𑁨. 𑀦𑀺𑀧𑁆𑀧𑀧𑀜𑁆𑀘𑀯𑀕𑁆𑀕𑁄

𑁧. 𑀦𑀺𑀧𑁆𑀧𑀧𑀜𑁆𑀘𑀧𑀜𑁆𑀳𑁄

𑁧. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀪𑀸𑀲𑀺𑀢𑀫𑁆𑀧𑁂𑀢𑀁 𑀪𑀕𑀯𑀢𑀸 ‘𑀦𑀺𑀧𑁆𑀧𑀧𑀜𑁆𑀘𑀸𑀭𑀸𑀫𑀸, 𑀪𑀺𑀓𑁆𑀔𑀯𑁂, 𑀯𑀺𑀳𑀭𑀣 𑀦𑀺𑀧𑁆𑀧𑀧𑀜𑁆𑀘𑀭𑀢𑀺𑀦𑁄’𑀢𑀺, 𑀓𑀢𑀫𑀁 𑀢𑀁 𑀦𑀺𑀧𑁆𑀧𑀧𑀜𑁆𑀘’’𑀦𑁆𑀢𑀺? ‘‘𑀲𑁄𑀢𑀸𑀧𑀢𑁆𑀢𑀺𑀨𑀮𑀁, 𑀫𑀳𑀸𑀭𑀸𑀚, 𑀦𑀺𑀧𑁆𑀧𑀧𑀜𑁆𑀘𑀁, 𑀲𑀓𑀤𑀸𑀕𑀸𑀫𑀺𑀨𑀮𑀁 𑀦𑀺𑀧𑁆𑀧𑀧𑀜𑁆𑀘𑀁, 𑀅𑀦𑀸𑀕𑀸𑀫𑀺𑀨𑀮𑀁 𑀦𑀺𑀧𑁆𑀧𑀧𑀜𑁆𑀘𑀁, 𑀅𑀭𑀳𑀢𑁆𑀢𑀨𑀮𑀁 𑀦𑀺𑀧𑁆𑀧𑀧𑀜𑁆𑀘’’𑀦𑁆𑀢𑀺.

‘‘𑀬𑀤𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀦𑀺𑀧𑁆𑀧𑀧𑀜𑁆𑀘𑀁, 𑀲𑀓𑀤𑀸𑀕𑀸𑀫𑀺𑀅𑀦𑀸𑀕𑀸𑀫𑀺𑀅𑀭𑀳𑀢𑁆𑀢𑀨𑀮𑀁 𑀦𑀺𑀧𑁆𑀧𑀧𑀜𑁆𑀘𑀁, 𑀓𑀺𑀲𑁆𑀲 𑀧𑀦 𑀇𑀫𑁂 𑀪𑀺𑀓𑁆𑀔𑀽 𑀉𑀤𑁆𑀤𑀺𑀲𑀦𑁆𑀢𑀺 𑀧𑀭𑀺𑀧𑀼𑀘𑁆𑀙𑀦𑁆𑀢𑀺 𑀲𑀼𑀢𑁆𑀢𑀁 𑀕𑁂𑀬𑁆𑀬𑀁 𑀯𑁂𑀬𑁆𑀬𑀸𑀓𑀭𑀡𑀁 𑀕𑀸𑀣𑀁 𑀉𑀤𑀸𑀦𑀁 𑀇𑀢𑀺𑀯𑀼𑀢𑁆𑀢𑀓𑀁 𑀚𑀸𑀢𑀓𑀁 𑀅𑀩𑁆𑀪𑀼𑀢𑀥𑀫𑁆𑀫𑀁 𑀯𑁂𑀤𑀮𑁆𑀮𑀁, 𑀦𑀯𑀓𑀫𑁆𑀫𑁂𑀦 𑀧𑀮𑀺𑀩𑀼𑀚𑁆𑀛𑀦𑁆𑀢𑀺 𑀤𑀸𑀦𑁂𑀦 𑀘 𑀧𑀽𑀚𑀸𑀬 𑀘, 𑀦𑀦𑀼 𑀢𑁂 𑀚𑀺𑀦𑀧𑁆𑀧𑀝𑀺𑀓𑁆𑀔𑀺𑀢𑁆𑀢𑀁 𑀓𑀫𑁆𑀫𑀁 𑀓𑀭𑁄𑀢𑀻’’𑀢𑀺?

‘‘𑀬𑁂 𑀢𑁂, 𑀫𑀳𑀸𑀭𑀸𑀚, 𑀪𑀺𑀓𑁆𑀔𑀽 𑀉𑀤𑁆𑀤𑀺𑀲𑀦𑁆𑀢𑀺 𑀧𑀭𑀺𑀧𑀼𑀘𑁆𑀙𑀦𑁆𑀢𑀺 𑀲𑀼𑀢𑁆𑀢𑀁 𑀕𑁂𑀬𑁆𑀬𑀁 𑀯𑁂𑀬𑁆𑀬𑀸𑀓𑀭𑀡𑀁 𑀕𑀸𑀣𑀁 𑀉𑀤𑀸𑀦𑀁 𑀇𑀢𑀺𑀯𑀼𑀢𑁆𑀢𑀓𑀁 𑀚𑀸𑀢𑀓𑀁 𑀅𑀩𑁆𑀪𑀼𑀢𑀥𑀫𑁆𑀫𑀁 𑀯𑁂𑀤𑀮𑁆𑀮𑀁, 𑀦𑀯𑀓𑀫𑁆𑀫𑁂𑀦 𑀧𑀮𑀺𑀩𑀼𑀚𑁆𑀛𑀦𑁆𑀢𑀺 𑀤𑀸𑀦𑁂𑀦 𑀘 𑀧𑀽𑀚𑀸𑀬 𑀘, 𑀲𑀩𑁆𑀩𑁂 𑀢𑁂 𑀦𑀺𑀧𑁆𑀧𑀧𑀜𑁆𑀘𑀲𑁆𑀲 𑀧𑀢𑁆𑀢𑀺𑀬𑀸 𑀓𑀭𑁄𑀦𑁆𑀢𑀺. 𑀬𑁂 𑀢𑁂, 𑀫𑀳𑀸𑀭𑀸𑀚, 𑀲𑀪𑀸𑀯𑀧𑀭𑀺𑀲𑀼𑀤𑁆𑀥𑀸 𑀧𑀼𑀩𑁆𑀩𑁂 𑀯𑀸𑀲𑀺𑀢𑀯𑀸𑀲𑀦𑀸, 𑀢𑁂 𑀏𑀓𑀘𑀺𑀢𑁆𑀢𑀓𑁆𑀔𑀡𑁂𑀦 𑀦𑀺𑀧𑁆𑀧𑀧𑀘 𑀳𑁄𑀦𑁆𑀢𑀺. 𑀬𑁂 𑀧𑀦 𑀢𑁂 𑀪𑀺𑀓𑁆𑀔𑀽 𑀫𑀳𑀸𑀭𑀚𑀓𑁆𑀔𑀸, 𑀢𑁂 𑀇𑀫𑁂𑀳𑀺 𑀧𑀬𑁄𑀕𑁂𑀳𑀺 𑀦𑀺𑀧𑁆𑀧𑀧𑀜𑁆𑀘𑀸 𑀳𑁄𑀦𑁆𑀢𑀺.

‘‘𑀬𑀣𑀸, 𑀫𑀳𑀸𑀭𑀸𑀚, 𑀏𑀓𑁄 𑀧𑀼𑀭𑀺𑀲𑁄 𑀔𑁂𑀢𑁆𑀢𑁂 𑀩𑀻𑀚𑀁 𑀭𑁄𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀬𑀣𑀸𑀩𑀮𑀯𑀻𑀭𑀺𑀬𑁂𑀦 𑀯𑀺𑀦𑀸 𑀧𑀸𑀓𑀸𑀭𑀯𑀢𑀺𑀬𑀸 𑀥𑀜𑁆𑀜𑀁 𑀉𑀤𑁆𑀥𑀭𑁂𑀬𑁆𑀬, 𑀏𑀓𑁄 𑀧𑀼𑀭𑀺𑀲𑁄 𑀔𑁂𑀢𑁆𑀢𑁂 𑀩𑀻𑀚𑀁 𑀭𑁄𑀧𑁂𑀢𑁆𑀯𑀸 𑀯𑀦𑀁 𑀧𑀯𑀺𑀲𑀺𑀢𑁆𑀯𑀸 𑀓𑀝𑁆𑀞𑀜𑁆𑀘 𑀲𑀸𑀔𑀜𑁆𑀘 𑀙𑀺𑀦𑁆𑀤𑀺𑀢𑁆𑀯𑀸 𑀯𑀢𑀺𑀧𑀸𑀓𑀸𑀭𑀁 𑀓𑀢𑁆𑀯𑀸 𑀥𑀜𑁆𑀜𑀁 𑀉𑀤𑁆𑀥𑀭𑁂𑀬𑁆𑀬. 𑀬𑀸 𑀢𑀢𑁆𑀣 𑀢𑀲𑁆𑀲 𑀯𑀢𑀺𑀧𑀸𑀓𑀸𑀭𑀧𑀭𑀺𑀬𑁂𑀲𑀦𑀸, 𑀲𑀸 𑀥𑀜𑁆𑀜𑀢𑁆𑀣𑀸𑀬. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁂 𑀢𑁂 𑀲𑀪𑀸𑀯𑀧𑀭𑀺𑀲𑀼𑀤𑁆𑀥𑀸 𑀧𑀼𑀩𑁆𑀩𑁂 𑀯𑀸𑀲𑀺𑀢𑀯𑀸𑀲𑀦𑀸, 𑀢𑁂 𑀏𑀓𑀘𑀺𑀢𑁆𑀢𑀓𑁆𑀔𑀡𑁂𑀦 𑀦𑀺𑀧𑁆𑀧𑀧𑀜𑁆𑀘𑀸 𑀳𑁄𑀦𑁆𑀢𑀺, 𑀯𑀺𑀦𑀸 𑀯𑀢𑀺𑀧𑀸𑀓𑀸𑀭𑀁 𑀧𑀼𑀭𑀺𑀲𑁄 𑀯𑀺𑀬 𑀥𑀜𑁆𑀜𑀼𑀤𑁆𑀥𑀸𑀭𑁄. 𑀬𑁂 𑀧𑀦 𑀢𑁂 𑀪𑀺𑀓𑁆𑀔𑀽 𑀫𑀳𑀸𑀭𑀚𑀓𑁆𑀔𑀸, 𑀢𑁂 𑀇𑀫𑁂𑀳𑀺 𑀧𑀬𑁄𑀕𑁂𑀳𑀺 𑀦𑀺𑀧𑁆𑀧𑀧𑀜𑁆𑀘𑀸 𑀳𑁄𑀦𑁆𑀢𑀺, 𑀯𑀢𑀺𑀧𑀸𑀓𑀸𑀭𑀁 𑀓𑀢𑁆𑀯𑀸 𑀧𑀼𑀭𑀺𑀲𑁄 𑀯𑀺𑀬 𑀥𑀜𑁆𑀜𑀼𑀤𑁆𑀥𑀸𑀭𑁄.

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀫𑀳𑀢𑀺𑀫𑀳𑀦𑁆𑀢𑁂 𑀅𑀫𑁆𑀩𑀭𑀼𑀓𑁆𑀔𑀫𑀢𑁆𑀣𑀓𑁂 𑀨𑀮𑀧𑀺𑀡𑁆𑀟𑀺 𑀪𑀯𑁂𑀬𑁆𑀬, 𑀅𑀣 𑀢𑀢𑁆𑀣 𑀬𑁄 𑀓𑁄𑀘𑀺 𑀇𑀤𑁆𑀥𑀺𑀫𑀸 𑀆𑀕𑀦𑁆𑀢𑁆𑀯𑀸 𑀢𑀲𑁆𑀲 𑀨𑀮𑀁 𑀳𑀭𑁂𑀬𑁆𑀬, 𑀬𑁄 𑀧𑀦 𑀢𑀢𑁆𑀣 𑀅𑀦𑀺𑀤𑁆𑀥𑀺𑀫𑀸, 𑀲𑁄 𑀓𑀝𑁆𑀞𑀜𑁆𑀘 𑀯𑀮𑁆𑀮𑀺𑀜𑁆𑀘 𑀙𑀺𑀦𑁆𑀤𑀺𑀢𑁆𑀯𑀸 𑀦𑀺𑀲𑁆𑀲𑁂𑀡𑀺𑀁 𑀩𑀦𑁆𑀥𑀺𑀢𑁆𑀯𑀸 𑀢𑀸𑀬 𑀢𑀁 𑀭𑀼𑀓𑁆𑀔𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀨𑀮𑀁 𑀳𑀭𑁂𑀬𑁆𑀬. 𑀬𑀸 𑀢𑀢𑁆𑀣 𑀢𑀲𑁆𑀲 𑀦𑀺𑀲𑁆𑀲𑁂𑀡𑀺𑀧𑀭𑀺𑀬𑁂𑀲𑀦𑀸, 𑀲𑀸 𑀨𑀮𑀢𑁆𑀣𑀸𑀬. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁂 𑀢𑁂 𑀲𑀪𑀸𑀯𑀧𑀭𑀺𑀲𑀼𑀤𑁆𑀥𑀸 𑀧𑀼𑀩𑁆𑀩𑁂 𑀯𑀸𑀲𑀺𑀢𑀯𑀸𑀲𑀦𑀸, 𑀢𑁂 𑀏𑀓𑀘𑀺𑀢𑁆𑀢𑀓𑁆𑀔𑀡𑁂𑀦 𑀦𑀺𑀧𑁆𑀧𑀧𑀜𑁆𑀘𑀸 𑀳𑁄𑀦𑁆𑀢𑀺, 𑀇𑀤𑁆𑀥𑀺𑀫𑀸 𑀯𑀺𑀬 𑀭𑀼𑀓𑁆𑀔𑀨𑀮𑀁 𑀳𑀭𑀦𑁆𑀢𑁄. 𑀬𑁂 𑀧𑀦 𑀢𑁂 𑀪𑀺𑀓𑁆𑀔𑀽 𑀫𑀳𑀸𑀭𑀚𑀓𑁆𑀔𑀸, 𑀢𑁂 𑀇𑀫𑀺𑀦𑀸 𑀧𑀬𑁄𑀕𑁂𑀦 𑀲𑀘𑁆𑀘𑀸𑀦𑀺 𑀅𑀪𑀺𑀲𑀫𑁂𑀦𑁆𑀢𑀺, 𑀦𑀺𑀲𑁆𑀲𑁂𑀡𑀺𑀬𑀸 𑀯𑀺𑀬 𑀧𑀼𑀭𑀺𑀲𑁄 𑀭𑀼𑀓𑁆𑀔𑀨𑀮𑀁 𑀳𑀭𑀦𑁆𑀢𑁄.

