𑁪𑁨𑁭. 𑀕𑀺𑀚𑁆𑀛𑀚𑀸𑀢𑀓𑀁 (𑁧)

𑁧. 𑀧𑀭𑀺𑀲𑀗𑁆𑀓𑀼𑀧𑀣𑁄 𑀦𑀸𑀫, 𑀕𑀺𑀚𑁆𑀛𑀧𑀦𑁆𑀣𑁄 𑀲𑀦𑀦𑁆𑀢𑀦𑁄;

𑀢𑀢𑁆𑀭𑀸𑀲𑀺 𑀫𑀸𑀢𑀸𑀧𑀺𑀢𑀭𑁄, 𑀕𑀺𑀚𑁆𑀛𑁄 𑀧𑁄𑀲𑁂𑀲𑀺 𑀚𑀺𑀡𑁆𑀡𑀓𑁂;

𑀢𑁂𑀲𑀁 𑀅𑀚𑀕𑀭𑀫𑁂𑀤𑀁, 𑀅𑀘𑁆𑀘𑀳𑀸𑀲𑀺 𑀩𑀳𑀼𑀢𑁆𑀢𑀲𑁄 [𑀧𑀳𑀼𑀢𑁆𑀢𑀢𑁄 (𑀓. 𑀲𑀻.), 𑀧𑀳𑀽𑀢𑀲𑁄 (𑀲𑁆𑀬𑀸. 𑀧𑀻.), 𑀩𑀳𑀼𑀥𑀲𑁄 (𑀓.)].

𑁨. 𑀧𑀺𑀢𑀸 𑀘 𑀧𑀼𑀢𑁆𑀢𑀁 𑀅𑀯𑀘, 𑀚𑀸𑀦𑀁 𑀉𑀘𑁆𑀘𑀁 𑀧𑀧𑀸𑀢𑀺𑀦𑀁;

𑀲𑀼𑀧𑀢𑁆𑀢𑀁 𑀣𑀸𑀫𑀲𑀫𑁆𑀧𑀦𑁆𑀦𑀁 [𑀧𑀓𑁆𑀔𑀲𑀫𑁆𑀧𑀦𑁆𑀦𑀁 (𑀲𑀻. 𑀲𑁆𑀬𑀸. 𑀧𑀻.)], 𑀢𑁂𑀚𑀲𑁆𑀲𑀺𑀁 𑀤𑀽𑀭𑀕𑀸𑀫𑀺𑀦𑀁.

𑁩. 𑀧𑀭𑀺𑀧𑁆𑀮𑀯𑀦𑁆𑀢𑀁 𑀧𑀣𑀯𑀺𑀁, 𑀬𑀤𑀸 𑀢𑀸𑀢 𑀯𑀺𑀚𑀸𑀦𑀳𑀺;

𑀲𑀸𑀕𑀭𑁂𑀦 𑀧𑀭𑀺𑀓𑁆𑀔𑀺𑀢𑁆𑀢𑀁, 𑀘𑀓𑁆𑀓𑀁𑀯 𑀧𑀭𑀺𑀫𑀡𑁆𑀟𑀮𑀁;

𑀢𑀢𑁄 𑀢𑀸𑀢 𑀦𑀺𑀯𑀢𑁆𑀢𑀲𑁆𑀲𑀼, 𑀫𑀸𑀲𑁆𑀲𑀼 𑀏𑀢𑁆𑀢𑁄 𑀧𑀭𑀁 𑀕𑀫𑀺.

𑁪. 𑀉𑀤𑀧𑀢𑁆𑀢𑁄𑀲𑀺 [𑀉𑀤𑁆𑀥𑀁 𑀧𑀢𑁆𑀢𑁄𑀲𑀺 (𑀓. 𑀲𑀻.)] 𑀯𑁂𑀕𑁂𑀦, 𑀩𑀮𑀻 𑀧𑀓𑁆𑀔𑀻 𑀤𑀺𑀚𑀼𑀢𑁆𑀢𑀫𑁄;

𑀑𑀮𑁄𑀓𑀬𑀦𑁆𑀢𑁄 𑀯𑀓𑁆𑀓𑀗𑁆𑀕𑁄, 𑀧𑀩𑁆𑀩𑀢𑀸𑀦𑀺 𑀯𑀦𑀸𑀦𑀺 𑀘.

