𑁩𑁦𑁯. 𑀙𑀯𑀓𑀚𑀸𑀢𑀓𑀁 (𑁪-𑁧-𑁯)

𑁩𑁩. 𑀲𑀩𑁆𑀩𑀫𑀺𑀤𑀁 𑀘𑀭𑀺𑀫𑀁 𑀓𑀢𑀁 [𑀘𑀭𑀺𑀫𑀯𑀢𑀁 (𑀲𑀻. 𑀧𑀻.)], 𑀉𑀪𑁄 𑀥𑀫𑁆𑀫𑀁 𑀦 𑀧𑀲𑁆𑀲𑀭𑁂;

𑀉𑀪𑁄 𑀧𑀓𑀢𑀺𑀬𑀸 𑀘𑀼𑀢𑀸, 𑀬𑁄 𑀘𑀸𑀬𑀁 𑀫𑀦𑁆𑀢𑁂𑀚𑁆𑀛𑀸𑀧𑁂𑀢𑀺 [𑀫𑀦𑁆𑀢𑀚𑁆𑀛𑀸𑀬𑀢𑀺 (𑀲𑀻.), 𑀲𑀚𑁆𑀛𑀸𑀧𑀬𑀢𑀺 (𑀧𑀻.)];

𑀬𑁄 𑀘 𑀫𑀦𑁆𑀢𑀁 𑀅𑀥𑀻𑀬𑀢𑀺.

𑁩𑁪. 𑀲𑀸𑀮𑀻𑀦𑀁 𑀑𑀤𑀦𑀁 𑀪𑀼𑀜𑁆𑀚𑁂, 𑀲𑀼𑀘𑀺𑀁 𑀫𑀁𑀲𑀽𑀧𑀲𑁂𑀘𑀦𑀁;

𑀢𑀲𑁆𑀫𑀸 𑀏𑀢𑀁 𑀦 𑀲𑁂𑀯𑀸𑀫𑀺, 𑀥𑀫𑁆𑀫𑀁 𑀇𑀲𑀻𑀳𑀺 𑀲𑁂𑀯𑀺𑀢𑀁.

𑁩𑁫. 𑀧𑀭𑀺𑀩𑁆𑀩𑀚 𑀫𑀳𑀸 𑀮𑁄𑀓𑁄 [𑀫𑀳𑀸𑀩𑁆𑀭𑀳𑁆𑀫𑁂 (𑀓.)], 𑀧𑀘𑀦𑁆𑀢𑀜𑁆𑀜𑁂𑀧𑀺 𑀧𑀸𑀡𑀺𑀦𑁄;

𑀫𑀸 𑀢𑀁 𑀅𑀥𑀫𑁆𑀫𑁄 𑀆𑀘𑀭𑀺𑀢𑁄, 𑀅𑀲𑁆𑀫𑀸 𑀓𑀼𑀫𑁆𑀪𑀫𑀺𑀯𑀸𑀪𑀺𑀤𑀸.

𑁩𑁬. 𑀥𑀺𑀭𑀢𑁆𑀣𑀼 𑀢𑀁 𑀬𑀲𑀮𑀸𑀪𑀁, 𑀥𑀦𑀮𑀸𑀪𑀜𑁆𑀘 𑀩𑁆𑀭𑀸𑀳𑁆𑀫𑀡;

𑀬𑀸 𑀯𑀼𑀢𑁆𑀢𑀺 𑀯𑀺𑀦𑀺𑀧𑀸𑀢𑁂𑀦, 𑀅𑀥𑀫𑁆𑀫𑀘𑀭𑀡𑁂𑀦 𑀯𑀸𑀢𑀺.

𑀙𑀯𑀓𑀚𑀸𑀢𑀓𑀁 𑀦𑀯𑀫𑀁.