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀏𑀓𑁄 𑀧𑀼𑀭𑀺𑀲𑁄 𑀅𑀢𑁆𑀣𑀓𑀭𑀡𑀺𑀓𑁄 𑀏𑀓𑀓𑁄 𑀬𑁂𑀯 𑀲𑀸𑀫𑀺𑀓𑀁 𑀉𑀧𑀕𑀦𑁆𑀢𑁆𑀯𑀸 𑀅𑀢𑁆𑀣𑀁 𑀲𑀸𑀥𑁂𑀢𑀺. 𑀏𑀓𑁄 𑀥𑀦𑀯𑀸 𑀥𑀦𑀯𑀲𑁂𑀦 𑀧𑀭𑀺𑀲𑀁 𑀯𑀟𑁆𑀠𑁂𑀢𑁆𑀯𑀸 𑀧𑀭𑀺𑀲𑀸𑀬 𑀅𑀢𑁆𑀣𑀁 𑀲𑀸𑀥𑁂𑀢𑀺. 𑀬𑀸 𑀢𑀢𑁆𑀣 𑀢𑀲𑁆𑀲 𑀧𑀭𑀺𑀲𑀧𑀭𑀺𑀬𑁂𑀲𑀦𑀸, 𑀲𑀸 𑀅𑀢𑁆𑀣𑀢𑁆𑀣𑀸𑀬. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁂 𑀢𑁂 𑀲𑀪𑀸𑀯𑀧𑀭𑀺𑀲𑀼𑀤𑁆𑀥𑀸 𑀧𑀼𑀩𑁆𑀩𑁂 𑀯𑀸𑀲𑀺𑀢𑀯𑀸𑀲𑀦𑀸, 𑀢𑁂 𑀏𑀓𑀘𑀺𑀢𑁆𑀢𑀓𑁆𑀔𑀡𑁂𑀦 𑀙𑀲𑀼 𑀅𑀪𑀺𑀜𑁆𑀜𑀸𑀲𑀼 𑀯𑀲𑀺𑀪𑀸𑀯𑀁 𑀧𑀸𑀧𑀼𑀡𑀦𑁆𑀢𑀺, 𑀧𑀼𑀭𑀺𑀲𑁄 𑀯𑀺𑀬 𑀏𑀓𑀓𑁄 𑀅𑀢𑁆𑀣𑀲𑀺𑀤𑁆𑀥𑀺𑀁 𑀓𑀭𑁄𑀦𑁆𑀢𑁄. 𑀬𑁂 𑀧𑀦 𑀢𑁂 𑀪𑀺𑀓𑁆𑀔𑀽 𑀫𑀳𑀸𑀭𑀚𑀓𑁆𑀔𑀸, 𑀢𑁂 𑀇𑀫𑁂𑀳𑀺 𑀧𑀬𑁄𑀕𑁂𑀳𑀺 𑀲𑀸𑀫𑀜𑁆𑀜𑀢𑁆𑀣𑀫𑀪𑀺𑀲𑀸𑀥𑁂𑀦𑁆𑀢𑀺, 𑀧𑀭𑀺𑀲𑀸𑀬 𑀯𑀺𑀬 𑀧𑀼𑀭𑀺𑀲𑁄 𑀅𑀢𑁆𑀣𑀲𑀺𑀤𑁆𑀥𑀺𑀁 𑀓𑀭𑁄𑀦𑁆𑀢𑁄.

‘‘𑀉𑀤𑁆𑀤𑁂𑀲𑁄𑀧𑀺, 𑀫𑀳𑀸𑀭𑀸𑀚, 𑀩𑀳𑀼𑀓𑀸𑀭𑁄, 𑀧𑀭𑀺𑀧𑀼𑀘𑁆𑀙𑀸𑀧𑀺 𑀩𑀳𑀼𑀓𑀸𑀭𑀸, 𑀦𑀯𑀓𑀫𑁆𑀫𑀫𑁆𑀧𑀺 𑀩𑀳𑀼𑀓𑀸𑀭𑀁, 𑀤𑀸𑀦𑀫𑁆𑀧𑀺 𑀩𑀳𑀼𑀓𑀸𑀭𑀁, 𑀧𑀽𑀚𑀸𑀧𑀺 𑀩𑀳𑀼𑀓𑀸𑀭𑀸 𑀢𑁂𑀲𑀼 𑀢𑁂𑀲𑀼 𑀓𑀭𑀡𑀻𑀬𑁂𑀲𑀼. 𑀬𑀣𑀸, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀭𑀸𑀚𑀽𑀧𑀲𑁂𑀯𑀻 𑀓𑀢𑀸𑀯𑀻 𑀅𑀫𑀘𑁆𑀘𑀪𑀝𑀩𑀮𑀤𑁄𑀯𑀸𑀭𑀺𑀓𑀅𑀦𑀻𑀓𑀝𑁆𑀞𑀧𑀸𑀭𑀺𑀲𑀚𑁆𑀚𑀚𑀦𑁂𑀳𑀺, 𑀢𑁂 𑀢𑀲𑁆𑀲 𑀓𑀭𑀡𑀻𑀬𑁂 𑀅𑀦𑀼𑀧𑁆𑀧𑀢𑁆𑀢𑁂 𑀲𑀩𑁆𑀩𑁂𑀧𑀺 𑀉𑀧𑀓𑀸𑀭𑀸 𑀳𑁄𑀦𑁆𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀉𑀤𑁆𑀤𑁂𑀲𑁄𑀧𑀺 𑀩𑀳𑀼𑀓𑀸𑀭𑁄, 𑀧𑀭𑀺𑀧𑀼𑀘𑁆𑀙𑀸𑀧𑀺 𑀩𑀳𑀼𑀓𑀸𑀭𑀸, 𑀦𑀯𑀓𑀫𑁆𑀫𑀫𑁆𑀧𑀺 𑀩𑀳𑀼𑀓𑀸𑀭𑀁, 𑀤𑀸𑀦𑀫𑁆𑀧𑀺 𑀩𑀳𑀼𑀓𑀸𑀭𑀁, 𑀧𑀽𑀚𑀸𑀧𑀺 𑀩𑀳𑀼𑀓𑀸𑀭𑀸 𑀢𑁂𑀲𑀼 𑀢𑁂𑀲𑀼 𑀓𑀭𑀡𑀻𑀬𑁂𑀲𑀼. 𑀬𑀤𑀺, 𑀫𑀳𑀸𑀭𑀸𑀚, 𑀲𑀩𑁆𑀩𑁂𑀧𑀺 𑀅𑀪𑀺𑀚𑀸𑀢𑀺𑀧𑀭𑀺𑀲𑀼𑀤𑁆𑀥𑀸 𑀪𑀯𑁂𑀬𑁆𑀬𑀼𑀁, 𑀅𑀦𑀼𑀲𑀸𑀲𑀦𑁂𑀦 [𑀅𑀦𑀼𑀲𑀸𑀲𑀓𑁂𑀦 (𑀲𑀻. 𑀧𑀻.)] 𑀓𑀭𑀡𑀻𑀬𑀁 𑀦 𑀪𑀯𑁂𑀬𑁆𑀬. 𑀬𑀲𑁆𑀫𑀸 𑀘 𑀔𑁄, 𑀫𑀳𑀸𑀭𑀸𑀚, 𑀲𑀯𑀦𑁂𑀦 𑀓𑀭𑀡𑀻𑀬𑀁 𑀳𑁄𑀢𑀺, 𑀣𑁂𑀭𑁄, 𑀫𑀳𑀸𑀭𑀸𑀚, 𑀲𑀸𑀭𑀺𑀧𑀼𑀢𑁆𑀢𑁄 𑀅𑀧𑀭𑀺𑀫𑀺𑀢𑀫𑀲𑀗𑁆𑀔𑁂𑀬𑁆𑀬𑀓𑀧𑁆𑀧𑀁 𑀉𑀧𑀸𑀤𑀸𑀬 𑀉𑀧𑀘𑀺𑀢𑀓𑀼𑀲𑀮𑀫𑀽𑀮𑁄 𑀧𑀜𑁆𑀜𑀸𑀬 𑀓𑁄𑀝𑀺𑀁 𑀕𑀢𑁄, 𑀲𑁄𑀧𑀺 𑀯𑀺𑀦𑀸 𑀲𑀯𑀦𑁂𑀦 𑀦𑀸𑀲𑀓𑁆𑀔𑀺 𑀆𑀲𑀯𑀓𑁆𑀔𑀬𑀁 𑀧𑀸𑀧𑀼𑀡𑀺𑀢𑀼𑀁. 𑀢𑀲𑁆𑀫𑀸, 𑀫𑀳𑀸𑀭𑀸𑀚, 𑀩𑀳𑀼𑀓𑀸𑀭𑀁 𑀲𑀯𑀦𑀁, 𑀢𑀣𑀸 𑀉𑀤𑁆𑀤𑁂𑀲𑁄𑀧𑀺 𑀧𑀭𑀺𑀧𑀼𑀘𑁆𑀙𑀸𑀧𑀺. 𑀢𑀲𑁆𑀫𑀸 𑀉𑀤𑁆𑀤𑁂𑀲𑀧𑀭𑀺𑀧𑀼𑀘𑁆𑀙𑀸𑀧𑀺 𑀦𑀺𑀧𑁆𑀧𑀧𑀜𑁆𑀘𑀸 𑀲𑀗𑁆𑀔𑀢𑀸’’𑀢𑀺. ‘‘𑀲𑀼𑀦𑀺𑀚𑁆𑀛𑀸𑀧𑀺𑀢𑁄, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀧𑀜𑁆𑀳𑁄, 𑀏𑀯𑀫𑁂𑀢𑀁 𑀢𑀣𑀸 𑀲𑀫𑁆𑀧𑀝𑀺𑀘𑁆𑀙𑀸𑀫𑀻’’𑀢𑀺.

𑀦𑀺𑀧𑁆𑀧𑀧𑀜𑁆𑀘𑀧𑀜𑁆𑀳𑁄 𑀧𑀞𑀫𑁄.

𑁨. 𑀔𑀻𑀡𑀸𑀲𑀯𑀪𑀸𑀯𑀧𑀜𑁆𑀳𑁄

𑁨. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀢𑀼𑀫𑁆𑀳𑁂 𑀪𑀡𑀣 ‘𑀬𑁄 𑀕𑀺𑀳𑀻 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄, 𑀤𑁆𑀯𑁂 𑀯𑀸𑀲𑁆𑀲 𑀕𑀢𑀺𑀬𑁄 𑀪𑀯𑀦𑁆𑀢𑀺 𑀅𑀦𑀜𑁆𑀜𑀸, 𑀢𑀲𑁆𑀫𑀺𑀁 𑀬𑁂𑀯 𑀤𑀺𑀯𑀲𑁂 𑀧𑀩𑁆𑀩𑀚𑀢𑀺 𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀺 𑀯𑀸. 𑀦 𑀲𑁄 𑀤𑀺𑀯𑀲𑁄 𑀲𑀓𑁆𑀓𑀸 𑀅𑀢𑀺𑀓𑁆𑀓𑀫𑁂𑀢𑀼’𑀦𑁆𑀢𑀺. 𑀲𑀘𑁂 𑀲𑁄, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀢𑀲𑁆𑀫𑀺𑀁 𑀤𑀺𑀯𑀲𑁂 𑀆𑀘𑀭𑀺𑀬𑀁 𑀯𑀸 𑀉𑀧𑀚𑁆𑀛𑀸𑀬𑀁 𑀯𑀸 𑀧𑀢𑁆𑀢𑀘𑀻𑀯𑀭𑀁 𑀯𑀸 𑀦 𑀮𑀪𑁂𑀣, 𑀅𑀧𑀺 𑀦𑀼 𑀔𑁄 𑀲𑁄 𑀅𑀭𑀳𑀸 𑀲𑀬𑀁 𑀯𑀸 𑀧𑀩𑁆𑀩𑀚𑁂𑀬𑁆𑀬 𑀤𑀺𑀯𑀲𑀁 𑀯𑀸 𑀅𑀢𑀺𑀓𑁆𑀓𑀫𑁂𑀬𑁆𑀬, 𑀅𑀜𑁆𑀜𑁄 𑀓𑁄𑀘𑀺 𑀅𑀭𑀳𑀸 𑀇𑀤𑁆𑀥𑀺𑀫𑀸 𑀆𑀕𑀦𑁆𑀢𑁆𑀯𑀸 𑀢𑀁 𑀧𑀩𑁆𑀩𑀸𑀚𑁂𑀬𑁆𑀬 𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑁂𑀬𑁆𑀬 𑀯𑀸’’𑀢𑀺? ‘‘𑀦 𑀲𑁄, 𑀫𑀳𑀸𑀭𑀸𑀚, 𑀅𑀭𑀳𑀸 𑀲𑀬𑀁 𑀧𑀩𑁆𑀩𑀚𑁂𑀬𑁆𑀬, 𑀲𑀬𑀁 𑀧𑀩𑁆𑀩𑀚𑀦𑁆𑀢𑁄 𑀣𑁂𑀬𑁆𑀬𑀁 𑀆𑀧𑀚𑁆𑀚𑀢𑀺, 𑀦 𑀘 𑀤𑀺𑀯𑀲𑀁 𑀅𑀢𑀺𑀓𑁆𑀓𑀫𑁂𑀬𑁆𑀬, 𑀅𑀜𑁆𑀜𑀲𑁆𑀲 𑀅𑀭𑀳𑀦𑁆𑀢𑀲𑁆𑀲 𑀆𑀕𑀫𑀦𑀁 𑀪𑀯𑁂𑀬𑁆𑀬 𑀯𑀸 𑀦 𑀯𑀸 𑀪𑀯𑁂𑀬𑁆𑀬, 𑀢𑀲𑁆𑀫𑀺𑀁 𑀬𑁂𑀯 𑀤𑀺𑀯𑀲𑁂 𑀧𑀭𑀺𑀦𑀺𑀩𑁆𑀩𑀸𑀬𑁂𑀬𑁆𑀬𑀸’’𑀢𑀺. ‘‘𑀢𑁂𑀦 𑀳𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀅𑀭𑀳𑀢𑁆𑀢𑀲𑁆𑀲 𑀲𑀦𑁆𑀢𑀪𑀸𑀯𑁄 𑀯𑀺𑀚𑀳𑀺𑀢𑁄 𑀳𑁄𑀢𑀺, 𑀬𑁂𑀦 𑀅𑀥𑀺𑀕𑀢𑀲𑁆𑀲 𑀚𑀻𑀯𑀺𑀢𑀳𑀸𑀭𑁄 𑀪𑀯𑀢𑀻’’𑀢𑀺.

‘‘𑀯𑀺𑀲𑀫𑀁, 𑀫𑀳𑀸𑀭𑀸𑀚, 𑀕𑀺𑀳𑀺𑀮𑀺𑀗𑁆𑀕𑀁, 𑀯𑀺𑀲𑀫𑁂 𑀮𑀺𑀗𑁆𑀕𑁂 𑀮𑀺𑀗𑁆𑀕𑀤𑀼𑀩𑁆𑀩𑀮𑀢𑀸𑀬 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄 𑀕𑀺𑀳𑀻 𑀢𑀲𑁆𑀫𑀺𑀁 𑀬𑁂𑀯 𑀤𑀺𑀯𑀲𑁂 𑀧𑀩𑁆𑀩𑀚𑀢𑀺 𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀺 𑀯𑀸. 𑀦𑁂𑀲𑁄, 𑀫𑀳𑀸𑀭𑀸𑀚, 𑀤𑁄𑀲𑁄 𑀅𑀭𑀳𑀢𑁆𑀢𑀲𑁆𑀲, 𑀕𑀺𑀳𑀺𑀮𑀺𑀗𑁆𑀕𑀲𑁆𑀲𑁂𑀯𑁂𑀲𑁄 𑀤𑁄𑀲𑁄 𑀬𑀤𑀺𑀤𑀁 𑀮𑀺𑀗𑁆𑀕𑀤𑀼𑀩𑁆𑀩𑀮𑀢𑀸.

