𑁧. 𑀓𑀸𑀮𑀺𑀗𑁆𑀕𑀯𑀕𑁆𑀕𑁄

𑁩𑁦𑁧. 𑀘𑀽𑀴𑀓𑀸𑀮𑀺𑀗𑁆𑀕𑀚𑀸𑀢𑀓𑀁 (𑁪-𑁧-𑁧)

𑁧. 𑀯𑀺𑀯𑀭𑀣𑀺𑀫𑀸𑀲𑀁 [𑀯𑀺𑀯𑀭𑀣 𑀇𑀫𑀸𑀲𑀁 (𑀲𑀻. 𑀲𑁆𑀬𑀸. 𑀧𑀻.)] 𑀤𑁆𑀯𑀸𑀭𑀁, 𑀦𑀕𑀭𑀁 𑀧𑀯𑀺𑀲𑀦𑁆𑀢𑀼 [𑀧𑀯𑀺𑀲𑀺𑀢𑀼𑀁 𑀫𑀬𑀸; (𑀓.)] 𑀅𑀭𑀼𑀡𑀭𑀸𑀚𑀲𑁆𑀲;

𑀲𑀻𑀳𑁂𑀦 𑀲𑀼𑀲𑀺𑀝𑁆𑀞𑁂𑀦, 𑀲𑀼𑀭𑀓𑁆𑀔𑀺𑀢𑀁 [𑀲𑀼𑀲𑀢𑁆𑀣𑁂𑀦, 𑀲𑀼𑀭𑀓𑁆𑀔𑀺𑀢𑀁 (𑀲𑀻. 𑀧𑀻.), 𑀲𑀼𑀲𑀺𑀝𑁆𑀞𑁂𑀦 (𑀓.)] 𑀦𑀦𑁆𑀤𑀺𑀲𑁂𑀦𑁂𑀦.

𑁨. 𑀚𑀬𑁄 𑀓𑀮𑀺𑀗𑁆𑀕𑀸𑀦𑀫𑀲𑀬𑁆𑀳𑀲𑀸𑀳𑀺𑀦𑀁, 𑀧𑀭𑀸𑀚𑀬𑁄 𑀅𑀦𑀬𑁄 [𑀅𑀚𑀬𑁄 (𑀲𑁆𑀬𑀸.), 𑀅𑀦𑁆𑀯𑀺𑀢𑁄 (𑀓.)] 𑀅𑀲𑁆𑀲𑀓𑀸𑀦𑀁;

𑀇𑀘𑁆𑀘𑁂𑀯 𑀢𑁂 𑀪𑀸𑀲𑀺𑀢𑀁 𑀩𑁆𑀭𑀳𑁆𑀫𑀘𑀸𑀭𑀺, 𑀦 𑀉𑀚𑁆𑀚𑀼𑀪𑀽𑀢𑀸 𑀯𑀺𑀢𑀣𑀁 𑀪𑀡𑀦𑁆𑀢𑀺.

𑁩. 𑀤𑁂𑀯𑀸 𑀫𑀼𑀲𑀸𑀯𑀸𑀤𑀫𑀼𑀧𑀸𑀢𑀺𑀯𑀢𑁆𑀢𑀸, 𑀲𑀘𑁆𑀘𑀁 𑀥𑀦𑀁 𑀧𑀭𑀫𑀁 𑀢𑁂𑀲𑀼 [𑀢𑀣𑀁 𑀧𑁂𑀫𑀓𑀭𑀁 𑀦𑀼 (𑀓.), 𑀢𑀣𑀁 𑀧𑀭𑀫𑀁 𑀓𑀭𑀁 𑀦𑀼 (𑀲𑁆𑀬𑀸.)] 𑀲𑀓𑁆𑀓;

𑀢𑀁 𑀢𑁂 𑀫𑀼𑀲𑀸 𑀪𑀸𑀲𑀺𑀢𑀁 𑀤𑁂𑀯𑀭𑀸𑀚, 𑀓𑀺𑀁 𑀯𑀸 𑀧𑀝𑀺𑀘𑁆𑀘 𑀫𑀖𑀯𑀸 𑀫𑀳𑀺𑀦𑁆𑀤.

𑁪. 𑀦𑀦𑀼 𑀢𑁂 𑀲𑀼𑀢𑀁 𑀩𑁆𑀭𑀸𑀳𑁆𑀫𑀡 𑀪𑀜𑁆𑀜𑀫𑀸𑀦𑁂, 𑀤𑁂𑀯𑀸 𑀦 𑀇𑀲𑁆𑀲𑀦𑁆𑀢𑀺 𑀧𑀼𑀭𑀺𑀲𑀧𑀭𑀓𑁆𑀓𑀫𑀲𑁆𑀲;

𑀤𑀫𑁄 𑀲𑀫𑀸𑀥𑀺 𑀫𑀦𑀲𑁄 𑀅𑀪𑁂𑀚𑁆𑀚𑁄 [𑀅𑀤𑁂𑀚𑁆𑀚𑁄 (𑀲𑀻. 𑀧𑀻.), 𑀅𑀪𑀺𑀚𑁆𑀚𑁄 (𑀓.)], 𑀅𑀩𑁆𑀬𑀕𑁆𑀕𑀢𑀸 𑀦𑀺𑀓𑁆𑀓𑀫𑀦𑀜𑁆𑀘 [𑀦𑀺𑀓𑁆𑀔𑀫𑀦𑀜𑁆𑀘 (𑀲𑀻.)] 𑀓𑀸𑀮𑁂;

