢𑁆𑀢𑀪𑀸𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺𑀁 𑀆𑀲𑀻𑀲𑀫𑀸𑀦𑀸 𑀇𑀘𑁆𑀙𑀫𑀸𑀦𑀸 𑀲𑀸𑀤𑀺𑀬𑀫𑀸𑀦𑀸 𑀧𑀢𑁆𑀣𑀬𑀫𑀸𑀦𑀸 𑀧𑀺𑀳𑀬𑀫𑀸𑀦𑀸 𑀅𑀪𑀺𑀚𑀧𑁆𑀧𑀫𑀸𑀦𑀸𑀢𑀺 𑀆𑀲𑀻𑀲𑀫𑀸𑀦𑀸 𑁋 𑀧𑀼𑀡𑁆𑀡𑀓 𑀇𑀢𑁆𑀣𑀢𑁆𑀢𑀁.

𑀚𑀭𑀁 𑀲𑀺𑀢𑀸 𑀬𑀜𑁆𑀜𑀫𑀓𑀧𑁆𑀧𑀬𑀺𑀁𑀲𑀽𑀢𑀺 𑀚𑀭𑀸𑀦𑀺𑀲𑁆𑀲𑀺𑀢𑀸 𑀩𑁆𑀬𑀸𑀥𑀺𑀦𑀺𑀲𑁆𑀲𑀺𑀢𑀸 𑀫𑀭𑀡𑀦𑀺𑀲𑁆𑀲𑀺𑀢𑀸 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀦𑀺𑀲𑁆𑀲𑀺𑀢𑀸. 𑀬𑀤𑁂𑀯 𑀢𑁂 𑀚𑀸𑀢𑀺𑀦𑀺𑀲𑁆𑀲𑀺𑀢𑀸 𑀢𑀤𑁂𑀯 𑀢𑁂 𑀚𑀭𑀸𑀦𑀺𑀲𑁆𑀲𑀺𑀢𑀸. 𑀬𑀤𑁂𑀯 𑀢𑁂 𑀚𑀭𑀸𑀦𑀺𑀲𑁆𑀲𑀺𑀢𑀸 𑀢𑀤𑁂𑀯 𑀢𑁂 𑀩𑁆𑀬𑀸𑀥𑀺𑀦𑀺𑀲𑁆𑀲𑀺𑀢𑀸. 𑀬𑀤𑁂𑀯 𑀢𑁂 𑀩𑁆𑀬𑀸𑀥𑀺𑀦𑀺𑀲𑁆𑀲𑀺𑀢𑀸 𑀢𑀤𑁂𑀯 𑀢𑁂 𑀫𑀭𑀡𑀦𑀺𑀲𑁆𑀲𑀺𑀢𑀸. 𑀬𑀤𑁂𑀯 𑀢𑁂 𑀫𑀭𑀡𑀦𑀺𑀲𑁆𑀲𑀺𑀢𑀸 𑀢𑀤𑁂𑀯 𑀢𑁂 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀦𑀺𑀲𑁆𑀲𑀺𑀢𑀸. 𑀬𑀤𑁂𑀯 𑀢𑁂 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀦𑀺𑀲𑁆𑀲𑀺𑀢𑀸 𑀢𑀤𑁂𑀯 𑀢𑁂 𑀕𑀢𑀺𑀦𑀺𑀲𑁆𑀲𑀺𑀢𑀸. 𑀬𑀤𑁂𑀯 𑀢𑁂 𑀕𑀢𑀺𑀦𑀺𑀲𑁆𑀲𑀺𑀢𑀸 𑀢𑀤𑁂𑀯 𑀢𑁂 𑀉𑀧𑀧𑀢𑁆𑀢𑀺𑀦𑀺𑀲𑁆𑀲𑀺𑀢𑀸. 𑀬𑀤𑁂𑀯 𑀢𑁂 𑀉𑀧𑀧𑀢𑁆𑀢𑀺𑀦𑀺𑀲𑁆𑀲𑀺𑀢𑀸 𑀢𑀤𑁂𑀯 𑀢𑁂 𑀧𑀝𑀺𑀲𑀦𑁆𑀥𑀺𑀦𑀺𑀲𑁆𑀲𑀺𑀢𑀸. 𑀬𑀤𑁂𑀯 𑀢𑁂 𑀧𑀝𑀺𑀲𑀦𑁆𑀥𑀺𑀦𑀺𑀲𑁆𑀲𑀺𑀢𑀸 𑀢𑀤𑁂𑀯 𑀢𑁂 𑀪𑀯𑀦𑀺𑀲𑁆𑀲𑀺𑀢𑀸. 𑀬𑀤𑁂𑀯 𑀢𑁂 𑀪𑀯𑀦𑀺𑀲𑁆𑀲𑀺𑀢𑀸 𑀢𑀤𑁂𑀯 𑀢𑁂 𑀲𑀁𑀲𑀸𑀭𑀦𑀺𑀲𑁆𑀲𑀺𑀢𑀸. 𑀬𑀤𑁂𑀯 𑀢𑁂 𑀲𑀁𑀲𑀸𑀭𑀦𑀺𑀲𑁆𑀲𑀺𑀢𑀸 𑀢𑀤𑁂𑀯 𑀢𑁂 𑀯𑀝𑁆𑀝𑀦𑀺𑀲𑁆𑀲𑀺𑀢𑀸 𑀅𑀮𑁆𑀮𑀻𑀦𑀸 𑀉𑀧𑀕𑀢𑀸 𑀅𑀚𑁆𑀛𑁄𑀲𑀺𑀢𑀸 𑀅𑀥𑀺𑀫𑀼𑀢𑁆𑀢𑀸𑀢𑀺 𑁋 𑀚𑀭𑀁 𑀲𑀺𑀢𑀸 𑀬𑀜𑁆𑀜𑀫𑀓𑀧𑁆𑀧𑀬𑀺𑀁𑀲𑀼. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀬𑁂 𑀓𑁂𑀘𑀺𑀫𑁂 𑀇𑀲𑀬𑁄 𑀫𑀦𑀼𑀚𑀸, [𑀧𑀼𑀡𑁆𑀡𑀓𑀸𑀢𑀺 𑀪𑀕𑀯𑀸]

𑀔𑀢𑁆𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑀸 𑀤𑁂𑀯𑀢𑀸𑀦𑀁;

𑀬𑀜𑁆𑀜𑀫𑀓𑀧𑁆𑀧𑀬𑀺𑀁𑀲𑀼 𑀧𑀼𑀣𑀽𑀥 𑀮𑁄𑀓𑁂, 𑀆𑀲𑀻𑀲𑀫𑀸𑀦𑀸 𑀧𑀼𑀡𑁆𑀡𑀓 𑀇𑀢𑁆𑀣𑀢𑁆𑀢𑀁;

𑀚𑀭𑀁 𑀲𑀺𑀢𑀸 𑀬𑀜𑁆𑀜𑀫𑀓𑀧𑁆𑀧𑀬𑀺𑀁𑀲𑀽’’𑀢𑀺.

𑁧𑁪. 𑀬𑁂 𑀓𑁂𑀘𑀺𑀫𑁂 𑀇𑀲𑀬𑁄 𑀫𑀦𑀼𑀚𑀸, [𑀇𑀘𑁆𑀘𑀸𑀬𑀲𑁆𑀫𑀸 𑀧𑀼𑀡𑁆𑀡𑀓𑁄]

𑀔𑀢𑁆𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑀸 𑀤𑁂𑀯𑀢𑀸𑀦𑀁;

𑀬𑀜𑁆𑀜𑀫𑀓𑀧𑁆𑀧𑀬𑀺𑀁𑀲𑀼 𑀧𑀼𑀣𑀽𑀥 𑀮𑁄𑀓𑁂, 𑀓𑀘𑁆𑀘𑀺𑀲𑀼 𑀢𑁂 𑀪𑀕𑀯𑀸 𑀬𑀜𑁆𑀜𑀧𑀣𑁂 𑀅𑀧𑁆𑀧𑀫𑀢𑁆𑀢𑀸;

𑀅𑀢𑀸𑀭𑀼𑀁 [𑀅𑀢𑀸𑀭𑀼𑀁 (𑀲𑁆𑀬𑀸. 𑀓.)] 𑀚𑀸𑀢𑀺𑀜𑁆𑀘 𑀚𑀭𑀜𑁆𑀘 𑀫𑀸𑀭𑀺𑀲, 𑀧𑀼𑀘𑁆𑀙𑀸𑀫𑀺 𑀢𑀁 𑀪𑀕𑀯𑀸 𑀩𑁆𑀭𑀽𑀳𑀺 𑀫𑁂𑀢𑀁.

𑀬𑁂 𑀓𑁂𑀘𑀺𑀫𑁂 𑀇𑀲𑀬𑁄 𑀫𑀦𑀼𑀚𑀸𑀢𑀺. 𑀬𑁂 𑀓𑁂𑀘𑀻𑀢𑀺…𑀧𑁂….

𑀓𑀘𑁆𑀘𑀺𑀲𑀼 𑀢𑁂 𑀪𑀕𑀯𑀸 𑀬𑀜𑁆𑀜𑀧𑀣𑁂 𑀅𑀧𑁆𑀧𑀫𑀢𑁆𑀢𑀸𑀢𑀺. 𑀓𑀘𑁆𑀘𑀺𑀲𑀽𑀢𑀺 𑀲𑀁𑀲𑀬𑀧𑀼𑀘𑁆𑀙𑀸 𑀯𑀺𑀫𑀢𑀺𑀧𑀼𑀘𑁆𑀙𑀸 𑀤𑁆𑀯𑁂𑀴𑁆𑀳𑀓𑀧𑀼𑀘𑁆𑀙𑀸 𑀅𑀦𑁂𑀓𑀁𑀲𑀧𑀼𑀘𑁆𑀙𑀸 𑁋 ‘‘𑀏𑀯𑀁 𑀦𑀼 𑀔𑁄, 𑀦 𑀦𑀼 𑀔𑁄, 𑀓𑀺𑀁 𑀦𑀼 𑀔𑁄, 𑀓𑀣𑀁 𑀦𑀼 𑀔𑁄’’𑀢𑀺 𑁋 𑀓𑀘𑁆𑀘𑀺𑀲𑀼. 𑀢𑁂𑀢𑀺 𑀬𑀜𑁆𑀜𑀬𑀸𑀚𑀓𑀸 𑀯𑀼𑀘𑁆𑀘𑀦𑁆𑀢𑀺. 𑀪𑀕𑀯𑀸𑀢𑀺 𑀕𑀸𑀭𑀯𑀸𑀥𑀺𑀯𑀘𑀦𑀁…𑀧𑁂… 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺, 𑀬𑀤𑀺𑀤𑀁 𑀪𑀕𑀯𑀸𑀢𑀺 𑁋 𑀓𑀘𑁆𑀘𑀺𑀲𑀼 𑀢𑁂 𑀪𑀕𑀯𑀸. 𑀬𑀜𑁆𑀜𑀧𑀣𑁂 𑀅𑀧𑁆𑀧𑀫𑀢𑁆𑀢𑀸𑀢𑀺 𑀬𑀜𑁆𑀜𑁄𑀬𑁂𑀯 𑀯𑀼𑀘𑁆𑀘𑀢𑀺 𑀬𑀜𑁆𑀜𑀧𑀣𑁄. 𑀬𑀣𑀸 𑀅𑀭𑀺𑀬𑀫𑀕𑁆𑀕𑁄 𑀅𑀭𑀺𑀬𑀧𑀣𑁄 𑀤𑁂𑀯𑀫𑀕𑁆𑀕𑁄 𑀤𑁂𑀯𑀧𑀣𑁄 𑀩𑁆𑀭𑀳𑁆𑀫𑀫𑀕𑁆𑀕𑁄 𑀩𑁆𑀭𑀳𑁆𑀫𑀧𑀣𑁄, 𑀏𑀯𑀫𑁂𑀯 𑀬𑀜𑁆𑀜𑁄𑀬𑁂𑀯 𑀯𑀼𑀘𑁆𑀘𑀢𑀺 𑀬𑀜𑁆𑀜𑀧𑀣𑁄. 𑀅𑀧𑁆𑀧𑀫𑀢𑁆𑀢𑀸𑀢𑀺 𑀬𑀜𑁆𑀜𑀧𑀣𑁂 𑀅𑀧𑁆𑀧𑀫𑀢𑁆𑀢𑀸 𑀲𑀓𑁆𑀓𑀘𑁆𑀘𑀓𑀸𑀭𑀺𑀦𑁄 𑀲𑀸𑀢𑀘𑁆𑀘𑀓𑀸𑀭𑀺𑀦𑁄 𑀅𑀝𑁆𑀞𑀺𑀢𑀓𑀸𑀭𑀺𑀦𑁄 𑀅𑀦𑁄𑀮𑀻𑀦𑀯𑀼𑀢𑁆𑀢𑀺𑀦𑁄 𑀅𑀦𑀺𑀓𑁆𑀔𑀺𑀢𑁆𑀢𑀘𑁆𑀙𑀦𑁆𑀤𑀸 𑀅𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑀸 𑀢𑀘𑁆𑀘𑀭𑀺𑀢𑀸 𑀢𑀩𑁆𑀩𑀳𑀼𑀮𑀸 𑀢𑀕𑁆𑀕𑀭𑀼𑀓𑀸 𑀢𑀦𑁆𑀦𑀺𑀦𑁆𑀦𑀸 𑀢𑀧𑁆𑀧𑁄𑀡𑀸 𑀢𑀧𑁆𑀧𑀩𑁆𑀪𑀸𑀭𑀸 𑀢𑀤𑀥𑀺𑀫𑀼𑀢𑁆𑀢𑀸 𑀢𑀤𑀥𑀺𑀧𑀢𑁂𑀬𑁆𑀬𑀸𑀢𑀺 𑁋 𑀢𑁂𑀧𑀺 𑀬𑀜𑁆𑀜𑀧𑀣𑁂 𑀅𑀧𑁆𑀧𑀫𑀢𑁆𑀢𑀸. 𑀬𑁂𑀧𑀺 𑀬𑀜𑁆𑀜𑀁 𑀏𑀲𑀦𑁆𑀢𑀺 𑀕𑀯𑁂𑀲𑀦𑁆𑀢𑀺 𑀧𑀭𑀺𑀬𑁂𑀲𑀦𑁆𑀢𑀺 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁 𑀅𑀦𑁆𑀦𑀁 𑀧𑀸𑀦𑀁…𑀧𑁂… 𑀲𑁂𑀬𑁆𑀬𑀸𑀯𑀲𑀣𑀧𑀤𑀻𑀧𑁂𑀬𑁆𑀬𑀁 𑀲𑀓𑁆𑀓𑀘𑁆𑀘𑀓𑀸𑀭𑀺𑀦𑁄…𑀧𑁂… 𑀢𑀤𑀥𑀺𑀧𑀢𑁂𑀬𑁆𑀬𑀸, 𑀢𑁂𑀧𑀺 𑀬𑀜𑁆𑀜𑀧𑀣𑁂 𑀅𑀧𑁆𑀧𑀫𑀢𑁆𑀢𑀸. 𑀬𑁂𑀧𑀺 𑀬𑀜𑁆𑀜𑀁 𑀅𑀪𑀺𑀲𑀗𑁆𑀔𑀭𑁄𑀦𑁆𑀢𑀺 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁 𑀅𑀦𑁆𑀦𑀁 𑀧𑀸𑀦𑀁…𑀧𑁂… 𑀲𑁂𑀬𑁆𑀬𑀸𑀯𑀲𑀣𑀧𑀤𑀻𑀧𑁂𑀬𑁆𑀬𑀁 𑀲𑀓𑁆𑀓𑀘𑁆𑀘𑀓𑀸𑀭𑀺𑀦𑁄…𑀧𑁂… 𑀢𑀤𑀥𑀺𑀧𑀢𑁂𑀬𑁆𑀬𑀸, 𑀢𑁂𑀧𑀺 𑀬𑀜𑁆𑀜𑀧𑀣𑁂 𑀅𑀧𑁆𑀧𑀫𑀢𑁆𑀢𑀸. 𑀬𑁂𑀧𑀺 𑀬𑀜𑁆𑀜𑀁 𑀤𑁂𑀦𑁆𑀢𑀺 𑀬𑀚𑀦𑁆𑀢𑀺 𑀧𑀭𑀺𑀘𑁆𑀘𑀚𑀦𑁆𑀢𑀺 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁 𑀅𑀦𑁆𑀦𑀁 𑀧𑀸𑀦𑀁…𑀧𑁂… 𑀲𑁂𑀬𑁆𑀬𑀸𑀯𑀲𑀣𑀧𑀤𑀻𑀧𑁂𑀬𑁆𑀬𑀁 𑀲𑀓𑁆𑀓𑀘𑁆𑀘𑀓𑀸𑀭𑀺𑀦𑁄 …𑀧𑁂… 𑀢𑀤𑀥𑀺𑀧𑀢𑁂𑀬𑁆𑀬𑀸, 𑀢𑁂𑀧𑀺 𑀬𑀜𑁆𑀜𑀧𑀣𑁂 𑀅𑀧𑁆𑀧𑀫𑀢𑁆𑀢𑀸𑀢𑀺 𑁋 𑀓𑀘𑁆𑀘𑀺𑀲𑀼 𑀢𑁂 𑀪𑀕𑀯𑀸 𑀬𑀜𑁆𑀜𑀧𑀣𑁂 𑀅𑀧𑁆𑀧𑀫𑀢𑁆𑀢𑀸.