‘‘𑀬𑀣𑀸, 𑀫𑀳𑀸𑀭𑀸𑀚, 𑀪𑁄𑀚𑀦𑀁 𑀲𑀩𑁆𑀩𑀲𑀢𑁆𑀢𑀸𑀦𑀁 𑀆𑀬𑀼𑀧𑀸𑀮𑀓𑀁 𑀚𑀻𑀯𑀺𑀢𑀭𑀓𑁆𑀔𑀓𑀁 𑀯𑀺𑀲𑀫𑀓𑁄𑀝𑁆𑀞𑀲𑁆𑀲 𑀫𑀦𑁆𑀤𑀤𑀼𑀩𑁆𑀩𑀮𑀕𑀳𑀡𑀺𑀓𑀲𑁆𑀲 𑀅𑀯𑀺𑀧𑀸𑀓𑁂𑀦 𑀚𑀻𑀯𑀺𑀢𑀁 𑀳𑀭𑀢𑀺. 𑀦𑁂𑀲𑁄, 𑀫𑀳𑀸𑀭𑀸𑀚, 𑀤𑁄𑀲𑁄 𑀪𑁄𑀚𑀦𑀲𑁆𑀲, 𑀓𑁄𑀝𑁆𑀞𑀲𑁆𑀲𑁂𑀯𑁂𑀲𑁄 𑀤𑁄𑀲𑁄 𑀬𑀤𑀺𑀤𑀁 𑀅𑀕𑁆𑀕𑀺𑀤𑀼𑀩𑁆𑀩𑀮𑀢𑀸. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀯𑀺𑀲𑀫𑁂 𑀮𑀺𑀗𑁆𑀕𑁂 𑀮𑀺𑀗𑁆𑀕𑀤𑀼𑀩𑁆𑀩𑀮𑀢𑀸𑀬 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄 𑀕𑀺𑀳𑀻 𑀢𑀲𑁆𑀫𑀺𑀁 𑀬𑁂𑀯 𑀤𑀺𑀯𑀲𑁂 𑀧𑀩𑁆𑀩𑀚𑀢𑀺 𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀺 𑀯𑀸. 𑀦𑁂𑀲𑁄, 𑀫𑀳𑀸𑀭𑀸𑀚, 𑀤𑁄𑀲𑁄 𑀅𑀭𑀳𑀢𑁆𑀢𑀲𑁆𑀲, 𑀕𑀺𑀳𑀺𑀮𑀺𑀗𑁆𑀕𑀲𑁆𑀲𑁂𑀯𑁂𑀲𑁄 𑀤𑁄𑀲𑁄 𑀬𑀤𑀺𑀤𑀁 𑀮𑀺𑀗𑁆𑀕𑀤𑀼𑀩𑁆𑀩𑀮𑀢𑀸.

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀧𑀭𑀺𑀢𑁆𑀢𑀁 𑀢𑀺𑀡𑀲𑀮𑀸𑀓𑀁 𑀉𑀧𑀭𑀺 𑀕𑀭𑀼𑀓𑁂 𑀧𑀸𑀲𑀸𑀡𑁂 𑀞𑀧𑀺𑀢𑁂 𑀤𑀼𑀩𑁆𑀩𑀮𑀢𑀸𑀬 𑀪𑀺𑀚𑁆𑀚𑀺𑀢𑁆𑀯𑀸 𑀧𑀢𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄 𑀕𑀺𑀳𑀻 𑀢𑁂𑀦 𑀮𑀺𑀗𑁆𑀕𑁂𑀦 𑀅𑀭𑀳𑀢𑁆𑀢𑀁 𑀥𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀢𑀲𑁆𑀫𑀺𑀁 𑀬𑁂𑀯 𑀤𑀺𑀯𑀲𑁂 𑀧𑀩𑁆𑀩𑀚𑀢𑀺 𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀺 𑀯𑀸.

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀅𑀩𑀮𑁄 𑀤𑀼𑀩𑁆𑀩𑀮𑁄 𑀦𑀺𑀳𑀻𑀦𑀚𑀘𑁆𑀘𑁄 𑀧𑀭𑀺𑀢𑁆𑀢𑀧𑀼𑀜𑁆𑀜𑁄 𑀫𑀳𑀢𑀺𑀫𑀳𑀸𑀭𑀚𑁆𑀚𑀁 𑀮𑀪𑀺𑀢𑁆𑀯𑀸 𑀔𑀡𑁂𑀦 𑀧𑀭𑀺𑀧𑀢𑀢𑀺 𑀧𑀭𑀺𑀥𑀁𑀲𑀢𑀺 𑀑𑀲𑀓𑁆𑀓𑀢𑀺, 𑀦 𑀲𑀓𑁆𑀓𑁄𑀢𑀺 𑀇𑀲𑁆𑀲𑀭𑀺𑀬𑀁 𑀥𑀸𑀭𑁂𑀢𑀼𑀁, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄 𑀕𑀺𑀳𑀻 𑀢𑁂𑀦 𑀮𑀺𑀗𑁆𑀕𑁂𑀦 𑀅𑀭𑀳𑀢𑁆𑀢𑀁 𑀥𑀸𑀭𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀢𑁂𑀦 𑀓𑀸𑀭𑀡𑁂𑀦 𑀢𑀲𑁆𑀫𑀺𑀁 𑀬𑁂𑀯 𑀤𑀺𑀯𑀲𑁂 𑀧𑀩𑁆𑀩𑀚𑀢𑀺 𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀺 𑀯𑀸’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀏𑀯𑀫𑁂𑀢𑀁 𑀢𑀣𑀸 𑀲𑀫𑁆𑀧𑀝𑀺𑀘𑁆𑀙𑀸𑀫𑀻’’𑀢𑀺.

𑀔𑀻𑀡𑀸𑀲𑀯𑀪𑀸𑀯𑀧𑀜𑁆𑀳𑁄 𑀤𑀼𑀢𑀺𑀬𑁄.

𑁩. 𑀔𑀻𑀡𑀸𑀲𑀯𑀲𑀢𑀺𑀲𑀫𑁆𑀫𑁄𑀲𑀧𑀜𑁆𑀳𑁄

𑁩. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀅𑀢𑁆𑀣𑀺 𑀅𑀭𑀳𑀢𑁄 𑀲𑀢𑀺𑀲𑀫𑁆𑀫𑁄𑀲𑁄’’𑀢𑀺? ‘‘𑀯𑀺𑀕𑀢𑀲𑀢𑀺𑀲𑀫𑁆𑀫𑁄𑀲𑀸 𑀔𑁄, 𑀫𑀳𑀸𑀭𑀸𑀚, 𑀅𑀭𑀳𑀦𑁆𑀢𑁄, 𑀦𑀢𑁆𑀣𑀺 𑀅𑀭𑀳𑀦𑁆𑀢𑀸𑀦𑀁 𑀲𑀢𑀺𑀲𑀫𑁆𑀫𑁄𑀲𑁄’’𑀢𑀺. ‘‘𑀆𑀧𑀚𑁆𑀚𑁂𑀬𑁆𑀬 𑀧𑀦, 𑀪𑀦𑁆𑀢𑁂, 𑀅𑀭𑀳𑀸 𑀆𑀧𑀢𑁆𑀢𑀺’’𑀦𑁆𑀢𑀺? ‘‘𑀆𑀫, 𑀫𑀳𑀸𑀭𑀸𑀚𑀸’’𑀢𑀺. ‘‘𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺’’𑀦𑁆𑀢𑀺? ‘‘𑀓𑀼𑀝𑀺𑀓𑀸𑀭𑁂, 𑀫𑀳𑀸𑀭𑀸𑀚, 𑀲𑀜𑁆𑀘𑀭𑀺𑀢𑁆𑀢𑁂, 𑀯𑀺𑀓𑀸𑀮𑁂 𑀓𑀸𑀮𑀲𑀜𑁆𑀜𑀸𑀬, 𑀧𑀯𑀸𑀭𑀺𑀢𑁂 𑀅𑀧𑁆𑀧𑀯𑀸𑀭𑀺𑀢𑀲𑀜𑁆𑀜𑀸𑀬, 𑀅𑀦𑀢𑀺𑀭𑀺𑀢𑁆𑀢𑁂 𑀅𑀢𑀺𑀭𑀺𑀢𑁆𑀢𑀲𑀜𑁆𑀜𑀸𑀬𑀸’’𑀢𑀺.

‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀢𑀼𑀫𑁆𑀳𑁂 𑀪𑀡𑀣 ‘𑀬𑁂 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀦𑁆𑀢𑀺, 𑀢𑁂 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀆𑀧𑀚𑁆𑀚𑀦𑁆𑀢𑀺 𑀅𑀦𑀸𑀤𑀭𑀺𑀬𑁂𑀦 𑀯𑀸 𑀅𑀚𑀸𑀦𑀦𑁂𑀦 𑀯𑀸’𑀢𑀺. 𑀅𑀧𑀺 𑀦𑀼 𑀔𑁄, 𑀪𑀦𑁆𑀢𑁂, 𑀅𑀭𑀳𑀢𑁄 𑀅𑀦𑀸𑀤𑀭𑀺𑀬𑀁 𑀳𑁄𑀢𑀺, 𑀬𑀁 𑀅𑀭𑀳𑀸 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀻’’𑀢𑀺? ‘‘𑀦 𑀳𑀺, 𑀫𑀳𑀸𑀭𑀸𑀚𑀸’’𑀢𑀺.

‘‘𑀬𑀤𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀅𑀭𑀳𑀸 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀦𑀢𑁆𑀣𑀺 𑀘 𑀅𑀭𑀳𑀢𑁄 𑀅𑀦𑀸𑀤𑀭𑀺𑀬𑀁, 𑀢𑁂𑀦 𑀳𑀺 𑀅𑀢𑁆𑀣𑀺 𑀅𑀭𑀳𑀢𑁄 𑀲𑀢𑀺𑀲𑀫𑁆𑀫𑁄𑀲𑁄’’𑀢𑀺? ‘‘𑀦𑀢𑁆𑀣𑀺, 𑀫𑀳𑀸𑀭𑀸𑀚, 𑀅𑀭𑀳𑀢𑁄 𑀲𑀢𑀺𑀲𑀫𑁆𑀫𑁄𑀲𑁄, 𑀆𑀧𑀢𑁆𑀢𑀺𑀜𑁆𑀘 𑀅𑀭𑀳𑀸 𑀆𑀧𑀚𑁆𑀚𑀢𑀻’’𑀢𑀺.

‘‘𑀢𑁂𑀦 𑀳𑀺, 𑀪𑀦𑁆𑀢𑁂, 𑀓𑀸𑀭𑀡𑁂𑀦 𑀫𑀁 𑀲𑀜𑁆𑀜𑀸𑀧𑁂𑀳𑀺, 𑀓𑀺𑀁 𑀢𑀢𑁆𑀣 𑀓𑀸𑀭𑀡’’𑀦𑁆𑀢𑀺? ‘‘𑀤𑁆𑀯𑁂𑀫𑁂, 𑀫𑀳𑀸𑀭𑀸𑀚, 𑀓𑀺𑀮𑁂𑀲𑀸 𑀮𑁄𑀓𑀯𑀚𑁆𑀚𑀁 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀜𑁆𑀘𑀸𑀢𑀺. 𑀓𑀢𑀫𑀁, 𑀫𑀳𑀸𑀭𑀸𑀚, 𑀮𑁄𑀓𑀯𑀚𑁆𑀚𑀁? 𑀤𑀲 𑀅𑀓𑀼𑀲𑀮𑀓𑀫𑁆𑀫𑀧𑀣𑀸, 𑀇𑀤𑀁 𑀯𑀼𑀘𑁆𑀘𑀢𑀺 𑀮𑁄𑀓𑀯𑀚𑁆𑀚𑀁. 𑀓𑀢𑀫𑀁 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁? 𑀬𑀁 𑀮𑁄𑀓𑁂 𑀅𑀢𑁆𑀣𑀺 𑀲𑀫𑀡𑀸𑀦𑀁 𑀅𑀦𑀦𑀼𑀘𑁆𑀙𑀯𑀺𑀓𑀁 𑀅𑀦𑀦𑀼𑀮𑁄𑀫𑀺𑀓𑀁, 𑀕𑀺𑀳𑀻𑀦𑀁 𑀅𑀦𑀯𑀚𑁆𑀚𑀁. 𑀢𑀢𑁆𑀣 𑀪𑀕𑀯𑀸 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀢𑀺 ‘𑀬𑀸𑀯𑀚𑀻𑀯𑀁 𑀅𑀦𑀢𑀺𑀓𑁆𑀓𑀫𑀦𑀻𑀬’𑀦𑁆𑀢𑀺. 𑀯𑀺𑀓𑀸𑀮𑀪𑁄𑀚𑀦𑀁, 𑀫𑀳𑀸𑀭𑀸𑀚, 𑀮𑁄𑀓𑀲𑁆𑀲 𑀅𑀦𑀯𑀚𑁆𑀚𑀁, 𑀢𑀁 𑀚𑀺𑀦𑀲𑀸𑀲𑀦𑁂 𑀯𑀚𑁆𑀚𑀁. 𑀪𑀽𑀢𑀕𑀸𑀫𑀯𑀺𑀓𑁄𑀧𑀦𑀁, 𑀫𑀳𑀸𑀭𑀸𑀚, 𑀮𑁄𑀓𑀲𑁆𑀲 𑀅𑀦𑀯𑀚𑁆𑀚𑀁, 𑀢𑀁 𑀚𑀺𑀦𑀲𑀸𑀲𑀦𑁂 𑀯𑀚𑁆𑀚𑀁. 𑀉𑀤𑀓𑁂 𑀳𑀲𑁆𑀲𑀥𑀫𑁆𑀫𑀁, 𑀫𑀳𑀸𑀭𑀸𑀚, 𑀮𑁄𑀓𑀲𑁆𑀲 𑀅𑀦𑀯𑀚𑁆𑀚𑀁, 𑀢𑀁 𑀚𑀺𑀦𑀲𑀸𑀲𑀦𑁂 𑀯𑀚𑁆𑀚𑀁. 𑀇𑀢𑀺 𑀏𑀯𑀭𑀽𑀧𑀸𑀦𑀺 𑀏𑀯𑀭𑀽𑀧𑀸𑀦𑀺, 𑀫𑀳𑀸𑀭𑀸𑀚, 𑀚𑀺𑀦𑀲𑀸𑀲𑀦𑁂 𑀯𑀚𑁆𑀚𑀸𑀦𑀺, 𑀇𑀤𑀁 𑀯𑀼𑀘𑁆𑀘𑀢𑀺 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁.

‘‘𑀮𑁄𑀓𑀯𑀚𑁆𑀚𑀁 𑀅𑀪𑀩𑁆𑀩𑁄 𑀔𑀻𑀡𑀸𑀲𑀯𑁄 𑀢𑀁 𑀅𑀚𑁆𑀛𑀸𑀘𑀭𑀺𑀢𑀼𑀁, 𑀬𑀁 𑀓𑀺𑀮𑁂𑀲𑀁 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀢𑀁 𑀅𑀚𑀸𑀦𑀦𑁆𑀢𑁄 𑀆𑀧𑀚𑁆𑀚𑁂𑀬𑁆𑀬. 𑀅𑀯𑀺𑀲𑀬𑁄, 𑀫𑀳𑀸𑀭𑀸𑀚, 𑀏𑀓𑀘𑁆𑀘𑀲𑁆𑀲 𑀅𑀭𑀳𑀢𑁄 𑀲𑀩𑁆𑀩𑀁 𑀚𑀸𑀦𑀺𑀢𑀼𑀁, 𑀦 𑀳𑀺 𑀢𑀲𑁆𑀲 𑀩𑀮𑀁 𑀅𑀢𑁆𑀣𑀺 𑀲𑀩𑁆𑀩𑀁 𑀚𑀸𑀦𑀺𑀢𑀼𑀁. 𑀅𑀦𑀜𑁆𑀜𑀸𑀢𑀁, 𑀫𑀳𑀸𑀭𑀸𑀚, 𑀅𑀭𑀳𑀢𑁄 𑀇𑀢𑁆𑀣𑀺𑀧𑀼𑀭𑀺𑀲𑀸𑀦𑀁 𑀦𑀸𑀫𑀫𑁆𑀧𑀺 𑀕𑁄𑀢𑁆𑀢𑀫𑁆𑀧𑀺, 𑀫𑀕𑁆𑀕𑁄𑀧𑀺 𑀢𑀲𑁆𑀲 𑀫𑀳𑀺𑀬𑀸 𑀅𑀦𑀜𑁆𑀜𑀸𑀢𑁄; 𑀯𑀺𑀫𑀼𑀢𑁆𑀢𑀺𑀁 𑀬𑁂𑀯, 𑀫𑀳𑀸𑀭𑀸𑀚, 𑀏𑀓𑀘𑁆𑀘𑁄 𑀅𑀭𑀳𑀸 𑀚𑀸𑀦𑁂𑀬𑁆𑀬; 𑀙𑀴𑀪𑀺𑀜𑁆𑀜𑁄 𑀅𑀭𑀳𑀸 𑀲𑀓𑀯𑀺𑀲𑀬𑀁 𑀚𑀸𑀦𑁂𑀬𑁆𑀬; 𑀲𑀩𑁆𑀩𑀜𑁆𑀜𑀽, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑁄𑀯 𑀲𑀩𑁆𑀩𑀁 𑀚𑀸𑀦𑀸𑀢𑀻’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀏𑀯𑀫𑁂𑀢𑀁 𑀢𑀣𑀸 𑀲𑀫𑁆𑀧𑀝𑀺𑀘𑁆𑀙𑀸𑀫𑀻’’𑀢𑀺.