𑀤𑀴𑁆𑀳𑀜𑁆𑀘 𑀯𑀺𑀭𑀺𑀬𑀁 𑀧𑀼𑀭𑀺𑀲𑀧𑀭𑀓𑁆𑀓𑀫𑁄 𑀘, 𑀢𑁂𑀦𑁂𑀯 𑀆𑀲𑀺 𑀯𑀺𑀚𑀬𑁄 𑀅𑀲𑁆𑀲𑀓𑀸𑀦𑀦𑁆𑀢𑀺.

𑀘𑀽𑀴𑀓𑀸𑀮𑀺𑀗𑁆𑀕𑀚𑀸𑀢𑀓𑀁 𑀧𑀞𑀫𑀁.

𑁩𑁦𑁨. 𑀫𑀳𑀸𑀅𑀲𑁆𑀲𑀸𑀭𑁄𑀳𑀚𑀸𑀢𑀓𑀁 (𑁪-𑁧-𑁨)

𑁫. 𑀅𑀤𑁂𑀬𑁆𑀬𑁂𑀲𑀼 𑀤𑀤𑀁 𑀤𑀸𑀦𑀁, 𑀤𑁂𑀬𑁆𑀬𑁂𑀲𑀼 𑀦𑀧𑁆𑀧𑀯𑁂𑀘𑁆𑀙𑀢𑀺;

𑀆𑀧𑀸𑀲𑀼 𑀩𑁆𑀬𑀲𑀦𑀁 𑀧𑀢𑁆𑀢𑁄, 𑀲𑀳𑀸𑀬𑀁 𑀦𑀸𑀥𑀺𑀕𑀘𑁆𑀙𑀢𑀺.

𑁬. 𑀦𑀸𑀤𑁂𑀬𑁆𑀬𑁂𑀲𑀼 𑀤𑀤𑀁 𑀤𑀸𑀦𑀁, 𑀤𑁂𑀬𑁆𑀬𑁂𑀲𑀼 𑀬𑁄 𑀧𑀯𑁂𑀘𑁆𑀙𑀢𑀺;

𑀆𑀧𑀸𑀲𑀼 𑀩𑁆𑀬𑀲𑀦𑀁 𑀧𑀢𑁆𑀢𑁄, 𑀲𑀳𑀸𑀬𑀫𑀥𑀺𑀕𑀘𑁆𑀙𑀢𑀺.

𑁭. 𑀲𑀜𑁆𑀜𑁄𑀕𑀲𑀫𑁆𑀪𑁄𑀕𑀯𑀺𑀲𑁂𑀲𑀤𑀲𑁆𑀲𑀦𑀁, 𑀅𑀦𑀭𑀺𑀬𑀥𑀫𑁆𑀫𑁂𑀲𑀼 𑀲𑀞𑁂𑀲𑀼 𑀦𑀲𑁆𑀲𑀢𑀺;

𑀓𑀢𑀜𑁆𑀘 𑀅𑀭𑀺𑀬𑁂𑀲𑀼 𑀘 𑀅𑀚𑁆𑀚𑀯𑁂𑀲𑀼, 𑀫𑀳𑀧𑁆𑀨𑀮𑀁 𑀳𑁄𑀢𑀺 𑀅𑀡𑀼𑀫𑁆𑀧𑀺 𑀢𑀸𑀤𑀺𑀲𑀼.

𑁮. 𑀬𑁄 𑀧𑀼𑀩𑁆𑀩𑁂 𑀓𑀢𑀓𑀮𑁆𑀬𑀸𑀡𑁄, 𑀅𑀓𑀸 𑀮𑁄𑀓𑁂 𑀲𑀼𑀤𑀼𑀓𑁆𑀓𑀭𑀁;

𑀧𑀘𑁆𑀙𑀸 𑀓𑀬𑀺𑀭𑀸 𑀦 𑀯𑀸 𑀓𑀬𑀺𑀭𑀸, 𑀅𑀘𑁆𑀘𑀦𑁆𑀢𑀁 𑀧𑀽𑀚𑀦𑀸𑀭𑀳𑁄𑀢𑀺.

𑀫𑀳𑀸𑀅𑀲𑁆𑀲𑀸𑀭𑁄𑀳𑀚𑀸𑀢𑀓𑀁 𑀤𑀼𑀢𑀺𑀬𑀁.

