𑁩𑁩𑁩. 𑀧𑀓𑁆𑀓𑀕𑁄𑀥𑀚𑀸𑀢𑀓𑀁 (𑁪-𑁪-𑁩)

𑁧𑁨𑁯. 𑀢𑀤𑁂𑀯 𑀫𑁂 𑀢𑁆𑀯𑀁 𑀯𑀺𑀤𑀺𑀢𑁄, 𑀯𑀦𑀫𑀚𑁆𑀛𑁂 𑀭𑀣𑁂𑀲𑀪;

𑀬𑀲𑁆𑀲 𑀢𑁂 𑀔𑀕𑁆𑀕𑀩𑀤𑁆𑀥𑀲𑁆𑀲, 𑀲𑀦𑁆𑀦𑀤𑁆𑀥𑀲𑁆𑀲 𑀢𑀺𑀭𑀻𑀝𑀺𑀦𑁄;

𑀅𑀲𑁆𑀲𑀢𑁆𑀣𑀤𑀼𑀫𑀲𑀸𑀔𑀸𑀬, 𑀧𑀓𑁆𑀓𑀸 𑀕𑁄𑀥𑀸 𑀧𑀮𑀸𑀬𑀣.

𑁧𑁩𑁦. 𑀦𑀫𑁂 𑀦𑀫𑀦𑁆𑀢𑀲𑁆𑀲 𑀪𑀚𑁂 𑀪𑀚𑀦𑁆𑀢𑀁, 𑀓𑀺𑀘𑁆𑀘𑀸𑀦𑀼𑀓𑀼𑀩𑁆𑀩𑀲𑁆𑀲 𑀓𑀭𑁂𑀬𑁆𑀬 𑀓𑀺𑀘𑁆𑀘𑀁;

𑀦𑀸𑀦𑀢𑁆𑀣𑀓𑀸𑀫𑀲𑁆𑀲 𑀓𑀭𑁂𑀬𑁆𑀬 𑀅𑀢𑁆𑀣𑀁, 𑀅𑀲𑀫𑁆𑀪𑀚𑀦𑁆𑀢𑀫𑁆𑀧𑀺 𑀦 𑀲𑀫𑁆𑀪𑀚𑁂𑀬𑁆𑀬.

𑁧𑁩𑁧. 𑀘𑀚𑁂 𑀘𑀚𑀦𑁆𑀢𑀁 𑀯𑀦𑀣𑀁 𑀦 𑀓𑀬𑀺𑀭𑀸, 𑀅𑀧𑁂𑀢𑀘𑀺𑀢𑁆𑀢𑁂𑀦 𑀦 𑀲𑀫𑁆𑀪𑀚𑁂𑀬𑁆𑀬;

𑀤𑀺𑀚𑁄 𑀤𑀼𑀫𑀁 𑀔𑀻𑀡𑀨𑀮𑀦𑁆𑀢𑀺 [𑀨𑀮𑀁𑀯 (𑀓. 𑀲𑀻. 𑀲𑁆𑀬𑀸. 𑀓.), 𑀤𑀼𑀓𑀦𑀺𑀧𑀸𑀢𑁂 𑀧𑀼𑀝𑀪𑀢𑁆𑀢𑀚𑀸𑀢𑀓𑁂𑀦 𑀲𑀁𑀲𑀦𑁆𑀤𑁂𑀢𑀩𑁆𑀩𑀁] 𑀜𑀢𑁆𑀯𑀸, 𑀅𑀜𑁆𑀜𑀁 𑀲𑀫𑁂𑀓𑁆𑀔𑁂𑀬𑁆𑀬 𑀫𑀳𑀸 𑀳𑀺 𑀮𑁄𑀓𑁄.

𑁧𑁩𑁨. 𑀲𑁄 𑀢𑁂 𑀓𑀭𑀺𑀲𑁆𑀲𑀸𑀫𑀺 𑀬𑀣𑀸𑀦𑀼𑀪𑀸𑀯𑀁, 𑀓𑀢𑀜𑁆𑀜𑀼𑀢𑀁 𑀔𑀢𑁆𑀢𑀺𑀬𑁂 [𑀔𑀢𑁆𑀢𑀺𑀬𑁄 (𑀲𑁆𑀬𑀸. 𑀓.)] 𑀧𑁂𑀓𑁆𑀔𑀫𑀸𑀦𑁄;

𑀲𑀩𑁆𑀩𑀜𑁆𑀘 𑀢𑁂 𑀇𑀲𑁆𑀲𑀭𑀺𑀬𑀁 𑀤𑀤𑀸𑀫𑀺, 𑀬𑀲𑁆𑀲𑀺𑀘𑁆𑀙𑀲𑀻 𑀢𑀲𑁆𑀲 𑀢𑀼𑀯𑀁 𑀤𑀤𑀸𑀫𑀻𑀢𑀺.

𑀧𑀓𑁆𑀓𑀕𑁄𑀥𑀚𑀸𑀢𑀓𑀁 [𑀕𑁄𑀥𑀚𑀸𑀢𑀓𑀁 (𑀲𑀻. 𑀲𑁆𑀬𑀸. 𑀧𑀻.)] 𑀢𑀢𑀺𑀬𑀁.