𑁪𑁦𑁬. 𑀕𑀦𑁆𑀥𑀸𑀭𑀚𑀸𑀢𑀓𑀁 (𑁭-𑁨-𑁧)

𑁭𑁬. 𑀳𑀺𑀢𑁆𑀯𑀸 𑀕𑀸𑀫𑀲𑀳𑀲𑁆𑀲𑀸𑀦𑀺, 𑀧𑀭𑀺𑀧𑀼𑀡𑁆𑀡𑀸𑀦𑀺 𑀲𑁄𑀴𑀲;

𑀓𑁄𑀝𑁆𑀞𑀸𑀕𑀸𑀭𑀸𑀦𑀺 𑀨𑀻𑀢𑀸𑀦𑀺, 𑀲𑀦𑁆𑀦𑀺𑀥𑀺𑀁 𑀤𑀸𑀦𑀺 𑀓𑀼𑀩𑁆𑀩𑀲𑀺.

𑁭𑁭. 𑀳𑀺𑀢𑁆𑀯𑀸 𑀕𑀦𑁆𑀥𑀸𑀭𑀯𑀺𑀲𑀬𑀁, 𑀧𑀳𑀽𑀢𑀥𑀦𑀥𑀸𑀭𑀺𑀬𑀁 [𑀥𑀸𑀦𑀺𑀬𑀁 (𑀲𑀻. 𑀧𑀻.), 𑀥𑀜𑁆𑀜𑀦𑁆𑀢𑀺 𑀅𑀢𑁆𑀣𑁄];

𑀧𑀲𑀸𑀲𑀦𑀢𑁄 [𑀧𑀲𑀸𑀲𑀦𑀺𑀢𑁄 (𑀲𑀻. 𑀲𑁆𑀬𑀸.), 𑀧𑀲𑀸𑀲𑀦𑀸𑀢𑁄 (𑀧𑀻.)] 𑀦𑀺𑀓𑁆𑀔𑀦𑁆𑀢𑁄, 𑀇𑀥 𑀤𑀸𑀦𑀺 𑀧𑀲𑀸𑀲𑀲𑀺.

𑁭𑁮. 𑀥𑀫𑁆𑀫𑀁 𑀪𑀡𑀸𑀫𑀺 𑀯𑁂𑀤𑁂𑀳, 𑀅𑀥𑀫𑁆𑀫𑁄 𑀫𑁂 𑀦 𑀭𑀼𑀘𑁆𑀘𑀢𑀺;

𑀥𑀫𑁆𑀫𑀁 𑀫𑁂 𑀪𑀡𑀫𑀸𑀦𑀲𑁆𑀲, 𑀦 𑀧𑀸𑀧𑀫𑀼𑀧𑀮𑀺𑀫𑁆𑀧𑀢𑀺.

𑁭𑁯. 𑀬𑁂𑀦 𑀓𑁂𑀦𑀘𑀺 𑀯𑀡𑁆𑀡𑁂𑀦, 𑀧𑀭𑁄 𑀮𑀪𑀢𑀺 𑀭𑀼𑀧𑁆𑀧𑀦𑀁;

𑀫𑀳𑀢𑁆𑀣𑀺𑀬𑀫𑁆𑀧𑀺 𑀘𑁂 𑀯𑀸𑀘𑀁, 𑀦 𑀢𑀁 𑀪𑀸𑀲𑁂𑀬𑁆𑀬 𑀧𑀡𑁆𑀟𑀺𑀢𑁄.

𑁮𑁦. 𑀓𑀸𑀫𑀁 𑀭𑀼𑀧𑁆𑀧𑀢𑀼 𑀯𑀸 𑀫𑀸 𑀯𑀸, 𑀪𑀼𑀲𑀁𑀯 𑀯𑀺𑀓𑀺𑀭𑀻𑀬𑀢𑀼;

𑀥𑀫𑁆𑀫𑀁 𑀫𑁂 𑀪𑀡𑀫𑀸𑀦𑀲𑁆𑀲, 𑀦 𑀧𑀸𑀧𑀫𑀼𑀧𑀮𑀺𑀫𑁆𑀧𑀢𑀺.

𑁮𑁧. 𑀦𑁄 𑀘𑁂 𑀅𑀲𑁆𑀲 𑀲𑀓𑀸 𑀩𑀼𑀤𑁆𑀥𑀺, 𑀯𑀺𑀦𑀬𑁄 𑀯𑀸 𑀲𑀼𑀲𑀺𑀓𑁆𑀔𑀺𑀢𑁄;

𑀯𑀦𑁂 𑀅𑀦𑁆𑀥𑀫𑀳𑀺𑀁𑀲𑁄𑀯 [𑀅𑀦𑁆𑀥𑀫𑀳𑀺𑀲𑁄𑀯 (𑀲𑀻. 𑀧𑀻.)] 𑀘𑀭𑁂𑀬𑁆𑀬 𑀩𑀳𑀼𑀓𑁄 𑀚𑀦𑁄.

𑁮𑁨. 𑀬𑀲𑁆𑀫𑀸 𑀘 𑀧𑀦𑀺𑀥𑁂𑀓𑀘𑁆𑀘𑁂, 𑀆𑀘𑁂𑀭𑀫𑁆𑀳𑀺 [𑀆𑀘𑀸𑀭𑀫𑁆𑀳𑀺 (𑀲𑀻. 𑀧𑀻.)] 𑀲𑀼𑀲𑀺𑀓𑁆𑀔𑀺𑀢𑀸;

𑀢𑀲𑁆𑀫𑀸 𑀯𑀺𑀦𑀻𑀢𑀯𑀺𑀦𑀬𑀸, 𑀘𑀭𑀦𑁆𑀢𑀺 𑀲𑀼𑀲𑀫𑀸𑀳𑀺𑀢𑀸𑀢𑀺.

𑀕𑀦𑁆𑀥𑀸𑀭𑀚𑀸𑀢𑀓𑀁 𑀧𑀞𑀫𑀁.