𑁩𑁦𑁩. 𑀏𑀓𑀭𑀸𑀚𑀚𑀸𑀢𑀓𑀁 (𑁪-𑁧-𑁩)

𑁯. 𑀅𑀦𑀼𑀢𑁆𑀢𑀭𑁂 𑀓𑀸𑀫𑀕𑀼𑀡𑁂 𑀲𑀫𑀺𑀤𑁆𑀥𑁂, 𑀪𑀼𑀢𑁆𑀯𑀸𑀦 𑀧𑀼𑀩𑁆𑀩𑁂 𑀯𑀲𑀻 𑀏𑀓𑀭𑀸𑀚;

𑀲𑁄 𑀤𑀸𑀦𑀺 𑀤𑀼𑀕𑁆𑀕𑁂 𑀦𑀭𑀓𑀫𑁆𑀳𑀺 𑀔𑀺𑀢𑁆𑀢𑁄, 𑀦𑀧𑁆𑀧𑀚𑁆𑀚𑀳𑁂 𑀯𑀡𑁆𑀡𑀩𑀮𑀁 𑀧𑀼𑀭𑀸𑀡𑀁.

𑁧𑁦. 𑀧𑀼𑀩𑁆𑀩𑁂𑀯 𑀔𑀦𑁆𑀢𑀻 𑀘 𑀢𑀧𑁄 𑀘 𑀫𑀬𑁆𑀳𑀁, 𑀲𑀫𑁆𑀧𑀢𑁆𑀣𑀺𑀢𑀸 𑀤𑀼𑀩𑁆𑀪𑀺𑀲𑁂𑀦 [𑀤𑀩𑁆𑀩𑀲𑁂𑀦𑀸 (𑀲𑀻. 𑀧𑀻.)] 𑀅𑀳𑁄𑀲𑀺;

𑀢𑀁 𑀤𑀸𑀦𑀺 𑀮𑀤𑁆𑀥𑀸𑀦 𑀓𑀣𑀁 𑀦𑀼 𑀭𑀸𑀚, 𑀚𑀳𑁂 𑀅𑀳𑀁 𑀯𑀡𑁆𑀡𑀩𑀮𑀁 𑀧𑀼𑀭𑀸𑀡𑀁.

𑁧𑁧. 𑀲𑀩𑁆𑀩𑀸 𑀓𑀺𑀭𑁂𑀯𑀁 𑀧𑀭𑀺𑀦𑀺𑀝𑁆𑀞𑀺𑀢𑀸𑀦𑀺, 𑀬𑀲𑀲𑁆𑀲𑀺𑀦𑀁 𑀧𑀜𑁆𑀜𑀯𑀦𑁆𑀢𑀁 𑀯𑀺𑀲𑀬𑁆𑀳;

𑀬𑀲𑁄 𑀘 𑀮𑀤𑁆𑀥𑀸 𑀧𑀼𑀭𑀺𑀫𑀁 𑀉𑀴𑀸𑀭𑀁, 𑀦𑀧𑁆𑀧𑀚𑁆𑀚𑀳𑁂 𑀯𑀡𑁆𑀡𑀩𑀮𑀁 𑀧𑀼𑀭𑀸𑀡𑀁.

𑁧𑁨. 𑀧𑀦𑀼𑀚𑁆𑀚 𑀤𑀼𑀓𑁆𑀔𑁂𑀦 𑀲𑀼𑀔𑀁 𑀚𑀦𑀺𑀦𑁆𑀤, 𑀲𑀼𑀔𑁂𑀦 𑀯𑀸 𑀤𑀼𑀓𑁆𑀔𑀫𑀲𑀬𑁆𑀳𑀲𑀸𑀳𑀺;

𑀉𑀪𑀬𑀢𑁆𑀣 𑀲𑀦𑁆𑀢𑁄 𑀅𑀪𑀺𑀦𑀺𑀩𑁆𑀩𑀼𑀢𑀢𑁆𑀢𑀸, 𑀲𑀼𑀔𑁂 𑀘 𑀤𑀼𑀓𑁆𑀔𑁂 𑀘 𑀪𑀯𑀦𑁆𑀢𑀺 𑀢𑀼𑀮𑁆𑀬𑀸𑀢𑀺.

𑀏𑀓𑀭𑀸𑀚𑀚𑀸𑀢𑀓𑀁 𑀢𑀢𑀺𑀬𑀁.

𑁩𑁦𑁪. 𑀤𑀤𑁆𑀤𑀭𑀚𑀸𑀢𑀓𑀁 (𑁪-𑁧-𑁪)

𑁧𑁩. 𑀇𑀫𑀸𑀦𑀺 𑀫𑀁 𑀤𑀤𑁆𑀤𑀭 𑀢𑀸𑀧𑀬𑀦𑁆𑀢𑀺, 𑀯𑀸𑀘𑀸𑀤𑀼𑀭𑀼𑀢𑁆𑀢𑀸𑀦𑀺 𑀫𑀦𑀼𑀲𑁆𑀲𑀮𑁄𑀓𑁂;

𑀫𑀡𑁆𑀟𑀽𑀓𑀪𑀓𑁆𑀔𑀸 𑀉𑀤𑀓𑀦𑁆𑀢𑀲𑁂𑀯𑀻, 𑀆𑀲𑀻𑀯𑀺𑀲𑀁 𑀫𑀁 𑀅𑀯𑀺𑀲𑀸 𑀲𑀧𑀦𑁆𑀢𑀺.