𑀅𑀢𑀸𑀭𑀼𑀁 𑀚𑀸𑀢𑀺𑀜𑁆𑀘 𑀚𑀭𑀜𑁆𑀘 𑀫𑀸𑀭𑀺𑀲𑀸𑀢𑀺 𑀚𑀭𑀸𑀫𑀭𑀡𑀁 𑀅𑀢𑀭𑀺𑀁𑀲𑀼 𑀉𑀢𑁆𑀢𑀭𑀺𑀁𑀲𑀼 𑀧𑀢𑀭𑀺𑀁𑀲𑀼 𑀲𑀫𑀢𑀺𑀓𑁆𑀓𑀫𑀺𑀁𑀲𑀼 𑀯𑀻𑀢𑀺𑀯𑀢𑁆𑀢𑀺𑀁𑀲𑀼. 𑀫𑀸𑀭𑀺𑀲𑀸𑀢𑀺 𑀧𑀺𑀬𑀯𑀘𑀦𑀁 𑀕𑀭𑀼𑀯𑀘𑀦𑀁 𑀲𑀕𑀸𑀭𑀯𑀲𑀧𑁆𑀧𑀢𑀺𑀲𑁆𑀲𑀸𑀥𑀺𑀯𑀘𑀦𑀫𑁂𑀢𑀁 𑀫𑀸𑀭𑀺𑀲𑀸𑀢𑀺 𑁋 𑀅𑀢𑀸𑀭𑀼 𑀚𑀸𑀢𑀺𑀜𑁆𑀘 𑀚𑀭𑀜𑁆𑀘 𑀫𑀸𑀭𑀺𑀲.

𑀧𑀼𑀘𑁆𑀙𑀸𑀫𑀺 𑀢𑀁 𑀪𑀕𑀯𑀸 𑀩𑁆𑀭𑀽𑀳𑀺 𑀫𑁂𑀢𑀦𑁆𑀢𑀺. 𑀧𑀼𑀘𑁆𑀙𑀸𑀫𑀺 𑀢𑀦𑁆𑀢𑀺 𑀧𑀼𑀘𑁆𑀙𑀸𑀫𑀺 𑀢𑀁 𑀬𑀸𑀘𑀸𑀫𑀺 𑀢𑀁 𑀅𑀚𑁆𑀛𑁂𑀲𑀸𑀫𑀺 𑀢𑀁 𑀧𑀲𑀸𑀤𑁂𑀫𑀺 𑀢𑀁 𑀓𑀣𑀬𑀲𑁆𑀲𑀼 𑀫𑁂𑀢𑀺 𑁋 𑀧𑀼𑀘𑁆𑀙𑀸𑀫𑀺 𑀢𑀁. 𑀪𑀕𑀯𑀸𑀢𑀺 𑀕𑀸𑀭𑀯𑀸𑀥𑀺𑀯𑀘𑀦𑀁…𑀧𑁂… 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺 𑁋 𑀬𑀤𑀺𑀤𑀁 𑀪𑀕𑀯𑀸𑀢𑀺. 𑀩𑁆𑀭𑀽𑀳𑀺 𑀫𑁂𑀢𑀦𑁆𑀢𑀺 𑀩𑁆𑀭𑀽𑀳𑀺 𑀆𑀘𑀺𑀓𑁆𑀔𑀸𑀳𑀺 𑀤𑁂𑀲𑁂𑀳𑀺 𑀧𑀜𑁆𑀜𑀧𑁂𑀳𑀺 𑀧𑀝𑁆𑀞𑀧𑁂𑀳𑀺 𑀯𑀺𑀯𑀭𑀸𑀳𑀺 𑀯𑀺𑀪𑀚𑀸𑀳𑀺 𑀉𑀢𑁆𑀢𑀸𑀦𑀻𑀓𑀭𑁄𑀳𑀺 𑀧𑀓𑀸𑀲𑁂𑀳𑀻𑀢𑀺 𑁋 𑀧𑀼𑀘𑁆𑀙𑀸𑀫𑀺 𑀢𑀁 𑀪𑀕𑀯𑀸 𑀩𑁆𑀭𑀽𑀳𑀺 𑀫𑁂𑀢𑀁. 𑀢𑁂𑀦𑀸𑀳 𑀲𑁄 𑀩𑁆𑀭𑀸𑀳𑁆𑀫𑀡𑁄 𑁋

‘‘𑀬𑁂 𑀓𑁂𑀘𑀺𑀫𑁂 𑀇𑀲𑀬𑁄 𑀫𑀦𑀼𑀚𑀸, [𑀇𑀘𑁆𑀘𑀸𑀬𑀲𑁆𑀫𑀸 𑀧𑀼𑀡𑁆𑀡𑀓𑁄]

𑀔𑀢𑁆𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑀸 𑀤𑁂𑀯𑀢𑀸𑀦𑀁;

𑀬𑀜𑁆𑀜𑀫𑀓𑀧𑁆𑀧𑀬𑀺𑀁𑀲𑀼 𑀧𑀼𑀣𑀽𑀥 𑀮𑁄𑀓𑁂, 𑀓𑀘𑁆𑀘𑀺𑀲𑀼 𑀢𑁂 𑀪𑀕𑀯𑀸 𑀬𑀜𑁆𑀜𑀧𑀣𑁂 𑀅𑀧𑁆𑀧𑀫𑀢𑁆𑀢𑀸;

𑀅𑀢𑀸𑀭𑀼 𑀚𑀸𑀢𑀺𑀜𑁆𑀘 𑀚𑀭𑀜𑁆𑀘 𑀫𑀸𑀭𑀺𑀲, 𑀧𑀼𑀘𑁆𑀙𑀸𑀫𑀺 𑀢𑀁 𑀪𑀕𑀯𑀸 𑀩𑁆𑀭𑀽𑀳𑀺 𑀫𑁂𑀢’’𑀦𑁆𑀢𑀺.

𑁧𑁫. 𑀆𑀲𑀻𑀲𑀦𑁆𑀢𑀺 [𑀆𑀲𑀺𑀁𑀲𑀦𑁆𑀢𑀺 (𑀲𑁆𑀬𑀸.)] 𑀣𑁄𑀫𑀬𑀦𑁆𑀢𑀺, 𑀅𑀪𑀺𑀚𑀧𑁆𑀧𑀦𑁆𑀢𑀺 𑀚𑀼𑀳𑀦𑁆𑀢𑀺; [𑀧𑀼𑀡𑁆𑀡𑀓𑀸𑀢𑀺 𑀪𑀕𑀯𑀸]

𑀓𑀸𑀫𑀸𑀪𑀺𑀚𑀧𑁆𑀧𑀦𑁆𑀢𑀺 𑀧𑀝𑀺𑀘𑁆𑀘 𑀮𑀸𑀪𑀁, 𑀢𑁂 𑀬𑀸𑀚𑀬𑁄𑀕𑀸 𑀪𑀯𑀭𑀸𑀕𑀭𑀢𑁆𑀢𑀸;

𑀦𑀸𑀢𑀭𑀺𑀁𑀲𑀼 𑀚𑀸𑀢𑀺𑀚𑀭𑀦𑁆𑀢𑀺 𑀩𑁆𑀭𑀽𑀫𑀺.