𑀔𑀻𑀡𑀸𑀲𑀯𑀲𑀢𑀺𑀲𑀫𑁆𑀫𑁄𑀲𑀧𑀜𑁆𑀳𑁄 𑀢𑀢𑀺𑀬𑁄.

𑁪. 𑀮𑁄𑀓𑁂 𑀦𑀢𑁆𑀣𑀺𑀪𑀸𑀯𑀧𑀜𑁆𑀳𑁄

𑁪. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀤𑀺𑀲𑁆𑀲𑀦𑁆𑀢𑀺 𑀮𑁄𑀓𑁂 𑀩𑀼𑀤𑁆𑀥𑀸, 𑀤𑀺𑀲𑁆𑀲𑀦𑁆𑀢𑀺 𑀧𑀘𑁆𑀘𑁂𑀓𑀩𑀼𑀤𑁆𑀥𑀸, 𑀤𑀺𑀲𑁆𑀲𑀦𑁆𑀢𑀺 𑀢𑀣𑀸𑀕𑀢𑀲𑁆𑀲 𑀲𑀸𑀯𑀓𑀸, 𑀤𑀺𑀲𑁆𑀲𑀦𑁆𑀢𑀺 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀸𑀦𑁄, 𑀤𑀺𑀲𑁆𑀲𑀦𑁆𑀢𑀺 𑀧𑀤𑁂𑀲𑀭𑀸𑀚𑀸𑀦𑁄, 𑀤𑀺𑀲𑁆𑀲𑀦𑁆𑀢𑀺 𑀤𑁂𑀯𑀫𑀦𑀼𑀲𑁆𑀲𑀸, 𑀤𑀺𑀲𑁆𑀲𑀦𑁆𑀢𑀺 𑀲𑀥𑀦𑀸, 𑀤𑀺𑀲𑁆𑀲𑀦𑁆𑀢𑀺 𑀅𑀥𑀦𑀸, 𑀤𑀺𑀲𑁆𑀲𑀦𑁆𑀢𑀺 𑀲𑀼𑀕𑀢𑀸, 𑀤𑀺𑀲𑁆𑀲𑀦𑁆𑀢𑀺 𑀤𑀼𑀕𑁆𑀕𑀢𑀸, 𑀤𑀺𑀲𑁆𑀲𑀢𑀺 𑀧𑀼𑀭𑀺𑀲𑀲𑁆𑀲 𑀇𑀢𑁆𑀣𑀺𑀮𑀺𑀗𑁆𑀕𑀁 𑀧𑀸𑀢𑀼𑀪𑀽𑀢𑀁, 𑀤𑀺𑀲𑁆𑀲𑀢𑀺 𑀇𑀢𑁆𑀣𑀺𑀬𑀸 𑀧𑀼𑀭𑀺𑀲𑀮𑀺𑀗𑁆𑀕𑀁 𑀧𑀸𑀢𑀼𑀪𑀽𑀢𑀁, 𑀤𑀺𑀲𑁆𑀲𑀢𑀺 𑀲𑀼𑀓𑀢𑀁 𑀤𑀼𑀓𑁆𑀓𑀢𑀁 𑀓𑀫𑁆𑀫𑀁, 𑀤𑀺𑀲𑁆𑀲𑀦𑁆𑀢𑀺 𑀓𑀮𑁆𑀬𑀸𑀡𑀧𑀸𑀧𑀓𑀸𑀦𑀁 𑀓𑀫𑁆𑀫𑀸𑀦𑀁 𑀯𑀺𑀧𑀸𑀓𑀽𑀧𑀪𑁄𑀕𑀺𑀦𑁄 𑀲𑀢𑁆𑀢𑀸, 𑀅𑀢𑁆𑀣𑀺 𑀮𑁄𑀓𑁂 𑀲𑀢𑁆𑀢𑀸 𑀅𑀡𑁆𑀟𑀚𑀸 𑀚𑀮𑀸𑀩𑀼𑀚𑀸 𑀲𑀁𑀲𑁂𑀤𑀚𑀸 𑀑𑀧𑀧𑀸𑀢𑀺𑀓𑀸, 𑀅𑀢𑁆𑀣𑀺 𑀲𑀢𑁆𑀢𑀸 𑀅𑀧𑀤𑀸 𑀤𑁆𑀯𑀺𑀧𑀤𑀸 𑀘𑀢𑀼𑀧𑁆𑀧𑀤𑀸 𑀩𑀳𑀼𑀧𑁆𑀧𑀤𑀸, 𑀅𑀢𑁆𑀣𑀺 𑀮𑁄𑀓𑁂 𑀬𑀓𑁆𑀔𑀸 𑀭𑀓𑁆𑀔𑀲𑀸 𑀓𑀼𑀫𑁆𑀪𑀡𑁆𑀟𑀸 𑀅𑀲𑀼𑀭𑀸 𑀤𑀸𑀦𑀯𑀸 𑀕𑀦𑁆𑀥𑀩𑁆𑀩𑀸 𑀧𑁂𑀢𑀸 𑀧𑀺𑀲𑀸𑀘𑀸, 𑀅𑀢𑁆𑀣𑀺 𑀓𑀺𑀦𑁆𑀦𑀭𑀸 𑀫𑀳𑁄𑀭𑀕𑀸 𑀦𑀸𑀕𑀸 𑀲𑀼𑀧𑀡𑁆𑀡𑀸 𑀲𑀺𑀤𑁆𑀥𑀸 𑀯𑀺𑀚𑁆𑀚𑀸𑀥𑀭𑀸, 𑀅𑀢𑁆𑀣𑀺 𑀳𑀢𑁆𑀣𑀻 𑀅𑀲𑁆𑀲𑀸 𑀕𑀸𑀯𑁄 𑀫𑀳𑀺𑀁𑀲𑀸 [𑀫𑀳𑀺𑀲𑀸 (𑀲𑀻. 𑀧𑀻.)] 𑀑𑀝𑁆𑀞𑀸 𑀕𑀤𑁆𑀭𑀪𑀸 𑀅𑀚𑀸 𑀏𑀴𑀓𑀸 𑀫𑀺𑀕𑀸 𑀲𑀽𑀓𑀭𑀸 𑀲𑀻𑀳𑀸 𑀩𑁆𑀬𑀕𑁆𑀖𑀸 𑀤𑀻𑀧𑀻 𑀅𑀘𑁆𑀙𑀸 𑀓𑁄𑀓𑀸 𑀢𑀭𑀘𑁆𑀙𑀸 𑀲𑁄𑀡𑀸 𑀲𑀺𑀗𑁆𑀕𑀸𑀮𑀸, 𑀅𑀢𑁆𑀣𑀺 𑀩𑀳𑀼𑀯𑀺𑀥𑀸 𑀲𑀓𑀼𑀡𑀸, 𑀅𑀢𑁆𑀣𑀺 𑀲𑀼𑀯𑀡𑁆𑀡𑀁 𑀭𑀚𑀢𑀁 𑀫𑀼𑀢𑁆𑀢𑀸 𑀫𑀡𑀺 𑀲𑀗𑁆𑀔𑁄 𑀲𑀺𑀮𑀸 𑀧𑀯𑀸𑀴𑀁 𑀮𑁄𑀳𑀺𑀢𑀗𑁆𑀓𑁄 𑀫𑀲𑀸𑀭𑀕𑀮𑁆𑀮𑀁 𑀯𑁂𑀴𑀼𑀭𑀺𑀬𑁄 𑀯𑀚𑀺𑀭𑀁 𑀨𑀮𑀺𑀓𑀁 𑀓𑀸𑀴𑀮𑁄𑀳𑀁 𑀢𑀫𑁆𑀩𑀮𑁄𑀳𑀁 𑀯𑀝𑁆𑀝𑀮𑁄𑀳𑀁 𑀓𑀁𑀲𑀮𑁄𑀳𑀁, 𑀅𑀢𑁆𑀣𑀺 𑀔𑁄𑀫𑀁 𑀓𑁄𑀲𑁂𑀬𑁆𑀬𑀁 𑀓𑀧𑁆𑀧𑀸𑀲𑀺𑀓𑀁 𑀲𑀸𑀡𑀁 𑀪𑀗𑁆𑀕𑀁 𑀓𑀫𑁆𑀩𑀮𑀁, 𑀅𑀢𑁆𑀣𑀺 𑀲𑀸𑀮𑀺 𑀯𑀻𑀳𑀺 𑀬𑀯𑁄 𑀓𑀗𑁆𑀕𑀼 𑀓𑀼𑀤𑁆𑀭𑀽𑀲𑁄 𑀯𑀭𑀓𑁄 𑀕𑁄𑀥𑀽𑀫𑁄 𑀫𑀼𑀕𑁆𑀕𑁄, 𑀫𑀸𑀲𑁄 𑀢𑀺𑀮𑀁 𑀓𑀼𑀮𑀢𑁆𑀣𑀁, 𑀅𑀢𑁆𑀣𑀺 𑀫𑀽𑀮𑀕𑀦𑁆𑀥𑁄 𑀲𑀸𑀭𑀕𑀦𑁆𑀥𑁄 𑀨𑁂𑀕𑁆𑀕𑀼𑀕𑀦𑁆𑀥𑁄 𑀢𑀘𑀕𑀦𑁆𑀥𑁄 𑀧𑀢𑁆𑀢𑀕𑀦𑁆𑀥𑁄 𑀧𑀼𑀧𑁆𑀨𑀕𑀦𑁆𑀥𑁄 𑀨𑀮𑀕𑀦𑁆𑀥𑁄 𑀲𑀩𑁆𑀩𑀕𑀦𑁆𑀥𑁄, 𑀅𑀢𑁆𑀣𑀺 𑀢𑀺𑀡 𑀮𑀢𑀸 𑀕𑀘𑁆𑀙 𑀭𑀼𑀓𑁆𑀔 𑀑𑀲𑀥𑀺 𑀯𑀦𑀧𑁆𑀧𑀢𑀺 𑀦𑀤𑀻 𑀧𑀩𑁆𑀩𑀢 𑀲𑀫𑀼𑀤𑁆𑀤 𑀫𑀘𑁆𑀙𑀓𑀘𑁆𑀙𑀧𑀸 𑀲𑀩𑁆𑀩𑀁 𑀮𑁄𑀓𑁂 𑀅𑀢𑁆𑀣𑀺. 𑀬𑀁, 𑀪𑀦𑁆𑀢𑁂, 𑀮𑁄𑀓𑁂 𑀦𑀢𑁆𑀣𑀺, 𑀢𑀁 𑀫𑁂 𑀓𑀣𑁂𑀳𑀻’’𑀢𑀺.

‘‘𑀢𑀻𑀡𑀺𑀫𑀸𑀦𑀺, 𑀫𑀳𑀸𑀭𑀸𑀚, 𑀮𑁄𑀓𑁂 𑀦𑀢𑁆𑀣𑀺. 𑀓𑀢𑀫𑀸𑀦𑀺 𑀢𑀻𑀡𑀺? 𑀲𑀘𑁂𑀢𑀦𑀸 𑀯𑀸 𑀅𑀘𑁂𑀢𑀦𑀸 𑀯𑀸 𑀅𑀚𑀭𑀸𑀫𑀭𑀸 𑀮𑁄𑀓𑁂 𑀦𑀢𑁆𑀣𑀺, 𑀲𑀗𑁆𑀔𑀸𑀭𑀸𑀦𑀁 𑀦𑀺𑀘𑁆𑀘𑀢𑀸 𑀦𑀢𑁆𑀣𑀺, 𑀧𑀭𑀫𑀢𑁆𑀣𑁂𑀦 𑀲𑀢𑁆𑀢𑀽𑀧𑀮𑀤𑁆𑀥𑀺 𑀦𑀢𑁆𑀣𑀺, 𑀇𑀫𑀸𑀦𑀺 𑀔𑁄, 𑀫𑀳𑀸𑀭𑀸𑀚, 𑀢𑀻𑀡𑀺 𑀮𑁄𑀓𑁂 𑀦𑀢𑁆𑀣𑀻’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀏𑀯𑀫𑁂𑀢𑀁 𑀢𑀣𑀸 𑀲𑀫𑁆𑀧𑀝𑀺𑀘𑁆𑀙𑀸𑀫𑀻’’𑀢𑀺.

𑀮𑁄𑀓𑁂 𑀦𑀢𑁆𑀣𑀺𑀪𑀸𑀯𑀧𑀜𑁆𑀳𑁄 𑀘𑀢𑀼𑀢𑁆𑀣𑁄.

𑁫. 𑀅𑀓𑀫𑁆𑀫𑀚𑀸𑀤𑀺𑀧𑀜𑁆𑀳𑁄

𑁫. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀤𑀺𑀲𑁆𑀲𑀦𑁆𑀢𑀺 𑀮𑁄𑀓𑁂 𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀸, 𑀤𑀺𑀲𑁆𑀲𑀦𑁆𑀢𑀺 𑀳𑁂𑀢𑀼𑀦𑀺𑀩𑁆𑀩𑀢𑁆𑀢𑀸, 𑀤𑀺𑀲𑁆𑀲𑀦𑁆𑀢𑀺 𑀉𑀢𑀼𑀦𑀺𑀩𑁆𑀩𑀢𑁆𑀢𑀸, 𑀬𑀁 𑀮𑁄𑀓𑁂 𑀅𑀓𑀫𑁆𑀫𑀚𑀁 𑀅𑀳𑁂𑀢𑀼𑀚𑀁 𑀅𑀦𑀼𑀢𑀼𑀚𑀁, 𑀢𑀁 𑀫𑁂 𑀓𑀣𑁂𑀳𑀻’’𑀢𑀺. ‘‘𑀤𑁆𑀯𑁂𑀫𑁂, 𑀫𑀳𑀸𑀭𑀸𑀚, 𑀮𑁄𑀓𑀲𑁆𑀫𑀺𑀁 𑀅𑀓𑀫𑁆𑀫𑀚𑀸 𑀅𑀳𑁂𑀢𑀼𑀚𑀸 𑀅𑀦𑀼𑀢𑀼𑀚𑀸. 𑀓𑀢𑀫𑁂 𑀤𑁆𑀯𑁂? 𑀆𑀓𑀸𑀲𑁄, 𑀫𑀳𑀸𑀭𑀸𑀚, 𑀅𑀓𑀫𑁆𑀫𑀚𑁄 𑀅𑀳𑁂𑀢𑀼𑀚𑁄 𑀅𑀦𑀼𑀢𑀼𑀚𑁄; 𑀦𑀺𑀩𑁆𑀩𑀸𑀦𑀁, 𑀫𑀳𑀸𑀭𑀸𑀚, 𑀅𑀓𑀫𑁆𑀫𑀚𑀁 𑀅𑀳𑁂𑀢𑀼𑀚𑀁 𑀅𑀦𑀼𑀢𑀼𑀚𑀁. 𑀇𑀫𑁂 𑀔𑁄, 𑀫𑀳𑀸𑀭𑀸𑀚, 𑀤𑁆𑀯𑁂 𑀅𑀓𑀫𑁆𑀫𑀚𑀸 𑀅𑀳𑁂𑀢𑀼𑀚𑀸 𑀅𑀦𑀼𑀢𑀼𑀚𑀸’’𑀢𑀺.