𑁧𑁪. 𑀲𑀓𑀸 𑀭𑀝𑁆𑀞𑀸 𑀧𑀩𑁆𑀩𑀸𑀚𑀺𑀢𑁄, 𑀅𑀜𑁆𑀜𑀁 𑀚𑀦𑀧𑀤𑀁 𑀕𑀢𑁄;

𑀫𑀳𑀦𑁆𑀢𑀁 𑀓𑁄𑀝𑁆𑀞𑀁 𑀓𑀬𑀺𑀭𑀸𑀣, 𑀤𑀼𑀭𑀼𑀢𑁆𑀢𑀸𑀦𑀁 [𑀤𑀼𑀭𑀼𑀢𑁆𑀢𑀸𑀦𑀺 (𑀓.)] 𑀦𑀺𑀥𑁂𑀢𑀯𑁂.

𑁧𑁫. 𑀬𑀢𑁆𑀣 𑀧𑁄𑀲𑀁 𑀦 𑀚𑀸𑀦𑀦𑁆𑀢𑀺, 𑀚𑀸𑀢𑀺𑀬𑀸 𑀯𑀺𑀦𑀬𑁂𑀦 𑀯𑀸;

𑀦 𑀢𑀢𑁆𑀣 𑀫𑀸𑀦𑀁 𑀓𑀬𑀺𑀭𑀸𑀣, 𑀯𑀲𑀫𑀜𑁆𑀜𑀸𑀢𑀓𑁂 𑀚𑀦𑁂.

𑁧𑁬. 𑀯𑀺𑀤𑁂𑀲𑀯𑀸𑀲𑀁 𑀯𑀲𑀢𑁄, 𑀚𑀸𑀢𑀯𑁂𑀤𑀲𑀫𑁂𑀦𑀧𑀺 [𑀚𑀸𑀢𑀯𑁂𑀤𑀪𑀬𑁂𑀦𑀧𑀺 (𑀓.)];

𑀔𑀫𑀺𑀢𑀩𑁆𑀩𑀁 𑀲𑀧𑀜𑁆𑀜𑁂𑀦, 𑀅𑀧𑀺 𑀤𑀸𑀲𑀲𑁆𑀲 𑀢𑀚𑁆𑀚𑀺𑀢𑀦𑁆𑀢𑀺.

𑀤𑀤𑁆𑀤𑀭𑀚𑀸𑀢𑀓𑀁 𑀘𑀢𑀼𑀢𑁆𑀣𑀁.

𑁩𑁦𑁫. 𑀲𑀻𑀮𑀯𑀻𑀫𑀁𑀲𑀦𑀚𑀸𑀢𑀓𑀁 (𑁪-𑁧-𑁫)

𑁧𑁭. 𑀦𑀢𑁆𑀣𑀺 𑀮𑁄𑀓𑁂 𑀭𑀳𑁄 𑀦𑀸𑀫, 𑀧𑀸𑀧𑀓𑀫𑁆𑀫𑀁 𑀧𑀓𑀼𑀩𑁆𑀩𑀢𑁄;

𑀧𑀲𑁆𑀲𑀦𑁆𑀢𑀺 𑀯𑀦𑀪𑀽𑀢𑀸𑀦𑀺, 𑀢𑀁 𑀩𑀸𑀮𑁄 𑀫𑀜𑁆𑀜𑀢𑀻 𑀭𑀳𑁄.

𑁧𑁮. 𑀅𑀳𑀁 𑀭𑀳𑁄 𑀦 𑀧𑀲𑁆𑀲𑀸𑀫𑀺, 𑀲𑀼𑀜𑁆𑀜𑀁 𑀯𑀸𑀧𑀺 𑀦 𑀯𑀺𑀚𑁆𑀚𑀢𑀺;

𑀬𑀢𑁆𑀣 𑀅𑀜𑁆𑀜𑀁 [𑀲𑀼𑀜𑁆𑀜𑀁 (𑀲𑁆𑀬𑀸. 𑀓.)] 𑀦 𑀧𑀲𑁆𑀲𑀸𑀫𑀺, 𑀅𑀲𑀼𑀜𑁆𑀜𑀁 𑀳𑁄𑀢𑀺 𑀢𑀁 𑀫𑀬𑀸.

𑁧𑁯. 𑀤𑀼𑀚𑁆𑀚𑀘𑁆𑀘𑁄 𑀘 𑀲𑀼𑀚𑀘𑁆𑀘𑁄 [𑀅𑀚𑀘𑁆𑀘𑁄 (𑀧𑀻.)] 𑀘, 𑀦𑀦𑁆𑀤𑁄 𑀘 𑀲𑀼𑀔𑀯𑀟𑁆𑀠𑀺𑀢𑁄 [𑀲𑀼𑀔𑀯𑀘𑁆𑀙𑀓𑁄 (𑀲𑀻.), 𑀲𑀼𑀔𑀯𑀘𑁆𑀙𑀦𑁄 (𑀲𑁆𑀬𑀸. 𑀧𑀻.)];

𑀯𑁂𑀚𑁆𑀚𑁄 𑀘 𑀅𑀤𑁆𑀥𑀼𑀯𑀲𑀻𑀮𑁄 [𑀅𑀣 𑀲𑀻𑀮𑁄 (𑀓.)] 𑀘, 𑀢𑁂 𑀥𑀫𑁆𑀫𑀁 𑀚𑀳𑀼 𑀫𑀢𑁆𑀣𑀺𑀓𑀸.

