𑁬. 𑀓𑀫𑁆𑀫𑀚𑀸𑀤𑀺𑀧𑀜𑁆𑀳𑁄

𑁬. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀓𑀢𑀫𑁂 𑀏𑀢𑁆𑀣 𑀓𑀫𑁆𑀫𑀚𑀸, 𑀓𑀢𑀫𑁂 𑀳𑁂𑀢𑀼𑀚𑀸, 𑀓𑀢𑀫𑁂 𑀉𑀢𑀼𑀚𑀸, 𑀓𑀢𑀫𑁂 𑀦 𑀓𑀫𑁆𑀫𑀚𑀸, 𑀦 𑀳𑁂𑀢𑀼𑀚𑀸, 𑀦 𑀉𑀢𑀼𑀚𑀸’’𑀢𑀺? ‘‘𑀬𑁂 𑀓𑁂𑀘𑀺, 𑀫𑀳𑀸𑀭𑀸𑀚, 𑀲𑀢𑁆𑀢𑀸 𑀲𑀘𑁂𑀢𑀦𑀸, 𑀲𑀩𑁆𑀩𑁂 𑀢𑁂 𑀓𑀫𑁆𑀫𑀚𑀸; 𑀅𑀕𑁆𑀕𑀺 𑀘 𑀲𑀩𑁆𑀩𑀸𑀦𑀺 𑀘 𑀩𑀻𑀚𑀚𑀸𑀢𑀸𑀦𑀺 𑀳𑁂𑀢𑀼𑀚𑀸𑀦𑀺; 𑀧𑀣𑀯𑀻 𑀘 𑀧𑀩𑁆𑀩𑀢𑀸 𑀘 𑀉𑀤𑀓𑀜𑁆𑀘 𑀯𑀸𑀢𑁄 𑀘, 𑀲𑀩𑁆𑀩𑁂 𑀢𑁂 𑀉𑀢𑀼𑀚𑀸; 𑀆𑀓𑀸𑀲𑁄 𑀘 𑀦𑀺𑀩𑁆𑀩𑀸𑀦𑀜𑁆𑀘 𑀇𑀫𑁂 𑀤𑁆𑀯𑁂 𑀅𑀓𑀫𑁆𑀫𑀚𑀸 𑀅𑀳𑁂𑀢𑀼𑀚𑀸 𑀅𑀦𑀼𑀢𑀼𑀚𑀸. 𑀦𑀺𑀩𑁆𑀩𑀸𑀦𑀁 𑀧𑀦, 𑀫𑀳𑀸𑀭𑀸𑀚, 𑀦 𑀯𑀢𑁆𑀢𑀩𑁆𑀩𑀁 𑀓𑀫𑁆𑀫𑀚𑀦𑁆𑀢𑀺 𑀯𑀸 𑀳𑁂𑀢𑀼𑀚𑀦𑁆𑀢𑀺 𑀯𑀸 𑀉𑀢𑀼𑀚𑀦𑁆𑀢𑀺 𑀯𑀸 𑀉𑀧𑁆𑀧𑀦𑁆𑀦𑀦𑁆𑀢𑀺 𑀯𑀸 𑀅𑀦𑀼𑀧𑁆𑀧𑀦𑁆𑀦𑀦𑁆𑀢𑀺 𑀯𑀸 𑀉𑀧𑁆𑀧𑀸𑀤𑀦𑀻𑀬𑀦𑁆𑀢𑀺 𑀯𑀸 𑀅𑀢𑀻𑀢𑀦𑁆𑀢𑀺 𑀯𑀸 𑀅𑀦𑀸𑀕𑀢𑀦𑁆𑀢𑀺 𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀦𑁆𑀢𑀺 𑀯𑀸 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀦𑁆𑀢𑀺 𑀯𑀸 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀦𑁆𑀢𑀺 𑀯𑀸 𑀖𑀸𑀦𑀯𑀺𑀜𑁆𑀜𑁂𑀬𑁆𑀬𑀦𑁆𑀢𑀺 𑀯𑀸 𑀚𑀺𑀯𑁆𑀳𑀸𑀯𑀺𑀜𑁆𑀜𑁂𑀬𑁆𑀬𑀦𑁆𑀢𑀺 𑀯𑀸 𑀓𑀸𑀬𑀯𑀺𑀜𑁆𑀜𑁂𑀬𑁆𑀬𑀦𑁆𑀢𑀺 𑀯𑀸, 𑀅𑀧𑀺 𑀘, 𑀫𑀳𑀸𑀭𑀸𑀚, 𑀫𑀦𑁄𑀯𑀺𑀜𑁆𑀜𑁂𑀬𑁆𑀬𑀁 𑀦𑀺𑀩𑁆𑀩𑀸𑀦𑀁, 𑀬𑀁 𑀲𑁄 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑁄 𑀅𑀭𑀺𑀬𑀲𑀸𑀯𑀓𑁄 𑀯𑀺𑀲𑀼𑀤𑁆𑀥𑁂𑀦 𑀜𑀸𑀡𑁂𑀦 𑀧𑀲𑁆𑀲𑀢𑀻’’𑀢𑀺. ‘‘𑀭𑀫𑀡𑀻𑀬𑁄, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀧𑀜𑁆𑀳𑁄 𑀲𑀼𑀯𑀺𑀦𑀺𑀘𑁆𑀙𑀺𑀢𑁄 𑀦𑀺𑀲𑁆𑀲𑀁𑀲𑀬𑁄 𑀏𑀓𑀦𑁆𑀢𑀕𑀢𑁄, 𑀯𑀺𑀫𑀢𑀺 𑀉𑀧𑁆𑀧𑀘𑁆𑀙𑀺𑀦𑁆𑀦𑀸, 𑀢𑁆𑀯𑀁 𑀕𑀡𑀺𑀯𑀭𑀧𑀯𑀭𑀫𑀸𑀲𑀚𑁆𑀚𑀸’’𑀢𑀺.

𑀓𑀫𑁆𑀫𑀚𑀸𑀤𑀺𑀧𑀜𑁆𑀳𑁄 𑀙𑀝𑁆𑀞𑁄.