𑀆𑀲𑀻𑀲𑀦𑁆𑀢𑀺 𑀣𑁄𑀫𑀬𑀦𑁆𑀢𑀺 𑀅𑀪𑀺𑀚𑀧𑁆𑀧𑀦𑁆𑀢𑀺 𑀚𑀼𑀳𑀦𑁆𑀢𑀻𑀢𑀺. 𑀆𑀲𑀻𑀲𑀦𑁆𑀢𑀻𑀢𑀺 𑀭𑀽𑀧𑀧𑀝𑀺𑀮𑀸𑀪𑀁 𑀆𑀲𑀻𑀲𑀦𑁆𑀢𑀺, 𑀲𑀤𑁆𑀤𑀧𑀝𑀺𑀮𑀸𑀪𑀁 𑀆𑀲𑀻𑀲𑀦𑁆𑀢𑀺, 𑀕𑀦𑁆𑀥𑀧𑀝𑀺𑀮𑀸𑀪𑀁 𑀆𑀲𑀻𑀲𑀦𑁆𑀢𑀺, 𑀭𑀲𑀧𑀝𑀺𑀮𑀸𑀪𑀁 𑀆𑀲𑀻𑀲𑀦𑁆𑀢𑀺, 𑀨𑁄𑀝𑁆𑀞𑀩𑁆𑀩𑀧𑀝𑀺𑀮𑀸𑀪𑀁 𑀆𑀲𑀻𑀲𑀦𑁆𑀢𑀺, 𑀧𑀼𑀢𑁆𑀢𑀧𑀝𑀺𑀮𑀸𑀪𑀁 𑀆𑀲𑀻𑀲𑀦𑁆𑀢𑀺, 𑀤𑀸𑀭𑀧𑀝𑀺𑀮𑀸𑀪𑀁 𑀆𑀲𑀻𑀲𑀦𑁆𑀢𑀺, 𑀥𑀦𑀧𑀝𑀺𑀮𑀸𑀪𑀁 𑀆𑀲𑀻𑀲𑀦𑁆𑀢𑀺, 𑀬𑀲𑀧𑀝𑀺𑀮𑀸𑀪𑀁 𑀆𑀲𑀻𑀲𑀦𑁆𑀢𑀺, 𑀇𑀲𑁆𑀲𑀭𑀺𑀬𑀧𑀝𑀺𑀮𑀸𑀪𑀁 𑀆𑀲𑀻𑀲𑀦𑁆𑀢𑀺, 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀓𑀼𑀮𑁂 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑀁 𑀆𑀲𑀻𑀲𑀦𑁆𑀢𑀺, 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀓𑀼𑀮𑁂…𑀧𑁂… 𑀕𑀳𑀧𑀢𑀺𑀫𑀳𑀸𑀲𑀸𑀮𑀓𑀼𑀮𑁂 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑀁 𑀆𑀲𑀻𑀲𑀦𑁆𑀢𑀺, 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑁂𑀲𑀼 𑀤𑁂𑀯𑁂𑀲𑀼…𑀧𑁂… 𑀩𑁆𑀭𑀳𑁆𑀫𑀓𑀸𑀬𑀺𑀓𑁂𑀲𑀼 𑀤𑁂𑀯𑁂𑀲𑀼 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑀁 𑀆𑀲𑀻𑀲𑀦𑁆𑀢𑀺 𑀇𑀘𑁆𑀙𑀦𑁆𑀢𑀺 𑀲𑀸𑀤𑀺𑀬𑀦𑁆𑀢𑀺 𑀧𑀢𑁆𑀣𑀬𑀦𑁆𑀢𑀺 𑀧𑀺𑀳𑀬𑀦𑁆𑀢𑀻𑀢𑀺 𑁋 𑀆𑀲𑀻𑀲𑀦𑁆𑀢𑀺.

𑀣𑁄𑀫𑀬𑀦𑁆𑀢𑀻𑀢𑀺 𑀬𑀜𑁆𑀜𑀁 𑀯𑀸 𑀣𑁄𑀫𑁂𑀦𑁆𑀢𑀺 𑀨𑀮𑀁 𑀯𑀸 𑀣𑁄𑀫𑁂𑀦𑁆𑀢𑀺 𑀤𑀓𑁆𑀔𑀺𑀡𑁂𑀬𑁆𑀬𑁂 𑀯𑀸 𑀣𑁄𑀫𑁂𑀦𑁆𑀢𑀺. 𑀓𑀣𑀁 𑀬𑀜𑁆𑀜𑀁 𑀣𑁄𑀫𑁂𑀦𑁆𑀢𑀺? 𑀲𑀼𑀘𑀺𑀁 𑀤𑀺𑀦𑁆𑀦𑀁 [𑀯𑀺𑀬𑀁 𑀤𑀺𑀦𑁆𑀦𑀁 (𑀲𑁆𑀬𑀸.)], 𑀫𑀦𑀸𑀧𑀁 𑀤𑀺𑀦𑁆𑀦𑀁, 𑀧𑀡𑀻𑀢𑀁 𑀤𑀺𑀦𑁆𑀦𑀁, 𑀓𑀸𑀮𑁂𑀦 𑀤𑀺𑀦𑁆𑀦𑀁, 𑀓𑀧𑁆𑀧𑀺𑀬𑀁 𑀤𑀺𑀦𑁆𑀦𑀁, 𑀯𑀺𑀘𑁂𑀬𑁆𑀬 𑀤𑀺𑀦𑁆𑀦𑀁, 𑀅𑀦𑀯𑀚𑁆𑀚𑀁 𑀤𑀺𑀦𑁆𑀦𑀁, 𑀅𑀪𑀺𑀡𑁆𑀳𑀁 𑀤𑀺𑀦𑁆𑀦𑀁 𑀤𑀤𑀁 𑀘𑀺𑀢𑁆𑀢𑀁 𑀧𑀲𑀸𑀤𑀺𑀢𑀦𑁆𑀢𑀺 𑁋 𑀣𑁄𑀫𑁂𑀦𑁆𑀢𑀺 𑀓𑀺𑀢𑁆𑀢𑁂𑀦𑁆𑀢𑀺 𑀯𑀡𑁆𑀡𑁂𑀦𑁆𑀢𑀺 𑀧𑀲𑀁𑀲𑀦𑁆𑀢𑀺. 𑀏𑀯𑀁 𑀬𑀜𑁆𑀜𑀁 𑀣𑁄𑀫𑁂𑀦𑁆𑀢𑀺.

𑀓𑀣𑀁 𑀨𑀮𑀁 𑀣𑁄𑀫𑁂𑀦𑁆𑀢𑀺? 𑀇𑀢𑁄 𑀦𑀺𑀤𑀸𑀦𑀁 𑀭𑀽𑀧𑀧𑀝𑀺𑀮𑀸𑀪𑁄 𑀪𑀯𑀺𑀲𑁆𑀲𑀢𑀺…𑀧𑁂… 𑀩𑁆𑀭𑀳𑁆𑀫𑀓𑀸𑀬𑀺𑀓𑁂𑀲𑀼 𑀤𑁂𑀯𑁂𑀲𑀼 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑁄 𑀪𑀯𑀺𑀲𑁆𑀲𑀢𑀻𑀢𑀺 𑁋 𑀣𑁄𑀫𑁂𑀦𑁆𑀢𑀺 𑀓𑀺𑀢𑁆𑀢𑁂𑀦𑁆𑀢𑀺 𑀯𑀡𑁆𑀡𑁂𑀦𑁆𑀢𑀺 𑀧𑀲𑀁𑀲𑀦𑁆𑀢𑀺. 𑀏𑀯𑀁 𑀨𑀮𑀁 𑀣𑁄𑀫𑁂𑀦𑁆𑀢𑀺.

𑀓𑀣𑀁 𑀤𑀓𑁆𑀔𑀺𑀡𑁂𑀬𑁆𑀬𑁂 𑀣𑁄𑀫𑁂𑀦𑁆𑀢𑀺? 𑀤𑀓𑁆𑀔𑀺𑀡𑁂𑀬𑁆𑀬𑀸 𑀚𑀸𑀢𑀺𑀲𑀫𑁆𑀧𑀦𑁆𑀦𑀸 𑀕𑁄𑀢𑁆𑀢𑀲𑀫𑁆𑀧𑀦𑁆𑀦𑀸 𑀅𑀚𑁆𑀛𑀸𑀬𑀓𑀸 𑀫𑀦𑁆𑀢𑀥𑀭𑀸 𑀢𑀺𑀡𑁆𑀡𑀁 𑀯𑁂𑀤𑀸𑀦𑀁 𑀧𑀸𑀭𑀕𑀽 𑀲𑀦𑀺𑀖𑀡𑁆𑀟𑀼𑀓𑁂𑀝𑀼𑀪𑀸𑀦𑀁 𑀲𑀸𑀓𑁆𑀔𑀭𑀧𑁆𑀧𑀪𑁂𑀤𑀸𑀦𑀁 𑀇𑀢𑀺𑀳𑀸𑀲𑀧𑀜𑁆𑀘𑀫𑀸𑀦𑀁 𑀧𑀤𑀓𑀸 𑀯𑁂𑀬𑁆𑀬𑀸𑀓𑀭𑀡𑀸 𑀮𑁄𑀓𑀸𑀬𑀢𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂𑀲𑀼 𑀅𑀦𑀯𑀬𑀸𑀢𑀺, 𑀯𑀻𑀢𑀭𑀸𑀕𑀸 𑀯𑀸 𑀭𑀸𑀕𑀯𑀺𑀦𑀬𑀸𑀬 𑀯𑀸 𑀧𑀝𑀺𑀧𑀦𑁆𑀦𑀸, 𑀯𑀻𑀢𑀤𑁄𑀲𑀸 𑀯𑀸 𑀤𑁄𑀲𑀯𑀺𑀦𑀬𑀸𑀬 𑀯𑀸 𑀧𑀝𑀺𑀧𑀦𑁆𑀦𑀸, 𑀯𑀻𑀢𑀫𑁄𑀳𑀸 𑀯𑀸 𑀫𑁄𑀳𑀯𑀺𑀦𑀬𑀸𑀬 𑀯𑀸 𑀧𑀝𑀺𑀧𑀦𑁆𑀦𑀸, 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑀸 𑀲𑀻𑀮𑀲𑀫𑁆𑀧𑀦𑁆𑀦𑀸 𑀲𑀫𑀸𑀥𑀺𑀲𑀫𑁆𑀧𑀦𑁆𑀦𑀸 𑀧𑀜𑁆𑀜𑀸𑀲𑀫𑁆𑀧𑀦𑁆𑀦𑀸 𑀯𑀺𑀫𑀼𑀢𑁆𑀢𑀺𑀲𑀫𑁆𑀧𑀦𑁆𑀦𑀸 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀲𑀫𑁆𑀧𑀦𑁆𑀦𑀸𑀢𑀺 𑁋 𑀣𑁄𑀫𑁂𑀦𑁆𑀢𑀺 𑀓𑀺𑀢𑁆𑀢𑁂𑀦𑁆𑀢𑀺 𑀯𑀡𑁆𑀡𑁂𑀦𑁆𑀢𑀺 𑀧𑀲𑀁𑀲𑀦𑁆𑀢𑀺. 𑀏𑀯𑀁 𑀤𑀓𑁆𑀔𑀺𑀡𑁂𑀬𑁆𑀬𑁂 𑀣𑁄𑀫𑁂𑀦𑁆𑀢𑀻𑀢𑀺 𑁋 𑀆𑀲𑀻𑀲𑀦𑁆𑀢𑀺 𑀣𑁄𑀫𑀬𑀦𑁆𑀢𑀺.

𑀅𑀪𑀺𑀚𑀧𑁆𑀧𑀦𑁆𑀢𑀻𑀢𑀺 𑀭𑀽𑀧𑀧𑀝𑀺𑀮𑀸𑀪𑀁 𑀅𑀪𑀺𑀚𑀧𑁆𑀧𑀦𑁆𑀢𑀺, 𑀲𑀤𑁆𑀤𑀧𑀝𑀺𑀮𑀸𑀪𑀁 𑀅𑀪𑀺𑀚𑀧𑁆𑀧𑀦𑁆𑀢𑀺, 𑀕𑀦𑁆𑀥𑀧𑀝𑀺𑀮𑀸𑀪𑀁 𑀅𑀪𑀺𑀚𑀧𑁆𑀧𑀦𑁆𑀢𑀺, 𑀭𑀲𑀧𑀝𑀺𑀮𑀸𑀪𑀁 𑀅𑀪𑀺𑀚𑀧𑁆𑀧𑀦𑁆𑀢𑀺…𑀧𑁂… 𑀩𑁆𑀭𑀳𑁆𑀫𑀓𑀸𑀬𑀺𑀓𑁂𑀲𑀼 𑀤𑁂𑀯𑁂𑀲𑀼 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑀁 𑀅𑀪𑀺𑀚𑀧𑁆𑀧𑀦𑁆𑀢𑀻𑀢𑀺 𑁋 𑀆𑀲𑀻𑀲𑀦𑁆𑀢𑀺 𑀣𑁄𑀫𑀬𑀦𑁆𑀢𑀺 𑀅𑀪𑀺𑀚𑀧𑁆𑀧𑀦𑁆𑀢𑀺. 𑀚𑀼𑀳𑀦𑁆𑀢𑀻𑀢𑀺 𑀚𑀼𑀳𑀦𑁆𑀢𑀺 𑀤𑁂𑀦𑁆𑀢𑀺 𑀬𑀚𑀦𑁆𑀢𑀺 𑀧𑀭𑀺𑀘𑁆𑀘𑀚𑀦𑁆𑀢𑀺 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁 𑀅𑀦𑁆𑀦𑀁 𑀧𑀸𑀦𑀁 𑀯𑀢𑁆𑀣𑀁 𑀬𑀸𑀦𑀁 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀁 𑀲𑁂𑀬𑁆𑀬𑀸𑀯𑀲𑀣𑀧𑀤𑀻𑀧𑁂𑀬𑁆𑀬𑀦𑁆𑀢𑀺 𑁋 𑀆𑀲𑀻𑀲𑀦𑁆𑀢𑀺 𑀣𑁄𑀫𑀬𑀦𑁆𑀢𑀺 𑀅𑀪𑀺𑀚𑀧𑁆𑀧𑀦𑁆𑀢𑀺 𑀚𑀼𑀳𑀦𑁆𑀢𑀺 𑀧𑀼𑀡𑁆𑀡𑀓𑀸𑀢𑀺 𑀪𑀕𑀯𑀸.