𑁨𑁦. 𑀩𑁆𑀭𑀸𑀳𑁆𑀫𑀡𑁄 𑀘 𑀓𑀣𑀁 𑀚𑀳𑁂, 𑀲𑀩𑁆𑀩𑀥𑀫𑁆𑀫𑀸𑀦 𑀧𑀸𑀭𑀕𑀽;

𑀬𑁄 𑀥𑀫𑁆𑀫𑀫𑀦𑀼𑀧𑀸𑀮𑁂𑀢𑀺, 𑀥𑀺𑀢𑀺𑀫𑀸 𑀲𑀘𑁆𑀘𑀦𑀺𑀓𑁆𑀓𑀫𑁄𑀢𑀺.

𑀲𑀻𑀮𑀯𑀻𑀫𑀁𑀲𑀦𑀚𑀸𑀢𑀓𑀁 𑀧𑀜𑁆𑀘𑀫𑀁.

𑁩𑁦𑁬. 𑀲𑀼𑀚𑀸𑀢𑀚𑀸𑀢𑀓𑀁 (𑁪-𑁧-𑁬)

𑁨𑁧. 𑀓𑀺𑀫𑀡𑁆𑀟𑀓𑀸 𑀇𑀫𑁂 𑀤𑁂𑀯, 𑀦𑀺𑀓𑁆𑀔𑀺𑀢𑁆𑀢𑀸 𑀓𑀁𑀲𑀫𑀮𑁆𑀮𑀓𑁂;

𑀉𑀧𑀮𑁄𑀳𑀺𑀢𑀓𑀸 𑀯𑀕𑁆𑀕𑀽, 𑀢𑀁 [𑀢𑁂 (𑀧𑀻.)] 𑀫𑁂 𑀅𑀓𑁆𑀔𑀸𑀳𑀺 𑀧𑀼𑀘𑁆𑀙𑀺𑀢𑁄.

𑁨𑁨. 𑀬𑀸𑀦𑀺 𑀧𑀼𑀭𑁂 𑀢𑀼𑀯𑀁 𑀤𑁂𑀯𑀺, 𑀪𑀡𑁆𑀟𑀼 𑀦𑀦𑁆𑀢𑀓𑀯𑀸𑀲𑀺𑀦𑀻;

𑀉𑀘𑁆𑀙𑀗𑁆𑀕𑀳𑀢𑁆𑀣𑀸 𑀧𑀘𑀺𑀦𑀸𑀲𑀺, 𑀢𑀲𑁆𑀲𑀸 𑀢𑁂 𑀓𑁄𑀮𑀺𑀬𑀁 𑀨𑀮𑀁.

𑁨𑁩. 𑀉𑀟𑁆𑀟𑀬𑁆𑀳𑀢𑁂 𑀦 𑀭𑀫𑀢𑀺, 𑀪𑁄𑀕𑀸 𑀯𑀺𑀧𑁆𑀧𑀚𑀳𑀦𑁆𑀢𑀺 𑀢𑀁 [𑀯𑀺𑀧𑁆𑀧𑀚𑀳𑀦𑁆𑀢𑀺’𑀫𑀁 (?)];

𑀢𑀢𑁆𑀣𑁂𑀯𑀺𑀫𑀁 𑀧𑀝𑀺𑀦𑁂𑀣, 𑀬𑀢𑁆𑀣 𑀓𑁄𑀮𑀁 𑀧𑀘𑀺𑀲𑁆𑀲𑀢𑀺.

𑁨𑁪. 𑀳𑁄𑀦𑁆𑀢𑀺 𑀳𑁂𑀢𑁂 𑀫𑀳𑀸𑀭𑀸𑀚, 𑀇𑀤𑁆𑀥𑀺𑀧𑁆𑀧𑀢𑁆𑀢𑀸𑀬 [𑀇𑀤𑁆𑀥𑀺𑀫𑀢𑁆𑀢𑀸𑀬 (𑀓.)] 𑀦𑀸𑀭𑀺𑀬𑀸;

𑀔𑀫 𑀤𑁂𑀯 𑀲𑀼𑀚𑀸𑀢𑀸𑀬, 𑀫𑀸𑀲𑁆𑀲𑀸 [𑀫𑀸𑀲𑀼 (𑀓.)] 𑀓𑀼𑀚𑁆𑀛 𑀭𑀣𑁂𑀲𑀪𑀸𑀢𑀺.

𑀲𑀼𑀚𑀸𑀢𑀚𑀸𑀢𑀓𑀁 𑀙𑀝𑁆𑀞𑀁.

𑁩𑁦𑁭. 𑀧𑀮𑀸𑀲𑀚𑀸𑀢𑀓𑀁 (𑁪-𑁧-𑁭)

𑁨𑁫. 𑀅𑀘𑁂𑀢𑀦𑀁 𑀩𑁆𑀭𑀸𑀳𑁆𑀫𑀡 𑀅𑀲𑁆𑀲𑀼𑀡𑀦𑁆𑀢𑀁, 𑀚𑀸𑀦𑁄 𑀅𑀚𑀸𑀦𑀦𑁆𑀢𑀫𑀺𑀫𑀁 𑀧𑀮𑀸𑀲𑀁;

𑀆𑀭𑀤𑁆𑀥𑀯𑀺𑀭𑀺𑀬𑁄 𑀥𑀼𑀯𑀁 𑀅𑀧𑁆𑀧𑀫𑀢𑁆𑀢𑁄, 𑀲𑀼𑀔𑀲𑁂𑀬𑁆𑀬𑀁 𑀧𑀼𑀘𑁆𑀙𑀲𑀺 𑀓𑀺𑀲𑁆𑀲 𑀳𑁂𑀢𑀼.

