𑁩𑁧𑁭. 𑀫𑀢𑀭𑁄𑀤𑀦𑀚𑀸𑀢𑀓𑀁 (𑁪-𑁨-𑁭)

𑁬𑁫. 𑀫𑀢𑀁 𑀫𑀢𑀁 𑀏𑀯 [𑀫𑀢𑀫𑀢𑀫𑁂𑀯 (𑀲𑀻. 𑀲𑁆𑀬𑀸. 𑀧𑀻.)] 𑀭𑁄𑀤𑀣, 𑀦 𑀳𑀺 𑀢𑀁 𑀭𑁄𑀤𑀣 𑀬𑁄 𑀫𑀭𑀺𑀲𑁆𑀲𑀢𑀺;

𑀲𑀩𑁆𑀩𑁂𑀧𑀺 [𑀲𑀩𑁆𑀩𑁂𑀯 (𑀲𑀻. 𑀲𑁆𑀬𑀸. 𑀧𑀻.)] 𑀲𑀭𑀻𑀭𑀥𑀸𑀭𑀺𑀦𑁄, 𑀅𑀦𑀼𑀧𑀼𑀩𑁆𑀩𑁂𑀦 𑀚𑀳𑀦𑁆𑀢𑀺 𑀚𑀻𑀯𑀺𑀢𑀁.

𑁬𑁬. 𑀤𑁂𑀯𑀫𑀦𑀼𑀲𑁆𑀲𑀸 𑀘𑀢𑀼𑀧𑁆𑀧𑀤𑀸, 𑀧𑀓𑁆𑀔𑀺𑀕𑀡𑀸 𑀉𑀭𑀕𑀸 𑀘 𑀪𑁄𑀕𑀺𑀦𑁄;

𑀲𑀫𑁆𑀳𑀺 [𑀬𑀫𑁆𑀳𑀺 (𑀲𑁆𑀬𑀸.), 𑀅𑀲𑁆𑀫𑀺𑀁 (𑀧𑀻. 𑀓.)] 𑀲𑀭𑀻𑀭𑁂 𑀅𑀦𑀺𑀲𑁆𑀲𑀭𑀸, 𑀭𑀫𑀫𑀸𑀦𑀸𑀯 𑀚𑀳𑀦𑁆𑀢𑀺 𑀚𑀻𑀯𑀺𑀢𑀁.

𑁬𑁭. 𑀏𑀯𑀁 𑀘𑀮𑀺𑀢𑀁 𑀅𑀲𑀡𑁆𑀞𑀺𑀢𑀁, 𑀲𑀼𑀔𑀤𑀼𑀓𑁆𑀔𑀁 𑀫𑀦𑀼𑀚𑁂𑀲𑁆𑀯𑀧𑁂𑀓𑁆𑀔𑀺𑀬;

𑀓𑀦𑁆𑀤𑀺𑀢𑀭𑀼𑀤𑀺𑀢𑀁 𑀦𑀺𑀭𑀢𑁆𑀣𑀓𑀁, 𑀓𑀺𑀁 𑀯𑁄 𑀲𑁄𑀓𑀕𑀡𑀸𑀪𑀺𑀓𑀻𑀭𑀭𑁂.

𑁬𑁮. 𑀥𑀼𑀢𑁆𑀢𑀸 𑀘 𑀲𑁄𑀡𑁆𑀟𑀸 [𑀥𑀼𑀢𑁆𑀢𑀸 𑀲𑁄𑀡𑁆𑀟𑀸 (𑀲𑀻.), 𑀥𑀼𑀢𑁆𑀢𑀸 𑀲𑁄𑀡𑁆𑀟𑀸 𑀘 (𑀲𑁆𑀬𑀸.)] 𑀅𑀓𑀢𑀸, 𑀩𑀸𑀮𑀸 𑀲𑀽𑀭𑀸 𑀅𑀬𑁄𑀕𑀺𑀦𑁄 [𑀩𑀸𑀮𑀸 𑀲𑀽𑀭𑀸 𑀯𑀻𑀭𑀸 𑀅𑀬𑁄𑀕𑀺𑀦𑁄 (𑀧𑀻.)];

𑀥𑀻𑀭𑀁 𑀫𑀜𑁆𑀜𑀦𑁆𑀢𑀺 𑀩𑀸𑀮𑁄𑀢𑀺, 𑀬𑁂 𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑀸𑀢𑀺.

𑀫𑀢𑀭𑁄𑀤𑀦𑀚𑀸𑀢𑀓𑀁 𑀲𑀢𑁆𑀢𑀫𑀁.