‘‘𑀫𑀸, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀚𑀺𑀦𑀯𑀘𑀦𑀁 𑀫𑀓𑁆𑀔𑁂𑀳𑀺, 𑀫𑀸 𑀅𑀚𑀸𑀦𑀺𑀢𑁆𑀯𑀸 𑀧𑀜𑁆𑀳𑀁 𑀩𑁆𑀬𑀸𑀓𑀭𑁄𑀳𑀻’’𑀢𑀺. ‘‘𑀓𑀺𑀁 𑀔𑁄, 𑀫𑀳𑀸𑀭𑀸𑀚, 𑀅𑀳𑀁 𑀯𑀤𑀸𑀫𑀺, 𑀬𑀁 𑀫𑀁 𑀢𑁆𑀯𑀁 𑀏𑀯𑀁 𑀯𑀤𑁂𑀲𑀺 ‘𑀫𑀸, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀚𑀺𑀦𑀯𑀘𑀦𑀁 𑀫𑀓𑁆𑀔𑁂𑀳𑀺, 𑀫𑀸 𑀅𑀚𑀸𑀦𑀺𑀢𑁆𑀯𑀸 𑀧𑀜𑁆𑀳𑀁 𑀩𑁆𑀬𑀸𑀓𑀭𑁄𑀳𑀻’’’𑀢𑀺? ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀬𑀼𑀢𑁆𑀢𑀫𑀺𑀤𑀁 𑀢𑀸𑀯 𑀯𑀢𑁆𑀢𑀼𑀁 ‘𑀆𑀓𑀸𑀲𑁄 𑀅𑀓𑀫𑁆𑀫𑀚𑁄 𑀅𑀳𑁂𑀢𑀼𑀚𑁄 𑀅𑀦𑀼𑀢𑀼𑀚𑁄’𑀢𑀺. 𑀅𑀦𑁂𑀓𑀲𑀢𑁂𑀳𑀺 𑀧𑀦, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀓𑀸𑀭𑀡𑁂𑀳𑀺 𑀪𑀕𑀯𑀢𑀸 𑀲𑀸𑀯𑀓𑀸𑀦𑀁 𑀦𑀺𑀩𑁆𑀩𑀸𑀦𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀫𑀕𑁆𑀕𑁄 𑀅𑀓𑁆𑀔𑀸𑀢𑁄, 𑀅𑀣 𑀘 𑀧𑀦 𑀢𑁆𑀯𑀁 𑀏𑀯𑀁 𑀯𑀤𑁂𑀲𑀺 ‘𑀅𑀳𑁂𑀢𑀼𑀚𑀁 𑀦𑀺𑀩𑁆𑀩𑀸𑀦’’’𑀦𑁆𑀢𑀺. ‘‘𑀲𑀘𑁆𑀘𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑀅𑀦𑁂𑀓𑀲𑀢𑁂𑀳𑀺 𑀓𑀸𑀭𑀡𑁂𑀳𑀺 𑀲𑀸𑀯𑀓𑀸𑀦𑀁 𑀦𑀺𑀩𑁆𑀩𑀸𑀦𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀫𑀕𑁆𑀕𑁄 𑀅𑀓𑁆𑀔𑀸𑀢𑁄, 𑀦 𑀘 𑀧𑀦 𑀦𑀺𑀩𑁆𑀩𑀸𑀦𑀲𑁆𑀲 𑀉𑀧𑁆𑀧𑀸𑀤𑀸𑀬 𑀳𑁂𑀢𑀼 𑀅𑀓𑁆𑀔𑀸𑀢𑁄’’𑀢𑀺.

‘‘𑀏𑀢𑁆𑀣 𑀫𑀬𑀁, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀅𑀦𑁆𑀥𑀓𑀸𑀭𑀢𑁄 𑀅𑀦𑁆𑀥𑀓𑀸𑀭𑀢𑀭𑀁 𑀧𑀯𑀺𑀲𑀸𑀫, 𑀯𑀦𑀢𑁄 𑀯𑀦𑀢𑀭𑀁 𑀧𑀯𑀺𑀲𑀸𑀫, 𑀕𑀳𑀦𑀢𑁄 𑀕𑀳𑀦𑀢𑀭𑀁 [𑀕𑀳𑀦𑀦𑁆𑀢𑀭𑀢𑁄 𑀕𑀳𑀦𑀦𑁆𑀢𑀭𑀁 (𑀓.)] 𑀧𑀯𑀺𑀲𑀸𑀫, 𑀬𑀢𑁆𑀭 𑀳𑀺 𑀦𑀸𑀫 𑀦𑀺𑀩𑁆𑀩𑀸𑀦𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀳𑁂𑀢𑀼 𑀅𑀢𑁆𑀣𑀺, 𑀢𑀲𑁆𑀲 𑀧𑀦 𑀥𑀫𑁆𑀫𑀲𑁆𑀲 𑀉𑀧𑁆𑀧𑀸𑀤𑀸𑀬 𑀳𑁂𑀢𑀼 𑀦𑀢𑁆𑀣𑀺. 𑀬𑀤𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀦𑀺𑀩𑁆𑀩𑀸𑀦𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀳𑁂𑀢𑀼 𑀅𑀢𑁆𑀣𑀺, 𑀢𑁂𑀦 𑀳𑀺 𑀦𑀺𑀩𑁆𑀩𑀸𑀦𑀲𑁆𑀲 𑀉𑀧𑁆𑀧𑀸𑀤𑀸𑀬𑀧𑀺 𑀳𑁂𑀢𑀼 𑀇𑀘𑁆𑀙𑀺𑀢𑀩𑁆𑀩𑁄.

‘‘𑀬𑀣𑀸 𑀧𑀦, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀧𑀼𑀢𑁆𑀢𑀲𑁆𑀲 𑀧𑀺𑀢𑀸 𑀅𑀢𑁆𑀣𑀺, 𑀢𑁂𑀦 𑀓𑀸𑀭𑀡𑁂𑀦 𑀧𑀺𑀢𑀼𑀦𑁄𑀧𑀺 𑀧𑀺𑀢𑀸 𑀇𑀘𑁆𑀙𑀺𑀢𑀩𑁆𑀩𑁄. 𑀬𑀣𑀸 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀆𑀘𑀭𑀺𑀬𑁄 𑀅𑀢𑁆𑀣𑀺, 𑀢𑁂𑀦 𑀓𑀸𑀭𑀡𑁂𑀦 𑀆𑀘𑀭𑀺𑀬𑀲𑁆𑀲𑀧𑀺 𑀆𑀘𑀭𑀺𑀬𑁄 𑀇𑀘𑁆𑀙𑀺𑀢𑀩𑁆𑀩𑁄. 𑀬𑀣𑀸 𑀅𑀗𑁆𑀓𑀼𑀭𑀲𑁆𑀲 𑀩𑀻𑀚𑀁 𑀅𑀢𑁆𑀣𑀺, 𑀢𑁂𑀦 𑀓𑀸𑀭𑀡𑁂𑀦 𑀩𑀻𑀚𑀲𑁆𑀲𑀧𑀺 𑀩𑀻𑀚𑀁 𑀇𑀘𑁆𑀙𑀺𑀢𑀩𑁆𑀩𑀁. 𑀏𑀯𑀫𑁂𑀯 𑀔𑁄, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀬𑀤𑀺 𑀦𑀺𑀩𑁆𑀩𑀸𑀦𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀳𑁂𑀢𑀼 𑀅𑀢𑁆𑀣𑀺, 𑀢𑁂𑀦 𑀓𑀸𑀭𑀡𑁂𑀦 𑀦𑀺𑀩𑁆𑀩𑀸𑀦𑀲𑁆𑀲 𑀉𑀧𑁆𑀧𑀸𑀤𑀸𑀬𑀧𑀺 𑀳𑁂𑀢𑀼 𑀇𑀘𑁆𑀙𑀺𑀢𑀩𑁆𑀩𑁄.

‘‘𑀬𑀣𑀸 𑀭𑀼𑀓𑁆𑀔𑀲𑁆𑀲 𑀯𑀸 𑀮𑀢𑀸𑀬 𑀯𑀸 𑀅𑀕𑁆𑀕𑁂 𑀲𑀢𑀺 𑀢𑁂𑀦 𑀓𑀸𑀭𑀡𑁂𑀦 𑀫𑀚𑁆𑀛𑀫𑁆𑀧𑀺 𑀅𑀢𑁆𑀣𑀺, 𑀫𑀽𑀮𑀫𑁆𑀧𑀺 𑀅𑀢𑁆𑀣𑀺. 𑀏𑀯𑀫𑁂𑀯 𑀔𑁄, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀬𑀤𑀺 𑀦𑀺𑀩𑁆𑀩𑀸𑀦𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀳𑁂𑀢𑀼 𑀅𑀢𑁆𑀣𑀺, 𑀢𑁂𑀦 𑀓𑀸𑀭𑀡𑁂𑀦 𑀦𑀺𑀩𑁆𑀩𑀸𑀦𑀲𑁆𑀲 𑀉𑀧𑁆𑀧𑀸𑀤𑀸𑀬𑀧𑀺 𑀳𑁂𑀢𑀼 𑀇𑀘𑁆𑀙𑀺𑀢𑀩𑁆𑀩𑁄’’’𑀢𑀺.

‘‘𑀅𑀦𑀼𑀧𑁆𑀧𑀸𑀤𑀦𑀻𑀬𑀁, 𑀫𑀳𑀸𑀭𑀸𑀚, 𑀦𑀺𑀩𑁆𑀩𑀸𑀦𑀁, 𑀢𑀲𑁆𑀫𑀸 𑀦 𑀦𑀺𑀩𑁆𑀩𑀸𑀦𑀲𑁆𑀲 𑀉𑀧𑁆𑀧𑀸𑀤𑀸𑀬 𑀳𑁂𑀢𑀼 𑀅𑀓𑁆𑀔𑀸𑀢𑁄’’𑀢𑀺. ‘‘𑀇𑀗𑁆𑀖, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀓𑀸𑀭𑀡𑀁 𑀤𑀲𑁆𑀲𑁂𑀢𑁆𑀯𑀸 𑀓𑀸𑀭𑀡𑁂𑀦 𑀫𑀁 𑀲𑀜𑁆𑀜𑀸𑀧𑁂𑀳𑀺, 𑀬𑀣𑀸𑀳𑀁 𑀚𑀸𑀦𑁂𑀬𑁆𑀬𑀁 𑀦𑀺𑀩𑁆𑀩𑀸𑀦𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀳𑁂𑀢𑀼 𑀅𑀢𑁆𑀣𑀺, 𑀦𑀺𑀩𑁆𑀩𑀸𑀦𑀲𑁆𑀲 𑀉𑀧𑁆𑀧𑀸𑀤𑀸𑀬 𑀳𑁂𑀢𑀼 𑀦𑀢𑁆𑀣𑀻’’𑀢𑀺.

‘‘𑀢𑁂𑀦 𑀳𑀺, 𑀫𑀳𑀸𑀭𑀸𑀚, 𑀲𑀓𑁆𑀓𑀘𑁆𑀘𑀁 𑀲𑁄𑀢𑀁 𑀑𑀤𑀳, 𑀲𑀸𑀥𑀼𑀓𑀁 𑀲𑀼𑀡𑁄𑀳𑀺, 𑀯𑀓𑁆𑀔𑀸𑀫𑀺 𑀢𑀢𑁆𑀣 𑀓𑀸𑀭𑀡𑀁, 𑀲𑀓𑁆𑀓𑀼𑀡𑁂𑀬𑁆𑀬, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀧𑀸𑀓𑀢𑀺𑀓𑁂𑀦 𑀩𑀮𑁂𑀦 𑀇𑀢𑁄 𑀳𑀺𑀫𑀯𑀦𑁆𑀢𑀁 𑀧𑀩𑁆𑀩𑀢𑀭𑀸𑀚𑀁 𑀉𑀧𑀕𑀦𑁆𑀢𑀼’’𑀦𑁆𑀢𑀺? ‘‘𑀆𑀫, 𑀪𑀦𑁆𑀢𑁂’’𑀢𑀺. ‘‘𑀲𑀓𑁆𑀓𑀼𑀡𑁂𑀬𑁆𑀬 𑀧𑀦 𑀲𑁄, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀧𑀸𑀓𑀢𑀺𑀓𑁂𑀦 𑀩𑀮𑁂𑀦 𑀳𑀺𑀫𑀯𑀦𑁆𑀢𑀁 𑀧𑀩𑁆𑀩𑀢𑀭𑀸𑀚𑀁 𑀇𑀥 𑀆𑀳𑀭𑀺𑀢𑀼’’𑀦𑁆𑀢𑀺? ‘‘𑀦 𑀳𑀺, 𑀪𑀦𑁆𑀢𑁂’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀲𑀓𑁆𑀓𑀸 𑀦𑀺𑀩𑁆𑀩𑀸𑀦𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀫𑀕𑁆𑀕𑁄 𑀅𑀓𑁆𑀔𑀸𑀢𑀼𑀁, 𑀦 𑀲𑀓𑁆𑀓𑀸 𑀦𑀺𑀩𑁆𑀩𑀸𑀦𑀲𑁆𑀲 𑀉𑀧𑁆𑀧𑀸𑀤𑀸𑀬 𑀳𑁂𑀢𑀼 𑀤𑀲𑁆𑀲𑁂𑀢𑀼𑀁.

‘‘𑀲𑀓𑁆𑀓𑀼𑀡𑁂𑀬𑁆𑀬, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀧𑀸𑀓𑀢𑀺𑀓𑁂𑀦 𑀩𑀮𑁂𑀦 𑀫𑀳𑀸𑀲𑀫𑀼𑀤𑁆𑀤𑀁 𑀦𑀸𑀯𑀸𑀬 𑀉𑀢𑁆𑀢𑀭𑀺𑀢𑁆𑀯𑀸 𑀧𑀸𑀭𑀺𑀫𑀢𑀻𑀭𑀁 𑀕𑀦𑁆𑀢𑀼’’𑀦𑁆𑀢𑀺? ‘‘𑀆𑀫, 𑀪𑀦𑁆𑀢𑁂’’𑀢𑀺? ‘‘𑀲𑀓𑁆𑀓𑀼𑀡𑁂𑀬𑁆𑀬 𑀧𑀦 𑀲𑁄, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀧𑀸𑀓𑀢𑀺𑀓𑁂𑀦 𑀩𑀮𑁂𑀦 𑀫𑀳𑀸𑀲𑀫𑀼𑀤𑁆𑀤𑀲𑁆𑀲 𑀧𑀸𑀭𑀺𑀫𑀢𑀻𑀭𑀁 𑀇𑀥 𑀆𑀳𑀭𑀺𑀢𑀼’’𑀦𑁆𑀢𑀺? ‘‘𑀦 𑀳𑀺 𑀪𑀦𑁆𑀢𑁂’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀲𑀓𑁆𑀓𑀸 𑀦𑀺𑀩𑁆𑀩𑀸𑀦𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀫𑀕𑁆𑀕𑁄 𑀅𑀓𑁆𑀔𑀸𑀢𑀼𑀁, 𑀦 𑀲𑀓𑁆𑀓𑀸 𑀦𑀺𑀩𑁆𑀩𑀸𑀦𑀲𑁆𑀲 𑀉𑀧𑁆𑀧𑀸𑀤𑀸𑀬 𑀳𑁂𑀢𑀼 𑀤𑀲𑁆𑀲𑁂𑀢𑀼𑀁. 𑀓𑀺𑀁 𑀓𑀸𑀭𑀡𑀸? 𑀅𑀲𑀗𑁆𑀔𑀢𑀢𑁆𑀢𑀸 𑀥𑀫𑁆𑀫𑀲𑁆𑀲𑀸’’𑀢𑀺.