𑁨𑁬. 𑀤𑀽𑀭𑁂 𑀲𑀼𑀢𑁄 𑀘𑁂𑀯 𑀩𑁆𑀭𑀳𑀸 𑀘 𑀭𑀼𑀓𑁆𑀔𑁄, 𑀤𑁂𑀲𑁂 𑀞𑀺𑀢𑁄 𑀪𑀽𑀢𑀦𑀺𑀯𑀸𑀲𑀭𑀽𑀧𑁄;

𑀢𑀲𑁆𑀫𑀸 𑀦𑀫𑀲𑁆𑀲𑀸𑀫𑀺 𑀇𑀫𑀁 𑀧𑀮𑀸𑀲𑀁, 𑀬𑁂 𑀘𑁂𑀢𑁆𑀣 𑀪𑀽𑀢𑀸 𑀢𑁂 [𑀢𑁂 𑀘 (𑀲𑀻. 𑀧𑀻.)] 𑀥𑀦𑀲𑁆𑀲 𑀳𑁂𑀢𑀼.

𑁨𑁭. 𑀲𑁄 𑀢𑁂 𑀓𑀭𑀺𑀲𑁆𑀲𑀸𑀫𑀺 𑀬𑀣𑀸𑀦𑀼𑀪𑀸𑀯𑀁, 𑀓𑀢𑀜𑁆𑀜𑀼𑀢𑀁 𑀩𑁆𑀭𑀸𑀳𑁆𑀫𑀡 𑀧𑁂𑀓𑁆𑀔𑀫𑀸𑀦𑁄;

𑀓𑀣𑀜𑁆𑀳𑀺 𑀆𑀕𑀫𑁆𑀫 𑀲𑀢𑀁 𑀲𑀓𑀸𑀲𑁂, 𑀫𑁄𑀖𑀸𑀦𑀺 𑀢𑁂 𑀅𑀲𑁆𑀲𑀼 𑀧𑀭𑀺𑀨𑀦𑁆𑀤𑀺𑀢𑀸𑀦𑀺.

𑁨𑁮. 𑀬𑁄 𑀢𑀺𑀦𑁆𑀤𑀼𑀓𑀭𑀼𑀓𑁆𑀔𑀲𑁆𑀲 𑀧𑀭𑁄 [𑀧𑀼𑀭𑁄 (𑀓.)] 𑀧𑀺𑀮𑀓𑁆𑀔𑁄 [𑀧𑀺𑀮𑀓𑁆𑀔𑀼 (𑀲𑀻. 𑀧𑀻.), 𑀫𑀺𑀮𑀓𑁆𑀔𑀼 (𑀓.)], 𑀧𑀭𑀺𑀯𑀸𑀭𑀺𑀢𑁄 𑀧𑀼𑀩𑁆𑀩𑀬𑀜𑁆𑀜𑁄 𑀉𑀴𑀸𑀭𑁄;

𑀢𑀲𑁆𑀲𑁂𑀲 𑀫𑀽𑀮𑀲𑁆𑀫𑀺𑀁 𑀦𑀺𑀥𑀺 𑀦𑀺𑀔𑀸𑀢𑁄, 𑀅𑀤𑀸𑀬𑀸𑀤𑁄 𑀕𑀘𑁆𑀙 𑀢𑀁 𑀉𑀤𑁆𑀥𑀭𑀸𑀳𑀻𑀢𑀺.

𑀧𑀮𑀸𑀲𑀚𑀸𑀢𑀓𑀁 𑀲𑀢𑁆𑀢𑀫𑀁.

𑁩𑁦𑁮. 𑀲𑀓𑀼𑀡𑀚𑀸𑀢𑀓𑀁 (𑁪-𑁧-𑁮)

𑁨𑁯. 𑀅𑀓𑀭𑀫𑁆𑀳𑀲 𑀢𑁂 𑀓𑀺𑀘𑁆𑀘𑀁, 𑀬𑀁 𑀩𑀮𑀁 𑀅𑀳𑀼𑀯𑀫𑁆𑀳𑀲𑁂;

𑀫𑀺𑀕𑀭𑀸𑀚 𑀦𑀫𑁄 𑀢𑁆𑀬𑀢𑁆𑀣𑀼, 𑀅𑀧𑀺 𑀓𑀺𑀜𑁆𑀘𑀺 𑀮𑀪𑀸𑀫𑀲𑁂.