𑀓𑀸𑀫𑀸𑀪𑀺𑀚𑀧𑁆𑀧𑀦𑁆𑀢𑀺 𑀧𑀝𑀺𑀘𑁆𑀘 𑀮𑀸𑀪𑀦𑁆𑀢𑀺 𑀭𑀽𑀧𑀧𑀝𑀺𑀮𑀸𑀪𑀁 𑀧𑀝𑀺𑀘𑁆𑀘 𑀓𑀸𑀫𑁂 𑀅𑀪𑀺𑀚𑀧𑁆𑀧𑀦𑁆𑀢𑀺, 𑀲𑀤𑁆𑀤𑀧𑀝𑀺𑀮𑀸𑀪𑀁 𑀧𑀝𑀺𑀘𑁆𑀘 𑀓𑀸𑀫𑁂 𑀅𑀪𑀺𑀚𑀧𑁆𑀧𑀦𑁆𑀢𑀺…𑀧𑁂… 𑀩𑁆𑀭𑀳𑁆𑀫𑀓𑀸𑀬𑀺𑀓𑁂𑀲𑀼 𑀤𑁂𑀯𑁂𑀲𑀼 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑀁 𑀧𑀝𑀺𑀘𑁆𑀘 𑀓𑀸𑀫𑁂 𑀅𑀪𑀺𑀚𑀧𑁆𑀧𑀦𑁆𑀢𑀺 𑀧𑀚𑀧𑁆𑀧𑀦𑁆𑀢𑀻𑀢𑀺 𑁋 𑀓𑀸𑀫𑀸𑀪𑀺𑀚𑀧𑁆𑀧𑀦𑁆𑀢𑀺 𑀧𑀝𑀺𑀘𑁆𑀘 𑀮𑀸𑀪𑀁.

𑀢𑁂 𑀬𑀸𑀚𑀬𑁄𑀕𑀸 𑀪𑀯𑀭𑀸𑀕𑀭𑀢𑁆𑀢𑀸 𑀦𑀸𑀢𑀭𑀺𑀁𑀲𑀼 𑀚𑀸𑀢𑀺𑀚𑀭𑀦𑁆𑀢𑀺 𑀩𑁆𑀭𑀽𑀫𑀻𑀢𑀺 𑀢𑁂𑀢𑀺 𑀬𑀜𑁆𑀜𑀬𑀸𑀚𑀓𑀸 𑀯𑀼𑀘𑁆𑀘𑀦𑁆𑀢𑀺, 𑀬𑀸𑀚𑀬𑁄𑀕𑀸𑀢𑀺 𑀬𑀸𑀚𑀬𑁄𑀕𑁂𑀲𑀼 𑀬𑀼𑀢𑁆𑀢𑀸 𑀧𑀬𑀼𑀢𑁆𑀢𑀸 𑀆𑀬𑀼𑀢𑁆𑀢𑀸 𑀲𑀫𑀸𑀬𑀼𑀢𑁆𑀢𑀸 𑀢𑀘𑁆𑀘𑀭𑀺𑀢𑀸 𑀢𑀩𑁆𑀩𑀳𑀼𑀮𑀸 𑀢𑀕𑁆𑀕𑀭𑀼𑀓𑀸 𑀢𑀦𑁆𑀦𑀺𑀦𑁆𑀦𑀸 𑀢𑀧𑁆𑀧𑁄𑀡𑀸 𑀢𑀧𑁆𑀧𑀩𑁆𑀪𑀸𑀭𑀸 𑀢𑀤𑀥𑀺𑀫𑀼𑀢𑁆𑀢𑀸 𑀢𑀤𑀥𑀺𑀧𑀢𑁂𑀬𑁆𑀬𑀸𑀢𑀺 𑁋 𑀢𑁂 𑀬𑀸𑀚𑀬𑁄𑀕𑀸, 𑀪𑀯𑀭𑀸𑀕𑀭𑀢𑁆𑀢𑀸𑀢𑀺 𑀪𑀯𑀭𑀸𑀕𑁄 𑀯𑀼𑀘𑁆𑀘𑀢𑀺 𑀬𑁄 𑀪𑀯𑁂𑀲𑀼 𑀪𑀯𑀘𑁆𑀙𑀦𑁆𑀤𑁄 𑀪𑀯𑀭𑀸𑀕𑁄 𑀪𑀯𑀦𑀦𑁆𑀤𑀻 𑀪𑀯𑀢𑀡𑁆𑀳𑀸 𑀪𑀯𑀲𑀺𑀦𑁂𑀳𑁄 𑀪𑀯𑀧𑀭𑀺𑀴𑀸𑀳𑁄 𑀪𑀯𑀫𑀼𑀘𑁆𑀙𑀸 𑀪𑀯𑀚𑁆𑀛𑁄𑀲𑀸𑀦𑀁. 𑀪𑀯𑀭𑀸𑀕𑁂𑀦 𑀪𑀯𑁂𑀲𑀼 𑀭𑀢𑁆𑀢𑀸 𑀕𑀺𑀤𑁆𑀥𑀸 𑀕𑀥𑀺𑀢𑀸 𑀫𑀼𑀘𑁆𑀙𑀺𑀢𑀸 𑀅𑀚𑁆𑀛𑁄𑀲𑀦𑁆𑀦𑀸 𑀮𑀕𑁆𑀕𑀸 𑀮𑀕𑁆𑀕𑀺𑀢𑀸 𑀧𑀮𑀺𑀩𑀼𑀤𑁆𑀥𑀸𑀢𑀺 𑁋 𑀢𑁂 𑀬𑀸𑀚𑀬𑁄𑀕𑀸 𑀪𑀯𑀭𑀸𑀕𑀭𑀢𑁆𑀢𑀸.

𑀦𑀸𑀢𑀭𑀺𑀁𑀲𑀼 𑀚𑀸𑀢𑀺𑀚𑀭𑀦𑁆𑀢𑀺 𑀩𑁆𑀭𑀽𑀫𑀻𑀢𑀺 𑀢𑁂 𑀬𑀸𑀚𑀬𑁄𑀕𑀸 𑀪𑀯𑀭𑀸𑀕𑀭𑀢𑁆𑀢𑀸 𑀚𑀸𑀢𑀺𑀚𑀭𑀸𑀫𑀭𑀡𑀁 𑀦𑀸𑀢𑀭𑀺𑀁𑀲𑀼 𑀦 𑀉𑀢𑁆𑀢𑀭𑀺𑀁𑀲𑀼 𑀦 𑀧𑀢𑀭𑀺𑀁𑀲𑀼 𑀦 𑀲𑀫𑀢𑀺𑀓𑁆𑀓𑀫𑀺𑀁𑀲𑀼 𑀦 𑀯𑀻𑀢𑀺𑀯𑀢𑁆𑀢𑀺𑀁𑀲𑀼, 𑀚𑀸𑀢𑀺𑀚𑀭𑀸𑀫𑀭𑀡𑀸 𑀅𑀦𑀺𑀓𑁆𑀔𑀦𑁆𑀢𑀸 𑀅𑀦𑀺𑀲𑁆𑀲𑀝𑀸 𑀅𑀦𑀢𑀺𑀓𑁆𑀓𑀦𑁆𑀢𑀸 𑀅𑀲𑀫𑀢𑀺𑀓𑁆𑀓𑀦𑁆𑀢𑀸 𑀅𑀯𑀻𑀢𑀺𑀯𑀢𑁆𑀢𑀸 𑀅𑀦𑁆𑀢𑁄𑀚𑀸𑀢𑀺𑀚𑀭𑀸𑀫𑀭𑀡𑁂 𑀧𑀭𑀺𑀯𑀢𑁆𑀢𑀦𑁆𑀢𑀺 𑀅𑀦𑁆𑀢𑁄𑀲𑀁𑀲𑀸𑀭𑀧𑀣𑁂 𑀧𑀭𑀺𑀯𑀢𑁆𑀢𑀦𑁆𑀢𑀺. 𑀚𑀸𑀢𑀺𑀬𑀸 𑀅𑀦𑀼𑀕𑀢𑀸 𑀚𑀭𑀸𑀬 𑀅𑀦𑀼𑀲𑀝𑀸 𑀩𑁆𑀬𑀸𑀥𑀺𑀦𑀸 𑀅𑀪𑀺𑀪𑀽𑀢𑀸 𑀫𑀭𑀡𑁂𑀦 𑀅𑀩𑁆𑀪𑀸𑀳𑀢𑀸 𑀅𑀢𑀸𑀡𑀸 𑀅𑀮𑁂𑀡𑀸 𑀅𑀲𑀭𑀡𑀸 𑀅𑀲𑀭𑀡𑀻𑀪𑀽𑀢𑀸𑀢𑀺; 𑀩𑁆𑀭𑀽𑀫𑀺 𑀆𑀘𑀺𑀓𑁆𑀔𑀸𑀫𑀺 𑀤𑁂𑀲𑁂𑀫𑀺 𑀧𑀜𑁆𑀜𑀧𑁂𑀫𑀺 𑀧𑀝𑁆𑀞𑀧𑁂𑀫𑀺 𑀯𑀺𑀯𑀭𑀸𑀫𑀺 𑀯𑀺𑀪𑀚𑀸𑀫𑀺 𑀉𑀢𑁆𑀢𑀸𑀦𑀻𑀓𑀭𑁄𑀫𑀺 𑀧𑀓𑀸𑀲𑁂𑀫𑀻𑀢𑀺 𑁋 𑀢𑁂 𑀬𑀸𑀚𑀬𑁄𑀕𑀸 𑀪𑀯𑀭𑀸𑀕𑀭𑀢𑁆𑀢𑀸 𑀦𑀸𑀢𑀭𑀺𑀁𑀲𑀼 𑀚𑀸𑀢𑀺𑀚𑀭𑀦𑁆𑀢𑀺 𑀩𑁆𑀭𑀽𑀫𑀺. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀆𑀲𑀻𑀲𑀦𑁆𑀢𑀺 𑀣𑁄𑀫𑀬𑀦𑁆𑀢𑀺, 𑀅𑀪𑀺𑀚𑀧𑁆𑀧𑀦𑁆𑀢𑀺 𑀚𑀼𑀳𑀦𑁆𑀢𑀺; [𑀧𑀼𑀡𑁆𑀡𑀓𑀸𑀢𑀺 𑀪𑀕𑀯𑀸]

𑀓𑀸𑀫𑀸𑀪𑀺𑀚𑀧𑁆𑀧𑀦𑁆𑀢𑀺 𑀧𑀝𑀺𑀘𑁆𑀘 𑀮𑀸𑀪𑀁, 𑀢𑁂 𑀬𑀸𑀚𑀬𑁄𑀕𑀸 𑀪𑀯𑀭𑀸𑀕𑀭𑀢𑁆𑀢𑀸;

𑀦𑀸𑀢𑀭𑀺𑀁𑀲𑀼 𑀚𑀸𑀢𑀺𑀚𑀭𑀦𑁆𑀢𑀺 𑀩𑁆𑀭𑀽𑀫𑀻’’𑀢𑀺.

𑁧𑁬. 𑀢𑁂 𑀘𑁂 𑀦𑀸𑀢𑀭𑀺𑀁𑀲𑀼 𑀬𑀸𑀚𑀬𑁄𑀕𑀸, [𑀇𑀘𑁆𑀘𑀸𑀬𑀲𑁆𑀫𑀸 𑀧𑀼𑀡𑁆𑀡𑀓𑁄]

𑀬𑀜𑁆𑀜𑁂𑀳𑀺 𑀚𑀸𑀢𑀺𑀜𑁆𑀘 𑀚𑀭𑀜𑁆𑀘 𑀫𑀸𑀭𑀺𑀲;

𑀅𑀣 𑀓𑁄 𑀘𑀭𑀳𑀺 𑀤𑁂𑀯𑀫𑀦𑀼𑀲𑁆𑀲𑀮𑁄𑀓𑁂, 𑀅𑀢𑀸𑀭𑀺 𑀚𑀸𑀢𑀺𑀜𑁆𑀘 𑀚𑀭𑀜𑁆𑀘 𑀫𑀸𑀭𑀺𑀲;

𑀧𑀼𑀘𑁆𑀙𑀸𑀫𑀺 𑀢𑀁 𑀪𑀕𑀯𑀸 𑀩𑁆𑀭𑀽𑀳𑀺 𑀫𑁂𑀢𑀁.