‘‘𑀅𑀲𑀗𑁆𑀔𑀢𑀁, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀦𑀺𑀩𑁆𑀩𑀸𑀦’’𑀦𑁆𑀢𑀺? ‘‘𑀆𑀫, 𑀫𑀳𑀸𑀭𑀸𑀚, 𑀅𑀲𑀗𑁆𑀔𑀢𑀁 𑀦𑀺𑀩𑁆𑀩𑀸𑀦𑀁 𑀦 𑀓𑁂𑀳𑀺𑀘𑀺 𑀓𑀢𑀁, 𑀦𑀺𑀩𑁆𑀩𑀸𑀦𑀁, 𑀫𑀳𑀸𑀭𑀸𑀚, 𑀦 𑀯𑀢𑁆𑀢𑀩𑁆𑀩𑀁 𑀉𑀧𑁆𑀧𑀦𑁆𑀦𑀦𑁆𑀢𑀺 𑀯𑀸 𑀅𑀦𑀼𑀧𑁆𑀧𑀦𑁆𑀦𑀦𑁆𑀢𑀺 𑀯𑀸 𑀉𑀧𑁆𑀧𑀸𑀤𑀦𑀻𑀬𑀦𑁆𑀢𑀺 𑀯𑀸 𑀅𑀢𑀻𑀢𑀦𑁆𑀢𑀺 𑀯𑀸 𑀅𑀦𑀸𑀕𑀢𑀦𑁆𑀢𑀺 𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀦𑁆𑀢𑀺 𑀯𑀸 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀦𑁆𑀢𑀺 𑀯𑀸 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀦𑁆𑀢𑀺 𑀯𑀸 𑀖𑀸𑀦𑀯𑀺𑀜𑁆𑀜𑁂𑀬𑁆𑀬𑀦𑁆𑀢𑀺 𑀯𑀸 𑀚𑀺𑀯𑁆𑀳𑀸𑀯𑀺𑀜𑁆𑀜𑁂𑀬𑁆𑀬𑀦𑁆𑀢𑀺 𑀯𑀸 𑀓𑀸𑀬𑀯𑀺𑀜𑁆𑀜𑁂𑀬𑁆𑀬𑀦𑁆𑀢𑀺 𑀯𑀸’’𑀢𑀺. ‘‘𑀬𑀤𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀦𑀺𑀩𑁆𑀩𑀸𑀦𑀁 𑀦 𑀉𑀧𑁆𑀧𑀦𑁆𑀦𑀁 𑀦 𑀅𑀦𑀼𑀧𑁆𑀧𑀦𑁆𑀦𑀁 𑀦 𑀉𑀧𑁆𑀧𑀸𑀤𑀦𑀻𑀬𑀁 𑀦 𑀅𑀢𑀻𑀢𑀁 𑀦 𑀅𑀦𑀸𑀕𑀢𑀁 𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀦 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀁 𑀦 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀁 𑀦 𑀖𑀸𑀦𑀯𑀺𑀜𑁆𑀜𑁂𑀬𑁆𑀬𑀁 𑀦 𑀚𑀺𑀯𑁆𑀳𑀸𑀯𑀺𑀜𑁆𑀜𑁂𑀬𑁆𑀬𑀁 𑀦 𑀓𑀸𑀬𑀯𑀺𑀜𑁆𑀜𑁂𑀬𑁆𑀬𑀁, 𑀢𑁂𑀦 𑀳𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀢𑀼𑀫𑁆𑀳𑁂 𑀦𑀢𑁆𑀣𑀺𑀥𑀫𑁆𑀫𑀁 𑀦𑀺𑀩𑁆𑀩𑀸𑀦𑀁 𑀅𑀧𑀤𑀺𑀲𑀣 ‘𑀦𑀢𑁆𑀣𑀺 𑀦𑀺𑀩𑁆𑀩𑀸𑀦’𑀦𑁆𑀢𑀺. ‘‘𑀅𑀢𑁆𑀣𑀺, 𑀫𑀳𑀸𑀭𑀸𑀚, 𑀦𑀺𑀩𑁆𑀩𑀸𑀦𑀁, 𑀫𑀦𑁄𑀯𑀺𑀜𑁆𑀜𑁂𑀬𑁆𑀬𑀁 𑀦𑀺𑀩𑁆𑀩𑀸𑀦𑀁, 𑀯𑀺𑀲𑀼𑀤𑁆𑀥𑁂𑀦 𑀫𑀸𑀦𑀲𑁂𑀦 𑀧𑀡𑀻𑀢𑁂𑀦 𑀉𑀚𑀼𑀓𑁂𑀦 𑀅𑀦𑀸𑀯𑀭𑀡𑁂𑀦 𑀦𑀺𑀭𑀸𑀫𑀺𑀲𑁂𑀦 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑁄 𑀅𑀭𑀺𑀬𑀲𑀸𑀯𑀓𑁄 𑀦𑀺𑀩𑁆𑀩𑀸𑀦𑀁 𑀧𑀲𑁆𑀲𑀢𑀻’’𑀢𑀺.

‘‘𑀓𑀻𑀤𑀺𑀲𑀁 𑀧𑀦 𑀢𑀁, 𑀪𑀦𑁆𑀢𑁂, 𑀦𑀺𑀩𑁆𑀩𑀸𑀦𑀁, 𑀬𑀁 𑀢𑀁 𑀑𑀧𑀫𑁆𑀫𑁂𑀳𑀺 𑀆𑀤𑀻𑀧𑀦𑀻𑀬𑀁 𑀓𑀸𑀭𑀡𑁂𑀳𑀺 𑀫𑀁 𑀲𑀜𑁆𑀜𑀸𑀧𑁂𑀳𑀺, 𑀬𑀣𑀸 𑀅𑀢𑁆𑀣𑀺𑀥𑀫𑁆𑀫𑀁 𑀑𑀧𑀫𑁆𑀫𑁂𑀳𑀺 𑀆𑀤𑀻𑀧𑀦𑀻𑀬’’𑀦𑁆𑀢𑀺. ‘‘𑀅𑀢𑁆𑀣𑀺, 𑀫𑀳𑀸𑀭𑀸𑀚, 𑀯𑀸𑀢𑁄 𑀦𑀸𑀫𑀸’’𑀢𑀺? ‘‘𑀆𑀫, 𑀪𑀦𑁆𑀢𑁂’’𑀢𑀺. ‘‘𑀇𑀗𑁆𑀖, 𑀫𑀳𑀸𑀭𑀸𑀚, 𑀯𑀸𑀢𑀁 𑀤𑀲𑁆𑀲𑁂𑀳𑀺 𑀯𑀡𑁆𑀡𑀢𑁄 𑀯𑀸 𑀲𑀡𑁆𑀞𑀸𑀦𑀢𑁄 𑀯𑀸 𑀅𑀡𑀼𑀁 𑀯𑀸 𑀣𑀽𑀮𑀁 𑀯𑀸 𑀤𑀻𑀖𑀁 𑀯𑀸 𑀭𑀲𑁆𑀲𑀁 𑀯𑀸’’𑀢𑀺. ‘‘𑀦 𑀲𑀓𑁆𑀓𑀸, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀯𑀸𑀢𑁄 𑀉𑀧𑀤𑀲𑁆𑀲𑀬𑀺𑀢𑀼𑀁, 𑀦 𑀲𑁄 𑀯𑀸𑀢𑁄 𑀳𑀢𑁆𑀣𑀕𑁆𑀕𑀳𑀡𑀁 𑀯𑀸 𑀦𑀺𑀫𑁆𑀫𑀤𑁆𑀤𑀦𑀁 𑀯𑀸 𑀉𑀧𑁂𑀢𑀺, 𑀅𑀧𑀺 𑀘 𑀅𑀢𑁆𑀣𑀺 𑀲𑁄 𑀯𑀸𑀢𑁄’’𑀢𑀺. ‘‘𑀬𑀤𑀺, 𑀫𑀳𑀸𑀭𑀸𑀚, 𑀦 𑀲𑀓𑁆𑀓𑀸 𑀯𑀸𑀢𑁄 𑀉𑀧𑀤𑀲𑁆𑀲𑀬𑀺𑀢𑀼𑀁, 𑀢𑁂𑀦 𑀳𑀺 𑀦𑀢𑁆𑀣𑀺 𑀯𑀸𑀢𑁄’’𑀢𑀺? ‘‘𑀚𑀸𑀦𑀸𑀫𑀳𑀁, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀯𑀸𑀢𑁄 𑀅𑀢𑁆𑀣𑀻𑀢𑀺 𑀫𑁂 𑀳𑀤𑀬𑁂 𑀅𑀦𑀼𑀧𑀯𑀺𑀝𑁆𑀞𑀁, 𑀦 𑀘𑀸𑀳𑀁 𑀲𑀓𑁆𑀓𑁄𑀫𑀺 𑀯𑀸𑀢𑀁 𑀉𑀧𑀤𑀲𑁆𑀲𑀬𑀺𑀢𑀼’’𑀦𑁆𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀅𑀢𑁆𑀣𑀺 𑀦𑀺𑀩𑁆𑀩𑀸𑀦𑀁, 𑀦 𑀘 𑀲𑀓𑁆𑀓𑀸 𑀦𑀺𑀩𑁆𑀩𑀸𑀦𑀁 𑀉𑀧𑀤𑀲𑁆𑀲𑀬𑀺𑀢𑀼𑀁 𑀯𑀡𑁆𑀡𑁂𑀦 𑀯𑀸 𑀲𑀡𑁆𑀞𑀸𑀦𑁂𑀦 𑀯𑀸’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀲𑀽𑀧𑀤𑀲𑁆𑀲𑀺𑀢𑀁 𑀑𑀧𑀫𑁆𑀫𑀁, 𑀲𑀼𑀦𑀺𑀤𑁆𑀤𑀺𑀝𑁆𑀞𑀁 𑀓𑀸𑀭𑀡𑀁, 𑀏𑀯𑀫𑁂𑀢𑀁 𑀢𑀣𑀸 𑀲𑀫𑁆𑀧𑀝𑀺𑀘𑁆𑀙𑀸𑀫𑀺 ‘𑀅𑀢𑁆𑀣𑀺 𑀦𑀺𑀩𑁆𑀩𑀸𑀦’’’𑀦𑁆𑀢𑀺.

𑀅𑀓𑀫𑁆𑀫𑀚𑀸𑀤𑀺𑀧𑀜𑁆𑀳𑁄 𑀧𑀜𑁆𑀘𑀫𑁄.

𑁬. 𑀓𑀫𑁆𑀫𑀚𑀸𑀤𑀺𑀧𑀜𑁆𑀳𑁄

𑁬. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀓𑀢𑀫𑁂 𑀏𑀢𑁆𑀣 𑀓𑀫𑁆𑀫𑀚𑀸, 𑀓𑀢𑀫𑁂 𑀳𑁂𑀢𑀼𑀚𑀸, 𑀓𑀢𑀫𑁂 𑀉𑀢𑀼𑀚𑀸, 𑀓𑀢𑀫𑁂 𑀦 𑀓𑀫𑁆𑀫𑀚𑀸, 𑀦 𑀳𑁂𑀢𑀼𑀚𑀸, 𑀦 𑀉𑀢𑀼𑀚𑀸’’𑀢𑀺? ‘‘𑀬𑁂 𑀓𑁂𑀘𑀺, 𑀫𑀳𑀸𑀭𑀸𑀚, 𑀲𑀢𑁆𑀢𑀸 𑀲𑀘𑁂𑀢𑀦𑀸, 𑀲𑀩𑁆𑀩𑁂 𑀢𑁂 𑀓𑀫𑁆𑀫𑀚𑀸; 𑀅𑀕𑁆𑀕𑀺 𑀘 𑀲𑀩𑁆𑀩𑀸𑀦𑀺 𑀘 𑀩𑀻𑀚𑀚𑀸𑀢𑀸𑀦𑀺 𑀳𑁂𑀢𑀼𑀚𑀸𑀦𑀺; 𑀧𑀣𑀯𑀻 𑀘 𑀧𑀩𑁆𑀩𑀢𑀸 𑀘 𑀉𑀤𑀓𑀜𑁆𑀘 𑀯𑀸𑀢𑁄 𑀘, 𑀲𑀩𑁆𑀩𑁂 𑀢𑁂 𑀉𑀢𑀼𑀚𑀸; 𑀆𑀓𑀸𑀲𑁄 𑀘 𑀦𑀺𑀩𑁆𑀩𑀸𑀦𑀜𑁆𑀘 𑀇𑀫𑁂 𑀤𑁆𑀯𑁂 𑀅𑀓𑀫𑁆𑀫𑀚𑀸 𑀅𑀳𑁂𑀢𑀼𑀚𑀸 𑀅𑀦𑀼𑀢𑀼𑀚𑀸. 𑀦𑀺𑀩𑁆𑀩𑀸𑀦𑀁 𑀧𑀦, 𑀫𑀳𑀸𑀭𑀸𑀚, 𑀦 𑀯𑀢𑁆𑀢𑀩𑁆𑀩𑀁 𑀓𑀫𑁆𑀫𑀚𑀦𑁆𑀢𑀺 𑀯𑀸 𑀳𑁂𑀢𑀼𑀚𑀦𑁆𑀢𑀺 𑀯𑀸 𑀉𑀢𑀼𑀚𑀦𑁆𑀢𑀺 𑀯𑀸 𑀉𑀧𑁆𑀧𑀦𑁆𑀦𑀦𑁆𑀢𑀺 𑀯𑀸 𑀅𑀦𑀼𑀧𑁆𑀧𑀦𑁆𑀦𑀦𑁆𑀢𑀺 𑀯𑀸 𑀉𑀧𑁆𑀧𑀸𑀤𑀦𑀻𑀬𑀦𑁆𑀢𑀺 𑀯𑀸 𑀅𑀢𑀻𑀢𑀦𑁆𑀢𑀺 𑀯𑀸 𑀅𑀦𑀸𑀕𑀢𑀦𑁆𑀢𑀺 𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀦𑁆𑀢𑀺 𑀯𑀸 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀦𑁆𑀢𑀺 𑀯𑀸 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀦𑁆𑀢𑀺 𑀯𑀸 𑀖𑀸𑀦𑀯𑀺𑀜𑁆𑀜𑁂𑀬𑁆𑀬𑀦𑁆𑀢𑀺 𑀯𑀸 𑀚𑀺𑀯𑁆𑀳𑀸𑀯𑀺𑀜𑁆𑀜𑁂𑀬𑁆𑀬𑀦𑁆𑀢𑀺 𑀯𑀸 𑀓𑀸𑀬𑀯𑀺𑀜𑁆𑀜𑁂𑀬𑁆𑀬𑀦𑁆𑀢𑀺 𑀯𑀸, 𑀅𑀧𑀺 𑀘, 𑀫𑀳𑀸𑀭𑀸𑀚, 𑀫𑀦𑁄𑀯𑀺𑀜𑁆𑀜𑁂𑀬𑁆𑀬𑀁 𑀦𑀺𑀩𑁆𑀩𑀸𑀦𑀁, 𑀬𑀁 𑀲𑁄 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑁄 𑀅𑀭𑀺𑀬𑀲𑀸𑀯𑀓𑁄 𑀯𑀺𑀲𑀼𑀤𑁆𑀥𑁂𑀦 𑀜𑀸𑀡𑁂𑀦 𑀧𑀲𑁆𑀲𑀢𑀻’’𑀢𑀺. ‘‘𑀭𑀫𑀡𑀻𑀬𑁄, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀧𑀜𑁆𑀳𑁄 𑀲𑀼𑀯𑀺𑀦𑀺𑀘𑁆𑀙𑀺𑀢𑁄 𑀦𑀺𑀲𑁆𑀲𑀁𑀲𑀬𑁄 𑀏𑀓𑀦𑁆𑀢𑀕𑀢𑁄, 𑀯𑀺𑀫𑀢𑀺 𑀉𑀧𑁆𑀧𑀘𑁆𑀙𑀺𑀦𑁆𑀦𑀸, 𑀢𑁆𑀯𑀁 𑀕𑀡𑀺𑀯𑀭𑀧𑀯𑀭𑀫𑀸𑀲𑀚𑁆𑀚𑀸’’𑀢𑀺.