𑁩𑁦. 𑀫𑀫 𑀮𑁄𑀳𑀺𑀢𑀪𑀓𑁆𑀔𑀲𑁆𑀲, 𑀦𑀺𑀘𑁆𑀘𑀁 𑀮𑀼𑀤𑁆𑀤𑀸𑀦𑀺 𑀓𑀼𑀩𑁆𑀩𑀢𑁄;

𑀤𑀦𑁆𑀢𑀦𑁆𑀢𑀭𑀕𑀢𑁄 𑀲𑀦𑁆𑀢𑁄, 𑀢𑀁 𑀩𑀳𑀼𑀁 𑀬𑀫𑁆𑀧𑀺 𑀚𑀻𑀯𑀲𑀺.

𑁩𑁧. 𑀅𑀓𑀢𑀜𑁆𑀜𑀼𑀫𑀓𑀢𑁆𑀢𑀸𑀭𑀁, 𑀓𑀢𑀲𑁆𑀲 𑀅𑀧𑁆𑀧𑀝𑀺𑀓𑀸𑀭𑀓𑀁;

𑀬𑀲𑁆𑀫𑀺𑀁 𑀓𑀢𑀜𑁆𑀜𑀼𑀢𑀸 𑀦𑀢𑁆𑀣𑀺, 𑀦𑀺𑀭𑀢𑁆𑀣𑀸 𑀢𑀲𑁆𑀲 𑀲𑁂𑀯𑀦𑀸.

𑁩𑁨. 𑀬𑀲𑁆𑀲 𑀲𑀫𑁆𑀫𑀼𑀔𑀘𑀺𑀡𑁆𑀡𑁂𑀦, 𑀫𑀺𑀢𑁆𑀢𑀥𑀫𑁆𑀫𑁄 𑀦 𑀮𑀩𑁆𑀪𑀢𑀺;

𑀅𑀦𑀼𑀲𑀽𑀬 [𑀅𑀦𑀼𑀲𑀼𑀬𑁆𑀬 (𑀲𑀻. 𑀧𑀻.)] 𑀫𑀦𑀓𑁆𑀓𑁄𑀲𑀁, 𑀲𑀡𑀺𑀓𑀁 𑀢𑀫𑁆𑀳𑀸 𑀅𑀧𑀓𑁆𑀓𑀫𑁂𑀢𑀺.

𑀲𑀓𑀼𑀡𑀚𑀸𑀢𑀓𑀁 𑀅𑀝𑁆𑀞𑀫𑀁.

𑁩𑁦𑁯. 𑀙𑀯𑀓𑀚𑀸𑀢𑀓𑀁 (𑁪-𑁧-𑁯)

𑁩𑁩. 𑀲𑀩𑁆𑀩𑀫𑀺𑀤𑀁 𑀘𑀭𑀺𑀫𑀁 𑀓𑀢𑀁 [𑀘𑀭𑀺𑀫𑀯𑀢𑀁 (𑀲𑀻. 𑀧𑀻.)], 𑀉𑀪𑁄 𑀥𑀫𑁆𑀫𑀁 𑀦 𑀧𑀲𑁆𑀲𑀭𑁂;

𑀉𑀪𑁄 𑀧𑀓𑀢𑀺𑀬𑀸 𑀘𑀼𑀢𑀸, 𑀬𑁄 𑀘𑀸𑀬𑀁 𑀫𑀦𑁆𑀢𑁂𑀚𑁆𑀛𑀸𑀧𑁂𑀢𑀺 [𑀫𑀦𑁆𑀢𑀚𑁆𑀛𑀸𑀬𑀢𑀺 (𑀲𑀻.), 𑀲𑀚𑁆𑀛𑀸𑀧𑀬𑀢𑀺 (𑀧𑀻.)];

𑀬𑁄 𑀘 𑀫𑀦𑁆𑀢𑀁 𑀅𑀥𑀻𑀬𑀢𑀺.

𑁩𑁪. 𑀲𑀸𑀮𑀻𑀦𑀁 𑀑𑀤𑀦𑀁 𑀪𑀼𑀜𑁆𑀚𑁂, 𑀲𑀼𑀘𑀺𑀁 𑀫𑀁𑀲𑀽𑀧𑀲𑁂𑀘𑀦𑀁;

𑀢𑀲𑁆𑀫𑀸 𑀏𑀢𑀁 𑀦 𑀲𑁂𑀯𑀸𑀫𑀺, 𑀥𑀫𑁆𑀫𑀁 𑀇𑀲𑀻𑀳𑀺 𑀲𑁂𑀯𑀺𑀢𑀁.

𑁩𑁫. 𑀧𑀭𑀺𑀩𑁆𑀩𑀚 𑀫𑀳𑀸 𑀮𑁄𑀓𑁄 [𑀫𑀳𑀸𑀩𑁆𑀭𑀳𑁆𑀫𑁂 (𑀓.)], 𑀧𑀘𑀦𑁆𑀢𑀜𑁆𑀜𑁂𑀧𑀺 𑀧𑀸𑀡𑀺𑀦𑁄;

𑀫𑀸 𑀢𑀁 𑀅𑀥𑀫𑁆𑀫𑁄 𑀆𑀘𑀭𑀺𑀢𑁄, 𑀅𑀲𑁆𑀫𑀸 𑀓𑀼𑀫𑁆𑀪𑀫𑀺𑀯𑀸𑀪𑀺𑀤𑀸.