𑀢𑁂 𑀘𑁂 𑀦𑀸𑀢𑀭𑀺𑀁𑀲𑀼 𑀬𑀸𑀚𑀬𑁄𑀕𑀸𑀢𑀺 𑀢𑁂 𑀬𑀜𑁆𑀜𑀬𑀸𑀚𑀓𑀸 𑀬𑀸𑀚𑀬𑁄𑀕𑀸 𑀪𑀯𑀭𑀸𑀕𑀭𑀢𑁆𑀢𑀸 𑀚𑀸𑀢𑀺𑀚𑀭𑀸𑀫𑀭𑀡𑀁 𑀦𑀸𑀢𑀭𑀺𑀁𑀲𑀼 𑀦 𑀉𑀢𑁆𑀢𑀭𑀺𑀁𑀲𑀼 𑀦 𑀧𑀢𑀭𑀺𑀁𑀲𑀼 𑀦 𑀲𑀫𑀢𑀺𑀓𑁆𑀓𑀫𑀺𑀁𑀲𑀼 𑀦 𑀯𑀻𑀢𑀺𑀯𑀢𑁆𑀢𑀺𑀁𑀲𑀼, 𑀚𑀸𑀢𑀺𑀚𑀭𑀸𑀫𑀭𑀡𑀸 𑀅𑀦𑀺𑀓𑁆𑀔𑀦𑁆𑀢𑀸 𑀅𑀦𑀺𑀲𑁆𑀲𑀝𑀸 𑀅𑀦𑀢𑀺𑀓𑁆𑀓𑀦𑁆𑀢𑀸 𑀅𑀲𑀫𑀢𑀺𑀓𑁆𑀓𑀦𑁆𑀢𑀸 𑀅𑀯𑀻𑀢𑀺𑀯𑀢𑁆𑀢𑀸 𑀅𑀦𑁆𑀢𑁄𑀚𑀸𑀢𑀺𑀚𑀭𑀸𑀫𑀭𑀡𑁂 𑀧𑀭𑀺𑀯𑀢𑁆𑀢𑀦𑁆𑀢𑀺 𑀅𑀦𑁆𑀢𑁄𑀲𑀁𑀲𑀸𑀭𑀧𑀣𑁂 𑀧𑀭𑀺𑀯𑀢𑁆𑀢𑀦𑁆𑀢𑀺. 𑀚𑀸𑀢𑀺𑀬𑀸 𑀅𑀦𑀼𑀕𑀢𑀸 𑀚𑀭𑀸𑀬 𑀅𑀦𑀼𑀲𑀝𑀸 𑀩𑁆𑀬𑀸𑀥𑀺𑀦𑀸 𑀅𑀪𑀺𑀪𑀽𑀢𑀸 𑀫𑀭𑀡𑁂𑀦 𑀅𑀩𑁆𑀪𑀸𑀳𑀢𑀸 𑀅𑀢𑀸𑀡𑀸 𑀅𑀮𑁂𑀡𑀸 𑀅𑀲𑀭𑀡𑀸 𑀅𑀲𑀭𑀡𑀻𑀪𑀽𑀢𑀸𑀢𑀺 𑁋 𑀢𑁂 𑀘𑁂 𑀦𑀸𑀢𑀭𑀺𑀁𑀲𑀼 𑀬𑀸𑀚𑀬𑁄𑀕𑀸.

𑀇𑀘𑁆𑀘𑀸𑀬𑀲𑁆𑀫𑀸 𑀧𑀼𑀡𑁆𑀡𑀓𑁄𑀢𑀺. 𑀇𑀘𑁆𑀘𑀸𑀢𑀺 𑀧𑀤𑀲𑀦𑁆𑀥𑀺…𑀧𑁂… 𑀆𑀬𑀲𑁆𑀫𑀸 𑀧𑀼𑀡𑁆𑀡𑀓𑁄.

𑀬𑀜𑁆𑀜𑁂𑀳𑀺 𑀚𑀸𑀢𑀺𑀜𑁆𑀘 𑀚𑀭𑀜𑁆𑀘 𑀫𑀸𑀭𑀺𑀲𑀸𑀢𑀺. 𑀬𑀜𑁆𑀜𑁂𑀳𑀻𑀢𑀺 𑀬𑀜𑁆𑀜𑁂𑀳𑀺 𑀧𑀳𑀽𑀢𑁂𑀳𑀺 𑀬𑀜𑁆𑀜𑁂𑀳𑀺 𑀯𑀺𑀯𑀺𑀥𑁂𑀳𑀺 𑀬𑀜𑁆𑀜𑁂𑀳𑀺 𑀧𑀼𑀣𑀽𑀳𑀺. 𑀫𑀸𑀭𑀺𑀲𑀸𑀢𑀺 𑀧𑀺𑀬𑀯𑀘𑀦𑀁 𑀕𑀭𑀼𑀯𑀘𑀦𑀁 𑀲𑀕𑀸𑀭𑀯𑀲𑀧𑁆𑀧𑀢𑀺𑀲𑁆𑀲𑀸𑀥𑀺𑀯𑀘𑀦𑀫𑁂𑀢𑀁 𑀫𑀸𑀭𑀺𑀲𑀸𑀢𑀺 𑁋 𑀬𑀜𑁆𑀜𑁂𑀳𑀺 𑀚𑀸𑀢𑀺𑀜𑁆𑀘 𑀚𑀭𑀜𑁆𑀘 𑀫𑀸𑀭𑀺𑀲.

𑀅𑀣 𑀓𑁄 𑀘𑀭𑀳𑀺 𑀤𑁂𑀯𑀫𑀦𑀼𑀲𑁆𑀲𑀮𑁄𑀓𑁂, 𑀅𑀢𑀸𑀭𑀺 𑀚𑀸𑀢𑀺𑀜𑁆𑀘 𑀚𑀭𑀜𑁆𑀘 𑀫𑀸𑀭𑀺𑀲𑀸𑀢𑀺 𑀅𑀣 𑀓𑁄 𑀏𑀲𑁄 𑀲𑀤𑁂𑀯𑀓𑁂 𑀮𑁄𑀓𑁂 𑀲𑀫𑀸𑀭𑀓𑁂 𑀲𑀩𑁆𑀭𑀳𑁆𑀫𑀓𑁂 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀚𑀸𑀬 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀚𑀸𑀢𑀺𑀚𑀭𑀸𑀫𑀭𑀡𑀁 𑀅𑀢𑀭𑀺 𑀉𑀢𑁆𑀢𑀭𑀺 𑀧𑀢𑀭𑀺 𑀲𑀫𑀢𑀺𑀓𑁆𑀓𑀫𑀺 𑀯𑀻𑀢𑀺𑀯𑀢𑁆𑀢𑀬𑀺 [𑀯𑀻𑀢𑀺𑀯𑀢𑁆𑀢𑀺 (𑀓.)]. 𑀫𑀸𑀭𑀺𑀲𑀸𑀢𑀺 𑀧𑀺𑀬𑀯𑀘𑀦𑀁 𑀕𑀭𑀼𑀯𑀘𑀦𑀁 𑀲𑀕𑀸𑀭𑀯𑀲𑀧𑁆𑀧𑀢𑁆𑀢𑀺𑀲𑁆𑀲𑀸𑀥𑀺𑀯𑀘𑀦𑀫𑁂𑀢𑀁 𑀫𑀸𑀭𑀺𑀲𑀸𑀢𑀺 𑁋 𑀅𑀣 𑀓𑁄 𑀘𑀭𑀳𑀺 𑀤𑁂𑀯𑀫𑀦𑀼𑀲𑁆𑀲𑀮𑁄𑀓𑁂, 𑀅𑀢𑀸𑀭𑀺 𑀚𑀸𑀢𑀺𑀜𑁆𑀘 𑀚𑀭𑀜𑁆𑀘 𑀫𑀸𑀭𑀺𑀲.

𑀧𑀼𑀘𑁆𑀙𑀸𑀫𑀺 𑀢𑀁 𑀪𑀕𑀯𑀸 𑀩𑁆𑀭𑀽𑀳𑀺 𑀫𑁂𑀢𑀦𑁆𑀢𑀺. 𑀧𑀼𑀘𑁆𑀙𑀸𑀫𑀺 𑀢𑀦𑁆𑀢𑀺 𑀧𑀼𑀘𑁆𑀙𑀸𑀫𑀺 𑀢𑀁 𑀬𑀸𑀘𑀸𑀫𑀺 𑀢𑀁 𑀅𑀚𑁆𑀛𑁂𑀲𑀸𑀫𑀺 𑀢𑀁 𑀧𑀲𑀸𑀤𑁂𑀫𑀺 𑀢𑀁 𑀓𑀣𑀬𑀲𑁆𑀲𑀼 𑀫𑁂𑀢𑀦𑁆𑀢𑀺 𑁋 𑀧𑀼𑀘𑁆𑀙𑀸𑀫𑀺 𑀢𑀁. 𑀪𑀕𑀯𑀸𑀢𑀺 𑀕𑀸𑀭𑀯𑀸𑀥𑀺𑀯𑀘𑀦𑀁…𑀧𑁂… 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺 𑁋 𑀬𑀤𑀺𑀤𑀁 𑀪𑀕𑀯𑀸𑀢𑀺. 𑀩𑁆𑀭𑀽𑀳𑀺 𑀫𑁂𑀢𑀦𑁆𑀢𑀺 𑀩𑁆𑀭𑀽𑀳𑀺 𑀆𑀘𑀺𑀓𑁆𑀔𑀸𑀳𑀺 𑀤𑁂𑀲𑁂𑀳𑀺 𑀧𑀜𑁆𑀜𑀧𑁂𑀳𑀺 𑀧𑀝𑁆𑀞𑀧𑁂𑀳𑀺 𑀯𑀺𑀯𑀭𑀸𑀳𑀺 𑀯𑀺𑀪𑀚𑀸𑀳𑀺 𑀉𑀢𑁆𑀢𑀸𑀦𑀻𑀓𑀭𑁄𑀳𑀺 𑀧𑀓𑀸𑀲𑁂𑀳𑀻𑀢𑀺 𑁋 𑀧𑀼𑀘𑁆𑀙𑀸𑀫𑀺 𑀢𑀁 𑀪𑀕𑀯𑀸 𑀩𑁆𑀭𑀽𑀳𑀺 𑀫𑁂𑀢𑀁. 𑀢𑁂𑀦𑀸𑀳 𑀲𑁄 𑀩𑁆𑀭𑀸𑀳𑁆𑀫𑀡𑁄 𑁋

‘‘𑀢𑁂 𑀘𑁂 𑀦𑀸𑀢𑀭𑀺𑀁𑀲𑀼 𑀬𑀸𑀚𑀬𑁄𑀕𑀸, [𑀇𑀘𑁆𑀘𑀸𑀬𑀲𑁆𑀫𑀸 𑀧𑀼𑀡𑁆𑀡𑀓𑁄]

𑀬𑀜𑁆𑀜𑁂𑀳𑀺 𑀚𑀸𑀢𑀺𑀜𑁆𑀘 𑀚𑀭𑀜𑁆𑀘 𑀫𑀸𑀭𑀺𑀲;

𑀅𑀣 𑀓𑁄 𑀘𑀭𑀳𑀺 𑀤𑁂𑀯𑀫𑀦𑀼𑀲𑁆𑀲𑀮𑁄𑀓𑁂, 𑀅𑀢𑀸𑀭𑀺 𑀚𑀸𑀢𑀺𑀜𑁆𑀘 𑀚𑀭𑀜𑁆𑀘 𑀫𑀸𑀭𑀺𑀲;

𑀧𑀼𑀘𑁆𑀙𑀸𑀫𑀺 𑀢𑀁 𑀪𑀕𑀯𑀸 𑀩𑁆𑀭𑀽𑀳𑀺 𑀫𑁂𑀢’’𑀦𑁆𑀢𑀺.

𑁧𑁭. 𑀲𑀗𑁆𑀔𑀸𑀬 𑀮𑁄𑀓𑀲𑁆𑀫𑀺 [𑀮𑁄𑀓𑀲𑁆𑀫𑀺𑀁 (𑀲𑁆𑀬𑀸. 𑀓.)] 𑀧𑀭𑁄𑀧𑀭𑀸𑀦𑀺, [𑀧𑀼𑀡𑁆𑀡𑀓𑀸𑀢𑀺 𑀪𑀕𑀯𑀸]

𑀬𑀲𑁆𑀲𑀺𑀜𑁆𑀚𑀺𑀢𑀁 𑀦𑀢𑁆𑀣𑀺 𑀓𑀼𑀳𑀺𑀜𑁆𑀘𑀺 𑀮𑁄𑀓𑁂;

𑀲𑀦𑁆𑀢𑁄 𑀯𑀺𑀥𑀽𑀫𑁄 𑀅𑀦𑀻𑀖𑁄 𑀦𑀺𑀭𑀸𑀲𑁄, 𑀅𑀢𑀸𑀭𑀺 𑀲𑁄 𑀚𑀸𑀢𑀺𑀚𑀭𑀦𑁆𑀢𑀺 𑀩𑁆𑀭𑀽𑀫𑀺.