𑀓𑀫𑁆𑀫𑀚𑀸𑀤𑀺𑀧𑀜𑁆𑀳𑁄 𑀙𑀝𑁆𑀞𑁄.

𑁭. 𑀬𑀓𑁆𑀔𑀧𑀜𑁆𑀳𑁄

𑁭. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀅𑀢𑁆𑀣𑀺 𑀮𑁄𑀓𑁂 𑀬𑀓𑁆𑀔𑀸 𑀦𑀸𑀫𑀸’’𑀢𑀺? ‘‘𑀆𑀫, 𑀫𑀳𑀸𑀭𑀸𑀚, 𑀅𑀢𑁆𑀣𑀺 𑀮𑁄𑀓𑁂 𑀬𑀓𑁆𑀔𑀸 𑀦𑀸𑀫𑀸’’𑀢𑀺. ‘‘𑀘𑀯𑀦𑁆𑀢𑀺 𑀧𑀦 𑀢𑁂, 𑀪𑀦𑁆𑀢𑁂, 𑀬𑀓𑁆𑀔𑀸 𑀢𑀫𑁆𑀳𑀸 𑀬𑁄𑀦𑀺𑀬𑀸’’𑀢𑀺? ‘‘𑀆𑀫, 𑀫𑀳𑀸𑀭𑀸𑀚, 𑀘𑀯𑀦𑁆𑀢𑀺 𑀢𑁂 𑀬𑀓𑁆𑀔𑀸 𑀢𑀫𑁆𑀳𑀸 𑀬𑁄𑀦𑀺𑀬𑀸’’𑀢𑀺. ‘‘𑀓𑀺𑀲𑁆𑀲 𑀧𑀦, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀢𑁂𑀲𑀁 𑀫𑀢𑀸𑀦𑀁 𑀬𑀓𑁆𑀔𑀸𑀦𑀁 𑀲𑀭𑀻𑀭𑀁 𑀦 𑀤𑀺𑀲𑁆𑀲𑀢𑀺, 𑀓𑀼𑀡𑀧𑀕𑀦𑁆𑀥𑁄𑀧𑀺 𑀦 𑀯𑀸𑀬𑀢𑀻’’𑀢𑀺? ‘‘𑀤𑀺𑀲𑁆𑀲𑀢𑀺, 𑀫𑀳𑀸𑀭𑀸𑀚, 𑀫𑀢𑀸𑀦𑀁 𑀬𑀓𑁆𑀔𑀸𑀦𑀁 𑀲𑀭𑀻𑀭𑀁, 𑀓𑀼𑀡𑀧𑀕𑀦𑁆𑀥𑁄𑀧𑀺 𑀢𑁂𑀲𑀁 𑀯𑀸𑀬𑀢𑀺, 𑀫𑀢𑀸𑀦𑀁, 𑀫𑀳𑀸𑀭𑀸𑀚, 𑀬𑀓𑁆𑀔𑀸𑀦𑀁 𑀲𑀭𑀻𑀭𑀁 𑀓𑀻𑀝𑀯𑀡𑁆𑀡𑁂𑀦 𑀯𑀸 𑀤𑀺𑀲𑁆𑀲𑀢𑀺, 𑀓𑀺𑀫𑀺𑀯𑀡𑁆𑀡𑁂𑀦 𑀯𑀸 𑀤𑀺𑀲𑁆𑀲𑀢𑀺, 𑀓𑀺𑀧𑀺𑀮𑁆𑀮𑀺𑀓𑀯𑀡𑁆𑀡𑁂𑀦 𑀯𑀸 𑀤𑀺𑀲𑁆𑀲𑀢𑀺, 𑀧𑀝𑀗𑁆𑀕𑀯𑀡𑁆𑀡𑁂𑀦 𑀯𑀸 𑀤𑀺𑀲𑁆𑀲𑀢𑀺, 𑀅𑀳𑀺𑀯𑀡𑁆𑀡𑁂𑀦 𑀯𑀸 𑀤𑀺𑀲𑁆𑀲𑀢𑀺, 𑀯𑀺𑀘𑁆𑀙𑀺𑀓𑀯𑀡𑁆𑀡𑁂𑀦 𑀯𑀸 𑀤𑀺𑀲𑁆𑀲𑀢𑀺, 𑀲𑀢𑀧𑀤𑀺𑀯𑀡𑁆𑀡𑁂𑀦 𑀯𑀸 𑀤𑀺𑀲𑁆𑀲𑀢𑀺, 𑀤𑀺𑀚𑀯𑀡𑁆𑀡𑁂𑀦 𑀯𑀸 𑀤𑀺𑀲𑁆𑀲𑀢𑀺, 𑀫𑀺𑀕𑀯𑀡𑁆𑀡𑁂𑀦 𑀯𑀸 𑀤𑀺𑀲𑁆𑀲𑀢𑀻’’𑀢𑀺. ‘‘𑀓𑁄 𑀳𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀅𑀜𑁆𑀜𑁄 𑀇𑀤𑀁 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀯𑀺𑀲𑀚𑁆𑀚𑁂𑀬𑁆𑀬 𑀅𑀜𑁆𑀜𑀢𑁆𑀭 𑀢𑀯𑀸𑀤𑀺𑀲𑁂𑀦 𑀩𑀼𑀤𑁆𑀥𑀺𑀫𑀢𑀸’’𑀢𑀺.

𑀬𑀓𑁆𑀔𑀧𑀜𑁆𑀳𑁄 𑀲𑀢𑁆𑀢𑀫𑁄.

𑁮. 𑀅𑀦𑀯𑀲𑁂𑀲𑀲𑀺𑀓𑁆𑀔𑀸𑀧𑀤𑀧𑀜𑁆𑀳𑁄

𑁮. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀬𑁂 𑀢𑁂 𑀅𑀳𑁂𑀲𑀼𑀁 𑀢𑀺𑀓𑀺𑀘𑁆𑀙𑀓𑀸𑀦𑀁 𑀧𑀼𑀩𑁆𑀩𑀓𑀸 𑀆𑀘𑀭𑀺𑀬𑀸 𑀲𑁂𑀬𑁆𑀬𑀣𑀺𑀤𑀁, 𑀦𑀸𑀭𑀤𑁄 𑀥𑀫𑁆𑀫𑀦𑁆𑀢𑀭𑀻 [𑀥𑀦𑁆𑀯𑀦𑁆𑀢𑀭𑀻 (?)] 𑀅𑀗𑁆𑀕𑀺𑀭𑀲𑁄 𑀓𑀧𑀺𑀮𑁄 𑀓𑀡𑁆𑀟𑀭𑀕𑁆𑀕𑀺 𑀲𑀸𑀫𑁄 𑀅𑀢𑀼𑀮𑁄 𑀧𑀼𑀩𑁆𑀩𑀓𑀘𑁆𑀘𑀸𑀬𑀦𑁄, 𑀲𑀩𑁆𑀩𑁂𑀧𑁂𑀢𑁂 𑀆𑀘𑀭𑀺𑀬𑀸 𑀲𑀓𑀺𑀁 𑀬𑁂𑀯 𑀭𑁄𑀕𑀼𑀧𑁆𑀧𑀢𑁆𑀢𑀺𑀜𑁆𑀘 𑀦𑀺𑀤𑀸𑀦𑀜𑁆𑀘 𑀲𑀪𑀸𑀯𑀜𑁆𑀘 𑀲𑀫𑀼𑀝𑁆𑀞𑀸𑀦𑀜𑁆𑀘 𑀢𑀺𑀓𑀺𑀘𑁆𑀙𑀜𑁆𑀘 𑀓𑀺𑀭𑀺𑀬𑀜𑁆𑀘 𑀲𑀺𑀤𑁆𑀥𑀸𑀲𑀺𑀤𑁆𑀥𑀜𑁆𑀘 𑀲𑀩𑁆𑀩𑀁 𑀢𑀁 [𑀲𑀦𑁆𑀢𑀁 (𑀓.)] 𑀦𑀺𑀭𑀯𑀲𑁂𑀲𑀁 𑀚𑀸𑀦𑀺𑀢𑁆𑀯𑀸 ‘𑀇𑀫𑀲𑁆𑀫𑀺𑀁 𑀓𑀸𑀬𑁂 𑀏𑀢𑁆𑀢𑀓𑀸 𑀭𑁄𑀕𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀦𑁆𑀢𑀻’𑀢𑀺 𑀏𑀓𑀧𑁆𑀧𑀳𑀸𑀭𑁂𑀦 𑀓𑀮𑀸𑀧𑀕𑁆𑀕𑀸𑀳𑀁 𑀓𑀭𑀺𑀢𑁆𑀯𑀸 𑀲𑀼𑀢𑁆𑀢𑀁 𑀩𑀦𑁆𑀥𑀺𑀁𑀲𑀼, 𑀅𑀲𑀩𑁆𑀩𑀜𑁆𑀜𑀼𑀦𑁄 𑀏𑀢𑁂 𑀲𑀩𑁆𑀩𑁂, 𑀓𑀺𑀲𑁆𑀲 𑀧𑀦 𑀢𑀣𑀸𑀕𑀢𑁄 𑀲𑀩𑁆𑀩𑀜𑁆𑀜𑀽 𑀲𑀫𑀸𑀦𑁄 𑀅𑀦𑀸𑀕𑀢𑀁 𑀓𑀺𑀭𑀺𑀬𑀁 𑀩𑀼𑀤𑁆𑀥𑀜𑀸𑀡𑁂𑀦 𑀚𑀸𑀦𑀺𑀢𑁆𑀯𑀸 ‘𑀏𑀢𑁆𑀢𑀓𑁂 𑀦𑀸𑀫 𑀯𑀢𑁆𑀣𑀼𑀲𑁆𑀫𑀺𑀁 𑀏𑀢𑁆𑀢𑀓𑀁 𑀦𑀸𑀫 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀢𑀩𑁆𑀩𑀁 𑀪𑀯𑀺𑀲𑁆𑀲𑀢𑀻’𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀅𑀦𑀯𑀲𑁂𑀲𑀢𑁄 𑀲𑀺𑀓𑁆𑀔𑀸𑀧𑀤𑀁 𑀦 𑀧𑀜𑁆𑀜𑀧𑁂𑀲𑀺, 𑀉𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑁂 𑀯𑀢𑁆𑀣𑀼𑀲𑁆𑀫𑀺𑀁 𑀅𑀬𑀲𑁂 𑀧𑀸𑀓𑀝𑁂 𑀤𑁄𑀲𑁂 𑀯𑀺𑀢𑁆𑀣𑀸𑀭𑀺𑀓𑁂 𑀧𑀼𑀣𑀼𑀕𑀢𑁂 𑀉𑀚𑁆𑀛𑀸𑀬𑀦𑁆𑀢𑁂𑀲𑀼 𑀫𑀦𑀼𑀲𑁆𑀲𑁂𑀲𑀼 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀓𑀸𑀮𑁂 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀲𑀻’’𑀢𑀺?

‘‘𑀜𑀸𑀢𑀫𑁂𑀢𑀁, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑀲𑁆𑀲 ‘𑀇𑀫𑀲𑁆𑀫𑀺𑀁 𑀲𑀫𑀬𑁂 𑀇𑀫𑁂𑀲𑀼 𑀫𑀦𑀼𑀲𑁆𑀲𑁂𑀲𑀼 𑀲𑀸𑀥𑀺𑀓𑀁 𑀤𑀺𑀬𑀟𑁆𑀠𑀲𑀺𑀓𑁆𑀔𑀸𑀧𑀤𑀲𑀢𑀁 𑀧𑀜𑁆𑀜𑀧𑁂𑀢𑀩𑁆𑀩𑀁 𑀪𑀯𑀺𑀲𑁆𑀲𑀢𑀻’𑀢𑀺, 𑀅𑀧𑀺 𑀘 𑀢𑀣𑀸𑀕𑀢𑀲𑁆𑀲 𑀏𑀯𑀁 𑀅𑀳𑁄𑀲𑀺 ‘𑀲𑀘𑁂 𑀔𑁄 𑀅𑀳𑀁 𑀲𑀸𑀥𑀺𑀓𑀁 𑀤𑀺𑀬𑀟𑁆𑀠𑀲𑀺𑀓𑁆𑀔𑀸𑀧𑀤𑀲𑀢𑀁 𑀏𑀓𑀧𑁆𑀧𑀳𑀸𑀭𑀁 𑀧𑀜𑁆𑀜𑀧𑁂𑀲𑁆𑀲𑀸𑀫𑀺, 𑀫𑀳𑀸𑀚𑀦𑁄 𑀲𑀦𑁆𑀢𑀸𑀲𑀫𑀸𑀧𑀚𑁆𑀚𑀺𑀲𑁆𑀲𑀢𑀺 ‘𑀩𑀳𑀼𑀓𑀁 𑀇𑀥 𑀭𑀓𑁆𑀔𑀺𑀢𑀩𑁆𑀩𑀁, 𑀤𑀼𑀓𑁆𑀓𑀭𑀁 𑀯𑀢 𑀪𑁄 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑀼’𑀦𑁆𑀢𑀺, 𑀧𑀩𑁆𑀩𑀚𑀺𑀢𑀼𑀓𑀸𑀫𑀸𑀧𑀺 𑀦 𑀧𑀩𑁆𑀩𑀚𑀺𑀲𑁆𑀲𑀦𑁆𑀢𑀺, 𑀯𑀘𑀦𑀜𑁆𑀘 𑀫𑁂 𑀦 𑀲𑀤𑁆𑀤𑀳𑀺𑀲𑁆𑀲𑀦𑁆𑀢𑀺, 𑀅𑀲𑀤𑁆𑀤𑀳𑀦𑁆𑀢𑀸 𑀢𑁂 𑀫𑀦𑀼𑀲𑁆𑀲𑀸 𑀅𑀧𑀸𑀬𑀕𑀸𑀫𑀺𑀦𑁄 𑀪𑀯𑀺𑀲𑁆𑀲𑀦𑁆𑀦-𑀢𑀺 𑀉𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑁂 𑀯𑀢𑁆𑀣𑀼𑀲𑁆𑀫𑀺𑀁 𑀥𑀫𑁆𑀫𑀤𑁂𑀲𑀦𑀸𑀬 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀧𑀸𑀓𑀝𑁂 𑀤𑁄𑀲𑁂 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀲𑁆𑀲𑀸𑀫𑀻’’’𑀢𑀺. ‘‘𑀅𑀘𑁆𑀙𑀭𑀺𑀬𑀁, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀩𑀼𑀤𑁆𑀥𑀸𑀦𑀁, 𑀅𑀩𑁆𑀪𑀼𑀢𑀁, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀩𑀼𑀤𑁆𑀥𑀸𑀦𑀁, 𑀬𑀸𑀯 𑀫𑀳𑀦𑁆𑀢𑀁 𑀢𑀣𑀸𑀕𑀢𑀲𑁆𑀲 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀁, 𑀏𑀯𑀫𑁂𑀢𑀁, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀲𑀼𑀦𑀺𑀤𑁆𑀤𑀺𑀝𑁆𑀞𑁄 𑀏𑀲𑁄 𑀅𑀢𑁆𑀣𑁄 𑀢𑀣𑀸𑀕𑀢𑁂𑀦, ‘𑀩𑀳𑀼𑀓𑀁 𑀇𑀥 𑀲𑀺𑀓𑁆𑀔𑀺𑀢𑀩𑁆𑀩’𑀦𑁆𑀢𑀺 𑀲𑀼𑀢𑁆𑀯𑀸 𑀲𑀢𑁆𑀢𑀸𑀦𑀁 𑀲𑀦𑁆𑀢𑀸𑀲𑁄 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀏𑀓𑁄𑀧𑀺 𑀚𑀺𑀦𑀲𑀸𑀲𑀦𑁂 𑀦 𑀧𑀩𑁆𑀩𑀚𑁂𑀬𑁆𑀬, 𑀏𑀯𑀫𑁂𑀢𑀁 𑀢𑀣𑀸 𑀲𑀫𑁆𑀧𑀝𑀺𑀘𑁆𑀙𑀸𑀫𑀻’’𑀢𑀺.