𑁩𑁬. 𑀥𑀺𑀭𑀢𑁆𑀣𑀼 𑀢𑀁 𑀬𑀲𑀮𑀸𑀪𑀁, 𑀥𑀦𑀮𑀸𑀪𑀜𑁆𑀘 𑀩𑁆𑀭𑀸𑀳𑁆𑀫𑀡;

𑀬𑀸 𑀯𑀼𑀢𑁆𑀢𑀺 𑀯𑀺𑀦𑀺𑀧𑀸𑀢𑁂𑀦, 𑀅𑀥𑀫𑁆𑀫𑀘𑀭𑀡𑁂𑀦 𑀯𑀸𑀢𑀺.

𑀙𑀯𑀓𑀚𑀸𑀢𑀓𑀁 𑀦𑀯𑀫𑀁.

𑁩𑁧𑁦. 𑀲𑁂𑀬𑁆𑀬𑀚𑀸𑀢𑀓𑀁 (𑁪-𑁧-𑁧𑁦)

𑁩𑁭. 𑀲𑀲𑀫𑀼𑀤𑁆𑀤𑀧𑀭𑀺𑀬𑀸𑀬𑀁, 𑀫𑀳𑀺𑀁 𑀲𑀸𑀕𑀭𑀓𑀼𑀡𑁆𑀟𑀮𑀁;

𑀦 𑀇𑀘𑁆𑀙𑁂 𑀲𑀳 𑀦𑀺𑀦𑁆𑀤𑀸𑀬, 𑀏𑀯𑀁 𑀲𑁂𑀬𑁆𑀬 [𑀲𑀬𑁆𑀳 (𑀲𑀻. 𑀲𑁆𑀬𑀸. 𑀧𑀻.)] 𑀯𑀺𑀚𑀸𑀦𑀳𑀺.

𑁩𑁮. 𑀥𑀺𑀭𑀢𑁆𑀣𑀼 𑀢𑀁 𑀬𑀲𑀮𑀸𑀪𑀁, 𑀥𑀦𑀮𑀸𑀪𑀜𑁆𑀘 𑀩𑁆𑀭𑀸𑀳𑁆𑀫𑀡;

𑀬𑀸 𑀯𑀼𑀢𑁆𑀢𑀺 𑀯𑀺𑀦𑀺𑀧𑀸𑀢𑁂𑀦, 𑀅𑀥𑀫𑁆𑀫𑀘𑀭𑀡𑁂𑀦 𑀯𑀸.

𑁩𑁯. 𑀅𑀧𑀺 𑀘𑁂 𑀧𑀢𑁆𑀢𑀫𑀸𑀤𑀸𑀬, 𑀅𑀦𑀕𑀸𑀭𑁄 𑀧𑀭𑀺𑀩𑁆𑀩𑀚𑁂;

𑀲𑀸𑀬𑁂𑀯 𑀚𑀻𑀯𑀺𑀓𑀸 𑀲𑁂𑀬𑁆𑀬𑁄, 𑀬𑀸 𑀘𑀸𑀥𑀫𑁆𑀫𑁂𑀦 𑀏𑀲𑀦𑀸.

𑁪𑁦. 𑀅𑀧𑀺 𑀘𑁂 𑀧𑀢𑁆𑀢𑀫𑀸𑀤𑀸𑀬, 𑀅𑀦𑀕𑀸𑀭𑁄 𑀧𑀭𑀺𑀩𑁆𑀩𑀚𑁂;

𑀅𑀜𑁆𑀜𑀁 𑀅𑀳𑀺𑀁𑀲𑀬𑀁 𑀮𑁄𑀓𑁂, 𑀅𑀧𑀺 𑀭𑀚𑁆𑀚𑁂𑀦 𑀢𑀁 𑀯𑀭𑀦𑁆𑀢𑀺.

𑀲𑁂𑀬𑁆𑀬𑀚𑀸𑀢𑀓𑀁 [𑀲𑀬𑁆𑀳𑀚𑀸𑀢𑀓𑀁 (𑀲𑀻. 𑀲𑁆𑀬𑀸. 𑀧𑀻.)] 𑀤𑀲𑀫𑀁.

𑀓𑀸𑀮𑀺𑀗𑁆𑀕𑀯𑀕𑁆𑀕𑁄 [𑀯𑀺𑀯𑀭𑀯𑀕𑁆𑀕𑁄 (𑀲𑀻. 𑀧𑀻.)] 𑀧𑀞𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀯𑀺𑀯𑀭𑀜𑁆𑀘 𑀅𑀤𑁂𑀬𑁆𑀬 𑀲𑀫𑀺𑀤𑁆𑀥𑀯𑀭𑀁, 𑀅𑀣 𑀤𑀤𑁆𑀤𑀭 𑀧𑀸𑀧𑀫𑀳𑀸𑀢𑀺𑀭𑀳𑁄;

𑀅𑀣 𑀓𑁄𑀮𑀺 𑀧𑀮𑀸𑀲𑀯𑀭𑀜𑁆𑀘 𑀓𑀭, 𑀘𑀭𑀺𑀫𑀁 𑀲𑀲𑀫𑀼𑀤𑁆𑀤𑀯𑀭𑁂𑀦 𑀤𑀲𑀸𑀢𑀺.