𑀲𑀗𑁆𑀔𑀸𑀬 𑀮𑁄𑀓𑀲𑁆𑀫𑀺 𑀧𑀭𑁄𑀧𑀭𑀸𑀦𑀻𑀢𑀺 𑀲𑀗𑁆𑀔𑀸 𑀯𑀼𑀘𑁆𑀘𑀢𑀺 𑀜𑀸𑀡𑀁 𑀬𑀸 𑀧𑀜𑁆𑀜𑀸 𑀧𑀚𑀸𑀦𑀦𑀸…𑀧𑁂… 𑀅𑀫𑁄𑀳𑁄 𑀥𑀫𑁆𑀫𑀯𑀺𑀘𑀬𑁄 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀧𑀭𑁄𑀧𑀭𑀸𑀦𑀻𑀢𑀺 𑀑𑀭𑀁 𑀯𑀼𑀘𑁆𑀘𑀢𑀺 𑀲𑀓𑀢𑁆𑀢𑀪𑀸𑀯𑁄, 𑀧𑀭𑀁 𑀯𑀼𑀘𑁆𑀘𑀢𑀺 𑀧𑀭𑀢𑁆𑀢𑀪𑀸𑀯𑁄 𑀑𑀭𑀁 𑀯𑀼𑀘𑁆𑀘𑀢𑀺 𑀲𑀓𑀭𑀽𑀧𑀯𑁂𑀤𑀦𑀸𑀲𑀜𑁆𑀜𑀸𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀁, 𑀧𑀭𑀁 𑀯𑀼𑀘𑁆𑀘𑀢𑀺 𑀧𑀭𑀭𑀽𑀧𑀯𑁂𑀤𑀦𑀸𑀲𑀜𑁆𑀜𑀸𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀁; 𑀑𑀭𑀁 𑀯𑀼𑀘𑁆𑀘𑀢𑀺 𑀙 𑀅𑀚𑁆𑀛𑀢𑁆𑀢𑀺𑀓𑀸𑀦𑀺 𑀆𑀬𑀢𑀦𑀸𑀦𑀺, 𑀧𑀭𑀁 𑀯𑀼𑀘𑁆𑀘𑀢𑀺 𑀙 𑀩𑀸𑀳𑀺𑀭𑀸𑀦𑀺 𑀆𑀬𑀢𑀦𑀸𑀦𑀺. 𑀑𑀭𑀁 𑀯𑀼𑀘𑁆𑀘𑀢𑀺 𑀫𑀦𑀼𑀲𑁆𑀲𑀮𑁄𑀓𑁄, 𑀧𑀭𑀁 𑀯𑀼𑀘𑁆𑀘𑀢𑀺 𑀤𑁂𑀯𑀮𑁄𑀓𑁄; 𑀑𑀭𑀁 𑀯𑀼𑀘𑁆𑀘𑀢𑀺 𑀓𑀸𑀫𑀥𑀸𑀢𑀼, 𑀧𑀭𑀁 𑀯𑀼𑀘𑁆𑀘𑀢𑀺 𑀭𑀽𑀧𑀥𑀸𑀢𑀼 𑀅𑀭𑀽𑀧𑀥𑀸𑀢𑀼; 𑀑𑀭𑀁 𑀯𑀼𑀘𑁆𑀘𑀢𑀺 𑀓𑀸𑀫𑀥𑀸𑀢𑀼 𑀭𑀽𑀧𑀥𑀸𑀢𑀼, 𑀧𑀭𑀁 𑀯𑀼𑀘𑁆𑀘𑀢𑀺 𑀅𑀭𑀽𑀧𑀥𑀸𑀢𑀼. 𑀲𑀗𑁆𑀔𑀸𑀬 𑀮𑁄𑀓𑀲𑁆𑀫𑀺 𑀧𑀭𑁄𑀧𑀭𑀸𑀦𑀻𑀢𑀺 𑀧𑀭𑁄𑀧𑀭𑀸𑀦𑀺 𑀅𑀦𑀺𑀘𑁆𑀘𑀢𑁄 𑀲𑀗𑁆𑀔𑀸𑀬 𑀤𑀼𑀓𑁆𑀔𑀢𑁄 𑀭𑁄𑀕𑀢𑁄 𑀕𑀡𑁆𑀟𑀢𑁄…𑀧𑁂… 𑀦𑀺𑀲𑁆𑀲𑀭𑀡𑀢𑁄 𑀲𑀗𑁆𑀔𑀸𑀬 𑀚𑀸𑀦𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸𑀢𑀺 𑁋 𑀲𑀗𑁆𑀔𑀸𑀬 𑀮𑁄𑀓𑀲𑁆𑀫𑀺 𑀧𑀭𑁄𑀧𑀭𑀸𑀦𑀺. 𑀧𑀼𑀡𑁆𑀡𑀓𑀸𑀢𑀺 𑀪𑀕𑀯𑀸𑀢𑀺. 𑀧𑀼𑀡𑁆𑀡𑀓𑀸𑀢𑀺 𑀪𑀕𑀯𑀸 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀦𑀸𑀫𑁂𑀦 𑀆𑀮𑀧𑀢𑀺. 𑀪𑀕𑀯𑀸𑀢𑀺 𑀕𑀸𑀭𑀯𑀸𑀥𑀺𑀯𑀘𑀦𑀫𑁂𑀢𑀁…𑀧𑁂… 𑀬𑀤𑀺𑀤𑀁 𑀪𑀕𑀯𑀸𑀢𑀺 𑁋 𑀧𑀼𑀡𑁆𑀡𑀓𑀸𑀢𑀺 𑀪𑀕𑀯𑀸.

𑀬𑀲𑁆𑀲𑀺𑀜𑁆𑀚𑀺𑀢𑀁 𑀦𑀢𑁆𑀣𑀺 𑀓𑀼𑀳𑀺𑀜𑁆𑀘𑀺 𑀮𑁄𑀓𑁂𑀢𑀺. 𑀬𑀲𑁆𑀲𑀸𑀢𑀺 𑀅𑀭𑀳𑀢𑁄 𑀔𑀻𑀡𑀸𑀲𑀯𑀲𑁆𑀲. 𑀇𑀜𑁆𑀚𑀺𑀢𑀦𑁆𑀢𑀺 𑀢𑀡𑁆𑀳𑀺𑀜𑁆𑀚𑀺𑀢𑀁 𑀤𑀺𑀝𑁆𑀞𑀺𑀜𑁆𑀚𑀺𑀢𑀁 𑀫𑀸𑀦𑀺𑀜𑁆𑀚𑀺𑀢𑀁 𑀓𑀺𑀮𑁂𑀲𑀺𑀜𑁆𑀚𑀺𑀢𑀁 𑀓𑀸𑀫𑀺𑀜𑁆𑀚𑀺𑀢𑀁. 𑀬𑀲𑁆𑀲𑀺𑀫𑁂 𑀇𑀜𑁆𑀚𑀺𑀢𑀸 𑀦𑀢𑁆𑀣𑀺 𑀦 𑀲𑀦𑁆𑀢𑀺 𑀦 𑀲𑀁𑀯𑀺𑀚𑁆𑀚𑀦𑁆𑀢𑀺 𑀦𑀼𑀧𑀮𑀩𑁆𑀪𑀦𑁆𑀢𑀺, 𑀧𑀳𑀻𑀦𑀸 𑀲𑀫𑀼𑀘𑁆𑀙𑀺𑀦𑁆𑀦𑀸 𑀯𑀽𑀧𑀲𑀦𑁆𑀢𑀸 𑀧𑀝𑀺𑀧𑀲𑁆𑀲𑀤𑁆𑀥𑀸 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸. 𑀓𑀼𑀳𑀺𑀜𑁆𑀘𑀻𑀢𑀺 𑀓𑀼𑀳𑀺𑀜𑁆𑀘𑀺 𑀓𑀺𑀲𑁆𑀫𑀺𑀜𑁆𑀘𑀺 𑀓𑀢𑁆𑀣𑀘𑀺 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸 𑀯𑀸. 𑀮𑁄𑀓𑁂𑀢𑀺 𑀅𑀧𑀸𑀬𑀮𑁄𑀓𑁂…𑀧𑁂… 𑀆𑀬𑀢𑀦𑀮𑁄𑀓𑁂𑀢𑀺 𑁋 𑀬𑀲𑁆𑀲𑀺𑀜𑁆𑀚𑀺𑀢𑀁 𑀦𑀢𑁆𑀣𑀺 𑀓𑀼𑀳𑀺𑀜𑁆𑀘𑀺 𑀮𑁄𑀓𑁂.

𑀲𑀦𑁆𑀢𑁄 𑀯𑀺𑀥𑀽𑀫𑁄 𑀅𑀦𑀻𑀖𑁄 𑀦𑀺𑀭𑀸𑀲𑁄, 𑀅𑀢𑀸𑀭𑀺 𑀲𑁄 𑀚𑀸𑀢𑀺𑀚𑀭𑀦𑁆𑀢𑀺 𑀩𑁆𑀭𑀽𑀫𑀻𑀢𑀺. 𑀲𑀦𑁆𑀢𑁄𑀢𑀺 𑀭𑀸𑀕𑀲𑁆𑀲 𑀲𑀦𑁆𑀢𑀢𑁆𑀢𑀸 𑀲𑀦𑁆𑀢𑁄, 𑀤𑁄𑀲𑀲𑁆𑀲…𑀧𑁂… 𑀫𑁄𑀳𑀲𑁆𑀲… 𑀓𑁄𑀥𑀲𑁆𑀲… 𑀉𑀧𑀦𑀸𑀳𑀲𑁆𑀲… 𑀫𑀓𑁆𑀔𑀲𑁆𑀲… 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀸𑀦𑀁 𑀲𑀦𑁆𑀢𑀢𑁆𑀢𑀸 𑀲𑀫𑀺𑀢𑀢𑁆𑀢𑀸 𑀯𑀽𑀧𑀲𑀫𑀺𑀢𑀢𑁆𑀢𑀸 𑀯𑀺𑀚𑁆𑀛𑀸𑀢𑀢𑁆𑀢𑀸 [𑀦𑀺𑀚𑁆𑀛𑀸𑀢𑀢𑁆𑀢𑀸 (𑀓.) 𑀫𑀳𑀸𑀦𑀺. 𑁧𑁮] 𑀦𑀺𑀩𑁆𑀩𑀼𑀢𑀢𑁆𑀢𑀸 𑀯𑀺𑀕𑀢𑀢𑁆𑀢𑀸 𑀧𑀝𑀺𑀧𑀲𑁆𑀲𑀤𑁆𑀥𑀢𑁆𑀢𑀸 𑀲𑀦𑁆𑀢𑁄 𑀉𑀧𑀲𑀦𑁆𑀢𑁄 𑀯𑀽𑀧𑀲𑀦𑁆𑀢𑁄 𑀦𑀺𑀩𑁆𑀩𑀼𑀢𑁄 𑀧𑀝𑀺𑀧𑀲𑁆𑀲𑀤𑁆𑀥𑁄𑀢𑀺 𑀲𑀦𑁆𑀢𑁄; 𑀯𑀺𑀥𑀽𑀫𑁄𑀢𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀯𑀺𑀥𑀽𑀫𑀺𑀢𑀁 𑀯𑀺𑀥𑀫𑀺𑀢𑀁 𑀲𑁄𑀲𑀺𑀢𑀁 𑀯𑀺𑀲𑁄𑀲𑀺𑀢𑀁 𑀩𑁆𑀬𑀦𑁆𑀢𑀻𑀓𑀢𑀁 [𑀩𑁆𑀬𑀦𑁆𑀢𑀺𑀓𑀢𑀁 (𑀓.)], 𑀯𑀘𑀻𑀤𑀼𑀘𑁆𑀘𑀭𑀺𑀢𑀁…𑀧𑁂… 𑀫𑀦𑁄𑀤𑀼𑀘𑁆𑀘𑀭𑀺𑀢𑀁 𑀯𑀺𑀥𑀽𑀫𑀺𑀢𑀁 𑀯𑀺𑀥𑀫𑀺𑀢𑀁 𑀲𑁄𑀲𑀺𑀢𑀁 𑀯𑀺𑀲𑁄𑀲𑀺𑀢𑀁 𑀩𑁆𑀬𑀦𑁆𑀢𑀻𑀓𑀢𑀁, 𑀭𑀸𑀕𑁄… 𑀤𑁄𑀲𑁄… 𑀫𑁄𑀳𑁄 𑀯𑀺𑀥𑀽𑀫𑀺𑀢𑁄 𑀯𑀺𑀥𑀫𑀺𑀢𑁄 𑀲𑁄𑀲𑀺𑀢𑁄 𑀯𑀺𑀲𑁄𑀲𑀺𑀢𑁄 𑀩𑁆𑀬𑀦𑁆𑀢𑀻𑀓𑀢𑁄, 𑀓𑁄𑀥𑁄… 𑀉𑀧𑀦𑀸𑀳𑁄… 𑀫𑀓𑁆𑀔𑁄… 𑀧𑀴𑀸𑀲𑁄… 𑀇𑀲𑁆𑀲𑀸… 𑀫𑀘𑁆𑀙𑀭𑀺𑀬𑀁… 𑀫𑀸𑀬𑀸… 𑀲𑀸𑀞𑁂𑀬𑁆𑀬𑀁… 𑀣𑀫𑁆𑀪𑁄… 𑀲𑀸𑀭𑀫𑁆𑀪𑁄… 𑀫𑀸𑀦𑁄… 𑀅𑀢𑀺𑀫𑀸𑀦𑁄… 𑀫𑀤𑁄… 𑀧𑀫𑀸𑀤𑁄… 𑀲𑀩𑁆𑀩𑁂 𑀓𑀺𑀮𑁂𑀲𑀸 𑀲𑀩𑁆𑀩𑁂 𑀤𑀼𑀘𑁆𑀘𑀭𑀺𑀢𑀸 𑀲𑀩𑁆𑀩𑁂 𑀤𑀭𑀣𑀸 𑀲𑀩𑁆𑀩𑁂 𑀧𑀭𑀺𑀴𑀸𑀳𑀸 𑀲𑀩𑁆𑀩𑁂 𑀲𑀦𑁆𑀢𑀸𑀧𑀸 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀸 𑀯𑀺𑀥𑀽𑀫𑀺𑀢𑀸 𑀯𑀺𑀥𑀫𑀺𑀢𑀸 𑀲𑁄𑀲𑀺𑀢𑀸 𑀯𑀺𑀲𑁄𑀲𑀺𑀢𑀸 𑀩𑁆𑀬𑀦𑁆𑀢𑀻𑀓𑀢𑀸. 𑀅𑀣 𑀯𑀸, 𑀓𑁄𑀥𑁄 𑀯𑀼𑀘𑁆𑀘𑀢𑀺 𑀥𑀽𑀫𑁄 𑁋

𑀫𑀸𑀦𑁄 𑀳𑀺 𑀢𑁂 𑀩𑁆𑀭𑀸𑀳𑁆𑀫𑀡 𑀔𑀸𑀭𑀺𑀪𑀸𑀭𑁄, 𑀓𑁄𑀥𑁄 𑀥𑀽𑀫𑁄 𑀪𑀲𑁆𑀫𑀦𑀺 [𑀕𑀫𑁆𑀫𑀦𑀺 (𑀲𑁆𑀬𑀸.)] 𑀫𑁄𑀲𑀯𑀚𑁆𑀚𑀁;

𑀚𑀺𑀯𑁆𑀳𑀸 𑀲𑀼𑀚𑀸 𑀳𑀤𑀬𑀁 [𑀢𑀧𑁆𑀧𑀭𑀲𑁆𑀲 (𑀲𑁆𑀬𑀸.)] 𑀚𑁄𑀢𑀺𑀝𑁆𑀞𑀸𑀦𑀁, 𑀅𑀢𑁆𑀢𑀸 𑀲𑀼𑀤𑀦𑁆𑀢𑁄 𑀧𑀼𑀭𑀺𑀲𑀲𑁆𑀲 𑀚𑁄𑀢𑀺.

