𑁩𑁨𑁧. 𑀓𑀼𑀝𑀺𑀤𑀽𑀲𑀓𑀚𑀸𑀢𑀓𑀁 (𑁪-𑁩-𑁧)

𑁮𑁧. 𑀫𑀦𑀼𑀲𑁆𑀲𑀲𑁆𑀲𑁂𑀯 𑀢𑁂 𑀲𑀻𑀲𑀁, 𑀳𑀢𑁆𑀣𑀧𑀸𑀤𑀸 𑀘 𑀯𑀸𑀦𑀭;

𑀅𑀣 𑀓𑁂𑀦 𑀦𑀼 𑀯𑀡𑁆𑀡𑁂𑀦, 𑀅𑀕𑀸𑀭𑀁 𑀢𑁂 𑀦 𑀯𑀺𑀚𑁆𑀚𑀢𑀺.

𑁮𑁨. 𑀫𑀦𑀼𑀲𑁆𑀲𑀲𑁆𑀲𑁂𑀯 𑀫𑁂 𑀲𑀻𑀲𑀁, 𑀳𑀢𑁆𑀣𑀧𑀸𑀤𑀸 𑀘 𑀲𑀺𑀗𑁆𑀕𑀺𑀮 [𑀲𑀺𑀗𑁆𑀕𑀸𑀮 (𑀓.), 𑀧𑀺𑀗𑁆𑀕𑀮 (𑀝𑀻𑀓𑀸)];

𑀬𑀸𑀳𑀼 𑀲𑁂𑀝𑁆𑀞𑀸 𑀫𑀦𑀼𑀲𑁆𑀲𑁂𑀲𑀼, 𑀲𑀸 𑀫𑁂 𑀧𑀜𑁆𑀜𑀸 𑀦 𑀯𑀺𑀚𑁆𑀚𑀢𑀺.

𑁮𑁩. 𑀅𑀦𑀯𑀝𑁆𑀞𑀺𑀢𑀘𑀺𑀢𑁆𑀢𑀲𑁆𑀲, 𑀮𑀳𑀼𑀘𑀺𑀢𑁆𑀢𑀲𑁆𑀲 𑀤𑀼𑀩𑁆𑀪𑀺𑀦𑁄 [𑀤𑀽𑀪𑀺𑀦𑁄 (𑀧𑀻.)];

𑀦𑀺𑀘𑁆𑀘𑀁 𑀅𑀤𑁆𑀥𑀼𑀯𑀲𑀻𑀮𑀲𑁆𑀲, 𑀲𑀼𑀔𑀪𑀸𑀯𑁄 [𑀲𑀼𑀘𑀺𑀪𑀸𑀯𑁄 (𑀲𑀻.), 𑀲𑀼𑀔𑀪𑀸𑀕𑁄 (?)] 𑀦 𑀯𑀺𑀚𑁆𑀚𑀢𑀺.

𑁮𑁪. 𑀲𑁄 𑀓𑀭𑀲𑁆𑀲𑀼 𑀆𑀦𑀼𑀪𑀸𑀯𑀁, 𑀯𑀻𑀢𑀺𑀯𑀢𑁆𑀢𑀲𑁆𑀲𑀼 𑀲𑀻𑀮𑀺𑀬𑀁;

𑀲𑀻𑀢𑀯𑀸𑀢𑀧𑀭𑀺𑀢𑁆𑀢𑀸𑀡𑀁, 𑀓𑀭𑀲𑁆𑀲𑀼 𑀓𑀼𑀝𑀯𑀁 [𑀓𑀼𑀝𑀺𑀓𑀁 (𑀲𑀻. 𑀲𑁆𑀬𑀸.)] 𑀓𑀧𑀻𑀢𑀺.

𑀓𑀼𑀝𑀺𑀤𑀽𑀲𑀓 [𑀲𑀺𑀗𑁆𑀕𑀸𑀮𑀲𑀓𑀼𑀡 (𑀓.)] 𑀚𑀸𑀢𑀓𑀁 𑀧𑀞𑀫𑀁.