𑁩𑁪𑁪. 𑀅𑀫𑁆𑀩𑀚𑀸𑀢𑀓𑀁 (𑁪-𑁫-𑁪)

𑁧𑁭𑁩. 𑀬𑁄 𑀦𑀻𑀮𑀺𑀬𑀁 𑀫𑀡𑁆𑀟𑀬𑀢𑀺, 𑀲𑀡𑁆𑀟𑀸𑀲𑁂𑀦 𑀯𑀺𑀳𑀜𑁆𑀜𑀢𑀺;

𑀢𑀲𑁆𑀲 𑀲𑀸 𑀯𑀲𑀫𑀦𑁆𑀯𑁂𑀢𑀼, 𑀬𑀸 𑀢𑁂 𑀅𑀫𑁆𑀩𑁂 𑀅𑀯𑀸𑀳𑀭𑀺.

𑁧𑁭𑁪. 𑀯𑀻𑀲𑀁 𑀯𑀸 𑀧𑀜𑁆𑀘𑀯𑀻𑀲𑀁 [𑀧𑀡𑁆𑀡𑀼𑀯𑀻𑀲𑀁 (𑀓. 𑀲𑀻. 𑀧𑀻.)] 𑀯𑀸, 𑀊𑀦𑀢𑀺𑀁𑀲𑀁 𑀯 𑀚𑀸𑀢𑀺𑀬𑀸;

𑀢𑀸𑀤𑀺𑀲𑀸 𑀧𑀢𑀺 𑀫𑀸 𑀮𑀤𑁆𑀥𑀸 [𑀧𑀢𑀺𑀁 𑀫𑀸 𑀮𑀤𑁆𑀥𑀸 (𑀧𑀻.), 𑀧𑀢𑀺 𑀫𑀸’𑀮𑀢𑁆𑀣 (?)], 𑀬𑀸 𑀢𑁂 𑀅𑀫𑁆𑀩𑁂 𑀅𑀯𑀸𑀳𑀭𑀺.

𑁧𑁭𑁫. 𑀤𑀻𑀖𑀁 𑀕𑀘𑁆𑀙𑀢𑀼 𑀅𑀤𑁆𑀥𑀸𑀦𑀁, 𑀏𑀓𑀺𑀓𑀸 𑀅𑀪𑀺𑀲𑀸𑀭𑀺𑀓𑀸;

𑀲𑀗𑁆𑀓𑁂𑀢𑁂 𑀧𑀢𑀺 𑀫𑀸 𑀅𑀤𑁆𑀤 [𑀫𑀸 𑀅𑀤𑁆𑀤𑀲 (𑀲𑀻. 𑀧𑀻.)], 𑀬𑀸 𑀢𑁂 𑀅𑀫𑁆𑀩𑁂 𑀅𑀯𑀸𑀳𑀭𑀺.

𑁧𑁭𑁬. 𑀅𑀮𑀗𑁆𑀓𑀢𑀸 𑀲𑀼𑀯𑀲𑀦𑀸, 𑀫𑀸𑀮𑀺𑀦𑀻 𑀘𑀦𑁆𑀤𑀦𑀼𑀲𑁆𑀲𑀤𑀸;

𑀏𑀓𑀺𑀓𑀸 𑀲𑀬𑀦𑁂 𑀲𑁂𑀢𑀼, 𑀬𑀸 𑀢𑁂 𑀅𑀫𑁆𑀩𑁂 𑀅𑀯𑀸𑀳𑀭𑀻𑀢𑀺.

𑀅𑀫𑁆𑀩𑀚𑀸𑀢𑀓𑀁 [𑀅𑀫𑁆𑀩𑀘𑁄𑀭𑀚𑀸𑀢𑀓𑀁 (𑀓. 𑀲𑀻. 𑀧𑀻.)] 𑀘𑀢𑀼𑀢𑁆𑀣𑀁.