𑀅𑀧𑀺 𑀘, 𑀤𑀲𑀳𑀸𑀓𑀸𑀭𑁂𑀳𑀺 𑀓𑁄𑀥𑁄 𑀚𑀸𑀬𑀢𑀺 𑁋 𑀅𑀦𑀢𑁆𑀣𑀁 𑀫𑁂 𑀅𑀘𑀭𑀻𑀢𑀺 𑀓𑁄𑀥𑁄 𑀚𑀸𑀬𑀢𑀺, 𑀅𑀦𑀢𑁆𑀣𑀁 𑀫𑁂 𑀘𑀭𑀢𑀻𑀢𑀺 𑀓𑁄𑀥𑁄 𑀚𑀸𑀬𑀢𑀺, 𑀅𑀦𑀢𑁆𑀣𑀁 𑀫𑁂 𑀘𑀭𑀺𑀲𑁆𑀲𑀢𑀻𑀢𑀺 𑀓𑁄𑀥𑁄 𑀚𑀸𑀬𑀢𑀺, 𑀧𑀺𑀬𑀲𑁆𑀲 𑀫𑁂 𑀫𑀦𑀸𑀧𑀲𑁆𑀲 𑀅𑀦𑀢𑁆𑀣𑀁 𑀅𑀘𑀭𑀺, 𑀅𑀦𑀢𑁆𑀣𑀁 𑀘𑀭𑀢𑀺, 𑀅𑀦𑀢𑁆𑀣𑀁 𑀘𑀭𑀺𑀲𑁆𑀲𑀢𑀻𑀢𑀺 𑀓𑁄𑀥𑁄 𑀚𑀸𑀬𑀢𑀺, 𑀅𑀧𑁆𑀧𑀺𑀬𑀲𑁆𑀲 𑀫𑁂 𑀅𑀫𑀦𑀸𑀧𑀲𑁆𑀲 𑀅𑀢𑁆𑀣𑀁 𑀅𑀘𑀭𑀺, 𑀅𑀢𑁆𑀣𑀁 𑀘𑀭𑀢𑀺, 𑀅𑀢𑁆𑀣𑀁 𑀘𑀭𑀺𑀲𑁆𑀲𑀢𑀻𑀢𑀺 𑀓𑁄𑀥𑁄 𑀚𑀸𑀬𑀢𑀺, 𑀅𑀝𑁆𑀞𑀸𑀦𑁂 𑀯𑀸 𑀧𑀦 𑀓𑁄𑀥𑁄 𑀚𑀸𑀬𑀢𑀺. 𑀬𑁄 𑀏𑀯𑀭𑀽𑀧𑁄 𑀘𑀺𑀢𑁆𑀢𑀲𑁆𑀲 𑀆𑀖𑀸𑀢𑁄 𑀧𑀝𑀺𑀖𑀸𑀢𑁄 𑀧𑀝𑀺𑀖𑀁 𑀧𑀝𑀺𑀯𑀺𑀭𑁄𑀥𑁄 𑀓𑁄𑀧𑁄 𑀧𑀓𑁄𑀧𑁄 𑀲𑀫𑁆𑀧𑀓𑁄𑀧𑁄 𑀤𑁄𑀲𑁄 𑀧𑀤𑁄𑀲𑁄 𑀲𑀫𑁆𑀧𑀤𑁄𑀲𑁄 𑀘𑀺𑀢𑁆𑀢𑀲𑁆𑀲 𑀩𑁆𑀬𑀸𑀧𑀢𑁆𑀢𑀺 𑀫𑀦𑁄𑀧𑀤𑁄𑀲𑁄 𑀓𑁄𑀥𑁄 𑀓𑀼𑀚𑁆𑀛𑀦𑀸 𑀓𑀼𑀚𑁆𑀛𑀺𑀢𑀢𑁆𑀢𑀁 𑀤𑁄𑀲𑁄 𑀤𑀼𑀲𑁆𑀲𑀦𑀸 𑀤𑀼𑀲𑁆𑀲𑀺𑀢𑀢𑁆𑀢𑀁 𑀩𑁆𑀬𑀸𑀧𑀢𑁆𑀢𑀺 𑀩𑁆𑀬𑀸𑀧𑀚𑁆𑀚𑀦𑀸 𑀩𑁆𑀬𑀸𑀧𑀚𑁆𑀚𑀺𑀢𑀢𑁆𑀢𑀁 𑀯𑀺𑀭𑁄𑀥𑁄 𑀧𑀝𑀺𑀯𑀺𑀭𑁄𑀥𑁄 𑀘𑀡𑁆𑀟𑀺𑀓𑁆𑀓𑀁 𑀅𑀲𑀼𑀭𑁄𑀧𑁄 [𑀅𑀲𑁆𑀲𑀼𑀭𑁄𑀧𑁄 (𑀲𑁆𑀬𑀸.)] 𑀅𑀦𑀢𑁆𑀢𑀫𑀦𑀢𑀸 𑀘𑀺𑀢𑁆𑀢𑀲𑁆𑀲 𑁋 𑀅𑀬𑀁 𑀯𑀼𑀘𑁆𑀘𑀢𑀺 𑀓𑁄𑀥𑁄.

𑀅𑀧𑀺 𑀘, 𑀓𑁄𑀥𑀲𑁆𑀲 𑀅𑀥𑀺𑀫𑀢𑁆𑀢𑀧𑀭𑀺𑀢𑁆𑀢𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀅𑀢𑁆𑀣𑀺 𑀓𑀜𑁆𑀘𑀺 [𑀓𑀺𑀜𑁆𑀘𑀺 (𑀓.) 𑀫𑀳𑀸𑀦𑀺. 𑁮𑁫] 𑀓𑀸𑀮𑀁 𑀓𑁄𑀥𑁄 𑀘𑀺𑀢𑁆𑀢𑀸𑀯𑀺𑀮𑀓𑀭𑀡𑀫𑀢𑁆𑀢𑁄 𑀳𑁄𑀢𑀺, 𑀦 𑀘 𑀢𑀸𑀯 𑀫𑀼𑀔𑀓𑀼𑀮𑀸𑀦𑀯𑀺𑀓𑀼𑀮𑀸𑀦𑁄 𑀳𑁄𑀢𑀺. 𑀅𑀢𑁆𑀣𑀺 𑀓𑀜𑁆𑀘𑀺 𑀓𑀸𑀮𑀁 𑀓𑁄𑀥𑁄 𑀫𑀼𑀔𑀓𑀼𑀮𑀸𑀦𑀯𑀺𑀓𑀼𑀮𑀸𑀦𑀫𑀢𑁆𑀢𑁄 𑀳𑁄𑀢𑀺, 𑀦 𑀘 𑀢𑀸𑀯 𑀳𑀦𑀼𑀲𑀜𑁆𑀘𑁄𑀧𑀦𑁄 𑀳𑁄𑀢𑀺. 𑀅𑀢𑁆𑀣𑀺 𑀓𑀜𑁆𑀘𑀺 𑀓𑀸𑀮𑀁 𑀓𑁄𑀥𑁄 𑀳𑀦𑀼𑀲𑀜𑁆𑀘𑁄𑀧𑀦𑀫𑀢𑁆𑀢𑁄 𑀳𑁄𑀢𑀺, 𑀦 𑀘 𑀢𑀸𑀯 𑀨𑀭𑀼𑀲𑀯𑀸𑀘𑀁 𑀦𑀺𑀘𑁆𑀙𑀸𑀭𑀡𑁄 [𑀨𑀭𑀼𑀲𑀯𑀸𑀘𑀦𑀺𑀘𑁆𑀙𑀸𑀭𑀡𑁄 (𑀲𑁆𑀬𑀸.)] 𑀳𑁄𑀢𑀺. 𑀅𑀢𑁆𑀣𑀺 𑀓𑀜𑁆𑀘𑀺 𑀓𑀸𑀮𑀁 𑀓𑁄𑀥𑁄 𑀨𑀭𑀼𑀲𑀯𑀸𑀘𑀁 𑀦𑀺𑀘𑁆𑀙𑀸𑀭𑀡𑀫𑀢𑁆𑀢𑁄 𑀳𑁄𑀢𑀺, 𑀦 𑀘 𑀢𑀸𑀯 𑀤𑀺𑀲𑀸𑀯𑀺𑀤𑀺𑀲𑀸𑀦𑀼𑀯𑀺𑀮𑁄𑀓𑀦𑁄 𑀳𑁄𑀢𑀺. 𑀅𑀢𑁆𑀣𑀺 𑀓𑀜𑁆𑀘𑀺 𑀓𑀸𑀮𑀁 𑀓𑁄𑀥𑁄 𑀤𑀺𑀲𑀸𑀯𑀺𑀤𑀺𑀲𑀸𑀦𑀼𑀯𑀺𑀮𑁄𑀓𑀦𑀫𑀢𑁆𑀢𑁄 𑀳𑁄𑀢𑀺, 𑀦 𑀘 𑀢𑀸𑀯 𑀤𑀡𑁆𑀟𑀲𑀢𑁆𑀣𑀧𑀭𑀸𑀫𑀲𑀦𑁄 𑀳𑁄𑀢𑀺. 𑀅𑀢𑁆𑀣𑀺 𑀓𑀜𑁆𑀘𑀺 𑀓𑀸𑀮𑀁 𑀓𑁄𑀥𑁄 𑀤𑀡𑁆𑀟𑀲𑀢𑁆𑀣𑀧𑀭𑀸𑀫𑀲𑀦𑀫𑀢𑁆𑀢𑁄 𑀳𑁄𑀢𑀺, 𑀦 𑀘 𑀢𑀸𑀯 𑀤𑀡𑁆𑀟𑀲𑀢𑁆𑀣𑀅𑀩𑁆𑀪𑀼𑀓𑁆𑀓𑀺𑀭𑀡𑁄 𑀳𑁄𑀢𑀺. 𑀅𑀢𑁆𑀣𑀺 𑀓𑀜𑁆𑀘𑀺 𑀓𑀸𑀮𑀁 𑀓𑁄𑀥𑁄 𑀤𑀡𑁆𑀟𑀲𑀢𑁆𑀣𑀅𑀩𑁆𑀪𑀼𑀓𑁆𑀓𑀺𑀭𑀡𑀫𑀢𑁆𑀢𑁄 𑀳𑁄𑀢𑀺, 𑀦 𑀘 𑀢𑀸𑀯 𑀤𑀡𑁆𑀟𑀲𑀢𑁆𑀣𑀅𑀪𑀺𑀦𑀺𑀧𑀸𑀢𑀦𑁄 𑀳𑁄𑀢𑀺. 𑀅𑀢𑁆𑀣𑀺 𑀓𑀜𑁆𑀘𑀺 𑀓𑀸𑀮𑀁 𑀓𑁄𑀥𑁄 𑀤𑀡𑁆𑀟𑀲𑀢𑁆𑀣𑀅𑀪𑀺𑀦𑀺𑀧𑀸𑀢𑀦𑀫𑀢𑁆𑀢𑁄 𑀳𑁄𑀢𑀺, 𑀦 𑀘 𑀢𑀸𑀯 𑀙𑀺𑀦𑁆𑀦𑀯𑀺𑀘𑁆𑀙𑀺𑀦𑁆𑀦𑀓𑀭𑀡𑁄 𑀳𑁄𑀢𑀺. 𑀅𑀢𑁆𑀣𑀺 𑀓𑀜𑁆𑀘𑀺 𑀓𑀸𑀮𑀁 𑀓𑁄𑀥𑁄 𑀙𑀺𑀦𑁆𑀦𑀯𑀺𑀘𑁆𑀙𑀺𑀦𑁆𑀦𑀓𑀭𑀡𑀫𑀢𑁆𑀢𑁄 𑀳𑁄𑀢𑀺, 𑀦 𑀘 𑀢𑀸𑀯 𑀲𑀫𑁆𑀪𑀜𑁆𑀚𑀦𑀧𑀮𑀺𑀪𑀜𑁆𑀚𑀦𑁄 𑀳𑁄𑀢𑀺. 𑀅𑀢𑁆𑀣𑀺 𑀓𑀜𑁆𑀘𑀺 𑀓𑀸𑀮𑀁 𑀓𑁄𑀥𑁄 𑀲𑀫𑁆𑀪𑀜𑁆𑀚𑀦𑀧𑀮𑀺𑀪𑀜𑁆𑀚𑀦𑀫𑀢𑁆𑀢𑁄 𑀳𑁄𑀢𑀺, 𑀦 𑀘 𑀢𑀸𑀯 𑀅𑀗𑁆𑀕𑀫𑀗𑁆𑀕𑀅𑀧𑀓𑀟𑁆𑀠𑀦𑁄 𑀳𑁄𑀢𑀺. 𑀅𑀢𑁆𑀣𑀺 𑀓𑀜𑁆𑀘𑀺 𑀓𑀸𑀮𑀁 𑀓𑁄𑀥𑁄 𑀅𑀗𑁆𑀕𑀫𑀗𑁆𑀕𑀅𑀧𑀓𑀟𑁆𑀠𑀦𑀫𑀢𑁆𑀢𑁄 𑀳𑁄𑀢𑀺, 𑀦 𑀘 𑀢𑀸𑀯 𑀚𑀻𑀯𑀺𑀢𑀸𑀯𑁄𑀭𑁄𑀧𑀦𑁄 [𑀚𑀻𑀯𑀺𑀢𑀧𑀦𑀸𑀲𑀦𑁄 (𑀲𑁆𑀬𑀸.) 𑀫𑀳𑀸𑀦𑀺. 𑁮𑁫] 𑀳𑁄𑀢𑀺. 𑀅𑀢𑁆𑀣𑀺 𑀓𑀜𑁆𑀘𑀺 𑀓𑀸𑀮𑀁 𑀓𑁄𑀥𑁄 𑀚𑀻𑀯𑀺𑀢𑀸𑀯𑁄𑀭𑁄𑀧𑀦𑀫𑀢𑁆𑀢𑁄 𑀳𑁄𑀢𑀺, 𑀦 𑀘 𑀢𑀸𑀯 𑀲𑀩𑁆𑀩𑀘𑀸𑀕𑀧𑀭𑀺𑀘𑁆𑀘𑀸𑀕𑀸𑀬 𑀲𑀡𑁆𑀞𑀺𑀢𑁄 𑀳𑁄𑀢𑀺. 𑀬𑀢𑁄 𑀓𑁄𑀥𑁄 𑀧𑀭𑀁 𑀧𑀼𑀕𑁆𑀕𑀮𑀁 𑀖𑀸𑀢𑁂𑀢𑁆𑀯𑀸 𑀅𑀢𑁆𑀢𑀸𑀦𑀁 𑀖𑀸𑀢𑁂𑀢𑀺, 𑀏𑀢𑁆𑀢𑀸𑀯𑀢𑀸 𑀓𑁄𑀥𑁄 𑀧𑀭𑀫𑀼𑀲𑁆𑀲𑀤𑀕𑀢𑁄 𑀧𑀭𑀫𑀯𑁂𑀧𑀼𑀮𑁆𑀮𑀧𑀢𑁆𑀢𑁄 𑀳𑁄𑀢𑀺. 𑀬𑀲𑁆𑀲 𑀲𑁄 𑀳𑁄𑀢𑀺 𑀓𑁄𑀥𑁄 𑀧𑀳𑀻𑀦𑁄 𑀲𑀫𑀼𑀘𑁆𑀙𑀺𑀦𑁆𑀦𑁄 𑀯𑀽𑀧𑀲𑀦𑁆𑀢𑁄 𑀧𑀝𑀺𑀧𑀲𑁆𑀲𑀤𑁆𑀥𑁄 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑁄 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑁄, 𑀲𑁄 𑀯𑀼𑀘𑁆𑀘𑀢𑀺 𑁋 𑀯𑀺𑀥𑀽𑀫𑁄.