𑁫. 𑀅𑀤𑁆𑀤𑀲𑁆𑀲 𑀧𑀣𑀯𑀺𑀁 𑀕𑀺𑀚𑁆𑀛𑁄, 𑀬𑀣𑀸𑀲𑀸𑀲𑀺 [𑀬𑀣𑀸𑀲𑁆𑀲𑀸𑀲𑀺 (𑀲𑁆𑀬𑀸. 𑀅𑀝𑁆𑀞. 𑀧𑀸𑀞𑀦𑁆𑀢𑀭𑀁)] 𑀧𑀺𑀢𑀼𑀲𑁆𑀲𑀼𑀢𑀁;

𑀲𑀸𑀕𑀭𑁂𑀦 𑀧𑀭𑀺𑀓𑁆𑀔𑀺𑀢𑁆𑀢𑀁, 𑀘𑀓𑁆𑀓𑀁𑀯 𑀧𑀭𑀺𑀫𑀡𑁆𑀟𑀮𑀁.

𑁬. 𑀢𑀜𑁆𑀘 𑀲𑁄 𑀲𑀫𑀢𑀺𑀓𑁆𑀓𑀫𑁆𑀫, 𑀧𑀭𑀫𑁂𑀯𑀘𑁆𑀘𑀯𑀢𑁆𑀢𑀣 [𑀧𑀭𑀫𑁂𑀯 𑀧𑀯𑀢𑁆𑀢𑀣 (𑀲𑀻. 𑀲𑁆𑀬𑀸.)];

𑀢𑀜𑁆𑀘 𑀯𑀸𑀢𑀲𑀺𑀔𑀸 𑀢𑀺𑀓𑁆𑀔𑀸, 𑀅𑀘𑁆𑀘𑀳𑀸𑀲𑀺 𑀩𑀮𑀺𑀁 𑀤𑀺𑀚𑀁.

𑁭. 𑀦𑀸𑀲𑀓𑁆𑀔𑀸𑀢𑀺𑀕𑀢𑁄 𑀧𑁄𑀲𑁄, 𑀧𑀼𑀦𑀤𑁂𑀯 𑀦𑀺𑀯𑀢𑁆𑀢𑀺𑀢𑀼𑀁;

𑀤𑀺𑀚𑁄 𑀩𑁆𑀬𑀲𑀦𑀫𑀸𑀧𑀸𑀤𑀺, 𑀯𑁂𑀭𑀫𑁆𑀪𑀸𑀦𑀁 [𑀯𑁂𑀭𑀫𑁆𑀩𑀸𑀦𑀁 (𑀲𑀻. 𑀧𑀻.)] 𑀯𑀲𑀁 𑀕𑀢𑁄.

𑁮. 𑀢𑀲𑁆𑀲 𑀧𑀼𑀢𑁆𑀢𑀸 𑀘 𑀤𑀸𑀭𑀸 𑀘, 𑀬𑁂 𑀘𑀜𑁆𑀜𑁂 𑀅𑀦𑀼𑀚𑀻𑀯𑀺𑀦𑁄;

𑀲𑀩𑁆𑀩𑁂 𑀩𑁆𑀬𑀲𑀦𑀫𑀸𑀧𑀸𑀤𑀼𑀁, 𑀅𑀦𑁄𑀯𑀸𑀤𑀓𑀭𑁂 𑀤𑀺𑀚𑁂.

𑁯. 𑀏𑀯𑀫𑁆𑀧𑀺 𑀇𑀥 𑀯𑀼𑀟𑁆𑀠𑀸𑀦𑀁, 𑀬𑁄 𑀯𑀸𑀓𑁆𑀬𑀁 𑀦𑀸𑀯𑀩𑀼𑀚𑁆𑀛𑀢𑀺;

𑀅𑀢𑀺𑀲𑀻𑀫𑀘𑀭𑁄 𑀤𑀺𑀢𑁆𑀢𑁄, 𑀕𑀺𑀚𑁆𑀛𑁄𑀯𑀸𑀢𑀻𑀢𑀲𑀸𑀲𑀦𑁄;

𑀲 𑀯𑁂 𑀩𑁆𑀬𑀲𑀦𑀁 𑀧𑀧𑁆𑀧𑁄𑀢𑀺, 𑀅𑀓𑀢𑁆𑀯𑀸 𑀯𑀼𑀟𑁆𑀠𑀲𑀸𑀲𑀦𑀦𑁆𑀢𑀺.

𑀕𑀺𑀚𑁆𑀛𑀚𑀸𑀢𑀓𑀁 𑀧𑀞𑀫𑀁.