𑁩𑁯𑁭. 𑀫𑀦𑁄𑀚𑀚𑀸𑀢𑀓𑀁 (𑁭-𑁧-𑁨)

𑁮. 𑀬𑀣𑀸 𑀘𑀸𑀧𑁄 𑀦𑀺𑀦𑁆𑀦𑀫𑀢𑀺, 𑀚𑀺𑀬𑀸 𑀘𑀸𑀧𑀺 𑀦𑀺𑀓𑀽𑀚𑀢𑀺;

𑀳𑀜𑁆𑀜𑀢𑁂 𑀦𑀽𑀦 𑀫𑀦𑁄𑀚𑁄, 𑀫𑀺𑀕𑀭𑀸𑀚𑀸 𑀲𑀔𑀸 𑀫𑀫.

𑁯. 𑀳𑀦𑁆𑀤 𑀤𑀸𑀦𑀺 𑀯𑀦𑀦𑁆𑀢𑀸𑀦𑀺, 𑀧𑀓𑁆𑀓𑀫𑀸𑀫𑀺 𑀬𑀣𑀸𑀲𑀼𑀔𑀁;

𑀦𑁂𑀢𑀸𑀤𑀺𑀲𑀸 𑀲𑀔𑀸 𑀳𑁄𑀦𑁆𑀢𑀺, 𑀮𑀩𑁆𑀪𑀸 𑀫𑁂 𑀚𑀻𑀯𑀢𑁄 𑀲𑀔𑀸.

𑁧𑁦. 𑀦 𑀧𑀸𑀧𑀚𑀦𑀲𑀁𑀲𑁂𑀯𑀻, 𑀅𑀘𑁆𑀘𑀦𑁆𑀢𑀁 𑀲𑀼𑀔𑀫𑁂𑀥𑀢𑀺;

𑀫𑀦𑁄𑀚𑀁 𑀧𑀲𑁆𑀲 𑀲𑁂𑀫𑀸𑀦𑀁, 𑀕𑀺𑀭𑀺𑀬𑀲𑁆𑀲𑀸𑀦𑀼𑀲𑀸𑀲𑀦𑀻 [𑀅𑀭𑀺𑀬𑀲𑁆𑀲𑀸𑀦𑀼𑀲𑀸𑀲𑀦𑀻 (𑀲𑀻. 𑀲𑁆𑀬𑀸. 𑀧𑀻.)].

𑁧𑁧. 𑀦 𑀧𑀸𑀧𑀲𑀫𑁆𑀧𑀯𑀗𑁆𑀓𑁂𑀦, 𑀫𑀸𑀢𑀸 𑀧𑀼𑀢𑁆𑀢𑁂𑀦 𑀦𑀦𑁆𑀤𑀢𑀺;

𑀫𑀦𑁄𑀚𑀁 𑀧𑀲𑁆𑀲 𑀲𑁂𑀫𑀸𑀦𑀁, 𑀅𑀘𑁆𑀙𑀦𑁆𑀦𑀁 [𑀲𑀘𑁆𑀙𑀦𑁆𑀦𑀁 (𑀓.)] 𑀲𑀫𑁆𑀳𑀺 𑀮𑁄𑀳𑀺𑀢𑁂.

𑁧𑁨. 𑀏𑀯𑀫𑀸𑀧𑀚𑁆𑀚𑀢𑁂 𑀧𑁄𑀲𑁄, 𑀧𑀸𑀧𑀺𑀬𑁄 𑀘 𑀦𑀺𑀕𑀘𑁆𑀙𑀢𑀺;

𑀬𑁄 𑀯𑁂 𑀳𑀺𑀢𑀸𑀦𑀁 𑀯𑀘𑀦𑀁, 𑀦 𑀓𑀭𑁄𑀢𑀺 𑀅𑀢𑁆𑀣𑀤𑀲𑁆𑀲𑀺𑀦𑀁.

𑁧𑁩. 𑀏𑀯𑀜𑁆𑀘 𑀲𑁄 𑀳𑁄𑀢𑀺 𑀢𑀢𑁄 𑀘 𑀧𑀸𑀧𑀺𑀬𑁄, 𑀬𑁄 𑀉𑀢𑁆𑀢𑀫𑁄 𑀅𑀥𑀫𑀚𑀦𑀽𑀧𑀲𑁂𑀯𑀻;

𑀧𑀲𑁆𑀲𑀼𑀢𑁆𑀢𑀫𑀁 𑀅𑀥𑀫𑀚𑀦𑀽𑀧𑀲𑁂𑀯𑀺𑀢𑀁 [𑀲𑁂𑀯𑀺𑀁 (𑀲𑁆𑀬𑀸.)], 𑀫𑀺𑀕𑀸𑀥𑀺𑀧𑀁 𑀲𑀭𑀯𑀭𑀯𑁂𑀕𑀦𑀺𑀤𑁆𑀥𑀼𑀢𑀁.

𑁧𑁪. 𑀦𑀺𑀳𑀻𑀬𑀢𑀺 𑀧𑀼𑀭𑀺𑀲𑁄 𑀦𑀺𑀳𑀻𑀦𑀲𑁂𑀯𑀻, 𑀦 𑀘 𑀳𑀸𑀬𑁂𑀣 𑀓𑀤𑀸𑀘𑀺 𑀢𑀼𑀮𑁆𑀬𑀲𑁂𑀯𑀻;

𑀲𑁂𑀝𑁆𑀞𑀫𑀼𑀧𑀕𑀫𑀁 [𑀫𑀼𑀧𑀦𑀫𑀁 (𑀲𑀻. 𑀧𑀻. 𑀅. 𑀦𑀺. 𑁩.𑁨𑁬)] 𑀉𑀤𑁂𑀢𑀺 𑀔𑀺𑀧𑁆𑀧𑀁, 𑀢𑀲𑁆𑀫𑀸𑀢𑁆𑀢𑀦𑀸 𑀉𑀢𑁆𑀢𑀭𑀺𑀢𑀭𑀁 [𑀢𑀲𑁆𑀫𑀸 𑀅𑀢𑁆𑀢𑀦𑁄 𑀉𑀢𑁆𑀢𑀭𑀺𑀁 (𑀲𑀻. 𑀧𑀻.), 𑀢𑀲𑁆𑀫𑀸 𑀅𑀢𑁆𑀢𑀦𑁄 𑀉𑀢𑁆𑀢𑀭𑀁 (𑀲𑁆𑀬𑀸.)] 𑀪𑀚𑁂𑀣𑀸𑀢𑀺.

𑀫𑀦𑁄𑀚𑀚𑀸𑀢𑀓𑀁 𑀤𑀼𑀢𑀺𑀬𑀁.