𑀓𑁄𑀥𑀲𑁆𑀲 𑀧𑀳𑀻𑀦𑀢𑁆𑀢𑀸 𑀯𑀺𑀥𑀽𑀫𑁄, 𑀓𑁄𑀥𑀯𑀢𑁆𑀣𑀼𑀲𑁆𑀲 𑀧𑀭𑀺𑀜𑁆𑀜𑀸𑀢𑀢𑁆𑀢𑀸 𑀯𑀺𑀥𑀽𑀫𑁄, 𑀓𑁄𑀥𑀳𑁂𑀢𑀼𑀲𑁆𑀲 𑀧𑀭𑀺𑀜𑁆𑀜𑀸𑀢𑀢𑁆𑀢𑀸 𑀯𑀺𑀥𑀽𑀫𑁄, 𑀓𑁄𑀥𑀳𑁂𑀢𑀼𑀲𑁆𑀲 𑀉𑀧𑀘𑁆𑀙𑀺𑀦𑁆𑀦𑀢𑁆𑀢𑀸 𑀯𑀺𑀥𑀽𑀫𑁄. 𑀅𑀦𑀻𑀖𑁄𑀢𑀺 𑀭𑀸𑀕𑁄 𑀦𑀻𑀖𑁄, 𑀤𑁄𑀲𑁄 𑀦𑀻𑀖𑁄, 𑀫𑁄𑀳𑁄 𑀦𑀻𑀖𑁄, 𑀓𑁄𑀥𑁄 𑀦𑀻𑀖𑁄, 𑀉𑀧𑀦𑀸𑀳𑁄 𑀦𑀻𑀖𑁄…𑀧𑁂… 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀸 𑀦𑀻𑀖𑀸. 𑀬𑀲𑁆𑀲𑁂𑀢𑁂 𑀦𑀻𑀖𑀸 𑀧𑀳𑀻𑀦𑀸 𑀲𑀫𑀼𑀘𑁆𑀙𑀺𑀦𑁆𑀦𑀸 𑀯𑀽𑀧𑀲𑀦𑁆𑀢𑀸 𑀧𑀝𑀺𑀧𑀲𑁆𑀲𑀤𑁆𑀥𑀸 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸, 𑀲𑁄 𑀯𑀼𑀘𑁆𑀘𑀢𑀺 𑀅𑀦𑀻𑀖𑁄.

𑀦𑀺𑀭𑀸𑀲𑁄𑀢𑀺 𑀆𑀲𑀸 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸. 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄…𑀧𑁂… 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁. 𑀬𑀲𑁆𑀲𑁂𑀲𑀸 𑀆𑀲𑀸 𑀢𑀡𑁆𑀳𑀸 𑀧𑀳𑀻𑀦𑀸 𑀲𑀫𑀼𑀘𑁆𑀙𑀺𑀦𑁆𑀦𑀸 𑀯𑀽𑀧𑀲𑀦𑁆𑀢𑀸 𑀧𑀝𑀺𑀧𑀲𑁆𑀲𑀤𑁆𑀥𑀸 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸, 𑀲𑁄 𑀯𑀼𑀘𑁆𑀘𑀢𑀺 𑀦𑀺𑀭𑀸𑀲𑁄. 𑀚𑀸𑀢𑀻𑀢𑀺 𑀬𑀸 𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀢𑀫𑁆𑀳𑀺 𑀢𑀫𑁆𑀳𑀺 𑀲𑀢𑁆𑀢𑀦𑀺𑀓𑀸𑀬𑁂 𑀚𑀸𑀢𑀺 𑀲𑀜𑁆𑀚𑀸𑀢𑀺 𑀑𑀓𑁆𑀓𑀦𑁆𑀢𑀺 𑀅𑀪𑀺𑀦𑀺𑀩𑁆𑀩𑀢𑁆𑀢𑀺 𑀔𑀦𑁆𑀥𑀸𑀦𑀁 𑀧𑀸𑀢𑀼𑀪𑀸𑀯𑁄 𑀆𑀬𑀢𑀦𑀸𑀦𑀁 𑀧𑀝𑀺𑀮𑀸𑀪𑁄. 𑀚𑀭𑀸𑀢𑀺 𑀬𑀸 𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀢𑀫𑁆𑀳𑀺 𑀢𑀫𑁆𑀳𑀺 𑀲𑀢𑁆𑀢𑀦𑀺𑀓𑀸𑀬𑁂 𑀚𑀭𑀸 𑀚𑀻𑀭𑀡𑀢𑀸 𑀔𑀡𑁆𑀟𑀺𑀘𑁆𑀘𑀁 𑀧𑀸𑀮𑀺𑀘𑁆𑀘𑀁 𑀯𑀮𑀺𑀢𑁆𑀢𑀘𑀢𑀸 𑀆𑀬𑀼𑀦𑁄 𑀲𑀁𑀳𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀭𑀺𑀧𑀸𑀓𑁄. 𑀲𑀦𑁆𑀢𑁄 𑀯𑀺𑀥𑀽𑀫𑁄 𑀅𑀦𑀻𑀖𑁄 𑀦𑀺𑀭𑀸𑀲𑁄, 𑀅𑀢𑀸𑀭𑀺 𑀲𑁄 𑀚𑀸𑀢𑀺𑀚𑀭𑀦𑁆𑀢𑀺 𑀩𑁆𑀭𑀽𑀫𑀻𑀢𑀺 𑀬𑁄 𑀲𑀦𑁆𑀢𑁄 𑀘 𑀯𑀺𑀥𑀽𑀫𑁄 𑀘 𑀅𑀦𑀻𑀖𑁄 𑀘 𑀦𑀺𑀭𑀸𑀲𑁄 𑀘, 𑀲𑁄 𑀚𑀸𑀢𑀺𑀚𑀭𑀸𑀫𑀭𑀡𑀁 𑀅𑀢𑀭𑀺 𑀉𑀢𑁆𑀢𑀭𑀺 𑀧𑀢𑀭𑀺 𑀲𑀫𑀢𑀺𑀓𑁆𑀓𑀫𑀺 𑀯𑀻𑀢𑀺𑀯𑀢𑁆𑀢𑀬𑀻𑀢𑀺 𑀩𑁆𑀭𑀽𑀫𑀺 𑀆𑀘𑀺𑀓𑁆𑀔𑀸𑀫𑀺 𑀤𑁂𑀲𑁂𑀫𑀺 𑀧𑀜𑁆𑀜𑀧𑁂𑀫𑀺 𑀧𑀝𑁆𑀞𑀧𑁂𑀫𑀺 𑀯𑀺𑀯𑀭𑀸𑀫𑀺 𑀯𑀺𑀪𑀚𑀸𑀫𑀺 𑀉𑀢𑁆𑀢𑀸𑀦𑀻𑀓𑀭𑁄𑀫𑀺 𑀧𑀓𑀸𑀲𑁂𑀫𑀻𑀢𑀺 𑁋 𑀲𑀦𑁆𑀢𑁄 𑀯𑀺𑀥𑀽𑀫𑁄 𑀅𑀦𑀻𑀖𑁄 𑀦𑀺𑀭𑀸𑀲𑁄, 𑀅𑀢𑀸𑀭𑀺 𑀲𑁄 𑀚𑀸𑀢𑀺𑀚𑀭𑀦𑁆𑀢𑀺 𑀩𑁆𑀭𑀽𑀫𑀺. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀲𑀗𑁆𑀔𑀸𑀬 𑀮𑁄𑀓𑀲𑁆𑀫𑀺 𑀧𑀭𑁄𑀧𑀭𑀸𑀦𑀺, [𑀧𑀼𑀡𑁆𑀡𑀓𑀸𑀢𑀺 𑀪𑀕𑀯𑀸]

𑀬𑀲𑁆𑀲𑀺𑀜𑁆𑀚𑀺𑀢𑀁 𑀦𑀢𑁆𑀣𑀺 𑀓𑀼𑀳𑀺𑀜𑁆𑀘𑀺 𑀮𑁄𑀓𑁂;

𑀲𑀦𑁆𑀢𑁄 𑀯𑀺𑀥𑀽𑀫𑁄 𑀅𑀦𑀻𑀖𑁄 𑀦𑀺𑀭𑀸𑀲𑁄, 𑀅𑀢𑀸𑀭𑀺 𑀲𑁄 𑀚𑀸𑀢𑀺𑀚𑀭𑀦𑁆𑀢𑀺 𑀩𑁆𑀭𑀽𑀫𑀻’’𑀢𑀺.

𑀲𑀳𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑀸…𑀧𑁂… 𑀧𑀜𑁆𑀚𑀮𑀺𑀓𑁄 𑀪𑀕𑀯𑀦𑁆𑀢𑀁 𑀦𑀫𑀲𑁆𑀲𑀫𑀸𑀦𑁄 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺 𑁋 ‘‘𑀲𑀢𑁆𑀣𑀸 𑀫𑁂 𑀪𑀦𑁆𑀢𑁂 𑀪𑀕𑀯𑀸, 𑀲𑀸𑀯𑀓𑁄𑀳𑀫𑀲𑁆𑀫𑀻’’𑀢𑀺.

𑀧𑀼𑀡𑁆𑀡𑀓𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲𑁄 𑀢𑀢𑀺𑀬𑁄.