𑀅𑀦𑀯𑀲𑁂𑀲𑀲𑀺𑀓𑁆𑀔𑀸𑀧𑀤𑀧𑀜𑁆𑀳𑁄 𑀅𑀝𑁆𑀞𑀫𑁄.

𑁯. 𑀲𑀽𑀭𑀺𑀬𑀢𑀧𑀦𑀧𑀜𑁆𑀳𑁄

𑁯. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀅𑀬𑀁 𑀲𑀽𑀭𑀺𑀬𑁄 𑀲𑀩𑁆𑀩𑀓𑀸𑀮𑀁 𑀓𑀞𑀺𑀦𑀁 𑀢𑀧𑀢𑀺, 𑀉𑀤𑀸𑀳𑀼 𑀓𑀺𑀜𑁆𑀘𑀺𑀓𑀸𑀮𑀁 𑀫𑀦𑁆𑀤𑀁 𑀢𑀧𑀢𑀻’’𑀢𑀺? ‘‘𑀲𑀩𑁆𑀩𑀓𑀸𑀮𑀁, 𑀫𑀳𑀸𑀭𑀸𑀚, 𑀲𑀽𑀭𑀺𑀬𑁄 𑀓𑀞𑀺𑀦𑀁 𑀢𑀧𑀢𑀺, 𑀦 𑀓𑀺𑀜𑁆𑀘𑀺𑀓𑀸𑀮𑀁 𑀫𑀦𑁆𑀤𑀁 𑀢𑀧𑀢𑀻’’𑀢𑀺. ‘‘𑀬𑀤𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀲𑀽𑀭𑀺𑀬𑁄 𑀲𑀩𑁆𑀩𑀓𑀸𑀮𑀁 𑀓𑀞𑀺𑀦𑀁 𑀢𑀧𑀢𑀺, 𑀓𑀺𑀲𑁆𑀲 𑀧𑀦 𑀅𑀧𑁆𑀧𑁂𑀓𑀤𑀸 𑀲𑀽𑀭𑀺𑀬𑁄 𑀓𑀞𑀺𑀦𑀁 𑀢𑀧𑀢𑀺, 𑀅𑀧𑁆𑀧𑁂𑀓𑀤𑀸 𑀫𑀦𑁆𑀤𑀁 𑀢𑀧𑀢𑀻’’𑀢𑀺? ‘‘𑀘𑀢𑁆𑀢𑀸𑀭𑁄𑀫𑁂, 𑀫𑀳𑀸𑀭𑀸𑀚, 𑀲𑀽𑀭𑀺𑀬𑀲𑁆𑀲 𑀭𑁄𑀕𑀸, 𑀬𑁂𑀲𑀁 𑀅𑀜𑁆𑀜𑀢𑀭𑁂𑀦 𑀭𑁄𑀕𑁂𑀦 𑀧𑀝𑀺𑀧𑀻𑀴𑀺𑀢𑁄 𑀲𑀽𑀭𑀺𑀬𑁄 𑀫𑀦𑁆𑀤𑀁 𑀢𑀧𑀢𑀺. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀅𑀩𑁆𑀪𑀁, 𑀫𑀳𑀸𑀭𑀸𑀚, 𑀲𑀽𑀭𑀺𑀬𑀲𑁆𑀲 𑀭𑁄𑀕𑁄, 𑀢𑁂𑀦 𑀭𑁄𑀕𑁂𑀦 𑀧𑀝𑀺𑀧𑀻𑀴𑀺𑀢𑁄 𑀲𑀽𑀭𑀺𑀬𑁄 𑀫𑀦𑁆𑀤𑀁 𑀢𑀧𑀢𑀺. 𑀫𑀳𑀺𑀓𑀸, 𑀫𑀳𑀸𑀭𑀸𑀚, 𑀲𑀽𑀭𑀺𑀬𑀲𑁆𑀲 𑀭𑁄𑀕𑁄, 𑀢𑁂𑀦 𑀭𑁄𑀕𑁂𑀦 𑀧𑀝𑀺𑀧𑀻𑀴𑀺𑀢𑁄 𑀲𑀽𑀭𑀺𑀬𑁄 𑀫𑀦𑁆𑀤𑀁 𑀢𑀧𑀢𑀺. 𑀫𑁂𑀖𑁄, 𑀫𑀳𑀸𑀭𑀸𑀚, 𑀲𑀽𑀭𑀺𑀬𑀲𑁆𑀲 𑀭𑁄𑀕𑁄, 𑀢𑁂𑀦 𑀭𑁄𑀕𑁂𑀦 𑀧𑀝𑀺𑀧𑀻𑀴𑀺𑀢𑁄 𑀲𑀽𑀭𑀺𑀬𑁄 𑀫𑀦𑁆𑀤𑀁 𑀢𑀧𑀢𑀺. 𑀭𑀸𑀳𑀼, 𑀫𑀳𑀸𑀭𑀸𑀚, 𑀲𑀽𑀭𑀺𑀬𑀲𑁆𑀲 𑀭𑁄𑀕𑁄, 𑀢𑁂𑀦 𑀭𑁄𑀕𑁂𑀦 𑀧𑀝𑀺𑀧𑀻𑀴𑀺𑀢𑁄 𑀲𑀽𑀭𑀺𑀬𑁄 𑀫𑀦𑁆𑀤𑀁 𑀢𑀧𑀢𑀺. 𑀇𑀫𑁂 𑀔𑁄, 𑀫𑀳𑀸𑀭𑀸𑀚, 𑀘𑀢𑁆𑀢𑀸𑀭𑁄 𑀲𑀽𑀭𑀺𑀬𑀲𑁆𑀲 𑀭𑁄𑀕𑀸, 𑀬𑁂𑀲𑀁 𑀅𑀜𑁆𑀜𑀢𑀭𑁂𑀦 𑀭𑁄𑀕𑁂𑀦 𑀧𑀝𑀺𑀧𑀻𑀴𑀺𑀢𑁄 𑀲𑀽𑀭𑀺𑀬𑁄 𑀫𑀦𑁆𑀤𑀁 𑀢𑀧𑀢𑀻’’𑀢𑀺. ‘‘𑀅𑀘𑁆𑀙𑀭𑀺𑀬𑀁, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀅𑀩𑁆𑀪𑀼𑀢𑀁, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀲𑀽𑀭𑀺𑀬𑀲𑁆𑀲𑀧𑀺 𑀢𑀸𑀯 𑀢𑁂𑀚𑁄𑀲𑀫𑁆𑀧𑀦𑁆𑀦𑀲𑁆𑀲 𑀭𑁄𑀕𑁄 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀓𑀺𑀫𑀗𑁆𑀕𑀁 𑀧𑀦 𑀅𑀜𑁆𑀜𑁂𑀲𑀁 𑀲𑀢𑁆𑀢𑀸𑀦𑀁, 𑀦𑀢𑁆𑀣𑀺, 𑀪𑀦𑁆𑀢𑁂, 𑀏𑀲𑀸 𑀯𑀺𑀪𑀢𑁆𑀢𑀺 𑀅𑀜𑁆𑀜𑀲𑁆𑀲 𑀅𑀜𑁆𑀜𑀢𑁆𑀭 𑀢𑀯𑀸𑀤𑀺𑀲𑁂𑀦 𑀩𑀼𑀤𑁆𑀥𑀺𑀫𑀢𑀸’’𑀢𑀺.

𑀲𑀽𑀭𑀺𑀬𑀢𑀧𑀦𑀧𑀜𑁆𑀳𑁄 𑀦𑀯𑀫𑁄.

𑁧𑁦. 𑀓𑀞𑀺𑀦𑀢𑀧𑀦𑀧𑀜𑁆𑀳𑁄

𑁧𑁦. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀓𑀺𑀲𑁆𑀲 𑀳𑁂𑀫𑀦𑁆𑀢𑁂 𑀲𑀽𑀭𑀺𑀬𑁄 𑀓𑀞𑀺𑀦𑀁 𑀢𑀧𑀢𑀺, 𑀦𑁄 𑀢𑀣𑀸 𑀕𑀺𑀫𑁆𑀳𑁂’’𑀢𑀺? ‘‘𑀕𑀺𑀫𑁆𑀳𑁂, 𑀫𑀳𑀸𑀭𑀸𑀚, 𑀅𑀦𑀼𑀧𑀳𑀢𑀁 𑀳𑁄𑀢𑀺 𑀭𑀚𑁄𑀚𑀮𑁆𑀮𑀁, 𑀯𑀸𑀢𑀓𑁆𑀔𑀼𑀪𑀺𑀢𑀸 𑀭𑁂𑀡𑀽 𑀕𑀕𑀦𑀸𑀦𑀼𑀕𑀢𑀸 𑀳𑁄𑀦𑁆𑀢𑀺, 𑀆𑀓𑀸𑀲𑁂𑀧𑀺 𑀅𑀩𑁆𑀪𑀸 𑀲𑀼𑀩𑀳𑀮𑀸 𑀳𑁄𑀦𑁆𑀢𑀺, 𑀫𑀳𑀸𑀯𑀸𑀢𑁄 𑀘 𑀅𑀥𑀺𑀫𑀢𑁆𑀢𑀁 𑀯𑀸𑀬𑀢𑀺, 𑀢𑁂 𑀲𑀩𑁆𑀩𑁂 𑀦𑀸𑀦𑀸𑀓𑀼𑀮𑀸 𑀲𑀫𑀸𑀬𑀼𑀢𑀸 𑀲𑀽𑀭𑀺𑀬𑀭𑀁𑀲𑀺𑀬𑁄 𑀧𑀺𑀤𑀳𑀦𑁆𑀢𑀺, 𑀢𑁂𑀦 𑀕𑀺𑀫𑁆𑀳𑁂 𑀲𑀽𑀭𑀺𑀬𑁄 𑀫𑀦𑁆𑀤𑀁 𑀢𑀧𑀢𑀺.

‘‘𑀳𑁂𑀫𑀦𑁆𑀢𑁂 𑀧𑀦, 𑀫𑀳𑀸𑀭𑀸𑀚, 𑀳𑁂𑀝𑁆𑀞𑀸 𑀧𑀣𑀯𑀻 𑀦𑀺𑀩𑁆𑀩𑀼𑀢𑀸 𑀳𑁄𑀢𑀺, 𑀉𑀧𑀭𑀺 𑀫𑀳𑀸𑀫𑁂𑀖𑁄 𑀉𑀧𑀝𑁆𑀞𑀺𑀢𑁄 𑀳𑁄𑀢𑀺, 𑀉𑀧𑀲𑀦𑁆𑀢𑀁 𑀳𑁄𑀢𑀺 𑀭𑀚𑁄𑀚𑀮𑁆𑀮𑀁, 𑀭𑁂𑀡𑀼 𑀘 𑀲𑀦𑁆𑀢𑀲𑀦𑁆𑀢𑀁 𑀕𑀕𑀦𑁂 𑀘𑀭𑀢𑀺, 𑀯𑀺𑀕𑀢𑀯𑀮𑀸𑀳𑀓𑁄 𑀘 𑀳𑁄𑀢𑀺 𑀆𑀓𑀸𑀲𑁄, 𑀯𑀸𑀢𑁄 𑀘 𑀫𑀦𑁆𑀤𑀫𑀦𑁆𑀤𑀁 𑀯𑀸𑀬𑀢𑀺, 𑀏𑀢𑁂𑀲𑀁 𑀉𑀧𑀭𑀢𑀺𑀬𑀸 𑀯𑀺𑀲𑀼𑀤𑁆𑀥𑀸 [𑀯𑀺𑀲𑀤𑀸 (𑀲𑀻. 𑀧𑀻.)] 𑀳𑁄𑀦𑁆𑀢𑀺 𑀲𑀽𑀭𑀺𑀬𑀭𑀁𑀲𑀺𑀬𑁄, 𑀉𑀧𑀖𑀸𑀢𑀯𑀺𑀫𑀼𑀢𑁆𑀢𑀲𑁆𑀲 𑀲𑀽𑀭𑀺𑀬𑀲𑁆𑀲 𑀢𑀸𑀧𑁄 𑀅𑀢𑀺 𑀯𑀺𑀬 𑀢𑀧𑀢𑀺. 𑀇𑀤𑀫𑁂𑀢𑁆𑀣, 𑀫𑀳𑀸𑀭𑀸𑀚, 𑀓𑀸𑀭𑀡𑀁, 𑀬𑁂𑀦 𑀓𑀸𑀭𑀡𑁂𑀦 𑀲𑀽𑀭𑀺𑀬𑁄 𑀳𑁂𑀫𑀦𑁆𑀢𑁂 𑀓𑀞𑀺𑀦𑀁 𑀢𑀧𑀢𑀺, 𑀦𑁄 𑀢𑀣𑀸 𑀕𑀺𑀫𑁆𑀳𑁂’’𑀢𑀺. ‘‘𑀲𑀩𑁆𑀩𑀻𑀢𑀺𑀫𑀼𑀢𑁆𑀢𑁄, 𑀪𑀦𑁆𑀢𑁂, 𑀲𑀽𑀭𑀺𑀬𑁄 𑀓𑀞𑀺𑀦𑀁 𑀢𑀧𑀢𑀺, 𑀫𑁂𑀖𑀸𑀤𑀺𑀲𑀳𑀕𑀢𑁄 𑀓𑀞𑀺𑀦𑀁 𑀦 𑀢𑀧𑀢𑀻’’𑀢𑀺.

𑀓𑀞𑀺𑀦𑀢𑀧𑀦𑀧𑀜𑁆𑀳𑁄 𑀤𑀲𑀫𑁄.

𑀦𑀺𑀧𑁆𑀧𑀧𑀜𑁆𑀘𑀯𑀕𑁆𑀕𑁄 𑀤𑀼𑀢𑀺𑀬𑁄.

𑀇𑀫𑀲𑁆𑀫𑀺𑀁 𑀯𑀕𑁆𑀕𑁂 𑀤𑀲 𑀧𑀜𑁆𑀳𑀸.